60. amānuṣōpasargapratiṣēdhādhyāyaḥ

Adhikarana 1 (1-2) · Śloka 2

অথাতোঽমানুষোপসর্গপ্রতিষেধমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

কাযচিকিত্সাপারিশেষ্যাত্ ভূতবিদ্যামারব্ধুকাম আদৌ মূত্রকৃচ্ছ্রানন্তরং মূত্রকৃচ্ছ্রে প্রতিক্ষণমল্পাল্পং মেহতোঽসম্যগাচমনেনাশৌচাদমানুষোপসর্গসম্ভাবনাযামমানুষজন্যব্যাধিপ্রতিষেধারম্ভো যুক্ত ইত্যত আহ- অথাত ইত্যাদি| অথেতি কাযচিকিত্সানন্তরম্| অত ইতি হেতৌ| হেতুশ্চপাতনিকাযামেব প্রকটীকৃতঃ| অমানুষা দেবাদিগ্রহাঃ, তেষামুপসর্গ উপদ্রবঃ, তস্য প্রতিষেধঃ চিকিত্সিতং, তদ্বিবিধপ্রকারমাভিমুখ্যেন শিষ্যাণাং ব্যাখ্যাস্যামঃ| অন্যে তু ‘অমানুষোপসর্গ’ ইত্যত্র ‘অমানুষাবাধ’ ইতি পঠন্তি; অমানুষাণি ভূতানি, তেষামাবাধা পীডেতি ব্যাখ্যানযন্তি||১-২||

Adhikarana 2 (3) · Śloka 3

নিশাচরেভ্যো রক্ষ্যস্তু নিত্যমেব ক্ষতাতুরঃ | ইতি যত্ প্রাগভিহিতং বিস্তরস্তস্য বক্ষ্যতে ||৩||

নিশাচরেভ্য ইত্যাদি| অত্র নিশাচরা দেবাদিগ্রহা উচ্যন্তে, নিশাবিহারিত্বাদসৃগাদিভোজনত্বাচ্চ; যদ্ব্রণিতোপাসনীযে ‘রক্ষাংসি’ ইত্যুক্তং তদ্রক্ষসাং বিশেষেণ তথাস্বরূপখ্যাপনায| প্রাগিতি দ্বিব্রণীযে| অন্যে তু নিশাচরশব্দেন রাক্ষসানেবাহুঃ||৩||

Adhikarana 3 (4) · Śloka 4

গুহ্যানাগতবিজ্ঞানমনবস্থাঽসহিষ্ণুতা | ক্রিযা বাঽমানুষী যস্মিন্ সগ্রহঃ পরিকীর্ত্যতে ||৪||

ইদানীং সামান্যগ্রহলক্ষণমাহ- গুহ্যেত্যাদি| গুহ্যাং গুপ্তম্, অনাগতং ভাবি, তযোর্বিজ্ঞানম্| অনবস্থা অনবস্থিতিঃ| অসহিষ্ণুতা ক্রোধনত্বম্| অমানুষী ক্রিযা বরদানাদিকা, লঙ্গনপ্লবনাদিকেত্যন্যে, অমানুষী যা মানুষৈঃ কর্তুং ন শক্যতে| যস্মিন্ আতুরে| সগ্রহো গ্রহসহিতঃ||৪||

Adhikarana 4 (5) · Śloka 5

অশুচিং ভিন্নমর্যাদং ক্ষতং ব যদি বাঽক্ষতম্ | হিংস্যুর্হিংসাবিহারার্থং সত্কারার্থমথাপি বা ||৫||

যাদৃশং ভূতানি হিংসন্তি, যাদৃশং বা জিঘৃক্ষন্তি, তমাহ- অশুচিমিত্যাদি| ভিন্নমর্যাদং ত্যক্তোচিতক্রমম্, অভক্ষ্যভক্ষণে অগম্যাগমনে তথা হিংসাদৌ চ প্রবৃত্তত্বাত্; ক্ষতং ব্রণিতম্, অক্ষতং ব্রণরহিতমপি শৌচাদিহীনং হিংস্যুঃ| হিংসাবিহারো বধক্রীডা, তদর্থং; সত্কারার্থং পূজার্থং; অন্যে বিহারশব্দেন রতিং মন্যন্তে, তত্র হিংসাযাং যা রতিস্তদর্থম্||৫||

Adhikarana 5 (6) · Śloka 6

অসঙ্খ্যেযা গ্রহগণা গ্রহাধিপতযস্তু যে | ব্যজ্যন্তে বিবিধাকারা ভিদ্যন্তে তে তথাঽষ্টধা ||৬||

গ্রহাণামসঙ্খ্যেযত্বং গ্রহাধিপানাং চাষ্টত্বং দর্শযন্নাহ- অসঙ্খ্যেযা ইত্যাদি| গ্রহাধিপতযো দেবদৈত্যাদযঃ| তুশব্দঃ পুনরর্থে| ব্যজ্যন্তে পৃথক্ প্রতীযন্তে| বিবিধাকারা বিবিধলক্ষণাঃ| তে পুনরষ্টধা ভিদ্যন্তে| অন্যে তু ‘গ্রহাধিপতিভিস্তু তে| ব্যঞ্জনৈঃ’ ইতি পঠিত্বা ব্যাখ্যানযন্তি- তে গ্রহগণা যদ্যপ্যসঙ্খ্যেযাস্তথাঽপি গ্রহাধিপতিভিঃ স্বস্বামিভিঃ কৃত্বা অষ্টধা ভিদ্যন্তে অষ্টভেদভিন্না ভবন্তীত্যর্থঃ; কিংবিশিষ্টাস্তে? ব্যঞ্জনৈর্বিবিধাকারা বিলক্ষণাঃ||৬||

Adhikarana 6 (7) · Śloka 7

দেবাস্তথা শত্রুগণাশ্চ তেষাং গন্ধর্বযক্ষাঃ পিতরো ভুজঙ্গাঃ | রক্ষাংসি যা চাপি পিশাচজাতিরেষোঽষ্টকো দেবগণো গ্রহাখ্যঃ ||৭||

তেষামষ্টবিধত্বমাহ- দেবতাস্তথেত্যাদি| দীব্যন্তীতি দেবাঃ| তেষাং দেবানাং শত্রুগণা দৈত্যসমূহাঃ| গন্ধর্বা দেবগাযনা হাহাহূহূপ্রভৃতযঃ| যক্ষাঃ কুবেরাদযঃ | পিতরঃ অগ্নিষ্বাত্তাদযঃ| ভুজঙ্গা বাসুকিপ্রভৃতযঃ| রক্ষাংসি মনুষ্যভক্ষণকারীণি হেতিপ্রহেতিকুলজাতানি| পিশাচাঃ পিশিতাশানাঃ, তেষাং জাতিঃ||৭||

