19. nayanābhighātapratiṣēdhādhyāyaḥ

Adhikarana 1 (1-2) · Śloka 2

অথাতো নযনাভিঘাতপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

ক্রিযাকল্পানন্তরং শারীরদোষনিমিত্তানাং নযনামযানামুক্তত্বাদ্বাহ্যনিমিত্তস্যাবশিষ্টত্বাচ্চিকিত্সার্থং নযনাভিঘাতপ্রতিষেধাধ্যাযারম্ভো যুক্ত ইত্যত আহ- অথাত ইত্যাদি| অভিঘাতশব্দেনাত্রাভিঘাতজনিতা বেদনাদযঃ, তেষাং প্রতিষেধশ্চিকিত্সিতম্| স চাভিঘাতো মূর্তেন দণ্ডাদিনা অমূর্তেন ভযশোকাদিনা বা||১-২||

Adhikarana 2 (3) · Śloka 4

অভ্যাহতে তু নযনে বহুধা নরাণাং সংরম্ভরাগতুমুলাসু রুজাসু ধীমান্ | নস্যাস্যলেপপরিষেচনতর্পণাদ্যমুক্তং পুনঃ ক্ষতজপিত্তজশূলপথ্যম্ ||৩|| দৃষ্টিপ্রসাদজননং বিধিমাশু কুর্যাত্ স্নিগ্ধৈর্হিমৈশ্চ মধুরৈশ্চ তথা প্রযোগৈঃ |৪|

তমেবাভিঘাতং মূর্তদণ্ডাদিজং চিকিত্সাভেদযোগিনং দর্শযন্নাহ- অভ্যাহতে ইত্যাদি| নরাণাং বহুধা অভ্যাহতে নযনে সতি সংরম্ভরাগতুমুলাসু রুজাসু নস্যাস্যলেপাদ্যং কর্ম ক্ষতজপিত্তজশূলপথ্যং যদুক্তং তথা স্নিগ্ধাদিভির্দৃষ্টিপ্রসাদজননং বিধিং ধীমানাশু কুর্যাদিতি পিণ্ডার্থঃ| বহুধা বহুপ্রকারম্| তথা চ বিদেহঃ,- “তীক্ষ্ণাঞ্জনাতিপরিক্লিষ্টেষু নেত্রেষু বাতাতপধূমরজব্যাপারকীটমক্ষিকামশকস্পর্শাদিভিরভিহতেষু সলিলক্রীডাজাগরণলঙ্ঘনাপ্লুতাভিদ্রুতেষু শ্রান্তক্লান্তেষু ভযার্দিতেষু দিবাকরাগ্নিচন্দ্রগ্রহনক্ষত্রক্রমণকর্মবিবিধরূপপ্রেক্ষণাদ্যভিহতেষু দুর্বলেষু নেত্রেষু রাগদাহতোদশোফপাকঘর্ষাদিবেদনাসু”- ইতি| সংরম্ভরাগাভ্যাং তুমুলাঃ সঙ্কুলাঃ সংরম্ভরাগতুমুলাস্তাসু| অন্যে তু সংরম্ভশ্চ রাগশ্চ তুমুলশ্চ সংরম্ভরাগতুমুলাস্তাসু; তুমুলাঃ প্রচণ্ডাঃ, সংরম্ভঃ শ্বযথুঃ, ইত্যর্থং বদন্তি| ক্ষতজপিত্তজশূলপথ্যমিতি রক্তাভিষ্যন্দহিতং পিত্তাভিষ্যন্দহিতং চেত্যর্থঃ| অন্যে তু অভিঘাতজো হি বাযুঃ শোণিতপিত্তং দূষযন্ তাভ্যামেবাবৃতঃ শূলং করোতীতি তদ্ধিতমিতি ব্যাখ্যানযন্তি| দৃষ্টিপ্রসাদনং নযনগোলকপ্রসাদনম্||৩||-

Adhikarana 3 (4) · Śloka 4

স্বেদাগ্নিধূমভযশোকরুজাভিঘাতৈরভ্যাহতামপি তথৈব ভিষক্ চিকিত্সেত্ ||৪||

‘অভ্যাহতে তু নযনে বহুধা নরাণাম্’ ইত্যত্র মূর্তানাং দণ্ডাদীনামভিঘাতে যচ্চিকিত্সিতমভিহিতং তদেব চিকিত্সিতমমূর্তানামপি স্বেদাদীনামভিঘাতেঽতিদিশন্নাহ- স্বেদাগ্নিধূমভযেত্যাদি| তথৈব চিকিত্সেত্ পূর্বোক্তপ্রকারেণ চিকিত্সেত্| এবং সপ্তাহাদর্বাগেব| ‘অভ্যাহতে তু নযনে’ ইত্যত্র পূর্ববাক্যে বহুধাত্বং মূর্তদণ্ডাদ্যভিঘাতস্য বোধ্যম্, ইহামূর্তাভিঘাতচিকিত্সিতমভিধীযতে||৪||

