Adhikarana 1 (1-2) · Śloka 2
athātō yuktasēnīyamadhyāyaṁ vyākhyāsyāmaḥ ||1|| yathōvāca bhagavān dhanvantariḥ ||2||
अथातो युक्तसेनीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
yuktasēnīyamiti yuktā sēnā yasya sa yuktasēnō rājētyarthaḥ; tamadhikr̥tya kr̥tō'dhyāyō yuktasēnīyaḥ||1-2||
Adhikarana 2 (3-4) · Śloka 4
nr̥patēryuktasēnasya parānabhijigīṣataḥ | bhiṣajā rakṣaṇaṁ kāryaṁ yathā tadupadēkṣyatē ||3|| vijigīṣuḥ sahāmātyairyātrāyuktaḥ prayatnataḥ | rakṣitavyō viśēṣēṇa viṣādēva narādhipaḥ ||4||
नृपतेर्युक्तसेनस्य परानभिजिगीषतः | भिषजा रक्षणं कार्यं यथा तदुपदेक्ष्यते ||३|| विजिगीषुः सहामात्यैर्यात्रायुक्तः प्रयत्नतः | रक्षितव्यो विशेषेण विषादेव नराधिपः ||४||
🔊 Audio coming soon
yuktasēnasyēti sajjasēnasya, gajaturagarathapadātilakṣaṇacaturaṅgabalasyētyarthaḥ| anyē yuktasēnasya militasēnasyēti kathayanti| parān śatrūn; abhijigīṣataḥ jētumicchata ityarthaḥ| vijigīṣuḥ jētumicchuḥ| sahāmātyairiti kramāgataiḥ puruṣaiḥ sahētyarthaḥ| yātrāyukta iti dattaprayāṇa ityarthaḥ| rakṣitavya iti sarvēbhya āgantumr̥tyubhyaḥ| viśēṣēṇa atiśayēna| viṣaṁ sthāvaraṁ, jaṅgamaṁ, kr̥trimaṁ ca||3-4||
Adhikarana 3 (5) · Śloka 5
panthānamudakaṁ chāyāṁ bhaktaṁ yavasamindhanam | dūṣayantyarayastacca jānīyācchōdhayēttathā ||5||
पन्थानमुदकं छायां भक्तं यवसमिन्धनम् | दूषयन्त्यरयस्तच्च जानीयाच्छोधयेत्तथा ||५||
🔊 Audio coming soon
viṣaprayōgabhēdaṁ cikitsārthaṁ darśayannāha- panthānamityādi| panthānaṁ mārgaṁ; sa ca viṣēṇa dūṣitō'śvādikhurakṣuṇṇarēṇunā rōmakūpanāsāvivarādiṣu praviśan vikāraṁ janayati| chāyāmiti viṣēṇa vr̥kṣādidūṣaṇācchāyādōṣaḥ, dravyasvabhāvādvā chāyāmapi viṣaṁ dūṣayati; yadvā bhallātakacchāyā tatkṣaṇācchōphakāriṇīti| bhaktam ōdanādikam| yavasaṁ busādi| dūṣayanti vikr̥tiṁ kurvanti| arayaḥ śatravaḥ| taccēti panthādi| jānīyāt ‘liṅgaiḥ kr̥tvā’ iti śēṣaḥ| śōdhayēt cikitsēt|||5||
Adhikarana 4 (6) · Śloka 6
tasya liṅgaṁ cikitsā ca kalpasthānē pravakṣyatē |6|
तस्य लिङ्गं चिकित्सा च कल्पस्थाने प्रवक्ष्यते |६|
🔊 Audio coming soon
kiṁ talliṅgaṁ kā vā cikitsētyāha- tasyētyādi|6|-
Adhikarana 5 (6) · Śloka 7
ēkōttaraṁ mr̥tyuśatamatharvāṇaḥ pracakṣatē ||6|| tatraikaḥ kālasaṁyuktaḥ śēṣā āgantavaḥ smr̥tāḥ |7|
एकोत्तरं मृत्युशतमथर्वाणः प्रचक्षते ||६|| तत्रैकः कालसंयुक्तः शेषा आगन्तवः स्मृताः |७|
🔊 Audio coming soon
