65. tantrayuktyadhyāyaḥ

Adhikarana 1 (1-2) · Śloka 2

অথাতস্তন্ত্রযুক্তিমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

স্বস্থবৃত্তানন্তরং স্বস্থবিধ্যর্থস্য তন্ত্রযুক্তিভিঃ প্রসাধানাত্তন্ত্রযুক্তযধ্যাযারম্ভঃ- অথাত ইত্যাদি| অথাত ইতি পূর্ববত্ ব্যাখ্যেযম্| ত্রাযতে শরীরমনেনেতি তন্ত্রং শাস্ত্রং চিকিত্সা চ, তস্য যুক্তযো যোজনাস্তন্ত্রযুক্তযঃ, তা অধিকৃত্য কৃতোঽধ্যাযঃ, তম্| বেদোত্পত্তিবদত্র তদ্ধিতলোপঃ| তাশ্চ তন্ত্রযোজনা দ্বিবিধাঃ- বাক্যযোজনা অর্থযোজনাশ্চ; তত্র বাক্যযোজনা যোগোদ্দেশনির্দেশাদ্যাঃ, অর্থযোজনা অধিকরণপদার্থাদযঃ||১-২||

Adhikarana 2 (3) · Śloka 3

দ্বাত্রিংশত্তন্ত্রযুক্তযো ভবন্তি শাস্ত্রে | তদ্যথা- অধিকরণং(১), যোগঃ(২), পদার্থঃ(৩), হেত্বর্থঃ(৪), উদ্দেশঃ(৫), নির্দেশঃ(৬), উপদেশঃ(৭), অপদেশঃ(৮), প্রদেশঃ(৯), অতিদেশঃ(১০), অপবর্জঃ(১১), বাক্যশেষঃ(১২), অর্থাপত্তিঃ(১৩), বিপর্যযঃ(১৪), প্রসঙ্গঃ(১৫), একান্তঃ(১৬), অনেকান্তঃ(১৭), পূর্বপক্ষঃ(১৮), নির্ণযঃ(১৯), অনুমতং(২০), বিধানম্(২১), অনাগতাবেক্ষণম্(২২), অতিক্রান্তাবেক্ষণং(২৩), সংশযঃ(২৪), ব্যাখ্যানং(২৫), স্বসঞ্জ্ঞা(২৬), নির্বচনং(২৭), নিদর্শনং(২৮), নিযোগঃ(২৯), বিকল্পঃ(৩০), সমুচ্চযঃ(৩১), ঊহ্যম্(৩২) ইতি ||৩||

সঙ্খ্যাভেদেন তন্ত্রযুক্তীর্নির্দিশন্নাহ- দ্বাত্রিংশদিত্যাদি| শাস্ত্রে সৌশ্রুতে| অধিকরণমিত্যাদিসঙ্খ্যেযনির্দেশাদেব দ্বাত্রিংশত্ সঙ্খ্যা লব্ধা, অতস্তত্করণমন্যতন্ত্রোক্তাঃ ষট্ত্রিংশচ্চত্বারিংশদ্বা তন্ত্রযুক্তয ইতি সঙ্খ্যানিষেধার্থম্| শাস্ত্রে ইত্যত্রান্যে সমাসেনেতি পঠিত্বা ব্যাখ্যানযন্তি- অন্যত্র বিস্তরেণ ষট্ত্রিংশচ্চত্বারিংশদ্বা তন্ত্রাযুক্তযঃ; অত্র দ্বাত্রিংশদিতি সমাসেনোক্তম্| কতমাস্তাস্তন্ত্রযুক্তয ইত্যাহ- তদ্যথেত্যাদি| তদ্যথেতি নিদর্শনম্| অধিকরণাদীনি সূত্রকার এব ব্যাখ্যাস্যতি||৩||

Adhikarana 3 (4) · Śloka 4

অত্রাসাং তন্ত্রযুক্তীনাং কিং প্রযোজনম্? উচ্যতে- বাক্যযোজনমর্থযোজনং চ ||৪||

এবং তন্ত্রযুক্তীরুদ্দেশতঃ প্রতীপাদ্য তাসাং তন্ত্রযুক্তীনাং প্রযোজনমাহ- অত্রাসামিত্যাদি| অত্র চিকিত্সাশাস্ত্রে| বাক্যযোজনমর্থযোজনং চেতি বাক্যস্যাসম্বদ্ধস্য যোজনং সম্বন্ধনং বাক্যযোজনং, লীনস্যাসঙ্গতস্য চার্থস্য প্রকাশনং সঙ্গতীকরণং চার্থযোজনম্| তত্র কাসাঞ্চিত্তন্ত্রযুক্তীনাং যোগোদ্দেশনির্দেশাদীনাং বাক্যযোজনং, কাসাঞ্চিদধিকরণপদার্থোহ্যাদীনামর্থযোজনং প্রযোজনম্||৪||

Adhikarana 4 (5-6) · Śloka 6

ভবন্তি চাত্র শ্লোকাঃ- অসদ্বাদিপ্রযুক্তানাং বাক্যানাং প্রতিষেধনম্ | স্ববাক্যসিদ্ধিরপি চ ক্রিযতে তন্ত্রযুক্তিতঃ ||৫|| ব্যক্তা নোক্তাস্তু যে হ্যার্থা লীনা যে চাপ্যনির্মলাঃ | লেশোক্তা যে চ কেচিত্স্যুস্তেষাং চাপি প্রসাধনম্ ||৬||