Adhikarana 4 (5) · Śloka 5

সদ্যোহতে নযন এষ বিধিস্তদূর্ধ্বং স্যন্দেরিতো ভবতি দোষমবেক্ষ্য কার্যঃ |৫|

ইদানীং পূর্বোক্তো বিধিঃ সপ্তাহাদর্বাগেব কার্যস্তদূর্ধ্বমন্যো বিধিরিত্যাহ- সদ্যোহত ইত্যাদি| সদ্যোহতে সপ্তাহাদর্বাগেবেত্যর্থঃ| এষ বিধিঃ পূর্বোক্তো বিধিঃ| তদূর্ধ্বং সপ্তাহাদূর্ধ্বম্| স্যন্দেরিতো বাতাভিষ্যন্দোক্তো বিধিঃ|৫|-

Adhikarana 5 (5) · Śloka 5

অভ্যাহতং নযনমীষদথাস্যবাষ্পসংস্বেদিতং ভবতি তন্নিরুজং ক্ষণেন ||৫||

ইদানীং কিঞ্চিদভ্যাহতনযনে বিশেষচিকিত্সিতমাহ- অভ্যাহতমিত্যাদি| আস্যবাষ্পং মুখফূত্কারজনিতোষ্মা||৫||

Adhikarana 6 (6) · Śloka 7

সাধ্যং ক্ষতং পটলমেকমুভে তু কৃচ্ছ্রে ত্রীণি ক্ষতানি পটলানি বিবর্জযেত্তু | স্যাত্ পিচ্চিতং চ নযনং হ্যতি চাবসন্নং স্রস্তং চ্যুতং চ হতদৃক্ চ ভবেত্তু যাপ্যম্ ||৬|| বিস্তীর্ণদৃষ্টিতনুরাগমসত্প্রদর্শি, সাধ্যং যথাস্থিতমনাবিলদর্শনং চ |৭|

ইদানীং পটলাবগাহনবিশেষেণাভিঘাতস্য সাধ্যকৃচ্ছ্রসাধ্যাসাধ্যবিশেষমাহ- সাধ্যং ক্ষতমিত্যাদি| কেচিদমুং পাঠং ন পঠন্তি| যাদৃঙ্নযনং যাপ্যং তাদৃগাহ- স্যাত্ পিচ্চিতমিত্যাদি| অবসন্নম্ অন্তঃপ্রবিষ্টং, স্রস্তং শিথিলং, চ্যুতম্ অবলম্বিতং, বিস্তীর্ণং মণ্ডলং তথা তনুরাগং চ যদসত্প্রদর্শি স্যাত্ তদপি যাপ্যম্| সাধ্যমাহ- সাধ্যমিত্যাদি||৬||-

Adhikarana 7 (7) · Śloka 7

প্রাণোপরোধবমনক্ষুতকণ্ঠরোধৈরুন্নম্যমাশু নযনং যদতিপ্রবিষ্টম্ ||৭||

অতিপ্রবিষ্টনেত্রে চিকিত্সিতমাহ- প্রাণোপরোধেত্যাদি| প্রাণাযামেন বমনেন ছিক্কাপ্রবর্তনেন তথা কণ্ঠনিরোধনেন বা উন্নম্যমুন্নমনীযম্||৭||

Adhikarana 8 (8) · Śloka 8

নেত্রে বিলম্বিনি বিধির্বিহিতঃ পুরস্তাদুচ্ছিঙ্ঘনং শিরসি বার্যবসেচনং চ |৮|

অতিনির্গতনযনস্য চিকিত্সিতমাহ- নেত্র ইত্যাদি| বিলম্বিনি অতিনির্গতে, বিধির্বিহিতঃ পুরস্তাদিতি ‘ভিন্নং নেত্রকর্মণ্যমভিন্নং লম্বতে তু যত্’ ইত্যাদিনা প্রোক্তঃ| উচ্ছিঙ্ঘনং নাসিকযা বাযোরন্তঃপ্রবেশনম্| বার্যবসেচনং শীতোদকপরিষেকঃ|৮|-

