18. kriyākalpādhyāyaḥ

Adhikarana 1 (1-2) · Śloka 2

অথাতঃ ক্রিযাকল্পং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

প্রাগুক্তাধ্যাযেষু চিকিত্সিতান্যভিহিতানি, তেষু চিকিত্সিতেষু সর্বত্র তর্পণাদেঃ ক্রিযাযা অভিহিতত্বাত্ সঙ্ক্ষেপার্থমেকত্র তর্পণাদিকল্পনবিস্তরায ক্রিযাকল্পঃ প্রতিপাদ্যো ভবতীত্যাহ- অথাত ইত্যাদি| ক্রিযাণাং তর্পণপুটপাকাদীনাং কল্পনং করণং ক্রিযাকল্পঃ||১-২||

Adhikarana 2 (3) · Śloka 3

সর্বশাস্ত্রার্থতত্ত্বজ্ঞস্তপোদৃষ্টিরুদারধীঃ | বৈশ্বামিত্রং শশাসাথ শিষ্যং কাশিপতির্মুনিঃ ||৩||

ক্রিযাকল্পবিষযেঽপি প্রাঙ্নির্দিষ্টং যত্ তর্পণাদি তত্পূর্বকর্মপ্রধানকর্মহীনযোগাতিযোগোত্তরকর্মভির্নির্দিদিক্ষুরাহ- সর্বশাস্ত্রার্থেত্যাদি| সর্বশাস্ত্রার্থতত্ত্বজ্ঞাদিগুণযুক্তঃ কাশিপতির্মুনির্বৈশ্বামিত্রং শিষ্যং শশাসেতি পিণ্ডার্থঃ| তপসা দৃষ্টির্দর্শনং বিশেষজ্ঞানোদযো যস্যাসৌ তপোদৃষ্টিঃ| উদারা মহতী ধীর্যস্য স উদারধীঃ| বিশ্বামিত্রস্যাপত্যং বৈশ্বামিত্রঃ সুশ্রুতস্তম্| শশাস শিক্ষিতবানিত্যর্থঃ| অথশব্দো মঙ্গলার্থঃ| কাশিপতির্মুনিরিতি রাজর্ষিঃ ধন্বন্তরিরিত্যর্থঃ||৩||

Adhikarana 3 (4) · Śloka 4

তর্পণং পুটপাকশ্চ সেক আশ্চ্যোতনাঞ্জনে | তত্র তত্রোপদিষ্টানি তেষাং ব্যাসং নিবোধ মে ||৪||

কাস্তাঃ ক্রিযা যাসাং কল্পনমিত্যাহ- তর্পণমিত্যাদি| যানি তর্পণপুটপাকাদীনি তত্র তত্র বাতাভিষ্যন্দাদাবুপদিষ্টানি সঙ্ক্ষেপতঃ কথিতানি তেষাং বিস্তরং মত্সকাশান্নিবোধ জানীহীতি পিণ্ডার্থঃ| শিরোবস্তিঃ সর্বেন্দ্রিযতর্পণাত্ তর্পণোক্তেরেবোক্তো মন্তব্যঃ, পুটপাকসেকাশ্চ্যোতনান্যপি স্নেহযুক্তানি তর্পণরূপত্বাত্ তর্পণ এবান্তর্ভবন্তি, যত্ পুনরুপাদানং পুটপাকাদীনাং তদ্রূক্ষাণাং পুটপাকাদীনাং গ্রহণায কৃতমিত্যর্থঃ||৪||

Adhikarana 4 (5-11) · Śloka 11

সংশুদ্ধদেহশিরসো জীর্ণান্নস্য শুভে দিনে | পূর্বাহ্ণে বাঽপরাহ্ণে বা কার্যমক্ষ্ণোস্তু তর্পণম্ ||৫|| বাতাতপরজোহীনে বেশ্মন্যুত্তানশাযিনঃ | আধারৌ মাষচূর্ণেন ক্লিন্নেন পরিমণ্ডলৌ ||৬|| সমৌ দৃঢাবসম্বাধৌ কর্তব্যৌ নেত্রকোশযোঃ | পূরযেদ্ঘৃতমণ্ডস্য বিলীনস্য সুখোদকে ||৭|| আপক্ষ্মাগ্রাত্ততঃ স্থাপ্যং পঞ্চ তদ্বাক্শতানি তু | স্বস্থে, কফে ষট্, পিত্তেঽষ্টৌ, দশ বাতে তদুত্তমম্ ||৮|| রোগস্থানবিশেষেণ কেচিত্ কালং প্রচক্ষতে | যথাক্রমোপদিষ্টেষু ত্রীণ্যেকং পঞ্চ সপ্ত চ ||৯|| দশ দৃষ্ট্যামথাষ্টৌ চ বাক্শতানি বিভাবযেত্ | ততশ্চাপাঙ্গতঃ স্নেহং স্রাবযিত্বাঽক্ষি শোধযেত্ ||১০|| স্বিন্নেন যবপিষ্টেন, স্নেহবীর্যেরিতং ততঃ | যথাস্বং ধূমপানেন কফমস্য বিশোধযেত্ ||১১||

তর্পণং কথং কার্যমিত্যাহ- সংশুদ্ধেত্যাদি| সংশুদ্ধদেহশিরস ইতি সিরামোক্ষণবিরেচননিরূহশিরোবিরেচনৈঃ সম্যক্শুদ্ধকাযমস্তকস্যেত্যর্থঃ| বেশ্মনি গৃহে| আধারৌ পালী ইত্যর্থঃ| ক্লিন্নেন পানীযালোডিতেন| পরিমণ্ডলৌ বর্তুলৌ, দ্বাবপি নেত্রকোশৌ পরিবার্য স্থিতাবিত্যর্থঃ| এতেন তির্যক্পূরণে ঘৃতস্য মাত্রোক্তা| সমৌ অনিম্নোন্নতৌ, দৃঢৌ অচ্ছিদ্রৌ, অসম্বাধৌ অসঙ্কটৌ| নেত্রকোশযোরিত্যত্র ‘পরিতঃ’ ইতি শেষঃ| ঘৃতমণ্ডো ঘৃতস্যোপর্যচ্ছো ভাগঃ| সুখোদকে উষ্ণোদকে| আপক্ষ্মাগ্রাদিত্যত্র পূরযেদিতি সম্বন্ধনীযম্| আপক্ষ্মাগ্রাত্ বর্ত্মলোমপর্যন্তমিত্যর্থঃ| এতেনোর্ধ্বং পূরণে ঘৃতস্য মাত্রোক্তা ভবতি| তর্পণং কিযত্কালং স্থাপ্যমিতি দর্শযন্নাহ- তত ইত্যাদি| তচ্চ প্রমাণমুত্তমং, দোষবলাপেক্ষযা পুনর্হ্রাসোঽপি কর্তব্যঃ| ইদানীং স্বমতং প্রদর্শ্য পরমতমপি দর্শযন্নাহ- রোগেত্যাদি| রোগস্থানবিশেষেণেতি সন্ধিবর্ত্মশুক্লাদিভেদেনেত্যর্থঃ| কথং রোগস্থানবিশেষেণ কালং প্রচক্ষতে ইত্যাহ- যথাক্রমোপদিষ্টেষ্বিত্যাদি| যথাক্রমকথিতেষু সন্ধ্যাদিরোগস্থানেষ্বিত্যর্থঃ| তত্র ত্রীণি বাক্শতানি সন্ধৌ, বর্ত্মন্যেকং, শুক্লে পঞ্চ, কৃষ্ণে সপ্ত, সর্বত্র দশ, দৃষ্টাবপি দশ অষ্টৌ বা| তত ইত্যাদি| অপাঙ্গতঃ অপাঙ্গাত্, ভ্রূপুচ্ছান্তপ্রদেশাদিত্যর্থঃ| স্নেহং স্রাবযিত্বা শলাকাকৃতদ্বারেণ| স্নেহবীর্যেরিতমিত্যাদি| স্নেহবীর্যেরিতং স্নেহশক্ত্যা প্রেরিতম্| ততঃ স্নেহাপনযনান্তরম্| যথাস্বং ধূমপানেনেতি কফপ্রত্যনীকেন শিরোবিরেচনধূমপানেনেত্যর্থঃ||৫-১১||

Adhikarana 5 (12) · Śloka 12

একাহং বা ত্র্যহং বাঽপি পঞ্চাহং চেষ্যতে পরম্ |১২|

কতি দিনানি তর্পণপ্রযোগস্তদাহ- একাহমিত্যাদি| একাহং বাতে, ত্র্যহং পিত্তে, পঞ্চাহং কফে ইতি গযী; একাহং ন্যূনদোষে, ত্র্যহং মধ্যদোষে, পঞ্চাহমধিকদোষে ইতি জেজ্জটাচার্যঃ| পরমিত্যুত্কৃষ্টপ্রমাণং যথা স্যাত্; এতেনাতঃ পরং তর্পণং ন যোজ্যম্| তচ্চ তর্পণং বিদেহানুমতেন নিরন্তরং দিনান্তরং দ্ব্যন্তরং ত্র্যন্তরং বা যোজ্যম্| তথা চ বিদেহঃ,- “স্বস্ববৃত্তে বিধাতব্যং দ্ব্যন্তরং তর্পণং ভবেত্| অহন্যহনি বাতোত্থে, রক্তপিত্তে দিনান্তরম্|| তর্পণং সন্নিপাতোত্থে দ্ব্যন্তরং, ত্র্যন্তরং কফে” ইতি|১২|-

Adhikarana 6 (12-13) · Śloka 13

তর্পণে তৃপ্তিলিঙ্গানি নেত্রস্যেমানি লক্ষযেত্ ||১২|| সুখস্বপ্নাববোধত্বং বৈশদ্যং বর্ণপাটবম্ | নির্বৃতির্ব্যাধিবিধ্বংসঃ ক্রিযালাঘবমেব চ ||১৩||

তর্পণে ইত্যাদি| বৈশদ্যং মলাভাবঃ| বর্ণপাটবং শ্বেতত্বাদের্বর্ণস্য যথার্থগ্রহণং; অন্যে তু নেত্রগতস্যৈব শুক্লকৃষ্ণাদের্বর্ণস্য বৈমল্যমাহুঃ| নির্বৃতিঃ তাত্কালিকং সুখমুত্পন্নম্| ক্রিযালাঘবমিতি ক্রিযাণাং নিমেষোন্মেষাদীনাং শীঘ্রতা; অন্যে তু ক্রিযা নিমেষোন্মেষণাদিকাঃ, লাঘবং নেত্রযোরেব লঘুতেত্যাহুঃ||১২-১৩||