Adhikarana 7 (8) · Śloka 8

সন্তুষ্টঃ শুচিরপি চেষ্টগন্ধমাল্যো নিস্তন্দ্রী হ্যবিতথসংস্কৃতপ্রভাষী | তেজস্বী স্থিরনযনো বরপ্রদাতা ব্রহ্যণ্যো ভবতি নরঃ স দেবজুষ্টঃ ||৮||

দেবাদিগ্রহগৃহীতানাং প্রত্যেকং লক্ষণমাহ- সন্তুষ্ট ইত্যাদি| শুচিঃ শৌচযুক্তঃ| ইষ্টানি অভিলষিতানি গন্ধমাল্যানি যস্য সঃ; গন্ধাঃ কুঙ্কুমচন্দনাদিকাঃ, মাল্যানি পুষ্পাণি| ‘শুচিরপি চেষ্টমাল্যগন্ধ’ ইত্যত্রান্যে ‘শুচিরহতেষ্টগন্ধমাল্য’ ইতি পঠন্তি, অনুপহতগন্ধমাল্য ইতি ব্যাখ্যানযন্তি| অবিতথসংস্কৃতপ্রভাষী অবিতথপ্রভাষী সংস্কৃতপ্রভাষী চ, অবিতথং যথার্থম্ স্থিরনযনো নিমেষরহিতঃ||৮||

Adhikarana 8 (9) · Śloka 9

সংস্বেদী দ্বিজগুরুদেবদোষবক্তা জিহ্মাক্ষো বিগতভযো বিমার্গদৃষ্টিঃ | সন্তুষ্টো ভবতি ন চান্নপানজাতৈর্দুষ্টাত্মা ভবতি চ দেবশত্রুজুষ্টঃ ||৯||

সংস্বেদীত্যাদি| সংস্বেদী প্রস্বেদযুক্তঃ| জিহ্মাক্ষো বক্রলোচনঃ| বিমার্গদৃষ্টিঃ বিমার্গদর্শনঃ, নাস্তিক ইত্যর্থঃ| অন্নং ভক্তাদি, পানং জলাদি, তেষাং জাতৈঃ সমূহৈঃ| দুষ্টাত্মা দুষ্টস্বভাবঃ| দেবশত্রুজুষ্টো দৈত্যগ্রহজুষ্ট ইত্যর্থঃ||৯||

Adhikarana 9 (10) · Śloka 10

হৃষ্টাত্মা পুলিনবনান্তরোপসেবী স্বাচারঃ প্রিযপরিগীতগন্ধমাল্যঃ | নৃত্যন্ বৈ প্রহসতি চারু চাল্পশব্দং গন্ধর্বগ্রহপরিপীডিতো মনুষ্যঃ ||১০||

হৃষ্টাত্মেত্যাদি| হৃষ্টাত্মা হর্ষযুক্তঃ| পুলিনবনান্তরোপসেবী পুলিনবনমধ্যে ক্রীডনশীলঃ; পুলিনং জলমধ্যোত্থিতভূতপ্রদেশঃ| স্বাচারঃ শোভনাচারঃ| প্রিযাণি পরিগীতগন্ধমাল্যানি যস্য স তথা| চারু যথা ভবতি এবং নৃত্যম্ অল্পশব্দং যথা তথা প্রহসতি ঈষদ্ধসতীত্যর্থঃ| এবম্ভূতো মনুষ্যো গন্ধর্বগ্রজুষ্টো জ্ঞেযঃ||১০||

Adhikarana 10 (11) · Śloka 11

তাম্রাক্ষঃ প্রিযতনুরক্তবস্ত্রধারী গম্ভীরো দ্রুতমতিরল্পবাক্ সহিষ্ণুঃ | তেজস্বী বদতি চ কিং দদামি কস্মৈ যো যক্ষগ্রহপরিপীডিতো মনুষ্যঃ ||১১||

তাম্রাক্ষ ইত্যাদি| তাম্রাক্ষো রক্তনেত্রঃ| প্রিযতনুরক্তবস্ত্রধারী কমনীযসূক্ষ্মরক্তবস্ত্রপরিধানশীলঃ| গম্ভীরো গম্ভীরশীলঃ, প্রচুরসত্ত্ব ইত্যর্থঃ দ্রুতমতিঃ উদ্ভান্তমনাঃ, অল্পবাক্ অল্পবক্তা, সহিষ্ণুঃ ক্ষমাযুক্তঃ||১১||

Adhikarana 11 (12) · Śloka 12

প্রেতেভ্যো বিসৃজতি সংস্তরেষু পিণ্ডান্ শান্তাত্মা জলমপি চাপসব্যবস্ত্রঃ | মাংসেপ্সুস্তিলগুডপাযসাভিকামস্তদ্ভুক্তো ভবতি পিতৃগ্রহাভিভূতঃ ||১২||

প্রেতেভ্য ইত্যাদি| প্রেতেভ্যো মৃতেভ্যঃ, বিসৃজতি দদাতি, সংস্তরেষু দর্ভসংস্তরেষু, পিণ্ডান্ অন্নমযান্, শান্তাত্মা শান্তস্বভাবঃ| জলমপি চেতি ন পরং দর্ভসংস্তরেষু পিণ্ডান্ দদাতি অপি তু অপসব্যহস্তো দক্ষিণহস্তো জলমপি দদাতি চেত্যর্থঃ| পাযসঃ ক্ষীরসিদ্ধাঃ তণ্ডুলাঃ| অভিকামঃ অভিলাষুকঃ| তদ্ভুক্তঃ তিলাদিভোজনঃ||১২||

Adhikarana 12 (13) · Śloka 13

ভূমৌ যঃ প্রসরতি সর্পবত্ কদাচিত্ সৃক্কিণ্যৌ বিলিখতি জিহ্বযা তথৈব | নিদ্রালুর্গডমধুদুগ্ধপাযসেপ্সুর্বিজ্ঞেযো ভবতি ভুজঙ্গমেন জুষ্টঃ ||১৩||

য ইত্যাদি| যো ভূমৌ সর্পবত্ প্রসরতি উরসা ভ্রমতি স ভুজঙ্গমেন জুষ্ট ইতি সম্বন্ধঃ| সৃক্কিণ্যৌ ওষ্ঠপ্রান্তৌ| বিলিখতি বিলেঢি, ধাতুনামনেকার্থকত্বাত্| তথৈবেতি সর্পবত্| অন্যে তু ‘তথৈব’ ইত্যত্র ‘প্রসক্তং’ ইতি পঠন্তি, তত্র প্রসক্তং সন্ততং বিলেঢীত্যর্থঃ||১৩||

Adhikarana 13 (14) · Śloka 14

মাংসাসৃগ্বিবিধসুরাবিকারলিপ্সুর্নির্লজ্জো ভৃশমতিনিষ্ঠুরোঽতিশূরঃ | ক্রোধালুর্বিপুলবলো নিশাবিহারী শৌচদ্বিড্ ভবতি চ রক্ষসা গৃহীতঃ ||১৪||

