46. mūrcchāpratiṣēdhādhyāyaḥ

Adhikarana 1 (1-2) · Śloka 2

অথাতো মূর্চ্ছাপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি||১-২||

Adhikarana 2 (3-5) · Śloka 5

ক্ষীণস্য বহুদোষস্য বিরুদ্ধাহারসেবিনঃ | বেগাঘাতাদভীঘাতাদ্ধীনসত্ত্বস্য বা পুনঃ ||৩|| করণাযতনেষূগ্রা বাহ্যেষ্বাভ্যন্তরেষু চ | নিবিশন্তে যদা দোষাস্তদা মূর্চ্ছন্তি মানবাঃ ||৪|| হৃত্পীডা জৃম্ভণং গ্লানিঃ সঞ্জ্ঞানাশো বলস্য চ | সর্বাসাং পূর্বরূপাণি, যথাস্বং তা বিভাবযেত্ ||৫||

ইদানীং দোষজমূর্চ্ছাযা হেতুসম্প্রাপ্তী আহ- ক্ষীণস্যেত্যাদি| এবম্ভূতস্য পুরুষস্য বেগাঘাতাদিভির্হেতুভিরুগ্রা দোষা যদা বাহ্যাভ্যন্তরেষু করণাযতনেষু নিবিশন্তে তদা মানবা মূর্চ্ছন্তীতি পিণ্ডার্থঃ| হীনসত্ত্বস্য অল্পসত্ত্বস্য| করণাযতনেষু বুদ্ধীন্দ্রিযকর্মেন্দ্রিযমনোবুদ্ধ্যহঙ্কারস্থানেষু| উগ্রা অতিপ্রবৃদ্ধাঃ প্রসৃতাশ্চ| বাহ্যেষ্বাভ্যন্তরেষু চেতি বাহ্যকরণাযতনানি কর্মেন্দ্রিযাণি, আভ্যন্তরকরণাযতনানি মনোবুদ্ধ্যহঙ্কারস্থানানি| আভ্যন্তরকরণাযতনস্য হৃদযস্যৈকত্বাত্ কথং বহুবচনং? সত্যং, অন্তঃসঞ্জ্ঞাবহনাডীনামপ্যন্তঃকরণাযতনত্বেনাভিমতত্বাত্| নিবিশন্তে অবতিষ্ঠন্তে| অপরে করণাযতনশব্দেনৈব করণানি কথযন্তি, উপচারাত্| তেন বাহ্যাভ্যন্তরেষু করণেষু যদা দোষা নিবিশন্তে তদা মানবা মূর্চ্ছন্তীত্যর্থঃ| অন্যে ত্বন্যথা ব্যাখ্যানযন্তি- করণাযতনেষু যদা দোষা নিবিশন্তে তথা বাহ্যাভ্যনরেষু করণেষু নিবিশন্তে তদা মানবা মূর্চ্ছন্তীতি||৩-৫||

Adhikarana 3 (6) · Śloka 7

সঞ্জ্ঞাবহাসু নাডীষু পিহিতাস্বনিলাদিভিঃ | তমোঽভ্যুপৈতি সহসা সুখদুঃখব্যপোহকৃত্ ||৬|| সুখদুঃখব্যপোহাচ্চ নরঃ পততি কাষ্ঠবত্ | মোহো মূর্চ্ছেতি তাং প্রাহুঃ... |৭|

যযা প্রক্রিযযা মানবো মূর্চ্ছতি তামাহ- সঞ্জ্ঞেত্যাদি| সুখদুঃখব্যপোহকৃত্ সুখদুঃখনাশকৃত্, সুখদুঃখনাশশ্চ সঞ্জ্ঞানাশাত্; সঞ্জ্ঞানাশস্তু সঞ্জ্ঞাবহনাডীপিধানাত্| অন্যে সুখদুঃখে সত্ত্বরজসী, তযোর্ব্যপোহো নাশস্তং করোতীতি ব্যাখ্যানযন্তি||৬||-

