47. pānātyayapratiṣēdhādhyāyaḥ

Adhikarana 1 (1-2) · Śloka 2

অথাতঃ পানাত্যযপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

মূর্চ্ছাপ্রতিষেধানন্তরং পিত্তপ্রধানসাম্যাত্ অসংবিত্তিজনকসাম্যাচ্চ পানাত্যযপ্রতিষেধারম্ভো যুক্ত ইত্যত আহ- অথাত ইত্যাদি| পানাত্যয ইত্যত্র আদিশব্দো লুপ্তো জ্ঞেযঃ, তেন পরমদাদীনাং গ্রহণম্||১-২||

Adhikarana 2 (3) · Śloka 3

মদ্যমুষ্ণং তথা তীক্ষ্ণং সূক্ষ্মং বিশদমেব চ | রূক্ষমাশুকরং চৈব ব্যবাযি চ বিকাশি চ ||৩||

তত্রাদৌ মদ্যগুণপ্রণযনং , এবঙ্গুণমপি মদ্যং মিথ্যোপযুক্তং পানাত্যযাদিকং করোতীতি প্রতিপাদনার্থম্ | মদ্যমিত্যাদি| আশুকরং শীঘ্রকারি| ব্যবাযি সর্বং দেহং ব্যাপ্য পশ্চাত্ পাকং যাতি| বিকাশি সন্ধিবন্ধবিমোচকম্| যদ্যপি সূত্রস্থানে মদ্যগুণা উক্তাস্তথাঽপ্যধিকখ্যাপনার্থমত্রাপ্যুক্তাঃ||৩||

Adhikarana 3 (4-5) · Śloka 5

ঔষ্ণ্যাচ্ছীতোপচারং তত্তৈক্ষ্ণ্যাদ্ধন্তি মনোগতিম্ | বিশত্যবযবান্ সৌক্ষ্ম্যাদ্বৈশদ্যাত্কফশুক্রনুত্ ||৪|| মারুতং কোপযেদ্রৌক্ষ্যাদাশুত্বাচ্চাশুকর্মকৃত্ | হর্ষদং চ ব্যবাযিত্বাদ্বিকাশিত্বাদ্বিসর্পতি ||৫||

মদ্যগুণানভিধায কর্মাণ্যাহ- ঔষ্ণ্যাদিত্যাদি| ‘ঔষ্ণ্যাচ্ছীতোপচারম্’ ইত্যনেন পিত্তকোপিত্বং সূচিতম্| মনোগতিং বাহ্যাধ্যাত্মিকাং করণপ্রাপ্তিম্| অবযবান্ হৃদযৌজঃপ্রভৃতীন্| হর্ষদং মনোহর্ষকরং; ন তু পুংস্ত্বদং, শুক্রহরত্বাত্||৪-৫||

Adhikarana 4 (6) · Śloka 6

তদম্লং রসতঃ প্রোক্তং লঘু রোচনদীপনম্ | কেচিল্লবণবর্জ্যাংস্তু রসানত্রাদিশন্তি হি ||৬||

মদ্যস্য কর্মাভিধায রসমাহ- তদম্লং রসত ইত্যাদি| তত্ মদ্যম্| অম্লম্ অম্লরসোত্কটং, তেন ইতরেঽপি পঞ্চরসা অনুরসত্বেন মদ্যে বোদ্ধব্যাঃ| তথা চোক্তম্,- “মদ্যস্য ষড্রসত্বেঽপি ব্যক্তোঽম্লো রস উচ্যতে”- ইতি| একীযমতমাহ- কেচিল্লবণবর্জ্যানিত্যাদি||৬||

Adhikarana 5 (7) · Śloka 7

স্নিগ্ধৈস্তদন্নৈর্মাংসৈশ্চ ভক্ষ্যৈশ্চ সহ সেবিতম্ | ভবেদাযুঃপ্রকর্ষায বলাযোপচযায চ ||৭||

এবঙ্গুণমপি মদ্যং যথা সেব্যমানং গুণায ভবতি তথাঽঽহ স্নিগ্ধৈস্তদন্নৈরিত্যাদি| স্নিগ্ধৈরিত্যুপলক্ষণং; তেন ইতরেঽপি মদ্যবিপরীতগুণাঃ শীতাদযো জ্ঞেযাঃ| তত্ মদ্যম্| বলায ওজসে, উপচযায চ মাংসোপচযায||৭||

Adhikarana 6 (8) · Śloka 8

কাম্যতা মনসস্তুষ্টির্ধৈর্যং তেজোঽতিবিক্রমঃ | বিধিবত্ সেব্যমানে তু মদ্যে সন্নিহিতা গুণাঃ ||৮||

অনন্তরোক্তবিধিনা সেব্যমানেন মদ্যেন কাম্যতাদযোঽপি গুণা ভবন্তীতি দর্শযন্নাহ- কাম্যতেত্যাদি| কাম্যতা কমনীযত্বম্| তেজঃ প্রভা| সন্নিহিতাঃ সম্যগবস্থিতাঃ||৮||

Adhikarana 7 (9) · Śloka 9

তদেবানন্নমজ্ঞেন সেব্যমানমমাত্রযা | কাযাগ্নিনা হ্যগ্নিসমং সমেত্য কুরুতে মদম্ ||৯||

বিধিরহিতং সেব্যমানং মদ্যং যত্ করোতি তদাহ- তদেবানন্নমিত্যাদি| তদেব মদ্যম্, অগ্নিসমং বহ্নিতুল্যম্, অজ্ঞেন উক্তমদ্যপানবিধানানভিজ্ঞেন, অনন্নম্ অন্নরহিতম্ অতিমাত্রযা চ সেব্যমানং, কাযাগ্নিনা জঠরানলেন, সমেত্য মিলিত্বা, মদং কুরুতে ইতি পিণ্ডার্থঃ||৯||

Adhikarana 8 (10) · Śloka 10

মদেন করণানাং তু ভাবান্যত্বে কৃতে সতি | নিগূঢমপি ভাবং স্বং প্রকাশীকুরুতেঽবশঃ ||১০||

মদেনাবশঃ পুরুষো যত্ করোতি তদাহ- মদেনেত্যাদি| করণানাং মনোবুদ্ধীন্দ্রিযাণাং, ভাবান্যত্বে স্বরূপান্যথাত্বে কৃতে সতি, নিগূঢমপি সংবৃতমপি, ভাবম্ অভিপ্রাযং, স্বম্ আত্মীযং প্রকাশীকুরুতে প্রকটীকুরুতে, অবশো মদপরবশ ইতি পিণ্ডার্থঃ||১০||

Adhikarana 9 (11) · Śloka 11

ত্র্যবস্থশ্চ মদো জ্ঞেযঃ পূর্বো মধ্যোঽথ পশ্চিমঃ |১১|

অথ কতিপ্রকারো মদ ইত্যাহ- ত্র্যবস্থশ্চেত্যাদি| ত্র্যবস্থঃ ত্রিপ্রকারঃ| তে চ ত্রযঃ প্রকারাঃ পূর্বাদযঃ|১১|-

Adhikarana 10 (11) · Śloka 11

পূর্বে বীর্যরতিপ্রীতিহর্ষভাষ্যাদিবর্ধনম্ ||১১||

পূর্বমদলক্ষণমাহ- পূর্বে ইত্যাদি| পূর্বে প্রথমে মদে, বীর্যম্ উত্সাহলক্ষণং, রতিঃ হর্ষঃ, প্রীতিঃ তৃপ্তিঃ, হর্ষঃ তুষ্টিঃ; আদিশব্দাত্ হাস্যাদযঃ||১১||

Adhikarana 11 (12) · Śloka 12

প্রলাপো মধ্যমে মোহো যুক্তাযুক্তক্রিযাস্তথা |১২|

মধ্যমদলক্ষণমাহ- প্রলাপ ইত্যাদি| যুক্তাযুক্তক্রিযা ইতি কদাচিদযুক্তাঃ কদাচিদ্যুক্তাঃ ক্রিযা ইত্যর্থঃ|১২|-

Adhikarana 12 (12) · Śloka 12

বিসঞ্জ্ঞঃ পশ্চিমে শেতে নষ্টকর্মক্রিযাগুণঃ ||১২||

পশ্চিমমদলক্ষণমাহ- বিসঞ্জ্ঞ ইত্যাদি| পশ্চিমে পশ্চিমমদে| নষ্টকর্মক্রিযাগুণ ইতি নষ্টানি কর্মাণি ক্রিযাগুণাঃ ক্রিযাফলানি চ যস্য স তথা; অত্র গুণশব্দঃ ফলে বর্ততে| কেচিত্, ‘বুদ্ধিস্মৃতিপ্রীতিকরঃ সুখশ্চ পানান্ননিদ্রারুচিবৃদ্ধিহেতুঃ| সম্পাঠগীতস্বরবর্ধনশ্চ প্রোক্তোঽতিরম্যঃ প্রথমো মদো হি|| অব্যক্তবুদ্ধিস্মৃতিবাগ্বিচেষ্টঃ সোন্মত্তলীলাক্রুতিরপ্রশান্তঃ| আলস্যনিদ্রাভিহতো মুহুশ্চ মধ্যেন মত্তঃ পুরুষো মদেন|| গচ্ছেদগম্যাং ন গুরূংশ্চ মন্যেত্ খাদেদভক্ষ্যাণি চ নষ্টসঞ্জ্ঞঃ| ব্রূযাচ্চ গুহ্যানি হৃদিস্থিতানি মত্তো মদেন প্রবরেণ মর্ত্যঃ’ ইতি পঠন্তি; ব্যাখ্যানযন্তি চ- অব্যক্তবুদ্ধিস্মৃতিবাগিতি অস্পষ্টবুদ্ধিস্মরণবচনঃ; বিচেষ্টো বিগতকাযপরিস্পন্দঃ, সোন্মত্তলীলাকৃতিরিতি সহ উন্মত্তলীলাকৃতিভ্যাং বর্ততে ইতি তথা উন্মত্তক্রীডাকার ইত্যর্থঃ| অযং পাঠঃ পূর্বো বা পঠনীযঃ, ন তু পাঠদ্বযং পঠনীযম্||১২||

Adhikarana 13 (13) · Śloka 13

শ্লৈষ্মিকানল্পপিত্তাংশ্চ স্নিগ্ধান্মাত্রোপসেবিনঃ | পানং ন বাধতেঽত্যর্থং বিপরীতাংস্তু বাধতে ||১৩||

ইদানীং পুরুষবিশেষেণ সেব্যমানং মদ্যং নাতিবাধাং কুরুতে ইত্যাহ- শ্লৈষ্মিকানল্পপিত্তাংশ্চেত্যাদি| বিপরীতান্ পিত্তাধিকরূক্ষাতিমাত্রসেবিনঃ||১৩||

Adhikarana 14 (14) · Śloka 14

নির্ভক্তমেকান্তত এব মদ্যং নিষেব্যমাণং মনুজেন নিত্যম্ | উত্পাদযেত্ কষ্টতমান্ বিকারানাপাদযেচ্চাপি শরীরমেদম্ ||১৪||

