Adhikarana 1 (1-2) · Śloka 2
অথাতো গ্রহোত্পত্তিমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो ग्रहोत्पत्तिमध्यायं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
নবগ্রহাকৃতিবিজ্ঞানং চিকিত্সিতং চাভিধায বালগ্রহাণামুত্পত্তিং কারণং চাভিধাতুং গ্রহোত্পত্ত্যধ্যাযারম্ভো যুজ্যত ইত্যাহ- অথাত ইত্যাদি| গ্রহাণাং স্কন্দাদীনাম্, উত্পত্তিঃ আগতিঃ প্রাপ্তিঃ; এতেন ক্রীডনার্থং নিযোজনমত্রোত্পত্তিঃ, নাভূতপ্রাদুর্ভাবঃ; কুতঃ? তেষাং নিত্যত্বাত্||১-২||
Adhikarana 2 (3) · Śloka 3
নব স্কন্দাদযঃ প্রোক্তা বালানাং য ইমে গ্রহাঃ | শ্রীমন্তো দিব্যবপুষো নারীপুরুষবিগ্রহাঃ ||৩||
नव स्कन्दादयः प्रोक्ता बालानां य इमे ग्रहाः | श्रीमन्तो दिव्यवपुषो नारीपुरुषविग्रहाः ||३||
🔊 Audio coming soon
নবেত্যাদি| বিগ্রহঃ শরীরং; তত্র চ স্কন্দস্কন্দাপস্মারনৈগমেষাঃ পুরুষশরীরাঃ, শেষাঃ স্ত্রীশরীরাঃ||৩||
Adhikarana 3 (4) · Śloka 4
এতে গুহস্য রক্ষার্থং কৃত্তিকোমাগ্নিশূলিভিঃ | সৃষ্টাঃ শরবণস্থস্য রক্ষিতস্যাত্মতেজসা ||৪||
एते गुहस्य रक्षार्थं कृत्तिकोमाग्निशूलिभिः | सृष्टाः शरवणस्थस्य रक्षितस्यात्मतेजसा ||४||
🔊 Audio coming soon
এতে ইত্যাদি| শরবণস্থস্য আত্মতেজসা রক্ষিতস্যাপি রক্ষার্থং কৃত্তিকাদিভিরেতে স্কন্দাদযো গ্রহাঃ সৃষ্টা নিযোজিতা ইত্যর্থঃ; গুহস্য কার্তিকেযস্য, আত্মতেজসা স্বশক্ত্যা| ননু স্বভাবরক্ষিতস্য গুহস্য রক্ষকৈঃ কিং? উচ্যতে- যথা স্বশক্ত্যা অনভিভবনীযস্যাপি ইন্দ্রস্য অন্যে দেবা রক্ষকাঃ, প্রভুধর্মত্বাত্; তদ্বদ্গুহস্যাপি অন্যে গ্রহা রক্ষকাঃ, প্রভুধর্মত্বাত্||৪||
Adhikarana 4 (5) · Śloka 5
স্ত্রীবিগ্রহা গ্রহা যে তু নানারূপা মযেরিতাঃ | গঙ্গোমাকৃত্তিকানাং তে ভাগা রাজসতামসাঃ ||৫||
स्त्रीविग्रहा ग्रहा ये तु नानारूपा मयेरिताः | गङ्गोमाकृत्तिकानां ते भागा राजसतामसाः ||५||
🔊 Audio coming soon
স্ত্রীত্যাদি| স্ত্রীবিগ্রহা নারীশরীরাঃ, নানারূপা মেষাদিমুখাঃ, মযা ধন্বন্তরিণা, ঈরিতাঃ কথিতাঃ| তে স্ত্রীবিগ্রহাঃ| ভাগা অংশাঃ, রাজসতামসা মতা রজস্তমোমযাঃ স্মৃতাঃ| যদ্যপি সর্বগ্রহাণাং রজস্তমোমযত্বং, তথাঽপি স্ত্রীবিগ্রহাণামেবাত্যর্থং রজস্তমোগুণভূযিষ্ঠত্বং; তদ্ভূযিষ্ঠত্বাচ্চাতিশযেন হিংসাত্মকত্বমিতি তেভ্যো বালকো রক্ষিতব্যঃ||৫||
