13. lēkhyarōgapratiṣēdhādhyāyaḥ

Adhikarana 1 (1-2) · Śloka 2

অথাতো লেখ্যরোগপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

রক্তাভিষ্যন্দানন্তরমৌষধসাধ্যান্ গদাঞ্চতুর্ষ্বভিষ্যন্দেষ্বভিধায শস্ত্রসাধ্যান্ প্রতিপাদযিতুকামো লেখ্যাঞ্জনপ্রসঙ্গেন প্রথমং লেখ্যরোগপ্রতিষেধমাহ- অথাত ইত্যাদি| যদ্যপি চিকিত্সাপ্রবিভাগীযোদ্দিষ্টাত্ ‘ছেদ্যাস্তেষু দশৈকশ্চ’ ইত্যাদিবচনাত্ পূর্বং ছেদ্যরোগাণামুপাদানং প্রপ্নোতি, তথাঽপি লেখ্যাঞ্জনপ্রসঙ্গাচ্ছেদ্যাদিষ্বল্পাবস্থাযাং লেখনোপযোগাচ্চ লিখ্যানাং প্রাগুপাদানম্||১-২||

Adhikarana 2 (3-8) · Śloka 9

নব যেঽভিহিতা লেখ্যাঃ সামান্যস্তেষ্বযং বিধিঃ | স্নিগ্ধবান্তবিরিক্তস্য নিবাতাতপসদ্মনি ||৩|| (আপ্তৈর্দৃঢং গৃহীতস্য বেশ্মন্যুত্তানশাযিনঃ) | সুখোদকপ্রতপ্তেন বাসসা সুসমাহিতঃ | স্বেদযেদ্বর্ত্ম নির্ভুজ্য বামাঙ্গুষ্ঠাঙ্গুলিস্থিতম্ ||৪|| অঙ্গুল্যঙ্গুষ্ঠকাভ্যাং তু নি র্ভুগ্নং বর্ত্ম যত্নতঃ | প্লোতান্তরাভ্যাং ন যথা চলতি স্রংসতেঽপি বা ||৫|| ততঃ প্রমৃজ্য প্লোতেন বর্ত্ম শস্ত্রপদাঙ্কিতম্ | লিখেচ্ছস্ত্রেণ পত্রৈর্বা, ততো রক্তে স্থিতে পুনঃ ||৬|| স্বিন্নং মনোহ্বাকাসীসব্যোষার্দ্রাঞ্জনসৈন্ধবৈঃ | শ্লক্ষ্ণপিষ্টৈঃ সমাক্ষীকৈঃ প্রতিসার্যোষ্ণবারিণা ||৭|| প্রক্ষাল্য হবিষা সিক্তং ব্রণবত্ সমুপাচরেত্ | স্বেদাবপীডপ্রভৃতীংস্ত্র্যহাদূর্ধ্বং প্রযোজযেত্ ||৮|| ব্যাসতস্তে সমুদ্দিষ্টং বিধানং লেখ্যকর্মণি |৯|

