55. udāvartapratiṣēdhādhyāyaḥ

Adhikarana 1 (1-2) · Śloka 2

ಅಥಾತ ಉದಾವರ್ತಪ್ರತಿಷೇಧಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಅಧಶ್ಚೋರ್ಧ್ವಂ ಚ ಭಾವಾನಾಂ ಪ್ರವೃತ್ತಾನಾಂ ಸ್ವಭಾವತಃ | ನ ವೇಗಾನ್ ಧಾರಯೇತ್ ಪ್ರಾಜ್ಞೋ ವಾತಾದೀನಾಂ ಜಿಜೀವಿಷುಃ ||೩||

Adhikarana 3 (4) · Śloka 4

ವಾತವಿಣ್ಮೂತ್ರಜೃಮ್ಭಾಶ್ರುಕ್ಷವೋದ್ಗಾರವಮೀನ್ದ್ರಿಯೈಃ | ವ್ಯಾಹನ್ಯಮಾನೈರುದಿತೈರುದಾವರ್ತೋ ನಿರುಚ್ಯತೇ ||೪||

Adhikarana 4 (5) · Śloka 5

ಕ್ಷುತ್ತೃಷ್ಣಾಶ್ವಾಸನಿದ್ರಾಣಾಮುದಾವರ್ತೋ ವಿಧಾರಣಾತ್ |೫|

Adhikarana 5 (5) · Śloka 5

ತಸ್ಯಾಭಿಧಾಸ್ಯೇ ವ್ಯಾಸೇನ ಲಕ್ಷಣಂ ಚ ಚಿಕಿತ್ಸಿತಮ್ ||೫||

Adhikarana 6 (6) · Śloka 6

ತ್ರಯೋದಶವಿಧಶ್ಚಾಸೌ ಭಿನ್ನ ಏತೈಸ್ತು ಕಾರಣೈಃ |೬|

Adhikarana 7 (6) · Śloka 6

ಅಪಥ್ಯಭೋಜನಾಚ್ಚಾಪಿ ವಕ್ಷ್ಯತೇ ಚ ತಥಾಽಪರಃ ||೬||

Adhikarana 8 (7) · Śloka 8

ಆಧ್ಮಾನಶೂಲೌ ಹೃದಯೋಪರೋಧಂ ಶಿರೋರುಜಂ ಶ್ವಾಸಮತೀವ ಹಿಕ್ಕಾಮ್ | ಕಾಸಪ್ರತಿಶ್ಯಾಯಗಲಗ್ರಹಾಂಶ್ಚ ಬಲಾಸಪಿತ್ತಪ್ರಸರಂ ಚ ಘೋರಮ್ ||೭|| ಕುರ್ಯಾದಪಾನೋಽಭಿಹತಃ ಸ್ವಮಾರ್ಗೇ ಹನ್ಯಾತ್ ಪುರೀಷಂ ಮುಖತಃ ಕ್ಷಿಪೇದ್ವಾ |೮|

Adhikarana 9 (8) · Śloka 9

ಆಟೋಪಶೂಲೌ ಪರಿಕರ್ತನಂ ಚ ಸಙ್ಗಃ ಪುರೀಷಸ್ಯ ತಥೋರ್ಧ್ವವಾತಃ ||೮|| ಪುರೀಷಮಾಸ್ಯಾದಪಿ ವಾ ನಿರೇತಿ ಪುರೀಷವೇಗೇಽಭಿಹತೇ ನರಸ್ಯ |೯|

Adhikarana 10 (9-10) · Śloka 10

ಮೂತ್ರಸ್ಯ ವೇಗೇಽಭಿಹತೇ ನರಸ್ತು ಕೃಚ್ಛ್ರೇಣ ಮೂತ್ರಂ ಕುರುತೇಽಲ್ಪಮಲ್ಪಮ್ ||೯|| ಮೇಢ್ರೇ ಗುದೇ ವಙ್ಕ್ಷಣಬಸ್ತಿಮುಷ್ಕನಾಭಿಪ್ರದೇಶೇಷ್ವಥವಾಽಪಿ ಮೂರ್ಧ್ನಿ | ಆನದ್ಧಬಸ್ತಿಶ್ಚ ಭವನ್ತಿ ತೀವ್ರಾಃ ಶೂಲಾಶ್ಚ ಶೂಲೈರಿವ ಭಿನ್ನಮೂರ್ತೇಃ ||೧೦||

