1. aupadravikādhyāyaḥ

Adhikarana 1 (1-2) · Śloka 2

অথাত ঔপদ্রবিকমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

কল্পস্থানানন্তরমুত্তরতন্ত্রমারভ্যতে, যেন কল্পস্থানে বিষজস্যাগন্তুব্রণস্য বিষমুপদ্রবকারি নিজব্রণস্যাপি রিপুভিরবচারিতবিষমুপদ্রবভূতমিতি তচ্চিকিত্সিতভিহিতম্, অত উপদ্রবচিকিত্সাধিকারসামান্যাত্ সর্বোপদ্রবচিকিত্সার্থমুত্তরতন্ত্রারম্ভঃ; অথবা সবিংশমধ্যাযশতং পরিসমাপ্য পরিশিষ্টত্বাদুত্তরতন্ত্রং প্রতিপাদ্যং ভবতি| তস্য চ তন্ত্রস্যোপদ্রবানধিকৃত্য প্রবৃত্তত্বান্নিরুক্ত্যা ঔপদ্রবিকত্বং প্রাপ্তমপ্যধ্যাযে ব্যবস্থিতম্| তদুক্তং সূত্রে- ‘অধিকৃত্য কৃতং’ ইত্যাদি| স চ নিরুক্তিসম্পন্নোঽধ্যাযঃ প্রাক্ প্রতিপাদ্যো ভবতীত্যত আহ- অথাত ইত্যাদি| উপদ্রবান্ রোগানধিকৃত্য কৃতোঽধ্যায ঔপদ্রবিকঃ||১-২||

Adhikarana 2 (3) · Śloka 4

অধ্যাযানাং শতে বিংশে যদুক্তমসকৃন্মযা | বক্ষ্যামি বহুধা সম্যগুত্তরেঽর্থানিমানিতি ||৩|| ইদানীং তত্ প্রবক্ষ্যামি তন্ত্রমুত্তরমুত্তমম্ |৪|

ইদানীমারভ্যমাণস্যোত্তরতন্ত্রস্য সম্বন্ধং দর্শযন্নাহ- অধ্যাযানামিত্যাদি| যদ্যস্মাত্ কারণাদ্বিংশত্যধিকেঽধ্যাযশতে পুনঃ পুনরুক্তং মযা; কিং তদিত্যাহ- ‘ইমানর্থান্ বহুধোত্তরে বক্ষ্যামি’ ইতি; তত্তস্মাত্ কারণাদধুনোত্তরতন্ত্রং প্রবক্ষ্যামীতি সম্বন্ধঃ| কেচিত্ ‘যদ্বিংশত্যধিকে প্রোক্তমধ্যাযানাং শতে মযা’ ইতি পঠন্তি; অপরে তু ‘শতে সবিংশেঽধ্যাযানাং’ ইতি পঠন্তি||৩||-

Adhikarana 3 (4-7) · Śloka 8

নিখিলেনোপদিশ্যন্তে যত্র রোগাঃ পৃথগ্বিধাঃ ||৪|| শালাক্যতন্ত্রাভিহিতা বিদেহাধিপকীর্তিতাঃ | যে চ বিস্তরতো দৃষ্টাঃ কুমারাবাধহেতবঃ ||৫|| ষট্সু কাযচিকিত্সাসু যে চোক্তাঃ পরমর্ষিভিঃ | উপসর্গাদযো রোগা যে চাপ্যাগন্তবঃ স্মৃতাঃ ||৬|| ত্রিষষ্টী রসসংসর্গাঃ স্বস্থবৃত্তং তথৈব চ | যুক্তার্থা যুক্তযশ্চৈব দোষভেদাস্তথৈব চ ||৭|| যত্রোক্তা বিবিধা অর্থা রোগসাধনহেতবঃ |৮|