নির্ভক্তমেকান্তত এব মদ্যমিত্যাদি| নির্ভক্তম্ আহাররহিতম্| শরীরভেদং দেহনাশম্| যদ্যপ্যযমর্থস্তদেবানন্নমিত্যাদিনৈবোক্তঃ তথাঽপি নির্ভক্তমিতি যদত্র পুনরুক্তং তন্নির্ভক্তপানস্যাতিগর্হিতত্বখ্যাপনার্থম্||১৪||

Adhikarana 15 (15-16) · Śloka 26

ক্রুদ্ধেন ভীতেন পিপাসিতেন শোকাভিতপ্তেন বুভুক্ষিতেন | ব্যাযামভারাধ্বপরিক্ষতেন বেগাবরোধাভিহতেন চাপি ||১৫|| অত্যম্লভক্ষ্যাবততোদরেণ সাজীর্ণভুক্তেন তথাঽবলেন | উষ্ণাভিতপ্তেন চ সেব্যমানং করোতি মদ্যং বিবিধান্ বিকারান্ ||২৬||

ইদানীং ক্রুদ্ধাদিভিঃ সেব্যমানং মদ্যং বিকারান্ জনযতীতি প্রতিপাদযিতুমাহ- ক্রুদ্ধেনেত্যাদি| ব্যাযামভারাধ্বপরিক্ষতেনেতি ব্যাযামাদিভিঃ পরিখিন্নেনেত্যর্থঃ| অভিহতেন পীডিতেন| অত্যম্লভক্ষ্যাবততোদরেণ অত্যম্লভক্ষণাবৃতজঠরেণ||১৫-১৬||

Adhikarana 16 (17) · Śloka 17

পানাত্যযং পরমদং পানাজীর্ণমথাপি বা | পানবিভ্রমমুগ্রং চ তেষাং বক্ষ্যমি লক্ষণম্ ||১৭||

কে তে বিবিধা বিকারাস্তানাহ- পানাত্যযমিত্যাদি||১৭||

Adhikarana 17 (18) · Śloka 19

স্তম্ভাঙ্গমর্দহৃদযগ্রহতোদকম্পাঃ পানাত্যযেঽনিলকৃতে শিরসো রুজশ্চ | স্বেদপ্রলাপমুখশোষণদাহমূর্চ্ছাঃ পিত্তাত্মকে বদনলোচনপীততা চ ||১৮|| শ্লেষ্মাত্মকে বমথুশীতকফপ্রসেকাঃ সর্বাত্মকে ভবতি সর্ববিকারসম্পত্ |১৯|

ইদানীং পানাত্যযস্য বাতাদিভেদেন লক্ষণমাহ- স্তম্ভেত্যাদি| স্তম্ভঃ স্তব্ধতা|১৮|-

Adhikarana 18 (19) · Śloka 20

ঊষ্মাণমঙ্গগুরুতাং বিরসাননত্বং শ্লেষ্মাধিকত্বমরুচিং মলমূত্রসঙ্গম্ ||১৯|| লিঙ্গং পরস্য তু মদস্য বদন্তি তজ্জ্ঞাস্তৃষ্ণাং রুজাং শিরসি সন্ধিষু চাপি ভেদম্ |২০|

পরমদলক্ষণমাহ- ঊষ্মাণমিত্যাদি| বিরসাননত্বং বিরসমুখত্বম্| শ্লেষ্মাধিকত্বং কফোত্কর্ষত্বম্ | পরস্য তু মদস্য পরমদস্যেত্যর্থঃ| ভেদমিতি ভেদ ইব ভেদঃ| পরমদাদীনাং ত্রযাণাং দোষত্রযজনিতত্বাত্ পৃথগ্দোষলিঙ্গং নোক্তম্||১৯||-

Adhikarana 19 (20) · Śloka 21

আধ্মানমুদ্গিরণমম্লরসো বিদাহোঽজীর্ণস্য পানজনিতস্য বদন্তি লিঙ্গম্ ||২০|| জ্ঞেযানি তত্র ভিষজা সুবিনিশ্চিতানি পিত্তপ্রকোপজনিতানি চ কারণানি |২১|

পানাজীর্ণলক্ষণমাহ- আধ্মানমিত্যাদি| উদ্গিরণং ছর্দিঃ| অজীর্ণস্য পানজনিতস্য পানাজীর্ণস্য| কারণানি লক্ষণানি, কারণস্যাপি ব্যাধিলক্ষণত্বাত্||২০||-

Adhikarana 20 (21) · Śloka 22

হৃদ্গাত্রতোদবমথুজ্বরকণ্ঠধূমমূর্চ্ছাকফস্রবণমূর্ধরুজো বিদাহঃ ||২১|| দ্বেষঃ সুরান্নবিকৃতেষু চ তেষু তেষু তং পানবিভ্রমমুশন্ত্যখিলেন ধীরাঃ |২২|

পানবিভ্রমলক্ষণমাহ- হৃদিত্যাদি| বমথুঃ ছর্দিঃ, কণ্ঠধূমঃ কণ্ঠে ধূমোদ্বমনমিব , মূর্ধরুজা শিরঃপীডা||২১||-

Adhikarana 21 (22) · Śloka 23

হীনোত্তরৌষ্ঠমতিশীতমমন্দদাহং তৈলপ্রভাস্যমতি(পি)পানহতং বিজহ্যাত্ ||২২|| জিহ্বৌষ্ঠদন্তমসিতং ত্বথবাঽপি নীলং পীতে চ যস্য নযনে রুধিরপ্রভে চ |২৩|

ইদানীমসাধ্যলক্ষণমাহ- হীনোত্তরৌষ্ঠমিত্যাদি| হীনোত্তরৌষ্ঠঃ স্বভাবৌষ্ঠাদল্পৌষ্ঠঃ| অমন্দদাহং তীব্রদাহম্| কদাচিদতিশীতং কদাচিত্তীব্রদাহম্| পানহতং পানপীডিতম্| বিজহ্যাত্ ত্যজেত্| অসিতং কৃষ্ণম্| পীতে পীতবর্ণে||২২||-

Adhikarana 22 (23) · Śloka 23

হিক্কাজ্বরৌ বমথুবেপথুপার্শ্বশূলাঃ কাসভ্রমাবপি চ পানহতং ভজন্তে ||২৩||

ইদানীমুপদ্রবানাহ- হিক্কাজ্বরাবিত্যাদি| বমথুঃ ছর্দিঃ, বেপথুঃ কম্পঃ||২৩||

Adhikarana 23 (24) · Śloka 24

তেষাং নিবারণমিদং হি মযোচ্যমানং ব্যক্তাভিধানমখিলেন বিধিং নিবোধ |২৪|

তেষাং নিবারণমিত্যাদি| তেষাং পানাত্যযাদীনাম্|২৪|-

Adhikarana 24 (24) · Śloka 25

মদ্যং তু চুক্রমরিচার্দ্রকদীপ্যকুষ্ঠসৌবর্চলাযুতমলং পবনস্য শান্ত্যৈ ||২৪|| পৃথ্বীকদীপ্যকমহৌষধহিঙ্গুভির্বা সৌবর্চলেন চ যুতং বিতরেত্ সুখায |২৫|

তমেব বিধিমাহ- মদ্যমিত্যাদি| দীপ্যকঃ অজমোদা, যবানীত্যপরে| সৌবর্চলাযুতম্ ঈষত্সৌবর্চলযুক্তম্| অলং সমর্থম্| পবনস্য বাতজমদাত্যযস্য| বিতরেত্ দদ্যাত্||২৪||-

Adhikarana 25 (25) · Śloka 26

আম্রাতকাম্রফলদাডিমমাতুলুঙ্গৈঃ কুর্যাচ্ছুভান্যপি চ ষাডবপানকানি ||২৫|| সেবেত বা ফলরসোপহিতান্ রসাদীনানূপবর্গপিশিতান্যপি গন্ধবন্তি |২৬|

কিং মদাত্যযে মদ্যমেব সেব্যমুতান্যদপীত্যাহ- আম্রাতকাম্রেত্যাদি| দাডিমমত্র অম্লমেব| ষাডবো যূষবিশেষঃ| আম্রাতকাদিভিঃ ক্বথিতৈরিক্ষুবিকারযুতৈঃ ষাডবঃ কার্যঃ| তথা চ তন্ত্রান্তরে ষাডবকল্পনা,- “যুতমিক্ষুবিকারেণ ক্বথিতং চূতজং ফলম্| ঘৃতশুণ্ঠীতিলযুতং বিজ্ঞেযো ঘনষাডবঃ”- ইতি| ফলরসোপহিতান্ মাতুলুঙ্গরসযুক্তান্| রসাদীন্ মাংসরসযূষাদীন্| আনূপবর্গপিশিতানি কূলচরাদিবর্গমাংসানি| গন্ধবন্তীতি প্রভূতহিঙ্গুজীরকাদিযুতানি||২৫||-

Adhikarana 26 (26) · Śloka 26

পিত্তাত্মকে মধুরবর্গকষাযমিশ্রং মদ্যং হিতং সমধুশর্করমিষ্টগন্ধম্ ||২৬||

পিত্তজমদাত্যযচিকিত্সামাহ- পিত্তাত্মকে মধুরবর্গকষাযমিশ্রমিত্যাদি| মধুরবর্গো গুডূচীবর্জিতঃ কাকোল্যাদিঃ, তন্ত্রান্তরসংবাদাত্| ইষ্টগন্ধম্ এলাত্বক্পত্রকাদ্যৈঃ সুরভীকৃতম্||২৬||

Adhikarana 27 (27) · Śloka 27

পীত্বা চ মদ্যমপি চেক্ষুরসপ্রগাঢং নিঃশেষতঃ ক্ষণমবস্থিতমুল্লিখেচ্চ | লাবৈণতিত্তিরিরসাংশ্চ পিবেদনম্লান্ মৌদ্গান্ সুখায সঘৃতান্ সসিতাংশ্চ যূষান্ ||২৭||

পিত্তাত্মকে মদাত্যযে বমনমাহ- পীত্বেত্যাদি| উল্লিখেত্ বমেত্| যদ্যপি পিত্তে বমনং ন কার্যং তথাঽপি পিত্তস্য কফস্থানগতত্বাদ্বমনং হিতমেব, ব্যাধিপ্রত্যনীকত্বাদ্বা| কিং পিত্তাত্মকে এতদেব কার্যমুতান্যদপীত্যাহ- লাবৈণতিত্তিরিরসানিত্যাদি| কেচিত্ ‘মৌদ্গান্ সুখায সঘৃতান্ সসিতাংশ্চ যূষান্’ ইত্যত্র ‘মৌদ্গান্ সশর্করঘৃতান্ স হিতায যূষান্’ ইতি পঠন্তি; স ইতি পিত্তপানাত্যযীতি চ ব্যাখ্যানযন্তি||২৭||