Adhikarana 11 (11) · Śloka 11

ಮನ್ಯಾಗಲಸ್ತಮ್ಭಶಿರೋವಿಕಾರಾ ಜೃಮ್ಭೋಪಘಾತಾತ್ ಪವನಾತ್ಮಕಾಃ ಸ್ಯುಃ | ಶ್ರೋತ್ರಾನನಘ್ರಾಣವಿಲೋಚನೋತ್ಥಾ ಭವನ್ತಿ ತೀವ್ರಾಶ್ಚ ತಥಾ ವಿಕಾರಾಃ ||೧೧||

Adhikarana 12 (12) · Śloka 12

ಆನನ್ದಜಂ ಶೋಕಸಮುದ್ಭವಂ ವಾ ನೇತ್ರೋದಕಂ ಪ್ರಾಪ್ತಮಮುಞ್ಚತೋ ಹಿ | ಶಿರೋಗುರುತ್ವಂ ನಯನಾಮಯಾಶ್ಚ ಭವನ್ತಿ ತೀವ್ರಾಃ ಸಹ ಪೀನಸೇನ ||೧೨||

Adhikarana 13 (13) · Śloka 13

ಭವನ್ತಿ ಗಾಢಂ ಕ್ಷವಥೋರ್ವಿಘಾತಾಚ್ಛಿರೋಕ್ಷಿನಾಸಾಶ್ರವಣೇಷು ರೋಗಾಃ | ಕಣ್ಠಾಸ್ಯಪೂರ್ಣತ್ವಮತೀವ ತೋದಃ ಕೂಜಶ್ಚ ವಾಯೋರುತ ವಾಽಪ್ರವೃತ್ತಿಃ ||೧೩||

Adhikarana 14 (14) · Śloka 14

ಉದ್ಗಾರವೇಗೇಽಭಿಹತೇ ಭವನ್ತಿ ಘೋರಾ ವಿಕಾರಾಃ ಪವನಪ್ರಸೂತಾಃ |೧೪|

Adhikarana 15 (14) · Śloka 14

ಛರ್ದೇರ್ವಿಘಾತೇನ ಭವೇಚ್ಚ ಕುಷ್ಠಂ ಯೇನೈವ ದೋಷೇಣ ವಿದಗ್ಧಮನ್ನಮ್ ||೧೪||

Adhikarana 16 (15) · Śloka 15

ಮೂತ್ರಾಶಯೇ ಪಾಯುನಿ ಮುಷ್ಕಯೋಶ್ಚ ಶೋಫೋ ರುಜೋ ಮೂತ್ರವಿನಿಗ್ರಹಶ್ಚ | ಶುಕ್ರಾಶ್ಮರೀ ತತ್ಸ್ರವಣಂ ಭವೇದ್ವಾ ತೇ ತೇ ವಿಕಾರಾ ವಿಹತೇ ತು ಶುಕ್ರೇ ||೧೫||

Adhikarana 17 (16) · Śloka 16

ತನ್ದ್ರಾಙ್ಗಮರ್ದಾರುಚಿವಿಭ್ರಮಾಃ ಸ್ಯುಃ ಕ್ಷುಧೋಽಭಿಘಾತಾತ್ ಕೃಶತಾ ಚ ದೃಷ್ಟೇಃ |೧೬|

Adhikarana 18 (16) · Śloka 16

ಕಣ್ಠಾಸ್ಯಶೋಷಃ ಶ್ರವಣಾವರೋಧಸ್ತೃಷ್ಣಾಭಿಘಾತದ್ಧೃದಯೇ ವ್ಯಥಾ ಚ ||೧೬||

Adhikarana 19 (17) · Śloka 17

ಶ್ರಾನ್ತಸ್ಯ ನಿಃಶ್ವಾಸವಿನಿಗ್ರಹೇಣ ಹೃದ್ರೋಗಮೋಹಾವಥವಾಽಪಿ ಗುಲ್ಮಃ |೧೭|

Adhikarana 20 (17) · Śloka 17

ಜೃಮ್ಭಾಽಙ್ಗಮರ್ದೋಽಙ್ಗಶಿರೋಕ್ಷಿಜಾಡ್ಯಂ ನಿದ್ರಾಭಿಘಾತಾದಥವಾಽಪಿ ತನ್ದ್ರಾ ||೧೭||

Adhikarana 21 (18) · Śloka 18

ತೃಷ್ಣಾರ್ದಿತಂ ಪರಿಕ್ಲಿಷ್ಟಂ ಕ್ಷೀಣಂ ಶೂಲೈರಭಿದ್ರುತಮ್ | ಶಕೃದ್ವಮನ್ತಂ ಮತಿಮಾನುದಾವರ್ತಿನಮುತ್ಸೃಜೇತ್ ||೧೮||