ইদানীমুত্তরতন্ত্রস্য নিখিলব্যাধিনিশ্চযচিকিত্সালক্ষণাং স্তুতিং নির্দিশন্নাহ- নিখিলেনেত্যাদি| নিখিলেন সামস্ত্যেন| যত্র যস্মিন্নুত্তরতন্ত্রে| পৃথগ্বিধা নানাপ্রকারাঃ| কে তে নানাপ্রকারা রোগা নিখিলেনোত্তরেঽভিধাস্যন্তে? ইত্যাহ- শালাক্যশাস্ত্রাভিহিতা ইত্যাদি| বিদেহাধিপকীর্তিতা ইতি নিমিপ্রণীতাঃ ষট্সপ্ততির্নেত্ররোগাঃ, ন করালভদ্রশৌনকাদিপ্রণীতাঃ| যে চ বিস্তরতো হষ্টা ইতি পার্বতকজীবকবন্ধকপ্রভৃতিভিঃ; কুমারাবাধহেতবঃ স্কন্দগ্রহপ্রভৃতযঃ| ষট্সু কাযচিকিত্সাসু অগ্নিবেশভেডজাতূকর্ণপরাশরহারীতক্ষারপাণীপ্রোক্তাসু| উপসর্গাদযো জ্বরাদযঃ| আগন্তবঃ অত্র উন্মাদাদযঃ| ননু ভূতনিমিত্তত্বাদুন্মাদাদীনাং কথমাগন্তুকত্বং? যতঃ প্রহারাদিকৃতা আগন্তবঃ; সত্যং, বাহ্যনিমিত্তত্বাদুন্মাদাদীনামাগন্তুকত্বম্| গযী তু, উপসর্গাদযঃ অমানুষোপসর্গাদযঃ, তে চাপস্মারোন্মাদা ভূতবিদ্যাভিহিতাঃ, ত এবাগন্তব ইতি ব্যাখ্যানযতি| উত্তরতন্ত্রে নিখিলেন রোগা এব প্রোক্তা উতান্যেঽপি প্রোক্তা? ইতি পৃষ্ট আহ- ত্রিষষ্টী রসসংসর্গা ইত্যাদি| যুক্তার্থাঃ প্রমাণোপপন্নার্থাঃ| যুক্তযঃ তন্ত্রযুক্তযঃ| অস্যাগ্রে কেচিত্ ‘বিদেহাধিপতিঃ শ্রীমান্ জনকো নাম বিশ্রুতঃ| আলম্ভযজ্ঞপ্রবণঃ সোঽযজদ্ব্রাহ্মণৈর্বৃতঃ|| তস্য যাগপ্রবৃত্তস্য কুপিতো ভগবান্ রবিঃ|| দৃষ্টিং প্রণাশযামাস সোঽনুতেপে মহত্তপঃ|| দীপ্তাংশুস্তপসা তেন তোষিতঃ প্রদদৌ পুনঃ|| চক্ষুর্বেদং প্রসন্নাত্মা সর্বভূতানুকম্পযা||’ ইতি পাঠং পঠন্তি ব্যাখ্যানযন্তি চ| তং চ বৃহত্পঞ্জিকাকারো ন পঠতি, তস্মান্মযাঽপি ন পঠিতো ন ব্যাখ্যাতশ্চ||৪-৭||-

Adhikarana 4 (8-9) · Śloka 9

মহতস্তস্য তন্ত্রস্য দুর্গাধস্যাম্বুধেরিব ||৮|| আদাবেবোত্তমাঙ্গস্থান্ রোগানভিদধাম্যহম্ | সঙ্খ্যযা লক্ষণৈশ্চাপি সাধ্যাসাধ্যক্রমেণ চ ||৯||

ইদানীং সর্বেন্দ্রিযাধিষ্ঠানত্বেন প্রাণাধিষ্ঠানত্বেন চ শিরঃ প্রধানমতঃ প্রথমং শিরঃস্থান্ ব্যাধীন্ কথযামীতি নির্দিশন্নাহ- মহত ইত্যাদি| তস্য উত্তরতন্ত্রস্যাদৌ উত্তমাঙ্গস্থান্ রোগানভিদধামীতি সম্বন্ধঃ| অম্বুধেরিব সমুদ্রস্যেব, মহতঃ অতিবিস্তীর্ণস্য, দুর্গাধস্য অগাধস্য| সঙ্খ্যযা ষট্সপ্তত্যা বিদেহাধিপপ্রোক্তযা, লক্ষণৈঃ ব্যঞ্জনৈঃ, চকারেণ হেতুচিকিত্সাভ্যাং; সাধ্যাসাধ্যক্রমেণ চেতি সাধ্যাসাধ্যপরিপাট্যা| অথবা লক্ষণৈঃ হেতুপূর্বরূপোপশযসম্প্রাপ্তিভিঃ; চকারেণ চিকিত্সিতমেবানুক্তং সমুচ্চীযতে, কেচিচ্চ ক্রমশব্দেনৈব চিকিত্সিতং গৃহ্ণন্তি||৮-৯||

Adhikarana 5 (10) · Śloka 11

বিদ্যাদ্দ্বযঙ্গুলবাহুল্যং স্বাঙ্গুষ্ঠোদরসম্মিতম্ | দ্ব্যঙ্গুলং সর্বতঃ সার্ধং ভিষঙ্নযনবুদ্বুদম্ ||১০|| সুবৃত্তং গোস্তনাকারং সর্বভূতগুণোদ্ভবম্ |১১|