Adhikarana 28 (28) · Śloka 28

পানাত্যযে কফকৃতে কফমুল্লিখেচ্চ মদ্যেন বিম্বিবিদুলোদকসংযুতেন | সেবেত তিক্তকটুকাংশ্চ রসানুদারান্ যূষাংশ্চ তিক্তকটুকোপহিতান্ হিতায ||২৮||

কফজমদাত্যযচিকিত্সামাহ- পানাত্যযে কফকৃতে ইত্যাদি| বিম্বী ওষ্ঠোপমফলা বিদুলো বেতসঃ| কফমদাত্যযেঽপরমপ্যৌষধমাহ- সেবেতেত্যাদি| তিক্তকটুকান্ তিক্তকটুকদ্রব্যসংস্কৃতান্| রসান্ মাংসরসান্; উদারান্ জাঙ্গলজান্, মেদস্কানিত্যর্থঃ| যূষান্ মুদ্গাদিযূষান্| তিক্তানি দুরালভাদীনি, কটুকানি পিপ্পল্যাদীনি, উপহিতান্ সংস্কৃতান্||২৮||

Adhikarana 29 (29) · Śloka 29

পথ্যং যবান্নবিকৃতানি চ জাঙ্গলানি শ্লেষ্মঘ্নমন্যদপি যচ্চ নিরত্যযং স্যাত্ |২৯|

শ্লেষ্মজপানাত্যযেঽপরমপি যদ্ধিতং তদাহ- পথ্যমিত্যাদি| পথ্যং হিতম্| যবান্নবিকৃতানি যবান্নানি বিবিধপ্রকারৈঃ কৃতানীত্যর্থঃ| অত্র অন্নশব্দঃ পেযলেহ্যব্যবচ্ছেদকঃ| জাঙ্গলানি জাঙ্গলমাংসানি| নিরত্যযং নির্দোষম্|২৯|-

Adhikarana 30 (29) · Śloka 29

কুর্যাচ্চ সর্বমথ সর্বভবে বিধানং দ্বন্দ্বোদ্ভবে দ্বযমবেক্ষ্য যথাপ্রধানম্ ||২৯||

সন্নিপাতজদ্বন্দ্বজমদাত্যযচিকিত্সামাহ- কুর্যাদিত্যাদি| সর্বং প্রত্যেকদোষজপানাত্যযচিকিত্সিতম্| সর্বভবে সন্নিপাতোদ্ভবে| দ্বন্দ্বভবে দ্বন্দ্বজে| যথাপ্রধানং যোগপ্রধানমিত্যর্থঃ; এতেন সমসন্নিপাতে সর্বপ্রধানং কার্যম্, একতমাধিকে চ তত্প্রধানমিত্যর্থঃ; এবং দ্বন্দ্বজেঽপি||২৯||

Adhikarana 31 (30) · Śloka 30

সামান্যমন্যদপি যচ্চ সমগ্রমগ্র্যং বক্ষ্যামি যচ্চ মনসো মদকৃত্ সুখং চ |৩০|

সামান্যমন্যদপীত্যাদি| অন্যদপি যত্ সামান্যং মনসো হর্ষকৃত্ বক্ষ্যামি তত্ সমগ্রমপি সর্বেষামগ্র্যং শ্রেষ্ঠং সুখং চ, সুখহেতুত্বাদিত্যর্থঃ|৩০|-

Adhikarana 32 (30-33) · Śloka 34

ত্বঙ্গাগপুষ্পমগধৈলমধূকধান্যৈঃ শ্লক্ষ্ণৈরজাজিমরিচৈশ্চ কৃতং সমাংশৈঃ ||৩০|| পানং কপিত্থরসবারিপরূষকাঢ্যং পানাত্যযেষু বিধিবত্স্রুতমম্বরান্তে | হ্রীবেরপদ্মপরিপেলবসম্প্রযুক্তৈঃ পুষ্পৈর্বিলিপ্য করবীরজলোদ্ভবৈশ্চ ||৩১|| পিষ্টৈঃ সপদ্মকযুতৈরপি সারিবাদ্যৈঃ সেকং জলৈশ্চ বিতরেদমলৈঃ সুশীতৈঃ | ত্বক্পত্রচোচমরিচৈলভুজঙ্গপুষ্পশ্লেষ্মাতকপ্রসববল্কগুডৈরুপেতম্ ||৩২|| দ্রাক্ষাযুতং হৃতমলং মদিরামযার্তৈস্তত্পানকং শুচি সুগন্ধি নরৈর্নিষেব্যম্ | পিষ্ট্বা পিবেচ্চ মধুকং কটুরোহিণীং চ দ্রাক্ষাং চ মূলমসকৃত্ ত্রপুষীভবং যত্ ||৩৩|| কার্পাসিনীমথ চ নাগবলাং চ তুল্যাং পীত্বা সুখী ভবতি সাধু সুবর্চলাং চ |৩৪|

পানাত্যযচিকিত্সামাহ- ত্বগিত্যাদি| নাগপুষ্পং নাগকেশরম্, এলা সূক্ষ্মৈলা, অজাজী উত্তরাপথে প্রসিদ্ধো জীরকবিশেষঃ| সমাংশৈঃ তুল্যভাগৈঃ| পানং পানকম্| কপিত্থরসঃ কপিত্থস্বরসঃ| স্রুতং গালিতম্| অম্বরান্তে বস্ত্রান্তে| হ্রীবেরেত্যাদি| হ্রীবেরাদিযুক্তৈঃ করবীরজলোদ্ভবৈঃ পুষ্পৈঃ পিষ্টৈর্বিলিপ্য পদ্মকযুতৈঃ সারিবাদিভিশ্চ প্রলিপ্য, অমলৈঃ সুশীতৈশ্চ জলৈঃ সেকং বিতরেত্ দদ্যাদিতি পিণ্ডার্থঃ| হ্রীবেরঃ বালকম্| পদ্মকং পদ্মকাষ্ঠং, জলোদ্ভবপুষ্পত্বেন পদ্মস্য পরিগ্রহাত্| কার্তিককুণ্ডস্তু ‘সপদ্মকযুতৈঃ’ ইত্যনেন পদ্মকসহিতপ্রিযঙ্গ্বাদ্যভিধায তেন যুক্তৈঃ করবীরাদিপুষ্পৈর্হ্রীবেরাদিযুক্তৈরিতি ব্যাখ্যানযতি, পদ্মকং জলজং মন্যতে| পরিপেলবো বন্যকঃ| জলোদ্ভবৈঃ নীলোত্পলপ্রভৃতিভিঃ| সপদ্মকযুতৈরপি সারিবাদ্যৈরিতি সপদ্মকঃ পদ্মকসহিতঃ প্রিযঙ্গ্বাদিঃ, তেন যুতৈঃ সারিবাদিভিরিত্যর্থঃ| ত্বগিত্যাদি|- ত্বক্ বনবাসিকাত্বক্| শ্লেষ্মাতকপ্রসবং বহুবারপুষ্পম্| হৃতমলং বস্ত্রগালিতম্| মদিরামযার্তৈঃ পানাত্যযপীডিতৈঃ| সুগন্ধিশোভনগন্ধি| কেচিত্ ত্বক্পত্রশব্দেন ত্বক্পত্রিকামাহুঃ| পিষ্ট্বেত্যাদি| অসকৃদিতি সাধ্বিতি চ পদং পিষ্ট্বেত্যত্র সম্বন্ধনীযম্| মধুকাদিস্ত্রপুসীমূলান্ত একো যোগঃ| কার্পাসিনীমিত্যাদিঃ সাধুসুবর্চলাং চেত্যন্তো দ্বিতীযঃ| কার্পাসিনী বনকার্পাসিনী| সুবর্চলা সূর্যভক্তা| কার্পাসিনীমথ চেত্যত্র কার্পাসমেবমথেতি কেচিত্ পঠন্তি, কার্পাসং কার্পাসীমূলং, এবমসকৃত্ পিষ্ট্বেতি চ ব্যাখ্যানযন্তি||৩০-৩৩||-

Adhikarana 33 (34) · Śloka 35

কাশ্মর্যদারুবিডদাডিমপিপ্পলীষু দ্রাক্ষান্বিতাসু কৃতমম্বুনি পানকং যত্ ||৩৪|| তদ্বীজপূরকরসাযুতমাশু পীতং শান্তিং পরাং পরমদে ত্বচিরাত্ করোতি |৩৫|

পরমদে চিকিত্সামাহ- কাশ্মর্যেত্যাদি| কাশ্মর্যং গম্ভারীফলং, কৃতং সংস্কৃতং, অম্বুনি পানীযে||৩৪||-

Adhikarana 34 (35-36) · Śloka 36

দ্রাক্ষাসিতামধুকজীরকধান্যকৃষ্ণাস্বেবং কৃতং ত্রিবৃতযা চ পিবেত্তথৈব ||৩৫|| সৌবর্চলাযুতমুদাররসং ফলাম্লং ভার্গীশৃতেন চ জলেন হিতোঽবসেকঃ ||৩৬||

পরমদে পানকান্তরমাহ- দ্রাক্ষেত্যাদি| দ্রাক্ষাদিষু দ্রব্যেষু এবং বীজপূরকরসসংস্কারেণ কৃতং পানকং ত্রিবৃতযা ত্রিজটযা চ কৃতং পানকং পিবেত্| তথৈব সৌবর্চলাযুতমিত্যাদি|- উদাররসং জাঙ্গলমাংসরসং, সৌবর্চলাযুতম্ ঈষত্সৌবর্চলাযুতং, দাডিমাদ্যম্লফলেনাম্লং তথৈব পিবেদিত্যর্থঃ| অবসেকঃ পরিষেকঃ||৩৫-৩৬||

Adhikarana 35 (37) · Śloka 37

ইক্ষ্বাকুধামার্গববৃক্ষকাণি কাকাহ্বযোদুম্বরিকাশ্চ দুগ্ধে | বিপাচ্য তস্যাঞ্জলিনা বমেদ্ধি মদ্যং পিবেচ্চাহ্নি গতে ত্বজীর্ণে ||৩৭||

পানাজীর্ণচিকিত্সামাহ- ইক্ষ্বাক্বিত্যাদি| ইক্ষ্বাক্বাদীনি দ্রব্যাণি ক্ষীরপাকবিধানেন দুগ্ধে বিপাচ্য তস্য কুডবেনাজীর্ণে পানাজীর্ণে বমেত, ততশ্চ অহ্নি দিবসে গতে অতীতে সতি মদ্যং পিবেত্ অগ্নিদীপনার্থম্| ইক্ষাকুঃ তিক্তালাবূঃ| ধামার্গবঃ পীতঘোষঃ| বৃক্ষকঃ কুটজফলম্| কাকাহ্বযা উদুম্বরিকাগো(কা)ষ্ঠোদুম্বরিকা| অন্যে গতে ত্বজীর্ণে অপগতে পানাজীর্ণে ইতি ব্যাখ্যানযন্তি||৩৭||