Adhikarana 7 (14) · Śloka 14

গুর্বাবিলমতিস্নিগ্ধমশ্রুকণ্ডূপদেহবত্ | জ্ঞেযং দোষসমুত্ক্লিষ্টং নেত্রমত্যর্থতর্পিতম্ ||১৪||

অতিতর্পিতস্য নেত্রস্য লক্ষণমাহ- গুর্বাবিলমিত্যাদি| আবিলম্ আকুলং, দোষসমুত্ক্লিষ্টং দোষব্যাপ্তম্||১৪||

Adhikarana 8 (15) · Śloka 15

রূক্ষমাবিলমস্রাঢ্যমসহং রূপদর্শনে | ব্যাধিবৃদ্ধিশ্চ তজ্জ্ঞেযং হীনতর্পিতমক্ষি চ ||১৫||

হীনতর্পিতস্য নযনস্য লক্ষণমাহ- রূক্ষমিত্যাদি| অস্রাঢ্যম্ অশ্রুবহুলম্||১৫||

Adhikarana 9 (16) · Śloka 16

অনযোর্দোষবাহুল্যাত্ প্রযতেত চিকিত্সিতে | ধূমনস্যাঞ্জনৈঃ সেকৈ রূক্ষৈঃ স্নিগ্ধৈশ্চ যোগবিত্ ||১৬||

ইদানীমতিতৃপ্তাতৃপ্তযোশ্চিকিত্সামুদ্দিশন্নাহ- অনযোরিত্যাদি| এতৈর্ধূমনস্যাঞ্জনসেকৈ রূক্ষৈঃ পিত্তশ্লেষ্মভূযিষ্ঠে, বাতভূযিষ্ঠে তু স্নিগ্ধৈরিতি| যোগবিত্ শাস্ত্রবিদ্বৈদ্যঃ||১৬||

Adhikarana 10 (17) · Śloka 18

তাম্যত্যতিবিশুষ্কং যদ্রূক্ষং যচ্চাতিদারুণম্ | শীর্ণপক্ষ্মাবিলং জিহ্মং রোগক্লিষ্টং চ যদ্ভৃশম্ ||১৭|| তদক্ষি তর্পণাদেব লভেতোর্জামসংশযম্ |১৮|

তর্পণবিষযং নির্দিশন্নাহ- তাম্যতীত্যাদি| তাম্যতি অন্ধকারমিব পশ্যতি| অতিবিশুষ্কম্ অশ্রুরহিতম্| রূক্ষম্ অস্নিগ্ধচ্ছবি| দারুণং কঠিনবর্ত্ম| জিহ্মং রূপক্রিযাসু জডম্| ঊর্জাং বলম্||১৭||-

Adhikarana 11 (18) · Śloka 19

দুর্দিনাত্যুষ্ণশীতেষু চিন্তাযাসভ্রমেষু চ ||১৮|| অশান্তোপদ্রবে চাক্ষ্ণি তর্পণং ন প্রশস্যতে |১৯|

তর্পণবিষযমাহ- দুর্দিনেত্যাদি| অশান্তোপদ্রবে চেতি অশান্তা অস্বল্পীভূতা উদীর্ণবেদনাদয উপদ্রবা যত্র তস্মিন্||১৮||-

Adhikarana 12 (19) · Śloka 20

পুটপাকস্তথৈতেষু, নস্যং যেষু চ গর্হিতম্ ||১৯|| তর্পণার্হা ন যে প্রোক্তাঃ স্নেহপানাক্ষমাশ্চ যে |২০|

ইদানীং পুটপাকস্য বিষযাবিষযমাহ- পুটপাক ইত্যাদি| পুটপাকস্তথৈতেষ্বিতি এতেষু পূর্বোক্তেষু তর্পণার্হেষু পুটপাকস্তথাঽর্হতীত্যর্থঃ| অযং পুটপাকস্য বিষযঃ, অবিষযস্তু নস্যং যেষু চ গর্হিতমিত্যাদিকঃ| নস্যং যেষু চ গর্হিতমিতি যেষু নস্যং গর্হিতং তেষু পুটপাকোঽপি গর্হিতঃ| তর্পণার্হা ন যে প্রোক্তা ইতি যে চিন্তাভ্রমগৃহীতাদযস্তর্পণং নার্হন্তি তে পুটপাকমপি নার্হন্তি| স্নেহপানাক্ষমাশ্চ যে দুর্বলারোচকিপ্রভৃতযঃ স্নেহপানং ন ক্ষমন্তে তে পুটপাকমপি ন ক্ষমন্তে ইত্যর্থঃ||১৯||-

Adhikarana 13 (20-21) · Śloka 21

ততঃ প্রশান্তদোষেষু পুটপাকক্ষমেষু চ ||২০|| পুটপাকঃ প্রযোক্তব্যো নেত্রেষু ভিষজা ভবেত্ | স্নেহনো লেখনীযশ্চ রোপণীযশ্চ স ত্রিধা ||২১||

ইদানীং পুটপাকস্যাবস্থিকং কালমুদ্দিশন্নাহ- তত ইত্যাদি| এবম্ভূতেষু নেত্রেষু ভিষজা পুটপাকঃ প্রযোক্তব্যো ভবেদিতি পিণ্ডার্থঃ| প্রশান্তদোষেষ্বিতি প্রশব্দোঽযমাদিকর্মণি, তেন প্রথমকর্মশান্তাবস্থদোষেষ্বিত্যর্থঃ| পুটপাকক্ষমেষু চেতি তর্পণনস্যস্নেহপানার্হেষ্বিত্যর্থঃ; তর্পণাদ্যনর্হাণি পুনঃ পুটপাকং ন ক্ষমন্তে| স্নেহন ইত্যাদি||২০-২১||

Adhikarana 14 (22) · Śloka 22

হিতঃ স্নিগ্ধোঽতিরূক্ষস্য স্নিগ্ধস্যাপি চ লেখনঃ | দৃষ্টের্বলার্থমপরঃ পিত্তাসৃগ্ব্রণবাতনুত্ ||২২||

তেষাং ত্রিবিধানামপি বিষযমাহ- হিত ইত্যাদি| অপর ইতি রোপণীযঃ পুটপাক ইত্যর্থঃ| ‘হিতঃ স্নিগ্ধোঽতিরূক্ষস্য’ ইত্যত্র ‘ত্রিবিধঃ স হিতো রূক্ষে’ ইতি কেচিত্ পঠন্তি| ‘পিত্তাসৃগ্ব্রণবাতনুত্’ ইত্যত্র ‘পিত্তাসৃগ্ব্রণনাশন’ ইতি পঠন্তি||২২||

Adhikarana 15 (23) · Śloka 23

স্নেহমাংসবসামজ্জমেদঃস্বাদ্বৌষধৈঃ কৃতঃ | স্নেহনঃ পুটপাকস্তু ধার্যো দ্বে বাক্শতে তু সঃ ||২৩||

স্নেহনপুটপাকমাহ- স্নেহেত্যাদি| স্নেহমাংসমিতি স্নেহপ্রধানং মাংসম্, আনূপমিত্যর্থঃ, ‘সর্পির্মাংস’ ইতি কেচিত্ পঠন্তি| স্বাদ্বৌষধৈঃ কাকোল্যাদিভিঃ, কৃতঃ সংস্কৃতঃ||২৩||

Adhikarana 16 (24-25) · Śloka 25

জাঙ্গলানাং যকৃন্মাংসৈর্লেখনদ্রব্যসম্ভৃতৈঃ | কৃষ্ণলোহরজস্তাম্রশঙ্খবিদ্রুমসিন্ধুজৈঃ ||২৪|| সমুদ্রফেনকাসীসস্রোতোজদধিমস্তুভিঃ | লেখনো বাক্শতং তস্য পরং ধারণমুচ্যতে ||২৫||

লেখনপুটপাকমাহ- জাঙ্গলানামিত্যাদি| জাঙ্গলা এণাদযঃ| যকৃত্ কালখণ্ডানি, মাংসানি চ কালখণ্ডাসন্নান্যেব| বিদ্রুমঃ প্রবালঃ, সিন্ধুজং সৈন্ধবম্||২৪-২৫||

Adhikarana 17 (26) · Śloka 26

স্তন্যজাঙ্গলমধ্বাজ্যতিক্তদ্রব্যবিপাচিতঃ | লেখনাত্ত্রিগুণং ধার্যঃ পুটপাকস্তু রোপণঃ ||২৬||

রোপণপুটপাকমাহ- স্তন্যজাঙ্গলেত্যাদি| স্তন্যং স্ত্রীস্তন্যং, জাঙ্গলেত্যত্র মাংসমিতি শেষঃ; ‘মধ্বাজ্য’ ইত্যত্র ‘মেধ্যাজ্য’ ইতি কেচিত্ পঠন্তি, মেধ্যাজ্যং গব্যং ঘৃতমিতি ব্যাখ্যানযন্তি||২৬||

Adhikarana 18 (27) · Śloka 27

বিতরেত্তর্পণোক্তং তু ধূমং হিত্বা তু রোপণম্ | স্নেহস্বেদৌ দ্বযোঃ কার্যৌ, কার্যো নৈব চ রোপণে ||২৭||

ইদানীং স্নেহনলেখনযোঃ পূর্বকর্মাহ- বিতরেদিত্যাদি| রোপণং পুটপাকং পরিত্যজ্য তর্পণোক্তং ধূমং দ্বযোর্বিতরেত্ কুর্যাত্, তথা স্নেহস্বেদৌ দ্বযোরেব কার্যাবিতি পিণ্ডার্থঃ||২৭||

Adhikarana 19 (28) · Śloka 28

একাহং বা দ্ব্যহং বাঽপি ত্র্যহং বাঽপ্যবচারণম্ |২৮|

একাহমিত্যাদি| একাহং শ্লৈষ্মিকে নেত্ররোগে পুটপাকস্যাবচারণং, দ্ব্যহং পৈত্তিকে, ত্র্যহং বাতিকে; অন্যে তু একাহং লেখনীযস্যাবচারণং, দ্ব্যহং স্নেহনস্য, ত্র্যহং রোপণীযস্যেতি|২৮|-

