4. dhāmārgavakalpaḥ

Adhikarana 1 (1-2) · Śloka 2

ಅಥಾತೋ ಧಾಮಾರ್ಗವಕಲ್ಪಂ ವ್ಯಾಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||

Adhikarana 2 (3) · Śloka 3

ಕರ್ಕೋಟಕೀ ಕೋಠಫಲಾ ಮಹಾಜಾಲಿನಿರೇವ ಚ| ಧಾಮಾರ್ಗವಸ್ಯ ಪರ್ಯಾಯಾ ರಾಜಕೋಶಾತಕೀ ತಥಾ||೩||

Adhikarana 3 (4) · Śloka 5

ಗರೇ ಗುಲ್ಮೋದರೇ ಕಾಸೇ ವಾತೇ ಶ್ಲೇಷ್ಮಾಶಯಸ್ಥಿತೇ| ಕಫೇ ಚ ಕಣ್ಠವಕ್ರಸ್ಥೇ ಕಫಸಞ್ಚಯಜೇಷು ಚ||೪|| ರೋಗೇಷ್ವೇಷು ಪ್ರಯೋಜ್ಯಂ ಸ್ಯಾತ್ ಸ್ಥಿರಾಶ್ಚ ಗುರವಶ್ಚ ಯೇ|೫|

Adhikarana 4 (5) · Śloka 5

ಫಲಂ ಪುಷ್ಪಂ ಪ್ರವಾಲಂ ಚ ವಿಧಿನಾ ತಸ್ಯ ಸಂಹರೇತ್||೫||

Adhikarana 5 (6) · Śloka 6

ಪ್ರವಾಲಸ್ವರಸಂ ಶುಷ್ಕಂ ಕೃತ್ವಾ ಚ ಗುಲಿಕಾಃ ಪೃಥಕ್| ಕೋವಿದಾರಾದಿಭಿಃ ಪೇಯಾಃ ಕಷಾಯೈರ್ಮಧುಕಸ್ಯ ಚ||೬||

Adhikarana 6 (7) · Śloka 7

ಪುಷ್ಪಾದಿಷು ಪಯೋಯೋಗಾಶ್ಚತ್ವಾರಃ ಪಞ್ಚಮೀ ಸುರಾ| ಪೂರ್ವವತ್...|೭|

Adhikarana 7 (7-8) · Śloka 9

... ಜೀರ್ಣಶುಷ್ಕಾಣಾಮತಃ ಕಲ್ಪಃ ಪ್ರವಕ್ಷ್ಯತೇ||೭|| ಮಧುಕಸ್ಯ ಕಷಾಯೇಣ ಬೀಜಕಣ್ಠೋದ್ಧೃತಂ ಫಲಮ್| ಸಗುಡಂ ವ್ಯುಷಿತಂ ರಾತ್ರಿಂ ಕೋವಿದಾರಾದಿಭಿಸ್ತಥಾ||೮|| ದದ್ಯಾದ್ಗುಲ್ಮೋದರಾರ್ತೇಭ್ಯೋ ಯೇ ಚಾಪ್ಯನ್ಯೇ ಕಫಾಮಯಾಃ|೯|

Adhikarana 8 (9) · Śloka 9

ದದ್ಯಾದನ್ನೇನ ಸಂಯುಕ್ತಂ ಛರ್ದಿಹೃದ್ರೋಗಶಾನ್ತಯೇ||೯||

Adhikarana 9 (10) · Śloka 10

ಚೂರ್ಣೈರ್ವಾಽಪ್ಯುತ್ಪಲಾದೀನಿ ಭಾವಿತಾನಿ ಪ್ರಭೂತಶಃ| ರಸಕ್ಷೀರಯವಾಗ್ವಾದಿತೃಪ್ತೋ ಘ್ರಾತ್ವಾ ವಮೇತ್ ಸುಖಮ್||೧೦||

Adhikarana 10 (11-12) · Śloka 12

ಚೂರ್ಣೀಕೃತಸ್ಯ ವರ್ತಿಂ ವಾ ಕೃತ್ವಾ ಬದರಸಮ್ಮಿತಾಮ್| ವಿನೀಯಾಞ್ಜಲಿಮಾತ್ರೇ ತು ಪಿಬೇದ್ಗೋಽಶ್ವಶಕೃದ್ರಸೇ ||೧೧|| ಪೃಷತರ್ಷ್ಯಕುರಙ್ಗಾಹ್ವಗಜೋಷ್ಟ್ರಾಶ್ವತರಾವಿಕೇ| ಶ್ವದಂಷ್ಟ್ರಖರಖಙ್ಗಾನಾಂ ಚೈವಂ ಪೇಯಾ ಶಕೃದ್ರಸೇ ||೧೨||

