Adhikarana 1 (1-2) · Śloka 2
অথাতো হিক্কাপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो हिक्काप्रतिषेधं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
ছর্দিপ্রতিষেধানন্তরং তুল্যসঙ্খ্যত্বাত্ কতিপযনিদানসাম্যাচ্চ হিক্কাপ্রতিষেধং ব্যাখ্যাতুং প্রতিজানীতে,- অথাত ইত্যাদি||১-২||
Adhikarana 2 (3-5) · Śloka 5
বিদাহিগুরুবিষ্টম্ভিরূক্ষাভিষ্যন্দিভোজনৈঃ | শীতপানাসনস্থানরজোধূমানিলানলৈঃ ||৩|| ব্যাযামকর্মভারাধ্ববেগাঘাতাপতর্পণৈঃ | আমাদোষাভিঘাতস্ত্রীক্ষযদোষপ্রপীডনৈঃ ||৪|| বিষমাশনাধ্যনশনৈস্তথা সমশনৈরপি | হিক্কা শ্বাসশ্চ কাসশ্চ নৃণাং সমুপজাযতে ||৫||
विदाहिगुरुविष्टम्भिरूक्षाभिष्यन्दिभोजनैः | शीतपानासनस्थानरजोधूमानिलानलैः ||३|| व्यायामकर्मभाराध्ववेगाघातापतर्पणैः | आमादोषाभिघातस्त्रीक्षयदोषप्रपीडनैः ||४|| विषमाशनाध्यनशनैस्तथा समशनैरपि | हिक्का श्वासश्च कासश्च नृणां समुपजायते ||५||
🔊 Audio coming soon
হিক্কাযা নিদানমাহ- বিদাহিগুরুবিষ্টম্ভীত্যাদি| বিদাহ্যাদিভির্হিক্কাদযস্ত্রযো জাযন্তে ইত্যন্বযঃ| বিদাহীনি মরীচসর্ষপমদ্যপ্রভৃতীনি| গুরূণি গুণতঃ পাকতশ্চ| বিষ্টম্ভীনি করীরপ্রভৃতীনি| রূক্ষাণি চণকাদীনি| অভিষ্যন্দীনি অভিমুখেন স্যন্দিতুং শীলং যেষাং তানি, অভিষ্যন্দনশীলানি মত্স্যমাষফাণিতাদীনি| শীতশব্দঃ পানাদিভিস্ত্রিভিঃ সম্বধ্যতে| রজো ধূলিঃ, সা চ ধূমবন্নাসাপ্রবেশাত্ কারণম্| ব্যাযামকর্ম ধনুরাকর্ষণাদিব্যাপারঃ| বেগাঘাতো বেগধারণম্| অপতর্পণম্ অনশনাদি| প্রপীডনশব্দ আমদোষাদিভিঃ প্রত্যেকং সম্বধ্যতে| অমদোষঃ “ঊষ্মণোঽল্পবলত্বেন ধাতুমাদ্যমপাচিতম্| দুষ্টমামাশযগতং রসমামং প্রচক্ষতে”- ইত্যুক্তলক্ষণঃ| কাসশ্চোক্তোঽপি একনিদানপ্রতিপাদনার্থং পুনরভিহিত ইতি||৩-৫||
Adhikarana 3 (6) · Śloka 6
মুহুর্মুহুর্বাযরুদেতি সস্বনো যকৃত্প্লিহান্ত্রাণি মুখাদিবাক্ষিপন্ | স ঘোষবানাশু হিনস্ত্যসূন্ যতস্ততস্তু হিক্কেতি ভিষগ্ভিরুচ্যতে ||৬||
मुहुर्मुहुर्वायरुदेति सस्वनो यकृत्प्लिहान्त्राणि मुखादिवाक्षिपन् | स घोषवानाशु हिनस्त्यसून् यतस्ततस्तु हिक्केति भिषग्भिरुच्यते ||६||
🔊 Audio coming soon
হিক্কানাং স্বরূপং নিরুক্তিং চাহ- মুহুরিত্যাদি| বাযুরত্র সোদানঃ প্রাণ ইত্যাহুঃ| মুহুর্মুহুরুদেতি ঊর্ধ্বমেতি| সস্বনঃ শব্দবান্| ঊর্ধ্বগতিমেব বিশিনষ্টি- যকৃদিত্যাদি| অত্র প্লীহ্নো হ্রস্বেকারত্বং ছন্দোঽনুরোধাত্| মুখাদিতি ল্যব্লোপে পঞ্চমী, তেন যকৃত্প্লীহান্ত্রাণি মুখমানীয নিঃক্ষিপন্ নিঃসারযন্নিত্যর্থঃ| মুখাদিবেত্যাদি মুখশব্দেন প্রাণোদকান্নবাহীনি স্রোতাংসি লভ্যন্তে| উক্তং