মাংসাসৃগিত্যাদি| বিবিধাঃ সুরাবিকারা মাধ্বীকাদযঃ| লিপ্সুঃ আস্বাদযিতুমিচ্ছুঃ| শৌচদ্বিট্ শৌচং দ্বেষ্টি অশুচিরিত্যর্থঃ|||১৪||

Adhikarana 14 (15) · Śloka 15

উদ্ধস্তঃ কৃশপরুষশ্চিরপ্রলাপী দুর্গন্ধো ভৃশমশুচিস্তথাঽতিলোলঃ | বহ্বাশী বিজনহিমাম্বুরাত্রিসেবী ব্যাবিগ্নো ভ্রমতি রুদন্ পিশাচজুষ্টঃ ||১৫||

উদ্ধস্ত ইত্যাদি| উদ্ধস্তো বিকৃতদর্শনঃ| কৃশো দুর্বলঃ| পরুষঃ কর্কশঃ| চিরপ্রলাপী চিরকালং বহুক্ষণং ব্যাপ্য প্রলাপী| অতিলোলঃ অতিচপলঃ| অন্যে তু ‘অতিলোলুঃ’ ইতি পঠিত্বা অশনলোলুপ ইতি ব্যাখ্যানযন্তি, যথা- ভীমো ভীমসেন ইতি| বহ্বাশী প্রচুরভোক্তা| বিজনং নির্জনস্থানং, হিমাম্বুসেবী শীতাম্বুসেবী, রাত্রিসেবী রাত্রিবিহারীত্যর্থঃ| ব্যাবিগ্ন উদ্বিগ্নঃ| অন্যে ত্বত্র ‘ব্যাচেষ্টং’ ইতি পঠন্তি, বিরুদ্ধচেষ্টং যথা ভবতি তথা ভ্রমতীত্যেবং ব্যাখ্যানযন্তি||১৫||

Adhikarana 15 (16) · Śloka 16

স্থূলাক্ষস্ত্বরিতগতিঃ স্বফেনলেহী নিদ্রালুঃ পততি চ কম্পতে চ যোঽতি | যশ্চাদ্রিদ্বিরদনগাদিবিচ্যুতঃ সন্ সংসৃষ্টো ন ভবতি বার্ধকেন জুষ্টঃ ||১৬||

অসাধ্যলক্ষণমাহ- স্থূলাক্ষ ইত্যাদি| স্বফেনলেহীতি এতেনাস্য মুখে ফেনাগমনমপ্যুক্তম্| যো গ্রহেণ সংসৃষ্টঃ স্থূলাক্ষ ইত্যাদিলক্ষণযুক্তঃ স্যাত্ স ন ভবতি বিনশ্যতীত্যর্থঃ| যশ্চ অদ্র্যাদের্বিচ্যুতঃ পতিতঃ সন্ গ্রহেণ সংসৃজ্যতে সোঽপি বিনশ্যতি| অদ্রিঃ পর্বতঃ, দ্বিরদো হস্তী, নগো বৃক্ষঃ, আদিশব্দাত্ শ্বভ্রনদীতটাদযঃ| বার্ধকেন জুষ্টঃ বৃদ্ধভাবেন গৃহীত ইত্যর্থঃ; অন্যে ‘বর্ধকেন’ ইতি পঠন্তি, বর্ধকেন ছেদকেন হিংসার্থিনা কেনচিদ্গ্রহেণ জুষ্টো গৃহীত ইতি ব্যাখ্যানযন্তি||১৬||

Adhikarana 16 (17-18) · Śloka 18

দেবগ্রহাঃ পৌর্ণমাস্যামসুরাঃ সন্ধ্যযোরপি | গন্ধর্বাঃ প্রাযশোঽষ্টম্যাং যক্ষাশ্চ প্রতিপদ্যথ ||১৭|| কৃষ্ণক্ষযে চ পিতরঃ পঞ্চম্যামপি চোরগাঃ | রক্ষাংসি নিশি পৈশাচাশ্চতুর্দশ্যাং বিশন্তি চ ||১৮||

ইদানীং দেবাদিগ্রহাণাং গ্রহণকালমাহ- দেবগ্রহা ইত্যাদি| অসুরা অসুরগ্রহাঃ| সন্ধ্যযোরপীত্যত্র অপিশব্দঃ পাদপূরণে| প্রাযোশোঽষ্টম্যামিতি প্রাযঃশব্দাত্ সন্ধযযোরপি গন্ধর্বা বিশন্তীতি লভ্যতে| পিতরঃ পিতৃগ্রহাঃ| কৃষ্ণক্ষযে কৃষ্ণপক্ষক্ষযে, অমাবস্যাযামিত্যর্থঃ| পঞ্চম্যামপীতি অপিশব্দাত্ কৃষ্ণপক্ষক্ষযেঽপি| উরগা নাগগ্রহাঃ||১৭-১৮||

Adhikarana 17 (19) · Śloka 19

দর্পণাদীন্ যথা ছাযা শীতোষ্ণং প্রাণিনো যথা | স্বমণিং ভাস্করস্যোস্রা যথা দেহং চ দেহধৃক্ | বিশন্তি চ ন দৃশ্যন্তে গ্রহাস্তদ্বচ্ছরীরিণম্ ||১৯||

ননু, দেহং বিশন্তো গ্রাহাঃ কুতো ন লক্ষ্যন্ত ইত্যাহ- দর্পণাদীনিত্যাদি| দর্পণ আদর্শঃ, আদিশব্দাত্ জলস্নেহখঙ্গাদিগ্রহণম্| স্বমণিং সূর্যকান্তং, ভাস্করযোস্রাঃ সূর্যরশ্মযঃ| দেহং গর্ভশরীরং, দেহধৃক্ জীবঃ, অন্যে দেহধৃক্শব্দেন মনঃ প্রতিপাদযন্তি| ননু, ভূতৈঃ শরীরেঽনুপ্রবেশঃ ক্রিযতে ন তু শরীরিণি, তত্ কথং শরীরিণমিতি? উচ্যতে- অত্র শরীরিশব্দেন শরীরমভিপ্রেতং, স্থানিনি স্থানোপচারাত্| যথা ছাযাশীতোষ্ণাদযো দর্পণপ্রাণিপ্রভৃতীন্ বিশন্তো ন দৃশ্যন্তে তদ্বদ্গ্রহা অপীত্যর্থঃ| অত্র ছাযাদিদৃষ্টান্তচতুষ্টযেন আদ্যৈর্হেতুভিঃ শরীরং ক্ষোভযিত্বৈবানুপ্রবিশ্য লিঙ্গৈরাত্মানং দর্শযন্তীত্যর্থঃ| যথা দেহং চ দেহধৃগিত্যনেন স্বমূর্তিমন্তর্নিধায বিশন্তীতি প্রদর্শিতম্||১৯||

Adhikarana 18 (20) · Śloka 20

তপাংসি তীব্রাণি তথৈব দানং ব্রতানি ধর্মো নিযমাশ্চ সত্যম্ | গুণাস্তথাঽষ্টাবপি তেষু নিত্যা ব্যস্তাঃ সমস্তাশ্চ যথাপ্রভাবম্ ||২০||

