Adhikarana 1 (1-2) · Śloka 2
অথাতো দৃষ্টিগতরোগবিজ্ঞানীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो दृष्टिगतरोगविज्ञानीयमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
সর্বগতরোগবিজ্ঞানীযানন্তরং দৃষ্টিগতরোগাণাং পারিশেষ্যাদারম্ভো যুক্ত ইত্যত আহ- অথাত ইত্যাদি||১-২||
Adhikarana 2 (3-4) · Śloka 4
মসূরদলমাত্রাং তু পঞ্চভূতপ্রসাদজাম্ | খদ্যোতবিস্ফুলিঙ্গাভামিদ্ধাং তেজোভিরব্যযৈঃ ||৩|| আবৃতাং পটলেনাক্ষ্ণোর্বাহ্যেন বিবরাকৃতিম্ | শীতসাত্ম্যাং নৃণাং দৃষ্টিমাহুর্নযনচিন্তকাঃ ||৪||
मसूरदलमात्रां तु पञ्चभूतप्रसादजाम् | खद्योतविस्फुलिङ्गाभामिद्धां तेजोभिरव्ययैः ||३|| आवृतां पटलेनाक्ष्णोर्बाह्येन विवराकृतिम् | शीतसात्म्यां नृणां दृष्टिमाहुर्नयनचिन्तकाः ||४||
🔊 Audio coming soon
তাং চ দৃষ্টিং চিকিত্সার্থং প্রমাণাকারস্বলক্ষণৈর্নির্দিশন্নাহ- মসূরেত্যাদি| মসূরদলমাত্রামিতি মসূরদলপ্রমাণামিত্যর্থঃ| পঞ্চভূতপ্রসাদজামিতি পঞ্চভূতানাং ধামভূতাত্ সারাজ্জাতামিত্যর্থঃ| পঞ্চভূতমধ্যে একস্য প্রাধান্যমাহ- ইদ্ধাং তেজোভিরব্যযৈরিতি; এতেন তেজোমযী দৃষ্টিরিত্যুক্তম্| খদ্যোতবিস্ফুলিঙ্গাভামিতি খদ্যোতো জ্যোতিরিঙ্গণঃ, বিস্ফুলিঙ্গঃ সুক্ষ্মোঽগ্নিকণঃ; খদ্যোতবিস্ফুলিঙ্গৌ তৈজসাবপি যথা ন দহতস্তথা দৃষ্টিরপি ন দহতি| যদি সা খদ্যোতাদিসদৃশী তর্হি দিবাকরপ্রকাশাদ্রূপগ্রহণেন ন ভবিতব্যমিত্যাহ- অব্যযৈরিতি|- অব্যযৈঃ উপচযাপচযরহিতৈস্তেজোভির্বিশিষ্টা| তস্য দৃষ্টেঃ কুতো ভাস্বরতা ন দৃশ্যত ইত্যাহ- আবৃতাং পটলেনাক্ষ্ণোর্বাহ্যেনেতি; আবৃতাম্ আচ্ছাদিতাং, বাহ্যেন তেজো জলাশ্রিতেন| যদ্যপি বাহ্যপটলাবৃতত্বাদ্দৃষ্টে রূপগ্রহণসামর্থ্যোপঘাতঃ প্রাপ্তঃ, তথাঽপি পটলস্যাত্যন্তাচ্ছত্বাদ্দ্রোমকূপবিবরান্তরত্বাচ্চ তেজঃপরমাণূনাং বহিশ্চরত্বে রূপগ্রহণসামর্থ্যং দৃষ্টের্নোপহন্যত ইত্যাহ- বিবরাকৃতিমিতি|- বিবরং ছিদ্রং তস্যেবাকৃতির্যস্যাঃ সা তথা তাং, ন তু সাক্ষাত্তত্র ছিদ্রমস্তি| বিবরাকারবচনেন পুনর্মৃদুতৈবোক্তা, ন পুনঃ সর্বথা শুষিরত্বং; তথা চ সতি পটলানাং প্রতিপাদিতানামপ্যনুপপত্তিঃ স্যাত্| দৃষ্টেঃ পটলচতুষ্টযেঽপি রূপগ্রহণসামর্থ্যমনুমাতব্যং, কালকাস্থ্যাশ্রিতাভ্যন্তরপটলমপি গতে দোষে রূপগ্রহণবিকৃতিলক্ষণস্য তিমিরস্যোক্তেঃ| শীতসাত্ম্যামিতি| ননু শীতেন তেজোঽভিহন্যতে তত্ কথং শীতেন সাত্ম্যং? উচ্যতে- পৃথগ্ব্যবস্থিতযোর্জলাগ্ন্যোর্বিরোধো, ন পুনঃ সহোত্পন্নযোরেককার্যযোঃ; প্রভাবাদ্বা জলান্তর্গতমপ্যেতত্তেজো নোপহন্যতে||৩-৪||
Adhikarana 3 (5) · Śloka 5
রোগাংস্তদাশ্রযান্ ঘোরান্ ষট্ চ ষট্ চ প্রচক্ষ্মহে | পটলানুপ্রবিষ্টস্য তিমিরস্য চ লক্ষণম্ ||৫||
रोगांस्तदाश्रयान् घोरान् षट् च षट् च प्रचक्ष्महे | पटलानुप्रविष्टस्य तिमिरस्य च लक्षणम् ||५||
🔊 Audio coming soon
প্রমাণাদিভিশ্চিকিত্সোপযোগিভির্দৃষ্টিমভিধায তদাশ্রযরোগোপবর্ণনার্থং পটলচতুষ্টযপ্রবিষ্টতিমিরলক্ষণোপদেশার্থং চ প্রতিপাদযন্নাহ- রোগানিত্যাদি| তদাশ্রযান্ দৃষ্ট্যাশ্রযানিত্যর্থঃ| ষট্ চ ষট্ চেতি দ্বাদশেত্যর্থঃ||৫||
Adhikarana 4 (6) · Śloka 7
সিরাভিরভিসম্প্রাপ্য বিগুঽভ্যন্তরে ভৃশম্ | প্রথমে পটলে দোষো যস্য দৃষ্টৌ ব্যবস্থিতঃ ||৬|| অব্যক্তানি স রূপাণি সর্বাণ্যেব প্রপশ্যতি |৭|
सिराभिरभिसम्प्राप्य विगुऽभ्यन्तरे भृशम् | प्रथमे पटले दोषो यस्य दृष्टौ व्यवस्थितः ||६|| अव्यक्तानि स रूपाणि सर्वाण्येव प्रपश्यति |७|
