21. karṇagatarōgapratiṣēdhādhyāyaḥ

Adhikarana 1 (1-2) · Śloka 2

অথাতঃ কর্ণগতরোগপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি| প্রতিষেধঃ চিকিত্সিতম্||১-২||

Adhikarana 2 (3) · Śloka 3

সামান্যং কর্ণরোধেষু ঘৃতপানং রসাযনম্ | অব্যাযামোঽশিরঃস্নানং ব্রহ্মচর্যমকত্থনম্ ||৩||

কর্ণরোগাণাং সামান্যং চিকিত্সিতমাহ- সামান্যমিত্যাদি| ঘৃতপানমত্র ঊর্ধ্বভক্তিকম্| অশিরঃস্নানং ন শিরঃস্নানমিত্যর্থঃ| অকত্থনম্ অভাষণম্| রসাযনমিত্যত্র ‘রসাশনম্’ ইতি কেচিত্ পঠন্তি, মাংসরসেন সহ ভোজনমিতি ব্যাখ্যানযন্তি||৩||

Adhikarana 3 (4) · Śloka 4

কর্ণশূলে প্রণাদে চ বাধির্যক্ষ্বেডযোরপি | চতুর্ণামপি রোগাণাং সামান্যং ভেষজং বিদুঃ ||৪||

বাতজানাং চতুর্ণাং কর্ণশূলাদীনামেকহেতুত্বাদেকামেব চিকিত্সামাহ- কর্ণশূল ইত্যাদি||৪||

Adhikarana 4 (5) · Śloka 5

স্নিগ্ধং বাতহরৈঃ স্বেদৈর্নরং স্নেহবিরেচিতম্ | নাডীস্বেদৈরুপচরেত্পিণ্ডস্বেদৈস্তথৈব চ ||৫||

কিং তত্ সামান্যং চিকিত্সিতমিত্যাহ- স্নিগ্ধমিত্যাদি| স্নিগ্ধং স্নেহপানেনাভ্যঙ্গেন চ| স্নেহবিরেচিতম্ এরণ্ডতৈলাদিভিঃ| স্বেদাধ্যাযে ব্যামার্ধমাত্রেত্যাদিনা নাডীস্বেদঃ প্রোক্তঃ; পিণ্ডস্বেদঃ কৃশরাপাযসাদিভিঃ||৫||

Adhikarana 5 (6-7) · Śloka 7

বিল্বৈরণ্ডার্কবর্ষাভূদধিত্থোন্মত্তশিগ্রুভিঃ | বস্তগন্ধাশ্বগন্ধাভ্যাং তর্কারীযববেণুভিঃ ||৬|| আরনালশৃতৈরেভির্নাডীস্বেদঃ প্রযোজিতঃ | কফবাতসমুত্থানং কর্ণশূলং নিরস্যতি ||৭||

নাডীস্বেদোপযোগিদ্রব্যাণ্যাহ- বিল্বেত্যাদি| বর্ষাভূঃ শ্বেতপুনর্নবা, দধিত্থঃ কপিত্থঃ, উন্মত্তো ধত্তূরকঃ, শিগ্রুঃ শোভাঞ্জনকঃ, বিটপশাকমন্যে| বস্তগন্ধা বোবযিকা| তর্কারী অরণিকা, যববেণুভিরিতি বেণুযবঃ অন্নজাতিঃ| বিল্বৈরণ্ডাদিভিঃ আরনালসিদ্ধৈঃ কেবলবাতারব্ধে কফাবৃতবাতারব্ধে চ কর্ণশূলে স্বেদঃ প্রযোজ্যঃ; পরং কেবলবাতজে শূলে স্নেহপূর্বঃ স্বেদঃ, কফাবৃতে পুনঃ রূক্ষঃ স্বেদ ইতি||৬-৭||

Adhikarana 6 (8) · Śloka 8

মীনকুক্কুটলাবানাং মাংসজৈঃ পযসাঽপি বা | পিণ্ডৈঃ স্বেদং চ কুর্বীত কর্ণশূলনিবারণম্ ||৮||

পিণ্ডস্বেদোপযোগিদ্রব্যাণ্যাহ- মীনকুক্কুটলাবানামিত্যাদি| পযসাঽপি বেতি ঘনীভূতক্ষীরপিণ্ডেনেত্যর্থঃ| এতৈর্মীনাদিভির্মাংসপিণ্ডৈঃ পৃথক্ সমস্তৈর্বা স্বেদঃ কার্যঃ||৮||