ইদানীং গ্রহাণাং তীব্রতপোনিযমাদিযুক্তত্বং প্রভাববত্তাং চ দর্শযিতুমাহ- তপাংসি তীব্রাণীত্যাদি| তপঃ তপনলক্ষণম্ উপবাসাদি| ব্রতানি শাস্ত্রোদিতবিধিনা ভোজনাদিনিযমনাদি| ধর্মঃ কাযবাঙ্মনসাং সুচরিতম্| গুণাঃ তথাঽষ্টাবিতি অণিমা, লঘিমা, মহিমা, গরিমা, প্রাপ্তিঃ, প্রাকাম্যং ঈশিত্বং, বশিত্বং, ইত্যষ্টৌ; অন্যে তু- “আবেশশ্চেতসো জ্ঞানমর্থানাং ছন্দতঃ ক্রিযা| দৃষ্টিঃ শ্রোত্রং স্মৃতিঃ কান্তিরিষ্টতশ্চাপ্যদর্শনম্”- ইত্যষ্টবিধমৈশ্চর্যমাহুঃ| তেষু গ্রহেষ্বেতে গুণা নিত্যা ন কাদাচিত্কাঃ| ব্যস্তা দ্বিত্রিচতুরাঃ| সমস্তাঃ সর্বে| যো যস্য প্রভাব ইতি যথাপ্রভাবম্| তত্র ব্যস্তা গুণা অসুরাদিগ্রহাণাং, সমস্তা দেবগ্রহাণাম্||২০||

Adhikarana 19 (21) · Śloka 21

ন তে মনুষ্যৈঃ সহ সংবিশন্তি ন বা মনুষ্যান্ ক্বচিদাবিশন্তি | যে ত্বাবিশন্তীতি বদন্তি মোহাত্তে ভূতবিদ্যাবিষযাদপোহ্যাঃ ||২১||

তপোনিযমাদিযুক্তা হি দেবাদিগ্রহাঃ কথঞ্চিদপ্যশুচিং দেহং নাবিশন্তীত্যাহ- ন তে মনুষ্যৈরিত্যাদি| তে দেবযোনযো মনুষ্যৈঃ সহ ন সংবিশন্তি একত্র ন ভবন্তীত্যর্থঃ| ন বা মনুষ্যান্ মানুষদেহান্ ক্বচিদাবিশন্তি অনুপ্রবিশন্তীত্যর্থঃ| যে পুনর্বৈদ্যা আবিশন্তীতি মোহাদজ্ঞানাত্ প্রবদন্তি তে বৈদ্যা ভূতবিদ্যাবিষযাদপোহ্যা অপসারণীযাস্ত্যাজ্যা ইত্যর্থঃ| ‘অপোহ্যা’ ইত্যত্র ‘অপেতা’ ইত্যন্যে পঠন্তি, তত্র গ্রহজ্ঞানাদ্বাহ্যা ইত্যর্থঃ||২১||

Adhikarana 20 (22) · Śloka 22

তেষাং গ্রহাণাং পরিচারকা যে কোটীসহস্রাযুতপহ্মসঙ্খ্যাঃ | অসৃগ্বসামাংসভুজঃ সুভীমা নিশাবিহারাশ্চ তমাবিশন্তি ||২২||

কে তর্হি গৃহ্ণন্তীত্যাহ- তেষামিত্যাদি| তেষাং দেবাদীনাং, পরিচারকাঃ প্রেষ্যাঃ কর্মকরা ইত্যর্থঃ| কোটী শতলক্ষপ্রমাণং, অযুতং দশসহস্রং, এতেন কোট্যাঃ শতলক্ষপরিমিতাযা যত্ সহস্রং তাদৃশৈর্দশভিঃ সহস্রৈরত্রাযুতং বোদ্ধব্যং, তেষাং পদ্মং চতুর্দশপ্রমাণং তদেব সঙ্খ্যা যেষাং তে তথা| প্রাক্ ‘অসঙ্খ্যেযা গ্রহগণা’ ইত্যভিধায অত্র কোট্যাদিসঙ্খ্যাযা অভিধানং গ্রহগণানামন্যোন্যসাদৃশ্যখ্যাপনার্থম্| সুভীমা অত্যর্থং ভযঙ্করাঃ| নিশাবিহারা রাত্রৌ ভ্রমণশীলাঃ||২২||

Adhikarana 21 (23) · Śloka 23

নিশাচরাণাং তেষাং হি যে দেবগণমাশ্রিতাঃ | তে তু তত্সত্ত্বসংসর্গাদ্বিজ্ঞেযাস্তু তদঞ্জনাঃ ||২৩||

দেবাদ্যনুচরাণাং স্বপ্রভূণামিবানুকারো ভবতীত্যাহ- নিশাচরাণামিত্যাদি| তেষাং নিশাচরাণামনুচরাণাং মধ্যে য অনুচরা যং দেবগণমাশ্রিতাস্তে তদঞ্জনাঃ তল্ল্ক্ষণা বিজ্ঞেযা ইতি সম্বন্ধঃ| কুত ইত্যাহ- তত্সত্বসংসর্গাত্ দেবাদিসত্ত্বসম্যোগাদিত্যর্থঃ||২৩||

Adhikarana 22 (24) · Śloka 24

দেবগ্রহা ইতি পুনঃ প্রোচ্যন্তেঽশুচযশ্চ যে | দেববচ্চ নমস্যন্তে প্রত্যর্থ্যন্তে চ দেববত্ ||২৪||

দেবগ্রহা ইত্যাদি| যে পুনরনুচরাঃ শুচযস্তে দেবগ্রহা ইতি প্রোচ্যন্তে| কুতঃ? যতঃ শুচযঃ, শুচিত্বং পুনস্তত্সংসর্গাদেব| দেববচ্চ নমস্যন্তে দেববন্নমস্ক্রিযন্তে| প্রত্যর্থ্যন্তে দেববদিত্যর্থঃ| অন্যে তু ব্যাখ্যানযন্তি- তদঞ্জনাস্তদ্দেবাকারাস্তথাবিধা এব ভবন্তীত্যাহ- অশুচযস্তু তে; তে পুনরশুচযো মোহান্ধত্বাদশুদ্ধাঃ, অত এব গৃহ্ণন্তি| দেববন্নমস্কারঃ পূজা চ তদঞ্জনত্বাদেব||২৪||

Adhikarana 23 (25) · Śloka 25

স্বামিশীলক্রিযাচারাঃ ক্রম এষ সুরাদিষু | নিরৃতের্যা দুহিতরস্তাসাং স প্রসবঃ স্মৃতঃ ||২৫||