nanu yadyakālamr̥tyurasti tadā viṣādibhyō nr̥patirakṣaṇaṁ yuktaṁ, viṣabhakṣakasya liṅgacikitsē ca yuktē, atha nāstyakālamr̥tyustadā kiṁ niṣphalaprayāsēnētyāśaṅkyākālamr̥tyuṁ pramāṇaiḥ sādhayannādāvāgamamēva pramāṇamāha- ēkōttaramityādi| ēkēnādhikaṁ mr̥tyuśatamatharvāṇō'tharvavēdavidaḥ puruṣāḥ, pracakṣatē kathayanti| tatraikaḥ kālasaṁyuktaḥ iti tatra tēṣāṁ mr̥tyūnāṁ madhyē ēkaḥ kālasaṁyuktaḥ kālamr̥tyurityarthaḥ| śēṣā āgantavaḥ smr̥tā iti śēṣā urvaritā āgantavō'pamr̥tyavaḥ smr̥tāḥ kathitāḥ ityarthaḥ| tatra garbhavarṣēṇa sahaikōttaraśatavarṣairēkōttaraśataṁ mr̥tyavaḥ pūryantē; tataḥ śatādarvāgakālamr̥tyavaḥ, śatādanantaraṁ kālamr̥tyuriti kēcinmanyantē| aparē bruvatē- ‘śataśabdō'trāsaṅkhyāvācakaḥ, uttaraśabdastu pradhānavācakaḥ; tēnāsaṅkhyā mr̥tyavaḥ, kāraṇānāmasaṅkhyēyatvāt; ēkaśca mr̥tyuḥ pradhānaṁ, sa ca kālamr̥tyuḥ kathyatē| nanu, yō yasmin kālē mriyatē sa tasya kālamr̥tyurēva, tat kathamakālamr̥tyurityucyatē? tathā cōktaṁ- “nākālē mriyatē kaścinnāsti mr̥tyurakālajaḥ yō yasmin mriyatē kālē mr̥tyukālaḥ sa tasya hi- ” iti| vyāsabhaṭṭārakēṇāyuktaṁ- “nākālē mriyatē kaccidviddhaḥ śaraśatairapi| kālaprāptasya kauntēya! vajrāyantē tr̥ṇānyapi”- iti| naitadasti, upamānādipramāṇairbahudhā''cāryairakālamr̥tyōḥ sthāpitatvāt| tathāca- “yathā varṣamakālē ca yathā puṣpaṁ yathā phalam| yathā syāddīpanirvāṇamakālē maraṇaṁ tathā”- iti| vyāsavacanamapyarjunaprōtsāhakamakālamr̥tyusthāpakaṁ dr̥śyatē; tathāhi- “jalamagnirviṣaṁ śastraṁ striyō rājakulāni ca| akālamr̥tyavō hyētē tēbhyō bibhyati paṇḍitāḥ”- iti| anyairapyuktaṁ;- “kālaḥ surairapi hi vañcayituṁ na śakyō vakṣyē vidhānamapamr̥tyuvināśanāya| mr̥tyurbhavēdyadi kathañcana nāpamr̥tyurvyarthāstadā carakasuśrutavāgbhaṭādyāḥ”- iti| tasmāt kālākālayōrmr̥tyurbhavatyēvēti| aparē, ‘śēṣā āgantavaḥ smr̥tāḥ’ ityasyāgrataḥ, “viṣvagvātādibhiryadvaddīpastailādisaṁyutaḥ| nirvātyatē kṣaṇāddēhī tathaivāgantumr̥tyubhiḥ”- iti ślōkaṁ paṭhanti, vyākhyānayanti ca- viṣvagvātaḥ prabalavātaḥ| ādiśabdēna śalabhādinipātaḥ kathyatē||6||-
Adhikarana 6 (7) · Śloka 8
dōṣāgantujamr̥tyubhyō rasamantraviśāradau ||7|| rakṣētāṁ nr̥patiṁ nityaṁ yattau vaidyapurōhitau |8|
दोषागन्तुजमृत्युभ्यो रसमन्त्रविशारदौ ||७|| रक्षेतां नृपतिं नित्यं यत्तौ वैद्यपुरोहितौ |८|
🔊 Audio coming soon
