4. dhāmārgavakalpaḥ

Adhikarana 1 (1-2) · Śloka 2

અથાતો ધામાર્ગવકલ્પં વ્યાખ્યાસ્યામઃ||૧|| ઇતિ હ સ્માહ ભગવાનાત્રેયઃ||૨||

Adhikarana 2 (3) · Śloka 3

કર્કોટકી કોઠફલા મહાજાલિનિરેવ ચ| ધામાર્ગવસ્ય પર્યાયા રાજકોશાતકી તથા||૩||

Adhikarana 3 (4) · Śloka 5

ગરે ગુલ્મોદરે કાસે વાતે શ્લેષ્માશયસ્થિતે| કફે ચ કણ્ઠવક્રસ્થે કફસઞ્ચયજેષુ ચ||૪|| રોગેષ્વેષુ પ્રયોજ્યં સ્યાત્ સ્થિરાશ્ચ ગુરવશ્ચ યે|૫|

Adhikarana 4 (5) · Śloka 5

ફલં પુષ્પં પ્રવાલં ચ વિધિના તસ્ય સંહરેત્||૫||

Adhikarana 5 (6) · Śloka 6

પ્રવાલસ્વરસં શુષ્કં કૃત્વા ચ ગુલિકાઃ પૃથક્| કોવિદારાદિભિઃ પેયાઃ કષાયૈર્મધુકસ્ય ચ||૬||

Adhikarana 6 (7) · Śloka 7

પુષ્પાદિષુ પયોયોગાશ્ચત્વારઃ પઞ્ચમી સુરા| પૂર્વવત્...|૭|

Adhikarana 7 (7-8) · Śloka 9

... જીર્ણશુષ્કાણામતઃ કલ્પઃ પ્રવક્ષ્યતે||૭|| મધુકસ્ય કષાયેણ બીજકણ્ઠોદ્ધૃતં ફલમ્| સગુડં વ્યુષિતં રાત્રિં કોવિદારાદિભિસ્તથા||૮|| દદ્યાદ્ગુલ્મોદરાર્તેભ્યો યે ચાપ્યન્યે કફામયાઃ|૯|

Adhikarana 8 (9) · Śloka 9

દદ્યાદન્નેન સંયુક્તં છર્દિહૃદ્રોગશાન્તયે||૯||

Adhikarana 9 (10) · Śloka 10

ચૂર્ણૈર્વાઽપ્યુત્પલાદીનિ ભાવિતાનિ પ્રભૂતશઃ| રસક્ષીરયવાગ્વાદિતૃપ્તો ઘ્રાત્વા વમેત્ સુખમ્||૧૦||

Adhikarana 10 (11-12) · Śloka 12

ચૂર્ણીકૃતસ્ય વર્તિં વા કૃત્વા બદરસમ્મિતામ્| વિનીયાઞ્જલિમાત્રે તુ પિબેદ્ગોઽશ્વશકૃદ્રસે ||૧૧|| પૃષતર્ષ્યકુરઙ્ગાહ્વગજોષ્ટ્રાશ્વતરાવિકે| શ્વદંષ્ટ્રખરખઙ્ગાનાં ચૈવં પેયા શકૃદ્રસે ||૧૨||

Adhikarana 11 (13-14) · Śloka 15

જીવકર્ષભકૌ વીરામાત્મગુપ્તાં શતાવરીમ્| કાકોલીં શ્રાવણીં મેદાં મહામેદાં મધૂલિકામ્||૧૩|| એકૈકશોઽભિસઞ્ચૂર્ણ્ય સહ ધામાર્ગવેણ તે| શર્કરામધુસંયુક્તા લેહા હૃદ્દાહકાસિનામ્||૧૪|| સુખોદકાનુપાનાઃ સ્યુઃ પિત્તોષ્મસહિતે કફે|૧૫|

Adhikarana 12 (15) · Śloka 15

ધાન્યતુમ્બુરુયૂષેણ કલ્કઃ સર્વવિષાપહઃ||૧૫||

Adhikarana 13 (16-17) · Śloka 18

જાત્યાઃ સૌમનસાયિન્યા રજન્યાશ્ચોરકસ્ય ચ| વૃશ્ચીરસ્ય મહાક્ષુદ્રસહાહૈમવતસ્ય ચ||૧૬|| બિમ્બ્યાઃ પુનર્નવાયા વા કાસમર્દસ્ય વા પૃથક્ | એકં ધામાર્ગવં દ્વે વા કષાયે પરિમૃદ્ય તુ||૧૭|| પૂતં મનોવિકારેષુ પિબેદ્વમનમુત્તમમ્|૧૮|

Adhikarana 14 (18) · Śloka 18

તચ્છૃતક્ષીરજં સર્પિઃ સાધિતં વા ફલાદિભિઃ||૧૮||

Adhikarana 15 (19-20) · Śloka 20

તત્ર શ્લોકૌ- પલ્લવે નવ ચત્વારઃ ક્ષીર એકઃ સુરાસવે| કષાયે વિંશતિઃ કલ્કે દશ દ્વૌ ચ શકૃદ્રસે||૧૯|| અન્ન એકસ્તથા ઘ્રેયે દશ લેહાસ્તથા ઘૃતમ્| કલ્પે ધામાર્ગવસ્યોક્તાઃ ષષ્ટિર્યોગા મહર્ષિણા||૨૦||

Adhikarana puShpikA · Śloka 4

ઇત્યગ્નિવેશકૃતે તન્ત્રે ચરકપ્રતિસંસ્કૃતેઽપ્રાપ્તે દૃઢબલસમ્પૂરિતે કલ્પસ્થાને ધામાર્ગવકલ્પો નામ ચતુર્થોઽધ્યાયઃ||૪||