44. pāṇḍurōgapratiṣēdhādhyāyaḥ

Adhikarana 1 (1-2) · Śloka 2

অথাতঃ পাণ্ডুরোগপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

হৃদ্রোগপ্রতিষেধানন্তরং সঙ্খ্যাসাম্যাত্ তীক্ষ্ণাম্লকটুকাদিহৃদ্রোগচিকিত্সিতস্য হেতুত্বাত্ পাণ্ডুরোগপ্রতিষেধারম্ভো যুক্ত ইত্যাহ- অথাত ইত্যাদি| অত্রাদিশব্দদ্বযং লুপ্তং দ্রষ্টব্যং, তেন পাণ্ড্বাদিরোগাদিপ্রতিষেধমিতি| তত্র প্রথমেনাদিশব্দেন কৃষ্ণপীতমিশ্রা বর্ণা গ্রাহ্যাঃ, কামলাদযো দ্বিতীযেন; অপরে তু পাণ্ডুবর্ণাধিক্যাত্ সর্বে এব পাণ্ডুরোগাঃ প্রোচ্যন্ত ইতি মত্বা একমেবাদিশব্দং লুপ্তং বর্ণযন্তি; তে চ আদিশব্দাত্ কামলাদীন্ গৃহ্ণন্তি| অপরে ত্বাদিশব্দং বিনাঽপি কামলাদীন্ গৃহ্ণন্তি, পাণ্ডুরোগান্তর্ভাবাত্তেষামিতি||১-২||

Adhikarana 2 (3) · Śloka 3

ব্যবাযমম্লং লবণানি মদ্যং মৃদং দিবাস্বপ্নমতীব তীক্ষ্ণম্ | নিষেবমাণস্য বিদূষ্য রক্তং কুর্বন্তি দোষাস্ত্বচি পাণ্ডুভাবম্ ||৩||

পাণ্ডুরোগস্য হেতুসম্প্রাপ্তী আহ- ব্যবাযমম্লমিত্যাদি| ব্যবাযাদীনি নিষেবমাণস্য পুরুষস্য দুষ্টা দোষা রক্তং বিদূষ্য ত্বচি পাণ্ডুভাবং কুর্বন্তীতি পিণ্ডার্থঃ| ব্যবাযঃ স্ত্রীসেবা, স চ সর্বদোষপ্রকোপকঃ, অন্যে তু বাতপিত্তপ্রকোপকত্বং ব্যবাযস্য মন্যন্তে ভারহরণাদৌ ক্রোধাদৌ চ তত্পাঠাত্| অম্ললবণযোঃ পিত্তকফকরত্বম্| মৃত্তিকা সর্বদোষপ্রকোপণী, নানাবিধত্বাত্; তথা চোক্তম্,- “কষাযা মারুতং, পিত্তমূষরা, মধুরা কফম্| কোপযেন্মৃদ্রসাদীংশ্চ রৌক্ষ্যাদ্ভুক্তং বিরূক্ষযেত্”- ইতি| দিবাস্বপ্নঃ ত্রিদোষপ্রকোপকঃ| তীক্ষ্ণং পিত্তকোপি| এবং যথাস্বং যথাসম্ভবং হেতুরুক্তঃ| বিদূষ্য রক্তমিত্যাদিকা সম্প্রাপ্তিঃ| অতীব তীক্ষ্ণমিত্যত্র আদিশব্দো লুপ্তো দ্রষ্টব্যঃ; তেন পিষ্টপযোমাষতিলাদীনাং গ্রহণম্| কেচিত্ ‘মৃন্মদ্যমত্স্যামিষতীক্ষ্ণপিষ্টপযোদিবাস্বপ্নতিলেক্ষুমাষান্| নিষেবমাণস্য’- ইতি পঠন্তি, শেষং সমম্| তেঽপি লুপ্তাদিশব্দাত্ ব্যবাযাদীনি গৃহ্ণন্তি| অপরে ‘অতীব তীক্ষ্ণম্’ ইত্যত্র ‘অতীবরূক্ষম্’ ইতি পঠন্তি||৩||

Adhikarana 3 (4) · Śloka 4

পাণ্ড্বামযোঽষ্টার্ধবিধঃ প্রদিষ্টঃ পৃথক্সমস্তৈর্যুগপচ্চ দোষৈঃ |৪|

সঙ্খ্যামাহ- পাণ্ড্বিত্যাদি| অষ্টার্ধবিধিঃ চতুর্বিধঃ; কথং চতুর্বিধ ইত্যাহ- পৃথগিত্যাদি| পৃথগ্দোষৈঃ ত্রযঃ, সমস্তৈঃ একঃ| যুগপদিতি পদং দোষত্রযস্যৈককালপ্রকোপসূচনার্থম্| যদ্যপি তন্ত্রান্তরে মৃজ্জঃ পাণ্ডুরোগঃ পঞ্চমঃ কথিতঃ, তথাঽপ্যত্র মৃজ্জস্ত্রিদোষজ এবান্তর্ভূতঃ, বক্ষ্যমাণাশ্চ কামলাদযঃ পাণ্ডুরোগস্যৈব পর্যাযাঃ; অতোঽত্র চত্বার এব| কেচিত্ পাণ্ড্বামযস্ত্বষ্টবিধ ইতি পঠন্তি| তন্মতে পৃথগ্দোষৈঃ ত্রযঃ, সমস্তৈঃ একঃ, মৃদ্ভক্ষণাত্ একঃ, দ্বে কামলে চ, একো হলীমকঃ, এবং পাণ্ডুরোগোঽষ্টবিধঃ| তথা চ তন্ত্রান্তরম্- “বাতেন পিত্তেন কফেন চাপি ত্রিদোষমৃদ্ভক্ষণসম্ভবঃ স্যাত্| দ্বে কামলে চৈকহলীমকশ্চ স চাষ্টধৈবং ত্বিহ পাণ্ডুরোগঃ”- ইতি|৪|-

Adhikarana 4 (4) · Śloka 4

সর্বেষু চৈতেষ্বিহ পাণ্ডুভাবো যতোঽধিকোঽতঃ খলু পাণ্ডুরোগঃ ||৪||

যদ্যপি বাতাদিভেদেন কৃষ্ণাদিবর্ণত্বমভিধাস্যতি, তথাঽপ্যস্য বিকারস্য পাণ্ডুবর্ণাধিক্যাত্ পাণ্ডুরোগব্যপদেশ ইতি দর্শযন্নাহ- সর্বেষু চৈতেষ্বিহ পাণ্ডুভাব ইত্যাদি||৪||

