58. mūtrāghātapratiṣēdhādhyāyaḥ

Adhikarana 1 (1-2) · Śloka 2

অথাতো মূত্রাঘাতপ্রতিষেধমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অরোচকপ্রতিষেধানন্তরং পারিশেষ্যান্মূত্রাঘাতপ্রতিষেধারম্ভঃ; পরিশেষত্বং চ মূত্রাঘাতমূত্রকৃচ্ছ্রযোরেকত্বেন বিবক্ষিতত্বাত্ কাযচিকিত্সাযাং চাপরস্যাধ্যাযস্যাভাবাত্| অথাত ইত্যাদি| মূত্রাঘাতো মূত্রাবরোধঃ, কেচিদাঘাতশব্দেন দুষ্টিমাহুঃ ন ত্ববরোধং, মূত্রশুক্রমূত্রসাদযোর্মূত্রাবরোধাসম্ভবাত্||১-২||

Adhikarana 2 (3-4) · Śloka 4

বাতকুণ্ডলিকাঽষ্ঠীলা বাতবস্তিস্তথৈব চ | মূত্রাতীতঃ সজঠরো মূত্রোত্সঙ্গঃ ক্ষযস্তথা ||৩|| মূত্রগ্রন্থির্মূত্রশুক্রমুষ্ণবাতস্তথৈব চ | মূত্রৌকসাদৌ দ্বৌ চাপি রোগা দ্বাদশ কীর্তিতাঃ ||৪||

ইদানীং সুখবোধার্থং মূত্রাঘাতান্নামভিঃ প্রাহ- বাতেত্যাদি| অষ্ঠীলেতি বাতাষ্ঠীলেত্যর্থঃ| যা নিদানস্থানে বাতাষ্ঠীলা ভণিতা সা ভিন্না, আধ্মানাদিলক্ষণরহিতত্বাত্ | সঙ্খ্যেযনির্দেশাদেবসঙ্খ্যাযাং সিদ্ধাযাং দ্বাদশেতি সঙ্খ্যাকরণং তন্ত্রান্তরোক্তাধিকসঙ্খ্যানিবারণার্থম্||৩-৪||

Adhikarana 3 (5-6) · Śloka 6

রৌক্ষ্যাদ্বেগবিঘাতাদ্বা বাযুরন্তরমাশ্রিতঃ | মূত্রং চরতি সঙ্গৃহ্য বিগুণঃ কুণ্ডলীকৃতঃ ||৫|| সৃজেদল্পাল্পমথবা সরুজস্কং শনৈঃ শনৈঃ | বাতকুণ্ডলিকাং তং তু ব্যাধিং বিদ্যাত্ সুদারুণম্ ||৬||

বাতকুণ্ডলিকাযা হেতুসম্প্রাপ্তিলক্ষণান্যাহ- রৌক্ষ্যাদিত্যাদি| অন্তরমাশ্রিত ইতি বস্তিমধ্যমাশ্রিত ইত্যর্থঃ| মূত্রং চরতি সঙ্গৃহ্যেতি মূত্রং গৃহীত্বা বাযুশ্চরতি ভ্রমতীত্যর্থঃ| কুণ্ডলীকৃত ইতি কুণ্ডলাকৃত্যা বর্তুলীভূতঃ| সৃজেত্ প্রবর্তযেত্| সরুজস্কং সবেদনং মূত্রম্| রৌক্ষ্যাদ্বেগবিঘাতাদিতি ব্যবহিতঃ সন্নিহিতশ্চ হেতুরুক্তঃ, বাযুরন্তরমাশ্রিত ইত্যাদিসম্প্রাপ্তিঃ, কুণ্ডলীকৃত ইত্যাদিলক্ষণম্| ‘মূত্রমল্পাল্পমথবা সরুজং সম্প্রবর্ততে’ ইতি কেচিত্ পঠন্তি| অপরে ‘সরুজং সম্প্রবর্তযেত্’ ইতি পঠন্তি| সর্বেষাং মূত্রাঘাতানাং বাযুরেব প্রাযশঃ কারণং বোদ্ধব্যম্||৫-৬||

Adhikarana 4 (7-8) · Śloka 8

শকৃন্মার্গস্য বস্তেশ্চ বাযুরন্তরমাশ্রিতঃ | অষ্ঠীলাবদ্ধনং গ্রন্থিং করোত্যচলমুন্নতম্ ||৭|| বিণ্মূত্রানিলসঙ্গশ্চ তত্রাধ্মানং চ জাযতে | বেদনা চ পরা বস্তৌ বাতাষ্ঠীলেতি তাং বিদুঃ ||৮||

অষ্ঠীলাযা হেতুসম্প্রাপ্তিলক্ষণান্যাহ- শকৃন্মার্গস্যেত্যাদি| শকৃন্মার্গো গুদঃ, বস্তিঃ মূত্রাধারঃ, বাযুরত্র অপানো গুদবস্তিস্থরোগকরত্বাত্, অন্তরং মধ্যম্| অষ্ঠীলা উত্তরাপথে দীর্ঘবর্তুলপাষাণবিশেষঃ, অন্যে চর্মকারাণাং লৌহীং ভাণ্ডীমাহুঃ| অচলম্ ঈষচ্চলম্| আধ্মানং বস্তৌ বোদ্ধব্যম্| অপানো বাযুরত্র হেতুঃ, শকৃন্মার্গস্যেত্যাদিঃ সম্প্রাপ্তিঃ, শেষং লক্ষণম্||৭-৮||

Adhikarana 5 (9-10) · Śloka 10

বেগং বিধারযেদ্যস্তু মূত্রস্যাকুশলো নরঃ | নিরুণদ্ধি মুখং তস্য বস্তের্বস্তিগতোঽনিলঃ ||৯|| মূত্রসঙ্গো ভবেত্তেন বস্তিকুক্ষিনিপীডিতঃ | বাতবস্তিঃ স বিজ্ঞেযো ব্যাধিঃ কৃচ্ছ্রপ্রসাধনঃ ||১০||

বাতবস্তের্হেতুসম্প্রাপ্তিলক্ষণান্যাহ- বেগমিত্যাদি| অকুশলো মূর্খঃ| তস্য মূর্খস্য| মূত্রসঙ্গো মূত্রস্যাপ্রবৃত্তিঃ| তেন ব্যাধিনা বস্তিকুক্ষিনিপীডিত ইতি বস্তিকুক্ষের্নিপীডনং বিদ্যতে যস্য(ত্র) স তথা; নিপীডিতং নিপীডনং বেদনেত্যর্থঃ| কৃচ্ছ্রপ্রসাধনঃ কষ্টসাধ্যঃ| বেগং বিধারযেদিতি হেতুঃ, নিরুণদ্ধি মুখং তস্য বস্তেরিতি সম্প্রাপ্তিঃ, শেষং লক্ষণম্||৯-১০||

