54. kr̥mirōgapratiṣēdhādhyāyaḥ

Adhikarana 1 (1-6) · Śloka 6

অথাতঃ কৃমিরোগপ্রতিষেধমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২|| অজীর্ণাধ্যশনাসাত্ম্যবিরুদ্ধমলিনাশনৈঃ | অব্যাযামদিবাস্বপ্নগুর্বতিস্নিগ্ধশীতলৈঃ ||৩|| মাষপিষ্টান্নবিদলবিসশালূকসেরুকৈঃ | পর্ণশাকসুরাশুক্তদধিক্ষীরগুডেক্ষুভিঃ ||৪|| পললানূপপিশিতপিণ্যাকপৃথুকাদিভিঃ | স্বাদ্বম্লদ্রবপানৈশ্চ শ্লেষ্মা পিত্তং চ কুপ্যতি ||৫|| কৃমীন্ বহুবিধাকারান্ করোতি বিবিধাশ্রযান্ | আমপক্বাশযে তেষাং কফবিড্জন্মনাং পুনঃ | ধমন্যাং রক্তজানাং চ প্রসবঃ প্রাযশঃ স্মৃতঃ ||৬||

কেষাঞ্চিত্ কৃমীণাং সামান্যং হেতুমাহ- অজীর্ণেত্যাদি| অজীর্ণম্ আমবিদগ্ধাদিভেদভিন্নং, অধ্যশনম্ অজীর্ণভোজনং অসাত্ম্যংযত্ সেবিতং সুখার্থং ন সম্পদ্যতে, বিরুদ্ধং হিতাহিতীযোক্তং, মলিনং সমলম্| পিষ্টান্নং তণ্ডুলপিষ্টাদি, বিদলং মকুষ্ঠাদি, বিসং বিসাণ্ডকং, শালূঃ পদ্মকন্দঃ| পর্ণশাকং পত্রশাকং, সূক্তং সন্ধানকবিশেষঃ| পললঃ তিলকল্কঃ , আনূপপিশিতম্ আনূপমাংসং, পিণ্যাকং যন্ত্রপীডিততিলখলী, 'পীতা' ইতি লোকে, পৃথুকঃ চিপিটকঃ আদিশব্দাদেবম্প্রকারা অন্যেঽপি| বহুবিধাকারান্ বিবিধাকারান্| বিবিধাশ্রযানিতি নানাপ্রকারাশ্রযানিত্যর্থঃ| প্রসব উত্পত্তিঃ| প্রাযোগ্রহণাদন্যত্রাপি সম্ভবো জ্ঞাতব্যঃ| কেচিদত্র অজীর্ণাধ্যশনাদিকং হেতুগণং ন পঠন্তি, তেষাং চ হেত্ববগতির্বক্ষ্যমাণাত্ 'ক্ষীরাণি মাংসানি' ইত্যাদিপ্রতিষেধবিধানাত্; মযা তু সুখবোধার্থং হেতুগণঃ পঠিতঃ| অপরে তু ‘অজীর্ণভোজী মধুরাম্লনিত্যো দ্রবপ্রিযঃ পিষ্টগুডোপভোক্তা| ব্যাযামজাতানি চ বর্জ্যমানঃ স্বপ্নাদিবান্ বৈ লভতে ক্রিমীন্না' ইতি পঠন্তি||১-৬||

Adhikarana 2 (7) · Śloka 7

বিংশতেঃ কৃমিজাতীনাং ত্রিবিধঃ সম্ভবঃ স্মৃতঃ | পুরীষকফরক্তানি, তাসাং বক্ষ্যামি বিস্তরম্ ||৭||