Adhikarana 4 (7-8) · Śloka 8

... ষড্বিধা সা প্রকীর্তিতা ||৭|| বাতাদিভিঃ শোণিতেন মদ্যেন চ বিষেণ চ | ষট্স্বপ্যেতাসু পিত্তং হি প্রভুত্বেনাবতিষ্ঠতে ||৮||

সঙ্খ্যামাহ- ষড্বিধেত্যাদি| যে তন্ত্রান্তরীযা বাতাদিভিঃ শোণিতেন চ চতুর্বিধাং মূর্চ্ছামিচ্ছন্তি তেষামযমাশযঃ- মদ্যবিষযোস্ত্বনন্তরোক্তপাণ্ডুরোগবত্ পৃথগুপাদানং, তেন স্বমতে ষড্বিধৈব মূর্চ্ছা| সর্বাস্বপি মুর্চ্ছাসু পিত্তং কর্তৃত্বেন প্রধানমিত্যাহ- ষট্স্বিত্যাদি| প্রভুত্বেনাবতিষ্ঠতে ইতরদোষাবাক্রম্য বর্তত ইত্যর্থঃ| বেগাঘাতাদিঃ হেতুঃ; করণাযতনেষ্বিত্যাদিঃ সম্প্রপ্তিঃ||৭-৮||

Adhikarana 5 (9) · Śloka 9

অপস্মারোক্তলিঙ্গানি তাসামুক্তানি তত্ত্বতঃ |৯|

বাতাদিজানাং তিসৃণাং লিঙ্গমপস্মারোক্তলিঙ্গাতিদেশেনাহ- অপস্মারেত্যাদি| অপস্মারোক্তলিঙ্গানি যথাস্বং তাসাং জানীযাদিত্যর্থঃ| কেচিত্ ‘অপস্মারোক্তলিঙ্গানি’ ইত্যত্র ‘অপস্মারেণ লিঙ্গানি’ ইতি পঠিত্বা ব্যাখ্যানযন্তি- দন্তনখখাদনাক্ষিবৈকৃতলালাস্রাবাদিরহিতান্যপস্মারেণ তুল্যানি লক্ষণানি যথাস্বমুপলক্ষযেদিত্যর্থঃ| তথা চ তন্ত্রান্তরং,- “সর্বাকৃতিঃ সন্নিপাতাদপস্মার ইবাগতঃ| স জন্তুং পাতযত্যাশু বিনা বীভত্সচেষ্টিতৈঃ”- ইতি|৯|-

Adhikarana 6 (9) · Śloka 10

পৃথিব্যম্ভস্তমোরূপং রক্তগন্ধশ্চ তন্মযঃ ||৯|| তস্মাদ্রক্তস্য গন্ধেন মূর্চ্ছন্তি ভুবি মানবাঃ |১০|