চ,- ‘প্রাণোদকান্নবাহীনি স্রোতাংসি বিকৃতোঽনিলঃ’ ইতি| স ঘোষবানিত্যাদিনা হিক্কানিরুক্তিঃ| যতঃ স বাযুঃ ঘোষবান্ সন্ আশু শীঘ্রমসূন্ প্রাণান্ হিনস্তি ততো বুধৈঃ ‘হিক্কা’ ইত্যুচ্যতে| সস্বন ইত্যনেন গতত্বাদ্ ঘোষবানিত্যভিধানং নিরুক্তিপ্রদর্শনার্থম্| হিক্কেতি নিরুক্তৌ পৃষোদরাদিত্বাদ্রূপসিদ্ধিঃ| হিগ্ ইতি কৃত্বা কাযতি শব্দাযতে ইতি ‘হিক্কা’ ইতি শাব্দিকাঃ||৬||
Adhikarana 4 (7) · Śloka 7
অন্নজাং যমলাং ক্ষুদ্রাং গম্ভীরাং মহতীং তথা | বাযুঃ কফেনানুগতঃ পঞ্চ হিক্কাঃ করোতি হি ||৭||
अन्नजां यमलां क्षुद्रां गम्भीरां महतीं तथा | वायुः कफेनानुगतः पञ्च हिक्काः करोति हि ||७||
🔊 Audio coming soon
তাসাং ভেদং সম্প্রাপ্তিং চাহ- অন্নজামিত্যাদি| বাযুঃ কফেনানুগতঃ সন্ অন্নজাদিভেদেন পঞ্চ হিক্কাঃ করোতি| যমলৈব চরকে ব্যপেতেতি নাম্না পঠ্যতে, অন্নপানে ব্যপেতে পরিণতে জাযত ইত্যতো হেতোঃ| ‘কফেনানুগতঃ প্রাণঃ’ ইতি বা পাঠঃ| প্রাণোঽত্র বাযুরিতি||৭||
Adhikarana 5 (8) · Śloka 8
মুখং কষাযমরতির্গৌরবং কণ্ঠবক্ষসোঃ | পূর্বরূপাণি হিক্কানামাটোপো জঠরস্য চ ||৮||
मुखं कषायमरतिर्गौरवं कण्ठवक्षसोः | पूर्वरूपाणि हिक्कानामाटोपो जठरस्य च ||८||
🔊 Audio coming soon
হিক্কানাং পূর্বরূপমাহ- মুখমিত্যাদি| মুখং কষাযং বাতাত্, নতু কফান্মাধুর্যং, ব্যাধিপ্রভাবাত্| অরতিঃ ন কুত্রচিদবস্থিতিশ্চেতসঃ| কেচিত্ পূর্বরূপং ন পঠন্তি, কফবাতোদ্ভবস্য গৌরবাদেরনুমানগ্রাহ্যত্বাত্||৮||
Adhikarana 6 (9) · Śloka 10
ত্বরমাণস্য চাহারং ভুঞ্জানস্যাথবা ঘনম্ | বাযুরন্নৈরবস্তীর্ণঃ কটুকৈরর্দিতো ভৃশম্ ||৯|| হিক্কযত্যূর্ধ্বগো ভূত্বা তাং বিদ্যাদন্নজাং ভিষক্ |১০|
त्वरमाणस्य चाहारं भुञ्जानस्याथवा घनम् | वायुरन्नैरवस्तीर्णः कटुकैरर्दितो भृशम् ||९|| हिक्कयत्यूर्ध्वगो भूत्वा तां विद्यादन्नजां भिषक् |१०|
🔊 Audio coming soon
অন্নজালক্ষণমাহ- ত্বরমাণস্যেত্যাদি| অন্নজাদীনাং সাধ্যত্বেন প্রাশস্ত্যাত্ পূর্বমভিধানম্| আহারং ত্বরমাণস্য অথবা ধনং গুরুমন্নং ভুঞ্জানস্য অন্নৈরবস্তীর্ণ আচ্ছাদিতো বাযুঃ তথা কটুকৈর্ভৃশমর্দিতো বাযুরূর্ধ্বগো ভূত্বা হিক্কযতি হিক্কাং করোতি, ভিষক্ তাম্ অন্নজাং বিদ্যাত্ জানীযাত্; যদ্যপ্যন্নজাযাং বাযুঃ কারণং, তথাঽপ্যন্নেন তত্পীডনাত্তদ্ব্যপদেশঃ||৯||-
Adhikarana 7 (10) · Śloka 11
চিরেণ যমলৈর্বেগৈর্যা হিক্কা সম্প্রবর্ততে ||১০|| কম্পযন্তী শিরোগ্রীবং যমলাং তাং বিনির্দিশেত্ |১১|
चिरेण यमलैर्वेगैर्या हिक्का सम्प्रवर्तते ||१०|| कम्पयन्ती शिरोग्रीवं यमलां तां विनिर्दिशेत् |११|
🔊 Audio coming soon