🔊 Audio coming soon
প্রথমপটলগতস্য তিমিরারম্ভকদোষস্য সম্প্রাপ্তিলেশপূর্বকং লক্ষণমাহ- সিরাভিরিত্যাদি| অভিসম্প্রাপ্য সম্যগ্গত্বা| বিগুণো দুষ্টঃ| অভ্যন্তরে সর্বাভ্যন্তরে কালকাস্থ্যাশ্রিতে প্রথমপটলে| স পুরুষঃ| ‘সর্বাণ্যেব প্রপশ্যতি’ ইত্যত্র ‘কদাচিদথ পশ্যতি’ ইতি পঞ্জিকাকারঃ পঠতি ব্যাখ্যানযতি চ- কদাচিন্ন সর্বকালম্| এতেন স্থানবিশেষাদ্দোষস্যাল্পবলবত্তোক্তা, তদুত্তরেষু ক্রমাত্ বলবত্ত্বমিতি| তান্যব্যক্তরূপাণ্যপি বক্ষ্যমাণরূপভ্রমণারুণবর্ণাদিযুক্তানি বাতেন, তথা পিত্তেনাদিত্যখদ্যোতাদীনি নীলপীতবর্ণানি, এবং কফেন সিতবর্ণানি, রক্তেন রক্তবর্ণানি, সন্নিপাতেন বিচিত্রাণি| এবং দ্বিতীযাদিপটলেষ্বপি ব্যাখ্যেযম্||৬||-
Adhikarana 5 (7-10) · Śloka 10
দৃষ্টির্ভৃশং বিহ্বলতি দ্বিতীযং পটলং গতে ||৭|| মক্ষিকা মশকান্ কেশাঞ্জালকানি চ পশ্যতি | মণ্ডলানি পতাকাংশ্চ মরীচীঃ কুণ্ডলানি চ ||৮|| পরিপ্লবাংশ্চ বিবিধান্ বর্ষমভ্রং তমাংসি চ | দূরস্থান্যপি রূপাণি মন্যতে চ সমীপতঃ ||৯|| সমীপস্থানি দূরে চ দৃষ্টের্গোচরবিভ্রমাত্ | যত্নবানপি চাত্যর্থং সূচীপাশং ন পশ্যতি ||১০||
दृष्टिर्भृशं विह्वलति द्वितीयं पटलं गते ||७|| मक्षिका मशकान् केशाञ्जालकानि च पश्यति | मण्डलानि पताकांश्च मरीचीः कुण्डलानि च ||८|| परिप्लवांश्च विविधान् वर्षमभ्रं तमांसि च | दूरस्थान्यपि रूपाणि मन्यते च समीपतः ||९|| समीपस्थानि दूरे च दृष्टेर्गोचरविभ्रमात् | यत्नवानपि चात्यर्थं सूचीपाशं न पश्यति ||१०||
🔊 Audio coming soon
দ্বিতীযপটলগতদোষলক্ষণমাহ- দৃষ্টিরিত্যাদি| দ্বিতীযং পটলং মেদঃশ্রিতম্| ভৃশমিতি যাদৃশী প্রথমে পটলে ততোঽধিকং বিহ্বলীভবতি| বিহ্বলত্বমাহ- মক্ষিকা মশকানিত্যাদি| মক্ষিকাদীনামভাবেঽপি তিমিরারম্ভকদ্বিতীযপটলাশ্রিতদোষপ্রভাবেণ মক্ষিকাদীনি যথাদোষবর্ণানি পশ্যতি| জালকানি জন্তুলালাবিরচিতজালকাকারাণি, মণ্ডলানি বর্তুলরূপাণি| পতাকাঃ ধ্বজান্| মরীচীঃ মৃগতৃষ্ণাঃ| কুণ্ডলানি কর্ণকুণ্ডলানি| পরিপ্লবাংশ্চেতি নক্ষত্রাদীনাং গতীঃ| বিবিধান্ ঊর্ধ্বাধস্তির্যগ্গমনেন কৃষ্ণপীতশুক্লবর্ণদর্শনেন বা নানাপ্রকারান্| বর্ষং বৃষ্টিম্| অসদ্রূপগ্রহণে বিহ্বলত্বং প্রতিপাদ্য সদ্রূপগ্রহণেঽপি দেশাপরিজ্ঞানে দৃশোর্বিহ্বলত্বং প্রতিপাদযন্নাহ- দূরস্থানীত্যাদি| গোচরবিভ্রমাত্ ইন্দ্রিযার্থবিভ্রমাত্||৭-১০||
Adhikarana 6 (11-14) · Śloka 15
ঊর্ধ্বং পশ্যতি নাধস্তাত্তৃতীযং পটলং গতে | মহান্ত্যপি চ রূপাণি চ্ছাদিতানীব বাসসা ||১১|| কর্ণনাসাক্ষিযুক্তানি বিপরীতানি বীক্ষতে | যথাদোষং চ রজ্যেত দৃষ্টির্দোষে বলীযসি ||১২|| অধঃস্থিতে সমীপস্থং দূরস্থং চোপরিস্থিতে | পার্শ্বস্থিতে তথা দোষে পার্শ্বস্থানি ন পশ্যতি ||১৩|| সমন্ততঃ স্থিতে দোষে সঙ্কুলানীব পশ্যতি | দৃষ্টিমধ্যগতে দোষে স একং মন্যতে দ্বিধা ||১৪|| দ্বিধাস্থিতে ত্রিধা পশ্যেদ্বহুধা চানবস্থিতে | তিমিরাখ্যঃ স বৈ দোষঃ... |১৫|
ऊर्ध्वं पश्यति नाधस्तात्तृतीयं पटलं गते | महान्त्यपि च रूपाणि च्छादितानीव वाससा ||११|| कर्णनासाक्षियुक्तानि विपरीतानि वीक्षते | यथादोषं च रज्येत दृष्टिर्दोषे बलीयसि ||१२|| अधःस्थिते समीपस्थं दूरस्थं चोपरिस्थिते | पार्श्वस्थिते तथा दोषे पार्श्वस्थानि न पश्यति ||१३|| समन्ततः स्थिते दोषे सङ्कुलानीव पश्यति | दृष्टिमध्यगते दोषे स एकं मन्यते द्विधा ||१४|| द्विधास्थिते त्रिधा पश्येद्बहुधा चानवस्थिते | तिमिराख्यः स वै दोषः... |१५|
