17. dr̥ṣṭigatarōgapratiṣēdhādhyāyaḥ

Adhikarana 1 (1-2) · Śloka 2

অথাতো দৃষ্টিগতরোগপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3) · Śloka 3

ত্রযঃ সাধ্যাস্ত্রযোঽসাধ্যা যাপ্যাঃ ষট্ চ ভবন্তি হি |৩|

Adhikarana 3 (3) · Śloka 3

তত্রৈকস্য প্রতীকারঃ কীর্তিতো ধূমদর্শিনঃ ||৩||

Adhikarana 4 (4-5) · Śloka 6

দৃষ্টৌ পিত্তবিদগ্ধাযাং বিদগ্ধাযাং কফেন চ | পিত্তশ্লেষ্মহরং কুর্যাদ্বিধিং শস্ত্রক্ষতাদৃতে ||৪|| নস্যসেকাঞ্জনালেপপুটপাকৈঃ সতর্পণৈঃ | আদ্যে তু ত্রৈফলং পেযং সর্পিস্ত্রৈবৃতমুত্তরে ||৫|| তৈল্বকং চোভযোঃ পথ্যং কেবলং জীর্ণমেব বা |৬|

Adhikarana 5 (6-7) · Śloka 8

গৈরিকং সৈন্ধবং কৃষ্ণা গোদন্তস্য মষী তথা ||৬|| গোমাংসং মরিচং বীজং শিরীষস্য মনঃশিলা | বৃন্তং কপিত্থান্মধুনা স্বযঙ্গুপ্তাফলানি চ ||৭|| চত্বার এতে যোগাঃ স্যুরুভযোরঞ্জনে হিতাঃ |৮|

Adhikarana 6 (8-9) · Śloka 10

কুব্জকাশোকশালাম্রপ্রিযঙ্গুনলিনোত্পলৈঃ ||৮|| পুষ্পৈর্হরেণুকৃষ্ণাহ্বাপথ্যামলকসংযুতৈঃ | সর্পির্মধুযুতৈশ্চূর্ণৈর্বেণুনাড্যামবস্থিতৈঃ ||৯|| অঞ্জযেদ্ দ্বাবপি ভিষক্ পিত্তশ্লেষ্মবিভাবিতৌ |১০|

Adhikarana 7 (10-11) · Śloka 12

আম্রজম্বূদ্ভবং পুষ্পং তদ্রসেন হরেণুকাম্ ||১০|| পিষ্ট্বা ক্ষৌদ্রাজ্যসংযুক্তং প্রযোজ্যমথবাঽঞ্জনম্ | নলিনোত্পলকিঞ্জল্কগৈরিকৈর্গোশকৃদ্রসৈঃ ||১১|| গুডিকাঞ্জনমেতদ্বা দিনরাত্র্যন্ধযোর্হিতম্ |১২|

Adhikarana 8 (12) · Śloka 13

রসাঞ্জনরসক্ষৌদ্রতালীশস্বর্ণগৈরিকম্ ||১২|| গোশকৃদ্রসসংযুক্তং পিত্তোপহতদৃষ্টযে |১৩|

Adhikarana 9 (13-14) · Śloka 14

শীতং সৌবীরকং বাঽপি পিষ্ট্বাঽথ রসভাবিতম্ ||১৩|| কূর্মপিত্তেন মতিমান্ ভাবযেদ্রৌহিতেন বা | চূর্ণাঞ্জনমিদং নিত্যং প্রযোজ্যং পিত্তশান্তযে ||১৪||

Adhikarana 10 (15) · Śloka 15

কাশমরীপুষ্পমধুকদার্বীরোধ্ররসাঞ্জনৈঃ | সক্ষৌদ্রমঞ্জনং তদ্বদ্ধিতমত্রামযে সদা ||১৫||

Adhikarana 11 (16) · Śloka 16

স্রোতোজং সৈন্ধবং কৃষ্ণাং রেণুকাং চাপি পেষযেত্ | অজামূত্রেণ তা বর্ত্যঃ ক্ষণদান্ধ্যাঞ্জনে হিতাঃ ||১৬||

