3. vartmagatarōgavijñānīyādhyāyaḥ

Adhikarana 1 (1-2) · Śloka 2

অথাতো বর্ত্মগতরোগবিজ্ঞানীযমধ্যাযং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

সন্ধিগতরোগানন্তরং ‘বর্ত্মশুক্লস্য সন্ধৌ চরন্তোঽন্তর্নযনং দূষযন্তি’ ইতি বর্ত্মনোঽনন্তরনির্দিষ্টত্বাদ্বর্ত্মগতরোগবিজ্ঞানীযারম্ভো যুক্ত ইত্যত আহ- অথাত ইত্যাদি||১-২||

Adhikarana 2 (3-4) · Śloka 4

পৃথগ্দোষাঃ সমস্তা বা যদা বর্ত্মব্যপাশ্রযাঃ | সিরা ব্যাপ্যাবতিষ্ঠন্তে বর্ত্মস্বধিকমূর্চ্ছিতাঃ ||৩|| বিবর্ধ্য মাংসং রক্তং চ তদা বর্ত্মব্যপাশ্রযান্ | বিকারাঞ্জনযন্ত্যাশু নামতস্তান্নিবোধত ||৪||

সম্প্রাপ্তিমাহ- পৃথগিত্যাদি| যদা পৃথক্ সমস্তা বা অধিকমূর্চ্ছিতা অতিশযপ্রকুপিতা দোষা বর্ত্মব্যপাশ্রযাঃ অপশব্দস্যোপসর্গস্য মধ্যবচনত্বাদ্বর্ত্মমধ্যগতাঃ সিরা ব্যাপ্য বর্ত্মস্ববতিষ্ঠন্তে, তদা বর্ত্মব্যপাশ্রযান্ বিকারান্ শীঘ্রং জনযন্তীতি সম্বন্ধঃ| অমুং পাঠং পঞ্জিকাকারো ন পঠতি, জেজ্জটপঠিতত্বাদস্মাভিরপি পঠিতঃ||৩-৪||

Adhikarana 3 (5-8) · Śloka 9

উত্সঙ্গিন্যথ কুম্ভীকা পোথক্যো বর্ত্মশর্করা | তথাঽর্শোবর্ত্ম শুষ্কার্শস্তথৈবাঞ্জননামিকা ||৫|| বহলং বর্ত্ম যচ্চাপি ব্যাধির্বর্ত্মাববন্ধকঃ | ক্লিষ্টকর্দমবর্ত্মাখ্যৌ শ্যাববর্ত্ম তথৈব চ ||৬|| প্রক্লিন্নমপরিক্লিন্নং বর্ত্ম বাতহতং তু যত্ | অর্বুদং নিমিষশ্চাপি শোণিতার্শশ্চ যত্ স্মৃতম্ ||৭|| লগণো বিশনামা চ পক্ষ্মকোপস্তথৈব চ | একবিংশতিরিত্যেতে বিকারা বর্ত্মসংশ্রযাঃ ||৮|| নামভিস্তে সমুদ্দিষ্টা... |৯|

তে চ বর্ত্মাশ্রযা রোগা একবিংশতিরভিহিতাঃ, অতস্তানেব নাম্না নির্দিশন্নাহ- উত্সঙ্গিনীত্যাদি||৫-৮||-

Adhikarana 4 (9) · Śloka 10

...লক্ষণৈস্তান্ প্রচক্ষ্মহে | অভ্যন্তরমুখী বাহ্যোত্সঙ্গেঽধো বর্ত্মনশ্চ যা ||৯|| বিজ্ঞেযোত্সঙ্গিনী নাম তদ্রূপপিডকাচিতা |১০|

