17. dr̥ṣṭigatarōgapratiṣēdhādhyāyaḥ

Adhikarana 1 (1-2) · Śloka 2

অথাতো দৃষ্টিগতরোগপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

পক্ষ্মকোপপ্রতিষেধানন্তরং দৃষ্টিগতানামেব রোগাণামবশিষ্টত্বাত্তত্প্রতিষেধো যুক্ত ইত্যাহ- অথাত ইত্যাদি| দৃষ্টিগতরোগেত্যত্র দৃষ্টিশব্দেন দৃষ্ট্যাশ্রযং মণ্ডলমভিপ্রেতম্||১-২||

Adhikarana 2 (3) · Śloka 3

ত্রযঃ সাধ্যাস্ত্রযোঽসাধ্যা যাপ্যাঃ ষট্ চ ভবন্তি হি |৩|

দৃষ্টিগতদ্বাদশরোগাণাং মধ্যে সাধ্যানাং সাধনার্থং, যাপ্যানাং যাপনার্থমসাধ্যানাং পরিহারর্থমাহ- ত্রয ইত্যাদি| ধূমদর্শিপিত্তবিদগ্ধদৃষ্টিশ্লেষ্মবিদগ্ধদৃষ্টযস্ত্রযঃ সাধ্যাঃ| ত্রযোঽসাধ্যা ইতি হ্রস্বজাড্য(ত্য)নাকুলান্ধ্যগম্ভীরিকাখ্যাঃ| যাপ্যাঃ ষট্ চেতি অরুণাদযো বিচিত্রবর্ণান্তাঃ ষট্ কাচাঃ| চকারোঽত্র ভিন্নক্রমে; তেন যাপ্যশব্দানন্তরমুপাত্তেন চশব্দেন সাধ্যাসাধ্যত্বং সমুচ্চীযতে; তেন ষণ্ণাং রোগাণামবস্থাবিশেষেণ সাধ্যত্বযাপ্যত্বাসাধ্যত্বানি; তথা চ তে প্রাগবস্থাযাং সাধ্যাঃ, উত্তরাবস্থাযামসাধ্যাঃ, পরং শ্লৈষ্মিকং লিঙ্গনাশং বিহায|৩|-

Adhikarana 3 (3) · Śloka 3

তত্রৈকস্য প্রতীকারঃ কীর্তিতো ধূমদর্শিনঃ ||৩||

তত্র সাধ্যেষু ত্রিষু মধ্যে ধূমদর্শিনঃ প্রাগুক্তমেব প্রতীকারং নির্দিশন্নাহ- তত্রেত্যাদি| প্রতীকারঃ হেতুব্যাধিবিপরীতা ক্রিযা| কীর্তিতঃ পিত্তাভিষ্যন্দপ্রতিষেধে||৩||

Adhikarana 4 (4-5) · Śloka 6

দৃষ্টৌ পিত্তবিদগ্ধাযাং বিদগ্ধাযাং কফেন চ | পিত্তশ্লেষ্মহরং কুর্যাদ্বিধিং শস্ত্রক্ষতাদৃতে ||৪|| নস্যসেকাঞ্জনালেপপুটপাকৈঃ সতর্পণৈঃ | আদ্যে তু ত্রৈফলং পেযং সর্পিস্ত্রৈবৃতমুত্তরে ||৫|| তৈল্বকং চোভযোঃ পথ্যং কেবলং জীর্ণমেব বা |৬|

ইদানীং পিত্তকফবিদগ্ধদৃশোরপি হেতুব্যাধিবিপরীতং চিকিত্সিতমাহ- দৃষ্টৌ পিত্তবিদগ্ধাযামিত্যাদি| পিত্তশ্লেষ্মহরং পিত্তশ্লেষ্মাভিষ্যন্দহরং; তেন পিত্তবিদগ্ধদৃষ্টৌ পিত্তাভিষ্যন্দহরোবিধিঃ, কফবিদগ্ধদৃষ্টৌ তু কফাভিষ্যন্দহরো বিধিঃ| শস্ত্রক্ষতাদৃতে সিরাব্যধং বর্জযিত্বা| তমেব পিত্তশ্লেষ্মাভিষ্যন্দহরং বিধিমাহ- নস্যসেকেত্যাদি| তত্র কফবিদগ্ধদৃষ্ট্যাং কফাভিষ্যন্দহরং নস্যাদি, পিত্তবিদগ্ধদৃষ্ট্যাং তু পিত্তাভিষ্যন্দহরং নস্যাদি| পিত্তকফবিদগ্ধদৃষ্ট্যাং বৈশেষিকং সামান্যং চ স্নেহোপক্রমমাহ- আদ্যে তু ত্রৈফলমিত্যাদি| আদ্যে পিত্তবিদগ্ধদৃষ্ট্যাখ্যে, ত্রৈফলং ত্রিফলাক্বাথকল্কাভ্যাং সংস্কৃতং ঘৃতং; কেচিত্ ‘ত্রিফলাযা রসপ্রস্থং’ ইত্যাদিকং বিদেহোক্তং ত্রৈফলমামনন্তি; তন্নেচ্ছতি গযী| ত্রৈবৃতং ত্রিবৃতাসংস্কৃতং, ন পুনরপতানকোক্তম্| উত্তরে শ্লেষ্মবিদগ্ধদৃষ্ট্যাখ্যে ইতি| তিল্বকঃ পট্টিকারোধ্রস্তেন সংস্কৃতং তৈল্বকম্| কেবলম্ অসংস্কৃতম্| জীর্ণং পুরাণম্| অনুক্তমপি স্নেহাদনন্তরং বমনাদি কর্তব্যং, তন্ত্রান্তরদর্শনাত্||৪-৫||-

Adhikarana 5 (6-7) · Śloka 8

গৈরিকং সৈন্ধবং কৃষ্ণা গোদন্তস্য মষী তথা ||৬|| গোমাংসং মরিচং বীজং শিরীষস্য মনঃশিলা | বৃন্তং কপিত্থান্মধুনা স্বযঙ্গুপ্তাফলানি চ ||৭|| চত্বার এতে যোগাঃ স্যুরুভযোরঞ্জনে হিতাঃ |৮|

ইদানীং বহিঃপরিমার্জনার্থমঞ্জনযোগাংশ্চতুরো নির্দিশন্নাহ- গৈরিকমিত্যাদি| তত্র গৈরিকমাদৌ কৃত্বা গোদন্তমষীং যাবদেকো যোগঃ, গোমাংসাদিকো মনঃশিলাং যাবদ্দ্বিতীযো যোগঃ, বৃন্তং কপিত্থান্মধুনেতি তৃতীযো যোগঃ, স্বযঙ্গুপ্তাফলানি মধুনেতি চতুর্থো যোগঃ, ইতি যোগচতুষ্টযং প্রভাবাত্ পিত্তকফবিদগ্ধদৃষ্ট্যোর্হিতমিত্যর্থঃ| কেচিদত্র পিত্তবিদগ্ধদৃষ্টৌ রাত্রাবঞ্জনং, কফবিদগ্ধদৃষ্টৌ দিবেতি কালবিভাগং মন্যন্তে||৬-৭||-

Adhikarana 6 (8-9) · Śloka 10

কুব্জকাশোকশালাম্রপ্রিযঙ্গুনলিনোত্পলৈঃ ||৮|| পুষ্পৈর্হরেণুকৃষ্ণাহ্বাপথ্যামলকসংযুতৈঃ | সর্পির্মধুযুতৈশ্চূর্ণৈর্বেণুনাড্যামবস্থিতৈঃ ||৯|| অঞ্জযেদ্ দ্বাবপি ভিষক্ পিত্তশ্লেষ্মবিভাবিতৌ |১০|

অধুনা দ্বযোরপি পুষ্পাঞ্জনমাহ- কুব্জকাশোকেত্যাদি| কুব্জকাশোকৌ স্বনামপ্রসিদ্ধৌ, শালঃ সর্জভেদঃ, নলিনম্ ঈষদ্রক্তং পদ্মং, উত্পলং নীলোত্পলং, হরেণুঃ রেণুকা, কৃষ্ণাহ্বা পিপ্পলী, বেণুনাড্যামবস্থানং শক্ত্যুত্কর্ষার্থম্| পিত্তশ্লেষ্মবিভাবিতাবিতি পিত্তশ্লেষ্মবিদগ্ধদৃষ্টী ইত্যর্থঃ||৮-৯||-

Adhikarana 7 (10-11) · Śloka 12

আম্রজম্বূদ্ভবং পুষ্পং তদ্রসেন হরেণুকাম্ ||১০|| পিষ্ট্বা ক্ষৌদ্রাজ্যসংযুক্তং প্রযোজ্যমথবাঽঞ্জনম্ | নলিনোত্পলকিঞ্জল্কগৈরিকৈর্গোশকৃদ্রসৈঃ ||১১|| গুডিকাঞ্জনমেতদ্বা দিনরাত্র্যন্ধযোর্হিতম্ |১২|

ইদানীং দিনরাত্র্যন্ধাঞ্জনদ্বযমাহ- আম্রেত্যাদি| আম্রজম্বূদ্ভবং যত্ পুষ্পং তদ্রসেন রসচতুর্থাংশং হরেণুকাচূর্ণং পিষ্ট্বা রসক্রিযাপাকেন বিপাচ্য মধুঘৃতযুক্তং দিনরাত্র্যন্ধযোঃ পিত্তকফবিদগ্ধদৃষ্ট্যপরপর্যাযযোর্দ্রবাঞ্জনং যোজ্যম্| তথা নলিনাদিভির্গোশকৃদ্রসপিষ্টৈর্গুটিকাঞ্জনং হিতং; নলিনম্ ঈষদ্রক্তং পদ্মং, উত্পলং নীলোত্পলং, কিঞ্জল্কঃ কেশরঃ, স চ নলিনোত্পলযোরেব| কেচিত্ ‘গোযকৃদ্রসৈঃ’ ইতি পঠন্তি; গোশব্দস্য পশুবাচিত্বাদজাদযো গৃহ্যন্তে; যকৃদ্রসঃ কালখণ্ডরস ইতি ব্যাখ্যানযন্তি||১০-১১||-