Adhikarana 5 (5) · Śloka 5

ত্বক্স্ফোটনং ষ্ঠীবনগাত্রসাদৌ মৃদ্ভক্ষণং প্রেক্ষণকূটশোথঃ | বিণ্মূত্রপীতত্বমথাবিপাকো ভবিষ্যতস্তস্য পুরঃসরাণি ||৫||

ইদানীং পাণ্ডুরোগপূর্বরূপাণ্যাহ- ত্বগিত্যাদি| ত্বক্স্ফোটঃ ত্বচাং স্ফুটনম্| ষ্ঠীবনং থূত্করণম্| যদ্যপ্যত্র মৃদ্ভক্ষণং কথিতং, তথাঽপি মৃদ্ভক্ষণে ইচ্ছা গম্যতে| প্রেক্ষণম্ অক্ষি| অবিপাক আহারস্য| পুরঃসরাণি অগ্রেসরাণি||৫||

Adhikarana 6 (6) · Śloka 6

স কামলাপানকিপাণ্ডুরোগঃ কুম্ভাহ্বযো লাঘর(ব)কোঽলসাখ্যঃ | বিভাষ্যতে লক্ষণমস্য কৃত্স্নং নিবোধ বক্ষ্যাম্যনুপূর্বশস্তত্ ||৬||

তস্যৈব পাণ্ডুরোগস্য পর্যাযানাহ- স ইত্যাদি| স রোগঃ কামলাদিকাভিঃ সঞ্জ্ঞাভির্বিভাষ্যতে বিবিধং ভাষ্যতে| অস্যেতি কামলাদিপর্যাযৈর্নির্দিষ্টস্য রোগস্য| অনুপূর্বশঃ পূর্বং পূর্বমনুপূর্বেণেত্যর্থঃ| তং পাণ্ডুরোগম্||৬||

Adhikarana 7 (7) · Śloka 7

কৃষ্ণেক্ষণং কৃষ্ণসিরাবনদ্ধং তদ্বর্ণবিণ্মূত্রনখাননং চ | বাতেন পাণ্ডুং মনুজং ব্যবস্যেদ্যুক্তং তথাঽন্যৈস্তদুপদ্রবৈশ্চ ||৭||

বাতিকপাণ্ডুরোগলক্ষণমাহ- কৃষ্ণেক্ষণমিত্যাদি| কৃষ্ণেক্ষণং কৃষ্ণাক্ষিকম্| তদ্বর্ণবিণ্মূত্রনখাননং কৃষ্ণবর্ণবিণ্মূত্রনখমিত্যর্থঃ| তদুপদ্রবৈঃ বাতোপদ্রবৈঃ||৭||

Adhikarana 8 (8) · Śloka 8

পীতেক্ষণং পীতসিরাবনদ্ধং তদ্বর্ণবিণ্মূত্রনখাননং চ | পিত্তেন পাণ্ডুং মনুজং ব্যবস্যেদ্যুক্তং তথাঽন্যৈস্তদুপদ্রবৈশ্চ ||৮||

পৈত্তিকপাণ্ডুরোগলক্ষণমাহ- পীতেত্যাদি| তদ্বর্ণং পীতবর্ণম্| তদুপদ্রবৈঃ পিত্তোপদ্রবৈরিত্যর্থঃ||৮||

Adhikarana 9 (9) · Śloka 9

শুক্লেক্ষণং শুক্লসিরাবনদ্ধং তদ্বর্ণবিণ্মূত্রনখাননং চ | কফেন পাণ্ডুং মনুজং ব্যবস্যেদ্যুক্তং তথাঽন্যৈস্তদুপদ্রবৈশ্চ ||৯||

শ্লৈষ্মিকপাণ্ডুরোগলক্ষণমাহ- শুক্লেত্যাদি| তদ্বর্ণং শুক্লবর্ণং, তদুপদ্রবৈঃ কফোপদ্রবৈঃ||৯||

Adhikarana 10 (10) · Śloka 10

সর্বাত্মকে সর্বমিদং ব্যবস্যেদ্... |১০|

সান্নিপাতিকপাণ্ডুরোগলক্ষণমাহ- সর্বাত্মকে সর্বমিদমিত্যাদি| সর্বাত্মকে সান্নিপাতিকে পাণ্ডুরোগে, সর্বং সমস্তম্, ইদং বাতাদিজ পাণ্ডুরোগলক্ষণং, ব্যবস্যেত্ জানীযাত্|১০|-

Adhikarana 11 (10) · Śloka 11

... বক্ষ্যামি লিঙ্গান্যথ কামলাযাঃ | যো হ্যামযান্তে সহসাঽন্নমম্লমদ্যাদপথ্যানি চ তস্য পিত্তম্ ||১০|| করোতি পাণ্ডুং বদনং বিশেষাত্ পূর্বেরিতৌ তন্দ্রিবলক্ষযৌ চ |১১|

ইদানীং পাণ্ডুরোগপর্যাযভূতাযা অপি কামলাযা লক্ষণমাহ- বক্ষ্যামীত্যাদি| ননু, যদি পাণ্ডুরোগস্য পর্যাযঃ কামলা, তত্ কথং তস্য লক্ষণান্যুক্তানি? সত্যং, যথা পাণ্ডুরোগাণাং বাতাদিজানাং প্রতিস্বং ভেদো বিদ্যতে তথাঽস্যাপীতি ন দোষঃ; এতেন কামলাদীনাং সঞ্জ্ঞানাং বিশিষ্টাবস্থাবিষযত্বাদ্বিশিষ্টত্বং, পর্যাযত্বং পাণ্ডুরোগত্বাপরিত্যাগাত্| তান্যেব লিঙ্গান্যাহ- য ইত্যাদি| ‘বক্ষ্যামি লিঙ্গান্যথ কামলাযা’ ইত্যভিধায কামলাকারণবচনং ভবিষ্যন্ত্যা অপি তস্যাঃ পরিজ্ঞানার্থম্| আমযান্তে পাণ্ডুরোগান্তে অন্যরোগান্তে চ| সহসা শীঘ্রম্| অন্নমম্লম্ অম্লভোজনম্| পাণ্ডুমিত্যত্র দেহমিতি শেষঃ| ‘পূর্বেরিতৌ তন্দ্রিবলক্ষযৌ চ’ ইতি শারীরস্থানে গর্ভব্যাকরণাধ্যাযে তন্দ্রা কথিতা, সূত্রস্থানে দোষাদিক্ষযবৃদ্ধ্যধ্যাযে বলক্ষয ইত্যর্থঃ| ননু, তন্দ্রাশব্দস্য ব্যুত্পাদিতত্বাত্ কথং তন্দ্রিবলক্ষযাবিতি? সত্যং, কৃষ্যাদেরাকৃতিগণত্বেনেক্প্রত্যযান্তত্বেন সাধু| অন্যে ‘তন্দ্রাঽবলত্বং প্রথমোদিতং চ’ ইতি পঠন্তি; তত্রাপি স এবার্থঃ| অপরে 'প্রথমোদিতাংশ্চ' ইতি পঠন্তি; তে চ পাণ্ডুরোগোক্তলিঙ্গবিশেষান্ গৃহ্ণন্তি| ‘পাণ্ডুবদনম্’ ইত্যত্র ‘পীতবদনম্’ ইতি কেচিত্ পঠন্তি, তং চানার্ষং টীকাকারা ভাষন্তে||১০||-