Adhikarana 9 (8) · Śloka 9

ষট্সপ্ততির্নযনজা য ইমে প্রদিষ্টা রোগা ভবন্ত্যমহতাং মহতাং চ তেভ্যঃ ||৮|| স্তন্যপ্রকোপকফমারুতপিত্তরক্তৈর্বালাক্ষিবর্ত্মভব এব কুকূণকোঽন্যঃ |৯|

ইদানীং বক্ষ্যমাণকুকূণকেন ষট্সপ্ততেঃ সঙ্খ্যাধিক্যমিত্যাশঙ্ক্যমানমাহ- ষট্সপ্ততিরিত্যাদি| য ইমে নযনজা রোগাঃ ষট্সপ্ততিঃ প্রদিষ্টাস্তেঽমহতাং বালানাং তথা মহতাং চ ভবন্তি| তেভ্যঃ ষট্সপ্ততিবিকারেভ্যঃ স্তন্যপ্রকোপাদিভির্বালাক্ষিবর্ত্মভব এব অন্যঃ কুকূণক ইতি সমুদাযার্থঃ| বালাক্ষিবর্ত্মভব এব ন মহতামক্ষিবর্ত্মনি, অন্যঃ অপরঃ| যোঽসৌ কুকূণকো বালানামেব ভবতি, স কফাভিষ্যন্দে অবরুদ্ধোঽতো ন সঙ্খ্যাতিরেকঃ| ‘স্তন্যপ্রকোপকফমারুতপিত্তরক্তৈঃ’ ইত্যত্র ‘স্তন্যপ্রকোপজনিতৈঃ পিশিতোদযাদ্বা’ ইত্যন্যে পঠন্তি; অপরে তু ‘পিশিতোচ্ছ্রযাত্’ ইতি পঠন্তি; তৌ চ নেচ্ছতি জেজ্জটঃ||৮||-

Adhikarana 10 (9-10) · Śloka 10

মৃদ্গাতি নেত্রমতিকণ্ডুমথাক্ষিকূটং নাসাললাটমপি তেন শিশুঃ স নিত্যম্ ||৯|| সূর্যপ্রভাং ন সহতে স্রবতি প্রবদ্ধং, তস্যাহরেদ্রুধিরমাশু বিনির্লিখেচ্চ | ক্ষৌদ্রাযুতৈশ্চ কটুভিঃ প্রতিসারযেত্তু মাতুঃ শিশোরভিহিতং চ বিধিং বিদধ্যাত্ ||১০||

ইদানীং তস্য কুকূণকস্য লক্ষণমাহ- মৃদ্গাতীত্যাদি| নাসাললাটমপি মৃদ্গাতি| প্রবদ্ধং নিরন্তরম্| কুকূণকস্য সাধনমাহ- তস্যাহরেদ্রুধিরমিত্যাদি| আহরেদ্রুধিরং জলৌকোভিঃ, বিনির্লিখেত্ শেফালিকাপত্রৈঃ| কটুভিঃ ত্রিকটুকাদিভিঃ| ইদানীং বালস্যৌষধাক্ষমত্বান্মাতুরেবৌষধমাহ- মাতুরিত্যাদি| যঃ স্তন্যরোগচিকিত্সিতে ‘স্তন্যে গতে বিকৃতিমাশু ভিষক্’ ইত্যাদিবিধিরভিহিতঃ, তং শিশোর্যা জননী তস্যা বিদধ্যাদিতি পিণ্ডার্থঃ| অন্যে তু দ্বযোরেবাভিহিতং বিধিমিচ্ছন্তি||৯-১০||

Adhikarana 11 (11) · Śloka 12

তং বামযেত্তু মধুসৈন্ধবসম্প্রযুক্তৈঃ পীতং পযঃ খলু ফলৈঃ খরমঞ্জরীণাম্ ||১১|| স্যাত্পিপ্পলীলবণমাক্ষিকসংযুতৈর্বা... |১২|

ইদানীং ক্ষীরপস্য বালস্য স্তন্যসাত্ম্যত্বাত্ স্তন্যযুক্তমেব বমনং নির্দিশন্নাহ- তং বামযেদিত্যাদি| মধুসৈন্ধবসংযুতৈঃ খরমঞ্জরীণাং ফলৈঃ সহ পযঃ স্তন্যং পীতং তং বালং বামযেদিতি সম্বন্ধঃ| খরমঞ্জরীণাং ফলৈঃ অপামার্গফলচূর্ণৈঃ| স্যাদিত্যাদি| পিপ্পলীসৈন্ধবাদিযুতৈর্বা খরমঞ্জরীণাং ফলচূর্ণৈঃ সহ স্তন্যং পীতং বমনকৃদ্ভবেদিত্যর্থঃ||১১||-