Adhikarana 5 (6) · Śloka 6
নৈগমেষস্তু পার্বত্যা সৃষ্টো মেষাননো গ্রহাঃ | কুমারধারী দেবস্য গুহস্যাত্মসমঃ সখা ||৬||
नैगमेषस्तु पार्वत्या सृष्टो मेषाननो ग्रहाः | कुमारधारी देवस्य गुहस्यात्मसमः सखा ||६||
🔊 Audio coming soon
নৈগমেষ ইত্যাদি| নৈগমেষঃ পুঙ্গ্রহঃ, মেষানন এডকমুখঃ, বালকৌতুকায সৃষ্টঃ| কুমারধারী কুমারপালযিতা; ‘কুমারহারী’ ইত্যন্যে পঠন্তি, তত্র কুমারান্ হরতীত্যর্থঃ| আত্মসম আত্মতুল্যঃ, সখা মিত্রম্| ‘আত্মসম’ ইত্যত্রান্যে ‘আত্মোদ্ভব’ ইতি পঠন্তি, তত্রাত্মোদ্ভবঃ পুত্রঃ||৬||
Adhikarana 6 (7) · Śloka 7
স্কন্দাপস্মারসঞ্জ্ঞো যঃ সোঽগ্নিনাঽগ্নিসমদ্যুতিঃ | স চ স্কন্দসখা নাম বিশাখ ইতি চোচ্যতে ||৭||
स्कन्दापस्मारसञ्ज्ञो यः सोऽग्निनाऽग्निसमद्युतिः | स च स्कन्दसखा नाम विशाख इति चोच्यते ||७||
🔊 Audio coming soon
স্কন্দেত্যাদি| অপস্মারবিকারলিঙ্গলিঙ্গতবিকারিত্বেন স্কন্দাপস্মার ইত্যুচ্যতে| সোঽগ্নিনা সৃষ্ট ইতি সম্বধ্যতে| বিশাখ ইতি স্কন্দাপস্মারস্যাপরং নাম||৭||
Adhikarana 7 (8) · Śloka 8
স্কন্দঃ সৃষ্টো ভগবতা দেবেন ত্রিপুরারিণা | বিভর্তি চারপরাং সঞ্জ্ঞাং কুমার ইতি স গ্রহঃ ||৮||
स्कन्दः सृष्टो भगवता देवेन त्रिपुरारिणा | बिभर्ति चारपरां सञ्ज्ञां कुमार इति स ग्रहः ||८||
🔊 Audio coming soon
স্কন্দ ইত্যাদি| ত্রিপুরারিণা রুদ্রেণ সৃষ্টঃ||৮||
Adhikarana 8 (9) · Śloka 9
বাললীলাধরো যোঽযং দেবো রুদ্রাগ্নিসম্ভবঃ | মিথ্যাচারেষু ভগবান্ স্বযং নৈষ প্রবর্ততে ||৯||
बाललीलाधरो योऽयं देवो रुद्राग्निसम्भवः | मिथ्याचारेषु भगवान् स्वयं नैष प्रवर्तते ||९||
🔊 Audio coming soon
গুহস্য স্কন্দাদিভ্যো ভেদমাহ- বাললীলাধর ইত্যাদি| লীলা চেষ্টা, রুদ্রাগ্নিসম্ভব ইতি রুদ্রসম্ভবোঽগ্নিসম্ভবশ্চ| মিথ্যাচারেষু বালেষ্বিত্যর্থঃ| স্বযং ন প্রবর্ততে তদনুচরাস্তু প্রবর্তন্তে, কুতঃ? যতোঽস্য দেবত্বাদ্যাগাদিভিরেব তৃপ্তিঃ| ‘বাললীলাধর’ ইত্যত্র ‘বাললীলাটন’ ইত্যন্যে পঠন্তি||৯||
