61. apasmārapratiṣēdhādhyāyaḥ

Adhikarana 1 (1-2) · Śloka 2

অথাতোঽপস্মারপ্রতিষেধমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অমানুষোপসর্গপ্রতিষেধানন্তরং মনঃপ্রদুষ্টিসামান্যাত্ গ্রহচিকিত্সিতস্যাত্রাপি শস্তত্বাদপস্মারপ্রতিষেধারম্ভঃ- অথাত ইত্যাদি| অথেত্যাদিকং পূর্ববদ্ব্যাখ্যেযম্| অপশব্দো গমনার্থঃ, স্মারঃ স্মরণং, অপগতঃ স্মারো যস্মিন্ রোগে সোঽপস্মারঃ; তস্য প্রতিষেধঃ চিকিত্সিতম্||১-২||

Adhikarana 2 (3) · Śloka 3

স্মৃতির্ভূতার্থবিজ্ঞানমপশ্চ পরিবর্জনে | অপস্মার ইতি প্রোক্তস্ততোঽযং ব্যাধিরন্তকৃত্ ||৩||

অপস্মারস্য নিরুক্তিমাহ- স্মৃতিরিত্যাদি| ভূতার্থজ্ঞানাপস্মরণাদযং ব্যাধিরপস্মার ইতি প্রোক্তঃ| অন্তকৃত্ বিনাশকৃত্, অপস্মরণভাবাজ্জলাগ্ন্যাদৌ প্রপতনাত্; অন্যে তু অন্তকৃদবস্থাযাং, সা চাবস্থা ‘অপস্মরন্তং বহুশঃ ক্ষীণং’ ইত্যাদিকা||৩||

Adhikarana 3 (4-6) · Śloka 6

মিথ্যাতিযোগেন্দ্রিযার্থকর্মণামভিসেবনাত্ | বিরুদ্ধমলিনাহারবিহারকুপিতৈর্মলৈঃ ||৪|| বেগনিগ্রহশীলানামহিতাশুচিভোজিনাম্ | রজস্তমোভিভূতানাং গচ্ছতাং চ রজস্বলাম্ ||৫|| তথা কামভযোদ্বেগক্রোধশোকাদিভির্ভৃশম্ | চেতস্যভিহতে পুংসামপস্মারোঽভিজাযতে ||৬||

অপস্মারোত্পত্তিকারণস্য চিত্তাভিঘাতস্য হেতূনাহ- মিথ্যেত্যাদি| অত্রাযোগো লুপ্তো দ্রষ্টব্যঃ, তেন মিথ্যাযোগাযোগাতিযোগৈঃ; কেচিত্ মিথ্যাদিযোগেতি পঠিত্বা আদিশব্দেনৈব অতিযোগমযোগং চ গৃহ্ণন্তি| ইন্দ্রিযার্থানাং স্পর্শাদীনাং, কর্মণাং কাযবাঙ্মানসানাম্| অথ শব্দাদীনাং মিথ্যাযোগাদযঃ কথ্যন্তে- তত্র পরুষেষ্টবিনাশাদিশ্রবণং মিথ্যাযোগঃ, পটহাদ্যতিশব্দশ্রবণমতিযোগঃ, সর্বশোঽশ্রবণমযোগঃ; তথা শীতাদিস্পর্শানাং বৈপরীত্যেনোপসেবনং মিথ্যাযোগঃ, অতিশীতাদীনামতিসেবনমতিযোগঃ; সর্বশোঽসেবনমযোগঃ; অতিবিকৃতাদিদর্শনং মিথ্যাযোগঃ, অতিতেজসামতিদর্শনমতিযোগঃ; সর্বথাঽনবলোকনমযোগঃ; তথাঽযোগ্যরসানামাদানং মিথ্যাযোগঃ, রসানামত্যাদানমতিযোগঃ, রসানাং সর্বথাঽনাদানমযোগঃ; পূত্যাদ্যাঘ্রাণং মিথ্যাযোগঃ, অতিতীক্ষ্ণাদিগন্ধানামত্যাঘ্রাণমতিযোগঃ, সর্বশোঽঘ্রাণমযোগঃ; তথা কাযিককর্মণো ব্যাযামাদের্নিষিদ্ধকালাদিষু সেবনং মিথ্যাযোগঃ, অতিসেবনমতিযোগঃ, সর্বশোঽনুপসেবনমযোগঃ, তথা বাচনিককর্মণঃ পরুষানৃতাদিভাষণং মিথ্যাযোগঃ, অতিবাচনাদিকমতিযোগঃ, সর্বথা মৌনমযোগঃ, তথা মানসকর্মণঃ শোকাদিচিন্তনং মিথ্যাযোগঃ, অতিমাত্রচিন্তনাদিকমতিযোগঃ, সর্বথাচিন্তনমযোগঃ| বিরুদ্ধং হিতাহিতীযোক্তম্| মলিনশব্দ আহারবিহারাভ্যাং সম্বধ্যতে; তত্র মলিনাহারঃ পূতিদ্বেষ্টামেধ্যপর্যুষিতাঃ, মলিনো বিহারো দৃষ্টাদৃষ্টার্থঃ স্মার্তবচনাত্ জ্ঞাতব্যঃ| কুপিতৈর্মলৈরিত্যত্র মলা বাতপিত্তশ্লেষ্মাণো রজস্তমসী চ, দেহমলিনীকরণাদুচ্যন্তে| বেগেত্যাদি| বেগা বিণ্মূত্রাদীনাং তেষাং বেগানাং নিগ্রহো ধারণং, তত্র শীলা বেগনিগ্রহরতাঃ| অহিতাশুচিভোজিনামিতি যদ্যপ্যেষোঽর্থো বিরুদ্ধমলিনাহারাত্ ইত্যনেনৈব প্রাপ্তঃ, তথাঽপ্যত্যর্থহেতুত্বাপাদনার্থং পুনঃ পাঠঃ| রজস্বলাং দৃষ্টার্তবাম্| এতৈর্হেতুভিশ্চিত্তে উপহতে দূষিতে সতি অপস্মারোঽভিজাযতে||৪-৬||