স্বামিশীলক্রিযাচারা ইত্যাদি| শীলং স্বভাবঃ| ক্রমশ্চাযং পূর্বোক্তদেবগ্রহশুচিত্বাদিকঃ| সুরাদিষু, দেবগ্রহেষু, যতস্তেঽপি স্বামিশীলক্রিযাচারাঃ| দেবগ্রহা ইত্যাদিকং চ শ্লোকং কার্তিককুণ্ডো ন পঠতি| তদঞ্জনত্বেনৈবাস্যার্থস্য লব্ধত্বাত্| ননু, যদি ‘তত্সত্ত্বসংসর্গাচ্ছুচযঃ’ তত্ কথং মাংসাদিভুজ ইত্যাহ- নিরৃতের্যা দুহিতর ইত্যাদি| নিরৃতী রক্ষসাং পিতামহঃ, তস্য যা দুহিতরঃ পুত্র্যস্তাসাং স দেবাদ্যনুচরগণঃ প্রসবঃ, অতঃ প্রসূতিভাবং ন ত্যজতি||২৫||

Adhikarana 24 (26) · Śloka 26

সত্যত্বাদপবৃত্তেষু বৃত্তিস্তেষাং গণৈঃ কৃতা |২৬|

তেষাং বৃত্তিবিষযমাহ- সত্যত্বাদিত্যাদি| সত্যত্বাত্ শাস্ত্রোক্তানুষ্ঠানাত্| অপবৃত্তেষু বিপরিতানুষ্ঠানপরেষু| গণৈঃ গ্রহগণৈঃ| তেষামনুচরাণাং বৃত্তিঃ কৃতা| কেচিত্ ‘গণৈঃ’ ইত্যত্র ‘গ্রহৈঃ’ ইতি পঠিত্বা গ্রহৈঃ কৃতা বৃত্তিরিতি চ ব্যাখ্যানযন্তি|২৬|-

Adhikarana 25 (26) · Śloka 27

হিংসাবিহারা যে কেচিদ্দেবভাবমুপাশ্রিতাঃ ||২৬|| ভূতানীতি কৃতা সঞ্জ্ঞা তেষাং সঞ্জ্ঞাপ্রবক্তৃভিঃ |২৭|

অতো গ্রহাণাং ভূতসঞ্জ্ঞত্বং দর্শযন্নাহ- হিংসাবিহারা ইত্যাদি| হিংসাবিহারা বধক্রীডনাঃ| দেবভাবং দেবরূপম্| তেষাং হিংসাবিহারাণাং ভূতানীতি সঞ্জ্ঞা কৃতা||২৬||-

Adhikarana 26 (27) · Śloka 28

গ্রহসঞ্জ্ঞানি ভূতানি যস্মদ্বেত্ত্যনযা ভিষক্ ||২৭|| বিদ্যযা ভূতবিদ্যাত্বমত এব নিরুচ্যতে |২৮|

ভূতবিদ্যাযা নিরুক্তিমাহ- গ্রহসঞ্জ্ঞানীত্যাদি||২৭||-

Adhikarana 27 (28) · Śloka 29

তেষাং শান্ত্যর্থমন্বিচ্ছন্ বৈদ্যস্তু সুসমাহিতঃ ||২৮|| জপৈঃ সনিযমৈর্হোমৈরারভেত চিকিত্সিতুম্ |২৯|

ইদানীং চিকিত্সিতমাহ- তেষামিত্যাদি| তেষাং দেবাদ্যনুচরাণাম্| সুসমাহিতঃ সুষ্ঠু সাবধানঃ, আত্মানং পরিরক্ষন্নিত্যর্থঃ| জপৈরিত্যাদি| জপৈঃ ওঙ্কারপূর্বকগাযত্র্যাদ্যাবর্তনৈরযুতলক্ষকোটিপ্রযুতোপলক্ষিতৈঃ| এতেন দৈবব্যপাশ্রযং চিকিত্সিতমুক্তম্||২৮||-

Adhikarana 28 (29) · Śloka 30

রক্তানি গন্ধমাল্যানি বীজানি মধুসর্পিষী ||২৯|| ভক্ষ্যাশ্চ সর্বে সর্বেষাং সামান্যো বিধিরুচ্যতে |৩০|

সর্বগ্রহাণাং সামান্যচিকিত্সামাহ- রক্তানীত্যাদি| রক্তানিগন্ধমাল্যানি কুঙ্কুমরক্তকরবীরাদীনি| বীজানি সর্ষপযবপ্রভৃতীনি | ভক্ষ্যাশ্চ সর্বে লঙ্ডুকফেনকগুডাদযঃ||২৯||-

Adhikarana 29 (30) · Śloka 30

বস্ত্রাণি গন্ধমাল্যানি মাংসানি রুধিরাণি চ যানি যেষাং যথেষ্টানি তানি তেভ্যঃ প্রদাপযেত্ ||৩০||

সর্বেষাং দেবাদিগ্রহাণাং বিশেষচিকিত্সিতমাহ- বস্ত্রাণীত্যাদি| যানি বস্ত্রাদীনি যেষাং দেবাদ্যনুচরাণাং যথা যাদৃশানি ইষ্টানি তানি বস্ত্রাদীনি তেভ্যঃ প্রদাপযেদিতি সম্বন্ধঃ| ইষ্টত্বং চ বস্ত্রাদিবস্তূনাং বিবিধানাং 'সন্তুষ্টঃ শুচিরপি চেষ্টগন্ধমাল্যঃ' ইত্যাদিগ্রহলক্ষণতোঽপি জ্ঞাতব্যম্| 'বস্ত্রাণি মদ্যমাংসানি ক্ষীরাণি' ইতি ক্বচিত্ পাঠঃ||৩০||

Adhikarana 30 (31) · Śloka 32

হিংসন্তি মনুজান্ যেষু প্রাযশো দিবসেষু তু ||৩১|| দিনেষু তেষু দেযানি তদ্ভূতবিনিবৃত্তযে |৩২|

বস্ত্রাদিপ্রদানকালমাহ- হিংসন্তি মনুজানিত্যাদি| দেযানি বস্ত্রাদীনি||৩১||-

Adhikarana 31 (32) · Śloka 33

দেবগ্রহে দেবগৃহে হুত্বাঽগ্নিং প্রা(দা) পযেদ্বলিম্ ||৩২|| কুশস্বস্তিকপূপাজ্যচ্ছত্রপাযসসম্ভৃতম্ |৩৩|

বলিপ্রদানায ব্যাখ্যানমাহ- দেবেত্যাদি| দেবগৃহে দেবাযতনে, কুশা দর্ভাঃ, স্বস্তিকো যবাদিচূর্ণৈঃ কৃতোঽধোভাগে বিস্তীর্ণ ঊর্ধ্বভাগে তীক্ষ্ণো মধ্যে বলিত্রযমুদ্রাঙ্কিতো ভক্ষ্যবিশেষঃ, পূপঃ পূপলিকা, আজ্যং ঘৃতম্; এতৈঃ সম্ভৃতং বলিং দাপযেদিত্যর্থঃ||৩২||-

