39. jvarapratiṣēdhādhyāyaḥ

Adhikarana 1 (1-2) · Śloka 2

অথাতো জ্বরপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

কুমারতন্ত্রানন্তরং কাযচিকিত্সারম্ভঃ; যতঃ কুমারতন্ত্রাবসানে ‘অপপ্রজাতারোগাংশ্চ চিকিত্সেদুত্তরাদ্ভিষক্’ ইতি বাক্যে উত্তরাদিত্যনেন কাযচিকিত্সিতস্য সূচিতত্বাত্, অথবা কুমারাণামপি জ্বরাদ্যুত্পতৌ সত্যাং কাযচিকিত্সিতস্যোপযোগিত্বাত্| অত্র কাযশব্দেন দোষধাতুমলসঙ্ঘাত উচ্যতে, তেন কাযস্থিতানাং জ্বরাদীনাং চিকিত্সা কাযচিকিত্সা, মঞ্চাঃ ক্রোশন্তীতিবত্| অন্যে কাযশব্দেন কাযাগ্নিং বদন্তি, যতোঽগ্নিং ব্যাপ্য বৈ জ্বরাদযো ভবন্তি| অপরে দুষ্টকাযঃ কাযঃ তস্য চিকিত্সা কাযচিকিত্সেত্যাহুঃ| তস্যামপি কাযচিকিত্সাযাং বহুষূপদ্রবেষু রুদ্রকোপসম্ভবতযা জ্বরস্য গরীযস্ত্বাত্ পূর্বং জ্বরপ্রতিষেধারম্ভ ইত্যাহ- অথাত ইত্যাদি| অথশব্দোঽনন্তরার্থঃ| কুতোঽনন্তরমিত্যাহ- অত ইতি; অস্মাত্ পূর্বাধ্যাযাদিত্যর্থঃ; অতঃশব্দো হেতৌ বা, যতোঽযং জ্বরো রুদ্রকোপসম্ভবতযা গরীযানতো হেতোরিত্যর্থঃ| প্রতিষেধঃ চিকিত্সা| বিঃ বিশেষে বিবিধপ্রকারে চ; আঙ্ অভিব্যাপ্তৌ, আভিমুখ্যে বা; ব্যাখ্যাস্যামঃ প্রকর্ষেণ কথযিষ্যামঃ||১-২||

Adhikarana 2 (3-4) · Śloka 5

যেনামৃতমপাং মধ্যাদুদ্ধৃতং পূর্বজন্মনি | যতোঽমরত্বং সম্প্রাপ্তাস্ত্রিদশাস্ত্রিদিবেশ্বরাত্ ||৩|| শিষ্যাস্তং দেবমাসীনং পপ্রচ্ছুঃ সুশ্রুতাদযঃ | ব্রণস্যোপদ্রবাঃ প্রোক্তা ব্রণিনামপ্যতঃ পরম্ ||৪|| সমাসাদ্ ব্যাসতশ্চৈব ব্রূহি নো ভিষজাংবর |৫|

ইদানীং জ্বরপ্রতিষেধরূপাং ধন্বন্তরিস্তুতিং প্রতিপাদযন্ জ্বরপ্রতিপাদনহেতুকং ধন্বন্তরিং গুরুং প্রতি শিষ্যাণাং প্রশ্নমাহ- যেনামৃতমপামিত্যাদি| যেন ধন্বন্তরিণা| অপাং মধ্যাত্ ক্ষীরার্ণবমধ্যাত্| উদ্ধৃতম্ আনীতম্| পূর্বজন্মনি দেবত্বে সতি| যতো যস্মাত্| ত্রিদশেশ্বরাত্ ধন্বন্তরেঃ| অমরত্বং সম্প্রাপ্তাঃ অমৃতদানেন; ত্রিদশা দেবা অমৃতপ্রাপ্ত্যা অমরত্বং সম্প্রাপ্তাঃ| তং দেবং ধন্বন্তরিনামানম্| আসীনম্ উপবিষ্টম্| পপ্রচ্ছুঃ পৃষ্টবন্তঃ| জেজ্জটাচার্যস্তু ‘ত্রিদশাস্ত্রিদশেশ্বরা’ ইতি পঠিত্বা যতো যস্মাত্ ধন্বন্তরেস্ত্রিদশা দেবা অমৃতপ্রাপ্ত্যা অমরত্বং সম্প্রপ্তাঃ সন্তঃ ত্রিদশেশ্বরাঃ সঞ্জাতা ইতি ব্যাখ্যানযন্তি| অত্র যেনামৃতমিত্যাদিশ্লোকে অমৃতামরযোর্নাম জ্বরপ্রতিষেধাদৌ মঙ্গলার্থমুক্তম্| যদ্যপি প্রাক্ সুশ্রুতস্য প্রশ্নকর্তৃত্বেন প্রাধান্যং, তথাঽপ্যত্র সর্বেষামনুগ্রহায প্রশ্নেঽধিকারঃ| কিং পপ্রচ্ছুরিত্যাহ- ব্রণস্যোপদ্রবা ইত্যাদি| ব্রণস্যোপদ্রবা বেদনাবর্ণাস্রাবাদযঃ| প্রোক্তা ব্রণাস্রাববিজ্ঞানীযাদিষু| ব্রণিনামিতি ব্রণিনঃ পুরুষাঃ, তেষামুপদ্রবা জ্বরাতীসারাদযঃ, তান্ সমাসাত্ সঙ্ক্ষেপতঃ, ব্যাসতো বিস্তারাত্; হে ভিষজাংবর নোঽস্মাকং ব্রূহি| অন্যে তু ব্রণস্যোপদ্রবা বর্ণাস্রাববেদনাদযঃ প্রোক্তাঃ, ব্রণিনামপি সমাসাত্ প্রোক্তাঃ; তথা চ- “বিসর্পঃ পক্ষঘাতশ্চ সিরাস্তম্ভোঽপতানকঃ| মোহোন্মাদৌ ব্রণরুজা জ্বরস্তৃষ্ণা হনুগ্রহঃ|| কাসশ্ছর্দিরতীসারো হিক্কা শ্বাসঃ সবেপথুঃ| ষোডশোপদ্রবাঃ প্রোক্তা ব্রণিনাং ব্রণচিন্তকৈঃ”- ইতি; ব্যাসতশ্চাতঃ পরং ব্রূহীতি ব্যাখ্যানযন্তি||৩-৪||-

Adhikarana 3 (5-7) · Śloka 7

উপদ্রবেণ জুষ্টস্য ব্রণঃ কৃচ্ছ্রেণ সিধ্যতি ||৫|| উপদ্রবাস্তু ব্রণিনঃ কৃচ্ছ্রসাধ্যাঃ প্রকীর্তিতাঃ | প্রক্ষীণবলমাংসস্য শেষধাতুপরিক্ষযাত্ ||৬|| তস্মাদুপদ্রবান্ কৃত্স্নান্ ব্রূহি নঃ সচিকিত্সিতান্ | সর্বকাযচিকিত্সাসু যে দৃষ্টাঃ পরমর্ষিণা ||৭||

ন পরং ব্রণিতোপদ্রবাণামনভিহিতত্বাত্ তান্ প্রতি প্রশ্নঃ, কিং তর্হি সোপদ্রবস্য কৃচ্ছ্রেণ ব্রণপ্রশান্তিঃ ব্রণিতোপদ্রবাণাং চ কৃচ্ছ্রসাধ্যত্বমিতি হেতুদ্বযেন পুনঃ শিষ্যাণাং প্রশ্নমাহ- উপদ্রবেণ জুষ্টস্যেত্যাদি| উপদ্রবেণ জ্বরাদিনা যুক্তস্য পুরুষস্য; অন্যে তু ‘উপদ্রবেণ জুষ্টস্তু’ ইতি ব্রণবিশেষণং পঠন্তি, তন্মতে উপদ্রবেণ ব্রণবেদনাদিনা , জুষ্টো ব্যাপ্তঃ| কৃচ্ছ্রেণ কষ্টেন| ব্রণিন উপদ্রবা জ্বরাদিকাঃ, বিসর্পাদিকা ইত্যন্যে| কীদৃশস্য ব্রণিন উপদ্রবাঃ কৃচ্ছ্রসাধ্যাঃ ইত্যাহ- প্রক্ষীণবলমাংসস্যেত্যাদি| বলম্ উত্সাহলক্ষণং, মাংসম্ উপচযলক্ষণম্| শেষধাতবো মেদঃপ্রভৃতযঃ, তেষাং পরিক্ষযাত্; রক্তস্য তু মাংসাশ্রযত্বান্মাংসগ্রহণেনৈব গ্রহণম্| তস্মাদিতি যস্মাদুপদ্রবজুষ্টস্যাতিকৃচ্ছ্রত্বং তস্মাত্ কৃত্স্নান্ সমস্তানুপদ্রবান্ সচিকিত্সিতান্ নোঽস্মাকং ব্রূহীতি সম্বন্ধঃ| সর্বকাযচিকিত্সাস্বিতি সর্বস্মিন্ কাযে চিকিত্সা তাসু| যে দৃষ্টা উপদ্রবা জ্বরাদযঃ| পরমর্ষিণা ধন্বন্তরিণা| অত্র চিকিত্সাশব্দেন প্রতিকার উচ্যতে; অন্যে ত্বত্র চিকিত্সাশব্দেন চিকিত্সাশাস্ত্রমভিধায মূলতন্ত্রাণামৌপধেনবৌরভ্রাদীনাং চিকিত্সাশাস্ত্রাণামবরোধং মন্যন্তে; অপরে ‘ষট্সু কাযচিকিত্সাসু’ ইতি পঠন্তি, তেষাং মতে ষট্শব্দেন অগ্নিবেশভেডজাতূকর্ণহারীতক্ষারপাণিপরাশরপ্রোক্তাঃ ষট্ চিকিত্সা লভ্যন্তে; অত্র পক্ষে ‘পরমর্ষিণা’ ইত্যত্র ‘পরমর্ষিভিঃ’ ইতি পাঠঃ||৫-৭||

Adhikarana 4 (8-9) · Śloka 9

তেষাং তদ্বচনং শ্রুত্বা প্রাব্রবীদ্ভিষজাংবরঃ | জ্বরমাদৌ প্রবক্ষ্যামি স রোগানীকরাট্ স্মৃতঃ ||৮|| রুদ্রকোপাগ্নিসম্ভূতঃ সর্বভূতপ্রতাপনঃ | তৈস্তৈর্নামভিরন্যেষাং সত্ত্বানাং পরিকীর্ত্যতে ||৯||

তেষামিত্যাদি| তেষাং শিষ্যাণাম্| ভিষজাংবরো ধন্বন্তরিঃ| জ্বরমাদাবিত্যাদি| স ইতি জ্বরঃ| রোগানীকরাডিতি রোগসমূহস্য রাজা| তৈস্তৈর্নামভিঃ পাকলাভিতাপখোরকভ্রমরকাদিভিঃ| অন্যেষাং সত্ত্বানাং গজাশ্বাদীনাম্||৮-৯||

Adhikarana 5 (10) · Śloka 10

জন্মাদৌ নিধনে চৈব প্রাযো বিশতি দেহিনম্ | অতঃ সর্ববিকরাণামযং রাজা প্রকীর্তিতঃ ||১০||

ইদানীমুক্তমেব রোগসমূহরাট্ত্বং সহেতুকং কৃত্বা প্রতিপাদযতি- জন্মেত্যাদি| প্রাযো বিশেষেণ||১০||

Adhikarana 6 (11-12) · Śloka 13

ঋতে দেবমনুষ্যেভ্যো নান্যো বিষহতে তু তম্ | কর্মণা লভতে যস্মাদ্দেবত্বং মানুষাদপি ||১১|| পুনশ্চৈব চ্যুতঃ স্বর্গান্মানুষ্যমনুবর্ততে | তস্মাত্তে দেবভাবেন সহন্তে মানুষা জ্বরম্ ||১২|| শেষাঃ সর্বে বিপদ্যন্তে তৈর্যগ্যোনা জ্বরার্দিতাঃ |১৩|

তির্যগ্যোনযস্তেন পীডিতা বিপদ্যন্ত এবেতি প্রতিপাদযিতুং জ্বরপ্রভাবমাহ- ঋতে ইত্যাদি| ঋতে বিনা| নান্যো বিষহতে নান্যঃ সোঢুং শক্নোতি| দেবাঃ স্বতপোমাহাত্ম্যাত্ সহন্তে; মনুষ্যাঃ কথং সোঢুং সমর্থাঃ? উচ্যতে- কর্মণেত্যাদি; এনং পাঠং কেচিন্ন পঠন্তি, ঈদৃশে ক্রমে নিশ্চযো নাস্তি যত্স্বর্গাচ্চ্যুতো মানুষ এব ভবতি||১১-১২||-

Adhikarana 7 (13) · Śloka 14

স্বেদাবরোধঃ সন্তাপঃ সর্বাঙ্গগ্রহণং তথা ||১৩|| বিকারা যুগপদ্যস্মিন্ জ্বরঃ স পরিকীর্তিতঃ |১৪|

ইদানীং জ্বরস্য স্বরূপমাহ- স্বেদাবরোধ ইত্যাদি| স্বেদাবরোধঃ স্বেদানির্গমঃ; এতচ্চ প্রাযিকং লক্ষণং, পৈত্তিকে স্বেদনির্গমাত্| সন্তাপ ইতি সন্তাপযতীতি সংশব্দান্মানসোঽপি তাপোঽভিপ্রেতঃ; তথা চোক্তং,- ‘সন্তাপো দেহমানস’ ইতি| সর্বাঙ্গগ্রহণং বেদনযা| যুগপদিতি এককালে| ‘স্বেদাবরোধ ’ ইত্যত্র ‘বেগোপরোধঃ’ ইত্যন্যে পঠন্তি; বেগোপরোধো বাতমূত্রপুরীষাদীনামনির্গমঃ||১৩||-

Adhikarana 8 (14) · Śloka 15

দোষৈঃ পৃথক্ সমস্তৈশ্চ দ্বন্দ্বৈরাগন্তুরেব চ ||১৪|| অনেককারণোত্পন্নঃ স্মৃতস্ত্বষ্টবিধো জ্বরঃ |১৫|

অতঃ পরং হেতুভেদাজ্জ্বরস্যানেকত্বমাহ- দোষৈরিত্যাদি| পৃথক্ ত্রযঃ, সমস্তৈর্দোষৈরেকঃ, দ্বন্দ্বজাস্ত্রযঃ, আগন্তুরেকঃ, এবমনেককারণোত্পন্নোঽপি জ্বরোঽষ্টবিধত্বং ন ত্যজতি||১৪||-

Adhikarana 9 (15-18) · Śloka 19

দোষাঃ প্রকুপিতাঃ স্বেষু কালেষু স্বৈঃ প্রকোপণৈঃ ||১৫|| ব্যাপ্য দেহমশেষেণ জ্বরমাপাদযন্তি হি | দুষ্টাঃ স্বহেতুভির্দোষাঃ প্রাপ্যামাশযমূষ্মণা ||১৬|| সহিতা রসমাগত্য রসস্বেদপ্রবাহিণাম্ | স্রোতসাং মার্গমাবৃত্য মন্দীকৃত্য হুতাশনম্ ||১৭|| নিরস্য বহিরূষ্মাণং পক্তিস্থানাচ্চ কেবলম্ | শরীরং সমভিব্যাপ্য স্বকালেষু জ্বরাগমম্ ||১৮|| জনযন্ত্যথ বৃদ্ধিং বা স্ববর্ণং চ ত্বগাদিষু |১৯|

জ্বরস্য সম্প্রাপ্তিমাহ- দোষাঃ প্রকুপিতা ইত্যাদি| দোষাঃ প্রকুপিতাশ্চযানুপূর্ব্যা; স্বেষু কালেষু প্রাবৃট্শরদ্বসন্তেষু অহোরাত্রিকেষু চ; এতেন প্রাকৃতো জ্বর উক্তঃ| স্বৈঃ প্রকোপণৈরিতি বলবদ্বিগ্রহাদিক্রোধাদিদিবাস্বাপাদিভির্ব্রণপ্রশ্নোক্তৈঃ| অনেন চ বৈকৃতঃ| ব্রহ্মদেবস্তু সন্নিপাতপ্রকোপস্য হেতূনত্র পৃথগাহ; যথা,- “বিষমাধ্যশনাত্যশনং লকুচামফলং শিলোচ্চযে সলিলম্| পিণ্যাকমামমূলকসর্ষপশাকং যবৈঃ কৃতা চ সুরা|| কৃশশুষ্কামিষশাকং যাবকমশনং চ পর্বতে বাসঃ| ব্যাপন্নাম্বুসুরাদধিকন্দং পিডকোচ্ছ্রিতির্দেহে|| মৃদ্বিষগরাদিভক্ষণমনার্তবং দুর্দিনং পুরোবাতঃ| অন্নপরিবর্তভূতাবেশৌ পীডা গ্রহর্ক্ষসম্ভূতা|| অনুচিতভেষজগন্ধাঘ্রাণং পাপস্য কর্মণোঽভ্যাসঃ| স্নেহস্বেদাদীনাং মিথ্যাযোগঃ পুরাকৃতং কর্ম|| স্ত্রীণাং বিষমপ্রসবো মিথ্যাযোগঃ প্রসূতানাম্| স্নেহস্বেদাদীনাং রসাযনস্যাপি চ ব্যাপত্|| এতে হেতব উক্তাঃ প্রকোপণে সন্নিপাতস্য”- ইতি| অশেষেণ সামস্ত্যেন| আপাদযন্তি জনযন্তি| অন্যে ‘দোষাঃ প্রকুপিতা গাঢমপথ্যাহারসেবনঃ’ ইতি পঠন্তি| অত্র গাঢশব্দেন প্রকৃতঃ, অপথ্যাহারসেবিন ইত্যনেন বৈকৃতঃ| অন্যে জ্বরসম্প্রাপ্তিমনেন পাঠেন পঠন্তি, তদ্যথা- দুষ্টাঃ স্বহেতুভিরিত্যাদি| দুষ্টাঃ প্রকুপিতাশ্চযাদিরূপেণ, স্বেষু কালেষু প্রাকৃতং জ্বরং, স্বহেতুভিরদ্যসম্প্রাপ্তিশ্লোকব্যাখ্যাতৈর্বলবদ্বিগ্রহাদিভির্বৈকৃতম্| ঊষ্মণা বহ্নযূষ্মণা সহিতা ধাতূষ্মণা দোষোষ্মণা বা সহিতা দোষা রসং হৃদযস্থমাগত্য, হুতাশনং জঠরাগ্নিং মন্দীকৃত্য, ঊষ্মাণমগ্নেরেব, পক্তিস্থানাত্ অগ্নিস্থানাত্, বহিঃ নিরস্য নিক্ষিপ্য, কেবলং সর্বং, স্বকালেষু আর্তবেষু অহোরাত্রিকেষু চ জ্বরাগমং জনযন্তি, অথবা বৃদ্ধিমাগতস্য; স্ববর্ণং নখত্বঙ্নযনাদিষু জনযন্তি||১৫-১৮||-

Adhikarana 10 (19-22) · Śloka 22

মিথ্যাতিযুক্তৈরপি চ স্নেহাদ্যৈঃ কর্মভির্নৃণাম্ ||১৯|| বিবিধাদভিঘাতাচ্চ রোগোত্থানাত্ প্রপাকতঃ | শ্রমাত্ ক্ষযাদজীর্ণাচ্চ বিষাত্সাত্ম্যর্তুপর্যযাত্ ||২০|| ওষধীপুষ্পগন্ধাচ্চ শোকান্নক্ষত্রপীডযা | অভিচারাভিশাপাভ্যাং মনোভূতাভিশঙ্কযা ||২১|| স্ত্রীণামপপ্রজাতানাং প্রজাতানাং তথাঽহিতৈঃ | স্তন্যাবতরণে চৈব জ্বরো দোষৈঃ প্রবর্ততে ||২২||

ন কেবলমেবং স্বপ্রকোপণৈর্ব্রণপ্রশ্নোক্তৈঃ প্রকুপিতা দোষা জ্বরমাপাদযন্তি, অপি তু তেঽন্যৈরপি কারণৈরিত্যত আহ- মিথ্যাতিযুক্তৈরিত্যাদি| মিথ্যাতিযুক্তৈঃ অযথাবিধিযুক্তৈরতিযুক্তৈশ্চ| স্নেহাদ্যৈঃ স্নেহস্বেদবমনবিরেচনাদিকৈঃ| নৃণাং জ্বরো দোষৈঃ প্রবর্ততে ইতি সম্বন্ধঃ; ‘প্রবর্তত’ ইত্যত্র ‘প্রকুপ্যতি’ ইতি কেচিত্| বিবিধাদভিঘাতাত্ শস্ত্রলোষ্ট্রকাষ্ঠাদিপ্রহারাত্| রোগোত্থানাত্ রোগা বিদ্রধ্যাদযস্তেষামুত্থানাত্| শ্রমাত্ অতিব্যাযামাত্| প্রপাকস্তেষামেব| আমাত্ অজীর্ণাত্| ক্ষযাত্ রাজযক্ষ্মণঃ| সাত্ম্যর্তুপর্যযাত্ সাত্ম্যবিপর্যযাদৃতুবিপর্যযাচ্চ| ওষধীশব্দস্যাদৌ বিষশব্দো লুপ্তো দ্রষ্টব্যঃ, তেন বিষৌষধীপুষ্পগন্ধাত্| নক্ষত্রং জন্মনক্ষত্রং, তস্য পীডা তথা ক্রূরগ্রহাণাং বাধা তযা| অভিচারো যন্ত্রমন্ত্রাদ্যভিপীডনম্, অভিশাপো দ্বিজগুরুসিদ্ধানামভিশপনং, তাভ্যাম্| মনোভূতাভ্যামভিশঙ্কাশব্দঃ সম্বধ্যতে, অভিশঙ্কা শব্দেন অভিষঙ্গত্বং কথ্যতে; তেন মনোঽভিষঙ্গেণ কামাদ্যভিষঙ্গেণেত্যর্থঃ, ভূতশব্দেন দেবাদিগ্রহা উচ্যন্তে, তেন দেবাদিগ্রহাভিষঙ্গেণেত্যর্থঃ| অপপ্রজাতানাম্ অসম্যক্প্রসূতানাং, প্রজাতানাং সম্যক্প্রসূতানাম্, অহিতৈঃ কৃত্বা| স্তন্যস্য ক্ষীরস্য, অবতরণে প্রথমমুন্মুখীভবনে||১৯-২২||

Adhikarana 11 (23-24) · Śloka 24

তৈর্বেগবদ্ভির্বহুধা সমুদ্ভ্রান্তৈর্বিমার্গগৈঃ | বিক্ষিপ্যমাণোঽন্তরগ্নির্ভবত্যাশু বহিশ্চরঃ ||২৩|| রুণদ্ধি চাপ্যপান্ধাতুং যস্মাত্তস্মাজ্জ্বরাতুরঃ | ভবত্যত্যুষ্ণগাত্রশ্চ জ্বরিতস্তেন চোচ্যতে ||২৪||

এবং জ্বরহেতূনুদাহৃত্য যথোষ্ণগাত্রত্বাং স্যাত্তথা দর্শযতি- তৈর্বেগবদ্ভির্বহুধেত্যাদি| তৈঃ দোষৈঃ| বেগবদ্ভিঃ প্রসরণশীলৈঃ| সমুদ্ভ্রান্তৈঃ ইতশ্চেতশ্চ বিক্ষিপ্তৈঃ| বিমার্গগৈঃ তির্যগ্গতৈঃ| বিক্ষিপ্যমাণঃ প্রের্যমাণঃ| অন্তরগ্নির্বহিশ্চরো ভবতি ‘রোমকূপৈঃ’ ইতি শেষঃ| অপান্ধাতুং স্বেদং, রুণদ্ধি| স এব বহির্নিঃসৃতোঽন্তরগ্নির্যস্মাদপান্ধাতুং রুণদ্ধি তস্মাদত্যুষ্ণসর্বাঙ্গো ভবতি, যতোঽত্যুষ্ণ সর্বাঙ্গঃ স্যাত্তেন কারণেন জ্বরিত ইত্যুচ্যতে| অন্যে তু ‘জ্বরিতস্তেন চোচ্যতে’ ইত্যত্র ‘ন চ স্বিদ্যতি সর্বশঃ’ ইতি পঠন্তি (ব্যাখ্যানযন্তি চ সর্বত্র ন স্বিদ্যতি, চ ক্বচিত্ স্বিদ্যতীত্যর্থঃ)||২৩-২৪||

Adhikarana 12 (25-28) · Śloka 28

শ্রমোঽরতির্বিবর্ণত্বং বৈরস্যং নযনপ্লবঃ | ইচ্ছাদ্বেষৌ মুহুশ্চাপি শীতবাতাতপাদিষু ||২৫|| জৃম্ভাঽঙ্গমর্দো গুরুতা রোমহর্ষোঽরুচিস্তমঃ | অপ্রহর্ষশ্চ শীতং চ ভবত্যুত্পত্স্যতি জ্বরে ||২৬|| সামান্যতো, বিশেষাত্তু জৃম্ভাঽত্যর্থং সমীরণাত্ | পিত্তান্নযনযোর্দাহঃ, কফান্নান্নাভিনন্দনম্ ||২৭|| সর্বলিঙ্গসমবাযঃ সর্বদোষপ্রকোপজে | দ্বযোর্দ্বযোস্তু রূপেণ সংসৃষ্টং দ্বন্দ্বজং বিদুঃ ||২৮||

ইদানীং পূর্বরূপমাহ- শ্রম ইত্যাদি| অরতিঃ শযনাসনাদৌ সর্বত্রাপি সুখাভাবঃ| নযনপ্লবো নযনযোরশ্রুপূর্ণতা| আতপাদিষ্বিত্যাদিশব্দগ্রহণাচ্ছয্যাসনগ্রহণম্| তমঃ অন্ধকারদর্শনম্| অপ্রহর্ষ আনন্দাভাবঃ| উত্পত্স্যতি ভাবিনি জ্বরে| সামান্যতঃ সর্বস্মিন্নেব জ্বরে| প্রত্যেকদোষজজ্বরে পূর্বরূপমাহ- বিশেষাত্তু জৃম্ভাঽত্যর্থমিত্যাদি| ন অন্নাভিনন্দনম্ অন্নানভিলাষঃ||২৫-২৮||

Adhikarana 13 (29-30) · Śloka 30

বেপথুর্বিষমো বেগঃ কণ্ঠৌষ্ঠপরিশোষণম্ | নিদ্রানাশঃ ক্ষুতঃ স্তম্ভো গাত্রাণাং রৌক্ষ্যমেব চ ||২৯|| শিরোহৃদ্গাত্ররুগ্বক্ত্রবৈরস্যং বদ্ধবিট্কতা | জৃম্ভাঽঽধ্মানং তথা শূলং ভবত্যনিলজে জ্বরে ||৩০||

বাতাদিজত্বেন জ্বরস্য লক্ষণান্যাহ- বেপথুরিত্যাদি| বেপথুঃ কম্পঃ| বিষমো বেগ ইতি কদাচিদতিশযিতঃ কদাচিন্মন্দশ্চ বেগঃ| ক্ষুতঃ স্তম্ভঃ ক্ষুত্ ছিক্কা তস্যাঃ স্তম্ভোঽনির্গমনং; ‘ক্ষুত’ ইত্যত্র অন্যে ‘ক্ষব’ ইতি পঠন্তি; তন্মতে ক্ষবঃ ছিক্কা, স্তম্ভো গাত্রস্য| ননু, বাতজ্বরমোক্ষেঽপি ছিক্কা স্যাত্, তত্ কথং জ্বরাগমমোক্ষযোর্জ্ঞানম্? উচ্যতে- অপরবেপথ্বাদিবাতজ্বরলক্ষণানামভাবাজ্জ্বরমোক্ষো বোদ্ধব্যঃ| রৌক্ষ্যমেব চেতি গাত্রাণাং (রূক্ষগ্রহণেনৈব কৃষ্ণারুণবর্ণযুক্তমিতি জ্ঞেযং); চকারাত্ কৃষ্ণবিণ্মূত্রত্বং সমুচ্চীযতে; অন্যে তু ‘গাত্রাণাং রৌক্ষ্যমেব চ’ ইত্যত্র ‘শ্যাবাঙ্গমলনেত্রতা’ ইতি পঠন্তি| শিরসঃ পৃথগুপাদানমত্যর্থং শিরোরুগ্ভবতীতি জ্ঞাপনার্থম্; অন্যথা গাত্ররুগিত্যনেনৈব তত্প্রাপ্তেঃ| ‘জৃম্ভাধ্মানে ভ্রমঃ শূলং’ ইত্যন্যে পঠন্তি||২৯-৩০||

Adhikarana 14 (31-32) · Śloka 32

বেগস্তীক্ষ্ণোঽতিসারশ্চ নিদ্রাল্পত্বং তথা বমিঃ | কণ্ঠৌষ্ঠমুখনাসানাং পাকঃ স্বেদশ্চ জাযতে ||৩১|| প্রলাপঃ কটুতা বক্ত্রে মূর্চ্ছা দাহো মদস্তৃষা | পীতবিণ্মূত্রনেত্রত্বং পৈত্তিকে ভ্রম এব চ ||৩২||

বেগ ইত্যাদি| ‘প্রলাপঃ কটুতা বক্ত্রে’ ইত্যত্র ‘প্রলাপস্তিক্তবক্ত্রত্বং’ ইতি কেচিত্ পঠন্তি| মদঃ পূগফলেনেব মত্ততা||৩১-৩২||

Adhikarana 15 (33-34) · Śloka 34

গৌরবং শীতমুত্ক্লেশো রোমহর্ষোঽতিনিদ্রতা | স্রোতোরোধো রুগল্পত্বং প্রসেকো মধুরাস্যতা ||৩৩|| নাত্যুষ্ণগাত্রতা ছর্দিরঙ্গসাদোঽবিপাকতা | প্রতিশ্যাযোঽরুচিঃ কাসঃ কফজেঽক্ষ্ণোশ্চ শুক্লতা ||৩৪||

গৌরবমিত্যাদি| গৌরবং গাত্রাণাং, উত্ক্লেশঃ শ্লেষ্মনিষ্ঠীবনং, প্রসেকো লালাস্রাবঃ, অঙ্গসাদঃ অঙ্গগ্লানিঃ| অন্যে ত্বেবং পঠন্তি- ‘স্তৈমিত্যং স্তিমিতো বেগ আলস্যং মধুরাস্যতা| শুক্লমূত্রপুরীষত্বং স্তম্ভস্তৃপ্তিরথাপি চ|| গৌরবং শীতমুত্ক্লেশো রোমহর্ষোঽতিনিদ্রতা| প্রতিশ্যাযোঽরুচিঃ কাসঃ কফজেঽক্ষ্ণোশ্চ শুক্লতা’ ইতি| স্তৈমিত্যং নিশ্চলত্বং জ্বরিতস্য, বেগোঽপি স্তিমিতঃ সততস্থিতো নিশ্চলঃ, অন্যে তু স্তিমিতো বেগো মন্দ উদ্গমঃ||৩৩-৩৪||

Adhikarana 16 (35-37) · Śloka 38

নিদ্রানাশো ভ্রমঃ শ্বাসস্তন্দ্রা সুপ্তাঙ্গতাঽরুচিঃ | তৃষ্ণা মোহো মদঃ স্তম্ভো দাহঃ শীতং হৃদি ব্যথা ||৩৫|| পক্তিশ্চিরেণ দোষাণামুন্মাদঃ শ্যাবদন্ততা | রসনা পরুষা কৃষ্ণা সন্ধিমূর্ধাস্থিজা রুজঃ ||৩৬|| নির্ভুগ্নে কলুষে নেত্রে কর্ণৌ শব্দরুগন্বিতৌ | প্রলাপঃ স্রোতসাং পাকঃ কূজনং চেতনাচ্যুতিঃ ||৩৭|| স্বেদমূত্রপুরীষাণামল্পশঃ সুচিরাত্ স্রুতিঃ |৩৮|

একৈকদোষজং জ্বরমভিধায সান্নিপাতিকমাহ- নিদ্রানাশ ইত্যাদি| ভ্রমশ্চক্রারূঢস্যেব ভ্রমণম্| তন্দ্রালক্ষণমুচ্যতে “ইন্দ্রিযার্থেষ্বসংবিত্তির্গৌরবং জৃম্ভণং ক্লমঃ| নিদ্রার্তস্যেব যস্যেহা তস্য তন্দ্রাং বিনির্দিশেত্”- ইতি| সুপ্তাঙ্গতা গাত্রাণাং স্পর্শাজ্ঞতা, মোহোঽত্র মূর্চ্ছা, মদঃ পূগফলেনেব মত্ততা, স্তম্ভঃ স্তব্ধতা| উন্মাদো মানসো বিকারঃ| রসনা জিহ্বা, পরুষা কর্কশা| সন্ধিমূর্ধাস্থিজা রুজ ইতি সন্ধিরুজা মূর্ধরুজা অস্থিরুজা চ; অন্যে সন্ধ্যাদিস্থানে ‘লোঠনং শিরসো রুজা’ ইতি পঠন্তি, লোঠনং শিরসো বিধূননম্| নির্ভুগ্নে কুটিলে, কলুষে মলিনে | শব্দরুগন্বিতৌ শব্দান্বিতৌ রুগন্বিতৌ চ কর্ণৌ ভবতঃ| প্রলাপঃ অসম্বদ্ধভাষণম্| স্রোতসাং মুখনাসাদিরন্ধ্রাণাম্| কূজনম্ অব্যক্তশব্দোত্থানং কণ্ঠে| চেতনাচ্যুতিঃ চিত্তনাশঃ| অল্পশঃ সুচিরাত্ স্রুতিরিতি অল্পমল্পং কৃত্বা চিরকালেন নিঃসরতীত্যর্থঃ||৩৫-৩৭||-