তত্র সর্বেষূত্তমাঙ্গস্থেষু সঙ্খ্যাদিভির্বাচ্যেষু নযনগতরোগাভিধানং, সর্বেন্দ্রিযাণাং মধ্যে নযনস্য প্রধানত্বাত্; তত্রাপি নযনস্য পটলব্যধনিমিত্তমন্তঃপ্রবেশাযামবিস্তারৈর্মানমাকারং চ দর্শযন্নাহ- বিদ্যাদিত্যাদি| দ্ব্যঙ্গুলবাহুল্যমিদমন্তঃপ্রবেশপ্রমাণং, দ্ব্যঙ্গুলমানমাহ - স্বাঙ্গুষ্ঠোদরসম্মিতং; এতেনৈতদুক্তং ভবতি- স্বাঙ্গুষ্ঠোদরসম্মিতং যদঙ্গুলং তদঙ্গুলদ্বযপ্রমাণং নেত্রবুদ্বুদস্যান্তঃপ্রবেশং বিদ্যাত্| দ্ব্যঙ্গুলং সার্ধমিতি অর্ধতৃতীযাঙ্গুলমিত্যর্থঃ| সর্বত ইতি আযামতো বিস্তরশ্চেত্যর্থঃ| নযনবুদ্বুদম্ অক্ষিগোলকঃ| সর্বভূতগুণোদ্ভবং সর্বভূতেভ্যস্তদ্গুণেভ্যশ্চোদ্ভবো যস্য তত্তথাবিধং; সর্বভূতেভ্যস্তাবন্নেত্রবুদ্বুদং সিরাস্নায্বস্থিসহিতং সাশ্রুমার্গং চোত্পন্নং, তদ্গুণেভ্যশ্চ রক্তসিতকৃষ্ণগুণা উত্পন্নাঃ; এতেন গুণবদ্ভূতোত্পন্নমিত্যর্থঃ| কেচিদ্গুণশব্দেন ভূতপ্রসাদং কথযন্তি; তচ্চ ব্যাখ্যানং জেজ্জটায ন রোচতে||১০||-

Adhikarana 6 (11) · Śloka 12

পলং ভুবোঽগ্নিতো রক্তং বাতাত্ কৃষ্ণং সিতং জলাত্ ||১১|| আকাশাদশ্রুমার্গাশ্চ জাযন্তে নেত্রবুদ্বুদে |১২|

যেন ভূতেন নেত্রবুদ্বুদমারভ্যতে যেন চ রক্তাদয ইতি দর্শযন্নাহ- পলমিত্যাদি| পলং মাংসং, ভুবঃ পৃথিব্যাঃ; অগ্নিতো রক্তমিতি অগ্নিগুণাদ্রক্তং পিত্তরূপং; এবং সিতং জলাদিত্যত্রাপি ব্যাখ্যেযং; অশ্রুমার্গা অশ্রুস্রোতাংসি||১১||-

Adhikarana 7 (12-13) · Śloka 13

দৃষ্টিং চাত্র তথা বক্ষ্যে যথা ব্রূযাদ্বিশারদঃ ||১২|| নেত্রাযামত্রিভাগং তু কৃষ্ণমণ্ডলমুচ্যতে | কৃষ্ণাত্ সপ্তমমিচ্ছন্তি দৃষ্টিং দৃষ্টিবিশারদাঃ ||১৩||

ইদানীং তস্মিন্নেত্রবুদ্বুদে যদ্দৃষ্টিমণ্ডলং তস্য প্রমাণং পূর্বাচার্যপ্রতিপাদিতপ্রমাণানুরূপং প্রতিপাদযিতুমাহ- দৃষ্টিং চেত্যাদি| বিশারদো বিদেহঃ| কৃষ্ণাত্ সপ্তমমিতি কৃষ্ণমণ্ডলাত্ সপ্তমং ভাগং দৃষ্টিমিচ্ছন্তি| দৃষ্টিবিশারদাঃ শালাকিনঃ| এতত্ প্রমাণং পরমতমপ্যপ্রতিষিদ্ধত্বাদনুমতমেব| তস্য সপ্তমাংশস্য কিং প্রমাণং স্যাদিতি কথনায মসূরদলমাত্রামিত্যগ্রে নির্দেশঃ; অথবা শালাকিনাং পরমতমভিধায মসূরদলমাত্রামিতি স্বমতমভিধাস্যত্যাচার্যঃ| যদ্যেবং তর্হ্যাতুরোপক্রমণীযে ‘নবমস্তারকাংশো দৃষ্টিঃ’ ইতি কথমুক্তবান্? সত্যং, মহাপুরুষাণাং পূর্ণাযুষাং ভিন্নবিষযমভিধানমিতি ন দোষঃ, অতোঽন্যান্যপি সমাধানানি পঞ্জিকোক্তানি সন্তি, তানি বিস্তরভযান্ন লিখিতানি| কেচিদিমং পাঠমন্যথা কৃত্বাঽঽপাতনিকাপূর্বকং পঠন্তি, স চাভাবান্ন লিখিতঃ||১২-১৩||