ইদানীং বিংশতিসঙ্খ্যানামপি কৃমিজাতীনাং কারণত্রৈবিধ্যমাহ- বিংশতেরিত্যাদি| জাতিগ্রহণং কৃমীণামানন্ত্যখ্যাপনার্থং; তচ্চানন্ত্যং বিংশত্যামেবাবরুদ্ধং, অতো বিংশতিসঙ্খ্যাকরণং সার্থকম্| সম্ভবঃ কারণম্| কস্ত্রিবিধঃ সম্ভব ইত্যাহ- পুরীষেত্যাদি| ননু, অজীর্ণাধ্যশনাদযো হেতব উক্তাঃ , কথং পুরীষাদযশ্চ উচ্যন্তে? সত্যং, অজীর্ণাদযঃ পুরীষাদীনাং হেতবঃ, পুরীষাদযশ্চ কৃমীণামিতি| যদ্যপি কৃম্যারম্ভকা ন পুরীষাদযঃ , তথাঽপ্যুপচারাত্ পুরীষাদীনামপি কৃম্যারম্ভকত্বম্| পুরীষাদ্যধিষ্ঠিতা দোষাঃ পুরীষাদি, ঘৃতাদিদগ্ধবত্; এতেনাজীর্ণাদিভিঃ প্রকুপিতা দোষাঃ পুরীষাদীন্যধিষ্ঠায কৃমীন্ জনযন্তি তাসাং কৃমিজাতীনাম্| কেচিত্ ‘বিস্তরং’ ইত্যত্র ‘লক্ষণং’ ইতি পাঠান্তরং সব্যাখ্যানং পঠন্তি; তচ্চ শিষ্যবুদ্ধিব্যাকুলত্বহেতুত্বাত্ পরিত্যক্তম্||৭||

Adhikarana 3 (8) · Śloka 8

অজবা বিজবাঃ কিপ্যাশ্চিপ্যা গণ্ডূপদাস্তথা | চূরবো দ্বিমুখাশ্চৈব জ্ঞেযাঃ সপ্ত পুরীষজাঃ ||৮||

পুরীষজকৃমিনামান্যাহ- অজবা ইত্যাদি| অজবাদযো দ্বিমুখান্তাঃ সপ্ত পুরীষজাঃ কৃমযঃ||৮||

Adhikarana 4 (9-10) · Śloka 10

শ্বেতাঃ সূক্ষ্মাস্তুদন্ত্যেতে গুদং প্রতিসরন্তি চ | তেষামেবাপরে পুচ্ছৈঃ পৃথবশ্চ ভবন্তি হি ||৯|| শূলাগ্নিমান্দ্যপাণ্ডুত্ববিষ্টম্ভবলসঙ্ক্ষযাঃ | প্রসেকারুচিহৃদ্রোগবিড্ভেদাস্তু পুরীষজৈঃ ||১০||

পুরীষজানাং লক্ষণমাহ- শ্বেতা ইত্যাদি| য এতে পুরীষজাঃ কৃমযঃ শ্বেতাঃ সূক্ষ্মাশ্চ ভবন্তি, তে বাহুল্যেনাদ্দষ্টবশাদ্গুদং তুদন্তি প্রতিসরন্তি চ| তেষামেব সপ্তানাং মধ্যে অপরে পুচ্ছৈঃ পৃথবো ভবন্তি| পুরীষজৈঃ সপ্তভিঃ কৃমিভিঃ শূলাগ্নিমান্দ্যাদযো ভবন্তি| বিষ্টম্ভো গুডগুডাশব্দঃ| প্রসেকো লালাস্রাবঃ| বিড্ভেদঃ দ্রবপুরীষতা||৯-১০||

Adhikarana 5 (11) · Śloka 11

রক্তা গণ্ডূপদা দীর্ঘা গুদকণ্ডূনিপাতিনঃ | শূলাটোপশকৃদ্ভেদপক্তিনাশকরাশ্চ তে ||১১||

তেষামেব সপ্তানাং পুরীষজানাং মধ্যে গণ্ডূপদানাং লক্ষণং কর্ম চাহ- রক্তা ইত্যাদি| পক্তিনাশকরা অগ্নিনাশকরাঃ, কারণে কার্যোপচারাত্||১১||

Adhikarana 6 (12) · Śloka 12

দর্ভপুষ্পা মহাপুষ্পাঃ প্রলূনাশ্চিপিটাস্তথা | পিপীলিকা দারুণাশ্চ কফকোপসমুদ্ভবাঃ ||১২||

কফকৃমিনামান্যাহ- দর্ভপুষ্পা ইত্যাদি| দর্ভপুষ্পাদিকা দারুণপর্যন্তাঃ কফকোপজাঃ ষট্ কৃমযঃ||১২||

Adhikarana 7 (13) · Śloka 13

রোমশা রোমমূর্ধানঃ সপুচ্ছাঃ শ্যাবমণ্ডলাঃ | রূঢধান্যাঙ্কুরাকারাঃ শুক্লাস্তে তনবস্তথা ||১৩||