🔊 Audio coming soon
তৃতীযপটলগতদোষলক্ষণমাহ- ঊর্ধ্বমিত্যাদি| তৃতীযং পটলং মাংসাশ্রিতম্| ঊর্ধ্বং পশ্যতীতি আলোকসহাযত্বেন দৃশ ঊর্ধ্বমুপলম্ভো নাধস্তাত্| বিপরীতানি কর্ণাদিহীনানি| যথাদোষং চেতি সামর্থ্যান্মাংসস্থিতশোণিতসহাযেন বলবত্তরদোষেণ দৃষ্টৌ রাগ উত্পদ্যত ইত্যর্থঃ| অত এব প্রথমদ্বিতীযপটলযোঃ শোণিতাভাবাদ্রাগাভাবঃ| অধঃস্থিতে দৃষ্টিমণ্ডলাধোভাগস্থিতে দোষে ইত্যর্থঃ| সঙ্কুলানীবেতি মিশ্রীভূতানীব বস্তুরূপাণি পশ্যতি| দ্বিধা স্থিতে ‘দোষে’ ইতি শেষঃ| অনবস্থিতে চঞ্চলে দোষে| তিমিরাখ্যঃ তিমিরসঞ্জ্ঞঃ, রাগপ্রাপ্তস্য চ তিমিরস্য ‘কাচ’ ইতি সঞ্জ্ঞা||১১-১৪||-
Adhikarana 7 (15-17) · Śloka 17
... চতুর্থং পটলং গতঃ ||১৫|| রুণদ্ধি সর্বতো দৃষ্টিং লিঙ্গনাশঃ স উচ্যতে | তস্মিন্নপি তমোভূতে নাতিরূঢে মহাগদে ||১৬|| চন্দ্রাদিত্যৌ সনক্ষত্রাবন্তরীক্ষে চ বিদ্যুতঃ | নির্মলানি চ তেজাংসি ভ্রাজিষ্ণূনি চ পশ্যতি ||১৭||
... चतुर्थं पटलं गतः ||१५|| रुणद्धि सर्वतो दृष्टिं लिङ्गनाशः स उच्यते | तस्मिन्नपि तमोभूते नातिरूढे महागदे ||१६|| चन्द्रादित्यौ सनक्षत्रावन्तरीक्षे च विद्युतः | निर्मलानि च तेजांसि भ्राजिष्णूनि च पश्यति ||१७||
🔊 Audio coming soon
চতুর্থপটলগতদোষলক্ষণমাহ- স ইত্যাদি| স এব তিমিরাখ্যঃ, চতুর্থং পটলং তেজোজলাশ্রিতং প্রাপ্তো যদা সর্বতো দৃষ্টিং রুণদ্ধি তদা লিঙ্গনাশ উচ্যত ইতি সম্বন্ধঃ| লিঙ্গনাশ ইতি লিঙ্গং চক্ষুরিন্দ্রিযশক্তিঃ, তস্য নাশো যস্মিন্ স লিঙ্গনাশো দোষঃ| তত্রাপ্যল্পেষু দোষেষু কেষাঞ্চিদ্বস্তুবিশেষাণামুপলম্ভো ভবতীতি দর্শযন্নাহ- তস্মিন্নিতি| তস্মিন্ লিঙ্গনাশে| তমোভূতে ইতি অত্র ভূতশব্দ উপমানে| নাতিরুঢে নাতিবৃদ্ধে| মহাগদে প্রধানেন্দ্রিযতিরোভাবকত্বাত্| নির্মলানি চ তেজাংসি অগ্ন্যাদীনি, ভ্রাজিষ্ণূনি অন্যান্যপি দীপ্তিমন্তি যানি বস্তূনি তানি পশ্যতীত্যর্থঃ||১৫-১৭||
Adhikarana 8 (18) · Śloka 18
স এব লিঙ্গনাশস্তু নীলিকাকাচসঞ্জ্ঞিতঃ |১৮|
स एव लिङ्गनाशस्तु नीलिकाकाचसञ्ज्ञितः |१८|
🔊 Audio coming soon
তস্যৈব লিঙ্গনাশস্যাপরং সঞ্জ্ঞাদ্বযং প্রতিপাদযন্নাহ- স এবেত্যাদি| নীলিকাবিশেষিতা কাচসঞ্জ্ঞা সঞ্জাতা যস্য স তথা| কাচসঞ্জ্ঞা চ তৃতীযেঽপি পটলে রাগিতিমিরস্য রাগোত্পত্তিদ্বারেণ সূচিতা| এতেন কাচত্বাত্ পটলদ্বযগতযোরপি দোষযোঃ ষট্ত্বং ন তু দ্বাদশত্বম্| অস্যাগ্রে কিচিত্ ‘যন্মযস্তন্মযানি’ ইত্যাদিপাঠমাপাতনিকাপূর্বকং পঠন্তি, স চাভাবান্ন লিখিতঃ|১৮|-
Adhikarana 9 (18) · Śloka 19
তত্র বাতেন রূপাণি ভ্রমন্তীব স পশ্যতি ||১৮|| আবিলান্যরুণাভানি ব্যাবিদ্ধানি চ মানবঃ |১৯|
तत्र वातेन रूपाणि भ्रमन्तीव स पश्यति ||१८|| आविलान्यरुणाभानि व्याविद्धानि च मानवः |१९|
🔊 Audio coming soon
ইদানীং তেষু পটলেষু ক্রমেণ বাতাদিদেষারব্ধস্য তিমিরস্য লিঙ্গানি দর্শযন্নাহ- বাতেনেত্যাদি| আবিলানি সমলানি, অরুণাভানি ঈষদ্রক্তানি| ব্যাবিদ্ধানি বক্রাণি||১৮||-
Adhikarana 10 (19) · Śloka 20
পিত্তেনাদিত্যখদ্যোতশক্রচাপতডিদ্গুণান্ ||১৯|| শিখিবর্হবিচিত্রাণি নীলকৃষ্ণানি পশ্যতি |২০|
पित्तेनादित्यखद्योतशक्रचापतडिद्गुणान् ||१९|| शिखिबर्हविचित्राणि नीलकृष्णानि पश्यति |२०|
🔊 Audio coming soon
পিত্তজতিমিরলক্ষণমাহ- পিত্তেনেত্যাদি| খদ্যোতো জ্যোতিরিঙ্গণঃ| শক্রচাপম্ ইন্দ্রধনুঃ, তডিদ্গুণো বিদ্যুল্লতা, শিখিবর্হঃ মযূরপিচ্ছঃ||১৯||-
Adhikarana 11 (20-21) · Śloka 22