বাতজাদীনাং তিসৃণাং লিঙ্গান্যতিদিশ্য রক্তজাযাঃ সম্প্রাপ্তিং লক্ষণং চাহ- পৃথিবীত্যাদি| পৃথ্বী অম্ভশ্চ দ্বযমপি তমোরূপং তমোবহুলং; তথা চোক্তং পুরা- ‘তমোবহুলা পৃথিবী, সত্ত্বতমোবহুলা আপঃ’ ইতি, রক্তগন্ধশ্চ তন্ময ইতি পৃথিব্যম্ভঃসমুদ্ভবঃ; পাঞ্চভৌতিকেঽপি রক্তে পৃথিব্যম্ভসোঃ প্রাধান্যাত্| মূর্চ্ছন্তি ভুবি মানবা ইত্যেতেন গন্ধস্য তমোবহুলত্বমুক্তম্| ননু, গন্ধঃ পার্থিবস্তত্কথং পৃথিব্যম্ভঃসমুদ্ভব ইত্যুচ্যতে? সত্যং, পরস্পরোপকার্যত্বাত্ | মূর্চ্ছন্তি ভুবি মানবা ইতি যে মানবা পৃথিবীগুণবহুলাস্তামসা ইত্যর্থঃ| ননু, যদি রক্তগন্ধো মূর্চ্ছাজনকঃ, তর্হি কিমিতি সর্বেষামেব ন মূর্চ্ছামুত্পাদযতি? সত্যং, যে হীনসত্ত্বাস্তেষাং মূর্চ্ছামুত্পাদযতি ন সর্বেষাম্| অপরে ‘রক্তগন্ধশ্চ তন্ময’ ইত্যন্যথা ব্যাচক্ষতে, তদ্যথা- তন্মযঃ পৃথিব্যম্ভোমযঃ; অত্র যথাসম্ভবং ব্যাখ্যানং; তেন রক্তমম্ভোমযং, দ্রবত্বাত্; গন্ধশ্চ পৃথিবীমযঃ, পার্থিবত্বাদ্গন্ধস্য; তেন তমোভূযিষ্ঠাযাঃ পৃথিব্যাঃ সকাশাদ্গন্ধস্য জাতত্বাদ্গন্ধোঽপি তমোবহুল এব, কারণানুরূপত্বাত্ কার্যস্য; শেষং সমম্| অন্যে তু ‘পৃথিব্যম্ভস্তমোরূপং রক্তং গন্ধশ্চ তন্ময’ ইতি পঠন্তি; পৃথিবী চাম্ভশ্চ পৃথিব্যম্ভসী, তযোঃ সম্বন্ধি যত্তমঃ, তদ্রূপং তদ্বহুলং তল্লক্ষণং বা রক্তং, গন্ধশ্চ তন্ময ইতি তমোময ইত্যর্থঃ; তমোবহুলপৃথিব্যুত্পন্নত্বাদ্গন্ধস্য| এতেন তমোভূযিষ্ঠপৃথিব্যম্ভৌত্পন্নরক্তস্য ধাতুজনিতত্বাদ্গন্ধস্য স্বযং তমোভূযিষ্ঠত্বাচ্চ রক্তগন্ধো মানবৈরাঘ্রাতঃ সন্ হৃদ্যবস্থিতং তমো বর্ধযন্ মূর্চ্ছামাপাদযতি, ‘সর্বভাবানাং সামান্যং বৃদ্ধিকারণম্’ ইত্যুক্তত্বাত্| ননু, তমোবহুলত্বাদ্রক্তং মূর্চ্ছাজনকং তর্হি তমোভূযিষ্ঠে এতে পৃথিব্যম্ভসী কুতো মূর্চ্ছাং নোত্পাদযতঃ? সত্যং, পৃথিব্যম্ভসী সাত্ম্যতযা স্বরূপতশ্চ মূর্চ্ছাং নোত্পাদযতঃ| অন্যে তু পঠন্তি- পৃথিব্যম্ভস্তমোরূপং রক্তগন্ধেন তু ত্রযম্’ ইতি; ব্যাখ্যানযন্তি চ- পৃথিব্যম্ভস্তমসাং রূপং স্বলক্ষণং যস্য রক্তস্য তত্পৃথিব্যম্ভস্তমোরূপং; রক্তগন্ধেন কৃত্বা তু পুনস্ত্রযং সত্ত্বরজস্তমসাং গুণানাং ত্রিতযং ‘রক্তে জ্ঞাযতে’ ইতি বাক্যশেষঃ| ননু, গন্ধেন কৃত্বা কথং গুণানাং ত্রিতযং রক্তে জ্ঞাযতে ইতি চেত্? সত্যং, রক্তে গন্ধো বিস্রো বর্ততে, গন্ধশ্চ গুণবিশেষঃ, উক্তং চ,- “তেষাং বিশেষাঃ শব্দস্পর্শরূপরসগন্ধাঃ”- ইতি, তে চ বিশেষাস্ত্রিগুণাঃ; উক্তং চ,- “সর্ব এবৈতে বিশেষাঃ সত্ত্বরজস্তমোমযা ভবন্তি” ইতি| কিন্ত্বত্র তমোগুণস্যাধিক্যং জ্ঞেযম্| এতেনৈতদুক্তং ভবতি- পৃথিব্যম্ভস্তমঃস্বলক্ষণস্য রক্তস্য গন্ধেন ত্রিগুণেন তমোগুণবিশিষ্টেন মানবা মূর্চ্ছন্তি||৯||-