Adhikarana 32 (33) · Śloka 33

অসুরায যথাকালং বিদধ্যাচ্চত্বরাদিষু ||৩৩||

অসুরায যথাকালমিত্যাদি| অসুরায অসুরগ্রহায| যথাকালমিতি সন্ধ্যাকালে| বিদধ্যাত্ দদ্যাত্, বলিমিত্যর্থঃ| চত্বরাদিষু চতুষ্পথ্যাদিষু||৩৩||

Adhikarana 33 (34) · Śloka 34

গন্ধর্বস্য গবাং মধ্যে মদ্যমাংসাম্বুজাঙ্গলম্ |৩৪|

গন্ধর্বস্যেত্যাদি| অম্বু পানীযং, জাঙ্গলং মাংসং, তচ্চ মাংসোপদানাল্লব্ধম্, অতঃ পৃথগুপাদানং তস্য বিশেষপরিগ্রহার্থম্; অন্যে ‘মদ্যমাংসাম্বুজাকুলং’ ইতি পঠন্তি, মদ্যমাংসাম্বুজাকুলং মদ্যাদ্যাকুলং সম্মৃতং বলিমিত্যর্থঃ| পুষ্পপ্রিযত্বাত্ গন্ধর্বাণামম্বুজং কমলোত্পলাদি|৩৪|-

Adhikarana 34 (34) · Śloka 35

হৃদ্যে বেশ্মনি যক্ষস্য কুল্মাষাসৃক্সুরাদিভিঃ ||৩৪|| অতিমুক্তককুন্দাব্জৈঃ পুষ্পৈশ্চ বিতরেদ্বলিম্ |৩৫|

হৃদ্যে ইত্যাদি| কুল্মাষাসৃক্সুরাদিভিঃ কুল্মাষা যবপিষ্টকৃতাঃ শৃঙ্গাটকাদযঃ, অসৃক্ রক্তম্, আদিশব্দাত্ ভক্ষ্যাদযঃ| অতিমুক্তককুন্দাব্জৈরিতি অতিমুক্তকো মাধবীলতা ‘অবেতক’ ইতি লোকে, অম্বুজানি উত্পলাদীনি| কুল্মাষাদিভিরতিমুক্তকাদিপুষ্পৈশ্চ মনোজ্ঞে গৃহে যক্ষস্য বলিং দদ্যাদিত্যর্থঃ||৩৪||

Adhikarana 35 (35) · Śloka 35

নদ্যাং পিতৃগ্রহাযেষ্টং কুশাস্তরণভূষিতম্ ||৩৫||

নদ্যামিত্যাদি| ইষ্টং বলিং তিলগুডপাযসাদিকম্||৩৫||

Adhikarana 36 (36) · Śloka 36

তত্রৈবোপহরেচ্চাপি নাগায বিবিধং বলিম্ |৩৬|

তত্রৈবত্যাদি| তত্রৈব নদ্যাম্| বিবিধং গুডমধ্বাসবপাযসৈর্নানাপ্রকারম্|৩৬|-

Adhikarana 37 (36) · Śloka 36

চতুষ্পথে রাক্ষসস্য ভীমেষু গহনেষু বা ||৩৬||

চতুষ্পথ ইত্যাদি| অত্রাপি ‘বিতরেদ্বলিং’ ইতি সম্বধ্যতে| বিবিধং মাংসাসৃক্সুরাবিকারৈরনেকপ্রকারম্| কিং চতুষ্পথে এব বলিং দদ্যাদিত্যাহ- ভীমেষু গহনেষু বা; ‘স্থানেষু’ ইত্যধ্যাহার্যম্||৩৬||

Adhikarana 38 (37) · Śloka 37

শূন্যাগারে পিশাচস্য তীব্রং বলিমুপাহরেত্ |৩৭|

শূন্যাগার ইত্যাদি| তীব্রং বলিং আমমাংসপশূপহারমদ্যোত্কটম্|৩৭|-

Adhikarana 39 (37) · Śloka 38

পূর্বমাচরিতৈর্মন্ত্রৈর্ভূতবিদ্যানিদর্শিতৈঃ ||৩৭|| ন শক্যা বলিভির্জেতুং যোগৈস্তান্ সমুপাচরেত্ |৩৮|

পূর্বোক্তবিধানেন জেতুমশক্যানাং বিশেষবিধানমাহ- পূর্বমিত্যাদি||৩৭||-

Adhikarana 40 (38-39) · Śloka 39

অজর্ক্ষচর্মরোমাণি শল্যকোলূকযোস্তথা ||৩৮|| হিঙ্গু মূত্রং চ বস্তস্য ধূমমস্য প্রযোজযেত্ | এতেন শাম্যতি ক্ষিপ্রং বলবানপি যো গ্রহঃ ||৩৯||

প্রাগ্যোগৈরিত্যুক্তমতস্তানেব যোগানাহ- অজেত্যাদি| অজঃ ছগলঃ||৩৮-৩৯||

Adhikarana 41 (40) · Śloka 41

গজাহ্বপিপ্পলীমূলব্যোষামলকসর্ষপান্ | গোধানকুলমার্জারঋষ্যপিত্তপ্রপেষিতান্ ||৪০|| নস্যাভ্যঞ্জনসেকেষু বিদধ্যাদ্যোগতত্ত্ববিত্ |৪১|

গজাহ্বেত্যাদি| গজাহ্বা গজপিপ্পলী| মার্জারো বিডালঃ, ঋষ্যো নীলাণ্ডো মৃগভেদঃ, পিত্তশব্দো গোধাদিভিঃ প্রত্যেকং সম্বধ্যতে| তেন গজাহ্বাদীন্ গোধাদিপিত্তপেষিতান্নস্যাদিষু দদ্যাদিতি সম্বন্ধঃ| অন্যে ঋষ্যস্থানে মত্স্যেতি পঠন্তি; তন্ন, আদ্যপুস্তকে ঋষ্যস্য পাঠো দৃশ্যতে ন মত্স্যস্য| নস্যাদিষু পিত্তপিষ্টেন কথং সেকঃ কর্তুং পার্যত ইত্যতঃ কিঞ্চিত্তোযমালোডনার্থং দেযম্| অত এব যোগতত্ত্ববিদিত্যুক্তম্| অন্যে তু ‘নস্যাভ্যঞ্জনযোগেষু’ ইতি পঠন্তি, অভ্যঞ্জনমত্র অঞ্জনমভিপ্রেতং নস্যসাহচর্যাদিতি চ ব্যাখ্যানযন্তি| মার্জারঋষ্য(ক্ষ)পিত্তপ্রপেষিতানিত্যত্রাসংহিতানির্দেশশ্ছন্দোভঙ্গভীতেঃ||৪০||-

Adhikarana 42 (41-42) · Śloka 42

খরাশ্বাশ্বতরোলূককরভশ্বশৃগালজম্ ||৪১|| পুরীষং গৃধ্রকাকানাং বরাহস্য চ পেষযেত্ | বস্তমূত্রেণ তত্সিদ্ধং তৈলং স্যাত্ পূর্ববদ্ধিতম্ ||৪২||

