63. rasabhēdavikalpādhyāyaḥ

Adhikarana 1 (1-2) · Śloka 2

অথাতো রসভেদবিকল্পমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথ ভূতবিদ্যাং পরিসমাপ্য ঔপদ্রবিকে তন্ত্রভূষণানাং রসভেদাদীনামধ্যাযানাং সূচিতত্বাত্ তন্ত্রভূষণানারব্ধুকামস্তত্রোক্তক্রমানুসারেণ রসভেদবিকল্পাধ্যাযমাহ- অথাত ইত্যাদি| অথাত ইত্যাদি পূর্ববদ্ব্যাখ্যেযম্ | রসভেদবিকল্পমিতি রসা মধুরাদযঃ পূর্বং ব্যাখ্যাতাঃ, রসানাং ভেদেন দ্বিত্রিকাদিভেদেন বিকল্পো বিভজনং যস্মিন্ স তথা, অথবা রসভেদানাং বিকল্পো দোষভেদবশাদবচারণং যস্মিন্ স তথা, তম্||১-২||

Adhikarana 2 (3) · Śloka 3

দোষাণাং পঞ্চদশধা প্রসরোঽভিহিতস্তু যঃ | ত্রিষষ্ট্যা রসাভেদানাং তত্প্রযোজনমুচ্যতে ||৩||

রসভেদকথনে প্রযোজনমাহ- দোষাণামিতাদি| যঃ পঞ্চদশপ্রকারো ব্রণপ্রশ্নাধ্যাযে দোষাণাং প্রসর উক্তঃ, তদ্রসভেদানাং ত্রিষষ্ট্যাঃ প্রযোজনমুচ্যত ইতি সম্বন্ধঃ| অত্র পঞ্চদশধেত্যুপলক্ষণং, তেন দোষভেদানাং ত্রিষষ্টিরপি গৃহ্যতে| অযমভিপ্রাযঃ- ত্রিষষ্টিপ্রকারাণামপি দোষভেদানামুপযোগার্থং রসভেদা উক্তাঃ||৩||

Adhikarana 3 (4) · Śloka 4

অবিদগ্ধা বিদগ্ধাশ্চ ভিদ্যন্তে তে ত্রিষষ্টিধা | রসভেদত্রিষষ্টিং তু বীক্ষ্য বীক্ষ্যাবচারযেত্ ||৪||