Adhikarana 7 (10) · Śloka 10

দ্রব্যস্বভাব ইত্যেকে দৃষ্ট্বা যদভিমুহ্যতি ||১০||

স্বমতং প্রদর্শ্য পরমতমাহ- দ্রব্যস্বভাব ইত্যেকে ইত্যাদি||১০||

Adhikarana 8 (11) · Śloka 11

গুণাস্তীব্রতরত্বেন স্থিতাস্তু বিষমদ্যযোঃ | ত এব তস্মাজ্জাযেত মোহস্তাভ্যাং যথেরিতঃ ||১১||

বিষমদ্যোত্থে আহ- গুণা ইত্যাদি| ত এব গুণা রূক্ষাদযঃ| মোহো মূর্চ্ছা| তাভ্যাং বিষমদ্যাভ্যাম্| যথেরিতো যথাকথিত ইত্যর্থঃ| অথ বিষমদ্যবিকারযোঃ সামান্যেনৈব মূর্চ্ছাপ্রণযনাত্ কথমত্র বিশিষ্টমভিধানম্? উচ্যতে- তত্র ইতরলক্ষণৈঃ সহ তদ্গ্রহণার্থম্| ননু, যদি বিষমদ্যযোস্তুল্যা গুণাঃ স্থিতাঃ, তত্ কিমিতি বিষবন্মদ্যং মারণাত্মকং ন স্যাত্? সত্যং, মদ্যে তেষাং গুণানামনতিতীব্রত্বেনাবস্থানাত্| যদ্যেবং তর্হি ‘গুণাস্তীব্রতরত্বেন স্থিতাস্তু বিষমদ্যযোঃ’ ইতি কথং ন ব্যাহন্যতে? সত্যং, তীব্রতরশব্দাদগ্রে তীব্রশব্দো মধ্যে লুপ্তো দ্রষ্টব্যঃ| তেন বিষে তীব্রতরত্বেন তে গুণাঃ স্থিতাঃ, মদ্যে তীব্রত্বেনেত্যর্থঃ| তথা চ তন্ত্রান্তরম্,- “বিষস্য যে গুণা দৃষ্টাঃ সন্নিপাতপ্রকোপণাঃ| ত এব মদ্যে দৃশ্যন্তে বিষে তু বলবত্তরাঃ|| ত এব তস্মাত্তাভ্যাং তু মোহৌ স্যাতাং যথেরিতৌ” (চ. চি. ২৪)- ইতি||১১||

Adhikarana 9 (12) · Śloka 12

স্তব্ধাঙ্গদৃষ্টিস্ত্বসৃজা গূঢোচ্ছ্বাসশ্চ মূর্চ্ছিতঃ |১২|

রুধিরজমূর্চ্ছালক্ষণমাহ- স্তব্ধাঙ্গদৃষ্টিস্ত্বসৃজেত্যাদি| স্তব্ধশব্দোঽঙ্গদৃষ্টিভ্যাং সম্বধ্যতে| গূঢোচ্ছ্বাসঃ অস্পষ্টশ্বাসঃ|১২|-

Adhikarana 10 (12) · Śloka 12

মদ্যেন বিলপংশ্ছেতে নষ্টবিভ্রান্তমানসঃ | গাত্রাণি বিক্ষিপন্ ভূমৌ জরাং যাবন্ন যাতি তত্ ||১২||