Adhikarana 12 (11) · Śloka 11

ভেদস্তু তস্যাঃ খলু কুম্ভসাহ্বঃ শোফো মহাংস্তত্র চ পর্বভেদঃ ||১১||

ইদানীং কামলাভেদমাহ- ভেদ ইত্যাদি| তত্রেতি কুম্ভসাহ্বে| পর্বভেদঃ সন্ধিপীডা| কুম্ভসাহ্বঃ তন্ত্রান্তরে কুম্ভকামলেতি কথ্যতে||১১||

Adhikarana 13 (12) · Śloka 12

জ্বরাঙ্গমর্দভ্রমসাদতন্দ্রাক্ষযান্বিতো লাঘর(ব)কোঽলসাখ্যঃ |১২|

তস্যৈব কুম্ভসাহ্বস্যাবস্থাযাং সঞ্জ্ঞান্তরমাহ- জ্বরাঙ্গমর্দেত্যাদি| স এব কুম্ভসাহ্বো জ্বরাদিযুক্তো লাঘরকোঽলসাখ্যঃ স্যাদিতি পিণ্ডার্থঃ| লাঘরকঃ কথ্যতে অলসকশ্চ কথ্যত ইত্যর্থঃ| অঙ্গমর্দো বেদনাবিশেষঃ, স্ফুটনিকেত্যপরে| অন্যে পাণ্ডুরোগ এব জ্বরাদিযুক্তঃ কুম্ভসাহ্বঃ কথ্যত ইতি মন্যন্তে| অস্যৈব অবস্থাভেদং পানকীতি তন্ত্রান্তরীযাঃ পঠন্তি| তদ্যথা- “সন্তাপো ভিন্নবর্চস্ত্বং বহিরন্তশ্চ পীততা| পাণ্ডুতা নেত্ররোগশ্চ পানকীলক্ষণং বদেত্”- ইতি|১২|-

Adhikarana 14 (12) · Śloka 12

তং বাতপিত্তাদ্ধরিপীতনীলং হলীমকং নাম বদন্তি তজ্জ্ঞাঃ ||১২||

ইদানীং হলীমকলক্ষণমাহ- তমিত্যাদি| তং পাণ্ডুরোগম্| কুম্ভসাহ্বো যদা হরিতপীতনীলঃ স্যাত্, তদা তজ্জ্ঞাঃ কাযচিকিত্সাবিদো হলীমকং নাম বদন্তি| হরি হরিতং, নীলং শ্যাবম্| কেচিত্তু ‘তং বাতপিত্তাভিপরীতলিঙ্গং’ ইতি পঠিত্বা বাতপিত্তাভ্যামভিপরীতং সম্বদ্ধং লিঙ্গং যস্য তথেতি ব্যাখ্যানযন্তি||১২||

Adhikarana 15 (13) · Śloka 13

উপদ্রবাস্তেষ্বরুচিঃ পিপাসা ছর্দির্জ্বরো মূর্ধরুজাঽগ্নিসাদঃ | শোফস্তথা কণ্ঠগতোঽবলত্বং মূর্চ্ছা ক্লমো হৃদ্যবপীডনং চ ||১৩||

ইদানীং পাণ্ডুরোগোপদ্রবানাহ- উপদ্রবা ইত্যাদি| তেষু পাণ্ডুরোগেষু| মূর্ধরুজা শিরোব্যথা| অবলত্বং নির্বলত্বম্| সোপদ্রবস্য পাণ্ডুরোগস্য কৃচ্ছ্রসাধ্যত্বমসাধ্যত্বং চ যথাবস্থং বোদ্ধব্যম্||১৩||

Adhikarana 16 (14-15) · Śloka 15

সাধ্যং তু পাণ্ড্বামযিনং সমীক্ষ্য স্নিগ্ধং ঘৃতেনোর্ধ্বমধশ্চ শুদ্ধম্ | সম্পাদযেত্ ক্ষৌদ্রঘৃতপ্রগাঢৈর্হরীতকীচূর্ণযুতৈঃ প্রযোগৈঃ ||১৪|| পিবেদ্ঘৃতং বা রজনীবিপক্বং যত্ত্রৈফলং তৈল্বকমেব বাঽপি | বিরেচনদ্রব্যকৃতং পিবেদ্বা যোগাংশ্চ বৈরেচনিকান্ ঘৃতেন ||১৫||