নামতস্তান্ সমুদ্দিশ্য লক্ষণৈরাহ- লক্ষণৈরিত্যাদি| অভ্যন্তরমুখী বর্ত্মাভ্যন্তরমুখী| বাহ্যেতি বহির্ভবা ইব প্রতিভাসতে, বাস্তূত্সেধেন বহিরপ্যুন্নতত্বাত্| উত্সঙ্গেঽধো বর্ত্মনশ্চ যেতি অধোভাগে যদ্বর্ত্ম তস্যোত্সঙ্গে ক্রোডে জাতা যা, তস্যা ইব রূপং যাসাং, তদ্রূপাভির্ব্যাপ্তা; ইযং সন্নিপাতজা সাধ্যা চ| বিদেহোক্তমিহানুক্তং কাঠিন্যাদি চোহ্যম্| তথা হি তদুক্তং বচঃ, - “বর্ত্মোত্সঙ্গেঽপ্যধো জন্তোঃ সন্নিপাতাত্ প্রজাযতে| অভ্যন্তরমুখী স্থূলা বাহ্যতশ্চাপি দৃশ্যতে|| পিডকা পিডকাভিশ্চ চিতাঽন্যাভিঃ সমন্ততঃ| উত্সঙ্গপিডকা নাম কঠিনা মন্দবেদনা|| সা প্রভিন্না স্রবেত্ স্রাবং কুক্কুটাণ্ডরসোপমম্”- ইতি||৯||-

Adhikarana 5 (10) · Śloka 11

কুম্ভীকবীজপ্রতিমাঃ পিডকা যাস্তু বর্ত্মজাঃ ||১০|| আধ্মাপযন্তি ভিন্না যাঃ কুম্ভীকপিডকাস্তু তাঃ |১১|

কুম্ভীকা দাডিমাকারফলা স্থলকুম্ভী| বর্ত্মজা ইতি বহুবচনাদ্ বাহ্যা এব ভবন্তি| এতাঃ সন্নিপাতজা অপি সাধ্যাঃ||১০||-

Adhikarana 6 (11) · Śloka 11

স্রাবিণ্যঃ কণ্ডুরা গুর্ব্যো রক্তসর্ষপসন্নিভাঃ | পিডকাশ্চ রুজাবত্যঃ পোথক্য ইতি সঞ্জ্ঞিতাঃ ||১১||

স্রাবিণ্য ইত্যাদি| স্রাবিণ্যো বহুস্রাবাঃ| কণ্ডুরা ইতি কণ্ডুযুক্তাঃ| রুজাবত্য ইতি কফজা অপি বেদনাযুক্তা ইত্যর্থঃ| ইমাঃ সাধ্যাঃ||১১||

Adhikarana 7 (12) · Śloka 12

পিডকাভিঃ সুসূক্ষ্মাভির্ঘনাভিরভিসংবৃতা | পিডকা যা খরা স্থূলা সা জ্ঞেযা বর্ত্মশর্করা ||১২||

পিডকাভিরিত্যাদি| ইযং সন্নিপাতজা সাধ্যা চ||১২||

Adhikarana 8 (13) · Śloka 13

এর্বারুবীজপ্রতিমাঃ পিডকা মন্দবেদনাঃ | সূক্ষ্মাঃ খরাশ্চ বর্ত্মস্থাস্তদর্শোবর্ত্ম কীর্ত্যতে ||১৩||

এর্বার্বিত্যাদি| এর্বারুঃ গ্রীষ্মকর্কটী| বর্ত্মস্থা বর্ত্মনামন্তর্বাহ্যতোঽপি তিষ্ঠাতি| ইদং সন্নিপাতজমপি সাধ্যম্||১৩||

Adhikarana 9 (14) · Śloka 14

দীর্ঘোঽঙ্কুরঃ খরঃ স্তব্ধো দারুণো বর্ত্মসম্ভবঃ | ব্যাধিরেষ সমাখ্যাতঃ শুষ্কার্শ ইতি সঞ্জ্ঞিতঃ ||১৪||