Adhikarana 7 (9-10) · Śloka 10

অশ্বত্থপত্রখল্লং বা বিধায বহুপত্রকম্ | তদঙ্গারৈঃ সুসম্পূর্ণং নিদধ্যাচ্ছ্রবণোপরি ||৯|| যত্তৈলং চ্যবতে তস্মাত্ খল্লাদঙ্গারতাপিতাত্ | তত্ প্রাপ্তং শ্রবণস্রোতঃ সদ্যো গৃহ্ণাতি বেদনাম্ ||১০||

শুদ্ধবাতজে শূলে স্নেহবিশেষস্বেদমুদ্দিশন্নাহ- অশ্বত্থপত্রেত্যাদি| খল্লমিতি দ্বিকর্ণিকাকারমিত্যর্থঃ| অভ্যজ্য তৈলেন ঘৃতেন বা, সাত্যকিবিদেহপ্রোক্তত্বাত্||৯-১০||

Adhikarana 8 (11) · Śloka 11

ক্ষৌমগুগ্গুল্বগুরুভিঃ সঘৃতৈর্ধূপযেচ্চ তম্ | ভক্তোপরি হিতং সর্পির্বস্তিকর্ম চ পূজিতম্ ||১১||

কর্ণস্বেদস্য পশ্চাত্কর্মাহ- ক্ষৌমেত্যাদি| ক্ষৌমম্ অতসীবস্ত্রং, বস্তিরত্র শিরোবস্তিঃ||১১||

Adhikarana 9 (12) · Śloka 13

নিরন্নো নিশি তত্সর্পিঃ পীত্বোপরি পিবেত্ পযঃ | মূর্ধবস্তিষু নস্যে চ মস্তিষ্কে পরিষেচনে ||১২|| শতপাকং বলাতৈলং প্রশস্তং চাপি ভোজনে |১৩|

ইদানীং নিরন্নস্য সাযমেব কোষ্ণং পযো নির্দিশন্নাহ- নিরন্ন ইত্যাদি| নিরন্নঃ পুরুষঃ| নিশি কোষ্ণং পযোঽনুপানং চ সর্পিঃ পিবেত্| মূর্ধেত্যাদি| মস্তিষ্কঃ শিরোবস্তিবিশেষঃ, স চ স্নেহপিচুপ্লোতাদিনাঽবচার্যতে| শতপাকং বাতব্যাধিপঠিতম্| বলাতৈলং মূঢগর্ভোক্তং, অন্যে তু বলাতৈলমেব শতপাকং কৃত্বোপযুজ্যত ইতি ব্যাখ্যানযন্তি||১২||-

Adhikarana 10 (13) · Śloka 14

কণ্টকারীমজাক্ষীরে পক্ত্বা ক্ষীরেণ তেন চ ||১৩|| বিপচেত্ কুক্কুটবসাং কর্ণযোস্তত্প্রপূরণম্ |১৪|

কণ্টকারীমিত্যাদি| কণ্টকারী চতুষ্পলপ্রমাণা, তদষ্টগুণং ক্ষীরং, ক্ষীরাচ্চতুর্গুণমুদকং দত্ত্বা বিপচেত্, তেন ক্ষীরেণ কুক্কুটবসাং কুডবাপ্রমাণাং পচেত্, তত্কর্ণযোঃ প্রপূরণম্||১৩||-

Adhikarana 11 (14-16) · Śloka 16

তণ্ডুলীযকমূলানি ফলমঙ্কোলজং তথা ||১৪|| অহিংস্রাকেন্দুকান্মূলং সরলং দেবদারু চ | লশুনং শৃঙ্গবেরং চ তথা বংশাবলেখনম্ ||১৫|| কল্কৈরেষাং তথাঽম্লৈশ্চ পচেত্ স্নেহং চতুর্বিধম্ | বেদনাযাঃ প্রশান্ত্যর্থং হিতং তত্কর্ণপূরণম্ ||১৬||

অপরমপি পূরণমাহ- তণ্ডুলীযকেত্যাদি| বংশাবলেখনং বংশাচ্ছোলনম্| কল্কো দৃষদি পেষিতঃ, স চাদ্রবঃ, স চাষ্টপলপ্রমাণঃ, অম্লৈঃ দধিতক্রসুরাচুক্রমাতুলুঙ্গরসৈঃ প্রত্যেকমষ্টাবিংশত্যধিকশতপ্রমাণৈঃ, স্নেহশ্চতুর্বিধঃ সর্পিস্তৈলবসামজ্জসঞ্জ্ঞো দ্বাত্রিংশত্পলপ্রমাণঃ||১৪-১৬||