ইদানীং চিকিত্সিতমাহ- সাধ্যমিত্যাদি| সাধ্যপাণ্ডুরোগজ্ঞানং বক্ষ্যমাণাসাধ্যলক্ষণবিপর্যযাদরিষ্টলক্ষণবৈপরীত্যাচ্চ| ঘৃতেনেতি কট্বরকল্যাণকদাধিকমহাতিক্তপঞ্চগব্যাদিনা, অন্যে কেবলেনৈব গব্যঘৃতেনেত্যাহুঃ| যদত্র পাণ্ডুরোগেষু ঘৃতেনৈব স্নেহনমুক্তং তত্তেষাং পিত্তভূযিষ্ঠত্বাদ্রক্তদূষ্যত্বাচ্চ| যদ্যপি পাণ্ডুরোগে ঊর্ধ্বশোধনং নিষিদ্ধং, তথাঽপি ঋতুদেশপ্রকৃতিকালশরীরাপেক্ষযা মৃদু বমনং দেযম্| তথা চ তন্ত্রান্তরম্,- “কালং চ দেশপ্রকৃতী শরীরং সমীক্ষ্য দদ্যাদ্বমনং বিধিজ্ঞঃ| বান্তস্য তীক্ষ্ণান্যনুলোমনানি কল্পোপদিষ্টানি ভিষগ্বিদধ্যাত্”- ইতি| বমনানন্তরং বক্ষ্যমাণৈঃ শালিপ্রভৃতিভিঃ কৃতসংসর্জনক্রমস্য দোষশমনার্থমাহ- সম্পাদযেদিত্যাদি| শুদ্ধং পাণ্ডুরোগিণমেবম্ভূতৈঃ প্রযোগৈর্বক্ষ্যমাণযোগৈঃ শেষদোষশমনার্থং সম্পাদযেত্ সম্যক্ যোজযেদিত্যর্থঃ| ননু, সর্পির্মধুহরীতকীযুক্তমেকমেবাযোরজোযোগমভিধাস্যতি, তত্ কথং প্রযোগৈরিতি বহুবচনং? সত্যং, প্রদেশান্তরোক্তানাং নবাযসপ্রভৃতীনামত্র শস্তত্বাত্| পিবেদ্ঘৃতং বেত্যাদি| রজনীবিপক্বং হরিদ্রাকল্কসাধিতম্|ত্রৈফলং ত্রিফলাসাধিতম্| তৈল্বকমিতি তিল্বকঃ পট্টিকারোধ্রঃ, তেন সাধিতমিত্যর্থঃ; অন্যে তৈল্বকং বাতব্যাধ্যুক্তমাহুঃ| বিরেচনদ্রব্যকৃতমিত্যাদি|- ত্রিবৃদাদিসংস্কৃতং ঘৃতং; বৈরেচনিকান্ যোগান্ বিরেচনদ্রব্যবিকল্পোক্তান্, তাংশ্চ ঘৃতেন পিবেত্||১৪-১৫||

Adhikarana 17 (16) · Śloka 16

মূত্রে নিকুম্ভার্ধপলং বিপাচ্য পিবেদভীক্ষ্ণং কুডবার্ধমাত্রম্ | খাদেদ্গুডং বাঽপ্যভযাবিপক্বমারগ্বধাদিক্বথিতং পিবেদ্বা ||১৬||

ইদানীং পাণ্ডুরোগেঽপরাণ্যপি বিরেচনান্যাহ- মূত্রে ইত্যাদি| নিকুম্ভা দন্তী, তস্যা অর্ধপলং মহিষীমূত্রে ষোডশগুণে বিপাচ্য, চতুর্ভাগাবশিষ্টং কুডবার্ধমাত্রং পলদ্বযমাত্রং, বিরেকায পিবেদিত্যর্থঃ| গুড ইক্ষুবিকৃতিঃ| অভযাবিপক্বং হরীতকীক্বাথবিপক্বং, অন্যে অভযাবিপক্বং গুডকং সহরীতকীপ্রভৃতিকমাহুঃ| অপরে ‘অভযাবিমিশ্রম্’ ইতি পঠন্তি| মুহুর্বৈরেচনিকযোগনির্দেশাত্ পাণ্ডুরোগে বিরেচনস্যাত্যন্তহিতত্বং জ্ঞেযম্||১৬||

Adhikarana 18 (17) · Śloka 17

অযোরজোব্যোষবিডঙ্গচূর্ণং লিহ্যাদ্ধরিদ্রাং ত্রিফলান্বিতাং বা | সর্পির্মধুভ্যাং বিদধীত বাঽপি শাস্ত্রপ্রদেশাভিহিতাংশ্চ যোগান্ ||১৭||

কিং পাণ্ডুরোগে পূর্বোক্তমেব কার্যমুতান্যদপীত্যাহ- অয ইত্যাদি| অযোরজোব্যোষবিডঙ্গচূর্ণমিত্যেকো যোগঃ| হরিদ্রাং ত্রিফলান্বিতামিতি দ্বিতীযো যোগঃ| অযোরজো লোহচূর্ণম্| ব্যোষং ত্রিকটুকম্| ‘লিহ্যাত্’ ইত্যাত্র ‘মধুসর্পির্ভ্যাম্’ ইতি সম্বন্ধনীযম্| হরিদ্রাং পিণ্ডহরিদ্রাম্| কেচিত্ হরিদ্রাশব্দেন আদৌ দারুশব্দলোপাত্ দারুহরিদ্রাং গৃহ্ণন্তি| বিদধীত বাঽপীত্যাদি| বিদধীত কুর্বীত| শাস্ত্রপ্রদেশাভিহিতাংশ্চ যোগান্ শাস্ত্রেঽন্যপ্রদেশোক্তান্ নবাযসাদীন্||১৭||

Adhikarana 19 (18) · Śloka 18

হরেচ্চ দোষান্ বহুশোঽল্পমাত্রান্ শ্বযেদ্ধি দোষেষ্বতিনির্হৃতেষু |১৮|

ইদানীং পাণ্ডুরোগে যত্ শোধনমুক্তং তদল্পমাত্রযা কর্তব্যমিত্যাহ- হরেচ্চ দোষানিত্যাদি| বহুশো বহূন্ বারান্| অল্পমাত্রান্ স্তোকস্তোকান্| কস্মাত্ স্তোকান্ স্তোকান্ হরেদিত্যাহ- শ্বযেদ্ধি দোষেষ্বিত্যাদি| শ্বযেত্ শ্বযথুং প্রাপ্নুযাত্| হি যস্মাদর্থে| অত্র পাঠান্তরং- ‘হরেচ্চ দোষান্ বহুশোঽল্পমাত্রান্ শুদ্ধেষু দোষেষ্বভিনির্হৃতেষু’ ইতি| শুদ্ধেষু দুষ্টিরহিতেষু; অভিনির্হৃতেষ্বিত্যভিশব্দঃ সম্যগর্থঃ, অতিযোগস্যানিষ্টত্বাত্|১৮|-

