10. pittābhiṣyandapratiṣēdhādhyāyaḥ

Adhikarana 1 (1-2) · Śloka 2

অথাতঃ পিত্তাভিষ্যন্দপ্রতিষেধং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

বাতাভিষ্যন্দপ্রতিষেধানন্তরং ‘বাতাদ্দশ তথা পিত্তাত্’ ইতি বচনাত্ পিত্তাভিষ্যন্দপ্রতিষেধারম্ভঃ- অথাত ইত্যাদি||১-২||

Adhikarana 2 (3) · Śloka 3

পিত্তস্যন্দে পৈত্তিকে চাধিমন্থে রক্তাস্রাবঃ স্রংসনং চাপি কার্যম্ | অক্ষ্ণোঃ সেকালেপনস্যাঞ্জনানি পৈত্তে চ স্যাদ্যদ্বিসর্পে বিধানম্ ||৩||

পিত্তেত্যাদি| স্রংসনং বিরেকঃ| পিত্তবিসর্পবিধানং ‘উশীরলামজ্জকচন্দনানি’ ইত্যাদিপ্রলেপাঃ| পূর্ববদত্রাপ্যপতর্পণাদিভিঃ কৃতামপাচনস্য স্নেহপূর্বকঃ সিরামোক্ষঃ||৩||

Adhikarana 3 (4-5) · Śloka 6

গুন্দ্রাং শালিং শৈবলং শৈলভেদং দার্বীমেলামুত্পলং রোধ্রমভ্রম্ | পদ্মাত্পত্রং শর্করা দর্ভমিক্ষুং তালং রোধ্রং বেতসং পদ্মকং চ ||৪|| দ্রাক্ষাং ক্ষৌদ্রং চন্দনং যষ্টিকাহ্বং যোষিত্ক্ষীরং রাত্র্যনন্তে চ পিষ্ট্বা | সর্পিঃসিদ্ধং তর্পণে সেকনস্যে শস্তং ক্ষীরং সিদ্ধমেতেষু চাজম্ ||৫|| যোজ্যো বর্গো ব্যস্ত এষোঽন্যথা বা সম্যঙ্নস্যেঽষ্টার্ধসঙ্খ্যেঽপি নিত্যম্ |৬|

ইদানীং পিত্তস্যাভিষ্যন্দযৌগিকদ্রব্যাণ্যাহ- গুন্দ্রামিত্যাদি| গুন্দ্রা এরকাভেদঃ, গবেধুকেত্যন্যে, শৈবলং দূর্বা, শৈলভেদঃ পাষাণভেদঃ, চন্দনং রক্তচন্দনং, রাত্রিঃ হরিদ্রা, অনন্তা উত্পলসারিবা, যোষিত্ক্ষীরং স্ত্রীস্তন্যং, শর্করাদেঃ সাহচর্যাত্ কল্কদ্রব্যে ইক্ষুরিতি ইক্ষুরসেন দ্রবকার্যম্| ব্যস্তঃ অসমস্তঃ, অন্যথা বা সমস্ত ইত্যর্থঃ| যদ্যপি বর্গত্বাত্ ‘সমস্তং বর্গমর্ধং বা যথালাভমথাপি বা’ ইতি শল্যতন্ত্রোক্তপরিভাষযৈব সমস্তব্যস্ততা প্রাপ্তা, তথাঽপি শালাক্যতন্ত্রত্বাদত্র পুনরুক্তা| নস্যে অষ্টার্ধসঙ্খ্যে চতুঃসঙ্খ্যে প্রতিমর্ষাবপীডনস্যশিরোবিরেচনাখ্যে||৪-৫||-

Adhikarana 4 (6) · Śloka 6

ক্রিযাঃ সর্বা পিত্তহর্যঃ প্রশস্তাস্ত্র্যহাচ্চোর্ধ্বং ক্ষীরসর্পিশ্চ নস্যম্ ||৬||

ক্রিযা ইত্যাদি| ক্ষীরসর্পিশ্চেতি ‘ভোজনে’ ইতি শেষঃ| নস্যমিত্যুপলক্ষণং, তেনাশ্চ্যোতনসেকাঞ্জনাদি গৃহ্যতে| যদ্যপি ‘পৈত্তে চ স্যাদ্যদ্বিসর্পে বিধানং’ ইত্যনেনৈব পিত্তহরী ক্রিযা কথিতা, তথাঽপি তত্র ব্যাধিপ্রত্যনীকতযোক্তা, অত্র তু দোষপ্রত্যনীকত্বেনেতি ন দোষঃ||৬||

