৪০. বিদ্রধিনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শোথত্বসামান্যাত্ বিদ্রধিনিদানম্| তস্য সম্প্রাপ্তিমাহ– ত্বগ্রক্তমাংসমেদাংসীত্যাদি| ঘোরমিত্যন্যেভ্যোঽপি শোথসমুত্থানেভ্যো গ্রন্থ্যাদিভ্য আশুকারিত্বাদ্দারুণম্| উচ্ছ্রিতা ভৃশমিতি অত্যর্থং বৃদ্ধাঃ| অস্থিসমাশ্রিতা ইত্যনেন স্থানসংশ্রযোঽভিহিতঃ| উচ্ছ্রিতা ভৃশমিত্যনেন প্রকোপ আবিষ্কৃতঃ, এতেনৈবান্তরীযকতযা চযপ্রসরাবপ্যাক্ষিপ্তৌ মন্তব্যৌ| মহামূলমস্থ্যাদিসমাশ্রযণাদ্গম্ভীরমূলম্| রুজাবন্তমিতি উত্পত্তাবেব রুজাপ্রকর্ষবন্তম্, অতিশাযনে মতুপ্| বৃত্তমিত্যাদি বৃত্তং বর্তুলম্| আযতং দীর্ঘম্| বৃত্তাযতাভ্যাং গ্রন্থ্যাদিবিলক্ষণতা| বিদ্রধিরিতি খ্যাত ইতি, ইতিশব্দেন নিরুপাধিসঙ্কেতমাত্রা বিদ্রধিসঞ্জ্ঞেতি দর্শযতি| চরকে তু বিদাহপ্রকর্ষাদ্বিদ্রধিসঞ্জ্ঞা| যদুক্তম্– “স বৈ শীঘ্রবিদাহিত্বাদ্বিদ্রধীত্যভিধীযতে|” (চ. সূ. অ. ১৭) ইতি||১-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

শোথসামান্যাদ্বিদ্রধিনিদানম্| তস্য সম্প্রাপ্তিমাহ– ত্বগিত্যাদি| ঘোরমন্যেভ্যঃ শোথসমুত্থানেভ্যো গ্রন্থ্যাদিভ্যঃ আশুকারিত্বাদ্দারুণম্| উচ্ছ্রিতা ভৃশমিতি অত্যর্থং বৃদ্ধাঃ, অস্থিসমাশ্রিতা ইতি স্থানসংশ্রযোঽর্থোঽভিহিতঃ| উচ্ছ্রিতা ভৃশমিত্যনেন প্রকোপ আবিষ্কৃতঃ| মহামূলম্ অস্থ্যাদিসমাশ্রযণাদ্ গম্ভীরমূলম্| রুজাবন্তমুত্পত্তাবেব রুজাপ্রকর্ষবন্তম্| বৃত্তং বর্তুলং, আযতং দীর্ঘং বৃত্তত্বাযতত্বাভ্যাং গ্রন্থ্যাদিবিলক্ষণতা কথিতা, বিদ্রধিরিতি খ্যাত ইতি| ইতিশব্দেন নিরুপাধিসঙ্কেতমাত্রা বিদ্রধিরিতি সঞ্জ্ঞেতি দর্শযতি, চরকে তু বিদাহপ্রকর্ষাদ্বিদ্রধিসঞ্জ্ঞা| যদুক্তম্– “সর্বৈঃ শীঘ্রবিদাহিত্বাদ্বিদ্রধীতি নিরূপ্যতে|” ইতি| স ষট্প্রকারঃ; ত্রিভির্দোষৈস্ত্রযঃ, সন্নিপাতেনৈকঃ, ক্ষতেনৈকঃ, অসৃজাঽপ্যেক ইতি ষট্| ষণ্ণামপি লক্ষণং কথ্যতে||১-৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বাতিকমাহ– কৃষ্ণ ইত্যাদি| বিষমো ভৃশমিতি কদাচিদল্পঃ, কদাচিন্মহান্| চিত্রোত্থানপ্রপাক ইতি| চিত্রৌ নানাবিধৌ বাযোর্বিষমক্রিযত্বাত্ উদ্গমপ্রপাকৌ যস্য স তথা||৪||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকবিদ্রধিলক্ষণমাহ– কৃষ্ণ ইত্যাদি| বিষমো ভৃশমিতি কদাচিদল্পঃ, কদাচিন্মহান্, ভৃশমতিশযেন| চিত্রোত্থানপ্রপাক ইতি চিত্রৌ নানাবিধৌ বাযোর্বিষমক্রিযত্বাদুদ্গমপ্রপাকৌ যস্য স তথা||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পৈত্তিকমাহ– পক্বেত্যাদি| জ্বরদাহাবুত্থানকাল এব, পাককালে তু প্রকর্ষবন্তৌ তাবিতি বিশেষঃ||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