Adhikarana 12 (17-18) · Śloka 18

লশুনার্দ্রকশিগ্রূণাং মুরঙ্গ্যা মূলকস্য চ | কদল্যাঃ স্বরসঃ শ্রেষ্ঠঃ কদুষ্ণঃ কর্ণপূরণে ||১৭|| শৃঙ্গবেররসঃ ক্ষৌদ্রং সৈন্ধবং তৈলমেব চ | কদুষ্ণং কর্ণযোর্দেযমেতদ্বা বেদনাপহম্ ||১৮||

লশুনার্দ্রকেত্যাদি| শিগ্রুঃ মধুশিগ্রুঃ, মুরঙ্গী দ্বিতীযঃ শোভাঞ্জনকঃ, কদুষ্ণ ঈষদুষ্ণঃ| এতেষাং লশুনাদীনাং ষণ্ণাং স্বরসা ব্যস্তাঃ সমস্তা বা কর্ণপূরণে দেযাঃ||১৭-১৮||

Adhikarana 13 (19) · Śloka 19

বংশাবলেখনাযুক্তে মূত্রে চাজাবিকে ভিষক্ | সর্পিঃ পচেত্তেন কর্ণং পূরযেত্ কর্ণশূলিনঃ ||১৯||

বংশেত্যাদি| ‘মূত্রে চাজাবিকে ভিষক্’ ইত্যত্র তন্ত্রান্তরদর্শনাদ্বিপর্যযেণ সর্পিঃপাকঃ কর্তব্যঃ; তেন পূর্বমাবিকে মূত্রে সর্পিঃ পক্তব্যং, পশ্চাদাজ ইতি| অন্যে তু পূর্বমাবিকমূত্রপক্বেন সর্পিষা কর্ণপূরণং, পশ্চাদাজেন মূত্রেণেতি বিপর্যযং ব্যাখ্যানযন্তি| কেচিত্ সর্পিঃ পচেদিত্যত্র তৈলং পচেদিতি পঠন্তি; তন্ন, সর্বনিবন্ধৈঃ পরিহৃতত্বাত্||১৯||

Adhikarana 14 (20-21) · Śloka 21

মহতঃ পঞ্চমূলস্য কাণ্ডমষ্টাদশাঙ্গুলম্ | ক্ষৌমেণাবেষ্ট্য সংসিচ্য তৈলেনাদীপযেত্ততঃ ||২০|| যত্তৈলং চ্যবতে তেভ্যো ধৃতেভ্যো ভাজনোপরি | জ্ঞেযং তদ্দীপিকাতৈলং সদ্যো গৃহ্ণাতি বেদনাম্ ||২১||

দীপিকাতৈলমাহ- মহত ইত্যাদি| কাণ্ডং খণ্ডং, ক্ষৌমেণ অতসীবস্ত্রেণ, আবেষ্ট্য ‘ত্রিভাগম্’ ইতি শেষঃ| ঘৃতেভ্যো ‘অধোমুখম্’ ইতি শেষঃ| গৃহ্ণাতি অপহরতি||২০-২১||

Adhikarana 15 (22) · Śloka 22

কুর্যাদেবং ভদ্রকাষ্ঠে কুষ্ঠে কাষ্ঠে চ সারলে | মতিমান্ দীপিকাতৈলং কর্ণশূলনিবর্হণম্ ||২২||

কুর্যাদেবমিত্যাদি| চকারাদগুর্বৈরণ্ডাগ্নিমন্থকাষ্ঠানি গৃহ্যন্তে||২২||

Adhikarana 16 (23-26) · Śloka 26

অর্কাঙ্কুরানম্লপিষ্টাংস্তৈলাক্তান্ লবণান্বিতান্ | সন্নিদধ্যাত্ স্নুহীকাণ্ডে কোরিতে তচ্ছদাবৃতে ||২৩|| পুটপাকক্রমাস্বিন্নান্ পীডযেদারসাগমাত্ | সুখোষ্ণং তদ্রসং কর্ণে দাপযেচ্ছূলশান্তযে ||২৪|| কপিত্থমাতুলুঙ্গাম্লশৃঙ্গবেররসৈঃ শুভৈঃ | সুখোষ্ণৈঃ পূরযেত্ কর্ণং তচ্ছূলবিনিবৃত্তযে ||২৫|| কর্ণং কোষ্ণেন চুক্রেণ পূরযেত্ কর্ণশূলিনঃ | সমুদ্রফেনচূর্ণেন যুক্ত্যা চাপ্যবচূর্ণযেত্ ||২৬||