Adhikarana 4 (7) · Śloka 7

হৃত্কম্পঃ শূন্যতা স্বেদো ধ্যানং মূর্চ্ছা প্রমূঢতা | নিদ্রানাশশ্চ তস্মিংস্তু ভবিষ্যতি ভবন্ত্যথ ||৭||

হেতূনভিধায পূর্বরূপমাহ- হৃদিত্যাদি| প্রমূঢতা অতিশযেন বিচেতনত্বম্| তস্মিন্ অপস্মারে||৭||

Adhikarana 5 (8-10) · Śloka 10

সঞ্জ্ঞাবহেষু স্রোতঃসু দোষব্যাপ্তেষু মানবঃ | রজস্তমঃপরীতেষু মূঢো ভ্রান্তেন চেতসা ||৮|| বিক্ষিপন্ হস্তপাদং চ বিজিহ্মভ্রূর্বিলোচনঃ | দন্তান্ খাদন্ বমন্ ফেনং বিবৃতাক্ষঃ পতেত্ ক্ষিতৌ ||৯|| অল্পকালান্তরং চাপি পুনঃ সঞ্জ্ঞাং লভেত সঃ | সোঽপস্মার ইতি প্রোক্তঃ... |১০|

প্রাগ্রূপমভিধায রূপমাহ- সঞ্জ্ঞাবহেষ্বিত্যাদি| সঞ্জ্ঞাবহেষু স্রোতঃস্বিতি কথং বহুবচনং, যতো ধমনীব্যাকরণে ‘দ্বাভ্যাং প্রবুধ্যতে’ ইত্যনেন দ্বে এব সঞ্জ্ঞাবহে স্রোতসী উক্তে? সত্যং, দ্বযোরপি স্রোতসোঃ সূক্ষ্মাণাং প্রতানানাং বহুত্বাত্ স্রোতঃস্বিত্যুক্তম্| দোষব্যাপ্তেষু বাতাদিদোষাভিভূতেষু| রজস্তমঃপরীতেষু রজস্তমোব্যাপ্তেষু| মূঢো মোহযুক্তঃ| কেন কৃত্বা মূঢঃ? ভ্রান্তেন চেতসা চিত্তভ্রান্ত্যেত্যর্থঃ| বিক্ষিপন্ ইতস্ততঃ ক্ষিপন্ | বিজিহ্মভ্রূঃ বিলোচনঃ বক্রভ্রূনেত্রঃ| বিবৃতাক্ষ উচ্ছলিতাক্ষঃ| যস্মিন্ বিকারে বিক্ষিপন্ হস্তপাদমিত্যাদিচেষ্টঃ সন্ আতুরঃ ক্ষিতৌ পততি স বিকারোঽপস্মার ইতি প্রোক্ত ইতি সম্বন্ধঃ||৮-১০||-

Adhikarana 6 (10) · Śloka 11

... স চ দৃষ্টশ্চতুর্বিধঃ ||১০|| বাতপিত্তকফৈর্নৄণাং চতুর্থঃ সন্নিপাততঃ |১১|

অপস্মারস্য সঙ্খ্যামাহ- স চ দৃষ্ট ইত্যাদি| চতুর্বিধ ইতি সঙ্খ্যাকরণং দ্বন্দ্বজাপস্মারনিষেধার্থম্| দ্বন্দ্বজাসম্ভবস্তু ব্যাধিস্বভাবাত্| চাতুর্বিধ্যং বিবৃণ্বন্নাহ- বাতপিত্তকফৈরিত্যাদি| বাতাদিভিঃ ত্রযঃ||১০||-

