53. svarabhēdapratiṣēdhādhyāyaḥ

Adhikarana 1 (1-2) · Śloka 2

অথাতঃ স্বরভেদপ্রতিষেধমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

শ্বাসকাসপ্রতিষেধানন্তরমূর্ধ্বগতত্বসামান্যাত্ শ্বাসকাসচিকিত্সিতসাধ্যত্বাচ্চ স্বরভেদপ্রতিষেধারম্ভো যুক্ত ইত্যত আহ- অথাত ইত্যাদি| স্বরভেদঃ স্বরোপঘাতঃ||১-২||

Adhikarana 2 (3) · Śloka 3

অত্যুচ্চভাষণবিষাধ্যযনাতিগীতশীতাদিভিঃ প্রকুপিতাঃ পবনাদযস্তু | স্রোতঃসু তে স্বরবহেষু গতাঃ প্রতিষ্ঠাং হন্যুঃ স্বরং ভবতি চাপি হি ষড্বিধঃ সঃ ||৩||

স্বরভেদহেতুসম্প্রাপ্তিসঙ্খ্যা আহ- অত্যুচ্চভাষণেত্যাদি| অধ্যযনম্ অনবরতং বেদাদিপাঠঃ| অতিগীতং নিরন্তরং মঙ্গলাদিগানম্| শীতাদিভিরিত্যত্রাদিশব্দাত্ পিত্তকফকোপহেতবো গৃহ্যন্তে| যদত্র অত্যুচ্চভাষণাদীনাং বাতকোপহেতূনামেব সাক্ষাত্ কথনং কৃতং ন পিত্তকফকোপহেতূনাং তত্ স্বরোপঘাতকর্তৃত্বে বাযোঃ প্রাধান্যখ্যাপনার্থম্| অন্যে তু শীতাদীত্যত্র আদিশব্দেন গুরুলঘুস্নিগ্ধরূক্ষাদীন্ গুণান্ গৃহ্ণন্তি| স্বরবহেষু স্রোতঃসু শব্দবাহিনীষু ধমনীষু, তে বাতাদযঃ, গতাঃ প্রাপ্তাঃ, প্রতিষ্ঠাং স্থিতিম্| ষড্বিধঃ ষট্প্রকারঃ; পৃথক্ বাতাদিভিস্ত্রযঃ, সন্নিপাতেনৈকঃ, মেদঃক্ষযাভ্যাং প্রত্যেকমেকঃ; এবং ষট্প্রকারঃ| ননু, সমানতন্ত্রে ‘বাতাত্ পিত্তাত্ কফাত্ কাসাদ্রক্তবেগাত্ সপীনসাত্’ (চ. চি. ৮) ইত্যত্র যথা ষড্বিধঃ স্বরভেদ উক্তস্তেন সার্ধং কথং ন বিরোধঃ| সত্যং, কাসজপ্রতিশ্যাযজযোর্লিঙ্গত্বেনোক্তত্বাদ্গ্রহণং, রক্তজস্য তু কফগ্রহণেনৈব গ্রহণং, যতো রক্তং কফযুক্তং স্বরভেদং করোতি সমানতন্ত্রোক্তত্বাত্| যদ্যেবং তর্হি কথং ন সঙ্খ্যাধিক্যং? স্ত্যং, কাসজপ্রতিশ্যাযজযোর্বাতিকত্বেন গ্রহণম্| অত্যুচ্চভাষণেত্যাদিকো হেতুঃ, প্রকুপিতাঃ পবনাদয ইত্যাদিকা সম্প্রাপ্তিঃ, ভবতি চাপি হি ষড্বিধঃ স ইতি সঙ্খ্যা||৩||

Adhikarana 3 (4) · Śloka 4

বাতেন কৃষ্ণনযনাননমূত্রবর্চা ভিন্নং শনৈর্বদতি গদ্গদবত্ স্বরং চ |৪|

বাতিকস্বরভেদলক্ষণমাহ- বাতেনেত্যাদি| কৃষ্ণশব্দো নযনাদিভির্বর্চঃপর্যন্তৈঃ সম্বধ্যতে| ভিন্নম্ অনবস্থিতম্| উক্তং চ তন্ত্রান্তরে- “স্বরভেদো ভবেদ্বাতাদ্রূক্ষঃ ক্ষামশ্চলঃ স্বরঃ” (চ. চি. ৮)- ইতি| ‘গদ্গদবত্ স্বরম্’ ইত্যত্র কেচিত্ ‘গর্দভবত্ স্বরং’ ইতি পঠন্তি|৪|-