যমলালক্ষণমাহ- চিরেণেত্যাদি| যা হিক্কা চিরেণ যমলৈর্বেগৈঃ সম্প্রবর্ততে সা যমলা, যমলৈর্বেগৈর্যুগপদ্বারদ্বযং হিক্কতে ইত্যর্থঃ | কম্পযন্তী শিরোগ্রীবমিত্যুপলক্ষণং; তেন চরকোক্তাঃ প্রলাপবমিতৃষ্ণাবৈচিত্ত্যজৃম্ভাবিপ্লুতাক্ষত্বমুখশোষাশ্চ বোদ্ধব্যা ইতি গযদাসঃ| ইযমসাধ্যাঽপি বলবতঃ স্থিরধাত্বিন্দ্রিযস্য সত্ত্ববতশ্চ সিদ্ধ্যতি||১০||-
Adhikarana 8 (11) · Śloka 12
বিকৃষ্টকালৈর্যা বেগৈর্মন্দৈঃ সমভিবর্ততে ||১১|| ক্ষুদ্রিকা নাম সা হিক্কা জত্রুমূলাত্ প্রধাবিতা |১২|
विकृष्टकालैर्या वेगैर्मन्दैः समभिवर्तते ||११|| क्षुद्रिका नाम सा हिक्का जत्रुमूलात् प्रधाविता |१२|
🔊 Audio coming soon
ক্ষুদ্রালক্ষণমাহ- বিকৃষ্টকালৈরিত্যাদি| বিকৃষ্টকালৈরিতি চিরেণ বেগৈর্জাযতে| কিম্ভূতা? জত্রুমূলাত্ প্রধাবিতা আগতা, সা ক্ষুদ্রিকাখ্যা| জত্রুঃ কণ্ঠোরসোঃ সন্ধিরিতি জেজ্জটঃ; জত্রু গ্রীবামূলং তদ্গ্রহণেন হৃদযক্লোমকণ্ঠানামপি গ্রহণমিতি গযদাসঃ||১১||-
Adhikarana 9 (12-13) · Śloka 13
নাভিপ্রবৃত্তা যা হিক্কা ঘোরা গম্ভীরনাদিনী ||১২|| শুষ্কৌষ্ঠকণ্ঠজিহ্বাস্যশ্বাসপার্শ্বরুজাকরী | অনেকোপদ্রবযুতা গম্ভীরা নাম সা স্মৃতা ||১৩||
नाभिप्रवृत्ता या हिक्का घोरा गम्भीरनादिनी ||१२|| शुष्कौष्ठकण्ठजिह्वास्यश्वासपार्श्वरुजाकरी | अनेकोपद्रवयुता गम्भीरा नाम सा स्मृता ||१३||
🔊 Audio coming soon
গম্ভীরালক্ষণমাহ- নাভিপ্রবৃত্তেত্যাদি| যা হিক্কা নাভিপ্রবৃত্তা নাভিতঃ প্রবৃত্তির্যস্যাঃ সা, অত এব অস্যা গম্ভীরাত্বং; ঘোরা কষ্টসাধ্যা| শুষ্কেত্যাদি শুষ্কশব্দ ওষ্ঠাদিভিশ্চতুর্ভিঃ সম্বন্ধনীযঃ| তথা অনেকোপদ্রববতী অনেকোপদ্রবৈর্জ্বরশ্বাসতৃষ্ণাদিভির্যুক্তা, সা গম্ভীরা নাম স্মৃতা; ইযমসাধ্যা||১২-১৩||
Adhikarana 10 (14) · Śloka 14
মর্মাণ্যাপীডযন্তীব সততং যা প্রবর্ততে | দেহমাযম্য বেগেন ঘোষযত্যতিতৃষ্যতঃ | মহাহিক্কেতি সা জ্ঞেযা সর্বগাত্রপ্রকম্পিনী ||১৪||
मर्माण्यापीडयन्तीव सततं या प्रवर्तते | देहमायम्य वेगेन घोषयत्यतितृष्यतः | महाहिक्केति सा ज्ञेया सर्वगात्रप्रकम्पिनी ||१४||
🔊 Audio coming soon
মহাহিক্কালক্ষণমাহ- মর্মাণীত্যাদি| মর্মাণি বস্তিহৃদযশিরাংসি; অন্যে নাভিহৃদযস্তনমূলান্যাহুঃ| আযম্য বিস্তার্য, ‘আযস্য’ ইতি পাঠে স এবার্থঃ| ঘোষবতী সশব্দা| ইযমপ্যসাধ্যা||১৪||
Adhikarana 11 (15) · Śloka 15
আযম্যতে হিক্কাঽতোঙ্গানি যস্য দৃষ্টিশ্চোর্ধ্বং তাম্যতে যস্য গাঢম্ | ক্ষীণোঽন্নদ্বিট্ কাসতে যশ্চ হিক্কী তৌ দ্বাবন্ত্যৌ বর্জযেদ্ধিক্কমানৌ ||১৫||
आयम्यते हिक्काऽतोङ्गानि यस्य दृष्टिश्चोर्ध्वं ताम्यते यस्य गाढम् | क्षीणोऽन्नद्विट् कासते यश्च हिक्की तौ द्वावन्त्यौ वर्जयेद्धिक्कमानौ ||१५||