মদ্যজমূর্চ্ছালক্ষণমাহ- মদ্যেনেত্যাদি| বিলপন্নিতি বিলাপং কুর্বন্| নষ্টবিভ্রান্তমানস ইতি নষ্টমানসঃ অপস্মরণঃ বিভ্রান্তমানসো বিক্ষিপ্তচেতাঃ| জরাং পাকম্||১২||

Adhikarana 11 (13) · Śloka 13

বেপথুস্বপ্নতৃষ্ণাঃ স্যুঃ স্তম্ভশ্চ বিষমূর্চ্ছিতে | বেদিতব্যং তীব্রতরং যথাস্বং বিষলক্ষণৈঃ ||১৩||

বিষজমূর্চ্ছালক্ষণমাহ- বেপথুস্বপ্নতৃষ্ণাঃ স্যুরিত্যাদি| বেপথুঃ কম্পঃ| স্তম্ভঃ স্তব্ধতা| বেদিতব্যমিত্যাদি| মূলাদিকন্দান্তস্য বিষস্য যথাস্বং যানি লক্ষণানি তৈঃ কৃত্বা বিষমূর্চ্ছিতস্য পুংসো যথাস্বং যথাত্মীযং বিষং জ্ঞেযম্||১৩||

Adhikarana 12 (14) · Śloka 14

সেকাবগাহৌ মণযঃ সহারাঃ শীতাঃ প্রদেহা ব্যজনানিলাশ্চ | শীতানি পানানি চ গন্ধবন্তি সর্বাসু মূর্চ্ছাস্বনিবারিতানি ||১৪||

অতঃ পরং চিকিত্সিতমাহ- সেকাবগাহাবিত্যাদি| মণযঃ সহারা ইতি মণযো মুক্তাস্ফটিকপ্রভৃতযঃ| তে চ সহারা হারারোপিতা হিতা ইত্যর্থঃ| ব্যজনানিলা ব্যজনানাং বাযবঃ| শীতাঃ প্রদেহাঃ চন্দনোত্পলপ্রভৃতিকৃতাঃ প্রলেপাঃ| শীতানি পানানি চ গন্ধবন্তীতি যানি শীতানি গন্ধবন্তি চ পানানি তানীত্যর্থঃ| অনিবারিতানি প্রশস্তানি||১৪||

Adhikarana 13 (15) · Śloka 15

সিতাপ্রিযালেক্ষুরসপ্লুতানি দ্রাক্ষামধূকস্বরসান্বিতানি | খর্জূরকাশ্মর্যরসৈঃ শৃতানি পানানি সর্পীংষি চ জীবনানি ||১৫||

তান্যেব শীতানি গন্ধবন্তি চ পানান্যাহ- সিতাপ্রিযালেক্ষুরসপ্লুতানীত্যাদি| খর্জূরকাশ্মর্যরসৈঃ শৃতানি সিতাপ্রিযালাদিযুতানি পানানি পানকানি সর্বাস্বনিবারিতানি| ন কেবলং পানান্যেবানিবারিতানি সর্পীংষি চ জীবনানীতি কাকোল্যাদিসিদ্ধানীত্যর্থঃ| কেচিত্ পানানীত্যত্র সিদ্ধানীতি পঠন্তি, তে চ ঘৃতবিশেষণং মন্যন্তে||১৫||

Adhikarana 14 (16) · Śloka 16

সিদ্ধানি বর্গে মধুরে পযাংসি সদাডিমা জাঙ্গলজা রসাশ্চ | তথা যবা লোহিতশালযশ্চ মূর্চ্ছাসু পথ্যাশ্চ সদা সতীনাঃ ||১৬||

