26. chardicikitsitam

Adhikarana 1 (1-2) · Śloka 2

ಅಥಾತಶ್ಛರ್ದಿಚಿಕಿತ್ಸಿತಂ ವ್ಯಾಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||

Adhikarana 2 (3) · Śloka 3

ಯಶಸ್ವಿನಂ ಬ್ರಹ್ಮತಪೋದ್ಯುತಿಭ್ಯಾಂ ಜ್ವಲನ್ತಮಗ್ನ್ಯರ್ಕಸಮಪ್ರಭಾವಮ್| ಪುನರ್ವಸುಂ ಭೂತಹಿತೇ ನಿವಿಷ್ಟಂ ಪಪ್ರಚ್ಛ ಶಿಷ್ಯೋಽತ್ರಿಜಮಗ್ನಿವೇಶಃ||೩||

Adhikarana 3 (4-5) · Śloka 5

ಯಾಶ್ಛರ್ದಯಃ ಪಞ್ಚ ಪುರಾ ತ್ವಯೋಕ್ತಾ ರೋಗಾಧಿಕಾರೇ ಭಿಷಜಾಂ ವರಿಷ್ಠ!| ತಾಸಾಂ ಚಿಕಿತ್ಸಾಂ ಸನಿದಾನಲಿಙ್ಗಾಂ ಯಥಾವದಾಚಕ್ಷ್ವ ನೃಣಾಂ ಹಿತಾರ್ಥಮ್||೪|| ತದಗ್ನಿವೇಶಸ್ಯ ವಚೋ ನಿಶಮ್ಯ ಪ್ರೀತೋ ಭಿಷಕ್ಶ್ರೇಷ್ಠ ಇದಂ ಜಗಾದ| ಯಾಶ್ಛರ್ದಯಃ ಪಞ್ಚ ಪುರಾ ಮಯೋಕ್ತಾಸ್ತಾ ವಿಸ್ತರೇಣ ಬ್ರುವತೋ ನಿಬೋಧ||೫||

Adhikarana 4 (6) · Śloka 6

ದೋಷೈಃ ಪೃಥಕ್ತ್ರಿಪ್ರಭವಾಶ್ಚತಸ್ರೋ ದ್ಬಿಷ್ಟಾರ್ಥಯೋಗಾದಪಿ ಪಞ್ಚಮೀ ಸ್ಯಾತ್|೬|

Adhikarana 5 (6) · Śloka 6

ತಾಸಾಂ ಹೃದುತ್ಕ್ಲೇಶಕಫಪ್ರಸೇಕೌ ದ್ವೇಷೋಽಶನೇ ಚೈವ ಹಿ ಪೂರ್ವರೂಪಮ್||೬||

Adhikarana 6 (7-9) · Śloka 9

ವ್ಯಾಯಾಮತೀಕ್ಷ್ಣೌಷಧಶೋಕರೋಗಭಯೋಪವಾಸಾದ್ಯತಿಕರ್ಶಿತಸ್ಯ| ವಾಯುರ್ಮಹಾಸ್ರೋತಸಿ ಸಮ್ಪ್ರವೃದ್ಧ ಉತ್ಕ್ಲೇಶ್ಯ ದೋಷಾಂಸ್ತತ ಊರ್ಧ್ವಮಸ್ಯನ್||೭|| ಆಮಾಶಯೋತ್ಕ್ಲೇಶಕೃತಾಂ ಚ ಮರ್ಮ ಪ್ರಪೀಡಯಂಶ್ಛರ್ದಿಮುದೀರಯೇತ್ತು| ಹೃತ್ಪಾರ್ಶ್ವಪೀಡಾಮುಖಶೋಷಮೂರ್ಧನಾಭ್ಯರ್ತಿಕಾಸಸ್ವರಭೇದತೋದೈಃ||೮|| ಉದ್ಗಾರಶಬ್ದಪ್ರಬಲಂ ಸಫೇನಂ ವಿಚ್ಛಿನ್ನಕೃಷ್ಣಂ ತನುಕಂ ಕಷಾಯಮ್| ಕೃಚ್ಛ್ರೇಣ ಚಾಲ್ಪಂ ಮಹತಾ ಚ ವೇಗೇನಾರ್ತೋಽನಿಲಾಚ್ಛರ್ದಯತೀಹ ದುಃಖಮ್||೯||