Adhikarana 7 (11-12) · Śloka 12

বেপমানো দশন্ দন্তান্ শ্বসন্ ফেনং বমন্নপি ||১১|| যো ব্রূযাদ্বিকৃতং সত্ত্বং কৃষ্ণং মামনুধাবতি | ততো মে চিত্তনাশঃ স্যাত্ সোঽপস্মারোঽনিলাত্মকঃ ||১২||

বাতাদিজত্বেনাপস্মারলক্ষণমাহ- বেপমান ইত্যাদি| বেপমানঃ কম্পমানঃ| দশন্ খাদন্ দন্তান্| শ্বসন্ শ্বাসং কুর্বন্| বিকৃতং বিকৃতরূপং সত্ত্বম্| কৃষ্ণমিত্যত্র কৃষ্ণসত্ত্বদর্শনম্, অসত এব সঞ্জ্ঞাবহস্রোতোগতবাতপ্রভাবাত্; ন পুনঃ সত্ত্বং পিশাচাদিকং ভূতমভিপ্রেতম্| তন্ত্রান্তরেঽপি “পরুষারুণকৃষ্ণানি পশ্যেদ্রূপাণি চানিলাত্” ইত্যাদিনা কৃষ্ণাদিরূপদর্শনমেবোক্তম্| এবং পিত্তকফাপস্মারযোরপি বোদ্ধব্যম্||১১-১২||

Adhikarana 8 (13) · Śloka 14

তৃট্তাপস্বেদমূর্চ্ছার্তো ধুন্বন্নঙ্গানি বিহ্বলঃ | যো ব্রূযাদ্বিকৃতং সত্ত্বং পীতং মামনুধাবতি ||১৩|| ততো মে চিত্তনাশঃ স্যাত্ স পিত্তভব উচ্যতে |১৪|

পিত্তাপস্মারলক্ষণমাহ- তৃডিত্যাদি| তৃট্ পিপাসা| তাপঃ সন্তাপঃ| ধুন্বন্ বিক্ষিপন্| অঙ্গানি হস্তপাদাদীনি| বিহ্বলো বিকলঃ||১৩||-

Adhikarana 9 (14-15) · Śloka 15

শীতহৃল্লাসনিদ্রার্তঃ পতন্ ভূমৌ বমন্ কফম্ ||১৪|| যো ব্রূযাদ্বিকৃতং সত্ত্বং শুক্লং মামনুধাবতি | ততো মে চিত্তনাশঃ স্যাত্ সোঽপস্মারঃ কফাত্মকঃ ||১৫||

কফজাপস্মারলক্ষণমাহ- শীতহৃল্লাসেত্যাদি| হৃল্লাসঃ থূত্করণম্||১৪-১৫||

Adhikarana 10 (16) · Śloka 16

হৃদি তোদস্তৃডুত্ক্লেদস্ত্রিষ্বপ্যেতেষু সঙ্খ্যযা |১৬|

বাতাদ্যপস্মারেষু প্রত্যেকমেকৈকং লক্ষণমাহ- হৃদি তোদ ইত্যাদি| হৃদি তোদো ব্যথা, -বাতিকে; তৃট্ পিপাসা,-পৈত্তিকে; উত্ক্লেশঃ শ্লেষ্মনিষ্ঠীবনং, -কফজে; এতেষু ত্রিষু বাতাদিজাপস্মারেষু যথাসঙ্খ্যং হৃত্তোদাদিলক্ষণং জ্ঞেযমিতি সম্বন্ধঃ|১৬|-

Adhikarana 11 (16) · Śloka 16

প্রলাপঃ কূজনং ক্লেশঃ প্রত্যেকং তু ভবেদিহ ||১৬||

বাতাদিজাপস্মারেষু প্রত্যেকং প্রলাপাদিলক্ষণত্রিতযমাহ- প্রলাপঃ কূজনমিত্যাদি| প্রলাপাদিকং ত্রযং বাতাদিজাপস্মারেষু ত্রিষ্বপি প্রত্যেকং বোদ্ধব্যং ন যথাসঙ্খ্যম্||১৬||

Adhikarana 12 (17) · Śloka 17

সর্বলিঙ্গসমবাযঃ সর্বদোষপ্রকোপজে |১৭|

সর্বজাপস্মারলক্ষণমাহ- সর্বলিঙ্গসমবায ইত্যাদি| সর্বলিঙ্গসমবাযো বাতাদিলিঙ্গসমাবেশঃ| সর্বদোষপ্রকোপজ ইতি প্রকোপোপাদানাত্ স্বকীযকারণপ্রকুপিতদোষত্রযজ ইতি বোদ্ধব্যং, ন কুপিতৈকদোষপ্রকোপিতসর্বদোষজ ইতি|১৭|-