Adhikarana 8 (12) · Śloka 13

রসাঞ্জনরসক্ষৌদ্রতালীশস্বর্ণগৈরিকম্ ||১২|| গোশকৃদ্রসসংযুক্তং পিত্তোপহতদৃষ্টযে |১৩|

অধুনা দিবান্ধ্যে বৈশেষিকং চূর্ণাঞ্জনমাহ- রসাঞ্জনেত্যাদি| রস ইতি জাতীপত্ররস ইত্যর্থঃ, আমলকীপত্ররস ইত্যন্যে| অত্র দ্রবদ্রব্যৈঃ কঠিনদ্রব্যভাবনাং বিধায চূর্ণাঞ্জনং কর্তব্যম্| পিত্তোপহতদৃষ্টযে পিত্তবিদগ্ধদৃষ্টযে||১২||-

Adhikarana 9 (13-14) · Śloka 14

শীতং সৌবীরকং বাঽপি পিষ্ট্বাঽথ রসভাবিতম্ ||১৩|| কূর্মপিত্তেন মতিমান্ ভাবযেদ্রৌহিতেন বা | চূর্ণাঞ্জনমিদং নিত্যং প্রযোজ্যং পিত্তশান্তযে ||১৪||

অপরমপি চূর্ণাঞ্জনমাহ- শীতেত্যাদি| শীতং রসঞ্জনং, কর্পূরমন্যে| সৌবীরকং সৌবীরাঞ্জনম্| রসভাবিতমিতি চতুষ্পদমৃগপক্ষিমাংসরসভাবিতমিত্যর্থঃ| কেচিদ্রস ইতি সামান্যোক্ত্যা রসাঞ্জনসৌবীরাঞ্জনযোরেব রসং সঙ্গৃহ্ণন্তি, তদভাবে চ তযোরেব চূর্ণাঢকমুদকাঢকে প্রক্ষিপ্য অহোরাত্রপর্যুষিতং প্রাতর্মর্দিতং পূতং স্বরসবত্ প্রযোজ্যমিত্যর্থঃ| কেচিচ্চ প্রস্তুতত্বাদ্রসশব্দেন গোশকৃদ্রসং গৃহ্ণন্তি||১৩-১৪||

Adhikarana 10 (15) · Śloka 15

কাশমরীপুষ্পমধুকদার্বীরোধ্ররসাঞ্জনৈঃ | সক্ষৌদ্রমঞ্জনং তদ্বদ্ধিতমত্রামযে সদা ||১৫||

দিবান্ধ্যে কল্কাঞ্জনমাহ- কাশ্মরীপুষ্পেত্যাদি| অত্রেতি পিত্তবিদগ্ধদৃষ্টৌ| কেচিত্ কাশ্মীরপুষ্পাদিরসক্রিযাঞ্জনমেতদিত্যাহুঃ||১৫||

Adhikarana 11 (16) · Śloka 16

স্রোতোজং সৈন্ধবং কৃষ্ণাং রেণুকাং চাপি পেষযেত্ | অজামূত্রেণ তা বর্ত্যঃ ক্ষণদান্ধ্যাঞ্জনে হিতাঃ ||১৬||

রাত্র্যান্ধ্যে কফবিদগ্ধদৃষ্ট্যপরপর্যাযে বর্ত্যঞ্জনমাহ- স্রোতোজমিত্যাদি||১৬||

Adhikarana 12 (17) · Śloka 18

কালানুসারিবাং কৃষ্ণাং নাগরং মধুকং তথা | তালীশপত্রং ক্ষণদে গাঙ্গেযং চ যকৃদ্রসে ||১৭|| কৃতাস্তা বর্তযঃ পিষ্টাশ্ছাযাশুষ্কাঃ সুখাবহাঃ |১৮|

অপরমপি নক্তন্ধ্যে বর্ত্যঞ্জনমাহ- কালানুসারিবামিত্যাদি| কালানুসারিবা তগরং, ক্ষণদে দ্বে হরিদ্রে, গাঙ্গেযং মুস্তা| যকৃদ্রসে ছাগল্যাদিকালখণ্ডরসে; অন্যে ‘শকৃদ্রসে’ ইতি পঠন্তি, শকৃদ্রসে গোমযরসে ইতি ব্যাখ্যানযন্তি||১৭||-

Adhikarana 13 (18) · Śloka 19

মনঃশিলাভযাব্যোষবলাকালানুসারিবাঃ ||১৮|| সফেনা বর্তযঃ পিষ্টাশ্ছাগক্ষীরসমন্বিতাঃ |১৯|

অন্যদপি রাত্র্যান্ধ্যে বর্ত্যঞ্জনমাহ- মনঃশিলেত্যাদি||১৮||-

Adhikarana 14 (19-20) · Śloka 21

গোমূত্রপিত্তমদিরাযকৃদ্ধাত্রীরসে পচেত্ ||১৯|| ক্ষুদ্রাঞ্জনং রসেনান্যদ্যকৃতস্ত্রৈফলেঽপি বা | গোমূত্রাজ্যার্ণবমলপিপ্পলীক্ষৌদ্রকট্ফলৈঃ ||২০|| সৈন্ধবোপহিতং যুঞ্জ্যান্নিহিতং বেণুগহ্বরে |২১|

ইদানীং রসক্রিযাঞ্জনত্রিতযমাহ- গোমূত্রেত্যাদি| অত্র মূত্রপিত্তযকৃন্ত্যজাদীনামেব| মদিরা পিষ্টসুরা| গোমূত্রাদিরসেন ক্ষুদ্রাঞ্জনং বিপচেদিত্যেকো যোগঃ, ক্ষুদ্রাঞ্জনং রসক্রিযাঞ্জনমিত্যর্থঃ; রসেন যকৃত ইতি দ্বিতীযো যোগঃ; ত্রৈফলেঽপি বেতি তৃতীযো যোগঃ| গোমূত্রাজ্যার্ণবমলেত্যাদি| এতদ্রসক্রিযাঞ্জনত্রিতযমপ্যেকৈকং গোমূত্রাজ্যাদিভিঃ সংযুক্তং বেণুগহ্বরে বংশনলিকাভ্যন্তরে ব্যবস্থিতমঞ্জনং রাত্র্যন্ধে যুঞ্জ্যাদিত্যর্থঃ||১৯-২০||-

Adhikarana 15 (21-22) · Śloka 22

মেদো যকৃদ্ধৃতং চাজং পিপ্পল্যঃ সৈন্ধবং মধু ||২১|| রসমামলকাচ্চাপি পক্বং সম্যঙ্নিধাপযেত্ | কোশে খদিরনির্মাণে তদ্বত্ ক্ষুদ্রাঞ্জনং হিতম্ ||২২||

শ্লেষ্মবিদগ্ধদৃষ্ট্যামপরমপি রসক্রিযাঞ্জনমাহ- মেদো যকৃদ্ধৃতং চাজমিত্যাদি| মেদো যকৃদ্ধৃতং চেতি ত্রযমেতচ্ছগলীনাম্| মেদোযকৃতি সর্বমেকীকৃত্য রসক্রিযাপাকেন পক্বং খদিরতরুসারনির্মিতভাজনে সূক্ষ্মমুখে বৃহন্মধ্যকুহরে নিক্ষিপ্তং ক্ষুদ্রাঞ্জনং রসক্রিযাঞ্জনাপরপর্যাযং হিতমিত্যর্থঃ||২১-২২||

Adhikarana 16 (23) · Śloka 23

হরেণুমগধাজাস্থিমজ্জৈলাযকৃদন্বিতম্ | যকৃদ্রসেনাঞ্জনং বা শ্লেষ্মোপহতদৃষ্টযে ||২৩||

অন্যদপি কফবিদগ্ধদৃষ্টাবঞ্জনমাহ- হরেণ্বিত্যাদি| হরেণুঃ হরেণুকা, মগধাজাস্থিমজ্জেতি পিপ্পলীবিতুষবীজানি| এতদ্ হরেণ্বাদি যকৃদ্রবেণ পিষ্টমঞ্জনং শ্লেষ্মোপহতদৃষ্টযে নক্তান্ধায হিতমিত্যর্থঃ| ইদমঞ্জনমেকীযমতাভিপ্রাযেণ গযদাসাচার্যেণ পঠিতং ব্যাখ্যাতং চ||২৩||

Adhikarana 17 (24) · Śloka 24

বিপাচ্য গোধাযকৃদর্ধপাটিতং সুপূরিতং মাগধিকাভিরগ্নিনা | নিষেবিতং তদ্যকৃদঞ্জনেন নিহন্তি নক্তান্ধ্যমসংশযং খলু ||২৪||

ইদানীং নক্তান্ধ্যে কফবিদগ্ধদৃষ্ট্যপরপর্যাযে প্রযোগমাহ- বিপাচ্যেত্যাদি| গোধাযকৃদর্ধপাটিতং কৃত্বা পিপ্পলীভিঃ পূরিতং শুচিমৃদা লিপ্তমগ্নিনা বিপাচ্য ত্র্যহং ভক্ষিতং সত্, তথা তদন্তঃস্বিন্না পিপ্পলী মধুনাঽঞ্জনেন নিঃসন্দেহং নক্তান্ধ্যং নিহন্তীত্যর্থঃ||২৪||

Adhikarana 18 (25) · Śloka 25

তথা যকৃচ্ছাগভবং হুতাশনে বিপাচ্য সম্যঙ্মগধাসমন্বিতম্ | প্রযোজিতং পূর্ববদাশ্বসংশযং জযেত্ ক্ষপান্ধ্যং সকৃদঞ্জনান্নৃণাম্ ||২৫||

নক্তান্ধ্যেঽপরমপি প্রযোগমাহ- তথা যকৃচ্ছাগভবমিত্যাদি| প্রযোজিতং পূর্ববদিতি যকৃদ্ভক্ষণবিধিনা প্রযোজিতং, পিপ্পলী পুনরঞ্জনবিধিনেত্যর্থঃ||২৫||

Adhikarana 19 (26) · Śloka 26

প্লীহা যকৃচ্চাপ্যুপভক্ষিতে উভে প্রকল্প্য শূল্যে ঘৃততৈলসংযুতে | তে সার্ষপস্নেহসমাযুতেঽঞ্জনং নক্তান্ধ্যমাশ্বেব হতঃ প্রযোজিতে ||২৬||