Adhikarana 9 (10) · Śloka 10
কুমারঃ স্কন্দসামান্যাদত্র কেচিদপণ্ডিতাঃ | গৃহ্ণাতীত্যল্পবিজ্ঞানা ব্রুবতে দেহচিন্তকাঃ ||১০||
कुमारः स्कन्दसामान्यादत्र केचिदपण्डिताः | गृह्णातीत्यल्पविज्ञाना ब्रुवते देहचिन्तकाः ||१०||
🔊 Audio coming soon
কুমার ইত্যাদি| কুমারঃ কার্তিকেযঃ, স্কন্দসামান্যাত্ স্কন্দগ্রহনামতুল্যত্বাদ্বালং গৃহ্ণাতীতি যে কেচিদপণ্ডিতা দেহচিন্তকা বৈদ্যা ব্রুবতে তেঽল্পবিজ্ঞানা অপণ্ডিতাঃ||১০||
Adhikarana 10 (11-20) · Śloka 21
ততো ভগবতি স্কন্দে সুরসেনাপতৌ কৃতে | উপতস্থুর্গ্রহাঃ সর্বে দীপ্তশক্তিধরং গুহম্ ||১১|| ঊচুঃ প্রাঞ্জলযশ্চৈনং বৃত্তিং নঃ সংবিধত্স্ব বৈ | তেষামর্থে ততঃ স্কন্দঃ শিবং দেবমচোদযত্ ||১২|| ততো গ্রহাংস্তানুবাচ ভগবান্ ভগনেত্রহৃত্ | তির্যগ্যোনিং মানুষং চ দৈবং চ ত্রিতযং জগত্ ||১৩|| পরস্পরোপকারেণ বর্ততে ধার্যতেঽপি চ | দেবা মনুষ্যান্ প্রীণন্তি তৈর্যগ্যোনীংস্তথৈব চ ||১৪|| বর্তমানৈর্যথাকালং শীতবর্ষোষ্ণমারুতৈঃ | ইজ্যাঞ্জলিনমস্কারজপহোমব্রতাদিভিঃ ||১৫|| নরাঃ সম্যক্ প্রযুক্তৈশ্চ প্রীণন্তি ত্রিদিবেশ্বরান্ | ভাগধেযং বিভক্তং চ শেষং কিঞ্চিন্ন বিদ্যতে ||১৬|| তদ্যুষ্মাকং শুভা বৃত্তির্বালেষ্বেব ভবিষ্যতি | কুলেষু যেষু নেজ্যন্তে দেবাঃ পিতর এব চ ||১৭|| ব্রাহ্মণাঃ সাধবশ্চৈব গুরবোঽতিথযস্তথা | নিবৃত্তাচারশৌচেষু পরপাকোপজীবিষু ||১৮|| উত্সন্নবলিভিক্ষেষু ভিন্নকাংস্যোপভোজিষু | গৃহেষু তেষু যে বালাস্তান্ গৃহ্ণীধ্বমশঙ্কিতাঃ ||১৯|| তত্র বো বিপুলা বৃত্তিঃ পূজা চৈব ভবিষ্যতি | এবং গ্রহাঃ সমুত্পন্না বালান্ গৃহ্ণন্তি চাপ্যতঃ ||২০|| গ্রহোপসৃষ্টা বালাস্তু দুশ্চিকিত্স্যতমা মতাঃ |২১|
ततो भगवति स्कन्दे सुरसेनापतौ कृते | उपतस्थुर्ग्रहाः सर्वे दीप्तशक्तिधरं गुहम् ||११|| ऊचुः प्राञ्जलयश्चैनं वृत्तिं नः संविधत्स्व वै | तेषामर्थे ततः स्कन्दः शिवं देवमचोदयत् ||१२|| ततो ग्रहांस्तानुवाच भगवान् भगनेत्रहृत् | तिर्यग्योनिं मानुषं च दैवं च त्रितयं जगत् ||१३|| परस्परोपकारेण वर्तते धार्यतेऽपि च | देवा मनुष्यान् प्रीणन्ति