কীদৃশা রসাস্ত্রিষষ্টিভেদান্ যান্তীত্যাহ- অবিদগ্ধা ইত্যাদি| অবিদগ্ধা অসংযুক্তা একাকিনঃ সমবাযতো ভিদ্যন্ত ইত্যর্থঃ| বিদগ্ধাঃ সংযোগতঃ সমবাযতশ্চ সংযুক্তা রসান্তরসংযোগাদ্ভিদ্যন্তে| বিদগ্ধশব্দঃ সংযুক্তে বর্ততে, ধাতূনামনেকার্থত্বাত্| ভিদ্যন্তে একৈকেনানুগমনাদ্ভেদং যান্তীত্যর্থঃ| তে রসাঃ| তত্র যথাসম্ভবং কেচিত্ সংযোগতঃ কেচিত্ সমবাযতশ্চ ভিদ্যন্তে| সংযুক্তা যথা- বদরকপিত্থফলাদিকং মধুরাম্লং(১), উষ্ট্রীক্ষীরোরভ্রমাংসাদিকং মধুরলবণং(২), কুক্কুরশৃগালমাংসাদিকং মধুরকটুকং(৩), শ্রীবাসসর্জরসাদিকং মধুরতিক্তং(৪) তৈলধন্বনফলাদিকং মধুরকষাযং(৫); ঊষকাদিকম্ অম্ললবণং(৬), চুক্রাদিকম্ অম্লকটুকং(৭), সুরাদিকম্ অম্লতিক্তং(৮), হস্তিনীদধিশুকমাংসাদিকম্ অম্লকষাযং(৯); ত্রপুসীসাদিকং লবণতিক্তং(১০), গোমূত্রস্বর্জিকাদিকং লবণকটুকং(১১), সমুদ্রফেনাদিকং লবণকষাযং(১২); কর্পূরজাতীফলাদিকং তিক্তকটুকং(১৩), লবলীফলহস্তিনীঘৃতাদিকং তিক্তকষাযং(১৪); ভল্লাতকমজ্জাহরিতালাদিকং কটুকষাযম্(১৫); এবং দ্বিরসভেদাঃ পঞ্চদশধা দর্শিতাঃ| অতঃ পরং রসত্রিতযভেদা বক্ষ্যন্তে- হস্তিমাংসাদিকং মধুরাম্ললবণং(১), শল্যকমাংসাদিকং মধুরাম্লকটুকং(২), গোধূমোত্থসুরাদিকং মধুরাম্লতিক্তকং(৩), মস্তুতক্রাদিকং মধুরাম্লকষাযং(৪), কাণকপোতমাংসাদিকং মধুরলবণকটুকং(৫), শম্বূকাদিমাংসং মধুরলবণতিক্তং(৬), পদ্মকন্দাদিকং গুডসংযুক্তং মধুরলবণকষাযং(৭), তৃণশূন্যাফলশুষ্ককুস্তুম্বর্যাদিকং মধুরকটুতিক্তকং(৮), গোধামাংসৈরণ্ডতৈলাদিকং মধুরকটুকটুকষাযং(৯), গুডূচীশাখামৃগামিষতুবরকতৈলাদিকং মধুরতিক্তকষাযং(১০), রৌপ্যশিলাজত্বাদিকম্ অম্ললবণকটুকং(১১), হস্তিমূত্রাদিকম্ অম্ললবণতিক্তং(১২), সরোমকং হস্তিনীদধ্যাদি অম্ললবণকষাযং(১৩), মরিচসংস্কৃতসুরাদিকম্ অম্লকটুতিক্তকং(১৪), অম্লবেতসাদিকম্ অম্লকটুকষাযং(১৫), কীরমাংসযুতসুরাদিকম্ অম্লতিক্তকষাযং(১৬), অবিমূত্রাদিকং লবণকটুতিক্তং(১৭), অরুষ্করং সরোমকং লবণকটুকষাযং(১৮), সমুদ্রফেনাবিকং লবণতিক্তকষাযং(১৯), কৃষ্ণাগরুসুরদারুস্নেহাদিকং কটুতিক্তকষাযং(২০); এবং ত্রিকভেদা বিংশতির্দর্শিতাঃ| অতঃ পরং চতুঃসংযোগাঃ পঞ্চদশপ্রকারা বক্ষ্যন্তে- গোমূত্রান্বিতশিলাজতুপ্রভৃতিকং মধুরাম্ললবণকটুকং(১), গোমূত্রৈকশফক্ষীরাদিকং