কফেন পশ্যেদ্রূপাণি স্নিগ্ধানি চ সিতানি চ ||২০|| গৌরচামরগৌরাণি শ্বেতাভ্রপ্রতিমানি চ | পশ্যেদসূক্ষ্মাণ্যত্যর্থং ব্যভ্রে চৈবাভ্রসম্প্লবম্ ||২১|| সলিলপ্লাবিতানীব পরিজাড্যানি মানবঃ |২২|
कफेन पश्येद्रूपाणि स्निग्धानि च सितानि च ||२०|| गौरचामरगौराणि श्वेताभ्रप्रतिमानि च | पश्येदसूक्ष्माण्यत्यर्थं व्यभ्रे चैवाभ्रसम्प्लवम् ||२१|| सलिलप्लावितानीव परिजाड्यानि मानवः |२२|
🔊 Audio coming soon
শ্লেষ্মজতিমিরলক্ষণমাহ- কফেনেত্যাদি| গৌরচামরগৌরাণীতি শ্বেতচামরবচ্ছুক্লানি| সিতানি চেতি সুধৌতশুক্লবস্ত্রসদৃশানি| অসূক্ষ্মাণি স্থূলানি| ব্যভ্রে বিগতঘনে | অভ্রসম্প্লবং মেঘানাং সর্বতো গমনম্| সলিলপ্লাবিতানীব পরিজাড্যানীতি সর্বতঃ সলিলপ্লবনেনেব শুক্লানি স্তিমিতানি চ রূপাণি পশ্যতি||২০-২১||-
Adhikarana 12 (22) · Śloka 23
তথা রক্তেন রক্তানি তমাংসি বিবিধানি চ ||২২|| হরিতশ্যাবকৃষ্ণানি ধূমধূম্রাণি চেক্ষতে |২৩|
तथा रक्तेन रक्तानि तमांसि विविधानि च ||२२|| हरितश्यावकृष्णानि धूमधूम्राणि चेक्षते |२३|
🔊 Audio coming soon
রক্তজতিমিরলক্ষণমাহ- তথেত্যাদি| ধূমধূম্রাণি ধূমবেষ্টিতানীব| যদ্যপি তিমিরস্য রক্তান্তর্গতদোষজন্যত্বাদ্রক্তজসঞ্জ্ঞা ন স্যাত্, তথাঽপি রক্তবাহুল্যাদুপচারাদ্বা রক্তজব্যপদেশঃ||২২||-
Adhikarana 13 (23-24) · Śloka 24
সন্নিপাতেন চিত্রাণি বিপ্লুতানি চ পশ্যতি ||২৩|| বহুধা বা দ্বিধা বাঽপি সর্বাণ্যেব সমন্ততঃ | হীনাধিকাঙ্গান্যথবা জ্যোতীংষ্যপি চ পশ্যতি ||২৪||
सन्निपातेन चित्राणि विप्लुतानि च पश्यति ||२३|| बहुधा वा द्विधा वाऽपि सर्वाण्येव समन्ततः | हीनाधिकाङ्गान्यथवा ज्योतींष्यपि च पश्यति ||२४||
🔊 Audio coming soon
সন্নিপাতজতিমিরলক্ষণমাহ- সন্নিপাতেনেত্যাদি| চিত্রাণি নানাবর্ণানি বিপ্লুতানি সর্বতোঽবকীর্ণানি| বহুধা বহুত্বং গতানি, দ্বিধা দ্বিত্বং গতানি, সর্বাণ্যেব যাবদ্দ্রষ্টব্যানি রূপাণি| হীনাধিকাঙ্গানীতি ন কেবলং তৃতীযে পটলে হীনাধিকাঙ্গানি পশ্যতি সন্নিপাতেন পুনঃ পটলান্তরেঽপি হীনাধিকাঙ্গানি পশ্যতি| জ্যোতীংষি তারকাণি||২৩-২৪||
Adhikarana 14 (25) · Śloka 26
পিত্তং কুর্যাত্ পরিম্লাযি মূর্চ্ছিতং রক্ততেজসা | পীতা দিশস্তথোদ্যন্তমাদিত্যমিব পশ্যতি ||২৫|| বিকীর্যমাণান্ খদ্যোতৈর্বৃক্ষাংস্তেজোভিরেব চ |২৬|
पित्तं कुर्यात् परिम्लायि मूर्च्छितं रक्ततेजसा | पीता दिशस्तथोद्यन्तमादित्यमिव पश्यति ||२५|| विकीर्यमाणान् खद्योतैर्वृक्षांस्तेजोभिरेव च |२६|
🔊 Audio coming soon
ননু বাতপিত্তকফশোণিতসন্নিপাতৈঃ পঞ্চভিঃ পঞ্চতিমিরাণাং চোত্তরাবস্থাসু কাচলিঙ্গনাশসঞ্জ্ঞে কৃতে, কাচাশ্চ ষট্ ব্যাখ্যেযা ইতি তেষাং ষট্ত্বোপপত্তিহেতুভূতষষ্ঠপরিম্লাযিতিমিরকথনায, তথা পরিম্লাযিতিমিরাক্রান্তস্য পুংসো যাদৃশং রূপগ্রহণং ভবতি তাদৃগ্রূপকথনায চ প্রাহ- পিত্তমিত্যাদি| মূর্চ্ছিতং সংযুক্তং, রক্ততেজসা রক্তপ্রসাদেন; অন্যে তু রক্তার্থং তেজো রক্ততেজঃ, তেন মূর্চ্ছিতং; এতেন রক্তার্থং পরিণম্যমানরসেন সংযুক্তমিত্যর্থঃ| ঈদৃশে চ ব্যাখ্যানে নামান্বযঃ সঙ্গচ্ছতে| যথা পরিম্লাযী ক্ষযী কথ্যতে তথা চ বক্ষ্যতি,- ‘দোষক্ষযাত্ কদাচিত্ স্যাত্ স্বযং তত্র চ দর্শনম্’ ইতি, তচ্চ ক্ষযিত্বং লঙ্ঘনাদিভিরুপবৃংহকরসক্ষযাত্ পিত্তক্ষযাচ্চোপপদ্যতে| রক্তজপক্ষে রক্তক্ষযোপপত্তির্নাস্তি| কেচিত্ ‘রক্ততেজসা’ ইত্যত্র ‘ভক্ততেজসা’ ইতি পঠন্তি, ব্যাখ্যানযন্তি চ- ভক্ততেজসা আহারপ্রসাদেন রসাখ্যেনেত্যর্থঃ| অত্র সাত্যকিপ্রভৃতীনাং মতানুলোমেন রক্তমূর্চ্ছিতং পিত্তং হ্যপীত্যবগন্তব্যম্| তথা চ রাগকথনপ্রস্তাবে সাত্যকিঃ- “পিত্তরক্তোত্থিতা পীতাশ্চিত্রিতাঃ সন্নিপাতজাঃ”- ইতি| এক এবাসৌ পরিম্লাযী রোগোঽরাগপ্রাপ্তঃ সন্ তিমিরাখ্যঃ, রাগপ্রাপ্তস্তু কাচাখ্যঃ, স এব কিঞ্চিদ্দর্শননাশকারী লিঙ্গনাশঃ| সর্বাণ্যেব তিমিরাণি প্রথমদ্বিতীযপটলগতানি সাধ্যানি; তৃতীযপটলগতানি রাগপ্রাপ্ত্যা কাচাখ্যানি ভবন্তি, তদা যাপ্যানি||২৫||-