তেষামাকৃতিমাহ- রোমশা ইত্যাদি| রোমশাঃ সর্বতো রোমান্বিতাঃ| রোমমূর্ধানঃ সরোমমস্তকাঃ| শ্যাবমণ্ডলাঃ শ্যামমণ্ডলযুক্তাঃ||১৩||

Adhikarana 8 (14) · Śloka 14

মজ্জাদা নেত্রলেঢারস্তালুশ্রোত্রভুজস্তথা |১৪|

তেষামেব কর্মবিশেষেণ সঞ্জ্ঞান্তরমাহ- মজ্জাদা ইত্যাদি|১৪|-

Adhikarana 9 (14) · Śloka 14

শিরোহৃদ্রোগবমথুপ্রতিশ্যাযকরাশ্চ তে ||১৪||

তেষাং সর্বেষামেব কর্মাণ্যাহ- শিরোহৃদ্রোগেত্যাদি| রোগশব্দঃ শিরোহৃদ্ভ্যাং সম্বধ্যতে, তেন শিরোরোগো হৃদ্রোগশ্চ, বমথুঃ ছর্দিঃ| চকারাত্ অন্যানপি কফজব্যাধীন্ কুর্বন্তি| তে কফজাঃ কৃমযঃ||১৪||

Adhikarana 10 (15) · Śloka 15

কেশরোমনখাদাশ্চ দন্তাদাঃ কিক্কিশাস্তথা | কুষ্ঠজাঃ সপরীসর্পা জ্ঞেযাঃ শোণিতসম্ভবাঃ ||১৫||

রক্তজকৃমিনামান্যাহ- কেশরোমেত্যাদি| কেশাদাদ্যাঃ পরীসর্পান্তাঃ সপ্ত রক্তজাঃ কৃমযঃ||১৫||

Adhikarana 11 (16) · Śloka 16

তে সরক্তাশ্চ কৃষ্ণাশ্চ স্নিগ্ধাশ্চ পৃথবস্তথা |১৬|

তেষামাকৃতিমাহ- ত ইত্যাদি| তে রক্তজাঃ কৃমযঃ| পৃথবঃ স্থূলাঃ|১৬|-

Adhikarana 12 (16) · Śloka 16

রক্তাধিষ্ঠানজান্ প্রাযো বিকারান্ জনযন্তি তে ||১৬||

তেষাং কর্মাণ্যাহ- রক্তাধিষ্ঠানজানিত্যাদি| রক্তাধিষ্ঠানজান্ ব্যাধিসমুদ্দেশীযোক্তান্ কুষ্ঠবিসর্পপিডকাদীন্||১৬||

Adhikarana 13 (17-18) · Śloka 19

মাষপিষ্টান্নবিদলপর্ণশাকৈঃ পুরীষজাঃ | মাংসমাষগুডক্ষীরদধিতৈলৈঃ কফোদ্ভবাঃ ||১৭|| বিরুদ্ধাজীর্ণশাকাদ্যৈঃ শোণিতোত্থা ভবন্তি হি | জ্বরো বিবর্ণতা শূলং হৃদ্রোগঃ সদনং ভ্রমঃ ||১৮|| ভক্তদ্বেষোঽতিসারশ্চ সঞ্জাতকৃমিলক্ষণম্ |১৯|

পুরীষজাদিকৃমীণাং সামান্যকারণমভিধাযেদানীং বিশেষকারণমাহ- মাষপিষ্টান্নবিদলেত্যাদি| পিষ্টান্নং তণ্ডুলাদিপিষ্টজম্||১৭-১৮||-

Adhikarana 14 (19) · Śloka 20

দৃশ্যাস্ত্রযোদশাদ্যাস্তু কৃমীণাং পরিকীর্তিতাঃ ||১৯|| কেশাদাদ্যাস্ত্বদৃশ্যাস্তে দ্বাবাদ্যৌ পরিবর্জযেত্ |২০|