তান্ সর্বান্ সঙ্খ্যযাঽভিধায সঙ্ক্ষেপার্থং তেষ্বভিন্নবিধিমুপদিশন্নাহ- নবেত্যাদি| তমেব সামান্যবিধিমাহ- স্নিগ্ধেত্যাদি|- স্নিগ্ধবান্তবিরিক্তস্যেত্যত্রানুক্তোঽপি স্নেহানন্তরং স্বেদঃ কার্যঃ| সুসমাহিত ইত্যনেন যথা দৃশোঃ পীডা ন স্যাত্তথা স্বেদযেদিতী দ্যোত্যতে| নির্ভুজ্য পরিবর্ত্য, উত্তানীকৃত্যেত্যর্থঃ| নির্ভুগ্নম্ উত্তানীকৃতম্| প্লোতান্তরাভ্যাং বস্ত্রবেষ্টিতাভ্যামঙ্গুল্যঙ্গুষ্ঠাভ্যাং যথা ন চলতি ন কম্পতে, ন বা স্রংসতে নাধঃ পততি, তথা বর্ত্ম নির্ভুজ্যেত্যর্থঃ| শস্ত্রপদাঙ্কিতমিতি প্রচ্ছযিতব্যে প্রচ্ছিতং, ভেদযিতব্যে চ ভিন্নং, ছেদনীযে চ ছিন্নমিত্যর্থঃ| বাতকফব্যাধিকঠিনং দারুণং বর্ত্ম শস্ত্রেণ লিখেত্, পিত্তরক্তগদক্রান্তং মৃদুবর্ত্ম পুনঃ শেফালিকাদীনাং পত্রৈর্লিখেত্| পশ্চাত্কর্মাহ- তত ইত্যাদি| স্বিন্নং স্বেদিতম্| মনোহ্বা মনঃশিলা| আর্দ্রাঞ্জনং রসাঞ্জনম্| মাক্ষীকং সুবর্ণমাক্ষীকম্| প্রতিসার্য অবঘৃষ্য| হবিষা ঘৃতেন| ব্রণবত্ সদ্যোব্রণবত্ সপ্তাহং যাবত্, তদূর্ধ্বং শারীরব্রণবত্; তচ্চ পর্ণবন্ধাদিনা ক্রমেণ| স্বেদাবপীডেত্যাদি| ত্র্যহাদূর্ধ্বং পুনর্ব্রণবদেব স্বেদাপীডাপ্রভৃতীন্ প্রযোজযেদিতি তাত্পর্যার্থঃ| স্বেদাবপীডাদিকং সমাসেনাভিধায বিস্তরেণাতিদিশন্নাহা- ব্যাসত ইত্যাদি| বিধানং স্বেদাবপীডাদিকম্| লেখ্যকর্মণীতি সকললেখনার্হগদকর্মণীত্যর্ত্থঃ||৩-৮||-

Adhikarana 3 (9) · Śloka 10

অসৃগাস্রাবরহিতং কণ্ডূশোফবিবর্জিতম্ ||৯|| সমং নখনিভং বর্ত্ম লিখিতং সম্যগিষ্যতে |১০|

ইদানীং সম্যগ্লিখিতস্য বর্ত্মনো লক্ষণমাহ- অসৃগাস্রাবরহিতমিত্যাদি| সমং নিম্নোন্নতত্বরহিতম্| নখনিভং নখস্যেব নিভা যস্য তত্তথা| তদেব ব্রণবদুপচরণীযম্||৯||-

Adhikarana 4 (10-12) · Śloka 12

রক্তমক্ষি স্রবেত্ স্কন্নং ক্ষতাচ্ছস্ত্রকৃতাদ্ধ্রুবম্ ||১০|| রাগশোফপরিস্রাবাস্তিমিরং ব্যাধ্যনির্জযঃ | বর্ত্ম শ্যাবং গুরু স্তব্ধং কণ্ডূহর্ষোপদেহবত্ ||১১|| নেত্রপাকমুদীর্ণং বা কুর্বীতাপ্রতিকারিণঃ | এতদ্দুর্লিখিতং জ্ঞেযং স্নেহযিত্বা পুনার্লিখেত্ ||১২||

দুর্লিখিতস্য বর্ত্মনো লক্ষণমাহ- রক্তমিত্যাদি| স্কন্নং স্ত্যানম্| ব্যাধ্যনির্জয ইতি লেখনসাধ্যস্য ব্যাধেরনুপশমঃ| অপ্রতিকারিণ ইতি তস্য প্রতিক্রিযামকুর্বত ইত্যর্থঃ| তত্র চিকিত্সামাহ- স্নেহত্বেত্যাদি| কেচিত্ ‘স্বেদযিত্বা’ ইতি পঠন্তি||১০-১২||