Adhikarana 20 (28) · Śloka 28

যন্ত্রণা তু ক্রিযাকালাদ্দ্বিগুণং কালমিষ্যতে ||২৮||

তর্পণপুটপাকযোরেকত্র পরিহার্যকালমুদ্দিশন্নাহ- যন্ত্রণা তু ক্রিযাকালাদ্দ্বিগুণমিত্যাদি| ক্রিযাকালাত্ স্নেহপানাদেরারভ্য যঃ কালস্তস্মাদ্ দ্বিগুণঃ কালঃ; ন পুনস্তর্পণকালাত্, তস্যাল্পত্বাত্||২৮||

Adhikarana 21 (29) · Śloka 29

তেজাংস্যনিলমাকাশমাদর্শং ভাস্বরাণি চ | নেক্ষেত তর্পিতে নেত্রে পুটপাককৃতে তথা ||২৯||

পরিহার্যাণ্যাহ- তেজাংস্যনিলমিত্যাদি| তেজাংসি দীপজ্বালাপ্রভৃতীনি, অনিলং সম্মুখবাযুং, ভাস্বরাণি আদিত্যাদীনি||২৯||

Adhikarana 22 (30) · Śloka 30

মিথ্যোপচারাদনযোর্যো ব্যাধিরুপজাযতে | অঞ্জনাশ্চ্যোতনস্বেদৈর্যথাস্বং তমুপাচরেত্ ||৩০||

অধুনা তযোর্ব্যাপচ্চিকিত্সাবীজমুদ্দিশন্নাহ- মিথ্যোপচারাদিত্যাদি| অনযোঃ তর্পণপুটপাকযোঃ||৩০||

Adhikarana 23 (31) · Śloka 31

প্রসন্নবর্ণং বিশদং বাতাতপসহং লঘু | সুখস্বপ্নাববোধ্যক্ষি পুটপাকগুণান্বিতম্ ||৩১||

পুটপাকস্য সম্যগ্যোগমাহ- প্রসন্নবর্ণমিত্যাদি||৩১||

Adhikarana 24 (32) · Śloka 32

অতিযোগাদ্রুজঃ শোফঃ পিডকাস্তিমিরোদ্গমঃ |৩২|

পুটপাকস্যাতিযোগমাহ- অতিযোগাদ্রুজ ইত্যাদি|৩২|-

Adhikarana 25 (32) · Śloka 32

পাকোঽশ্রু হর্ষণং চাপি হীনে দোষোদ্গমস্তথা ||৩২||

পুটপাকস্য হীনযোগমাহ- পাক ইত্যাদি| হর্ষো বেদনাবিশেষোঽন্তঃশীতকরঃ||৩২||

Adhikarana 26 (33-38) · Śloka 38

অত ঊর্ধ্বং প্রবক্ষ্যামি পুটপাকপ্রসাধনম্ | দ্বৌ বিল্বমাত্রৌ শ্লক্ষ্ণস্য পিণ্ডৌ মাংসস্য পেষিতৌ ||৩৩|| দ্রব্যাণাং বিল্বমাত্রং তু দ্রবাণাং কুডবো মতঃ | তদৈকধ্যং সমালোড্য পত্রৈঃ সুপরিবেষ্টিতম্ ||৩৪|| (কাশ্মরীকুমুদৈরণ্ডপদ্মিনীকদলীভবৈঃ ) | মৃদাবলিপ্তমঙ্গারৈঃ খাদিরৈরবকূলযেত্ ||৩৫|| কতকাশ্মন্তকৈরণ্ডপাটলাবৃষবাদরৈঃ | সক্ষীরদ্রুমকাষ্ঠৈর্বা গোমযৈর্বাঽপি যুক্তিতঃ ||৩৬|| স্বিন্নমুদ্ধৃত্য নিষ্পীড্য রসমাদায তং নৃণাম্ | তর্পণোক্তেন বিধিনা যথাবদবচারযেত্ ||৩৭|| কনীনকে নিষেচ্যঃ স্যান্নিত্যমুত্তানশাযিনঃ | রক্তে পিত্তে চ তৌ শীতৌ কোষ্ণৌ বাতকফাপহৌ ||৩৮||

অত ঊর্ধ্বমিত্যাদি| শ্লক্ষ্ণস্য মাংসস্য দ্বৌ পিণ্ডৌ বিল্বমাত্রৌ প্রত্যেকং পলপ্রমাণৌ কার্যবিত্যর্থঃ| দ্রব্যাণাং বিল্বমাত্রমিতি স্নেহনলেখনরোপণেষু পুটপাকেষু যথাক্রমং মধুরৌষধলেখনদ্রব্যতিক্তদ্রব্যাণাং পলপ্রমাণমিত্যর্থঃ| দ্রবাণাং কুডব ইতি অষ্টৌ পলানি; কেচিচ্চত্বারি পলানি, কস্মাত্? কুডবাদূর্ধ্বং দ্বিগুণপরিভাষা| তত্র স্নেহনপুটপাকস্য পেষণালোডনার্থং মাংসরসমধুরৌষধকষাযক্ষীরাণি, লেখনস্য মধুমস্তুত্রিফলোদকানি, রোপণস্য তিক্তকষায ইতি| অবকূলযেত্ বিপচেত্| ক্ষীরদ্রুমা বটাদযঃ| যুক্তিত ইতি পদমবকূলযেদিত্যত্র সম্বন্ধনীযম্| যুক্তিস্তু ‘পুটপাকস্য পাকোঽযং বহিরারক্তবর্ণতা’ ইতি| ইদানীং তর্পণপুটপাকযোর্দোষোপযোগিধর্মন্তরং নির্দিশন্নাহ- রক্তে ইত্যাদি||৩৩-৩৮||

Adhikarana 27 (39-40) · Śloka 40

অত্যুষ্ণতীক্ষ্ণৌ সততং দাহপাককরৌ স্মৃতৌ | অপ্লুতৌ শীতলৌ চাশ্রুস্তম্ভরুগ্ঘর্ষকারকৌ ||৩৯|| অতিমাত্রৌ কষাযত্বসঙ্কোচস্ফুরণাবহৌ | হীনপ্রমাণৌ দোষাণামুত্ক্লেশজননৌ ভৃশম্ ||৪০||

তর্পণপুটপাকযোর্বিরুদ্ধগুণমাত্রযোর্ব্যাপদো নির্দিশন্নাহ- অত্যুষ্ণেত্যাদি| অপ্লুতৌ মন্দপ্লতৌ||৩৯-৪০||

Adhikarana 28 (41) · Śloka 42

যুক্তৌ কৃতৌ দাহশোফরুগ্ধর্ষস্রাবনাশনৌ | কণ্ডূপদেহদূষীকারক্তরাজিবিনাশনৌ ||৪১|| তস্মাত্ পরিহরন্ দোষান্ বিদধ্যাত্তৌ সুখাবহৌ |৪২|

যুক্তৌ কৃতাবিত্যাদি| দূষীকা নেত্রমলঃ, দোষান্ অত্যুষ্ণতীক্ষ্ণাদিকান্||৪১||-

Adhikarana 29 (42) · Śloka 42

ব্যাপদশ্চ যথাদোষং নস্যধূমাঞ্জনৈর্জযেত্ ||৪২||

ইদানীং ব্যাপচ্চিকিত্সামাহ- ব্যাপদশ্চ যথাদোষমিত্যাদি| ব্যাপদো দাহপাকাদিকাঃ, যথাদোষং দোষানতিক্রমেণ||৪২||

Adhikarana 30 (43) · Śloka 43

আদ্যন্তযোশ্চাপ্যনযোঃ স্বেদ উষ্ণাম্বুচৈলিকঃ | তথা হিতোঽবসানে চ ধূমঃ শ্লেষ্মসমুচ্ছ্রিতৌ ||৪৩||

ইদানীং তর্পণপুটপাকযোঃ পূর্বকর্ম পশ্চাত্কর্ম চাহ- আদ্যন্তযোশ্চাপ্যনযোরিত্যাদি| অনযোঃ তর্পণপুটপাকযোঃ| স্বেদ উষ্ণাম্বুচৈলিক ইতি উষ্ণাম্বুসিক্তেন কর্পটেন স্বেদ ইত্যর্থঃ| ‘তথা হিতোঽবসানে চ ধূমঃ শ্লেষ্মসমুত্থিতৌ’ ইতি কেচিত্ পঠন্তি||৪৩||

Adhikarana 31 (44) · Śloka 44

যথাদোষোপযুক্তং তু নাতিপ্রবলমোজসা | রোগমাশ্চ্যোতনং হন্তি সেকস্তু বলবত্তরম্ ||৪৪||

ইদানীমাশ্চ্যোতনসেকাবাহ- যথাদোষোপযুক্তমিত্যাদি| যথাদোষোপযুক্তমিতি বাতাদিজে নেত্ররোগে বাতাদিহরদ্রব্যসিদ্ধমাশ্চ্যোতনমিত্যর্থঃ| নাতিপ্রবলং নাত্যুত্কটং রোগম্| ওজসা শক্ত্যা| সেকস্তু বলবত্তরমিতি যথাদোষোপযুক্তঃ পরিষেকঃ পুনর্বলবত্তরমিতি প্রবলং রোগং হন্তি| তৌ চাশ্চ্যোতনসেকৌ চতুর্থেঽহন্যাগতরোগলক্ষণে প্রযোক্তব্যৌ| তথা চ বিদেহঃ- “প্রাগেবাক্ষ্যামযে কার্যং ত্রিরাত্রং লঘুভোজনম্| উপবাসস্ত্র্যহং বা স্যান্নক্তং বাঽপ্যশনং ত্র্যহম্|| ততশ্চতুর্থে দিবসে ব্যাধিং সঞ্জাতলক্ষণম্| সমীক্ষ্যাশ্চ্যোতনৈঃ সেকৈর্যথাস্বমুপপাদযেত্”- ইতি||৪৪||

Adhikarana 32 (45) · Śloka 45

তৌ ত্রিধৈবোপযুজ্যেতে রোগেষু পুটপাকবত্ |৪৫|

তাবিত্যাদি| তৌ আশ্চ্যোতনসেকৌ| ত্রিধৈবেতি স্নেহনলেখনরোপণভেদেন পুটপাকবত্ত্রিপ্রকারাবিত্যর্থঃ| তযোশ্চ পেষণালোডনার্থং দ্রবাণি পুটপাকোক্তান্যেব| তযোরেব সম্যগ্যোগো হীনযোগো মিথ্যাযোগশ্চ পুটপাকবত্| আশ্চ্যোতনস্য ধারণকালঃ পুটপাকবত্| পরিষেকস্য পুনরিহৈবাগ্রে ধারণকালং কথযিষ্যামঃ| কেচিদাশ্চ্যোতনসেকযোঃ পুটপাকাদ্ দ্বিগুণং কালং মন্যন্তে| তন্ন, ‘সেকস্য দ্বিগুণঃ কালঃ পুটপাকাত্ পরো মত’ ইত্যত্রোক্তেন সহ বিরোধাপত্তেঃ|৪৫|-