Adhikarana 13 (17) · Śloka 18

অনিমিত্তাগমাদ্ব্যাধের্গমনাদকৃতেঽপি চ ||১৭|| আগমাচ্চাপ্যপস্মারং বদন্ত্যন্যে ন দোষজম্ |১৮|

স্বমতেনাপস্মারস্য দোষজত্বং প্রদর্শ্য পরমতেনাগন্তুকত্বমাহ- অনিমিত্তাগমাদিত্যাদি| অনিমিত্তাগমাত্ অকারণোত্পাদনাত্, আকস্মিকোদ্ভবাদিত্যর্থঃ| গমনাদকৃতেঽপি চেত্যত্র ‘প্রতীকারে’ ইতি শেষঃ ; তেন প্রতীকারে অকৃতেঽপি ব্যাধের্গমনাদুপশমাদিত্যর্থঃ| অকৃতেঽপীত্যত্র অকৃতাদিতি ক্বচিত্; তত্র, অকৃতাত্ প্রতীকারদ্ভেষজেনেতি দ্রষ্টব্যম্ আগমাচ্চেতি স্বকীযাত্; ন পুনশ্চেতরস্মাত্, তত্র দোষজত্বেনাপস্মারস্য দর্শিতত্বাত্| ‘বদন্ত্যন্যে ন দোষজং’ ইত্যত্র অন্যে ‘বদন্ত্যন্যোন্যদোষজম্’ ইতি পঠন্তি, অন্যোন্যদোষজং রজস্তমোদোষজমিত্যর্থঃ| অপরে তু ‘অন্যোন্যদূষণাত্’ ইতি পঠন্তি| তত্র কাযমনসোরন্যোন্যদূষণাত্||১৭||-

Adhikarana 14 (18-21) · Śloka 21

ক্রমোপযোগাদ্দোষাণাং ক্ষণিকত্বাত্তথৈব চ ||১৮|| আগমাদ্বৈশ্বরূপ্যাচ্চ স তু নির্বর্ণ্যতে বুধৈঃ | দেবে বর্ষত্যপি যথা ভূমৌ বীজানি কানিচিত্ ||১৯|| শরদি প্রতিরোহন্তি তথা ব্যাধিসমুদ্ভবঃ | স্থাযিনঃ কেচিদল্পেন কালেনাভিপ্রবর্ধিতাঃ ||২০|| দর্শযন্তি বিকারাংস্তু বিশ্বরূপান্নিসর্গতঃ | অপস্মারো মহাব্যাধিস্তস্মাদ্দোষজ এব তু ||২১||