অপরমপি নক্তান্ধ্যযোগমাহ- প্লীহেত্যাদি| প্লীহা উদরবামপার্শ্বস্থং মাংসখণ্ডং, যকৃত্ দক্ষিণপার্শ্বস্থং কালখণ্ডাপরপর্যাযং, তে উভে অপি প্রস্তুতত্বাদ্ গোধাচ্ছাগযোরেব গ্রাহ্যে| প্রকল্প্য খণ্ডশঃ কল্পযিত্বা| শূল্যে শূলপাকপক্বে||২৬||

Adhikarana 20 (27) · Śloka 27

নদীজশিম্বীত্রিকটূন্যথাঞ্জনং মনঃশিলা দ্বে চ নিশে য(শ)কৃদ্গবাম্ | সচন্দনেযং গুটিকাঽথবাঽঞ্জনং প্রশস্যতে বৈ দিবসেষ্বপশ্যতাম্ ||২৭||

ইদানীং দিবান্ধ্যে পিত্তবিদগ্ধদৃষ্ট্যপরপর্যাযেঽঞ্জনমাহ- নদীজেত্যাদি| নদীজং সৈন্ধবং; শিম্বীশব্দেনাত্র হরিতমুদ্গাঃ, চক্ষুষ্যত্বাত্; অন্যে শিম্বীস্থানে শিম্বেতি পঠন্তি, তত্রাপি স এবার্থঃ; অঞ্জনং সৌবীরাঞ্জনম্| গবাং ছাগাদীনাম্| চন্দনং রক্তচন্দনম্| গুটিকা বটীকৃত্যাঞ্জনং; অথবাঽঞ্জনমিতি চূর্ণাঞ্জনমথবেত্যর্থঃ| বিপাচ্য গোধাযকৃদর্ধপাটিতমিত্যাদিকং সচন্দনেযং গুটিকাঽথবাঞ্জনমিতি পর্যন্তং যোগচতুষ্টযং নিবন্ধকারৈরনার্ষীকৃতং, তেরৈব সুভাষিতত্বাদুপযোগার্হত্বাচ্চ ব্যাখ্যাতং; তস্মান্মযাঽপি পঠিতং ব্যাখ্যাতং চ||২৭||

Adhikarana 21 (28) · Śloka 28

ভবন্তি যাপ্যাঃ খলু যে ষডামযা হরেদসৃক্তেষু সিরাবিমোক্ষণৈঃ | বিরেচযেচ্চাপি পুরাণসর্পিষা বিরেচনাঙ্গোপহিতেন সর্বদা ||২৮||

ইদানীং সাধ্যানাং চিকিত্সিতমভিধায যাপ্যানাং চিকিত্সিতমাহ- ভবন্তীত্যাদি| ভবন্তি যাপ্যা ইতি অত্র ‘উপেক্ষ্যমাণা’ ইতি শেষঃ, এতেন তেষাং প্রগবস্থাযাং সাধ্যত্বম্| যাপ্যাঃ ষডামযা ইতি| ননু শ্লৈষ্মিককাচস্য সাধ্যত্বাত্ কথং ষড্ যাপ্যাঃ? সত্যং, যাপ্যবাহুল্যাদেতদ্ব্যপদেশঃ| তেষ্বিতি প্রথমদ্বিতীযপটলপ্রাপ্তেষু তিমিরাবস্থেষু কাচেষ্বিত্যর্থঃ, ন তু রাগপ্রাপ্তেষু, যতস্তত্র সিরাব্যধনিষেধঃ; তথা চোক্তং- ‘তিমিরে রাগিণি ভিষক্ সিরামোক্ষং বিবর্জযেত্’- ইতি| সিরাবিমোক্ষণৈরিত্যনেনৈব স্নেহস্বেদৌ পূর্বকর্মসঞ্জ্ঞকাবাক্ষিপ্তৌ মন্তব্যৌ| বিরেচনাঙ্গোপহিতেনেতি বিরেচনদ্রব্যসংস্কৃতেনেত্যর্থঃ||২৮||

Adhikarana 22 (29) · Śloka 30

পযোবিমিশ্রং পবনোদ্ভবে হিতং বদন্তি পঞ্চাঙ্গুলতৈলমেব তু | ভবেদ্ধৃতং ত্রৈফলমেব শোধনং বিশেষতঃ শোণিতপিত্তরোগযোঃ ||২৯|| ত্রিবৃদ্বিরেকঃ কফজে প্রশস্যতে ত্রিদোষজে তৈলমুশন্তি তত্কৃতম্ |৩০|

সর্বতিমিরাণাং সামান্যং শোধনমভিধায বিশেষশোধনমাহ- পযোবিমিশ্রমিত্যাদি| পঞ্চাঙ্গুলতৈলম্ এরণ্ডতৈলম্| বিশেষতঃ শোণিতপিত্তরোগযোরিতি ত্রৈফলং ঘৃতং সর্বতিমিরেষু হিতং, অনযোর্বিশেষত ইত্যর্থঃ| ত্রিবৃদ্ধিরেক ইতি ত্রিবৃতা সিদ্ধঘৃতেন বিরেক ইত্যর্থঃ| তত্কৃতমিতি ত্রিবৃতা সংস্কৃতমিত্যর্থঃ; অন্যে তু তৈর্বাতপিত্তকফঘ্নৈর্দ্রব্যৈঃ সংস্কৃতং তত্কৃতং বদন্তি| দ্বন্দ্বজেষু তিমিরেষু ত্বনুক্তমপি সংশোধনং ব্যামিশ্রং কর্তব্যম্||২৯||-

Adhikarana 23 (30) · Śloka 31

পুরাণসর্পিস্তিমিরেষু সর্বশো হিতং ভবেদাযসভাজনস্থিতম্ ||৩০|| হিতং চ বিদ্যাত্ত্রিফলাঘৃতং সদা কৃতং চ যন্মেষবিষাণনামভিঃ |৩১|

সংশোধনমভিধায সামান্যং সংশমনমাহ- পুরাণসর্পিরিত্যাদি| সর্বত ইতি পানাভ্যঞ্জননস্যাদিষু, সর্বেষ্বেব বাতাদিজন্যনযনবিকারেষ্বিত্যন্যে| ত্রিফলাঘৃতং ত্রিফলাক্বাথকল্কপক্বং ঘৃতম্| কৃতং সংস্কৃতং ‘ঘৃতং’ ইতি শেষঃ| মেষবিষাণনামভিঃ মেষশৃঙ্গীফলৈরিত্যর্থঃ||৩০||-

Adhikarana 24 (31) · Śloka 32

সদাঽবলিহ্যাত্ত্রিফলং সুচূর্ণিতাং ঘৃতপ্রগাঢাং তিমিরেঽথ পিত্তজে ||৩১|| সমীরজে তৈলযুতাং কফাত্মকে মধুপ্রগাঢাং বিদধীত যুক্তিতঃ |৩২|

সামান্যং সংশমনমভিধায বিশেষসংশমনমাহ- সদেত্যাদি| সদেতি নিত্যগে আবস্থিকে চ কালে ইত্যর্থঃ| পিত্তজে ইত্যত্রানুক্তমপি রক্তজং তিমিরং বোদ্ধব্যং, তত্রাপি ঘৃতেন ত্রিফলাপ্রযোগঃ| কেচিত্ “সদাঽবলিহ্যাত্ত্রিফলাং সুচূর্ণিতং ঘৃতপ্রগাঢাং তিমিরাতুরো নরঃ| কফাভিভূতঃ খলু তৈলসংযুতাং মধুপ্রগাঢামপি বা প্রযোজযেত্” ঈদৃশং পাঠং পঠন্তি; স চ জেজ্জটাচার্যেণ দূষিতঃ; তস্মাত্ পূর্বপাঠ এব ন্যায্যঃ||৩১||-

Adhikarana 25 (32) · Śloka 32

গবাং শকৃত্ক্বাথবিপক্বমুত্তমং হিতং তু তৈলং তিমিরেষু নাবনম্ ||৩২||

ইদানীং শ্লেষ্মতিমিরে নস্যমাহ- গবাং শকৃদিত্যাদি| সামান্যস্নেহপাকপরিভাষযা গোশকৃত্ক্বাথেন তৈলমকল্কং পক্তব্যং, এতত্তৈলং তন্ত্রান্তরদর্শনাত্ কফজে তিমিরে বোদ্ধব্যং; অন্যে তু তিমিরেষ্বিতি বহুবচনাত্ সর্বতিমিরেষু বোদ্ধব্যমিতি বদন্তি||৩২||

Adhikarana 26 (33) · Śloka 33

হিতং ঘৃতং কেবল এব পৈত্তিকে হ্যজাবিকং যন্মধুরৈর্বিপাচিতম্ |৩৩|

পিত্তজে তিমিরে নস্যমাহ- হিতমিত্যাদি| কেবল এব পৈত্তিকে নান্যদোষসম্পৃক্তে তিমিরে ইত্যর্থঃ| মধুরৈর্বিপাচিতমিতি কাকোল্যাদিক্বাথকল্কবিপক্বমিত্যর্থঃ| ‘কেবল এব’ ইত্যত্র ‘কেবলমেব’ ইতি কেচিত্ পঠন্তি, তত্র কেবলমসংস্কৃতমিত্যর্থঃ, অজাবিকং ঘৃতমিতি চ ব্যাখ্যানযন্তি|৩৩|-

Adhikarana 27 (33) · Śloka 33

তৈলং স্থিরাদৌ মধুরে চ যদ্গণে তথাঽণুতৈলং পবনাসৃগুত্থযোঃ ||৩৩||

বাতরক্তজযোস্তিমিরযোর্নস্যমাহ- তৈলমিত্যাদি| স্থিরাদৌ বিদারিগন্ধাদৌ, সিদ্ধমিতি শেষঃ| তথা মধুরে গণে কাকোল্যাদিকে যত্ সিদ্ধং, তথাঽণুতৈলং বাতব্যাধিচিকিত্সিতোক্তম্||৩৩||