Adhikarana 6 (11-12) · Śloka 12

বেগং সন্ধার্য মূত্রস্য যো ভূযঃ স্রষ্টুমিচ্ছতি | তস্য নাভ্যেতি যদি বা কথঞ্চিত্সম্প্রবর্ততে ||১১|| প্রবাহতো মন্দরুজমল্পমল্পং পুনঃ পুনঃ | মূত্রাতীতং তু তং বিদ্যান্মূত্রবেগবিঘাতজম্ ||১২||

মূত্রাতীতস্য হেতুং সম্প্রাপ্তিং লক্ষণং চাহ- বেগমিত্যাদি| বেগং প্রবৃত্ত্যুন্মুখত্বং, তং সন্ধার্য সম্যগ্ধৃত্বা, ভূযঃ পুনঃ, স্রষ্টুমিচ্ছতি মোক্তুং বাঞ্ছতি| নাভ্যেতি মূত্রং নাগচ্ছতীত্যর্থঃ| প্রবাহত ইতি নিকুহনাদিত্যর্থঃ| যদ্যপি বেগং সন্ধার্য মূত্রস্যেত্যনেনৈব মূত্রবিঘাতজত্বমস্য ব্যাধেঃ প্রাপ্তং, তথাঽপি পুনর্মূত্রবেগবিঘাতজমিতি করণং মূত্রবিঘাতোত্থবাতজত্বপ্রতিপাদনার্থম্| বেগং সন্ধার্যেত্যাদির্হেতুঃ, যো ভূযঃ স্রষ্টুমিচ্ছতীত্যাদিঃ সম্প্রাপ্তিঃ, শেষং লক্ষণম||১১-১২||

Adhikarana 7 (13-14) · Śloka 14

মূত্রস্য বিহতে বেগে তদুদাবর্তহেতুনা | অপানঃ কুপিতো বাযুরুদরং পূরযেদ্ভৃশম্ ||১৩|| নাভেরধস্তাদাধ্মানং জনযেত্তীব্রবেদনম্ | তং মূত্রজঠরং বিদ্যাদধঃস্রোতোনিরোধনম্ ||১৪||

মূত্রজঠরস্য হেত্বাদিকমাহ- মূত্রস্যেত্যাদি| তদুদাবর্তহেতুনেতি তদুদাবর্তো মূত্রোদাবর্তঃ স এব হেতুস্তেনেত্যর্থঃ; এতেন মূত্রবেগেঽবরুদ্ধে সতি তদুদাবর্তহেতুনাঽপানো বাযুঃ কুপিতঃ সন্ উদরং পূরযেত্, ততশ্চ নাভেরধোভাগে তীব্রপীডমাধ্মানং জনযেত্; তং মূত্রজঠরমধঃস্রোতোনিরোধনং বিদ্যাত্ মূত্রপুরীষমার্গাবরোধকং জানীযাদিত্যর্থঃ| কেচিত্ ‘অধোবস্তিনিরোধজম্’ ইতি পঠন্তি| যে তু ‘অপানঃ কুপিতো বাযুঃ’ ইত্যাদিকমেব মূত্রজঠরং পঠন্তি, তে ‘মূত্রস্য বেগে বিহতে তদুদাবর্তহেতুনা’ ইতি পাঠং মূত্রাতীতপাঠমধ্যে পঠন্তি| তথা চ সতি তে প্রকোপকারণানুক্তাবপানপ্রকোপকারণং বলবদ্বিগ্রহাদিকং মন্যন্তে| তাদৃশশ্চ পাঠো ন বৃদ্ধচিত্তাহ্লাদকরঃ| মূত্রস্য বেগে বিহতে ইত্যাদির্হেতুঃ, উদরং পূরযেদ্ভৃশমিত্যাদিঃ সম্প্রাপ্তিঃ, শেষং লক্ষণম্||১৩-১৪||

Adhikarana 8 (15-16) · Śloka 16

বস্তৌ বাঽপ্যথবা নালে মণৌ বা যস্য দেহিনঃ | মূত্রং প্রবৃত্তং সজ্জেত সরক্তং বা প্রবাহতঃ ||১৫|| স্রবেচ্ছনৈরল্পমল্পং সরুজং বাঽথ নীরুজম্ | বিগুণানিলজো ব্যাধিঃ স মূত্রোত্সঙ্গসঞ্জ্ঞিতঃ ||১৬||

মূত্রোত্সঙ্গস্য হেত্বাদিকমাহ- বস্তাবিত্যাদি| নালে মেঢ্রস্রোতসি| মণৌ মেঢ্রাগ্রদেশে| যদ্যপি নালে ইত্যনেনৈব মণেরপি গ্রহণং সঞ্জাতং, তথাঽপি মণেরুপাদানং মণাবত্যন্তমূত্রোত্সঙ্গপ্রতিপাদনার্থম্| সজ্জেত অবরুধ্যেত| ‘সরক্তম্’ ইত্যত্র ‘সংসক্তম্’ ইতি পাঠে সংসক্তং সম্বদ্ধম্| প্রবাহতঃ নিকুহনাদিত্যর্থঃ| সরুজম্ অতিবাতপ্রকোপাত্, নীরুজং হীনবাতপ্রকোপাত্| বিগুণানিলজ ইতি বিমার্গবাযুজঃ, বাযোর্বিমার্গগমনং মার্গাবরোধাত্ স্বহেতুভিশ্চ; কেচিন্মার্গাবরোধমেব বিমার্গগমনে কারণমিচ্ছন্তি| বিগুণানিলজো ব্যাধিরিতি হেতুঃ, বস্তাবিত্যাদিঃ সম্প্রাপ্তিঃ, শেষং লক্ষণম্||১৫-১৬||

Adhikarana 9 (17) · Śloka 17

রূক্ষস্য ক্লান্তদেহস্য বস্তিস্থৌ পিত্তমারুতৌ | সদাহবেদনং কৃচ্ছ্রং কুর্যাতাং মূত্রসঙ্ক্ষযম্ ||১৭||