Adhikarana 17 (38) · Śloka 38

সর্বজে সর্বলিঙ্গানি... |৩৮|

নিদ্রানাশ ইত্যাদিপাঠেন বিকৃতিবিষমসমবেতস্য সন্নিপাতস্য লক্ষণমভিধায প্রকৃতিসমসমবেতস্য লক্ষণমাহ- সর্বজে ইত্যাদি| সর্বদোষজে সর্বলিঙ্গানি প্রত্যেকবাতাদিজ্বরোক্তলক্ষণানি|৩৮|-

Adhikarana 18 (38-40) · Śloka 41

...বিশেষং চাত্র মে শৃণু ||৩৮|| নাত্যুষ্ণশীতোঽল্পসঞ্জ্ঞো ভ্রান্তপ্রেক্ষী হতস্বরঃ | খরজিহ্বঃ শুষ্ককণ্ঠঃ স্বেদবিণ্মূত্রবর্জিতঃ ||৩৯|| সাস্রো নির্ভুগ্নহৃদযো ভক্তদ্বেষী হতপ্রভঃ | শ্বসন্নিপতিতঃ শেতে প্রলাপোপদ্রবাযুতঃ ||৪০|| তমভিন্যাসমিত্যাহুর্হতৌজসমথাপরে |৪১|

ইদানীমভিন্যাসাদিসঞ্জ্ঞাভিঃ সন্নিপাতভেদমাহ- বিশেষমিত্যাদি| বিশেষং ভেদম্| অত্র সন্নিপাতজ্বরে| নাত্যুষ্ণশীতঃ সাধারণাঙ্গস্পর্শঃ| ভ্রান্তপ্রেক্ষী সর্বপদার্থাযথার্থদর্শী| সাস্রঃ অশ্রুপূর্ণনেত্রঃ| নির্ভুগ্নহৃদযঃ কুটিলহৃদযঃ| শ্বসন্ শ্বাসং কুর্বন্| নিপতিত ইব শেতে, এতেন বিকলাঙ্গ উক্তঃ| প্রলাপ এবোপদ্রবস্তেন আযুতোঽত্যর্থযুক্তঃ| তং সন্নিপাতভেদম্||৩৮-৪০||-

Adhikarana 19 (41) · Śloka 41

সন্নিপাতজ্বরং কৃচ্ছ্রমসাধ্যমপরে বিদুঃ ||৪১||

মতভেদেন সন্নিপাতজ্বরস্য কৃচ্ছ্রসাধ্যত্বমসাধ্যত্বং চোচ্যতে- সন্নিপাতজ্বরমিত্যাদি| অসমস্তলক্ষণত্বে কৃচ্ছ্রসাধ্যত্বং, সমস্তলক্ষণত্বে বিবদ্ধদোষত্বেঽগ্নৌ চ নষ্টে সত্যসাধ্যত্বম্||৪১||

Adhikarana 20 (42) · Śloka 42

নিদ্রোপেতমভিন্যাসং ক্ষীণমেনং হতৌজসম্ | সন্ন্যস্তগাত্রং সন্ন্যাসং বিদ্যাত্সর্বাত্মকে জ্বরে ||৪২||

অভিন্যাসস্য ভেদমাহ- নিদ্রেত্যাদি| তমেব নিদ্রোপেতমভিন্যাসং বিদ্যাত্, এনং ক্ষীণং সন্তং হতৌজসং বিদ্যাত্, তমেব চ সন্ন্যস্তগাত্রং সন্ন্যাসমিতি| কেচিদমুমভিন্যাসপ্রতিপাদকং বাক্যং ন পঠন্তি| নিদ্রোপেতমভিন্যাসমিত্যাদিপাঠস্যাগ্রে ‘প্রলিম্পন্নিব গাত্রাণি পর্বণাং গৌরবেণ চ’ ইত্যাদিনা ‘মন্দজ্বরপ্রলাপস্তু সশীতঃ স্যাত্প্রলেপকঃ’ ইত্যন্তেনাপরতন্ত্রোক্তপাঠেন প্রলেপকলক্ষণং কেচিত্ পঠন্তি, তচ্চ ন পঠনীযং; ‘তথা প্রলেপকো জ্ঞেয’ ইত্যাদিপাঠেন স্বতন্ত্রে তস্য পঠিতত্বাত্| ‘নিত্যং মন্দজ্বর’ ইত্যাদিনা ক্ষারপাণিপ্রোক্তং বাতবলাসকলক্ষণমপরে পঠন্তি, তদপি ন পঠনীযং, ‘প্রলেপকং বাতবলাসকং চ’ ইত্যনেন তস্যোক্তেঃ| নিত্যং মন্দজ্বর ইত্যাদিপাঠস্যাগ্রেঽন্যে তৃণপুষ্পকলক্ষণমধীযন্তে- “পুষ্পেভ্যো গন্ধরজসী তেজস্বিভ্যো যদাঽনিলঃ| উপাদায মনুষ্যস্য প্রাণাপানৌ নিযচ্ছতি|| সৌক্ষ্ম্যাদনুসৃতো ধাতূন্ মর্মাণ্যপি চ তেজসা| কর্ম চিতং বলং জ্ঞানং তদাঽস্যাভ্যেতি মারুতঃ|| কর্মাদিষু নিরুদ্ধেষু স্বপিতীতি সুহৃজ্জনঃ| মন্যতে হতচিত্তত্বাদোজস্যুপরতে সতি|| তস্যাদিতঃ শিরোরোগঃ সসঞ্জ্ঞস্যেব জাযতে| বিগন্ধং চ সুগন্ধং চ দৃষ্ট্বাঽকস্মাত্ স মূর্চ্ছতি|| তৃণপুষ্পকমিত্যেবং জ্বরং বিদ্যাদ্বিচক্ষণঃ”- ইতি; তচ্চৌষধীগন্ধজে জ্বরে তথৌপত্যকে চান্তর্ভূতত্বান্নাধ্যেযমিতি||৪২||

Adhikarana 21 (43-44) · Śloka 45

ওজো বিস্রংসতে যস্য পিত্তানিলসমুচ্ছ্রযাত্ | স গাত্রস্তম্ভশীতাভ্যাং শযনেপ্সুরচেতনঃ ||৪৩|| অপি জাগ্রত্ স্বপন্ জন্তুস্তন্দ্রালুশ্চ প্রলাপবান্ | সংহৃষ্টরোমা স্রস্তাঙ্গো মন্দসন্তাপবেদনঃ ||৪৪|| ওজোনিরোধজং তস্য জানীযাত্ কুশলো ভিষক্ |৪৫|

কেচিদত্র হতৌজসলক্ষণং পঠন্তি; যথা- ওজো বিস্রংসতে যস্যেত্যাদি| স জ্বরী গাত্রস্তম্ভশীতাভ্যাং কৃত্বা শযনেপ্সুঃ স্বপিতুমিচ্ছুঃ জাগ্রদবস্থাযাং স্বপ্নাবস্থাযাং চ চেতনারহিতো ভবতি, তস্য সন্নিপাতিন এতদ্গাত্রস্তম্ভাদিকমোজোনিরোধজং লক্ষণং জানীযাত্| যদ্যপি তন্ত্রান্তরে সন্নিপাতভেদাস্ত্রযোদশ প্রোক্তাঃ, তথাঽপি দোষোত্কর্ষাপকর্ষতারতম্যেন ধাত্বাবরণভেদেন চ সন্নিপাতভেদানামানন্ত্যান্নেহ প্রদর্শিতাঃ||৪৩-৪৪||-

Adhikarana 22 (45) · Śloka 46

সপ্তমে দিবসে প্রাপ্তে দশমে দ্বাদশেঽপি বা ||৪৫|| পুনর্ঘোরতরো ভূত্বা প্রশমং যাতি হন্তি বা |৪৬|

সন্নিপাতজ্বরস্য মোক্ষবধযোরবধিমাহ- সপ্তমে দিবসে প্রাপ্তে ইত্যাদি| শীঘ্রমধ্যমন্দশক্তিত্বাদ্বাতাদীনাং সপ্তমে দিনে বাতাধিকঃ সন্নিপাতজ্বরঃ, দশমে দিনে পিত্তাধিকঃ, দ্বাদশে দিনে শ্লেষ্মধিকো বিমুঞ্চতি মলপাকাত্, হন্তি চ ধাতুপাকাত্; যদি হি তস্য দীর্ঘজীবনং(নে) কর্মাস্তি তদা মলপাকো ভবতি, অন্যথা ধাতুপাকঃ| অন্যে তু সপ্তাহেঽভিন্যাসো, দশাহে হতৌজাঃ, দ্বাদশাহে সন্ন্যাসঃ, মলপাকাত্ প্রশমং যাতি ধাতুপাকাদ্ধন্তীতি মন্যন্তে| ধাতুপাকাস্য লক্ষণমাহ- “সম্বাধ্যমানো হৃদি নাভিদেশে গাত্রেষু বা পাকরুজোজ্ঝিতেষু| পক্বেষ্বিবাচৈতি রুজং জ্বরার্তঃ স ধাতুপাকী কথিতো ভিষগ্ভিঃ”- ইতি| শকুনৈররিষ্টৈর্বা মরণকারী ধাতুপাকী(কো) জ্ঞেয ইতি বৃদ্ধাঃ| ‘দ্বাদশেঽপি বা’ ইত্যত্রাপিশব্দাদ্ভালুকিপ্রোক্তঃ সন্নিপাতজ্বরস্য মোক্ষবধযোরবধিঃ প্রাপ্যতে| তেন “সপ্তমী দ্বিগুণা যা তু নবম্যেকাদশী তথা| এষা ত্রিদোষমর্যাদা মোক্ষায চ বধায চ” ইতি লব্ধম্| পুনর্ঘোরতর ইতি পুনঃশব্দাত্ পূর্বং ঘোর আসীত্ ততঃ পুনর্ঘোরতর ইতি লভ্যতে||৪৫||-

Adhikarana 23 (46) · Śloka 46

দ্বিদোষোচ্ছ্রাযলিঙ্গাস্তু দ্বন্দ্বজাস্ত্রিবিধাঃ স্মৃতাঃ ||৪৬||

ইদানীং প্রকৃতিসমবেতাস্ত্রিবিধা দ্বন্দ্বজজ্বরা উচ্যন্তে- দ্বিদোষোচ্ছ্রাযলিঙ্গা ইত্যাদি| দ্বিদোষোচ্ছ্রাযেত্যুচ্ছ্রাযগ্রহণং দ্বযোর্দোষযোঃ স্বকারণোচ্ছ্রিতত্বজ্ঞাপনার্থং ত্রিবিধত্বমত্র সমবৃদ্ধদ্বিদোষজাপেক্ষযেতি||৪৬||

Adhikarana 24 (47) · Śloka 48

তৃষ্ণা মূর্চ্ছা ভ্রমো দাহঃ স্বপ্ননাশঃ শিরোরুজা | কণ্ঠাস্যদশোষো বমথূ রোমহর্ষোঽরুচিস্তথা ||৪৭|| পর্বভেদশ্চ জৃম্ভা চ বাতপিত্তজ্বরাকৃতিঃ |৪৮|

ইদানীং বিকৃতিবিষমসমবেতান্ দ্বন্দ্বজজ্বরানাহ- তৃষ্ণেত্যাদি| কণ্ঠাস্যশোষঃ কণ্ঠশোষো মুখশোষশ্চ| বমথুঃ ছর্দিঃ| যতোঽযং বিকৃতিবিষমসমবেতঃ অতো বাতপৈত্তিকে জ্বরে রোমহর্ষারুচ্যোরভিধানং, কফপৈত্তিকে তন্দ্রাভিধানম্||৪৭||-

Adhikarana 25 (48-49) · Śloka 49

স্তৈমিত্যং পর্বণাং ভেদো নিদ্রা গৌরবমেব চ ||৪৮|| শিরোগ্রহঃ প্রতিশ্যাযঃ কাসঃ স্বেদপ্রবর্তনম্ | সন্তাপো মধ্যবেগশ্চ বাতশ্লেষ্মজ্বরাকৃতিঃ ||৪৯||

স্তৈমিত্যং নিশ্চলত্বং জ্বরিতস্য, পর্বণাং ভেদো গ্রন্থিস্ফুটনং, শিরোগ্রহঃ শিরো গৃহীতমিব মন্যতে, প্রতিশ্যাযো নাসাস্রাবঃ||৪৮-৪৯||

Adhikarana 26 (50) · Śloka 3

লিপ্তাতিক্তাস্যতা তন্দ্রা মোহঃ কাসোঽরুচিস্তৃষা | মুহুর্দাহো মুহুঃ শীতং শ্লেষ্মপিত্তজ্বরাকৃতিঃ ||৫০|| (জৃম্ভাধ্মানমদোত্কম্পপর্বভেদপরিক্ষযাঃ| তৃট্প্রলাপাভিতাপাঃ স্যুর্জ্বরে মারুতপৈত্তিকে ||১|| শূলকাসকফোত্ক্লেশশীতবেপথুপীনসাঃ| গৌরবারুচিবিষ্টম্ভা বাতশ্লেষ্মসমুদ্ভবে||২|| শীতদাহারুচিস্তম্ভস্বেদমোহমদভ্রমাঃ| কাসাঙ্গসাদহৃল্লাসা ভবন্তি কফপৈত্তিকে||৩||) |

লিপ্তেত্যাদি| লিপ্তাস্যতা তিক্তাস্যতা চ| জেজ্জটাচার্যস্তু দ্বন্দ্বজজ্বরপাঠমেকমেব পঠতি- জৃম্ভেত্যাদিনা| অযং বা পঠনীযঃ পূর্বো বা, ন তু দ্বযম্||৫০||

Adhikarana 27 (51-52) · Śloka 52

কৃশানাং জ্বরমুক্তানাং মিথ্যাহারবিহারিণাম্ | দোষঃ স্বল্পোঽপি সংবৃদ্ধো দেহিনামনিলেরিতঃ ||৫১|| সততান্যেদ্যুষ্কত্র্যাখ্যচাতুর্থান্ সপ্রলেপকান্ | কফস্থানবিভাগেন যথাসঙ্খ্যং করোতি হি ||৫২||

সন্ততজ্বরমভিধাযেদানীং বিষমজ্বরান্ সততাদীনাহ- কৃশানামিত্যাদি| কৃশানাং মিথ্যাহারবিহারিণাং জ্বরমুক্তানাং চ মিথ্যাহারবিহারিণাং দোষঃ স্বল্পোঽপি ‘অপথ্যৈঃ কৃত’ ইতি শেষঃ, পুনর্মিথ্যাহারবিহারাভ্যামভিসংবৃদ্ধো বাতপ্রেরিতঃ সন্ সততাদীন্ যথাসঙ্খ্যং কফস্থানবিভাগেন করোতীতি সম্বন্ধঃ| কফস্থানানি আমাশযোরঃকণ্ঠশিরঃসন্ধযো যথাসঙ্খ্যং কথ্যন্তে| তত্র আমাশযস্থঃ সততং করোতি, স চ প্রতিদিনং কালদ্বযানুবর্তনাত্ কিঞ্চিন্ন্যূনঃ , উরঃস্থো অন্যেদ্যুষ্কং, কণ্ঠস্থঃ তৃতীযকং, শিরস্থঃ চতুর্থকং, সন্ধিস্থঃ প্রলেপকং, সর্বেষু কফস্থানেষু ব্যবস্থিতো দোষঃ সন্ততং করোতীতি জ্ঞাতব্যম্| দোষশব্দোঽত্র পৃথগ্দ্বন্দ্বসমস্তরূপো বাতাদির্গ্রাহ্যঃ| অনিলেরিতত্বং চ বাতস্যাপি স্থিতস্য বাহ্যহেতুপ্রচুরীভূতেনাপরেণ বাতেন সম্ভবতি||৫১-৫২||

Adhikarana 28 (53) · Śloka 53

অহোরাত্রাদহোরাত্রাত্ স্থানাত্ স্থানং প্রপদ্যতে | ততশ্চামাশযং প্রাপ্য দোষঃ কুর্যাজ্জ্বরং নৃণাম্ ||৫৩||

যথা উরআদিস্থিতো দোষোঽন্যেদ্যুষ্কাদীন্ করোতি তথাঽঽহ- অহোরাত্রাদিত্যাদি| অহোরাত্রাদুরঃস্থো দোষ আমাশযং প্রাপ্য অন্যেদ্যুষ্কং করোতি অন্যস্মিন্ দিবসে, কণ্ঠস্থিতো দ্বাভ্যামহোরাত্রাভ্যাং তৃতীযকং তৃতীযদিবসে, শিরঃস্থিতঃ স্থানত্রযমতিক্রম্য চতুর্থকং চতুর্থদিবসে, সন্ধিষু স্থিতো নিত্যমেব প্রলেপকং করোতি, স চ রাজযক্ষ্মিণামেব||৫৩||

Adhikarana 29 (54) · Śloka 54

তথা প্রলেপকো জ্ঞেযঃ শোষিণাং প্রাণনাশনঃ | দুশ্চিকিত্স্যতমো মন্দঃ সুকষ্টো ধাতুশোষকৃত্ ||৫৪||

প্রলেপকলক্ষণমাহ- তথা প্রলেপকো জ্ঞেয ইত্যাদি| দুশ্চিকিত্স্যতম ইতি হেতুভাবেন সন্নিপাতাত্মকত্বাত্| মন্দো মন্দবেগঃ| সুকষ্ট ইতি হেতুফলভাবেন মারণাত্মকত্বাত্||৫৪||

Adhikarana 30 (55) · Śloka 55

কফস্থানেষু বা দোষস্তিষ্ঠন্ দ্বিত্রিচতুর্ষু বা | বিপর্যযাখ্যান্ কুরুতে বিষমান্ কৃচ্ছ্রসাধনান্ ||৫৫||

বিষমজ্বরানভিধায তদ্বিপর্যযজ্বরানাহ- কফস্থানেষ্বিত্যাদি| কফস্থানযোর্দ্বযোরুরআমাশযযোস্তিষ্ঠন্ দোষোঽন্যেদ্যুষ্কবিপর্যযং করোতি; কস্তদ্বিপর্যযঃ? অহোরাত্রে পূর্বাহ্ণাদীনামেককালং মুক্ত্বা সমস্তাহোরাত্রং ভবতীতি | এবং ত্রিষু কফস্থানেষু কণ্ঠোরআমাশযেষু তিষ্ঠন্ দোষস্তৃতীযকবিপর্যযং করোতি, যস্তৃতীযদিনে বিমুঞ্চতি| চতুর্ষু কফস্থানেষু শিরঃকণ্ঠোরআমাশযেষু তিষ্ঠন্ দোষশ্চতুর্থকবিপর্যযং করোতি, স চতুর্থেঽহ্নি মুঞ্চতীতি| সততস্য তু বিপর্যযো ন ভবতি, একস্মিন্নেব কফস্থানে স্থিতেন দোষেণ তত্করণাদ্ ব্যাধিস্বভাবাদ্বা| কফস্থানেষু বা দোষ ইত্যত্র দোষশব্দঃ পৃথগ্দ্বন্দ্বসমস্তদোষপ্রতিপাদকঃ|| ৫৫||

Adhikarana 31 (56) · Śloka 56

পরো হেতুঃ স্বভাবো বা বিষমে কৈশ্চিদীরিতঃ | আগন্তুশ্চানুবন্ধো হি প্রাযশো বিষমজ্বরে ||৫৬||

বিষমজ্বরাণাং নিযতৈককালাগমনে একীযমতেন হেতুমাহ- পর ইত্যাদি| পরো ভূতাদিঃ, হেতুঃ কারণং, স্বভাবো বেতি বিষমজ্বরে হেতুরিত্যর্থঃ| অন্যে তু বিষমজ্বরে স্বভাবো বা পর উত্কৃষ্টো হেতুঃ কৈশ্চিদাচার্যৈরীরিত ইতি ব্যাখ্যানযন্তি| বিষমজ্বরে ভূতাদির্হেতুরুক্তস্তস্য সমর্থনমাহ- আগন্তুরিত্যাদি| প্রাযশো বাহুল্যেন, আগন্তুঃ ভূতাদিঃ, অনুবন্ধঃ কারণং, হীতি যস্মাদর্থে||৫৬||

Adhikarana 32 (57-58) · Śloka 58

বাতাধিকত্বাত্ প্রবদন্তি তজ্জ্ঞাস্তৃতীযকং চাপি চতুর্থকং চ | ঔপত্যকে মদ্যসমুদ্ভবে চ হেতুং জ্বরে পিত্তকৃতং বদন্তি ||৫৭|| প্রলেপকং বাতবলাসকং চ কফাধিকত্বেন বদন্তি তজ্জ্ঞাঃ | মূর্চ্ছানুবন্ধা বিষমজ্বরা যে প্রাযেণ তে দ্বন্দ্বসমুত্থিতাস্তু ||৫৮||

ইদানীমুক্তানামন্যেষাং চারম্ভকদোষকথনাযাহ- বাতেত্যাদি| যদ্যপি তন্ত্রান্তরে ‘কফপিত্তাত্ত্রিকগ্রাহী’ ইত্যাদিনা তৃতীযচতুর্থকযোর্দ্বন্দ্বদোষসমুদ্ভবত্বং প্রতিপাদিতং, তথাঽপি স্বতন্ত্রে পিত্তশ্লেষ্মলিঙ্গত্বেঽপি তযোর্বাতাধিকত্বং জ্ঞেযম্| ঔপত্যকে পর্বতাসন্নভূমিসমুদ্ভবে জ্বরে| পিত্তকৃতমিতি তত্র ঔপত্যকমদ্যসমুদ্ভবযোঃ পিত্তং কারণং হেতুং বদন্তি; তত্র ঔপত্যকে জ্বরে পর্বতাসন্নভূমিস্থিতানাং তীক্ষ্ণোষ্ণবীর্যাণমুগ্রগন্ধানামৌষধীনাং পিত্তকারিত্বং, মদ্যসমুদ্ভবে তু মদ্যমেব পিত্তকারী হেতুঃ| অন্যে তু ‘ঔপত্যপানাত্যযসম্প্রভূতে হেতুং জ্বরে পিত্তমুদাহরন্তি’ ইতি পঠন্তি| প্রলেপকে যদ্যপি বাযুরেব প্রেরযিতা, তথাঽপি সন্ধীনাং শ্লেষ্মস্থানত্বাচ্ছ্লেষ্মোত্কটোঽযং, অন্যশস্ত্রোপপন্নাশ্চর্থাস্তদ্বিদ্যেভ্য এব জ্ঞাতব্যা ইতি প্রমাণাত্তন্ত্রান্তরাদ্বা বাতবলাসকো জ্ঞেযঃ| তথা চ- “নিত্যং মন্দজ্বরো রূক্ষঃ শূনঃ কৃচ্ছ্রেণ সিধ্যতি| স্তব্ধাঙ্গঃ শ্লেষ্মভূযিষ্ঠো নরো বাতবলাসকী ”- ইতি| মূর্চ্ছানুবন্ধা ইত্যাদি| মূর্চ্ছানুবন্ধাঃ সততমূর্চ্ছা যে বিষমজ্বরাস্তে প্রাযেণ দ্বন্দ্বসমুচ্ছ্রিতাঃ; এবংবিধাস্তে বিষমা দুশ্চিকিত্স্যাশ্চ ভবন্তি| ‘মুঞ্চানুবন্ধা’ ইত্যেকে পঠন্তি; তত্র মুঞ্চন্তি অনুবধ্নন্তি যে তে মুঞ্চানুবন্ধাঃ সততকাদযঃ সবিপর্যযাঃ| কেচিত্ ‘মুক্ত্বাঽনুবন্ধান্’ ইতি পঠন্তি; তত্র, অনুবন্ধান্ অনুবন্ধজ্বরানেব বিষমান্ মুক্ত্বা যেঽন্যে বিষমজ্বরাস্তে দ্বন্দ্বসমুত্থিতা ইতি| অন্যে তু ব্যাখ্যানযন্তি- অনুবন্ধানুপদ্রবজ্বরান্মুক্ত্বা যেঽন্যে মৌলাঃ সততকাদযো বিষমজ্বরত্বেনাভিমতাস্তে প্রাযেণ দ্বন্দ্বসমুত্থিতাঃ; প্রাযোগ্রহণাত্ পৃথক্সমস্তৈশ্চ জন্যন্তে ইতি||৫৭-৫৮||

Adhikarana 33 (59-61) · Śloka 61

ত্বক্স্থৌ শ্লেষ্মানিলৌ শীতমাদৌ জনযতো জ্বরে | তযোঃ প্রশান্তযোঃ পিত্তমন্তে দাহং করোতি চ ||৫৯|| করোত্যাদৌ তথা পিত্তং ত্বক্স্থং দাহমতীব চ | প্রশান্তে কুরুতস্তস্মিংশ্ছীতমন্তে চ তাবপি ||৬০|| দ্বাবেতৌ দাহশীতাদী জ্বরৌ সংসর্গজৌ স্মৃতৌ | দাহপূর্বস্তযোঃ কষ্টঃ কৃচ্ছ্রসাধ্যশ্চ স স্মৃতঃ ||৬১||

অতঃ পরং সততাদীনাং শীতদাহপূর্বত্বেন দ্বৈবিধ্যমাহ- ত্বক্স্থাবিত্যাদি| তযোঃ শ্লেষ্মানিলযোঃ, প্রশান্তযোঃ স্বকালাপগমাত্ প্রত্যনীকপ্রাপ্ত্যা বা| অন্তে দাহং করোতি চেত্যত্র চকারাত্ মোহমূর্চ্ছাদযঃ| তস্মিন্ পিত্তে| তাবপি শ্লেষ্মানিলৌ; অপিশব্দাত্ বমথুতন্দ্রাদযঃ| যদ্যপ্যেতৌ জ্বরৌ দোষত্রযজৌ তথাঽপ্যত্র দোষদ্বযোক্ত্যা সংসর্গজাবিত্যুক্তং, এককার্যকরত্বাত্কফবাতযোরেকেন ব্যপদেশাদ্বেত্যন্যে| দ্বযোঃ দাহপূর্বশীতপূর্বকযোঃ| কষ্টঃ কৃচ্ছ্রসাধ্য ইতি বিশেষণদ্বযোপাদানাদত্যর্থং দুঃসাধ্যত্বং দর্শিতং; দাহপূর্বোঽত্যন্তকষ্টসাধ্যঃ, শীতপূর্বঃ সুখসাধ্য ইতি কুতঃ? রোগশক্তেরচিন্ত্যত্বাত্||৫৯-৬১||

Adhikarana 34 (62) · Śloka 62

প্রসক্তশ্চাভিঘাতোত্থশ্চেতনাপ্রভবস্তু যঃ |৬২|

অভিঘাতকামাদিজযোরপ্যত্যন্তকষ্টত্বং দর্শযন্নাহ- প্রসক্ত ইত্যাদি| প্রসক্তঃ প্রকর্ষেণ সঙ্গী, এতচ্চাভিঘাতোত্থচেতনাপ্রভবজ্বরযোর্বিশেষণম্| অভিঘাতোত্থঃ কাষ্ঠলোষ্টাদ্যভিঘাতজঃ| চেতনাপ্রভবঃ কামাদিজঃ|৬২|-

Adhikarana 35 (62) · Śloka 63

রাত্র্যহ্নোঃ ষট্সু কালেষু কীর্তিতেষু যথা পুরা ||৬২|| প্রসহ্য বিষমোঽভ্যেতি মানবং বহুধা জ্বরঃ |৬৩|

ইদানীং সততাদীনাং স্বকালেষূদ্গমং দর্শযতি- রাত্র্যহ্নোরিত্যাদি| ষট্সু কালেষু পূর্বাহ্ণমধ্যাহ্নাপরাহ্ণপ্রদোষার্ধরাত্রপ্রত্যূষেষু, কীর্তিতেষু কথিতেষু, যথা পুরা যেন প্রকারেণ পূর্বং ব্রণপ্রশ্নাধ্যাযে| তত্র পূর্বাহ্ণপ্রদোষযোঃ কফস্য, মধ্যাহ্নার্ধরাত্রযোঃ পিত্তস্য, অপরাহ্ণপ্রত্যূষযোর্বাতস্য প্রকোপ ইতি; এবং পূর্বোক্তকথিতেষু স্বস্বদোষপ্রকোপকালেষু প্রসহ্য হঠাদ্বিষমো জ্বরোঽভ্যেতি অভি সমন্ততো ব্যাপ্য মানবমাগচ্ছতি| বহুধেতি অহোরাত্রে কালদ্বযং, এককালং, একদিনানন্তরং, দ্বিদিনানন্তরং; অন্যে তু ব্যাখ্যানযন্তি- বহুধা কদাচিচ্ছীতঃ, কদাচিদুষ্ণঃ, কদাচিদ্ধস্তপাদযোঃ, কদাচিদংসাদ্যবযবেষু, নিযতকালং, চিরকালমল্পকালং চেতি| এতেন বিষমজ্বরাণামানন্ত্যমুক্তম্||৬২||-

Adhikarana 36 (63-64) · Śloka 64

স চাপি বিষমো দেহং ন কদাচিদ্বিমুঞ্চতি ||৬৩|| গ্লানিগৌরবকার্শ্যেভ্যঃ স যস্মান্ন প্রমুচ্যতে | বেগে তু সমতিক্রান্তে গতোঽযমিতি লক্ষ্যতে ||৬৪||

বিষমজ্বরাণামুপশান্তবেগানামপি দেহাবস্থানং দর্শযতি- স চাপীত্যাদি| বিষমো বিষমজ্বরঃ| সমাহারত্বেন কার্শ্যাদিতি সিদ্ধে যত্ কার্শ্যেভ্য ইতি বহুবচনং তেন লক্ষণান্তরমপি গৃহ্যতে| তথা চ- “শিরসো গৌরবং গ্লানির্নাতিশ্রদ্ধা চ ভোজনে| মাধুর্যমথ বৈরস্যং তিক্তত্বমথবা পুনঃ| বক্ত্রস্য জাযতে যস্মাত্ প্রবেগেঽপি গতে সতি| তস্মাত্তু নিযতো লীনঃ শরীরে বিষমজ্বরঃ”- ইতি||৬৩-৬৪||

Adhikarana 37 (65) · Śloka 65

ধাত্বন্তরস্থো লীনত্বান্ন সৌক্ষ্ম্যাদুপলভ্যতে | অল্পদোষেন্ধনঃ ক্ষীণঃ ক্ষীণেন্ধন ইবানলঃ ||৬৫||

যদি বেগাপগমেঽপি ন বিমুচ্যতে তর্হি কিমিতি নোপলভ্যত ইত্যাহ- ধাত্বন্তরস্থো লীনত্বাদিত্যাদি| একস্মাদ্ধাতোরন্যো ধাতুঃ ধাত্বন্তরং তত্রস্থঃ, অন্যে তু ধাত্বন্তরশব্দেন সপ্ত কলাঃ কথযন্তি| লীনত্বাদেকদেশস্থিতত্বাত্| সূক্ষ্মত্বাত্ অণুত্বাত্| অল্পদোষেত্যাদি অল্পদোষ ইব ইন্ধনত্বেন ক্ষীণোঽল্পীভূতো জ্বরঃ; ‘অল্পদোষা এব ইন্ধনং যস্য স অল্পদোষেন্ধনঃ’ ইত্যন্যে||৬৫||

Adhikarana 38 (66) · Śloka 66

দোষোঽল্পোঽহিতসম্ভূতো জ্বরোত্সৃষ্টস্য বা পুনঃ | ধাতুমন্যতমং প্রাপ্য করোতি বিষমজ্বরম্ ||৬৬||

ইদানীং ভোজভালুকিপুষ্কলাবতপ্রভৃতীনাং শল্যতন্ত্রবিদাং মতেন বিষমজ্বরোত্পত্তিমভিধায কাযচিকিত্সাবিদামগ্নিবেশাদীনাং মতেন ধাতুস্থানৈর্দোষৈর্বিষমজ্বরাণামুত্পত্তিং দর্শযতি- দোষ ইত্যাদি| অহিতসম্ভূতঃ অপথ্যাদ্বৃদ্ধিং গতঃ| জ্বরোত্সৃষ্টস্য জ্বরমুক্তস্য, বাশব্দেন কৃশস্যেতি সমুচ্চীযতে| কৃশানামিত্যাদিনা কফস্থানবিভাগেন প্রাক্ সততাদযো দর্শিতাঃ, অত্র তু ধাত্বন্তরগতভেদেনেতি ন পুনরুক্ততা||৬৬||

Adhikarana 39 (67) · Śloka 68

সততং রসরক্তস্থঃ সোঽন্যেদ্যুঃ পিশিতাশ্রিতঃ | মেদোগতস্তৃতীযেঽহ্নি ত্বস্থিমজ্জগতঃ পুনঃ ||৬৭|| কুর্যাচ্চাতুর্থকং ঘোরমন্তকং রোগসঙ্করম্ |৬৮|