মধুরাম্ললবণতিক্তকং(২) সৈন্ধবান্বিততক্রাদিকং মধুরাম্ললবণকষাযং(৩), লশুনান্বিতং সুরাদিকং মধুরাম্লকটুতিক্তং(৪), কাঞ্জিকান্বিতৈরণ্ডতৈলাদি খদিরান্বিতশিলাহ্বাদিকং চ মধুরাম্লকটুকষাযং(৫), উদুম্বরান্বিতং যবাসশর্করাদিকং মধুরাম্লতিক্তকষাযং(৬), বার্তাকফলাদিকং মধুরলবণতিক্তকটুকং(৭), গোমূত্রান্বিততৈলাদিকং মধুরলবণকটুকষাযং(৮), তিলগুগ্গুল্বাদিকং মধুরকটুতিক্তকষাযং(৯), সমুদ্রফেনশর্করাচিত্রকান্বিতবদরাদি মধুরলবণতিক্তকষাযং(১০), সুবর্চলান্বিতহস্তিনীদধ্যাদি কৃতসুরাদিকম্ অম্ললবণকটুতিক্তং(১১), সৌবর্চলান্বিতহস্তিনীদধ্যাদিকম্ অম্ললবণকটুকষাযং(১২), ঔদ্ভিদলবণান্বিতং শুকমাংসাদিকম্ অম্ললবণতিক্তকষাযং(১৩), বালমূলকহস্তিনীদধ্যাদিকম্ অম্লকটুতিক্তকষাযং(১৪), সরোমকং বালবিল্বাদিকং লবণকটুতিক্তকষাযং(১৫); এবং চতুষ্করসসংযোগাঃ পঞ্চদশ কথিতাঃ| অতঃ পরং পঞ্চরসসংযোগাঃ ষড্ বক্ষ্যন্তে- আমকরমর্দান্বিতং ভৃষ্টবার্তাকফলাদিকং মধুরাম্ললবণতিক্তকষাযং(১), কটুত্রযযবক্ষারান্বিততক্রাদিকং মধুরাম্ললবণকটুকষাযম্(২), ঔদ্ভিদান্বিততক্রাদিকং মধুরাম্ললবণতিক্তকষাযং(৩), হরীতকীধাত্রীফলাদিকং মধুরাম্লকটুতিক্তকষাযং(৪), রসোনাদিকং মধুরলবণকটুতিক্তকষাযং(৫), ভল্লাতকরৌপ্যশিলাজতুমিশ্রিতনিম্বাদিকম্ অম্ললবণকটুতিক্তকষাযং(৬); এবং পঞ্চরসসংযোগাঃ ষড্ দর্শিতাঃ| অতঃ পরং ষড্রসং বক্ষ্যতে- এণমাংসাদিকং মধুরাম্ললবণকটুতিক্তকষাযম্| অতঃ পরমেকৈকরসানাহ- সন্তানিকাগোদুগ্ধাদিকং মধুরং(১) আমকরমর্দাদিকম্ অম্লং(২), রোমকাদিকং লবণং(৩), চব্যাদিকং কটুকং(৪), নিম্বপর্পটাদিকং তিক্তং(৫), পদ্মন্যগ্রোধাদ্যঙ্কুরাদিকং কষাযং(৬); এবং ষট্ কথিতাঃ| অনেন প্রকারেণ ত্রিষষ্টিঃ কথিতাঃ| কার্তিককুণ্ডস্ত্বমুং পাঠমন্যথা আপাতনিকাং কৃত্বা ব্যাখ্যানযতি; তদ্যথা- দোষাণাং পঞ্চদশধা প্রসরো ভেদঃ, তস্য বহুভিস্ত্রিষষ্টিরসভেদৈঃ সহ প্রযোগো দুর্ঘটঃ, অতো দোষভেদানামপি বহুত্বমাহ- অবিদগ্ধা ইত্যাদি| অবিদগ্ধা অপ্রকুপিতাঃ; বিদগ্ধাঃ কুপিতা দোষাঃ; যদ্যস্মিন্ পাঠে দোষাণাং ত্রিষষ্টিভেদা উক্তাঃ, তর্হি পূর্বপাঠে পঞ্চদশধা প্রসরঃ কিমিত্যুক্তঃ? সত্যং, কুপিতদোষস্যাত্যন্তচিকিত্সনীযত্বাপাদনার্থম্; অন্যত্ গ্রন্থগৌরবভযাত্ পরিত্যক্তম্||৪||হ্