মৃত্রক্ষযস্য হেত্বাদিকমাহ- রূক্ষস্যেত্যাদি| ক্লান্তদেহস্য গ্লানদেহস্য| যদ্যপি রূক্ষগ্লানদেহত্বং ন পিত্তপ্রকোপকারণং তথাঽপি বাতান্বিতপিত্তস্য প্রকোপকং জ্ঞেযম্| কুর্যাতাম্ উত্পাদযেতাম্| কৃচ্ছ্রং কুষ্ঠজননম্| মূত্রসঙ্ক্ষযমিতি মূত্রশোষণান্মূত্রসঙ্ক্ষযো রোগঃ| রূক্ষস্যেত্যাদিঃ হেতুঃ, বস্তিস্থাবিত্যাদিঃ সম্প্রাপ্তিঃ, শেষং লক্ষণম্| ‘বস্তিস্থৌ পিত্তমারুতৌ’ ইত্যত্র ‘বস্তৌ তিষ্ঠন্ সদাগতিঃ’ ইতি কেচিত্ পঠন্তি; স চানার্ষঃ পাঠঃ||১৭||

Adhikarana 10 (18-19) · Śloka 19

অভ্যন্তরে বস্তিমুখে বৃত্তোঽল্পঃ স্থির এব চ | বেদনাবানতি সদা মূত্রমার্গনিরোধনঃ ||১৮|| জাযতে সহসা যস্য গ্রন্থিরশ্মরিলক্ষণঃ | স মূত্রগ্রন্থিরিত্যেবমুচ্যতে বেদনাদিভিঃ ||১৯||

মূত্রগ্রন্থের্হেত্বাদিকমাহ- অভ্যন্তর ইত্যাদি| অভ্যন্তরে বস্তিমুখে ইতি বস্তিদ্বারস্যাভ্যন্তরে ইত্যর্থঃ| বৃত্তো বর্তুলঃ| স্থিরঃ অচলঃ| মূত্রমার্গনিরোধনঃ মূত্রবাহিস্রোতোনিরোধকারীত্যর্থঃ| সহসা ঝটিতি| অশ্মরীলক্ষণ ইত্যত্র বেদনাদিভিরিতি সম্বধ্যতে| তেন বেদনাভিঃ কৃত্বা অশ্মর্যাস্তুল্যলক্ষণো ন ত্বধিষ্ঠানাদিভিরশ্মরীতুল্যলক্ষণঃ, এষ এবাশ্মরীমূত্রগ্রন্থ্যোর্ভেদঃ; তথা অশ্মর্যাং রক্তসম্বন্ধো নাস্তি, মূত্রগ্রন্থৌ তু তন্ত্রান্তরদর্শনাদ্রক্তসম্বন্ধো জ্ঞেয ইত্যপি ভেদঃ| তথা চ তদ্বচঃ- “রক্তং বাতকফাদ্দুষ্টং বস্তিদ্বারে সুদারুণম্| গ্রন্থিং কুর্যাত্ স কৃচ্ছ্রেণ সৃজেন্মূত্রং তদাবৃতম্| অশ্মরীসমশূলং তং মূত্রগ্রন্থিং প্রচক্ষতে”- ইতি| অভ্যন্তর ইত্যাদিসম্প্রাপ্তিঃ, বেদনাবানিত্যাদিলক্ষণং, হেতুরত্রানুক্তোঽপি উষ্ণবাতহেতুসাহচর্যাত্ পিত্তং জ্ঞেযঃ| যদ্যেবং তর্হি উষ্ণবাতে বাযুরপি হেতুরুক্তঃ; সোঽত্রকিমিতি ন গৃহ্যতে? সত্যং, মূত্রগ্রন্থের্ব্যতিক্রমপাঠাদেব বাযুরত্র কারণং ন ভবতীতি জ্ঞেযম্||১৮-১৯||

Adhikarana 11 (20-21) · Śloka 21

প্রত্যুপস্থিতমূত্রস্তু মৈথুনং যোঽভিনন্দতি | তস্য মূত্রযুতং রেতঃ সহসা সম্প্রবর্ততে ||২০|| পুরস্তাদ্বাঽপি মূত্রস্য পশ্চাদ্বাঽপি কদাচন | ভস্মোদকপ্রতীকাশং মূত্রশুক্রং তদুচ্যতে ||২১||

মূত্রশুক্রস্য হেত্বাদিকমাহ- প্রত্যুপস্থিতেত্যাদি| প্রত্যুপস্থিতমূত্র ইতি সঞ্জাতমূত্রবেগ ইত্যর্থঃ| যঃপুরুষঃ, মৈথুনমভিনন্দতি ইচ্ছতি করোতীতি তাত্পর্যার্থঃ| রেতঃ শুক্রম্| পুরস্তাদ্বাঽপি মূত্রস্য আদাবিত্যর্থঃ| ভস্মোদকপ্রতীকাশং ভস্মমিশ্রিতপানীযতুল্যম্ | এতচ্চ রেতোবিশেষণম্| যঃপুরুষঃ সঞ্জাতমূত্রবেগঃ সন্ মৈথুনং করোতি তস্য পুংসো ভস্মোদকপ্রতীকাশং মূত্রযুতং রেতো মূত্রস্যাদৌ কদাচিত্ পশ্চাদ্বা বাযোর্বিচিত্রক্রিযাকরত্বাত্ প্রবর্ততে, তন্মূত্রশুক্রমুচ্যত ইতি ফলিতোঽর্থঃ| অত্র হেতুসম্প্রাপ্ত্যাদিকং স্বযমপ্যূহ্য জ্ঞেযম্||২০-২১||

Adhikarana 12 (22-23) · Śloka 23

ব্যাযামাধ্বাতপৈঃ পিত্তং বস্তিং প্রাপ্যানিলাবৃতম্ | বস্তিং মেঢ্রং গুদং চৈব প্রদহন্ স্রাবযেদধঃ ||২২|| মূত্রং হারিদ্রমথবা সরক্তং রক্তমেব বা | কৃচ্ছ্রাত্ প্রবর্ততে জন্তোরুষ্ণবাতং বদন্তি তম্ ||২৩||