Adhikarana 12 (17) · Śloka 18

কালানুসারিবাং কৃষ্ণাং নাগরং মধুকং তথা | তালীশপত্রং ক্ষণদে গাঙ্গেযং চ যকৃদ্রসে ||১৭|| কৃতাস্তা বর্তযঃ পিষ্টাশ্ছাযাশুষ্কাঃ সুখাবহাঃ |১৮|

Adhikarana 13 (18) · Śloka 19

মনঃশিলাভযাব্যোষবলাকালানুসারিবাঃ ||১৮|| সফেনা বর্তযঃ পিষ্টাশ্ছাগক্ষীরসমন্বিতাঃ |১৯|

Adhikarana 14 (19-20) · Śloka 21

গোমূত্রপিত্তমদিরাযকৃদ্ধাত্রীরসে পচেত্ ||১৯|| ক্ষুদ্রাঞ্জনং রসেনান্যদ্যকৃতস্ত্রৈফলেঽপি বা | গোমূত্রাজ্যার্ণবমলপিপ্পলীক্ষৌদ্রকট্ফলৈঃ ||২০|| সৈন্ধবোপহিতং যুঞ্জ্যান্নিহিতং বেণুগহ্বরে |২১|

Adhikarana 15 (21-22) · Śloka 22

মেদো যকৃদ্ধৃতং চাজং পিপ্পল্যঃ সৈন্ধবং মধু ||২১|| রসমামলকাচ্চাপি পক্বং সম্যঙ্নিধাপযেত্ | কোশে খদিরনির্মাণে তদ্বত্ ক্ষুদ্রাঞ্জনং হিতম্ ||২২||

Adhikarana 16 (23) · Śloka 23

হরেণুমগধাজাস্থিমজ্জৈলাযকৃদন্বিতম্ | যকৃদ্রসেনাঞ্জনং বা শ্লেষ্মোপহতদৃষ্টযে ||২৩||

Adhikarana 17 (24) · Śloka 24

বিপাচ্য গোধাযকৃদর্ধপাটিতং সুপূরিতং মাগধিকাভিরগ্নিনা | নিষেবিতং তদ্যকৃদঞ্জনেন নিহন্তি নক্তান্ধ্যমসংশযং খলু ||২৪||

Adhikarana 18 (25) · Śloka 25

তথা যকৃচ্ছাগভবং হুতাশনে বিপাচ্য সম্যঙ্মগধাসমন্বিতম্ | প্রযোজিতং পূর্ববদাশ্বসংশযং জযেত্ ক্ষপান্ধ্যং সকৃদঞ্জনান্নৃণাম্ ||২৫||

Adhikarana 19 (26) · Śloka 26

প্লীহা যকৃচ্চাপ্যুপভক্ষিতে উভে প্রকল্প্য শূল্যে ঘৃততৈলসংযুতে | তে সার্ষপস্নেহসমাযুতেঽঞ্জনং নক্তান্ধ্যমাশ্বেব হতঃ প্রযোজিতে ||২৬||

Adhikarana 20 (27) · Śloka 27

নদীজশিম্বীত্রিকটূন্যথাঞ্জনং মনঃশিলা দ্বে চ নিশে য(শ)কৃদ্গবাম্ | সচন্দনেযং গুটিকাঽথবাঽঞ্জনং প্রশস্যতে বৈ দিবসেষ্বপশ্যতাম্ ||২৭||

Adhikarana 21 (28) · Śloka 28

ভবন্তি যাপ্যাঃ খলু যে ষডামযা হরেদসৃক্তেষু সিরাবিমোক্ষণৈঃ | বিরেচযেচ্চাপি পুরাণসর্পিষা বিরেচনাঙ্গোপহিতেন সর্বদা ||২৮||

Adhikarana 22 (29) · Śloka 30

পযোবিমিশ্রং পবনোদ্ভবে হিতং বদন্তি পঞ্চাঙ্গুলতৈলমেব তু | ভবেদ্ধৃতং ত্রৈফলমেব শোধনং বিশেষতঃ শোণিতপিত্তরোগযোঃ ||২৯|| ত্রিবৃদ্বিরেকঃ কফজে প্রশস্যতে ত্রিদোষজে তৈলমুশন্তি তত্কৃতম্ |৩০|

Adhikarana 23 (30) · Śloka 31

পুরাণসর্পিস্তিমিরেষু সর্বশো হিতং ভবেদাযসভাজনস্থিতম্ ||৩০|| হিতং চ বিদ্যাত্ত্রিফলাঘৃতং সদা কৃতং চ যন্মেষবিষাণনামভিঃ |৩১|