ইদানীং কৃমীণাং দৃশ্যাদৃশ্যত্বেন সাধ্যাসাধ্যত্বেন চ বিভাগকরণার্থমাহ- দৃশ্যা ইত্যাদি| আদ্যাস্ত্রযোদশেতি অজবাদ্যা দারুণান্তা ইত্যর্থঃ| কেশাদাদ্যা ইতি কেশাদাদ্যাঃ পরীসর্পান্তা রক্তজাঃ কৃময ইত্যর্থঃ| দ্বাবাদ্যাবিতি রক্তজাপেক্ষযৈব আদ্যৌ, তেন কেশাদরোমাদাবিত্যর্থঃ| তথা চোক্তম্- “অসাধ্যৌ দ্বৌ তু বিজ্ঞেযৌ রোমকেশাদসঞ্জ্ঞিতৌ” ইতি||১৯||-

Adhikarana 15 (20) · Śloka 21

এষামন্যতমং জ্ঞাত্বা জিঘাংসুঃ স্নিগ্ধমাতুরম্ ||২০|| সুরসাদিবিপক্বেন সর্পিষা বান্তমাদিতঃ | বিরেচযেত্তীক্ষ্ণতরৈর্যোগৈ ... |২১|

নিদানমভিধাযেদানীং চিকিত্সাবসরঃ- এষামন্যতমমিত্যাদি| এষাং ক্রিমীণাং মধ্যে অন্যতমমেকতমং জিঘাংসুঃ, স্নিগ্ধমাতুরং সুরসাদিগণবিপক্বেন সর্পিষা স্নিগ্ধমাতুরং জ্ঞাত্বা, আদিতশ্চ বান্তং তীক্ষ্ণতরৈর্যোগৈঃ কফঘ্নৈর্বিরেচনকল্পোক্তৈর্বিরেচযেদিতি পিণ্ডার্থঃ| ‘দুষ্টে চ কোষ্ঠে কৃমিভির্মনুষ্যং ন বামযেত্’ ইত্যাদিনা কৃমিযুক্তস্য পুংসো বমননিষেধঃ, তথাঽপি কৃমিযুক্তস্য প্রথমাবস্থাযাং বমনং শস্তম্, অতো বান্তমাদিত ইত্যুক্তম্||২০||-

Adhikarana 16 (21-22) · Śloka 22

... রাস্থাপযেচ্চ তম্ ||২১|| যবকোলকুলত্থানাং সুরসাদের্গণস্য চ | বিডঙ্গস্নেহযুক্তেন ক্বাথেন লবণেন চ ||২২||

বিরেকানন্তরং কিং কুর্যাদিত্যাহ- আস্থাপযেদিত্যাদি| তম্ আতুরং যবকোলাদীনাং ক্বাথেন তথা সুরসাদিগণস্য ক্বাথেন বিডঙ্গসাধিতস্নেহযুক্তেন সৈন্ধবলবণান্বিতেনাস্থাপযেদিতি পিণ্ডার্থঃ| গণস্য চেতি চকারাত্ সুরসাদিকল্কোঽপি গ্রাহ্যঃ||২১-২২||

Adhikarana 17 (23) · Śloka 24

প্রত্যাগতে নিরূহে তু নরং স্নাতং সুখাম্বুনা | যুঞ্জ্যাত্ কৃমিঘ্নৈরশনৈস্ততঃ শীঘ্রং ভিষগ্বরঃ ||২৩|| স্নেহেনোক্তেন চৈনং তু যোজযেত্ স্নেহবস্তিনা |২৪|

আস্থাপনানন্তরং কিং কুর্যাদিত্যাহ- প্রত্যাগত ইত্যাদি| প্রত্যাগতে ব্যাঘুটিতে পতিতে ইত্যর্থঃ| সুখাম্বুনা উষ্ণোদকেন| কৃমিঘ্নৈরশনৈঃ কৃমিঘ্নদ্রব্যসাধিতৈঃ স্বভাবতঃ কৃমিঘ্নৈশ্চ| স্নেহেনোক্তেন বিডঙ্গসাধিতস্নেহেন| স্নেহবস্তিনা অনুবাসনেন||২৩||-

Adhikarana 18 (24) · Śloka 24

ততঃ শিরীষকিণিহীরসং ক্ষৌদ্রযুতং পিবেত্ ||২৪||

অতোঽনন্তরং কৃতান্নসংসর্গঃ কিং কুর্যাদিত্যাহ- তত ইত্যাদি| তত ইতি অনুবাসনানন্তরম্| কিণিহী কটভী||২৪||