পৈত্তিকমাহ– পক্বেত্যাদি| পক্বোদুম্বরসদৃশঃ, শ্যাবঃ শ্যামবর্ণঃ, জ্বরদাহৌ উত্থানকাল এব স্যাতাং, পাককালে তু তাবেব প্রকর্ষবন্তৌ, ক্ষিপ্রমুত্থানপ্রপাকৌ যস্য স তথা||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কফজমাহ– শরাবেত্যাদি| শরাবসদৃশ ইতি মহত্ত্বসূচনপরম্||৬||

আতঙ্কদর্পণ ব্যাখ্যা (বাচস্পতি বৈদ্য কৃত)

শ্লেষ্মজমাহ– শরাবেত্যাদি| শরাবসদৃশ ইতি মহত্ত্বসূচনপরম্| চিরমুত্থানপ্রপাকৌ যস্য স তথা||৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পাকানন্তরং সম্ভূতাস্রাবলিঙ্গমাহ– তনুপীতসিতাশ্চৈষামিত্যাদি| ক্রমশ ইতি যথাক্রমং; তেন বাতেন তনুঃ, পিত্তেন পীতঃ, কফেন সিতঃ; তনুস্রাবে বাতানুরূপো বর্ণো জ্ঞেযঃ|৭|–

আতঙ্কদর্পণ ব্যাখ্যা (বাচস্পতি বৈদ্য কৃত)

তেষাং দোষভেদেন স্রাবানাহ– তন্বিত্যাদি| ক্রমশ ইতি ক্রমেণ; বাতেন তনুঃ, পিত্তেন পীতঃ, শ্লেষ্মণা সিতঃ, তনুস্রাবে বাতানুরূপো বর্ণো জ্ঞেযঃ|৭|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সন্নিপাতজমাহ– নানেত্যাদি| নানাবর্ণরুজাস্রাব ইতি নানাশব্দো বর্ণাদিভিঃ প্রত্যেকমভিসম্বধ্যতে; নানা বহুবিধা বর্ণাঃ কৃষ্ণপীতশুক্লবর্ণাঃ, রুজাঃ তোদদাহকণ্ড্বাদিকাঃ, তনুপীতসিতা আস্রাবাশ্চ যস্য স তথা| অন্যত্র শোথে পাককালে নানারুজা, অত্র তু সর্বদা| ঘাটাল ইতি ঘাটা অস্যাস্তি স ঘাটাল ইতি মত্বর্থীযো লচ্, অত্যুচ্ছ্রিতাগ্রত্বেন ঘাটাল ইব| বিষমোঽসাধ্যত্বাত্| বিষমং পচ্যতে ইতি চিরাচিরগম্ভীরোত্তানোর্ধ্বানূর্ধ্বভেদেন বিষমং যথা ভবতি তথা পচ্যত ইতি; বিষমম্ অসমম্| ননু, বিষমপাকিত্বং বাতিকে বিদ্রধাবুক্তং, তথাঽনুপক্রান্তে চ শোথে; যথা– “যোঽভ্যুত্থিতোঽল্পো যদি বা মহান্ স্যাত্ ক্রিযাং বিনা পাকমুপৈতি শোথঃ| বিশালমূলো বিষমো বিদগ্ধঃ স কৃচ্ছ্রতাং যাত্যবগাঢদোষঃ||” (সু. সূ. অ. ১৭) ইতি| অতঃ সংশযে কথং মিথো ভেদপ্রতীতিঃ? উচ্যতে– বাতিকে অপ্রতীকারেণৈব বিষমপাকিত্বম্, প্রতীকারেণৈব ভেদিতম্| ইহ পুনঃ প্রতীকারেঽপি বৈষম্যং; বাতিকে তু পাকমাত্রবৈষম্যং, ন তু গাম্ভীর্যাদিনা; অতো বাতিকঃ সাধ্যঃ||৭||–