Adhikarana 24 (31) · Śloka 32

সদাঽবলিহ্যাত্ত্রিফলং সুচূর্ণিতাং ঘৃতপ্রগাঢাং তিমিরেঽথ পিত্তজে ||৩১|| সমীরজে তৈলযুতাং কফাত্মকে মধুপ্রগাঢাং বিদধীত যুক্তিতঃ |৩২|

Adhikarana 25 (32) · Śloka 32

গবাং শকৃত্ক্বাথবিপক্বমুত্তমং হিতং তু তৈলং তিমিরেষু নাবনম্ ||৩২||

Adhikarana 26 (33) · Śloka 33

হিতং ঘৃতং কেবল এব পৈত্তিকে হ্যজাবিকং যন্মধুরৈর্বিপাচিতম্ |৩৩|

Adhikarana 27 (33) · Śloka 33

তৈলং স্থিরাদৌ মধুরে চ যদ্গণে তথাঽণুতৈলং পবনাসৃগুত্থযোঃ ||৩৩||

Adhikarana 28 (34) · Śloka 34

সহাশ্বগন্ধাতিবলাবরীশৃতং হিতং চ নস্যে ত্রিবৃতং যদীরিতম্ | জলোদ্ভবানূপজমাংসসংস্কৃতাদ্ধৃতং বিধেযং পযসো যদুত্থিতম্ ||৩৪||

Adhikarana 29 (35) · Śloka 35

সসৈন্ধবঃ ক্রব্যভুগেণমাংসযোর্হিতঃ সসর্পিঃ সমধুঃ পুটাহ্বযঃ |৩৫|

Adhikarana 30 (35) · Śloka 35

বসাঽথ গৃধ্রোরগতাম্রচূডজা সদা প্রশস্তা মধুকান্বিতাঽঞ্জনে ||৩৫||

Adhikarana 31 (36) · Śloka 36

প্রত্যঞ্জনং স্রোতসি যত্সমুত্থিতং ক্রমাদ্রসক্ষীরঘৃতেষু ভাবিতম্ |৩৬|

Adhikarana 32 (36-37) · Śloka 37

স্থিতং দশাহত্রযমেতদঞ্জনং কৃষ্ণোরগাস্যে কুশসম্প্রবেষ্টিতে ||৩৬|| তন্মালতীকোরকসৈন্ধবাযুতং সদাঽঞ্জনং স্যাত্তিমিরেঽথ রাগিণি | সুভাবিতং বা পযসা দিনত্রযং কাচাপহং শাস্ত্রবিদঃ প্রচক্ষতে ||৩৭||

Adhikarana 33 (38) · Śloka 38

হবির্হিতং ক্ষীরভবং তু পৈত্তিকে বদন্তি নস্যে মধুরৌষধৈঃ কৃতম্ | তত্তর্পণে চৈব হিতং প্রযোজিতং সজাঙ্গলস্তেষু চ যঃ পুটাহ্বযঃ ||৩৮||