Adhikarana 33 (45) · Śloka 46

লেখনে সপ্ত চাষ্টৌ বা বিন্দবঃ স্নৈহিকে দশ ||৪৫|| আশ্চ্যোতনে প্রযোক্তব্যা দ্বাদশৈব তু রোপণে |৪৬|

লেখনাদীনামাশ্চ্যোতনানাং বিন্দুসঙ্খ্যামাহ- লেখনে সপ্ত চাষ্টৌ বেত্যাদি| লেখনে লেখনাশ্চ্যোতনে সপ্তাষ্টৌ বা বিন্দবঃ||৪৫||-

Adhikarana 34 (46) · Śloka 46

সেকস্য দ্বিগুণঃ কালঃ পুটপাকাত্ পরো মতঃ ||৪৬||

ইদানীং পরিষেকস্য ধারণকালমাহ- সেকস্যেত্যাদি| তত্র লেখনপরিষেকস্য বাক্শতদ্বযং ধারণকালঃ, স্নেহনস্য বাক্শতচতুষ্টযং, রোপণস্য ষড্বাক্শতানি||৪৬||

Adhikarana 35 (47) · Śloka 47

অথবা কার্যনির্বৃত্তেরুপযোগো যথাক্রমম্ |৪৭|

পক্ষান্তরমাহ- অথবেত্যাদি| কার্যনির্বৃত্তিঃ ব্যাধেরুপশমঃ প্রকৃতিবর্ণোপপত্তিঃ ক্রিযাপাটবং বেদনোপশমশ্চ কার্যং, তস্য নিষ্পত্তিঃ কার্যনির্বৃত্তিঃ| যথাক্রমং শনৈঃ শনৈরিত্যর্থঃ| অযং কার্যনির্বৃত্তিলক্ষণো ধারণকাল আশ্চ্যোতনসেকযোঃ| অন্যে তু সর্বেষাং তর্পণাদীনামযং ধারণকাল ইতি বদন্তি| অপরে তু পুটপাকসেকযোরযং কালঃ; তত্র পুটপাকসেকযোর্দ্রব্যভেদতো ভেদঃ|৪৭|-

Adhikarana 36 (47) · Śloka 47

পূর্বাপরাহ্ণে মধ্যাহ্নে রুজাকালেষু চোভযোঃ ||৪৭||

ইদানীমাশ্চ্যোতনসেকযোর্যথাদোষং প্রযোগকালমাহ- পূর্বাপরাহ্ণ ইত্যাদি| কফজে ব্যাধৌ পূর্বাহ্ণে লেখনাবাশ্চ্যোতনসেকৌ প্রযোজ্যৌ, বাতজেঽপরাহ্ণে স্নেহনৌ, রক্তপিত্তজে মধ্যাহ্নে রোপণৌ| রুজাকালেষু চেত্যাবস্থিকঃ কালঃ, তেন যদৈব রুগুত্পদ্যতে তদৈব সেকাশ্চ্যোতনৌ প্রযোজ্যৌ| উভযোঃ আশ্চ্যোতনসেকযোঃ| কেচিত্ পরিষেকস্যৈবাযং প্রযোগকাল ইতি কথযন্তি||৪৭||

Adhikarana 37 (48) · Śloka 48

যোগাযোগাত্ স্নেহসেকে তর্পণোক্তান্ প্রচক্ষতে |৪৮|

ইদানীং পরিষেকস্য দ্রব্যবিশেষকৃতস্য সঙ্ক্ষেপার্থং যোগাযোগলক্ষণমাহ- যোগাযোগানিত্যাদি| যোগঃ সম্যগ্যোগঃ, অযোগঃ সম্যগ্যোগাভাবঃ| তেনাযোগশব্দেন হীনমিথ্যাতিযোগাঃ প্রাপ্যন্তে, অতঃ পৃথঙ্নেহোক্তাঃ| অন্যে তু, অযোগে ইত্যত্র নশব্দেনৈব হীনযোগমিথ্যাযোগাবাক্ষিপ্তৌ, অতিযোগস্য তু মাত্রাকালাভ্যামেব পর্যুদাসঃ কৃত ইতি| স্নৈহিকে কেবলঘৃতপরিষেকে| তর্পণোক্তান্ সুখস্বপ্নাববোধিত্বমিত্যাদীন্| ইদং যোগাযোগলক্ষণং কেবলং স্নেহপরিষেকস্যৈব বোদ্ধব্যং, ক্ষীরেক্ষুরসাদিকৃতস্য স্নেহনীযাখ্যপরিষেকস্য যোগাযোগলক্ষণং পুটপাকবত্ কথিতম্|৪৮|-

Adhikarana 38 (47-50) · Śloka 51

রোগাঞ্ছিরসি সম্ভূতান্ হত্বাঽতিপ্রবলান্ গুণান্ ||৪৮|| করোতি শিরসো বস্তিরুক্তা যে মূর্ধতৈলিকাঃ | শুদ্ধদেহস্য সাযাহ্নে যথাব্যাধ্যশিতস্য তু ||৪৯|| ঋজ্বাসীনস্য বধ্নীযাদ্বস্তিকোশং ততো দৃঢম্ | যথাব্যাধিশৃতস্নেহপূর্ণং সংযম্য ধারযেত্ ||৫০|| তর্পণোক্তং দশগুণং যথাদোষং বিধানবিত্ |৫১|

শিরোবস্তিমাহ- রোগানিত্যাদি| অতিপ্রবলান্ শিরসি সম্ভূতান্ রোগান্ শিরোভিতাপাদীন্ হত্বা শিরোবস্তির্যে মূর্ধতৈলিকা গুণা উক্তাস্তান্ করোতীতি সম্বন্ধঃ| শিরোঽত্র গ্রীবাপর্যন্তং গ্রাহ্যং, নতু ষডঙ্গুলোত্সেধম্| মূর্ধতৈলিকা গুণা শিরোগতাংস্তথা রোগানিত্যাদযঃ শিরসঃ প্রতিপূরণপর্যন্তা অনাগতাবাধপ্রতিষেধোক্তাঃ| শুদ্ধদেহস্য বমনাদিভির্নির্মলশরীরস্য; অথবা শুদ্ধদেহস্য নস্যাদিভির্বিশুদ্ধমস্তকস্য, দেহাবযবেঽপি দেহোপচারাত্; অথবা শিরঃশুদ্ধাবপি দেহস্য শুদ্ধিরিতি| সাযাহ্নে দিনাবসানে| যথাব্যাধ্যশিতস্যেতি ব্যাধিপ্রত্যনীকং ভুক্তবত ইত্যর্থঃ| ঋজ্বিতি ঋজু যথা স্যাদেবং বস্তিকোশং বধ্নীযাত্, ‘কেশান্ত’ ইতি শেষঃ| অথবা ঋজ্বিতি আসীনস্য বিশেষণম্| বস্তিকোশমিত্যুক্তেনৈব পট্টচেলিকামাষচূর্ণাদিকমাক্ষিপ্তম্| যথাব্যাধিশৃতস্নেহপূর্ণং যথাব্যাধিদোষদূষ্যহিতদ্রব্যসিদ্ধস্নেহপূর্ণম্| সংযম্য ধারযেত্ যাবত্ কেশভূমেরুপরি দ্ব্যঙ্গুলং বদ্ধ্বা ধারযেত্| কিযত্কালং শিরোবস্তিং ধারযেদিত্যাহ- তর্পণোক্তমিত্যাদি| তর্পণোক্তমক্ষিতর্পণকথিতকালং দশগুণং শিরোবস্তিরবচার্যঃ| যথাদোষমিতি তত্র ষণ্মাত্রাসহস্রাণি শ্লেষ্মণি, অষ্টৌ সহস্রাণি পিত্তে, দশসহস্রাণি বাতে ইতি; অপরং চ বাতরোগচিকিত্সিতে শিরোগতবাতপ্রস্তাবে ব্যাখ্যাতম্| কেচিদমুং পাঠমন্যথা পঠন্তি, স চাভাবান্ন লিখিতঃ||৪৭-৫০||

Adhikarana 39 (51-52) · Śloka 52

ব্যক্তরূপেষু দোষেষু শুদ্ধকাযস্য কেবলে ||৫১|| নেত্র এব স্থিতে দোষে প্রাপ্তমঞ্জনমাচরেত্ | লেখনং রোপণং চাপি প্রসাদনমথাপি বা ||৫২||

ইদানীমঞ্জনস্যাবস্থিকং কালমুদ্দিশন্নাহ- ব্যক্তরূপেষ্বিত্যাদি| ব্যক্তরূপেষু সামতাপগমেন ব্যক্তাত্মরূপপ্রাপ্তেষু| শুদ্ধকাযস্য সিরাব্যধিবিরেচননিরূহশিরোবিরেচনৈর্হৃতমলদেহস্য| কেবলে অন্যদোষাসংসৃষ্টে| নেত্রে এব স্থিতে অক্ষিগোলকত্বঙ্মাত্রস্থিতে, ন পুনঃ পক্ষ্মাদ্যাশ্রিতে| প্রাপ্তং যুক্তম্| কেচিত্ ‘দোষেষু’ ইত্যত্র ‘রোগেষু’ ইতি পঠন্তি, রোগশব্দো দোষেষ্বপি বর্ততে ইতি ব্যাখ্যানযন্তি| ইদানীমঞ্জনভেদং নির্দিশন্নাহ- লেখনমিত্যাদি||৫১-৫২||

Adhikarana 40 (53) · Śloka 53

তত্র পঞ্চ রসান্ ব্যস্তানাদ্যৈকরসবর্জিতান্ | পঞ্চধা লেখনং যুঞ্জ্যাদ্যথাদোষমতন্দ্রিতঃ ||৫৩||