Adhikarana 4 (5) · Śloka 5

একৈকেনানুগমনং ভাগশো যদুদীরিতম্ | দোষাণাং , তত্র মতিমান্ ত্রিষষ্টিং তু প্রযোজযেত্ ||৫||

পূর্বমবিদগ্ধা বিদগ্ধাশ্চ রসা একৈকেনানুগমনাদ্ভিদ্যন্ত ইত্যুক্তং, তদেব স্মারযতি একৈকেনানুগমনমিত্যাদি| ভাগশঃ অংশাংশতযা| রসানামেকৈকেনানুগমনং প্রবর্তনং যদুদীরিতমস্মিন্নধ্যাযে ভণিতং, তদ্বশাত্তে রসাস্ত্রিষষ্টিধা ভিদ্যন্ত ইতি পূর্ববাক্যেন সহ সম্বন্ধঃ| তাং চ রসভেদত্রিষষ্টিং, মতিমান্ ঊহাপোহবিদ্বৈদ্যঃ, তত্র দোষভেদেষু প্রযোজযেত্| মতিমানিতি পদাত্ যাদৃশা এব দোষাণাং হীনাধিকভাবেন ভেদাস্তাদৃশা এব রসভেদা যোজ্যা ইতি সূচযতি| অন্যে তু ‘এবমেবানুগমনং’ ইতি পঠিত্বা দোষাণামেবং ভাগশোংঽশাংশবলবিকল্পেনৈকং প্রত্যেকস্যানুগমনং দোষভেদীযে যদুদীরিতং তত্র রসভেদত্রিষষ্টিং যোজযেদিতি| যদ্যপি দোষভেদীযে যদ্বক্ষ্যতে ইতি সুন্দরং নতু যদুদীরিতমিতি, তথাঽপি ভাবিনি ভূতবদুপচারাদ্দোষভেদীযে যদুদীরিতমিতি কৃতম্| অপরেঽত্রামুং পাঠমন্যথা পঠিত্বা বহু জল্পন্তি, তচ্চ গ্রন্থগৌরবভযাচ্ছিষ্যবুদ্ধিব্যাকুলহেতুত্বাচ্চ পরিত্যক্তম্||৫||

Adhikarana 5 (6-8) · Śloka 8

যথাক্রমপ্রবৃত্তানাং দ্বিকেষু মধুরো রসঃ | পঞ্চানুক্রমতে যোগানম্লশ্চতুর এব তু ||৬|| ত্রীংশ্চানুগচ্ছতি রসো লবণঃ কটুকো দ্বযম্ | তিক্তঃ কষাযমন্বেতি তে দ্বিকা দশ পঞ্চ চ ||৭|| তদ্যথা- মধুরাম্লঃ(১), মধুরলবণঃ(২), মধুরকটুকঃ(৩), মধুরতিক্তঃ(৪), মধুরকষাযঃ(৫), এতেপঞ্চানুক্রান্তা মধুরেণ; অম্ললবণঃ(১), অম্লকটুকঃ(২), অম্লতিক্তঃ(৩), অম্লকষাযঃ(৪), এতে চত্বারোঽনুক্রান্তা অম্লেন; লবণকটুকঃ(১), লবণতিক্তঃ(২), লবণকষাযঃ(৩), এতে ত্রযোঽনুক্রান্তা লবণেন; কটুতিক্তঃ(১), কটুকষাযঃ(২), দ্বাবেতাবনুক্রান্তৌ কটুকেন; তিক্তকষাযঃ(১) এক এবানুক্রান্তস্তিক্তেন; এবমেতে পঞ্চদশ দ্বিকসংযোগা ব্যাখ্যাতাঃ ||৮||

ইদানীং রসভেদত্রিষষ্টিং গ্রন্থেনৈব বিবৃণ্বন্নাহ- যথাক্রমমিত্যাদি| যথাক্রমপ্রবৃত্তানামিতি মধুরাদিক্রমপ্রবৃত্তানাং রসানামিত্যর্থঃ| দ্বিকেষু দ্বিকসংযোগেষু| অনুক্রমতে অনুগচ্ছতি, অনুগতো ভবতীত্যর্থঃ| দশ পঞ্চেতি পঞ্চদশেত্যর্থঃ| যদ্যপি সূত্রস্থানে রসবিশেষবিজ্ঞানীযাধ্যাযে পঞ্চদশ দ্বিকা ইত্যাদিনা দ্বিকসংযোগাদীনাং সঙ্খ্যা উক্তাঃ, তথাঽপি পুনরত্র সঙ্খ্যাকরণং নিযমার্থম্| তেন ইযন্ত এব রসভেদা গণনীযা ন তন্ত্রান্তরোক্তাস্তরতমযোগাদিজা ইত্যর্থঃ| তেষামেব দ্বিকানাং পঞ্চদশসঙ্খ্যাকানামুদাহরণান্যাহ- তদ্যথেত্যাদি| মধুরাম্লৌ বিদ্যেতে যত্র সংযোগে স মধুরাম্লঃ| এবং শেষেষ্বপি জ্ঞেযম্||৬-৮||