ব্যাযামাধ্বাতপৈরিত্যাদি| অনিলাবৃতং বাতান্বিতং পিত্তম্| হারিদ্রং হরিদ্রাবর্ণম্| সরক্তম্ ঈষদ্রক্ত বর্ণমীষচ্ছোণিতং বা| রক্তং বেতি কেবলং শোণিতম্, অত্যন্তরক্তবর্ণং মূত্রং বেত্যর্থঃ| ননু, অত্রোদ্দেশসূত্রপাঠান্মূত্রগ্রন্থিমূত্রশুক্রযোরুপাদানং প্রাপ্নোতি নোষ্ণবাতস্য, তত্ কথমত্রোষ্ণবাতো নির্দিষ্টঃ? উচ্যতে- যথা মূত্রক্ষযস্য বাতপিত্তে হেতূ তথাঽস্যাপি ত এব হেতূ ইতি হেতুসাম্যাদ্ব্যতিক্রমেণোষ্ণবাতো নির্দিষ্টঃ| যদ্যেবং তর্হি উদ্দেশেঽপ্যুষ্ণবাতো মূত্রক্ষযানন্তরমেব কিমিতি ন পঠিতঃ? সত্যং, মূত্রগ্রন্থৌ কেবলপিত্তস্যানুবর্তনার্থমুষ্ণবাতো মূত্রক্ষযানন্তরং পঠিতঃ| ব্যাযামাদিকো হেতুঃ, বস্তিং প্রাপ্যেত্যাদিঃ সম্প্রাপ্তিঃ, শেষং লক্ষণম্||২২-২৩||

Adhikarana 13 (24-26) · Śloka 26

বিশদং পীতকং মূত্রং সদাহং বহলং তথা | শুষ্কং ভবতি যচ্চাপি রোচনাচূর্ণসন্নিভম্ ||২৪|| মূত্রৌকসাদং তং বিদ্যাদ্রোগং পিত্তকৃতং বুধঃ | পিচ্ছিলং সংহতং শ্বেতং তথা কৃচ্ছ্রপ্রবর্তনম্ ||২৫|| শুষ্কং ভবতি যচ্চাপি শঙ্খচূর্ণপ্রপাণ্ডুরম্ | মূত্রৌকসাদং তং বিদ্যাদামযং দ্বাদশং কফাত্ ||২৬||

মূত্রৌকসাদলক্ষণমাহ- বিশদমিত্যাদি| বিশদং পিচ্ছিলবিপরীতম্| পীতকং পীতবর্ণম্| বহলং স্থূলং ঘনমিত্যর্থঃ| শুষ্কমিতি আতপাদিনা শুষ্কম্| রোচনা গোরোচনা| দ্বিতীযমূত্রৌকসাদলক্ষণমাহ- পিচ্ছিলমিত্যাদি| পিচ্ছিলমিতি বিশদবিপরীতম্, সংহতং ঘনম্, শ্বেতং শ্বেতবর্ণম্, কৃচ্ছ্রপ্রবর্তনং দুঃখেন প্রবর্তত ইত্যর্থঃ| দ্বাদশেতি পুনরুপাদানং মূত্রৌকসাদযোরেকনামত্বাদেব মন্দমতীনাং চেতস্যেকত্বং মা ভূদিতি দ্যোতনার্থম্||২৪-২৬||

Adhikarana 14 (27) · Śloka 28

কষাযকল্কসর্পীংষি ভক্ষ্যান্ লেহান্ পযাংসি চ | ক্ষারমদ্যা(ধ্বা)সবস্বেদান্ বস্তীংশ্চোত্তরসঞ্জ্ঞিতান্ ||২৭|| বিদধ্যান্মতিমাংস্তত্র বিধিং চাশ্মরিনাশনম্ |২৮|

মূত্রাঘাতানাং চিকিত্সামাহ- কষাযেত্যাদি| কষাযঃ ক্বাথঃ, কল্কো দৃষদি পেষিতঃ সদ্রবঃ| ভক্ষ্যান্ লড্ডুকপ্রভৃতীন্| পযাংসি ক্ষীরাণি| আসবো মদ্যভেদঃ| স্বেদা উপনাহাদ্যাঃ| বস্তীংশ্চোত্তরসঞ্জ্ঞিতানিতি উত্তরবস্তীনিত্যর্থঃ| চকারাত্ স্নেহবিরেচনমপি| বিদধ্যাত্ কুর্যাত্| মতিমানিতি ঊহাপোহবিদ্বৈদ্যঃ| তত্র মূত্রাঘাতরোগে| বিধিমশ্মরীসাধনমশ্মরীচিকিত্সিতোক্তম্| ননু, যথা বাতাদিভেদেন ভিন্না মূত্রাঘাতা দর্শিতাঃ, তথৈব চিকিত্সাঽপি ভিন্না বক্তুমুচিতা, তত্ কথমত্র সামান্যেন চিকিত্সোক্তা? উচ্যতে- সর্বেষু মূত্রাঘাতেষু যতো বাতঃ কারণম্ অতঃ সামান্যেন চিকিত্সিতং বক্তুমুচিতং ভবতি; এবং যদি তত্র বাযুরেব কারণং কিং তর্হি তত্র পিত্তকফাবপ্যারম্ভকত্বেন নির্দিষ্টৌ, তত্ কথমেকৈব চিকিত্সা সর্বেষু মৃত্রাঘাতেষু ক্রিযতে? সত্যং, সর্বেঽপি মূত্রাঘাতাঃ প্রাযশো বাতজন্যাঃ পিত্তকফৌ পুনরাবরকৌ; তস্মাত্তেষামেকৈব চিকিত্সা দোষাদিবলবিকল্পং দ্রব্যতত্ত্বং রোগতত্ত্বং চ জ্ঞাত্বা ভিষজা প্রযোজ্যা, অত এব মতিমানিত্যুক্তবানাচার্যঃ| কেচিদত্র ‘অতঃ পরং প্রবক্ষ্যামি মূত্রদোষস্য ভেষজম্’ ইত্যাদিপাঠং পঠন্তি, স চ কষাযকল্পমিত্যনেনোপসঙ্গৃহীত ইতি ন দর্শিতঃ| অপরে তু ‘স্ত্রীণামতিপ্রসঙ্গেন’ ইত্যাদিপাঠং পঠন্তি, স চ নার্ষঃ||২৭||

Adhikarana 15 (28) · Śloka 28

মূত্রোদাবর্তযোগাংশ্চ কার্ত্স্ন্যেনাত্র প্রযোজযেত্ ||২৮||

মূত্রাঘাতেষু মূত্রোদাবর্তচিকিত্সিতমতিদেশেনাহ- মূত্রোদাবর্তেত্যাদি| মূত্রোদাবর্তযোগা য উদিতা ভবন্তি তেঽত্র যোজ্যা ইতি অত্রার্থঃ| মূত্রোদাবর্তযোগান্ ‘সৌবর্চলাঢ্যাং মদিরাম্’ ইত্যাদিমূত্রোদাবর্তপ্রতিষেধোক্তান্| কার্ত্স্ন্যেন সামস্ত্যেন| এতেন যস্যামবস্থাযাং যে মূত্রোদাবর্তযোগা উচিতা ভবন্তি তেঽত্র যোজ্যা ইত্যর্থঃ| কার্ত্স্ন্যেনেত্যত্র কর্তিককুণ্ডেন বহুধা প্রজল্পিতং, তত্তু শিষ্যবুদ্ধিব্যাকুলহেতুত্বাদ্গ্রন্থগৌরবভযাচ্চ পরিহৃতম্| অত্র মূত্রাঘাতে||২৮||