অত্রৈব পূর্বাচার্যাপঠিতৌ শ্লোকাবধিকার্থখ্যাপনাযাহ- অসদ্বাদিপ্রযুক্তানামিত্যাদি| অসদ্বাদিনো হি প্রতিরসপাকবাদিনঃ পাকত্রযবাদিনো গুণকর্তৃত্ববাদিনো বেত্যাদযঃ| প্রতিষেধনম্ অপদেশাদিভিস্তন্ত্রযুক্তিভিঃ পরপক্ষদূষণম্| স্ববাক্যসিদ্ধিঃ স্ববাক্যস্থাপনং নির্ণযাখ্যযা তন্ত্রযুক্তযা| যথা- প্রতিরসং পাক ইত্যসদ্বাদিদর্শনমপদেশাখ্যযা তন্ত্রযুক্তযা দ্রব্যাদিবিজ্ঞানে নিরাকৃতং, তত্রৈব দ্বিবিধঃ পাক ইত্যাদিস্বমতসাধনং নির্ণযাখ্যযা তন্ত্রযুক্তযা কৃতম্| ব্যক্তা নোক্তাঃ স্পষ্টতযা নোক্তাঃ| লীনা অসম্যগ্দর্শিতাঃ| অনির্মলা লেশেনোক্তাঃ| তেষাং প্রসাধনং যোগপ্রভৃতিভিঃ ক্রিযতে ||৫-৬||

Adhikarana 5 (7) · Śloka 7

যথাঽম্বুজবনস্যার্কঃ প্রদীপো বেশ্মনো যথা | প্রবোধস্য প্রকাশার্থং তথা তন্ত্রস্য যুক্তযঃ ||৭||

কেচিদত্র তন্ত্রযুক্তীনাং স্তুত্যর্থ শ্লোকং পঠন্তি- যথাঽম্বুজবনস্যার্ক ইত্যাদি| এষ চ শ্লোকষ্টীকাসু মূলত্বেন ন বর্ণিতঃ||৭||

Adhikarana 6 (8) · Śloka 8

তত্র যমর্থমধিকৃত্যোচ্যতে তদধিকরণং; যথা রসং দোষং বা ||৮||

অতঃ পরমুদ্দিষ্টানাং তন্ত্রযুক্তীনাং বিবরণমাহ- তত্রেত্যাদি| তত্র তাসু তন্ত্রযুক্তিষু মধ্যে; যমর্থমধিকৃত্য অপরে অর্থা অভিধীযন্তে তদধিকরণসঞ্জ্ঞং ভবতি উদাহরণমাহ- রসং দোষং বেতি| এতেনৈতদুক্তং ভবতি- রসং দোষং বা অধিকৃত্য যত্তদুল্লেখাভাবেঽপ্যর্থজাতমভিহিতং তত্ সর্বং তদধিকারে প্রতীযত ইত্যর্থঃ||৮||

Adhikarana 7 (9) · Śloka 9

যেন বাক্যং যুজ্যতে স যোগঃ | যথা- ‘তৈলং পিবেচ্চামৃতবল্লিনিম্বহিংস্রাভযাবৃক্ষকপিপ্পলীভিঃ | সিদ্ধং বলাভ্যাং চ সদেবদারু হিতায নিত্যং গলগণ্ডরোগে’ | ইত্যত্র তৈলং সিদ্ধং পিবেদিতি প্রথমং বক্তব্যে তৃতীযপাদে সিদ্ধমিতি প্রযুক্তং, এবং দূরস্থানামপি পদানামেকীকরণং যোগঃ ||৯||

যোগাখ্যাং তন্ত্রযুক্তিমাহ- যেনেত্যাদি| যেন ব্যত্যাসোক্তানাং সন্নিকৃষ্টবিপ্রকৃষ্টানাং পদানামেকীকরণং স যোগ ইত্যর্থঃ| ব্যত্যাসেনোক্তং পদযোগং দর্শযন্নাহ- তৈলমিত্যাদি| বিপর্যযেণোক্তস্য পদস্যৈকীকরণং যোগ ইত্যর্থঃ| যেনেত্যাদি সূত্রং, যেন ব্যত্যাসোক্তানাং ইত্যাদিসূত্রার্থঃ, যথেত্যাদ্যুদাহরণম্| এবং সন্নিকৃষ্টস্য বিপর্যযোক্তস্য পদস্যাপহরণং মুখ্যমেকীকরণং প্রতিপাদ্য দূরস্থানামপ্যুদ্দেশেনাহ- এবং দূরস্থানামপীতি||৯||

Adhikarana 8 (10) · Śloka 10

যোঽর্থোঽভিহিতঃ সূত্রে পদে বা স পদার্থঃ পদস্য পদযোঃ পদানাং বাঽর্থঃ পদার্থঃ; অপরিমিতাশ্চ পদার্থাঃ | যথা- স্নেহস্বেদাঞ্জনেষু নির্দিষ্টেষু দ্বযোস্ত্রযাণাং বাঽর্থানামুপপত্তির্দৃশ্যতে, তত্র যোঽর্থঃ পূর্বাপরযোগসিদ্ধো ভবতি স গ্রহীতব্যঃ; যথা- ‘বেদোত্পত্তিমধ্যাযং ব্যাখ্যাস্যাম’ ইত্যুক্তে সন্দিহ্যতে বুদ্ধিঃ- কতমস্য বেদস্যোত্পত্তিং বক্ষ্যতীতি, যতঃ ঋগ্বেদাদযস্তু বেদাঃ; ‘বিদ বিচারণে, বিদ্লৃ লাভে,’ ইত্যেতযোশ্চ ধাত্বোরনেকার্থযোঃ প্রযোগাত্, তত্র পূর্বাপরযোগমুপলভ্য প্রতিপত্তির্ভবতি- আযুর্বেদোত্পত্তিমযং বিবক্ষুরিতি; এষ পদার্থঃ ||১০||

