অথ শ্লীপদনিদানম্ | যঃ সজ্বরো বঙ্ক্ষণজো ভৃশার্তিঃ শোথো নৃণাং পাদগতঃ ক্রমেণ | তচ্ছ্লীপদং স্যাত্ করকর্ণনেত্রশিশ্নৌষ্ঠনাসাস্বপি কেচিদাহুঃ ||১|| বাতজং কৃষ্ণরূক্ষং চ স্ফুটিতং তীব্রবেদনম্ | অনিমিত্তরুজং তস্য বহুশো জ্বর এব চ ||২|| পিত্তজং পীতসঙ্কাশং দাহজ্বরযুতং মৃদু | শ্লৈষ্মিকং স্নিগ্ধবর্ণং চ শ্বেতং পাণ্ডু গুরু স্থিরম্ ||৩||
View original
अथ श्लीपदनिदानम् | यः सज्वरो वङ्क्षणजो भृशार्तिः शोथो नृणां पादगतः क्रमेण | तच्छ्लीपदं स्यात् करकर्णनेत्रशिश्नौष्ठनासास्वपि केचिदाहुः ||१|| वातजं कृष्णरूक्षं च स्फुटितं तीव्रवेदनम् | अनिमित्तरुजं तस्य बहुशो ज्वर एव च ||२|| पित्तजं पीतसङ्काशं दाहज्वरयुतं मृदु | श्लैष्मिकं स्निग्धवर्णं च श्वेतं पाण्डु गुरु स्थिरम् ||३||
🔊 Audio coming soon
Show commentary
মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)
উত্সেধসাধর্ম্যাদর্বুদেন সহ কফসম্বন্ধাব্যভিচারসাম্যাচ্চাথ শ্লীপদনিদানম্| তস্য সম্প্রাপ্তিমাহ– য ইত্যাদি| বঙ্ক্ষণাবস্থানমেবাস্য পূর্বরূপম্| ক্রমেণেতি শনৈঃ শনৈঃ| তত্ শ্লীপদং স্যাদিত্যনেন নিরুপাধিরেবেযং সঞ্জ্ঞেতি দর্শযতি; অন্যে শিলাবত্ পদং শ্লীপদমিতি বদন্তি, নৈরুক্ত্যেন চ বিধিনা সাধুত্বম্| করকর্ণাদিগতশ্লীপদানাং যথোক্তসম্প্রাপ্ত্যভাবাত্ কেচিদাহুরিতি পরমতেনোক্তিঃ||১-৩||
আতঙ্কদর্পণ ব্যাখ্যা (বাচস্পতি বৈদ্য কৃত)
উত্সেধসাধর্ম্যাদর্বুদেন সহ কফসম্বন্ধাব্যভিচারসাধর্ম্যাচ্চ শ্লীপদনিদানম্| তস্য সম্প্রাপ্তিমাহ– য ইত্যাদি| বঙ্ক্ষণাদ্যবস্থানমেবাস্য পূর্বরূপম্| ক্রমেণেতি শনৈঃ| বঙ্ক্ষণমূরুমেঢ্রসন্ধিঃ, বঙ্ক্ষণস্থঃ শ্বযথুঃ ভৃশার্তিসহিতঃ চরণং গচ্ছতীত্যর্থঃ, তত্ শ্লীপদং স্যাদিত্যনেন পারিভাষিকী নিরুপাধিরেবেযং সঞ্জ্ঞেতি| অন্যে শিলাবত্ পদং শ্লীপদমিতি বদন্তি| কেচিদাহুরিতি পরমতেনোক্তিঃ| বাতজমাহ– অনিমিত্তমিত্যাদি| অকারণেনৈবং পীডা| বহুশো বারংবারং জ্বরঃ, শেষং সুগমম্| পিত্তজমাহ– পীতসঙ্কাশং পীতাবভাসং, মৃদু মৃদুস্পর্শম্| শ্লেষ্মজমাহ– স্নিগ্ধবর্ণমিতি| স্নিগ্ধবদ্বর্ণো যস্য, চিক্কণমিত্যর্থঃ| পাণ্ডু পীতশ্বেতম্||১-৩||