আতঙ্কদর্পণ ব্যাখ্যা (বাচস্পতি বৈদ্য কৃত)

সান্নিপাতিকমাহ– নানেত্যাদি| নানা বহুবিধাঃ কৃষ্ণপীতশুক্লা বর্ণাঃ, তোদদাহকণ্ড্বাদিরুজাঃ, তনুপীতসিতাঃ স্রাবা যস্য স তথা| অন্যত্র শোথে পাককালে নানারুজাঃ, অত্র তু সর্বদা| ঘাটাল ইতি ঘাটা অস্যাস্তীতি ঘাটালঃ, মত্বর্থীযো লচ্, অত্যুচ্ছ্রিতাকৃতিত্বেন ঘাটাল ইব| বিষমোঽসাধ্যত্বাত্| বিষমং পচ্যত ইতি চিরাচিরগম্ভীরোত্তানোর্ধ্বানূর্ধ্বভেদেন বিষমং যথা ভবতি তথা পচ্যতে||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অভিঘাতজস্যাগন্তোঃ সম্প্রাপ্তিমাহ– তৈস্তৈরিত্যাদি| তৈস্তৈরিতি কাষ্ঠলোষ্টপাষাণাদিভিঃ| অভিহত ইতি অস্রুতরক্তস্য মথিতপিচ্চিতাদেরুপলক্ষণং, ক্ষত ইতি স্রুতরক্তস্য ছিন্নভিন্নাদেঃ; দ্বযোরভিহতযোরপথ্যকারিণ ইতি বিশেষণম্| ক্ষতোষ্মেতি ক্ষতশব্দস্য হিংসামাত্রপরিগ্রহাত্ ক্ষতাভিহতযোরপ্যূষ্মা ক্ষতোষ্মশব্দেনোচ্যতে| বাযুবিসৃত ইতি ক্ষতে রক্তক্ষযাত্ অভিহতে অভিঘাতাদেব বাতকোপঃ, কুপিতেন বাতেন হেতুভূতেন বিসৃতঃ প্রসৃতো বাযুবিসৃতঃ| যদ্যপ্যযং বাতপিত্তরক্তজস্তথাঽপি প্রাগভিঘাতসম্ভবত্বেনাগন্তুঃ, বাতপিত্তরক্তজানাং জনকত্বেনৈব বিলক্ষণাঽস্য সম্প্রাপ্তিঃ| পিত্তবিদ্রধিলক্ষণ ইতি অত্রোক্তজ্বরাদিব্যতিরিক্তসংস্থানবর্ণবেদনাদিপিত্তবিদ্রধিলিঙ্গযুক্ত ইত্যর্থঃ||৮-৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

অভিঘাতজস্যাগন্তোর্বিদ্রধেঃ সম্প্রাপ্তিমাহ– তৈস্তৈরিত্যাদি| কাষ্ঠলগুডপাষাণাদিভিঃ, অভিহিত ইতি অস্রুতরক্তস্য মথিতপিচ্চিতাদেরুপলক্ষণম্| দ্বযোরভিহতক্ষতযোরপথ্যকারিণ ইতি যোজ্যম্| ক্ষতোষ্মেত্যাদি ক্ষতস্য হিংসাত্বমাত্রপরিগ্রহাত্ ক্ষতাভিহতযোরপ্যূষ্মা ক্ষতোষ্মশব্দেনোচ্যতে| বাযুবিসৃত ইত্যাদি| বাতেন বিস্তারিতঃ ক্ষতেন রক্তক্ষযাত্, অভিহতে অভিঘাতাদেব বাতকোপঃ, কুপিতেন চ বাতেন হেতুভূতেন বিসৃতঃ প্রসৃতঃ রক্তং পিত্তং ঈরযেত্ কোপযেত্| যদ্যপ্যযং বাতপিত্তরক্তজস্তথাঽপি প্রাগভিঘাতসম্ভবত্বেনাগন্তুঃ| পিত্তবিদ্রধিলক্ষণ ইতি অত্র জ্বরদাহব্যতিরিক্তসংস্থানবর্ণবেদনাদিপিত্তলক্ষণ ইত্যর্থঃ||৮-৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