🔊 Audio coming soon
ইদানীং সাধ্যানামপি হিক্কানামবস্থাবিশেষেঽসাধ্যত্বমাহ- আযম্যত ইত্যাদি| যস্য পুংসো হিক্কতো হিক্কাং কুর্বতো দেহ আযম্যতে দীর্ঘোক্রিযত ইব; তথৈব দৃষ্টিশ্চোর্ধ্বং ‘ভবতি’ ইতি শেষঃ, দৃষ্টিশব্দেনাত্র দৃষ্ট্যধিষ্ঠানং বিবক্ষিতং, নতু দর্শনেন্দ্রিযশক্তিঃ| গাঢম্ অতিশযেন, তাম্যতে আকুঞ্চতে দেহ ইতি সম্বন্ধ ইতি জেজ্জটগযদাসৌ; ‘তাম্যতে যশ্চ’ ইতি পাঠান্তরং, তাম্যতে মুহ্যতি হিক্কী| ক্ষীণস্তথা অন্নদ্বিট্ তথা ক্ষৌতি ক্ষুতং করোতি| তৌ দ্বাবিতি আযম্যত ইত্যাদিনা নিত্যমিত্যন্তেন একাবস্থো হিক্কী, ক্ষীণ ইত্যাদিনা অতিমাত্রান্তেনাপরঃ| সাধ্যানামপি মধ্যে এবংবিধৌ বর্জযেদিত্যর্থঃ; গম্ভীরামহত্যোঃ স্বভাবাদেবাসাধ্যত্বাত্তদ্যুক্তৌ হিক্কিনৌ, অন্ত্যৌ অন্তপঠিতৌ, অসাধ্যৌ| পাঠান্তরাণি ব্যাখ্যাবিশেষাশ্চ বিস্তরভযান্ন লিখিতাঃ||১৫||
Adhikarana 12 (16) · Śloka 16
প্রাণাযামোদ্বেজনত্রাসনানি সূচীতোদৈঃ সম্ভ্রমশ্চাত্র শস্তঃ |১৬|
प्राणायामोद्वेजनत्रासनानि सूचीतोदैः सम्भ्रमश्चात्र शस्तः |१६|
🔊 Audio coming soon
ইদানীং হিক্কানাং চিকিত্সিতমাহ- প্রাণাযামোদ্বেজনেত্যাদি| অত্র হিক্কাসু, প্রাণাযামাদি শস্তমিতি সম্বন্ধঃ| প্রাণাযামো বাযোর্নিরোধঃ| যদ্যপি রেচকপূরককুম্ভকভেদাত্ প্রাণাযামস্ত্রিবিধঃ, তথাঽপ্যূর্ধ্বগতিনিরোধাত্ কুম্ভক এবাত্র| ত্রাসনমল্পসত্ত্বস্য ভযোত্পাদকৈর্বাক্যৈঃ| উদ্বেজনং পরুষবচনৈঃ| সূচীতোদৈঃ সম্ভ্রমঃ সূচীব্যথাভির্মনস আকুলীকরণম্| এতচ্চ প্রাযঃ ক্ষুদ্রাযামন্নজাযাং চ যোজনীযম্|১৬|-
Adhikarana 13 (16) · Śloka 16
যষ্ট্যাহ্বং বা মাক্ষিকেণাবপীডে পিপ্পল্যো বা শর্করাচূর্ণযুক্তাঃ ||১৬||
यष्ट्याह्वं वा माक्षिकेणावपीडे पिप्पल्यो वा शर्कराचूर्णयुक्ताः ||१६||
🔊 Audio coming soon
নস্যমাহ- যষ্ট্যাহ্বং বেত্যাদি| বাশব্দোঽত্র ভিন্নক্রমে| যষ্ট্যাহ্বং যষ্টীমধু, মাক্ষিকেণ মধুনা, অবপীডে শস্তং; পিপ্পল্যো বা শর্করাচূর্ণযুক্তা অবপীডে শস্তা ইতি যোজনীযম্||১৬||
Adhikarana 14 (17) · Śloka 17
সর্পিঃ কোষ্ণং ক্ষীরমিক্ষো রসো বা নাতিক্ষীণে ছর্দনং শান্তিহেতোঃ |১৭|
सर्पिः कोष्णं क्षीरमिक्षो रसो वा नातिक्षीणे छर्दनं शान्तिहेतोः |१७|
🔊 Audio coming soon
সর্পিরিত্যাদি| সর্পিঃপ্রভৃতিকং পানং হিতম্| ছর্দনং বমনম্| ‘শান্তিহেতোঃ’ ইত্যত্রান্যে ‘স্রংসনং চ’ ইতি পঠিত্বা বিরেচনং চেতি ব্যাখ্যানযন্তি; তং চ নেচ্ছন্তি শ্রীজেজ্জটাচার্যাঃ, সমতন্ত্রেষ্বপি হিক্কাসু বিরেচনস্যানুক্তত্বাত্|১৭|-
Adhikarana 15 (17) · Śloka 18