Adhikarana 15 (26) · Śloka 26
বক্ষ্যামি ষড্বিধং রাগৈর্লিঙ্গনাশমতঃ পরম্ ||২৬||
वक्ष्यामि षड्विधं रागैर्लिङ्गनाशमतः परम् ||२६||
🔊 Audio coming soon
তৃতীযরাগিতিমিরস্য কাচাখ্যাং প্রাপ্তস্য লিঙ্গনাশস্য চ রাগেণৈব সঙ্খ্যাষট্ত্বং নির্দিশন্নাহ- বক্ষ্যামীত্যাদি| ষড্বিধং ষড্ভেদভিন্নম্| তৃতীযপটলগতং কাচাখ্যাং প্রাপ্তং তিমিরমিতি শেষঃ| রাগৈঃ বক্ষ্যমণৈঃ অরুণাদিভিঃ| লিঙ্গনাশমতঃ পরমিতি কাচাখ্যতিমিরকথনানন্তরং লিঙ্গনাশমপি ষড্বিধং বক্ষ্যামি||২৬||
Adhikarana 16 (27) · Śloka 27
রাগোঽরুণো মারুতজঃ প্রদিষ্টঃ পিত্তাত্ পরিম্লায্যথবাঽপি নীলঃ | কফাত্ সিতঃ শোণিতজস্তু রক্তঃ সমস্তদোষোঽথ বিচিত্ররূপঃ ||২৭||
रागोऽरुणो मारुतजः प्रदिष्टः पित्तात् परिम्लाय्यथवाऽपि नीलः | कफात् सितः शोणितजस्तु रक्तः समस्तदोषोऽथ विचित्ररूपः ||२७||
🔊 Audio coming soon
তানেবারুণাদিকান্ রাগানাহ- রাগ ইত্যাদি| পরিম্লাযী পীত ইত্যর্থঃ| অরুণাদিরাগৈঃ পঞ্চভিস্তাবত্ পঞ্চ কাচা জ্ঞেযাঃ, ষষ্ঠঃ কাচশ্চ পরিম্লাযী রোগঃ পরং রাগপ্রাপ্তঃ| অস্য চ পীতবর্ণতা সাত্যকিবচনাদবগন্তব্যা| এবং ষট্ কাচাঃ কথিতাঃ||২৭||
Adhikarana 17 (28) · Śloka 29
রক্তজং মণ্ডলং দৃষ্টৌ স্থূলকাচানলপ্রভম্ | পরিম্লাযিনি রোগে স্যান্ম্লায্যানীলং চ মণ্ডলম্ ||২৮|| দোষক্ষযাত্ কদাচিত্ স্যাত্স্বযং তত্র চ দর্শনম্ |২৯|
रक्तजं मण्डलं दृष्टौ स्थूलकाचानलप्रभम् | परिम्लायिनि रोगे स्यान्म्लाय्यानीलं च मण्डलम् ||२८|| दोषक्षयात् कदाचित् स्यात्स्वयं तत्र च दर्शनम् |२९|
🔊 Audio coming soon
অত্র পিত্তাত্ পরিম্লাযীত্যুক্তং তস্য চ লক্ষণমনুক্তং বক্তুমাহ- রক্তজমিত্যাদি| রক্তজং রক্তপ্রসাদাজ্জাতং রক্ততেজসা জাতং বা| স্থূলকাচানলপ্রভমিতি বাহুল্যেন স্থূলকাচাভং, বর্ণেনানলপ্রভম্| অন্যে তু ‘অরুণং মণ্ডলং দৃষ্টৌ স্থূলকাচারুণপ্রভং’ ইতি পঠন্তি ব্যাখ্যানযন্তি চ- অরুণম্ অরুণবর্ণং| কীদৃশমরুণমিত্যাহ- স্থূলকাচারুণপ্রভমিতি|- স্থূলকাচস্যেবারুণা প্রভা যস্য তত্তথা| এষ পাঠঃ পঞ্জিকযা দূষিতঃ| ম্লাযি ক্ষযি| আনীলমিতি ঈষন্নীলম্| অনলপ্রভত্বেন চ পীতত্বমুক্তমেব, তস্মাত্ কিঞ্চিন্নীলপীতমিত্যর্থঃ| অন্যে তু ‘ম্লাযীনীলম্’ ইতি পঠন্তি, ব্যাখ্যানযন্তি চ- ম্লাযীনীলং পীতনীলমিত্যর্থঃ| তত্র পীতং রসমূর্চ্ছিতপিত্তজনিতং, নীলং পুনঃ রক্তমূর্চ্ছিতপিত্তজম্| অত্র তৃতীযপটলস্থে রাগে দোষব্যাধি(প্তি)বশাদ্রাগস্য মণ্ডলাকারতৈব, ন তু লে(রে)খাদিপ্রকারত্বমিতি নিযমার্থং পুনর্মণ্ডলগ্রহণমিতি| দোষক্ষযাদিত্যাদি কর্মক্ষযাদ্দোষক্ষযে সঞ্জাতে কদাচিদাকস্মিকং তত্র পরিম্লাযিনি রোগে দর্শনং স্যাদিত্যেকে; অন্যে তু পিত্তসম্মূর্চ্ছাকররসসঙ্ক্ষযাত্ ক্ষীণে দোষে তত্র কদাচিদ্দর্শনং স্যাদিতি ব্যাখ্যাং কুর্বন্তীতি| অযং যাপ্যঃ||২৮||-
Adhikarana 18 (29-33) · Śloka 33