Adhikarana 34 (39) · Śloka 39

রসাঞ্জনক্ষৌদ্রসিতামনঃশিলাঃ ক্ষুদ্রাঞ্জনং তন্মধুকেন সংযুতম্ |৩৯|

Adhikarana 35 (39) · Śloka 39

সমাঞ্জনং বা কনকারোদ্ভবং সুচূর্ণিতং শ্রেষ্ঠমুশন্তি তদ্বিদঃ ||৩৯||

Adhikarana 36 (40) · Śloka 40

ভিল্লোটগন্ধোদকসেকসেচিতং প্রত্যঞ্জনে চাত্র হিতং তু তুত্থকম্ |৪০|

Adhikarana 37 (40) · Śloka 40

সমেষশৃঙ্গাঞ্জনভাগসম্মিতং জলোদ্ভবং কাচমলং ব্যপোহতি ||৪০||

Adhikarana 38 (41) · Śloka 41

পলাশরোহীতমধূকজা রসাঃ ক্ষৌদ্রেণ যুক্তা মদিরাগ্রমিশ্রিতাঃ |৪১|

Adhikarana 39 (41) · Śloka 41

উশীরলোধ্রত্রিফলাপ্রিযঙ্গুভিঃ পচেত্তু নস্যং কফরোগশান্তযে ||৪১||

Adhikarana 40 (42) · Śloka 42

বিডঙ্গপাঠাকিণিহীঙ্গুদীত্বচঃ প্রযোজযেদ্ধূমমুশীরসংযুতাঃ |৪২|

Adhikarana 41 (42) · Śloka 42

বনস্পতিক্বাথবিপাচিতং ঘৃতং হিতং হরিদ্রানলদে চ তর্পণম্ ||৪২||

Adhikarana 42 (43) · Śloka 43

সমাগধো মাক্ষিকসৈন্ধবাঢ্যঃ সজাঙ্গলঃ স্যাত্ পুটপাক এব চ |৪৩|

Adhikarana 43 (43) · Śloka 43

মনঃশিলাত্র্যূষণশঙ্খমাক্ষিকৈঃ সসিন্ধুকাসীসরসাঞ্জনৈঃ ক্রিযাঃ ||৪৩||

Adhikarana 44 (44) · Śloka 44

হিতে চ কাসীসরসাঞ্জনে তথা বদন্তি পথ্যে গুডনাগরৈর্যুতে |৪৪|

Adhikarana 45 (44-45) · Śloka 45

যদঞ্জনং বা বহুশো নিষেচিতং সমূত্রবর্গে ত্রিফলোদকে শৃতে ||৪৪|| নিশাচরাস্থিস্থিতমেতদঞ্জনং ক্ষিপেচ্চ মাসং সলিলেঽস্থিরে পুনঃ | মেষস্য পুষ্পৈর্মধুকেন সংযুতং তদঞ্জনং সর্বকৃতে প্রযোজযেত্ ||৪৫||

Adhikarana 46 (46) · Śloka 46

ক্রিযাশ্চ সর্বাঃ, ক্ষতজোদ্ভবে হিতঃ ক্রমঃ পরিম্লাযিনি চাপি পিত্তহৃত্ |৪৬|

Adhikarana 47 (46) · Śloka 46

ক্রমো হিতঃ স্যন্দহরঃ প্রযোজিতঃ সমীক্ষ্য দোষেষু যথাস্বমেব চ ||৪৬||

Adhikarana 48 (47) · Śloka 47

দোষোদযে নৈব চ বিপ্লতিঙ্গতে দ্রব্যাণি নস্যাদিষু যোজযেদ্বুধঃ |৪৭|

Adhikarana 49 (47) · Śloka 47

পুনশ্চ কল্পেঽঞ্জনবিস্তরঃ শুভঃ প্রবক্ষ্যতেঽন্যস্তমপীহ যোজযেত্ ||৪৭||

Adhikarana 50 (48) · Śloka 48

ঘৃতং পুরাণং ত্রিফলাং শতাবরীং পটোলমুদ্গামলকং যবানপি | নিষেবমাণস্য নরস্য যত্নতো ভযং সুঘোরাত্তিমিরান্ন বিদ্যতে ||৪৮||

Adhikarana 51 (49) · Śloka 49

শতাবরীপাযস এব কেবলস্তথা কৃতো বাঽঽমলকেষু পাযসঃ | প্রভূতসর্পিস্ত্রিফলোদকোত্তরো যবৌদনো বা তিমিরং ব্যপোহতি ||৪৯||

Adhikarana 52 (50-51) · Śloka 51

জীবন্তিশাকং সুনিষণ্ণকং চ সতণ্ডুলীযং বরবাস্তুকং চ | চিল্লী তথা মূলকপোতিকা চ দৃষ্টের্হিতং শাকুনজাঙ্গলং চ ||৫০|| পটোলকর্কোটককারবেল্লবার্তাকুতর্কারিকরীরজানি | শাকানি শিগ্র্বার্তগলানি চৈব হিতানী দৃষ্টের্ঘৃতসাধিতানি ||৫১||

Adhikarana 53 (52) · Śloka 52

বিবর্জযেত্সিরামোক্ষং তিমিরে রাগমাগতে | যন্ত্রেণোত্পীডিতো দোষো নিহন্যাদাশু দর্শনম্ ||৫২||