तैर्यग्योनींस्तथैव च ||१४|| वर्तमानैर्यथाकालं शीतवर्षोष्णमारुतैः | इज्याञ्जलिनमस्कारजपहोमव्रतादिभिः ||१५|| नराः सम्यक् प्रयुक्तैश्च प्रीणन्ति त्रिदिवेश्वरान् | भागधेयं विभक्तं च शेषं किञ्चिन्न विद्यते ||१६|| तद्युष्माकं शुभा वृत्तिर्बालेष्वेव भविष्यति | कुलेषु येषु नेज्यन्ते देवाः पितर एव च ||१७|| ब्राह्मणाः साधवश्चैव गुरवोऽतिथयस्तथा | निवृत्ताचारशौचेषु परपाकोपजीविषु ||१८|| उत्सन्नबलिभिक्षेषु भिन्नकांस्योपभोजिषु | गृहेषु तेषु ये बालास्तान् गृह्णीध्वमशङ्किताः ||१९|| तत्र वो विपुला वृत्तिः पूजा चैव भविष्यति | एवं ग्रहाः समुत्पन्ना बालान् गृह्णन्ति चाप्यतः ||२०|| ग्रहोपसृष्टा बालास्तु दुश्चिकित्स्यतमा मताः |२१|
🔊 Audio coming soon
কে তর্হি বালান্ গৃহ্ণন্তীতি পৃষ্ট আহ- তত ইত্যাদি| ততো গুহরক্ষার্থং নবগ্রহেষু সৃষ্টেষু সত্সু, অনন্তরং সুরা দেবাস্তেষাং সেনা তস্যাঃ পতৌ স্বামিনি গুহে কৃতে সতি, উপতস্থুঃ আগতাঃ| শক্তিঃ আযুধবিশেষঃ| ঊচুঃ উক্তবন্তঃ| প্রাঞ্জলযঃ সংযোজিতহস্তাঃ| এনং গুহং প্রতি; এনমিত্যত্র অন্যে দেবেতি গুহসম্বোধনং পঠন্তি| কিমূচুঃ? বৃত্তিং বর্তনং, নঃ অস্মাকং, সংবিধত্স্ব কুরু, বৈ স্ফুটম্| আত্মবৃত্ত্যর্থমুপস্থিতানাং গ্রহাণাং কার্তিকেযেন কিং কৃতমিত্যাহ- তেষামিত্যাদি| ততঃ স্কন্দঃ শিবং দেবমচোদযত্তেষাং গ্রহণামর্থে, ততো গ্রহবৃত্তিপ্রার্থনাদনন্তরং, স্কন্দঃ কার্তিকেযঃ, অচোদযত্ প্রার্থিতবান্| এবং গ্রহার্থে প্রার্থিতঃ শঙ্করঃ কিং কৃতবানিত্যাহ- তত ইত্যাদি| ততঃ প্রার্থনানন্তরং তান্ গ্রহান্ প্রতি ভগবান্ ভগনেত্রহৃত্ ভগলোচনহারী রুদ্র উক্তবান্| কিমুক্তবানিত্যাহ- তির্যগিত্যাদি| তির্যগ্যোনিমানুষদেবানাং ত্রিতযং জগচ্ছব্দবাচ্যং, এতত্ত্রিতযং পরস্পরমন্যোন্যোপকারেণ বর্ততে, ধার্যতেঽপি চেতি চকারাত্ ক্রিযতে চ| তত্র তির্যগ্যোনযো গবাদযঃ, তে মনুষ্যানুপকুর্বন্তি বহনাদিনা; মানুষাশ্চ মাষাদিদানেন তির্যগ্যোনীনুপকুর্বন্তি| দেবমানুষযোঃ পরস্পরোপকারমাহ- দেবা ইত্যাদি| যথাকালং শীতোষ্ণবর্ষাদীন্ কৃত্বা মানুষান্ তির্যগ্যোনীংশ্চ প্রীণযন্তীতি সম্বন্ধঃ| দেবেষু