নারীপযঃপিষ্টমশুক্লচন্দনং ঘৃতং সুখোষ্ণং চ সসৈন্ধবং তথা ||১৭|| চূর্ণীকৃতং সৈন্ধবমম্ভসাঽথবা নিহন্তি হিক্কাং চ হিতং চ নস্যতঃ |১৮|
नारीपयःपिष्टमशुक्लचन्दनं घृतं सुखोष्णं च ससैन्धवं तथा ||१७|| चूर्णीकृतं सैन्धवमम्भसाऽथवा निहन्ति हिक्कां च हितं च नस्यतः |१८|
🔊 Audio coming soon
নস্যত্রযমাহ- নারীপয ইত্যাদি| নারীপযঃপিষ্টমশুক্লচন্দনং রক্তচন্দনং নস্যতো নস্যাত্ হিতমিত্যেকো যোগঃ| অশুক্লচন্দনং সুখোষ্ণং ঘৃতং চেতি দ্বিতীযঃ| সুখোষ্ণম্ ঈষদুষ্ণম্| অথবাঽম্ভসা চূর্ণীকৃতং সৈন্ধবং চেতি তৃতীযঃ| এতানি ত্রীণি নস্যানি দোষাদ্যপেক্ষযা যোজ্যানি||১৭||-
Adhikarana 16 (18) · Śloka 19
যুঞ্জ্যাদ্ধূমং শালনির্যাসজাতং নৈপালং বা গোবিষাণোদ্ভবং বা ||১৮|| সর্পিঃস্নিগ্ধৈশ্চর্মবালৈঃ কৃতং বা হিক্কাস্থানে স্বেদনং চাপি কার্যম্ |১৯|
युञ्ज्याद्धूमं शालनिर्यासजातं नैपालं वा गोविषाणोद्भवं वा ||१८|| सर्पिःस्निग्धैश्चर्मबालैः कृतं वा हिक्कास्थाने स्वेदनं चापि कार्यम् |१९|
🔊 Audio coming soon
নস্যানন্তরং লীনদোষনির্হরণার্থং ধূমানাহ- যুঞ্জ্যাদিত্যাদি| শালনির্যাসঃ সর্জরসঃ| নৈপালং মনঃশিলাজাতং ধূমম্| গোবিষাণোদ্ভবং গোশৃঙ্গোদ্ভবধূমং, চর্মবালৈর্গোরেব| স্বেদনমাহ- হিক্কেত্যাদি| হিক্কাস্থানে কণ্ঠস্তনান্তরে| কেচিচ্চর্মবালৈঃ স্বেদনমিচ্ছন্তি||১৮||-
Adhikarana 17 (19-20) · Śloka 21
ক্ষৌদ্রোপেতং গৈরিকং কাঞ্চনাহ্বং লিহ্যাদ্ভস্ম গ্রাম্যসত্ত্বাস্থিজং বা ||১৯|| তদ্বচ্ছ্বাবিন্মেষগোশল্য(ল্ল)কানাং রোমাণ্যন্তর্ধূমদগ্ধানি চাত্র | মধ্বাজ্যাক্তং বর্হিপত্রপ্রসূতমেবং ভস্মৌদুম্বরং তৈল্বকং বা ||২০|| স্বর্জিক্ষারং বীজপূরাদ্রসেন ক্ষৌদ্রোপেতং হন্তি লীঢ্বাঽঽশু হিক্কাম্ |২১|
क्षौद्रोपेतं गैरिकं काञ्चनाह्वं लिह्याद्भस्म ग्राम्यसत्त्वास्थिजं वा ||१९|| तद्वच्छ्वाविन्मेषगोशल्य(ल्ल)कानां रोमाण्यन्तर्धूमदग्धानि चात्र | मध्वाज्याक्तं बर्हिपत्रप्रसूतमेवं भस्मौदुम्बरं तैल्वकं वा ||२०|| स्वर्जिक्षारं बीजपूराद्रसेन क्षौद्रोपेतं हन्ति लीढ्वाऽऽशु हिक्काम् |२१|
🔊 Audio coming soon
লেহানাহ- ক্ষৌদ্রোপেতমিত্যাদি| কাঞ্চনাহ্বং গৈরিকং সুবর্ণগৈরিকং দাক্ষিণাত্যপ্রসিদ্ধং ক্ষৌদ্রোপেতং লিহ্যাদিত্যর্থঃ| গ্রাম্যসত্ত্বা গবাদযস্তেষামস্থিজং ভস্ম ক্ষৌদ্রোপেতং লিহ্যাত্| তদ্বদিতি ক্ষৌদ্রোপেতং শ্বাবিধাদীনাং রোমজং ভস্ম লিহ্যাত্| শ্বাবিত্ সেঢিকা, তস্যাঃ সূচয এব লোমানি| অন্তর্ধূমদগ্ধানীতি এতেষাং রোমাণি ঘটমধ্যে নিক্ষিপ্য মুখং পিধায দগ্ধানীত্যর্থঃ| অত্র হিক্কাসু| ‘অত্র’ ইত্যত্র ‘আর্ত’ ইতি কেচিত্ পঠন্তি| কিমেতাবদেব লীঢ্বা হিক্কাং