Adhikarana 8 (14) · Śloka 14

মণ্ডলানি চ সন্ধীংশ্চ পটলানি চ লোচনে | যথাক্রমং বিজানীযাত্ পঞ্চ ষট্ চ ষডেব চ ||১৪||

ইদানীং নযনস্য রোগাধিষ্ঠানকথনায মণ্ডলাদিসঙ্খ্যামাহ- মণ্ডলানীত্যাদি| কেচিদেবং পঠন্তি- ‘লোচনে মণ্ডলান্যন্তান্ সন্ধীংশ্চ পটলানি চ| জানীযাত্ ক্রমশঃ পঞ্চ চতুরঃ ষট্ ষডেব চ’- ইতি| এষ পাঠো নিবন্ধকারৈর্দূষিতঃ||১৪||

Adhikarana 9 (15) · Śloka 15

পক্ষ্মবর্ত্মশ্বেতকৃষ্ণদৃষ্টীনাং মণ্ডলানি তু | অনুপূর্বং তু তে মধ্যাশ্চত্বারোঽন্ত্যা যথোত্তরম্ ||১৫||

তান্যেব পঞ্চমণ্ডলান্যাহ- পক্ষ্মবর্ত্মেত্যাদি| পক্ষ্মাদীনাং পঞ্চ মণ্ডলানি| তে তু মণ্ডলা অনুপূর্বং মধ্যাঃ, যথোত্তরং চান্ত্যাঃ||১৫||

Adhikarana 10 (16) · Śloka 16

পক্ষ্মবর্ত্মগতঃ সন্ধির্বর্ত্মশুক্লগতোঽপরঃ | শুক্লকৃষ্ণগতস্ত্বন্যঃ কৃষ্ণদৃষ্টিগতোঽপরঃ | ততঃ কনীনকগতঃ ষষ্ঠশ্চাপাঙ্গগঃ স্মৃতঃ ||১৬||

সন্ধীনাহ- পক্ষ্মেত্যাদি| কনীনকগতো নাসাসমীপেঽবস্থিতঃ , অপাঙ্গগো ভ্রূপুচ্ছান্তঃস্থিতঃ||১৬||

Adhikarana 11 (17) · Śloka 17

দ্বে বর্ত্মপটলে বিদ্যাচ্চত্বার্যন্যানি চাক্ষিণি | জাযতে তিমিরং যেষু ব্যাধিঃ পরমদারুণঃ ||১৭||

পটলান্যাহ- দ্বে ইত্যাদি| চত্বার্যন্যানি চাক্ষিণি অপরাণ্যপি চত্বারি পটলান্যক্ষিণি বিদ্যাত্| যেষু চতুর্ষু পটলেষু||১৭||-

Adhikarana 12 (18) · Śloka 19

তেজোজলাশ্রিতং বাহ্যং তেষ্বন্যত্ পিশিতাশ্রিতম্ | মেদস্তৃতীযং পটলমাশ্রিতং ত্বস্থি চাপরম্ ||১৮|| পঞ্চমাংশসমং দৃষ্টেস্তেষাং বাহুল্যমিষ্যতে |১৯|

ইদানীং তান্যেব তিমিরস্যাশ্রযভূতানি চত্বারি পটলানি চিকিত্সার্থং বিভজন্নাহ- তেজ ইত্যাদি| অত্র তেজঃশব্দেনালোচকতেজঃসমাশ্রযং সিরাগতং রক্তং বোদ্ধব্যম্| জলং ত্বগ্গতো রসধাতুঃ, বাহ্যম্ অক্ষিগোলকস্য প্রথমং পটলং; অন্যত্ দ্বিতীযং, বাহুল্যং স্থূলতা||১৮||-

Adhikarana 13 (19) · Śloka 20

সিরাণাং কণ্ডরাণাং চ মেদসঃ কালকস্য চ ||১৯|| গুণাঃ কালাত্ পরঃ শ্লেষ্মা বন্ধনেঽক্ষ্ণোঃ সিরাযুতঃ |২০|