দীর্ঘ ইত্যাদি| দারুণঃ অতিকষ্টতরঃ| বর্ত্মসম্ভবো বর্ত্মনামন্তরেব ভবতি| অযং ব্যাধিঃ সন্নিপাতজোঽপি সাধ্যঃ||১৪||

Adhikarana 10 (15) · Śloka 15

দাহতোদবতী তাম্রা পিডকা বর্ত্মসম্ভবা | মৃদ্বী মন্দরুজা সূক্ষ্মা জ্ঞেযা সাঽঞ্জননামিকা ||১৫||

দাহেত্যাদি| রক্তজেযং সাধ্যা চ||১৫||

Adhikarana 11 (16) · Śloka 16

বর্ত্মোপচীযতে যস্য পিডকাভিঃ সমন্ততঃ | সবর্ণাভিঃ সমাভিশ্চ বিদ্যাদ্বহলবর্ত্ম তত্ ||১৬||

বর্ত্মেত্যাদি| এতদপি সন্নিপাতজং সাধ্যং চ||১৬||

Adhikarana 12 (17) · Śloka 17

কণ্ডূমতাঽল্পতোদেন বর্ত্মশোফেন যো নরঃ | ন সমং ছাদযেদক্ষি ভবেদ্বন্ধঃ স বর্ত্মনঃ ||১৭||

কণ্ডূমতেত্যাদি| এষ সন্নিপাতজোঽপি সাধ্যঃ||১৭||

Adhikarana 13 (18) · Śloka 18

মৃদল্পবেদনং তাম্রং যদ্বর্ত্ম সমমেব চ | অকস্মাচ্চ ভবেদ্রক্তং ক্লিষ্টবর্ত্ম তদাদিশেত্ ||১৮||

মৃদ্বিত্যাদি| ‘অকস্মাচ্চ স্রবেদ্রক্তং’ ইতি ক্বচিত্ পাঠঃ, তং চ পঞ্জিকাকারো ন মন্যতে| অকস্মাচ্চ কারণং বিনা দ্বযমপি বর্ত্ম রক্তং ভবেত্| তথা চ বিদেহঃ,- “শ্লেষ্মদুষ্টেন রক্তেন ক্লিষ্টমাংসমিবোভযম্| বন্ধুজীবনিভং বর্ত্ম ক্লিষ্টবর্ত্ম তদুচ্যতে”- ইতি| এতদ্রক্তজং সাধ্যং চ||১৮||

Adhikarana 14 (19) · Śloka 19

ক্লিষ্টং পুনঃ পিত্তযুতং বিদহেচ্ছোণিতং যদা | তদা ক্লিন্নত্বমাপন্নমুচ্যতে বর্ত্মকর্দমঃ ||১৯||

ক্লিষ্টমিত্যাদি| যদা ক্লিষ্টারম্ভকং শ্লেষ্মদুষ্টং শোণিতং পিত্তযুক্তং বিদহেত্ বিদাহং গচ্ছেত্তদা ক্লিন্নত্বমাপন্নং ক্লিষ্টমেব বর্ত্মকর্দম উচ্যতে, ক্লিন্নত্বমাপন্নমার্দ্রতাং প্রাপ্তম্| এতত্ কফপিত্তরক্তারব্ধত্বাত্ সন্নিপাতজং সাধ্যং চ| ‘কৃষ্ণত্বমাপন্নম্’ ইতি কেচিত্ পঠন্তি, তং পাঠং পঞ্জিকাকারো নাঙ্গীকরোতি||১৯||

Adhikarana 15 (20) · Śloka 20

যদ্বর্ত্ম বাহ্যতোঽন্তশ্চ শ্যাবং শূনং সবেদনম্ | দাহকণ্ডূপরিক্লেদি শ্যাববর্ত্মেতি তন্মতম্ ||২০||

যদ্বর্ত্মেত্যাদি| এতদপি সন্নিপাতজং সাধ্যং চ||২০||

Adhikarana 16 (21) · Śloka 21

অরুজং বাহ্যতঃ শূনমন্তঃ ক্লিন্নং স্রবত্যপি | কণ্ডূনিস্তোদভূযিষ্ঠং ক্লিন্নবর্ত্ম তদুচ্যতে ||২১||