লেখনমাহ- তত্রেত্যাদি| পঞ্চরসান্ পঞ্চরসদ্রব্যাণীত্যর্থঃ| আদ্যৈকরসবর্জিতান্ মধুররসবর্জিতান্| পঞ্চধেতি বাতপিত্তশ্লেষ্মরক্তসন্নিপাতভেদেন| যথাদোষং দোষানতিক্রমেণ| তত্র বাতে অম্ললবণৌ, পিত্তে তিক্তকষাযৌ, শ্লেষ্মণি কটুতিক্তকষাযাঃ, রক্তে পিত্তবত্, সন্নিপাতে রসদ্বযং ত্রযং বা| সন্নিপাতেনৈব সংসর্গোঽবরুদ্ধঃ, অতোঽত্র পৃথঙ্নোক্তঃ| লেখনং দোষস্রাবণান্নযনস্য রিক্তীকরণম্||৫৩||

Adhikarana 41 (54) · Śloka 54

নেত্রবর্ত্মসিরাকোশস্রোতঃশৃঙ্গাটকাশ্রিতম্ | মুখনাসাক্ষিভির্দোষমোজসা স্রাবযেত্তু তত্ ||৫৪||

লেখনং যথা দোষস্য স্রাবণং কুরুতে তথা দর্শযন্নাহ- নেত্রেত্যাদি| নেত্রবর্ত্মনোর্যাঃ সিরা যশ্চ কোশো যানি চ স্রোতাংসি তত্র স্থিতং দোষং, তথা শৃঙ্গাটকমর্মাশ্রিতং চ দোষং তল্লেখনাঞ্জনং মুখাদিভিরোজসা প্রভাবেণ স্রাবযেদিতি পিণ্ডার্থঃ||৫৪||

Adhikarana 42 (55) · Śloka 55

কষাযং তিক্তকং বাঽপি সস্নেহং রোপণং মতম্ | তত্স্নেহশৈত্যাদ্বর্ণ্যং স্যাদ্দৃষ্টেশ্চ বলবর্ধনম্ ||৫৫||

রোপণমাহ- কষাযেত্যাদি| সস্নেহম্ ঈষদ্ঘৃতযুক্তম্||৫৫||

Adhikarana 43 (56) · Śloka 56

মধুরং স্নেহসম্পন্নমঞ্জনং তু প্রসাদনম্ | দৃষ্টিদোষপ্রসাদার্থং স্নেহনার্থং চ তদ্ধিতম্ ||৫৬||

প্রসাদনমাহ- মধুরমিত্যাদি| দৃষ্টিদোষপ্রসাদার্থং দৃষ্টিস্থদোষপ্রসাদার্থমিত্যর্থঃ||৫৬||

Adhikarana 44 (57) · Śloka 57

যথাদোষং প্রযোজ্যানি তানি রোগবিশারদৈঃ | অঞ্জনানি যথোক্তানি প্রাহ্ণসাযাহ্নরাত্রিষু ||৫৭||

যথেত্যাদি| তানি যথোক্তানি লেখনাদীন্যঞ্জনানি রোগবিশারদৈর্বৈদ্যৈর্যথাদোষং প্রাহ্ণসাযাহ্নরাত্রিষু প্রযোজ্যানীতি পিণ্ডার্থঃ| তত্র পূর্বাহ্ণে শ্লেষ্মরোগে লেখনাঞ্জনং, সাযাহ্নে বাতজে, রাত্রৌ পিত্তজে| অন্যে তু আদৌ শোধনাঞ্জনং, ততো রোপণং; অপরে তু প্রসাদনমিতি বদন্তি| অপরমপি ঋতুভেদাদর্থান্তরমস্তি, তচ্চ বিস্তরভযান্ন লিখিতম্||৫৭||

Adhikarana 45 (58) · Śloka 58

গুটিকারসচূর্ণানি ত্রিবিধান্যঞ্জনানি তু | যথাপূর্বং বলং তেষাং শ্রেষ্ঠমাহুর্মনীষিণঃ ||৫৮||

ইদানীমপ্যেকৈকমঞ্জনং গুটিকাদিভেদাত্ত্রিপ্রকারমিতি দর্শযন্নাহ- গুটিকারসেত্যাদি| রসোঽত্র ঘনরসো রসক্রিযেত্যর্থঃ| যথাপূর্বং বলং তেষামিতি এতেনৈতদুক্তং ভবতি- মহাবলানাং রোগাণাং গুটিকাঞ্জনং, মধ্যানাং রসক্রিযাঞ্জনং, হীনানাং চূর্ণাঞ্জনম্||৫৮||

Adhikarana 46 (59) · Śloka 59

হরেণুমাত্রা বর্তিঃ স্যাল্লেখনস্য প্রমাণতঃ | প্রসাদনস্য চাধ্যর্ধা দ্বিগুণা রোপণস্য চ ||৫৯||

ইদানীং প্রমাণাবসরঃ- হরেণুমাত্রা বর্তিরিত্যাদি| হরেণুঃ বর্তুলকলাযঃ, অধ্যর্ধা সার্ধকলাযপ্রমাণেত্যর্থঃ, দ্বিগুণা দ্বিকলাযপ্রমাণেত্যর্থঃ||৫৯||

Adhikarana 47 (60) · Śloka 60

রসাঞ্জনস্য মাত্রা তু যথাবর্তিমিতা মতা |৬০|

গুটিকাঞ্জনপ্রমাণমভিধায রসক্রিযাঞ্জনপ্রমাণমাহ- রসাঞ্জনস্যেত্যাদি| রসাঞ্জনস্য রসক্রিযাঞ্জনস্য, ‘রসাঞ্জনদ্রব্যস্য’ ইত্যেকে, তন্মতে রসক্রিযাঞ্জনপ্রমাণমন্যত্রান্বেষণীযম্| যথাবর্তিমিতা মতা ইতি যথাস্ববর্তিপ্রমাণমাত্রেত্যর্থঃ| তত্র লেখনরসক্রিযাঞ্জনস্য লেখনবর্তিবত্ প্রমাণং, রোপণস্য রোপণবর্তিবত্, প্রসাদনস্য প্রসাদনবর্তিবত্|৬০|-

Adhikarana 48 (60) · Śloka 60

দ্বিত্রিচতুঃশলাকাশ্চ চূর্ণস্যাপ্যনুপূর্বশঃ ||৬০||

চূর্ণাঞ্জনপ্রমাণমাহ- দ্বিত্রিচতুরিত্যাদি| অনুপূর্বশো লেখনাদীনামঞ্জনানামানুপূর্ব্যেণেত্যর্থঃ| তত্র শলাকাদ্বযং লেখনচূর্ণস্য, তিস্রো রোপণস্য, চতস্রঃ প্রসাদনস্য||৬০||

Adhikarana 49 (61) · Śloka 62

তেষাং তুল্যগুণান্যেব বিদধ্যাদ্ভাজনান্যপি | সৌবর্ণং রাজতং শার্ঙ্গং তাম্রং বৈদূর্যকাংস্যজম্ ||৬১|| আযসানি চ যোজ্যানি শলাকাশ্চ যথাক্রমম্ |৬২|

ইদানীমঞ্জনানি কিঙ্গুণে কিম্মযে পাত্রে স্থাপযিতব্যানি, তথা কিঙ্গুণানি কিম্মযশলাকানীত্যাহ- তেষামিত্যাদি| তুল্যগুণানীতি সৌবর্ণে মধুরং, রাজতে অম্লং, শার্ঙ্গে মেষশৃঙ্গমযে লবণং, তাম্রে লোহমযে বা কষাযং, বৈদূর্যে কটুকং, কাংস্যে তিক্তং, শীতাঞ্জনং তু নলাদিমযে, এবং সমানগুণানি ভাজনানি বিদধ্যাত্ কুর্যাত্| শলাকাশ্চৈষাং ভাজনদ্রব্যগুণেন যথাক্রমমেব ব্যাখ্যাতাঃ||৬১||-

Adhikarana 50 (62) · Śloka 63

বক্ত্রযোর্মুকুলাকারা কলাযপরিমণ্ডলা ||৬২|| অষ্টাঙ্গুলা তনুর্মধ্যে সুকৃতা সাধুনিগ্রহা |৬৩|

তাসাং শলাকানামাকারমুদ্দিশন্নাহ- বক্ত্রযোর্মুকুলাকারেত্যাদি| মুকুলাকারা মল্লিকাদিমুকুলস্যেব নির্গচ্ছতো যদ্বন্মুখং তদাকারা; কলাযপরিমণ্ডলত্বেন তীক্ষ্ণাগ্রত্বনিষেধঃ; সুকৃতা কর্কশাদিদোষরহিতা; সাধুনিগ্রহা সুখগ্রহেত্যর্থঃ||৬২||-

Adhikarana 51 (63) · Śloka 63

ঔদুম্বর্যশ্মজা বাঽপি শারীরী বা হিতা ভবেত্ ||৬৩||

ইদানীং তাম্রাদিজানাং শলাকানাং হিতত্বং প্রতিপাদযন্নাহ- ঔদুম্বরীত্যাদি| ঔদুম্বরী তাম্রমযী, অশ্মজা বৈদূর্যাদিপাষাণজা, শারীরী শৃঙ্গাদিজা, অপিশব্দাত্ সুবর্ণাদিজাঽপি হিতেত্যর্থঃ| তথা চ তন্ত্রান্তরে,- “আযসী রোপণে, তাম্রা লেখ্যে, হৈমী প্রসাদনে| শেষা অপি যথাদোষং প্রযোজ্যা রসকোবিদৈঃ”- ইতি| কেচিত্ শারীরীশব্দেন অঙ্গুলিমাচক্ষতে, তন্নেচ্ছতি গযী||৬৩||

Adhikarana 52 (64-65) · Śloka 65

বামেনাক্ষি বিনির্ভুজ্য হস্তেন সুসমাহিতঃ | শলাকযা দক্ষিণেন ক্ষিপেত্ কানীনমঞ্জনম্ ||৬৪|| আপাঙ্গ্যং বা যথাযোগং কুর্যাচ্চাপি গতাগতম্ | বর্ত্মোপলেপি বা যত্তদঙ্গুল্যৈব প্রযোজযেত্ ||৬৫||