রক্তজমাহ– কৃষ্ণেত্যাদি| পিত্তবিদ্রধিলিঙ্গাতিদেশেন লব্ধাবপি দাহজ্বরৌ তীব্রতাবিশেষার্থমুক্তৌ| শ্যাব ইতি পিত্তবিদ্রধিলিঙ্গাতিদেশেন প্রসক্তস্য পক্বোদুম্বরসঙ্কাশস্যাপবাদঃ| ভোজপ্রভৃতযস্তু ধাতুরক্তজং বিদ্রধিং পরিত্যজ্য মক্কল্লসঞ্জ্ঞযাঽঽর্তবলক্ষণরক্তজং পঠন্তি| তেষাং মতে আর্তবজেন সহ ষড্বিদ্রধযঃ, সুশ্রুতে তু ধাতুরক্তজোঽপি তথা মক্কল্লসঞ্জ্ঞকোঽপি বিদ্রধিঃ সামান্যেন রক্তজ এবেতি ষড্বিদ্রধয ইতি বোদ্ধব্যম্||১০||–

আতঙ্কদর্পণ ব্যাখ্যা (বাচস্পতি বৈদ্য কৃত)

রক্তজবিদ্রধিমাহ– কৃষ্ণেত্যাদি| কৃষ্ণঃ কৃষ্ণবর্ণঃ, স্ফোটাবৃতঃ পিডকাযুক্তঃ, শ্যাবঃ শ্যাববর্ণঃ; অন্যে ‘কৃষ্ণস্ফোটাবৃতঃ’ ইতি পঠন্তি, তত্র কৃষ্ণৈঃ স্ফোটৈরাবৃতঃ পিত্তবিদ্রধিলক্ষণনির্দেশেন যদ্যপি দাহজ্বরৌ লব্ধৌ, তথাঽপ্যত্রাতিদাহজ্বরখ্যাপনার্থমুক্তম্| ভোজপ্রভৃতযস্তু ধাতুরক্তজং বিদ্রধিং পরিত্যজ্য মক্কল্লসঞ্জ্ঞমার্তবলক্ষণরক্তজং পঠন্তি| তেষাং মতে আর্তবজেন সহ ষড্ বিদ্রধযঃ, সুশ্রুতে তু ধাতুরক্তজোঽপি তথা মক্কল্লজোঽপি বিদ্রধিঃ সামান্যেন রক্তজ এবেতি ষড্ বিদ্রধয ইতি বোদ্ধব্যম্||১০||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অধিষ্ঠানবিশেষেণ লিঙ্গবিশেষং সাধ্যতামসাধ্যতাং চ প্রতিপাদযিতুমাভ্যন্তরবিদ্রধিমাহ– পৃথগিত্যাদি| ইযমধিকবিধানার্থমুক্তাঽপি সম্প্রাপ্তির্বিদ্রধেঃ পুনরুচ্যতে| আভ্যন্তরস্য রক্তজস্য তথাঽঽগন্তোশ্চ বিদ্রধের্দোষেণ ব্যপদেশাদিযমেব তত্রাপি সম্প্রাপ্তির্জ্ঞেযেতি কশ্চিত্| বাহ্যাগন্তুবদাভ্যন্তরাগন্তুসম্প্রাপ্তিরিত্যর্থঃ| ক্ষতজস্যাভ্যন্তরাভাবান্ন নির্দিষ্টঃ ক্ষতজ ইতি তু জেজ্জটঃ| গুল্মরূপিণমিতি গুল্মবত্ সংহতম্| এতদাভ্যন্তরবিদ্রধীনাং সামান্যরূপং; বিশেষলক্ষণং তু বাহ্যবিদ্রধিলক্ষণৈরেব জ্ঞেযম্| বল্মীকবত্ সমুন্নদ্ধং সমন্তাদুন্নতম্; এতদপি পচ্যমানাবস্থাযাং সর্বেষাং সমানম্| বস্তিমুখ ইতি বস্তিমুখ এব, বিদ্রধ্যাধারভূতমাংসাদিসম্ভবাত্; ন বস্তৌ, তস্য তনুত্বাত্| আটোপো রুজাপূর্বকক্ষোভঃ| মারুতকোপনমিতি মার্গাবরোধাদ্বাযোঃ কোপঃ| বৃক্কযোরিতি বৃক্কমগ্রমাংসম্| সর্বাঙ্গপ্রগ্রহঃ প্রত্যঙ্গব্যথা, সর্বসিরাধিষ্ঠানত্বাত্ হৃদযস্য| ক্লোম্নীতি ক্লোম বৃক্কাদূর্ধ্বং পিপাসাস্থানম্| পেপীযতে পযঃ ইতি পুনঃ পুনর্জলং