Adhikarana 22 (19) · Śloka 20

ಸರ್ವೇಷ್ವೇತೇಷು ವಿಧಿವದುದಾವರ್ತೇಷು ಕೃತ್ಸ್ನಶಃ | ವಾಯೋಃ ಕ್ರಿಯಾ ವಿಧಾತವ್ಯಾಃ ಸ್ವಮಾರ್ಗಪ್ರತಿಪತ್ತಯೇ ||೧೯|| ಸಾಮಾನ್ಯತಃ ಪೃಥಕ್ತ್ವೇನ ಕ್ರಿಯಾಂ ಭೂಯೋ ನಿಬೋಧ ಮೇ |೨೦|

Adhikarana 23 (20) · Śloka 20

ಆಸ್ಥಾಪನಂ ಮಾರುತಜೇ ಸ್ನಿಗ್ಧಸ್ವಿನ್ನೇ ವಿಶಿಷ್ಯತೇ ||೨೦||

Adhikarana 24 (21) · Śloka 21

ಪುರೀಷಜೇ ತು ಕರ್ತವ್ಯೋ ವಿಧಿರಾನಾಹಿಕೋ ಭವೇತ್ |೨೧|

Adhikarana 25 (21-25) · Śloka 26

ಸೌವರ್ಚಲಾಢ್ಯಾಂ ಮದಿರಾಂ ಮೂತ್ರೇ ತ್ವಭಿಹತೇ ಪಿಬೇತ್ ||೨೧|| ಏಲಾಂ ವಾಽಪ್ಯಥ ಮದ್ಯೇನ ಕ್ಷೀರಂ ವಾಽಪಿ ಪಿಬೇನ್ನರಂ | ಧಾತ್ರೀಫಲಾನಾಂ ಸ್ವರಸಂ ಸಜಲಂ ವಾ ಪಿಬೇತ್ತ್ರ್ಯಹಮ್ ||೨೨|| ರಸಮಶ್ವಪುರೀಷಸ್ಯ ಗರ್ದಭಸ್ಯಾಥವಾ ಪಿಬೇತ್ | ಮಾಂಸೋಪದಂಶಂ ಮಧು ವಾ ಪಿಬೇದ್ವಾ ಸೀಧು ಗೌಡಿಕಮ್ ||೨೩|| ಭದ್ರದಾರು ಘನಂ ಮೂರ್ವಾ ಹರಿದ್ರಾ ಮಧುಕಂ ತಥಾ | ಕೋಲಪ್ರಮಾಣಾನಿ ಪಿಬೇದಾನ್ತರಿಕ್ಷೇಣ ವಾರಿಣಾ ||೨೪|| ದುಃಸ್ಪರ್ಶಾಸ್ವರಸಂ ವಾಽಪಿ ಕಷಾಯಂ ಕುಙ್ಕುಮಸ್ಯ ಚ | ಏರ್ವಾರುಬೀಜಂ ತೋಯೇನ ಪಿಬೇದ್ವಾಽಲವಣೀಕೃತಮ್ ||೨೫|| ಪಞ್ಚಮೂಲೀಶೃತಂ ಕ್ಷೀರಂ ದ್ರಾಕ್ಷಾರಸಮಥಾಪಿ ವಾ |೨೬|

Adhikarana 26 (26-27) · Śloka 27

ಯೋಗಾಂಶ್ಚ ವಿತರೇದತ್ರ ಪೂರ್ವೋಕ್ತಾನಶ್ಮರೀಭಿದಃ ||೨೬|| ಮೂತ್ರಕೃಚ್ಛ್ರಕ್ರಮಂ ಚಾಪಿ ಕುರ್ಯಾನ್ನಿರವಶೇಷತಃ | ಭೂಯೋ ವಕ್ಷ್ಯಾಮಿ ಯೋಗಾನ್ ಯಾನ್ ಮೂತ್ರಾಘಾತೋಪಶಾನ್ತಯೇ ||೨೭||