Adhikarana 28 (34) · Śloka 34

সহাশ্বগন্ধাতিবলাবরীশৃতং হিতং চ নস্যে ত্রিবৃতং যদীরিতম্ | জলোদ্ভবানূপজমাংসসংস্কৃতাদ্ধৃতং বিধেযং পযসো যদুত্থিতম্ ||৩৪||

কেবলবাতজে তিমিরে নস্যমাহ- সহেত্যাদি| সহা মুদ্গপর্ণী, মাষপর্ণীত্যন্যে| বরী শতাবরী| এতৈর্বিপক্বং তৈলং বাতারব্ধে তিমিরে নস্যে হিতম্| ত্রিবৃতং যদীরিতমিতি মহাবাতব্যাধিচিকিত্সিতে ত্রিভিঃ সর্পির্বসামজ্জভির্বৃতং ত্রিবৃতং তৈলং যদীরিতং তদত্র হিতং; কেচিদেতৈরেব মুদ্গপর্ণ্যাদিভির্দ্রব্যৈস্ত্রিবৃতং তৈলং সিদ্ধং বাতারব্ধতিমিরে নস্যে হিতমিতি বদন্তি| বাতারব্ধতিমিরে দ্বিতীযং নস্যমাহ - জলোদ্ভবেত্যাদি| জলোদ্ভবা মত্সাদযঃ, আনূপাঃ কূলচরাঃ, তেষাং মাংসেন ক্ষীরপাককল্পেন সংস্কৃতাদ্দুগ্ধান্মথ্যমানাদ্ যদ্ধৃতমুদ্ধৃতং তত্ সহাশ্বগন্ধাদিভিরনন্তরোক্তৈর্বিপক্বং বাতারব্ধতিমিরে নস্যং বিধেযম্| কেচিজ্জলোদ্ভবশব্দেন পদ্মাদীনি গৃহ্ণন্তি, তন্নেচ্ছন্তি নিবন্ধকারাঃ||৩৪||

Adhikarana 29 (35) · Śloka 35

সসৈন্ধবঃ ক্রব্যভুগেণমাংসযোর্হিতঃ সসর্পিঃ সমধুঃ পুটাহ্বযঃ |৩৫|

নস্যমভিধায পুটপাকমাহ- সসৈন্ধব ইত্যাদি| ক্রব্যভুজো গৃধ্রাদযঃ, এণঃ কৃষ্ণসারঃ| পুটাহ্বযঃ পুটপাকঃ| তস্য বিধানং ক্রিযাকল্পে বক্ষ্যতি|৩৫|-

Adhikarana 30 (35) · Śloka 35

বসাঽথ গৃধ্রোরগতাম্রচূডজা সদা প্রশস্তা মধুকান্বিতাঽঞ্জনে ||৩৫||

বাতজতিমিরে পুটপাকমভিধাযাঞ্জনম্রাহ- বসেত্যাদি| উরগঃ কৃষ্ণসর্পঃ, তাম্রচূডঃ কুক্কুটঃ, মধুকান্বিতা যষ্টীমধুকসংযুতা; এতা গৃধ্রাদিজাস্তিস্রো বসা যষ্টীমধুকচূর্ণান্বিতা একশো দ্বিশঃ সমস্তা বাঽঞ্জনে হিতাঃ||৩৫||

Adhikarana 31 (36) · Śloka 36

প্রত্যঞ্জনং স্রোতসি যত্সমুত্থিতং ক্রমাদ্রসক্ষীরঘৃতেষু ভাবিতম্ |৩৬|

ইদানীং বাতজতিমিরে স্নেহাঞ্জনেন জডীভূতস্য চক্ষুষ উপকারার্থং প্রত্যঞ্জনমাহ- প্রত্যঞ্জনমিত্যাদি| যত্ অঞ্জনস্যানু প্রযুজ্যতে তত্ প্রত্যঞ্জনম্| তত্র তীক্ষ্ণাঞ্জনস্য মৃদ্বঞ্জনমনু প্রযুজ্যতে, মৃদ্বঞ্জনস্য তীক্ষ্ণাঞ্জনম্| স্রোতসি যত্ সমুত্থিতং সিন্ধুস্রোতসি বর্ণসার্পণসযোঃ স্রোতসি বা যত্ সমুত্থিতং স্রোতোঞ্জনং, সৌবীরাঞ্জনমিত্যন্যে| রসশ্চ চক্ষুষ্যমৃগপক্ষিমাংসরসঃ| পৃথক্ পৃথক্ সপ্তাহং রসক্ষীরঘৃতেষু ভাবিতং চূর্ণাঞ্জনং প্রযোজ্যম্|৩৬|-

Adhikarana 32 (36-37) · Śloka 37

স্থিতং দশাহত্রযমেতদঞ্জনং কৃষ্ণোরগাস্যে কুশসম্প্রবেষ্টিতে ||৩৬|| তন্মালতীকোরকসৈন্ধবাযুতং সদাঽঞ্জনং স্যাত্তিমিরেঽথ রাগিণি | সুভাবিতং বা পযসা দিনত্রযং কাচাপহং শাস্ত্রবিদঃ প্রচক্ষতে ||৩৭||

অরাগিতিমিরচিকিত্সিতং প্রতিপাদ্য বাতজরাগিতিমিরাচিকিত্সিতং প্রতিপাদযন্নাহ- স্থিতমিত্যাদি| দশাহত্রযং মাসমেকমিত্যর্থঃ| এতদঞ্জনং স্রোতোঞ্জনং, সৌবীরঞ্জনমিত্যন্যে| ততঃ স্রোতোঞ্জনং কৃষ্ণসর্পমুখে যথোদিতপ্রকারেণ নিবাসিতং পশ্চান্মালতীকোরকসৈন্ধবেন সমুদাযসমভাগেন যুতমঞ্জনং কার্যং; মালতীকোরকাঃ জাতীকুসুমানি| তিমিরেঽথ রাগিণি বাতকাচে ইত্যর্থঃ| বাতকাচেঽপরমপ্যঞ্জনমাহ- সুভাবিতমিত্যাদি| অন্যে তু জাতীকোরকযুক্তত্বাত্ বাতপিত্তকাচাপহং বদন্তি, তন্নেচ্ছতি গযী||৩৬-৩৭||

Adhikarana 33 (38) · Śloka 38

হবির্হিতং ক্ষীরভবং তু পৈত্তিকে বদন্তি নস্যে মধুরৌষধৈঃ কৃতম্ | তত্তর্পণে চৈব হিতং প্রযোজিতং সজাঙ্গলস্তেষু চ যঃ পুটাহ্বযঃ ||৩৮||

পিত্ততিমিররোগচিকিত্সিতমাহ- হবিরিত্যাদি| হবিঃ ঘৃতং, ক্ষীরভবং ক্ষীরমথনোদ্ভূতং, পৈত্তিকে ‘তিমিরে’ ইতি শেষঃ| মধুরৌষধৈঃ কাকোল্যাদিভিঃ, কৃতং সংস্কৃতং; অন্যে তু ক্ষীরমপি কাকোল্যদিভিঃ সাধিতং মন্যন্তে, তেন কাকোল্যাদিসাধিতাত্ ক্ষীরান্মথ্যমানাদুত্থিতং ঘৃতং কাকোল্যাদিভিরেব সাধিতং পিত্তজতিমিরে হিতমিতি বদন্তি| কেচিদিহ কৃতমিত্যস্য স্থানে শৃতমিতি পঠন্তি, তত্র শৃতং পক্বম্| তত্তর্পণ ইত্যাদি| ন কেবলং তদ্ঘৃতং নস্যে হিতং, কিং তর্হি তর্পণেঽক্ষিপূরণপর্যাযে প্রযোজিতং হিতম্| তথা তেষু মধুরৌষধেষু যো জাঙ্গলমাংসযুক্তঃ পুটপাকঃ স পিত্ততিমিরে স্নেহার্থং হিতঃ||৩৮||

Adhikarana 34 (39) · Śloka 39

রসাঞ্জনক্ষৌদ্রসিতামনঃশিলাঃ ক্ষুদ্রাঞ্জনং তন্মধুকেন সংযুতম্ |৩৯|

পিত্ততিমিরে রসক্রিযাঞ্জনমাহ- রসাঞ্জনমিত্যাদি| রসাঞ্জনাদিকৃতং ক্ষুদ্রাঞ্জনং ফাণিতাকৃতি পিত্ততিমিরে হিতম্| ক্ষুদ্রাঞ্জনমিত্যত্র কেচিদ্রসাঞ্জনমিতি পঠন্তি, তত্রাপি স এবার্থঃ|৩৯|-

Adhikarana 35 (39) · Śloka 39

সমাঞ্জনং বা কনকারোদ্ভবং সুচূর্ণিতং শ্রেষ্ঠমুশন্তি তদ্বিদঃ ||৩৯||

ইদানীং পিত্ততিমিরে প্রত্যঞ্জনমাহ- সমাঞ্জনমিত্যাদি| সমাঞ্জনং তুল্যসৌবীরাঞ্জনং, কনকাকরোদ্ভবং তুত্থকং, শ্রেষ্ঠম্ উত্তমং, উশন্তি ইচ্ছন্তি, প্রত্যঞ্জনমিত্যধ্যাহার্যম্| তদ্বিদঃ শালাকিনঃ| কেচিত্ সমাঞ্জনমিত্যত্র রসাঞ্জনমিতিপঠন্তি||৩৯||

Adhikarana 36 (40) · Śloka 40

ভিল্লোটগন্ধোদকসেকসেচিতং প্রত্যঞ্জনে চাত্র হিতং তু তুত্থকম্ |৪০|

পিত্তমিরেঽপরমপি প্রত্যঞ্জনমাহ- ভিল্লোটেত্যাদি ভিল্লোটকো হিমবদাসন্নভূমিজঃ ককুভানুকারিফলো বৃক্ষবিশেষঃ, গন্ধা এলাদিগণোক্তাঃ, উদকমত্র কষাযঃ, তত্সেকসেচিতং তুত্থকং প্রত্যঞ্জনে হিতম্| অন্যে ভিল্লোটকস্বাভাবিকগন্ধোদকসেকসেচিতমাহুঃ| কেচিদমুং প্রত্যঞ্জনং ন পঠন্তি|৪০|-

