16. pakṣmakōpapratiṣēdhādhyāyaḥ

Adhikarana 1 (1-2) · Śloka 2

অথাতঃ পক্ষ্মকোপপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

ছেদ্যরোগপ্রতিষেধানন্তরং পক্ষ্মকোপে চ্ছেদ্যকর্মসমবাযাত্ পক্ষ্মগতরোগপ্রতিষেধারম্ভো যুক্তোঽত আহ- অথাত ইত্যাদি| পক্ষ্ম বর্ত্মগতরোমমালিকা; কেচিত্ পক্ষ্মশব্দেন পক্ষ্মাশ্রযং বর্ত্ম কথযন্তি||১-২||

Adhikarana 2 (3-6) · Śloka 6

যাপ্যস্তু যো বর্ত্মভবো বিকারঃ পক্ষ্মপ্রকোপোঽভিহিতঃ পুরস্তাত্ | তত্রোপবিষ্টস্য নরস্য চর্ম বর্ত্মোপরিষ্টাদনুতির্যগেব ||৩|| ভ্রুবোরধস্তাত্ পরিমুচ্য ভাগৌ পক্ষ্মাশ্রিতং চৈকমতোঽবকৃন্তেত্ | কনীনকাপাঙ্গসমং সমন্তাদ্যবাকৃতি স্নিগ্ধতনোর্নরস্য ||৪|| উত্কৃত্য শস্ত্রেণ যবপ্রমাণং বালেন সীব্যেদ্ভিষগপ্রমত্তঃ | দত্ত্বা চ সর্পির্মধুনাঽবশেষং কুর্যাদ্বিধানং বিহিতং ব্রণে যত্ ||৫|| ললাটদেশে চ নিবদ্ধপট্টং প্রাক্স্যূতমত্রাপ্যপরং চ বদ্ধ্বা | স্থৈর্যং গতে চাপ্যথ শস্ত্রমার্গে বালান্ বিমুঞ্চেত্ কুশলোঽভিবীক্ষ্য ||৬||

পক্ষ্মকোপে শস্ত্রমগ্নিঃ ক্ষারো ভেষজমিতি চতুর্বিধং কর্ম; তত্রাদৌ শস্ত্রকর্ম নির্দিশন্নাহ- যাপ্য ইত্যাদি| পুরস্তাত্ বর্ত্মরোগবিজ্ঞানীযে| তত্র পক্ষ্মপ্রকোপে| স্নিগ্ধদেহস্যোপবিষ্টস্য নরস্য, ভ্রুবোরধস্তাদ্দ্বৌ ভাগৌ, তত্র পক্ষ্মাশ্রিতমেকং ভাগং বিমুচ্য কনীনকাপাঙ্গযোঃ সমং প্রদেশমনুলক্ষীকৃত্য, সমন্তাত্ সর্বতঃ ন তু ক্বচিদেব, এতেনোপপক্ষ্মমালাপ্রমাণেন বর্ত্মোপরিষ্টাদ্যবাকৃতি চর্ম তির্যক্ শস্ত্রেণ নিকৃন্তেত্, চর্ম নিকৃত্য তদশ্বাদীনাং বালেন সীব্যেত্| ততঃ সন্ধানার্থং মধু ঘৃতং চ দত্ত্বা, প্রাক্স্যূতং যত্তত্ অপরং যত্ স্যূত্বোদ্ধৃতং তত্ এতদ্বালাঞ্চলদ্বযেন ললাটে পট্টং বদ্ধ্বা ব্রণোক্তং বিধিং কুর্যাদিতি পিণ্ডার্থঃ| স্থৈর্যং গতে কঠিনীভূতে সংরূঢে ইত্যর্থঃ| শস্ত্রমার্গে ব্রণে, বালান্ সেবনবালান্, বিমুঞ্চেত্ স্যূতরন্ধ্রাত্ ক্রমেণাপকর্ষেদিত্যর্থঃ| কেচিত্ ‘বিমুঞ্চেত্’ ইত্যত্র ‘প্রকল্পযেত্’ ইতি পঠন্তি, প্রকল্পযেত্ কর্তর্যা চ্ছিন্দ্যাদিতি চ ব্যাখ্যানযন্তি||৩-৬||

Adhikarana 3 (7) · Śloka 7

এবং ন চেচ্ছাম্যতি তস্য বর্ত্ম নির্ভুজ্য দোষোপহতাং বলিং চ | ততোঽগ্নিনা বা প্রতিসারযেত্তাং ক্ষারেণ বা সম্যগবেক্ষ্য ধীরঃ ||৭||

এবমপ্যশাম্যতি পক্ষ্মকোপে উপপক্ষ্মমালাপরপর্যাযে কর্মান্তরমাহ- এবমিত্যাদি| নির্ভুজ্য উত্তানীকৃত্বেত্যর্থঃ| অবেক্ষ্য ‘শাস্ত্রম্’ ইতি শেষঃ||৭||

Adhikarana 4 (8) · Śloka 8

ছিত্বা সমং বাঽপ্যুপপক্ষ্মমালাং সম্যগ্গৃহীত্বা বডিশৈস্ত্রিভিস্তু | পথ্যাফলেন প্রতিসারযেত্তু ঘৃষ্টেন বা তৌবরকেণ সম্যক্ ||৮||

ক্ষারাগ্নিভ্যামপ্যপ্রশাম্যন্ত্যামুপপক্ষ্মমালাযাং বিধ্যন্তরমাহ- ছিত্ত্বা সমমিত্যাদি| ছিত্ত্বা দ্বিধা ভাবং নীত্বা, উত্পাট্যেত্যর্থঃ| সমম্ এককালম্| উপপক্ষ্মমালাং ‘দোষাঃ পক্ষ্মাশযগতাস্তীক্ষ্ণাগ্রাণি খরাণি চ’ ইত্যাদ্যুক্তলক্ষণাম্| পথ্যাফলেন জলঘৃষ্টেন প্রতিসারযেত্| কেচিত্ ‘পিষ্টেন’ ইতি পঠন্তি||৮||

Adhikarana 5 (9) · Śloka 9

চত্বার এতে বিধযো বিহন্তুং পক্ষ্মোপরোধং পৃথগেব শস্তাঃ | বিরেচনাশ্চ্যোতনধূমনস্যলেপাঞ্জনস্নেহরসক্রিযাশ্চ ||৯||

উক্তমেবোপসংহরন্নাহ- চত্বার ইত্যাদি| চত্বার এত ইতি শস্ত্রাগ্নিক্ষারভেষজানি| পক্ষ্মোপরোধং পক্ষ্মপ্রকোপম্| বিহন্তুং বিঘট্টযিতুং ন পুনঃ সর্বথা শমযিতুং, তস্য যাপ্যত্বাত্| তথাঽভিষ্যন্দোক্তা বিরেচনাদযো যথাবস্থমুপযুক্তাঃ পৃথগেব পক্ষ্মোপরোধং বিহন্তুং সমর্থাঃ| রসক্রিযাশ্চেত্যত্র চকারাদুপপক্ষ্মোত্পাটনম্||৯||

Adhikarana puShpikA · Śloka 16

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে পক্ষ্মগতরোগপ্রতিষেধো নাম ষোডশোঽধ্যাযঃ ||১৬||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে ষোডশোঽধ্যাযঃ||১৬||