অরুণং মণ্ডলং বাতাচ্চঞ্চলং পরুষং তথা ||২৯|| পিত্তান্মণ্ডলমানীলং কাংস্যাভং পীতমেব বা | শ্লেষ্মণা বহলং স্নিগ্ধং শঙ্খকুন্দেন্দুপাণ্ডুরম্ ||৩০|| চলত্পদ্মপলাশস্থঃ শুক্লো বিন্দুরিবাম্ভসঃ | সঙ্কুচত্যাতপেঽত্যর্থং ছাযাযাং বিস্তৃতো ভবেত্ ||৩১|| মৃদ্যমানে চ নযনে মণ্ডলং তদ্বিসর্পতি | প্রবালপদ্মপত্রাভং মণ্ডলং শোণিতাত্মকম্ ||৩২|| দৃষ্টিরাগো ভবেচ্চিত্রো লিঙ্গনাশে ত্রিদোষজে | যথাস্বং দোষলিঙ্গানি সর্বেষ্বেব ভবন্তি হি ||৩৩||
अरुणं मण्डलं वाताच्चञ्चलं परुषं तथा ||२९|| पित्तान्मण्डलमानीलं कांस्याभं पीतमेव वा | श्लेष्मणा बहलं स्निग्धं शङ्खकुन्देन्दुपाण्डुरम् ||३०|| चलत्पद्मपलाशस्थः शुक्लो बिन्दुरिवाम्भसः | सङ्कुचत्यातपेऽत्यर्थं छायायां विस्तृतो भवेत् ||३१|| मृद्यमाने च नयने मण्डलं तद्विसर्पति | प्रवालपद्मपत्राभं मण्डलं शोणितात्मकम् ||३२|| दृष्टिरागो भवेच्चित्रो लिङ्गनाशे त्रिदोषजे | यथास्वं दोषलिङ्गानि सर्वेष्वेव भवन्ति हि ||३३||
🔊 Audio coming soon
ইদানীং কাচাখ্যাং প্রাপ্তস্য তিমিরস্য রাগেণ ষট্ত্বং প্রতিপাদ্য, ষড্বিধং লিঙ্গনাশমতঃ পরং বক্ষ্যামীতি যদুক্তং তদেব ষড্বিধত্বং মণ্ডলরাগভেদেন বিবৃণ্বন্নাহ- অরুণমিত্যাদি| পরুষং খরস্পর্শম্| আনীলম্ ঈষন্নীলং, কাংস্যাভম্ আপাণ্ডুপীতম্| বহলং স্থূলম্| শুক্লো বিন্দুরিবাম্ভস ইত্যস্যাগ্রে কেচিত্ ‘সঙ্কুচত্যাতপেঽত্যর্থং ছাযাযাং বিস্তৃতো ভবেত্’ ইতি পঠন্তি| লিঙ্গনাশেঽপি পূর্বোক্তবাতাদিরূপভ্রমণারুণবর্ণাদিদোষলিঙ্গং জ্ঞেযমিতি দর্শযিতুমাহ- যথাস্বমিত্যাদি| যথাস্বং দোষলিঙ্গানীতি পূর্বোক্তবাতাদিতিমিরাণাং রূপভ্রণাদিলক্ষণানীত্যর্থঃ| এষু লিঙ্গনাশেষু কেবলশ্লেষ্মজলিঙ্গনাশং বিহাযান্যে লিঙ্গনাশা অসাধ্যাঃ| অত্র কিঞ্চিদ্দর্শনাবস্থাং প্রাপ্তঃ পরিম্লায্যেব রোগঃ ষষ্ঠো লিঙ্গনাশো জ্ঞেযঃ| এবং ষড্ লিঙ্গনাশা উক্তাঃ||২৯-৩৩||
Adhikarana 19 (34) · Śloka 35
ষড্ লিঙ্গনাশাঃ ষডিমে চ রোগা দৃষ্ট্যাশ্রযাঃ ষট্ চ ষডেব চ স্যুঃ | তথা নরঃ পিত্তবিদগ্ধদৃষ্টিঃ কফেন চান্যস্ত্বথ ধূমদর্শী ||৩৪|| যো হ্রস্বজাড্যো(ত্যো) নকুলান্ধতা চ গম্ভীরসঞ্জ্ঞা চ তথৈব দৃষ্টিঃ |৩৫|
षड् लिङ्गनाशाः षडिमे च रोगा दृष्ट्याश्रयाः षट् च षडेव च स्युः | तथा नरः पित्तविदग्धदृष्टिः कफेन चान्यस्त्वथ धूमदर्शी ||३४|| यो ह्रस्वजाड्यो(त्यो) नकुलान्धता च गम्भीरसञ्ज्ञा च तथैव दृष्टिः |३५|
🔊 Audio coming soon
রাগৈররুণাদিকৈঃ ষড্বিধং লিঙ্গনাশমভিধাযাপরান্ পিত্তবিদগ্ধদৃষ্ট্যাদিকান্ ষডেব নির্দিশন্নাহ- ষডিত্যাদি| ষড্লিঙ্গনাশা ইতি ‘বক্ষ্যামি ষড্বিধং রাগৈর্লিঙ্গনাশমতঃ পরং’ ইত্যনৈনেব লিঙ্গনাশানাং ষট্ত্বে প্রাপ্তে পুনঃ ষডিতি যত্সঙ্খ্যাকরণং তন্নিযমার্থং, তেন তিমিরকাচলিঙ্গনাশানাং পৃথক্ সঙ্খ্যাকরণং ন গণনীযং; এতেনৈতদুক্তং ভবতি- ষড্ লিঙ্গনাশাঃ, ষডিমে চ রোগা বক্ষ্যমাণাঃ পিত্তবিদগ্ধদৃষ্ট্যাদযঃ, এবং দৃষ্ট্যাশ্রযা দ্বাদশ| ষডিমে চ রোগা ইতি বক্ষ্যমাণাঃ পিত্তবিদগ্ধদৃষ্ট্যাদযঃ| দৃষ্ট্যাশ্রযাঃ ষট্ চ ষডেব স্যুরিতি অত্রাপি পূর্বশঙ্কযা ষডেবেতি পরস্মান্নিযমযতি; দ্বাদশৈব দৃষ্ট্যাশ্রযা রোগা ভবেযুরিত্যর্থঃ| কে তে পিত্তবিদগ্ধদৃষ্ট্যাদযঃ ষডিত্যাহ- তথেত্যাদি| তথাশব্দো ভিন্নক্রমে, কফেন চান্য ইত্যত্র সম্বধ্যতে; তেন কফেনাপি বিদগ্ধদৃষ্টিরন্য ইত্যর্থঃ||৩৪||-
Adhikarana 20 (35-36) · Śloka 37
পিত্তেন দুষ্টেন গতেন দৃষ্টিং পীতা ভবেদ্যস্য নরস্য দৃষ্টিঃ ||৩৫|| পীতানি রূপাণি চ মন্যতে যঃ স মানবঃ পিত্তবিদগ্ধদৃষ্টিঃ | প্রাপ্তে তৃতীযং পটলং তু দোষে দিবা ন পশ্যেন্নিশি বীক্ষতে চ ||৩৬|| (রাত্রৌ স শীতানুগৃহীতদৃষ্টিঃ পিত্তাল্পভাবাদপি তানি পশ্যেত্) |৩৭|