Adhikarana 36 (38) · Śloka 39

ত্বক্পিপ্পলীভুজগপুষ্পবিডৈরুপেতং সেবেত হিঙ্গুমরিচৈলযুতং ফলাম্লম্ | উষ্ণাম্বুসৈন্ধবযুতাস্ত্বথবা বিডত্বক্চব্যৈলহিঙ্গুমগধাফলমূলশুণ্ঠীঃ ||৩৮|| হৃদ্যৈঃ খডৈরপি চ ভোজনমত্র শস্তং... |৩৯|

কিম্মযং মদ্যং পানাজীর্ণে পিবেদিত্যাহ- ত্বগিত্যাদি| ত্বক্পিপ্পলীপ্রভৃতিযুতং মদ্যং সেবেত, তথা হিঙ্গুমরিচাদিযুতং মদ্যং সেবেত| ভুজগপুষ্পং নাগপুষ্পম্| ফলাম্লং দাডিমবীজপূরকাদিভিরম্লীকৃতং মদ্যম্| উষ্ণাম্বুসৈন্ধবযুতা ইত্যাদি| অত্রাপি সেবেতেতি সম্বধ্যতে| মগধাফলমূলমিতি পিপ্পল্যাঃ ফলমূলমিত্যর্থঃ| ভোজনমাহ- হৃদ্যৈরিত্যাদি| খডা যূষবিশেষাঃ| অত্র পানাজীর্ণে| ‘হৃদ্যৈঃ’ ইত্যত্র ‘মদ্যৈঃ’ ইত্যন্যে পঠন্তি| অপরে ‘খডৈঃ’ ইত্যত্র ‘ফলৈঃ’ ইতি পঠন্তি| ‘বিডত্বক্’ ইত্যত্র ‘যথোক্তং’ ইতি কেচিত্ পঠন্তি||৩৮||-

Adhikarana 37 (39-41) · Śloka 41

... দ্রাক্ষাকপিত্থফলদাডিমপানকং যত্ | তত্ পানবিভ্রমহরং মধুশর্করাঢ্যমাম্রাতকোলরসপানকমেব চাপি ||৩৯|| খর্জূরবেত্রককরীরপরূষকেষু দ্রাক্ষাত্রিবৃত্সু চ কৃতং সসিতং হিমং বা | শ্রীপর্ণিযুক্তমথবা তু পিবেদিমানি যষ্ট্যাহ্বযোত্পলহিমাম্বুবিমিশ্রিতানি ||৪০|| ক্ষীরিপ্রবালবিসজীরকনাগপুষ্পপত্রৈলবালুসিতসারিবপদ্মকানি | আম্রাতভব্যকরমর্দকপিত্থকোলবৃক্ষাম্লবেত্রফলজীরকদাডিমানি ||৪১||

পানবিভ্রমচিকিত্সামাহ- দ্রাক্ষাকপিত্থেত্যাদি| অত্র ফলশব্দেন বিশিষ্টানি মাতুলুঙ্গাদিফলানি গৃহ্যন্তে| ন কেবলং দ্রাক্ষাদিপানকং মধুশর্করাঢ্যং পানবিভ্রমে শস্তম্, আম্রাতকোলরসপানকমপি| অথবা খর্জূরাদিষু কৃতং সংস্কৃতং সশর্করং শ্রীপর্ণীযুক্তং হিমং পানকং পানবিভ্রমে শস্তম্| করীরো মরুদেশজঃ, তস্য ফলম্| শ্রীপর্ণীযুক্তং কাশ্মরীফলযুক্তম্| অথবেত্যাদি|- অথবা ইমানি ক্ষীরিপ্রবালাদীনি দাডিমান্তানি যষ্ট্যাহ্বযোত্পলহিমাম্বুবিমিশ্রিতানি অত্র পানবিভ্রমে পিবেত্| যষ্ট্যাহ্বযোত্পলহিমাম্বুবিমিশ্রিতানীতি যষ্টীমধুনীলোত্পলযুক্তং যত্ হিমাম্বু তেন বিমিশ্রিতানীত্যর্থঃ| ক্ষীরিপ্রবালা বটাদিপল্লবাঃ| ভব্যং তালফলপ্রমাণম্ উত্তরাপথজম্, অন্যে কর্মরঙ্গমাহুঃ||৩৯-৪১||

Adhikarana 38 (42) · Śloka 42

সেবেত বা মরিচজীরকনাগপুষ্পত্বক্পত্রবিশ্বচবিকৈলযুতান্ রসাংশ্চ | সূক্ষ্মাম্বরস্রুতহিমাংশ্চ সুগন্ধিগন্ধান্ পানোদ্ভবান্নুদতি সপ্তগদানশেষান্ ||৪২||

ইদানীং পানাত্যযাদীনাং চিকিত্সামাহ- সেবেতেত্যাদি| রসান্ মাংসরসান্| সমগ্রান্ সম্পূর্ণান্; সম্পূর্ণত্বং চৈষাং মরিচাদিভিঃ সর্বৈরেবান্বিতত্বম্| সূক্ষ্মাম্বরস্রুতহিমান্ সূক্ষ্মবস্ত্রগালিতশীতানিত্যর্থঃ| সুগন্ধিগন্ধান্ অত্যর্থমগুর্বাদিধূপিতান্| নুদতি স্ফোটযতি| পানোদ্ভবান্ সপ্তগদান্ চত্বারো মদাত্যযাঃ, ত্রযশ্চ পরমদপানাজীর্ণপানবিভ্রমাঃ, পানাত্যযপ্রভবত্বাত্তেষাং; এবং সপ্ত||৪২||

Adhikarana 39 (43-44) · Śloka 44

পঞ্চেন্দ্রিযার্থবিষযা মৃদুপানযোগা হৃদ্যাঃ সুখাশ্চ মনসঃ সততং নিষেব্যাঃ | পানাত্যযেষু বিকটোরুনিতম্ববত্যঃ পীনোন্নতস্তনভরানতমধ্যদেশাঃ ||৪৩|| প্রৌঢাঃ স্ত্রিযোঽভিনবযৌবনপীনগাত্র্যঃ সেব্যাশ্চ পঞ্চবিষযাতিশযস্বভাবাঃ ||৪৪||

এবং পানাত্যযাদীনাং চিকিত্সিতমভিধাযাধুনা পানাত্যযচিকিত্সামেবাহ- পঞ্চেন্দ্রিযার্থবিষযা ইত্যাদি| পঞ্চেন্দ্রিযার্থবিষযা ইতি পঞ্চেন্দ্রিযার্থাঃ শব্দস্পর্শরূপরসগন্ধাঃ, তেষাং বিষযাঃ করণানি| মৃদুপানযোগাঃ মৃদুমদ্যযোগাঃ; তে চ পৈষ্টিকগৌডিকমাধ্বীকাদযঃ| হৃদ্যা হৃদযহিতা হৃদযপ্রিযাশ্চ| সুখাঃ সুখকরাঃ| বিকটোরুনিতম্ববত্যঃ বিকটৌ শ্রেষ্ঠৌ বিস্তীর্ণৌ বা ঊরূযাসাং তা বিকটোরবঃ, নিতম্ববত্যঃ শ্রেষ্ঠনিতম্বাঃ; যস্মাদত্র প্রশংসাযাং বতুপ্প্রত্যযঃ| পীনোন্নতস্তনভরানতমধ্যদেশাঃ পীনোন্নতস্তনভরেণ আনত ঈষন্নম্রো মধ্যদেশো যাসাং তাস্তথা| প্রৌঢাঃ কামক্ষমাঃ| পঞ্চবিষযাঃ শব্দাদ্যতিশযাঃ, ত এব স্বভাবো যাসাং তাস্তথা| শ্রীব্রহ্মদেবস্তু পঞ্চানাং বিষযাণামতিশযেন স্ব আত্মীযো ভাবোঽভিপ্রাযো যাসাং তাস্তথা| ‘পঞ্চেন্দ্রিযার্থবিষযাতিশযস্বভাবা ’ ইত্যন্যে পঠন্তি, ব্যাখ্যানযন্তি চ- পঞ্চেন্দ্রিযার্থবিষযাণাং শব্দাদীনামতিশযো যাসাং তাস্তথেত্যর্থঃ||৪৩-৪৪||

Adhikarana 40 (45) · Śloka 45

পিবেদ্রসং পুষ্পফলোদ্ভবং বা সিতামধূকত্রিসুগন্ধিযুক্তম্ | সঞ্চূর্ণ্য সংযোজ্য চ নাগপুষ্পৈরজাজিকৃষ্ণামরিচৈশ্চ তুল্যৈঃ ||৪৫||

অপরং পানাত্যযে কিং কার্যমিত্যাহ- পিবেদ্রসং পুষ্পফলোদ্ভবমিত্যাদি| পুষ্পফলোদ্ভবং কূষ্মাণ্ডোদ্ভবম্| মধূকো গুডপুষ্পঃ| ত্রিসুগন্ধি ত্রিজাতকম্||৪৫||

Adhikarana 41 (46) · Śloka 46

বর্ষাভূযষ্ট্যাহ্বমধূকলাক্ষাত্বক্কর্বুদারাঙ্কুরজীরকাণি | দ্রাক্ষাং চ কৃষ্ণামথ কেশরং চ ক্ষীরে সমালোড্য পিবেত্ সুখেপ্সুঃ ||৪৬||

বর্ষাভূযষ্ট্যাহ্বেত্যাদি| বর্ষাভূপ্রভৃতীনি কেশরান্তানি ক্ষীরে সমালোড্য সুখেপ্সুঃ পুরুষঃ পিবেদিতি পিণ্ডার্থঃ| বর্ষাভূঃ শ্বেতপুনর্নবা, ত্বক্ চোচং, কর্বুদারাঙ্কুরাঃ কাঞ্চনারাঙ্কুরাঃ||৪৬||

Adhikarana 42 (47) · Śloka 47

ভবেচ্চ মদ্যেন তু যেন পাতিতঃ প্রকামপীতেন সুরাসবাদিনা | তদেব তস্মৈ বিধিবত্ প্রদাপযেদ্বিপর্যযে ভ্রংশমবশ্যমৃচ্ছতি ||৪৭||

মদাত্যযেষু সামান্যমদ্যপানে উক্তেঽপি বিশেষবিধিমাহ- ভবেদিত্যাদি| যেন সুরাসবাদিনা মদ্যেন প্রকামপীতেন পুরুষঃ পাতিতো ভবেত্, তদেব সুরাসবাদিকং মদ্যং তস্মৈ পুরুষায বিধিবত্ সৌবর্চলাদিযুক্তং প্রদাপযেত্| কস্মাত্তদেব তস্মৈ প্রদাপযেদিত্যাহ- বিপর্যয ইত্যাদি| যস্মাদ্বিপর্যযে কৃতে অসৌ পুরুষো, ভ্রংশং ক্লেশং, ঋচ্ছতি প্রাপ্নোতি, তস্মাত্তদেব মদ্যং তস্মৈ প্রদাপযেদিত্যর্থঃ||৪৭||

Adhikarana 43 (48) · Śloka 48

যথা নরেন্দ্রোপহতস্য কস্যচিদ্ভবেত্ প্রসাদস্তত এব নান্যতঃ | ধ্রুবং তথা মদ্যহতস্য দেহিনো ভবেত্ প্রসাদস্তত এব নান্যতঃ ||৪৮||