তেষামেব ধাতূনাং পটলাশ্রযাণামুপধাতূনাং চ কর্মতো নযনেঽস্তিবং দর্শযন্নাহ- সিরাণামিত্যাদি| সিরাদীনাং কালকাস্থিপর্যন্তানাং পরা গুণা যথোত্তরমুত্কৃষ্টাঃ প্রসাদা, অক্ষ্ণোর্বন্ধনেঽন্যোন্যসংহননেঽধিকৃতাঃ|| তথা কালকাত্ পরঃ কালকাস্থ্নঃ সকাশাচ্ছ্লেষ্মা সিরাযুতোঽক্ষ্ণোর্বন্ধনে পর উত্কৃষ্টোঽধিকৃত ইতি পিণ্ডার্থঃ| সিরাণামিত্যত্র বহুবচনস্যাদ্যর্থবাচিত্বাদ্ধমনীনামপি গ্রহণম্| কণ্ডরাণামিত্যত্র কণ্ডরাশব্দঃ স্নাযুবাচকঃ| অন্যে তু সিরাদীনাং মেদঃপর্যন্তানাং গুণাঃ প্রসাদাঃ কালকস্যাক্ষ্ণোঃ কৃষ্ণভাগস্য বন্ধনেঽধিকৃতাঃ| তথা কালাত্ পরঃ কৃষ্ণভাগাদ্যঃ পরঃ শুক্লো ভাগস্তস্য বন্ধনে সিরাযুতঃ শ্লেষ্মা| কেচিদেতদর্থানুকূলেনৈবাত্র পাঠং পঠন্তি,- ‘সিরাণাং কণ্ডরাণাং চ মেদসঃ কৃষ্ণবন্ধনে| গুণাঃ কালাত্ পরঃ শ্লেষ্মা বন্ধনেঽক্ষ্ণোঃ সিরাযুতঃ’- ইতি||১৯||-

Adhikarana 14 (20) · Śloka 21

সিরানুসারিভির্দোষৈর্বিগুণৈরূর্ধ্বমাগতৈঃ ||২০|| জাযন্তে নেত্রভাগেষু রোগাঃ পরমদারুণাঃ |২১|

ইদানীং নেত্ররোগাণাং সামান্যাং সম্প্রাপ্তিমাহ- সিরানুসারিভিরিত্যাদি| সিরা অত্র নেত্রগতাঃ| বিগুণৈঃ প্রকুপিতৈঃ| নেত্রভাগেষু নেত্রাবযবেষু| নেত্ররাজিষ্বিতি কেচিত্ পঠন্তি; তত্র নেত্রাণ্যেব রাজযো নেত্ররাজযঃ| এতেন সর্বনেত্রাশ্রযা অপি লব্ধা ভবন্তি||২০||-

Adhikarana 15 (21-23) · Śloka 23

তত্রাবিলং সসংরম্ভমশ্রুকণ্ডূপদেহবত্ ||২১|| গুরূষাতোদরাগাদ্যৈর্জুষ্টং চাব্যক্তলক্ষণৈঃ | সশূলং বর্ত্মকোষেষু শূকপূর্ণাভমেব চ ||২২|| বিহন্যমানং রূপে বা ক্রিযাস্বক্ষি যথা পুরা | দৃষ্ট্বৈব ধীমান্ বুধ্যেত দোষেণাধিষ্ঠিতং তু তত্ ||২৩||

পূর্বরূপমাহ- তত্রেত্যাদি| আবিলম্ আকুলমশ্রুপূর্ণমিত্যর্থঃ | সসংরম্ভম্ ঈষচ্ছোফযুক্তম্| উপদেহো মলবৃদ্ধিঃ| গুরূষাতোদরাগাদ্যৈর্জুষ্টমিতি অত্রাদিশব্দঃ প্রত্যেকং যোজ্যঃ; তেন গুরুত্বাদিভিঃ শ্লেষ্মলিঙ্গৈঃ, ঊষাদিভিঃ পিত্তলিঙ্গৈঃ, তোদাদিভিঃ বাতালিঙ্গৈঃ, রাগাদিভিঃ শোণিতলিঙ্গৈঃ, জুষ্টং সেবিতম্| ননু যদি গুরুত্বাদীনি দোষলিঙ্গানি সন্তি তত্ কথং পূর্বরূপং? যতো দোষবিশেষেণাব্যক্তং লক্ষণং পূর্বরূপং; অত আহ- অব্যক্তলক্ষণৈরিতি|- গুরুত্বাদীনামপি তত্র ব্যক্ততা নাস্ত্যেবেত্যর্থঃ| সশূলম্ ঈষচ্ছূলমিত্যর্থঃ| বিহন্যমানমিত্যাদি| রূপে নীলপীতাদৌ যেন প্রকারেণ পূর্বমাসীত্ততঃ স্বযমেব বিহন্যমানং ক্রিযমাণবিঘাতম্| ক্রিযাসু নিমেষোন্মেষাদিষু চেতি| অন্যে তু ‘ক্রিযাস্বক্ষি যথা পুরা’ ইত্যত্র ‘ক্রিযাস্বক্ষ্যাগতক্লমম্’ ইতি পঠন্তি| তত্রাগতক্লমম্ আপ্তক্লমং, নির্ব্যাপারমিত্যর্থঃ||২১-২৩||