Adhikarana 4 (4) · Śloka 4

পিত্তেন পীতবদনাক্ষিপুরীষমূত্রো ব্রূযাদ্গলেন পরিদাহসমন্বিতেন ||৪||

পিত্তজস্বরভেদলক্ষণমাহ- পিত্তেনেত্যাদি| পীতশব্দো বদনাদিভির্মূত্রান্তৈঃ সম্বধ্যতে| 'স বিদাহসমন্বিতেন’ ইতি কেচিত্ পঠন্তি, তত্র স ইতি স্বরভেদী পুরুষঃ||৪||

Adhikarana 5 (5) · Śloka 5

কৃচ্ছ্রাত্ কফেন সততং কফরুদ্ধকণ্ঠো মন্দং শনৈর্বদতি চাপি দিবা বিশেষঃ |৫|

কফজস্বরভেদলক্ষণমাহ- কৃচ্ছ্রাদিত্যাদি| সততম্ অনবরতম্| কফরুদ্ধকণ্ঠঃ শ্লেষ্মাবৃতকণ্ঠঃ| মন্দং শনৈরিতি মন্দং মন্দমিত্যর্থঃ| দিবা বিশেষ ইতি দিবসে বিশেষো ভবেত্, কফক্ষযাত্| ‘দিবা বিশেষাত্’ ইতি কেচিত্ পঠন্তি; রাত্রৌ তাবত্ কফরুদ্ধকণ্ঠত্বান্ন বদত্যেব, দিবা পুনঃ কফাপচযাদ্বিশেষো ভবতি, তস্মাচ্চ বিশেষান্মন্দং মন্দং বদতীতি ব্যাখ্যানযন্তি|৫|-

Adhikarana 6 (5) · Śloka 5

সর্বাত্মকে ভবতি সর্ববিকারসম্পদব্যক্ততা চ বচসস্তমসাধ্যমাহুঃ ||৫||

সান্নিপাতিকস্বরভেদলক্ষণমাহ- সর্বাত্মক ইত্যাদি| সর্বাত্মকে সন্নিপাতোত্থস্বরভেদে| সর্ববিকারসম্পদ্ বাতাদিলিঙ্গপ্রাদুর্ভাবঃ| অব্যক্ততা চ বচসঃ অস্পষ্টবাক্ত্বম্| তং সান্নিপাতিকস্বরভেদম্||৫||

Adhikarana 7 (6) · Śloka 6

ধূপ্যেত বাক্ ক্ষযকৃতে ক্ষযমাপ্নুযাচ্চ বাগেষ চা(বা)পি হতবাক্ পরিবর্জনীযঃ |৬|

ক্ষযজস্বরভেদলক্ষণমাহ- ধূপ্যেতেত্যাদি| ধূপ্যেত মুখাদ্ধূমমিবোদ্বমতি, ‘ব্রুবন্’ ইতি বাক্যশেষঃ| ক্ষযমাপ্নুযাদ্ বাগিতি বচনক্ষযং প্রাপ্নুযাত্ ‘বাতাত্’ ইতি শেষঃ|৬|-

Adhikarana 8 (6-7) · Śloka 7

অন্তর্গলং স্বরমলক্ষ্যপদং চিরেণ মেদশ্চযাদ্বদতি দিগ্ধগলৌষ্ঠতালুঃ ||৬|| ক্ষীণস্য বৃদ্ধস্য কৃশস্য চাপি চিরোত্থিতো যশ্চ সহোপজাতঃ | মেদস্বিনঃ সর্বসমুদ্ভবশ্চ স্বরামযো যো ন স সিদ্ধিমেতি ||৭||

মেদোজস্বরভেদলক্ষণমাহ- অন্তর্গলমিত্যাদি| অন্তর্গলং গলস্যান্তরে| স্বরং বদতি শব্দং করোতি| ‘অন্তর্গতং’ ইতি কেচিত্ পঠন্তি, তত্রাপি স এবার্থঃ| যতোঽন্তর্গলং স্বরং বদতি অত এব অলক্ষ্যপদমিতি, ন লক্ষ্যন্তে পদানি যস্যেত্যর্থঃ| ভেদশ্চযাত্ মেদোবৃদ্ধেঃ| দিগ্ধং মেদোদিগ্ধং গলৌষ্ঠতালু যস্য স তথা| ‘মেদোঽন্বযাত্’ ইতি কেচিত্ পঠন্তি||৬-৭||

Adhikarana 9 (8) · Śloka 8

স্নিগ্ধান্ স্বরাতুরনরানপকৃষ্টদোষান্ ন্যাযেন তান্ বমনরেচনবস্তিভিশ্চ | নস্যাবপীডমুখধাবনধূমলেহৈঃ সম্পাদযেচ্চ বিবিধৈঃ কবলগ্রহৈশ্চ ||৮||