অর্কাঙ্কুরানিত্যাদি| অযং পাঠঃ সর্বনিবন্ধকারৈরনার্ষীকৃতস্তস্মান্ন ব্যাখ্যাতঃ||২৩-২৬||

Adhikarana 17 (27) · Śloka 27

অষ্টানামিহ মূত্রাণাং মূত্রেণান্যতমেন তু | কোষ্ণেন পূরযেত্ কর্ণং কর্ণশূলোপশান্তযে ||২৭||

অষ্টানামিত্যাদি| অষ্টানাং মূত্রাণামন্যতমেনৈকতমেন||২৭||

Adhikarana 18 (28) · Śloka 28

মূত্রেষ্বম্লেষু বাতঘ্নে গণে চ ক্বথিতে ভিষক্ | পচেচ্চতুর্বিধং স্নেহং পূরণং তচ্চ কর্ণযোঃ ||২৮||

মূত্রেষ্বিত্যাদি| মূত্রাণি গবাদীনামষ্টানাম্| অম্লানি সুরামস্ত্বারনালবীজপূরচুক্রাণি| বাতঘ্নো গণো বিদারিগন্ধাদিঃ||২৮||

Adhikarana 19 (29) · Śloka 29

এতা এব ক্রিযাঃ কুর্যাত্ পিত্তঘ্নৈঃ পিত্তসংযুতে |২৯|

বাতজকর্ণরোগে ক্রিযামভিধায পিত্তজকর্ণশূলচিকিত্সামাহ- এতা ইত্যাদি| এতা এব দীপিকাদযঃ ক্রিযাঃ| তত্র দীপিকা অশ্বত্থপত্রখল্লস্নেহসর্পিষা কর্ণপূরণং; কাঞ্জিকেনাপি, তস্য স্পর্শনে পিত্তহরত্বাত্| পিত্তসংযুতে কর্ণশূলে ইত্যর্থঃ|২৯|-

Adhikarana 20 (29-30) · Śloka 30

কাকোল্যাদৌ দশক্ষীরং তিক্তং চাত্র হিতং হবিঃ ||২৯|| ক্ষীরবৃক্ষপ্রবালেষু মধুকে চন্দনে তথা | কল্কক্বাথে পরং পক্বং শর্করামধুকৈঃ সরৈঃ ||৩০||

পিত্তজকর্ণশুলে সামান্যচিকিত্সামভিধায বিশেষচিকিত্সামাহ- কাকোল্যাদাবিত্যাদি| কাকোল্যাদিকল্কেন দশগুণক্ষীরং ঘৃতং সিদ্ধং হিতং, তথা তিক্তং তিক্তদ্রব্যসংস্কৃতম্; অন্যে তু তিক্তং কুষ্ঠচিকিত্সিতোক্তং ঘৃতং কথযন্তি| ক্ষীরবৃক্ষা ন্যগ্রোধোদুম্বরাশ্বত্থপ্লক্ষগর্দভাণ্ডাঃ, তেষাং পল্লবক্বাথেন কাকোল্যাদিকল্কেন সিদ্ধং ঘৃতং হিতম্| মধুকে চন্দনে তথেতি প্রত্যেকং যষ্টীমধুকচন্দনক্বাথকল্কাভ্যাং সিদ্ধম্| শর্করামধুকৈরিত্যত্র যষ্টীমধুকদ্বিতযং, অত এব বহুত্বম্| সরৈঃ বিরেচনদ্রব্যৈরিত্যর্থঃ| জেজ্জটাচার্যস্তু ক্ষীরবৃক্ষপ্রবালেষ্বিত্যেকং যোগং কথযতি, বিম্বীক্বাথ ইতি দ্বিতীযং; তৌ চ যোগাবনার্ষৌ কথযন্তি||২৯-৩০||

Adhikarana 21 (31) · Śloka 31

ইঙ্গুদীসর্ষপস্নেহৌ সকফে পূরণে হিতৌ | তিক্তৌষধানাং যূষাশ্চ স্বেদাশ্চ কফনাশনাঃ ||৩১||

শ্লেষ্মশূলস্য চিকিত্সামাহ- ইঙ্গুদীসর্ষপেত্যাদি| সকফে ‘কর্ণশূলে’ ইত্যধ্যাহারঃ| তিক্তেত্যাদি| স্বেদাশ্চ কফনাশনা ইতি তাপোষ্মস্বেদা রূক্ষাঃ||৩১||