মদ্যপীডিতস্য পুংসো যথা মদ্যাদেব স্বাস্থ্যং স্যাত্তথা দৃষ্টান্তমাহ- যথেত্যাদি| তত ইতি নরেন্দ্রাদিত্যর্থঃ| দ্বিতীযততঃশব্দেন মদ্যং পরামৃশ্যতে||৪৮||

Adhikarana 44 (49) · Śloka 49

বিচ্ছিন্নমদ্যঃ সহসা যোঽতিমদ্যং নিষেবতে | তস্য পানাত্যযোদ্দিষ্টা বিকারাঃ সম্ভবন্তি হি ||৪৯||

ইদানীমনুক্তসঙ্গ্রহাযাহ- বিচ্ছিন্নমদ্য ইত্যাদি| বিচ্ছিন্নমদ্যঃ ত্যক্তমদ্যঃ| সহসা অবিমৃশ্যৈব| পানাত্যযোদ্দিষ্টা ধ্বংসকাদযঃ| তথা চ তন্ত্রান্তরম্,- “বিচ্ছিন্নমদ্যঃ সহসা যোঽতিমদ্যং নিষেবতে| ভবেতাং মারুতাত্ কষ্টৌ তস্য ধ্বংসকবিক্ষযৌ”- ইত্যাদি||৪৯||

Adhikarana 45 (50) · Śloka 50

মদ্যস্যাগ্নেযবাযব্যৌ গুণাবম্বু(ম্ভো)বহানি তু | স্রোতাংসি শোষযেযাতাং তেন তৃষ্ণোপজাযতে ||৫০||

মদ্যপানাদ্যথা তৃষ্ণোত্পত্তিস্তথাঽঽহ- মদ্যস্যেত্যাদি| আগ্নেযবাযব্যৌ গুণৌ তৈক্ষ্ণ্যরূক্ষৌ| অম্বুবহানি স্রোতাংসীত্যত্রাম্বুবহস্রোতঃশব্দেনাম্বু কথ্যতে, উপচারাত্| অন্যে তু ব্যাখ্যানযন্তি- যৈঃ স্রোতোভিরুদকং বহন্তি তান্যেব স্রোতাংসি তৌ তীক্ষ্ণরূক্ষৌ গুণৌ শোষযিত্বা তত আধারস্রোতঃশোষাত্তদাশ্রযস্যাম্বুনোঽপি শোষঃ, তেন হেতুনা মদ্যেনাপি তৃষোপজাযতে| ‘মদ্যস্য’ ইত্যাদিপাঠস্থানে কেচিত্ ‘মদ্যমাগ্নেযভাবাত্’ ইত্যাদি পাঠং পঠন্তি, স চাভাবান্ন লিখিতঃ||৫০||

Adhikarana 46 (51) · Śloka 51

পাটলোত্পলকন্দেষু মুদ্গপর্ণ্যাং চ সাধিতম্ | পিবেন্মাগধিকোন্মিশ্রং তত্রাম্ভো হিমশীতলম্ ||৫১||

মদ্যজতৃষ্ণাচিকিত্সামাহ- পাটলেত্যাদি| পাটলা সুগন্ধিপুষ্পবৃক্ষঃ, উত্পলব্যক্তিবহুত্বাত্ কন্দেষ্বিতি বহুত্বমুক্তম্| তত্রেতি তৃষ্ণাযাম্| হিমঃ তুষারঃ, তদ্বচ্ছীতলং হিমশীতলম্| পাটলাদিসাধিতমম্ভো হিমশীতলং পিপ্পলীচূর্ণমিশ্রং তৃষ্ণাযাং পিবেদিতি পিণ্ডার্থঃ||৫১||

Adhikarana 47 (52) · Śloka 53

সর্পিস্তৈলবসামজ্জদধিভৃঙ্গরসৈর্যুতম্ | ক্বাথেন বিল্বযবযোঃ সর্বগন্ধৈশ্চ পেষিতৈঃ ||৫২|| পক্বমভ্যঞ্জনে শ্রেষ্ঠং... |৫৩|

তৃষ্ণাযাং ক্বাথমভিধাযোপচারার্থং স্নেহমাহ- সর্পিস্তৈলবসামজ্জেত্যাদি| ভৃঙ্গরসো ভৃঙ্গরাজরসঃ| বিল্বং বিল্বফলম্| যবাঃ প্রসিদ্ধাঃ| সর্বগন্ধা এলাদিপঠিতাঃ| পেষিতাঃ কল্কীকৃতাঃ| দধিভৃঙ্গরসৈরিতি দ্বিভেদভিন্নভৃঙ্গাপেক্ষযা রসস্যাপি দ্বিবিধত্বং, ততো বহুবচনম্| দধ্না ভৃঙ্গরসেন বিল্বযবযোঃ ক্বাথেন প্রত্যেকং চতুর্গুণেন সর্বগন্ধৈঃ কল্কীকৃতৈঃ স্নেহচতুর্থাংশৈঃ সর্পিস্তৈলং বসা মজ্জেতি চতুঃস্নেহং পক্বমভ্যঞ্জনে শস্তমিতি সম্বন্ধঃ| অন্যেঽত্র মজ্জাস্থানে দুগ্ধং পঠন্তি, ব্যাখ্যানযন্তি চ- তৈলবসেতি যদ্যপি দ্রবদ্রব্যমধ্যে তৈলবসে পঠিতে তথাঽপি স্নেহস্য স্নেহান্তরেণাসংস্কারাত্ সর্পিস্তৈলবসেতি স্নেহস্য ত্রযং দুগ্ধাদিচতুর্দ্রবৈঃ পক্বমভ্যঞ্জনে শস্তমিতি||৫২||-

Adhikarana 48 (53) · Śloka 53

...সেকে ক্বাথশ্চ শীতলঃ |৫৩|

অভ্যঞ্জনস্নেহমভিধায সেকমাহ- সেকে ক্বাথ ইত্যাদি| সেকে পরিষেকে| ক্বাথশ্চ শীতল ইতি মধুরশীতদ্রব্যকৃতো হিমসন্নিভঃ| এতাবভ্যঙ্গসেকৌ সতৃষি মদাত্যযে কার্যৌ; অন্যে মদ্যজতৃষ্ণাযামেবাভ্যঙ্গসেকাবিচ্ছন্তি|৫৩|

Adhikarana 49 (53) · Śloka 54

রসবন্তি চ ভোজ্যানি যথাস্বমবচারযেত্ ||৫৩|| পানকানি সুশীতানি হৃদ্যানি সুরভীণি চ |৫৪|

সতৃষি মদাত্যযে ভোজ্যানি নির্দিশন্নাহ- রসবন্তীত্যাদি| রসবন্তি প্রচুরমধুররসানি| ভোজ্যানি ভক্তানি| যথাস্বং যথাদোষপ্রত্যনীকমিতি; এতেন যদ্ভোজ্যং যস্য দোষস্য প্রত্যনীকং তদ্দোষজে সতৃষি মদাত্যযে তদ্ভোজ্যমবচারযেদিত্যর্থঃ| পানকানি দ্রাক্ষাদাডিমাদিকৃতানি| হৃদ্যানি মনঃপ্রিযাণি| সুরভীণি কর্পূরাদ্যধিবাসিতানি||৫৩||-

Adhikarana 50 (54) · Śloka 54

ত্বচং প্রাপ্তস্তু পানোষ্মা পিত্তরক্তাভিমূর্চ্ছিতঃ | দাহং প্রকুরুতে ঘোরং পিত্তবত্তত্র ভেষজম্ ||৫৪||

ইদানীং মদ্যোষ্মণো দাহকারিত্বমতিদেশেন তজ্জন্যদাহস্য চিকিত্সিতং চ শ্লোকেনাহ- ত্বচমিত্যাদি| পানোষ্মা মদ্যপানোষ্মা| পিত্তরক্তাভিমূর্চ্ছিতঃ পিত্তরক্তসম্পৃক্তঃ| ঘোরং ভযাবহম্| পিত্তবত্তত্র ভেষজং মধুরশীতাদি| ‘পানোষ্মা’ ইত্যত্র ‘মদ্যোষ্মা’ ইতি কেচিত্ পঠন্তি||৫৪||

Adhikarana 51 (55-56) · Śloka 56

শীতং বিধানমত ঊর্ধ্বমহং প্রবক্ষ্যে দাহপ্রশান্তিকরমৃদ্ধিমতাং নরাণাম্ | তত্রাদিতো মলযজেন হিতঃ প্রদেহশ্চন্দ্রাংশুহারতুহিনোদকশীতলেন ||৫৫|| শীতাম্বুশীতলতরৈশ্চ শযানমেনং হারৈর্মৃণালবলযৈরবলাঃ স্পৃশেযুঃ | ভিন্নোত্পলোজ্জ্বলহিমে শযনে শযীত পত্রেষু বা সজলবিন্দুষু পদ্মিনীনাম্ ||৫৬||

দাহপ্রতীকারমতিদেশেনাভিধাযেশ্বরাণাং পুরুষাণাং বিশিষ্টং প্রতীকারমাহ- শীতমিত্যাদি| তত্রেতি দাহে| আদিত ইতি আদৌ| মলযজেনেতি সুরভিচন্দনেন | প্রদেহঃ প্রতনুর্লেপঃ| মলযজবিশেষণমাহ- চন্দ্রাংশুহারতুহিনোদকশীতলেনেতি|- হারো মুক্তাহারঃ, তুহিনোদকং হিমপানীযং, তদ্বচ্ছীতলেনেত্যর্থঃ| অন্যে ‘চদ্রাংশুহারহিমনির্মলশীতলেন’ ইতি, অপরে ‘চন্দ্রাংশুহারকরকাহিমশীতলেন’ ইতি পঠন্তি| করকাঃ স্ফটিকগুটিকাকারা বৃষ্টিজলজাঃ পাষাণাঃ, হিমং তুষারঃ, শেষং সমম্| শীতাম্বুশীতলতরৈঃ শীতোদকবদতিশযশীতলৈঃ| এতদ্বিশেষণং হারৈর্মৃণালবলযৈরিত্যনযোঃ| ‘শীতাম্বুশীতলকরৈঃ’ ইত্যন্যে; শীতাম্বুবত্ শীতলহস্তৈঃ| শযানং বিশ্রান্তং ন তু স্বপন্তং, তাদৃগ্দাহার্তস্য নিদ্রাযা অসম্ভবাত্| অন্যে ‘মৃণালবলযৈঃ’ ইত্যত্র ‘তুষারবিমলৈঃ’ ইতি পঠিত্বা হারৈরিত্যস্য বিশেষণং মন্যন্তে| অবলাঃ প্রৌঢস্ত্রিযঃ| স্পৃশেযুঃ স্পর্শনং কুর্যুঃ| দাহার্তস্য সুখোত্পাদনায শযনমাহ- ভিন্নোত্পলোজ্জ্বলহিমে ইতি|- প্রফুল্লনীলোত্পলোজ্জ্বলশীতলে এবংবিধে শযনে শযীত| পক্ষান্তরমাহ- পত্রেষু বেত্যাদি| সজলবিন্দুষু পদ্মিনীনাং পত্রেষু বা শযীতেতি সম্বন্ধঃ||৫৫-৫৬||