স্বরভেদস্য সামান্যচিকিত্সামাহ- স্নিগ্ধানিত্যাদি| যদ্যপি কফজমেদোজযোঃ স্বরভেদযোরপতর্পণসাধ্যত্বাত্ স্নেহনং ন যুক্তং, তথাঽপি যথাদোষপ্রত্যনীকৈর্যথাদোষপ্রত্যনীকসাধিতৈশ্চ স্নেহৈঃ স্নেহনং যুক্তমেব, অথবা মেদঃকফজযোরপি বাযুসদ্ভাবাত্ স্নেহনোপদেশঃ| অপকৃষ্টদোষান্ আকৃষ্টদোষান্; অত্র বমনবিরেচনবস্তিভিরিতি সম্বধ্যতে| ন্যাযেন যথাবিধীত্যর্থঃ| বমনাদিভিরপকৃষ্টদোষান্ স্বরভেদাতুরান্ কিং কুর্যাদিত্যাহ- নস্যাবপীডেত্যাদি| অবপীড্য দীযতে ইত্যবপীডো নস্যভেদঃ| মুখধাবনং গণ্ডূষাদি| সম্পাদযেত্ যোজযেত্| বিবিধৈঃ দোষপ্রত্যনীকত্বেন নানাপ্রকারৈঃ| কবলগ্রহৈঃ গণ্ডূষভেদৈঃ| তথা চ- “সুখং সঞ্চার্যতে যা তু গণ্ডূষে সা প্রকীর্তিতা| অসঞ্চার্যা তু যা মাত্রা কবলে সা প্রকীর্তিতা ”- ইতি||৮||

Adhikarana 10 (9) · Śloka 9

যঃ শ্বাসকাসবিধিরাদিত এব চোক্তস্তং চাপ্যশেষমবতারযিতুং যতেত |৯|

অন্যদপি স্বরভেদচিকিত্সিতমতিদেশেনাহ- য ইত্যাদি| শ্বাসকাসপ্রতিষেধে সামান্যেনাদৌ যঃ শ্বাসকাসবিধিরুদ্দিষ্টস্তং বিধিং সমস্তমপি যথাদোষং কর্তুং যতেতেতি পিণ্ডার্থঃ|৯|

Adhikarana 11 (9) · Śloka 9

বৈশেষিকং চ বিধিমূর্ধ্বমতো বদামি তং বৈ স্বরাতুরহিতং নিখিলং নিবোধ ||৯||

বৈশেষিকমিত্যাদি| অত ইতি সামান্যচিকিত্সানন্তরম্| তং বৈ স্বরাতুরহিতমিতি স্বরভেদাতুরহিতম্| নিবোধ জানীহি||৯||

Adhikarana 12 (10) · Śloka 11

স্বরোপঘাতেঽনিলজে ভুক্তোপরি ঘৃতং পিবেত্ | কাসমর্দকবার্তাকমার্কবস্বরসে শৃতম্ ||১০|| পীতং ঘৃতং হন্ত্যনিলং সিদ্ধমার্তগলে রসে |১১|

তমেব বৈশেষিকবিধিমাহ- স্বরোপঘাত ইত্যাদি| ভুক্তোপরি ভোজনোপরি| মার্কবো ভৃঙ্গরাজঃ, শৃতং পক্বম্| অনিলং বাতজস্বরভেদম্, উপচারাত্| আর্তগলঃ ককুভঃ||১০||-

Adhikarana 13 (11) · Śloka 12

যবক্ষারাজমোদাভ্যাং চিত্রকামলকেষু বা ||১১|| দেবদার্বগ্নিকাভ্যাং বা সিদ্ধমাজং সমাক্ষিকম্ |১২|

অপরমপি বাতজে ঘৃতত্রযমাহ- যবক্ষারাজমোদাভ্যামিত্যাদি| অগ্নিকো অজমোদা| আজং ‘ঘৃতং’ শেষঃ| সমাক্ষিকং সমধু| অত্রাপি পীতমিতি যোজ্যম্||১১||-

Adhikarana 14 (12) · Śloka 12

সুখোদকানুপানো বা সসর্পিষ্কো গুডৌদনঃ ||১২||

বাতিকে পথ্যযোগমাহ- সুখোদকানুপান ইত্যাদি| সুখোদকম্ ঈষদুষ্ণোদকম্| কেচিদমুং যোগং পৈত্তিকে মন্যন্তে; তন্ন, সমানতন্ত্রেষু বাতিকস্বরভেদ এব প্রযুক্তত্বাত্||১২||