Adhikarana 20 (18) · Śloka 18

ধাত্রীফলানাং রসমিক্ষুজং চ মন্থং পিবেত্ ক্ষৌদ্রযুতং হিতাশী ||১৮||

ধাত্রীফলানামিত্যাদি| ধাত্রীফলানামামলকফলানাং স্বরসং ক্ষৌদ্রযুতং পিবেদিত্যেকো যোগঃ| ইক্ষুজং রসং ক্ষৌদ্রযুতমিতি দ্বিতীযঃ| মন্থমিতি “শক্তবঃ সর্পিষাঽভ্যক্তাঃ শীতবারিপরিপ্লুতাঃ”- ইত্যাদ্যুক্তলক্ষণং ক্ষৌদ্রযুতমিতি তৃতীযঃ| তথা চ তন্ত্রান্তরম্- “পিবেত্ সুশীতলান্ মন্থান্ ঘৃতাক্তান্ মধুসংযুতান্| সক্ষৌদ্রং বা রসং ধাত্র্যা ইক্ষোর্বাঽপি হিতাশনঃ”- ইতি| তন্ত্রান্তরে পাণ্ডুরোগে মন্থশব্দেন বিশিষ্টো মন্থ উচ্যতে| তদ্যথা- “ধাত্রীফলরসে শক্তূনিক্ষূণাং চ রসে তথা| পাণ্ডুর্মধুসমাযুক্তং পিবেন্মন্থং সুশীতলম্”- ইতি||১৮||

Adhikarana 21 (19) · Śloka 20

উমে বৃহত্যৌ রজনীং শুকাখ্যাং কাকাদনীং চাপি সকাকমাচীম্ | আদারিবিম্বীং সকদম্বপুষ্পীং বিপাচ্য সর্পির্বিপচেত্ কষাযে ||১৯|| তত্ পাণ্ডুতাং হন্ত্যুপযুজ্যমানং ক্ষীরেণ বা মাগধিকা যথাগ্নি |২০|

উমে ইত্যাদি| শুকাখ্যা চর্মকারবটঃ, অন্যে শুকশিম্বামাহুঃ| কাকাদনী কাকতিন্দুকঃ| আদারিবিম্বীং সকদম্বপুষ্পীমিত্যাদি|- আদারী বেল্লন্তরসদৃশপুষ্পা আলিরিতি লোকে, বিম্বী রাস্নানুকারিবিটপা লোহিতফলা চ; কার্তিককুণ্ডস্তু আদারিশিম্বী আউলিরিতি প্রসিদ্ধেতি ব্যাখ্যানযতি| কদম্বপুষ্পী ভূমিকদম্বঃ, অলম্বুষামপরে| এতানি কষাযকল্পেন বিপাচ্য, তস্মিন্ কষাযে সর্পির্ঘৃতং বিপচেত্| ক্ষীরেণ বেত্যাদি| মাগধিকা বা ক্ষীরেণ সহ যথাগ্নি উপযুজ্যমানা পণ্ডুতাং হন্তীত্যর্থঃ||১৯||-

Adhikarana 22 (20) · Śloka 20

হিতং চ যষ্টীমধুজং কষাযং চূর্ণং সমং বা মধুনাঽবলিহ্যাত্ ||২০||

হিতং চেত্যাদি| যষ্টীমধুককষাযং মধুনা সমমিত্যেকো যোগঃ| চূর্ণং বা যষ্টীমধুকস্য মধুনা সমং মধুনা সহ লিহ্যাদিতি দ্বিতীযঃ| অন্যে ‘চূর্ণং সমং বা মধুনাঽবলিহ্যাত্’ ইত্যত্র ‘চূর্ণং লিহেদ্বা মধুনা দ্বিতীযম্’ ইতি পঠন্তি; তত্রাপি স এবার্থঃ||২০||

Adhikarana 23 (21) · Śloka 21

গোমূত্রযুক্তং ত্রিফলাদলানাং দত্ত্বাঽঽযসং চূর্ণমনল্পকালম্ | প্রবালমুক্তাঞ্জনশঙ্খচূর্ণং লিহ্যাত্তথা কাঞ্চনগৈরিকোত্থম্ ||২১||

গোমূত্রযূক্তমিত্যাদি| ত্রিফলাদলানাং চূর্ণমাযসং চূর্ণং দত্ত্বা গোমূত্রযুক্তমনল্পকালং চিরকালং লিহ্যাত্| ত্রিফলাদলানামিতি দলশব্দঃ অষ্ঠীলাপরিহারার্থম্| অন্যে ‘গোমূত্রযুক্তং ত্রিফলাদলানাং’ ইত্যত্র ‘গোমূত্রপীতত্রিফলাদলানাং’ ইতি পঠন্তি, গোমূত্রভাবিতত্রিফলাদলানামিতি ব্যাখ্যানযন্তি| প্রবালেত্যাদি| প্রবালো বিদ্রুমঃ, মুক্তা মৌক্তিকম্, অঞ্জনং রসাঞ্জনম্| তথেতি গোমূত্রযুক্তমনল্পকালং লিহ্যাদিত্যর্থঃ| কাঞ্চনগৈরিকোত্থমিত্যত্রাপি তথেতি সম্বধ্যতে; তেন সুবর্ণগৈরিকচূর্ণং গোমূত্রযুতং চিরকালং লিহ্যাদিত্যর্থঃ| ‘গোমূত্রপীতাং ত্রিফলাং সপিষ্টাং’ ইতি কেচিত্ পঠন্তি, গোমূত্রপীতাং গোমূত্রভাবিতাং মধুনা অবলিহ্যাদিতি ব্যাখ্যানযন্তি||২১||

Adhikarana 24 (22) · Śloka 22

আজং শকৃত্স্যাত্ কুডবপ্রমাণং বিডং হরিদ্রা লবণোত্তমং চ | পৃথক্ পলাংশানি সমগ্রমেতচ্চূর্ণং হিতাশী মধুনাঽবলিহ্যাত্ ||২২||

আজমিত্যাদি| আজং শকৃত্ ছাগলীপুরীষম্| কুডবপ্রমাণং চতুষ্পলমাত্রম্| বিডং লবণম্| লবণোত্তমং সৈন্ধবম্| পৃথক্পলাংশানি বিডাদীনি পৃথক্পলমাত্রাণীত্যর্থঃ| সমগ্রং সমস্তম্||২২||

Adhikarana 25 (23) · Śloka 23

মণ্ডূরলোহাগ্নিবিডঙ্গপথ্যাব্যোষাংশকঃ সর্বসমানতাপ্যঃ | মূত্রাসুতোঽযং মধুনাঽবলেহঃ পাণ্ড্বামযং হন্ত্যচিরেণ ঘোরম্ ||২৩||