কিমেতান্যেব সর্বমূর্চ্ছাসু হিতান্যুতান্যান্যপীত্যাহ- সিদ্ধানীত্যাদি| মধুরে বর্গে কাকোল্যাদৌ| পযাংসি সর্বাণ্যপি দুগ্ধানি, সর্বেষাং ক্ষীরাণাং মূর্চ্ছাহরত্বাত্| সদাডিমা দাডিমেন সংস্কৃতাঃ, জাঙ্গলজা রসাঃ| মূর্চ্ছাসু যে ভোজনে হিতাস্তানাহ- তথেত্যাদি| পথ্যা হিতাঃ, ‘ভোজনে’ ইতি শেষঃ| সতীনো বর্তুলকলাযঃ||১৬||

Adhikarana 15 (17) · Śloka 17

ভুজঙ্গপুষ্পং মরিচান্যুশীরং কোলস্য মধ্যং চ পিবেত্ সমানি | শীতেন তোযেন বিসং মৃণালং ক্ষৌদ্রেণ কৃষ্ণাং সিতযা চ পথ্যাম্ ||১৭||

ভুজঙ্গপুষ্পমিত্যাদি| ভুজঙ্গপুষ্পং নাগকেশরম্| কোলস্য মধ্যং বদরমজ্জা| এতানি ভুজঙ্গপুষ্পাদীনি সমানি তুল্যানি শীততোযেন সহ পিবেত্| ন কেবলমেতান্যেব শীততোযেন সহ পিবেত্ বিসং মৃণালং চাপি শীততোযেন পিবেত্; বিসং বিসেন্দ্রকং, মৃণালং পদ্মনালম্| ক্ষৌদ্রেণ কৃষ্ণামিতি মধুনা সহ পিপ্পলীং পিবেদিত্যর্থঃ; অন্যে লিহেদিতি মন্যন্তে| সিতযা চ পথ্যামিতি হরীতকীং শর্করযা সহ পিবেদিত্যর্থঃ||১৭||

Adhikarana 16 (18) · Śloka 18

কুর্যাচ্চ নাসাবদনাবরোধং ক্ষীরং পিবেদ্বাঽপ্যথ মানুষীণাম্ | মূর্চ্ছাং প্রসক্তাং তু শিরোবিরেকৈর্জযেদভীক্ষ্ণং বমনৈশ্চ তীক্ষ্ণৈঃ ||১৮||

অতঃ পরং কিং কুর্যাদিত্যাহ- কুর্যাদিত্যাদি| নাসাবক্ত্রযোরবরোধেন ব্যাঘুট্যান্তঃ প্রবিষ্টো মারুতো রুদ্ধানি স্রোতাংসি বিবৃণ্বন্ মূর্চ্ছামপহন্তি; নারীক্ষীরং চাতিশীতলত্বাত্| মূর্চ্ছামিত্যাদি| প্রসক্তাং ভূযো ভূযোঽনুসঙ্গিনীম্| শিরোবিরেকৈঃ নস্যৈঃ| অভীক্ষ্ণং পুনঃ পুনঃ| যদ্যপি সর্বমূর্চ্ছাযাং পিত্তং প্রধানং, তীক্ষ্ণে নস্যবমনে ন যুক্তেঽস্য, তথাঽপি সঞ্জ্ঞাবহস্রোতোনিরোধশান্তিকরত্বাদ্ ব্যাধিপ্রত্যনীকত্বাচ্চ হিতে এব| কেচিত্ ‘তীক্ষ্ণৈঃ’ ইত্যত্র ‘পথ্যৈঃ’ ইতি পঠন্তি; তত্র পিত্তশ্লেষ্মহরৈরিত্যর্থঃ||১৮||

Adhikarana 17 (19) · Śloka 20

হরীতকীক্বাথশৃতং ঘৃতং বা ধাত্রীফলানাং স্বরসৈঃ কৃতং বা | দ্রাক্ষাসিতাদাডিমলাজবন্তি শীতানি নীলোত্পলপদ্মবন্তি ||১৯|| পিবেত্ কষাযাণি চ গন্ধবন্তি পিত্তজ্বরং যানি শমং নযন্তি |২০|