Adhikarana 12 (12) · Śloka 12

... নৈনং বমন্তমপি বামযিতুং যতেত |১২|

ইদানীমুত্কৃষ্টদোষত্বাত্ স্বযং বমন্তং বালকং বমনযোগং দত্ত্বা ন বামযেদিত্যাহ- নৈনমিত্যাদি| এনমুত্ক্লিষ্টদোষত্বাত্স্বযমেব বমন্তং বামযিতুমন্যপ্রকারেণ বামযিতুং ন যতেত যত্নং ন কুর্বীত, বমনাতিযোগভযাত্|১২|-

Adhikarana 13 (12) · Śloka 12

দত্ত্বা বচামশনদুগ্ধভুজে প্রযোজ্যমূর্ধ্বং ততঃ ফলযুতং বমনং বিধিজ্ঞৈঃ ||১২||

ক্ষীরান্নাদস্য তথাঽন্নাদস্য চ বমনমাহ- দত্ত্বা বচামিত্যাদি| অশনদুগ্ধভুজে ক্ষীরান্নাদায পূর্বোক্তমেব বমনং বচাং দত্ত্বা প্রযোজ্যম্| অত ঊর্ধ্বং ক্ষীরান্নাবস্থাতোঽনন্তরমন্নাদস্য মদনফলযুতং পূর্বোক্তমেব বমনং সক্ষীরমক্ষীরং বা যোজ্যম্||১২||

Adhikarana 14 (13) · Śloka 13

জম্ব্বাম্রধাত্র্যণুদলৈঃ পরিধাবনার্থং কার্যং কষাযমবসেচনমেব চাপি |১৩|

ইদানীং কুকূণকে বর্ত্মনঃ প্রক্ষালনপরিষেকার্থং কষাযমাহ- জম্ব্বাম্রধাত্র্যণুদলৈরিত্যাদি| ধাত্রী আমলকী, অণুঃ অশ্মন্তকঃ, পরিধাবনার্থং প্রক্ষালনার্থং, পরিষেচনং পরিষেক ইত্যর্থঃ|১৩|-

Adhikarana 15 (13) · Śloka 13

আশ্চ্যোতনে চ হিতমত্র ঘৃতং গুডূচীসিদ্ধং তথাঽঽহুরপি চ ত্রিফলাবিপক্বম্ ||১৩||

প্রক্ষালনপরিষেকাবভিধায পূরণার্থমকল্কঘৃতদ্বযমাহ- আশ্চ্যোতনে ইত্যাদি| আশ্চ্যোতনে অক্ষিপূরণে| অত্র কুকূণকে গুডূচীস্বরসেন ঘৃতচতুর্গুণেন পক্বং, ইদমেকমঞ্জনং; ত্রিফলাক্বাথেন পক্বং, এতচ্চ দ্বিতীযম্||১৩||

Adhikarana 16 (14) · Śloka 14

নেপালজামরিচশঙ্খরসাঞ্জনানি সিন্ধুপ্রসূতগুডমাক্ষিকসংযুতানি | স্যাদঞ্জনং, মধুরসামধুকাম্রকৈর্বা ... |১৪|

অধুনা কুকূণকেঽঞ্জনমাহ- নেপালজেত্যাদি| নেপালজা মনঃশিলা| সিন্ধুপ্রসূতং সৈন্ধবম্| অপরমঞ্জনমাহ- স্যাদঞ্জনমিত্যাদি| মধুরসা মূর্বা| এতৈর্মূর্বাদিভিস্ত্রিভির্বাঽঞ্জনং স্যাত্|১৪|-

Adhikarana 17 (14) · Śloka 14

... কৃষ্ণাযসং ঘৃতপযো মধু বাঽপি দগ্ধম্ ||১৪||

চূর্ণাঞ্জনমাহ- কৃষ্ণাযসমিত্যাদি| কৃষ্ণাযসং কৃষ্ণলোহচূর্ণম্| এতত্ কৃষ্ণলোহাদিকং চান্তর্ধূমদগ্ধং চূর্ণাঞ্জনং ভবেত্| তথা চ বিদেহঃ,- “লৌহচূর্ণং চ সর্পিশ্চ মধু ক্ষীরং চ দাহযেত্|| এতচ্চূর্ণাঞ্জনং পিষ্টং কুমারাণাং কুকূণকে”- ইতি||১৪||