পদার্থাভিধাং তন্ত্রযুক্তিমাহ- যোঽর্থোঽভিহিত ইত্যাদি| পদ্যতে গম্যতে যেনার্থ ইতি সূত্রস্যাপি পদত্বাত্ সূত্রে যোঽর্থঃ প্রতিপাদিতঃ স পদার্থঃ| পদার্থখ্যতন্ত্রযুক্তিপ্রতিপাদকং লক্ষণমভিধাযেদানীং তদ্ব্যাখ্যাতুকামঃ প্রথমং তদবযবস্য সমাসমভিধত্তে- পদস্যেত্যাদি| অধুনা বহুষু পদার্থেষু নির্ধার্য বিশিষ্টপদার্থগ্রহণায পদার্থবহুত্বং প্রতিপাদযতি- অপরিমিতা ইত্যাদি| কথমিত্যাহ- যথেত্যাদি| তত্র স্নেহশব্দে নির্দিষ্টে হি গুণপ্রেমসর্পিষাং ত্রযাণামর্থানামুপপত্তির্দৃশ্যতে, স্বেদশব্দেনাপি সাগ্নিনিরগ্নিকযোরুষ্মণোঃ প্রাপ্তিঃ, অঞ্জনশব্দেনাপি নযনাঞ্জনাভ্যাঙ্গযোঃ প্রাপ্তিঃ, তেষু পদার্থষু যাদৃশঃ পদার্থো গৃহ্যতে তাদৃশমাহ- তত্র যোঽর্থ ইত্যাদি| পূর্বোক্তপরোক্তবাক্যসম্বন্ধেনোপপন্নো যোঽর্থো ভবতি স গ্রহীতব্য ইত্যর্থঃ| উদাহরণমাহ- যথা বেদোত্পত্তিমিত্যাদি| সন্দিহ্যতে সন্দেহং গচ্ছতীত্যর্থঃ| কথং সন্দিহ্যত ইত্যাহ- কতমস্যেত্যাদি| যতঃ ঋগ্বেদাদযো বেদাস্ততঃ কতমস্যা বেদস্যোত্পত্তিং বক্ষ্যতীতি সন্দিহ্যতে, তস্মিন্ সন্দেহে যথা প্রত্যযার্থঃ স্বীকর্তব্যস্তথাঽঽহ- বিদিত্যাদি- ‘আযুর্বেদমিচ্ছাম ইহোপদিশ্যমানম্’ ইত্যস্মিন্নাযুর্বেদশব্দঃ শ্রূযতে, অতোঽত্র বেদ আযুর্বেদ ইত্যভিপ্রাযঃ ||১০||

Adhikarana 9 (11) · Śloka 11

যদন্যদুক্তমন্যার্থসাধকং ভবতি স হেত্বর্থঃ | যথা- মৃত্পিণ্ডোঽদ্ভিঃ প্রক্লিঘতে তথা মাষদুগ্ধপ্রভৃতিভির্ব্রণঃ প্রক্লিঘত ইতি ||১১||

হেত্বর্থতন্ত্রযুক্তের্লক্ষণমাহ- যদন্যদিত্যাদি| উদাহরণমাহ- যথা মৃদিত্যাদি| অত্র বাহ্যেন মৃত্পিণ্ডদৃষ্টান্তেন মাষদুগ্ধযোগাদিভিরাভ্যন্তরো ব্রণপ্রক্লেদঃ সাধ্যতে||১১||

Adhikarana 10 (12) · Śloka 12

সমাসবচনমুদ্দেশঃ | যথা- শল্যমিতি ||১২||

উদ্দেশলক্ষণমাহ- সমাসেত্যাদি| সঙ্ক্ষেপেণ ভণনমুদ্দেশ ইত্যর্থঃ| উদাহরণমাহ- যথা শল্যমিতি| সর্বমেবাবাধজননং সঙ্ক্ষেপেণ শল্যমুচ্যতে, নতু শারীরাগন্তুভেদেন প্রপঞ্চনাত্||১২||

Adhikarana 11 (13) · Śloka 13

বিস্তরবচনং নির্দেশঃ | যথা- শারীরমাগন্তুকং চেতি ||১৩||

নির্দেশলক্ষণমাহ- বিস্তরেত্যাদি| বিস্তরেণ ভাষণং নির্দেশ ইত্যর্থঃ| উদাহরণমাহ- যথা শারীরমাগন্তুকং চেতি| শারীরশল্যমাগন্তুকং চ শল্যমিতি শল্যং দ্বিবিধমুচ্যতে||১৩||