Adhikarana 37 (40) · Śloka 40

সমেষশৃঙ্গাঞ্জনভাগসম্মিতং জলোদ্ভবং কাচমলং ব্যপোহতি ||৪০||

পিত্তজে তিমিরে রাগপ্রাপ্তে চিকিত্সামাহ- সমেষেত্যাদি| মেষশৃঙ্গঃ পুত্রজীবানুকারী বৃক্ষঃ, অঞ্জনং সৌবীরাঞ্জনং, এতযোর্ভাগেন অংশেন সম্মিতং তুল্যভাগং জলোদ্ভবং স্রোতোঞ্জনং, অঞ্জনেন কাচমলং পিত্তকাচং ব্যপোহতি| অন্যে জলোদ্ভবং শঙ্খং বদন্তি||৪০||

Adhikarana 38 (41) · Śloka 41

পলাশরোহীতমধূকজা রসাঃ ক্ষৌদ্রেণ যুক্তা মদিরাগ্রমিশ্রিতাঃ |৪১|

পৈত্তিকে কাচে রসক্রিযাঞ্জনমাহ- পলাশরোহীতেত্যাদি| পলাশঃ কিংশুকঃ, রোহিতো দাডিমপুষ্পতুল্যপুষ্পঃ, মধূকঃ স্বনামপ্রসিদ্ধো বৃক্ষবিশেষঃ, এতেষাং রসাঃ; মদিরাগ্রং মদিরাযা উপর্যচ্ছো ভাগঃ| কিংশুকাদিরসক্ষৌদ্রমদিরাগ্রাণি সমভাগানি আহৃত্য রসক্রিযা কার্যা, সা চাঞ্জনাত্পিত্তকাচমলং ব্যপোহতি|৪১|-

Adhikarana 39 (41) · Śloka 41

উশীরলোধ্রত্রিফলাপ্রিযঙ্গুভিঃ পচেত্তু নস্যং কফরোগশান্তযে ||৪১||

ইদানীং কফতিমিরে নস্যমাহ- উশীরলোধ্রেত্যাদি| উশীরাদিভির্দ্রব্যৈঃ কল্কীকৃতৈঃ সামান্যস্নেহপাকপরিভাষযাঽনুক্তমপি তিলতৈলং পাচনীযং, বিদেহদর্শনাত্||৪১||

Adhikarana 40 (42) · Śloka 42

বিডঙ্গপাঠাকিণিহীঙ্গুদীত্বচঃ প্রযোজযেদ্ধূমমুশীরসংযুতাঃ |৪২|

কফতিমিরে ধূমমাহ- বিডঙ্গেত্যাদি| কিণিহী অপামার্গঃ| ননু তিমিরে ধূমো নিষিদ্ধঃ, কথমত্রোচ্যতে? সত্যং, পিত্ততিমিরে এব ধূমো নিষিদ্ধো ন কফজে, অতো ন দোষঃ|৪২|-

Adhikarana 41 (42) · Śloka 42

বনস্পতিক্বাথবিপাচিতং ঘৃতং হিতং হরিদ্রানলদে চ তর্পণম্ ||৪২||

কফতিমিরে তর্পণমাহ- বনস্পতিক্বাথেত্যাদি| বনস্পতযঃ ক্ষীরবৃক্ষাঃ, তত্কৃতক্বাথে চতুর্গুণে হরিদ্রানলদকল্কচতুর্থাংশং ঘৃতং পক্বং কফতিমিরে তর্পণে অক্ষিপূরণাপরপর্যাযে হিতম্| নলদম্ উশীরম্||৪২||

Adhikarana 42 (43) · Śloka 43

সমাগধো মাক্ষিকসৈন্ধবাঢ্যঃ সজাঙ্গলঃ স্যাত্ পুটপাক এব চ |৪৩|

কফতিমিরে পুটপাকমাহ- সমাগধ ইত্যাদি| মাগধী পিপ্পলী| আঢ্য উত্কটঃ| সজাঙ্গলঃ জাঙ্গলমৃগপক্ষিমাংসকৃতঃ| কেচিত্ ‘আঢ্যঃ’ ইত্যত্র ‘আজ্য’ ইতি পঠন্তি| তত্রাজ্যং ঘৃতম্| কেচিদমুং পুটপাকং রাগিণি কফতিমিরে বদন্তি, তন্নেচ্ছতি গযী|৪৩|-

Adhikarana 43 (43) · Śloka 43

মনঃশিলাত্র্যূষণশঙ্খমাক্ষিকৈঃ সসিন্ধুকাসীসরসাঞ্জনৈঃ ক্রিযাঃ ||৪৩||

কফতিমিরে রসক্রিযাঞ্জনমাহ- মনঃশিলেত্যাদি| মনঃশিলাদিভিঃ কাসীসরসাঞ্জনান্তৈশ্চূর্ণীকৃতৈঃ সলিলচতুর্থাংশনিক্ষিপ্তৈরগ্নিপাকাত্ ফাণিতাকৃতীকৃতৈ রসক্রিযা| মাক্ষিকং মধু||৪৩||

Adhikarana 44 (44) · Śloka 44

হিতে চ কাসীসরসাঞ্জনে তথা বদন্তি পথ্যে গুডনাগরৈর্যুতে |৪৪|

কফতিমিরেঽপরমপি রসক্রিযাঞ্জনমাহ- হিতে ইত্যাদি| তথেতি রসক্রিযাঞ্জনপ্রকারেণেত্যর্থঃ| পথ্যে ইতি পথোঽনপেতে ইত্যর্থঃ| কফকাচস্য শলাকাকর্মসাধ্যত্বাত্তত্রাঞ্জনাদিকং ন নির্দিষ্টম্|৪৪|-

Adhikarana 45 (44-45) · Śloka 45

যদঞ্জনং বা বহুশো নিষেচিতং সমূত্রবর্গে ত্রিফলোদকে শৃতে ||৪৪|| নিশাচরাস্থিস্থিতমেতদঞ্জনং ক্ষিপেচ্চ মাসং সলিলেঽস্থিরে পুনঃ | মেষস্য পুষ্পৈর্মধুকেন সংযুতং তদঞ্জনং সর্বকৃতে প্রযোজযেত্ ||৪৫||

সর্বজকাচচিকিত্সামাহ- যদঞ্জনমিত্যাদি| অঞ্জনং স্রোতোঞ্জনম্| বহুশো বহূন বারান্ নিষেচিতমিত্যত্র ‘ধ্মাতং সত্’ ইত্যধ্যাহার্যম্| মূত্রবর্গে অষ্টস্বপি মূত্রেষু| শৃতে ক্বাথীকৃতে| নিশাচরাস্থিস্থিতমিত্যাদি| নিশাচরাণাং গৃধ্রাদীনাং নলকে বিগতমজ্জনি মূত্রবর্গাদিসেচিতং তদঞ্জনং নিক্ষিপ্য পশ্চান্নলকমুখং পিধায বহতি সরিজ্জলে নিখাতকীলকোপরি সূত্রেণ বদ্ধ্বা মাসং যাবত্ স্থাপযেত্, ততস্তদুদ্ধৃত্য শোষযিত্বা মেষশৃঙ্গপুষ্পযষ্টীমধুকচূর্ণসমাংশং তদঞ্জনং সর্বকৃতে রাগিতিমিরে প্রযোজযেত্| ‘মেষস্য পুষ্পৈর্মধুকেন সংযুতং’ ইত্যত্র কেচিদ্ ‘যুতং তু পুষ্পৈর্মধুশিগ্রুকোদ্ভবৈঃ’ ইতি পঠন্তি| তত্র মধুর্মধূকঃ তস্য সারঃ, শিগ্রুঃ শোভাঞ্জনকস্তস্য পুষ্পাণি||৪৪-৪৫||

Adhikarana 46 (46) · Śloka 46

ক্রিযাশ্চ সর্বাঃ, ক্ষতজোদ্ভবে হিতঃ ক্রমঃ পরিম্লাযিনি চাপি পিত্তহৃত্ |৪৬|

সান্নিপাতিকরাগিতিমিরস্য চিকিত্সামাহ- ক্রিযাশ্চেত্যাদি| ক্রিযা অত্র তর্পণপুটপাকাদিকাঃ, সর্বা বাতপিত্তকফমিরোক্তাঃ, অন্যে তু ক্রিযাশ্চ সর্বা বাতপিত্তকফতিমিরোক্তা রসক্রিযা ইত্যাহুঃ| রক্ততিমিরে তথা পরিম্লাযিনি তিমিরে চ কঃ ক্রম ইত্যাহ- ক্ষতজোদ্ভব ইত্যাদি| পিত্তহৃত্ ক্রমঃ পিত্ততিমিরাপহনস্যতর্পণাদিক্রম ইত্যর্থঃ| এষ এব ক্রমোঽরাগিণি রক্ততিমিরে, রাগিণি পুনঃ পিত্তকাচাপহো বিধিঃ|৪৬|-

Adhikarana 47 (46) · Śloka 46

ক্রমো হিতঃ স্যন্দহরঃ প্রযোজিতঃ সমীক্ষ্য দোষেষু যথাস্বমেব চ ||৪৬||

ইদানীং বাতাদিজেষু তিমিরেষু রাগারাগপ্রাপ্তেষু বাতাদিজনিতাভিষ্যন্দচিকিত্সিতমতিদিশন্নাহ- ক্রম ইত্যাদি| যথাস্বমিতি যো যস্যাত্মীয ইত্যর্থঃ| তেন বাততিমিরে বাতাভিষ্যন্দক্রমঃ, পিত্ততিমিরে পিত্তাভিষ্যন্দোক্তঃ, এবং শেষেষু||৪৬||

