29. skandāpasmārapratiṣēdhādhyāyaḥ

Adhikarana 1 (1-3) · Śloka 3

ಅಥಾತಃ ಸ್ಕನ್ದಾಪಸ್ಮಾರಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨|| ಬಿಲ್ವಃ ಶಿರೀಷೋ ಗೋಲೋಮೀ ಸುರಸಾದಿಶ್ಚ ಯೋ ಗಣಃ | ಪರಿಷೇಕೇ ಪ್ರಯೋಕ್ತವ್ಯಃ ಸ್ಕನ್ದಾಪಸ್ಮಾರಶಾನ್ತಯೇ ||೩||

Adhikarana 2 (4) · Śloka 5

ಸರ್ವಗನ್ಧವಿಪಕ್ವಂ ತು ತೈಲಮಭ್ಯಞ್ಜನೇ ಹಿತಮ್ | ಕ್ಷೀರವೃಕ್ಷಕಷಾಯೇ ಚ ಕಾಕೋಲ್ಯಾದೌ ಗಣೇ ತಥಾ ||೪|| ವಿಪಕ್ತವ್ಯಂ ಘೃತಂ ಚಾಪಿ ಪಾನೀಯಂ ಪಯಸಾ ಸಹ |೫|

Adhikarana 3 (5-6) · Śloka 6

ಉತ್ಸಾದನಂ ವಚಾಹಿಙ್ಗುಯುಕ್ತಂ ಸ್ಕನ್ದಗ್ರಹೇ ಹಿತಮ್ ||೫|| ಗೃಧ್ರೋಲೂಕಪುರೀಷಾಣಿ ಕೇಶಾ ಹಸ್ತಿನಖಾ ಘೃತಮ್ | ವೃಷಭಸ್ಯ ಚ ರೋಮಾಣಿ ಯೋಜ್ಯಾನ್ಯುದ್ಧೂಪನೇಽಪಿ ಚ ||೬||

Adhikarana 4 (7) · Śloka 7

ಅನನ್ತಾಂ ಕುಕ್ಕುಟೀಂ ಬಿಮ್ಬೀಂ ಮರ್ಕಟೀಂ ಚಾಪಿ ಧಾರಯೇತ್ |೭|

Adhikarana 5 (7) · Śloka 8

ಪಕ್ವಾಪಕ್ವಾನಿ ಮಾಂಸಾನಿ ಪ್ರಸನ್ನಾ ರುಧಿರಂ ಪಯಃ ||೭|| ಭೂತೌದನೋ ನಿವೇದ್ಯಶ್ಚ ಸ್ಕನ್ದಾಪಸ್ಮಾರಿಣೇಽವಟೇ |೮|

Adhikarana 6 (8) · Śloka 8

ಚತುಷ್ಪಥೇ ಚ ಕರ್ತವ್ಯಂ ಸ್ನಾನಮಸ್ಯ ಯತಾತ್ಮನಾ ||೮||

Adhikarana 7 (9) · Śloka 9

ಸ್ಕನ್ದಾಪಸ್ಮಾರಸಞ್ಜ್ಞೋ ಯಃ ಸ್ಕನ್ದಸ್ಯ ದಯಿತಃ ಸಖಾ | ವಿಶಾಖಸಞ್ಜ್ಞಶ್ಚ ಶಿಶೋಃ ಶಿವೋಽಸ್ತು ವಿಕೃತಾನನಃ ||೯||

Adhikarana puShpikA · Śloka 29

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಕುಮಾರತನ್ತ್ರೇ ಸ್ಕನ್ದಾಪಸ್ಮಾರಪ್ರತಿಷೇಧೋ ನಾಮ (ತೃತೀಯೋಽಧ್ಯಾಯಃ, ಆದಿತಃ) ಏಕೋನತ್ರಿಂಶೋಽಧ್ಯಾಯಃ ||೨೯||