Adhikarana 16 (24) · Śloka 24

তত্র সম্ভবমাসাদ্য যথাদোষং ভিষগ্জিতম্ | বিদধ্যান্নেত্রজা রোগা বলবন্তঃ স্যুরন্যথা ||২৪||

পূর্বরূপে ক্রিযাং নির্দিশন্নাহ- তত্রেত্যাদি| তত্র নযনে, সম্ভবং রোগাণাং প্রাগুত্পত্তিং, আসাদ্য জ্ঞাত্বা, ভিষগ্জিতম্ ঔষধং, বিদধ্যাত্| ‘তত্র সঞ্চযমাসাদ্য’ ইতি কেচিত্ পঠন্তি; তত্র সঞ্চযশব্দশ্চযপ্রকোপপ্রসরাদিষু বর্ততে||২৪||

Adhikarana 17 (25) · Śloka 25

সঙ্ক্ষেপতঃ ক্রিযাযোগো নিদানপরিবর্জনম্ | বাতাদীনাং প্রতীঘাতঃ প্রোক্তো বিস্তরতঃ পুনঃ ||২৫||

কিং তদ্ভিষগ্জিতং পূর্বরূপে কুর্যাদিত্যাশঙ্ক্য সঙ্ক্ষেপবিস্তরাভ্যাং তত্র ভিষগ্জিতমাহ- সঙ্ক্ষেপত ইত্যাদি| ক্রিযাণাং সংশমনসংশোধনাদীনামযমেব সম্যগ্যোগঃ| কিং তদিত্যাহ- নিদানপরিবর্জনমিতি|- নিদানানাং দোষকারকহেতূনাং রোগকারকহেতূনাং চ সর্বতো বর্জনম্| বিস্তরেণ পুনর্বাতাদীনাং প্রতীঘাতঃ ক্রিযাযোগঃ প্রোক্তঃ| যেনৌষধপ্রযোগেণ বাতাদীনাং কোপঃ প্রতিহন্যতে স উপক্রম উক্ত ইত্যর্থঃ||২৫||

Adhikarana 18 (26-27) · Śloka 27

উষ্ণাভিতপ্তস্য জলপ্রবেশাদ্দূরেক্ষণাত্ স্বপ্নবিপর্যযাচ্চ | প্রসক্তসংরোদনকোপশোকক্লেশাভিঘাতাদতিমৈথুনাচ্চ ||২৬|| শুক্তারনালাম্লকুলত্থমাষনিষেবণাদ্বেগবিনিগ্রহাচ্চ | স্বেদাদথো ধূমনিষেবণাচ্চ ছর্দের্বিঘাতাদ্বমনাতিযোগাত্ | বাষ্পগ্রহাত্ সূক্ষ্মনিরীক্ষণাচ্চ নেত্রে বিকারান্ জনযন্তি দোষাঃ ||২৭||

কানি তানি নিদানানি যানি পরিহর্তব্যানীত্যাহ- উষ্ণেত্যাদি| অত্র কেচিত্ ‘এবং বিদাহ্যাপ্রতিকারিণোঽন্নং’ ইত্যাদি যাবত্ ‘অবাক্শিরোত্যুচ্ছ্রিতশাযিতস্য জ্বরোপতাপাদৃতুপর্যযাচ্চ’ ইত্যন্তং পঠন্তি , স চ পাঠঃ পুনরুক্তিদূষণভযান্নাঙ্গীকৃতঃ||২৬-২৭||

Adhikarana 19 (28) · Śloka 29

বাতাদ্দশ তথা পিত্তাত্ কফাচ্চৈব ত্রযোদশ | রক্তাত্ ষোডশ বিজ্ঞেযাঃ সর্বজাঃ পঞ্চবিংশতিঃ ||২৮|| তথা বাহ্যৌ পুনর্দ্বৌ চ রোগাঃ ষট্সপ্ততিঃ স্মৃতাঃ |২৯|