Adhikarana 54 (53) · Śloka 53

অরাগি তিমিরং সাধ্যমাদ্যং পটলমাশ্রিতম্ | কৃচ্ছ্রং দ্বিতীযে রাগি স্যাত্তৃতীযে যাপ্যমুচ্যতে ||৫৩||

Adhikarana 55 (54) · Śloka 54

রাগপ্রাপ্তেষ্বপি হিতাস্তিমিরেষু তথা ক্রিযাঃ | যাপনার্থং যথোদ্দিষ্টাঃ সেব্যাশ্চাপি জলৌকসঃ ||৫৪||

Adhikarana 56 (55-56) · Śloka 56

শ্লৈষ্মিকে লিঙ্গনাশে তু কর্ম বক্ষ্যামি সিদ্ধযে | ন চেদর্ধেন্দুঘর্মাম্বুবিন্দুমুক্তাকৃতিঃ স্থিরঃ ||৫৫|| বিষমো বা তনুর্মধ্যে রাজিমান্ বা বহুপ্রভঃ | দৃষ্টিস্থো লক্ষ্যতে দোষঃ সরুজো বা সলোহিতঃ ||৫৬||

Adhikarana 57 (57-60) · Śloka 61

স্নিগ্ধস্বিন্নস্য তস্যাথ কালে নাত্যুষ্ণশীতলে | যন্ত্রিতস্যোপবিষ্টস্য স্বাং নাসাং পশ্যতঃ সমম্ ||৫৭|| মতিমান্ শুক্লভাগৌ দ্বৌ কৃষ্ণান্মুক্ত্বা হ্যপাঙ্গতঃ | উন্মীল্য নযনে সম্যক্ সিরাজালবিবর্জিতে ||৫৮|| নাধো নোর্ধ্বং ন পার্শ্বাভ্যাং ছিদ্রে দৈবকৃতে ততঃ | শলাকযা প্রযত্নেন বিশ্বস্তং যববক্রযা ||৫৯|| মধ্যপ্রদেশিন্যঙ্গুষ্ঠস্থিরহস্তগৃহীতযা | দক্ষিণেন ভিষক্ সব্যং বিধ্যেত্ সব্যেন চেতরত্ ||৬০|| বারিবিন্দ্বাগমঃ সম্যগ্ ভবেচ্ছব্দস্তথা ব্যধে |৬১|

Adhikarana 58 (61-63) · Śloka 64

সংসিচ্য বিদ্ধমাত্রং তু যোষিত্স্তন্যেন কোবিদঃ ||৬১|| স্থিরে দোষে চলে বাঽপি স্বেদযেদক্ষি বাহ্যতঃ | সম্যক্ শলাকাং সংস্থাপ্য ভঙ্গৈরনিলনাশনৈঃ ||৬২|| শলাকাগ্রেণ তু ততো নির্লিখেদ্দৃষ্টিমণ্ডলম্ | বিধ্যতো যোঽন্যপার্শ্বেঽক্ষ্ণস্তং রুদ্ধ্বা নাসিকাপুটম্ ||৬৩|| উচ্ছিঙ্ঘনেন হর্তব্যো দৃষ্টিমণ্ডলগঃ কফঃ |৬৪|

Adhikarana 59 (64-68) · Śloka 68

নিরভ্র ইব ঘর্মাংশুর্যদা দৃষ্টিঃ প্রকাশতে ||৬৪|| তদাঽসৌ লিখিতা সম্যগ্ জ্ঞেযা যা চাপি নির্ব্যথা | (এবং ত্বশক্যে নির্হর্তুং দোষে প্রত্যাগতেঽপি বা ||৬৫|| স্নেহাদ্যৈরুপপন্নস্য ব্যধো ভূযো বিধীযতে) | ততো দৃষ্টেষু রূপেষু শলাকামাহরেচ্ছনৈঃ ||৬৬|| ঘৃতেনাভ্যজ্য নযনং বস্ত্রপট্টেন বেষ্টযেত্ | ততো গৃহে নিরাবাধে শযীতোত্তান এব চ ||৬৭|| উদ্গারকাসক্ষবথুষ্ঠীবনোত্কম্পনানি চ | তত্কালং নাচরেদূর্ধ্বং যন্ত্রণা স্নেহপীতবত্ ||৬৮||