Adhikarana 16 (29) · Śloka 29

কল্কমের্বারুবীজানামক্ষমাত্রং সসৈন্ধবম্ | ধান্যাম্লযুক্তং পীত্বৈব মূত্রকৃচ্ছ্রাত্ প্রমুচ্যতে ||২৯||

কল্কমিত্যাদি| এর্বারুঃ গ্রীষ্মকর্কটিকা| অক্ষমাত্রং কর্ষপ্রমাণম্ ধান্যাম্লং কাঞ্জিকম্| কেচিদমুং পাঠমন্যথা পঠন্তি, স চাভাবান্ন লিখিতঃ||২৯||

Adhikarana 17 (30) · Śloka 30

সুরাং সৌবর্চলবতীং মূত্রকৃচ্ছ্রী পিবেন্নরঃ | মধু মাংসোপদংশং বা পিবেদ্বাঽপ্যথ গৌডিকম্ ||৩০||

সুরামিত্যাদি| সুরা পিষ্টকৃতা| মধু মদ্যং; তচ্চ মধুকৃতং, সমানতন্ত্রদর্শনাত্| তথা চ- ‘মাংসোপদংশং মধুনা মদ্যং বাঽপি পিবেন্নরঃ’- ইতি| মাংসোপদংশং মাংসভক্ষণযুতম্| গৌডিকং গুডকৃতং মদ্যম্||৩০||

Adhikarana 18 (31) · Śloka 31

পিবেত্ কুঙ্কুমকর্ষং বা মধূদকসমাযুতম্ | রাত্রিপর্যুষিতং প্রাতস্তথা সুখমবাপ্নুযাত্ ||৩১||

পিবেদিত্যাদি| মধূদকং মধুযুক্তমুদকম্| প্রাতরিতি পিবেদিত্যত্র যোজ্যং; তেন প্রভাতে পিবেদিত্যর্থঃ||৩১||

Adhikarana 19 (32) · Śloka 32

দাডিমাম্লাং যুতাং মুখ্যামেলাজীরকনাগরৈঃ | পীত্বা সুরাং সলবণাং মূত্রকৃচ্ছ্রাত্ প্রমুচ্যতে ||৩২||

দাডিমাম্লামিত্যাদি| দাডিমাম্লাং দাডিমেনাম্লীকৃতাম্| যুতামিত্যত্র এলাজীরকনাগরৈরিতি যোজ্যম্| সুরাং মুখ্যাং পৈষ্টীমিত্যর্থঃ| সলবণাং সৌন্ধবযুক্তাম্||৩২||

Adhikarana 20 (33-34) · Śloka 34

পৃথক্পর্ণ্যাদিবর্গস্য মূলং গোক্ষুরকস্য চ | অর্ধপ্রস্থেন তোযস্য পচেত্ ক্ষীরচতুর্গুণম্ ||৩৩|| ক্ষীরাবশিষ্টং তচ্ছীতং সিতাক্ষৌদ্রযুতং পিবেত্ | নরো মারুতপিত্তোত্থমূত্রাঘাতনিবারণম্ ||৩৪||

পৃথক্পর্ণ্যাদিবর্গস্যেত্যাদি| পৃথক্পর্ণ্যাদিবর্গো বিদারিগন্ধাদিকঃ||৩৩-৩৪||

Adhikarana 21 (35) · Śloka 35

নিষ্পীড্য বাসসা সম্যগ্বর্চো রাসভবাজিনোঃ | রসস্য কুডবং তস্য পিবেন্মূত্ররুজাপহম্ ||৩৫||

নিষ্পীড্যেত্যাদি| বর্চঃ পুরীষম্| রাসভো গর্দভঃ| বাজী ঘোটকঃ| কুডবং চত্বারি পলানি||৩৫||

Adhikarana 22 (36) · Śloka 36

মুস্তাভযাদেবদারুমূর্বাণাং মধুকস্য চ | পিবেদক্ষসমং কল্কং মূত্রদোষনিবারণম্ ||৩৬||

মুস্তেত্যাদি| মূর্বা চোরস্নাযুঃ| মধুকং যষ্টীমধু| অক্ষসমং কর্ষপ্রমাণম্||৩৬||

Adhikarana 23 (37) · Śloka 37

অভযামলকাক্ষাণাং কল্কং বদরসম্মিতম্ | অম্ভসাঽলবণোপেতং পিবেন্মূত্ররুজাপহম্ ||৩৭||

অভযেত্যাদি| অক্ষো বিভীতকঃ| বদরসম্মিতম্ অর্ধকর্ষপ্রমাণম্| অম্ভসা পানীযেন| অলবণোপেতং কিঞ্চিত্সৈন্ধবযুতম্||৩৭||

Adhikarana 24 (38) · Śloka 38

উদুম্বরসমং কল্কং দ্রাক্ষাযা জলসংযুতম্ | পিবেত্ পর্যুষিতং রাত্রৌ শীতং মূত্ররুজাপহম্ ||৩৮||

উদুম্বরসমং কর্ষপ্রমাণং, দ্রাক্ষাযাঃ কল্কম্ উদুম্বরসমং জলান্বিতং রাত্রিপর্যুষিতং পিবেদিতি পিণ্ডার্থঃ||৩৮||

Adhikarana 25 (39) · Śloka 39

নিদিগ্ধিকাযাঃ স্বরসং পিবেত্ কুডবসম্মিতম্ | মূত্রদোষহরং কল্য ... |৩৯|

নিদিগ্ধিকা কণ্টকারিকা| কুডবসম্মিতং চতুষ্পলোন্মিতম্| কল্যং প্রাতরিত্যর্থঃ|৩৯|-

Adhikarana 26 (39-40) · Śloka 40

... মথবা ক্ষৌদ্রসংযুতম্ ||৩৯|| প্রপীড্যামলকানাং তু রসং কুডবসম্মিতম্ | পীত্বাঽগদী ভবেজ্জন্তুর্মূত্রদোষরুজাতুরঃ ||৪০||