বামেনেত্যাদি| নির্ভুজ্য বক্রীকৃত্য| কনীন্যাং নাসাসমীপে নেত্রাবযবে অঞ্জনং কানীনং, তচ্চাঞ্জনং কনীনকপ্রদেশাদপাঙ্গং নযেত্, আপাঙ্গ্যং চেতি অপাঙ্গে নেত্রান্তে ভবম্ আপাঙ্গ্যং, তচ্চাপাঙ্গপ্রদেশাত্ কনীনকপ্রদেশং নযেত্| পরং যথাযোগং যথাঽতিযোগহীনযোগৌ ন ভবত ইত্যর্থঃ| এবং গতাগতমপি কুর্যাত্| এতচ্ছলাকযা অন্তর্নযনমঞ্জনপ্রণিধানং বোদ্ধব্যম্| অন্তর্নযনপ্রণিধানমভিধায বহিরঞ্জনপ্রণিধানমাহ- বর্ত্মেত্যাদি| বর্ত্মোপলেপি বর্ত্মোপলেপনযোগ্যম্||৬৪-৬৫||

Adhikarana 53 (66) · Śloka 66

অক্ষি নাত্যন্তযোরঞ্জ্যাদ্বাধমানোঽপি বা ভিষক্ |৬৬|

অক্ষীত্যাদি| অন্তযোঃ কনীনকাপাঙ্গযোঃ| নাত্যঞ্জ্যাত্ ঈষদঞ্জ্যাত্, ক্ষতভযাত্| বাধমানোঽপি বেতি বাধাং কুর্বন্ বৈদ্যো বা নাঞ্জ্যাদিত্যর্থঃ| ‘অক্ষি নাত্যন্তযোরঞ্জ্যাত্’ ইত্যত্র ‘নাত্যন্তমঞ্জযেদক্ষি’ ইতি কেচিত্ পঠন্তি; তত্র চ পাঠে সর্বত্রাপ্যত্যন্তাঞ্জননিষেধঃ কৃতো ভবতি|৬৬|-

Adhikarana 54 (66) · Śloka 67

ন চানির্বান্তদোষেঽক্ষ্ণি ধাবনং সম্প্রযোজযেত্ ||৬৬|| দোষঃ প্রতিনিবৃত্তঃ সন্ হন্যাদ্ দৃষ্টের্বলং তথা |৬৭|

ইদানীমকালে প্রক্ষালননিষেধমাহ- ন চেত্যাদি| ন চানির্বান্তদোষে ইতি নিশ্চযেন সম্যগ্যোগেন ন বান্তোঽশ্রুদূষিকাদিরূপো দোষো যেন তস্মিন্নিত্যর্থঃ| ধাবনং ন সম্প্রযোজযেত্ প্রক্ষালনং ন প্রযোজযেত্, দোষপ্রত্যাবৃত্তিহেতুত্বাত্| অকালপ্রক্ষালনাত্ কিং স্যাদিত্যাহ- দোষ ইত্যাদি| প্রতিনিবৃত্তঃ পুনরাবৃত্তঃ| তথেত্যকালপ্রক্ষালনপ্রকারেণেত্যর্থঃ||৬৬||-

Adhikarana 55 (67) · Śloka 68

গতদোষমপেতাশ্রু পশ্যেদ্যত্ সম্যগম্ভসা ||৬৭|| প্রক্ষাল্যাক্ষি যথাদোষং কার্যং প্রত্যঞ্জনং ততঃ |৬৮|

কীদৃশং পুনশ্চক্ষুঃ প্রক্ষাল্যমিত্যাহ- গতদোষমিত্যাদি| প্রত্যঞ্জনং তীক্ষ্ণাঞ্জনেন কটুভূতনযনস্য যদঞ্জনং শীতং, তথা শীতেন জডীভূতনযনস্য যত্তীক্ষ্ণমঞ্জনমিত্যর্থঃ| কেচিদমুং পাঠং ন পঠন্তি, তন্নেচ্ছতি গযী||৬৭||-

Adhikarana 56 (68-69) · Śloka 69

শ্রমোদাবর্তরুদিতমদ্যক্রোধভযজ্বরৈঃ ||৬৮|| বেগাঘাতশিরোদোষৈশ্চার্তানাং নেষ্যতেঽঞ্জনম্ | রাগরুক্তিমিরাস্রাবশূলসংরম্ভসম্ভবাত্ ||৬৯||

ইদানীমঞ্জনস্য পূর্বাহ্ণাদিকান্ কালান্ সামান্যেন স্বস্থাতুরযোঃ প্রতিপাদ্য, আবস্থিকেষু কালেষ্বঞ্জননিষেধমাহ- শ্রমোদাবর্তেত্যাদি| শ্রমাদিভিরার্তানাং পুরুষাণামঞ্জনং নেষ্যত ইতি সম্বন্ধঃ| কেচিদত্র ‘শান্তে ভীতে প্ররুদিতে মদ্যপীতে নবজ্বরে| উষ্ণে বেগাভিঘাতে চ নাঞ্জনং সম্প্রশস্যতে’ ইতি পঠন্তি, তত্রাপি স এবার্থঃ| কস্মাচ্ছ্রমাদিভিরার্তানামঞ্জনং নেষ্যত ইত্যাহ- রাগরুগিত্যাদি| সংরম্ভঃ শ্বযথুঃ||৬৮-৬৯||

Adhikarana 57 (70-73) · Śloka 73

নিদ্রাক্ষযে ক্রিযাশক্তিং, প্রবাতে দৃগ্বলক্ষযম্ | রজোধূমহতে রাগস্রাবাধীমন্থসম্ভবম্ ||৭০|| সংরম্ভশূলৌ নস্যান্তে, শিরোরুজি শিরোরুজম্ | শিরঃস্নাতেঽতিশীতে চ রবাবনুদিতেঽপি চ ||৭১|| দোষস্থৈর্যাদপার্থং স্যাদ্দোষোত্ক্লেশং করোতি চ | অজীর্ণেঽপ্যেবমেব স্যাত্ স্রোতোমার্গাবরোধনাত্ ||৭২|| দোষবেগোদযে দত্তং কুর্যাত্তাংস্তানুপদ্রবান্ | তস্মাত্ পরিহরন্ দোষানঞ্জনং সাধু যোজযেত্ ||৭৩||

ইদানীং সামান্যেনাঞ্জনবৈগুণ্যেন ব্যাপদঃ প্রদর্শ্য প্রতিবৈগুণ্যং ব্যাপদ আহ- নিদ্রাক্ষযে ইত্যাদি| ক্রিযাশক্তিং নিমেষোন্মেষণাদীনামশক্তিম্ ‘অঞ্জনং করোতি’ ইত্যধ্যাহার্যম্| কেচিত্ ক্রিযাসঙ্গমিতি পঠন্তি| প্রবাতে ইত্যাদি| দৃগ্বলং দৃষ্টের্বলমিত্যর্থঃ| সংরম্ভঃ শ্বযথুঃ| অপার্থম্ অকিঞ্চিত্করম্| এতদুক্তং ভবতি- এতৈঃ স্নানাদিভিঃ স্থিরীকৃতস্য দোষস্য নির্হরণং কর্তুমঞ্জনং ন শন্কোতীত্যর্থঃ| এবমেবেত্যপার্থকমঞ্জনং স্যাত্ দোষোত্ক্লেশং চ করোতীত্যর্থঃ| উপদ্রবান্ রাগশোফাদিকান্| সাধু যোজযেদিতি দেশকালাবস্থাপেক্ষমিত্যর্থঃ||৭০-৭৩||

Adhikarana 58 (74) · Śloka 74

লেখনস্য বিশেষেণ কাল এষ প্রকীর্তিতঃ |৭৪|

লেখনস্যেত্যাদি| লেখনস্য লেখনাঞ্জনস্যৈষ পূর্বোক্তঃ প্রতিষেধকালঃ|৭৪|-

Adhikarana 59 (74) · Śloka 75

ব্যাপদশ্চ জযেদেতাঃ সেকাশ্চ্যোতনলেপনৈঃ ||৭৪|| যথাস্বং ধূমকবলৈর্নস্যৈশ্চাপি সমুত্থিতাঃ |৭৫|

অকালাঞ্জনকৃতানাং ব্যাপদাং চিকিত্সিতমাহ- ব্যাপদ ইত্যাদি| এতা রাগরুজাদ্যাঃ সমুত্থিতা ব্যাপদো যথাস্বং সেকাদিভির্জযেদিতি সম্বন্ধঃ||৭৪||-

Adhikarana 60 (75) · Śloka 76

বিশদং লঘ্বনাস্রাবি ক্রিযাপটু সুনির্মলম্ ||৭৫|| সংশান্তোপদ্রবং নেত্রং বিরিক্তং সম্যগাদিশেত্ |৭৬|

ইদানীং লেখনাঞ্জনস্য সম্যগ্যোগলক্ষণমাহ- বিশদমিত্যাদি||৭৫||-

Adhikarana 61 (76) · Śloka 77

জিহ্মং দারুণদুর্বর্ণং স্রস্তং রূক্ষমতীব চ ||৭৬|| নেত্রং বিরেকাতিযোগে স্যন্দতে চাতিমাত্রশঃ |৭৭|

লেখনাঞ্জনস্যাতিযোগলক্ষণমাহ- জিহ্মমিত্যাদি| জিহ্মং বক্রং, দারুণং কঠিনং, স্যন্দতে স্রবতি||৭৬||-

Adhikarana 62 (77) · Śloka 77

তত্র সন্তর্পণং কার্যং বিধানং চানিলাপহম্ ||৭৭||

লেখনাঞ্জনাতিযোগপ্রতীকারমাহ- তত্রেত্যাদি| তত্রেতি লেখনাঞ্জনাতিযোগে ইত্যর্থঃ||৭৭||

Adhikarana 63 (78) · Śloka 78

অক্ষি মন্দবিরিক্তং স্যাদুদগ্রতরদোষবত্ |৭৮|

লেখনাঞ্জনস্য হীনযোগমাহ- অক্ষি মন্দবিরিক্তমিত্যাদি| উদগ্রতরদোষবত্ উত্কটতরদোষযুক্তম্|৭৮|-

Adhikarana 64 (78) · Śloka 78

ধূমনস্যাঞ্জনৈস্তত্র হিতং দোষাবসেচনম্ ||৭৮||

হীনযোগপ্রতীকারমাহ- ধূমনস্যাঞ্জনৈরিত্যাদি| কেচিদত্র ‘নস্যধূমাঞ্জনালেপৈর্জযেচ্ছ্লেষ্মাণমীরিতম্’ ইতি পাঠং পঠন্তি; তত্রাপি স এবার্থঃ||৭৮||

Adhikarana 65 (79) · Śloka 79

স্নেহবর্ণবলোপেতং প্রসন্নং দোষবর্জিতম্ | জ্ঞেযং প্রসাদনে সম্যগুপযুক্তেঽক্ষি নির্বৃতম্ ||৭৯||