Adhikarana 60 (69) · Śloka 69

ত্র্যহাত্ ত্র্যহাচ্চ ধাবেত কষাযৈরনিলাপহৈঃ | বাযোর্ভযাত্ ত্র্যহাদূর্ধ্বং স্বেদযেদক্ষি পূর্ববত্ ||৬৯||

Adhikarana 61 (70) · Śloka 70

দশাহমেবং সংযম্য হিতং দৃষ্টিপ্রসাদনম্ | পশ্চাত্কর্ম চ সেবেত লঘ্বন্নং চাপি মাত্রযা ||৭০||

Adhikarana 62 (71) · Śloka 71

সিরাব্যধবিধৌ পূর্বং নরা যে চ বিবার্জিতাঃ | ন তেষাং নীলিকাং বিধ্যেদন্যত্রাভিহিতাদ্ভিষক্ ||৭১||

Adhikarana 63 (72) · Śloka 72

পূর্যতে শোণিতেনাক্ষি সিরাবেধাদ্বিসর্পতা | তত্র স্ত্রীস্তন্যযষ্ট্যাহ্বপক্বং সেকে হিতং ঘৃতম্ ||৭২||

Adhikarana 64 (73-79) · Śloka 79

অপাঙ্গাসন্নবিদ্ধে তু শোফশূলাশ্রুরক্ততাঃ | তত্রোপনাহং ভ্রূমধ্যে কুর্যাচ্চোষ্ণাজ্যসেচনম্ ||৭৩|| ব্যধেনাসন্নকৃষ্ণেন রাগঃ কৃষ্ণং চ পীড্যতে | তত্রাধঃশোধনং সেকঃ সর্পিষা রক্তমোক্ষণম্ ||৭৪|| অথাপ্যুপরি বিদ্ধে তু কষ্টা রুক্ সম্প্রবর্ততে | তত্র কোষ্ণেন হবিষা পরিষেকঃ প্রশস্যতে ||৭৫|| শূলাশ্রুরাগাস্ত্বত্যর্থমধোবেধেন পিচ্ছিলঃ | শলাকামনু চাস্রাবস্তত্র পূর্বচিকিত্সিতম্ ||৭৬|| রাগাশ্রুবেদনাস্তম্ভহর্ষাশ্চাতিবিঘট্টিতে | স্নেহস্বেদৌ হিতৌ তত্র হিতং চাপ্যনুবাসনম্ ||৭৭|| দোষস্ত্বধোঽপকৃষ্টোঽপি তরুণঃ পুনরূর্ধ্বগঃ | কুর্যাচ্ছুক্লারুণং নেত্রং তীব্ররুঙ্নষ্টদর্শনম্ ||৭৮|| মধুরৈস্তত্র সিদ্ধেন ঘৃতেনাক্ষ্ণঃ প্রসেচনম্ | শিরোবস্তিং চ তেনৈব দদ্যান্মাংসৈশ্চ ভোজনম্ ||৭৯||

Adhikarana 65 (80) · Śloka 80

দোষস্তু সঞ্জাতবলো ঘনঃ সম্পূর্ণমণ্ডলঃ | প্রাপ্য নশ্যেচ্ছলাকাগ্রং তন্বভ্রমিব মারুতম্ ||৮০||

Adhikarana 66 (81) · Śloka 81

মূর্ধাভিঘাতব্যাযামব্যবাযবমিমূর্চ্ছনৈঃ | দোষঃ প্রত্যেতি কোপাচ্চ বিদ্ধোঽতিতরুণশ্চ যঃ ||৮১||

Adhikarana 67 (82) · Śloka 83

শলাকা কর্কশা শূলং, খরা দোষপরিপ্লুতিম্ | ব্রণং বিশালং স্থূলাগ্রা, তীক্ষ্ণা হিংস্যাদনেকধা ||৮২|| জলাস্রাবং তু বিষমা, ক্রিযাসঙ্গমথাস্থিরা | করোতি ... |৮৩|

Adhikarana 68 (83-84) · Śloka 85

... বর্জিতা দোষৈস্তস্মাদেভির্হিতা ভবেত্ ||৮৩|| অষ্টাঙ্গুলাযতা মধ্যে সূত্রেণ পরিবেষ্টিতা | অঙ্গুষ্ঠপর্বসমিতা বক্ত্রযোর্মুকুলাকৃতিঃ ||৮৪|| তাম্রাযসী শাতকুম্ভী শলাকা স্যাদনিন্দিতা |৮৫|