atharvavēdō'kālāmr̥tyupraśamanahētuḥ, tadaṅgāni ca vaidyapurōhitau paṭhataḥ, atastayō rājarakṣaṇē vyāpāraṁ darśayannāha- dōṣētyādi| dōṣāḥ vātādayaḥ, āgantavō viṣābhighātādayaḥ| rasamantraviśāradāviti yathāsaṅkhyēna rasaviśāradō vaidyaḥ, mantraviśāradaḥ purōdhāḥ| tatra kēcit ‘rasaviśārada’ ityatrādiśabdalōpādrasavīryavipākaviśāradaḥ; athavā rasaśabdēna rasavanti dravyāṇi kathyantē, tēṣāṁ viśāradaḥ, athavā rasaśabdō'tra viṣavācakaḥ tadviśārada iti kathayanti| viśāradaḥ paṇḍitaḥ| mantrāṇāmr̥gyajuḥsāmōktānāmatharvavēdōktānāṁ cētyarthaḥ| yattau yatnaparau||7||
Adhikarana 7 (8) · Śloka 9
brahmā vēdāṅgamaṣṭāṅgamāyurvēdamabhāṣata ||8|| purōhitamatē tasmādvartēta bhiṣagātmavān |9|
ब्रह्मा वेदाङ्गमष्टाङ्गमायुर्वेदमभाषत ||८|| पुरोहितमते तस्माद्वर्तेत भिषगात्मवान् |९|
🔊 Audio coming soon
purōhitō vēdānadhītē, vaidyastu tadaṅgamāyurvēdamiti vaidyāt purōdhasaḥ prādhānyaṁ darśayannāha- brahmētyādi| brahmā āyurvēdamabhāṣata, kiṁviśiṣṭam? aṣṭāṅgaṁ; punaḥ kiṁviśiṣṭaṁ? vēdāṅgam| vartēta vyavaharēdityarthaḥ| ātmavān buddhimān||8||-
Adhikarana 8 (9) · Śloka 10
saṅkaraḥ sarvavarṇānāṁ praṇāśō dharmakarmaṇām ||9|| prajānāmapi cōcchittirnr̥pavyasanahētutaḥ |10|
सङ्करः सर्ववर्णानां प्रणाशो धर्मकर्मणाम् ||९|| प्रजानामपि चोच्छित्तिर्नृपव्यसनहेतुतः |१०|
🔊 Audio coming soon
sarvaprajānāṁ rājāyattā sthitiriti rājarakṣaṇaṁ yatnēna kāryamiti darśayannāha- saṅkara ityādi|| saṅkaraḥ ēkatvaṁ brāhmaṇāśūdrādīnāṁ varṇānāṁ daṇḍābhāvēnācāralōpāt| dharmakarmaṇāmiti varṇānāmēva dharmasya karmaṇāmanyēṣāmapi| anyē tu ‘dharmikarmaṇām’ iti paṭhanti, tatra dharmayōgādāśramāścatvārō dharmiṇaḥ, brahmacārigr̥hasthavānaprasthayatayaścatvāra āśramāḥ, tatkarmaṇāṁ prāṇāśaḥ| prajānāmucchittiriti daṇḍābhāvēna kr̥ṣipāśupālyavāṇijyarājōpasēvānāmabhāvāducchittirucchēdō bhavatītyarthaḥ| nr̥pavyasanahētuta iti varṇasaṅkarādayō'narthā rājavyasanāt kāraṇādbhavanti, tasmādrājā yatnēna rakṣaṇīya ityarthaḥ| anyē ‘nr̥pavyasanahētukā’ iti paṭhanti; tatra ucchittiriti sambadhyatē||9||-
Adhikarana 9 (10-11) · Śloka 12
puruṣāṇāṁ nr̥pāṇāṁ ca kēvalaṁ tulyamūrtitā ||10|| ājñā tyāgaḥ kṣamā dhairyaṁ vikramaścāpyamānuṣaḥ | tasmāddēvamivābhīkṣṇaṁ vāṅmanaḥkarmabhiḥ śubhaiḥ ||11|| cintayēnnr̥patiṁ vaidyaḥ śrēyāṁsīcchan vicakṣaṇaḥ |12|
पुरुषाणां नृपाणां च केवलं तुल्यमूर्तिता ||१०|| आज्ञा त्यागः क्षमा धैर्यं विक्रमश्चाप्यमानुषः | तस्माद्देवमिवाभीक्ष्णं वाङ्मनःकर्मभिः शुभैः ||११|| चिन्तयेन्नृपतिं वैद्यः श्रेयांसीच्छन् विचक्षणः |१२|
🔊 Audio coming soon