Adhikarana 7 (10-11) · Śloka 11

ಅಜೀರ್ಣಕಟ್ವಮ್ಲವಿದಾಹ್ಯಶೀತೈರಾಮಾಶಯೇ ಪಿತ್ತಮುದೀರ್ಣವೇಗಮ್| ರಸಾಯನೀಭಿರ್ವಿಸೃತಂ ಪ್ರಪೀಡ್ಯ ಮರ್ಮೋರ್ಧ್ವಮಾಗಮ್ಯ ವಮಿಂ ಕರೋತಿ||೧೦|| ಮೂರ್ಚ್ಛಾಪಿಪಾಸಾಮುಖಶೋಷಮೂರ್ಧತಾಲ್ವಕ್ಷಿಸನ್ತಾಪತಮೋಭ್ರಮಾರ್ತಃ| ಪೀತಂ ಭೃಶೋಷ್ಣಂ ಹರಿತಂ ಸತಿಕ್ತಂ ಧೂಮ್ರಂ ಚ ಪಿತ್ತೇನ ವಮೇತ್ ಸದಾಹಮ್||೧೧||

Adhikarana 8 (12-13) · Śloka 13

ಸ್ನಿಗ್ಧಾತಿಗುರ್ವಾಮವಿದಾಹಿಭೋಜ್ಯೈಃ ಸ್ವಪ್ನಾದಿಭಿಶ್ಚೈವ ಕಫೋಽತಿವೃದ್ಧಃ| ಉರಃ ಶಿರೋ ಮರ್ಮ ರಸಾಯನೀಶ್ಚ ಸರ್ವಾಃ ಸಮಾವೃತ್ಯ ವಮಿಂ ಕರೋತಿ||೧೨|| ತನ್ದ್ರಾಸ್ಯಮಾಧುರ್ಯಕಫಪ್ರಸೇಕಸನ್ತೋಷನಿದ್ರಾರುಚಿಗೌರವಾರ್ತಃ| ಸ್ನಿಗ್ಧಂ ಘನಂ ಸ್ವಾದು ಕಫಾದ್ವಿಶುದ್ಧಂ ಸಲೋಮಹರ್ಷೋಽಲ್ಪರುಜಂ ವಮೇತ್ತು||೧೩||

Adhikarana 9 (14-15) · Śloka 15

ಸಮಶ್ನತಃ ಸರ್ವರಸಾನ್ ಪ್ರಸಕ್ತಮಾಮಪ್ರದೋಷರ್ತುವಿಪರ್ಯಯೈಶ್ಚ| ಸರ್ವೇ ಪ್ರಕೋಪಂ ಯುಗಪತ್ ಪ್ರಪನ್ನಾಶ್ಛರ್ದಿಂ ತ್ರಿದೋಷಾಂ ಜನಯನ್ತಿ ದೋಷಾಃ||೧೪|| ಶೂಲಾವಿಪಾಕಾರುಚಿದಾಹತೃಷ್ಣಾಶ್ವಾಸಪ್ರಮೋಹಪ್ರಬಲಾ ಪ್ರಸಕ್ತಮ್| ಛರ್ದಿಸ್ತ್ರಿದೋಷಾಲ್ಲವಣಾಮ್ಲನೀಲಸಾನ್ದ್ರೋಷ್ಣರಕ್ತಂ ವಮತಾಂ ನೃಣಾಂ ಸ್ಯಾತ್||೧೫||