ইদানীং রসাদীনাং ধাতূনাং মধ্যে যং যং ধাতুমাশ্রিত্য যং যং দোষো যং যং বিষমজ্বরমারভতে তং তং দর্শযন্নাহ- সততং রসরক্তস্থ ইত্যাদি| রসরক্তস্থো দোষঃ সততং জ্বরং করোতি, যেঽপি ‘দোষো রক্তাশ্রযঃ প্রাযঃ করোতি সততজ্বরং’ ইতি পঠন্তি তৈরপি প্রাযোগ্রহণাদ্রসোঽঙ্গীকর্তব্যঃ, যতো রসমাদায দোষা জ্বরমাপাদযন্তি| অন্যে তু সততমিত্যত্রৈব সন্ততমিতি পঠন্তি, তত্র সন্ততমিত্যেতস্যাগ্রে সততমিতি শব্দো লুপ্তো জ্ঞেযঃ; তেন রসস্থঃ সন্ততং, রক্তস্থঃ সততমিতি ব্যাখ্যানযন্তি| কেচিত্তু সততপর্যাযং সন্ততং মন্যন্তে| সন্ততজ্বরস্য বিষমজ্বরত্বং নাস্তি, তত্সন্নিধৌ পাঠান্তরেণ ব্যাখ্যানান্তরেণ চ যদ্গ্রহণং তত্ সন্ততাপেক্ষযা সততাদীনাং বিষমত্বাদ্ বিষমত্বপ্রতিপাদনার্থং; অন্যথা কিমপেক্ষ্যৈষাং বিষমত্বং ভবেত্| স দোষঃ পিশিতাশ্রিতোঽন্যেদ্যুষ্কং কুর্যাদিতি সম্বন্ধঃ| মেদোগতো দোষস্তৃতীযেঽহ্নি কুর্যাত্ তৃতীযকং জ্বরমিতি বোদ্ধব্যম্| ঘোরং কষ্টকারিণম্| অন্তকং যমসদৃশং, মারণাত্মকত্বাচ্চিরং ক্লেশনত্বাচ্চ ||৬৭||-

Adhikarana 40 (68) · Śloka 68

কেচিদ্ভূতাভিষঙ্গোত্থং ব্রুবতে বিষমজ্বরম্ ||৬৮||

ইদানীং ধাত্বন্তরস্থদোষারব্ধত্বেঽপি সততকাদাবেকীযমতেন ভূতাভিষঙ্গং হেতুমাহ- কেচিদিত্যাদি| ভূতাভিষঙ্গো গ্রহাবেশঃ| পূর্বং দোষপ্রস্তাবে দোষোত্থিতা এব পরং বিষমজ্বরা ভূতাদিজা অপি ভবন্তীতি প্রতিপাদনার্থং ‘পরো হেতুঃ স্বভাবো বা’ ইত্যাদি পঠিতং; ইহ তু ধাত্বাশ্রিতপ্রকরণত্বাদিতি ন পৌনরুক্ত্যম্||৬৮||

Adhikarana 41 (69) · Śloka 69

সপ্তাহং বা দশাহং বা দ্বাদশাহমথাপি বা | সন্তত্যা যোঽবিসর্গী স্যাত্সন্ততঃ স নিগদ্যতে ||৬৯||

সন্নিপাতারব্ধস্য সন্ততজ্বরস্য ‘সপ্তমে দিবসে প্রাপ্তে’ ইত্যাদিনা মোক্ষবধযোরবধিমভিধাযেদানীমেকদোষজদ্বিদোষজস্য বিসর্গকালাবধিদ্বারেণ লক্ষণমাহ- সপ্তাহমিত্যাদি| সন্তত্যা নৈরন্তর্যেণ, অবিসর্গী অবিসর্জনশীলঃ| অযং চ সুখসাধ্যঃ; যদুক্তং,- “সন্ততজ্বর এবান্যঃ স্বল্পদুর্বলকারণঃ| একদোষো দ্বিদোষো বা সুখসাধ্যঃ প্রকীর্তিতঃ”- ইতি||৬৯||

Adhikarana 42 (70) · Śloka 71

অহোরাত্রে সততকো দ্বৌ কালাবনুবর্ততে | অন্যেদ্যুষ্কস্ত্বহোরাত্রাদেককালং প্রবর্ততে ||৭০|| তৃতীযকস্তৃতীযেঽহ্নি চতুর্থেঽহ্নি চতুর্থকঃ |৭১|

সততাদীনাং লক্ষণমাহ- অহোরাত্র ইত্যাদি| পূর্বাহ্ণাদীনাং কালানাং মধ্যে কালদ্বযমনুবর্ততে| এককালমিতি অন্যেদ্যুষ্কো জ্বরঃ অহোরাত্রাদন্যস্মিন্নহোরাত্রে এককালমাগচ্ছতীত্যর্থঃ| তৃতীযকস্তৃতীযেঽহ্নীত্যত্রৈককালমিতি সম্বধ্যতে| চতুর্থকশ্চতুর্থেঽহ্নীত্যত্রাপি এককালমিতি যোজ্যম্| অত্র দোষোত্কর্ষাপকর্ষাভ্যামধিককালত্বং হীনকালত্বমপি চ জ্ঞাতব্যং, নতু নিযমঃ||৭০||-

Adhikarana 43 (71-74) · Śloka 75

বাতেনোদীর্যমাণাশ্চ হ্রীযমাণাশ্চ সর্বতঃ | একদ্বিদোষা মর্ত্যানাং তস্মিন্নেবোদিতেঽহনি ||৭১|| বেলাং তামেব কুর্বন্তি জ্বরবেগে মুহুর্মুহুঃ | (বাতেনোদ্ধূযমানস্তু যথা পূর্যেত সাগরঃ ||৭২|| বাতেনোদীরিতাস্তদ্বদ্দোষাঃ কুর্বন্তি বৈ জ্বরান্ | যথা বেগাগমে বেলাং ছাদযিত্বা মহোদধেঃ ||৭৩|| বেগহানৌ তদেবাম্ভস্তত্রৈবান্তর্নিলীযতে | দোষবেগোদযে তদ্বদুদীর্যেত জ্বরোঽস্য বৈ ||৭৪|| বেগহানৌ প্রশাম্যেত যথাঽম্ভঃ সাগরে তথা) |৭৫|

ইদানীং ধাতুস্থদোষারব্ধানাং বিষমজ্বরাণামুদ্গমকালং পূর্বোক্তমেবাহ- বাতেনেত্যাদি| তস্মিন্ পূর্বে, উদিতে কথিতে বিষমজ্বরাণাং সম্বন্ধিন্যহনি দিনে, মানুষাণামেকদ্বিদোষাঃ পৃথগ্দ্বন্দ্বভাবেন স্থিতা বাতেনোত্কটীক্রিযমাণা হ্রীযমাণা আকৃষ্যমাণাশ্চ সর্বতঃ, তামেব পূর্বাহ্ণাদিকাং বেলাং জ্বরবেগবিষযে মুহুর্মুহুঃ কুর্বন্তি| ‘জ্বরবেগাত্’ ইতি কেচিত্; তত্র জ্বরবেগাদ্ধেতোস্তাং বেলাং কুর্বন্তি| কেচিদত্র ‘বাতেনোদ্ধূযমানাস্তু’ ইত্যাদিকং যাবত্ ‘প্রাপ্তে প্রাপ্তে প্রবর্ততে’ ইত্যন্তং গ্রন্থপাঠং পঠন্তি; স চ উক্তার্থঃ, অতঃ সর্বৈরপি নিবন্ধকারৈঃ পরিহৃতঃ, তস্মান্ন পঠনীযঃ||৭১-৭৪||-

Adhikarana 44 (75) · Śloka 76

বিবিধেনাভিঘাতেন জ্বরো যঃ সম্প্রবর্ততে ||৭৫|| যথাদোষপ্রকোপং তু তথা মন্যেত তং জ্বরম্ |৭৬|

ইদানীং বাতাদিকৃতান্ সপ্তজ্বরানভিধায আগন্তুজ্বরমনেকমেদভিন্নং দর্শযন্নাহ- বিবিধেনাভিঘাতেনেত্যাদি| বিবিধেনেতি শস্ত্রলোষ্টকাষ্ঠাদিনা, দোষপ্রকোপজত্বেঽপি আদ্যনিমিত্তেন ব্যপদেশাদভিঘাতজ ইত্যুচ্যতে||৭৫||-

Adhikarana 45 (76-79) · Śloka 80

শ্যাবাস্যতা বিষকৃতে দাহাতীসারহৃদ্গ্রহাঃ ||৭৬|| অভক্তরুক্ পিপাসা চ তোদো মূর্চ্ছা বলক্ষযঃ | ওষধীগন্ধজে মূর্চ্ছা শিরোরুক্ বমথুঃ ক্ষবঃ ||৭৭|| কামজে চিত্তবিভ্রংশস্তন্দ্রাঽঽলস্যমরোচকঃ | হৃদযে বেদনা চাস্য গাত্রং চ পরিশুষ্যতি ||৭৮|| ভযাত্ প্রলাপঃ শোকাচ্চ ভবেত্ কোপাচ্চ বেপথুঃ | অভিচারাভিশাপাভ্যাং মোহস্তৃষ্ণা চ জাযতে ||৭৯|| ভূতাভিষঙ্গাদুদ্বেগহাস্যকম্পনরোদনম্ |৮০|

কেষুচিদ্বিশিষ্টেষু নিমিত্তেষু বৈশেষিকং লক্ষণমাহ- শ্যাবাস্যতেত্যাদি| বিষস্য ত্রিদোষকরত্বেঽপ্যত্যন্তপিত্তকরত্বাত্ শ্যাবাস্যতা স্যাত্| অভক্তরুক্ অরোচকঃ| ঔষধিগন্ধজে মূর্চ্ছেত্যাদি| বমথুঃ ছর্দিঃ, ক্ষবঃ ছিক্কা| কামজে ইত্যাদি| চিত্তবিভ্রংশঃ কিঙ্কর্তব্যতামূঢত্বম্| ভযাদিত্যাদি| প্রলাপঃ অসম্বদ্ধভাষণং; যদ্যপি প্রলাপ ইতি সামান্যং লক্ষণং তথাঽপি নিদানাদিভিঃ কৃত্বা বিশেষো জ্ঞাতব্য ইতি| বেপথুঃ কম্পঃ| অভিচারেত্যাদি| অভিচারো মন্ত্রাদিভির্মারণপ্রযোগঃ, অভিশাপো ব্রহ্মর্ষিগুরুসিদ্ধানামাক্রোশঃ| ভূতাভিষঙ্গাদিত্যাদি| ভূতানাং দেবাদিগ্রহাণামভি সমন্ততো ভাবেন সঙ্গো ভূতাভিষঙ্গঃ| উদ্বেগ উদ্বিগ্নচিত্ততা||৭৬-৭৯||-

Adhikarana 46 (80) · Śloka 81

শ্রমক্ষযাভিঘাতেভ্যো দেহিনাং কুপিতোঽনিলঃ ||৮০|| পূরযিত্বাঽখিলং দেহং জ্বরমাপাদযেদ্ভৃশম্ |৮১|

শ্রমাদিজানাং জ্বরাণাং সম্প্রাপ্তিদ্বারেণ লক্ষণমাহ- শ্রমেত্যাদি| পূরযিত্বা ব্যাপ্য||৮০||-

Adhikarana 47 (81-82) · Śloka 82

রোগাণাং তু সমুত্থানাদ্বিদাহাগন্তুতস্তথা ||৮১|| জ্বরোঽপরঃ সম্ভবতি তৈস্তৈরন্যৈশ্চ হেতুভিঃ | দোষাণাং স তু লিঙ্গানি কদাচিন্নাতিবর্ততে ||৮২||

ইদানীমন্যথাঽঽগন্তুজ্বরং বিবক্ষুরাহ- রোগাণামিত্যাদি| রোগাণাং বিদ্রধ্যাদীনাং; বিদাহাগন্তুতস্তথেতি বিদাহতঃ পাকাত্ তেষামেব, আগন্তুতঃ অভিঘাতাত্, অপক্ববিদ্রধ্যাদিপাটনাদিত্যর্থঃ; অন্যে তু বিদাহতঃ সামান্যসন্তাপাত্, আগন্তুতঃ সামান্যাভিঘাতাদিভিরিতি ব্যাখ্যানযন্তি| জ্বরোঽপরোঽন্যঃ, ভেদাত্| তৈস্তৈরন্যৈশ্চ হেতুভিরিতি বিদ্রধ্যাদিসমুত্থানাত্ প্রাগুক্তৈরন্যৈশ্চ জ্বরকারিভির্হেতুভিঃ| স ত্বিতি স পুনর্জ্বরো হেতুভেদাদ্ভিন্নোঽপি বাতাদীনাং লিঙ্গানি নাতিবর্ততে ন পরিত্যজ্য যাতি||৮১-৮২||

Adhikarana 48 (83-89) · Śloka 90

গুরুতা হৃদযোত্ক্লেশঃ সদনং ছর্দ্যরোচকৌ | রসস্থে তু জ্বরে লিঙ্গং দৈন্যং চাস্যোপজাযতে ||৮৩|| রক্তনিষ্ঠীবনং দাহঃ স্বেদশ্ছর্দনবিভ্রমৌ | প্রলাপঃ পিটিকা তৃষ্ণা রক্তপ্রাপ্তে জ্বরে নৃণাম্ ||৮৪|| পিণ্ডিকোদ্বেষ্টনং তৃষ্ণা সৃষ্টমূত্রপুরীষতা | ঊষ্মাঽন্তর্দাহবিক্ষেপৌ গ্লানিঃ স্যান্মাংসগে জ্বরে ||৮৫|| ভৃশং স্বেদস্তৃষা মূর্চ্ছা প্রলাপশ্ছর্দিরেব চ | দৌর্গন্ধ্যারোচকৌ গ্লানির্মেদঃস্থে চাসহিষ্ণুতা ||৮৬|| ভেদোঽস্থ্নাং কুঞ্চ(জ)নং শ্বাসো বিরেকশ্ছর্দিরেব চ | বিক্ষেপণং চ গাত্রাণামেতদস্থিগতে জ্বরে ||৮৭|| তমঃপ্রবেশনং হিক্কা কাসঃ শৈত্যং বমিস্তথা | অন্তর্দাহো মহাশ্বাসো মর্মচ্ছেদশ্চ মজ্জগে | মরণং প্রাপ্নুযাত্তত্র শুক্রস্থানগতে জ্বরে ||৮৮|| শেফসঃ স্তব্ধতা মোক্ষঃ শুক্রস্য তু বিশেষতঃ | দগ্ধ্বেন্ধনং যথা বহ্নির্ধাতূন্ হত্বা যথা বিষম্ ||৮৯|| কৃতকৃত্যো ব্রজেচ্ছান্তিং দেহং হত্বা তথা জ্বরঃ |৯০|

কেচিদত্র রসাদিধাতুগতজ্বরস্য লক্ষণং পঠন্তি- “রসস্থে তু জ্বরে বত্স! লক্ষণানি নিবোধ মে| গুরুত্বং দৈন্যমুত্ক্লেশঃ সদনং ছর্দ্যরোচকৌ|| রাগোষ্ণপিটিকাস্তৃষ্ণা সরক্তং ষ্ঠীবনং ভ্রমঃ| দাহো মূর্চ্ছাঽরুচিশ্ছর্দিঃ প্রলাপো রক্তসংস্থিতে|| পিণ্ডিকোদ্বেষ্টনং তৃষ্ণা সৃষ্টমূত্রপুরীষতা| ঊষ্মাঽন্তর্মোহবিক্ষেপৌ গ্লানিঃ স্যান্মাংসগে জ্বরে|| বেগস্তীব্রঃ পিপাসা চ মূর্চ্ছা ছর্দিঃ প্রলাপকঃ| গন্ধস্য চাসহত্বং চ মেদঃস্থে গ্লান্যরোচকৌ|| বিরেকবমনে চোভে ত্বস্থিভেদঃ প্রকূজনম্| বিক্ষেপণং চ গাত্রাণাং শ্বাসশ্চাস্থিগতে জ্বরে|| হিক্কা কাসো মহাশ্বাসস্তমসশ্চ প্রবেশনম্| মর্মচ্ছেদো বহিঃ শৈত্যং দাহোঽন্তশ্চৈব মজ্জগে|| তস্মান্মরণমাপ্নোতি শুক্রস্যাপ্যুপসর্পণে| শেফসঃ স্তব্ধতা মোক্ষঃ শুক্রস্য তু বিশেষতঃ”- ইতি| এতচ্চ ন পঠনীযম্| কুতঃ? যতঃ সর্বশরীরং সন্ততেন ব্যাপ্তং, সততাদিভিশ্চ রসাদিধাতব ইতি কুতোঽপরো রসাদিধাতুগতজ্বরাবকাশ ইতি রসাদিস্থজ্বরাণাং পাঠো ন পঠনীয এবেতি জেজ্জটাচার্যাভিমতম্| শ্রীগযদাসাচার্যেণ চাযং পাঠোঽন্যাদৃশঃ পঠিতো ব্যাখ্যাতশ্চ, তন্মতানুসারিভিরস্মাভিরপি পঠ্যতে ব্যাখ্যাযতে চ- গুরুতেত্যাদি| গুরুতা গাত্রাণাম্| সদনং চ গাত্রাণামেব| দৈন্যং গ্লানিঃ| অস্যেতি প্রাণিনঃ| যদ্যপি রসৈকধাতুপ্রাপ্ত্যা সন্তত এবাযং তথাঽপ্যনুক্তধাত্বাশ্রিতলক্ষণকথনার্থমত্র নির্দেশঃ| রক্তেত্যাদি| মোহো বিগতচিত্ততা| পিণ্ডিকেত্যাদি| পিণ্ডিকোদ্বেষ্টনং জঙ্ঘাক্রোডে জানুনোঽধোভাগে পীডা| ঊষ্মাঽন্তঃ অন্তর্দাহঃ| বিক্ষেপঃ অঙ্গবিক্ষেপঃ| ভৃশমিত্যাদি| অসহিষ্ণুতা ক্রোধনত্বং, কেচিত্তু স্বগন্ধস্যাসহিষ্ণুত্বমিতি মন্যন্তে| কুঞ্চনং সঙ্কোচঃ, স চ সান্নিধ্যাদস্থ্নামিত্যনেন সম্বধ্যতে| তম ইত্যাদি| তমঃপ্রবেশনম্ অন্ধকারদর্শনম্| মহাশ্বাসো বক্ষ্যমাণলক্ষণঃ| মর্মচ্ছেদশ্চেতি হৃদযস্য ছেদনমিব| শুক্রস্থানগত ইতি| ননু শুক্রগে জ্বরে মরণমিত্যুক্তং তন্ন, শুক্রং সর্বদেহগতং ততশ্চ রসাদিধাত্বাভিভবেনাপি শুক্রপ্রাপ্তেস্তদ্গতেঽপি মরণমিতি| নৈবং, সর্বশরীরস্থস্যাপি শুক্রস্য কলান্তরিতত্বেন ত্বচাং ক্রমেণ মর্মপ্রাপ্তেঃ| যদ্যেবমনুক্রমাদেব শুক্রং জ্বরেণ কথং প্রাপ্যত ইতি চেত্? ধাত্বন্তরানতিক্রম্য শুক্রমার্গগমনদিতি| শুক্রগতো জ্বরোঽপরব্যাপারাভাবাদ্দেহঘাতেনৈবোপশাম্যতীতি দর্শযতি- দগ্ধ্বেত্যাদি| মৃতশরীরে ঊষ্মাভাবাজ্জ্বরোপশমো জ্ঞাযতে, বিষাক্তকাণ্ডবিদ্ধসর্পদষ্টমৃগাদের্মরণাদ্বিষোপশান্তিঃ প্রতীযতে||৮৩-৮৯||-

Adhikarana 49 (90-91) · Śloka 92

বাতপিত্তকফোত্থানাং জ্বরাণাং লক্ষণং যথা ||৯০|| তথা তেষাং ভিষগ্ব্রূযাদ্রসাদিষ্বপি বুদ্ধিমান্ | সমস্তৈঃ সন্নিপাতেন ধাতুস্থমপি নির্দিশেত্ ||৯১|| দ্বন্দ্বজং দ্বন্দ্বজৈরেব দোষৈশ্চাপি বদেত্ কৃতম্ |৯২|

ইদানীং ধাতুগতানামপি জ্বরাণামুক্তৈরেব বাতাদিজ্বরলক্ষণৈর্দোষাত্মকত্বেনাবগম ইতি দর্শযতি- বাতেত্যাদি| যথা যেন প্রকারেণ তেষাং বাতাদিজ্বরাণাং রসাদিষু সপ্তসু ধাতুষু গতানাং লক্ষণং বুদ্ধিমান্ ভিষক্ ব্রূযাদিতি সম্বন্ধঃ| সমস্তৈঃ দোষলক্ষণৈঃ দ্বন্দ্বজং জ্বরং, দ্বন্দ্বজৈরেবেতি দ্বিদোষজনিতৈঃ| দোষৈশ্চাপীতি দোষলক্ষণৈঃ ধাতুস্থং বদেদিতি||৯০-৯১||-

Adhikarana 50 (92) · Śloka 93

গম্ভীরস্তু জ্বরো জ্ঞেযো হ্যন্তর্দাহেন তৃষ্ণযা ||৯২|| আনদ্ধত্বেন চাত্যর্থং শ্বাসকাসোদ্গমেন চ |৯৩|

গম্ভীর ইত্যাদি| আনদ্ধত্বেন দোষপুরীষবিবন্ধেন| আনদ্ধত্বেন চেত্যত্র চকারাত্ প্রলাপভ্রমসন্ধ্যস্থিশূলাদিপরিগ্রহঃ; এতদ্বিপর্যযেণান্যে জ্বরা জ্ঞেযাঃ||৯২||-

Adhikarana 51 (93) · Śloka 94

হতপ্রভেন্দ্রিযং ক্ষীণমরোচকনিপীডিতম্ ||৯৩|| গম্ভীরতীক্ষ্ণবেগার্তং জ্বরিতং পরিবর্জযেত্ |৯৪|

গম্ভীরজ্বরস্যাসাধ্যত্বমাহ- হতেত্যাদি| হতপ্রমেন্দ্রিযং হতশরীরদীপ্তিং তথা হতশ্রোত্রচক্ষুরাদিশক্তিকম্| অন্যে প্রভাশব্দেন ইন্দ্রিযশক্তিং বদন্তি; তেন হতেন্দ্রিযশক্তিকমিত্যর্থঃ| গম্ভীর ইব গম্ভীরোঽন্তর্বেগঃ, তীক্ষ্ণোঽতিদুঃসহো বহিরন্তশ্চ বেগঃ, তাভ্যামন্যোন্যমার্তং পীডিতং; এতেন ক্ষীণং গম্ভীরার্তং বিবর্জযেত্, তীক্ষ্ণবেগার্তং চ ক্ষীণমিতি| ‘অরোচকনিপীডিতং’ ইত্যত্র ‘দুরাত্মানমুপদ্রুতং’ ইতি তথা ‘উপদ্রবনিপীডিতং’ ইতি চ কেচিত্ পঠন্তি| দুরাত্মানং দুঃখিতান্তঃকরণং, উপদ্রুতং জ্বরোপদ্রবৈঃ| ‘অপরে দুরাত্মভিরুপদ্রুতম্’ ইতি পঠন্তি, তত্র প্রেতভূতপিশাচরক্ষোভিঃ পীডিতম্||৯৩||-

Adhikarana 52 (94) · Śloka 95

হীনমধ্যাধিকৈর্দোষৈস্ত্রিসপ্তদ্বাদশাহিকঃ ||৯৪|| জ্বরবেগো ভবেত্তীব্রো যথাপূর্বং সুখক্রিযঃ |৯৫|

অতোঽনন্তরং তীক্ষ্ণবেগস্য সুখক্রিযত্বমাহ- হীনেত্যাদি| হীনৈর্দোষৈস্ত্র্যহং সুখক্রিযস্তীক্ষ্ণবেগঃ, মধ্যৈঃ সপ্তাহং, অধিকৈর্দ্বাদশাহানীতি| অত্র হীনমধ্যত্বং বৃদ্ধাপেক্ষযা| যথাপূর্বং সুখক্রিযা ইতি দ্বাদশাহিকাত্তীক্ষ্ণবেগাত্ সপ্তাহিকঃ সুচিকিত্স্যঃ, সপ্তাহিকাত্তীক্ষ্ণবেগাত্ ত্র্যাহিকঃ সুচিকিত্স্যঃ| হীনমধ্যাধিকৈর্দোষৈস্ত্রিসপ্তদ্বাদশাহিক ইতি যদুক্তং তদবধিমাত্রদ্যোতকং; তেন দোষতারতম্যাদ্দোষভেদানামানন্ত্যাদুক্তাবধের্ন্যূনো ন্যূনতরো ন্যূনতমো, অধিকোঽধিকতরোঽধিকতমোঽপ্যবধির্বোদ্ধব্যঃ||৯৪||-

Adhikarana 53 (95-96) · Śloka 96

কালো হ্যোষ যমশ্চৈব নিযতির্মৃত্যুরেব চ ||৯৫|| তস্মিন্ ব্যপগতে দেহাজ্জন্মেহ পুনরুচ্যতে | ইতি জ্বরাঃ সমাখ্যাতাঃ কর্মেদানীং প্রবক্ষ্যতে ||৯৬||

ইদানীং কালনামভির্বিশেষণৈর্মারণাত্মকত্বং জ্বরস্য সূচযন্ তন্মুক্তস্য পুনর্জন্ম প্রতিপাদযতি- কাল ইত্যাদি| ইতিশব্দো নিদানপরিসমাপ্তৌ| কর্মেত্যাদি| কর্মচিকিত্সা||৯৫-৯৬||

Adhikarana 54 (97-98) · Śloka 98

জ্বরস্য পূর্বরূপেষু বর্তমানেষু বুদ্ধিমান্ | পাযযেত ঘৃতং স্বচ্ছং ততঃ স লভতে সুখম্ ||৯৭|| বিধির্মারুতজেষ্বেষ, পৈত্তিকেষু বিরেচনম্ | মৃদু, প্রচ্ছর্দনং তদ্বত্কফজেষু বিধীযতে ||৯৮||

জ্বরস্যেত্যাদি| জ্বরস্যেতি নিরামবাতজনিতস্য| ঘৃতং পুরাণং, তস্য কালদিসংস্কারেণ বিশেষগুণকারিত্বাত্| স্বচ্ছং সুষ্ঠু অচ্ছং কেবলং, স্বচ্ছবচনাদ্দ্রব্যান্তযোগো নিষিধ্যতে, ন তু সংস্কারঃ পাকেন কালেন চ| মারুতজেষু শ্রমক্ষযাদিকুপিতবাতজ্বরপূর্বরূপেষু, নত্বামাশযানুপূর্ব্যোত্পন্নেষু সামবাতজ্বরপূর্বরূপেষু| অত এব বুদ্ধিমান্ পাযযেদিত্যুক্তম্| এষ সর্পিঃপানবিধিঃ| সুখমিতি তাবদচ্ছং কেবলং ঘৃতং পাতব্যং যাবত্ সুখং প্রাপ্নোতি, তদনন্তরং লঘুভোজনাদি| পৈত্তিকেষু পিত্তজ্বরপূর্বরূপেষু| মৃদু অতীক্ষ্ণম্| তদ্বন্মৃদু| কফজেষু কফজ্বরপূর্বরূপেষু||৯৭-৯৮||

Adhikarana 55 (99) · Śloka 99

সর্বদ্বিদোষজেষূক্তং যথাদোষং বিকল্পযেত্ |৯৯|

সর্বেত্যাদি| সর্বেষু সন্নিপাতজ্বরপূর্বরূপেষু, দ্বিদোষজেষু দ্বন্দ্বজ্বরপূর্বরূপেষু; উক্তং যথাদোষং সর্পিঃপানাদিকং, বিকল্পযেত্ অবধারযেত্|৯৯|-

Adhikarana 56 (99) · Śloka 99

অস্নেহনীযোঽশোধ্যশ্চ সংযোজ্যো লঙ্ঘনাদিনা ||৯৯||

ইদানীং ঘৃতাদ্যনর্হস্য জ্বরপূর্বরূপে কিং বিধেযমিত্যাহ- অস্নেহনীয ইত্যাদি| অস্নেহনীযোঽজীর্ণী তরুণজ্বরীত্যাদিকঃ| অশোধ্যো বমনবিরেচনাযোগ্যঃ| লঙ্ঘনাদিনেত্যাদিগ্রহণাত্ ষডঙ্গাদিশৃতশীতোষ্ণোদকাদিকং গৃহ্যতে||৯৯||

Adhikarana 57 (100) · Śloka 100

রূপপ্রাগ্রূপযোর্বিদ্যান্নানাত্বং বহ্নিধূমবত্ |১০০|

অথ নবজ্বরে স্নেহসংশোধনবর্জনাত্ কথং পূর্বরূপে তদুপদেশ ইত্যাহ- রূপপ্রাগ্রূপযোরিত্যাদি| রূপপ্রাগ্রূপযোঃ নানাত্বং পৃথক্ত্বং বহ্নিধূমবত্ বিদ্যাত্; বহ্নিধূমদৃষ্টান্তেন নানাত্বমনযোর্ন ঘটপটাদিবত্, অতোঽনযোর্জ্ঞানে যত্নো বিধেযঃ|১০০|-

Adhikarana 58 (100) · Śloka 100

প্রব্যক্তরূপেষু হিতমেকান্তেনাপতর্পণম্ ||১০০||

পূর্বরূপে চিকিত্সিতমভিধায রূপে চিকিত্সিতমাহ- প্রব্যক্তরূপেষ্বিত্যাদি| একান্তেন অতিশযেন| অতর্পণমত্র উপবাসঃ, শেষাণামতর্পণভেদানামবস্থাবিশেষেণ বক্ষ্যমাণত্বাত্| তেনামাশযানুপূর্ব্যোত্পন্নেষু জ্বরেষূপবাসার্হেষু হিতমিত্যর্থঃ||১০০||

Adhikarana 59 (101) · Śloka 101

আমাশযস্থে দোষে তু সোত্ক্লেশে বমনং পরম্ |১০১|

অবস্থাবিশেষেণাপতর্পণবিশেষমাহ- আমাশযস্থে ইত্যাদি| হৃল্লাসলালাপ্রসেকাদিনা দোষোত্ক্লেশো জ্ঞেযঃ|১০১|-

Adhikarana 60 (101) · Śloka 102

আনদ্ধঃ স্তিমিতৈর্দোষৈর্যাবন্তং কালমাতুরঃ ||১০১|| কুর্যাদনশনং তাবত্ততঃ সংসর্গমাচরেত্ |১০২|

লঙ্ঘনং কিযন্তং কালং কার্যমিত্যাহ- আনদ্ধ ইত্যাদি| যাবন্তং কালমাতুরঃ স্তিমিতৈর্দোষৈরপ্রচলিতরূপৈরানদ্ধো বদ্ধ ইব ভবেত্তাবন্তং কালং লঙ্ঘযেদিতি সম্বন্ধঃ| স্তিমিতত্বং চ দোষাণামামরসাবনদ্ধত্বাত্| তত আনদ্ধত্বে নিবৃত্তে, অত্রাভিলাষে সতি, সংসর্গং পেযাদিক্রমমাচরেত্| অন্যে শ্লোকোত্তরার্ধমন্যথা পঠন্তি,- “কালং তাবন্তমশ্নীযাল্লঘ্বন্নং তু বিরিক্তবত্” ইতি| লঘ্বন্নমিতি অত্রান্নদ্রব্যকৃতং লঘ্বন্নং; বিরিক্তবদিত্যনেন মাত্রালঘুত্বম্||১০১||-

Adhikarana 61 (102) · Śloka 103

ন লঙ্ঘযেন্মারুতজে ক্ষযজে মানসে তথা ||১০২|| অলঙ্ঘ্যাশ্চাপি যে পূর্বং দ্বিব্রণীযে প্রকীর্তিতাঃ |১০৩|

উচিতস্যাপি লঙ্ঘনস্য ক্বচিন্নিষেধমাহ- ন লঙ্ঘযেদিত্যাদি| ক্ষযজে ধাতুক্ষযজে যক্ষ্মজ্বরে বা, মানসে কামক্রোধাদিসম্ভূতে| অলঙ্ঘ্যা “গর্ভিণীবৃদ্ধবালদুর্বলভীরুভিঃ ” ইত্যনেনোক্তাঃ| অন্যে তু ব্যাখ্যানযন্তি- মারুতজে জ্বরে ন লঙ্ঘযেত্; কিম্ভূতে? ক্ষযজে| এতেন ধাতুক্ষযপ্রকুপিতবাতজ ইত্যুক্তং; অথবা ক্ষযজে ন লঙ্ঘযেত্; কিম্ভূতে? মারুতজে| এতেন যক্ষ্মজ্বরে মারুতসম্ভূতে ন লঙ্ঘযেত্| (যঃ সামাবস্থাযাং মারুতজ্বরো যক্ষ্মজ্বরশ্চ স লঙ্ঘনীয এব, নিরামে মারুতজে জ্বরে ন লঙ্ঘযেত্)||১০২||-

Adhikarana 62 (103) · Śloka 104

অনবস্থিতদোষাগ্নের্লঙ্ঘনং দোষপাচনম্ ||১০৩|| জ্বরঘ্নং দীপনং কাঙ্ক্ষারুচিলাঘবকারকম্ |১০৪|

অতো লঙ্ঘনবর্ণনমাহ- অনবস্থিতদোষাগ্নেরিত্যাদি| অনবস্থিতদোষাগ্নেরিতি ‘পুরুষস্য’ ইতি শেষঃ| তত্র দোষা অনবস্থিতাঃ স্থানান্তরগমনাত্, বহ্নিশ্চানবস্থিতো বহির্বিক্ষিপ্তত্বাত্| আহারেচ্ছা হৃদি কাঙ্ক্ষা, মুখোপনীতস্যাহারস্য রসনেন্দ্রিযস্যেচ্ছা রুচিঃ||১০৩||-

Adhikarana 63 (104) · Śloka 105

সৃষ্টমারুতবিণ্মূত্রং ক্ষুত্পিপাসাঽসহং লঘুম্ ||১০৪|| প্রসন্নাত্মেন্দ্রিযং ক্ষামং নরং বিদ্যাত্ সুলঙ্ঘিতম্ |১০৫|