পরমতনিরাকরণায স্বমতমাহ- ক্রমোপযোগাদিত্যাদি| স তু পুনরপস্মারঃ ক্রমোপযোগাদিত্যাদিহেতুভিশ্চতুর্ভির্দোষজ এব বুধৈঃ পণ্ডিতৈর্নির্বর্ণ্যতে কথ্যত ইত্যর্থঃ| অত্র হেতুমাহ- ক্রমোপযোগাদ্দোষাণামিতি সঞ্চযাদিক্রমেণ দোষাণাং বিকারজননযোগাদিত্যর্থঃ; এতেন, অনিমিত্তাগমাদ্ব্যাধেরিতি হেতুর্নিরাকৃতঃ| তথা সর্বপারিষদত্বাদাযুর্বেদস্য সৌগতমতমবলম্ব্য ‘গমনাদকৃতেঽপি চ’ ইত্যস্য হেতোর্নিরাকরণায হেতুমাহ- ক্ষণিকত্বাত্তথৈব চেতি| তথৈব বাতাদীনাং ক্ষণিকত্বাদ্দ্বিতীযোঽপি হেতুর্নিরাকৃতঃ| যতো যাবন্মাত্রো দোষবেগোঽভূত্ তাবন্মাত্রস্যাপগমাদকৃতেঽপি প্রতীকারে ব্যাধেরপগমঃ| তৃতীযং হেতুমাহ- আগমাচ্চেতি; স্বতন্ত্রাত্ পরতন্ত্রাচ্চেত্যর্থঃ| তত্রাগমে স্বতন্ত্রে পরতন্ত্রে চ বাতিক-পৈত্তিক-শ্লৈষ্মিক-সান্নিপাতিকাশ্চত্বারোঽপস্মারা অভিহিতা ইতি| চতুর্থং হেতুমাহ- বৈশ্বরূপ্যাচ্চেতি বিশ্বেষাং সমস্তানাং বাতপিত্তশ্লেষ্মণাং মনোদোষযো রজস্তমসোশ্চ রূপং নানাপ্রকারং লিঙ্গং যস্যাপস্মারস্য স তথা, তদ্ভাবো বৈশ্বরূপ্যং তস্মাত্| ‘স তু’ ইত্যত্রান্যে ‘তত্র’ ইতি পঠন্তি, ব্যাখ্যানযন্তি চ- তত্র অপস্মারে| যদৈবং তর্হি বাতপিত্তশ্লেষ্মণাং সদৈব দেহে সদ্ভাবাত্ সন্ততমপস্মারঃ স্যাদতস্তন্নিরাকরণার্থমাহ- দেবে বর্ষতীত্যাদি| বর্ষত্যপি মেঘে ভূমৌ সুকৃষ্টাযামপি অঙ্কুরজননসমর্থান্যপি কানিচিদ্বীজানি শরদ্যেব প্ররোহন্তি, তথা সর্বরোগবীজানাং বাতাদীনাং কদাচিত্ কস্যচিদপস্মারাদিব্যাধেরঙ্কুরস্থানীযস্য নিদানাদিসঙ্গমে সত্যপি দূষ্যাদিসমুদাযেনৈব সমুদ্ভবো ভবতীত্যর্থঃ| অন্যে ত্বন্যথা ব্যাখ্যানযন্তি- ননু, সঞ্চযাদিক্রমেণোপযোগশ্চেদ্দোষাণাং তদা পুনঃ কথমল্পেনৈব কালেন তদ্বিকারোদ্গমঃ স্যাদিত্যত আহ- দেবেঽবর্ষতীত্যাদি| অবর্ষতি দেবে যথা শরত্কালে ভূমৌ স্তিমিত্বাত্ কানিচিদ্বীজানি প্ররোহন্ত্যেব, তথাঽল্পেনাপি কালেন শরীরস্থা দোষাঃ কিঞ্চিদুপচিতা বিকারং জনযন্তীতি| এতদেব স্পষ্টীকুর্বন্নাহ- স্থাযিন ইত্যাদি| স্থাযিনঃ অবশ্যমবস্থাযিনো বাতাদযঃ, পরং কেচিদল্পেনাপি কালেনাভিপ্রবর্ধিতাঃ সন্তো বিশ্বরূপান্ নানারূপান্ বিকারান্ দর্শযন্তি| কুতঃ? নিসর্গতো দূষণস্বভাবাদিত্যর্থঃ| অপস্মারো মহাব্যাধিরিত্যাদি| তস্মাদিতি পূর্বোক্তক্রমোপযোগাদিহেতুসমূহাদপস্মারো দোষজো ন তু ভূতাবেশজ ইতি সিদ্ধান্তঃ ||১৮-২১||

Adhikarana 15 (22-23) · Śloka 24

তস্য কার্যো বিধিঃ সর্বো য উন্মাদেষু বক্ষ্যতে | পুরাণসর্পিষঃ পানমভ্যঙ্গশ্চৈব পূজিতঃ ||২২|| উপযোগো গ্রহোক্তানাং যোগানাং তু বিশেষতঃ | ততঃ সিধ্যন্তি তে সর্বে যোগৈরন্যৈশ্চ সাধযেত্ | শিগ্রুকট্বঙ্গকিণ্বাহিনিম্বত্বগ্রসসাধিতম্ ||২৩|| চতুর্গুণে গবাং মূত্রে তৈলমভ্যঞ্জনে হিতম্ |২৪|

ইদানীং চিকিত্সিতমাহ- তস্য কার্যো বিধিরিত্যাদি| তস্য অপস্মারস্য| ননু, উন্মাদে যো বিধিঃ পঠিষ্যমাণোঽস্তি তং বিধিমপস্মারে নির্দিশ্য তত্রৈব কিমিতি নাতিদিশ্যতে? উচ্যতে,- উন্মাদে তস্যাতিশযেন হিতত্বাদিত্যর্থঃ| অভ্যঙ্গশ্চৈবেতি পুরাণসর্পিষা, অস্য ত্রিদোষঘ্নত্বাত্| গ্রহোক্তবিধিমুপদিশতি- উপযোগ ইত্যাদি| শিগ্রুকট্বঙ্গেত্যাদি| শিগ্রুঃ শোভাঞ্জনকঃ, কট্বঙ্গঃ অরলুঃ, স্যোনাক ইত্যন্যে, কিণিহী শ্বেতস্যন্দঃ; ত্বগ্রসসাধিতমিতি ত্বগ্ বল্কলং, রসঃ স্বরসঃ; এতেন কল্কস্বরসাভ্যাং সাধিতমিতি বোদ্ধব্যম্| গবাং মূত্রে ইতি চেতোবিকারহরত্বেন হস্তিচ্ছাগভেডমূত্রাণাং নির্দিষ্টত্বাত্তন্নিষেধার্থং ‘গবাং মূত্রে’ ইতি কৃতম্| তৈলং তিলতৈলম্||২২-২৩||-