পাতুমিচ্ছতীত্যর্থঃ||১১-১৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অধিষ্ঠানবিশেষেণ লিঙ্গবিশেষং সাধ্যাসাধ্যতাং চ জ্ঞাপযিতুমন্তরবিদ্রধীনাহ– পৃথগিত্যাদি| দোষা বাতাদযঃ, পৃথগ্ ভিন্নাঃ, সম্ভূয মিলিত্বা বা, অন্তর্মধ্যে, গুল্মরূপিণং গুল্মবত্সংহতং, বল্মীকবত্সমুন্নতং, বল্মীকং ভূমৌ কৃমিবিশেষৈঃ কৃতং, তদ্বত্সমন্তাত্ উন্নতম্| স্থানসংশ্রযমাহ– গুদ ইত্যাদি| বস্তিমুখ ইতি বস্তিমুখাশ্রিতমাংসাদৌ; ন চ বস্তৌ, তনুত্বাত্| কুক্ষৌ পার্শ্বযোরধোভাগে, বঙ্ক্ষণযোঃ ঊরুমেঢ্রসন্ধ্যোঃ| বৃক্কৌ মাংসপিণ্ডদ্বযম্, একো বামপার্শ্বে স্থিতঃ, দ্বিতীযো দক্ষিণপার্শ্বে স্থিতঃ, প্লীহা উদরস্য বামপার্শ্বে স্থিতঃ, যকৃত্ কালখণ্ডং দক্ষিণপার্শ্বস্থং, হৃদযং কমলমুকুলাকারমধোমুখং, ক্লোম কালখণ্ডাধস্তাত্ স্থিতং দক্ষিণপার্শ্বস্থং তিলকং প্রসিদ্ধম্| তেষামাভ্যন্তরাণাং বিদ্রধীনাং লিঙ্গানি বাহ্যবিদ্রধীনাং লিঙ্গানি বাহ্যবিদ্রধিলক্ষণৈরুক্তানি| প্রত্যেকং স্থানসংশ্রযত্বেন রূপমাহ– গুদ ইত্যাদি| গুদেনার্তে বিদ্রধৌ বাতনিরোধো ভবতি, তথা বস্তৌ কৃচ্ছ্রমূত্রতা অল্পমূত্রতা চ| তাভ্যাং হিক্কা তথা আটোপো রুজাপূর্বকঃ ক্ষোভঃ, কুক্ষৌ মারুতকোপনমিতি মার্গরোধাত্ বাযোঃ প্রকোপঃ, বঙ্ক্ষণোত্থে বিদ্রধৌ তীব্রঃ কটীপৃষ্ঠগ্রহো ভবতি বৃক্কযোরিত্যাদি| বৃক্কমগ্রমাংসং, পার্শ্বসঙ্কোচঃ পার্শ্বোত্পাটনমিব, প্লীহ্নি উচ্ছ্বাসাবরোধনং ভবতি| তথা হৃদীতি হৃদযোত্থে বিদ্রধৌ সর্বাঙ্গপ্রগ্রহাদয উপদ্রবা ভবন্তীত্যর্থঃ| তীব্রো দুঃসহঃ, সর্বেষামঙ্গানাং প্রকর্ষেণ গ্রহণমিব সর্বাঙ্গপ্রগ্রহঃ প্রত্যঙ্গব্যথা, সর্বাধিষ্ঠানত্বাত্ হৃদযস্য, যকৃতি জাতে বিদ্রধৌ শ্বাসস্তথা হিক্কা চ ভবতি| ক্লোম্নীত্যাদি| বৃক্কাদূর্ধ্বং পিপাসাস্থানং ক্লোম, পেপীযতে পয ইতি পুনঃপুনর্জলং পাতুমিচ্ছতি||১১-১৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্রাবনির্গমমার্গমাহ– নাভেরিত্যাদি| উপরিজা বৃক্কপ্লীহাদিজাঃ| যান্তি স্রবন্তি| নাভিজস্তূভযমার্গস্রাবী, ঊর্ধ্বাধঃস্রাবশ্চ তথাগতিত্বাত্ বাতস্য| যদাহ হারীতঃ– “ঊর্ধ্বং প্রভিন্নেষু মুখান্নরাণাং প্রবর্ততেঽসৃক্সহিতোঽপি পূযঃ| অধঃপ্রভিন্নেষু চ পাযুমার্গাত্, দ্বাভ্যাং প্রবৃত্তিস্ত্বিহ নাভিজেষু||” ইতি| ইতর ইতি নাভিবস্তিবঙ্ক্ষণজাঃ|১৭|–