Adhikarana 12 (14) · Śloka 14

এবমিত্যুপদেশঃ | যথা- ‘তথা ন জাগৃযাদ্রাত্রৌ দিবাস্বপ্নং চ বর্জযেত্’ ইতি ||১৪||

উপদেশলক্ষণমাহ- এবমিত্যাদি| এবং কুর্যাদিত্যুপদেশ ইত্যর্থঃ| উদাহরণমাহ- যথেত্যাদি| ননু, উপদেশনিযোগযোঃ কো ভেদঃ? উচ্যতে, প্রাযিক উপদেশঃ, যথা- রাত্রৌ ন জাগৃযাদিতি প্রাযিকত্বেনোপন্যস্তং, কফাদ্যভিভূতে তু তত্র রাত্রিজাগরণস্যাপি শস্তত্বাত্ দিবা ন স্বাপং কুর্যাদিত্যপি প্রাযিকং, গ্রীষ্মে তৃষ্ণাদ্যন্বযে চ দিবাস্বাপস্যোচিতত্বাত্; নিযোগশ্চাপ্রাযিকঃ, যথা- পথ্যমেব ভোক্তব্যমিতি; যদ্যপি ‘জ্বরিতোঽহিতমশ্নীযাদ্যদ্যপ্যস্যারুচির্ভবেত্’ ইত্যাদিনাঽপথ্যভোজনস্যাপ্যবকাশঃ, তথাঽপি তদানীমপথ্যস্যৈব পথ্যত্বমিতি নিযোগস্য ব্যভিচারো নাস্তি||১৪||

Adhikarana 13 (15) · Śloka 15

অনেন কারণেনেত্যপদেশঃ, যথাঽপদিশ্যতে- মধুরঃ শ্লেষ্মাণমভিবর্ধযতীতি ||১৫||

অপদেশলক্ষণমাহ- অনেনেত্যাদি| অনেন কারণেনেতি কার্য প্রতি হেতুকথনমপদেশ ইত্যর্থঃ| উদাহরণমাহ- যথাপদিশ্যত ইত্যাদি| যথাপদিশ্যত ইতি উদাহরণোপক্রমে| দ্রব্যবিশেষো মধুরঃ কুতঃ শ্লেষ্মাণং বর্ধযতি? অত্র মধুরঃ শ্লেষ্মাণং বর্ধযতি অর্থান্নিজভাবেন মধুরত্বেন বর্ধযতি||১৫||

Adhikarana 14 (16) · Śloka 16

প্রকৃতস্যাতিক্রান্তেন সাধনং প্রদেশঃ | যথা- দেবদত্তস্যানেন শল্যমুদ্ধৃতং তথা যজ্ঞদত্তস্যাপ্যযমুদ্ধরিষ্যতীতি ||১৬||

প্রদেশমাহ- প্রকৃতস্যেত্যাদি| উদাহরণমাহ- যথা দেবদত্তস্যেত্যাদি| অত্র যজ্ঞদত্তস্য শল্যোদ্ধরণং প্রস্তুতং, তদ্দেবদত্তস্য শল্যোদ্ধরণেনাতিক্রান্তেন সাধ্যতে||১৬||

Adhikarana 15 (17) · Śloka 17

প্রকৃতস্যানাগতস্য সাধনমতিদেশঃ | যথা- যতোঽস্য বাযুরুর্ধ্বমুত্তিষ্ঠতে তেনোদাবর্তী স্যাদিতি ||১৭||

অতিদেশমাহ- প্রকৃতস্যেত্যাদি| অনাগতস্য ভবিষ্যতঃ| উদাহরণমাহ- যথা যত ইত্যাদি| অত্র বাযোরুর্ধ্বমুত্থানং প্রকৃতম্| তেন প্রস্তুতেন অনাগতং ভবিষ্যদুদাবর্তিত্বং সাধ্যতে| উদাবর্তী স্যাত্ উদাবর্তী সম্ভাব্যেত||১৭||

Adhikarana 16 (18) · Śloka 18

অভিব্যাপ্যাপকর্ষণমপবর্গঃ | যথা- অস্বেদ্যা বিষোপসৃষ্টাঃ, অন্যত্র কীটবিষাদিতি ||১৮||

অপবর্গমাহ- অভিব্যাপ্যেত্যাদি| (গুণক্রিযাদিভিঃ সর্বতো বা অভিব্যাপ্ত কস্যচিত্ পদার্থস্য তেভ্যো গুণক্রিযাদিভ্যঃ পৃথক্করণম্ অপবর্গঃ)| উদাহরণমাহ- যথা অস্বেদ্যা ইত্যাদি| উত্সর্গরূপতযা বিষোপসৃষ্টানস্বেদ্যান্ প্রতিপাদ্যাপবাদমাহ- অন্যেত্রেত্যাদি||১৮||

Adhikarana 17 (19) · Śloka 19

যেন পদেনানুক্তেন বাক্যং সমাপ্যেত স বাক্যশেষঃ | যথা- শিরঃ পাণিপাদপার্শ্বপৃষ্ঠোদরোরসামিত্যুক্তে পুরুষগ্রহণং বিনাঽপি গম্যতে পুরুষস্যেতি ||১৯||

বাক্যশেষমাহ- যেনেত্যাদি| উদাহরণমাহ- যথা শির ইত্যাদি| গম্যতে জ্ঞাযত ইত্যর্থঃ||১৯||

Adhikarana 18 (20) · Śloka 20

যদকীর্তিতমর্থাদাপদ্যতে সাঽর্থাপত্তিঃ | যথা- ওদনং ভোক্ষ্যে ইত্যুক্তেঽর্থাদাপন্নং ভবতি- নাযং পিপাসুর্যবাগূমিতি ||২০||

অর্থাপত্তিমাহ- যদকীর্তিতমিত্যাদি| অকীর্তিতম্ অপ্রতিপাদিতম্ তদুদাহরণমাহ- যথৌদনমিত্যাদি| নাযং পাতুমিচ্ছুর্যবাগূমিত্যর্থ||২০||