Adhikarana 18 (15) · Śloka 15

ব্যোষং পলাণ্ডু মধুকং লবণোত্তমং চ লাক্ষাং চ গৌরিকযুতাং গুটিকাঞ্জনং বা | নিম্বচ্ছদং মধুকদার্বি সতাম্রলোধ্রমিচ্ছন্তি চাত্র ভিষজোঽঞ্জনমংশতুল্যম্ ||১৫||

গুটিকাঞ্জনমাহ- ব্যোষমিত্যাদি| পলাণ্ডুঃ লশুনভেদঃ, মধুকং যষ্টীমধু, লবণোত্তমং সৈন্ধবম্| গুটিকাঞ্জনং বর্ত্যঞ্জনম্| অপরমপি বর্ত্যঞ্জনমাহ- নিম্বচ্ছদমিত্যাদি| দার্বী হরিদ্রাদ্বযং; বিদেহদর্শনাত্| অত্র কুকূণকে অঞ্জনমিত্যত্র গুটিকাশব্দো লুপ্তো দ্রষ্টব্যঃ; তেন গুটিকাঞ্জনমিত্যর্থঃ| অংশতুল্যং নিম্বচ্ছদাদিকং সমভাগমিত্যর্থঃ||১৫||

Adhikarana 19 (16) · Śloka 16

স্রোতোজশঙ্খদধিসৈন্ধবমর্ধপক্ষং শুক্রং শিশোর্নুদতি ভাবিতমঞ্জনেন | স্যন্দে কফদভিহিতং ক্রমমাচরেচ্চ বালস্য রোগকুশলোঽক্ষিগদং জিঘাংসুঃ ||১৬||

ইদানীং কুকূণকপ্রসঙ্গেন বালানাং শুক্রলেখনার্থমঞ্জনমাহ- স্রোতোজেত্যাদি| অস্যাঞ্জনস্য কল্পনাং বিদেহদর্শনেন বৃদ্ধবৈদ্যা আহুঃ| তদ্যথা- গব্যেন দধ্না পিষ্টাভ্যাং শঙ্খসৈন্ধবাভ্যাং স্রোতোজং রসাঞ্জনমর্ধপক্ষং সার্ধসপ্তরাত্রমসকৃল্লেপযেত্; ততোঽনন্তরং তত্স্রোতোজং রসাঞ্জনং পিষ্ট্বা বর্তিঃ কার্যা, সা অঞ্জনেন শিশোঃ শুক্রং নুদতি স্ফোটযতীত্যর্থঃ| কেচিত্ স্রোতোঞ্জনশব্দেন সৌবীরাঞ্জনমাহুঃ| কেচিত্ ‘শুক্রং শিশোর্নুদতি ভাবিতমঞ্জনেন’ ইত্যত্র ‘আভাবিতং শিশুকরোগনুদঞ্জনেন’ ইতি পঠন্তি| অন্যে তু ‘ব্রাহ্মীরসেন পরিভাবিতমঞ্জনার্থং’ ইতি পঠন্তি, তন্নেচ্ছতি গযী| পূর্বোক্তমেবৌষধং শুক্রেঽতিদিশন্নাহ- স্যন্দে কফাদভিহিতমিত্যাদি| কফাদ্যঃ স্যন্দস্তত্র স্যন্দে যঃ ক্রমোঽভিহিতস্তং ক্রমং বালস্যাক্ষিগদং জিঘাংসুর্যোগকুশলো বৈদ্য আচরেত্ কুর্যাদিতি সম্বন্ধঃ; জিঘাংসুঃ হন্তুমিচ্ছুঃ| কেচিত্ ‘স্যন্দে কফাদভিহিতং ক্রমং’ ইত্যত্র ‘স্যন্দক্রমং কফবিনাশনমাচরেচ্চ’ ইতি পঠন্তি| বালস্য কফাধিক্যাত্ কফস্যন্দক্রমং বিদধ্যাত্| আচরেচ্চেতি চকারো ভিন্নক্রমে, স চ কফবিনাশনমিত্যত্র দ্রষ্টব্যঃ; ততোঽন্যমপ্যবস্থাকুপিতং বাতং পিত্তং রক্তং চানুবন্ধভূতমিহোক্তমবেক্ষ্য বাতপিত্তস্যন্দানুক্রমং রক্তাভিষ্যন্দক্রমং চাবেক্ষ্য যথাদোষং যোগমুপযোজযেদিতি ব্যাখ্যানযন্তি||১৬||