Adhikarana 10 (16-17) · Śloka 17

ವಿಟ್ಸ್ವೇದಮೂತ್ರಾಮ್ಬುವಹಾನಿ ವಾಯುಃ ಸ್ರೋತಾಂಸಿ ಸಂರುಧ್ಯ ಯದೋರ್ಧ್ವಮೇತಿ| ಉತ್ಸನ್ನದೋಷಸ್ಯ ಸಮಾಚಿತಂ ತಂ ದೋಷಂ ಸಮುದ್ಧೂಯ ನರಸ್ಯ ಕೋಷ್ಠಾತ್||೧೬|| ವಿಣ್ಮೂತ್ರಯೋಸ್ತತ್ ಸಮವರ್ಣಗನ್ಧಂ ತೃಟ್ಶ್ವಾಸಹಿಕ್ಕಾರ್ತಿಯುತಂ ಪ್ರಸಕ್ತಮ್| ಪ್ರಚ್ಛರ್ದಯೇದ್ದುಷ್ಟಮಿಹಾತಿವೇಗಾತ್ತಯಾಽರ್ದಿತಶ್ಚಾಶು ವಿನಾಶಮೇತಿ||೧೭||

Adhikarana 11 (18) · Śloka 18

ದ್ವಿಷ್ಟಪ್ರತೀಪಾಶುಚಿಪೂತ್ಯಮೇಧ್ಯಬೀಭತ್ಸಗನ್ಧಾಶನದರ್ಶನೈಶ್ಚ| ಯಚ್ಛರ್ದಯೇತ್ತಪ್ತಮನಾ ಮನೋಧ್ನೈರ್ದ್ವಿಷ್ಟಾರ್ಥಸಂಯೋಗಭವಾ ಮತಾ ಸಾ||೧೮||

Adhikarana 12 (19) · Śloka 19

ಕ್ಷೀಣಸ್ಯ ಯಾ ಛರ್ದಿರತಿಪ್ರವೃದ್ಧಾ ಸೋಪದ್ರವಾ ಶೋಣಿತಪೂಯಯುಕ್ತಾ| ಸಚನ್ದ್ರಿಕಾಂ ತಾಂ ಪ್ರವದನ್ತ್ಯಸಾಧ್ಯಾಂ ಸಾಧ್ಯಾಂ ಚಿಕಿತ್ಸೇದನುಪದ್ರವಾಂ ಚ||೧೯||

Adhikarana 13 (20-22) · Śloka 22

ಆಮಾಶಯೋತ್ಕ್ಲೇಶಭವಾ ಹಿ ಸರ್ವಾಶ್ಛರ್ದ್ಯೋ ಮತಾ ಲಙ್ಘನಮೇವ ತಸ್ಮಾತ್| ಪ್ರಾಕ್ಕಾರಯೇನ್ಮಾರುತಜಾಂ ವಿಮುಚ್ಯ ಸಂಶೋಧನಂ ವಾ ಕಫಪಿತ್ತಹಾರಿ||೨೦|| ಚೂರ್ಣಾನಿ ಲಿಹ್ಯಾನ್ಮಧುನಾಽಭಯಾನಾಂ ಹೃದ್ಯಾನಿ ವಾ ಯಾನಿ ವಿರೇಚನಾನಿ| ಮದ್ಯೈಃ ಪಯೋಭಿಶ್ಚ ಯುತಾನಿ ಯುಕ್ತ್ಯಾ ನಯನ್ತ್ಯಧೋ ದೋಷಮುದೀರ್ಣಮೂರ್ಧ್ವಮ್||೨೧|| ವಲ್ಲೀಫಲಾದ್ಯೈರ್ವಮನಂ ಪಿಬೇದ್ವಾ ಯೋ ದುರ್ಬಲಸ್ತಂ ಶಮನೈಶ್ಚಿಕಿತ್ಸೇತ್| ರಸೈರ್ಮನೋಜ್ಞೈರ್ಲಘುಭಿರ್ವಿಶುಷ್ಕೈರ್ಭಕ್ಷ್ಯೈಃ ಸಭೋಜ್ಯೈರ್ವಿವಿಧೈಶ್ಚ ಪಾನೈಃ||೨೨||