rājñō manujatvē samānē'pyamānuṣānuvartibhirguṇērdēvatvaṁ sādhayannāha- puruṣāṇāmityādi| kēvalaṁ niścitaṁ, mūrtirākr̥tiḥ; ājñā anullaṅghanīya ādēśaḥ, tyāgaḥ kīrtidharmārthaṁ bahuprakārō vittavisargaḥ, kṣāmā sarvaṁsahatā, dhairyaṁ vyasanēṣu dhīratā, vikramaḥ parākramaḥ, amānuṣaḥ ēṣa guṇasamūhō mānuṣēṣu na sambhavatītyarthaḥ| tasmādityādi|- abhīkṣṇamanavarataṁ, tasmāt kāraṇāddēvamiva nr̥patiṁ vaidyaścintayēditi sambandhaḥ| kaiḥ kr̥tvā cintayēdityāha- vāṅmanaḥ karmabhiḥ śubhairiti|- śubhaiḥ śōbhanairityarthaḥ||10-11||
Adhikarana 10 (12-14) · Śloka 15
skandhāvārē ca mahati rājagēhādanantaram ||12|| bhavētsannihitō vaidyaḥ sarvōpakaraṇānvitaḥ | tatrasthamēnaṁ dhvajavadyaśaḥkhyātisamucchritam ||13|| upasarpantyamōhēna viṣaśalyāmayārditāḥ | svatantrakuśalō'nyēṣu śāstrārthēṣvabahiṣkr̥taḥ ||14|| vaidyō dhvaja ivābhāti nr̥patadvidyapūjitaḥ |15|
स्कन्धावारे च महति राजगेहादनन्तरम् ||१२|| भवेत्सन्निहितो वैद्यः सर्वोपकरणान्वितः | तत्रस्थमेनं ध्वजवद्यशःख्यातिसमुच्छ्रितम् ||१३|| उपसर्पन्त्यमोहेन विषशल्यामयार्दिताः | स्वतन्त्रकुशलोऽन्येषु शास्त्रार्थेष्वबहिष्कृतः ||१४|| वैद्यो ध्वज इवाभाति नृपतद्विद्यपूजितः |१५|
🔊 Audio coming soon
vaidyasya santatōpayōgitvāducitapradēśavāsaṁ nirdiśannāha- skandhāvāra ityādi| skandhāvārē kaṭakē| mahati gurutarē| anantaramiti avyavadhānē antarāyavarjitē| sarvōpakaraṇānvita iti yantraśastrakṣārauṣadhāgadādiyuktaḥ| tatrētyādi|- tatrasthaṁ rājagr̥hasamipastham| ēnamiti vaidham| dhvajavat patākāvat| nirmalaguṇakīrtanaṁ yaśaḥ, khyātiḥ svābhāvikī stutiḥ, samucchritaṁ vr̥ddhiṅgatam| upasarpanti samīpaṁ gacchanti| amōhēna niścintamanasā| viṣaśalyāmayārditā iti arditāḥ pīḍitāḥ; tēna viṣārditāḥ śalyārditā āmayārditāścētyarthaḥ| vaidyaṁ bahuśrutaṁ stuvannāha- svatantrētyādi| kuśalaḥ pravīṇaḥ| abahiṣkr̥ta iti nātyantamakuśalaḥ| nr̥patadvidyapūjita iti nr̥paistadvidyaiśca pūjitaḥ sammānitaḥ, tadvidyaiḥ vaidyairityarthaḥ||12-14||-
Adhikarana 11 (15-16) · Śloka 17
vaidyō vyādhyupasr̥ṣṭaśca bhēṣajaṁ paricārakaḥ ||15|| ētē pādāścikitsāyāḥ karmasādhanahētavaḥ | guṇavadbhistribhiḥ pādaiścaturthō guṇavān bhiṣak ||16|| vyādhimalpēna kālēna mahāntamapi sādhayēt |17|
वैद्यो व्याध्युपसृष्टश्च भेषजं परिचारकः ||१५|| एते पादाश्चिकित्सायाः कर्मसाधनहेतवः | गुणवद्भिस्त्रिभिः पादैश्चतुर्थो गुणवान् भिषक् ||१६|| व्याधिमल्पेन कालेन महान्तमपि साधयेत् |१७|
🔊 Audio coming soon