অরুজমিত্যাদি| অরুজমল্পরুজং শূনং চ বাহ্যে, ক্লিন্নং স্রবত্যপ্যন্তরেব, কণ্ডূনিস্তোদবহুলং পুনরন্তরেব| অযং রোগঃ পিল্লাখ্যঃ কেনচিত্ কথিতঃ, তত্ পঞ্জিকাকারো ন মন্যতে| অযং ব্যাধিঃ কফজঃ সাধ্যশ্চ||২১||

Adhikarana 17 (22) · Śloka 22

যস্য ধৌতানি ধৌতানি সম্বধ্যন্তে পুনঃ পুনঃ | বর্ত্মান্যপরিপক্বানি বিদ্যাদক্লিন্নবর্ত্ম তত্ ||২২||

যস্যেত্যাদি| যস্য রোগস্য স্থানভূতানি বর্ত্মান্যসকৃত্প্রক্ষালিতানি পুনঃ সম্বদ্ধানি ভবন্তি পিল্লোপদেহেনান্তর্বহিশ্চ পাকরহিতান্যপি , তদক্লিন্নবর্ত্ম জানীযাত্| এতত্ সন্নিপাতজমপি সাধ্যং পিল্লাখ্যং চ| তথা চ বিদেহঃ- “প্রক্ষালিতে তথা মৃষ্টে আনহ্যেতে পুনঃ পুনঃ| অপরিক্লিন্নবর্ত্মানং পিল্লাখ্যমিতি নির্দেশেত্”- ইতি| অমুং দ্বযমপি দৃষ্টান্তদার্ষ্টান্তিকপাঠং সূত্রে জেজ্জটাচার্যঃ পঠতি, তন্নেচ্ছতি গযদাসঃ||২২||

Adhikarana 18 (23) · Śloka 23

বিমুক্তসন্ধি নিশ্চেষ্টং বর্ত্ম যস্য ন মীল্যতে | এতদ্বাতহতং বিদ্যাত্ সরুজং যদি বাঽরুজম্ ||২৩||

বিমুক্তেত্যাদি| নিশ্চেষ্টং নিষ্ক্রিযম্| অত এব ন নিমীল্যতে ন সঙ্কুচতীত্যর্থঃ| অরুজম্ অল্পরুজম্| ইদং বাতজমসাধ্যং চ||২৩||

Adhikarana 19 (24) · Śloka 24

বর্ত্মান্তরস্থং বিষমং গ্রন্থিভূতমবেদনম্ | বিজ্ঞেযমর্বুদং পুংসাং সরক্তমবলম্বিতম্ ||২৪||

বর্ত্মেত্যাদি| বর্ত্মান্তরস্থম্ অভ্যন্তরস্থমিত্যর্থঃ| বিষমং কষ্টকারি| গ্রন্থিভূতং গ্রন্থিরিব | সরক্তমবলম্বিতমিতি কিঞ্চিদ্রক্ততা পিত্তেন, অবলম্বিতত্বমর্বুদত্বেন| ‘অবলম্বি চ’ ইতি কেচিত্ পঠন্তি| সন্নিপাতজমপীদং সাধ্যম্||২৪||

Adhikarana 20 (25) · Śloka 25

নিমেষণীঃ সিরা বাযুঃ প্রবিষ্টো বর্ত্মসংশ্রযাঃ | চালযত্যতি বর্ত্মানি নিমেষঃ স গদো মতঃ ||২৫||

