21. karṇagatarōgapratiṣēdhādhyāyaḥ

Adhikarana 1 (1-2) · Śloka 2

অথাতঃ কর্ণগতরোগপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

Adhikarana 2 (3) · Śloka 3

সামান্যং কর্ণরোধেষু ঘৃতপানং রসাযনম্ | অব্যাযামোঽশিরঃস্নানং ব্রহ্মচর্যমকত্থনম্ ||৩||

Adhikarana 3 (4) · Śloka 4

কর্ণশূলে প্রণাদে চ বাধির্যক্ষ্বেডযোরপি | চতুর্ণামপি রোগাণাং সামান্যং ভেষজং বিদুঃ ||৪||

Adhikarana 4 (5) · Śloka 5

স্নিগ্ধং বাতহরৈঃ স্বেদৈর্নরং স্নেহবিরেচিতম্ | নাডীস্বেদৈরুপচরেত্পিণ্ডস্বেদৈস্তথৈব চ ||৫||

Adhikarana 5 (6-7) · Śloka 7

বিল্বৈরণ্ডার্কবর্ষাভূদধিত্থোন্মত্তশিগ্রুভিঃ | বস্তগন্ধাশ্বগন্ধাভ্যাং তর্কারীযববেণুভিঃ ||৬|| আরনালশৃতৈরেভির্নাডীস্বেদঃ প্রযোজিতঃ | কফবাতসমুত্থানং কর্ণশূলং নিরস্যতি ||৭||

Adhikarana 6 (8) · Śloka 8

মীনকুক্কুটলাবানাং মাংসজৈঃ পযসাঽপি বা | পিণ্ডৈঃ স্বেদং চ কুর্বীত কর্ণশূলনিবারণম্ ||৮||

Adhikarana 7 (9-10) · Śloka 10

অশ্বত্থপত্রখল্লং বা বিধায বহুপত্রকম্ | তদঙ্গারৈঃ সুসম্পূর্ণং নিদধ্যাচ্ছ্রবণোপরি ||৯|| যত্তৈলং চ্যবতে তস্মাত্ খল্লাদঙ্গারতাপিতাত্ | তত্ প্রাপ্তং শ্রবণস্রোতঃ সদ্যো গৃহ্ণাতি বেদনাম্ ||১০||

Adhikarana 8 (11) · Śloka 11

ক্ষৌমগুগ্গুল্বগুরুভিঃ সঘৃতৈর্ধূপযেচ্চ তম্ | ভক্তোপরি হিতং সর্পির্বস্তিকর্ম চ পূজিতম্ ||১১||

Adhikarana 9 (12) · Śloka 13

নিরন্নো নিশি তত্সর্পিঃ পীত্বোপরি পিবেত্ পযঃ | মূর্ধবস্তিষু নস্যে চ মস্তিষ্কে পরিষেচনে ||১২|| শতপাকং বলাতৈলং প্রশস্তং চাপি ভোজনে |১৩|

Adhikarana 10 (13) · Śloka 14

কণ্টকারীমজাক্ষীরে পক্ত্বা ক্ষীরেণ তেন চ ||১৩|| বিপচেত্ কুক্কুটবসাং কর্ণযোস্তত্প্রপূরণম্ |১৪|

Adhikarana 11 (14-16) · Śloka 16

তণ্ডুলীযকমূলানি ফলমঙ্কোলজং তথা ||১৪|| অহিংস্রাকেন্দুকান্মূলং সরলং দেবদারু চ | লশুনং শৃঙ্গবেরং চ তথা বংশাবলেখনম্ ||১৫|| কল্কৈরেষাং তথাঽম্লৈশ্চ পচেত্ স্নেহং চতুর্বিধম্ | বেদনাযাঃ প্রশান্ত্যর্থং হিতং তত্কর্ণপূরণম্ ||১৬||