Adhikarana 52 (57) · Śloka 57

আসাদযন্ পবনমাহৃতমঙ্গনাভিঃ কহ্লারপদ্মদলশৈবলসঞ্চযেষু | কান্তৈর্বনান্তপবনৈঃ পরিমৃশ্যমানঃ শক্তশ্চরেদ্ভবনকাননদীর্ঘিকাসু ||৫৭||

কিং কুর্বন্ শযীতেত্যাহ- আসাদযন্নিত্যাদি| আসাদযন্ প্রাপ্নুবন্| কং? পবনং| কিম্ভূতম্? আহৃতম্ আনীতম্| অঙ্গনাভিঃ স্ত্রীভিঃ; ব্যঞ্জনাদিভিঃ কৃত্বেত্যূহ্যম্| কহ্লারপদ্মদলশৈবলসঞ্চযেষু শযীতেতি সম্বধ্যতে| কহ্লারং সৌগন্ধিকোত্পলম্| অন্যে ‘সঞ্চযেষু’ ইত্যত্র ‘সঞ্চযেভ্যঃ’ ইতি পঠিত্বা কহ্লারপদ্মদলশৈবলসঞ্চযেভ্যোঽবলাভিরাহৃতমিতি সম্বধ্নন্তি| এবংবিধৈঃ শযনৈরাহ্লাদিতঃ সন্ কিং কুর্যাদিত্যাহ- কান্তৈরিত্যাদি| কান্তৈঃ কমনীযৈর্মৃদুশীতসুগন্ধিভিঃ, বনান্তপবনৈঃ আম্রাদিবাটিকাসমীপবাতৈঃ, পরিমৃশ্যমানঃ স্পৃশ্যমানঃ, শক্তঃ সমর্থঃ সন্, চরেত্ ভ্রমেত্| কাসু ভবনকাননদীর্ঘিকাসু গৃহোদ্যানসসোপানপুষ্করিণীষু| অন্যে ‘কান্তৈঃ’ ইত্যত্র ‘শীতৈঃ’ ইতি, ‘বনান্তপবনৈঃ’ ইত্যত্র ‘জলান্তপবনৈঃ’, ‘পরিমৃশ্যমান’ ইত্যত্র ‘পরিমৃজ্যমানঃ,’ ‘শক্তঃ’ ইত্যত্র ‘প্রীতঃ’ ইতি পঠন্তি||৫৭||

Adhikarana 53 (58) · Śloka 59

দাহাভিভূতমথবা পরিষেচযেত্তু লামজ্জকাম্বুরুহচন্দনতোযতোযৈঃ | বিস্রাবিতাং হৃতমলাং নববারিপূর্ণাং পদ্মোত্পলাকুলজলামধিবাসিতাম্বুম্ ||৫৮|| বাপীং ভজেত হরিচন্দনভূষিতাঙ্গঃ কান্তাকরস্পৃশনকর্কশরোমকূপঃ |৫৯|

দাহাভিভূতমিত্যাদি| অথবা তমাতুরং দাহপীডিতং পরিষেচযেত্| কৈঃ? লামজ্জকেত্যাদিভিঃ; লামজ্জকং পর্বতোদ্ভূতমূলং, অন্যে উশীরমাহুঃ; অম্বুরুহং পদ্মোত্পলাদিকং; চন্দনমত্র শ্বেতং, তস্যৈব দাহহরত্বাত্; তোযং বালকং; এষাং তোযৈঃ ক্বাথৈঃ| বিস্রাবিতামিতি নিঃসারিতপূর্বপানীযাম্| হৃতমলাম্ আকৃষ্টপঙ্কাদিকাম্, নববারিপূর্ণাম্ অপরনির্মলজলভৃতাং; পদ্মোত্পলাকুলজলাং পদ্মম্ ঈষচ্ছুক্লং, উত্পলানি নীলোত্পলানি, তৈর্ব্যাপ্তজলাম্| অধিবাসিতাম্বুং প্রচুরচন্দনাদিপ্রক্ষেপেণ সুগন্ধিতজলাম্| এবংবিধাং বাপীং ভজেত সেবেত, ‘দাহার্ত আতুর’ ইতি শেষঃ| কিম্ভূতঃ সন্? চন্দনভূষিতাঙ্গঃ শ্বেতচন্দনানুলিপ্তগাত্রঃ| পুনঃ কিম্ভূতঃ? কান্তেত্যাদিবিশেষণযুক্তঃ||৫৮||-

Adhikarana 54 (59) · Śloka 60

তত্রৈনমম্বুরুহপত্রসমৈঃ স্পৃশন্ত্যঃ শীতৈঃ করোরুবদনৈঃ কঠিনৈঃ স্তনৈশ্চ ||৫৯|| তোযাবগাহকুশলা মধুরস্বভাবাঃ সংহর্ষযেযুরবলাঃ সুকলৈঃ প্রলাপৈঃ |৬০|

তত্র তস্যাং বাপ্যম্| এনং দাহার্তম্| অম্বুরুহং কমলং, তস্য পত্রসমৈঃ পত্রতুল্যৈঃ; এতচ্চ শীতৈঃ করোরুবদনৈরিত্যস্য বিশেষণম্| ‘বদনৈঃ’ ইত্যত্র ‘জঘনৈঃ’ ইত্যন্যে| মধুরস্বভাবা মৃদুপ্রচারাঃ| সুকলৈঃ প্রলাপৈঃ শোভনকলাযুক্তৈঃ প্রকৃষ্টবচনৈঃ| তত্র বাপ্যমেবংবিধৈঃ করোরুবদনৈঃ স্তনৈশ্চ কঠিনৈঃ স্পৃশন্ত্যোঽবলাঃ প্রৌঢস্ত্রিযস্তোযাবগাহকুশলা মৃদুপ্রচারাঃ সুকলৈঃ প্রলাপৈরেনং দাহার্তং সংহর্ষযেযুঃ তুষ্টিমুত্পাদযেযুরিতি সম্বন্ধঃ||৫৯||-

Adhikarana 55 (60-61) · Śloka 62

ধারাগৃহে প্রগলিতোদকদুর্দিনাভে ক্লান্তঃ শযীত সলিলানিলশীতকুক্ষৌ ||৬০|| গন্ধোদকৈঃ সকুসুমৈরুপসিক্তভূমৌ পত্রাম্বুচন্দনরসৈরুপলিপ্তকুড্যে | জাত্যুত্পলপ্রিযককেশরপুণ্ডরীকপুন্নাগনাগকরবীরকৃতোপচারে ||৬১|| তস্মিন্ গৃহে কমলরেণ্বরুণে শযীত যত্নাহৃতানিলবিকম্পিতপুষ্পদাম্নি |৬২|

ধারাগৃহে ইত্যাদি| প্রগলিতং গলিতুং প্রবৃত্তং যদুদকং তেন দুর্দিনস্যেব আভা যস্য তত্তথা| ক্লান্তো গ্লানিযুক্তঃ, ‘আতুর’ ইতি শেষঃ| সলিলেন মিশ্রিতোঽনিলঃ সলিলানিলস্তেন শীতঃ কুক্ষিরভ্যন্তরং যস্য তত্ তত্র| ‘সজলাম্বুদশীতকুক্ষৌ’ ইত্যন্যে পঠন্তি; তত্র সজলমেঘবচ্ছীতাভ্যন্তরপ্রদেশে| গন্ধোদকৈঃ এলাদিগন্ধদ্রব্যকষাযৈঃ| সকুসুমৈঃ জাতীকুসুমাদিযুতৈঃ| অন্যে ‘সকুসুমৈরুপসিক্তভূমৌ’ ইত্যত্র ‘পটুভিরুক্ষিতভূমিভাগে’ ইতি পঠন্তি; তত্র এলাদিকষাযৈঃ পটুভির্ব্যক্তগন্ধৈঃ সিক্তো ভূমিপ্রদেশো যত্র| পত্রং পত্রকম্, অম্বু বালকং, চন্দনং শ্বেতচন্দনং; রসোঽত্র ক্বাথঃ| কুড্যং ভিত্তিঃ| এতেষামেব কল্কক্বাথাভ্যামুপলিপ্তভিত্তিকে| ‘উপদিগ্ধকুড্যে’ ইত্যন্যে; তত্রাপ্যেক এবার্থঃ| জাতী প্রসিদ্ধা, উত্পলং নীলোত্পলং, প্রিযকো বীজকঃ, কেশরো বকুলঃ, পুণ্ডরীকং শ্বেতপদ্মং, পুন্নাগো দেববল্লভঃ স্বনামপ্রসিদ্ধঃ, নাগং নাগকেশরং, করবীরোঽত্র রক্তকরবীরঃ, অত্রৈতেষাং পুষ্পাণি গ্রাহ্যাণি; তৈঃ কৃতোপচারে কৃতরচনাবিশেষে ধারগৃহে| অন্যে ত্বেবং পঠন্তি- ‘মাংসীতমালতৃণকুঙ্কুমপদ্মপত্রজাত্যুত্পলাগ্রকরবীরকৃতোপকারে’ ইতি| তমালং পত্রকং, তৃণং সুগন্ধিতৃণং, পদ্মপত্রকং কমলপত্রং, জাত্যুত্পলে পূর্ববত্, অগ্রকরবীরো রক্তকরবীরঃ, শেষং সমমিতি| তস্মিন্ গৃহে ধারাগৃহে| কমলরেণ্বরুণে কমলধূলীবদ্রক্তাঙ্গে ইতি ধারাগৃহবিশেষণম্| যত্নাহৃতানিলবিকম্পিতপুষ্পদাম্নি প্রকারান্তরানীতবচালিতপুষ্পমালাযুক্তে ||৬০-৬১||-

Adhikarana 56 (62-64) · Śloka 64

হেমন্তবিন্ধ্যহিমবন্মলযাচলানাং শীতাম্ভসাং সকদলীহরিতদ্রুমাণাম্ ||৬২|| উদ্ভিন্ননীলনলিনাম্বুরুহাকরাণাং চন্দ্রোদযস্য চ কথাঃ শৃণুযান্মনোজ্ঞাঃ | ম্লানং প্রতান্তমনসং মনসোঽনুকূলাঃ পীনস্তনোরুজঘনা হরিচন্দনাঙ্গ্যঃ ||৬৩|| তা এনমার্দ্রবসনাঃ সহ সংবিশেযুঃ শ্লিষ্ট্বাঽবলাঃ শিথিলমেখলহারযষ্ট্যঃ ||৬৪||