হন্ত্যুতান্যদপীত্যাহ- মধ্বিত্যাদি| বর্হিপত্রপ্রসূতং মযূরপিচ্ছচন্দ্রিকোত্পন্নং ভস্ম মধুঘৃতোপেতং, এবং পূর্বোক্তগুণম্| মধুঘৃতে অত্র ন তুল্যভাগে; উক্তং চ,- “ভজতো বিষরূপত্বং তুল্যাংশে মধুসর্পিষী”- ইতি| ঔদুম্বরং তৈল্বকং বা ভস্ম এবং মযূরপত্রবন্মধুঘৃতোপেতং হিক্কাঘ্নম্| স্বর্জিক্ষারমিত্যাদি| যস্মাত্ হিক্কা শ্লেষ্মাবরুদ্ধমার্গবাতজা তস্মান্মার্গবিশুদ্ধ্যর্থমেতে লেহা দেযাঃ||১৯-২০||-
Adhikarana 18 (21) · Śloka 21
সর্পিঃস্নিগ্ধা ঘ্নন্তি হিক্কাং যবাগ্বঃ কোষ্ণগ্রাসাঃ পাযসো বা সুখোষ্ণঃ ||২১||
सर्पिःस्निग्धा घ्नन्ति हिक्कां यवाग्वः कोष्णग्रासाः पायसो वा सुखोष्णः ||२१||
🔊 Audio coming soon
ইদানীমাহারাশ্রিতং হিক্কানামৌষধামাহ - সর্পিরিত্যাদি| কোষ্ণগ্রাসাঃ সুখোষ্ণকবলাঃ| পাযসমাহ- পাযসো বা সুখোষ্ণ ইতি হন্তীত্যনুবর্ততে||২১||
Adhikarana 19 (22) · Śloka 22
শুণ্ঠীতোযে সাধিতং ক্ষীরমাজং তদ্বত্ পীতং শর্করাসংযুতং বা | আতৃপ্তের্বা সেব্যমানং নিহন্যাদ্ ঘ্রাতং হিক্কামাশু মূত্রং ত্বজাব্যোঃ ||২২||
शुण्ठीतोये साधितं क्षीरमाजं तद्वत् पीतं शर्करासंयुतं वा | आतृप्तेर्वा सेव्यमानं निहन्याद् घ्रातं हिक्कामाशु मूत्रं त्वजाव्योः ||२२||
🔊 Audio coming soon
ক্ষীরমাহ- শুণ্ঠীতোযে সাধিতমিত্যাদি| শুণ্ঠীতোযে ক্ষীরাচ্চতুর্গুণে সাধিতমজাদুগ্ধং পীতং তদ্বত্ হিক্কাহরং ভবতি; শর্করাসংযুতং বা সাধিতং দুগ্ধমাতৃপ্তেঃ সেব্যমানং হিক্কাং নিহন্যাদিত্যর্থঃ||২২||
Adhikarana 20 (23) · Śloka 23
সপূতিকীটং লশুনোগ্রগন্ধাহিঙ্গ্বব্জমাচূর্ণ্য সুভাবিতং তত্ |২৩|
सपूतिकीटं लशुनोग्रगन्धाहिङ्ग्वब्जमाचूर्ण्य सुभावितं तत् |२३|
🔊 Audio coming soon
ঘ্রেযপ্রসঙ্গেন ঘ্রেযযোগমাহ- সপূতিকীটমিত্যাদি| লশুনাদিকমব্জান্তমাচূর্ণ্য তচ্চূর্ণ সপূতিকীটং পূতিকীটচূর্ণসহিতং, পূতিকীটো ‘ভোন্দুলিকা’ ইতি লোকে, সুভাবিতমজাব্যোরেব মূত্রেণ বহূন্ বারান্ ভাবিতং, ঘ্রাতং হিক্কাং নিহন্যাদিত্যর্থঃ|২৩|-
Adhikarana 21 (23) · Śloka 23
ক্ষৌদ্রং সিতাং বারণকেশরং চ পিবেদ্রসেনেক্ষুমধূকজেন ||২৩||
क्षौद्रं सितां वारणकेशरं च पिबेद्रसेनेक्षुमधूकजेन ||२३||
🔊 Audio coming soon
হিক্কাঘ্নং পানমাহ- ক্ষৌদ্রমিত্যাদি| বারণকেশরং নাগকেশরং, ক্ষৌদ্রাদিকমিক্ষুমধূকজেন রসেন পিবেদিতি সম্বন্ধঃ; অত্র মধুনো দ্রবত্বাচ্চূর্ণাভাবঃ, তেন মধুনঃ প্রক্ষেপঃ| মধুমাত্রা তু “ষোডশাষ্টচতুর্ভাগং বাতপিত্তকফার্তিষু| ক্ষৌদ্রং কষাযে দাতব্যং বিপরীতা তু শর্করা” ইতি ইক্ষুরসমধূকস্বরসৌ তু লেহাচ্চতুর্গুণৌ| উক্তং চ- “কর্ষশ্চূর্ণস্য কল্কস্য গুটিকানাং তু সর্বশঃ| দ্রবশুক্ত্যাঽবলেঢব্যঃ পাতব্যশ্চ চতুর্গুণে”||২৩||