ইদানীং তানেব বিকারান্ বাতাদিসঙ্খ্যযা নির্দিশন্নাহ- বাতাদিত্যাদি| তথা পিত্তাত্ পিত্তাদপি দশৈব চ| বাহ্যৌ বহির্নিমিত্তভবৌ| তৌ কৌ? একোঽভিঘাতোত্পন্নঃ সনিমিত্তঃ, অন্যঃ সুরর্ষিগন্ধর্বাদিদর্শনাভিহতশক্তিরনিমিত্তঃ||২৮||-

Adhikarana 20 (29-30) · Śloka 31

হতাধিমন্থো নিমিষো দৃষ্টির্গম্ভীরিকা চ যা ||২৯|| যচ্চ বাতহতং বর্ত্ম ন তে সিধ্যন্তি বাতজাঃ | যাপ্যোঽথ তন্মযঃ কাচঃ সাধ্যাঃ স্যুঃসান্যমারুতাঃ ||৩০|| শুষ্কাক্ষিপাকাধীমন্থস্যন্দমারুতপর্যযাঃ |৩১|

ইদানীং তেষামেব বিকারাণাং বাতাদিভেদেন সাধ্যাসাধ্যযাপ্যত্বং দর্শযন্নাহ- হতেত্যাদি| তন্মযঃ বাতমযঃ| সাধ্যাঃ স্যুঃ সান্যমারুতা ইতি হতাধিমন্থাদযশ্চত্বারো বাতজা অসাধ্যাঃ, একশ্চ যাপ্যঃ, শুষ্কাক্ষিপাকাদযো রোগাঃ সান্যমারুতা অন্যতোবাতরোগেণ সহিতাঃ পঞ্চ সাধ্যাঃ||২৯-৩০||-

Adhikarana 21 (31-32) · Śloka 33

অসাধ্যো হ্রস্বজাড্যো যো জলস্রাবশ্চ পৈত্তিকঃ ||৩১|| পরিম্লাযী চ নীলশ্চ যাপ্যঃ কাচোঽথ তন্মযঃ | অভিষ্যন্দোঽধিমন্থোঽম্লাধ্যুষিতং শুক্তিকা চ যা ||৩২|| দৃষ্টিঃ পিত্তবিদগ্ধা চ ধূমদর্শী চ সিধ্যতি |৩৩|

অসাধ্য ইত্যাদি| পিত্তসম্ভবৌ দ্বৌ হ্রস্বজাড্যজলস্রাবৌ সাধযিতুমশক্যৌ, তথা পৈত্তিকৌ পরিম্লাযীনীলাখ্যৌ কাচৌ যাপনার্হৌ, অভিষ্যন্দাদযঃ ষট্ সাধ্যাঃ||৩১-৩২||-

Adhikarana 22 (33-35) · Śloka 35

অসাধ্যঃ কফজঃ স্রাবো যাপ্যঃ কাচশ্চ তন্মযঃ ||৩৩|| অভিষ্যন্দোঽধিমন্থশ্চ বলাসগ্রথিতং চ যত্ | দৃষ্টিঃ শ্লেষ্মবিদগ্ধা চ পোথক্যো লগণ্শ্চ যঃ ||৩৪|| ক্রিমিগ্রন্থিপরিক্লিন্নবর্ত্মশুক্লার্মপিষ্টকাঃ | শ্লেষ্মোপনাহঃ সাধ্যাস্তু কথিতাঃ শ্লেষ্মজেষু তু ||৩৫||

অসাধ্য ইত্যাদি| তন্মযঃ শ্লেষ্মজ ইত্যর্থঃ| কফজেষ্বেক এবাসাধ্যঃ, যাপ্যোঽপ্যেক এব, অভিষ্যন্দাদযশ্চৈকাদশ সাধ্যাঃ||৩৩-৩৫||

Adhikarana 23 (36-38) · Śloka 38

রক্তস্রাবোঽজকাজাতং শোণিতার্শোব্রণান্বিতম্ | শুক্রং ন সাধ্যং কাচশ্চ যাপ্যস্তজ্জঃ প্রকীর্তিতঃ ||৩৬|| মন্থস্যন্দৌ ক্লিষ্টবর্ত্ম হর্ষোত্পাতৌ তথৈব চ | সিরাজাতাঽঞ্জনাখ্যা চ সিরাজালং চ যত্ স্মৃতম্ ||৩৭|| পর্বণ্যথাব্রণং শুক্রং শোণিতার্মার্জুনশ্চ যঃ | এতে সাধ্যা বিকারেষু রক্তজেষু ভবন্তি হি ||৩৮||