Adhikarana 5 (7) · Śloka 7

পালাশং স্যাচ্ছোণিতং চাঞ্জনার্থে শল্লক্যা বা শর্করাক্ষৌদ্রযুক্তম্ |৭|

রক্তপিত্তপ্রসাদকাঞ্জনানাং রসক্রিযা প্রথমা, অতস্তামাহ- পালাশমিত্যাদি| পালাশং শোণিতং কিংশুকরসঃ; অন্যে পলাশখপুরমাহুঃ|৭|-

Adhikarana 6 (7) · Śloka 7

রসক্রিযাং শর্করাক্ষৌদ্রযুক্তাং পালিন্দ্যাং বা মধুকে বাঽপি কুর্যাত্ ||৭||

অপরামপি রসক্রিযামাহ- রসক্রিযামিত্যাদি| রসক্রিযাফাণিতাকৃতিঃ| তথা চোক্তম্- “গৃহীত্বা ক্বাথকল্পেন ক্বাথং পূতং পুনঃ পুনঃ| ক্বাথযেত্ ফাণিতাকারমেষা প্রোক্তা রসক্রিযা” ইতি| পালিন্দী শ্যামা ত্রিবৃত্, সারিবামন্যে||৭||

Adhikarana 7 (8) · Śloka 8

মুস্তা ফেনঃ সাগরস্যোত্পলং চ কৃমিঘ্নৈলাধাত্রিবীজাদ্রসশ্চ |৮|

অপরমপি রসক্রিযাঞ্জনমাহ- মুস্তেত্যাদি| কৃমিঘ্না বিডঙ্গাঃ, ধাত্রী আমলকং, বীজঃ পীতসারঃ ‘বীজক’ ইতি যাবত্, মুস্তাদীনাং রসে রসক্রিযা কার্যা|৮|-

Adhikarana 8 (8) · Śloka 8

তালীশৈলাগৈরিকোশীরশঙ্খৈরেবং যুঞ্জ্যাদঞ্জনং স্তন্যপিষ্টৈঃ ||৮||

বর্ত্যঞ্জনমাহ- তালীশেত্যাদি| কাশীশৈলেতি কেচিত্ পঠন্তি||৮||

Adhikarana 9 (9) · Śloka 9

চূর্ণং কুর্যাদঞ্জনার্থে রসো বা স্তন্যোপেতো ধাতকীস্যন্দনাভ্যাম্ |৯|

চূর্ণাঞ্জনমাহ- চূর্ণমিত্যাদি| রসো বেতি রসক্রিযা বেত্যর্থঃ| স্যন্দনোঽনেনৈব নাম্না প্রসিদ্ধঃ| কেচিত্ চন্দনাভ্যামিতি পঠন্তি|৯|-

Adhikarana 10 (9) · Śloka 9

যোষিত্স্তন্যং শাতকুম্ভং বিঘৃষ্টং ক্ষৌদ্রোপেতং কৈংশুকং চাপি পুষ্পম্ ||৯||

যোষিদিত্যাদি| শাতকুম্ভং সুবর্ণং, তচ্চ যোষিত্স্তন্যেন ঘৃষ্টমঞ্জনম্| ক্ষৌদ্রযুক্তং বা কিংশুকপুষ্পং ঘৃষ্টং তাম্রপাত্রাদাবঞ্জনম্||৯||

Adhikarana 11 (10) · Śloka 10

রোধ্রং দ্রাক্ষাং শর্করামুত্পলং চ নার্যাঃ ক্ষীরে যষ্টিকাহ্বং বচাং চ | পিষ্ট্বা ক্ষীরে বর্ণকস্য ত্বচং চ তোযোন্মিশ্রে চন্দনোদুম্বরে চ ||১০||

রোধ্রমিত্যাদি| রোধ্রাদিবচান্তং নারীক্ষীরে পিষ্টমেকমঞ্জনম্| বর্ণকো রোচনিকা; তস্যাস্ত্বক্ নারীক্ষীরেণ পিষ্টা দ্বিতীযমঞ্জনম্| অন্যে বর্ণকত্বক্শব্দেন কর্ণিকারবৃক্ষস্য বল্কলং কথযন্তি, তন্নেচ্ছতি গযী| তোযোন্মিশ্রে চন্দনোদুম্বরে চেতি তৃতীযাঞ্জনং, তোযোন্মিশ্রে বালকযুক্তে, চন্দনং কুচন্দনং; পঞ্জিকাকারস্তু চন্দনোদুম্বরং ভৃশতরং চূর্ণিতং বস্ত্রবদ্ধং তোযপ্লুতমাশ্চ্যোতনাঞ্জনমাহ||১০||