নিমেষণীরিত্যাদি| বর্ত্মসংশ্রযাঃ নিমেষিণীঃ সিরা বাযুঃ প্রবিষ্টঃ সন্ বর্ত্মানি চালযতীতি সম্বন্ধঃ| যদ্বলেন নিমেষোন্মেষৌ স্যাতাং তা নিমেষিণ্যঃ সিরাঃ| ‘সোঽগদো মত’ ইতি কেচিত্ পঠন্তি, তত্রাগদ অব্যথ ইত্যর্থঃ| অসৌ বাতজোঽসাধ্যশ্চ||২৫||

Adhikarana 21 (26) · Śloka 26

ছিন্নাশ্ছিন্না বিবর্ধন্তে বর্ত্মস্থা মৃদবোঽঙ্কুরাঃ | দাহকণ্ডূরুজোপেতাস্তেঽর্শঃ শোণিতসম্ভবাঃ ||২৬||

ছিন্না ইত্যাদি| যে শোণিতসম্ভবা মৃদবো বর্ত্মস্থা অঙ্কুরাশ্ছিন্নাশ্ছিন্নাঃ সন্তো বিবর্ধন্তে তেঽঙ্কুরা অর্শঃ শোণিতার্শ ইতি সম্বন্ধঃ| ইদং শোণিতার্শো রক্তজমসাধ্যং চ||২৬||

Adhikarana 22 (27) · Śloka 27

অপাকঃ কঠিনঃ স্থূলো গ্রন্থির্বর্ত্মভবোঽরুজঃ | সকণ্ডূঃ পিচ্ছিলঃ কোলপ্রমাণো লগণস্তু সঃ ||২৭||

অপাক ইত্যাদি| শ্লেষ্মজোঽযং সাধ্যশ্চ||২৭||

Adhikarana 23 (28) · Śloka 28

শূনং যদ্বর্ত্ম বহুভিঃ সূক্ষ্মৈশ্ছিদ্রৈঃ সমন্বিতম্ | বিসমন্তর্জল ইব বিসবর্ত্মেতি তন্মতম্ ||২৮||

শূনমিত্যাদি| যথাঽন্তর্জলে বিসং বিসাণ্ডং তদ্বদিত্যর্থঃ| এতত্ সর্বজমপি সাধ্যম্||২৮||

Adhikarana 24 (29-30) · Śloka 30

দোষাঃ পক্ষ্মাশযগতাস্তীক্ষ্ণাগ্রাণি খরাণি চ | নির্বর্তযন্তি পক্ষ্মাণি তৈর্ঘুষ্টং চাক্ষি দূযতে ||২৯|| উদ্ধৃতৈরুদ্ধৃতৈঃ শান্তিঃ পক্ষ্মভিশ্চোপজাযতে | বাতাতপানলদ্বেষী পক্ষ্মকোপঃ স উচ্যতে ||৩০||

দোষা ইত্যাদি| নির্বর্তযন্তি নিষ্পাদযন্তি| পক্ষ্মাণি প্রতিবালান্| তৈঃ পক্ষ্মভিঃ, অক্ষি লোচনং, দূযতে উপতপ্যতে| উদ্ধৃতৈরুদ্ধৃতৈরিতি উন্মূলিতৈরুন্মূলিতৈরিত্যর্থঃ; অত্র বীপ্সযা তেষাং পুনঃ পুনরুদ্ভবঃ খ্যাপ্যতে| অস্য পক্ষ্মকোপস্য ‘উপপক্ষ্মমালা’ ইতি অনুক্তা দ্বিতীযা সঞ্জ্ঞা; লোকে ‘পরিবাল’ ইতি বদন্তি| এষ রোগঃ সর্বজো যাপ্যশ্চ||২৯-৩০||

Adhikarana puShpikA · Śloka 3

ইতি সুশ্রুতসংহিতাযামুত্তরতন্ত্রে বর্ত্মগতরোগবিজ্ঞানীযো নাম তৃতীযোঽধ্যাযঃ ||৩||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযামুত্তরতন্ত্রান্তর্গতে শালাক্যতন্ত্রে তৃতীযোঽধ্যাযঃ সমাপ্তঃ||৩||