Adhikarana 12 (17-18) · Śloka 18

লশুনার্দ্রকশিগ্রূণাং মুরঙ্গ্যা মূলকস্য চ | কদল্যাঃ স্বরসঃ শ্রেষ্ঠঃ কদুষ্ণঃ কর্ণপূরণে ||১৭|| শৃঙ্গবেররসঃ ক্ষৌদ্রং সৈন্ধবং তৈলমেব চ | কদুষ্ণং কর্ণযোর্দেযমেতদ্বা বেদনাপহম্ ||১৮||

Adhikarana 13 (19) · Śloka 19

বংশাবলেখনাযুক্তে মূত্রে চাজাবিকে ভিষক্ | সর্পিঃ পচেত্তেন কর্ণং পূরযেত্ কর্ণশূলিনঃ ||১৯||

Adhikarana 14 (20-21) · Śloka 21

মহতঃ পঞ্চমূলস্য কাণ্ডমষ্টাদশাঙ্গুলম্ | ক্ষৌমেণাবেষ্ট্য সংসিচ্য তৈলেনাদীপযেত্ততঃ ||২০|| যত্তৈলং চ্যবতে তেভ্যো ধৃতেভ্যো ভাজনোপরি | জ্ঞেযং তদ্দীপিকাতৈলং সদ্যো গৃহ্ণাতি বেদনাম্ ||২১||

Adhikarana 15 (22) · Śloka 22

কুর্যাদেবং ভদ্রকাষ্ঠে কুষ্ঠে কাষ্ঠে চ সারলে | মতিমান্ দীপিকাতৈলং কর্ণশূলনিবর্হণম্ ||২২||

Adhikarana 16 (23-26) · Śloka 26

অর্কাঙ্কুরানম্লপিষ্টাংস্তৈলাক্তান্ লবণান্বিতান্ | সন্নিদধ্যাত্ স্নুহীকাণ্ডে কোরিতে তচ্ছদাবৃতে ||২৩|| পুটপাকক্রমাস্বিন্নান্ পীডযেদারসাগমাত্ | সুখোষ্ণং তদ্রসং কর্ণে দাপযেচ্ছূলশান্তযে ||২৪|| কপিত্থমাতুলুঙ্গাম্লশৃঙ্গবেররসৈঃ শুভৈঃ | সুখোষ্ণৈঃ পূরযেত্ কর্ণং তচ্ছূলবিনিবৃত্তযে ||২৫|| কর্ণং কোষ্ণেন চুক্রেণ পূরযেত্ কর্ণশূলিনঃ | সমুদ্রফেনচূর্ণেন যুক্ত্যা চাপ্যবচূর্ণযেত্ ||২৬||

Adhikarana 17 (27) · Śloka 27

অষ্টানামিহ মূত্রাণাং মূত্রেণান্যতমেন তু | কোষ্ণেন পূরযেত্ কর্ণং কর্ণশূলোপশান্তযে ||২৭||

Adhikarana 18 (28) · Śloka 28

মূত্রেষ্বম্লেষু বাতঘ্নে গণে চ ক্বথিতে ভিষক্ | পচেচ্চতুর্বিধং স্নেহং পূরণং তচ্চ কর্ণযোঃ ||২৮||

Adhikarana 19 (29) · Śloka 29

এতা এব ক্রিযাঃ কুর্যাত্ পিত্তঘ্নৈঃ পিত্তসংযুতে |২৯|

Adhikarana 20 (29-30) · Śloka 30

কাকোল্যাদৌ দশক্ষীরং তিক্তং চাত্র হিতং হবিঃ ||২৯|| ক্ষীরবৃক্ষপ্রবালেষু মধুকে চন্দনে তথা | কল্কক্বাথে পরং পক্বং শর্করামধুকৈঃ সরৈঃ ||৩০||

Adhikarana 21 (31) · Śloka 31

ইঙ্গুদীসর্ষপস্নেহৌ সকফে পূরণে হিতৌ | তিক্তৌষধানাং যূষাশ্চ স্বেদাশ্চ কফনাশনাঃ ||৩১||