Adhikarana 6 (9-10) · Śloka 10

ত্রিকান্ বক্ষ্যামঃ- আদৌ প্রযুজ্যমানস্তু মধুরো দশ গচ্ছতি | ষডম্লো লবণস্তস্মাদর্ধমেকং তথা কটুঃ ||৯|| তদ্যথা- মধুরাম্ললবণঃ(১), মধুরাম্লকটুকঃ(২), মধুরাম্লতিক্তঃ(৩), মধুরাম্লকষাযঃ(৪), মধুরলবণকটুকঃ(৫), মধুরলবণতিক্তাঃ(৬), মধুরলবণকষাযঃ(৭), মধুরকটুকতিক্তঃ(৮), মধুরকটুকষাযঃ(৯), মধুরতিক্তকষাযঃ(১০), এবমেষাং দশানাং ত্রিকসংযোগানামাদৌ মধুরঃ প্রযুজ্যতে; অম্ললবণকটুকঃ(১), অম্ললবণতিক্তঃ(২), অম্ললবণকষাযঃ(৩), অম্লকটুতিক্তঃ(৪), অম্লকটুকষাযঃ(৫), অম্লতিক্তকষাযঃ(৬), এবমেষাং ষণ্ণামাদাবম্লঃ প্রযুজ্যতে; লবণকটুতিক্তঃ(১), লবণকটুকষাযঃ(২), লবণতিক্তকষাযঃ(৩), এবমেষাং ত্রযাণামাদৌ লবণঃ প্রযুজ্যতে; কটুতিক্তকষাযঃ(১), এবমেকস্যাদৌ কটুকঃ প্রযুজ্যতে; এবমেতে ত্রিকসংযোগা বিংশতির্ব্যাখ্যাতাঃ ||১০||

আদাবিত্যাদি| দশেতি দশযোগানিত্যর্থঃ| তস্মাদর্ধমিতি ত্রীনিত্যর্থঃ| তেষামেব ত্রিকানাং বিংশতিসঙ্খ্যাকানামুদাহরণান্যাহ- মধুরাম্লেত্যাদি| মধুরাম্ললবণা বিদ্যন্তে যত্র স মধুরাম্ললবণঃ| এবং শেষেষ্বপি ব্যাখ্যেযম্||৯-১০||

Adhikarana 7 (11-12) · Śloka 12

চতুষ্কান্ বক্ষ্যামঃ | চতুষ্করসসংযোগান্মধুরো দশ গচ্ছতি | চতুরোঽম্লোঽনুগচ্ছেচ্চ লবণস্ত্বেকমেব তু ||১১|| মধুরাম্ললবণকটুকঃ(১), মধুরাম্ললবণতিক্তঃ(২), মধুরাম্ললবণকষাযঃ(৩), মধুরাম্লকটুকতিক্তঃ(৪), মধুরাম্লকটুকষাযঃ(৫), মধুরাম্লতিক্তকষাযঃ(৬), মধুরলবণকটুকতিক্তঃ(৭), মধুরলবণকটুকষাযঃ(৮), মধুরলবণতিক্তকষাযঃ(৯), মধুরকটুতিক্তকষাযঃ(১০), এবমেষাং দশানামাদৌ মধুরঃ প্রযুজ্যতে; অম্ললবণকটুতিক্তঃ(১), অম্ললবণকটুকষাযঃ(২), অম্ললবণতিক্তকষাযঃ(৩), অম্লকটুতিক্তকষাযঃ(৪), এবমেষাং চতুর্ণামাদাবম্লঃ; লবণকটুতিক্তকষাযঃ(১), এবমেকস্যাদৌ লবণঃ; এবমেতে চতুষ্করসসংযোগাঃ পঞ্চদশ কীর্তিতাঃ ||১২||