Adhikarana 16 (24) · Śloka 25

গোধানকুলনাগানাং পৃষতর্ক্ষগবামপি ||২৪|| পিত্তেষু সিদ্ধং তৈলং চ পানাভ্যঙ্গেষু পূজিতম্ |২৫|

দ্বিতীযতৈলমাহ- গোধানকুলনাগানামিত্যাদি| নাগো হস্তী| পৃষতঃ চিত্রলো মৃগঃ| ঋক্ষো ভল্লূকঃ| গোধাদীনাং পিত্তেষু পৃথক্ স্নেহসমেষু সিদ্ধং তৈলমিত্যর্থঃ||২৪||-

Adhikarana 17 (25) · Śloka 25

তীক্ষ্ণৈরুভযতোভাগৈঃ শিরশ্চাপি বিশোধযেত্ ||২৫||

তৈলমভিধায শিরোবিরেচনমাহ- তীক্ষ্ণৈরিত্যাদি| তীক্ষ্ণৈরুভযতোভাগৈঃ বিষাণিকাব্রাহ্মীকারবেল্লকাদিভিঃ| অন্যে তু ‘তীক্ষ্ণৈরুভযতোভাগৈঃ শিরসশ্চ বিরেচনৈঃ’ ইতি পঠন্তি, ব্যাখ্যানযন্তি চ- তীক্ষ্ণৈরিত্যুভযত্র সম্বধ্যতে| তেন উভযতোভাগৈর্বমনবিরেচনৈস্তীক্ষ্ণৈশ্চ শিরোবিরেচনৈরুপাচরেদিতি সম্বধ্যতে||২৫||

Adhikarana 18 (26) · Śloka 26

পূজাং রুদ্রস্য কুর্বীত তদ্গণানাং চ নিত্যশঃ |২৬|

কেচিদত্র দৈবব্যপাশ্রযং চিকিত্সিতং পঠন্তি- পূজাং রুদ্রস্যেত্যাদি|২৬|-

Adhikarana 19 (26) · Śloka 27

বাতিকং বস্তিভিশ্চাপি পৈত্তিকং তু বিরেচনৈঃ ||২৬|| কফজং বমনৈর্ধীমানপস্মারমুপাচরেত্ |২৭|

সামান্যং চিকিত্সিতং নির্দিশ্য বাতাদিভেদেনাপস্মারাণাং চিকিত্সাং নির্দিশন্নাহ- বাতিকমিত্যাদি| কেচিদিমং পাঠং পঞ্চগব্যাখ্যঘৃতপাঠস্যাগ্রে পঠন্তি||২৬||-

Adhikarana 20 (27-28) · Śloka 28

কুলত্থযবকোলানি শণবীজং পলঙ্কষাম্ ||২৭|| জটিলাং পঞ্চমূল্যৌ দ্বে পথ্যাং চোত্ক্বাথ্য যত্নতঃ | বস্তমূত্রযুতং সর্পিঃ পচেত্তদ্বাতিকে হিতম্ ||২৮||

বাতাদিজাপস্মারেষু ঘৃতং নির্দিশন্নাহ- কুলত্থেত্যাদি| কোলং বদরম্| পলঙ্কষা গুগ্গুলুঃ| জটিলা মাংসী| পঞ্চমূল্যৌ দ্বে ইতি শালিপর্ণ্যাদির্বিল্বাদিশ্চ, এরণ্ডবিল্বাদ্যে ইত্যন্যে| পথ্যা হরীতকী| ‘যত্নত’ ইত্যত্রান্যে ‘যোগত’ ইতি পঠন্তি| যোগতোগ্রহণাত্ ক্বাথমূত্রযোর্মধ্যে একং চতুর্গুণমেকং চ সমং গ্রাহ্যমিতি ব্যাখ্যানযন্তি||২৭-২৮||

Adhikarana 21 (29) · Śloka 29

কাকোল্যাদিপ্রতীবাপং সিদ্ধং চ প্রথমে গণে | পযোমধুসিতাযুক্তং ঘৃতং তত্ পৈত্তিকে হিতম্ ||২৯||

কাকোল্যাদিপ্রতীবাপমিত্যাদি| কাকোল্যাদিপ্রতীবাপং কাকোল্যাদিকল্কম্| সিদ্ধং চ প্রথমে গণে বিদারিগন্ধাদিকে ক্বাথীকৃতে ইতি জ্ঞেযম্| কুতঃ? কাকোল্যাদিকল্কোপদেশাত্| পযঃ ক্ষীরম্| সিতা শর্করা| ক্ষীরাদিপ্রক্ষেপযুক্তং ঘৃতং হিতম্||২৯||

Adhikarana 22 (30) · Śloka 30

কৃষ্ণাবচামুস্তকাদ্যৈর্যুক্তমারগ্বধাদিকে | পক্বং চ মূত্রবর্গে তু শ্লেষ্মাপস্মারিণে হিতম্ ||৩০||