Adhikarana 14 (23-25) · Śloka 25

ಸುಸಂಸ್ಕೃತಾಸ್ತಿತ್ತಿರಿಬರ್ಹಿಲಾವರಸಾ ವ್ಯಪೋಹನ್ತ್ಯನಿಲಪ್ರವೃತ್ತಾಮ್| ಛರ್ದಿಂ ತಥಾ ಕೋಲಕುಲತ್ಥಧಾನ್ಯಬಿಲ್ವಾದಿಮೂಲಾಮ್ಲಯವೈಶ್ಚ ಯೂಷಃ||೨೩|| ವಾತಾತ್ಮಿಕಾಯಾಂ ಹೃದಯದ್ರವಾರ್ತೋ ನರಃ ಪಿಬೇತ್ ಸೈನ್ಧವವದ್ಧೃತಂ ತು| ಸಿದ್ಧಂ ತಥಾ ಧಾನ್ಯಕನಾಗರಾಭ್ಯಾಂ ದಧ್ನಾ ಚ ತೋಯೇನ ಚ ದಾಡಿಮಸ್ಯ||೨೪|| ವ್ಯೋಷೇಣ ಯುಕ್ತಾಂ ಲವಣೈಸ್ತ್ರಿಭಿಶ್ಚ ಘೃತಸ್ಯ ಮಾತ್ರಾಮಥವಾ ವಿದಧ್ಯಾತ್| ಸ್ನಿಗ್ಧಾನಿ ಹೃದ್ಯಾನಿ ಚ ಭೋಜನಾನಿ ರಸೈಃ ಸಯೂಷೈರ್ದಧಿದಾಡಿಮಾಮ್ಲೈಃ||೨೫||