Adhikarana 48 (47) · Śloka 47

দোষোদযে নৈব চ বিপ্লতিঙ্গতে দ্রব্যাণি নস্যাদিষু যোজযেদ্বুধঃ |৪৭|

স এব বাতাভিষ্যন্দাদিক্রমো বাতাদিতিমিরেষু কদা কর্তব্য ইতি দর্শযন্নাহ- দোষোদয ইত্যাদি| দোষোদয ইতি দোষোদযমাত্রে তাবদ্বাতস্যন্দাদ্যুক্তক্রমো ন কর্তব্যঃ| তথা বিপ্লুতিঙ্গতে; কোঽর্থঃ? সমস্তনযনব্যাপ্তিপরে স্যন্দোক্তক্রমো ন কর্তব্যঃ| এতেন লঙ্ঘনবিরেচননিংরূহানুবাসনশিরোবিরেচনাদিনা ত্র্যহমতিক্রম্য পশ্চাদ্বাতস্যন্দাদ্যুক্তনস্যাদিদ্রব্যাণি বাতাদিজনিততিমিরেষু (নস্যতর্পণাদিষু) যোজযেদিত্যর্থঃ| অন্যে ‘বিপ্লুতিঙ্গতে’ ইত্যত্র ‘বিপ্লুতে গদে’ ইতি পঠন্তি; তত্র বিশব্দো বিবিধার্থঃ, তেন বিবিধতাং গতে গদ ইত্যর্থঃ|৪৭|-

Adhikarana 49 (47) · Śloka 47

পুনশ্চ কল্পেঽঞ্জনবিস্তরঃ শুভঃ প্রবক্ষ্যতেঽন্যস্তমপীহ যোজযেত্ ||৪৭||

ইদানীং ক্রিযাকল্পে বক্ষ্যমাণমঞ্জনবিস্তরমত্রোপদিশন্নাহ- পুনশ্চেত্যাদি| কল্পে ক্রিযাকল্পে ইত্যর্থঃ| অন্যঃ অপরঃ| তমিতি অঞ্জনবিস্তরমিত্যর্থঃ||৪৭||

Adhikarana 50 (48) · Śloka 48

ঘৃতং পুরাণং ত্রিফলাং শতাবরীং পটোলমুদ্গামলকং যবানপি | নিষেবমাণস্য নরস্য যত্নতো ভযং সুঘোরাত্তিমিরান্ন বিদ্যতে ||৪৮||

ইদানীং বহিরাশ্রযং চিকিত্সিতং প্রতিপাদ্যান্তরাশ্রযং প্রতিপাদযন্নাহ- ঘৃতমিত্যাদি||৪৮||

Adhikarana 51 (49) · Śloka 49

শতাবরীপাযস এব কেবলস্তথা কৃতো বাঽঽমলকেষু পাযসঃ | প্রভূতসর্পিস্ত্রিফলোদকোত্তরো যবৌদনো বা তিমিরং ব্যপোহতি ||৪৯||

আহারবিশেষমাহ- শতাবরীত্যাদি| শতাবরীপাযস ইতি শতাবরীমূলশৃতেন পযসা কৃতঃ শতাবরীপাযসঃ, আমলকেষু পাযস ইতি আমলকশৃতপযসা কৃতঃ পাযস ইত্যর্থঃ| অন্যে তু শতাবরীস্বরসসিদ্ধা যবাগূঃ শতাবরীপাযসঃ, আমলকস্বরসসিদ্ধা যবাগূশ্চামলকপাযসঃ| প্রভূতসর্পিরিত্যাদি প্রচুরঘৃতো যবৌদনো বাট্যসঞ্জ্ঞকঃ গৃঞ্জাসঞ্জ্ঞকো বা, ত্রিফলোদকে প্রচুরে সাধিত ইত্যর্থঃ||৪৯||

Adhikarana 52 (50-51) · Śloka 51

জীবন্তিশাকং সুনিষণ্ণকং চ সতণ্ডুলীযং বরবাস্তুকং চ | চিল্লী তথা মূলকপোতিকা চ দৃষ্টের্হিতং শাকুনজাঙ্গলং চ ||৫০|| পটোলকর্কোটককারবেল্লবার্তাকুতর্কারিকরীরজানি | শাকানি শিগ্র্বার্তগলানি চৈব হিতানী দৃষ্টের্ঘৃতসাধিতানি ||৫১||

আহারোপযোগিচক্ষুষ্যশাকানাহ- জীবন্তিশাকমিত্যাদি| জীবন্তী ডোডিকা, সুনিষণ্ণকং চতুষ্পত্রী, অন্যে শিরবালিকামাহুঃ, বরবাস্তুকং, টঙ্কবাস্তুকং, চিল্লী ক্ষেত্রবাস্তুকঃ, মূলকপোতিকা বালমূলকং, শাকুনং লাবাদিকং, জাঙ্গলম্ এণাদিজাতং, তর্কারী অরণিকা, করীরো গূঢপত্রঃ, শিগ্রুঃ শোভাঞ্জনকঃ, আর্তগলো নীলসহচরঃ||৫০-৫১||

Adhikarana 53 (52) · Śloka 52

বিবর্জযেত্সিরামোক্ষং তিমিরে রাগমাগতে | যন্ত্রেণোত্পীডিতো দোষো নিহন্যাদাশু দর্শনম্ ||৫২||

সেব্যমুদ্দিশ্য পরিহার্যমাহ- বিবর্জযেদিত্যাদি||৫২||

Adhikarana 54 (53) · Śloka 53

অরাগি তিমিরং সাধ্যমাদ্যং পটলমাশ্রিতম্ | কৃচ্ছ্রং দ্বিতীযে রাগি স্যাত্তৃতীযে যাপ্যমুচ্যতে ||৫৩||

ইদানীং মন্দধিযাং সুখস্মরণায সাধ্যাদিভেদমাহ- অরাগীত্যাদি||৫৩||

Adhikarana 55 (54) · Śloka 54

রাগপ্রাপ্তেষ্বপি হিতাস্তিমিরেষু তথা ক্রিযাঃ | যাপনার্থং যথোদ্দিষ্টাঃ সেব্যাশ্চাপি জলৌকসঃ ||৫৪||

রাগপ্রাপ্তেষু বিধ্যন্তরং যাপনার্থং পূর্বমুক্তমপ্যনুবদন্নাহ- রাগপ্রাপ্তেষ্বিত্যাদি| তৃতীযপটলপ্রাপ্তরাগিতিমিরেষু যাপনার্থং তথা ক্রিযা হিতা যথোদ্দিষ্টা ইত্যর্থঃ| তত্র সিরামোক্ষস্য নিষিদ্ধত্বাদবশ্যাকর্ষণীযশোণিতে উপাযান্তরমাহ- সেব্যা ইত্যাদি||৫৪||

Adhikarana 56 (55-56) · Śloka 56

শ্লৈষ্মিকে লিঙ্গনাশে তু কর্ম বক্ষ্যামি সিদ্ধযে | ন চেদর্ধেন্দুঘর্মাম্বুবিন্দুমুক্তাকৃতিঃ স্থিরঃ ||৫৫|| বিষমো বা তনুর্মধ্যে রাজিমান্ বা বহুপ্রভঃ | দৃষ্টিস্থো লক্ষ্যতে দোষঃ সরুজো বা সলোহিতঃ ||৫৬||

অনৌষধসাধ্যে শ্লৈষ্মিকে লিঙ্গনাশেঽর্ধেন্দ্বাদ্যাকৃতিবিশিষ্টো দৃষ্টিস্থো দোষো ন চেল্লক্ষ্যতে তদা সাধনার্থং শস্ত্রকর্ম বক্ষ্যামীতি নির্দিশন্নাহ- শ্লৈষ্মিক ইত্যাদি| লিঙ্গনাশো দৃষ্টিনাশঃ| কর্ম শস্ত্রকর্ম| ঘর্মাম্বুবিন্দুঃ প্রস্বেদবিন্দুঃ| আকৃতিশব্দোঽর্ধেন্দ্বাদিভিঃ প্রত্যেকং সম্বন্ধনীযঃ| স্থিরঃ কঠিনঃ| বিষমো বা তনুর্মধ্যে ইতি যতো মধ্যে তনুরত এব বিষমো নিম্নোন্নত ইত্যর্থঃ||৫৫-৫৬||

Adhikarana 57 (57-60) · Śloka 61

স্নিগ্ধস্বিন্নস্য তস্যাথ কালে নাত্যুষ্ণশীতলে | যন্ত্রিতস্যোপবিষ্টস্য স্বাং নাসাং পশ্যতঃ সমম্ ||৫৭|| মতিমান্ শুক্লভাগৌ দ্বৌ কৃষ্ণান্মুক্ত্বা হ্যপাঙ্গতঃ | উন্মীল্য নযনে সম্যক্ সিরাজালবিবর্জিতে ||৫৮|| নাধো নোর্ধ্বং ন পার্শ্বাভ্যাং ছিদ্রে দৈবকৃতে ততঃ | শলাকযা প্রযত্নেন বিশ্বস্তং যববক্রযা ||৫৯|| মধ্যপ্রদেশিন্যঙ্গুষ্ঠস্থিরহস্তগৃহীতযা | দক্ষিণেন ভিষক্ সব্যং বিধ্যেত্ সব্যেন চেতরত্ ||৬০|| বারিবিন্দ্বাগমঃ সম্যগ্ ভবেচ্ছব্দস্তথা ব্যধে |৬১|

তদেব শস্ত্রকর্ম নির্দিশন্নাহ- স্নিগ্ধস্বিন্নস্যেত্যাদি| নাত্যুষ্ণশীতে সাধারণে মার্গশীর্ষে চৈত্রে বা| শুক্লভাগৌ দ্বাবপি দ্বৌ শুক্লতারকাংশাবিত্যর্থঃ| কৃষ্ণাত্ কৃষ্ণতারকান্তাত্, মুক্ত্বা পরিত্যজ্য, অপাঙ্গতঃ অপাঙ্গসমীপে, বিধ্যেদিত্যর্থঃ| সম্যগিতি নাতিপ্রসারিতং নাতিসঙ্কুচিতং যথা স্যাদিত্যর্থঃ| দৈবকৃতে ছিদ্রে ইতি ছিদ্রমিব ছিদ্রং ন পরমার্থতশ্ছিদ্রমস্তি| বিশ্বস্তং অসন্ত্রস্তং যথা স্যাত্| সব্যং বামনেত্রং, সব্যেন বামহস্তেন, ইতরত্ দক্ষিণনযনম্| সম্যগ্বিদ্ধলক্ষণমাহ- বারিবিন্দ্বাগম ইত্যাদি| সম্যগিতি পদং ব্যধ ইত্যত্র সম্বধ্যতে| অসম্যগ্ব্যধে চ রক্তনির্গমনমশব্দতা চ||৫৭-৬০||-

