56. visūcikāpratiṣēdhādhyāyaḥ

Adhikarana 1 (1-2) · Śloka 2

ಅಥಾತೋ ವಿಸೂಚಿಕಾಪ್ರತಿಷೇಧಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಅಜೀರ್ಣಮಾಮಂ ವಿಷ್ಟಬ್ಧಂ ವಿದಗ್ಧಂ ಚ ಯದೀರಿತಮ್ | ವಿಸೂಚ್ಯಲಸಕೌ ತಸ್ಮಾದ್ಭವೇಚ್ಚಾಪಿ ವಿಲಮ್ಬಿಕಾ ||೩||

Adhikarana 3 (4) · Śloka 4

ಸೂಚೀಭಿರಿವ ಗಾತ್ರಾಣಿ ತುದನ್ ಸನ್ತಿಷ್ಠತೇಽನಿಲಃ | ಯಸ್ಯಾಜೀರ್ಣೇನ ಸಾ ವೈದ್ಯೈರುಚ್ಯತೇ ತಿ ವಿಸೂಚಿಕಾ ||೪||

Adhikarana 4 (5) · Śloka 5

ನ ತಾಂ ಪರಿಮಿತಾಹಾರಾ ಲಭನ್ತೇ ವಿದಿತಾಗಮಾಃ | ಮೂಢಾಸ್ತಾಮಜಿತಾತ್ಮಾನೋ ಲಭನ್ತೇ ಕಲುಷಾಶಯಾಃ ||೫||

Adhikarana 5 (6) · Śloka 6

ಮೂರ್ಚ್ಛಾತಿಸಾರೌ ವಮಥುಃ ಪಿಪಾಸಾ ಶೂಲಂ ಭ್ರಮೋದ್ವೇಷ್ಟನಜೃಮ್ಭದಾಹಾಃ | ವೈವರ್ಣ್ಯಕಮ್ಪೌ ಹೃದಯೇ ರುಜಶ್ಚ ಭವನ್ತಿ ತಸ್ಯಾಂ ಶಿರಸಶ್ಚ ಭೇದಃ ||೬||

Adhikarana 6 (7-8) · Śloka 8

ಕುಕ್ಷಿರಾನಹ್ಯತೇಽತ್ಯರ್ಥಂ ಪ್ರತಾಮ್ಯತಿ ವಿಕೂಜತಿ | ನಿರುದ್ಧೋ ಮಾರುತಶ್ಚಾಪಿ ಕುಕ್ಷೌ ವಿಪರಿಧಾವತಿ ||೭|| ವಾತವರ್ಚೋನಿರೋಧಶ್ಚ ಕುಕ್ಷೌ ಯಸ್ಯ ಭೃಶಂ ಭವೇತ್ | ತಸ್ಯಾಲಸಕಮಾಚಷ್ಟೇ ತೃಷ್ಣೋದ್ಗಾರಾವರೋಧಕೌ ||೮||

Adhikarana 7 (9) · Śloka 9

ದುಷ್ಟಂ ತು ಭುಕ್ತಂ ಕಫಮಾರುತಾಭ್ಯಾಂ ಪ್ರವರ್ತತೇ ನೋರ್ಧ್ವಮಧಶ್ಚ ಯಸ್ಯ | ವಿಲಮ್ಬಿಕಾಂ ತಾಂ ಭೃಶದುಶ್ಚಿಕಿತ್ಸ್ಯಾಮಾಚಕ್ಷತೇ ಶಾಸ್ತ್ರವಿದಃ ಪುರಾಣಾಃ ||೯||

Adhikarana 8 (10) · Śloka 10

ಯತ್ರಸ್ಥಮಾಮಂ ವಿರುಜೇತ್ತಮೇವ ದೇಶಂ ವಿಶೇಷೇಣ ವಿಕಾರಜಾತೈಃ | ದೋಷೇಣ ಯೇನಾವತತಂ ಸ್ವಲಿಙ್ಗೈಸ್ತಂ ಲಕ್ಷಯೇದಾಮಸಮುದ್ಭವೈಶ್ಚ ||೧೦||

Adhikarana 9 (11) · Śloka 11

ಯಃ ಶ್ಯಾವದನ್ತೌಷ್ಠನಖೋಽಲ್ಪಸಞ್ಜ್ಞಶ್ಛರ್ದ್ಯರ್ದಿತೋಽಭ್ಯನ್ತರಯಾತನೇತ್ರಃ | ಕ್ಷಾಮಸ್ವರಃ ಸರ್ವವಿಮುಕ್ತಸನ್ಧಿರ್ಯಾಯಾನ್ನರಃ ಸೋಽಪುನರಾಗಮಾಯ ||೧೧||