Adhikarana 5 (13) · Śloka 14

ব্যাবর্ততে যদা বর্ত্ম পক্ষ্ম চাপি বিমুহ্যতি | স্যাত্ সরুক্ স্রাববহুলং তদতিস্রাবিতং বিদুঃ ||১৩|| স্নেহস্বেদাদিরিষ্টঃ স্যাত্ ক্রমস্তত্রানিলাপহঃ |১৪|

অতিলিখিতবর্ত্মনো লক্ষণমাহ- ব্যাবর্তত ইত্যাদি| তচ্চিকিত্সিতমাহ- স্নেহস্বেদাদিরিত্যাদি| অনিলাপহঃ ক্রমোঽন্যোঽপি পরিষেকাদির্বাহ্য আভ্যন্তরো বাঽঽহারাদিকঃ| অনিলাপহেন বাযুং জিত্বা পশ্চাদ্ব্রণবদুপচরণীযম্||১৩||-

Adhikarana 6 (14) · Śloka 15

বর্ত্মাববন্ধং ক্লিষ্টং চ বহলং যচ্চ কীর্তিতম্ ||১৪|| পোথকীশ্চাপ্যবলিখেত্ প্রচ্ছযিত্বাঽগ্রতঃ শনৈঃ |১৫|

ইদানীং রোগবিশেষে ক্বচিদেব প্রচ্ছন্নেন রক্তহরণমৃদুকরণপূর্বকং লেখনমতিদিশন্নাহ- বর্ত্মেত্যাদি| অবলিখেত্ শস্ত্রেণ, ন তু পত্রাদিভিঃ||১৪||-

Adhikarana 7 (15) · Śloka 15

সমং লিখেত্তু মেধাবী শ্যাবকর্দমবর্ত্মনী ||১৫||

ক্বচিত্ পুনর্লেখনমাত্রমেব কর্তব্যং ন পুনশ্ছেদভেদপ্রচ্ছন্নানীতি দর্শযন্নাহ- সমমিত্যাদি| সমম্ এককালমিত্যর্থঃ; অন্যে তু নাত্যবগাঢং নাত্যুত্তানমিতি সমমাহুঃ||১৫||

Adhikarana 8 (16) · Śloka 16

কুম্ভীকিনীং শর্করাং চ তথৈবোত্সঙ্গিনীমপি | কল্পযিত্বা তু শস্ত্রেণ লিখেত্ পশ্চাদতন্দ্রিতঃ ||১৬||

কুত্রচিচ্ছেদপূর্বকং লেখনমাহ- কুম্ভীকিনীমিত্যাদি| কল্পযিত্বা ছিত্ত্বেত্যর্থঃ| অতন্দ্রিতঃ অনলসঃ||১৬||

Adhikarana 9 (17) · Śloka 17

ভবেযুর্বর্ত্মসু চ যাঃ পিডকাঃ কঠিনা ভৃশম্ | হ্রস্বাস্তাম্রাশ্চ তাঃ পক্বা ভিন্দ্যাদ্ভিন্না লিখেদপি ||১৭||

কস্মিংশ্চিদ্ভেদপূর্বকং লেখনমাহ- ভবেযুরিত্যাদি||১৭||

Adhikarana 10 (18) · Śloka 18

তরুণীশ্চাল্পসংরম্ভা পিডকা বাহ্যবর্ত্মজাঃ | বিদিত্বৈতাঃ প্রশমযেত্ স্বেদালেপনশোধনৈঃ ||১৮||

কুত্রাপি বর্ত্মরোগে ন পূর্বং ছেদভেদপ্রচ্ছন্নানি, ন চোত্তরকালং লেখনমিতি দর্শযন্নাহ- তরুণীশ্চাল্পেত্যাদি||১৮||

Adhikarana puShpikA · Śloka 13

ইতি সুশুতসংহিতাযামুত্তরতন্ত্রান্তর্গতে শালাক্যতন্ত্রে লেখ্যরোগপ্রতিষেধো নাম ত্রযোদশোঽধ্যাযঃ ||১৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে ত্রযোদশোঽধ্যাযঃ||১৩||