Adhikarana 19 (21) · Śloka 21

যদ্যত্রাভিহিতং তস্য প্রাতিলোম্যং বিপর্যযঃ | যথা- কৃশাল্পপ্রাণভীরবো দুশ্চিকিত্স্যা ইত্যুক্তে বিপরীতং গৃহ্যতে দৃঢাদযঃ সুচিকিত্স্যা ইতি ||২১||

বিপর্যযমাহ- যদ্যত্রাভিহিতমিত্যাদি| প্রাতিলোম্যং বিপরীতম্| উদাহরণমাহ- যথা কৃশাল্পেত্যাদি| বিপর্যযেণ বিপরীতমেব গম্যতে, অর্থাপত্ত্যা অবিপরীত এবার্থঃ প্রতীযত ইত্যনযোর্ভেদঃ||২১||

Adhikarana 20 (22) · Śloka 22

প্রকরণান্তরেণ সমাপনং প্রসঙ্গঃ, যদ্বা প্রকরণান্তরিতো যোঽর্থোঽসকৃদুক্তঃ সমাপ্যতে স প্রসঙ্গঃ | যথা- পঞ্চমহাভূতশরীরিসমবাযঃ পুরুষস্তস্মিন্ ক্রিযা সোঽধিষ্ঠানমিতি বেদোত্পত্তাবভিধায, ভূতচিন্তাযাং পুনরুক্তং- যতোঽভিহিতং পঞ্চমহাভূতশরীরিসমবাযঃ পুরূষ ইতি, স খল্বেষ কর্মপুরুষশ্চিকিত্সাধিকৃত ইতি ||২২||

প্রসঙ্গমাহ- প্রকরণান্তরেণেত্যাদি| প্রকরণান্তরেণেতি প্রকরণান্তরোক্তেনার্থেনেত্যর্থঃ| সমানং তুল্যম্| উদাহরণমাহ- যথেত্যাদি| প্রকরণান্তরেষু অসকৃদুক্তঃ পুনঃ পুনরুক্তঃ| সমাপ্যতে সমাপ্তিং নীযতে| তদেব কথ্যতে- যথেত্যাদি| অপরে তু ‘অধিকরণান্তরিতো যোঽর্থোঽসকৃদুক্ত’ ইতি পঠিত্বা ব্যাখ্যানযন্তি- স্নেহবিরেকাধিকারযোর্নবজ্বরী নিষিদ্ধঃ, পুনর্জ্বরাধিকারে তরুণজ্বরিণঃ স্নেহশোধনে নিষিদ্ধে ইতি অধিকরণেঽন্তরিতস্যর্থস্যাসকৃদুক্তিঃ||২২||

Adhikarana 21 (23) · Śloka 23

(সর্বত্র )যদবধারণেনোচ্যতে স একান্তঃ | যথা- ত্রিবৃদ্বিরেচযতি, মদনফলং বামযতি(এব) ||২৩||

একান্তলক্ষণমাহ- সর্বত্রেত্যাদি| অবধারণেন অবিকল্পেন, নিযমেনেত্যর্থঃ; উদাহরণেঽবধারণবাচিন এবকারস্য নির্দেশাত্ উদাহরণমাহ- যথা ত্রিবৃদ্বিরেচযতীযি||২৩||

Adhikarana 22 (24) · Śloka 24

ক্বচিত্তথা ক্বচিদন্যথেতি যঃ সোঽনেকান্তঃ | যথা- কেচিদাচার্যা ব্রুবতে দ্রব্যং প্রধানং, কেচিদ্রসং, কেচিদ্বীর্যং কেচিদ্বিপাকমিতি ||২৪||

অনেকান্তমাহ- ক্বচিত্তথেত্যাদি| উদাহরণমাহ- যথা কেচিদাচার্যা ব্রুবতে দ্রব্যং প্রধানমিত্যাদি| স্পষ্টার্থঃ||২৪||

Adhikarana 23 (25) · Śloka 25

আক্ষেপপূর্বকঃ প্রশ্নঃ পূর্বপক্ষঃ | যথা- কথং বাতনিমিত্তাশ্চত্বারঃ প্রমেহ অসাধ্যা ভবন্তীতি ||২৫||

পূর্বপক্ষমাহ- আক্ষেপেত্যাদি| উদাহরণমাহ- যথেত্যাদি| অত্রৈব দোষজানাং সাধ্যত্বেনোপলব্ধেরিতি হেতোঃ পূর্বপক্ষাবতারঃ| নির্ণযাঙ্গত্বেনার্থসাধনত্বমেব সংশযস্যাপি||২৫||

Adhikarana 24 (26-27) · Śloka 27

তস্যোত্তরং নির্ণযঃ | যথা- শরীরং প্রপীড্য পশ্চাদধো গত্বা বসামেদোমজ্জানুবিদ্ধং মূত্রং বিসৃজতি বাতঃ এবমসাধ্যা বাতজা ইতি ||২৬|| তথা চোক্তম্- কৃত্স্নং শরীরং নিষ্পীড্য মেদোমজ্জাবসাযুতঃ | অধঃ প্রকুপ্যতে বাযুস্তেনাসাধ্যাস্তু বাতজাঃ ||২৭||

নির্ণযমাহ- তস্যোত্তরমিত্যাদি| তস্য পূর্বপক্ষস্য যদুত্তরং স নির্ণয ইত্যর্থঃ| উদাহরণমাহ- যথা শরীরমিত্যাদি| যতঃ শরীরপীডাদিকং কৃত্বা বসাদ্যন্বিতং মূত্রং বাতো বিসৃজতি, অতো মজ্জক্ষযে পূর্বপূর্বধাতুক্ষযাদসাধ্যত্বমিত্যর্থঃ||২৬-২৭||