হরীতকীক্বাথশৃতমিত্যাদি| হরীতকীক্বাথেন শৃতং সিদ্ধং হরীতকীক্বাথশৃতম্| ধাত্রীফলানাম্ আমলকফলানাং স্বরসৈঃ| দ্রাক্ষাসিতেত্যাদি| যানি কষাযাণি শ্রীপর্ণ্যাদিকৃতানি পিত্তজ্বরং শমং নযন্তি তানি দ্রাক্ষাসিতাদাডিমলাজবন্তি তত্প্রধানানি পিবেত্| নীলোত্পলপদ্মবন্তি নীলোত্পলপদ্মপ্রধানানি| গন্ধবন্তি গন্ধদ্রব্যাঢ্যানি| নীলোত্পলপদ্মবন্তীত্যাদিকং পিত্তজ্বরহরকষাযবিশেষণম্||১৯||-

Adhikarana 18 (20) · Śloka 21

প্রভূতদোষস্তমসোঽতিরেকাত্ সম্মূর্চ্ছিতো নৈব বিবুধ্যতে যঃ ||২০|| সন্ন্যস্তসঞ্জ্ঞো ভৃশদুশ্চিকিত্স্যো জ্ঞেযস্তদা বুদ্ধিমতা মনুষ্যঃ |২১|

ইদানীং মূর্চ্ছাযা অবস্থাযাং সঞ্জ্ঞান্তরমাহ- প্রভূতদোষ ইত্যাদি| যঃ প্রভূতদোষো মনুষ্যঃ সম্মূর্চ্ছিতঃ সন্ তমসোঽতিরেকান্নাববুধ্যতে নাববোধং প্রাপ্নোতি স দুশ্চিকিত্স্যো মতিমতা বৈদ্যেন সন্ন্যস্তসঞ্জ্ঞো জ্ঞেয ইতি পিণ্ডার্থঃ| সন্ন্যস্তসঞ্জ্ঞ ইতি মৃত্যুমুখে বর্তমানত্বাত্ সন্ন্যস্ত ইব সন্ন্যস্তঃ||২০||-

Adhikarana 19 (21) · Śloka 22

যথাঽঽমলোষ্টং সলিলে নিষিক্তং সমুদ্ধরেদাশ্ববিলীনমেব ||২১|| তদ্বচ্চিকিত্সেত্ত্বরযা ভিষক্তমস্বেদনং মৃত্যুবশং প্রযাতম্ |২২|

ইদানীং সন্ন্যস্তস্য শীঘ্রং প্রতীকারায দৃষ্টান্তমাহ- যথাঽঽমলোষ্টমিত্যাদি| আমলোষ্টম্ আমমৃত্পিণ্ডম্| তং সন্ন্যস্তসঞ্জ্ঞম্| অস্বেদনং প্রস্বেদরহিতম্||২১||-

Adhikarana 20 (22) · Śloka 23

তীক্ষ্ণাঞ্জনাভ্যঞ্জনধূমযোগৈস্তথা নখাভ্যন্তরতোত্রপাতৈঃ ||২২|| বাদিত্রগীতানুনযৈরপূর্বৈর্বিঘট্টনৈর্গুপ্তফলাবঘর্ষৈঃ |২৩|