Adhikarana 10 (12) · Śloka 12

ಸಾಧ್ಯಾಸು ಪಾರ್ಷ್ಣ್ಯೋರ್ದಹನಂ ಪ್ರಶಸ್ತಮಗ್ನಿಪ್ರತಾಪೋ ವಮನಂ ಚ ತೀಕ್ಷ್ಣಮ್ | ಪಕ್ವೇ ತತೋಽನ್ನೇ ತು ವಿಲಙ್ಘನಂ ಸ್ಯಾತ್ ಸಮ್ಪಾಚನಂ ಚಾಪಿ ವಿರೇಚನಂ ಚ ||೧೨||

Adhikarana 11 (13) · Śloka 13

ವಿಶುದ್ಧದೇಹಸ್ಯ ಹಿ ಸದ್ಯ ಏವ ಮೂರ್ಚ್ಛಾತಿಸಾರಾದಿರುಪೈತಿ ಶಾನ್ತಿಮ್ |೧೩|

Adhikarana 12 (13) · Śloka 13

ಆಸ್ಥಾಪನಂ ಚಾಪಿ ವದನ್ತಿ ಪಥ್ಯಂ ಸರ್ವಾಸು ಯೋಗಾನಪರಾನ್ನಿಬೋಧ ||೧೩||

Adhikarana 13 (14) · Śloka 14

ಪಥ್ಯಾವಚಾಹಿಙ್ಗುಕಲಿಙ್ಗಗೃಞ್ಜಸೌವರ್ಚಲೈಃ ಸಾತಿವಿಷೈಶ್ಚ ಚೂರ್ಣಮ್ | ಸುಖಾಮ್ಬುಪೀತಂ ವಿನಿಹನ್ತ್ಯಜೀರ್ಣಂ ಶೂಲಂ ವಿಸೂಚೀಮರುಚಿಂ ಚ ಸದ್ಯಃ ||೧೪||

Adhikarana 14 (15-16) · Śloka 16

ಕ್ಷಾರಾಗದಂ ವಾ ಲವಣಂ ವಿಡಂ ವಾ ಗುಡಪ್ರಗಾಢಾನಥ ಸರ್ಷಪಾನ್ ವಾ | ಅಮ್ಲೇನ ವಾ ಸೈನ್ಧವಹಿಙ್ಗುಯುಕ್ತೌ ಸಬೀಜಪೂರ್ಣೌ ಸಘೃತೌ ತ್ರಿವರ್ಗೌ ||೧೫|| ಕಟುತ್ರಿಕಂ ವಾ ಲವಣೈರುಪೇತಂ ಪಿಬೇತ್ ಸ್ನುಹೀಕ್ಷೀರವಿಮಿಶ್ರಿತಂ ತು | ಕಲ್ಯಾಣಕಂ ವಾ ಲವಣಂ ಪಿಬೇತು ಯದುಕ್ತಮಾದಾವನಿಲಾಮಯೇಷು ||೧೬||

Adhikarana 15 (17) · Śloka 18

ಕೃಷ್ಣಾಜಮೋದಕ್ಷವಕಾಣಿ ವಾಽಪಿ ತುಲ್ಯೌ ಪಿಬೇದ್ವಾ ಮಗಧಾನಿಕುಮ್ಭೌ | ದನ್ತೀಯುತಂ ವಾ ಮಗಧೋದ್ಭವಾನಾಂ ಕಲ್ಕಂ ಪಿಬೇತ್ ಕೋಷವತೀರಸೇನ ||೧೭|| ಉಷ್ಣಾಭಿರದ್ಭಿರ್ಮಗಧೋದ್ಭವಾನಾಂ ಕಲ್ಕಂ ಪಿಬೇನ್ನಾಗರಕಲ್ಕಯುಕ್ತಮ್ |೧೮|

Adhikarana 16 (18) · Śloka 19

ವ್ಯೋಷಂ ಕರಞ್ಜಸ್ಯ ಫಲಂ ಹರಿದ್ರೇ ಮೂಲಂ ಸಮಂ ಚಾಪ್ಯಥ ಮಾತುಲುಙ್ಗ್ಯಾಃ ||೧೮|| ಛಾಯಾವಿಶುಷ್ಕಾ ಗುಟಿಕಾಃ ಕೃತಾಸ್ತಾ ಹನ್ಯುರ್ವಿಸೂಚೀಂ ನಯನಾಞ್ಜನೇನ |೧೯|

Adhikarana 17 (19) · Śloka 20

ಸುವಾಮಿತಂ ಸಾಧುವಿರೇಚಿತಂ ವಾ ಸುಲಙ್ಘಿತಂ ಮನುಜಂ ವಿದಿತ್ವಾ ||೧೯|| ಪೇಯಾದಿಭಿರ್ದೀಪನಪಾಚನೀಯೈಃ ಸಮ್ಯಕ್ಕ್ಷುಧಾರ್ತಂ ಸಮುಪಕ್ರಮೇತ |೨೦|