Adhikarana 15 (26-33) · Śloka 33

ಪಿತ್ತಾತ್ಮಿಕಾಯಾಮನುಲೋಮನಾರ್ಥಂ ದ್ರಾಕ್ಷಾವಿದಾರೀಕ್ಷುರಸೈಸ್ತ್ರಿವೃತ್ ಸ್ಯಾತ್| ಕಫಾಶಯಸ್ಥಂ ತ್ವತಿಮಾತ್ರವೃದ್ಧಂ ಪಿತ್ತಂ ಹರೇತ್ ಸ್ವಾದುಭಿರೂರ್ಧ್ವಮೇವ||೨೬|| ಶುದ್ಧಾಯ ಕಾಲೇ ಮಧುಶರ್ಕರಾಭ್ಯಾಂ ಲಾಜೈಶ್ಚ ಮನ್ಥಂ ಯದಿ ವಾಽಪಿ ಪೇಯಾಮ್| ಪ್ರದಾಪಯೇನ್ಮುದ್ಗರಸೇನ ವಾಽಪಿ ಶಾಲ್ಯೋದನಂ ಜಾಙ್ಗಲಜೈ ರಸೈರ್ವಾ||೨೭|| ಸಿತೋಪಲಾಮಾಕ್ಷಿಕಪಿಪ್ಪಲೀಭಿಃ ಕುಲ್ಮಾಷಲಾಜಾಯವಸಕ್ತುಗೃಞ್ಜಾನ್| ಖರ್ಜೂರಮಾಂಸಾನ್ಯಥ ನಾರಿಕೇಲಂ ದ್ರಾಕ್ಷಾಮಥೋ ವಾ ಬದರಾಣಿ ಲಿಹ್ಯಾತ್||೨೮|| ಸ್ರೋತೋಜಲಾಜೋತ್ಪಲಕೋಲಮಜ್ಜಚೂರ್ಣಾನಿ ಲಿಹ್ಯಾನ್ಮಧುನಾಽಭಯಾಂ ಚ| ಕೋಲಾಸ್ಥಿಮಜ್ಜಾಞ್ಜನಮಕ್ಷಿಕಾವಿಡ್ಲಾಜಾಸಿತಾಮಾಗಧಿಕಾಕಣಾನ್ ವಾ||೨೯|| ದ್ರಾಕ್ಷಾರಸಂ ವಾಽಪಿ ಪಿಬೇತ್ ಸುಶೀತಂ ಮೃದ್ಭೃಷ್ಟಲೋಷ್ಟಪ್ರಭವಂ ಜಲಂ ವಾ| ಜಮ್ಬ್ವಾಮ್ರಯೋಃ ಪಲ್ಲವಜಂ ಕಷಾಯಂ ಪಿಬೇತ್ ಸುಶೀತಂ ಮಧುಸಂಯುತಂ ವಾ||೩೦|| ನಿಶಿ ಸ್ಥಿತಂ ವಾರಿ ಸಮುದ್ಗಕೃಷ್ಣಂ ಸೋಶೀರಧಾನ್ಯಂ ಚಣಕೋದಕಂ ವಾ| ಗವೇಧುಕಾಮೂಲಜಲಂ ಗುಡೂಚ್ಯಾ ಜಲಂ ಪಿಬೇದಿಕ್ಷುರಸಂ ಪಯೋ ವಾ||೩೧|| ಸೇವ್ಯಂ ಪಿಬೇತ್ ಕಾಞ್ಚನಗೈರಿಕಂ ವಾ ಸಬಾಲಕಂ ತಣ್ಡುಲಧಾವನೇನ| ಧಾತ್ರೀರಸೇನೋತ್ತಮಚನ್ದನಂ ವಾ ತೃಷ್ಣಾವಮಿಘ್ನಾನಿ ಸಮಾಕ್ಷಿಕಾಣಿ||೩೨|| ಕಲ್ಕಂ ತಥಾ ಚನ್ದನಚವ್ಯಮಾಂಸೀದ್ರಾಕ್ಷೋತ್ತಮಾಬಾಲಕಗೈರಿಕಾಣಾಮ್| ಶೀತಾಮ್ಬುನಾ ಗೈರಿಕಶಾಲಿಚೂರ್ಣಂ ಮೂರ್ವಾಂ ತಥಾ ತಣ್ಡುಲಧಾವನೇನ||೩೩||