চতুষ্কানিত্যাদি| দশেতি ‘যোগান্’ ইতি শেষঃ| তেষাং চতুষ্করসসংযোগে পঞ্চদশসঙ্খ্যাকানামুদাহরণান্যাহ- মধুরাম্লেত্যাদি| মধুরাম্ললবণকটুকা বিদ্যন্তে যত্র যোগে স মধুরাম্ললবণকটুকঃ; এবং শেষেষ্বপি||১১-১২||

Adhikarana 8 (13-14) · Śloka 14

পঞ্চকান্ বক্ষ্যামঃ | পঞ্চকান্ পঞ্চ মধুর একমম্লস্তু গচ্ছতি ||১৩|| মধুরাম্ললবণকটুতিক্তঃ(১), মধুরাম্ললবণকটুকষাযঃ(২), মধুরাম্ললবণতিক্তকষাযঃ(৩), মধুরাম্লকটুতিক্তকষাযঃ(৪), মধুরলবণকটুতিক্তকষাযঃ(৫), এবমেষাং পঞ্চানামাদৌ মধুরঃ প্রযুজ্যতে; অম্ললবণকটুতিক্তকষাযঃ(১), এবমেকস্যাদাবম্লঃ; এবমেতে ষট্ পঞ্চকসংযোগা ব্যাখ্যাতাঃ ||১৪||

পঞ্চকানিত্যাদি| পঞ্চকানিতি পঞ্চরসসমূহান্| পঞ্চেতি পঞ্চসঙ্খ্যাকান্ ‘যোগান্’ ইতি শেষঃ| তেষামেব ষণ্ণামুদাহরণান্যাহ- মধুরাম্লেত্যাদি||১৩-১৪||

Adhikarana 9 (15) · Śloka 15

ষট্কমেকং বক্ষ্যামঃ; একস্তু ষট্কসংযোগঃ- মধুরাম্ললবণকটুতিক্তকষাযঃ; এষ এক এব ষট্সংযোগঃ ||১৫||

তস্য ষট্কস্যোদাহরণমাহ- মধুরাম্লেত্যাদি||১৫||

Adhikarana 10 (16) · Śloka 16

একৈকশ্চ ষড্রসা ভবন্তি- মধুরঃ(১), অম্লঃ(২), লবণঃ(৩), কটুকঃ(৪), তিক্তঃ(৫), কষাযঃ(৬), ইতি ||১৬||

এষামুদাহরণান্যাহ- মধুরেত্যাদি||১৬||

Adhikarana 11 (17) · Śloka 17

ভবন্তি চাত্র- এষা ত্রিষষ্টির্ব্যাখ্যাতা রসানাং রসচিন্তকৈঃ | দোষভেদত্রিষষ্ট্যাং তু প্রযোক্তব্যা বিচক্ষণৈঃ ||১৭||

উপসংহারমাহ- ভবতি চাত্রেত্যাদি| অনুরসো হীনরসঃ| দোষভেদত্রিষষ্ট্যাং দোষভেদীযাধ্যাযে বক্ষ্যমাণাযাম্| যদ্যপি পরস্পরং ভিন্নাঃ সন্তো রসা বহবো ভবন্তি, তথাঽপি, ষট্ত্বং নাতিবর্তন্তে; যথা বাতাদিদোষা বহুধা ভিন্না অপি ত্রিত্বং ন ত্যজন্তি তথা রসা অপি ষট্ত্বং নাতিবর্তন্তে||১৭||

Adhikarana puShpikA · Śloka 63

ইতি সুশ্রুতসংহিতাযামুত্তরতন্ত্রে তন্ত্রভূষণাধ্যাযেষু রসভেদবিকল্পাধ্যাযো নাম (প্রথমঃ, আদিতঃ) ত্রিষষ্টিতমোঽধ্যাযঃ ||৬৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রে ত্রিষষ্টিতমোঽধ্যাযঃ||৬৩||