Adhikarana 25 (28) · Śloka 28

পরমতমপ্রতিষিদ্ধমনুমতম্ | যথা- অন্যো ব্রূযাত্- সপ্ত রসা ইতি, তচ্চাপ্রতিষেধাদনুমন্যতে কথঞ্চিদিতি ||২৮||

অনুমতমাহ- পরমতমিত্যাদি| অপ্রতিষিদ্ধম্ অধিগতমিত্যর্থঃ| উদাহরণমাহ- যথেত্যাদি| কথঞ্চিদিতি কেনাপি প্রকারেণেত্যর্থ||২৮||

Adhikarana 26 (29) · Śloka 29

প্রকরণানুপূর্ব্যাঽভিহিতং বিধানম্ | যথা- সক্থিমর্মাণ্যেকাদশ প্রকরণানুপূর্ব্যাঽভিহিতানি ||২৯||

বিধানমাহ- প্রকরণেত্যাদি| প্রকরণানুপূর্ব্যাঽভিহিতমিতি যথাক্রমমুক্তম্| চন্দ্রনন্দনেন চ ‘পরিপাঠ্যাঽর্থকথনং বিধানম্’ ইতি বিধানলক্ষণং কৃতম্| উদাহরণমাহ- যথা সক্থীত্যাদি| মর্মণাং প্রকরণানুপূর্ব্যা অভিধানং ক্ষিপ্ততলহৃদযৈত্যাদিকম্||২৯||

Adhikarana 27 (30) · Śloka 30

এবং বক্ষ্যতীত্যনাগতাবেক্ষণম্ | যথা- শ্লোকস্থানে ব্রূযাত্- চিকিত্সিতেষু বক্ষ্যামীতি ||৩০||

অনাগতাবেক্ষণমাহ- এবমিত্যাদি| অনাগতস্য ভবিষ্যতঃ অবলোকনং কার্যার্থমবেক্ষণমিত্যর্থঃ উদাহরণমাহ- যথা শ্লোকেত্যাদি||৩০||

Adhikarana 28 (31) · Śloka 31

যত্পূর্বমুক্তং তদতিক্রান্তাবেক্ষণম্ | যথা- চিকিত্সিতেষু ব্রূযাত্- শ্লোকস্থানে যদীরিতমিতি ||৩১||

অতিক্রান্তাবেক্ষণমাহ- যদিত্যাদি| অতিক্রান্তস্য অতীতস্য অবেক্ষনম্| উদাহরণমাহ- যথা চিকিত্সিতেষ্বিত্যাদি||৩১||

Adhikarana 29 (32) · Śloka 32

উভযহেতুদর্শনং সংশযঃ | যথা - তলহৃদযাভিঘাতঃ প্রাণহরঃ, পাণিপাদচ্ছেদনমপ্রাণহরমিতি ||৩২||

সংশযমাহ- উভযেত্যাদি| উভযোর্বিসদৃশযোরর্থযোর্হেতুঃ তস্য দর্শনম্| উদাহরণমাহ- যথা তলেত্যাদি| ননু, এতত্ সংশযজ্ঞানার্থমুদাহৃতং, সংশযোঽস্তি কুতঃ? তলহৃদযাভিঘাতস্য তথা পাণ্যাদিচ্ছেদস্য প্রাণহরত্বাপ্রাণহরত্বাভ্যাং পৃথগ্দর্শিতত্বাত্| সত্যং, পরং যত্র ঘাতচ্ছেদযোর্দ্বযোঃ সদ্ভাবস্তত্র কিং তলহৃদযাভিঘাতান্মরণমুত পাণিপাদচ্ছেদাজ্জীবনমিত্যেবং সংশযঃ ||৩২||

Adhikarana 30 (33) · Śloka 33

তন্ত্রেঽতিশযোপবর্ণনং ব্যাখ্যানম্ | যথা- ইহ পঞ্চবিংশতিকঃ পুরূষো ব্যাখ্যাযতে, অন্যেষ্বাযুর্বেদতন্ত্রেষু ভূতাদিপ্রভৃত্যারভ্য চিন্তা ||৩৩||

ব্যাখ্যানমাহ- তন্ত্রে ইত্যাদি| তন্ত্রে শাস্ত্রে| অতিশযস্য অতিরিক্তস্যার্থস্য উপবর্ণনং খ্যাপনং ব্যাখ্যানম্| ‘তত্রাতিশয’ ইতি পাঠে তত্রেতি নির্ধারণে| উদাহরণমাহ- যথা ইহেত্যাদি| পঞ্চবিংশতিকঃ পুরুষ ইতি পঞ্চবিংশতিতম ইত্যর্থঃ, অব্যক্তাদীনামষ্টানাং প্রকৃতিবিকারৈঃ ষোডশভিঃ সহ চতুর্বিশতিত্বাত্| পুরুষ ইতি ক্ষেত্রজ্ঞঃ| স্বমতমভিধায পরমতমাহ- অন্যেষ্বাযুর্বেদতন্ত্রেষ্বিত্যাদি| ভূতাদিস্তামসোঽহঙ্কারঃ ; এতেন ভূতাদিমহঙ্কারমারভ্যান্যাযুর্বেদতন্ত্রেষু চিন্তা নত্বব্যক্তমারভ্যেতি||৩৩||