Adhikarana 11 (13-14) · Śloka 15

ಜೀವಕರ್ಷಭಕೌ ವೀರಾಮಾತ್ಮಗುಪ್ತಾಂ ಶತಾವರೀಮ್| ಕಾಕೋಲೀಂ ಶ್ರಾವಣೀಂ ಮೇದಾಂ ಮಹಾಮೇದಾಂ ಮಧೂಲಿಕಾಮ್||೧೩|| ಏಕೈಕಶೋಽಭಿಸಞ್ಚೂರ್ಣ್ಯ ಸಹ ಧಾಮಾರ್ಗವೇಣ ತೇ| ಶರ್ಕರಾಮಧುಸಂಯುಕ್ತಾ ಲೇಹಾ ಹೃದ್ದಾಹಕಾಸಿನಾಮ್||೧೪|| ಸುಖೋದಕಾನುಪಾನಾಃ ಸ್ಯುಃ ಪಿತ್ತೋಷ್ಮಸಹಿತೇ ಕಫೇ|೧೫|

Adhikarana 12 (15) · Śloka 15

ಧಾನ್ಯತುಮ್ಬುರುಯೂಷೇಣ ಕಲ್ಕಃ ಸರ್ವವಿಷಾಪಹಃ||೧೫||

Adhikarana 13 (16-17) · Śloka 18

ಜಾತ್ಯಾಃ ಸೌಮನಸಾಯಿನ್ಯಾ ರಜನ್ಯಾಶ್ಚೋರಕಸ್ಯ ಚ| ವೃಶ್ಚೀರಸ್ಯ ಮಹಾಕ್ಷುದ್ರಸಹಾಹೈಮವತಸ್ಯ ಚ||೧೬|| ಬಿಮ್ಬ್ಯಾಃ ಪುನರ್ನವಾಯಾ ವಾ ಕಾಸಮರ್ದಸ್ಯ ವಾ ಪೃಥಕ್ | ಏಕಂ ಧಾಮಾರ್ಗವಂ ದ್ವೇ ವಾ ಕಷಾಯೇ ಪರಿಮೃದ್ಯ ತು||೧೭|| ಪೂತಂ ಮನೋವಿಕಾರೇಷು ಪಿಬೇದ್ವಮನಮುತ್ತಮಮ್|೧೮|

Adhikarana 14 (18) · Śloka 18

ತಚ್ಛೃತಕ್ಷೀರಜಂ ಸರ್ಪಿಃ ಸಾಧಿತಂ ವಾ ಫಲಾದಿಭಿಃ||೧೮||

Adhikarana 15 (19-20) · Śloka 20

ತತ್ರ ಶ್ಲೋಕೌ- ಪಲ್ಲವೇ ನವ ಚತ್ವಾರಃ ಕ್ಷೀರ ಏಕಃ ಸುರಾಸವೇ| ಕಷಾಯೇ ವಿಂಶತಿಃ ಕಲ್ಕೇ ದಶ ದ್ವೌ ಚ ಶಕೃದ್ರಸೇ||೧೯|| ಅನ್ನ ಏಕಸ್ತಥಾ ಘ್ರೇಯೇ ದಶ ಲೇಹಾಸ್ತಥಾ ಘೃತಮ್| ಕಲ್ಪೇ ಧಾಮಾರ್ಗವಸ್ಯೋಕ್ತಾಃ ಷಷ್ಟಿರ್ಯೋಗಾ ಮಹರ್ಷಿಣಾ||೨೦||

Adhikarana puShpikA · Śloka 4

ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇಽಪ್ರಾಪ್ತೇ ದೃಢಬಲಸಮ್ಪೂರಿತೇ ಕಲ್ಪಸ್ಥಾನೇ ಧಾಮಾರ್ಗವಕಲ್ಪೋ ನಾಮ ಚತುರ್ಥೋಽಧ್ಯಾಯಃ||೪||