এবংবিধে ধারাগৃহে শযানঃ কিং কুর্যাদিত্যাহ- হেমন্তেত্যাদি| হেমন্তঃ ঋতুঃ; মলযান্তৈরচলশব্দঃ প্রত্যেকং সম্বধ্যতে, তেনাত্র বিন্ধ্যবনাদিপরিহারঃ | তেষাং বিশেষণত্রযমাহ- শীতাম্ভসাং শীতপানীযানাম্| সকদলীহরিতদ্রুমাণাং কদলীহরিতবৃক্ষসহিতানাম্| উদ্ভিন্ননীলনলিনাম্বুরুহাকরাণাম্ উদ্ভিন্নানি বিকসিতানি নীলনলিনানি নীলোত্পলানি অম্বুরুহাণি পুণ্ডরীকরক্তোত্পলাদীনি তেষামাকরাঃ তদ্যুক্তজলাশযাঃ তে উত্ ঊর্ধ্বপ্রদেশে যেষামিত্যর্থঃ; তেষামেবংবিধানাং পর্বতানাং মনোজ্ঞাঃ কথাঃ শৃণুযাত্| চন্দ্রোদযস্য চেতি কথাঃ শৃণুযাদিত্যর্থঃ| মনোজ্ঞা মনোনুকূলাঃ| এবমপি সুখমনাপ্নুবন্তং কথমুপাচরেদিত্যাহ- ম্লানমিত্যাদি| ম্লানং গ্লানিযুক্তম্| প্রতান্তমনসং দীনমনস্কম্| পীনানি মাংসলানি স্তনোরুজঘনানি যাসাং তাস্তথা; জঘনং স্ত্রীকট্যগ্রভাগঃ| হরিচন্দনাঙ্গ্যঃ রক্তচন্দনানুলিপ্তাঃ; অন্যে ‘ঘনসারদিগ্ধা’ ইতি পঠন্তি, তত্র চন্দনানুলিপ্তাঃ| তা ইতি অবলা ইত্যর্থঃ| এনং দাহার্তিমন্তম্| আর্দ্রবসনা আর্দ্রবস্ত্রাঃ | সহ সংবিশেযুরিতি দাহার্তেন সহ বিশ্রামং কুর্যুরিত্যর্থঃ| শ্লিষ্ট্বা আলিঙ্গ্য| অবলাঃ স্ত্রিযঃ| কিম্ভূতাঃ? শিথিলমেখলহারযষ্ট্য ইতি শিথিলা লম্বমানা মেখলা ক্ষুদ্রসুবর্ণঘণ্টিকাযুক্তঃ কটিদোরকঃ, হারযষ্টিঃ মৌক্তিকমালা যাসাং তাস্তথা| তা অবলাঃ মনসোঽনুকূলা ইত্যাদিবিশেষণবিশিষ্টাঃ, গ্লানং প্রতান্তমনসমাতুরং শ্লিষ্ট্বা তেনৈব সহ সংবিশেযুরিতি সম্বন্ধঃ| কেচিত্ ‘শ্লিষ্ট্বা’ ইত্যত্র ‘শ্লিষ্য’ ইতি পঠন্তি, ব্যাখ্যানযন্তি চ- শ্লিষ্য আশ্লিষ্য; ছন্দোনুরোধেন আঙ্শব্দলোপঃ||৬২-৬৪||

Adhikarana 57 (65) · Śloka 65

হর্ষযেযুর্নরং নার্যঃ স্বগুণৈ রহসি স্থিতাঃ | তাঃ শৈত্যাচ্ছমযেযুশ্চ পিত্তপানাত্যযান্তরম্ ||৬৫||

হর্ষযেযুরিত্যাদি| হর্ষযেযুঃ তুষ্টিং নযেযুঃ| নরমিতি দাহার্তম্| নার্যঃ স্ত্রিযঃ| কৈর্হর্ষযেযুঃ? স্বগুণৈঃ মৃদুভাষণাদিভিঃ| রহসিস্থিতা একান্তে স্থিতাঃ| তা নার্যঃ| শৈত্যাত্ ‘আত্মন’ ইতি শেষঃ| শমযেযুঃ শান্তিং নযেযুঃ| কিং শমযেযুঃ? পিত্তপানাত্যযান্তরং পিত্তপানাত্যযভেদম্||৬৫||

Adhikarana 58 (66) · Śloka 66

তৃড্দাহরক্তপিত্তেষু কার্যোঽযং ভেষজক্রমঃ | সামান্যতো... |৬৬|

ইমং বিধিমন্যত্রাপ্যতিদিশন্নাহ- তৃডিত্যাদি| তৃট্ পিপাসা, দাহো নানাপ্রকারো বক্ষ্যমাণঃ| অযম্ অনন্তরোক্তঃ| ভেষজক্রম ঔষধবিধিঃ কার্যঃ|৬৬|-

Adhikarana 59 (66) · Śloka 66

... বিশেষং তু শৃণু দাহেষ্বশেষতঃ ||৬৬||

তৃডাদিষু সামান্যতো বিধিমুদ্দিশ্য দাহেষু বিশেষবিধিমাহ- বিশেষমিত্যাদি| দাহেষ্বিতি বহুবচনং নানাপ্রকারত্বেন দাহস্যাভিধাস্যমানত্বাত্; অত এব অশেষত ইত্যুক্তম্, অশেষেষ্বিত্যর্থঃ||৬৬||

Adhikarana 60 (67-69) · Śloka 69

কৃত্স্নদেহানুগং রক্তমুদ্রিক্তং দহতি হ্যতি | সঞ্চূষ্যতে দহ্যতে চ তাম্রাভস্তাম্রলোচনঃ ||৬৭|| লোহগন্ধাঙ্গবদনো বহ্নিনেবাবকীর্যতে | তং বিলঙ্ঘ্য বিধানেন সংসৃষ্টাহারমাচরেত্ ||৬৮|| অপ্রশাম্যতি দাহে চ রসৈস্তৃপ্তস্য জাঙ্গলৈঃ | শাখাশ্রযা যথান্যাযং রোহিণীর্ব্যধযেত্ সিরাঃ ||৬৯||

ইদানীং রক্তাদিদাহলক্ষণং তেষামেব বিশিষ্টং চিকিত্সিতং চাহ- কৃত্স্নদেহানুগমিত্যাদি| কৃত্স্নদেহানুগং সকলদেহব্যপ্তম্| উদ্রিক্তং প্রবৃদ্ধম্| হিশব্দ এবার্থে| সঞ্চূষ্যতে আকৃষ্যত ইব বেদনাবিশেষঃ| ‘দহ্যতে’ ইত্যত্র 'উষ্যতে' ইত্যন্যে; তত্র উষ্যতে দহ্যত ইত্যর্থঃ| তাম্রাভঃ তাম্রপ্রভঃ| তাম্রলোচনো লোহিতাক্ষঃ| লোহগন্ধশব্দোঽঙ্গবদনাভ্যাং সম্বধ্যতে| বহ্নিনেবাবকীর্যতে জ্বলিতাঙ্গারৈরিবাত্মানমাচিতং মন্যতে, অনেন দাহাতিশযঃ প্রতিপাদিতঃ| তমিতি রক্তদাহার্তম্ | বিলঙ্ঘযেতি বিবিধপ্রকারং লঙ্ঘযিত্বা| বিধানেন ক্রমেণ, সংসৃষ্টাহারং কৃততর্পণাদিক্রমং, আচরেদিতি কুর্যাত্, ‘বৈদ্যপ্রযুক্তং’ ইতি শেষঃ| এবমপ্যপ্রশাম্যতি দাহে কিং কুর্যাদিত্যাহ- অপ্রশাম্যতীত্যাদি| অপ্রশাম্যতি দাহে জাঙ্গলৈ রসৈস্তৃপ্তস্য শাখাশ্রযা বাহুজঙ্ঘাশ্রযাঃ রোহিণীঃ লোহিতাঃ সিরা যথান্যাযং ব্যধযেদিতি সম্বন্ধঃ; যথান্যাযং সিরাব্যধবিধানোক্তেন ন্যাযেনেত্যর্থঃ||৬৭-৬৯||

Adhikarana 61 (70) · Śloka 70

পিত্তজ্বরসমঃ পিত্তাত্ স চাপ্যস্য বিধির্হিতঃ |৭০|

অতঃ পরং দাহস্য পিত্তজ্বরেণ সহ সমত্বং তচ্চিকিত্সিতং চাহ- পিত্তজ্বরসম ইত্যাদি|৭০|

Adhikarana 62 (70-71) · Śloka 71

তৃষ্ণানিরোধাদব্ধাতৌ ক্ষীণে তেজঃ সমুদ্ধতম্ ||৭০|| সবাহ্যাভ্যন্তরং দেহং দহেদ্বৈ মন্দচেতসঃ | সংশুষ্কগলতাল্বোষ্ঠো জিহ্বাং নিষ্কৃষ্য চেষ্টতে ||৭১||

তৃণ্ণিরোধজে দাহে চিকিত্সিতং নির্দিশন্নাহ- তৃষ্ণানিরোধাদিত্যাদি| অব্ধাতৌ পানীযধাতৌ| তেজঃ পিত্তোষ্মা| সমুদ্ধতম্ অত্যর্থবৃদ্ধম্| এবংবিধং তেজো দেহং সবাহ্যাভ্যন্তরং মন্দচেতস আতুরস্য বৈ স্ফুটং দহেদিত্যর্থঃ| স দহ্যমানদেহঃ কিং কুর্যাদিত্যাহ- জিহ্বাং নিষ্কৃষ্যেত্যাদি| জিহ্বাং নিষ্কৃষ্য নিঃসার্যেত্যর্থঃ| চেষ্টতে হস্তপাদাদিবিক্ষেপণং করোতি, ‘দাহার্তঃ’ ইতি শেষঃ| অন্যে ‘জিহ্বা নিঃসৃত্য বেপতে’ ইতি পঠন্তি, তত্র দাহার্তস্য জিহ্বা নিঃসৃত্য কম্পতে ইত্যর্থঃ||৭০-৭১||

Adhikarana 63 (72) · Śloka 73

তত্রোপশমযেত্তেজস্ত্বব্ধাতুং চ বিবর্ধযেত্ | পাযযেত্ কামমম্ভশ্চ শর্করাঢ্যং পযোঽপি বা ||৭২|| শীতমিক্ষুরসং মন্থং বিতরেচ্চেরিতং বিধিম্ |৭৩|

তত্রেত্যাদি| তত্র তৃষ্ণানিরোধজে দাহে| উপশমযেত্ শান্তিং নযেত্ মধুরশীতাদিভিঃ| তেজঃ পিত্তোষ্মাণম্| অত্রান্যে ‘তস্য তেজঃ প্রশমযেত্’ ইতি পঠন্তি; তত্র তস্যেতি দাহার্তস্য, শেষং সমম্| অব্ধাতুং চ বিবর্ধযেদিতি স্বযোনিবর্ধনৈঃ মধুরস্নিগ্ধশীতলৈঃ| অম্ভঃ পানীযম্| তং তৃষ্ণানিরোধজদাহার্তম্| কিম্ভূতমম্ভঃ? শর্করাঢ্যং প্রভূতশর্করাযুক্তম্| কিমম্ভ এব পাযযেদিত্যাহ- পযোঽপি বেতি|- শর্করাঢ্যং দুগ্ধং বেত্যর্থঃ| মন্থং “শক্তবঃ সর্পিষাঽভ্যক্তাঃ শীতবারিপরিপ্লুতাঃ” ইত্যাদ্যুক্তলক্ষণম্| বিতরেচ্চেরিতং বিধিমিতি পিত্তজ্বরহরম্| কেচিত্ ‘বিতরেচ্চেতরং বিধিম্’ ইতি পঠন্তি; তত্র পিত্তজ্বরোক্তাত্ ইতরোঽন্যঃ পিত্তহরো বিধিরিত্যর্থঃ||৭২||-