অথবেত্যাদি| প্রপীড্যেতি বাসসা গালযিত্বেত্যর্থঃ| কুডবং চত্বারি পলানি| অগদী ভবেত্ নীরোগো ভবেত্||৩৯-৪০||

Adhikarana 27 (41) · Śloka 41

ধাত্রীফলরসেনৈবং সূক্ষ্মৈলাং বা পিবেন্নরঃ |৪১|

ধাত্রীফলরসেনৈবমিত্যাদি| ধাত্রীফলরসেন আমলকরসেন| এবমিতি ক্ষৌদ্রযুতামিত্যর্থঃ|৪১|-

Adhikarana 28 (41-42) · Śloka 42

পিষ্ট্বাঽথবা সুশীতেন শালিতণ্ডুলবারিণা ||৪১|| তালস্য তরুণং মূলং ত্রপুসস্য রসং তথা | শ্বেতং কর্কটকং চৈব প্রাতস্তু পযসা পিবেত্ ||৪২||

পিষ্ট্বেত্যাদি| তালস্যাভিনবং মূলং পিষ্ট্বা শালিতণ্ডুলোদকেন পিবেত্, ত্রপুসস্বরসমথ বা পিবেত্| ত্রপুসঃ সুধাবাসঃ| শ্বেতমিত্যাদি| শ্বেতং কর্কটকং ত্রপুসম্| পযসা ক্ষীরেণ, সমানতন্ত্রদর্শনাত্; ‘ত্রপুসং বাঽথ দুগ্ধেন মূত্রদোষহরং পিবেত্’ ইতি||৪১-৪২||

Adhikarana 29 (43) · Śloka 43

শৃতং বা মধুরৈঃ ক্ষীরং সর্পির্মিশ্রং পিবেন্নরঃ | মূত্রদোষবিশুদ্ধ্যর্থং তথৈবাশ্মরিনাশনম্ ||৪৩||

শৃতমিত্যাদি| মধুরৈঃ কাকোল্যাদিভিঃ| অযং যোগো মূত্রশুক্রস্য বাহুল্যেন বোদ্ধব্যঃ||৪৩||

Adhikarana 30 (44-45) · Śloka 45

বলাশ্বদংষ্ট্রাক্রৌঞ্চাস্থিকোকিলাক্ষকতণ্ডুলান্ | শতপর্বকমূলং চ দেবদারু সচিত্রকম্ ||৪৪|| অক্ষবীজং চ সুরযা কল্কীকৃত্য পিবেন্নরঃ | মূত্রদোষবিশুদ্ধ্যর্থং তথৈবাশ্মরিনাশনম্ ||৪৫||

বলাশ্বদংষ্ট্রেত্যাদি| বলা স্বনামখ্যাতা, শ্বদংষ্ট্রা গোক্ষুরকঃ, ক্রৌঞ্চঃ পক্ষিবিশেষঃ, ‘কৈচর’ ইতি লোকে, কোকিলাক্ষকঃ খগ্গলী, শতপর্বকো জলগণ্ডীরঃ| অক্ষবীজং বিভীতকমজ্জা| এতদ্বলাদিকং কল্কীকৃত্য মূত্রদোষবিশুদ্ধ্যর্থং পিবেদিত্যর্থঃ| তথাঽশ্মরীচিকিত্সিতোক্তমপি মূত্রদোষবিশুদ্ধ্যর্থং পিবেদিত্যর্থঃ| অশ্মরীচিকিত্সিতং যদত্র বারংবারং ভণিতং, তদত্যন্তহিতত্বাপাদনার্থম্| কেচিত্ ভোজসংবাদাদ্ বলাদিকং যোগচতুষ্টযং মন্যন্তে; তন্ন, বৃদ্ধানামসম্মতত্বাত্||৪৪-৪৫||

Adhikarana 31 (46) · Śloka 46

পাটলাক্ষারমাহৃত্য সপ্তকৃত্বঃ পরিস্রুতম্ | পিবেন্মূত্রবিকারঘ্নং সংসৃষ্টং তৈলমাত্রযা ||৪৬||

পাটলাক্ষারমিত্যাদি| সপ্তকৃত্বঃ সপ্তবারান্| পরিস্রুতং গালিতম্| সংসৃষ্টং সংযুক্তম্| তৈলমাত্রযা স্তোকেন তৈলেন| অত্র মাত্রাশব্দোঽল্পবাচী| যথা- “মাত্রাং খাদেদ্বুভুক্ষিতঃ” ইত্যাদিষু| অত্র ক্ষারস্য তোযস্য চ প্রমাণং ক্ষারকল্পোক্তং জ্ঞাতব্যম্| তেন চতুর্গুণেন জলেন ক্ষারঃ পরিস্রাবণীযঃ||৪৬||

Adhikarana 32 (47) · Śloka 47

নলাশ্মভেদদর্ভেক্ষুত্রপুসৈর্বারুবীজকান্ | ক্ষীরে পরিশৃতান্ তত্র পিবেত্ সর্পিঃসমাযুতান্ ||৪৭||

নলাশ্মভেদেত্যাদি| নলঃ স্বনামপ্রসিদ্ধঃ শুষিরপর্বা, অশ্মভেদঃ পাষাণভেদঃ, এর্বারুঃ গ্রীষ্মকর্কটিকা, বীজকঃ অসনসারঃ| কার্তিককুণ্ডস্তু বৃদ্ধকাশ্যপীযসংবাদাত্ত্রপুসৈর্বারুবীজান্যেবাচক্ষতে, বীজকানিত্যত্র স্বার্থিকাশ্চ প্রকৃতিলিঙ্গবচনান্যতিক্রামন্তীত্যুক্তত্বাত্ পুংলিঙ্গতেতি চ কথযতি তত্র| মূত্রাঘাতে||৪৭||

Adhikarana 33 (48) · Śloka 49

পাটল্যা যাবশূকাচ্চ পারিভদ্রাত্তিলাদাপি | ক্ষারোদকেন মতিমান্ ত্বগেলোষণচূর্ণকম্ ||৪৮|| পিবেদ্গুডেন মিশ্রং বা লিহ্যাল্লেহান্ পৃথক্ পৃথক্ |৪৯|