Adhikarana 22 (32-33) · Śloka 33

সুরসাদৌ কৃতং তৈলং পঞ্চমূলে মহত্যপি | মাতুলুঙ্গরসঃ শুক্তং লশুনার্দ্রকযো রসঃ ||৩২|| একৈকঃ পূরণে পথ্যস্তৈলং তেষ্বপি বা কৃতম্ | তীক্ষ্ণা মূর্ধবিরেকাশ্চ কবলাশ্চাত্র পূজিতাঃ ||৩৩||

Adhikarana 23 (34) · Śloka 34

কর্ণশূলবিধিঃ কৃত্স্নঃ পিত্তঘ্নঃ শোণিতাবৃতে |৩৪|

Adhikarana 24 (34-35) · Śloka 36

শূলপ্রণাদবাধির্যক্ষ্বেডানাং তু প্রকীর্তিতম্ ||৩৪|| সামান্যতো, বিশেষেণ বাধির্যে পূরণং শৃণু | গবাং মূত্রেণ বিল্বানি পিষ্ট্বা তৈলং বিপাচযেত্ ||৩৫|| সজলং চ সদুগ্ধং চ বাধির্যে কর্ণপূরণম্ |৩৬|

Adhikarana 25 (36-37) · Śloka 38

সিতামধুকবিম্বীভিঃ সিদ্ধং বাঽঽজে পযস্যপি ||৩৬|| বিম্বীক্বাথে বিমথ্যোষ্ণং শীতীভূতং তদুদ্ধৃতম্ | পুনঃ পচেদ্দশক্ষীরং সিতামধুকচন্দনৈঃ ||৩৭|| বিল্বাম্বুগাঢং তত্তৈলং বাধির্যে কর্ণপূরণম্ |৩৮|

Adhikarana 26 (38) · Śloka 38

বক্ষ্যতে যঃপ্রতিশ্যাযে বিধিঃ সোঽপ্যত্র পূজিতঃ ||৩৮||

Adhikarana 27 (39) · Śloka 39

বাতব্যাধিষু যশ্চোক্তো বিধিঃ স চ হিতো ভবেত্ |৩৯|

Adhikarana 28 (39) · Śloka 40

কর্ণস্রাবে পূতিকর্ণে তথৈব কৃমিকর্ণকে ||৩৯|| সমানং কর্ম কুর্বীত যোগান্ বৈশেষিকানপি |৪০|

Adhikarana 29 (40-41) · Śloka 41

শিরোবিরেচনং চৈব ধূপনং পূরণং তথা ||৪০|| প্রমার্জনং ধাবনং চ বীক্ষ্য বীক্ষ্যাবচারযেত্ | রাজবৃক্ষাদিতোযেন সুরসাদিগণেন বা ||৪১||

Adhikarana 30 (42-45) · Śloka 45

কর্ণপ্রক্ষালনং কার্যং চূর্ণৈরেষাং চ পূরণম্ | ক্বাথং পঞ্চকষাযং তু কপিত্থরসযোজিতম্ ||৪২|| কর্ণস্রাবে প্রশংসন্তি পূরণং মধুনা সহ | সর্জত্বক্চূর্ণসংযুক্তঃ কার্পাসীফলজো রসঃ ||৪৩|| যোজিতো মধুনা বাঽপি কর্ণস্রাবে প্রশস্যতে | লাক্ষা রসাঞ্জনং সর্জশ্চূর্ণিতং কর্ণপূরণম্ ||৪৪|| সশৈবলং মহাবৃক্ষজম্ব্বাম্রপ্রসবাযুতম্ | কুলীরক্ষৌদ্রমণ্ডূকীসিদ্ধং তৈলং চ পূজিতম্ ||৪৫||

Adhikarana 31 (46) · Śloka 46

তিন্দুকান্যভযা রোধ্রং সমঙ্গাঽঽমলকং মধু | পূরণং চাত্র পথ্যং স্যাত্কপিত্থরসযোজিতম্ ||৪৬||