Adhikarana 16 (34-39) · Śloka 39

ಕಫಾತ್ಮಿಕಾಯಾಂ ವಮನಂ ಪ್ರಶಸ್ತಂ ಸಪಿಪ್ಪಲೀಸರ್ಷಪನಿಮ್ಬತೋಯೈಃ| ಪಿಣ್ಡೀತಕೈಃ ಸೈನ್ಧವಸಮ್ಪ್ರಯುಕ್ತೈರ್ವಮ್ಯಾಂ ಕಫಾಮಾಶಯಶೋಧನಾರ್ಥಮ್||೩೪|| ಗೋಧೂಮಶಾಲೀನ್ ಸಯವಾನ್ ಪುರಾಣಾನ್ ಯೂಷೈಃ ಪಟೋಲಾಮೃತಚಿತ್ರಕಾಣಾಮ್| ವ್ಯೋಷಸ್ಯ ನಿಮ್ಬಸ್ಯ ಚ ತಕ್ರಸಿದ್ಧೈರ್ಯೂಷೈಃ ಫಲಾಮ್ಲೈಃ ಕಟುಭಿಸ್ತಥಾಽದ್ಯಾತ್||೩೫|| ರಸಾಂಶ್ಚ ಶೂಲ್ಯಾನಿ ಚ ಜಾಙ್ಗಲಾನಾಂ ಮಾಂಸಾನಿ ಜೀರ್ಣಾನ್ಮಧುಸೀಧ್ವರಿಷ್ಟಾನ್| ರಾಗಾಂಸ್ತಥಾ ಷಾಡವಪಾನಕಾನಿ ದ್ರಾಕ್ಷಾಕಪಿತ್ಥೈಃ ಫಲಪೂರಕೈಶ್ಚ||೩೬|| ಮುದ್ಗಾನ್ಮಸೂರಾಂಶ್ಚಣಕಾನ್ ಕಲಾಯಾನ್ ಭೃಷ್ಟಾನ್ ಯುತಾನ್ನಾಗರಮಾಕ್ಷಿಕಾಭ್ಯಾಮ್| ಲಿಹ್ಯಾತ್ತಥೈವ ತ್ರಿಫಲಾವಿಡಙ್ಗಚೂರ್ಣಂ ವಿಡಙ್ಗಪ್ಲವಯೋರಥೋ ವಾ||೩೭|| ಸಜಾಮ್ಬವಂ ವಾ ಬದರಾಮ್ಲಚೂರ್ಣಂ ಮುಸ್ತಾಯುತಾಂ ಕರ್ಕಟಕಸ್ಯ ಶೃಙ್ಗೀಮ್| ದುರಾಲಭಾಂ ವಾ ಮಧುಸಮ್ಪ್ರಯುಕ್ತಾಂ ಲಿಹ್ಯಾತ್ ಕಫಚ್ಛರ್ದಿವಿನಿಗ್ರಹಾರ್ಥಮ್||೩೮|| ಮನಃಶಿಲಾಯಾಃ ಫಲಪೂರಕಸ್ಯ ರಸೈಃ ಕಪಿತ್ಥಸ್ಯ ಚ ಪಿಪ್ಪಲೀನಾಮ್| ಕ್ಷೌದ್ರೇಣ ಚೂರ್ಣಂ ಮರಿಚೈಶ್ಚ ಯುಕ್ತಂ ಲಿಹಞ್ಜಯೇಚ್ಛರ್ದಿಮುದೀರ್ಣವೇಗಾಮ್||೩೯||

Adhikarana 17 (40) · Śloka 40

ಯೈಷಾ ಪೃಥಕ್ತ್ವೇನ ಮಯಾ ಕ್ರಿಯೋಕ್ತಾ ತಾಂ ಸನ್ನಿಪಾತೇಽಪಿ ಸಮಸ್ಯ ಬುದ್ಧ್ಯಾ| ದೋಷರ್ತುರೋಗಾಗ್ನಿಬಲಾನ್ಯವೇಕ್ಷ್ಯ ಪ್ರಯೋಜಯೇಚ್ಛಾಸ್ತ್ರವಿದಪ್ರಮತ್ತಃ||೪೦||