Adhikarana 19 (25) · Śloka 25

কেবূকস্বরসং বাঽপি পূর্ববত্তীক্ষ্ণভোজনঃ |২৫|

পানান্তরমাহ- কেবূকেত্যাদি| কেবূকঃ ‘কেসুর ’ ইতি নাম্না প্রসিদ্ধঃ| পূর্ববদিতি ক্ষৌদ্রযুতমিত্যর্থঃ| তীক্ষ্ণভোজনঃ তীক্ষ্ণদ্রব্যসংস্কৃতাহারঃ|২৫|-

Adhikarana 20 (25) · Śloka 25

পলাশবীজস্বরসং কল্কং বা তণ্ডুলাম্বুনা ||২৫||

অপরমপি পানযোগমাহ- পলাশবীজেত্যাদি| পলাশবীজস্বরসং কল্কং বেতি পলাশবীজকল্কং বা তণ্ডুলাম্বুনা পিবেদিত্যর্থঃ||২৫||

Adhikarana 21 (26) · Śloka 26

পারিভদ্রকপত্রাণাং ক্ষৌদ্রেণ স্বরসং পিবেত্ | পত্তূরস্বরসং বাঽপি পিবেদ্বা সুরসাদিজম্ ||২৬||

অপরমপি পানযোগমাহ- পারিভদ্রকপত্রাণামিত্যাদি| পারিভদ্রঃ পর্বতনিম্বঃ| পত্তূরঃ শিরবালিকা| সুরসাদিকঃ সুরসাদিগণঃ||২৬||

Adhikarana 22 (27) · Śloka 27

লিহ্যাদশ্বশকৃচ্চূর্ণং বৈডঙ্গং বা সমাক্ষিকম্ |২৭|

কৃমিঘ্নমবলেহযোগমাহ- লিহ্যাদিত্যাদি| অশ্বশকৃচ্চূর্ণং ঘোটকপুরীষচূর্ণম্| বৈডঙ্গং বিডঙ্গচূম্| ‘বৈডঙ্গম্’ ইত্যত্র ‘বৈডালম্’ ইতি কেচিত্ পঠন্তি; তত্র বিডালবিট্চূর্ণমিতি ব্যাখ্যানম্|২৭|-

Adhikarana 23 (27) · Śloka 28

পত্রৈর্মূষিকপর্ণ্যা বা সুপিষ্টৈঃ পিষ্টমিশ্রিতৈঃ ||২৭|| খাদেত্ পূপলিকাঃ পক্বা ধান্যাম্লং চ পিবেদনু |২৮|

ক্রিমিঘ্নপূপলিকামাহ- পত্রৈর্মূষিকপর্ণ্যা বেত্যাদি| মূষিকপর্ণী দন্তী, অন্যে মূষিককর্ণাখ্যং দ্রব্যান্তরমাহুঃ| পিষ্টমিশ্রিতৈঃ যবপিষ্টমিশ্রিতৈঃ, তস্য বিশেষেণ ক্রিমিহরত্বাত্| ধান্যাম্লং কাঞ্জিকম্| অন্বিতি পূপলিকাভক্ষণানন্তরম্| যদ্যপি ‘ক্ষীরাণি মাংসানি ঘৃতানি চ’ ইত্যাদিগ্রন্থোক্তাদম্লবর্জনাদত্র কাঞ্জিকস্যাপি বর্জনং প্রাপ্নোতি, তথাঽপি কাঞ্জিকস্য প্রাযোগিকত্বাত্ ক্রিমিহরত্বাচ্চাত্র কাঞ্জিকানুপানং, তথা হি গুণোপবর্ণনে কাঞ্জিকং কৃমিঘ্নত্বেন দৃষ্টম্||২৭||-

Adhikarana 24 (28) · Śloka 29

সুরসাদিগণে পক্বং তৈলং বা পানমিষ্যতে ||২৮|| বিডঙ্গচূর্ণযুক্তৈর্বা পিষ্টৈর্ভক্ষ্যাংস্তু কারযেত্ |২৯|

কৃমিঘ্নতৈলমাহ- সুরসাদিগণে ইত্যাদি| তৈলমিতি সুরসাদিগণে ‘ক্বাথকল্কীকৃতে’ ইতি শেষঃ| বিডঙ্গেত্যাদি| পিষ্টৈঃ যবাদিপিষ্টৈঃ| ভক্ষ্যান্ লড্ডূকাদীন্| বিকল্পবিধানং পূর্বযোগাপেক্ষযা||২৮||-