কৃষ্ণাবচেত্যাদি| কৃষ্ণাবচামুস্তকাদ্যৈরিতি পিপ্পল্যাদিবচাদিমুস্তাদ্যৈঃ ক্বথিতৈঃ, আরগ্বধাদিকৈঃ কল্কীকৃতৈঃ, মূত্রবর্গেঽষ্টবিধে সিদ্ধং পক্বং ঘৃতং শ্লেষ্মাপস্মারিণে হিতমিত্যর্থঃ| অন্যে মূত্রবর্গেষ্বিত্যত্র চেতোবিকারহরত্বেন ছাগোরভ্রহস্তিমূত্রাণি গৃহ্ণন্তি||৩০||

Adhikarana 23 (31-33) · Śloka 33

সুরদ্রুমবচাকুষ্ঠসিদ্ধার্থব্যোষহিঙ্গুভিঃ | মঞ্জিষ্ঠারজনীযুগ্মসমঙ্গাত্রিফলাম্বুদৈঃ ||৩১|| করঞ্জবীজশৈরীষগিরিকর্ণীহুতাশনৈঃ | সিদ্ধং সিদ্ধার্থকং নাম সর্পির্মূত্রচতুর্গুণম্ ||৩২|| কৃমিকুষ্ঠগরশ্বাসবলাসবিষমজ্বরান্ | সর্বভূতগ্রহোন্মাদানপস্মারাংশ্চ নাশযেত্ ||৩৩||

সিদ্ধার্থকং সর্পিরাহ- সুরদ্রুমেত্যাদি| সুরদ্রুমঃ দেবদারু| সিদ্ধার্থঃ সর্ষপঃ| ব্যোষং শুণ্ঠীমরীচপিপ্পল্যঃ| রজনীযুগ্মং হরিদ্রাদ্বযম্| সমঙ্গা লজ্জালুঃ| অম্বুদো মুস্তা| শৈরীষং শিরীষবীজম্| গিরিকর্ণী শ্বেতস্যন্দা| হুতাশনঃ চিত্রকঃ| এতৈঃ কল্কীকৃতৈর্মূত্রচতুর্গুণং সর্পিঃ সিদ্ধং সিদ্ধার্থকং নামেতি সম্বন্ধঃ| গরঃ কৃত্রিমং বিষম্| বলাসঃ শ্লেষ্মা||৩১-৩৩||

Adhikarana 24 (34-37) · Śloka 37

দশমূলেন্দ্রবৃক্ষত্বঙ্মূর্বাভার্গীফলত্রিকৈঃ | শম্পাকশ্রেযসীসপ্তপর্ণাপামার্গফল্গুভিঃ ||৩৪|| শৃতৈঃ কল্কৈশ্চ ভূনিম্বপূতীকব্যোষচিত্রকৈঃ | ত্রিবৃত্পাঠানিশাযুগ্মসারিবাদ্বযপৌষ্করৈঃ ||৩৫|| কটুকাযাসদন্ত্যুগ্রানীলিনীক্রিমিশত্রুভিঃ | সর্পিরেভিশ্চ গোক্ষীরদধিমূত্রশকৃদ্রসৈঃ ||৩৬|| সাধিতং পঞ্চগব্যাখ্যং সর্বাপস্মারভূতনুত্ | চাতুর্থকক্ষযশ্বাসানুন্মাদাংশ্চ নিযচ্ছতি ||৩৭||

পঞ্চগব্যমাহ- দশমূলেত্যাদি| ইন্দ্রবৃক্ষঃ কুটজঃ, তস্য ত্বক্; অন্যে ত্বক্শব্দেন ত্বচমাহুঃ| মূর্বা চোরস্নাযুঃ| ফল্গুঃ কাষ্ঠোদুম্বরিকা| শৃতৈঃ ক্বথিতৈঃ| ভূনিম্বঃ কিরাতকঃ| পূতীকঃ চিরবিল্বঃ| ব্যোষং ত্রিকটুকম্| নিশাযুগ্মং হরিদ্রাদ্বযম্| সারিবাদ্বযম্ আস্ফোতা কাকবল্লী চ| পৌষ্করং পুষ্করমূলম্| যাসো দুরালভা, দন্তী দন্তিনী, উগ্রা বচা, নীলিনী রজনিকা শারদফলা, কৃমিশত্রুঃ বিডঙ্গম্, দশমূল্যাদিভিঃ কাষ্ঠোদুম্বরিকান্তৈঃ ক্বথিতৈর্ভূনিম্বাদিভিঃ কৃমিশত্রুপর্যন্তৈঃ| কল্কীকৃতৈর্গোক্ষীরাদিভিঃ প্রত্যেকং স্নেহসমৈঃ সাধিতং সর্পিঃ পঞ্চগব্যাখ্যং সর্বাপস্মারাদীন্নিযচ্ছতীত্যর্থঃ ||৩৪-৩৭||