Adhikarana 18 (41-44) · Śloka 44

ಮನೋಭಿಘಾತೇ ತು ಮನೋನುಕೂಲಾ ವಾಚಃ ಸಮಾಶ್ವಾಸನಹರ್ಷಣಾನಿ| ಲೋಕಪ್ರಸಿದ್ಧಾಃ ಶ್ರುತಯೋ ವಯಸ್ಯಾಃ ಶೃಙ್ಗಾರಿಕಾಶ್ಚೈವ ಹಿತಾ ವಿಹಾರಾಃ||೪೧|| ಗನ್ಧಾ ವಿಚಿತ್ರಾ ಮನಸೋಽನುಕೂಲಾ ಮೃತ್ಪುಷ್ಪಶುಕ್ತಾಮ್ಲಫಲಾದಿಕಾನಾಮ್| ಶಾಕಾನಿ ಭೋಜ್ಯಾನ್ಯಥ ಪಾನಕಾನಿ ಸುಸಂಸ್ಕೃತಾಃ ಷಾಡವರಾಗಲೇಹಾಃ||೪೨|| ಯೂಷಾ ರಸಾಃ ಕಾಮ್ಬಲಿಕಾ ಖಡಾಶ್ಚ ಮಾಂಸಾನಿ ಧಾನಾ ವಿವಿಧಾಶ್ಚ ಭಕ್ಷ್ಯಾಃ| ಫಲಾನಿ ಮೂಲಾನಿ ಚ ಗನ್ಧವರ್ಣರಸೈರುಪೇತಾನಿ ವಮಿಂ ಜಯನ್ತಿ||೪೩|| ಗನ್ಧಂ ರಸಂ ಸ್ಪರ್ಶಮಥಾಪಿ ಶಬ್ದಂ ರೂಪಂ ಚ ಯದ್ಯತ್ ಪ್ರಿಯಮಪ್ಯಸಾತ್ಮ್ಯಮ್| ತದೇವ ದದ್ಯಾತ್ ಪ್ರಶಮಾಯ ತಸ್ಯಾಸ್ತಜ್ಜೋ ಹಿ ರೋಗಃ ಸುಖ ಏವ ಜೇತುಮ್||೪೪||

Adhikarana 19 (45) · Śloka 45

ಛರ್ದ್ಯುತ್ಥಿತಾನಾಂ ಚ ಚಿಕಿತ್ಸಿತಾತ್ ಸ್ವಾಚ್ಚಿಕಿತ್ಸಿತಂ ಕಾರ್ಯಮುಪದ್ರವಾಣಾಮ್| ಅತಿಪ್ರವೃತ್ತಾಸು ವಿರೇಚನಸ್ಯ ಕರ್ಮಾತಿಯೋಗೇ ವಿಹಿತಂ ವಿಧೇಯಮ್||೪೫||

Adhikarana 20 (46-47) · Śloka 47

ವಮಿಪ್ರಸಙ್ಗಾತ್ ಪವನೋಽಪ್ಯವಶ್ಯಂ ಧಾತುಕ್ಷಯಾದ್ಧೃದ್ಧಿಮುಪೈತಿ ತಸ್ಮಾತ್| ಚಿರಪ್ರವೃತ್ತಾಸ್ವನಿಲಾಪಹಾನಿ ಕಾರ್ಯಾಣ್ಯುಪಸ್ತಮ್ಭನಬೃಂಹಣಾನಿ||೪೬|| ಸರ್ಪಿರ್ಗುಡಾಃ ಕ್ಷೀರವಿಧಿರ್ಘೃತಾನಿ ಕಲ್ಯಾಣಕತ್ರ್ಯೂಷಣಜೀವನಾನಿ| ವೃಷ್ಯಾಸ್ತಥಾ ಮಾಂಸರಸಾಃ ಸಲೇಹಾಶ್ಚಿರಪ್ರಸಕ್ತಾಂ ಚ ವಮಿಂ ಜಯನ್ತಿ||೪೭||

Adhikarana 21 (48) · Śloka 48

ತತ್ರ ಶ್ಲೋಕಃ- ಹೇತುಂ ಸಙ್ಖ್ಯಾಂ ಲಕ್ಷಣಮುಪದ್ರವಾನ್ ಸಾಧ್ಯತಾಂ ನ ಯೋಗಾಂಶ್ಚ| ಛರ್ದೀನಾಂ ಪ್ರಶಮಾರ್ಥಂ ಪ್ರಾಹ ಚಿಕಿತ್ಸಿತಂ ಮುನಿವರ್ಯಃ||೪೮||

Adhikarana puShpikA · Śloka 20

ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇಽಪ್ರಾಪ್ತೇ ದೃಢಬಲಸಮ್ಪೂರಿತೇ ಚಿಕಿತ್ಸಾಸ್ಥಾನೇ ಛರ್ದಿಚಿಕಿತ್ಸಿತಂ ನಾಮ ವಿಂಶೋಽಧ್ಯಾಯಃ||೨೦||