Adhikarana 31 (34) · Śloka 34

অন্যশাস্ত্রাসামান্যা স্বসঞ্জ্ঞা | যথা- মিথুনমিতি মধুসর্পিষোর্গ্রগণং; লোকপ্রসিদ্ধমুদাহরণং বা ||৩৪||

স্বসঞ্জ্ঞামাহ- অন্যশাস্ত্রাসামান্যা স্বসঞ্জ্ঞেত্যাদি| অন্যানি শাস্ত্রাণি আযুর্বেদাদপরাণি ব্যাকরণাদীনি তেষু, অসামান্যা অসাধারণা, তত্রাননুগতা স্বশাস্ত্রেষ্বেব প্রযোজনবতীত্যর্থঃ| উদাহরণমাহ- যথা মিথুনমিত্যাদি| ননু, স্বসঞ্জ্ঞাপ্রণযনং ব্যবহারার্থ ক্রিযতে, ন চাত্র মিথুনসঞ্জ্ঞযা যন্মধুসর্পিষোর্গ্রহণং তদ্বারেণ ব্যবহারো দৃশ্যতে? উচ্যতে- উদাহরণমাত্রমেতদ্যথাকথঞ্চিদিতি| অত এব পক্ষান্তরমাহ- লোকে প্রসিদ্ধমুদাহরণং বা| স্বসঞ্জ্ঞাযা গ্রাহ্যামিত্যর্থঃ- যথা চতুর্ষু স্নেহেষু মহাস্নেহসঞ্জ্ঞা| অতঃ পরং কেচিদধীযতে- যথোষ্ণভযাত্ ছাযামনুসরতীতি| তে তূদাহরণমপি তন্ত্রযুক্তিষ্বিচ্ছন্তি| তন্ন যুক্তং, উদ্দেশসূত্রে উদাহরণখ্যতন্ত্রযুক্তেরনুক্তেঃ, সঙ্খ্যাধিক্যপ্রসক্তেশ্চ, তস্মাদ্যথোষ্ণেত্যাদিকোঽপপাঠ এবেতি||৩৪||

Adhikarana 32 (35) · Śloka 35

নিশ্চিতং বচনং নির্বচনম্ | যথা- আযুর্বিদ্যতেঽস্মিন্ননেন বা আযুর্বিন্দতীত্যাযুর্বেদঃ ||৩৫||

নির্বচনমাহ- নিশ্চিতমিত্যাদি| উদাহরণমাহ- যথা আযুর্বিদ্যতেঽস্মিন্ ইত্যাদি||৩৫||

Adhikarana 33 (36) · Śloka 36

দৃষ্টান্তব্যক্তির্নিদর্শনম্ | যথা- অগ্নির্বাযুনা সহিতঃ কক্ষে বৃর্দ্ধি গচ্ছতি তথা বাতপিত্তকফদুষ্টো ব্রণ ইতি ||৩৬||

নিদর্শনমাহ- দৃষ্টান্তব্যক্তিরিত্যাদি| দৃষ্টান্তেন ব্যক্তির্যস্মিন্ বাক্যে তত্তথা| এতেনৈতদুক্তং ভবতি- দৃষ্টান্তেনার্থঃ প্রসাধ্যতে যত্র তন্নিদর্শনমিতি| অত এব চ নিদর্শনাত্ হেত্বর্থো ভিদ্যতে, হেত্বর্থস্য দৃষ্টান্তমাত্রত্বাত্ | উদাহরণমাহ- যথা অগ্নিরিত্যাদি| তথেতি অভিবৃদ্ধিং গচ্ছতীত্যর্থঃ||৩৬||

Adhikarana 34 (37) · Śloka 37

ইদমেব কর্তব্যমিতি নিযোগঃ | যথা- পথ্যমেব ভোক্তব্যমিতি ||৩৭||

নিযোগমাহ- ইদমিত্যাদি| উদাহরণমাহ- যথা পথ্যমিত্যাদি| (ক্বচিন্নিযোগো ব্যভিচরতি, যথা- জ্বরিতস্যারুচৌ সত্যামপথ্যমপি দীযতে; তদুক্তং- ‘জ্বরিতোঽহিতমশ্নীযাদ্যদ্যস্য হ্যরুচির্ভবেত্| অন্নকালে হ্যভুঞ্জানঃ ক্ষীযতে ম্রিযতেঽথবা’ ইতি| তন্ত্রান্তরেঽপ্যুক্তং- ‘উত্পদ্যতে হি সাঽবস্থা দেশকালবলং প্রতি| যস্যাং কার্যমকার্য স্যাদ্বর্জিতং কার্যমেব চ’- ইতি )||৩৭||

Adhikarana 35 (38) · Śloka 38

ইদং চেদং চেতি সমুচ্চযঃ | যথা- মাংসবর্গে এণহরিণাদযো লাবতিত্তিরিশারঙ্গশ্চ প্রধানানীতি ||৩৮||

সমুচ্চযমাহ- ইদমিত্যাদি| উদাহরণমাহ- যথা মাংসেত্যাদি| এণাদযঃ প্রধানানি লাবাদযশ্চ প্রধানানীতি সমুচ্চযশ্চ||৩৮||