প্রসাদনাঞ্জনস্য সম্যগ্যোগমাহ- স্নেহেত্যাদি| নির্বৃতং সর্বক্রিযাক্ষমম্, উপশান্তোপদ্রবমিতি যাবত্||৭৯||

Adhikarana 66 (80) · Śloka 80

কিঞ্জিদ্ধীনবিকারং স্যাত্তর্পণাদ্ধি কৃতাদতি |৮০|

প্রসাদনাঞ্জনাতিযোগমাহ- কিঞ্চিদিত্যাদি| তর্পণাদতিকৃতাত্ সকৃদতিকৃতে প্রসাদনাঞ্জনে কিঞ্চিদ্ধীনবিকারং চক্ষুঃ স্যাদিতি তাত্পর্যার্থঃ|৮০|-

Adhikarana 67 (80) · Śloka 80

তত্র দোষহরং রূক্ষং ভেষজং শস্যতে মৃদু ||৮০||

প্রসাদনাঞ্জনাতিযোগচিকিত্সামাহ- তত্রেত্যাদি| দোষহরং কফহরমিত্যর্থঃ| মৃদু মৃদুবীর্যং শীতবীর্যমিত্যর্থঃ; উষ্ণেন হি নযনং দুষ্যতি ন তু প্রসাদ্যতে||৮০||

Adhikarana 68 (81) · Śloka 81

সাধারণমপি জ্ঞেযমেবং রোপণলক্ষণম্ | প্রসাদনবদাচষ্টে তস্মিন্ যুক্তেঽতিভেষজম্ ||৮১||

ইদানীং রোপণাঞ্জনস্য সম্যগ্যোগমতিযোগং চাতিদেশেনাহ- সাধারণমিত্যাদি| এবং রোপণলক্ষণমিতি প্রসাদনাঞ্জনস্য সম্যগ্যোগাতিযোগপ্রকারেণ রোপণাঞ্জনস্য সম্যগ্যোগাতিযোগলক্ষণং জ্ঞেযম্| পরং সাধারণং নাতিস্নিগ্ধরূক্ষমিতি যাবত্| অন্যে তু রোপণলক্ষণমেবং প্রসাদনাঞ্জনব্যঞ্জনেন সাধারণং সমানং জ্ঞেযমিতি ব্যাখ্যানযন্তি| রোপণাঞ্জনাতিযোগে চিকিত্সামাহ- প্রসাদনবদিত্যাদি| তস্মিন্ রোপণাঞ্জনেঽতিপ্রযুক্তে প্রসাদনবত্ প্রসাদনাঞ্জনাতিযোগবদ্ভেষজমাচষ্টে ব্রূযাদিতি পিণ্ডার্থঃ||৮১||

Adhikarana 69 (82) · Śloka 82

স্নেহনং রোপণং বাঽপি হীনযুক্তমপার্থকম্ |৮২|

ইদানীং প্রসাদনরোপণযোর্হীনযোগমাহ- স্নেহনমিত্যাদি| স্নেহনং প্রসাদনাঞ্জনম্| অপার্থকম্ অকিঞ্চিত্করম্|৮২|-

Adhikarana 70 (82) · Śloka 82

কর্তব্যং মাত্রযা তস্মাদঞ্জনং সিদ্ধিমিচ্ছতা ||৮২||

কর্তব্যমিত্যাদি| মাত্রযেতি যথা হীনাতিযোগৌ ন ভবতঃ| সিদ্ধিং বিকারনিবৃত্তিম্| অস্যাগ্রে বিদ্যমানপুস্তকেষু ‘ধূমৈর্নস্যাঞ্জনৈর্বাঽপি দোষশেষং শমং নযেত্’ ইতি পাঠো বিদ্যতে, স জেজ্জটাদিভির্ন পঠিতঃ, তস্মান্ন পঠিতব্যঃ||৮২||

Adhikarana 71 (83) · Śloka 83

পুটপাকক্রিযদ্যাসু ক্রিযাস্বেষৈ(কৈ)ব কল্পনা | সহস্রশশ্চাঞ্জনেষু বীজেনোক্তেন পূজিতাঃ ||৮৩||

ইদানীমঞ্জনোক্তেন মধুররসবর্জপঞ্চরসেন লেখনাঞ্জনকল্পনাবীজেন, তথা তিক্তকষাযেণ সস্নেহেন রোপণাঞ্জনকল্পনাবীজেন, তথা মধুররসেন স্নেহসম্পন্নেন প্রসাদনাঞ্জনকল্পনাবীজেন, পুটপাকাদ্যাসু ক্রিযাস্বঞ্জনেষ্বপি লেখনরোপণপ্রসাদনকল্পনাঃ সহস্রপ্রকারাঃ কল্পনীযা ইত্যাহ- পুটপাকেত্যাদি| অঞ্জনেষূক্তেন লেখনরোপণপ্রসাদনাখ্যেন বীজেন পুটপাকক্রিযাদ্যাসু ক্রিযাসু তথাঽনুক্তেষ্বঞ্জনেষ্বপ্যৌষধকল্পনাঃ লেখনরোপণপ্রসাদনাখ্যাঃ সহস্রশঃ পূজিতা ইতি পিণ্ডার্থঃ| পুটপাকক্রিযাদ্যাস্বিত্যত্র আদিশব্দাত্ সেকাশ্চ্যোতনাদযো গৃহ্যন্তে| অন্যে ত্বঞ্জনোক্তেন হীনযোগাতিযোগচিকিত্সাবীজেন পুটপাকাদিহীনাতিযোগচিকিত্সিতং ব্যাচক্ষতে, তন্নেচ্ছতি গযী||৮৩||

Adhikarana 72 (84) · Śloka 84

দৃষ্টের্বলবিবৃদ্ধ্যর্থং যাপ্যরোগক্ষযায চ | রাজার্হান্যঞ্জনাগ্র্যাণি নিবোধেমান্যতঃ পরম্ ||৮৪||

ইদানীং রোগাপহরণপ্রযোগাণ্যঞ্জনান্যভিধায স্বস্থাতুরহিতান্যঞ্জনান্যাহ- দৃষ্টের্বলবিবৃদ্ধ্যর্থমিত্যাদি| দৃষ্টির্মসুরদলমাত্রা তচ্ছক্তিবলাধানার্থং স্বস্থেন প্রসাদাঞ্জনং কার্যম্, আতুরেণ যাপ্যরোগপ্রসাদনাঞ্জনং কার্যং; যাপ্যরোগাশ্চ ‘সম্পশ্যতঃ ষডপি যেঽভিহিতাস্তু কাচা’ ইত্যাদিপ্রোক্তাঃ| কেচিত্পাপ্মরোগক্ষযায চেতি পঠন্তি, পাপ্মশব্দেন চ স্রাবণং কথযন্তি||৮৪||

Adhikarana 73 (85-93) · Śloka 93

অষ্টৌ ভাগানঞ্জনস্য নীলোত্পলসমত্বিষঃ | ঔদুম্বরং শাতকুম্ভং রাজতং চ সমাসতঃ ||৮৫|| একাদশৈতান্ ভাগাংস্তু যোজযেত্ কুশলো ভিষক্ | মূষাক্ষিপ্তং তদাধ্মাতমাবৃতং জাতবেদসি ||৮৬|| খদিরাশ্মন্তকাঙ্গারৈর্গোশকৃদ্ভিরথাপি বা | গবাং শকৃদ্রসে মূত্রে দধ্নি সর্পিষি মাক্ষিকে ||৮৭|| তৈলমদ্যবসামজ্জসর্বগন্ধোদকেষু চ | দ্রাক্ষারসেক্ষুত্রিফলারসেষু সুহিমেষু চ ||৮৮|| সারিবাদিকষাযে চ কষাযে চোত্পলাদিকে | নিষেচযেত্ পৃথক্ চৈনং ধ্মাতং ধ্মাতং পুনঃ পুনঃ ||৮৯|| ততোঽন্তরীক্ষে সপ্তাহং প্লোতবদ্ধং স্থিতং জলে | বিশোষ্য চূর্ণযেন্মুক্তাং স্ফটিকং বিদ্রুমং তথা ||৯০|| কালানুসারিবাং চাপি শুচিরাবাপ্য যোগতঃ | এতচ্চূর্ণাঞ্জনং শ্রেষ্ঠং নিহিতং ভাজনে শুভে ||৯১|| দন্তস্ফটিকবৈদূর্যশঙ্খশৈলাসনোদ্ভবে | শাতকুম্ভেঽথ শার্ঙ্গে বা রাজতে বা সুসংস্কৃতে | সহস্রপাকবত্ পূজাং কৃত্বা রাজ্ঞঃ প্রযোজযেত্ ||৯২|| তেনাঞ্জিতাক্ষো নৃপতির্ভবেত্ সর্বজনপ্রিযঃ | অধৃষ্যঃ সর্বভূতানাং দৃষ্টিরোগবিবর্জিতঃ ||৯৩||