Adhikarana 58 (61-63) · Śloka 64

সংসিচ্য বিদ্ধমাত্রং তু যোষিত্স্তন্যেন কোবিদঃ ||৬১|| স্থিরে দোষে চলে বাঽপি স্বেদযেদক্ষি বাহ্যতঃ | সম্যক্ শলাকাং সংস্থাপ্য ভঙ্গৈরনিলনাশনৈঃ ||৬২|| শলাকাগ্রেণ তু ততো নির্লিখেদ্দৃষ্টিমণ্ডলম্ | বিধ্যতো যোঽন্যপার্শ্বেঽক্ষ্ণস্তং রুদ্ধ্বা নাসিকাপুটম্ ||৬৩|| উচ্ছিঙ্ঘনেন হর্তব্যো দৃষ্টিমণ্ডলগঃ কফঃ |৬৪|

সম্যগ্বিদ্ধে নেত্রে সতি কিং কার্যমিত্যাহ- সংসিচ্যেত্যাদি| যোষিত্স্তন্যেন নারীক্ষীরেণ| কোবিদো ধীমান্ বৈদ্যঃ| স্থিরে অচলে| শলাকাং সংস্থাপ্য নিশ্চলীকৃত্য| ভঙ্গৈঃ পল্লবৈঃ| স্বেদানন্তরং কিং কর্তব্যমিত্যাহ- শলাকাগ্রেণেত্যাদি| ততঃ স্বেদানন্তরং; দৃষ্টিমণ্ডলং নির্লিখেত্ শ্লেষ্মসংহতিবিশ্লেষার্থম্| শলাকাগ্রবিনির্লেখনাদ্বিশ্লিষ্টকফস্য নির্হরণোপাযমাহ- বিধ্যত ইত্যাদি| বিধ্যতোঽক্ষ্ণোঽন্যপার্শ্বে যো নাসাপুটস্তং নাসাপুটং রুদ্ধ্বা দৃষ্টিমণ্ডলগঃ কফ উচ্ছিঙ্ঘনেন হর্তব্য ইতি পিণ্ডার্থঃ||৬১-৬৩||-

Adhikarana 59 (64-68) · Śloka 68

নিরভ্র ইব ঘর্মাংশুর্যদা দৃষ্টিঃ প্রকাশতে ||৬৪|| তদাঽসৌ লিখিতা সম্যগ্ জ্ঞেযা যা চাপি নির্ব্যথা | (এবং ত্বশক্যে নির্হর্তুং দোষে প্রত্যাগতেঽপি বা ||৬৫|| স্নেহাদ্যৈরুপপন্নস্য ব্যধো ভূযো বিধীযতে) | ততো দৃষ্টেষু রূপেষু শলাকামাহরেচ্ছনৈঃ ||৬৬|| ঘৃতেনাভ্যজ্য নযনং বস্ত্রপট্টেন বেষ্টযেত্ | ততো গৃহে নিরাবাধে শযীতোত্তান এব চ ||৬৭|| উদ্গারকাসক্ষবথুষ্ঠীবনোত্কম্পনানি চ | তত্কালং নাচরেদূর্ধ্বং যন্ত্রণা স্নেহপীতবত্ ||৬৮||

সম্যগ্লিখিতলক্ষণমাহ- নিরভ্র ইত্যাদি| নিরভ্রো নির্মেঘঃ, ঘর্মাংশুঃ আদিত্যঃ| ততো দৃষ্টেষ্বিত্যাদি| শলাকামাহৃত্য কিং কুর্যাদিত্যাহ- ঘৃতেনাভ্যজ্যেত্যাদি| নিরাবাধে ধূলিধূমবাতাতপাদিরহিতে| উত্তানশযনমৃজূকরণার্থং| উদ্গারেত্যাদি| ক্ষবথুঃ ছিক্কা| তত্কালমিতি যাবচ্ছলাকা নেত্রে তিষ্ঠতি| তত ঊর্ধ্বং যন্ত্রণা আহারাদীনাং নিযমঃ, স্নেহপীতবত্ স্নেহপানোক্তঃ কার্যঃ||৬৪-৬৮||

Adhikarana 60 (69) · Śloka 69

ত্র্যহাত্ ত্র্যহাচ্চ ধাবেত কষাযৈরনিলাপহৈঃ | বাযোর্ভযাত্ ত্র্যহাদূর্ধ্বং স্বেদযেদক্ষি পূর্ববত্ ||৬৯||

ত্র্যহাদিত্যাদি| ধাবেত প্রক্ষালযেত্| অনিলাপহৈঃ এরণ্ডমূলাদিবাতাপহচক্ষুষ্যদ্রব্যৈঃ ক্ষীরাম্বুসাধিতৈঃ| প্রক্ষালনানন্তরং কিং কর্তব্যমিত্যাহ- বাযোর্ভযাদিত্যাদি| পূর্ববদিতি বাহ্যতো মৃদু স্বেদযেদিত্যর্থঃ||৬৯||

Adhikarana 61 (70) · Śloka 70

দশাহমেবং সংযম্য হিতং দৃষ্টিপ্রসাদনম্ | পশ্চাত্কর্ম চ সেবেত লঘ্বন্নং চাপি মাত্রযা ||৭০||

দশাহমেবমিত্যাদি| এবমুত্তানশযনাদিনা দশাহং নিযম্য তদনন্তরং পশ্চাত্কর্ম নস্যতর্পণশিরোবস্ত্যাদিকং যদ্দৃষ্টিপ্রসাদনং দৃষ্টের্নৈর্মল্যজননং তত্ সেবেতেতি পিণ্ডার্থঃ||৭০||

Adhikarana 62 (71) · Śloka 71

সিরাব্যধবিধৌ পূর্বং নরা যে চ বিবার্জিতাঃ | ন তেষাং নীলিকাং বিধ্যেদন্যত্রাভিহিতাদ্ভিষক্ ||৭১||

ইদানীং শ্লৈষ্মিকেঽপি লিঙ্গনাশে কেষাঞ্চিত্ পুরুষাণাং শস্ত্রনিষেধং দর্শযন্নাহ- সিরাব্যধবিধৌ পূর্বমিত্যাদি| নরা যে চ বিবর্জিতা ইতি সিরাব্যধবিধৌ যে নরা বালস্থবিরাদযো বিবর্জিতাস্তেষাং নীলিকাং লিঙ্গনাশাপরপর্যাযাং ন বিধ্যেত্| অন্যত্রাভিহিতাদিতি তথাঽভিহিতাত্ কথিতাদ্দৈবকৃতাচ্ছিদ্রাদন্যত্র ন বিধ্যেত্| চকারস্তু সিরাবিদ্ধৈঃ পুরুষৈর্যে ক্রোধাদযো বিবর্জনীযাস্তেঽপি নীলিকাযাং বর্জনীযা ইতি জ্ঞাপযতি||৭১||

Adhikarana 63 (72) · Śloka 72

পূর্যতে শোণিতেনাক্ষি সিরাবেধাদ্বিসর্পতা | তত্র স্ত্রীস্তন্যযষ্ট্যাহ্বপক্বং সেকে হিতং ঘৃতম্ ||৭২||

দৈবকৃতচ্ছিদ্রাদন্যত্র কস্মান্ন নীলিকাং বিধ্যেদিত্যাহ- পূর্যত ইত্যাদি| বিসর্পতা শোণিতেনাক্ষি পূর্যত ইত্যর্থঃ| প্রমাদাদ্দৈবকৃতচ্ছিদ্রাদন্যত্রাপি বিদ্ধে সতি ব্যাপদুপশমনার্থং চিকিত্সিতমাহ- তত্রেত্যাদি||৭২||

Adhikarana 64 (73-79) · Śloka 79

অপাঙ্গাসন্নবিদ্ধে তু শোফশূলাশ্রুরক্ততাঃ | তত্রোপনাহং ভ্রূমধ্যে কুর্যাচ্চোষ্ণাজ্যসেচনম্ ||৭৩|| ব্যধেনাসন্নকৃষ্ণেন রাগঃ কৃষ্ণং চ পীড্যতে | তত্রাধঃশোধনং সেকঃ সর্পিষা রক্তমোক্ষণম্ ||৭৪|| অথাপ্যুপরি বিদ্ধে তু কষ্টা রুক্ সম্প্রবর্ততে | তত্র কোষ্ণেন হবিষা পরিষেকঃ প্রশস্যতে ||৭৫|| শূলাশ্রুরাগাস্ত্বত্যর্থমধোবেধেন পিচ্ছিলঃ | শলাকামনু চাস্রাবস্তত্র পূর্বচিকিত্সিতম্ ||৭৬|| রাগাশ্রুবেদনাস্তম্ভহর্ষাশ্চাতিবিঘট্টিতে | স্নেহস্বেদৌ হিতৌ তত্র হিতং চাপ্যনুবাসনম্ ||৭৭|| দোষস্ত্বধোঽপকৃষ্টোঽপি তরুণঃ পুনরূর্ধ্বগঃ | কুর্যাচ্ছুক্লারুণং নেত্রং তীব্ররুঙ্নষ্টদর্শনম্ ||৭৮|| মধুরৈস্তত্র সিদ্ধেন ঘৃতেনাক্ষ্ণঃ প্রসেচনম্ | শিরোবস্তিং চ তেনৈব দদ্যান্মাংসৈশ্চ ভোজনম্ ||৭৯||

ইদানীমস্থানবেধাত্ সঙ্ক্ষেপেণ ব্যাপদমভিধায বিস্তরেণাপি ব্যাপদো নির্দিশন্নাহ- অপাঙ্গেত্যাদি| তত্র চিকিত্সামাহ- তত্রোপনাহমিত্যাদি| চিকিত্সামাহ- তত্রাধ ইত্যাদি| অধঃশোধনং বিরেকঃ, রক্তমোক্ষণমত্র জলৌকোভিঃ| অথেত্যাদি| কষ্টা তীব্রা| চিকিত্সামাহ- তত্র কোষ্ণেনেত্যাদি| শূলেত্যাদি| অনু শলাকাং শলাকাযা অনন্তরমেবেত্যর্থঃ| চিকিত্সামাহ- তত্রেত্যাদি| পূর্বচিকিত্সিতং স্ত্রীস্তন্যযষ্ট্যাহ্বেত্যাদিকম্| হর্ষো রোমাঞ্চপ্রাযো বেদনাবিশেষঃ, অতিবিঘট্টিতে অতিচালিতে| চিকিত্সামাহ- স্নেহস্বেদাবিত্যাদি| তরুণো লিঙ্গনাশমপ্রাপ্তঃ| চিকিত্সামাহ- মধুরৈরিত্যাদি| মধুরৈঃ যষ্টীমধুকাদিভিঃ তেনৈব যষ্টীমধুকাদিসিদ্ধেনৈব||৭৩-৭৯||