Adhikarana 22 (32-33) · Śloka 33

সুরসাদৌ কৃতং তৈলং পঞ্চমূলে মহত্যপি | মাতুলুঙ্গরসঃ শুক্তং লশুনার্দ্রকযো রসঃ ||৩২|| একৈকঃ পূরণে পথ্যস্তৈলং তেষ্বপি বা কৃতম্ | তীক্ষ্ণা মূর্ধবিরেকাশ্চ কবলাশ্চাত্র পূজিতাঃ ||৩৩||

সুরসাদৌ কৃতমিত্যাদি| তৈলদ্বিতযমেতত্| মাতুলুঙ্গরস ইত্যাদি| মাতুলুঙ্গরসাদিনা একৈকেনৈব সিদ্ধং তৈলং পূরণে পথ্যমিত্যর্থঃ| তীক্ষ্ণা ইত্যাদি| তীক্ষ্ণা মূর্ধবিরেকা ইতি অপামার্গবীজাদিভিঃ| তীক্ষ্ণাঃ কবলাঃ পিপ্পল্যাদিভিঃ||৩২-৩৩||

Adhikarana 23 (34) · Śloka 34

কর্ণশূলবিধিঃ কৃত্স্নঃ পিত্তঘ্নঃ শোণিতাবৃতে |৩৪|

শোণিতশূলস্য চিকিত্সামাহ- কর্ণেত্যাদি| কেচিদমুং পাঠং ন পঠন্তি|৩৪|-

Adhikarana 24 (34-35) · Śloka 36

শূলপ্রণাদবাধির্যক্ষ্বেডানাং তু প্রকীর্তিতম্ ||৩৪|| সামান্যতো, বিশেষেণ বাধির্যে পূরণং শৃণু | গবাং মূত্রেণ বিল্বানি পিষ্ট্বা তৈলং বিপাচযেত্ ||৩৫|| সজলং চ সদুগ্ধং চ বাধির্যে কর্ণপূরণম্ |৩৬|

শূলেত্যাদি| পঞ্জিকাকারস্তু ‘সজলং চ সদুগ্ধং চ’ ইত্যত্র পাদিকং জলদুগ্ধাভ্যাং ইতি পঠতি||৩৪-৩৫||-

Adhikarana 25 (36-37) · Śloka 38

সিতামধুকবিম্বীভিঃ সিদ্ধং বাঽঽজে পযস্যপি ||৩৬|| বিম্বীক্বাথে বিমথ্যোষ্ণং শীতীভূতং তদুদ্ধৃতম্ | পুনঃ পচেদ্দশক্ষীরং সিতামধুকচন্দনৈঃ ||৩৭|| বিল্বাম্বুগাঢং তত্তৈলং বাধির্যে কর্ণপূরণম্ |৩৮|

সিতামধুকেত্যাদি| সিতামধুকবিম্বীভিঃ কল্কিতাভিশ্ছাগীক্ষীরে চতুর্গুণে পক্বং তিলতৈলমুষ্ণমেব বিম্বীক্বাথে মথিত্বা শীতীভূতং পাণিনাঽঽদায পুনরপি বিল্বফলক্বাথে বিলোডিতং সিতশর্করাযষ্টীমধুরক্তচন্দনৈঃ কল্কীকৃতৈর্দশগুণে ক্ষীরে বিপচেত্| কেচিদ্ ‘বিল্বাম্বুগাঢং’ ইত্যত্র ‘বিম্ব্যম্বুগাঢং’ ইতি পঠন্তি||৩৬-৩৭||-

Adhikarana 26 (38) · Śloka 38

বক্ষ্যতে যঃপ্রতিশ্যাযে বিধিঃ সোঽপ্যত্র পূজিতঃ ||৩৮||

ইদানীং বাধির্যে কফানুবন্ধোঽপ্যস্তীত্যনাগতাবেক্ষণেন সঙ্ক্ষেপার্থমতিদেশেন চিকিত্সামাহ- বক্ষ্যতে য ইত্যাদি| সোঽপ্যত্র পূজিত ইতি ‘নবং প্রতিশ্যাযমপাস্য সর্বমুপাচরেত্ সর্পিষ এব পানৈঃ’ ইত্যাদিনোক্তঃ||৩৮||