রক্তস্রাব ইত্যাদি| রক্তস্রাবস্তথাঽজকা শোণিতার্শঃ ক্ষতশুক্রকং চ রক্তাজ্জাতং চতুষ্টযমপ্যসাধ্যং, তজ্জো রক্তজঃ কাচো যাপ্যঃ, মন্থস্যন্দাদয একাদশ সাধ্যাঃ||৩৬-৩৮||

Adhikarana 24 (39-42) · Śloka 42

পূযাস্রাবো নাকুলান্ধ্যমক্ষিপাকাত্যযোঽলজী | অসাধ্যাঃ সর্বজা যাপ্যঃ কাচঃ কোপশ্চ পক্ষ্মণঃ ||৩৯|| বর্ত্মাববন্ধো যো ব্যাধিঃ সিরাসু পিডকা চ যা | প্রস্তার্যর্মাধিমাংসার্ম স্নায্বর্মোত্সঙ্গিনী চ যা ||৪০|| পূযালসশ্চার্বুদং চ শ্যাবকর্দমবর্ত্মনী | তথাঽর্শোবর্ত্ম শুষ্কার্শঃ শর্করাবর্ত্ম যচ্চ বৈ ||৪১|| সশোফশ্চাপ্যশোফশ্চ পাকো বহলবর্ত্ম চ | অক্লিন্নবর্ত্ম কুম্ভীকা বিসবর্ত্ম চ সিধ্যতি ||৪২||

পূযেত্যাদি| পূযাস্রাবাদযশ্চত্বারোঽসাধ্যাঃ, কাচপক্ষ্মকোপৌ যাপ্যৌ, বর্ত্মাববন্ধাদয একোনবিংশতিঃ সাধ্যাঃ| কেচিত্তু ‘কাচঃ কোপশ্চ পক্ষ্মণ’ ইত্যত্র ‘যাপ্যো বর্ত্মাববন্ধশ্চ কাচঃ কোপশ্চ পক্ষ্মণঃ| পিল্লাখ্যশ্চাপি যো ব্যাধিঃ সিরাসু পিডকা চ যা’ ইতি পঠন্তি| স চ পাঠঃ পঞ্জিকযা নিরস্তঃ, তস্মাদস্মাভিরপি পরিত্যক্তঃ||৩৯-৪২||

Adhikarana 25 (43) · Śloka 43

সনিমিত্তোঽনিমিত্তশ্চ দ্বাবসাধ্যৌ তু বাহ্যজৌ |৪৩|

সনিমিত্ত ইত্যাদি| তৌ দ্বাবপি সন্নিপাতনিমিত্তৌ বিবৃতৌ|৪৩|-

Adhikarana 26 (43) · Śloka 43

ষট্সপ্ততির্বিকারাণামেষা সঙ্গ্রহকীর্তিতা ||৪৩||

ষডিত্যাদি| সঙ্ক্ষেপেণ কথিতা, অথবা সঙ্গ্রহেণ সম্যক্ দোষগ্রহেণ কথিতা||৪৩||

Adhikarana 27 (44-45) · Śloka 45

নব সন্ধ্যাশ্রযাস্তেষু বর্ত্মজাস্ত্বেকবিংশতিঃ | শুক্লভাগে দশৈকশ্চ চত্বারঃ কৃষ্ণভাগজাঃ ||৪৪|| সর্বাশ্রযাঃ সপ্তদশ দৃষ্টিজা দ্বাদশৈব তু | বাহ্যজৌ দ্বৌ সমাখ্যাতৌ রোগৌ পরমদারুণৌ | ভূয এতান্ প্রবক্ষ্যামি সঙ্খ্যারূপচিকিত্সিতৈঃ ||৪৫||

ইদানীং তেষাং দোষবিশেষেণ সঙ্গ্রহং প্রতিপাদ্য সন্ধ্যাদ্যাশ্রযমেদেনাপি সঙ্গ্রহং প্রতিপাদযন্নাহ- নবেত্যাদি| দ্বৌ বাহ্যজৌ সর্বাশ্রযত্বেঽপি দৃষ্ট্যাশ্রিতৌ মন্তব্যৌ, দৃষ্টেঃ প্রধানতমত্বাত্||৪৪-৪৫||

Adhikarana puShpikA · Śloka 1

ইতি সুশ্রুতসংহিতাযামুত্তরতন্ত্রান্তর্গতে শালক্যতন্ত্রে ঔপদ্রবিকো নাম প্রথমোঽধ্যাযঃ ||১||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে প্রথমোঽধ্যাযঃ||১||