pādacatuṣṭayaṁ cikitsāsādhakaṁ darśayannāha- vaidya ityādi| vyādhyupasr̥ṣṭō rōgī; paricārakaḥ śuśrūṣakaḥ puruṣaḥ| karmasādhanahētava iti ārōgyahētava ityarthaḥ||15-16||-
Adhikarana 12 (17) · Śloka 18
vaidyahīnāstrayaḥ pādā guṇavantō'pyapārthakāḥ ||17|| udgātr̥hōtr̥brahmāṇō yathā'dhvaryuṁ vinā'dhvarē |18|
वैद्यहीनास्त्रयः पादा गुणवन्तोऽप्यपार्थकाः ||१७|| उद्गातृहोतृब्रह्माणो यथाऽध्वर्युं विनाऽध्वरे |१८|
🔊 Audio coming soon
vaidyasya prādhānyaṁ darśayannāha- vaidyētyādi| apārthakā niṣphalāḥ| udgātā sāmāvit, hōtā r̥gvēdavit, brahmā tu trayīvit, adhvaryuryarvēdavidupādhyāyaḥ sarvēṣāmupadēṣṭā| adhvarē yajñē||17||
Adhikarana 13 (18) · Śloka 19
vaidyastu guṇavānēkastārayēdāturāṁ sadā ||18|| plavaṁ pratitarairhīnaṁ karṇadhāra ivāmbhasi |19|
वैद्यस्तु गुणवानेकस्तारयेदातुरां सदा ||१८|| प्लवं प्रतितरैर्हीनं कर्णधार इवाम्भसि |१९|
🔊 Audio coming soon
pādatrayavyatirēkē'pi vaidyakriyāyāḥ sāphalyaṁ darśayannāha- vaidyastvityādi| plavaṁ nāvaṁ, pratitarairantaḥpraviṣṭajalōtkṣēpakaiḥ puruṣaiḥ| karṇadhārō naukāyā nētā||18||
Adhikarana 14 (19-20) · Śloka 21
tattvādhigataśāstrārthō dr̥ṣṭakarmā svayaṅkr̥tī ||19|| laghuhastaḥ śuciḥ śūraḥ sajjōpaskarabhēṣajaḥ | pratyutpannamatirdhīmān vyavasāyī viśāradaḥ ||20|| satyadharmaparō yaśca sa bhiṣak pāda ucyatē |21|
तत्त्वाधिगतशास्त्रार्थो दृष्टकर्मा स्वयङ्कृती ||१९|| लघुहस्तः शुचिः शूरः सज्जोपस्करभेषजः | प्रत्युत्पन्नमतिर्धीमान् व्यवसायी विशारदः ||२०|| सत्यधर्मपरो यश्च स भिषक् पाद उच्यते |२१|
🔊 Audio coming soon
vaidyādīnāṁ guṇānāha- tattvētyādi| tattvādhigataśāstrārtha iti yathāvadadhītaśāstrō yathāvajjñātatadarthaścētyarthaḥ| dr̥ṣṭakarmēti chēdyādau snēhādau ca kuśala ityarthaḥ| svayaṅkr̥tī svaprajñayā cikitsāyāṁ pravr̥ttaḥ| laghuhasta iti chēdyādikriyāsu vēpanādidōṣarahitaḥ| śuciriti bāhyābhyantaraśaucayuktaḥ| śūrō viṣādarahitaḥ| sajjōpaskarabhēṣaja iti sajjāni praguṇānyupastarāṇyagrōpaharaṇīyapaṭhitāni yantraśastrādīni bhēṣajāni ca yasya sa tathā| pratyutpannamatiḥ yō'vasthāsu na muhyati| dhīmāniti anuktaduruktōhāpōhalakṣaṇabuddhiyuktaḥ| vyavasāyī viṣamāvasthāsvapi cikitsāṁ kurvanna muhyati; anyē utsāhīti manyantē| viśāradaḥ paṇḍitaḥ, kr̥cchrapadamātrēṣu na muhyati| satyadharmapara iti satyaṁ mithyābhāṣaṇanivr̥ttiḥ; dharmaḥ anēkasādhanasādhyaḥ||19-20||
Adhikarana 15 (21) · Śloka 22
āyuṣmān sattvavān sādhyō dravyavānātmavānapi ||21|| āstikō vaidyavākyasthō vyādhitaḥ pāda ucyatē |22|