পাটল্যা ইত্যাদি| যাবশূকো যবক্ষারঃ| পারিভদ্রঃ পর্বতনিম্বঃ, অন্যে পারিভদ্রশব্দেন কণ্টকিবৃক্ষং রক্তকুসুমং ফলভদ্রসঞ্জ্ঞকং বদন্তি| ঊষণং পিপ্পলী| পাটল্যাদীনাং ক্ষারোদকেন সহ ত্বগেলোষণচূর্ণং পিবেত্, পাটল্যাদিক্ষারোদকগুডকৃতান্ লেহান্ বা লিহ্যাত্| কার্তিককুণ্ডস্তু ‘ত্বগেলোষণচূর্ণকং’ ইত্যত্র ‘ত্বগেলোষণসংযুতম্’ ইতি পঠতি| তত্র পাটল্যাদিতিলান্তানাং দ্রব্যাণাং যত্ চূর্ণং তত্ ক্ষারোদকেন মুষ্ককক্ষারোদকেন পিবেত্, তত্কৃতান্বা পৃথক্ পৃথক্ ত্বগেলোষণসংযুতান্ লেহান্ গুডমিশ্রিতান্ লিহ্যাদিতি ব্যাখ্যানযতি| তথা চ বিশ্বামিত্রঃ- ‘পাটল্যাঃ পারিভদ্রাদ্বা তিলাদ্বাঽপি যবাগ্রজাত্| কণৈলাত্বগ্যুতং চূর্ণং মুষ্ককক্ষারবারিণা|| পিবেদ্গুডেন মিশ্রং বা লিহ্যাল্লেহান্ পৃথক্ পৃথক্’ ইতি| ‘গতিমান্’ ইত্যত্র ‘মদিরাং’ ইতি কেচিত্ পঠন্তি, তথা ‘গুডেন মিশ্রং বা’ ইত্যত্র ‘গুডোপদংশং বা’ ইতি চ পঠন্তি| তচ্চ পাঠদ্বযমনার্ষম্||৪৮||

Adhikarana 34 (49-50) · Śloka 50

অত ঊর্ধ্বং প্রবক্ষ্যামি মূত্রদোষে ক্রমং হিতম্ ||৪৯|| স্নেহস্বেদোপপন্নানাং হিতং তেষু বিরেচনম্ | ততঃ সংশুদ্ধদেহানাং হিতাশ্চোত্তরবস্তযঃ ||৫০||

সামান্যেন চ ক্রিযাক্রমার্থমাহ- অত ঊর্ধ্বমিত্যাদি| তেষু মূত্রদোষেষু| ‘তেষু বিরেচনং’ ইত্যত্র ‘স্নেহবিরেচনং’ ইতি কেচিত্ পঠন্তি| কার্তিককুণ্ডস্ত ইমং পাঠং ন পঠতি, ‘কষাযকল্কসর্পীষি’ ইত্যাদিনৈব গতার্থত্বাত্| জেজ্জটাচার্যস্তু স্নিগ্ধশুদ্ধদেহানাং পূর্বোক্তা যোগাঃ প্রযোক্তব্যা ইত্যাবেদনায পঠতি, তত্পঠিতত্বান্মযাঽপি পঠিতঃ||৪৯-৫০||

Adhikarana 35 (51) · Śloka 51

স্ত্ত্রীণামতিপ্রসঙ্গেন শোণিতং যস্য দৃশ্যতে | মৈথুনোপরমস্তস্য বৃংহণশ্চ বিধিঃ স্মৃতঃ ||৫১||

অত্র চ কেচিন্মূত্রদোষপ্রসঙ্গেন মূত্রমার্গপ্রবৃত্তরক্তস্যাপি বিধানং কথযন্তি স্ত্রীণামিত্যাদি| অতিপ্রসঙ্গেন অত্যন্তসেবযা| মৈথুনোপরমো মৈথুননিবৃত্তিঃ| বৃংহণশ্চ বিধিঃ মাংসক্ষীরঘৃতাদিসেবনম্| অমুমপি পাঠং কার্তিককুণ্ডো ন পঠতি, শুক্রক্ষযলিঙ্গেনৈবোক্তত্বাত্ সঙ্খ্যাতিরেকভযাচ্চ; জেজ্জটস্তু প্রকরণাত্ তথা শিষ্যসুখবোধার্থং পঠতি ; তত্পঠিতত্বান্মযাঽপি পঠিতঃ||৫১||

Adhikarana 36 (52) · Śloka 52

তাম্রচূডবসা তৈলং হিতং চোত্তরবস্তিষু | বিধানং তস্য পূর্বং হি ব্যাসতঃ পরিকীর্তিতম্ ||৫২||

কিমেতদেব তত্র রক্তে হিতমুতান্যদপীত্যাহ- তাম্রচূডেত্যাদি| তাম্রচূডবসা কুক্কুটবসা, বিধানং বিধিঃ, উত্তরবস্তিষু উত্তরবস্তিচিকিত্সিতে, তস্য উত্তরবস্তেঃ, ‘ব্যাসতঃ’ ইত্যত্র ‘ব্যাপদঃ’ ইতি কেচিত্ পঠন্তি||৫২||

Adhikarana 37 (53-57) · Śloka 57

ক্ষৌদ্রার্ধপাত্রং দত্ত্বা চ পাত্রং তু ক্ষীরসর্পিষঃ | শর্করাযাশ্চ চূর্ণং চ দ্রাক্ষাচূর্ণং চ তত্সমম্ ||৫৩|| স্বযঙ্গুপ্তাফলং চৈব তথৈবেক্ষুরকস্য চ | পিপ্পলীচূর্ণসংযুক্তমর্ধভাগং প্রকল্পযেত্ ||৫৪|| তদৈকধ্যং সমানীয খজেনাভিপ্রমন্থযেত্ | ততঃ পাণিতলং চূর্ণং লীঢ্বা ক্ষীরং ততঃ পিবেত্ ||৫৫|| এতত্ সর্পিঃ প্রযুঞ্জানঃ শুদ্ধদেহো নরঃ সদা | মূত্রদোষাঞ্জযেত্ সর্বানন্যযোগৈঃ সুদুর্জযান্ ||৫৬|| জযেচ্ছোণিতদোষাংশ্চ বন্ধ্যা গর্ভং লভেত চ | নারী চৈতত্ প্রযুঞ্জানা যোনিদোষাত্ প্রমুচ্যতে ||৫৭||

ক্ষৌদ্রার্ধপাত্রমিত্যাদি| ক্ষৌদ্রার্ধপাত্রং মধ্বর্ধাঢকং, ক্ষীরসর্পিষঃ ক্ষীরসম্মথনোত্থঘৃতস্য| স্বযঙ্গুপ্তাফলাদীনাং পিপ্পল্যন্তানাং চূর্ণমর্ধভাগং প্রকল্পযেদিত্যর্থঃ| স্বযঙ্গুপ্তা কপিকচ্ছূঃ, হক্ষুরকঃ কোকিলাক্ষকঃ, খজেন মন্থনদণ্ডেন; পাণিতলং চূর্ণমিতি অঙ্গুলিরহিতং হস্ততলং চূর্ণমিত্যর্থঃ; অন্যে পাণিতলশব্দেন কর্ষং বদন্তি||৫৩-৫৭||