पित्तेन दुष्टेन गतेन दृष्टिं पीता भवेद्यस्य नरस्य दृष्टिः ||३५|| पीतानि रूपाणि च मन्यते यः स मानवः पित्तविदग्धदृष्टिः | प्राप्ते तृतीयं पटलं तु दोषे दिवा न पश्येन्निशि वीक्षते च ||३६|| (रात्रौ स शीतानुगृहीतदृष्टिः पित्ताल्पभावादपि तानि पश्येत्) |३७|
🔊 Audio coming soon
পিত্তবিদগ্ধদৃষ্টের্লক্ষণমাহ- পিত্তেনেত্যাদি| দৃষ্টেন বৃদ্ধেন| নিশি বীক্ষতে চেতি রাত্রৌ শীতোপকৃতদৃষ্টিত্বাত্ পিত্তাভাবঃ, অতো রাত্রৌ রূপদর্শনম্| সাধ্যোঽযম্||৩৫-৩৬||-
Adhikarana 21 (38) · Śloka 38
তথা নরঃ শ্লেষ্মবিদগ্ধদৃষ্টিস্তান্যেব শুক্লানি হি মন্যতে তু ||৩৭|| ত্রিষু স্থিতোল্পঃ পটলেষু দোষো নক্তান্ধ্যমাপাদযতি প্রসহ্য | দিবা স সূর্যানুগৃহীতচক্ষুরিক্ষেত রূপাণি কফাল্পভাবাত্ ||৩৮||
तथा नरः श्लेष्मविदग्धदृष्टिस्तान्येव शुक्लानि हि मन्यते तु ||३७|| त्रिषु स्थितोल्पः पटलेषु दोषो नक्तान्ध्यमापादयति प्रसह्य | दिवा स सूर्यानुगृहीतचक्षुरिक्षेत रूपाणि कफाल्पभावात् ||३८||
🔊 Audio coming soon
কফবিদগ্ধদৃষ্টের্লক্ষণমাহ- নর ইত্যাদি| কফেন দুষ্টেন গতেন দৃষ্টিং সিতা ভবেদ্যস্য নরস্য দৃষ্টিরিতি তথাশব্দার্থঃ| তান্যেব রূপাণি| অযমপি সাধ্যঃ||৩৮||
Adhikarana 22 (39) · Śloka 39
শোকজ্বরাযাসশিরোভিতাপৈরভ্যাহতা যস্য নরস্য দৃষ্টিঃ | সধূমকান্ পশ্যতি সর্বভাবাংস্তং ধূমদর্শীতি বদন্তি রোগম্ ||৩৯||
शोकज्वरायासशिरोभितापैरभ्याहता यस्य नरस्य दृष्टिः | सधूमकान् पश्यति सर्वभावांस्तं धूमदर्शीति वदन्ति रोगम् ||३९||
🔊 Audio coming soon
ধূমদর্শিনো লক্ষণমাহ- শোকেত্যাদি| শিরোভিতাপঃ শিরোব্যথা| অযং পিত্তজঃ সাধ্যশ্চ||৩৯||
Adhikarana 23 (40) · Śloka 40
স হ্রস্বজাড্যো দিবসেষু কৃচ্ছ্রাদ্ধ্রস্বানি রূপাণি চ যেন পশ্যেত্ |৪০|
स ह्रस्वजाड्यो दिवसेषु कृच्छ्राद्ध्रस्वानि रूपाणि च येन पश्येत् |४०|
🔊 Audio coming soon
হ্রস্বজাড্যলক্ষণমাহ - স ইত্যাদি| স পুরুষঃ| যেন বিকারেণ| অত্র দিবসেষু পশ্যেদিতি বচনাদ্রাত্রৌ ন পশ্যতীত্যবগম্যতে| কেচিত্তু ‘রাত্রৌ চ শীতানুগৃহীতদৃষ্টিঃ পিত্তাল্পভাবাদপি তানি পশ্যেত্’ ইতি পঠন্তি; তচ্চাসঙ্গতং, অস্য নক্তান্ধতাজনকত্বাত্| তথা চ বিদেহঃ,- “নক্তমন্ধাস্তু চত্বারো যে পুরস্তাত্ প্রকীর্তিতাঃ| তেষামসাধ্যো নকুলো হ্রস্বজাড্য(ত্য)স্তথৈব চ”- ইতি| অত্র চ দৃষ্টিমধ্যগতঃ পীতো রাগো জ্ঞেযঃ| অস্য পটলচতুষ্টযাশ্রিতপিত্তপ্রভবত্বাদসাধ্যত্বম্|৪০|-
Adhikarana 24 (40) · Śloka 41
বিদ্যোততে যেন নরস্য দৃষ্টির্দোষাভিপন্না নকুলস্য যদ্বত্ ||৪০|| চিত্রাণি রূপাণি দিবা স পশ্যেত্ স বৈ বিকারো নকুলান্ধ্যসঞ্জ্ঞঃ |৪১|
विद्योतते येन नरस्य दृष्टिर्दोषाभिपन्ना नकुलस्य यद्वत् ||४०|| चित्राणि रूपाणि दिवा स पश्येत् स वै विकारो नकुलान्ध्यसञ्ज्ञः |४१|
🔊 Audio coming soon
নকুলান্ধ্যলক্ষণমাহ- বিদ্যোতত ইত্যাদি| দোষাভিপন্না দোষৈর্ব্যাপ্তা| চিত্রাণি সর্বদোষবর্ণানি| দিবা স পশ্যেদিতি বচনাদ্রাত্রৌ ন পশ্যতীত্যবগম্যতে| সর্বজোঽসাধ্যশ্চ||৪০||-
Adhikarana 25 (41) · Śloka 42
দৃষ্টির্বিরূপা শ্বসনোপসৃষ্টা সঙ্কুচ্যতেঽভ্যন্তরতশ্চ যাতি ||৪১|| রুজাবগাঢা চ তমক্ষিরোগং গম্ভীরিকেতি প্রবদন্তি তজ্জ্ঞাঃ |৪২|
दृष्टिर्विरूपा श्वसनोपसृष्टा सङ्कुच्यतेऽभ्यन्तरतश्च याति ||४१|| रुजावगाढा च तमक्षिरोगं गम्भीरिकेति प्रवदन्ति तज्ज्ञाः |४२|