Adhikarana 69 (85-86) · Śloka 86

রাগঃ শোফোঽর্বুদং চোষো বুদ্বুদং শূকরাক্ষিতা ||৮৫|| অধিমন্থাদযশ্চান্যে রোগাঃ স্যুর্ব্যধদোষজাঃ | অহিতাচারতো বাঽপি যথাস্বং তানুপাচরেত্ ||৮৬||

Adhikarana 70 (87-94) · Śloka 94

রুজাযামক্ষিরাগে বা যোগান্ ভূযো নিবোধ মে | গৈরিকং সারিবা দূর্বা যবপিষ্টং ঘৃতং পযঃ ||৮৭|| সুখালেপঃ প্রযোজ্যোঽযং বেদনারাগশান্তযে | মৃদুভৃষ্টৈস্তিলৈর্বাঽপি সিদ্ধার্থকসমাযুতৈঃ ||৮৮|| মাতুলুঙ্গরসোপেতৈঃ সুখালেপস্তদর্থকৃত্ | পযস্যাসারিবাপত্রমঞ্জিষ্ঠামধুকৈরপি ||৮৯|| অজাক্ষীরান্বিতৈর্লেপঃ সুখোষ্ণঃ পথ্য উচ্যতে | দারুপদ্মকশুণ্ঠীভিরেবমেব কৃতোঽপি বা ||৯০|| দ্রাক্ষামধুককুষ্ঠৈর্বা তদ্বত্ সৈন্ধবসংযুতৈঃ | রোধ্রসৈন্ধবমৃদ্বীকামধুকৈর্বাঽপ্যজাপযঃ ||৯১|| শৃতং সেকে প্রযোক্তব্যং রুজারাগনিবারণম্ | মধুকোত্পলকুষ্ঠৈর্বা দ্রাক্ষালাক্ষাসিতাযুতৈঃ | সসৈন্ধবৈঃ শৃতং ক্ষীরং রুজারাগনিবর্হণম্ ||৯২|| শতাবরীপৃথক্পর্ণীমুস্তামলকপদ্মকৈঃ | সাজক্ষীরৈঃ শৃতং সর্পির্দাহশূলনিবর্হণম্ ||৯৩|| বাতঘ্নসিদ্ধে পযসি সিদ্ধং সর্পিশ্চতুর্গুণে | কাকোল্যাদিপ্রতীবাপং তদ্যুঞ্জ্যাত্ সর্বকর্মসু ||৯৪||

Adhikarana 71 (95) · Śloka 95

শাম্যত্যেবং ন চেচ্ছূলং স্নিগ্ধস্বিন্নস্য মোক্ষযেত্ | ততঃ সিরাং দহেদ্বাঽপি মতিমান্ কীর্তিতং যথা ||৯৫||

Adhikarana 72 (96-99) · Śloka 99

দৃষ্টেরতঃ প্রসাদার্থমঞ্জনে শৃণু মে শুভে | মেষশৃঙ্গস্য পুষ্পাণি শিরীষধবযোরপি ||৯৬|| সুমনাযাশ্চ পুষ্পাণি মুক্তা বৈদূর্যমেব চ | অজাক্ষীরেণ সম্পিষ্য তাম্রে সপ্তাহমাবপেত্ ||৯৭|| প্রবিধায চ তদ্বর্তীর্যোজযেচ্চাঞ্জনে ভিষক্ | স্রোতোজং বিদ্রুমং ফেনং সাগরস্য মনঃশিলাম্ ||৯৮|| মরিচানি চ তদ্বর্তীঃ কারযেচ্চাপি পূর্ববত্ | দৃষ্টিস্থৈর্যার্থমেতত্তু বিদধ্যাদঞ্জনে হিতম্ ||৯৯||

Adhikarana 73 (100) · Śloka 100

ভূযো বক্ষ্যামি মুখ্যানি বিস্তরেণাঞ্জনানি চ | কল্পে নানাপ্রকারাণি তান্যপীহ প্রযোজযেত্ ||১০০||

Adhikarana puShpikA · Śloka 17

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে দৃষ্টিগতরোগবিজ্ঞানীযো নাম সপ্তদশোঽধ্যাযঃ ||১৭||