Adhikarana 27 (39) · Śloka 39

বাতব্যাধিষু যশ্চোক্তো বিধিঃ স চ হিতো ভবেত্ |৩৯|

শুদ্ধবাতকৃতে পুনরতীতাবেক্ষণেন সঙ্ক্ষেপার্থমতিদেশেন নির্দিশন্নাহ- বাতব্যাধিষ্বিত্যাদি| বাতব্যাধ্যুক্তো বিধিঃ নিবাতব্রহ্মচর্যাদিকঃ|৩৯|-

Adhikarana 28 (39) · Śloka 40

কর্ণস্রাবে পূতিকর্ণে তথৈব কৃমিকর্ণকে ||৩৯|| সমানং কর্ম কুর্বীত যোগান্ বৈশেষিকানপি |৪০|

কর্ম চিকিত্সাম্||৩৯||-

Adhikarana 29 (40-41) · Śloka 41

শিরোবিরেচনং চৈব ধূপনং পূরণং তথা ||৪০|| প্রমার্জনং ধাবনং চ বীক্ষ্য বীক্ষ্যাবচারযেত্ | রাজবৃক্ষাদিতোযেন সুরসাদিগণেন বা ||৪১||

কিং তত্ সমানং কর্মেত্যাহ- শিরোবিরেচনমিত্যাদি| প্রমার্জনং পিচুকূর্চিকযা কর্ণপ্রোঞ্ছনং, ধাবনং প্রক্ষালনম্| বীক্ষ্য বীক্ষ্যেতি প্রত্যেকং কর্ণপ্রস্রাবাদিষু দোষদূষ্যাদিমলবিশেষং দৃষ্ট্বা দৃষ্ট্বেত্যর্থঃ| রাজবৃক্ষাদিতোযেনেত্যাদি| রাজবৃক্ষাদিঃ আরগ্বধাদিঃ||৪০-৪১||

Adhikarana 30 (42-45) · Śloka 45

কর্ণপ্রক্ষালনং কার্যং চূর্ণৈরেষাং চ পূরণম্ | ক্বাথং পঞ্চকষাযং তু কপিত্থরসযোজিতম্ ||৪২|| কর্ণস্রাবে প্রশংসন্তি পূরণং মধুনা সহ | সর্জত্বক্চূর্ণসংযুক্তঃ কার্পাসীফলজো রসঃ ||৪৩|| যোজিতো মধুনা বাঽপি কর্ণস্রাবে প্রশস্যতে | লাক্ষা রসাঞ্জনং সর্জশ্চূর্ণিতং কর্ণপূরণম্ ||৪৪|| সশৈবলং মহাবৃক্ষজম্ব্বাম্রপ্রসবাযুতম্ | কুলীরক্ষৌদ্রমণ্ডূকীসিদ্ধং তৈলং চ পূজিতম্ ||৪৫||

সমানং কর্মাভিধায বৈশেষিকান্ যোগানাহ- কর্ণেত্যাদি| পঞ্চকষাযমস্মিন্নেবাধ্যাযে ‘তিন্দুকান্যভযা রোধ্রং সমঙ্গাঽঽমলকং’ ইত্যাদিনা পঠিষ্যতি, অন্যে তু আরগ্বধশিরীষজম্বুসর্জাশ্বকর্ণজং পঞ্চকষাযচূর্ণং কথযন্তি, তচ্চ টীকাপঞ্জিকাভ্যাং নাঙ্গীকৃতম্| সর্জত্বগিত্যাদি| কার্পাসী বনকার্পাসী| শৈবলং দূর্বা, হঠমিত্যন্যে| মহাবৃক্ষঃ সেহুণ্ডঃ, প্রসবাঃ পল্লবাঃ| কুলীরঃ কর্কটশৃঙ্গী, মণ্ডূকী ব্রাহ্মীভেদঃ| শৈবলাদিকং প্রসবপর্যন্তং কষাযদ্রব্যং, কুলীরাদিকং চ কল্কদ্রব্যম্| পূজিতং ‘কর্ণস্রাবে কর্ণপূরণম্’ ইত্যধ্যাহার্যম্||৪২-৪৫||

Adhikarana 31 (46) · Śloka 46

তিন্দুকান্যভযা রোধ্রং সমঙ্গাঽঽমলকং মধু | পূরণং চাত্র পথ্যং স্যাত্কপিত্থরসযোজিতম্ ||৪৬||