Adhikarana 25 (29) · Śloka 29

তত্কষাযপ্রপীতানাং তিলানাং স্নেহমেব বা ||২৯||

তত্কষাযপ্রপীতানামিত্যাদি| তত্কষাযপ্রপীতানাং বিডঙ্গক্বাথভাবিতানাম্| অত্রাপি কারযেদিতি সম্বন্ধনীযম্||২৯||

Adhikarana 26 (31) · Śloka 31

শ্বাবিধঃ শকৃতশ্চূর্ণং সপ্তকৃত্বঃ সুভাবিতম্ | বিডঙ্গানাং কষাযেণ ত্রৈফলেন তথৈব চ ||৩০|| ক্ষৌদ্রেণ লীঢ্বাঽনুপিবেদ্রসমামলকোদ্ভবম্ | অক্ষাভযারসং বাঽপি... |৩১|

শ্বাবিধ ইত্যাদি| শ্বাবিধঃ সেঢাযাঃ, শকৃত্ বিষ্ঠা, তস্যাশ্চূর্ণং সপ্তবারান্ বিডঙ্গক্বাথেন ভাবিতং পুনস্ত্রিফলাক্বাথেন তথৈব ভাবিতং, ক্ষৌদ্রেণ লীঢ্বা, অনু পশ্চাত্, আমলকোদ্ভবং বিভীতকোদ্ভবং বা হরীতকীরসং বাঽপি ক্ষৌদ্রেণ পিবেদিতি সম্বন্ধঃ||৩১||-

Adhikarana 27 (31) · Śloka 31

... বিধিরেষোঽযসামপি ||৩১||

অমুমেব বিধি লৌহচূর্ণানামপ্যতিদিশন্নাহ- বিধিরিত্যাদি| এষ বিধিঃ শ্বাবিধঃ শকৃচ্চূর্ণবিধিঃ| অযসামপীতি ত্রপুসীসতাম্ররজতকৃষ্ণলোহানামপি| এতেনৈতদুক্তং ভবতি- প্রত্যেকং লোহাদিচূর্ণানাং শ্বাবিত্পুরীষচূর্ণবিধানবদ্বিধিঃ কার্যঃ||৩১||

Adhikarana 28 (32) · Śloka 33

পূতীকস্বরসং বাঽপি পিবেদ্বা মধুনা সহ | পিবেদ্বা পিপ্পলীমূলমজামূত্রেণ সংযুতম্ ||৩২|| সপ্তরাত্রং পিবেদ্ধৃষ্টং ত্রপু বা দধিমস্তুনা |৩৩|

পূতীকঃ চিরবিল্বঃ| পিবেদিত্যাদি| অজামূত্রেণ ছাগমূত্রেণ| পিবেদ্ধৃষ্টমিত্যাদি| ত্রপু রঙ্গং, ‘কথীর’ ইতি লোকে| দধিমস্তুগ্রহণম্ অন্যমস্তুনিষেধার্থং; অন্যে ‘দধিমস্তুনা’ ইত্যত্র দধিগ্রহণং কূর্চিকামস্তুপরিহারার্থমিতি ব্যাখ্যানযন্তি| তন্ন, দধিমস্তুগ্রহণেন কূর্চিকামস্তুগ্রহণমসম্ভবং, সর্বনিবন্ধবিরোধাত্ সমানতন্ত্রবিরোধাচ্চ||৩২||

Adhikarana 29 (33) · Śloka 33

পুরীষজান্ কফোত্থাংশ্চ হন্যাদেবং কৃমীন্ ভিষক্ ||৩৩||

যত্ পূর্বমেতচ্চিকিত্সিতমুক্তং তত্ পুরীষকফজানাং কার্যমিতি দর্শযন্নাহ- পুরীষজানিত্যাদি| এবমিতি পূর্বোক্তেন বিধিনেত্যর্থঃ||৩৩||

Adhikarana 30 (34) · Śloka 34

শিরোহৃদ্ঘ্রাণকর্ণাক্ষিসংশ্রিতাংশ্চ পৃথগ্বিধান্ | বিশেষেণাঞ্জনৈর্নস্যৈরবপীডৈশ্চ সাধযেত্ ||৩৪||