ইদানীং পাণ্ডুরোগে সিদ্ধতমং যোগমাহ- মণ্ডূরেত্যাদি| মণ্ডূরং লোহকিট্টানুকারি দ্রব্যম্| অগ্নিঃ চিত্রকঃ| ব্যোষং ত্রিকটুকম্| মণ্ডূরাদীনাং ব্যোষপর্যন্তানামংশঃ সমো ভাগো যস্মিন্ স তথেত্যর্থঃ| তাপ্যো মাক্ষিকধাতুঃ| মূত্রাসুতঃ মূত্রে উষিতঃ মূত্রসন্ধিত ইত্যর্থঃ||২৩||

Adhikarana 26 (24) · Śloka 24

বিভীতকাযোমলনাগরাণাং চূর্ণং তিলানাং চ গুডশ্চ মুখ্যঃ | তক্রানুপানো বটকঃ প্রযুক্তঃ ক্ষিণোতি ঘোরানপি পাণ্ডুরোগান্ ||২৪||

অপরমপি সিদ্ধতমং যোগমাহ- বিভীতকেত্যাদি| অযোমলং লোহসিঙ্ঘাণকম্| তিলানাং কৃষ্ণতিলানামপি চূর্ণম্| গুডশ্চ মুখ্য ইতি সর্বসমো গুডো নার্ধগুড ইত্যর্থঃ| ক্ষিণোতি হন্তি| যদ্যপ্যেতদ্যোগদ্বযমনার্ষং তথাঽপি সিদ্ধতমত্বেনাস্মদ্গুরুসম্মতত্বাদস্মাভিঃ পঠিতম্||২৪||

Adhikarana 27 (25-26) · Śloka 26

সৌবর্চলং হিঙ্গু কিরাততিক্তং কলাযমাত্রাণি সুখাম্বুনা বা | মূর্বাহরিদ্রামলকং চ লিহ্যাত্ স্থিতং গবাং সপ্তদিনানি মূত্রে ||২৫|| মূলং বলাচিত্রকযোঃ পিবেদ্বা পাণ্ড্বামযার্তোঽক্ষসমং হিতাশী | সুখাম্বুনা বা লবণেন তুল্যং শিগ্রোঃ ফলং ক্ষীরভুজোপযোজ্যম্ ||২৬||

সৌবর্চলমিত্যাদি| সৌবর্চলাদীনামেকত্বেন নির্দিষ্টানাং বহুবচনান্তং কলাযমাত্রাণীতি বিশেষণং সৌবর্চলাদীনাং প্রত্যেকং কলাযমাত্রেতি প্রমাণবোধনার্থম্| সুখাম্বুনা বা ঈষদুষ্ণাম্বুনা, ‘লিহেত্’ ইতি বাক্যশেষঃ| বাশব্দোঽত্র যোগাপেক্ষযা| মূর্বেত্যাদি| মূর্বাদিকং সপ্তদিনানি গবাং মূত্রে স্থিতং লিহ্যাত্| মূর্বা চোরস্নাযুঃ| বলাচিত্রকযোঃ সমুদিতযোর্মূলকল্কং বা কর্ষসমং হিতাশী পাণ্ডুরোগার্তো মূত্রেণ সুখাম্বুনা বা পিবেদিত্যর্থঃ| কার্তিককুণ্ডস্তু ‘মূর্বাহরিদ্রামলকং পিবেদ্বা স্থিতং গবাং সপ্তদিনানি মূত্রে’ ইতি পঠতি; তত্র তন্ত্রযুক্তিবশাত্ ‘যত্র তত্’ ইতি পদং দ্রষ্টব্যং, তেন যত্র মূর্বাদিকং স্থিতং তত্ পিবেদিত্যর্থঃ| তথা চ তন্ত্রান্তরম্- “নিশামলকমূর্বাভির্ভাবিতং সপ্ত বাসরান্| গোমূত্রং পিবতঃ পাণ্ডুঃ কামলা চ প্রণশ্যতি”- ইতি| সুখাম্বুনা উষ্ণোদকেন| লবণেন সৈন্ধবেন| তুল্যং সমম্| শিগ্রোঃ ফলং শোভাঞ্জনকফলম্| কলাযমাত্রমিত্যনুবর্তনীযং, সৈন্ধবস্যাপি হিঙ্গুবদধিকমাত্রস্যানভিমতত্বাত্| ক্ষীরভুজা দুগ্ধাশনেন| উপযোজ্যং পানাদিবিধিনা||২৫-২৬||

Adhikarana 28 (27) · Śloka 27

ন্যগ্রোধবর্গস্য পিবেত্ কষাযং শীতং সিতাক্ষৌদ্রযুতং হিতাশী | শালাদিকং চাপ্যথ সারচূর্ণং ধাত্রীফলং বা মধুনাঽবলিহ্যাত্ ||২৭||

ন্যগ্রোধবর্গস্যেত্যাদি| ন্যগ্রোধবর্গস্য ন্যগ্রোধাদিগণস্য| কষাযং ক্বাথপাকপরিভাষযা ক্বথিতম্| শালাদিকং চাঽপ্যথ সারচূর্ণমিত্যাদি| শালসারাদিচূর্ণং মধুনা অবলিহ্যাত্, আমলকচূর্ণং বেত্যর্থঃ||২৭||

Adhikarana 29 (28-29) · Śloka 30

বিডঙ্গমুস্তত্রিফলাজমোদপরূষকব্যোষবিনির্দহন্যঃ | চূর্ণানি কৃত্বা গুডশর্করে চ তথৈব সর্পির্মধুনী শুভে চ ||২৮|| সম্ভারমেতদ্বিপচেন্নিধায সারোদকে সারবতো গণস্য | জাতং চ লেহ্যং মতিমান্ বিদিত্বা নিধাপযেন্মোক্ষকজে সমুদ্গে ||২৯|| হন্ত্যেষ লেহঃ খলু পাণ্ডুরোগং সশোথমুগ্রামপি কামলাং চ |৩০|