মানুষোপকারমাহ- ইজ্যেত্যাদি| ইজ্যা যাগঃ, অঞ্জলিঃ করদ্বযযোজনং, নমস্কারঃ প্রণামঃ, জপ ওঙ্কারপূর্বকং গাযত্র্যাদ্যাবর্তনং, হোমো লক্ষাদিসঙ্খ্যাহুতিভির্বহ্নৌ হবনং, ব্রতং প্রসিদ্ধং, সম্যক্প্রযুক্তৈঃ বেদোক্তবিধানেন প্রযুক্তৈঃ; ইজ্যাঞ্জলিপ্রভৃতিভিঃ সম্যক্প্রযুক্তৈর্নরাস্ত্রিদিবেশ্বরান্ দেবান্ প্রীণযন্তীতি সম্বন্ধঃ| ভাগধেযমিত্যাদি| ভাগধেযম্ অংশসমূহঃ, বিভক্তং দেবাদিত্রিতযেন সর্বমেব বিভজ্য গৃহীতং, শেষম্ অবশিষ্টং, কিঞ্চিন্নাস্তি যতস্তত্তস্মাদ্বালগ্রহরক্ষার্থং সৃষ্টত্বাদ্যুষ্মাকং বৃত্তিরপি ভো গ্রহা বালেষ্বেব ভবিষ্যতীতি| অনপরাধেষু বালেষু বৃত্তিং কল্পযন্ শম্ভুরপি দোষভাক্ স্যাদতঃ সাপরাধেষু বৃত্তিমাহ- কুলেষ্বিত্যাদি| নেজ্যন্তে ন পূজ্যন্তে, উত্সন্নে নষ্টে বলিভিক্ষে যেষু তানি তথা, তেষু বৃত্তিরিতি| অত্র হিংসনমেব বৃত্তিঃ| পূজা চৈবেতি পুষ্পাদিনা ভোজনাদিনা চেত্যর্থঃ||১১-২০||-
Adhikarana 11 (21-22) · Śloka 22
বৈকল্যং মরণং চাপি ধ্রুবং স্কন্দগ্রহে মতম্ ||২১|| স্কন্দগ্রহোঽত্যুগ্রতমঃ সর্বেষ্বেব যতঃ স্মৃতঃ | অন্যো বা সর্বরূপস্তু ন সাধ্যো গ্রহ উচ্যতে ||২২||
वैकल्यं मरणं चापि ध्रुवं स्कन्दग्रहे मतम् ||२१|| स्कन्दग्रहोऽत्युग्रतमः सर्वेष्वेव यतः स्मृतः | अन्यो वा सर्वरूपस्तु न साध्यो ग्रह उच्यते ||२२||
🔊 Audio coming soon
এবমিত্যাদি| বৈকল্যং বিকলাঙ্গতা| ধ্রুবং নিশ্চিতম্| স্কন্দেত্যাদি| সর্বেষ্বেব গ্রহেষু মধ্যে স্কন্দগ্রহো যতোঽত্যুগ্রতমঃ, অত এব তদ্গৃহীতস্য ধ্রুবং মরণং, অথ কথঞ্চিজ্জীবতি তদা বৈকল্যমিতি| অন্য ইত্যাদি| অন্যো বা স্কন্দাপস্মারাদিকঃ||২১-২২||
Adhikarana puShpikA · Śloka 37
ইতি সুশ্রুতসংহিতাযামুত্তরতন্ত্রান্তর্গতে কুমারতন্ত্রে গ্রহোত্পত্ত্যধ্যাযো নাম(একাদশোঽধ্যাযঃ, আদিতঃ) সপ্তত্রিংশত্তমোঽধ্যাযঃ ||৩৭||
इति सुश्रुतसंहितायामुत्तरतन्त्रान्तर्गते कुमारतन्त्रे ग्रहोत्पत्त्यध्यायो नाम(एकादशोऽध्यायः, आदितः) सप्तत्रिंशत्तमोऽध्यायः ||३७||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে কৌমারভৃত্যতন্ত্রে গ্রহেত্পত্ত্যধ্যাযঃ সপ্তত্রিংশত্তমঃ||৩৭||