সম্যগ্লঙ্ঘিতলক্ষণমাহ- সৃষ্টমারুতবিণ্মূত্রমিত্যাদি| সৃষ্টমারুতবিণ্মূত্রমিতি অধঃপ্রবৃত্তবাতপুরীষমূত্রং, ক্ষুত্পিপাসাসহমিতি সম্যগ্লঙ্ঘনাদেকস্মিন্নেব কালে যে ক্ষুত্পিপাসে সমবেতে ভবতস্তে সোঢুমশক্তম্| তথা চ তন্ত্রান্তরং,- “বাতমূত্রপুরীষাণাং বিসর্গে গাত্রলাঘবে| হৃদযোদরকণ্ঠাস্যশুদ্ধৌ তন্দ্রাক্লমে গতে|| স্বেদে জাতে রুচৌ চাপি ক্ষুত্পিপাসাসহোদযে| কৃতং লঙ্ঘনমাদেশ্যং নির্ব্যথে চান্তরাত্মনি”- ইতি| লঘুম্ অঙ্গগৌরবাদিরহিতম্| আত্মা অন্তঃকরণম্| ক্ষামং সর্বাক্ষমম্| এবম্ভূতং সুলঙ্ঘিতং বিদ্যাত্||১০৪||-

Adhikarana 64 (105) · Śloka 106

বলক্ষযস্তৃষা শোষস্তন্দ্রানিদ্রাভ্রমক্লমাঃ ||১০৫|| উপদ্রবাশ্চ শ্বাসাদ্যাঃ সম্ভবন্ত্যতিলঙ্ঘনাত্ |১০৬|

অতিলঙ্ঘনলক্ষণমাহ- বলক্ষয ইত্যাদি| বলক্ষয ইতি কালজযুক্তিজসহজানাং বলানাং হানিঃ, অথবা বলক্ষয ওজঃক্ষযঃ| শোষো মুখশোষঃ| তন্দ্রা শারীরোক্তলিঙ্গা নিদ্রাভেদঃ| নিদ্রা প্রসিদ্ধা| ননু শ্লেষ্মণা নিদ্রা উত্পদ্যতে, অতিলঙ্ঘনাত্তু শ্লেষ্মক্ষযে জাতে কথং সা উত্পদ্যতে? সত্যং; নিদ্রেব নিদ্রেত্যুপমযা চেষ্টোপরমান্নিদ্রাত্বেন বিবক্ষিতা| অন্যে তু তন্দ্রানিদ্রযোর্মধ্যে অকারপ্রশ্লেষং মন্যন্তে, ততশ্চানিদ্রেতি ব্যাখ্যানযন্তি| ভ্রমঃ চক্রারূঢস্যেব ভ্রমণং, ক্লমঃ অনাযাসশ্রমঃ| আদিশব্দাত্ কাসস্বরক্ষযচ্ছর্দিহিক্কাদযঃ| তন্ত্রান্তরোক্তপর্বভেদাদীন্যতিলঙ্ঘনলক্ষণানি সুলঙ্ঘনলক্ষণোক্তপ্রসন্নাত্মেন্দ্রিযাদিবৈপরীত্যাদধিগন্তব্যানি||১০৫||-

Adhikarana 65 (106) · Śloka 107

দীপনং কফবিচ্ছেদি পিত্তবাতানুলোমনম্ ||১০৬|| কফবাতজ্বরার্তেভ্যো হিতমুষ্ণাম্বু তৃট্ছিদম্ | তদ্ধি মার্দবকৃদ্দোষস্রোতসাং ... |১০৭|

অর্ধাবশিষ্টোদকগুণমাহ- দীপনমিত্যাদি| কফবিচ্ছেদি স্ত্যানশ্লেষ্মণো বিচ্ছেদকম্| কফবাতজ্বরার্তেভ্য ইতি বহুবচননির্দেশাত্ কফজ্বরার্তবাতজ্বরার্তকফবাতজ্বরার্তেভ্যো হিতমিত্যর্থঃ| যদ্যপি পানীযবর্গে উষ্ণোদকগুণা বর্ণিতাস্তথাঽপি তত্রোক্তগুণেভ্যোঽধিকবিধানার্থমত্রোক্তাঃ| যদ্যেবং তর্হ্যেতে গুণাস্তত্রৈব কুতো ন নির্দিষ্টাঃ? স্বস্থাতুরযোপ্যুষ্ণোদকস্য হিতত্বাপাদনার্থং; তচ্চোষ্ণোদকং মার্দবকৃত্ মৃদুকারি; দোষস্রোতসাং দোষবহস্রোতসাম্, অথবা দোষাণাং স্রোতসাং মৃদুত্বং বিদধাতি| এবঙ্গুণমপ্যুষ্ণোদকং জ্বরেঽল্পং দেযমিত্যাহুরাচার্যাঃ||১০৬||-

Adhikarana 66 (107) · Śloka 108

... শীতমন্যথা ||১০৭|| সেব্যমানেন তোযেন জ্বরঃ শীতেন বর্ধতে |১০৮|

শীতোদকগুণমাহ- শীতমন্যথেত্যাদি| শীতম্ অক্বথিতম্| অন্যথা উষ্ণোদকগুণবিপরীতগুণম্| কিং শীতোদকমুষ্ণাম্বুগুণবিপরীতমেব স্যাদুতান্যত্ কিমপি কুরুত ইত্যাহ- সেব্যমানেনেত্যাদি||১০৭||-

Adhikarana 67 (108) · Śloka 109

পিত্তমদ্যবিষোত্থেষু শীতলং তিক্তকৈঃ শৃতম্ ||১০৮|| গাঙ্গেযনাগরোশীরপর্পটোদীচ্যচন্দনৈঃ |১০৯|

ইদানীং শৃতশীতস্য গুণমাহ- পিত্তেত্যাদি| পিত্তমদ্যবিষোত্থেষু জ্বরেষু তিক্তকৈঃ শৃতশীতলং জলং দেযং, কেবলং বা শৃতশীতলং জলং দেযং, তন্ত্রান্তরবচনাত্| তান্যেব তিক্তদ্রব্যাণ্যাহ- গাঙ্গেযেত্যাদি| গাঙ্গেযং মুস্তম্, উদীচ্যং বালকং, চন্দনং রক্তচন্দনম্| কল্পনোচ্যতে- গাঙ্গেযাদিসর্বদ্রব্যং কর্ষমাত্রমুদকপ্রস্থে ক্বাথ্যার্ধশৃতং কৃত্বা প্রযোক্তব্যং; বৃদ্ধবৈদ্যাস্তু গাঙ্গেযাদিসর্বদ্রব্যপলমুদকাঢকে পক্ত্বাঽর্ধাঢকমবশেষযন্তি| যদ্যপ্যতিক্তা শুণ্ঠী তথাঽপি পাচনীযত্বেন যৌগিকত্বাদস্মিন্ যোগে প্রক্ষেপঃ| তন্ত্রান্তরে তু, “কর্ষমাত্রং ততো দ্রব্যং সাধযেত্ প্রাস্থিকেঽম্ভসি| অর্ধশৃতং প্রযোক্তব্যং পানে পেযাদিসংবিধৌ”- ইতি| পঞ্জিকাকারস্তু পূর্বার্ধমেব পঠতি নোত্তরার্ধং; তিক্তকৈস্তিক্তদ্রব্যৈঃ পর্পটাদিভিরিতি চ ব্যাখ্যানযন্তি||১০৮||-

Adhikarana 68 (109) · Śloka 110

দীপনী পাচনী লঘ্বী জ্বরার্তানাং জ্বরাপহা ||১০৯|| অন্নকালে হিতা পেযা যথাস্বং পাচনৈঃ কৃতা |১১০|

দীপনীত্যাদি| অন্নকালে স্বস্থবৃত্তাভিধাস্যমানে ‘বিসৃষ্টে বিণ্মূত্রে’ ইত্যাদিকে, ‘দিনান্তে’ ইত্যন্যে| যথাস্বং পাচনৈঃ কৃতা পঞ্চমূলীপ্রভৃতিভিঃ সংস্কৃতা| অন্যে তু পাচনৈরিত্যত্র বহুবচনমাদ্যর্থে, তেন দীপনপাচনসংশমনীযাদিভিঃ সংস্কৃতেতি ব্যাখ্যানযন্তি| পুনঃ পেযাগুণাভিধানমুষ্ণোদকগুণাভিধানবত্, অতো ন পুনরুক্তিঃ||১০৯||-

Adhikarana 69 (110-111) · Śloka 112

বহুদোষস্য মন্দাগ্নেঃ সপ্তরাত্রাত্ পরং জ্বরে ||১১০|| লঙ্ঘনাম্বুযবাগূভির্যদা দোষো ন পচ্যতে | তদা তং মুখবৈরস্যতৃষ্ণারোচকনাশনৈঃ ||১১১|| কষাযৈঃ পাচনৈর্হৃদ্যৈর্জ্বরঘ্নৈঃ সমুপাচরেত্ |১১২|

কৃতলঙ্ঘনাদের্জ্বরিণো যস্যামবস্থাযাং পাচনং দেযং তামাহ- বহুদোষস্যেত্যাদি| ননু, তন্ত্রান্তরে স্বেদতিক্তকরসৌ পাচনার্থমুক্তৌ, তাবত্র কস্মান্ন নির্দিষ্টৌ? সত্যং, উষ্ণোদকবিধানেন তাবত্ কফবাতজ্বরস্য স্বেদো লব্ধঃ, ষডঙ্গকল্পনযা পানীযসংস্কারেণ চ তিক্তকরসো গৃহীত ইত্যত্র দ্বাবপি নির্দিষ্টৌ| মুখবৈরস্যতৃষ্ণারোচকনাশনৈরিতি বক্ষ্যমাণৈঃমরুত্পিত্তকফজ্বরপাচনৈঃ, বাতাদিলক্ষণত্বাদ্বদনবৈরস্যাদীনাম্| কষাযৈঃ ক্বাথৈঃ| আমদোষপাচনার্থং যবাগূঃ কথমামে প্রযুজ্যতে? সত্যং, দ্বিপ্রকারা হ্যামতা প্রভূতা অল্পা চ, তত্র প্রভূতামতাং বিহাযাল্পামতাযাং প্রযুজ্যত ইতি ন দোষঃ||১১০-১১১||-

Adhikarana 70 (112-113) · Śloka 114

পঞ্চমূলীকষাযং তু পাচনং পবনজ্বরে ||১১২|| সক্ষৌদ্রং পৈত্তিকে মুস্তকটুকেন্দ্রযবৈঃ কৃতম্ | পিপ্পল্যাদিকষাযং তু কফজে পরিপাচনম্ ||১১৩|| দ্বন্দ্বজেষু তু সংসৃষ্টং দদ্যাত্ ... |১১৪|

তান্যেব পাচনানি প্রতিদোষমাহ- পঞ্চমূলীত্যাদি| পঞ্চমূলী মহতী| অন্যে তু কফানুগে বাতজ্বরে মহতী, পিত্তানুগে চ কনীযসী, ইতি দ্বিবিধামপি পঞ্চমূলীং গৃহ্ণন্তি| সংসৃষ্টং মিশ্রম্| সন্নিপাতচিকিত্সা দ্বন্দ্বজচিকিত্সাযামেবান্তর্ভূতা, অতঃ পৃথঙ্নোক্তা||১১২-১১৩||-

Adhikarana 71 (114) · Śloka 114

... অথ বিবর্জযেত্ | পীতাম্বুর্লঙ্ঘিতো ভুক্তোঽজীর্ণী ক্ষীণঃ পিপাসিতঃ ||১১৪||

যেষাং পাচনমহিতং তানাহ- অথেত্যাদি| বিবর্জযেত্ ‘পাচনম্’ ইতি শেষঃ| পীতাম্বুঃ সদ্য এব পীতোদকঃ| লঙ্ঘিতঃ কৃতোপবাসঃ| ভুক্তঃ সদ্য এব কৃতাহারঃ| অজীর্ণী অপরিপক্বভোজনঃ||১১৪||

Adhikarana 72 (115) · Śloka 115

(তীক্ষ্ণে জ্বরে গুরৌ দেহে বিবদ্ধেষু মলেষু চ| সামদোষং বিজানীযাজ্জ্বরং পক্বমতোঽন্যথা ||) মৃদৌ জ্বরে লঘৌ দেহে প্রচলেষু মলেষু চ | পক্বং দোষং বিজানীযাজ্জ্বরে দেযং তদৌষধম্ ||১১৫||

ইদানীং পক্বদোষলক্ষণমাহ- মৃদাবিত্যাদি| তত্ বক্ষ্যমাণশমনশোধনাখ্যমৌষধম্||১১৫||

Adhikarana 73 (116) · Śloka 116

দোষপ্রকৃতিবৈকৃত্যাদেকেষাং পক্বলক্ষণম্ |১১৬|

একীযমতমাহ- দোষপ্রকৃতিবৈকৃত্যাদিত্যাদি| দোষপ্রকৃতিবৈকৃত্যাদিতি জ্বরোত্পাদিকাযা দোষপ্রকৃতেরুচ্ছ্রিতাযা অন্যথাত্বাদিত্যর্থঃ|১১৬|-

Adhikarana 74 (116-118) · Śloka 119

হৃদযোদ্বেষ্টনং তন্দ্রা লালাস্রুতিররোচকঃ ||১১৬|| দোষাপ্রবৃত্তিরালস্যং বিবন্ধো বহুমূত্রতা | গুরূদরত্বমস্বেদো ন পক্তিঃ শকৃতোঽরতিঃ ||১১৭|| স্বাপঃ স্তম্ভো গুরুত্বং চ গাত্রাণাং বহ্নিমার্দবম্ | মুখস্যাশুদ্ধিরগ্লানিঃ প্রসঙ্গী বলবাঞ্জ্বরঃ ||১১৮|| লিঙ্গৈরেভির্বিজানীযাজ্জ্বরমামং বিচক্ষণঃ |১১৯|

ইদানীং সামান্যমামজ্বরলক্ষণমাহ- হৃদযোদ্বেষ্টনমিত্যাদি| হৃদযোদ্বেষ্টনং হৃদযস্য আমোটনমিব| দোষাপ্রবৃত্তিঃ বাতাদীনাং নিশ্চলতা| বিবন্ধো বিড্বাতযোরপ্রবর্তনম্| অরতিঃ ন কুত্রচিদবস্থিতিশ্চেতসঃ| অগ্লানিঃ ঈষচ্ছান্তিঃ| প্রসঙ্গী সংসক্তঃ| এতানি লক্ষণানি প্রাযেণ সপ্তরাত্রং যাবদ্ভবন্তি| অমুং পাঠং পঞ্জিকাকারো ‘লালাপ্রসেকো হৃল্লাসো হৃদযাশুদ্ধ্যরোচকাঃ| তন্দ্রালস্যাবিপাকাস্যবৈরস্যং গুরুগাত্রতা|| ক্ষুন্নাশো বহুমূত্রত্বং স্তব্ধতা বলবাঞ্জ্বরঃ| আমজ্বরস্য লিঙ্গানি ন দদ্যাত্তত্র ভেষজম্’ ইত্যাদিনা গ্রন্থেন পঠতি||১১৬-১১৮||-

Adhikarana 75 (119) · Śloka 120

সপ্তরাত্রাত্পরং কেচিন্মন্যন্তে দেযমৌষধম্ ||১১৯|| দশরাত্রাত্পরং কেচিদ্দাতব্যমিতি নিশ্চিতাঃ |১২০|

ইদানীং কষাযরসস্যৌষধস্যোপযোগকালং পরমতেনাহ- সপ্তেত্যাদি| ঔষধং কষাযরসমপি, নতু তিক্তরসমেব, তস্য সামেঽপ্যুপযোগার্হত্বাত্| ননু, ‘মৃদৌ জ্বরে লঘৌ দেহে’ ইত্যাদিনৈব পক্বলক্ষণেঽভিহিতে ভেষজদানমুক্তং, তত্কথং সপ্তরাত্রাদিত্যাদিকং পরমতমঙ্গীক্রিযতে? সত্যং, সপ্তরাত্রাদর্বাক্ পাচনস্যাপি নিষেধার্থং সপ্তরাত্রগ্রহণং, দশাহাদনন্তরমবিদ্যমানেঽপি পাকলক্ষণে ঔষধং দেযমিতি দর্শনার্থং চ দশরাত্রগ্রহণম্| নিশ্চিতা নিশ্চযকারিণো বৈদ্যাঃ||১১৯||-

Adhikarana 76 (120) · Śloka 121

পৈত্তিকে বা জ্বরে দেযমল্পকালসমুত্থিতে ||১২০|| অচিরজ্বরিতস্যাপি দেযং স্যাদ্দোষপাকতঃ |১২১|

যদা পুনঃ সপ্তাহাদর্বাগপি পিত্তজ্বরোঽল্পদোষশ্চ শীঘ্রং পাকং যাযাত্তদৌষধং দেযমিত্যাহ- পৈত্তিকে ইত্যাদি| অল্পকালসমুত্থিতেঽপি পৈত্তিকে জ্বরে যদৌষধং দেযং দাতব্যং ভবেত্ তত্তদা দেযমিতি পিণ্ডার্থঃ| বাশব্দাত্ বাতশ্লেষ্মাদিজ্বরে দোষপাকে সত্যৌষধং দেযম্||১২০||-

Adhikarana 77 (121) · Śloka 122

ভেষজং হ্যামদোষস্য ভূযো জ্বলযতি জ্বরম্ ||১২১|| শোধনং, শমনীযং তু করোতি বিষমজ্বরম্ |১২২|

কস্মাদ্দোষাণাং পাকে সত্যেবৌষধং দেযমিত্যাহ- ভেষজমিত্যাদি| শোধনমৌষধমামদোষস্য পুরুষস্য জ্বরং জ্বলযতি দীপযতীত্যর্থঃ; শমনীযং তু পুনরৌষধং দত্তং বিষমজ্বরং করোতি| কেচিত্ ‘জ্বলযতি’ ইত্যত্র ‘বর্ধযতি’ ইতি পঠন্তি||১২১||-

Adhikarana 78 (122) · Śloka 123

চ্যবমানং জ্বরোত্ক্লিষ্টমুপেক্ষেত মলং সদা ||১২২|| অতিপ্রবর্তমানং চ সাধযেদতিসারবত্ |১২৩|

ইদানীং জ্বরিণামাবস্থিকং কর্তব্যমাহ- চ্যবমানমিত্যাদি| উত্ক্লিষ্টমিতি যতো জ্বরেণামাশযাচ্চালিতমত এব চ্যবমানং, মলং বাতাদিকং, সদাঽঽমাবস্থাযাং পক্বাবস্থাযাং চ| অতিসারবদিত্যনেন পাচযন্ সঙ্গ্রহং নযেদিত্যর্থঃ সূচ্যতে| মলোঽত্র ন পুরীষমেব, অনির্গমনে বমনাদিভির্নির্হরণোপদেশাত্||১২২||-

Adhikarana 79 (123) · Śloka 124

যদা কোষ্ঠানুগাঃ পক্বা বিবদ্ধাঃ স্রোতসাং মলাঃ ||১২৩|| অচিরজ্বরিতস্যাপি তদা দদ্যাদ্বিরেচনম্ |১২৪|

তর্হি কদা শোধনং প্রযোজ্যমিত্যাহ- যদা কোষ্টানুগা ইত্যাদি| বিরেচনমত্র শোধনং, ন ত্বধোরেচনমেব| কেচিত্ পূর্বত্র অস্মিংশ্চ বাক্যে মলং পুরীষং কথযন্তি||১২৩||-

Adhikarana 80 (124-125) · Śloka 125

পক্বো হ্যনির্হৃতো দোষো দেহে তিষ্ঠন্ মহাত্যযম্ ||১২৪|| বিষমং বা জ্বরং কুর্যাদ্বলব্যাপদমেব চ | তস্মান্নির্হরণং কার্যং দোষাণাং বমনাদিভিঃ ||১২৫||

পক্বদোষোপেক্ষণে দূষণমাহ- পক্ব ইত্যাদি| অনির্হৃতো বমনাদিনা, মহাত্যযং গম্ভীরং, বলব্যাপদং বলাপচযং কুর্যাত্| তস্মাদিত্যাদি| নির্হরণম্ ঈষদ্ধরণম্||১২৪-১২৫||

Adhikarana 81 (126) · Śloka 127

প্রাক্কর্ম বমনং চাস্য কার্যমাস্থাপনং তথা | বিরেচনং তথা কুর্যাচ্ছিরসশ্চ বিরেচনম্ ||১২৬|| ক্রমশঃ... |১২৭|

ইদানীং ক্রমশো বমনাদিপরিপাটীমাহ- প্রাগিত্যাদি| যদ্যপি প্রথমং লঙ্ঘনস্যোপদেশঃ, তথাঽপ্যবস্থাপ্রাপ্তত্বাদ্বমনস্যাপি প্রাক্কর্মত্বম্| ক্রমশ ইতি ক্রমেণ, ন যুগপত্; অথবা লঙ্ঘনপাচনানন্তরং স্নেহাদিনা কোষ্ঠপ্রাপ্তেষু দোষেষু মধ্যমাবস্থাযাং জ্বরস্যেতি ক্রমশো দেযম্| প্রাক্কর্ম বমনং চাস্যেত্যত্র চকারাদগ্রেঽনুবাসনমিত্যপি||১২৬||-

Adhikarana 82 (127-129) · Śloka 129

...বলিনে দেযং বমনং শ্লৈষ্মিকে জ্বরে | পিত্তপ্রাযে বিরেকস্তু কার্যঃ প্রশিথিলাশযে ||১২৭|| সরুজেঽনিলজে কার্যং সোদাবর্তে নিরূহণম্ | কটীপৃষ্ঠগ্রহার্তস্য দীপ্তাগ্নেরনুবাসনম্ ||১২৮|| শিরোগৌরবশূলঘ্নমিন্দ্রিযপ্রতিবোধনম্ | কফাভিপন্নে শিরসি কার্যং মূর্ধবিরেচনম্ ||১২৯||

যাদৃশস্য পুংসো যদাত্মকে জ্বরে বমনাদিকং প্রযুজ্যতে তদাহ- বলিনে ইত্যাদি| বলিনে পুরুষায শ্লৈষ্মিকে জ্বরে বমনং দেযম্, ‘আমাশযস্থে দোষে তু সোত্ক্লেশে’ ইত্যাদিনা যা পূর্বং বমনাবস্থা কথিতা তস্যাং জাতাযামিত্যর্থঃ| পিত্তপ্রাযে পিত্তবাহুল্যে, প্রশিথিলাশযে অস্তব্ধপক্বাশযে| তুশব্দাদ্বমনমপি পিত্তে দেযম্| তথা চ,- “উপস্থিতে শ্লেষ্মপিত্তে ব্যাধাবামাশযাশ্রযে| বমনার্থং প্রযুঞ্জীত ভিষগ্দেহমদূষযন্”- ইতি| সরুজে কোষ্ঠরুগ্যুক্তে| সোদাবর্তে সবিবন্ধে| শিরোগৌরবশূলঘ্নমিত্যাদিকং মূর্ধবিরেচনমিতি| জীর্ণজ্বরে মূর্ধবিরেচনং ন তু তরুণজ্বরে পরং সান্নিপাতকং বিহায, সান্নিপাতকে পুনঃ সঞ্জ্ঞাপ্রবোধনার্থং তরুণেঽপি প্রযুজ্যতে| পঞ্জিকাকারস্তু ‘ক্রমেণ বলিনে দেযং বমনং শ্লৈষ্মিকে জ্বরে’ ইত্যত্র ‘আমাশযস্থে দোষে তু সোত্ক্লেশে বমনে পরম্’ ইত্যাদি পূর্বোক্তমেব পাঠং পঠতি||১২৭-১২৯||

Adhikarana 83 (130) · Śloka 131

দুর্বলস্য সমাধ্মাতমুদরং সরুজং দিহেত্ | দারুহৈমবতীকুষ্ঠশতাহ্বাহিঙ্গুসৈন্ধবৈঃ ||১৩০|| অম্লপিষ্টৈঃ সুখোষ্ণৈশ্চ... |১৩১|

অতঃ পরং দুর্বলস্যোদরলেপমাহ- দুর্বলস্যেত্যাদি| দারু দেবদারু, হৈমবতী বচা, অম্লং কাঞ্জিকম্||১৩০||-

Adhikarana 84 (131) · Śloka 131

...পবনে তূর্ধ্বমাগতে | রুদ্ধমূত্রপূরীষায গুদে বর্তিং নিধাপযেত্ ||১৩১||

বর্তিবিষযমাহ- পবনে ইত্যাদি| বর্তিরত্র দারুহৈমবত্যাদিভিঃকৃতা, অন্যে তু মদনফলসৈন্ধবপিপ্পল্যাদিভির্যৌগিকৈর্দ্রব্যৈঃ কৃতা ইতি ব্যাখ্যানযন্তি||১৩১||

Adhikarana 85 (132) · Śloka 132

পিপ্পলীপিপ্পলীমূলযবানীচব্যসাধিতাম্ | পাযযেত যবাগূং বা মারুতাদ্যনুলোমিনীম্ ||১৩২||

ঊর্ধ্বগতপবনে রুদ্ধমূত্রপুরীষস্যান্যত্ কিং কুর্যাদিত্যাহ- পিপ্পলীত্যাদি||১৩২||

Adhikarana 86 (133) · Śloka 133

শুদ্ধস্যোভযতো যস্য জ্বরঃ শান্তিং ন গচ্ছতি | সশেষদোষরূক্ষস্য তস্য তং সর্পিষা জযেত্ ||১৩৩||

সশেষদোষত্বাদ্রূক্ষত্বাচ্চ জ্বরেঽপ্রশাম্যতি সতি রূক্ষস্য শুদ্ধস্য প্রতীকারমাহ- শুদ্ধস্যেত্যাদি||১৩৩||

Adhikarana 87 (134) · Śloka 134

কৃশং চৈবাল্পদোষং চ শমনীযৈরুপাচরেত্ | উপবাসৈর্বলস্থং তু জ্বরে সন্তর্পণোত্থিতে ||১৩৪||

শোধনবিধিমভিধায সংশমনবিধিমাহ- কৃশমিত্যাদি| উপবাসৈরিতি ভোজনপরিত্যাগৈঃ| জেজ্জটাচার্যস্তু- উপবাসস্যাপি সংশমনীযত্বাদ্বিশিষ্টবিষযে তন্নিযোগমাহ- উপবাসৈরিত্যাদি| উপবাসৈরিতি বহুবচনাদ্দশবিধমপি লঙ্ঘনং যথাবস্থং যোজ্যম্| তথা চ,- “চতুষ্প্রকারা সংশুদ্ধিঃ পিপাসামারুতাতপৌ| পাচনান্যুপবাসশ্চ ব্যাযামশ্চেতি লঙ্ঘনম্”- ইতি| ঈদৃশে চ ব্যাখ্যানে সংশমনপ্রস্তাবেঽপি পুনঃ শোধনমভিহিতং ভবতি||১৩৪||

Adhikarana 88 (135) · Śloka 135

ক্লিন্নাং যবাগূং মন্দাগ্নিং তৃষার্তং পাযযেন্নরম্ |১৩৫|

সংশমনেষ্বাহারস্য বরত্বাত্তদভিধানমাহ- ক্লিন্নামিত্যাদি| ক্লিন্নাম্ অল্পসিক্থত্বেন; ‘ক্লিন্নাং’ ইত্যত্র ‘তন্বীং’ ইতি কেচিত্ পঠন্তি, তত্রাপি স এবার্থঃ|১৩৫|-

Adhikarana 89 (135-137) · Śloka 138

তৃট্ছর্দিদাহঘর্মার্তং মদ্যপং লাজতর্পণম্ ||১৩৫|| সক্ষৌদ্রমম্ভসা পশ্চাজ্জীর্ণে যূষরসৌদনম্ | উপবাসশ্রমকৃতে ক্ষীণং(ণে) বাতাধিকে জ্বরে ||১৩৬|| দীপ্তাগ্নিং ভোজযেত্ প্রাজ্ঞো নরং মাংসরসৌদনম্ | মুদ্গযূষৌদনশ্চাপি হিতঃ কফসমুত্থিতে ||১৩৭|| স এব সিতযা যুক্তঃ শীতঃ পিত্তজ্বরে হিতঃ |১৩৮|

যবাগ্বনর্হস্য তর্পণমাহ- তৃডিত্যাদি| হিত ইতি ‘অন্নকালে’ ইতি শেষঃ| স ইত্যাদি| স এব মুদ্গযূষ এব||১৩৫-১৩৭||-

Adhikarana 90 (138-140) · Śloka 140

দাডিমামলমুদ্গানাং যূষশ্চানিলপৈত্তিকে ||১৩৮|| হ্রস্বমূলকযূষস্তু বাতশ্লেষ্মাধিকে হিতঃ | পটোলনিম্বযূষস্তু পথ্যঃ পিত্তকফাত্মকে ||১৩৯|| দাহচ্ছর্দিযুতং ক্ষামং নিরন্নং তৃষ্ণযাঽর্দিতম্ | সিতাক্ষৌদ্রযুতং লাজতর্পণং পাযযেত চ ||১৪০||

দ্বন্দ্বজ্বরাণাং পথ্যমাহ- দাডিমেত্যাদি| হ্রস্বমূলকো লঘুমূলকঃ| লাজতর্পণং পাযযেত চেত্যত্র দ্রবানুক্তেঃ শীতোদকেন লাজতর্পণপানং; কেচিচ্ছৃতশীতেন পানমিচ্ছন্তি, অন্যে তু জ্বরাপহৈঃ ফলরসৈঃ পানং লাজতর্পণস্য পথ্যমাহুঃ ||১৩৮-১৪০||

Adhikarana 91 (141) · Śloka 142

কফপিত্তপরীতস্য গ্রীষ্মেঽসৃক্পিত্তিনস্তথা | মদ্যনিত্যস্য ন হিতা যবাগূস্তমুপাচরেত্ ||১৪১|| যূষৈরম্লৈরনম্লৈর্বা জাঙ্গলৈশ্চ রসৈর্হিতৈঃ |১৪২|

ইদানীং প্রশস্তাযা যবাগ্বা বিশিষ্টবিষযেঽহিতত্বং দর্শযন্নাহ- কফপিত্তপরীতস্যেত্যাদি| কফপিত্তপরীতস্য কফপিত্তাভ্যাং মিলিতাভ্যাং ব্যাপ্তস্য| যদ্যপি রক্তপিত্তপ্রতিষেধে ঘৃতমিশ্রাযা যবাগ্বা হিতত্বমভিধাস্যতি, তথাঽপ্যত্র জ্বরে সতি রক্তপিত্তে যবাগূরহিতা, সংযোগে পুনস্তথেতি তস্য যবগূরহিতা| তস্য পথ্যমাহ- তমুপাচরেদিত্যাদি| যূষৈঃ অম্লৈরনম্লৈর্বেতি বিকল্পঃ সাত্ম্যাপেক্ষযা অগ্ন্যপেক্ষযা চ| যূষজাঙ্গলরসোপদেশোঽপি সাত্ম্যাপেক্ষযা অবস্থাপেক্ষযা চ| যূষো মুদ্গাদিযূষঃ| কফপিত্তপরীতাদীনাং দাহাদ্যভিভূতানাং যূষরসোপদেশস্তত্র কালিকো মন্তব্যঃ||১৪১||-

Adhikarana 92 (142) · Śloka 142

মদ্যং পুরাণং মন্দাগ্নের্যবান্নোপহিতং হিতম্ ||১৪২||

ইদানীং শমনত্বান্মদ্যতক্রেঽবস্থাবশেন দ্রব্যান্তরোপহিতে হিততযা দর্শযন্নাহ- মদ্যমিত্যাদি| মদ্যং পুরাণং সম্যক্ পক্বং, দীপনীযত্বাত্ কফঘ্নত্বাচ্চ ||১৪২||

Adhikarana 93 (143) · Śloka 143

সব্যোষং বিতরেত্তক্রং কফারোচকপীডিতে |১৪৩|

তক্রপ্রযোগমাহ- সব্যোষমিত্যাদি| সব্যোষং ত্রিকটুকসংস্কৃতং, বিতরেত্ দদ্যাত্||১৪৩||-

Adhikarana 94 (143-144) · Śloka 144

কৃশোঽল্পদোষো দীনশ্চ নরো জীর্ণজ্বরার্দিতঃ ||১৪৩|| বিবদ্ধঃ সৃষ্টদোষশ্চ রূক্ষঃ পিত্তানিলজ্বরী | পিপাসার্তঃ সদাহো বা পযসা স সুখী ভবেত্ ||১৪৪||

ক্ষীরাবস্থামাহ- কৃশ ইত্যাদি| দীনঃ ক্লিষ্টচিত্তঃ| বিবদ্ধদোষঃ অপ্রবৃত্তদোষঃ, সৃষ্টদোষঃ চ্যুতদোষঃ| ননু, যদি বিবদ্ধদোষে ক্ষীরং প্রযুজ্যতে তত্কথং প্রচ্যুতেঽপি প্রযুজ্যতে? সত্যং, উভযশক্তিকত্বাত্ প্রচ্যুতেঽপি প্রযুজ্যতে; অথবা প্রচ্যুতো দোষঃ স্তোকস্তোকেন যস্য প্রবর্ততে, অত্র সোঽভিপ্রেতঃ; ততঃ সম্যগ্দোষপ্রবর্তনার্থং ভেদনং ক্ষীরং চ্যুতদোষেঽপি প্রযুজ্যতে ইত্যর্থঃ| এষ পাঠো নিবন্ধকারৈঃ কিযন্মাত্রঃ পঠিতঃ কিযন্মাত্রশ্চ পরিত্যক্তঃ, অস্মাভির্বৃদ্ধপঠিতত্বাত্ সর্বোঽপি লিখিতঃ||১৪৩-১৪৪||