Adhikarana 12 (11-12) · Śloka 12

কার্যঃ ফেনঃ সাগরস্যাঞ্জনার্থে নারীস্তন্যে মাক্ষিকে চাপি ঘৃষ্টঃ | যোষিত্স্তন্যে স্থাপিতং যষ্টিকাহ্বং রোধ্রং দ্রাক্ষাং শর্করামুত্পলং চ ||১১|| ক্ষৌমাবদ্ধং পথ্যমাশ্চ্যোতনে বা সর্পির্ঘৃষ্টং যষ্টিকাহ্বং সরোধ্রম্ | তোযোন্মিশ্রাঃ কাশ্মরীধাত্রিপথ্যাস্তদ্বচ্চাহুঃ কট্ফলং চাম্বুনৈব ||১২||

কার্য ইত্যাদি| অপরমাশ্চ্যোতনমাহ- নারীত্যাদি| যষ্টিমধুকাদিদ্রব্যমতীব চূর্ণিতং স্ত্রীস্তন্যস্থাপিতং ক্ষৌমবস্ত্রাববদ্ধমাশ্চ্যোতনে হিতমিত্যর্থঃ| যষ্টিকাহ্বং সরোধ্রমিতি যষ্টিমধুকরোধ্রে বা ঘৃতঘৃষ্টে পূর্ববদাশ্চ্যোতনম্||১১-১২||

Adhikarana 13 (13) · Śloka 13

এষোঽম্লাখ্যেঽনুক্রমশ্চাপি শুক্তৌ কার্যঃ সর্বঃ স্যাত্সিরামোক্ষবর্জ্যঃ ||১৩||

ইদানীমম্লাধ্যুষিতশুক্ত্যোঃ সামান্যচিকিত্সামাহ- এষ ইত্যাদি| কেচিদম্লাধ্যুষিতশুক্ত্যোরশস্ত্রকৃত্যত্বাদেব সিরামোক্ষবর্জনং সিদ্ধম্, অতঃ ‘শিরামোক্ষবর্জ্য’ ইতি পাঠং ন পঠন্তি||১৩||

Adhikarana 14 (14) · Śloka 14

সর্পিঃ পেযং ত্রৈফলং তৈল্বকং বা পেযং বা স্যাত্ কেবলং যত্ পুরাণম্ |১৪|

অম্লাধ্যুষিতে বিশেষচিকিত্সিতমাহ- সর্পিরিত্যাদি| আদ্যং ঘৃতদ্বযং সংশোধনং, পুরাণঘৃতং তু সংশমনম্|১৪|-

Adhikarana 15 (14) · Śloka 14

দোষেঽধস্তাচ্ছুক্তিকাযামপাস্তে শীতৈর্দ্রব্যৈরঞ্জনং কার্যমাশু ||১৪||

শুক্তিকাযাং বিশেষচিকিত্সিতমাহ- দোষে ইত্যাদি| অধস্তাদপাস্তে দোষে ‘বিরেচনেন’ ইতি শেষঃ||১৪||

Adhikarana 16 (15) · Śloka 15

বৈদূর্যং যত্ স্ফাটিকং বৈদ্রুমং চ মৌক্তং শাঙ্খং রাজতং শাতকুম্ভম্ | চূর্ণং সূক্ষ্মং শর্করাক্ষৌদ্রযুক্তং শুক্তিং হন্যাদঞ্জনং চৈতদাশু ||১৫||

তান্যেব শীতদ্রব্যাণ্যাহ- বৈদূর্যমিত্যাদি||১৫||

Adhikarana 17 (16) · Śloka 16

যুঞ্জ্যাত্ সর্পির্ধূমদর্শী নরস্তু শেষং কুর্যাদ্রক্তপিত্তে বিধানম্ | যচ্চৈবান্যত্ পিত্তহৃচ্চাপি সর্বং যদ্বীসর্পে পৈত্তিকে বৈ বিধানম্ ||১৬||

ধূমদর্শিনশ্চিকিত্সিতমাহ- যুঞ্জ্যাদিত্যাদি| রক্তপিত্তে বিধানমিতি রক্তাভিষ্যন্দে পিত্তাভিষ্যন্দে চ চিকিত্সিতং যদুক্তং তদিত্যর্থঃ| অন্যত্ পিত্তহৃদিতি পিত্তবিদগ্ধদৃষ্টের্যদ্বিধানং তদত্র যোজযেত্| যদ্বীসর্পে পৈত্তিকে বৈ বিধানমিতি পিত্তবিসর্পোক্তং বিধানং যোজযেদিতি সম্বন্ধঃ||১৬||

Adhikarana puShpikA · Śloka 10

ইতি সুশ্রুতসংহিতাযামুত্তরতন্ত্রান্তর্গতে শালাক্যতন্ত্রে পিত্তাভিষ্যন্দপ্রতিষেধো নাম দশমোঽধ্যাযঃ ||১০||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে দশমোঽধ্যাযঃ||১০||