Adhikarana 65 (80) · Śloka 80

দোষস্তু সঞ্জাতবলো ঘনঃ সম্পূর্ণমণ্ডলঃ | প্রাপ্য নশ্যেচ্ছলাকাগ্রং তন্বভ্রমিব মারুতম্ ||৮০||

দোষস্তু সঞ্জাতেত্যাদি||৮০||

Adhikarana 66 (81) · Śloka 81

মূর্ধাভিঘাতব্যাযামব্যবাযবমিমূর্চ্ছনৈঃ | দোষঃ প্রত্যেতি কোপাচ্চ বিদ্ধোঽতিতরুণশ্চ যঃ ||৮১||

নির্লিখিতস্যাপি দোষস্য পুনরাবৃত্তিকারণান্যাহ- মূর্ধাভিঘাতেত্যাদি| প্রত্যেতি আগচ্ছতি| তরুণো লিঙ্গনাশমপ্রাপ্তঃ||৮১||

Adhikarana 67 (82) · Śloka 83

শলাকা কর্কশা শূলং, খরা দোষপরিপ্লুতিম্ | ব্রণং বিশালং স্থূলাগ্রা, তীক্ষ্ণা হিংস্যাদনেকধা ||৮২|| জলাস্রাবং তু বিষমা, ক্রিযাসঙ্গমথাস্থিরা | করোতি ... |৮৩|

দুষ্টশলাকাজনিতব্যাপদমাহ- শলাকেত্যাদি| দোষপরিপ্লুতিঃ দোষস্য সমন্তাদাগমনম্| হিংস্যাদনেকধেতি অনেকপ্রকারং ক্ষতং করোতীত্যর্থঃ| বিষমা কৃশস্থূলা| অস্থিরা বৃদ্ধা মুগ্ধা | ‘করোতি’ ইতি পদমন্তে নির্দিষ্টত্বাত্ সর্বত্র সম্বধ্যতে||৮২||-

Adhikarana 68 (83-84) · Śloka 85

... বর্জিতা দোষৈস্তস্মাদেভির্হিতা ভবেত্ ||৮৩|| অষ্টাঙ্গুলাযতা মধ্যে সূত্রেণ পরিবেষ্টিতা | অঙ্গুষ্ঠপর্বসমিতা বক্ত্রযোর্মুকুলাকৃতিঃ ||৮৪|| তাম্রাযসী শাতকুম্ভী শলাকা স্যাদনিন্দিতা |৮৫|

বর্জিতেত্যাদি| এভির্দোষৈরনন্তরোক্তৈঃ কর্কশাদিভির্বিরহিতা| হিতা কার্যকারিণী| শাতকুম্ভী সুবর্ণমযী||৮৩-৮৪||-

Adhikarana 69 (85-86) · Śloka 86

রাগঃ শোফোঽর্বুদং চোষো বুদ্বুদং শূকরাক্ষিতা ||৮৫|| অধিমন্থাদযশ্চান্যে রোগাঃ স্যুর্ব্যধদোষজাঃ | অহিতাচারতো বাঽপি যথাস্বং তানুপাচরেত্ ||৮৬||

ইদানীং দুষ্টব্যধাহারাচারজান্ রোগানাহ- রাগ ইত্যাদি| চোষ আচূষ্যত ইব বেদনাবিশেষঃ| বুদ্বুদং বুদ্বুদাকারো মাংসনির্গমঃ| শূকরাক্ষিতা অধোদৃষ্টিত্বম্| তত্র চিকিত্সিতমাহ- যথাস্বমিত্যাদি| যথাস্বং যথাত্মীযং, যথাদোষমিত্যর্থঃ||৮৫-৮৬||

Adhikarana 70 (87-94) · Śloka 94

রুজাযামক্ষিরাগে বা যোগান্ ভূযো নিবোধ মে | গৈরিকং সারিবা দূর্বা যবপিষ্টং ঘৃতং পযঃ ||৮৭|| সুখালেপঃ প্রযোজ্যোঽযং বেদনারাগশান্তযে | মৃদুভৃষ্টৈস্তিলৈর্বাঽপি সিদ্ধার্থকসমাযুতৈঃ ||৮৮|| মাতুলুঙ্গরসোপেতৈঃ সুখালেপস্তদর্থকৃত্ | পযস্যাসারিবাপত্রমঞ্জিষ্ঠামধুকৈরপি ||৮৯|| অজাক্ষীরান্বিতৈর্লেপঃ সুখোষ্ণঃ পথ্য উচ্যতে | দারুপদ্মকশুণ্ঠীভিরেবমেব কৃতোঽপি বা ||৯০|| দ্রাক্ষামধুককুষ্ঠৈর্বা তদ্বত্ সৈন্ধবসংযুতৈঃ | রোধ্রসৈন্ধবমৃদ্বীকামধুকৈর্বাঽপ্যজাপযঃ ||৯১|| শৃতং সেকে প্রযোক্তব্যং রুজারাগনিবারণম্ | মধুকোত্পলকুষ্ঠৈর্বা দ্রাক্ষালাক্ষাসিতাযুতৈঃ | সসৈন্ধবৈঃ শৃতং ক্ষীরং রুজারাগনিবর্হণম্ ||৯২|| শতাবরীপৃথক্পর্ণীমুস্তামলকপদ্মকৈঃ | সাজক্ষীরৈঃ শৃতং সর্পির্দাহশূলনিবর্হণম্ ||৯৩|| বাতঘ্নসিদ্ধে পযসি সিদ্ধং সর্পিশ্চতুর্গুণে | কাকোল্যাদিপ্রতীবাপং তদ্যুঞ্জ্যাত্ সর্বকর্মসু ||৯৪||

ইদানীং কর্কশশলাকাজনিতে শূলে তথা দুষ্টব্যধজে চ রোগে চিকিত্সামুদ্দিশন্নাহ- রুজাযামিত্যাদি| নিবোধ জানীহি| সারিবা উত্পলসারিবা| মৃদুভৃষ্টৈরিত্যাদি| সিদ্ধার্থকঃ সর্ষপঃ| তদর্থকৃত্ বেদনারাগনাশকৃত্| পযস্যেত্যাদি| পযস্যা অর্কপুষ্পী, ক্ষীরকাকোলীত্যন্যে| পত্রং পত্রকম্| দারুপদ্মকেত্যাদি| এবমেবেতি অজাক্ষীরান্বিতৈঃ দারুপদ্মকাদিভিঃ লেপঃ কার্যঃ; তদ্বদ্দ্রাক্ষাদিভিরপি| রোধ্রসৈন্ধবেত্যাদি| বাতঘ্নানি ভদ্রদার্বাদীনি| সর্বকর্মসু নস্যালেপনাদিষু||৮৭-৯৪||

Adhikarana 71 (95) · Śloka 95

শাম্যত্যেবং ন চেচ্ছূলং স্নিগ্ধস্বিন্নস্য মোক্ষযেত্ | ততঃ সিরাং দহেদ্বাঽপি মতিমান্ কীর্তিতং যথা ||৯৫||

এবমপ্যশাম্যতি শূলে কিং কুর্যাদিত্যাহ- শাম্যত্যেবমিত্যাদি| সিরাঽত্র ঔপনাসিকা আপাঙ্গ্যা লালাট্যা বা| ন কেবলং সিরাং মোক্ষযেত্ দহেদ্বা| কীর্তিতং যথেতি ‘ভ্রূললাটশঙ্খপ্রদেশেষু দহেত্’ ইত্যাদিবাক্যেন||৯৫||

Adhikarana 72 (96-99) · Śloka 99

দৃষ্টেরতঃ প্রসাদার্থমঞ্জনে শৃণু মে শুভে | মেষশৃঙ্গস্য পুষ্পাণি শিরীষধবযোরপি ||৯৬|| সুমনাযাশ্চ পুষ্পাণি মুক্তা বৈদূর্যমেব চ | অজাক্ষীরেণ সম্পিষ্য তাম্রে সপ্তাহমাবপেত্ ||৯৭|| প্রবিধায চ তদ্বর্তীর্যোজযেচ্চাঞ্জনে ভিষক্ | স্রোতোজং বিদ্রুমং ফেনং সাগরস্য মনঃশিলাম্ ||৯৮|| মরিচানি চ তদ্বর্তীঃ কারযেচ্চাপি পূর্ববত্ | দৃষ্টিস্থৈর্যার্থমেতত্তু বিদধ্যাদঞ্জনে হিতম্ ||৯৯||

সিরাব্যধেনাপ্যবশিষ্টদোষকলুষিতাযা দৃষ্টেঃ প্রসাদনার্থমঞ্জনে আহ- দৃষ্টেরত ইত্যাদি| সুমনা জাতী| আবপেত্ প্রতিক্ষিপেত্| স্রোতোজং সৌবীরাঞ্জনং বিদ্রুমং প্রবালম্| মেষশৃঙ্গস্যেত্যাদ্যেকং, স্রোতোজমিত্যাদি দ্বিতীযম্||৯৬-৯৯||

Adhikarana 73 (100) · Śloka 100

ভূযো বক্ষ্যামি মুখ্যানি বিস্তরেণাঞ্জনানি চ | কল্পে নানাপ্রকারাণি তান্যপীহ প্রযোজযেত্ ||১০০||

ভূয ইত্যাদি| কল্পে ক্রিযাকল্পে||১০০||

Adhikarana puShpikA · Śloka 17

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে দৃষ্টিগতরোগবিজ্ঞানীযো নাম সপ্তদশোঽধ্যাযঃ ||১৭||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে সপ্তদশোঽধ্যাযঃ||১৭||