🔊 Audio coming soon
গম্ভীরিকাযা লক্ষণমাহ- দৃষ্টিরিত্যাদি| বিরূপা বিকৃতরূপা| শ্বসনোপসৃষ্টা বাতোপদ্রুতা| রুজাবগাঢা তীব্রবেদনা| ইযমপ্যসাধ্যা||৪১||-
Adhikarana 26 (42) · Śloka 43
বাহ্যৌ পুনর্দ্বাবিহ সম্প্রদিষ্টৌ নিমিত্ততশ্চাপ্যনিমিত্ততশ্চ ||৪২|| নিমিত্ততস্তত্র শিরোভিতাপাজ্জ্ঞেযস্ত্বভিষ্যন্দনিদর্শনৈশ্চ |৪৩|
बाह्यौ पुनर्द्वाविह सम्प्रदिष्टौ निमित्ततश्चाप्यनिमित्ततश्च ||४२|| निमित्ततस्तत्र शिरोभितापाज्ज्ञेयस्त्वभिष्यन्दनिदर्शनैश्च |४३|
🔊 Audio coming soon
হেতুভেদেন বাহ্যৌ নির্দিশন্নাহ- বাহ্যাবিত্যাদি| বহির্ভবৌ বাহ্যৌ; যদ্যপি প্রাক্সূত্রে সঙ্ক্ষেপেণোপদিষ্টৌ তথাঽপি পুনরিহ নিমিত্তানিমিত্তভেদদ্বযেন সম্যক্ প্রকর্ষান্নির্দিষ্টাবিত্যর্থঃ| তত্র সনিমিত্তং দর্শযন্নাহ- নিমিত্তত ইত্যাদি| তত্র তযোর্মধ্যে, শিরোভিতাপাদ্ বিষপুষ্পগন্ধস্পৃষ্টপবনসম্পর্কজাতাত্, অভিষ্যন্দনিদর্শনৈরিতি অভিষ্যন্দলক্ষণৈরিত্যর্থঃ| অযমসাধ্যঃ||৪২||-
Adhikarana 27 (43-44) · Śloka 44
সুরর্ষিগন্ধর্বমহোরগাণাং সন্দর্শনেনাপি চ ভাস্বরাণাম্ ||৪৩|| হন্যেত দৃষ্টির্মনুজস্য যস্য স লিঙ্গনাশস্ত্বনিমিত্তসঞ্জ্ঞঃ | তত্রাক্ষি বিস্পষ্টমিবাবভাতি বৈদূর্যবর্ণা বিমলা চ দৃষ্টিঃ ||৪৪||
सुरर्षिगन्धर्वमहोरगाणां सन्दर्शनेनापि च भास्वराणाम् ||४३|| हन्येत दृष्टिर्मनुजस्य यस्य स लिङ्गनाशस्त्वनिमित्तसञ्ज्ञः | तत्राक्षि विस्पष्टमिवावभाति वैदूर्यवर्णा विमला च दृष्टिः ||४४||
🔊 Audio coming soon
অনিমিত্তং দর্শযন্নাহ- সুরর্ষীত্যাদি| অনিমিত্ত ইতি অনুপলভ্যমানবিশিষ্টসুরাদিদর্শননিমিত্তঃ| দৃষ্টিঃ দর্শনম্| লিঙ্গনাশ ইতি দর্শননাশ ইত্যর্থঃ| অযমপ্যসাধ্যঃ| তস্যৈবানিমিত্তস্য লক্ষণমাহ- তত্রেত্যাদি| তত্র অনিমিত্তসঞ্জ্ঞকে| বিস্পষ্টমিব বিশেষেণ প্রসন্নমিব| বৈদূর্যবর্ণা প্রকৃতিবর্ণেত্যর্থঃ| বিমলেতি বিগতাস্তিমিরকাচাদযো মলা যস্যাং সা তথা| এতৌ সনিমিত্তানিমিত্তৌ সর্বগতাবপি দর্শননাশকরত্বাদনুক্তাবপি দৃষ্ট্যাশ্রিতৌ কথিতৌ, অতো ন সঙ্খ্যাতিরেকঃ||৪৩-৪৪||
Adhikarana 28 (45) · Śloka 45
বিদীর্যতে সীদতি হীযতে বা নৃণামভীঘাতহতা তু দৃষ্টিঃ ||৪৫||
विदीर्यते सीदति हीयते वा नृणामभीघातहता तु दृष्टिः ||४५||
🔊 Audio coming soon
আগন্তুপ্রস্তাবাদপরমভিঘাতজমাহ- বিদীর্যত ইত্যাদি| সীদতি অবসাদং যাতি| এষ বাহ্যনিমিত্তত্বাত্ সন্নিপাতান্তর্ভূতঃ||৪৫||
Adhikarana 29 (46) · Śloka 46
ইত্যেতে নযনগতা মযা বিকারাঃ সঙ্খ্যাতাঃ পৃথগিহ ষট্ চ সপ্ততিশ্চ | এতেষাং পৃথগিহ বিস্তরেণ সর্বং বক্ষ্যেঽহং তদনু চিকিত্সিতং যথাবত্ ||৪৬||
इत्येते नयनगता मया विकाराः सङ्ख्याताः पृथगिह षट् च सप्ततिश्च | एतेषां पृथगिह विस्तरेण सर्वं वक्ष्येऽहं तदनु चिकित्सितं यथावत् ||४६||
🔊 Audio coming soon
সমুদাযসঙ্খ্যামাহ- ইত্যেত ইত্যাদি| সঙ্খ্যাতাঃ সম্যগাখ্যাতাঃ, সম্যগ্গণিতা বা| ইহ শালাক্যে| পুনঃ ষট্সপ্ততিসঙ্খ্যাকারণং নিযমার্থং; তেন ষট্সপ্ততিরেব| এতেন করালাদিপ্রোক্তা সঙ্খ্যা নিরাকৃতা||৪৬||
Adhikarana puShpikA · Śloka 7
ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে দৃষ্টিগতরোগবিজ্ঞানীযো নাম সপ্তমোঽধ্যাযঃ ||৭||
इति सुश्रुतसंहितायामुत्तरतन्त्रान्तर्गते शालाक्यतन्त्रे दृष्टिगतरोगविज्ञानीयो नाम सप्तमोऽध्यायः ||७||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে সপ্তমোঽধ্যাযঃ||৭||