Adhikarana 64 (73) · Śloka 74

অসৃজা পূর্ণকোষ্ঠস্য দাহো ভবতি দুঃসহঃ ||৭৩|| বিধিঃ সদ্যোব্রণীযোক্তস্তস্য লক্ষণমেব চ |৭৪|

অসৃজা পূর্ণকোষ্ঠস্যেত্যাদি| অসৃজা রক্তেন| পূর্ণকোষ্ঠস্য সম্ভৃতোদরস্য| দুঃসহঃ রৌদ্রঃ| বিধিঃ চিকিত্সা| তস্যেতি দাহার্তস্য| লক্ষণমেবেতি সদ্যোব্রণীযোক্তমিত্যর্থঃ ‘অসৃজা’ ইত্যত্র ‘অসৃজঃ’ ইতি ষষ্ঠ্যন্তং কেচিত্ পঠন্তি, পূরণার্থে ষষ্ঠীং ব্যাখ্যানযন্তি চ||৭৩||-

Adhikarana 65 (74-75) · Śloka 75

ধাতুক্ষযোক্তো যো দাহস্তেন মূর্চ্ছাতৃষান্বিতঃ ||৭৪|| ক্ষামস্বরঃ ক্রিযাহীনো ভৃশং সীদতি পীডিতঃ | রক্তপিত্তবিধিস্তস্য হিতঃ স্নিগ্ধোঽনিলাপহঃ ||৭৫||

ধাতুক্ষযোক্তো যো দাহ ইত্যাদি| ধাতুক্ষযোক্তো রক্তক্ষযোক্তঃ| যচ্চাত্র রক্তক্ষযোক্ত ইতি পাঠো ন কৃতঃ, তদিতরধাতুক্ষযেঽপি দাহো ভবতীতি জ্ঞাপনার্থম্| তেন ধাতুক্ষযজদাহেন| ক্ষামস্বরো দুর্বলস্বরঃ| ক্রিযাহীনঃ কাযিকমানসচেষ্টাহীনঃ| পীডিতো ‘দাহেন’ ইতি শেষঃ||৭৪-৭৫||

Adhikarana 66 (76-77) · Śloka 77

ক্ষতজেনাশ্নতশ্চান্যঃ শোচতো বাঽপ্যনেকধা | তেনান্তর্দহ্যতেঽত্যর্থং তৃষ্ণামূর্চ্ছাপ্রলাপবান্ ||৭৬|| তমিষ্টবিষযোপেতং সুহৃদ্ভিরভিসংবৃতম্ | ক্ষীরমাংসরসাহারং বিধিনোক্তেন সাধযেত্ ||৭৭||

‘অসৃজা পূর্ণকোষ্ঠস্য’ ইত্যাদিনা কোষ্ঠস্থেন রক্তেন দাহমভিধাযেদানীং প্রকারান্তরেণাহ- ক্ষতজেনাশ্নতশ্চান্য ইত্যাদি| ক্ষতজেন রক্তেন| অশ্নতঃ ভোজনং কুর্বতঃ| অন্যো ‘দাহ’ ইতি শেষঃ| শোচতো বাঽপ্যনেকধেতি অনেকপ্রকারং শোকং কুর্বতঃ| শোকং কুর্বতো ভোজনং কুর্বতো বাঽপি নরস্যান্যো দাহো রক্তেন ভবতীতি সম্বন্ধঃ| তেন দাহেন, অন্তঃ অভ্যন্তরং দহ্যতে| মূর্চ্ছাতৃষ্ণাপ্রলাপবান্ ‘আতুরো ভবতি’ ইতি শেষঃ| তম্ আতুরম্| ইষ্টবিষযোপেতম্ অভিলষিতশব্দস্পর্শাদিসংযুক্তম্| সুহৃদ্ভিঃ মিত্রৈঃ| অভিসংবৃতং সমন্ততঃ পরিবৃতম্| বিধিনোক্তেন সাধযেত্ দাহশান্তিকরেণ প্রাগুক্তেন বিধানেন শান্তিং নযেত্||৭৬-৭৭||

Adhikarana 67 (78) · Śloka 78

মর্মাভিঘাতজোঽপ্যস্তি স চাসাধ্যতমঃ স্মৃতঃ |৭৮|

মর্মাভিঘাতজ ইত্যাদি| মর্মাভিঘাতজঃ সদ্যঃ কালান্তরে বা প্রাণহরমর্মাভিঘাতজঃ| যদ্যেবং তর্হি অসাধ্যত্বং প্রাপ্তমেব, স চাসাধ্যতমঃ স্মৃত ইতি ব্যর্থম্| নৈবং, স চাসাধ্যতমঃ স্মৃত ইত্যস্মাদেব সদ্যঃকালান্তরপ্রাণহরমর্মজো জ্ঞাযত ইত্যদোষঃ| ‘স চাসাধ্যতমঃ স্মৃতঃ’ ইত্যত্রান্যে ‘সোঽসাধ্যঃ সপ্তমো মত’ ইতি পঠন্তি| অত এব চ দাহগণনাং কুর্বন্তি- ত্বচং প্রাপ্তস্তু পানোষ্মেত্যাদিঃ প্রথমো দাহঃ, কৃত্স্নদেহানুগং পিত্তমিত্যাদির্দ্বিতীযঃ তৃষ্ণানিরোধাদিত্যাদিস্তৃতীযঃ, অসৃজা পূর্ণকোষ্ঠস্যেত্যাদিশ্চতুর্থঃ, ধাতুক্ষযোক্ত ইত্যাদিঃ পঞ্চমঃ, ক্ষতজেনাশ্নতশ্চান্যঃ শোচতো বাঽপীত্যাদিঃ ষষ্ঠঃ, সপ্তমশ্চ মর্মাভিঘাতজঃ|৭৮|-

Adhikarana 68 (78) · Śloka 78

সর্ব এব চ বর্জ্যাঃ স্যুঃ শীতগাত্রেষু দেহিষু ||৭৮|| (এবংবিধো ভবেদ্যস্তু মদিরামযপীডিতঃ ||) |

অবস্থাযাং সর্বেষামপি দাহানাং বর্জনমাহ- সর্ব এবেত্যাদি| সর্ব এব ‘দাহা’ ইতি শেষঃ||৭৮||

Adhikarana 69 (79) · Śloka 79

প্রশান্তোপদ্রবে চাপি শোধনং প্রাপ্তমাচরেত্ ||৭৯||

দাহানাং পুনরাবৃত্তিনিষেধায বিধানমাহ- এবংবিধো ভবেদিত্যাদি| প্রশান্তোপদ্রবে নিবৃত্ততৃষ্ণাদিকে ‘আতুরে’ ইতি শেষঃ| শোধনং বিরেচনং, পিত্তহরত্বাত্| প্রাপ্তং যথাদোষপ্রত্যনীকম্| আচরেত্ কুর্যাত্ ‘বৈদ্য’ ইতি শেষঃ| অন্যে শোধনশব্দেন বমনমপি কথযন্তি| তদ্বমনং দাহকারিণি পিত্তে কফস্থানগে কার্যম্| অন্যে ‘প্রশান্তোপদ্রবশ্চাপি’ ইতি পঠন্তি; তত্র এবংবিধ আতুরঃ শোধনমাচরেদিতি ব্যাখ্যানযন্তি||৭৯||

Adhikarana 70 (80) · Śloka 80

সজীরকাণ্যার্দ্রকশৃঙ্গবেরসৌবর্চলান্যর্ধজলপ্লুতানি | মদ্যানি হৃদ্যান্যথ গন্ধবন্তি পীতানি সদ্যঃ শমযন্তি তৃষ্ণাম্ ||৮০||

যথা পীযমানং মদ্যং তৃষ্ণাকরং ন ভবতি তথা প্রাহ- সজীরকাণিত্যাদি| সজীরকাণি জীরকসহিতানি| আর্দ্রকং প্রসিদ্ধং, শৃঙ্গবেরং শুণ্ঠী| আর্দ্রকস্যাদৌ সহশব্দো বোদ্ধব্যঃ; তেন ‘আর্দ্রকশৃঙ্গবেরসৌবর্চলানি’ ইতি মদ্যানীত্যস্য বিশেষণম্| অর্ধজলপ্লুতানি অর্ধপানীযমিশ্রিতানি| হৃদ্যানি মনঃপ্রিযাণি| গন্ধবন্তি প্রশস্তগন্ধানি| এবংবিধানি মদ্যানি পীতানি সন্তি সদ্যস্তৃষ্ণাং শমযন্তীতি পিণ্ডার্থঃ||৮০||

Adhikarana 71 (81) · Śloka 81

জলপ্লুতশ্চন্দনভূষিতাঙ্গঃ স্রগ্বী সভক্তাং পিশিতোপদংশাম্ | পিবন্ সুরাং নৈব লভেত রোগান্ মনোনুবিঘ্নং চ মদং ন যাতি ||৮১||

কিম্ভূতঃ সন্মদ্যপঃ কিম্ভূতাং সুরাং পিবন্ পানজরোগান্ মনোবিধাতকং চ মদং ন প্রাপ্নোতীত্যাহ- জলপ্লুত ইত্যাদি| জলপ্লুতো জলার্দ্রগাত্রঃ| চন্দনভূষিতাঙ্গঃ চন্দনানুলিপ্তশরীরঃ| স্রগ্বী পুষ্পমালাযুক্তঃ| সভক্তাং ভক্তেন সহিতাম্| পিশিতোপদংশাং মাংসভক্ষণসহিতাম্| রোগান্ পানজানিত্যর্থঃ| মনোনুবিঘ্নং চ মদং ন যাতি মনোবিঘাতকং মদং ন প্রাপ্নোতি| এতেনোত্তরৌ মদৌ নাধিগচ্ছতীত্যুক্তম্| অন্যে ‘মনোমতিঘ্নং চ মদং ন যাতি’ ইতি পঠন্তি; তত্র মনোবুদ্ধিপ্রমোহলক্ষণং মদং ন প্রাপ্নোতীত্যর্থঃ||৮১||

Adhikarana puShpikA · Śloka 47

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রে মদাত্যযপ্রতিষেধো নাম (নবমোঽধ্যাযঃ, আদিতঃ) সপ্তচত্বারিংশত্তমোঽধ্যাযঃ ||৪৭||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রে সপ্তচত্বারিংশত্তমোঽধ্যাযঃ||৪৭||