Adhikarana 95 (145) · Śloka 145

তদেব তরুণে পীতং বিষবদ্ধন্তি মানবম্ |১৪৫|

তরুণজ্বরে পযঃ পীতং সত্ কিং কুর্যাদিত্যাহ- তদেবেত্যাদি| তদেবেতি পযঃ| তরুণে তরুণজ্বরে|১৪৫|-

Adhikarana 96 (145) · Śloka 146

সর্বজ্বরেষু সুলঘু মাত্রাবদ্ভোজনং হিতম্ ||১৪৫|| বেগাপাযেঽন্যথা তদ্ধি জ্বরবেগাভিবর্ধনম্ |১৪৬|

ইদানীং সর্বজ্বরোচিতস্যাহারস্য যথাকালমুপযোগমাহ- সর্বজ্বরেষ্বিত্যাদি| সুলঘু পুরাণরক্তশাল্যাদি, মাত্রাবত্ অল্পং, বেগাপাযে জ্বরবেগহানৌ, অন্যথা উক্তপ্রকারবৈপরীত্যেন, তত্ ভোজনং, হি যস্মাদর্থে| কেচিত্ ‘বেগাপাযে’ ইত্যত্র ‘দিনাপাযে’ ইতি পঠন্তি; দিনান্তে ইতি চ ব্যাখ্যানযন্তি| ‘সর্বজ্বরেষু সপ্তাহং মাত্রাবল্লঘু ভোজযেত্’ ইতীদৃশং পূর্বার্ধং কেচিত্ পঠন্তি, স চ নিবন্ধেষু ন দৃশ্যতে||১৪৫||-

Adhikarana 97 (146-148) · Śloka 149

জ্বরিতো হিতমশ্নীযাদ্যদ্যপ্যস্যারুচির্ভবেত্ ||১৪৬|| অন্নকালে হ্যভুঞ্জানঃ ক্ষীযতে ম্রিযতেঽথবা | স ক্ষীণঃ কৃচ্ছ্রতাং যাতি যাত্যসাধ্যত্বমেব চ ||১৪৭|| তস্মাদ্রক্ষেদ্বলং পুংসাং বলে সতি হি জীবিতম্ | গুর্বভিষ্যন্দ্যকালে চ জ্বরী নাদ্যাত্ কথঞ্চন ||১৪৮|| ন তু তস্যাহিতং ভুক্তমাযুষে বা সুখায বা |১৪৯|

ইদানীং জীর্ণজ্বরিতস্যারুচাবপি হিতভোজনোপদেশমাহ- জ্বরিত ইত্যাদি| অস্য জীর্ণজ্বরিণো যদি হিতভোজনে কথঞ্চিদরুচিস্তদা হিতমেবানেকপ্রকারাভিঃ কল্পনাভির্মুখাপ্রিযং কৃত্বাঽরুচিনিবৃত্ত্যর্থং জ্বরিতোঽশ্নীযাত্| তথা চ তন্ত্রান্তরং,- “সাতত্যাত্ স্বাদ্বভাবাচ্চ পথ্যং দ্বেষ্যত্বামাগতম্| কল্পনাবিধিভিস্তৈস্তৈঃ প্রিযত্বং গমযেত্ পুনঃ”- ইতি| কস্মাদেবংবিধমপি কৃত্বা জ্বরিতোঽশ্নীযাদিত্যাহ- অন্নকালে হ্যভুঞ্জান ইত্যাদি| অন্যে তু যদ্যস্য জীর্ণজ্বরিণোঽরুচিঃ স্যাত্তদা অহিতমপ্যশ্নীযাদিতি ব্যাখ্যানযন্তি| ননু, যদ্যরুচৌ সত্যামহিতভোজনং ক্রিযতে তদা ‘গুর্বভিষ্যন্দ্যকালে চ’ ইত্যাদ্যুত্তরোক্তশ্লোকেন সহ কথং ন বিরোধঃ? সত্যং, অহিতস্য সাতত্যসেবননিরাকরণার্থং গুর্বভিষ্যন্দ্যকালে চেত্যাদিশ্লোকঃ| গুর্বিত্যাদি অভিষ্যন্দি দোষধাতুমলস্রোতসাং ক্লেদপ্রাপ্তিজননম্| কথঞ্চন সকৃদপি| তুশব্দো যস্মাদর্থে, তেন যস্মাদহিতং ভুক্তং ভোজনং জ্বরিতস্য ন আযুষোঽর্থে সুখার্থে বা ভবতি, তস্মাদ্গুর্বাদি ন ভক্ষযেত্| যদ্যপি কৈশ্চিন্নিবন্ধকারৈরেষ পাঠো ন পঠিতস্তথাঽপি সর্বনিবন্ধোপজীবিনা মযা পঞ্জিকাকারপঠিত্বাত্ পঠিতঃ||১৪৬-১৪৮||-

Adhikarana 98 (149) · Śloka 150

সন্ততং বিষমং বাঽপি ক্ষীণস্য সুচিরোত্থিতম্ ||১৪৯|| জ্বরং সম্ভোজনৈঃ পথ্যৈর্লঘুভিঃ সমুপাচরেত্ |১৫০|

ইদানীং দুর্বলস্য চিরোত্থিতে জ্বরে পথ্যসম্ভোজনৈর্বৃংহণবিধিমাহ- সন্ততমিত্যাদি| সন্ততং নিত্যলগ্নং, বিষমং সততান্যেদ্যুষ্কাদিকম্| সম্ভোজনৈঃ যথেষ্টভোজনৈঃ||১৪৯||-

Adhikarana 99 (150) · Śloka 151

মুদ্গান্মসুরাংশ্চণকান্ কুলত্থান্ সমকুষ্ঠকান্ ||১৫০|| আহারকালে যূষার্থং জ্বরিতায প্রদাপযেত্ |১৫১|

মুদ্গান্ মসূরাংশ্চণকানিত্যাদি| পূর্বং দোষপ্রত্যনীকত্বদর্শনার্থং মুদ্গাদিযূষাণামুপাদানং, অত্র তু বিকারপ্রত্যনীকত্বদর্শনার্থম্, অতো ন পুনরুক্তিঃ||১৫০||-

Adhikarana 100 (151-152) · Śloka 152

পটোলপত্রং বার্তাকং কঠিল্লং পাপচৈলিকম্ ||১৫১|| কর্কোটকং পর্পটকং গোজিহ্বাং বালমূলকম্ | পত্রং গুডূচ্যাঃ শাকার্থে জ্বরিতানাং প্রদাপযেত্ ||১৫২||

পটোলপত্রমিত্যাদি| কঠিল্লং পুনর্নবাশাকং, পাপচৈলিকং পাঠাশাকং, গোজিহ্বাং গোজীশাকম্||১৫১-১৫২||

Adhikarana 101 (153) · Śloka 154

লাবান্ কপিঞ্জলানেণান্ পৃষতাঞ্ছরভাঞ্ছশান্ | কালপুচ্ছান্ কুরঙ্গাংশ্চ তথৈব মৃগমাতৃকান্ ||১৫৩|| মাংসার্থে মাংসসাত্ম্যানাং জ্বরিতানাং প্রদাপযেত্ |১৫৪|

লাবানিত্যাদি| কপিঞ্জলো গৌরতিত্তিরিঃ, এণঃ কৃষ্ণমৃগঃ, পৃষতঃ চিত্রমৃগঃ ‘চীতল’ ইতি লোকে, শরভঃ অষ্টপাদুষ্ট্রপ্রমাণো মহাশৃঙ্গঃ, কালপুচ্ছঃ স চ প্রসিদ্ধঃ, কুরঙ্গঃ চতুঃশৃঙ্গঃ ‘মেদুলী’ ইতি লোকে| মাংসার্থে মাংসপ্রযোগে; কেচিন্মাংসার্থে বৃংহণার্থে ইতি ব্যাখ্যানযন্তি, ‘মাংসং মাংসেন বর্ধতে’ ইত্যুক্তত্বাত্||১৫৩||-

Adhikarana 102 (154) · Śloka 155

সারসক্রৌঞ্চশিখিনঃ কুক্কুটাংস্তিত্তিরাং(রীং)স্তথা ||১৫৪|| গুরূষ্ণত্বান্ন শংসন্তি জ্বরে কেচিচ্চিকিত্সকাঃ |১৫৫|

অতঃ পরং সারসাদীনমপ্রশস্তত্বং পরমতেন দর্শযন্নাহ- সারসক্রৌঞ্চশিখিন ইত্যাদি| সারসো রক্তচঞ্চুকঃ পক্ষিবিশেষঃ, ক্রৌঞ্চঃ ‘ক্রৌঞ্চি’ ইতি প্রসিদ্ধঃ, শিখী মযূরঃ, তিত্তিরঃ কৃষ্ণতিত্তিরিঃ, তিত্তিরিশব্দ অকারান্তোঽপ্যস্তি| যদ্যপি মাংসবর্গে কুক্কুটতিত্তিরী পরমুষ্ণৌ দর্শিতৌ ন সারসাদযস্তথাঽপ্যত এব বিধানাত্ ‘উষ্ণৌ মযূরতিত্তিরৌ’ ইতি দর্শনাত্ সারসাদযোঽপ্যুষ্ণা জ্ঞেযাঃ||১৫৪||-

Adhikarana 103 (155) · Śloka 156

জ্বরিতানাং প্রকোপং তু যদা যাতি সমীরণঃ ||১৫৫|| তদৈতেঽপি হি শস্যন্তে মাত্রাকালোপপাদিতাঃ |১৫৬|

নিষিদ্ধানামপি সারসাদীনামবস্থাযাং জ্বরে প্রযোগমাহ- জ্বরিতানামিত্যাদি||১৫৫||-

Adhikarana 104 (156-158) · Śloka 158

পরিষেকান্ প্রদেহাংশ্চ স্নেহান্ সংশোধনানি চ ||১৫৬|| (স্নানাভ্যঙ্গদিবাস্বপ্নশীতব্যাযামযোষিতঃ) | কষাযগুরুরূক্ষাণি ক্রোধাদীনি তথৈব চ ||১৫৭|| সারবন্তি চ ভোজ্যানি বর্জযেত্তরুণজ্বরী | তথৈব নবধান্যাদিং বর্জযেচ্চ সমাসতঃ ||১৫৮||

ইদানীং নবজ্বরে যানি বর্জনীযানি তান্যাহ- পরিষেকানিত্যাদি| পরিষেকো ধারাপ্রসেকঃ| অবগাহঃ জলপূর্ণকটাহাদৌ নিমজ্জনম্| স্নেহান্ স্নেহপানম্| সংশোধনানি বমনাদীনি| কষাযঃ কষাযদ্রব্যকৃতঃ ক্বাথঃ| ক্রোধাদীনীত্যত্র আদিশব্দাচ্ছোকাদীনি| সারবন্তি স্নিগ্ধান্যভিষ্যন্দীনি চ| নবধান্যাদিবর্গস্তক্রান্তো ব্রণিতোপাসনীযোক্তঃ| সমাসতঃ সঙ্ক্ষেপতঃ| যদ্যপি পরিষেকাদিবর্জনমামজ্বরলক্ষণানন্তরং পঠিতুমুচিতং স্যাত্, তথাঽপি নবজ্বরে ভেষজস্যাত্যন্তনিষেধজ্ঞাপনার্থং তত্র নোক্তম্| কেচিদমুমেব পাঠমীদৃশং পঠন্তি- “পরিষেকান্ প্রদেহাংশ্চ স্নেহান্ সংশোধনানি চ| সারবন্তি চ ভোজ্যানি বর্জযেত্তরুণজ্বরী|| তথৈব নবধান্যানি ক্রোধাদীনি চ বর্জযেত্’ ইতি ব্যাখ্যানযন্তি চ- স্নাননিষেধাদবগাহনিষেধো বোদ্ধব্যঃ, অভ্যঙ্গনিষেধশ্চ স্নেহনিষেধাত্, ক্রোধাদীনি চেত্যত্র চকারাত্ কষাযো গৃহীতব্যঃ||১৫৬-১৫৮||

Adhikarana 105 (159) · Śloka 159

অনবস্থিতদোষাগ্নেরেভিঃ সন্ধুক্ষিতো জ্বরঃ | গম্ভীরতীক্ষ্ণবেগত্বং যাত্যসাধ্যত্বমেব চ ||১৫৯||

ইদানীং নবজ্বরে পরিষেকাদিসেবনাত্কিং স্যাদিত্যাহ- অনবস্থিতেত্যাদি| অনবস্থিতদোষাগ্নেঃ নবজ্বরিণঃ, এভিঃ পরিষেকাদিভিঃ সন্ধুক্ষিতো বৃদ্ধো জ্বরো গম্ভীরাদিবেগিত্বং যাতীতি পিণ্ডার্থঃ| অনবস্থিতদোষা বিমার্গগাঃ, বহ্নিরনবস্থিতো বহির্গমনাত্||১৫৯||-

Adhikarana 106 (160-162) · Śloka 162

শীততোযদিবাস্বপ্নক্রোধব্যাযামযোষিতঃ | ন সেবেত জ্বরোত্সৃষ্টো যাবন্ন বলবান্ ভবেত্ ||১৬০|| মুক্তস্যাপি জ্বরেণাশু দুর্বলস্যাহিতৈর্জ্বরঃ | প্রত্যাপন্নো দহেদ্দেহং শুষ্কং বৃক্ষমিবানলঃ ||১৬১|| তস্মাত্কার্যঃ পরীহারো জ্বরমুক্তৈর্বিরিক্তবত্ | যাবন্ন প্রকৃতিস্থঃ স্যাদ্দোষতঃ প্রাণতস্তথা ||১৬২||

ইদানীং জ্বরমুক্তস্য শীততোযাদিনিষেধার্থমাহ- শীতেত্যাদি| জ্বরোত্সৃষ্টো জ্বরবিমুক্তঃ| ইদানীং জ্বরমুক্তস্য শীততোযাদিসেবনাত্ কিং স্যাদিত্যাহ- মুক্তস্যেত্যাদি| অহিতৈঃ শীততোযাদিভিঃ| প্রত্যাপন্নঃ পুনরাগতঃ| দহেত্ বিনাশযেত্| যস্মাদহিতসেবনাত্ পুনরাগতো জ্বরো দেহং দহেত্, তস্মাদহিতানাং পরিহারো জ্বরমুক্তেন পুরুষেণ কার্য ইতি পিণ্ডার্থঃ| প্রকৃতিস্থঃ স্যাদ্দোষতঃ প্রাণতস্তথেতি দোষাণামবিকৃতকার্যকারিত্বেন দোষতঃ প্রকৃতিস্থত্বং জ্ঞেযং, ব্যাযামাদিসেবনসামর্থ্যেন চ প্রাণতঃ প্রকৃতিস্থত্বং জ্ঞেযম্||১৬০-১৬২||

Adhikarana 107 (163) · Śloka 163

জ্বরে প্রমোহো ভবতি স্বল্পৈরপ্যবচেষ্টিতৈঃ | নিষণ্ণং ভোজযেত্তস্মান্মূত্রোচ্চারৌ চ কারযেত্ ||১৬৩||

জ্বরে আযাসনিষেধার্থমাহ- জ্বরে ইত্যাদি| জ্বরে জ্বরকর্শিতে পুরুষে| প্রমোহোঽত্র মূর্চ্ছা| অবচেষ্টিতৈঃ উত্থানচঙ্ক্রমণাদিভিঃ| নিষণ্ণং শয্যাযামেব আসীনমুপবিষ্টমিতি যাবত্, মূত্রোচ্চারৌ চ কারযেদিত্যত্রাপি নিষণ্ণমিতি সম্বন্ধনীযম্| উচ্চারো বিষ্ঠা||১৬৩||

Adhikarana 108 (164) · Śloka 164

অরোচকে গাত্রসাদে বৈবর্ণ্যেঽঙ্গমলাদিষু | শান্তজ্বরোঽপি শোধ্যঃ স্যাদনুবন্ধভযান্নরঃ ||১৬৪||

অতঃ পরং জ্বরোপশমেঽরোচকাদিপ্রতিষেধার্থমাহ- অরোচকে ইত্যাদি| গাত্রসাদঃ অঙ্গগ্লানিঃ| শান্ত ইব শান্তো লীনজ্বর ইত্যর্থঃ, নতু সর্বথোপশান্তজ্বরঃ, যস্মাদুপশান্তজ্বরেঽরোচকাদীনামভাব এব| শোধ্যঃ শোধনীযঃ| অনুবন্ধভযাত্ পুনরুদ্ভবশঙ্কযা||১৬৪||

Adhikarana 109 (165) · Śloka 165

ন জাতু স্নাপযেত্ প্রাজ্ঞঃ সহসা জ্বরকর্শিতম্ | তেন সন্দূষিতো হ্যস্য পুনরেব ভবেজ্জ্বরঃ ||১৬৫||

অতঃ পরং জ্বরকর্শিতস্য স্নাননিষেধমাহ- ন জাতু স্নাপযেদিত্যাদি| জাতু কথঞ্চন| প্রাজ্ঞো বৈদ্যঃ| সহসা শীঘ্রং, যাবদ্বলং ন প্রাপ্নোতীত্যর্থঃ| তেন স্নানেন||১৬৫||

Adhikarana 110 (166-167) · Śloka 167

চিকিত্সেচ্চ জ্বরান্ সর্বান্নিমিত্তানাং বিপর্যযৈঃ | শ্রমক্ষযাভিঘাতোত্থে মূলব্যাধিমুপাচরেত্ ||১৬৬|| স্ত্রীণামপপ্রজাতানাং স্তন্যাবতরণে চ যঃ | তত্র সংশমনং কুর্যাদ্যথাদোষং বিধানবিত্ ||১৬৭||

ইদানীং সঙ্ক্ষেপতঃ সর্বজ্বরচিকিত্সামাহ- চিকিত্সেদিত্যাদি| নিমিত্তানাং কারণানাং, বিপর্যযৈঃ বিপরীতৈঃ; যথা- সন্তর্পণোত্থেঽপতর্পণম্, অপতর্পণজে সন্তর্পণমিতি| শ্রমক্ষযাভিঘাতোত্থে ইত্যাদি| মূলব্যাধিমিত্যত্র ব্যাধিশব্দো দোষে প্রবর্ততে, কারণে কার্যোপচারাত্; তেন মূলদোষং বাযুং, শ্রমাদিভির্বাতকোপাদিত্যর্থঃ| স্ত্রীণামিত্যাদি| অপপ্রজাতাঃ পতিতগর্ভাঃ স্ত্রিযঃ, তাসাং যো জ্বরঃ, তথা স্তন্যাবতরণে চ স্ত্রীণাং যো জ্বরঃ, তত্র সংশমনং কুর্যাদিতি পিণ্ডার্থঃ| যথাদোষমিতি যস্য দোষস্য তত্র প্রকোপো ভবেত্তস্য প্রত্যনীকং সংশমনং কুর্যাদিত্যর্থঃ| সংশমনশব্দেন পাচনমপি গৃহীতম্| কেচিদমুং পাঠং ন পঠন্তি; শ্রীজেজ্জটাচার্যপঠিতত্বাদস্মাভিঃ পঠিতঃ||১৬৬-১৬৭||

Adhikarana 111 (168) · Śloka 168

অতঃ সংশমনীযানি কষাযাণি নিবোধ মে | সর্বজ্বরেষু দেযানি যানি বৈদ্যেন জানতা ||১৬৮||

এবং সঙ্ক্ষেপেণ চিকিত্সামুপদিশ্য, অধুনা সংশমনকষাযান্ বিবক্ষুরাহ- অত ইত্যাদি| নিবোধ জানীহি| মে মত্সকাশাত্||১৬৮||

Adhikarana 112 (169) · Śloka 169

পিপ্পলীসারিবাদ্রাক্ষাশতপুষ্পাহরেণুভিঃ | কৃতঃ কষাযঃ সগুডো হন্যাচ্ছ্বসনজং জ্বরম্ ||১৬৯||

ইদানীং প্রথমং বাতজ্বরে সংশমনমাহ- পিপ্পলীত্যাদি| সারিবা উত্পলসারিবা, হরেণুঃ রেণুকা| শ্বসনজং বাতজম্| পিপ্পল্যাদিদ্রব্যপলমুদকস্য ষোডশভিঃ পলৈরুত্ক্বাথ্য, চতুর্ভাগাবশিষ্টং পলচতুষ্টযং গৃহীত্বা, গুডকর্ষসংযুক্তং পাযযেত্| তথা চোক্তম্,- “ভেষজাত্ ষোডশগুণং জলং; ক্বাথ্যং পলং মতম্| চতুর্ভাগাবশেষং তু পেযমেবং সুখার্থিনা”- ইতি| ক্বাথ্যদ্রব্যস্য যত্ পলং প্রমাণং তদুত্তমানাং; তথা চোক্তম্,- “উত্তমস্য পলং মানং ত্রিভিঃ কর্ষৈশ্চ মধ্যমে| জঘন্যস্য পলার্ধং চ স্নেহক্বাথৌষধেষু চ”- ইতি| বৃদ্ধবৈদ্যাশ্চ মধ্যমপ্রমাণেনাষ্টৌ শরাবানুদকস্য প্রক্ষিপ্যাষ্টভাগাবশেষিতং শরাবমেকং গৃহ্ণন্তি, শেষং সমমেব ব্যাখ্যানযন্তি; গুডাবাপমপি বৃদ্ধবৈদ্যা ন মন্যন্তে||১৬৯||

Adhikarana 113 (170) · Śloka 170

শৃতং শীতকষাযং বা গুডূচ্যাঃ পেযমেব তু |১৭০|

শৃতমিত্যাদি| শৃতম্ অনন্তরোক্তকল্পনযা ক্বাথীকৃতম্| উষ্ণোদকপাচিতাদ্দ্রব্যাদ্রাত্রিপর্যুষিতাদ্যো রসোঽভিনির্যাতি স শীতকষাযশব্দবাচ্যঃ| তথা চোক্তং- “দ্রব্যাদাপোত্থিতাত্তোযে প্রতপ্তে সংস্থিতান্নিশি| কষাযো যোঽভিনির্যাতি স শীতঃ সমুদাহৃতঃ”- ইতি| শৃতকষাযপানং কফানুবন্ধবাতজ্বরে, পিত্তানুবন্ধে তু শীতকষাযপানমিতি|১৭০|-

Adhikarana 114 (170) · Śloka 171

বলাদর্ভশ্বদংষ্ট্রাণাং কষাযং পাদশেষিতম্ ||১৭০|| শর্করাঘৃতসংযুক্তং পিবেদ্বাতজ্বরাপহম্ |১৭১|

বলাদর্ভশ্বদংষ্ট্রাণামিত্যাদি| শ্বদংষ্ট্রা গোক্ষুরকঃ, কষাযঃ পূর্বোক্তকল্পনযা ক্বথিতঃ| শর্করাঘৃতযোঃ প্রমাণং কর্ষম্||১৭০||-

Adhikarana 115 (171-172) · Śloka 172

শতপুষ্পাবচাকুষ্ঠদেবদারুহরেণুকাঃ ||১৭১|| কুস্তুম্বুরূণি নলদং মুস্তং চৈবাপ্সু সাধযেত্ | ক্ষৌদ্রেণ সিতযা চাপি যুক্তঃ ক্বাথোঽনিলাধিকে ||১৭২||

শতপুষ্পেত্যাদি| হরেণুকা রেণুকা, কুস্তুম্বুরু ধান্যকং নলদম্ উশীরম্| শর্করাক্ষৌদ্রপ্রমাণং পূর্ববত্| শতপুষ্পাদিহরেণুকান্তৈরেকো যোগঃ পরং শর্করাহীনঃ; কুস্তুম্বুরুপ্রভৃতিভিশ্চ দ্বিতীযঃ||১৭১-১৭২||

Adhikarana 116 (173-174) · Śloka 174

দ্রাক্ষাগুডূচীকাশ্মর্যত্রাযমাণাঃ সসারিবাঃ | নিষ্ক্বাথ্য সগুডং ক্বাথং পিবেদ্বাতকৃতে জ্বরে ||১৭৩|| গুডূচ্যাঃ স্বরসো গ্রাহ্যঃ শতাবর্যাশ্চ তত্সমঃ | নিহন্যাত্সগুডঃ পীতঃ সদ্যোঽনিলকৃতং জ্বরম্ ||১৭৪||

দ্রাক্ষাগুডূচীত্যাদি| কাশ্মর্যং গম্ভারীফলম্| সগুডমিতি ক্বাথোপরি কর্ষপ্রমাণস্য গুডস্য পশ্চান্নিক্ষেপঃ||১৭৩-১৭৪||

Adhikarana 117 (175) · Śloka 175

ঘৃতাভ্যঙ্গস্বেদলেপানবস্থাসু চ যোজযেত্ |১৭৫|

ঘৃতেত্যাদি| ননু, যথাপ্রতিজ্ঞং কষাযেষু বাচ্যেষু স্নেহনাদ্যুপদেশঃ কুতোঽভিধীযতে? উচ্যতে- বাতজ্বরপ্রতীকারপ্রস্তাবাত্| অবস্থাসু শীতোদ্গমাদিষু| তত্র জীর্ণজ্বরে ত্বগ্গতে ঘৃতাভ্যঙ্গঃ, শীতোদ্গমে চ স্বেদলেপাবিতি|১৭৫|-

Adhikarana 118 (175) · Śloka 176

শ্রীপর্ণীচন্দনোশীরপরূষকমধূকজঃ ||১৭৫|| শর্করামধুরো হন্তি কষাযঃ পৈত্তিকং জ্বরম্ |১৭৬|

পৈত্তিকজ্বরসংশমনমাহ- শ্রীপর্ণীত্যাদি| শ্রীপর্ণীশব্দেন গম্ভারীফলং, চন্দনং রক্তচন্দনং, পরূষকং স্বনামপ্রসিদ্ধং, মধূকো গুডপুষ্পঃ , তস্যাপি ফলং গ্রাহ্যম্| যাবত্প্রমাণযা শর্করযা মধুরঃ ক্বাথো ভবতি তাবত্যেব শর্করা প্রক্ষেপ্তব্যা, বৃদ্ধবৈদ্যা আদিদ্রব্যসমাং শর্করামাহুঃ||১৭৫||

Adhikarana 119 (176) · Śloka 176

পীতং পিত্তজ্বরং হন্যাত্সারিবাদ্যং সশর্করম্ ||১৭৬||

পীতং পিত্তজ্বরমিত্যাদি| সারিবাদ্যং সারিবাদিদ্রব্যগণজাতং কষাযকল্পনযা নিষ্ক্বাথ্য কর্ষপ্রমাণশর্করাযুতং পীতং সত্ পিত্তজ্বরং হন্যাদিতি সম্বন্ধঃ||১৭৬||

Adhikarana 120 (177) · Śloka 177

সযষ্টীমধুকং হন্যাত্তথৈবোত্পলপূর্বকম্ |১৭৭|

সযষ্টীমধুকমিত্যাদি| উত্পলাদিগণোক্তং দ্রব্যজাতং সযষ্টীমধুকং নিষ্ক্বাথ্য পীতং সত্ পিত্তজ্বরং হন্যাদিতি সম্বন্ধঃ| যদ্যপি উত্পলাদিগণেনৈব যষ্টীমধুকং প্রাপ্তং তথাঽপি পুনঃ সযষ্টীমধুকমিতি যত্কৃতং তদ্যষ্টীমধুকস্য ভাগদ্বযপ্রতিপাদনার্থম্|১৭৭|-

Adhikarana 121 (177) · Śloka 177

শৃতং শীতকষাযং বা সোত্পলং শর্করাযুতম্ ||১৭৭||

শৃতমিত্যাদি| শৃতং শীতকষাযং বেতি বিকল্পো দাহাদিতারতম্যাদ্যপেক্ষযা| সোত্পলমিত্যত্র আদিশব্দো লুপ্তো দ্রষ্টব্যঃ; তেন, উত্পলাদিগণসহিতম্, উত্পলাদিগণকৃতমিত্যর্থঃ||১৭৭||

Adhikarana 122 (178) · Śloka 178

গুডূচীপদ্মরোধ্রাণাং সারিবোত্পলযোস্তথা | শর্করামধুরঃ ক্বাথঃ শীতঃ পিত্তজ্বরাপহঃ ||১৭৮||

গুডূচীত্যাদি| পদ্মং কমলম্, উত্পলম্ ঈষন্নীলম্| এতে চ সর্ব এবানন্তরোক্তাঃ পাক্যকষাযাঃ শীতকষাযা বা দোষাদিবলং দৃষ্ট্বা বৈদ্যেন যোজ্যাঃ||১৭৮||

Adhikarana 123 (179) · Śloka 180

দ্রাক্ষারগ্বধযোশ্চাপি কাশ্মর্যস্যাথবা পুনঃ | স্বাদুতিক্তকষাযাণাং কষাযৈঃ শর্করাযুতৈঃ ||১৭৯|| সুশীতৈঃ শমযেত্তৃষ্ণাং প্রবৃদ্ধাং দাহমেব চ |১৮০|

ইদানীং পিত্তজ্বরে আবস্থিকং ক্রমমাহ- দ্রাক্ষারগ্বধযোরিত্যাদি| দ্রাক্ষারগ্বধযোশ্চাপীত্যেকো যোগঃ, কাশ্মর্যস্যাথবেতি দ্বিতীযঃ, স্বাদুতিক্তকষাযাণামিতি তৃতীযঃ| আরগ্বধঃ কৃতমালফলং, কাশ্মর্যং গম্ভারীফলম্| স্বাদুতিক্তকষাযাণামিতি স্বাদূনি দ্রাক্ষামধুকসারিবাদীনি, তিক্তানি দুরালভাপর্পটককিরাততিক্তকপ্রভৃতীনি, কষাযাণি পদ্মোত্পলপ্রভৃতীনি, তেষাং কষাযৈঃ| সুশীতৈরিতি শীতকষাযৈরেবেতি কার্তিককুণ্ডাচার্যঃ, জেজ্জটাচার্যস্তু পূর্ব ক্বথিতৈঃ পশ্চাচ্ছীতীকৃতৈরিতি মন্যতে||১৭৯||-

Adhikarana 124 (180) · Śloka 181

শীতং মধুযুতং তোযমাকণ্ঠাদ্বা পিপাসিতম্ ||১৮০|| বামযেত্পাযযিত্বা তু তেন তৃষ্ণা প্রশাম্যতি |১৮১|

পিত্তজ্বরেঽপরমাবস্থিকং কার্যমাহ- শীতং মধুযুতমিত্যাদি| যদ্যপি সংশমনপ্রস্তাবে বমনং নোপযুক্তং, তথাঽপি প্রবৃদ্ধাযাং তৃষ্ণাযাং বমনস্যাপি সংশমনকার্যকরত্বাদুপদেশঃ||১৮০||-

Adhikarana 125 (181) · Śloka 182

ক্ষীরৈঃ ক্ষীরিকষাযৈশ্চ সুশীতৈশ্চন্দনাযুতৈঃ ||১৮১|| অন্তর্দাহে বিধাতব্যমেভিশ্চান্যৈশ্চ শীতলৈঃ |১৮২|

ক্ষীরৈরিত্যাদি| ক্ষীরিকষাযৈঃ বটাদিক্বাথৈঃ, বিধাতব্যং পানলেপনপরিষেকাবগাহাদিকম্| কার্তিককুণ্ডস্তু বহিঃপরিমার্জনমেবেচ্ছতি| অন্যৈশ্চ শীতলৈঃ কাকোল্যাদিভিঃ শীতবীর্যৈঃ, তথা শীতস্পর্শৈরপীত্যর্থঃ||১৮১||-

Adhikarana 126 (182-183) · Śloka 184

পদ্মকং মধুকং দ্রাক্ষাং পুণ্ডরীকমথোত্পলম্ ||১৮২|| যবান্ ভৃষ্টানুশীরাণি সমঙ্গাং কাশ্মরীফলম্ | নিদধ্যাদপ্সু চালোড্য নিশাপর্যুষিতং ততঃ ||১৮৩|| ক্ষৌদ্রেণ যুক্তং পিবতো জ্বরদাহৌ প্রশাম্যতঃ |১৮৪|

পিত্তজ্বরাবস্থাযাং শীতকষাযমাহ- পদ্মকং মধুকমিত্যাদি| সমঙ্গা অঞ্জলিকারিকা, বরাহক্রান্তামপরে| যদ্যপি কাশ্মরীফলমিত্যুক্তং তথাঽপি কাশ্মরীফলমজ্জা গৃহ্যতে, অত্যন্তপিত্তহরত্বাত্| নিদধ্যাত্ ধারযেত্| অপ্সু চালোড্যেতি অর্ধক্বথিতাম্বুনি প্রতপ্তে আলোড্যেত্যর্থঃ; অথবা অনুষ্ণমপি বার্যৌষধান্বিতং পর্যুষিতং শীতকষাযম্, অবিশেষাত্| জ্বরদাহৌ প্রশাম্যত ইতি জ্বরশ্চ দাহশ্চ, তৌ প্রশাম্যতঃ; এতেন জ্বরসংযুক্তো দাহঃ শাম্যতি, তথা জ্বরং বিনাঽপি যো দাহঃ সোঽপি শাম্যতীত্যর্থঃ| অন্যে তু ‘জ্বরো দাহশ্চ শাম্যতি’ ইতি পঠন্তি| তত্র পাঠে জ্বরোঽপি শাম্যতীতি লভ্যতে| অনেন শীতকষাযবিধানেনান্যান্যপি শীতকষাযাণি কার্যাণি| কেচিত্ ‘পদ্মকং মধুকং দ্রাক্ষাং পুণ্ডরীকমথোত্পলম্’ ইতি পাঠং ন পঠন্তি||১৮২-১৮৩||-