আতঙ্কদর্পণ ব্যাখ্যা (বাচস্পতি বৈদ্য কৃত)

স্রাবনির্গমমাহ– নাভেরিত্যাদি| উপরিজাতাঃ বৃক্কপ্লীহাদিজাঃ পক্বাঃ সন্ত ঊর্ধ্বং যান্তি স্রবন্তি, নাভিজস্তূভযমার্গস্রাবী, ঊর্ধ্বাধঃস্রাবশ্চ তথা গতিত্বাদ্বাতস্য| তথা চ হারীতঃ– “ঊর্ধ্বং প্রভিন্নেষু মুখান্নরাণাং প্রবর্ততেঽসৃক্সহিতশ্চ পূযঃ| অধঃপ্রভিন্নেষু তু পাযুমার্গাদ্ দ্বাভ্যাং প্রবৃত্তিস্ত্বিহ নাভিজেষু||” ইতি| ইতরে নাভিবস্তিবঙ্ক্ষণজাঃ স্রবন্তি|১৭|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সাধ্যত্বাদিকমাহ– অধ ইত্যাদি| অধঃস্রুতেষ্বিতি স্বযমেব যদা নাভ্যাদিজা ভিন্না অধঃ স্রবন্তি তদা জীবতি| স্রুতেষূর্ধ্বং ন জীবতীতি ঊর্ধ্বং পূযস্যাসম্যঙ্নির্গমান্ন জীবনম্| হৃন্নাভিবস্তিবর্জ্যা ইতি প্লীহক্লোমাদিজাঃ| ভিন্নেষু বাহ্যত ইতি বৈদ্যব্যাপারেণ ভিন্নেষু; অন্যে মর্মাদ্যাশযজেষু স্বযমেব ভিন্নেষ্বিতি ব্যাচক্ষতে, অন্তর্ভিন্নেষ্বপ্যধঃস্রাবিষু জীবনোক্তেঃ| নেতরেষ্বিতি হৃন্নাভিবস্তিজেষু ভিন্নেষু তেষাং মর্মত্বাদ্ বাহ্যা আভ্যন্তরা বা বর্জ্যাঃ| কদাচনেতি পাকে অপাকে বা| তথা চ ভোজঃ– “অসাধ্যো মর্মজো জ্ঞেযঃ পক্বোঽপক্বশ্চ বিদ্রধিঃ| সন্নিপাতোত্থিতোঽপ্যেবং পক্ব এব তু বস্তিজঃ|| ত্বগ্জো নাভেরধো যশ্চ সাধ্যো মর্মসমীপজঃ| অপক্বশ্চৈব পক্বশ্চ সাধ্যো নোপরি নাভিজঃ||” ইতি| অত্র মর্মজশব্দেন হৃদযনাভিজাবুচ্যেতে| বদ্ধনিষ্যন্দমিতি বদ্ধমূত্রম্| এতদ্বস্তিজে প্রাযঃ||১৭-২০||