Adhikarana 32 (47-48) · Śloka 49

রসমাম্রকপিত্থানাং মধূকধবশালজম্ | পূরণার্থং প্রশংসন্তি তৈলং বা তৈর্বিপাচিতম্ ||৪৭|| প্রিযঙ্গুমধুকাম্বষ্ঠাধাতকীশিলপর্ণিভিঃ | মঞ্জিষ্ঠালোধ্রলাক্ষাভিঃ কপিত্থস্য রসেন বা ||৪৮|| পচেত্তৈলং তদাস্রাবমবগৃহ্ণাতি পূরণাত্ |৪৯|

Adhikarana 33 (49-50) · Śloka 51

ঘৃতং রসাঞ্জনং নার্যাঃ ক্ষীরেণ মধুসংযুতম্ ||৪৯|| তত্প্রশস্তং চিরোত্থেঽপি সাস্রাবে পূতিকর্ণকে | নির্গুণ্ডীস্বরসস্তৈলং সিন্ধুর্ধূমরজো গুডঃ ||৫০|| পূরণঃ পূতিকর্ণস্য শমনো মধুসংযুতঃ |৫১|

Adhikarana 34 (51) · Śloka 51

কৃমিকর্ণকনাশার্থং কৃমিঘ্নং যোজযেদ্বিধিম্ ||৫১||

Adhikarana 35 (52) · Śloka 52

বার্তাকুধূমশ্চ হিতঃ সার্ষপস্নেহ এব চ |৫২|

Adhikarana 36 (52-53) · Śloka 53

কৃমিঘ্নং হরিতালেন গবাং মূত্রযুতেন চ ||৫২|| গুগ্গুলোঃ কর্ণদৌর্গন্ধ্যে ধূপনং শ্রেষ্ঠমুচ্যতে | ছর্দনং ধূমপানং চ কবলস্য চ ধারণম্ ||৫৩||

Adhikarana 37 (54) · Śloka 54

কর্ণক্ষ্বেডে হিতং তৈলং সার্ষপং চৈব পূরণম্ | বিদ্রধৌ চাপি কুর্বীত বিদ্রধ্যুক্তং চিকিত্সিতম্ ||৫৪||

Adhikarana 38 (55) · Śloka 55

প্রক্লেদ্য ধীমাংস্তৈলেন স্বেদেন প্রবিলায্য চ | শোধযেত্কর্ণবিট্কং তু ভিষক্ সম্যক্ শলাকযা ||৫৫||

Adhikarana 39 (56) · Śloka 56

নাডীস্বেদোঽথ বমনং ধূমো মূর্ধবিরেচনম্ | বিধিশ্চ কফহৃত্সর্বঃ কর্ণকণ্ডূমপোহতি ||৫৬||

Adhikarana 40 (57) · Śloka 57

অথ কর্ণপ্রতীনাহে স্নেহস্বেদৌ প্রযোজযেত্ | ততো বিরিক্তশিরসঃ ক্রিযাং প্রাপ্তাং সমাচরেত্ ||৫৭||

Adhikarana 41 (58) · Śloka 58

কর্ণপাকস্য ভৈষজ্যং কুর্যাত্পিত্তবিসর্পবত্ |৫৮|

Adhikarana 42 (58) · Śloka 59

কর্ণচ্ছিদ্রে বর্তমানং কীটং ক্লেদমলাদি বা ||৫৮|| শৃঙ্গেণাপহরেদ্ধীমানথবাঽপি শলাকযা |৫৯|

Adhikarana 43 (59) · Śloka 59

শেষাণাং তু বিকারাণাং প্রাক্ চিকিত্সিতমীরিতম্ ||৫৯||

Adhikarana puShpikA · Śloka 21

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে কর্ণগতরোগপ্রতিষেধো নামৈকবিংশোঽধ্যাযঃ ||২১||