Adhikarana 25 (38-40) · Śloka 41

ভার্গীশৃতে পচেত্ ক্ষীরে শালিতণ্ডুলপাযসম্ | ত্র্যহং শুদ্ধায তং ভোক্তুং বরাহাযোপকল্পযেত্ ||৩৮|| জ্ঞাত্বা চ মধুরীভূতং তং বিশস্যান্নমুদ্ধরেত্ | ত্রীন্ ভাগাংস্তস্য চূর্ণস্য কিণ্বভাগেন সংসৃজেত্ ||৩৯|| মণ্ডোদকার্থে দেযশ্চ ভার্গীক্বাথঃ সুশীতলঃ | শুদ্ধে কুম্ভে নিদধ্যাচ্চ সম্ভারং তং সুরাং ততঃ ||৪০|| জাতগন্ধাং জাতরসাং পাযযেদাতুরং ভিষক্ |৪১|

ভার্গীশৃতে ইত্যাদি| ভার্গীশৃতে ক্ষীরে শালিতণ্ডুলপাযসং পচেদিতি সম্বন্ধঃ| অত্র ক্ষীরসাধনবিধিঃ- চতুর্থাংশং ভার্গীকল্কং দত্ত্বা চতুর্গুণেন জলেন ক্ষীরং সাধনীযম্| ত্র্যহং শুদ্ধায ত্রিদিনমুপোষিতায বরাহায তং পাযসং ভোক্তুং প্রকল্পযেত্ দদ্যাদিত্যর্থঃ| মধুরীভূতং শ্লেষ্মসংসৃষ্টং বিদাহাবস্থামপ্রাপ্তম্; অন্যে তু মধুরীভূতং বিষীভূতমিতি ব্যাখ্যানযন্তি, যতো মধুরশব্দো বিষে বর্ততে| অথ পাযসঃ কথং বিষীভবতীতি চেত্? সত্যং, আধারপ্রভাবাত্| বিষীভূতং বরাহস্যৈব লালাস্রাবমূর্চ্ছাদিবিষলিঙ্গৈর্জ্ঞাতব্যম্| তং বরাহং, বিশস্য হত্বা, অন্নং বিষীভূতমুদ্ধরেত্| তস্য চূর্ণস্যেত্যাদি| তস্য উদ্ধৃতস্যান্নস্য শোষিতচূর্ণীকৃতস্য ত্রীন্ ভাগান্ কিণ্বভাগেন সংসৃজেত্ সুরাবীজৈকভাগেন মিশ্রযেত্| মণ্ডোদকার্থং সন্ধানার্থং ভার্গীক্বাথো দেযঃ| অন্যে তু মণ্ডঃ সুরামণ্ডঃ, দকার্থে উদকার্থে ভার্গীক্বাথশ্চ দেয ইতি ব্যাখ্যানযন্তি| শুদ্ধে কুম্ভে ইতি কৃতসংস্কারে চাতুর্জাতকঘৃতমধুপিপ্পল্যাদিবিলিপ্তে ইত্যর্থঃ| পাযসচূর্ণকিণ্বভাগচতুষ্টযে ভার্গীক্বাথস্তাবানেব দেযো যাবতা সম্যক্সুরাভাবং প্রাপ্নোতি, তদ্বিদশ্চ কল্পপালাঃ প্রষ্টব্যাঃ| সুরানিষ্পত্তিকালপ্রমাণং চ জাতরসামিত্যনেনোক্তম্||৩৮-৪০||-

Adhikarana 26 (41) · Śloka 41

সিরাং বিধ্যেদথ প্রাপ্তাং মঙ্গল্যানি চ ধারযেত্ ||৪১||

সিরামিত্যাদি| প্রোক্তাং উরোপাঙ্গললাটজাম্| অন্যে তু প্রাপ্তামিতি পঠন্তি, হনুসন্ধিমধ্যগতামিতি চ ব্যাখ্যানযন্তি| মঙ্গল্যানি ব্রণিতোপাসনীযোক্তানি ছত্রাতিছত্রাদীনি | অপরে তু ‘মঙ্গল্যাদি চ কারযেত্’ ইতি পঠন্তি, তচ্চ মঙ্গল্যমথর্ববেদবিহিতমিতি ব্যাখ্যানযন্তি||৪১||

Adhikarana puShpikA · Śloka 61

ইতি সুশ্রুতসংহিতাযামুত্তরতন্ত্রান্তর্গতে ভূতবিদ্যাতন্ত্রেঽপস্মারপ্রতিষেধো নাম (দ্বিতীযোঽধ্যাযঃ, আদিতঃ) একষষ্টিতমোঽধ্যাযঃ ||৬১||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রেঽপস্মারপ্রতিষেধো নামৈকষষ্টিতমোঽধ্যাযঃ||৬১||