Adhikarana 127 (184) · Śloka 184

জিহ্বাতালুগলক্লোমশোষে মূর্ধ্নি চ দাপযেত্ ||১৮৪||

পিত্তজ্বরাবস্থাযাং মূর্ধপ্রলেপমাহ- জিহ্বাতালুগলক্লোমেত্যাদি| ক্লোম তিলকম্| মূর্ধ্নি মস্তকে| দাপযেত্ পদ্মকাদিশীতকষাযস্য জিহ্বাদিশোষে মস্তকরুজাসু চাভ্যন্তরমুপযোগঃ স্পর্শে চেতি ব্যাখ্যানযন্তি| ননু, কষাযাধিকারে কথং মূর্ধ্নি লেপো গণ্ডূষশ্চ নির্দিশ্যতে? উচ্যতে- কষাযাণীতি বাহুল্যেন নির্দেশাত্; যথা ছত্রিণঃ, তেনাদোষ ইতি||১৮৪||

Adhikarana 128 (185) · Śloka 186

কেশরং মাতুলঙ্গস্য মধুসৈন্ধবসংযুতম্ | শর্করাদাডিমাভ্যাং বা দ্রাক্ষাখর্জূরযোস্তথা ||১৮৫|| বৈরস্যে ধারযেত্কল্কং গণ্ডূষং চ তথা হিতম্ |১৮৬|

পিত্তজ্বরে আবস্থিকং ক্রমমাহ- কেশরমিত্যাদি| কেশরাদিঃ মধুসৈন্ধবসংযুতমিত্যন্ত একো যোগঃ, শর্করাদিঃ খর্জূরযোস্তথেত্যন্তো দ্বিতীযঃ| বৈরস্যে মুখবৈরস্যে| ধারযেত্ ‘মুখে’ ইতি শেষঃ| কল্কো দৃষদি পেষিতঃ সদ্রবঃ| তথা হিতমিতি বিশিষ্টদোষারব্ধজ্বরপ্রত্যনীকমিত্যর্থঃ| কেচিজ্জিহ্বাতাল্বাদিশোষে মাতুলুঙ্গকেশরস্যৈব কেবলং মধুসৈন্ধবযুক্তস্য মূর্ধ্নি ধারণমিচ্ছন্তি, তথা দ্রাক্ষাখর্জূরকল্কস্য শর্করাদাডিমযুতস্য বৈরস্যে আস্যে ধারণমিচ্ছন্তি| যদ্যপি মুখবৈরস্যং বাতলিঙ্গং, তথাঽপি পিত্তাদপি বৈরস্যং জ্ঞেযং, তন্ত্রান্তরোক্তত্বাত্| কেচিত্ ‘পদ্মকং মধুকং দ্রাক্ষাং’ ইত্যাদিকং ‘গণ্ডূষং চ তথা হিতং’ ইতি পর্যন্তং ন পঠন্তি; স চ পাঠঃ পঠনীযঃ, সর্বনিবন্ধকারৈঃ পঠিতত্বাত্||১৮৫||-

Adhikarana 129 (186) · Śloka 187

সপ্তচ্ছদং গুডূচীং চ নিম্বং স্ফূর্জকমেব চ ||১৮৬|| ক্বাথযিত্বা পিবেত্ ক্বাথং সক্ষৌদ্রং কফজে জ্বরে |১৮৭|

কফজ্বরসংশমনান্যাহ- সপ্তচ্ছদমিত্যাদি| সপ্তচ্ছদঃ সপ্তপর্ণঃ, স্ফূর্জকো বনকুরণ্টকাকারঃ ফণিজ্জকাপরপর্যাযঃ| ক্বাথমিত্যত্র কল্কমিত্যন্যে| পিবেত্ পরং শীতীকৃতং, মধুনা উষ্ণেন সহ নিষিদ্ধত্বাত্; মধু চাত্র ক্বাথ্যদ্রব্যচতুর্থাংশম্||১৮৬||-

Adhikarana 130 (187) · Śloka 188

কটুত্রিকং নাগপুষ্পং হরিদ্রা কটুরোহিণী ||১৮৭|| কৌটজং চ ফলং হন্যাত্ সেব্যমানং কফজ্বরম্ |১৮৮|

কটুত্রিকমিত্যাদি| নাগপুষ্পং নাগকেশরম্| সেব্যমানম্ অসকৃদুপযোগাত্||১৮৭||-

Adhikarana 131 (188-189) · Śloka 189

হরিদ্রাং চিত্রকং নিম্বমুশীরাতিবিষে বচাম্ ||১৮৮|| কুষ্ঠমিন্দ্রযবান্ মূর্বাং পটোলং চাপি সাধিতম্ | পিবেন্মরিচসংযুক্তং সক্ষৌদ্রং কফজে জ্বরে ||১৮৯||

হরিদ্রামিত্যাদি| মূর্বা চোরস্নাযুঃ, ‘সক্ষৌদ্রং’ ইত্যত্র ‘সগুডং’ ইত্যন্যে পঠন্তি||১৮৮-১৮৯||

Adhikarana 132 (190) · Śloka 190

সারিবাতিবিষাকুষ্ঠপুরাখ্যৈঃ সদুরালভৈঃ | মুস্তেন চ কৃতঃ ক্বাথঃ পীতো হন্যাত্ কফজ্বরম্ ||১৯০||

সারিবাতিবিষাকুষ্ঠেত্যাদি| পুরো গুগ্গুলুঃ||১৯০||

Adhikarana 133 (191) · Śloka 191

মুস্তং বৃক্ষকবীজানি ত্রিফলা কটুরোহিণী | পরূষকাণি চ ক্বাথঃ কফজ্বরবিনাশনঃ ||১৯১||

মুস্তমিত্যাদি| বৃক্ষকবীজানি ইন্দ্রযবাঃ||১৯১||

Adhikarana 134 (192) · Śloka 192

রাজবৃক্ষাদিবর্গস্য কষাযো মধুসংযুতঃ | কফবাতজ্বরং হন্যাচ্ছীঘ্রং কালেঽবচারিতঃ ||১৯২||

ইদানীং যদ্যপ্যুদ্দেশশাস্ত্রসামর্থ্যাত্ কফজ্বরচিকিত্সানন্তরং সন্নিপাতজ্বরচিকিত্সিতং পঠিতুমুচিতং, তথাঽপি সন্নিপাতে দ্বন্দ্বজচিকিত্সা কর্তব্যেতি দর্শনার্থং পূর্বং দ্বন্দ্বজচিকিত্সামাহ- রাজবৃক্ষাদিবর্গস্যেত্যাদি| রাজবৃক্ষাদিঃ আরগ্বধাদিঃ, কালেঽবচারিত ঔষধকালে দত্তঃ| পূর্বোক্তং বাতপিত্তদ্বন্দ্বজক্রমং বিহায বাতশ্লেষ্মদ্বন্দ্বজচিকিত্সিতং প্রথমং যদত্র কৃতং তত্ কেবলকফজ্বরেঽপি বাতশ্লেষ্মদ্বন্দ্বজচিকিত্সিতং বিধেযমিতি দর্শনার্থম্||১৯২||

Adhikarana 135 (193-194) · Śloka 195

নাগরং ধান্যকং ভার্গীমভযাং সুরদারু চ | বচাং পর্পটকং মুস্তং ভূতীকমথ কট্ফলম্ ||১৯৩|| নিষ্ক্বাথ্য কফবাতোত্থে ক্ষৌদ্রহিঙ্গুসমন্বিতম্ | দা(পা)তব্যং শ্বাসকাসঘ্নং শ্লেষ্মোত্সেকে গলগ্রহে ||১৯৪|| হিক্কাসু কণ্ঠশ্বযথৌ শূলে হৃদযপার্শ্বজে |১৯৫|

নাগরমিত্যাদি| ভূতীকং সুগন্ধিতৃণং ‘রোহিষং’ ইতি প্রসিদ্ধম্| নিষ্ক্বাথ্য পূর্বোক্তযা কষাযকল্পনযা| মধু কর্ষপ্রমাণম্| হিঙ্গু মাষকপ্রমাণং, “মাষিকে হিঙ্গুসিন্ধূত্থে” ইতি বচনাত্| শ্লেষ্মোত্সেকে শ্লেষ্মবৃদ্ধৌ| হৃদযপার্শ্বজে ইত্যত্রাপি ‘শূলে’ ইতি সম্বধ্যতে| এষ যোগঃ শৃঙ্গীসহিতঃ কট্ফলাদিঃ| কেচিদমুং পাঠং দেবদার্বভযেত্যাদিনা পঠন্তি||১৯৩-১৯৪||-

Adhikarana 136 (195-198) · Śloka 199

বলাপটোলত্রিফলাযষ্ট্যাহ্বানাং বৃষস্য চ ||১৯৫|| ক্বাথো মধুযুতঃ পীতো হন্তি পিত্তকফজ্বরম্ | কটুকাবিজযাদ্রাক্ষামুস্তপর্পটকৈঃ কৃতঃ ||১৯৬|| কষাযো নাশযেত্ পীতঃ শ্লেষ্মপিত্তভবং জ্বরম্ | ভার্গীবচাপর্পটকধান্যহিঙ্গ্বভযাঘনৈঃ ||১৯৭|| কাশ্মর্যনাগরৈঃ ক্বাথঃ সক্ষৌদ্রঃ শ্লেষ্মপিত্তজে | সশর্করামক্ষমাত্রাং কটুকামুষ্ণবারিণা ||১৯৮|| পীত্বা জ্বরং জযেজ্জন্তুঃ কফপিত্তসমুদ্ভবম্ |১৯৯|

বলাপটোলত্রিফলেত্যাদি| বিজযা হরীতকী| ভার্গীবচেত্যাদি| অক্ষমাত্রাং কর্ষপ্রমাণাম্||১৯৫-১৯৮||-

Adhikarana 137 (199-200) · Śloka 201

কিরাততিক্তমমৃতাং দ্রাক্ষামামলকং শটীম্ ||১৯৯|| নিষ্ক্বাথ্য বাতপিত্তোত্থে তং ক্বাথং সগুডং পিবেত্ | রাস্না বৃষোঽথ ত্রিফলা রাজবৃক্ষফলৈঃ সহ ||২০০|| কষাযঃ সাধিতঃ পীতো বাতপিত্তজ্বরং জযেত্ |২০১|

কিরাততিক্তমিত্যাদি| জেজ্জটাচার্যস্তু সন্নিপাতজ্বরচিকিত্সাং পঠিত্বা দ্বন্দ্বজচিকিত্সাং পঠতি, ‘দোষৈঃ পৃথক্ সমস্তৈশ্চ দ্বন্দ্বৈরাগন্তুভিস্তথা’ ইত্যুক্তত্বাত্||১৯৯-২০০||-

Adhikarana 138 (201) · Śloka 201

সর্বদোষসমুত্থে তু সংসৃষ্টানবচারযেত্ ||২০১||

ইদানীং সমসন্নিপাতজ্বরচিকিত্সামাহ- সর্বদোষেত্যাদি| সর্বদোষসমুত্থে সমসন্নিপাতে| সংসৃষ্টানবচারযেদিতি বাতাদিবিহিতান্ কষাযানেকীকৃত্য প্রযুঞ্জীতেত্যর্থঃ| অস্যাগ্রে কেচিত্ ‘বর্ধনৈঃ ক্ষপণৈর্বাপি’ ইত্যাদিকং পাঠং পঠন্তি, স চ বর্তমানেষু পুস্তকেষু ন দৃশ্যতে, অতো ন লিখিতঃ||২০১||

Adhikarana 139 (202) · Śloka 202

যথাদোষোচ্ছ্রযং চাপি জ্বরান্ সর্বানুপাচরেত্ |২০২|

বিষমসন্নিপাতচিকিত্সামাহ- যথাদোষোচ্ছ্রযমিত্যাদি| যথাদোষোচ্ছ্রযমিতি যস্য দোষস্য উচ্ছ্রযো ভবতি তদ্দোষপ্রতীকারেণেত্যর্থঃ| সর্বান্ বিষমসন্নিপাতজ্বরান্| এতত্ সামান্যং সর্বেষামেব জ্বরাণাং চিকিত্সিতেষু আগন্তূনামপি চিকিত্সিতে চ|২০২|-

Adhikarana 140 (202) · Śloka 203

বৃশ্চীববিল্ববর্ষাভ্বঃ পযশ্চোদকমেব চ ||২০২|| পচেত্ ক্ষীরাবশিষ্টং তু তদ্ধি সর্বজ্বরাপহম্ |২০৩|

সামান্যসন্নিপাতচিকিত্সাং নির্দিদিক্ষুরাদৌ ক্ষীরস্য জীবনতযা ক্ষীরপ্রযোগমাহ- বৃশ্চীবেত্যাদি| বৃশ্চীবঃ শ্বেতপুনর্নবা, বর্ষাভূঃ রক্তপুনর্নবা| পচেদিতি “দ্রব্যাদষ্টগুণং ক্ষীরং ক্ষীরাত্তোযং চতুর্গুণম্| ক্ষীরাবশেষং কর্তব্যং ক্ষীরপাকে ত্বযং বিধিঃ”- ইতি পরিভাষযা| কেচিদগ্রিমশ্লোকোক্তমেবোদকপ্রমাণমিচ্ছন্তি| অন্যে এনং যোগদ্বযং মন্যন্তে, তন্ত্রান্তরোক্তত্বাত্; বৃশ্চীববিল্বমিত্যেকো যোগঃ, বর্ষাভ্বাদিঃ দ্বিতীযঃ||২০২||-

Adhikarana 141 (203) · Śloka 204

উদকাংশাস্ত্রযঃ ক্ষীরং শিংশপাসারসংযুতম্ ||২০৩|| তত্ ক্ষীরশেষং ক্বথিতং পেযং সর্বজ্বরাপহম্ |২০৪|

সন্নিপাতেঽপরমপি ক্ষীরযোগমাহ- উদকাংশাস্ত্রয ইত্যাদি| উদকাংশাস্ত্রযঃ ক্ষীরাংশাপেক্ষযা, ক্ষীরস্যাষ্টৌ পলানি, শিংশপাসারঃ পলপ্রমিতঃ||২০৩||-

Adhikarana 142 (204-207) · Śloka 207

নলবেতসযোর্মূলে মূর্বাযাং দেবদারুণি ||২০৪|| কষাযং বিধিবত্ কৃত্বা পেযমেতজ্জ্বরাপহম্ | হরিদ্রা ভদ্রমুস্তং চ ত্রিফলা কটুরোহিণী ||২০৫|| পিচুমন্দঃ পটোলী চ দেবদারু নিদিগ্ধিকা | এষাং কষাযঃ পীতস্তু সন্নিপাতজ্বরং জযেত্ ||২০৬|| অবিপক্তিং প্রসেকং চ শোফং কাসমরোচকম্ | ত্রৈফলো বা সসর্পিষ্কঃ ক্বাথঃ পেযস্ত্রিদোষজে ||২০৭||

নলবেতসযোরিত্যাদি| কষাযং বিধিবত্ কৃত্বেতি পূর্বোক্তকষাযকল্পনযা| ক্ষীরসাধ্যাযামবস্থাযামযমপি যোগো দেযঃ| কেচিন্নলবেতসাদিযোগং ন পঠন্তি; স চ পঠনীযঃ, সর্বনিবন্ধকারৈঃ পঠিতত্বাত্||২০৪-২০৭||

Adhikarana 143 (208) · Śloka 209

অনন্তাং বালকং মুস্তাং নাগরং কটুরোহিণীম্ সুখাম্বুনা প্রাগুদযাত্পাযযেতাক্ষসম্মিতম্ ||২০৮|| এষ সর্বজ্বরান্ হন্তি দীপযত্যাশু চানলম্ |২০৯|

অনন্তামিত্যাদি| অনন্তা দুরালভা| সুখাম্বুনা অত্রোষ্ণোদকেন পলপ্রমিতেন| প্রাগুদযাদিতি অত্রোদযঃ সূর্যস্য বোদ্ধব্যঃ; ন তু জ্বরস্য; তেন সূর্যোদযাত্ পূর্বং দেযং, এতেন প্রাতরেব| অক্ষসম্মিতং কর্ষসমম্| সুখাম্বুনা প্রাগুদযাত্’ ইত্যত্র ‘পিষ্ট্বা সুখাম্বুনা কল্কং’ ইতি কেচিত্ পঠন্তি||২০৮||-

Adhikarana 144 (209) · Śloka 210

দ্রব্যাণি দীপনীযানি তথা বৈরেচনানি চ ||২০৯|| একশো বা দ্বিশো বাঽপি জ্বরঘ্নানি প্রযোজযেত্ |২১০|

ইদানীমুক্তানুক্তসঙ্গ্রহার্থমাহ- দ্রব্যাণি দীপনীযানীত্যাদি| দীপনীযানি পিপ্পল্যাদীনি, বৈরেচনানি ত্রিবৃদভযাদীনি, জ্বরঘ্নানি দীর্ঘজ্বরঘ্নানি| প্রযোজযেত্ দোষবলমপেক্ষ্য সন্নিপাতজীর্ণজ্বরাবস্থাযামেকশো দ্বিশো বা দাপযেত্| যে ত্বেবং বদন্তি- পিপ্পল্যাদীনি প্রাযশঃ কটুকানি, তানি চ জ্বরে ন প্রাযোগিকান্যুষ্ণবীর্যত্বাত্; বিরেচনান্যপি গুরুত্বাদযৌগিকানি; তেষাং সম্যক্ শাস্ত্রাববোধো নাস্তি, পিপ্পল্যাদীনাং জ্বরে পঠিতত্বাত্||২০৯||-

Adhikarana 145 (210) · Śloka 211

সর্পির্মধ্বভযাতৈললেহোঽযং সর্বজং জ্বরম্ ||২১০|| শান্তিং নযেত্ত্রিবৃচ্চাপি সক্ষৌদ্রা প্রবলং জ্বরম্ |২১১|

সর্পিরিত্যাদি| প্রবলং দাহাদিসমন্বিতম্| লেহাবস্থা চ তন্ত্রান্তরাজ্জ্ঞেযা| তথা চ তন্ত্রান্তরং- “পথ্যাতৈলঘৃতক্ষৌদ্রৈর্লেহো দাহশ্রমজ্বরান্| কাসাসৃক্পিত্তবীসর্পশ্বাসান্ হন্তি বমীরপি”- ইতি| ‘সক্ষৌদ্রা বিষমজ্বরং’ ইতি কেচিত্ পঠন্তি; তন্ন, বিষমজ্বরস্য পরতোঽভিধাস্যমানত্বাত্||২১০||-

Adhikarana 146 (211) · Śloka 211

জ্বরে তু বিষমে কার্যমূর্ধ্বং চাধশ্চ শোধনম্ ||২১১||

ইদানীং বিষমজ্বরচিকিত্সামাহ- জ্বরে ত্বিত্যাদি| ঊর্ধ্বশোধনং বমনং, তচ্চ কফাধিকে বিষমজ্বরে| অধঃশোধনং বিরেচনং, তচ্চ পিত্তাধিকে| এতেন সর্বেষ্বেব বিষমজ্বরেষু কফপিত্তাধিকতযা বমনবিরেচনে প্রযোক্তব্যে ইত্যুক্তম্| অন্যে তু বিষমজ্বরে ইত্যত্র যদ্যপি বিষমজ্বরশব্দেন সন্ততং বিহাযান্যে বিষমজ্বরাঃ প্রোক্তাঃ, তথাঽপ্যত্র তৃতীযচতুর্থকৌ গ্রাহ্যৌ, যতস্তযোরেব সাধারণং বাতাদিহরমাস্থাপনবিরেচনবমনাদিকং যুক্তমিতি ব্যাচক্ষতে||২১১||

Adhikarana 147 (212) · Śloka 212

ঘৃতং প্লীহোদরোক্তং বা নিহন্যাদ্বিষমজ্বরম্ |২১২|

ঘৃতমিত্যাদি| প্লীহোদরোক্তং ঘৃতং ষট্পলং, তচ্চ কফোত্তরে বিষমজ্বরে দেযং, তীক্ষ্ণত্বাত্|২১২|-

Adhikarana 148 (212) · Śloka 212

গুডপ্রগাঢাং ত্রিফলাং পিবেদ্বা বিষমার্দিতঃ ||২১২||

গুডপ্রগাঢামিত্যাদি| গুডপ্রগাঢাং কিঞ্চিদধিককর্ষগুডপ্রতিবাপযুতাং ত্রিফলাং পিবেত্, ‘ক্বথিতাং’ ইতি শেষঃ| বিষমার্দিতো বিষমজ্বরপীডিতঃ||২১২||

Adhikarana 149 (213) · Śloka 213

গুডূচীনিম্বধাত্রীণাং কষাযং বা সমাক্ষিকম্ |২১৩|

গুডূচীনিম্বধাত্রীণামিত্যাদি| ধাত্রী আমলকী| এষ যোগশ্চাতুর্থকজ্বরঘ্নঃ, সমানতন্ত্রোক্তত্বাত্|২১৩|-

Adhikarana 150 (213) · Śloka 213

প্রাতঃ প্রাতঃ সসর্পিষ্কং রসোনমুপযোজযেত্ ||২১৩||

প্রাতঃ প্রাতঃ সসর্পিষ্কমিত্যাদি||২১৩||

Adhikarana 151 (214) · Śloka 215

ত্রিচতুর্ভিঃ পিবেত্ ক্বাথং পঞ্চভির্বা সমন্বিতৈঃ | মধুকস্য পটোলস্য রোহিণ্যা মুস্তকস্য চ ||২১৪|| হরীতক্যাশ্চ সর্বোঽযং ত্রিবিধো যোগ ইষ্যতে |২১৫|

মধুকাদীনাং হরীতক্যন্তানাং দ্রব্যাণাং ত্রিভিঃ, চতুর্ভিঃ, পঞ্চভির্বা দ্রব্যৈঃ সমন্বিতৈঃ কৃতং ক্বাথং পিবেদিতি সম্বন্ধঃ| মধুকং যষ্টীমধু, রোহিণী কটুকা, মুস্তং প্রসিদ্ধম্| সর্বোঽযং ত্রিবিধো যোগ ইষ্যতে; অযং মধুকাদিযোগস্ত্রিপ্রকারো বক্ষ্যতে| কথং? মধুকপটোলরোহিণীভিস্ত্রিরেকো যোগঃ, মধুকপটোলরোহিণীমুস্তকৈশ্চতুর্ভির্দ্বিতীযঃ, মধুকপটোলরোহিণীমুস্তকহরীতকীভিঃ পঞ্চভিস্তৃতীযঃ, এবং ত্রযো যোগাঃ| কেচিন্মুস্তকস্থানে ‘বত্সকং’ পঠিত্বাঽন্যথা ব্যাখ্যানযন্তি; তদ্যথা- মধুকাদিহরীতকীপর্যন্তানাং দ্রব্যাণাং রসভেদবত্ ত্রিযোগচতুষ্কসংযোগপঞ্চসংযোগসংস্কৃতং ক্বাথং পিবেত্; তদ্যথা,- মধুকপটোলরোহিণীভিঃ, মধুকপটোলবত্সকৈঃ, মধুকপটোলহরীতকীভিঃ, মধুকরোহিণীবত্সকৈঃ, মধুকরোহিণীহরীতকীভিঃ, মধুকবত্সকহরীতকীভিঃ, পটোলরোহিণীবত্সকৈঃ, পটোলবত্সকহরীতকীভিঃ, পটোলরোহিণীহরীতকীভিঃ, রোহিণীবত্সকহরীতকীভিঃ, এবং ত্রিভির্দ্রব্যৈর্দশবিকল্পা ভবন্তি; মধুকপটোলরোহিণীবত্সকৈঃ, মধুকপটোলরোহিণীহরীতকীভিঃ, মধুকরোহিণীবত্সকহরীতকীভিঃ, মধুকপটোলবত্সকহরীতকীভিঃ, পটোলরোহিণীবত্সকহরীতকীভিঃ, এবং চতুর্ভিঃ পঞ্চ বিকল্পাঃ; মধুকরোহিণীবত্সকপটোলকহরীতকীভিঃ পঞ্চভিরেকঃ; ইত্থং ত্রিপ্রকরস্যাপি যোগস্য ষোডশ বিকল্পা ভবন্তি, তে চ সূক্ষ্মমতিনা বৈদ্যেন দোষাপেক্ষযা প্রযোক্তব্যাঃ||২১৪||-

Adhikarana 152 (215) · Śloka 216

সর্পিঃক্ষীরসিতাক্ষৌদ্রমাগধীর্বা যথাবলম্ ||২১৫|| দশমূলীকষাযেণ মাগধীর্বা প্রযোজযেত্ |২১৬|

সর্পিঃক্ষীরসিতাক্ষৌদ্রেত্যাদি| সর্পিঃপ্রভৃতীনাং সমুদিতানামযং প্রযোগো বিষমজ্বরে জ্ঞেযঃ| দশমূলীকষাযেণ পাতব্যকষাযকল্পনযা ক্বথিতেন, কর্ষণপ্রমাণাং পিপ্পলীং পিবেত্, যস্মাদযং পিপ্পলীবর্ধমানো ন ভবতি||২১৫||-

Adhikarana 153 (216) · Śloka 216

পিপ্পলীবর্ধমানং বা পিবেত্ ক্ষীররসাশনঃ ||২১৬||

বর্ধমানপিপ্পলীপ্রযোগমাহ- পিপ্পলীবর্ধমানমিত্যাদি| বর্ধমানপিপ্পলীপ্রযোগো বাতব্যাধিচিকিত্সিতমবলোক্য কর্তব্যঃ||২১৬||

Adhikarana 154 (217) · Śloka 217

তাম্রচূডস্য মাংসেন পিবেদ্বা মদ্যমুত্তমম্ |২১৭|

তাম্রচূডস্যেত্যাদি| তাম্রচূডঃ কুক্কুটঃ| মদ্যমুত্তমং মার্দ্বীকং সস্যকং চ| জেজ্জটাচার্যস্তু মার্দ্বীকস্থানে মাধ্বীকমাহ| কুক্কুটমাংসেন সহোত্তমমদ্যপানং বাতপ্রধানস্য মন্দাগ্নেশ্চ| এতানি বক্ষ্যমাণানি পূর্বোক্তানি চ যদ্যপি বিষমজ্বরে পঠিতানি, তথাঽপি জীর্ণজ্বরেঽপি দেযানি|২১৭|-

Adhikarana 155 (217) · Śloka 218

কোলাগ্নিমন্থত্রিফলাক্বাথে দধ্না ঘৃতং পচেত্ ||২১৭|| তিল্বকাবাপমেতদ্ধি বিষমজ্বরনাশনম্ |২১৮|

কোলাগ্নিমন্থত্রিফলেত্যাদি| কোলং পঞ্চকোলং, তিল্বকঃ পট্টিকারোধ্রঃ| কল্পনামাহ- পঞ্চকোলাদিদ্রব্যাণাং পলশতং, পানীযপলানি দ্বাদশাধিকানি পঞ্চশতানি, একীকৃত্য বিপচেত্, যাবচ্চতুর্থাংশমষ্টাবিংশত্যধিকশতং নিষ্পদ্যতে; তেন ক্বাথেন চতুর্গুণেন তথা চতুর্গুণেন চ দধ্না দ্বাত্রিংশত্পলপ্রমিতং ঘৃতম্, অষ্টপলপ্রমাণং তিল্বকাবাপং দত্ত্বা পচেত্| অনেন বিধিনাঽনুক্তপ্রমাণানি তৈলঘৃতানি পাচনীযানি| ব্রহ্মদেবাচার্যস্তু পঞ্চকোলাদীনাং কষাযত্রযেণ পৃথক্ স্নেহচতুর্গুণেন তথা চতুর্থেন দধ্না স্নেহচতুর্গুণেন চ ঘৃতং তিল্বকাবাপং সাধযতি; তচ্চ প্রমাদব্যাখ্যানং, পঞ্চকোলাদিকষাযত্রযস্য জেজ্জটাদিষ্বনুক্তেঃ||২১৭||-

Adhikarana 156 (218-220) · Śloka 221

পিপ্পল্যতিবিষাদ্রাক্ষাসারিবাবিল্বচন্দনৈঃ ||২১৮|| কটুকেন্দ্রযবোশীরসিংহীতামলকীঘনৈঃ | ত্রাযমাণাস্থিরাধাত্রীবিশ্বভেষজচিত্রকৈঃ ||২১৯|| পক্বমেতৈর্ঘৃতং পীতং বিজিত্য বিষমাগ্নিতাম্ | জীর্ণজ্বরশিরঃশূলগুল্মোদরহলীমকান্ ||২২০|| ক্ষযকাসং সসন্তাপং পার্শ্বশূলানপাস্যতি |২২১|

পিপ্পল্যতিবিষেত্যাদি| সারিবা উত্পলসারিবা সুগন্ধমূলা, সিংহী বৃহত্কণ্টকারিকা, তামলকী দরফলিকা, ভূম্যামলকীতি লোকে, স্থিরা শালপর্ণী, তেষাং কল্ককষাযাভ্যাং ঘৃতং সাধযেত্||২১৮-২২০||-

Adhikarana 157 (221-222) · Śloka 223

গুডূচীত্রিফলাবাসাত্রাযমাণাযবাসকৈঃ ||২২১|| ক্বথিতৈর্বিধিবত্পক্বমেতৈঃ কল্কীকৃতৈঃ সমৈঃ | দ্রাক্ষামাগধিকাম্ভোদনাগরোত্পলচন্দনৈঃ ||২২২|| পীতং সর্পিঃ ক্ষযশ্বাসকাসজীর্ণজ্বরান্ জযেত্ |২২৩|

গুডূচীত্রিফলেত্যাদি| এভিঃ দ্রাক্ষাদিভিঃ||২২১-২২২||-

Adhikarana 158 (223-225) · Śloka 226

কলশীবৃহতীদ্রাক্ষাত্রাযন্তীনিম্বগোক্ষুরৈঃ ||২২৩|| বলাপর্পটকাম্ভোদশালপর্ণীযবাসকৈঃ | পক্বমুত্ক্বথিতৈঃ সর্পিঃ কল্কৈরেভিঃ সমন্বিতম্ ||২২৪|| শটীতামলকীভার্গীমেদামলকপৌষ্করৈঃ | ক্ষীরদ্বিগুণসংযুক্তং জীর্ণজ্বরমপোহতি ||২২৫|| শিরঃপার্শ্বরুজাকাসক্ষযপ্রশমনং পরম্ |২২৬|

কলশীত্যাদি| কলশী পৃশ্নিপর্ণী, ত্রাযন্তী ত্রাযমাণা, অম্ভোদো মুস্তা| এভিঃ শট্যাদিভিঃ| অনুক্তমপি চতুর্গুণং জলং দেযং, তদ্বিনা পাকো ন স্যাদিতি বৃদ্ধভিষজঃ||২২৩-২২৫||-

Adhikarana 159 (226-228) · Śloka 229

পটোলীপর্পটারিষ্টগুডূচীত্রিফলাবৃষৈঃ ||২২৬|| কটুকাম্বুদভূনিম্বযাসযষ্ট্যাহ্বচন্দনৈঃ | দার্বীশক্রযবোশীরত্রাযমাণাকণোত্পলৈঃ ||২২৭|| ধাত্রীভৃঙ্গরজোভীরুকাকমাচীরসৈর্ঘৃতম্ | সিদ্ধমাশ্বপচীকুষ্ঠজ্বরশুক্রার্জুনব্রণান্ ||২২৮|| হন্যান্নযনবদনশ্রবণঘ্রাণজান্ গদান্ |২২৯|

পটোলীপর্পটারিষ্টেত্যাদি| পটোল্যাদীনাং কুষ্ঠান্তানাং কল্কৈঃ, ধাত্র্যাদীনাং স্বরসৈশ্চ ঘৃতং পাচনীযম্| অরিষ্টো নিম্বঃ, বৃষো বাসকঃ, অম্বুদো মুস্তং, ভূনিম্বঃ কিরাততিক্তকঃ, যাসো দুরালভা, শক্রযবঃ ইন্দ্রযবঃ, উত্পলং কুষ্ঠম্ ||২২৬-২২৮||-

Adhikarana 160 (229-233) · Śloka 234

বিডঙ্গত্রিফলামুস্তমঞ্জিষ্ঠাদাডিমোত্পলৈঃ ||২২৯|| প্রিযঙ্গ্বেলৈলবালূকচন্দনামরদারুভিঃ | বর্হিষ্ঠকুষ্ঠরজনীপার্ণিনীসারিবাদ্বযৈঃ ||২৩০|| হরেণুকাত্রিবৃদ্দন্তীবচাতালীশকেসরৈঃ | দ্বিক্ষীরং বিপচেত্সর্পির্মালতীকুসুমৈঃ সহ ||২৩১|| জীর্ণজ্বরশ্বাসকাসগুল্মোন্মাদগরাপহম্ | এতত্কল্যাণকং নাম সর্পির্মাঙ্গল্যমুত্তমম্ ||২৩২|| অলক্ষ্মীগ্রহরক্ষোগ্নিমান্দ্যাপস্মারপাপনুত্ | শস্যতে নষ্টশুক্রাণাং বন্ধ্যানাং গর্ভদং পরম্ ||২৩৩|| মেধ্যং চক্ষুষ্যমাযুষ্যং রেতোমার্গবিশোধনম্ |২৩৪|

বিডঙ্গত্রিফলামুস্তেত্যাদি| উত্পলং নীলোত্পলং, এলা সূক্ষ্মৈলা, এলবালুকং কুষ্ঠগন্ধিকং, চন্দনং রক্তচন্দনং, অমরদারুঃ দেবদারুঃ, বর্হিষ্ঠং বালুকং, রজনীদ্বযং পিণ্ডহরিদ্রা দারুহরিদ্রা চ, পর্ণিনীদ্বযং শালপর্ণী পৃশ্নিপর্ণী চ, সারিবাদ্বযং সারিবা উত্পলসারিবা চ| বিডঙ্গাদিদ্রব্যকল্কমষ্টপলপ্রমাণং গব্যঘৃতপ্রস্থং চোদকস্য চতুর্ভিঃ প্রস্থৈঃ সাধযেত্| কার্তিককুণ্ডস্তু ইদং ঘৃতমন্যথা পঠতি, স চাদর্শনান্ন লিখিতঃ||২২৯-২৩৩||-