বিডঙ্গমুস্তত্রিফলেত্যাদি| এতানি বিডঙ্গাদিদ্রব্যাণি চূর্ণীকৃতানি , সারবতো গণস্য সারোদকে শালাসারাদিগণসারক্বাথে, নিধায নিক্ষিপ্য, তথা শুভে নির্মলে কৃত্বা গুডশর্করে সর্পির্মধুনী চ নিক্ষিপ্য, ঐকধ্যং তাবত্ পচেত্ যাবল্লেহ্যং স্যাত্, ততশ্চ সঞ্জাতলেহ্যং বিদিত্বা মতিমান্ বৈদ্যো মোক্ষকজে সমুদ্গে মোক্ষকমযে সম্পুটে নিধাপযেত্ নিক্ষিপেদিতি পিণ্ডার্থঃ| বিনির্দহনী চিত্রকঃ| গুডশর্করাবিডঙ্গাদিদ্রব্যচূর্ণপ্রমাণং সারোদকচতুর্থাংশেন, মধুসর্পিঃপ্রমাণমপি তথৈব| ননু, উষ্ণযোগেন মধু বিরুধ্যতে, তত্ কথং মধুনা সহাবলেহপাকঃ? সত্যম্, উষ্ণেন সহ মধুনোঽভ্যবহারে বিরোধো ন পাকে; তথা চ তন্ত্রান্তরং- ‘সক্ষৌদ্রাং শর্করাং পক্ত্বা’ ইত্যাদি| যদ্যপ্যত্র পাণ্ডুরোগচিকিত্সিতং সামান্যেনোক্তং, তথাঽপ্যেতদেব চিকিত্সিতং দ্রব্যস্বরূপেণ বিকল্প্য যথাদোষং যোজ্যম্| তথা চ তন্ত্রান্তরম্- “পাণ্ডুরোগপ্রশান্ত্যর্থমিদমুক্তং চিকিত্সিতম্| বিকল্প্যৈবং চ ভিষজা যথাদোষবলং প্রতি|| স্নেহপ্রাযং পবনজে, তিক্তশীতং তু পৈত্তিকে| শ্লৈষ্মিকে কটুরূক্ষোষ্ণং, মিশ্রং স্যাত্ সান্নিপাতিকে” (চ. চি. ১৬) ইতি||২৮-২৯||-

Adhikarana 30 (30) · Śloka 30

সশর্করা কামলিনাং ত্রিভণ্ডী হিতা গবাক্ষী সগুডা চ শুণ্ঠী ||৩০||

অতঃ পরং কামলাচিকিত্সিতমাহ- সশর্করেত্যাদি| ত্রিভণ্ডী ত্রিবৃত্, সশর্করা কামলিনাং হিতা| গবাক্ষী ইন্দ্রবারুণী, সা সগুডা হিতা, শুণ্ঠ্যপি সগুডা||৩০||

Adhikarana 31 (31) · Śloka 31

কালেযকে চাপি ঘৃতং বিপক্বং হিতং চ তত্ স্যাদ্রজনীবিমিশ্রম্ |৩১|

কালেযকে ইত্যাদি| কালেযকং দারুহরিদ্রানুকারি দ্রব্যং, তত্কল্কসাধিতং ঘৃতং, রজনীবিমিশ্রং হরিদ্রাচূর্ণপ্রক্ষেপযুতম্|৩১|-

Adhikarana 32 (31) · Śloka 31

ধাতুং নদীজং জতু শৈলজং বা কুম্ভাহ্বযে মূত্রযুতং পিবেদ্বা ||৩১||

কুম্ভাহ্বযচিকিত্সামাহ- ধাতুমিত্যাদি| নদীজং ধাতুং সুবর্ণমাক্ষিকম্| তচ্চ মূত্রযুতং পিবেত্| জতু শৈলজং বেতি শিলাজতু বা মূত্রযুতং পিবেত্||৩১||

Adhikarana 33 (32) · Śloka 32

মূত্রে স্থিতং সৈন্ধবসম্প্রযুক্তং মাসং পিবেদ্বাঽপি হি লোহকিট্টম্ |৩২|

মূত্রে স্থিতমিত্যাদি| গোমূত্রে মাসমুষিতং লোহকিট্টং লোহমলং তেনৈব মূত্রেণ চূর্ণিতং সৈন্ধবযুক্তং কুম্ভাহ্বযে পিবেত্| লোহকিট্টমিত্যত্র হিরণ্যকিট্টমিতি কেচিত্ পঠন্তি; তন্নেচ্ছন্তি নিবন্ধকারাঃ, হিরণ্যস্যামলত্বাত্|৩২|-

Adhikarana 34 (32-35) · Śloka 35

দগ্ধ্বাঽক্ষকাষ্ঠৈর্মলমাযসং বা গোমূত্রনির্বাপিতমষ্টবারান্ ||৩২|| বিচূর্ণ্য লীঢং মধুনাঽচিরেণ কুম্ভাহ্বযং পাণ্ডুগদং নিহন্যাত্ | সিন্ধূদ্ভবং বাঽগ্নিসমং চ কৃত্বা ক্ষিপ্ত্বা চ মূত্রে সকৃদেব তপ্তম্ ||৩৩|| লৌহং চ কিট্টং বহুশশ্চ তপ্ত্বা নির্বাপ্য মূত্রে বহুশস্তথৈব | একীকৃতং গোজলপিষ্টমেতদৈকধ্যমাবাপ্য পচেদুখাযাম্ ||৩৪|| যথা ন দহ্যেত তথা বিশুষ্কং চূর্ণীকৃতং পেযমুদশ্বিতা তত্ | তক্রৌদনাশী বিজযেত রোগং পাণ্ডুং তথা দীপযতেঽনলং চ ||৩৫||

কুম্ভাহ্বযে সিদ্ধতমং যোগমাহ- দগ্ধ্বেত্যাদি| সিন্ধূদ্ভবং সৈন্ধবম্| অগ্নিসমং কৃত্বা বিভীতকাগ্নিনা অগ্নিবর্ণং কৃত্বেত্যর্থঃ| সকৃত্ একবারম্| লৌহং চ কিট্টমিতি লোহসিংহাণকমিত্যর্থঃ| নির্বাপ্য নির্বাপিত্তং কৃত্বা| একীকৃতং সমভাগেন মিশ্রীকৃতং, গোজলপিষ্টং নির্বাপণাবশিষ্টপঞ্চগুণে গোমূত্রে পিষ্টম্, উখাযাং স্থাল্যাং নিক্ষিপ্য, মুখং পিধায, যথা বাষ্পো বহির্ন নিঃসরতি যথা ন দহ্যেত তথা বিপচেত্| ততশ্চ বিশুষ্কং চূর্ণীকৃতমুদশ্বিতা মথিতেন সহ পেযম্| জীর্ণে চ তক্রৌদনং ভোজযেদিত্যর্থঃ| অযমসৌশ্রুতোঽপি পূর্বোক্তহেতুত্বাদস্মাভিঃ পঠিতঃ| অস্য যোগস্য তন্ত্রান্তরে বিভীতকলবণমিতি সঞ্জ্ঞা||৩২-৩৫||