তান্যঞ্জনানি দর্শযন্নাহ- অষ্টাবিত্যাদি| অঞ্জনস্য সৌবীরাঞ্জনস্য, স্রোতোজরসাঞ্জনস্যেত্যন্যে; নীলোত্পলসমত্বিষঃ নীলোত্পলবর্ণস্যেত্যর্থঃ; ‘নীলোত্পলসুগন্ধিনঃ’ ইতি কেচিত্ পঠন্তি| ঔদুম্বরং তাম্রভাগং, শাতকুম্ভং সুবর্ণভাগং, রাজতং রূপ্যভাগম্, এতেন তাম্রাদীনাং প্রত্যেকমেকৈকং ভাগং, এবমেকাদশ ভাগাঃ পূর্যন্তে| মূষা মৃত্কল্পিতা; সা তু ধাতুবাদিনাং গৃহে প্রসিদ্ধা| আবৃতং বিলীনং, জাতবেদসি অগ্নৌ, অঙ্গারৈঃ দগ্ধনির্বাপিতকৃষ্ণবর্ণকাষ্ঠখণ্ডৈঃ, গোশকৃদ্ভিঃ শুষ্কৈর্গোপুরীষৈঃ, গবামিতি পদং শকৃদ্রসাদিষু সর্পিঃপর্যন্তেষু সম্বধ্যতে| মাক্ষিকে মধুনি, বসা শুদ্ধমাংসস্নেহঃ| অন্তরীক্ষে তথা জলে পানীযে| প্লোতবদ্ধং কর্পটবদ্ধম্| কেচিচ্ছিক্যারোপিতং পানীযমান্তরীক্ষং কথযন্তি| বিশোষ্য সপ্তরাত্রাদনন্তরং তদঞ্জনং শোষযিত্বেত্যর্থঃ| মুক্তা মৌক্তিকং, বিদ্রুমং প্রবালং, কালানুসারিবা তগরমূলং, জেজ্জটস্তু দ্বিতীযসারিবামাহ| শুচিরিতি বৈদ্যবিশেষণম্| আবাপ্য প্রক্ষিপ্য, যোগতঃ অল্পমাত্রযা| অন্যে তু সৌবীরাঞ্জনাদীনাং চতুর্থাংশেন মুক্তাদিচূর্ণং প্রক্ষিপ্যেতি ব্যাখ্যানযন্তি| নিহিতং নিক্ষিপ্তম্| অসনো বীজকঃ, শাতকুম্ভে সুবর্ণমযে, শার্ঙ্গে মেষশৃঙ্গমযে| কেচিদত্র স্ফটিকবৈদূর্যাদিভাজনপাঠং ন পঠন্তি; তে চাত্র পাত্রাণাং তাম্ররজতসুবর্ণানাং শুভভাজনং গৃহ্ণন্তি| সহস্রপাকবত্ শঙ্খদুন্দুভিনির্ঘোষাদিনা, পূজ্যং পূজনীযম্| কৃত্বেতি পদং নিহিতমিত্যত্র সম্বন্ধনীযম্| কেচিত্ সহস্রপাকবত্ পূজাং কৃত্বেতি পঠন্তি| অধৃষ্যঃ অগম্যঃ| সর্বভূতানাং দেবাসুরগন্ধর্বযক্ষরক্ষঃপিতৃপিশাচনাগানামষ্টানাম্| ‘দৃষ্টিরাগবিবর্জিতং’ ইতি কেচিত্ পঠন্তি, রাগশব্দেন ‘সম্পশ্যতঃ ষডপি যেঽভিহিতাস্তু কাচা’ ইতি ব্যাখ্যানযন্তি||৮৫-৯৩||

Adhikarana 74 (94-97) · Śloka 97

কুষ্ঠং চন্দনমেলাশ্চ পত্রং মধুকমঞ্জনম্ | মেষশৃঙ্গস্য পুষ্পাণি বক্রং রত্নানি সপ্ত চ ||৯৪|| উত্পলস্য বৃহত্যোশ্চ পদ্মস্যাপি চ কেশরম্ | নাগপুষ্পমুশীরাণি পিপ্পলী তুত্থমুত্তমম্ ||৯৫|| কুক্কুটাণ্ডকপালানি দার্বীং পথ্যাং সরোচনাম্ | মরিচান্যক্ষমজ্জানং তুল্যাং চ গৃহগোপিকাম্ ||৯৬|| কৃত্বা সূক্ষ্মং ততশ্চূর্ণং ন্যসেদভ্যর্চ্য পূর্ববত্ | এতদ্ভদ্রোদযং নাম সদৈবার্হতি ভূমিপঃ ||৯৭||

কুষ্ঠমিত্যাদি| বক্রং তগরং, রত্নানি সপ্ত পদ্মরাগমরকতনীলববৈদূর্যমুক্তাপ্রবালহেমানি| উত্পলস্য নীলোত্পলস্য, পুষ্পাণি কুসুমানি, বৃহত্যোঃ কণ্টকারীদ্বযস্যাপি কুসুমানি, তুত্থমুত্তমং মযূরগ্রীবাখ্যং, কেচিত্ তুত্থং খর্পরিকাতুত্থং, উত্তমং মযূরগ্রীবাখ্যতুত্থমিতি ব্যাখ্যানযন্তি, গৃহগোপিকা গৃহগোধিকা, গৃহকারিকেত্যন্যে| ন্যসেত্ শুভে ভাজনে প্রক্ষিপেত্| অভ্যর্চ্য শঙ্খদুন্দুভিনির্ঘোষাদিনা পূজাং কৃত্বা| পূর্ববত্ যাদৃগ্গুণং পূর্বাঞ্জনং তাদৃগ্গুণমেতদপি স্যাদিত্যর্থঃ| অন্যে তু পূর্ববত্ শঙ্খদুন্দুভিনির্ঘোষাদিনাঽভ্যর্চ্যেত্যাহুঃ| ভদ্রোদযং ভদ্রস্য কল্যাণস্য উদযো লাভো যস্মাত্তত্তথা; অন্যে তু ভদ্র উদযো যস্যেত্যাহুঃ||৯৪-৯৭||

Adhikarana 75 (98-99) · Śloka 99

বক্রং সমরিচং চৈব মাংসীং শৈলেযমেব চ | তুল্যাংশানি সমানৈস্তৈঃ সমগ্রৈশ্চ মনঃশিলা ||৯৮|| পত্রস্য ভাগাশ্চত্বারো দ্বিগুণং সর্বতোঽঞ্জনম্ | তাবচ্চ যষ্টীমধুকং পূর্ববচ্চৈতদঞ্জনম্ ||৯৯||

বক্রমিত্যাদি| সমানৈস্তৈঃ সমগ্রৈশ্চ মনঃশিলেতি সমভাগৈঃ সর্বদ্রব্যৈঃ সমা মনঃশিলেত্যর্থঃ| পত্রস্য ভাগাশ্চত্বার ইতি আদ্যদ্রব্যাত্ পত্রকস্য চত্বারো ভাগাঃ| দ্বিগুণং সর্বতোঽঞ্জনং সর্বস্মাদেব সমুদিতাঞ্জনচূর্ণাদ্দ্বিগুণং সৌবীরাঞ্জনম্; অন্যে তু অঞ্জনশব্দেন স্রোতোজরসাঞ্জনমাহুঃ| তাবচ্চ যষ্টীমধুকং সৌবীরাঞ্জনপ্রমাণং যষ্টীমধুকমিত্যর্থঃ| অন্যে তু সর্বদ্রব্যসমং যষ্টীমধুকমিচ্ছন্তি| পূর্ববত্ পূর্বমষ্টৌ ভাগানঞ্জনস্যেতি যদুক্তমঞ্জনং তত্তুল্যমেতদপ্যঞ্জনং ফলশ্রুত্যা শঙ্খাদিধ্বনিপূজনেন ভাজনস্থাপনেন চ| অস্যাগ্রে কেচিদুশীরাদ্যঞ্জনং পঠন্তি, তচ্চাভাবান্ন লিখিতম্||৯৮-৯৯||

Adhikarana 76 (100-102) · Śloka 102

মনঃশিলাং দেবকাষ্ঠং রজন্যৌ ত্রিফলোষণম্ | লাক্ষালশুনমঞ্জিষ্ঠাসৈন্ধবৈলাঃ সমাক্ষিকাঃ ||১০০|| রোধ্রং সাবরকং চূর্ণমাযসং তাম্রমেব চ | কালানুসারিবাং চৈব কুক্কুটাণ্ডদলানি চ ||১০১|| তুল্যানি পযসা পিষ্ট্বা গুটিকাং কারযেদ্বুধঃ | কণ্ডূতিমিরশুক্লার্মরক্তরাজ্যুপশান্তযে ||১০২||

মনঃশিলেত্যাদি| ঊষণং মরিচম্||১০০-১০২||

Adhikarana 77 (103-104) · Śloka 104

কাংস্যাপমার্জনমসী মধুকং সৈন্ধবং তথা | এরণ্ডমূলং চ সমং বৃহত্যংশদ্বযান্বিতম্ ||১০৩|| আজেন পযসা পিষ্ট্বা তাম্রপাত্রং প্রলেপযেত্ | সপ্তকৃত্বস্তু তা বর্ত্যশ্ছাযাশুষ্কা রুজাপহাঃ ||১০৪||

কাংস্যাপমার্জনমসীত্যাদি| কাংস্যাপমার্জনমসী কাংস্যাপমার্জনস্যোল্লেখননীলিকা, নতং তগরমূলং, বৃহত্যংশদ্বযান্বিতং বৃহতীফলযোর্বৃহতীমূলযোর্বা আদ্যদ্রব্যাদ্যদংশদ্বযং তেন সমন্বিতম্||১০৩-১০৪||

Adhikarana 78 (105) · Śloka 105

পথ্যাতুত্থকযষ্ট্যাহ্বৈস্তুল্যৈর্মরিচষোডশা | পথ্যা সর্ববিকারেষু বর্তিঃ শীতাম্বুপেষিতা ||১০৫||

পথ্যাতুত্থকেত্যাদি| মরিচস্য ষোডশভাগো যস্যাঃ সা মরিচষোডশা বর্তিঃ| পথ্যা হিতা||১০৫||

Adhikarana 79 (106) · Śloka 106

রসক্রিযাবিধানেন যথোক্তবিধিকোবিদঃ | পিণ্ডাঞ্জনানি কুর্বীত যথাযোগমতন্দ্রিতঃ ||১০৬||

সা পুনঃ শুষ্কা বর্তিরঞ্জনেঽবচার্যমাণা নযনে ক্ষতাদিজননীত্যাশঙ্ক্য তস্যাঃ প্রযোগমাহ- রসক্রিযাবিধানেনেত্যাদি| রসক্রিযাবিধানেন রসক্রিযাযা যদ্বিধানং নাতিতনু নাতিঘনং শলাকোপলেপক্ষমমঙ্গুল্যুপলেপক্ষমং বা তেনেত্যর্থঃ| পিণ্ডাঞ্জনানি বর্ত্যঞ্জনানি শিলাপট্টকঘৃষ্টানি পিষ্টানি বা| এতেনৈতদুক্তং- ন কদাচিদপি শুষ্কবর্ত্যা নযনমঞ্জ্যাদিতি তাত্পর্যার্থঃ| যথাযোগমিতি যথা নযনে ক্ষতাদযো ন ভবেযুরিত্যর্থঃ| অতন্দ্রিতঃ অনলসঃ| কেচিদমুং শ্লোকমন্যথা ব্যাখ্যানযন্তি, তচ্চ বিস্তরভযান্ন লিখিতম্||১০৬||

Adhikarana puShpikA · Śloka 18

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে ক্রিযাকল্পো নামাষ্টাদশোঽধ্যাযঃ ||১৮||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালক্যতন্ত্রেঽষ্টাদশোঽধ্যাযঃ||১৮||