Adhikarana 27 (28) · Śloka 28

ಸ್ನೈಹೈಃ ಸ್ವೇದೈರುದಾವರ್ತಂ ಜೃಮ್ಭಾಜಂ ಸಮುಪಾಚರೇತ್ |೨೮|

Adhikarana 28 (28) · Śloka 28

ಅಶ್ರುಮೋಕ್ಷೋಽಶ್ರುಜೇ ಕಾರ್ಯಃ ಸ್ನಿಗ್ಧಸ್ವಿನ್ನಸ್ಯ ದೇಹಿನಃ ||೨೮||

Adhikarana 29 (29) · Śloka 29

ತೀಕ್ಷ್ಣಾಞ್ಜನಾವಪೀಡಾಭ್ಯಾಂ ತೀಕ್ಷ್ಣಗನ್ಧೋಪಶಿಙ್ಘನೈಃ | ವರ್ತಿಪ್ರಯೋಗೈರಥವಾ ಕ್ಷವಸಕ್ತಿಂ ಪ್ರವರ್ತಯೇತ್ ||೨೯|| (ತೀಕ್ಷ್ಣೌಷಧಪ್ರಧಮನೈರಥವಾಽಽದಿತ್ಯರಶ್ಮಿಭಿಃ||) |

Adhikarana 30 (30) · Śloka 31

ಉದ್ಗಾರಜೇ ಕ್ರಮೋಪೇತಂ ಸ್ನೈಹಿಕಂ ಧೂಮಮಾಚರೇತ್ ||೩೦|| ಸುರಾಂ ಸೌವರ್ಚಲವತೀಂ ಬೀಜಪೂರರಸಾನ್ವಿತಾಮ್ |೩೧|

Adhikarana 31 (31) · Śloka 32

ಛರ್ದ್ಯಾಘಾತಂ ಯಥಾದೋಷಂ ಸಮ್ಯಕ್ ಸ್ನೇಹಾದಿಭಿರ್ಜಯೇತ್ ||೩೧|| ಸಕ್ಷಾರಲವಣೋಪೇತಮಭ್ಯಙ್ಗಂ ಚಾತ್ರ ದಾಪಯೇತ್ |೩೨|

Adhikarana 32 (32-33) · Śloka 33

ಬಸ್ತಿಶುದ್ಧಿಕರಾವಾಪಂ ಚತುರ್ಗುಣಜಲಂ ಪಯಃ ||೩೨|| ಆವಾರಿನಾಶಾತ್ ಕ್ವಥಿತಂ ಪೀತವನ್ತಂ ಪ್ರಕಾಮತಃ | ರಮಯೇಯುಃ ಪ್ರಿಯಾ ನಾರ್ಯಃ ಶುಕ್ರೋದಾವರ್ತಿನಂ ನರಮ್ ||೩೩||

Adhikarana 33 (34) · Śloka 34

ಕ್ಷುದ್ವಿಘಾತೇ ಹಿತಂ ಸ್ನಿಗ್ಧಮುಷ್ಣಮಲ್ಪಂ ಚ ಭೋಜನಮ್ |೩೪|

Adhikarana 34 (34) · Śloka 34

ತೃಷ್ಣಾಘಾತೇ ಪಿಬೇನ್ಮನ್ಥಂ ಯವಾಗೂಂ ವಾಽಪಿ ಶೀತಲಾಮ್ ||೩೪||

Adhikarana 35 (35) · Śloka 35

ಭೋಜ್ಯೋ ರಸೇನ ವಿಶ್ರಾನ್ತಃ ಶ್ರಮಶ್ವಾಸಾತುರೋ ನರಃ |೩೫|

Adhikarana 36 (35) · Śloka 35

ನಿದ್ರಾಘಾತೇ ಪಿಬೇತ್ ಕ್ಷೀರಂ ಸ್ವಪ್ಯಾಚ್ಚೇಷ್ಟಕಥಾ ನರಃ ||೩೫||

Adhikarana 37 (36) · Śloka 36

ಆಧ್ಮಾನಾದ್ಯೇಷು ರೋಗೇಷು ಯಥಾಸ್ವಂ ಪ್ರಯತೇತ ಹಿ | ಯಚ್ಚ ಯತ್ರ ಭವೇತ್ಪ್ರಾಪ್ತಂ ತಚ್ಚ ತಸ್ಮಿನ್ ಪ್ರಯೋಜಯೇತ್ ||೩೬||