Adhikarana 38 (58-64) · Śloka 65

বলা কোলাস্থি মধুকং শ্বদংষ্ট্রাঽথ শতাবরী | মৃণালং চ কশেরুশ্চ বীজানীক্ষুরকস্য চ ||৫৮|| সহস্রবীর্যাংঽশুমতী পযস্যা সহ কালযা | শৃগালবিন্নাঽতিবলা বৃংহণীযো গণস্তথা ||৫৯|| এতানি সমভাগানি মতিমান্ সহ সাধযেত্ | চতুর্গুণেন পযসা গুডস্য তুলযা সহ ||৬০|| দ্রোণাবশিষ্টং তত্ পূতং পচেত্তেন ঘৃতাঢকম্ | তত্ সিদ্ধং কলশে স্থাপ্যং ক্ষৌদ্রপ্রস্থেন সংযুতম্ ||৬১|| সর্পিরেতত্ প্রযুঞ্জানো মূত্রদোষাত্ প্রমুচ্যতে | তুগাক্ষীর্যাশ্চ চূর্ণানি শর্করাযাস্তথৈব চ ||৬২|| ক্ষৌদ্রেণ তুল্যান্যালোড্য প্রশস্তেঽহনি লেহযেত্ | তস্য খাদেদ্যথাশক্তি মাত্রাং ক্ষীরং ততঃ পিবেত্ ||৬৩|| শুক্রদোষাঞ্জযেন্মর্ত্যঃ প্রাশ্য সম্যক্ সুযন্ত্রিতঃ | ব্যবাযক্ষীণরেতাস্তু সদ্যঃ সংলভতে সুখম্ ||৬৪|| ওজস্বী বলবান্মর্ত্যঃ পিবন্নেব চ হৃষ্যতি |৬৫|

অগর্ভং বলাঘৃতমাহ- বলেত্যাদি| কোলাস্থি বদরমজ্জা, মধুকং যষ্টীমধু, শ্বদংষ্ট্রা গোক্ষুরকঃ, ইক্ষুরকঃ কোকিলাক্ষঃ, সহস্রবীর্যা দূর্বা, অংশুমতী শালপর্ণী, পযস্যা অর্কপুষ্পী, দুগ্ধিকামন্যে, কালা কালানুসারিবা, শ্রীপর্ণিকামন্যে, শৃগালবিন্না পৃশ্নিপর্ণী, বৃংহণীযো গণো গুডূচীবর্জিতঃ কাকোল্যাদিঃ ‘গুডূচীরহিতো বর্গঃ কাকোল্যাদিরুদাহৃতঃ| বৃংহণীযঃ’ ইত্যাদিসমানতন্ত্রসংবাদাত্| চতুর্গুণেন পযসা দুগ্ধেন, জলেনেত্যন্যে| পূতং বস্ত্রগালিতম্| পচেত্তেন ঘৃতাঢকমিতি অকল্কমেব| কার্তিককুণ্ডস্ত্বমুং যোগমন্যথা পঠতি ব্যাখ্যানযতি চ, স চ গ্রন্থগৌরবভযান্ন লিখিতঃ| কেচিদেনমনার্ষং বদন্তি; তন্ন, সুকীরসুধীরাদিভিষ্টীকাকৃদ্ভিরার্ষত্বেন বর্ণিতত্বাত্||৫৮-৬৪||-

Adhikarana 39 (65-72) · Śloka 72

চিত্রকঃ সারিবা চৈব বলা কালানুসারিবা ||৬৫|| দ্রাক্ষা বিশালা পিপ্পল্যস্তথা চিত্রফলা ভবেত্ | তথৈব মধুকং পথ্যাং দদ্যাদামলকানি চ ||৬৬|| ঘৃতাঢকং পচেদেভিঃ কল্কৈঃ কর্ষসমন্বিতৈঃ | ক্ষীরদ্রোণে জলদ্রোণে তত্সিদ্ধমবতারযেত্ ||৬৭|| শীতং পরিস্রুতং চৈব শর্করাপ্রস্থসংযুতম্ | তুগাক্ষীর্যাশ্চ তত্ সর্বং মতিমান্ পরিমিশ্রযেত্ ||৬৮|| ততো মিতং পিবেত্কালে যথাদোষং যথাবলম্ | বাতরেতাঃ শ্লেষ্মরেতাঃ পিত্তরেতাস্তু যো ভবেত্ ||৬৯|| রক্তরেতা গ্রন্থিরেতাঃ পিবেদিচ্ছন্নরোগতাম্ | জীবনীযং চ বৃষ্যং চ সর্পিরেতদ্বলাবহম্ ||৭০|| প্রজ্ঞাহিতং চ ধন্যং চ সর্বরোগাপহং শিবম্ | সর্পিরেতত্ প্রযুঞ্জানা স্ত্রী গর্ভং লভতেঽচিরাত্ ||৭১|| অসৃগ্দোষাঞ্জযেচ্চাপি যোনিদোষাংশ্চ সংহতান্ | মূত্রদোষেষু সর্বেষু কুর্যাদেতচ্চিকিত্সিতম্ ||৭২||

মহাবলং ঘৃতমাহ- চিত্রক ইত্যাদি| চিত্রফলা গুডদুগ্ধিকা ইন্দ্রবারুণীপর্যাযা | তুগাক্ষীর্যাশ্চেত্যত্রাপি প্রস্থসংযুতমিতি সম্বধ্যতে| মিতং মাত্রোপেতম্| যথাবলমিত্যস্য প্রাক্ অগ্নিশব্দো লুপ্তো দ্রষ্টব্য; তেন যথাগ্নিবলমিত্যর্থঃ| কেচিদিদং ঘৃতং ন পঠন্তি||৬৫-৭২||

Adhikarana puShpikA · Śloka 58

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রে মূত্রাঘাতপ্রতিষেধো নাম (বিংশোঽধ্যাযঃ, আদিতঃ) অষ্টপঞ্চাশত্তমোঽধ্যাযঃ ||৫৮||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রে মূত্রাঘাতপ্রতিষেধো নামাষ্টপঞ্চাশতমোঽধ্যাযঃ||৫৮||