কৈশ্চিকিত্সেদিত্যাহ- তীক্ষ্ণাঞ্জনাভ্যঞ্জনেত্যাদি| তীক্ষ্ণশব্দোঽঞ্জনাদিভিঃ প্রত্যেকং সম্বধ্যতে| তোত্রাণি সূচিপ্রকারাণি| বাদিত্রং বীণাদি| অনুনযঃ সান্ত্বনাপূর্বকং বচনাদি| বিঘট্টনৈঃ বিবিধপ্রকারেণ চালনৈঃ| গুপ্তফলাবঘর্ষৈঃ কপিকচ্ছূফলাবঘর্ষণৈঃ| অন্যে গুপ্তফলং বৃষণং, তস্যাবঘর্ষণৈঃ পীডনৈরিত্যর্থঃ| কেচিদ্বিঘট্টনৈরিত্যত্র ‘বিস্মাপনৈঃ’ ইতি পঠন্তি; তত্র আশ্চর্যকারকৈরিত্যর্থঃ| এতৈরুপচারৈঃ উপাচরেত্ আসঞ্জ্ঞাপ্রাপ্তেঃ||২২||-

Adhikarana 21 (23) · Śloka 23

আভিঃ ক্রিযাভিশ্চ ন লব্ধসঞ্জ্ঞঃ সানাহলালাশ্বসনশ্চ বর্জ্যঃ ||২৩||

আভিঃ ক্রিযাভিরিত্যাদি| আভিঃ ক্রিযাভিঃ অনন্তরোক্তাভিস্তীক্ষ্ণাঞ্জনাদিভিঃ| সানাহলালাশ্বসনশ্চ আনাহাদিযুক্তঃ; শ্বসনঃ শ্বাস ইত্যর্থঃ||২৩||

Adhikarana 22 (24) · Śloka 24

প্রবুদ্ধসঞ্জ্ঞং বমনানুলোম্যৈস্তীক্ষ্ণৈর্বিশুদ্ধং লঘুপথ্যভুক্তম্ | ফলত্রিকৈশ্চিত্রকনাগরাঢ্যৈস্তথাঽশ্মজাতাজ্জতুনঃ প্রযোগৈঃ | সশর্করৈর্মাসমুপক্রমেত বিশেষতো জীর্ণঘৃতং স পায্যঃ ||২৪||

তীক্ষ্ণাঞ্জনাদিভির্লব্ধসঞ্জ্ঞে সন্ন্যাসিনি পশ্চাত্কর্মাহ- প্রবুদ্ধেত্যাদি| তীক্ষ্ণাঞ্জনাদিভিঃ প্রবুদ্ধসঞ্জ্ঞং সন্ন্যাসিনং তীক্ষ্ণৈর্বমনানুলোম্যৈর্বমনবিরেচনৈর্বিশুদ্ধং, অন্নসংসর্জনক্রমেণ চ লঘুপথ্যভুক্তং, ত্রিফলাচিত্রকশুণ্ঠীভাবিতৈঃ সশর্করৈঃ শিলাজতুপ্রযোগৈঃ বজ্রকবটককল্পনযা কল্পিতৈর্মাসং যাবদুপক্রমেত, শেষদোষোপশমনার্থম্| জীর্ণং ঘৃতং দশাব্দিকং পায্যঃ পাযযিতব্যঃ||২৪||

Adhikarana 23 (25) · Śloka 25

যথাস্বং চ জ্বরঘ্নানি কষাযাণ্যুপযোজযেত্ | সর্বমূর্চ্ছাপরীতানাং বিষজাযাং বিষাপহম্ ||২৫||

যথাস্বং চ জ্বরঘ্নানীতি যথাস্বং যথাদোষং জ্বরেষু যানি কষাযাণ্যুক্তানি তানি তদ্দোষজমূর্চ্ছাস্বপি যোজ্যানি| বিষাপহমিতি কল্পস্থানোক্তং বিষমোহশমনং নস্যাঞ্জনাদিকম্||২৫||

Adhikarana puShpikA · Śloka 46

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রে মূর্চ্ছাপ্রতিষেধো নাম (অষ্টমোঽধ্যাযঃ, আদিতঃ) ষট্চত্বারিংশত্তমোঽধ্যাযঃ ||৪৬||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রে ষট্চত্বারিংশত্তমোঽধ্যাযঃ||৪৬||