Adhikarana 35 (36) · Śloka 36

দ্রাক্ষাগুডূচ্যামলকীরসৈশ্চ সিদ্ধং ঘৃতং লাঘর(ব)কে হিতং চ |৩৬|

ইদানীং লাঘরচিকিত্সামাহ- দ্রাক্ষেত্যাদি|৩৬|-

Adhikarana 36 (36-37) · Śloka 37

গৌডানরিষ্টান্ মধুশর্করাশ্চ মূত্রাসবান্ ক্ষারকৃতাংস্তথৈব ||৩৬|| স্নিগ্ধান্ রসানামলকৈরুপেতান্ কোলান্বিতান্ বাঽপি হি জাঙ্গলানাম্ | সেবেত শোফাভিহিতাংশ্চ যোগান্ পাণ্ড্বামযী শালিযবাংশ্চ নিত্যম্ ||৩৭||

ইদানীং তন্ত্রান্তরোক্তান্ সর্বানেবাভযারিষ্টাদীন্ ভোজনং চ সঙ্গৃহ্ণন্নাহ- গৌডানিত্যাদি| গৌডানরিষ্টান্ অভযারিষ্টাদীন্| মধুশর্করাশ্চেতি মধুশব্দেন মধ্বাসবঃ, স চ লোহারিষ্টপ্রভৃতিকঃ; শর্করাশব্দেন শর্করাসবঃ| মূত্রাসবান্ কুষ্ঠচিকিত্সিতোক্তান্| ক্ষারকৃতানাসবান্ শ্লীপদপঠিতান্| স্নিগ্ধান্ রসান্ স্নেহভৃষ্টান্ জাঙ্গলানাং মাংসরসান্; আমলকৈরুপেতান্ আমলকফলসংস্কৃতান্, কোলান্বিতান্ বেতি বদরসংস্কৃতান্; বিকল্পাভিধানং সাত্ম্যাপেক্ষযা| শোফাভিহিতান্ যোগান্ দেবদারুশুণ্ঠীরসাদিকান্| শালযো রক্তশাল্যাদযঃ||৩৬-৩৭||

Adhikarana 37 (38) · Śloka 38

শ্বাসাতিসারারুচিকাসমূর্চ্ছাতৃট্ছর্দি শূলজ্বরশোফদাহান্ | তথাঽবিপাকস্বরভেদসাদান্ জযেদ্যথাস্বং প্রসামীক্ষ্য শাস্ত্রম্ ||৩৮||

পাণ্ডুরোগোপদ্রবচিকিত্সামাহ- শ্বাসেত্যাদি| এতান্ শ্বাসাদীনুপদ্রবান্, যথাস্বং শাস্ত্রং যথাত্মীযং চিকিত্সাশাস্ত্রং প্রসমীক্ষ্য জযেত্| কেচিদমুং পাঠমন্যথা পঠন্তি,- ‘তৃষ্ণাং জ্বরং ছর্দিমথাতিসারং মূর্চ্ছাং ক্ষযং শ্বাসমনন্নলিপ্সাম্ | তথাঽবিপাকস্বরভেদসাদান্ জযেদ্যথাবত্ প্রসমীক্ষ্য শাস্ত্রম্’- ইতি| ননু, জ্বরাতিসারান্বিতস্য তস্যাসাধ্যত্বেন বক্ষ্যমাণত্বাত্ কুতো জ্বরাতিসারযোশ্চিকিত্সাতিদেশঃ? উচ্যতে, অচিরোত্থিতযোস্তযোঃ সতোঃ পাণ্ডুরোগিণঃ প্রতিকার্যত্বাত্||৩৮||

Adhikarana 38 (39-40) · Śloka 40

অন্তেষু শূনং পরিহীনমধ্যং ম্লানং তথাঽন্তেষু চ মধ্যশূনম্ | গুদে চ শেফস্যথ মুষ্কশূনং প্রতাম্যমানং চ বিসঞ্জ্ঞকল্পম্ ||৩৯|| বিবর্জযেত্ পাণ্ডুকিনং যশোঽর্থী তথাঽতিসারজ্বরপীডিতং চ ||৪০||

ইদানীমনুপক্রম্যস্য পাণ্ডুরোগিণো লক্ষণমাহ- অন্তেষু শূনমিত্যাদি| অন্তেষু হস্তপাদমুখেষু| পরিহীনমধ্যং কৃশমধ্যকাযম্| ম্লানং কৃশম্| গুদে চ শেফসীত্যত্রাপি শূনমিতি সম্বন্ধনীযং, শেফো যোনিলিঙ্গম্| মুষ্কশূনম্ অণ্ডকোষশূনম্| যদ্যপি মধ্যশূনমিত্যনেনৈব গুদাদিশোফঃ প্রাপ্তঃ, তথাঽপ্যন্তে ম্লানতাং বিনাঽপি গুদাদিশোফী ত্যাজ্য ইতি দর্শনার্থং গুদাদিশোফকথনম্| প্রতাম্যমানং মূর্চ্ছন্তম্| বিসঞ্জ্ঞকল্পং বেচেতনপ্রাযম্| যদ্যপি মূর্চ্ছাযেন বিসঞ্জ্ঞকল্পমিতি প্রাপ্তং, তথাঽপ্যভিধানং বিসঞ্জ্ঞকল্পস্য বিশেষেণাসাধ্যতাপ্রতিপাদনার্থম্| অতিসারজ্বরপীডিতম্ অতিসারজ্বরাভ্যাং পীডিতমিত্যর্থঃ| যদ্যপি পানকীহলীমকচিকিত্সিতং নোক্তং, তথাঽপি পাণ্ডুরোগচিকিত্সিতং তযোরপি কর্তব্যম্||৩৯-৪০||

Adhikarana puShpikA · Śloka 44

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রে পাণ্ডুরোগপ্রতিষেধো নাম (ষষ্ঠোঽধ্যাযঃ, আদিতঃ) চতুশ্চত্বারিংশত্তমোঽধ্যাযঃ ||৪৪||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে কাযচিকিত্সাতন্ত্রে পাণ্ডুরোগপ্রতিষেধো নাম চতুশ্চত্বারিংশত্তমোঽধ্যাযঃ||৪৪||