আতঙ্কদর্পণ ব্যাখ্যা (বাচস্পতি বৈদ্য কৃত)

স্রাববিষযসাধ্যাসাধ্যত্বমাহ– স্বযমেব যদা নাভ্যাদিজা ভিন্না অধঃ স্রবন্তীতি তদা জীবতি, স্রুতেষূর্ধ্বমিত্যাদি, ঊর্ধ্বস্রুতেষু ন জীবতি| ঊর্ধ্বপূযস্যাসম্যঙ্নির্গমান্ন জীবনম্|| হৃদিত্যাদি| ভিন্নেষু বাহ্যত ইতি বৈদ্যব্যাপারেণ ভিন্নেষু কদাচিদ্দৈববশাত্ পুরুষো জীবেত্| অন্যে মর্মাদ্যাশযজেষু স্বযমেব ভিন্নেষ্বিতি ব্যাচক্ষতে| অন্তর্ভিন্নেষ্বপ্যধঃস্রাবিষু জীবনোক্তেঃ| নেতরেষ্বিতি হৃন্নাভিবস্তিজেষু ভিন্নেষু, তেষাং মর্মত্বাত্ বাহ্যা আভ্যন্তরা বা বর্জ্যাঃ| কদাচনেতি পাকে অপাকে চ| তথাচ ভোজঃ– “অসাধ্যো মর্মজো জ্ঞেযঃ পক্বোঽপক্বশ্চ বিদ্রধিঃ| সন্নিপাতোত্থিতোঽপ্যেবং পক্ব এব তু বস্তিজঃ|| ত্বগ্জো নাভেরধো যশ্চ সাধ্যো মর্মসমীপজঃ| অপক্বশ্চৈব পক্বশ্চ সাধ্যো নোপরিনাভিজঃ||” ইতি| অত্র মর্মশব্দেন হৃদযনাভিজাবুচ্যেতে| সাধ্যাসাধ্যত্বমাহ– পঞ্চ ইতি| বাতিকপৈত্তিকশ্লৈষ্মিকাগন্তুরক্তজা ইতি| অযং বাহ্যেষু বিষযঃ ত্রিদোষজস্ত্বসাধ্যঃ| তেষাং বিষযমাহ– আমেতি| তেষাং বিদ্রধীনামাভ্যন্তরেষ্বসাধ্যত্বমাহ– আধ্মাতমিত্যাদি| বদ্ধনিষ্পন্দং বদ্ধমূত্রম্, এতদ্বস্তিজে প্রাযঃ| শেষং সুগমম্| অত্র কেচিত্ তন্ত্রান্তরোক্তং স্তনবিদ্রধিলক্ষণং পঠন্তি, তদ্যথা– “এবমেব স্তনসিরা বিকৃতাঃ প্রাপ্য যোষিতাম্| সূতানাং গর্ভিণীনাং চ সম্ভবেচ্ছ্বযথুর্ঘনঃ|| স্তনে সদুগ্ধে চাপ্তাসৃগ্বাহ্যবিদ্রধিলক্ষণঃ| নাডীনাং সূক্ষ্মরন্ধ্রত্বাত্স কন্যানাং ন জাযতে||১৭-২০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং বিদ্রধিনিদানং সমাপ্তম্||৪০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং বিদ্রধিনিদানম্||৪০||