Adhikarana 161 (234-239) · Śloka 240

এতৈরেব তথা দ্রব্যৈঃ সর্বগন্ধৈশ্চ সাধিতম্ ||২৩৪|| কপিলাযা ঘৃতপ্রস্থং সুবর্ণমণিসংযুতম্ | তত্ক্ষীরেণ সহৈকধ্যং প্রসাধ্য কুসুমৈরিমৈঃ ||২৩৫|| সুমনশ্চম্পকাশোকশিরীষকুসুমৈর্বৃতম্ | তথা নলদপদ্মানাং কেশরৈর্দাডিমস্য চ ||২৩৬|| তিথৌ প্রশস্তে নক্ষত্রে সাধকস্যাতুরস্য চ | কৃতং মনুষ্যদেবায ব্রাহ্মণৈরভিমন্ত্রিতম্ ||২৩৭|| দত্তং সর্বজ্বরান্ হন্তি মহাকল্যাণকং ত্বিদম্ ||২৩৮|| দর্শনস্পর্শনাভ্যাং চ সর্বরোগহরং শিবম্ | অধৃষ্যঃ সর্বভূতানাং বলীপলিতবর্জিতঃ ||২৩৯|| অস্যাভ্যাসাদ্ঘৃতস্যেহ জীবেদ্বর্ষশতত্রযম্ |২৪০|

মহাকল্যাণকমাহ- এতৈরেব তথা দ্রব্যৈরিত্যাদি| এতৈর্দ্রব্যৈস্তথা সর্বগন্ধৈশ্চ কপিলাঘৃতপ্রস্থং সুবর্ণাদিযুক্তং, তত্সাধিতং সর্পিরেতৈঃ সুমনাদিজৈঃ কুসুমৈঃ কপিলাক্ষীরেণ সহৈকধ্যং কৃতং, পুনঃ প্রসাধ্য ব্রাহ্মণৈরভিমন্ত্রিতং, বৈদ্যাতুরযোঃ প্রশস্ততিথ্যাদৌ মনুষ্যদেবায রাজ্ঞে দত্তমিদং কল্যাণকং ঘৃতং সর্বজ্বরান্ হন্তীতি পিণ্ডার্থঃ| এতৈঃ কল্যাণকোক্তৈর্বিডঙ্গাদিভিঃ, সর্বগন্ধৈঃ এলাদিপঠিতৈঃ, মণিভিঃ স্ফটিকাদিভিঃ| তত্ক্ষীরেণ কপিলাক্ষীরেণ| সুমনা জাতী, বৃতং যুক্তং, নলদং মাংসী, পদ্মং লোহিতপদ্মম্| সাধকস্য বৈদ্যস্য| মনুষ্যদেবায নৃপতযে| অধৃষ্যঃ অজেযঃ| এতদ্ঘৃতং পাকদ্বযসাধিতং বোদ্ধব্যম্||২৩৪-২৩৯||-

Adhikarana 162 (240-242) · Śloka 242

গব্যং দধি চ মূত্রং চ ক্ষীরং সর্পিঃ শকৃদ্রসঃ ||২৪০|| সমভাগানি পাচ্যানি কল্কাংশ্চৈতান্ সমাবপেত্ | ত্রিফলাং চিত্রকং মুস্তং হরিদ্রাতিবিষে বচাম্ ||২৪১|| বিডঙ্গং ত্র্যূষণং চব্যং সুরদারু তথৈব চ | পঞ্চগব্যমিদং পানাদ্বিষমজ্বরনাশনম্ ||২৪২||

গব্যমিত্যাদি| শকৃদ্রসো গোপুরীষোত্থরসঃ| পাচ্যানি পচনীযানি| কল্কপ্রমাণমত্র স্নেহচতুর্থাংশম্||২৪০-২৪২||

Adhikarana 163 (243) · Śloka 243

পঞ্চগব্যমৃতে গর্ভাত্পাচ্যমন্যদ্... |২৪৩|

অগর্ভপঞ্চগব্যমাহ- পঞ্চগব্যমৃতে গর্ভাদিত্যাদি| অন্যত্ দ্বিতীযং পঞ্চগব্যম্| ঋতে গর্ভাদিতি দ্বিতীযং পঞ্চগব্যং কল্কং বিনা পচনীযম্; এতেনৈতদুক্তং ভবতি- পূর্বং পঞ্চগব্যং সকল্কং, এতচ্চ দ্বিতীযমকল্কং; ফলং চ তুল্যম্|২৪৩|-

Adhikarana 164 (243) · Śloka 244

... বৃষেণ চ | বলযাঽথ পরং পাচ্যং গুডূচ্যা তদ্বদেব তু ||২৪৩|| জীর্ণজ্বরে চ শোফে চ পাণ্ডুরোগে চ পূজিতম্ |২৪৪|

ইদানীং পঞ্চগব্যোক্তত্রিফলাদিকল্কেন বৃষাদিপৃথক্স্বরসত্রযেণ ঘৃতত্রযস্য সাধনং নির্দিশন্নাহ- বৃষেণ চেত্যাদি| তদ্বদিতি পূর্বোক্তকল্পনযেত্যর্থঃ | তদ্বচ্ছব্দো ঘৃতত্রযেঽপি সম্বধ্যতে||২৪৩||-

Adhikarana 165 (244) · Śloka 244

এতেনৈব তু কল্পেন ঘৃতং পঞ্চাবিকং পচেত্ | পঞ্চাজং পঞ্চমহিষং চতুরুষ্ট্রমথাপি চ ||২৪৪||

ইদানীং পঞ্চগব্যোক্তবিধিনা পঞ্চাবিকাদীনি ঘৃতানি পচনীযানীতি দর্শযন্নাহ- এতেনৈব তু কল্পেনেত্যাদি| অনেনৈব কল্পেন পূর্বোক্তপঞ্চগব্যবিধিনা| চতুরুষ্ট্রং শকৃদ্রসবর্জনেন||২৪৪||

Adhikarana 166 (245-253) · Śloka 254

ত্রিফলোশীরশম্পাককটুকাতিবিষাঘনৈঃ | শতাবরীসপ্তপর্ণগুডূচীরজনীদ্বযৈঃ ||২৪৫|| চিত্রকত্রিবৃতামূর্বাপটোলারিষ্টবালকৈঃ | কিরাততিক্তকবচাবিশালাপদ্মকোত্পলৈঃ ||২৪৬|| সারিবাদ্বযযষ্ট্যাহ্বচবিকারক্তচন্দনৈঃ | দুরালভাপর্পটকত্রাযমাণাটরূষকৈঃ ||২৪৭|| রাস্নাকুঙ্কুমমঞ্জিষ্ঠামাগধীনাগরৈস্তথা | ধাত্রীফলরসৈঃ সম্যগ্দ্বিগুণৈঃ সাধিতং হবিঃ ||২৪৮|| পরিসর্পজ্বরশ্বাসগুল্মকুষ্ঠনিবারণম্ | পাণ্ডুপ্লীহাগ্নিসাদিভ্য এতদেব পরং হিতম্ ||২৪৯|| পটোলকটুকাদার্বীনিম্ববাসাফলত্রিকম্ | দুরালভাপর্পটকত্রাযমাণাঃ পলোন্মিতাঃ ||২৫০|| প্রস্থমামলকানাং চ ক্বাথযেত্সলিলার্মণে | তেন পাদাবশেষেণ ঘৃতপ্রস্থং বিপাচযেত্ ||২৫১|| কল্কৈঃ কুটজভূনিম্বঘনযষ্ট্যাহ্বচন্দনৈঃ | সপিপ্পলীকৈস্তত্সিদ্ধং চক্ষুষ্যং শুক্লযোর্হিতম্ ||২৫২|| ঘ্রাণকর্ণাক্ষিবদনবর্ত্মরোগব্রণাপহম্ | রক্তপিত্তকফস্বেদক্লেদপূযোপশোষণম্ ||২৫৩|| কামলাজ্বরবীসর্পগণ্ডমালাহরং পরম্ |২৫৪|

ত্রিফলেত্যাদি| শুক্লযোঃ নেত্রগতরোগযোঃ||২৪৫-২৫৩||-

Adhikarana 167 (254-255) · Śloka 255

শৃতং পযঃ শর্করা চ পিপ্পল্যো মধুসর্পিষী ||২৫৪|| পঞ্চসারমিদং পেযং মথিতং বিষমজ্বরে | ক্ষতক্ষীণে ক্ষযে শ্বাসে হৃদ্রোগে চৈতদিষ্যতে ||২৫৫||

পঞ্চসারমাহ- শৃতং পয ইত্যাদি| শৃতং পযঃ ক্বথিতং দুগ্ধং, মথিতং ‘হস্তেন’ ইতি শেষঃ||২৫৪-২৫৫||

Adhikarana 168 (256) · Śloka 256

লাক্ষাবিশ্বনিশামূর্বামঞ্জিষ্ঠাস্বর্জিকামযৈঃ | ষড্গুণেন চ তক্রেণ সিদ্ধং তৈলং জ্বরান্তকৃত্ ||২৫৬||

ইদানীমন্তঃপরিমার্জনমভিধায বহিঃপরিমার্জনার্থং তৈলমাহ- লাক্ষেত্যাদি| বিশ্বং শুণ্ঠী, নিশা হরিদ্রা, মূর্বা চোরস্নাযুঃ, আমযং কুষ্ঠম্| লাক্ষাদিকল্কস্যাষ্টৌ পলানি, তৈলস্য দ্বাত্রিংশত্পলানি, তৈলাত্ ষড্গুণেন তক্রেণ তৈলং সাধনীযম্| জ্বরান্তকৃত্ শীতপূর্বদাহপূর্বযোর্বিনাশকারীত্যর্থঃ||২৫৬||

Adhikarana 169 (257-258) · Śloka 258

ক্ষীরিবৃক্ষাসনারিষ্টজম্বূসপ্তচ্ছদার্জুনৈঃ | শিরীষখদিরাস্ফোটামৃতবল্ল্যাটরূষকৈঃ ||২৫৭|| কটুকাপর্পটোশীরবচাতেজোবতীঘনৈঃ | সাধিতং তৈলমভ্যঙ্গাদাশু জীর্ণজ্বরাপহম্ ||২৫৮||

ক্ষীরিবৃক্ষেত্যাদি| ক্ষীরিবৃক্ষা ন্যগ্রোধাদযঃ, অসনো বীজকঃ, অরিষ্টো নিম্বঃ, সপ্তচ্ছদঃ সপ্তপর্ণঃ, অর্জুনঃ ককুভঃ, আস্ফোটা সারিবা অর্কো বা, তেজোবতী কাকমর্দনিকা| ক্ষীরিবৃক্ষাদিকল্কেনাষ্টপলমিতেন তৈলপ্রস্থং চতুর্গুণজলেন সাধযেত্||২৫৭-২৫৮||

Adhikarana 170 (259-261) · Śloka 261

নির্বিষৈর্ভুজগৈর্নাগৈর্বিনীতৈঃ কৃততস্করৈঃ | ত্রাসযেদাগমে চৈনং তদহর্ভোজযেন্ন চ ||২৫৯|| অত্যভিষ্যন্দিগুরুভির্বামযেদ্বা পুনঃ পুনঃ | মদ্যং তীক্ষ্ণং পাযযেত ঘৃতং বা জ্বরনাশনম্ ||২৬০|| পুরাণং বা ঘৃতং কামমুদারং বা বিরেচনম্ | নিরূহযেদ্বা মতিমান্ সুস্বিন্নং তদহর্নরম্ ||২৬১||

ইদানীং বিষমজ্বরাণাং বিশিষ্টাবস্থাযাং ভূতাভিষঙ্গজাদীনাং বা বিষমজ্বরাণাং চিকিত্সামাহ- নির্বিষৈরিত্যাদি| নির্বিষৈঃভুজগৈঃ ডুণ্ডুভাহিপতাকাপ্রভৃতিভিঃ, নাগৈঃ হস্তিভিঃ, বিনীতৈঃ হস্তিশিক্ষাবিদ্ভির্বিনম্রীকৃতৈঃ , কৃততস্করৈঃ মিথ্যাধ্যারোপিতচৌরৈঃ| আগমে জ্বরাগমকালে, যস্মাজ্জ্বরারম্ভোন্মুখস্য দোষস্য নির্বিষভুজগাদিভযাত্ ক্ষুভিতেন বাযুনা বিক্ষেপণং ক্রিযতে তস্মাজ্জ্বরানুত্পাদো জ্বরকালবিস্মারকত্বাদ্বা| তদহরিতি জ্বরাগমনদিনে, ন ভোজযেন্ন চাশ্নীযাত্; শেষদোষক্ষপণার্থম্| অত্যভিষ্যন্দিগুরুভিরিত্যাদি| অত্যভিষ্যন্দিগুরুভিঃ ক্ষীরদধিযবাগূভিঃ মদনফলসংস্কৃতাভির্বামযেত্, তদহরিতি শেষঃ| অত্যভিষ্যন্দ্যাদিভির্যদ্বমনং তদ্বলরক্ষণার্থম্| মদ্যং তীক্ষ্ণমিত্যাদি| ঘৃতং বা জ্বরনাশনং ষট্পলং; যদ্যেবং ‘ঘৃতং প্লীহোদরোক্তং যত্’ ইত্যনেন তস্যোক্তেঃ কুতঃ পুনরভিধানম্? উচ্যতে, কামং তত্পানস্য তদহঃ প্রতিপাদনার্থম্| পুরাণং ঘৃতমৌষধার্থে সংস্কৃতং পাযযেত্| কামং স্বেচ্ছযা, উদারং বিরেচনমপীডাকরং, নত্বপ্রশিথিলাশযস্য বিরেচনানর্হস্য বিধেযম্| তং বিরেচনার্থং পুনর্নিরূহযেত্| তদহরিতি সর্বত্র সম্বন্ধনীযম্||২৫৯-২৬১||

Adhikarana 171 (262) · Śloka 262

অজাব্যোশ্চর্মরোমাণি বচা কুষ্ঠং পলঙ্কষা | নিম্বপত্রং মধুযুতং ধূপনং তস্য দাপযেত্ ||২৬২||

বিষমজ্বরে ধূপনমাহ- অজেত্যাদি| অজা ছাগী, অবিঃ মেষী, পলঙ্কষা গুগ্গুলুঃ| বিষমজ্বরোক্তোঽপ্যসৌ যোগো জীর্ণজ্বরে ভূতবিষমজ্বরে চ প্রযোক্তব্যঃ, সমানতন্ত্রোক্তত্বাত্||২৬২||

Adhikarana 172 (263) · Śloka 263

বৈডালং বা শকৃদ্যোজ্যং বেপমানস্য ধূপনম্ |২৬৩|

অবস্থাবিশেষেণ ধূপনমাহ- বৈডালমিত্যাদি| বৈডালং শকৃত্ বিডালবিষ্ঠা|২৬৩|-

Adhikarana 173 (263) · Śloka 263

পিপ্পলী সৈন্ধবং তৈলং নেপালী চেক্ষণাঞ্জনম্ ||২৬৩||

বিষমজ্বরেঽঞ্জনমাহ- পিপ্পলীত্যাদি| যদ্যপি অঞ্জনমিত্যুক্তোঽপি নেত্রাঞ্জনং প্রাপ্তং, তথাঽপ্যত্রেক্ষণাঞ্জনমিতি যদুক্তং তদভ্যঙ্গবাচিনোঽঞ্জনশব্দস্য নিষেধার্থম্||২৬৩||

Adhikarana 174 (264) · Śloka 264

উদরোক্তানি সর্পিংষি যান্যুক্তানি পুরা মযা | কল্পোক্তং চাজিতং সর্পিঃ সেব্যমানং জ্বরং জযেত্ ||২৬৪||

ইদানীং বিষমজ্বরেঽতিদেশেন চিকিত্সিতমাহ- উদরোক্তানি সর্পিংষীত্যাদি| কল্পোক্তং কল্পস্থানোক্তম্| অজিতম্ অজেযাখ্যম্| কেচিত্ ‘যান্যুক্তানি পুরা মযা’ ইত্যত্র ‘কুর্যাত্ সর্বগণেষু চ’ ইতি পঠন্তি, সর্বজ্বরসমূহেষ্বিতি চ ব্যাখ্যানযন্তি| অপরে তু ‘সর্বজ্বরেষু চ’ ইতি পঠন্তি||২৬৪||

Adhikarana 175 (265) · Śloka 265

ভূতবিদ্যাসমুদ্দিষ্টৈর্বন্ধাবেশনপূজনৈঃ | জযেদ্ভূতাভিষঙ্গোত্থং... |২৬৫|

ভূতজ্বরে চিকিত্সিতমতিদেশেনাহ- ভূতবিদ্যাসমুদ্দিষ্টৈরিত্যাদি| বন্ধঃ সমন্ত্রে রজ্জ্বাদিভিঃ, আবেশনং সমন্ত্রসর্ষপাদিতাডনং, পূজনং বল্যুপহারস্তুত্যাদিভিঃ| যদ্যপি নিদানপ্রস্তাবে পূর্বং বিষাদিজ্বরস্যোপদেশঃ পশ্চাদ্ভূতাভিষঙ্গজস্য, তথাঽপ্যত্র পূর্বং যদ্ভূতাভিষঙ্গজ্বরচিকিত্সিতমুক্তং তদ্ভূতবিদ্যাসমুদ্দিষ্টস্য বিধের্বিষমজ্বরেঽপি হিতত্বং বোধযতি|২৬৫|-

Adhikarana 176 (265) · Śloka 265

... বিজ্ঞানাদ্যৈশ্চ মানসম্ ||২৬৫||

বিজ্ঞানাদ্যৈরিতি মানসং জ্বরং বিজ্ঞানাদ্যৈর্জযেদিতি সম্বন্ধঃ| আদিশব্দাত্ ধৈর্যস্মৃতিজ্ঞানসমাধযো গৃহ্যন্তে| মানসং কামশোকক্রোধভযজম্| বিজ্ঞানাদ্যৈরিত্যত্র ‘মনঃসান্ত্বৈশ্চ’ ইতি কেচিত্ পঠন্তি, মনঃপ্রসাদনৈরিতি চ ব্যাখ্যানযন্তি||২৬৫||

Adhikarana 177 (266) · Śloka 266

শ্রমক্ষযোত্থে ভুঞ্জীত ঘৃতাভ্যক্তো রসৌদনম্ |২৬৬|

শ্রমক্ষযোত্থে ভুঞ্জীতেত্যাদি| যদ্যপি রসৌদনভোজনং পূর্বমেবোক্তং, তথাঽপি ঘৃতাভ্যঙ্গযোগাদধিকফলদর্শনার্থমত্রোক্তম্|২৬৬|-

Adhikarana 178 (266) · Śloka 266

অভিশাপাভিচারোত্থৌ জ্বরৌ হোমাদিনা জযেত্ ||২৬৬||

অভিশাপভিচারোত্থাবিত্যাদি| অভিশাপঃ সিদ্ধাদীনামাক্রোশঃ, অভিচারো যন্ত্রমন্ত্রাদিভিরবপীডনং, আদিশব্দাত্ শান্তিপ্রযশ্চিত্তমঙ্গলজপাদযঃ||২৬৬||

Adhikarana 179 (267) · Śloka 267

দানস্বস্ত্যযনাতিথ্যৈরুত্পাতগ্রহপীডিতম্ |২৬৭|

দানস্বস্ত্যযনাতিথ্যৈরিত্যাদি| স্বস্ত্যযনম্ আশীর্বাদঃ, আতিথ্যম্ অতিথিপূজনম্| উত্পাতঃ অনিষ্টসূচকং নির্ঘাতাদি, গ্রহা আদিত্যাদযঃ|২৬৭|-

Adhikarana 180 (267) · Śloka 268

অভিঘাতজ্বরে কুর্যাত্ ক্রিযামুষ্ণবিবর্জিতাম্ ||২৬৭|| কষাযমধুরাং স্নিগ্ধাং যথাদোষমথাপি বা |২৬৮|

অভিঘাতজ্বরে কুর্যাদিত্যাদি| যস্মাদ্বাতরক্তবহুলোঽভিঘাতজ্বরঃ তস্মাদেবম্ভূতাস্তত্র ক্রিযাঃ কার্যাঃ||২৬৭||-

Adhikarana 181 (268-269) · Śloka 269

ওষধীগন্ধবিষজৌ বিষপিত্তপ্রসাধনৈঃ ||২৬৮|| জযেত্ কষাযং চ হিতং সর্বগন্ধকৃতং তথা | নিম্বদারুকষাযং বা হিতং সৌমনসং যথা ||২৬৯||

ওষধীগন্ধবিষজাবিত্যাদি| বিষপিত্তপ্রসাধনৈঃ বিষপিত্তচিকিত্সিতৈরিত্যর্থঃ| অন্যে ‘বিষপীতপ্রসাধনৈঃ’ ইতি পঠন্তি, ব্যাখ্যানযন্তি চ- বিষপীতস্য যানি প্রসাধনানি চিকিত্সিতানি তৈরিত্যর্থঃ| ওষধীগন্ধবিষজজ্বরযোরপরমপি যোগমাহজযেদিত্যাদি| সর্বগন্ধকৃতম্ এলাদিকৃতং, সৌমনসং জাতীকৃতম্| ভূতাভিষঙ্গাদিজানাং জ্বরাণাং বিষমজ্বরমধ্যে ব্যতিক্রমেণ যদুপাদানং তদ্ভূতাভিষঙ্গাদিজা অপি জ্বরাঃ প্রাযেণ বৈষম্যেণ ভবন্তীতি বোধযতি||২৬৮-২৬৯||

Adhikarana 182 (270) · Śloka 270

যবান্নবিকৃতিঃ সর্পির্মদ্যং চ বিষমে হিতম্ |২৭০|

যবান্নবিকৃতিরিত্যাদি| যবান্নবিকৃতিঃ যবভক্ষ্যবিকারঃ| সর্পির্মদ্যযোর্বিষমজ্বরেঽত্যন্তহিতত্বোপাদানার্থং পুনরভিধানম্| অন্যে ‘যাবান্নবিকৃতিঃ’ ইতি পঠন্তি; যাবান্নো যবৌদনঃ, বিকৃতিঃ যববিকারঃ; যদ্যপি যববিকৃতিশব্দেনৈব যবৌদনো লব্ধস্তথাঽপি যবৌদনস্যাত্যন্তহিতত্বোপাদানার্থং যাবান্নগ্রহণমিতি চ ব্যাখ্যানযন্তি|২৭০|-

Adhikarana 183 (270) · Śloka 270

সম্পূজযেদ্দ্বিজান্ গাশ্চ দেবমীশানমম্বিকাম্ ||২৭০||

বিষমজ্বরে যুক্তিব্যপাশ্রযং চিকিত্সিতমভিধাযেদানীং দৈবব্যপাশ্রযমাহ- সম্পূজযেদিত্যাদি| ঈশানো মহেশ্বরঃ, অম্বিকা চণ্ডী, দ্বিজাদিপূজনাদ্দুরিতোপশান্তির্ধর্মোত্পত্তিশ্চ||২৭০||

Adhikarana 184 (271-281) · Śloka 281

কফবাতোত্থযোশ্চাপি জ্বরযোঃ শীতপীডিতম্ | দিহ্যাদুষ্ণেন বর্গেণ পরশ্চোষ্ণো বিধির্হিতঃ ||২৭১|| সিঞ্চেত্ কোষ্ণৈরারনালশুক্তগোমূত্রমস্তুভিঃ | দিহ্যাত্ পলাশৈঃ পিষ্টৈর্বা সুরসার্জকশিগ্রুজৈঃ ||২৭২|| ক্ষারতৈলেন বাঽভ্যঙ্গঃ সশুক্তেন বিধীযতে | পানমারগ্বধাদেশ্চ ক্বথিতস্য বিশেষতঃ ||২৭৩|| অবগাহঃ সুখোষ্ণশ্চ বাতঘ্নক্বাথযোজিতঃ | জিত্বা শীতং ক্রমৈরেভিঃ সুখোষ্ণজলসেচিতম্ ||২৭৪|| প্রবেশ্যৌর্ণিককার্পাসকৌশেযাম্বরসংবৃতম্ | শাযযেত্ ক্ষামদেহং চ কালাগুরুবিভূষিতম্ ||২৭৫|| স্তনাঢ্যা রূপসম্পন্নাঃ কুশলা নবযৌবনাঃ | ভজেযুঃ প্রমদা গাত্রৈঃ শীতদৈন্যাপহাঃ শুভাঃ ||২৭৬|| শরচ্ছশাঙ্কবদনা নীলোত্পলবিলোচনাঃ | স্ফুরিতভ্রূলতাভঙ্গললাটতটকম্পনাঃ ||২৭৭|| প্রলম্ববিম্বপ্রচলদ্বিম্বীফলনিভাধরাঃ | কৃশোদর্যোঽতিবিস্তীর্ণজঘনোদ্বহনালসাঃ ||২৭৮|| কুঙ্কুমাগুরুদিগ্ধাঙ্গ্যো ঘনতুঙ্গপযোধরাঃ | সুগন্ধিধূপিতশ্লক্ষ্ণস্রস্তাংশুকবিভূষণাঃ ||২৭৯|| গাঢমালিঙ্গযেযুস্তং তরুং বনলতা ইব | প্রহ্লাদং চাস্য বিজ্ঞায তাঃ স্ত্রীরপনযেত্ পুনঃ ||২৮০|| তাসামঙ্গপরিষ্বঙ্গনিবারিতহিমজ্বরম্ | ভোজযেদ্ধিতমন্নং চ যথা সুখমবাপ্নুযাত্ ||২৮১||

ইদানীং জীর্ণজ্বরাণাং দ্বন্দ্বজানাং বহিঃপরিমার্জনপ্রলেপাভিষেকাভ্যঙ্গশযনানুলেপনস্ত্রীসংবাহনাদিকমাহ- কফবাতোত্থযোশ্চাপি জ্বরযোরিত্যাদি| দিহ্যাত্ লিম্পেত্| উষ্ণেন বর্গেণ ভদ্রদার্বাদিনা সুরসাদিনা এলাদিনা বা| পরশ্চোষ্ণো বিধিরিতি পর উত্কৃষ্টঃ, উষ্ণো বিধিঃ স্বেদঃ| আরনালং কাঞ্জিকং, শুক্তং চুক্রং তচ্চ তণ্ডুলাম্বুসৌবীরাদিভিঃ কৃতসন্ধানং, তথা চ তন্ত্রান্তরে পঠ্যতে- “প্রস্থমেকং তু ভক্তস্য ত্রযং সৌবীরকস্য চ| অর্ধং প্রস্থং তু দধ্নশ্চ ভিষগম্লস্য দাপযেত্|| পলষোডশকং চৈব শোধিতস্যার্দ্রকস্য চ| সৈন্ধবং পিপ্পলীং চৈব চূর্ণীকৃত্য বিনিক্ষিপেত্|| স্থাপযেত্ সুদৃঢে ভাণ্ডে সর্পিষা পরিভাবিতে| হেমন্তে বাসরাণ্যষ্টৌ বসন্তে ষট্ দিনানি চ|| প্রাবৃট্কালে চতুরহং বর্ষাস্বপি চ বাসযেত্| অত ঊর্ধ্বং ক্ষিপেচ্চূর্ণং চাতুর্জাতাত্পলদ্বযম্”- ইত্যাদি| অস্য শুক্তস্য গুণবর্ণনং বহুত্বান্ন লিখিতম্| পলাশৈঃ পত্রৈঃ| অর্জকঃ কুঠেরকঃ; অন্যে সিতপর্ণাসমাহুঃ; শিগ্রুঃ শোভাঞ্জনানুকারী বিটপঃ, শোভাঞ্জনমপরে| ক্ষারতৈলং ক্ষারেণ সিদ্ধং তৈলং ক্ষারতৈলমাহুঃ; অপরে তন্ত্রান্তরোক্তং ‘শুষ্কমূলকশুণ্ঠীনাং ক্ষার’ ইত্যাদিকং ক্ষারতৈলমিচ্ছন্তি; তন্ন, তস্য সশুক্তস্য সশুক্তেনেতি বিশেষণবৈযর্থ্যাত্| অবগাহো দ্রবপূর্ণভাজনে নিমজ্জনং, সুখোষ্ণ ঈষদুষ্ণঃ| ক্রমৈরেভিঃ উষ্ণবর্গপ্রলেপাদিভিঃ| প্রবেশ্য ‘নিবাতাগারে’ ইতি শেষঃ| ঔর্ণিকা নানাপ্রকারাঃ কম্বলাঃ, কার্পাসাঃ কার্পাসতন্তুরচিতাঃ, কৌশেযাঃ কোশকারক্রিমিলালাতন্তুরচিতাঃ ‘তসর ’ ইতি লোকে| ক্ষামদেহমিত্যাদি| এবম্ভূতাঃ স্ত্রিযো গ্লানদেহং কৃষ্ণাগুরুবিভূষিতং পুরুষং মৃদুমর্দনার্থং গাত্রৈঃ কৃত্বা ভজেযুরিতি সম্বন্ধঃ| কুশলাঃ কামসূত্রজ্ঞাঃ| দৈন্যং ক্লিষ্টচেতনাত্বম্| শরচ্ছশাঙ্কবদনা ইত্যাদি| এবংবিধাশ্চ ললনাস্তং পুরুষং গাঢমালিঙ্গযেযুরিতি সম্বন্ধঃ| প্রহ্লাদমিত্যাদি| অস্য পুরুষস্য প্রহ্লাদং হর্ষং জ্ঞাত্বা তাঃ পূর্বোক্তবনিতা অপনযেত্, অন্যথা তত্সংসর্গান্মহাননর্থ ইতি| হিতমন্নং বাতশ্লেষ্মহরম্ আহারম্| ‘অবগাহঃ সুখোষ্ণশ্চ বাতঘ্নক্বাথসংযুতঃ’ ইত্যত্র ‘অবগাহঃ সুখোষ্ণশ্চ বাতঘ্নঃ ক্বাথভোজনে’ ইতি কেচিত্ পঠন্তি, ব্যাখ্যানযন্তি চ- বাতঘ্নোঽবগাহঃ কার্যঃ, সুখোষ্ণে চ ক্বাথভোজনে কার্যে| অত্র দ্বিতীযশ্চকারো লুপ্তো জ্ঞেযঃ; তেন ক্বাথভোজনেঽপি বাতঘ্নে বোদ্ধব্যে| প্রবেশ্যৌর্ণিকেত্যত্র ‘প্রবেণ্যৌর্ণিকে’ ইতি কেচিত্ পঠন্তি, ব্যাখ্যানযন্তি চ- প্রবেণী সূচীবাণাখ্যো বস্ত্রবিশেষঃ| ‘কালাগুরুবিভূষিতং’ ইত্যত্র ‘কৃষ্ণাগুরুবিভাবিতং’ ইতি কেচিত্ পঠন্তি, কৃষ্ণাগুরুলিপ্তমিতি চ ব্যাখ্যানযন্তি||২৭১-২৮১||

Adhikarana 185 (282-285) · Śloka 286

দাহাভিভূতে তু বিধিং কুর্যাদ্দাহবিনাশনম্ | মধুফাণিতযুক্তেন নিম্বপত্রাম্ভসাঽপি বা ||২৮২|| দাহজ্বরার্তং মতিমান্ বামযেত্ ক্ষিপ্রমেব চ | শতধৌতঘৃতাভ্যক্তং দিহ্যাদ্বা যবশত্কুভিঃ ||২৮৩|| কোলামলকসংযুক্তৈঃ শুক্তধান্যাম্লসংযুতৈঃ | অম্লপিষ্টৈঃ সুশীতৈশ্চ ফেনিলাপল্লবৈস্তথা ||২৮৪|| অম্লপিষ্টৈঃ সুশীতৈর্বা পলাশতরুজৈর্দিহেত্ | বদরীপল্লবোত্থেন ফেনেনারিষ্টকস্য চ ||২৮৫|| লিপ্তেঽঙ্গে দাহতৃণ্মূর্চ্ছাঃ প্রশাম্যন্তি চ সর্বশঃ |২৮৬|