পুরীষকফজানাং সামান্যচিকিত্সিতমভিধাযেদানীং কফজানামাশ্রযবিশেষেণ চিকিত্সামাহ- শিরোহৃদ্ঘ্রাণেত্যাদি| শিরঃপ্রভৃতিসংশ্রিতান্ নানাপ্রকারান্ কৃমীন্ বিশেষেণাঞ্জনাদিভিঃ সাধযেদিতি পিণ্ডার্থঃ| চকারাত্ গণ্ডূষকবলগ্রহাদিভিরপি| অন্যে তু যদ্যপ্যঞ্জনাদিকং সামান্যেনোক্তং, তথাঽপ্যঞ্জনং নেত্রস্থে, নস্যাবপীডৌ ঘ্রাণশিরঃসংশ্রিতে চ, বিশেষেণাঞ্জনাদীনাং নেত্রাদিজকৃমিহরত্বাত্; হৃদ্গতানাং কর্ণগতানাং চার্থবশাদেব কৃমিজহৃদ্রোগকৃমিকর্ণকচিকিত্সিতৈশ্চিকিত্সা কার্যা; চকারাত্ শিরঃস্থিতানাং কৃমীণাং কৃমিশিরোরোগচিকিত্সিতৈশ্চিকিত্সা কার্যেতি গৃহ্যত ইতি ব্যাখ্যানযন্তি| ‘সংশ্রিতান্’ ইত্যত্র ‘ব্রণজান্’ ইতি কেচিত্ পঠন্তি; অন্যে ‘সংশ্রিতান্’ ইত্যত্র ‘সংসৃতান্’ ইতি পঠন্তি; কর্ণস্থানে চ বক্ত্রং পঠন্তি||৩৪||

Adhikarana 31 (35) · Śloka 35

শকৃদ্রসং তুরঙ্গস্য সুশুষ্কং ভাবযেদতি | নিষ্ক্বাথেন বিডঙ্গানাং চূর্ণং প্রধমনং তু তত্ ||৩৫||

শিরঃ প্রভৃতিসংশ্রিতকৃমিঘ্নং প্রধমনমাহ- শকৃদ্রসমিত্যাদি| শকৃদ্রসং তুরঙ্গস্যেতি ঘোটকপুরীষস্য রসমিত্যর্থঃ| সুশুষ্কমিতি পুরীষরসস্য বিশেষণম্| প্রধমনমিতি নাসাযাং চূর্ণপ্রক্ষেপণং জ্ঞেযম্||৩৫||

Adhikarana 32 (36) · Śloka 36

অযশ্চূর্ণান্যনেনৈব বিধিনা যোজযেদ্ভিষক্ | সকাংস্যনীলং তৈলং চ নস্যং স্যাত্সুরসাদিকে ||৩৬||

অমুমেব প্রধমনবিধিং লোহচূর্ণেষ্বতিদিশন্নাহ- অযশ্চূর্ণানীত্যাদি| অনেনেতি ঘোটপুরীষস্বরসপ্রধমনবিধানেন| সকাংস্যনীলং কাংস্যাপমার্জনমসীসহিতম্| ‘সুরসাদিকে’ ইত্যত্র ‘বিপক্বং’ ইতি শেষঃ| তেন সুরসাদিগণক্বাথবিপক্বং তৈলং কাংস্যমসীসহিতং নস্যং স্যাদিতি| তথা চোক্তাং,- ‘সুরসাদিশৃতং তৈলং নস্যং কাংস্যমলান্বিতম্’- ইতি||৩৬||

Adhikarana 33 (37) · Śloka 37

ইন্দ্রলুপ্তবিধিশ্চাপি বিধেযো রোমভোজিষু |৩৭|

রোমাদাদীনামতিদেশেন চিকিত্সামাহ- ইন্দ্রলুপ্তেত্যাদি| রোমভোজিষু রোমাদেষু| চকারেণ কেশভোজিষ্বপীন্দ্রলুপ্তবিধিঃ কার্য ইতি সমুচ্চীযতে|৩৭|-