তিন্দুকান্যভযা রোধ্রমিত্যাদি| সমঙ্গা অঞ্জলিকারিকা, ‘বরাহক্রান্তা’ ইত্যপরে| ইদং পঞ্চকষাযচূর্ণম্||৪৬||

Adhikarana 32 (47-48) · Śloka 49

রসমাম্রকপিত্থানাং মধূকধবশালজম্ | পূরণার্থং প্রশংসন্তি তৈলং বা তৈর্বিপাচিতম্ ||৪৭|| প্রিযঙ্গুমধুকাম্বষ্ঠাধাতকীশিলপর্ণিভিঃ | মঞ্জিষ্ঠালোধ্রলাক্ষাভিঃ কপিত্থস্য রসেন বা ||৪৮|| পচেত্তৈলং তদাস্রাবমবগৃহ্ণাতি পূরণাত্ |৪৯|

রসমাম্রেত্যাদি| আম্রাদিপল্লবানাং রসঃ স্বরস এব একৈকঃ সমস্তো বা কর্ণপূরণম্, তৈর্বিপক্বং বা তিলতৈলং পূযস্রাবে পূরণম্| প্রিযঙ্গুমধুকাম্বষ্ঠেত্যাদি| প্রিযঙ্গ্বাদিকল্কৈঃ কপিত্থপল্লবরসেন চতুর্গুণেন তিলতৈলং সিদ্ধং কর্ণস্রাবাপহম্| অম্বষ্ঠা সাঙ্কুরডা, শিলা মনঃশিলা, পর্ণী শালপর্ণী||৪৭-৪৮||-

Adhikarana 33 (49-50) · Śloka 51

ঘৃতং রসাঞ্জনং নার্যাঃ ক্ষীরেণ মধুসংযুতম্ ||৪৯|| তত্প্রশস্তং চিরোত্থেঽপি সাস্রাবে পূতিকর্ণকে | নির্গুণ্ডীস্বরসস্তৈলং সিন্ধুর্ধূমরজো গুডঃ ||৫০|| পূরণঃ পূতিকর্ণস্য শমনো মধুসংযুতঃ |৫১|

ইদানীং পূতিকর্ণস্য বিশেষচিকিত্সাং যোগদ্বযেনাহ- ঘৃষ্টমিত্যাদি||৪৯-৫০||-

Adhikarana 34 (51) · Śloka 51

কৃমিকর্ণকনাশার্থং কৃমিঘ্নং যোজযেদ্বিধিম্ ||৫১||

কৃমিকর্ণে বৈশেষিকমাহ- কৃমিকর্ণকনাশার্থমিত্যাদি| কৃমিঘ্নো বিধিঃ ক্রিমিপ্রতিষেধে বক্ষ্যমাণঃ||৫১||

Adhikarana 35 (52) · Śloka 52

বার্তাকুধূমশ্চ হিতঃ সার্ষপস্নেহ এব চ |৫২|

অপরমপি বিশেষচিকিত্সিতমাহ- বার্তাকুধূম ইত্যাদি| পরিণতশুষ্কবার্তাকুধূমস্য পানং কর্ণধূপনং চ, সার্ষপস্নেহেন কর্ণপূরণং, তন্ত্রান্তরোক্তত্বাত্|৫২|-

Adhikarana 36 (52-53) · Śloka 53

কৃমিঘ্নং হরিতালেন গবাং মূত্রযুতেন চ ||৫২|| গুগ্গুলোঃ কর্ণদৌর্গন্ধ্যে ধূপনং শ্রেষ্ঠমুচ্যতে | ছর্দনং ধূমপানং চ কবলস্য চ ধারণম্ ||৫৩||

কৃমিকৃতদৌর্গন্ধ্যচিকিত্সামাহ- কৃমিঘ্নমিত্যাদি| কৃমিঘ্নং বিডঙ্গসারচূর্ণং, তচ্চ হরিতালচূর্ণেন যুতং গোমূত্রেণ পূরণং, গুগ্গুলুনা ধূপনম্| ছর্দনমিত্যাদি| কেচিচ্ছর্দনাদিকং ক্রিযাত্রিতযং ত্রযাণামাস্রাবাদীনাং হিতমাহুঃ; তন্ন, যতঃ কৃমিকৃতদৌর্গন্ধ্যসান্নিধ্যাদ্বিদেহাদিষ্বস্য দর্শনাদ্ দৌর্গন্ধ্য এব ছর্দনাদিত্রিতযং হিতম্||৫২-৫৩||