Adhikarana 20 (17-18) · Śloka 18

সমুদ্র ইব গম্ভীরং নৈব শক্যং চিকিত্সিতম্ | বক্তুং নিরবশেষেণ শ্লোকানামযুতৈরপি ||১৭|| সহস্রৈরপি বা, প্রোক্তমর্থমল্পমতির্নরঃ | তর্কগ্রন্থার্থরহিতো নৈব গৃহ্ণাত্যপণ্ডিতঃ ||১৮||

কুতঃ পুনঃ স ক্রমোঽবস্থাবিশেষেণ স্বগ্রন্থে আচার্যেণ ন নিবদ্ধ ইত্যাহ- সমুদ্র ইব গম্ভীরমিত্যাদি| সমুদ্র ইব গম্ভীরং চিকিত্সিতং শ্লোকানাং সহস্রৈরপ্যযুতৈর্নিরবশেষেণ বক্তুং নৈব শক্যমিত্যর্থঃ; শ্লোকানাং সহস্তৈরপ্যযুতৈঃ শ্লোককোট্যাঽপীত্যর্থঃ| যদি শ্লোককোট্যা বক্তুং ন শক্যতে তর্হি কিং গ্রন্থকর্তুরশক্তিরিত্যাশঙ্কমানমাহ- প্রোক্তমিত্যাদি| অল্পমতিরপণ্ডিতো নরো যতস্তর্কগ্রন্থার্থরহিতোঽতঃ শ্লোককোট্যোক্তমপ্যর্থং নৈব গৃহ্ণাতীতি সম্বন্ধঃ; তর্কগ্রন্থার্থরহিতস্তর্কেণোহেন যো গ্রন্থার্থঃ শাস্ত্রার্থস্তেন রহিত ইত্যর্থঃ||১৭-১৮||

Adhikarana 21 (19-20) · Śloka 20

তদিদং বহুগূঢার্থং চিকিত্সাবীজমীরিতম্ | কুশলেনাভিপন্নং তদ্বহুধাঽভিপ্ররোহতি ||১৯|| তস্মান্মতিমতা নিত্যং নানাশাস্ত্রার্থদর্শিনা | সর্বমূহ্যমগাধার্থং শাস্ত্রমাগমবুদ্ধিনা ||২০||

তদিদমিত্যাদি| যস্মান্নিরবশেষেণ রোগাবস্থানন্ত্যাচ্চিকিত্সিতস্য বক্তুমশক্যত্বং, শক্যত্বে বা নিরূপণস্য নিষ্ফলতা, তস্মাত্ কারণাদিদং বহুগূঢার্থং চিকিত্সাযা বীজমীরিতমিতি সমুদাযার্থঃ| তদেব চিকিত্সাবীজং কুশলেন জ্ঞাতমনেকধা প্ররোহতীত্যাহ- কুশলেনেত্যাদি| কুশলেনাবস্থাবিদা বৈদ্যেনাভিপন্নমধিগতং তদ্বহুধাঽভিপ্ররোহতি| চিকিত্সাবীজমিতি বীজমিব বীজং, যথৈকং বীজং সুভূমৌ নিক্ষিপ্তং মূলকাণ্ডশাখাপল্লবাদিনাঽনেকধা প্ররোহতি তথেদমপীতি চিকিত্সাবীজমিত্যর্থঃ| যস্মাত্ কুশলেনাধিগতং চিকিত্সাবীজমনেকধা প্ররোহতি তস্মাত্ কারণান্মতিমতা নিত্যং নানাশাস্ত্রার্থদর্শিনা আগমবুদ্ধিনা বৈদ্যেন সর্বমগাধার্থং শাস্ত্রং নিত্যমূহ্যমিতি সম্বন্ধঃ| নানাশাস্ত্রাণি শালাক্যানি| আগমঃ আপ্তানাং শাস্ত্রং; তথা চোক্তং,- “সিদ্ধং সিদ্ধৈঃ প্রমাণৈস্তু হিতং চাত্র পরত্র চ| আগমঃ শাস্ত্রমাপ্তানামাপ্তাস্তত্ত্বার্থদর্শিনঃ”- ইতি||১৯-২০||

Adhikarana puShpikA · Śloka 19

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে নযনাভিঘাতচিকিত্সিতং নামৈকোনবিংশোঽধ্যাযঃ ||১৯||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে একোনবিংশোঽধ্যাযঃ||১৯||