31. rēvatīpratiṣēdhādhyāyaḥ

Adhikarana 1 (1-2) · Śloka 2

ಅಥಾತೋ ರೇವತೀಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಅಶ್ವಗನ್ಧಾ ಚ ಶೃಙ್ಗೀ ಚ ಸಾರಿವಾ ಸಪುನರ್ನವಾ | ಸಹೇ ತಥಾ ವಿದಾರೀ ಚ ಕಷಾಯಾಃ ಸೇಚನೇ ಹಿತಾಃ ||೩||

Adhikarana 3 (4) · Śloka 4

ತೈಲಮಭ್ಯಞ್ಜನೇ ಕಾರ್ಯಂ ಕುಷ್ಠೇ ಸರ್ಜರಸೇಽಪಿ ಚ | ಪಲಙ್ಕಷಾಯಾಂ ನಲದೇ ತಥಾ ಗಿರಿಕದಮ್ಬಕೇ ||೪||

Adhikarana 4 (5) · Śloka 5

ಧವಾಶ್ವಕರ್ಣಕಕುಭಧಾತಕೀತಿನ್ದುಕೀಷು ಚ | ಕಾಕೋಲ್ಯಾದಿಗಣೇ ಚೈವ ಪಾನೀಯಂ ಸರ್ಪಿರಿಷ್ಯತೇ ||೫||

Adhikarana 5 (6-8) · Śloka 9

ಕುಲತ್ಥಾಃ ಶಙ್ಖಚೂರ್ಣಂ ಚ ಪ್ರದೇಹಃ ಸಾರ್ವಗನ್ಧಿಕಃ | ಗೃಧ್ರೋಲೂಕಪುರೀಷಾಣಿ ಯವಾ ಯವಫಲೋ ಘೃತಮ್ ||೬|| ಸನ್ಧ್ಯಯೋರುಭಯೋಃ ಕಾರ್ಯಮೇತದುದ್ಧೂಪನಂ ಶಿಶೋಃ | ವರುಣಾರಿಷ್ಟಕಮಯಂ ರುಚಕಂ ಸೈನ್ದುಕಂ ತಥಾ ||೭|| ಸತತಂ ಧಾರಯೇಚ್ಚಾಪಿ ಕೃತಂ ವಾ ಪೌತ್ರಜೀವಿಕಮ್ | ಶುಕ್ಲಾಃ ಸುಮನಸೋ ಲಾಜಾಃ ಪಯಃ ಶಾಲ್ಯೋದನಂ ತಥಾ ||೮|| ಬಲಿರ್ನಿವೇದ್ಯೋ ಗೋತೀರ್ಥೇ ರೇವತ್ಯೈ ಪ್ರಯತಾತ್ಮನಾ |೯|

Adhikarana 6 (9-11) · Śloka 11

ಸಙ್ಗಮೇ ಚ ಭಿಷಕ್ ಸ್ನಾನಂ ಕುರ್ಯಾದ್ಧಾತ್ರೀಕುಮಾರಯೋಃ ||೯|| ನಾನಾವಸ್ತ್ರಧರಾ ದೇವೀ ಚಿತ್ರಮಾಲ್ಯಾನುಲೇಪನಾ | ಚಲತ್ಕುಣ್ಡಲಿನೀ ಶ್ಯಾಮಾ ರೇವತೀ ತೇ ಪ್ರಸೀದತು ||೧೦|| ಉಪಾಸತೇ ಯಾಂ ಸತತಂ ದೇವ್ಯೋ ವಿವಿಧಭೂಷಣಾಃ | ಲಮ್ಬಾ ಕರಾಲಾ ವಿನತಾ ತಥೈವ ಬಹುಪುತ್ರಿಕಾ | ರೇವತೀ ಶುಷ್ಕನಾಮಾ ಯಾ ಸಾ ತೇ ದೇವೀ ಪ್ರಸೀದತು ||೧೧||

Adhikarana puShpikA · Śloka 31

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಕುಮಾರತನ್ತ್ರೇ ರೇವತೀಪ್ರತಿಷೇಧೋ ನಾಮ (ಪಞ್ಚಮೋಽಧ್ಯಾಯಃ, ಆದಿತಃ) ಏಕತ್ರಿಂಶೋಽಧ್ಯಾಯಃ ||೩೧||