Adhikarana 37 (54) · Śloka 54

কর্ণক্ষ্বেডে হিতং তৈলং সার্ষপং চৈব পূরণম্ | বিদ্রধৌ চাপি কুর্বীত বিদ্রধ্যুক্তং চিকিত্সিতম্ ||৫৪||

কর্ণক্ষ্বেডে হিতমিত্যাদি| কর্ণক্ষ্বেডে যত্ সার্ষপং তৈলং পূরণে উক্তং তদ্বিদ্রধাবপি কুর্বীত; ন কেবলং তদেব কুর্বীত বিদ্রধ্যুক্তং চিকিত্সিতমপি কুর্বীতেত্যর্থঃ| বাতজে আমে সবেদনে বিদ্রধৌ তিলতৈলেন সেকঃ, কফজে পুনঃ সার্ষপতৈলেনেতি||৫৪||

Adhikarana 38 (55) · Śloka 55

প্রক্লেদ্য ধীমাংস্তৈলেন স্বেদেন প্রবিলায্য চ | শোধযেত্কর্ণবিট্কং তু ভিষক্ সম্যক্ শলাকযা ||৫৫||

কর্ণগূথচিকিত্সামাহ- প্রক্লেদ্যেত্যাদি||৫৫||

Adhikarana 39 (56) · Śloka 56

নাডীস্বেদোঽথ বমনং ধূমো মূর্ধবিরেচনম্ | বিধিশ্চ কফহৃত্সর্বঃ কর্ণকণ্ডূমপোহতি ||৫৬||

কর্ণকণ্ডূচিকিত্সামাহ- নাডীস্বেদ ইত্যাদি| বমনং সস্বেদবমনং, ধূমোঽত্র বৈরেচনিকঃ||৫৬||

Adhikarana 40 (57) · Śloka 57

অথ কর্ণপ্রতীনাহে স্নেহস্বেদৌ প্রযোজযেত্ | ততো বিরিক্তশিরসঃ ক্রিযাং প্রাপ্তাং সমাচরেত্ ||৫৭||

কর্ণপ্রতীনাহে চিকিত্সামাহ- অথেত্যাদি| ক্রিযাং স্নেহস্বেদনস্যাদিকাং, প্রাপ্তাং যুক্তাম্||৫৭||

Adhikarana 41 (58) · Śloka 58

কর্ণপাকস্য ভৈষজ্যং কুর্যাত্পিত্তবিসর্পবত্ |৫৮|

কর্ণপাকে চিকিত্সামাহ- কর্ণপাকস্যেত্যাদি| শীতালেপনপরিষেকাদীংশ্চ তচ্চিকিত্সিতোক্তান্ কুর্যাত্|৫৮|-

Adhikarana 42 (58) · Śloka 59

কর্ণচ্ছিদ্রে বর্তমানং কীটং ক্লেদমলাদি বা ||৫৮|| শৃঙ্গেণাপহরেদ্ধীমানথবাঽপি শলাকযা |৫৯|

শারীরদোষভবকর্ণগূথপ্রত্যাকর্ষণচিকিত্সাপ্রসঙ্গেনাগন্তুকীটমলাদীনামাকর্ষণচিকিত্সামাহ- কর্ণচ্ছিদ্র ইত্যাদি| শৃঙ্গেণাপহরেত্ ‘আচূষ্য’ ইতি শেষঃ||৫৮||-

Adhikarana 43 (59) · Śloka 59

শেষাণাং তু বিকারাণাং প্রাক্ চিকিত্সিতমীরিতম্ ||৫৯||

ইদানীং শালক্যসিদ্ধান্তেন চতুর্বিধানামর্শসাং সপ্তবিধানামর্বুদানাং চতুর্বিধানাং শোফানাং কিং চিকিত্সিতমিতি পৃষ্ঠঃ শালাক্যতন্ত্রস্য ন্যূনতাদোষং পরিজিহীর্ষুরাহ- শেষাণামিত্যাদি| শেষাণাং চতুর্বিধানামর্শসাং, সপ্তবিধানাম্ অর্বুদানাং, চতুর্বিধানাং শোফানাং চেত্যর্থঃ| প্রাগিতি অর্শআদিচিকিত্সিতে| ঈরিতং প্রতিদোষং প্রত্যবস্থং সর্বমুক্তমিত্যর্থঃ||৫৯||

Adhikarana puShpikA · Śloka 21

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে কর্ণগতরোগপ্রতিষেধো নামৈকবিংশোঽধ্যাযঃ ||২১||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে একবিংশোঽধ্যাযঃ||২১||