Adhikarana 38 (37-40) · Śloka 41

ವಾಯುಃ ಕೋಷ್ಠಾನುಗೋ ರೂಕ್ಷೈಃ ಕಷಾಯಕಟುತಿಕ್ತಕೈಃ | ಭೋಜನೈಃ ಕುಪಿತಃ ಸದ್ಯ ಉದಾವರ್ತಂ ಕರೋತಿ ಹಿ ||೩೭|| ವಾತಮೂತ್ರಪುರೀಷಾಸೃಕ್ಕಫಮೇದೋವಹಾನಿ ವೈ | ಸ್ರೋತಾಂಸ್ಯುದಾವರ್ತಯತಿ ಪುರೀಷಂ ಚಾತಿವರ್ತಯೇತ್ ||೩೮|| ತತೋ ಹೃದ್ಬಸ್ತಿಶೂಲಾರ್ತೋ ಗೌರವಾರುಚಿಪೀಡಿತಃ | ವಾತಮೂತ್ರಪುರೀಷಾಣಿ ಕೃಚ್ಛ್ರೇಣ ಕುರುತೇ ನರಃ ||೩೯|| ಶ್ವಾಸಕಾಸಪ್ರತಿಶ್ಯಾಯದಾಹಮೋಹವಮಿಜ್ವರಾನ್ | ತೃಷ್ಣಾಹಿಕ್ಕಾಶಿರೋರೋಗಮನಃಶ್ರವಣವಿಭ್ರಮಾನ್ ||೪೦|| ಲಭತೇ ಚ ಬಹೂನನ್ಯಾನ್ ವಿಕಾರಾನ್ ವಾತಕೋಪಜಾನ್ |೪೧|

Adhikarana 39 (41) · Śloka 42

ತಂ ತೈಲಲವಣಾಭ್ಯಕ್ತಂ ಸ್ನಿಗ್ಧಂ ಸ್ವಿನ್ನಂ ನಿರೂಹಯೇತ್ ||೪೧|| ದೋಷತೋ ಭಿನ್ನವರ್ಚಸ್ಕಂ ಭುಕ್ತಂ ಚಾಪ್ಯನುವಾಸಯೇತ್ |೪೨|

Adhikarana 40 (42) · Śloka 43

ನ ಚೇಚ್ಛಾನ್ತಿಂ ವ್ರಜತ್ಯೇವಮುದಾವರ್ತಃ ಸುದಾರುಣಃ ||೪೨|| ಅಥೈನಂ ಬಹುಶಃ ಸ್ವಿನ್ನಂ ಯುಞ್ಜ್ಯಾತ್ ಸ್ನೇಹವಿರೇಚನೈಃ |೪೩|

Adhikarana 41 (43-44) · Śloka 44

ಪಾಯಯೇತ ತ್ರಿವೃತ್ಪೀಲುಯವಾನೀರಮ್ಲಪಾಚನೈಃ ||೪೩|| ಹಿಙ್ಗುಕುಷ್ಠವಚಾಸ್ವರ್ಜಿವಿಡಙ್ಗಂ ವಾ ದ್ವಿರುತ್ತರಮ್ | ಯೋಗಾವೇತಾವುದಾವರ್ತಂ ಶೂಲಂ ಚಾನಿಲಜಂ ಹತಃ ||೪೪||

Adhikarana 42 (45) · Śloka 46

ದೇವದಾರ್ವಗ್ನಿಕೌ ಕುಷ್ಠಂ ಶುಣ್ಠೀಂ ಪಥ್ಯಾಂ ಪಲಙ್ಕಷಾಮ್ | ಪೌಷ್ಕರಾಣಿ ಚ ಮೂಲಾನಿ ತೋಯಸ್ಯರ್ಧಾಢಕೇ ಪಚೇತ್ ||೪೫|| ಪಾದಾವಶಿಷ್ಟಂ ತತ್ ಪೀತಮುದಾವರ್ತಮಪೋಹತಿ |೪೬|