খরাশ্বেত্যাদি| খরাশ্বাদীনাং পুরীষং বস্তমূত্রেণ পেষযেত্, ততস্তেন কল্কেন ছাগমূত্রেণ তত্সিদ্ধং তৈলং পূর্ববদ্ধিতং স্যাদিতি সম্বন্ধঃ| খরো গর্দভঃ, অশ্বতরো বেসরঃ, করভ উষ্ট্রঃ, শ্বা কুক্কুরো মাংসবর্গে প্রোক্তলক্ষণঃ| বরাহস্য চেতি চকারেণ পুরীষং সমুচ্চীযতে| তত্ তৈলং পূর্ববন্নস্যাভ্যঞ্জসেকেষু বিদধ্যাদিত্যর্থঃ||৪১-৪২||

Adhikarana 43 (43) · Śloka 44

শিরীষবীজং লশুনং শুণ্ঠীং সিদ্ধার্থকং বচাম্ | মঞ্জিষ্ঠাং রজনীং কৃষ্ণাং বস্তমূত্রেণ পেষযেত্ ||৪৩|| বর্ত্যশ্ছাযাবিশুষ্কাস্তাঃ সপিত্তা নযনাঞ্জনম্ |৪৪|

শিরীষবীজমিত্যাদি| সিদ্ধার্থকঃ শ্বেতসর্ষপঃ| কৃষ্ণা পিপ্পলী| সপিত্তা গোপিত্তান্বিতা, প্রধানকল্পনযা; অন্যে শ্রুতত্বাদ্গোধাদ্যন্যতমপিত্তং গৃহ্ণন্তি| শিরীষবীজাদীনি বস্তমূত্রেণ পেষযেত্, ততো বর্ত্যঃ, সগোপিত্তা ছাযাশুষ্কাঃ, তাভির্নযনাঞ্জনং কার্যমিত্যর্থঃ||৪৩||

Adhikarana 44 (44) · Śloka 45

নক্তমালফলং ব্যোষং মূলং শ্যোনাকবিল্বযোঃ ||৪৪|| হরিদ্রে চ কৃতা বর্ত্যঃ পূর্ববন্নযনাঞজনম্ |৪৫|

নক্তমালফলমিত্যাদি| কৃতা বর্ত্যঃ পূর্ববদিতি বস্তমূত্রনিষ্পিষ্টাঃ ছাযাবিশুষ্কাশ্চ সপিত্তাঃ কার্যাঃ||৪৪||-

Adhikarana 45 (45) · Śloka 46

সৈন্ধবং কটুকাং হিঙ্গং বযঃস্থাং চ বচামপি | বস্তমূত্রেণ সম্পিষ্টং মত্স্যপিত্তেন পূর্ববত্ ||৪৫|| যে যে গ্রহা ন সিধ্যন্তি সর্বেষাং নযনাঞ্জনম্ |৪৬|

যে যে গ্রহা ইত্যাদি| বযঃস্থা গুডুচী| বস্তমূত্রেণেত্যত্র বাশব্দো লুপ্তো দ্রষ্টব্যঃ; তেন বস্তমূত্রেণ বা পিষ্টং মত্স্যপিত্তেন বেতি লভ্যতে| পূর্ববত্ ছাযাশুষ্কমঞ্জনং কার্যমিত্যর্থঃ||৪৫||-

Adhikarana 46 (46-53) · Śloka 54

পুরাণসর্পির্লশুনং হিঙ্গ সিদ্ধার্থকং বচা ||৪৬|| গোলোমী চাজলোমী চ ভূতকেশী জটা তথা | কুক্কুটা সর্পগন্ধা চ তথা কাণবিকাণিকে ||৪৭|| বজ্রপ্রোক্তা বযঃস্থা চ শৃঙ্গী মোহনবল্লিকা | অর্কমূলং ত্রিকটুকং লতা স্রোতোজমঞ্জনম্ ||৪৮|| নৈপালী হরিতালং চ রক্ষোঘ্না যে চ কীর্তিতাঃ | সিংহব্যাঘ্রর্ক্ষমার্জারদ্বীপিবাজিগবাং তথা ||৪৯|| শ্বাবিচ্ছল্যকগোধানামুষ্ট্রস্য নকুলস্য চ | বিট্ত্বগ্রোমবসামূত্ররক্তপিত্তনখাদযঃ ||৫০|| অস্মিন্ বর্গে ভিষক্ কুর্যাত্তৈলানি চ ঘৃতানি চ | পানাভ্যঞ্জননস্যেষু তানি যোজ্যানি জানতা ||৫১|| অবপীডেঽঞ্জনে চৈব বিদধ্যাদ্গুটিকীকৃতম্ | বিদধীত পরীষেকে ক্বথিতং, চূর্ণিতং তথা ||৫২|| উদ্ধূলনে, শ্লক্ষ্ণপিষ্টং প্রদেহে চাবচারযেত্ | এষ সর্ববিকারাংস্তু মানসানপরাজিতঃ ||৫৩|| হন্যাদল্পেন কালেন স্নেহাদিরপি চ ক্রমঃ |৫৪|