দাহাভিভূতে ইত্যাদি| দাহবিনাশনবিধিঃ বক্ষ্যমাণঃ| ননু যথা শীতপ্রতীকারে পূর্বং ‘কফবাতোত্থযোশ্চাপি জ্বরযোঃ শীতপীডিতম্’ ইত্যুক্তং তথাঽত্রাপি পিত্তজ্বরাভিভূত ইতি কথং নোক্তং? সত্যং, জ্বররহিতদাহে অসৌ বিধিঃ কার্য ইতি দর্শনার্থম্| মধুফাণিতযুক্তেনেত্যাদি| ‘মধুফাণিতমিশ্রেণ’ ইতি কেচিত্ পঠন্তি| তে চ ‘অপি বা’ ইতি শব্দং পাদপূরণার্থং বর্ণযিত্বা নিম্বপত্রাম্ভসেত্যস্য বিশেষণমাচক্ষতে| যদ্যপি কফে বমনং প্রযুজ্যতে ন পিত্তে, তথাঽপি প্রবৃদ্ধং পিত্তং কিঞ্চিদ্বমনেনাপি নির্হ্রিযতে| তথা চ তন্ত্রান্তরং,- “স্বস্থানগতমুত্ক্লিষ্টমগ্নিনির্বাপকং ভিষক্| পিত্তং জ্ঞাত্বা বিরেকেণ বমনেনাথবা হরেত্”- ইতি| অপরে তু ‘মধুফাণিতমিশ্রেণ নিম্বপত্রাম্ভসা পিবেত্’ ইতি পঠন্তি| শতধৌতঘৃতাভ্যক্তমিত্যাদি| শতবারান্ শীতজলেন ধৌতং ফেনিলং ঘৃতং শতধৌতঘৃতম্| দিহ্যাত্ লিম্পেত্| শুক্তং চুক্রং, ধান্যাম্লং কাঞ্জিকং; ‘শুক্তধান্যাম্লসংযুতৈঃ’ ইত্যত্রাপরে তু ‘ধান্যাম্লৈরপি বুদ্ধিমান্’ ইতি পঠন্তি; তত্র ধান্যাম্লযুক্তৈর্যবশক্তুভিরিতি জ্ঞেযম্| অম্লপিষ্টৈরিত্যাদি| অম্লং কাঞ্জিকং, ফেনিলা উপোদিকা| তথাশব্দাত্ কোলামলকশুক্তসংযুক্তৈঃ ফেনিলাপল্লবৈর্লিম্পেদিতি জ্ঞেযম্| অম্লপিষ্টৈঃ সুশীতৈরিত্যাদি| পলাশতরুজৈঃ পলাশপল্লবৈঃ| অরিষ্টো নিম্বঃ, ফেনিলাবৃক্ষো বা| ফেনকল্পনামাহ- বদরীপল্লবান্ কাঞ্জিকপিষ্টান্ কাঞ্জিকপূর্ণভাজনে নিক্ষিপ্য করেণ বিলোডযেত্, ততো যঃ ফেন উত্তিষ্ঠেত্ তেন লিম্পেত্||২৮২-২৮৫||-

Adhikarana 186 (286-287) · Śloka 287

যবার্ধকুডবং পিষ্ট্বা মঞ্জিষ্ঠার্ধপলং তথা ||২৮৬|| অম্লপ্রস্থশতোন্মিশ্রং তৈলপ্রস্থং বিপাচযেত্ | এতত্ প্রহ্লাদনং তৈলং জ্বরদাহবিনাশনম্ ||২৮৭||

প্রহ্লাদনতৈলমাহ- যবার্ধকুডবমিত্যাদি| অম্লপ্রস্থশতোন্মিশ্রং কাঞ্জিকপ্রস্থশতযুক্তম্||২৮৬-২৮৭||

Adhikarana 187 (288-293) · Śloka 293

ন্যগ্রোধাদির্গণো যস্তু কাকোল্যাদিশ্চ যো গণঃ | উত্পলাদির্গণো যস্তু পিষ্টৈর্বা তৈঃ প্রলেপযেত্ ||২৮৮|| তত্কষাযাম্লসংসিদ্ধাঃ স্নেহাশ্চাভ্যঞ্জনে হিতাঃ | তেষাং শীতকষাযে বা দাহার্তমবগাহযেত্ ||২৮৯|| দাহবেগে ত্বতিক্রান্তে তস্মাদুদ্ধৃত্য মানবম্ | পরিষিচ্যাম্বুভিঃ শীতৈঃ প্রলিম্পেচ্চন্দনাদিভিঃ ||২৯০|| গ্লানং বা দীনমনসমাশ্লিষেযুর্বরাঙ্গনাঃ | পেলবক্ষৌমসংবীতাশ্চন্দনার্দ্রপযোধরাঃ ||২৯১|| বিভ্রত্যোঽব্জস্রজশ্চিত্রা মণিরত্নবিভূষিতাঃ | ভজেযুস্তাঃ স্তনৈঃ শীতৈঃ স্পৃশন্ত্যোঽম্বুরুহৈঃ সুখৈঃ ||২৯২|| প্রহ্লাদং চাস্য বিজ্ঞায তাঃ স্ত্রীরপনযেত্ পুনঃ | হিতং চ ভোজযেদন্নং তথাঽঽপ্নোতি সুখং মহত্ ||২৯৩||

তত্কষাযাম্লসংসিদ্ধা ইতি ন্যগ্রোধাদিকাকোল্যাদ্যুত্পলাদিক্বাথকাঞ্জিকবিপক্বা ইত্যর্থঃ| তেষামিত্যাদি| তেষাং ন্যগ্রোধাদীনাম্| দাহবেগে ত্বতিক্রান্তে ইত্যাদি| তস্মাত্ ন্যগ্রোধাদিপ্রভৃতিশীতকষাযাবগাহাত্| চন্দনাদিনা চন্দনাদিগণেন; অপরে তু চন্দনং শ্রীচন্দনম্, আদিশব্দাত্ উশীরলামজ্জকাদয ইতি ব্যাখ্যানযন্তি| গ্লানং বা দীনমনসমিত্যাদি| দীনমনসং ক্লিষ্টচিত্তম্| আশ্লিষেযুঃ আলিঙ্গেযুঃ| পেলবং সুকুমারং , ক্ষৌমং দুকূলং, পট্টবস্ত্রমিত্যর্থঃ| সংবীতাঃ সম্যগাচ্ছাদিতাঃ| বিভ্রত্যো ধারযন্ত্যঃ, অব্জস্রজ উত্পলাদিমালাঃ, চিত্রা নানাবর্ণাঃ| ভজেযুরিত্যাদি| তাঃ স্ত্রিযঃ, অম্বুরুহৈঃ সুখৈরুত্পলাদিভির্বিকচৈঃ স্পৃশন্ত্যঃ, স্তনৈঃ কৃত্বা ভজেযুরিতি পিণ্ডার্থঃ| হিতমন্নং পিত্তহরম্||২৮৮-২৯৩||

Adhikarana 188 (294) · Śloka 294

পিত্তজ্বরোক্তং শমনং বিরেকোঽন্যদ্ধিতং চ যত্ |২৯৪|

জ্বরদাহেঽতিদেশেনাপরমপি চিকিত্সিতমাহ- পিত্তজ্বরোক্তমিত্যাদি| অন্যদপি যদ্ধিতং ভবেত্তত্কর্তব্যমিত্যর্থঃ|২৯৪|-

Adhikarana 189 (294) · Śloka 295

নির্হরেত্পিত্তমেবাদৌ দোষেষু সমবাযিষু ||২৯৪|| দুর্নিবারতরং তদ্ধি জ্বরার্তানাং বিশেষতঃ |২৯৫|

ইদানীং দাহপ্রতীকারপ্রস্তাবে সংসর্গজ্বরে তাবত্ প্রকৃতিকালাপেক্ষযা ক্বচিত্ সন্নিপাতেঽপি পিত্তস্যাদৌ প্রতিকারার্থমাহ- নির্হরেদিত্যাদি| সমবাযিষু সংসর্গিষু, নতু সন্নিপাতেষু; তত্র প্রতীকারস্যাদাবুক্তত্বাত্| পিত্তান্বিতসংসর্গস্য দ্বিত্বাত্ সমবাযিষ্বিত্যত্র বহুবচনং ন সম্ভবতি, তথাঽপি কালপ্রকৃত্যপেক্ষযা সন্নিপাতেঽপি কফবিরোধেনাদৌ কদাচিত্ পিত্তস্য প্রতিক্রিযা কার্যেতি দর্শনার্থং বহুবচনম্| অন্যে তু ‘শমযেত্ পিত্তমেবাদৌ জ্বরেষু সমবাযিষু’ ইতি পঠন্তি, ব্যাখ্যানযন্তি চ- সমবাযিষু জ্বরেষু সন্নিপাতজ্বরেষ্বাদৌ পিত্তং শমযেত্ লঙ্ঘনাম্বুযবাগ্বাদিভিঃ প্রকৃতিস্থং কুর্যাত্, যস্মাদগ্নিমুপহত্য জ্বরো ভবতি, অগ্নিশ্চ পিত্তান্তর্গতঃ, তস্মাত্ পিত্তসংশমনে আদৌ যত্নঃ কার্যঃ| তথা চোক্তং,- “সমবাযে তু দোষাণাং পূর্বং পিত্তমুপাচরেত্| জ্বরে চৈবাতিসারে চ সর্বত্রান্যত্র মারুতম্”- ইতি| ননু, সন্নিপাতজ্বরেষ্বাদাবন্যত্রামশ্লেষ্মণো নির্হরণং কথিতং, তথা চ- “সন্নিপাতজ্বরে পূর্বং কুর্যাদামবিশোষণম্| পশ্চাচ্ছ্লেষ্মণি সঙ্ক্ষীণে শমযেত্ পিত্তমারুতৌ”- ইতি, তত্ কথমত্র সন্নিপাতেষ্বাদৌ পিত্তশমনং? সত্যং, শমনশব্দেনাত্র প্রকৃতিস্থাপনমুচ্যতে ন নির্হরণমিত্যদোষঃ | দুর্নিবারতরমিতি বাতকফাবপি সমবাযে দুর্নিবারৌ পিত্তং চ দুর্নিবারতরম্| হি যস্মাদর্থে| অত্র নিবন্ধকারৈর্বহূক্তং তচ্চ শিষ্যবুদ্ধিব্যাকুলহেতুত্বাত্ পরিহৃতম্||২৯৪||-

Adhikarana 190 (295) · Śloka 296

ছর্দিমূর্চ্ছাপিপাসাদীনবিরোধাজ্জ্বরস্য চ ||২৯৫|| উপদ্রবাঞ্জযেচ্চাপি প্রত্যনীকেন হেতুনা |২৯৬|

ইদানীং জ্বরচিকিত্সিতমভিধাযোপদ্রবচিকিত্সিতমাহ- ছর্দিমূর্চ্ছেত্যাদি| ছর্দ্যাদীনুপদ্রবান্ জ্বরস্যাবিরোধেন প্রত্যনীকেন হেতুনা জযেদিতি সম্বন্ধঃ| ননু, ছর্দ্যাদয উপদ্রবাঃ কথং প্রোচ্যন্তে, যাবতা জ্বরলক্ষণান্যেতানি? সত্যং, যে জ্বরেণ সহোত্পন্নাশ্ছর্দ্যাদযস্তে জ্বরলক্ষণানি, যে তু জ্বরস্যোত্তরকালজাস্ত উপদ্রবাঃ; তথা চোক্তং,- “ব্যাধেরুপরি যো ব্যাধির্ভবত্যুত্তরকালজঃ| উপক্রমাবিরোধী চ স উপদ্রব উচ্যতে”- ইতি| যদ্যপি প্রাগুক্তাত্- ‘সোপদ্রবমন্যোন্যাবিরোধেনোপচরেদ্বলবন্তমুপদ্রবং চ’- ইতি বাক্যাদেবান্যোন্যাবিরোধেন চিকিত্সা সিদ্ধা, তথাঽপি ‘অবিরোধাজ্জ্বরস্য’ ইতি যত্ পুনরুক্তং তন্নিযমার্থং; তেন বলবন্তমুপদ্রবং বিহাযান্যত্র সর্বত্রাপ্যবিরোধেনৈব চিকিত্সা কর্তব্যেতি; অন্যে তু পূর্বং সামান্যেনোক্তমত্র তু বিশেষেণেতি ন দোষঃ| প্রত্যনীকেন স্বচিকিত্সিতেন| যদ্যেবং তর্হি হেতুনেতি পদং ব্যর্থং; তন্ন, যুক্তিব্যপাশ্চযদৈবব্যপাশ্রযসত্ত্বাবজযেতি ত্রিপ্রকারস্যাপি চিকিত্সিতস্য সঙ্গ্রহার্থত্বাত্; অথবা হেতুগ্রহণং হেতুবিপরীতপ্রাপ্ত্যর্থং, যস্মাত্ত্রিবিধমৌষধং- হেতুবিপরীতং ব্যাধিবিপরীতং, তদর্থকারি চেতি||২৯৫||

Adhikarana 191 (296-299) · Śloka 299

বিশেষমপরং চাত্র শৃণূপদ্রবনাশনম্ ||২৯৬|| মধুকং রজনী মুস্তং দাডিমং সাম্লবেতসম্ | অঞ্জনং তিন্তিডীকং চ নলদং পত্রমুত্পলম্ ||২৯৭|| ত্বচং ব্যাঘ্রনখং চৈব মাতুলুঙ্গরসো মধু | দিহ্যাদেভির্জ্বরার্তস্য মধুশুক্তযুতৈঃ শিরঃ ||২৯৮|| শিরোভিতাপসম্মোহবমিহিক্কাপ্রবেপথূন্ | প্রদেহো নাশযত্যেষ জ্বরিতানামুপদ্রবান্ ||২৯৯||

বিশেষমপরমিত্যাদি| অঞ্জনং রসাঞ্জনং, নলদং মাংসী, পত্রং পত্রকং, উত্পলং নীলোত্পলং, ব্যাঘ্রনখো নখঃ| মধুশুক্তং জম্বীররসকৃতঃ সন্ধানবিশেষঃ; তথা চোক্তং,- “জম্বীরস্য ফলরসং পিপ্পলীচূর্ণসংযুতম্| মধুভাণ্ডে বিনিক্ষিপ্য ধান্যরাশৌ নিধাপযেত্|| মাসেন তজ্জাতরসং মধুশুক্তং প্রকীর্তিতম্”- ইতি| প্রদিহ্যাত্ লিম্পেত্| শিরোভিতাপঃ শিরোরুক্| সম্মোহো মূর্চ্ছা||২৯৬-২৯৯||

Adhikarana 192 (300-301) · Śloka 301

মধূকমথ হ্রীবেরমুত্পলানি মধূলিকাম্ ||৩০০|| লীঢ্বা চূর্ণানি মধুনা সর্পিষা চ জযেদ্বমিম্ | কফপ্রসেকাসৃক্পিত্তহিক্কাশ্বাসাংশ্চ দারুণান্ ||৩০১||

মধূকমিত্যাদি| হ্রীবেরং বালকং, মধূলিকা জলযষ্টী||৩০০-৩০১||

Adhikarana 193 (302) · Śloka 302

লিহন্ জ্বরার্তস্ত্রিফলাং পিপ্পলীং চ সমাক্ষিকাম্ | কাসে শ্বাসে চ মধুনা সর্পিষা চ সুখী ভবেত্ ||৩০২||

লিহন্ জ্বরার্তস্ত্রিফলামিত্যাদি| অত্র যোগে যন্মধুনো বারদ্বযমুপাদানং তদেকস্য মধুনঃ পেষ্যদ্রব্যবত্ প্রমাণং, অন্যস্য ত্বালোডনবত্প্রমাণম্||৩০২||

Adhikarana 194 (303) · Śloka 303

বিদারী দাডিমং লোধ্রং দধিত্থং বীজপূরকম্ | এভিঃ প্রদিহ্যান্মূর্ধানং তৃড্দাহার্তস্য দেহিনঃ ||৩০৩||

বিদারীমিত্যাদি| দধিত্থং কপিত্থম্||৩০৩||

Adhikarana 195 (304) · Śloka 305

দাডিমস্য সিতাযাশ্চ দ্রাক্ষামলকযোস্তথা | বৈরস্যে ধারযেত্ কল্কং গণ্ডূষং চ যথাহিতম্ ||৩০৪|| ক্ষীরেক্ষুরসমাক্ষীকসর্পিস্তৈলোষ্ণবারিভিঃ |৩০৫|

দাডিমস্যেত্যাদি| বৈরস্যে মুখবৈরস্যে| ক্ষীরেক্ষুরসমাধ্বীকেত্যাদি| মাক্ষীকং মধু, অত্রাপি মুখবৈরস্যে ধারযেদিতি যোজনীযম্||৩০৪||-

Adhikarana 196 (305) · Śloka 305

শূন্যে মূর্ধ্নি হিতং নস্যং জীবনীযশৃতং ঘৃতম্ ||৩০৫||

শূন্যে ইত্যাদি| শূন্যে রিক্তে| জীবনীযানি কাকোল্যাদীনি দশ| তথা চোক্তং,- “জীবন্তী কাকোল্যৌ দ্বে মেদে মুদ্গমাষপর্ণ্যৌ চ| জীবকর্ষভকৌ মধুকং চেতী গণো জীবনীযাখ্যঃ”||৩০৫||

Adhikarana 197 (306) · Śloka 307

চূর্ণিতৈস্ত্রিফলাশ্যামাত্রিবৃত্পিপ্পলিসংযুতৈঃ | সক্ষৌদ্রঃ শর্করাযুক্তো বিরেকস্তু প্রশস্যতে ||৩০৬|| পক্বে পিত্তজ্বরে রক্তে চোর্ধ্বগে বেপথৌ তথা |৩০৭|

চূর্ণিতৈরিত্যাদি| শ্যামা বৃদ্ধদারকঃ| ঊর্ধ্বগে ঊর্ধ্বপ্রবৃত্তে রক্তে||৩০৬||-

Adhikarana 198 (307) · Śloka 307

কফবাতোত্থযোরেবং স্নেহাভ্যঙ্গৈর্বিশোধযেত্ ||৩০৭||

কফবাতোত্থযোরেবমিত্যাদি| বিশোধযেত্ বিশুদ্ধিং নযেত্, শমং নযেদিতি তাত্পর্যার্থঃ| কফবাতাবিতি কর্মপদং শেষীভূতমত্র যোজনীযম্||৩০৭||

Adhikarana 199 (308) · Śloka 308

হৃতদোষো ভ্রমার্তস্তু লিহ্যাত্ ক্ষৌদ্রসিতাভযাঃ |৩০৮|

হৃতেত্যাদি| হৃতদোষোঽপি যো ভ্রমার্তো ভবেত্ স ক্ষৌদ্রেণ সিতাভযা লিহ্যাদিতি পিণ্ডার্থঃ|৩০৮|-

Adhikarana 200 (308) · Śloka 309

বাতঘ্নমধুরৈর্যোজ্যা নিরূহা বাতজে জ্বরে ||৩০৮|| অবেক্ষ্য দোষং প্রাণং চ যথাস্বং চানুবাসনাঃ |৩০৯|

ইদানীং বাতজ্বরে নিরূহদ্রব্যাণ্যাহ- বাতঘ্নমধুরৈরিত্যাদি| বাতঘ্না ভদ্রদার্বাদযঃ, মধুরাঃ কাকোল্যাদযঃ| অবেক্ষ্য দোষং প্রাণং চেতি হীনম্ধ্যোত্তমাদিভেদেন দোষং বলং চ বীক্ষ্যেত্যর্থঃ| তেনাল্পপ্রকুপিতদোষে অল্পো নিরূহঃ, মধ্যমে মধ্যমঃ, উত্তমে উত্তমঃ; এবং বলেঽপি| যথাস্বং চানুবাসনা ইতি বাতহরদ্রব্যসাধিতস্নেহানুবাসনা যোজ্যা ইতি||৩০৮||-

Adhikarana 201 (309-311) · Śloka 312

উত্পলাদিকষাযাদ্যা(ঢ্যা)শ্চন্দনোশীরসংযুতাঃ ||৩০৯|| শর্করামধুরাঃ শীতাঃ পিত্তজ্বরহরা মতাঃ | আম্রাদীনাং ত্বচং শঙ্খং চন্দনং মধুকোত্পলে ||৩১০|| গৈরিকাঞ্জনমঞ্জিষ্ঠামৃণালান্যথ পদ্মকম্ | শ্লক্ষ্ণপিষ্টং তু পযসা শর্করামধুসংযুতম্ ||৩১১|| সুপূতং শীতলং বস্তিং দহ্যমানায দাপযেত্ |৩১২|

পিত্তজ্বরে নিরূহদ্রব্যাণ্যাহ- উত্পলাদিকষাযাদ্যা ইত্যাদি| আদ্যাঃ প্রধানাঃ| উত্পলাদিকষাযাদ্যা ইত্যাদি বিশেষণযুক্তা নিরূহা জ্ঞেযাঃ| পিত্তজ্বরে নিরূহদ্রব্যাণ্যভিধাযাপরাণ্যপি নিরূহদ্রব্যাণ্যাহ- আম্রাদীনাং ন্যগ্রোধাদিগণান্তর্ভূতত্বাত্ পূর্বদ্রব্যাণি বিহায আম্রাদিকানি দ্রব্যাণি নন্দীবৃক্ষকপর্যন্তানি গ্রাহ্যাণি| চন্দনং রক্তচন্দনম্, উত্পলং নীলোত্পলম্, অঞ্জনং স্রোতোঽঞ্জনং, তদভাবে রসাঞ্জনং সৌবীরাঞ্জনং বা, মৃণালং বিসং, পদ্মকং পদ্মকাষ্ঠং, বস্তিঃ নিরূহবস্তিঃ||৩০৯-৩১১||-

Adhikarana 202 (312) · Śloka 312

জ্বরদাহাপহং তেষু সিদ্ধং চৈবানুবাসনম্ ||৩১২||

পিত্তজ্বরেঽনুবাসনদ্রব্যাণ্যতিদেশেনাহ- জ্বরদাহপহমিত্যাদি| তেষু ন্যগ্রোধাদিত্বক্প্রভৃতিষু||৩১২||

Adhikarana 203 (313) · Śloka 313

আরগ্বধগণক্বাথাঃ পিপ্পল্যাদিসমাযুতাঃ | সক্ষৌদ্রমূত্রা দেযাঃ স্যুঃ কফজ্বরবিনাশনাঃ ||৩১৩||

কফজ্বরে নিরূহদ্রব্যাণ্যাহ- আরগ্বধেত্যাদি| দেযাঃ স্যুঃ দাতব্যা ভবেযুঃ, ‘নিরূহা’ ইতি শেষঃ| অন্যে তু ‘আরগ্বধাদিসংসিদ্ধাঃ কফজে ক্ষৌদ্রসংযুতাঃ| জ্বরং হন্যুর্নিরূহাশ্চ তত্সিদ্ধাশ্চানুবাসনাঃ’- ইতি পঠন্তি||৩১৩||

Adhikarana 204 (314) · Śloka 314

কফঘ্নৈরেব সংসিদ্ধা দ্রব্যৈশ্চাপ্যনুবাসনাঃ |৩১৪|

কফজেঽনুবাসনমাহ- কফঘ্নৈরিত্যাদি| কফঘ্নৈর্দ্রব্যৈঃ আরগ্বধাদিভিঃ|৩১৪|-

Adhikarana 205 (314) · Śloka 314

সংসর্গে সন্নিপাতে চ সংসৃষ্টা বস্তযো হিতাঃ ||৩১৪||

সংসর্গসন্নিপাতযোর্নিরূহদ্রব্যাণ্যাহ- সংসর্গে ইত্যাদি| সংসর্গে সন্নিপাতাদৌ, সংসৃষ্টা মিলিতাঃ, বস্তযো নিরূহা ইতি||৩১৪||

Adhikarana 206 (315) · Śloka 315

সংসৃষ্টৈরেব সংসৃষ্টা দ্রব্যৈশ্চাপ্যনুবাসনাঃ |৩১৫|

সংসর্গসন্নিপাতযোরতিদেশেনানুবাসনদ্রব্যাণ্যাহ- সংসৃষ্টৈরিত্যাদি| সংসৃষ্টৈঃ সম্মিলিতৈঃ, সংসৃষ্টা মিলিতাঃ|৩১৫|-

Adhikarana 207 (315) · Śloka 316

বাতরোগাপহাঃ সর্বে স্নেহা যে সম্যগীরিতাঃ ||৩১৫|| বিনা তৈলং ত এব স্যুর্যোজ্যা মারুতজে জ্বরে |৩১৬|

ইদানীং বাতজ্বরেঽনুবাসনবিষযে তৈলনিষেধমাহ- বাতরোগাপহা ইত্যাদি| সর্বে স্নেহাঃ সর্পিস্তৈলবসামজ্জানঃ, যোজ্যাঃ ‘অনুবাসনে’ ইতি শেষঃ||৩১৫||-

Adhikarana 208 (316) · Śloka 316

নিখিলেনোপযোজ্যাশ্চ ত এবাভ্যঞ্জনাদিষু ||৩১৬||

বাতজ্বরেঽনুবাসননিষিদ্ধস্যাপি তৈলস্যাভ্যঙ্গাদৌ প্রযোগমাহ- নিখিলেনেত্যাদি| নিখিলেন সামস্ত্যেন| এতেন তৈলস্যাপি গ্রহণম্| ত এব সর্পিস্তৈলবসামজ্জান এব| এতে চত্বারঃ স্নেহা ব্যস্তাঃ সমস্তা বা সংস্কৃতাশ্চ প্রযোজ্যাঃ| অত এব ষট্কট্বরাদিতৈলমপি শস্যতে||৩১৬||

Adhikarana 209 (317) · Śloka 317

পৈত্তিকে মধুরৈস্তিক্তৈঃ সিদ্ধং সর্পিশ্চ পূজ্যতে |৩১৭|

পিত্তজ্বরে পুনরভ্যঙ্গার্থং বিশিষ্টং স্নেহমাহ- পৈত্তিকে মধুরৈরিত্যাদি| পূজ্যতে অভ্যঙ্গাদিষু|৩১৭|-

Adhikarana 210 (317) · Śloka 317

শ্লৈষ্মিকে কটুতিক্তৈশ্চ, সংসৃষ্টানীতরেষু চ ||৩১৭||

শ্লৈষ্মিকে পানাভ্যঙ্গার্থং স্নেহবিশেষমাহ- শ্লৈষ্মিকে ইত্যাদি| কটুতিক্তৈশ্চেত্যত্র সর্পিঃ সিদ্ধমিতি যোজনীযম্| যদ্যপি কফস্য তুল্যগুণং সর্পিস্তথাঽপি বিশিষ্টসংস্কারবশাত্ কফেঽপি সর্পিঃ প্রযুজ্যতে| অন্যে তু চকারাত্ অনুক্তমপি তৈলং কথযন্তি; তন্ন, অন্যতন্ত্রসংবাদাভাবাত্ সংসর্গসন্নিপাতেষ্বভ্যঙ্গার্থং বিশিষ্টস্নেহমাহ- সংসৃষ্টানীতরেষু চেতি|- সংসৃষ্টানি সর্পিরাদীনি অন্যোন্যমিশ্রাণি তথা বাতাদিহরদ্রব্যৈর্মিশ্রৈরেব সাধিতানি চ; ইতরেষু সন্নিপাতেষু||৩১৭||

Adhikarana 211 (318) · Śloka 319

হৃতাবশেষং পিত্তং তু ত্বক্স্থং জনযতি জ্বরম্ | পিবেদিক্ষুরসং তত্র শীতং বা শর্করোদকম্ ||৩১৮|| শালিষষ্টিকযোরন্নমশ্নীযাত্ ক্ষীরসম্প্লুতম্ |৩১৯|

ইদানীং হৃতাবশেষস্য পিত্তস্য প্রতীকারমাহ- হৃতাবশেষমিত্যাদি| তত্র হৃতাবশেষপিত্তজ্বরে| অন্নম্ ওদনম্| যদ্যপি ত্বক্স্থিতে পিত্তে বহিঃপরিমার্জনং যুক্তং নান্তঃপরিমার্জনং, তথাঽপি তদ্বীর্যযুক্তস্য রসস্য সর্বতোগমনাদন্তঃপরিমার্জনমুক্তম্||৩১৮||-

Adhikarana 212 (319) · Śloka 319

কফবাতোত্থযোরেব স্বেদাভ্যঙ্গৌ প্রযোজযেত্ ||৩১৯||

ইদানীং কফবাতযোরপি হৃতাবশেষযোঃ প্রতীকারার্থমাহ- কফবাতোত্থযোরেবেত্যাদি| কফবাতোত্থযোরিতি হৃতাবশেষকফবাতজ্বরযোরিত্যর্থঃ||৩১৯||

Adhikarana 213 (320) · Śloka 320

ঘৃতং দ্বাদশরাত্রাত্তু দেযং সর্বজ্বরেষু চ | তেনান্তরেণাশযং স্বং গতা দোষা ভবন্তি হি ||৩২০||

অধুনা যাবতা কালেন জ্বরে সর্পির্দেযং তাবন্তং কালং সকারণং দর্শযন্নাহ- ঘৃতমিত্যাদি| সর্বজ্বরেষু চেতি যে জ্বরা লঙ্ঘনোষ্ণোদকপানপেযাপাচনৈস্তু পক্বাস্তেষু সর্বজ্বরেষু দ্বাদশাহাদনন্তরং ঘৃতং দেযম্| তেনান্তরেণ তেনাবসরেণ তেন কালেনেত্যর্থঃ, দ্বাদশরাত্রাদূর্ধ্বমিতি তাত্পর্যার্থঃ| আশযং স্বং গতা দোষা ইতি স্থানমাত্মীযং প্রাপ্তা বাতাদযো ভবন্তি, পাকপ্রাপ্তত্বাত্| যদ্যপ্যষ্টাহেন দশাহাত্পরং বা জ্বরপাকো ভবতি তথাঽপি সন্নিপাতজ্বরস্য দ্বাদশাহেন পাকো ভবতীতি দর্শনার্থং দ্বাদশাহগ্রহণম্| কেচিদত্র নস্যার্থং ঘৃতং পঠন্তি; তন্ন পঠনীযং, নস্যার্থঘৃতস্য গণ্ডূষোত্তরং প্রাগেব পঠিতত্বাত্||৩২০||

Adhikarana 214 (321) · Śloka 321

ধাতূন্ প্রক্ষোভযন্ দোষো মোক্ষকালে বলীযতে | তেন ব্যাকুলচিত্তস্তু ম্রিযমাণ ইবেহতে ||৩২১||

শান্তিং গচ্ছত্যপি জ্বরে যথা ক্লেশাতিশযো ভবতি তথা দর্শযন্নাহ- ধাতূনিত্যাদি| মোক্ষকালে ধাতূংশ্চালযন্ দোষো বলীযতে বলীবাচরতীতি পিণ্ডার্থঃ| ননু, প্রক্ষীণাবস্থাযাং কস্মাদ্দোষো বলীবাচরতি? সত্যং, প্রভাবাত্; যথা দীপো নির্বাণাবস্থাযাং মহতীং জ্বালাং প্রদর্শযন্ নির্বাণং যাতি , তদ্বদযমপি জ্বরারম্ভকো দোষো বলীযত ইতি| কেচিত্ বলীযতে বলীযান্ গচ্ছতি ইতি ব্যাখ্যানযন্তি, ঈযতে ইতি ইদধাতোর্দিবাদিকস্য কর্তরি প্রযোগাত্| অপরে তু ‘অবলীযতে’ ইতি পঠন্তি, ব্যাখ্যানযন্তি চ- অবলীযতে তাদৃগ্রূপেণ নোপলভ্যতে| তেন দোষেণ, ম্রিযমাণ ইবেহতে মুমূর্ষুবদ্গাত্রবিক্ষেপণাদিকাং ক্রিযাং করোতীত্যর্থঃ||৩২১||

Adhikarana 215 (322) · Śloka 322

লঘুত্বং শিরসঃ স্বেদো মুখমাপাণ্ডু পাকি চ | ক্ষবথুশ্চান্নকাঙ্ক্ষা চ জ্বরমুক্তস্য লক্ষণম্ ||৩২২||

জ্বরমুক্তলক্ষণমাহ- লঘুত্বমিত্যাদি| লঘুত্বং শিরস ইতি শিরোলঘুত্বং, আপাণ্ডু ঈষত্পাণ্ডু, ক্ষবথুঃ ছিক্কা| জ্বরাতীসারযোর্মহাব্যাধিত্বান্মুক্তিলক্ষণং কথিতং নান্যেষাম্| কেচিদাচার্যা ‘ঘাতূন্ প্রক্ষোভযন্ দোষ’ ইত্যাদিকমনন্তরোক্তং সন্নিপাতজ্বরমুক্তিলক্ষণং, ‘লঘুত্বং শিরস’ ইত্যাদিকং চেতরজ্বরমুক্তিলক্ষণমিতি ব্রুবতে||৩২২||

Adhikarana 216 (323-324) · Śloka 324

শম্ভুক্রোধোদ্ভবো ঘোরো বলবর্ণাগ্নিসাদকঃ | রোগরাট্ রোঘসঙ্ঘাতো জ্বর ইত্যুপদিশ্যতে ||৩২৩|| ব্যাপিত্বাত্ সর্বসংস্পর্শাত্ কৃচ্ছ্রত্বাদন্তসম্ভবাত্ | অন্তকো হ্যেষ ভূতানাং জ্বর ইত্যুপদিশ্যতে ||৩২৪||

ইদানীং জ্বরস্যাতিশযেন প্রতীকরণায গরীযস্ত্বং দর্শযন্নাহ- শম্ভুক্রোধোদ্ভব ইত্যাদি| এতৈর্হেতুভির্জ্বরোঽন্তক ইত্যুপদিশ্যত ইতি সম্বন্ধঃ| ব্যাপিত্বমস্য পুরুষপশ্বাদিসর্বপ্রাণিব্যাপনাত্, সর্বসংস্পর্শিত্বং সমনস্কেন্দ্রিযস্য দেহস্য তাপনাত্, কৃচ্ছ্রত্বম্ অগ্নেরুপঘাতাদত্যন্তপীডাকরত্বাদ্বা, অন্তসম্ভবত্বং চাপরব্যাধিগ্রস্তস্যাপি পুরুষস্য জ্বরেণৈব প্রাণনাশিত্বাত্| অন্তক ইব অন্তকঃ, অন্তকারিত্বাত্| যদ্যপ্যযমধ্যাযো নিবন্ধকারৈরন্যক্রমপাঠৈঃ পঠিতঃ, তথাঽপি মযা যথা গুরুণোপদিষ্টস্তেন ক্রমেণ পঠিতঃ||৩২৩-৩২৪||

Adhikarana puShpikA · Śloka 39

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রে জ্বরপ্রতিষেধো নাম(প্রথমোঽধ্যাযঃ, আদিত) একোনচত্বারিংশোঽধ্যাযঃ ||৩৯||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতকাযচিকিত্সাযাং জ্বরপ্রতিষেধাধ্যায একোনচত্বারিংশত্তমঃ||৩৯||