Adhikarana 18 (20) · Śloka 21

ಆಮಂ ಶಕೃದ್ವಾ ನಿಚಿತಂ ಕ್ರಮೇಣ ಭೂಯೋ ವಿಬದ್ಧಂ ವಿಗುಣಾನಿಲೇನ ||೨೦|| ಪ್ರವರ್ತಮಾನಂ ನ ಯಥಾಸ್ವಮೇನಂ ವಿಕಾರಮಾನಾಹಮುದಾಹರನ್ತಿ |೨೧|

Adhikarana 19 (21) · Śloka 22

ತಸ್ಮಿನ್ ಭವನ್ತ್ಯಾಮಸಮುದ್ಭವೇ ತು ತೃಷ್ಣಾಪ್ರತಿಶ್ಯಾಯಶಿರೋವಿದಾಹಾಃ ||೨೧|| ಆಮಾಶಯೇ ಶೂಲಮಥೋ ಗುರುತ್ವಂ ಹೃಲ್ಲಾಸ ಉದ್ಗಾರವಿಘಾತನಂ ಚ |೨೨|

Adhikarana 20 (22) · Śloka 23

ಸ್ತಮ್ಭಃ ಕಟೀಪೃಷ್ಠಪುರೀಷಮೂತ್ರೇ ಶೂಲೋಽಥ ಮೂರ್ಚ್ಛಾ ಸ ಶಕೃದ್ವಮೇಚ್ಚ ||೨೨|| ಶ್ವಾಸಶ್ಚ ಪಕ್ವಾಶಯಜೇ ಭವನ್ತಿ ಲಿಙ್ಗಾನಿ ಚಾತ್ರಾಲಸಕೋದ್ಭವಾನಿ |೨೩|

Adhikarana 21 (23) · Śloka 23

ಆಮೋದ್ಭವೇ ವಾನ್ತಮುಪಕ್ರಮೇತ ಸಂಸರ್ಗಭಕ್ತಕ್ರಮದೀಪನೀಯೈಃ ||೨೩||

Adhikarana 22 (24) · Śloka 24

ಅಥೇತರಂ ಯೋ ನ ಶಕೃದ್ವಮೇತ್ತಮಾಮಂ ಜಯೇತ್ ಸ್ವೇದನಪಾಚನೈಶ್ಚ |೨೪|

Adhikarana 23 (24-25) · Śloka 25

ವಿಸೂಚಿಕಾಯಾಂ ಪರಿಕೀರ್ತಿತಾನಿ ದ್ರವ್ಯಾಣಿ ವೈರೇಚನಿಕಾನಿ ಯಾನಿ ||೨೪|| ತಾನ್ಯೇವ ವರ್ತೀರ್ವಿರಚೇದ್ವಿಚೂರ್ಣ್ಯ ಮಹಿಷ್ಯಜಾವೀಭಗವಾಂ ತು ಮೂತ್ರೈಃ | ಸ್ವಿನ್ನಸ್ಯ ಪಾಯೌ ವಿನಿವೇಶ್ಯ ತಾಶ್ಚ ಚೂರ್ಣಾನಿ ಚೈಷಾಂ ಪ್ರಧಮೇತ್ತು ನಾಡ್ಯಾ ||೨೫||

Adhikarana 24 (26) · Śloka 27

ಮೂತ್ರೇಷು ಸಂಸಾಧ್ಯ ಯಥಾವಿಧಾನಂ ದ್ರವ್ಯಾಣಿ ಯಾನ್ಯೂರ್ಧ್ವಮಧಶ್ಚ ಯಾನ್ತಿ | ಕ್ವಾಥೇನ ತೇನಾಶು ನಿರುಹಯೇಚ್ಚ ಮೂತ್ರಾರ್ಧಯುಕ್ತೇನ ಸಮಾಕ್ಷಿಕೇಣ ||೨೬|| ತ್ರಿಭಣ್ಡಿಯುಕ್ತಂ ಲವಣಪ್ರಕುಞ್ಚಂ ದತ್ತ್ವಾ ವಿರಿಕ್ತಕ್ರಮಮಾಚರೇಚ್ಚ |೨೭|

Adhikarana 25 (27) · Śloka 27

ಏಷ್ವೇವ ತೈಲೇನ ಚ ಸಾಧಿತೇನ ಪ್ರಾಪ್ತಂ ಯದಿ ಸ್ಯಾದನುವಾಸಯೇಚ್ಚ ||೨೭||

Adhikarana puShpikA · Śloka 56

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಕಾಯಚಿಕಿತ್ಸಾತನ್ತ್ರೇ ವಿಸೂಚಿಕಾಪ್ರತಿಷೇಧೋ ನಾಮ (ಅಷ್ಟಾದಶೋಽಧ್ಯಾಯಃ, ಆದಿತಃ ) ಷಟ್ಪಞ್ಚಾಶತ್ತಮೋಽಧ್ಯಾಯಃ ||೫೬||