Adhikarana 15 (13) · Śloka 13

ক্ষীরানুপানং পিত্তে তু পিবেত্ সর্পিরতন্দ্রিতঃ |১৩|

পৈত্তিকস্বরভেদচিকিত্সামাহ- ক্ষীরানুপানমিত্যাদি| অতন্দ্রিতঃ অনলসঃ|১৩|-

Adhikarana 16 (13) · Śloka 13

অশ্নীযাচ্চ সসর্পিষ্কং যষ্টীমধুকপাযসম্ ||১৩||

পৈত্তিকে পথ্যযোগমাহ- অশ্নীযাদিত্যাদি| যষ্টীমধুকপাযসমিতি যষ্টীমধুকসাধিতক্ষীরসিদ্ধাংস্তণ্ডুলান্; অথবা যষ্টীমধুকান্বিতং পাযসং যষ্টীমধুকপাযসম্||১৩||

Adhikarana 17 (14) · Śloka 14

লিহ্যান্মধুরকাণাং বা চূর্ণং মধুঘৃতাপ্লুতম্ | শতাবরীচূর্ণযোগং বলাচূর্ণমথাপি বা ||১৪||

লিহ্যাদিত্যাদি| মধুরকাণাং কাকোলীপ্রভৃতীনাম্| শতাবরীচূর্ণযোগমিতি শতাবরীচূর্ণস্য যোগঃ সংযোগো যত্র তত্তথা, অত্রাপি মধুঘৃতাপ্লুতং লিহ্যাদিতি সম্বন্ধনীযম্||১৪||

Adhikarana 18 (15) · Śloka 15

পিবেত্ কটূনি মূত্রেণ কফজে স্বরসঙ্ক্ষযে | লিহ্যাদ্বা মধুতৈলাভ্যাং ভুক্ত্বা খাদেত্ কটূনি বা ||১৫||

কফজস্বরভেদচিকিত্সামাহ- পিবেদিত্যাদি| কটূনি ত্রিকটুকাদীনি| মূত্রেণ গোমূত্রেণ প্রাধান্যাত্| স্বরসঙ্ক্ষযে স্বরভেদে| লিহ্যাদ্বা মধুতৈলাভ্যামিত্যাদি মধুতৈলাভ্যাং বা কটূনি ত্রিকটুকপ্রভৃতীনি লিহ্যাত্, ভুক্ত্বা বা তানি খাদেত্||১৫||

Adhikarana 19 (16) · Śloka 16

স্বরোপঘাতে মেদোজে কফবদ্বিধিরিষ্যতে |১৬|

মেদোজস্বরভেদে কফজচিকিত্সামতিদিশন্নাহ- স্বরোপঘাত ইত্যাদি| কফবত্ কফজস্বরভেদবত্|১৬|-

Adhikarana 20 (16) · Śloka 16

সর্বজে ক্ষযজে চাপি প্রত্যাখ্যাযাচরেত্ ক্রিযাম্ ||১৬||

সান্নিপাতিকক্ষযজযোরসাধ্যযোরপি চিকিত্সা কর্তব্যেত্যাহ- সর্বজ ইত্যাদি| প্রত্যাখ্যায অসাধ্যত্বেন নিরাকৃত্য| আচরেত্ কুর্যাত্| ক্রিযামিতি সান্নিপাতিকে সর্বেষাং বাতাদিস্বরভেদানাং সর্বমেব চিকিত্সিতং কার্যং, ক্ষযজে তু ক্ষযোক্তমিতি; কেচিদুভযোরপি সামান্যচিকিত্সিতং কুর্যাদিত্যাহুঃ||১৬||

Adhikarana 21 (17) · Śloka 17

শর্করামধুমিশ্রাণি শৃতানি মধুরৈঃ সহ | পিবেত্ পযাংসি যস্যোচ্চৈর্বদতোঽভিহতঃ স্বরঃ ||১৭||

অত্যুচ্চভাষণোত্থস্বরভেদস্য বাতাত্মকত্বেঽপি নিমিত্তভেদমাশ্রিত্য বিশিষ্টাং চিকিত্সামাহ- শর্করেত্যাদি| মধুরৈঃ কাকোল্যাদিভিঃ শৃতানি পযাংসি শর্করামধুমিশ্রাণি পিবেদিতি পিণ্ডার্থঃ| পযাংসীত্যত্র বহুবচনং গোমহিষ্যজানাং ক্ষীরপরিগ্রহায||১৭||

Adhikarana puShpikA · Śloka 53

ইতি সুশ্রুতসংহিতাযামুত্তরতন্ত্রান্তর্গতে কাযচিকিত্সাতন্ত্রে ছর্দিপ্রতিষেধো নাম (পঞ্চদশোঽধ্যাযঃ, আদিতঃ) ত্রিপঞ্চাশত্তমোঽধ্যাযঃ ||৫৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে কাযচিকিত্সাতন্ত্রে স্বরভেদপ্রতিষেধো নাম ত্রিপঞ্চাশত্তমোঽধ্যাযঃ||৫৩||