Adhikarana 22 (24) · Śloka 24
পিবেত্ পলং বা লবণোত্তমস্য দ্বাভ্যাং পলাভ্যাং হবিষঃ সমগ্রম্ |২৪|
पिबेत् पलं वा लवणोत्तमस्य द्वाभ्यां पलाभ्यां हविषः समग्रम् |२४|
🔊 Audio coming soon
যোগান্তরমাহ- পিবেত্ পলমিত্যাদি| লবণোত্তমস্য সৈন্ধবস্য| সমগ্রমিতি ইযমুত্তমমাত্রেতি বোধার্থং, তেন হীনবলাদিকমবেক্ষ্য হীনমাত্রমপি পিবেদিত্যর্থঃ|২৪|-
Adhikarana 23 (24-25) · Śloka 25
হরীতকীং কোষ্ণজলানুপানাং পিবেদ্ঘৃতং ক্ষারমধূপপন্নম্ ||২৪|| রসং কপিত্থান্মধুপিপ্পলীভ্যাং শুক্তিপ্রমাণং প্রপিবেত্ সুখায ||২৫||
हरीतकीं कोष्णजलानुपानां पिबेद्घृतं क्षारमधूपपन्नम् ||२४|| रसं कपित्थान्मधुपिप्पलीभ्यां शुक्तिप्रमाणं प्रपिबेत् सुखाय ||२५||
🔊 Audio coming soon
হরীতক্যাদিযোগত্রযমাহ- হরীতকীমিত্যাদি| ঘৃতং কোষ্ণং কৃত্বা ক্ষীরমধুভ্যামুপপন্নং যুক্তং পিবেত্| শুক্তিপ্রমাণমিতি অর্ধপল প্রমাণম্| প্রসৃতপ্রমাণমিত্যর্থঃ| অর্ধপলমিতং মধু, পিপ্পলীপ্রমাণং কর্ষমাত্রম্| কপিত্থাদ্রসং স্বরসং, সুখায আরোগ্যায পিবেত্| হরীতকীমিত্যাদ্যেকো যোগঃ, পিবেদ্ঘৃতমিত্যাদির্দ্বিতীযঃ, রসং কপিত্থাদিত্যাদিস্তৃতীযঃ||২৪-২৫||
Adhikarana 24 (26) · Śloka 26
কৃষ্ণাং সিতাং চামলকং চ লীঢং সশৃঙ্গবেরং মধুনাঽথবাঽপি | কোলাস্থিমজ্জাঞ্জনলাজচূর্ণং হিক্কা নিহন্যান্মধুনাঽবলীঢম্ ||২৬||
कृष्णां सितां चामलकं च लीढं सशृङ्गवेरं मधुनाऽथवाऽपि | कोलास्थिमज्जाञ्जनलाजचूर्णं हिक्का निहन्यान्मधुनाऽवलीढम् ||२६||
🔊 Audio coming soon
কৃষ্ণাদিযোগমাহ- কৃষ্ণাং সিতামিত্যাদি| অথবেতি পূর্বযোগাপেক্ষযা পরযোগাপেক্ষযা বা| কৃষ্ণাং পিপ্পলীং, সিতাং শর্করাং, শৃঙ্গবেরং শুণ্ঠীং; কৃষ্ণাং সিতাং চ মধুনা লিহ্যাদিত্যেকো যোগঃ, সশৃঙ্গবেরমামলকং মধুনেতি দ্বিতীযঃ| কার্তিককুণ্ডস্তু কৃষ্ণা মিত্যাদিকমেকমেব যোগমিচ্ছতি, বিকল্পং তু পূর্বযোগাপেক্ষযা| কোলমজ্জাদিযোগমাহ- কোলাস্থিমজ্জেত্যাদি| কোলাস্থিমজ্জা বদরাস্থিজাতং বীজং, অঞ্জনং সৌবীরাঞ্জনং, লাজাঃ পুষ্পিতং ধান্যম্| মধু চূর্ণাদ্দ্বিগুণিতং পাতব্যম্||২৬||
Adhikarana 25 (27-28) · Śloka 28
পাটলাযাঃ ফলং পুষ্পং গৈরিকং কটুরোহিণী | খর্জূরমধ্যং মাগধ্যঃ কাশীশং দধিনাম চ ||২৭|| চত্বার এতে যোগাঃ স্যুঃ প্রতিপাদপ্রদর্শিতাঃ | মধুদ্বিতীযাঃ কর্তব্যাস্তে হিক্কাসু বিজানতা ||২৮||
पाटलायाः फलं पुष्पं गैरिकं कटुरोहिणी | खर्जूरमध्यं मागध्यः काशीशं दधिनाम च ||२७|| चत्वार एते योगाः स्युः प्रतिपादप्रदर्शिताः | मधुद्वितीयाः कर्तव्यास्ते हिक्कासु विजानता ||२८||
🔊 Audio coming soon