Adhikarana 36 (39) · Śloka 39

ইদং বেদং বেতি বিকল্পঃ | যথা- রসৌদনঃ সঘৃতা যবাগূর্বা (ভবত্বিতি) ||৩৯||

বিকল্পমাহ- ইদং বেত্যাদি| প্রত্যেকং বাশব্দোপাদানমত্রোদাহরণে যন্ন কৃতং তদেকেনাপি বাশব্দেন বহুষু বিকল্পতাদর্শনার্থ; ক্বচিদ্ বাশব্দং বিনাঽপি বিকল্পো ভবতি, যথৈকং রোগং প্রতি বহুষু যোগেষু বাশব্দং বিনাঽপ্যন্যতমো যোগো যোজ্য ইতি বিকল্পঃ| উদাহরণমাহ- যথা রসৌদন ইত্যাদি||৩৯||

Adhikarana 37 (40) · Śloka 40

যদনির্দিষ্টং বুদ্ধযাঽবগম্যতে তদূহ্যম্ | যথা- অভিহিতমন্নপানবিধৌ চতুর্বিধং চান্নমুপদিশ্যতে- ভক্ষ্যং ভোজ্যং লেহ্যং পেযমিতি, এবং চতুর্বিধে বক্তব্যে দ্বিবিধমভিহিতম্; ইদমত্রোহ্যম্- অন্নপানে বিশিষ্টযোর্দ্বযোর্গ্রহণে কৃতে চতুর্ণামপি গ্রহণং ভবতীতি; চতুর্বিধশ্চাহারঃ প্রবিরলঃ, প্রাযেণ দ্বিবিধ এব; অতো দ্বিত্বং প্রসিদ্ধমিতি | কিঞ্চান্যত্- অন্নেন ভক্ষ্যমবরুদ্ধং, ঘনসাধর্ম্যাত্; পেযেন লেহ্যং, দ্রবসাধর্ম্যাত্ ||৪০||

সাম্প্রতমূহ্যাখ্যাং তন্ত্রযুক্তিমাহ- যদিত্যাদি| অনির্দিষ্টমিতি সাক্ষাদিত্যর্থঃ| উদাহরণমাহ- যথাঽমিহিতমিত্যাদি| কথমত্রোহ্যং ভবতীতি কথনাযাহ- ভক্ষ্যং ভোজ্যং লেহ্যং পেযমিতি চতুর্ধা বক্তব্যে দ্বিবিধমমিহিতমত্রোহ্যং ভবতি চাতুর্বিধ্যমত্রোহ্যং ভবতীত্যর্থঃ| বুদ্ধিগম্যমূহ্যং প্রাক্ প্রতিপাদিতং তত্ কীদৃশ্যা বুদ্ধ্যা গম্যত ইত্যাহ- অন্নপানে ইত্যাদি| অন্নপানযোর্বিশিষ্টযোরভ্যবহার্যযোর্গ্রহণে চতুর্ণামভ্যবহার্যবিশেষাণাং ভক্ষ্যভোজ্যলেহ্যপেযানাং গ্রহণং ভবতীতি| চাতুর্বিধ্যমেব কিমিতি নোক্তমিত্যাশঙ্কযাহ- চতুর্বিধ ইত্যাদি| প্রবিরল ইতি প্রকর্ষেণ বিরলঃ ক্বচিত্কথঞ্চিদ্ভাবাত্| প্রকারান্তরেণাপি চতুর্বিধত্বমাহ- কিঞ্চান্যদিত্যাদি| অন্ন কেচিত্পূর্বপক্ষং কুর্বন্তি বাক্যার্থস্যাস্পষ্টাবিদ্যমানস্য যোজনাদূহ্যং ন তন্ত্রযুক্তিরিতি, লীনস্যানির্দিষ্টস্য চার্থস্য বাক্যাদেবোহনেনোভযরূপস্য যোজনাদূহ্যং তন্ত্রযুক্তেরেব||৪০||

Adhikarana 38 (41-43) · Śloka 43

ভবন্তি চাত্র- সামান্যদর্শনেনাসাং ব্যবস্থা সম্প্রদর্শিতা | বিশেষস্তু যথাযোগমুপধার্যো বিপশ্চিতা ||৪১|| দ্বাত্রিংশদ্যুক্তযো হ্যেতাস্তন্ত্রসারগবেষণে | মযা সম্যগ্বিনিহিতাঃ শব্দার্থন্যাযসংযুতাঃ ||৪২|| যো হ্যোতা বিধিবদ্বেত্তি দীপীভূতাস্তু বুদ্ধিমান্ | স পূজার্হো ভিষক্শ্রেষ্ঠ ইতি ধন্বন্তরের্মতম্ ||৪৩||

এবং তন্ত্রযুক্তীরভিধাযোপসংহরন্ প্রতিপাদিততন্ত্রযুক্তিবিশেষপ্রতিপত্তযে শ্লোকমাহ- ভবন্তি চাত্রেত্যাদি| তন্ত্রযুক্তীনাং বিশেষো যথাসম্বন্ধং বিদুষা উপধারণীয ইত্যর্থঃ| কার্তিকস্তু দ্বাত্রিংশদ্যুক্তয ইত্যাদিকং শ্লোকদ্বযং পঠতি||৪১-৪৩||

Adhikarana puShpikA · Śloka 65

ইতি সুশ্রুতসংহিতাযামুত্তরতন্ত্রে তন্ত্রভূষণাধ্যাযেষু তন্ত্রযুক্তির্নাম (তৃতীযোঽধ্যাযঃ, আদিতঃ) পঞ্চষষ্টিমোঽধ্যাযঃ ||৬৫||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রে পঞ্চষষ্টিতমোঽধ্যাযঃ||৬৫||