आयुष्मान् सत्त्ववान् साध्यो द्रव्यवानात्मवानपि ||२१|| आस्तिको वैद्यवाक्यस्थो व्याधितः पाद उच्यते |२२|
🔊 Audio coming soon
āyuṣmānityādi|- āyuṣmān dīrghāyuḥ| sattvavān klēśasahiṣṇuḥ| sādhyaḥ sādhyavyādhiyukta ityarthaḥ| ātmavān alōlupaḥ| āstika iti dattamasti hutamasti paralōkō'styēvaṁ matiryasya sa āstikaḥ| vaidyavākyasthō vaidyavacanakara ityarthaḥ||21||-
Adhikarana 16 (22-23) · Śloka 23
praśastadēśasambhūtaṁ praśastē'hani cōddhr̥tam ||22|| yuktamātraṁ manaskāntaṁ gandhavarṇarasānvitam | dōṣaghnamaglānikaramavikāri viparyayē | samīkṣya dattaṁ kālē ca bhēṣajaṁ pāda ucyatē ||23||
प्रशस्तदेशसम्भूतं प्रशस्तेऽहनि चोद्धृतम् ||२२|| युक्तमात्रं मनस्कान्तं गन्धवर्णरसान्वितम् | दोषघ्नमग्लानिकरमविकारि विपर्यये | समीक्ष्य दत्तं काले च भेषजं पाद उच्यते ||२३||
🔊 Audio coming soon
praśastadēśasambhūtamityādi|- yuktamātraṁ yuktapramāṇam| manaskāntaṁ manaḥpriyam| dōṣaghnamiti dōṣaśabdēna vātādaya ucyantē taddūṣitā dhātumalāśca, athavā dōṣaharaṁ duṣṭiṁ haratyaduṣṭaṁ na ca kōpayati| aglānikaraṁ harṣakṣayaṁ na karōtītyarthaḥ| avikāri viparyaya iti viparyayē vyāpattāvapyalpavikāraṁ nirvikāraṁ vā| samīkṣya dattamiti kimabhisamīkṣya? āturōpakramōktān parīkṣyānāyurādīn dēśāntān, kālāvasthāḥ pūrvāhṇādikā vā||22-23||
Adhikarana 17 (24) · Śloka 24
snigdhō'jugupsurbalavān yuktō vyādhitarakṣaṇē | vaidyavākyakr̥daśrāntaḥ pādaḥ paricaraḥ smr̥taḥ ||24||
स्निग्धोऽजुगुप्सुर्बलवान् युक्तो व्याधितरक्षणे | वैद्यवाक्यकृदश्रान्तः पादः परिचरः स्मृतः ||२४||
🔊 Audio coming soon
snigdha itādi| snigdhaḥ prītiyuktaḥ| ajugupsuriti anindakaḥ; ētēna kaṣṭavyādhāvavasthāsvapyāturaṁ na nindatītyarthaḥ| balavāniti balavattvāt sarvaklēśasahaḥ| yuktō vyādhitarakṣaṇa iti yuktō nipuṇaḥ, ētēna vyādhitasya rakṣaṇē tatpara ityarthaḥ| vaidyavākyakr̥diti vaidyavākyamavikalpaṁ karōtītyarthaḥ| aśrāntaḥ iti khadērahitaḥ| ‘pādaiścaturbhiḥ sampūrṇairēbhiḥ karma prasidhyati’ iti kēcidadhyāyāntē paṭhanti| ētacca na paṭhanīyaṁ, sarvēṣu nibandhēṣvadarśanāt||24||
Adhikarana puShpikA · Śloka 34
iti suśrutasaṁhitāyāṁ sūtrasthānē yuktasēnīyō nāma catustriṁśattamō'dhyāyaḥ ||34||
इति सुश्रुतसंहितायां सूत्रस्थाने युक्तसेनीयो नाम चतुस्त्रिंशत्तमोऽध्यायः ||३४||
🔊 Audio coming soon
iti śrīḍalha(hṇa)ṇaviracitāyāṁ nibandhasaṅgrahākhyāyāṁ suśrutavyākhyāyāṁ sūtrasthānē catustriṁśattamō'dhyāyaḥ||34||