পাটলাদিকযোগচতুষ্টযমাহ- পাটলাযাঃ ফলং পুষ্পমিত্যাদি| এতে চত্বারো যোগাঃ প্রতিপাদং পাদিকা যোগাঃ, প্রদর্শিতা উক্তাঃ| পাটল্যাঃ সফলং পুষ্পং ক্ষৌদ্রেণেত্যেকো যোগঃ| গৈরিকং স্বর্ণগৈরিকং, কটুরোহিণী তিক্তা, ক্ষৌদ্রেণেতি দ্বিতীযো যোগঃ| খর্জূরমধ্যং মাগধ্যো মধুযুক্তা ইতি তৃতীযো যোগঃ; খর্জূরমধ্যং খর্জূরমস্তকমজ্জা, অন্যে খর্জূরাস্থীন্যাহুঃ| কাশীশং স্বনামখ্যাতং দধিনাম কপিত্থং, মধুনেতি চতুর্থো যোগঃ; ‘কাশীশং দধি না সহ’ ইতি কেচিত্ পঠন্তি; কাশীশং দধি চ না পুরুষঃ লিহ্যাদিতি ব্যাখ্যানযন্তি||২৭-২৮||
Adhikarana 26 (29) · Śloka 29
কপোতপারাবতলাবশ(ল্ল)কশ্বদংষ্ট্রগোধাবৃষদংশজান্ রসান্ | পিবেত্ ফলাম্লানহিমান্ সসৈন্ধবান্ স্নিগ্ধাংস্তথৈবর্ষ্যমৃগদ্বিজোদ্ভবান্ ||২৯||
कपोतपारावतलावश(ल्ल)कश्वदंष्ट्रगोधावृषदंशजान् रसान् | पिबेत् फलाम्लानहिमान् ससैन्धवान् स्निग्धांस्तथैवर्ष्यमृगद्विजोद्भवान् ||२९||
🔊 Audio coming soon
রসানাহ- কপোতপারাবতলাবেত্যাদি| কপোতাদিপক্ষিণাং রসান্ মাংসরসান্, ফলাম্লান্ দাডিমাদিসংস্কৃতান্ , অহিমান্ উষ্ণান্, সৈন্ধবযুক্তান্ স্নিগ্ধান্ ঘৃতাঢ্যান্ পিবেত্| বৃষদংশো বনমার্জারঃ, গোধা পঞ্চনখা| তথৈব ঋষ্যাদিজান্ রসান্ পিবেত্| মৃগদ্বিজা জঙ্ঘালবিষ্কিরাঃ| ঋষ্যলাবকযোঃ পৃথগুপাদানং বিশেষেণ তযোর্হিক্কাহরত্বপ্রতিপাদনার্থম্||২৯||
Adhikarana 27 (30) · Śloka 30
বিরেচনং পথ্যতমং সসৈন্ধবং ঘৃতং সুখোষ্ণং চ সিতোপলাযুতম্ | সদাগতাবূর্ধ্বগতেঽনুবাসনং বদন্তি কেচিচ্চ হিতায হিক্কিনাম্ ||৩০||
विरेचनं पथ्यतमं ससैन्धवं घृतं सुखोष्णं च सितोपलायुतम् | सदागतावूर्ध्वगतेऽनुवासनं वदन्ति केचिच्च हिताय हिक्किनाम् ||३०||
🔊 Audio coming soon
বিস্তরোক্তাং চিকিত্সাং সঙ্ক্ষেপেণাহ- বিরেচনং পথ্যতমমিত্যাদি| বিরেচনং বাযোরনুলোমার্থং বলবত আতুরস্য যোজ্যম্| সদাগতৌ বাযৌ| পরমতমপ্যনুমতমনিষেধাত্| যদ্যপি হিক্কাসু বস্তির্নিষিদ্ধঃ, তথাঽপ্যূর্ধ্বগতে বাযৌ প্রযুজ্যতে, অবস্থাবশাত্| যদ্যপ্যেতে যোগাঃ সামান্যেনোক্তাঃ, তথাঽপি দোষোচ্ছ্রাযমবেক্ষ্য যথাবস্থং প্রযোজ্যাঃ||৩০||
Adhikarana puShpikA · Śloka 50
ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রে হিক্কাপ্রতিষেধো নাম (দ্বাদশোঽধ্যাযঃ, আদিতঃ) পঞ্চাশত্তমোঽধ্যাযঃ ||৫০||
इति सुश्रुतसंहितायामुत्तरतन्त्रान्तर्गते कायचिकित्सातन्त्रे हिक्काप्रतिषेधो नाम (द्वादशोऽध्यायः, आदितः) पञ्चाशत्तमोऽध्यायः ||५०||
🔊 Audio coming soon
ইতি শ্রীডল্হ(হ্ল)ণবিরচিতাযাং সুশ্রুতব্যাখ্যাযাং নিবন্ধসঙ্গ্রহাখ্যাযামুত্তরতন্ত্রে হিক্কাপ্রতিষেধো নাম পঞ্চাশত্তমোঽধ্যাযঃ||৫০||