Adhikarana 43 (46-47) · Śloka 47

ಮೂಲಕಂ ಶುಷ್ಕಮಾರ್ದ್ರಂ ಚ ವರ್ಷಾಭೂಃ ಪಞ್ಚಮೂಲಕಮ್ ||೪೬|| ಆರೇವತಫಲಂ ಚಾಪ್ಸು ಪಕ್ತ್ವಾ ತೇನ ಘೃತಂ ಪಚೇತ್ | ತತ್ ಪೀಯಮಾನಂ ಶಾಸ್ತ್ಯುಗ್ರಮುದಾವರ್ತಮಶೇಷತಃ ||೪೭||

Adhikarana 44 (48) · Śloka 48

ವಚಾಮತಿವಿಷಾಂ ಕುಷ್ಠಂ ಯವಕ್ಷಾರಂ ಹರೀತಕೀಮ್ | ಕೃಷ್ಣಾಂ ನಿರ್ದಹನೀಂ ಚಾಪಿ ಪಿಬೇದುಷ್ಣೇನ ವಾರಿಣಾ ||೪೮||

Adhikarana 45 (49) · Śloka 50

ಇಕ್ಷ್ವಾಕುಮೂಲಂ ಮದನಂ ವಿಶಲ್ಯಾತಿವಿಷೇ ವಚಾಮ್ | ಕುಷ್ಠಂ ಕಿಣ್ವಾಗ್ನಿಕೌ ಚೈವ ಪಿಬೇತ್ತುಲ್ಯಾನಿ ಪೂರ್ವವತ್ ||೪೯|| ಮೂತ್ರೇಣ ದೇವದಾರ್ವಗ್ನಿತ್ರಿಫಲಾಬೃಹತೀಃ ಪಿಬೇತ್ |೫೦|

Adhikarana 46 (50) · Śloka 51

ಯವಪ್ರಸ್ಥಂ ಫಲೈಃ ಸಾರ್ಧಂ ಕಣ್ಟಕಾರ್ಯಾ ಜಲಾಢಕೇ ||೫೦|| ಪಕ್ತ್ವಾಽರ್ಧಪ್ರಸ್ಥಶೇಷಂ ತು ಪಿಬೇದ್ಧಿಙ್ಗುಸಮನ್ವಿತಮ್ |೫೧|

Adhikarana 47 (51) · Śloka 52

ಮದನಾಲಾಬುಬೀಜಾನಿ ಪಿಪ್ಪಲೀಂ ಸನಿದಿಗ್ಧಿಕಾಮ್ ||೫೧|| ಸಞ್ಚೂರ್ಣ್ಯ ಪ್ರಧಮೇನ್ನಾಡ್ಯಾ ವಿಶತ್ಯೇತದ್ಯಥಾ ಗುದಮ್ |೫೨|

Adhikarana 48 (52-53) · Śloka 53

ಚೂರ್ಣಂ ನಿಕುಮ್ಭಕಮ್ಪಿಲ್ಲಶ್ಯಾಮೇಕ್ಷ್ವಾಕ್ವಗ್ನಿಕೋದ್ಭವಮ್ ||೫೨|| ಕೃತವೇಧನಮಾಗಧ್ಯೋರ್ಲವಣಾನಾಂ ಚ ಸಾಧಯೇತ್ | ಗವಾಂ ಮೂತ್ರೇಣ ತಾ ವರ್ತೀಃ ಕಾರಯೇತ್ತು ಗುದಾನುಗಾಃ | ಸದ್ಯಃ ಶರ್ಮಕರಾವೇತೌ ಯೋಗಾವಮೃತಸಮ್ಮತೌ ||೫೩||

Adhikarana puShpikA · Śloka 55

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಕಾಯಚಿಕಿತ್ಸಾತೇನ್ತ್ರೇ ಉದಾವರ್ತಪ್ರತಿಷೇಧೋ ನಾಮ (ಸಪ್ತದಶೋಽಧ್ಯಾಯಃ, ಆದಿತಃ) ಪಞ್ಚಪಞ್ಚಾಶತ್ತಮೋಽಧ್ಯಾಯಃ ||೫೫||