পুরাণসর্পিরিত্যাদি| লশতি ভিনত্তি রোগানিতি লশুনম্| সিদ্ধার্থকঃ সিদ্ধপ্রযোগারম্ভকত্বাত্ শ্বেতসর্ষপঃ| গোলোমী দূর্বা| অজলোমী শ্বেতদূর্বা| ভূতকেশী মাংসী| জটা গন্ধমাংসী| কুক্কুটা কুক্কুটশিম্বী, বর্তমানপ্রতিষু কুক্কটীতি দৃশ্যতে, কুক্কটী কুক্কটসদৃশকন্দা মহৌষধিঃ| সর্পগন্ধা বর্ষাসু ছত্রাকারা| কাণবিকাণিকে কাকোলীক্ষীরকাকোল্যৌ| তথৈত্যত্র তিক্তেতি, ‘বিকাণিকে’ ইত্যত্র ‘বিষাণিকে’ ইতি চ কেচিত্ পঠন্তি| তিক্তা কটুতুম্বী, বিষাণিকা মেষশৃঙ্গী| বজ্রপ্রোক্তা বজ্রকন্দঃ, স্নুহীত্যন্যে; ‘বজ্রপ্রোক্তা’ ইত্যত্রান্যে ‘ঋষ্যপ্রোক্তা’ ইতি পঠন্তি; বযঃস্থা গুডূচী| শৃঙ্গী কর্কটশৃঙ্গী| মোহনবল্লিকা বটপত্রিকা| লতা প্রিযঙ্গুঃ| স্রোতোঞ্জনং পর্ণসানদ্যাং সিন্ধুনদে বা ভবতি| তল্লক্ষণম্,- “বল্মীকশিখরাকারং রূপে নীলোত্পলদ্যুতি| স্রোতোঞ্জনং প্রশংসন্তি তচ্চ প্রত্যঞ্জনে হিতম্”- ইতি| নৈপালী মনঃশিলা| রক্ষোঘ্না যে প্রকীর্তিতা ইতি শ্বতেসর্ষপাঃ| ‘রক্ষোঘ্নং যচ্চ কীর্তিতং’ ইত্যন্যে, তত্র রুদ্রাক্ষং; অপরে তু ‘যদ্যদ্রক্ষোঘ্নমীরিতং’ ইতি পঠন্তি, গুগ্গুলুপ্রভৃতীনিতি চ ব্যাখ্যানযন্তি| ঋক্ষো ভল্লূকঃ| দ্বীপী চিত্রকঃ| মার্জারো বিডালঃ| বাজী ঘোটকঃ| শ্বাবিত্ সেহি(ঢি)কেতি লোকে| শল্যকো গোধানুকারী বজ্রশল্যকঃ| বিট্ পুরীষম্| নখত্বচঃ শস্ত্রেণ তনূক্রৃতনখস্য তনূনি খণ্ডানি| অস্মিন্ বর্গে পুরাণসর্পিরিত্যাদিকে যাবদ্রক্তমূত্রত্বগন্তে, তৈলানি ঘৃতানি চ ভিষক্ কুর্যাত্; তানি চ পানাদিষু জানতা বৈদ্যেন যোজ্যানীতি সম্বন্ধঃ| ‘অস্মিন্ বর্গে’ ইতি বর্গগ্রহণাত্ অসমস্তেনাপ্যনেন তৈলাদিকং কর্তব্যমিত্যর্থঃ| অবপীডো নস্যভেদঃ| গুটিকীকৃতং বর্তীকৃতম্| অস্মিন্ বর্গ ইতি অবপীড ইত্যাদিষ্বনুবর্ত্য সম্বধ্যতে| তেনাস্মিন্ বর্গে যত্ ক্বথিতং ক্বাথস্তত্ পরিষেকে বিদধীত, তথা চুর্ণিতমুদ্ধূলনে বিদধীত, শ্লক্ষ্ণপিষ্টং প্রদেহে অবচারযেদিত্যর্থঃ| এষ গণোঽপরাজিতো নাম সর্ববিকারান্ মানসান্ গ্রহকৃতাংশ্চোন্মাদাদীনল্পেন কালেন নিহন্যাদিতি সম্বন্ধঃ; অন্যে অপরাজিতানিতি পঠন্তি, তত্র অপরৈঃ প্রযোগৈরজিতান্ মানসান্ বিকারানিতি ব্যাখ্যেযম্| কিমেষ এব গণঃ পরমেতান্ বিকারান্ হন্যাদিত্যাহ- স্নেহাদিরপি চ ক্রমঃ| আদিশব্দাত্ স্বেদবমনবিরেকাদি||৪৬-৫৩||-

Adhikarana 47 (54) · Śloka 54

ন চাচৌক্ষং প্রযুঞ্জীত প্রযোগং দেবতাগ্রহে ||৫৪||

ন চাচৌক্ষমিত্যাদি| অচৌক্ষমপবিত্রং প্রযোগং দেবতাগ্রহে দেবাদিগ্রহে ন প্রযুঞ্জীতেত্যর্থঃ| অন্যে ন চাযুক্তমিতি পঠন্তি||৫৪||

Adhikarana 48 (55) · Śloka 55

ঋতে পিশাচাদন্যত্র প্রতিকূলং ন চাচরেত্ |৫৫|

দেবতাগ্রহ ইত্যত্র সামান্যবচনাত্ সর্বেষ্বপি গ্রহেষু নিষেধঃ প্রাপ্ত ইত্যত আহ- ঋতে পিশাচাদিত্যাদি| ঋতে পিশাচাত্ পিশাচগ্রহং বিহায, অন্যেষু গ্রহেষু, প্রতিকূলং নিষিদ্ধম্; অন্যত্রেত্যত্রাপি ঋতে পিশাচাদিতি সম্বধ্যতে; তেন পিশাচাদন্যত্র প্রতিকূলং ন চ আচরেত্; এতেন পিশাচগ্রহে অচৌক্ষং প্রতিকূলং চোচিতমিত্যুক্তম্|৫৫|-

Adhikarana 49 (55) · Śloka 55

বৈদ্যাতুরৌ নিহন্যুস্তে ধ্রুবং ক্রুদ্ধা মহৌজসঃ ||৫৫||

পিশাচাদন্যত্র প্রতিকূলাচরণে কিং স্যাদিত্যাহ- বৈদ্যাতুরৌ নিহন্যুরিত্যাদি| তে দেবাদিগ্রহা ধ্রুবমবশ্যমনুচিতাচরণাত্ ক্রুদ্ধাঃ সন্তো বৈদ্যাতুরৌ নিহন্যুরিত্যর্থঃ| মহৌজসঃ মহাপ্রভাবাঃ||৫৫||

Adhikarana 50 (56) · Śloka 56

হিতাহিতীযে যচ্চোক্তং নিত্যমেব সমাচরেত্ |৫৬|

হিতাহারাদিকং নির্দিশন্নাহ- হিতাহিতীযে যদিত্যাদি| যচ্চোক্তং রক্তশাল্যাদিকং তন্নিত্যমেব আচরেদিত্যর্থঃ| ‘হিতাহিতীযে’ ইত্যত্র ‘হিতাহিতং চ’ ইত্যন্যে পঠত্বা ব্যাখ্যানযন্তি- ব্রণিতোপাসনীযোক্তং হিতাহিতীযোক্তং চ হিতবিধানং নিত্যং সমাচরেদহিতং চ পরিহরেদিত্যর্থঃ|৫৬|-

Adhikarana 51 (56) · Śloka 56

ততঃ প্রাপ্স্যতি সিদ্ধিং চ যশশ্চ বিপুলং ভিষক্ ||৫৬||

হিতাচরণফলমাহ- তত ইত্যাদি| ততো হিতাহিতপ্রতিপাদিতক্রিযাচরণাত্ গ্রহমুক্তিলক্ষণং সিদ্ধিমাতুরঃ প্রাপ্স্যতি, ভিষক্ বিপুলং যশশ্চ প্রাপ্স্যতীতি| কার্তিককুণ্ডস্ত্বমুং পাঠং ন পঠতি||৫৬||

Adhikarana puShpikA · Śloka 60

ইতি সুশ্রুতসংহিতাযামুত্তরতন্ত্রান্তর্গতে ভূতবিদ্যাতন্ত্রেঽমানুষোপসর্গপ্রতিষেধো নাম (প্রথমোঽধ্যাযঃ, আদিতঃ) ষষ্টিতমোঽধ্যাযঃ ||৬০||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রেঽমানুষোপসর্গপ্রতিষেধো নাম ষষ্টিতমোঽধ্যাযঃ||৬০||