Adhikarana 34 (37) · Śloka 37

দন্তাদানাং সমুদ্দিষ্টং বিধানং মুখরোগিকম্ ||৩৭||

দন্তাদানামপ্যতিদেশেন চিকিত্সিতমাহ- দন্তাদানামিত্যাদি| মুখরোগিকং কৃমিদন্তোক্তং, বিশেষেণ কৃমিদন্তোক্তচিকিত্সিতস্য দন্তানাং হিতত্বাত্| যদ্যপি রোমাদদন্তাদানাং রক্তজত্বাত্ রক্তজসামান্যচিকিত্সানন্তরমিন্দ্রলুপ্তবিধ্যাদিকং বিশেষচিকিত্সিতং কর্তুমুচিতং ভবতি, তথাঽপি কফজা অপি রোমদন্তভক্ষণং কুর্বন্তীতি প্রব্যক্তকটুকং ভোজনং হিতং ভবেদিতি প্রতিপাদনার্থং রোমদন্তাদানাং প্রথমং চিকিত্সিতমুক্তম্||৩৭||

Adhikarana 35 (38) · Śloka 38

রক্তজানাং প্রতীকারং কুর্যাত্ কুষ্ঠচিকিত্সিতে |৩৮|

ইদানীং সামান্যচিকিত্সিতং রক্তজানামতিদেশেনাহ- রক্তজানামিত্যাদি| ‘কুষ্ঠচিকিত্সিতে’ ইত্যত্র পূর্বোক্তমেব সমুদ্দিষ্টমিতি পদং সম্বন্ধনীযম্| কেচিত্ ‘কুষ্ঠচিকিত্সিতাত্’ ইতি পঠন্তি|৩৮|-

Adhikarana 36 (38) · Śloka 38

সুরসাদিং তু সর্বেষু সর্বথৈবোপযোজযেত্ ||৩৮||

সুরসাদিং তু সর্বেষ্বিত্যাদি| সর্বেষু পুরীষজাদিষু| সর্বথৈব অন্নপানস্নানাদিবিধিনা||৩৮||

Adhikarana 37 (39) · Śloka 39

প্রব্যক্ততিক্তকটুকং ভোজনং চ হিতং ভবেত্ |৩৯|

ভোজনে বিধ্যন্তরমাহ- প্রব্যক্তেত্যাদি| প্রব্যক্ততিক্তকটুকমিতি তিক্তকটুকোত্কটমিত্যর্থঃ|৩৯|-

Adhikarana 38 (39) · Śloka 39

কুলত্থক্ষারসংসৃষ্টং ক্ষারপানং চ পূজিতম্ ||৩৯||

পানেঽপি বিধ্যন্তরমাহ- কুলত্থেত্যাদি| কুলত্থক্ষারসংসৃষ্টং কুলত্থভস্মোদকসংযুক্তম্? ক্ষারপানং যবক্ষারপানং, তথা চোক্তং বিশ্বামিত্রেণ- ‘যাবশূকস্য পানং তু কুলত্থক্ষারবারিণা’- ইতি| কেচিত্ ‘কুলত্থক্ষার...’ ইত্যত্র ‘বিডঙ্গক্ষার...’ ইতি পঠন্তি||৩৯||

Adhikarana 39 (40) · Śloka 40

ক্ষীরাণি মাংসানি ঘৃতানি চৈব দধীনি শাকানি চ পর্ণবন্তি | সমাসতোঽম্লান্মধুরান্ হিমাংশ্চ কৃমীন্ জিঘাংসুঃ পরিবর্জযেত্তু ||৪০||

প্রবৃত্তিলক্ষণং চিকিত্সিতমভিধাযেদানীং নিবৃত্তিলক্ষণং চিকিত্সিতমাহ- ক্ষীরাণি মাংসানীত্যাদি| যদ্যপি ‘সঙ্ক্ষেপতঃ ক্রিযাযোগো নিদানপরিবর্জনম্’ ইতি বাক্যাদেব ক্ষীরাদীনাং নিষেধবিধিঃ সিদ্ধঃ, তথাঽপি ক্ষীরাদীনাং প্রতিষেধকরণং নিযমার্থং; তেন কৃমীণাং নিদানমপি ক্ষীরাদিকং মদাত্যযে মদ্যবদ্ভেষজং মা ভূদিত্যর্থঃ||৪০||

Adhikarana puShpikA · Śloka 54

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রে কৃমিপ্রতিষেধো নাম (ষোডশোঽধ্যাযঃ, আদিতঃ) চতুঃপঞ্চাশত্তমোঽধ্যাযঃ ||৫৪||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রে কৃমিপ্রতিষেধো নাম চতুঃপঞ্চাশত্তমোঽধ্যাযঃ||৫৪||