Skip to content
AYANAACADEMYby Dr Vijaya Dwarampudi
Open Academy navigation

51. amlapittanidānam

DevanagariIAST (Roman)TeluguTamilMalayalamKannadaGujaratiBengaliGurmukhi

Adhikarana amlapittasya nidānapūrvakaṁ svarūpam (1) · Śloka 1

athāmlapittanidānam | viruddhaduṣṭāmlavidāhipittaprakōpipānānnabhujō vidagdham | pittaṁ svahētūpacitaṁ purā yattadamlapittaṁ pravadanti santaḥ ||1||

View original

अथाम्लपित्तनिदानम् | विरुद्धदुष्टाम्लविदाहिपित्तप्रकोपिपानान्नभुजो विदग्धम् | पित्तं स्वहेतूपचितं पुरा यत्तदम्लपित्तं प्रवदन्ति सन्तः ||१||

🔊 Audio coming soon

Show commentary

madhukōśa vyākhyā (vijayarakṣita, śrīkaṇṭhadatta kr̥ta)

kōṭhahētau pittaślēṣmōllēkhāt pittaślēṣmamilanarūpasyāmlapittasya nidānam| nidānapūrvakamamlapittasya svarūpamāha– viruddhētyādi| viruddhaṁ kṣīramatsyādi, duṣṭaṁ vyāpannamannaṁ; vidāhisthānē vidagdhēti pāṭhāntarē vidagdhaṁ bharjitaṁ; pittaprakōpipānānnabhuja iti pittaprakōpi pānaṁ takrasurādi, annamāśudhānyamāṣādi; pittaprakōpipānānnagrahaṇēnaivāmlavidāhinō grahaṇē siddhē tadabhidhānaṁ viśēṣārthaṁ; ‘pittaprakōpaṇādyannabhuja’ iti pāṭhāntarē ādiśabdāt kaphādiprakōpaṇamannaṁ gr̥hyatē| ēvaṁvidhapānānnamupabhuñjānasya vidagdhaṁ kupitaṁ, svahētūpacitaṁ purā yaditi varṣāsu jalauṣadhigatavidāhādibhiḥ svahētubhirupacitaṁ sañcayamāpannam| yaduktam– “varṣāsvamlavipākitvādadbhirauṣadhibhistathā|” (ca. ci. a. 3) iti| vidāhādyamlaguṇōdriktaṁ pittamamlapittam||1||

ātaṅkadarpaṇa vyākhyā (vācaspati vaidya kr̥ta)

kōṭhahētau pittakaphōllēkhāt pittakaphamilitarūpasyāmlapittasyātō'nantaraṁ nidānam| tatra nidānapūrvakamamlapittasya svarūpamāha– viruddhētyādi| viruddhaṁ kṣīramatsyādi, duṣṭaṁ vyāpannamannam| vidāhisthānē ‘vidagdha’ iti pāṭhāntaraṁ, tatra vidagdhaṁ bharjitam| pittaprakōpipānānnabhuja iti pittaprakōpi pānaṁ takrasurādi, annamāśudhānyamāṣādi, ‘pittaprakōpaṇādyannabhujaḥ’ iti pāṭhāntarē ādiśabdāt kaphādiprakōpaṇamannaṁ gr̥hyatē, ēvaṁvidhapānānnaṁ bhuñjānasya vidagdhaṁ kupitaṁ, svahētūpacitaṁ purā yaditi varṣāsu jalauṣadhigatavidāhādibhirhētubhiḥ upacitaṁ sañcayamāpannaṁ, yaduktam– “varṣāsvamlavipākitvādadbhirōṣadhibhistathā” iti| pittaprakōpipānānnagrahaṇēnaivāmlavidāhinō grahaṇē siddhē tadabhidhānaṁ viśēṣārtham||1||

Adhikarana amlapittalakṣaṇam (2) · Śloka 2

avipākaklamōtklēśatiktāmlōdgāragauravaiḥ | hr̥tkaṇṭhadāhārucibhiścāmlapittaṁ vadēdbhiṣak ||2||

View original

अविपाकक्लमोत्क्लेशतिक्ताम्लोद्गारगौरवैः | हृत्कण्ठदाहारुचिभिश्चाम्लपित्तं वदेद्भिषक् ||२||

🔊 Audio coming soon

Show commentary

madhukōśa vyākhyā (vijayarakṣita, śrīkaṇṭhadatta kr̥ta)

tasya liṅgamāha– avipākētyādi| avipāka ityāhārāpākaḥ, klamō'nāyāsajaḥ śramaḥ| amlapittē pittaṁ pradhānaṁ, vātakaphāvapyatrānugau gauravōdgārakampādinā jñēyau||2||

ātaṅkadarpaṇa vyākhyā (vācaspati vaidya kr̥ta)

tasya liṅgamāha– avipākētyādi| avipākaḥ āhārāpākaḥ, klamō'nāyāsajaḥ śramaḥ, amlapittē pittaṁ pradhānaṁ, vātakaphāvapyatrānugau gauravōdgārakampādinā jñēyau||2||

Adhikarana adhōgatasyāmlapittasya lakṣaṇam (3) · Śloka 3

tr̥ḍdāhamūrchābhramamōhakāri prayātyadhō vā vividhaprakāram | hr̥llāsakōṭhānalasādaharṣasvēdāṅgapītatvakaraṁ kadācit ||3||

View original

तृड्दाहमूर्छाभ्रममोहकारि प्रयात्यधो वा विविधप्रकारम् | हृल्लासकोठानलसादहर्षस्वेदाङ्गपीतत्वकरं कदाचित् ||३||

🔊 Audio coming soon

Show commentary

madhukōśa vyākhyā (vijayarakṣita, śrīkaṇṭhadatta kr̥ta)

tasya kadācidadha-ūrdhvagamanabhēdāddvividhasyādhōgatiṁ tāvadāha– tr̥ḍdāhētyādi| mūrchā sarvathā jñānaśūnyatvaṁ, mōhō viparītajñānam| prayātyadhō vētyatra vāśabdō bhāvyūrdhvagamanāpēkṣayā| vividhaprakāramiti haritpītakr̥ṣṇaraktādibahuvarṇatvadurgandhitvayōgānnānāvidham| kadāciditi na sarvakālam||3||

ātaṅkadarpaṇa vyākhyā (vācaspati vaidya kr̥ta)

tasya kadācit kāyōrdhvādhōgamanabhēdādvividhasyādhōgatiṁ tāvadāha– tr̥ḍityādi| adhō vividhaprakāraṁ kadācitprayāti, tathā tr̥ḍdāhādikāri, tathā hr̥llāsādikaraṁ, mūrchā sarvathā jñānaśūnyatvaṁ, mōhō'tra viparītaṁ jñānam| prayātyadhō vētyatra vāśabdō bhāvyūrdhvagamanāpēkṣayā; vividhaprakāramiti haritapītakr̥ṣṇaraktādibahuvarṇatvadurgandhitvayōgānnānāvidham| kadāciditi na sarvakālam||3||

Adhikarana ūrdhvagasyāmlapittasya lakṣaṇam (4-6) · Śloka 6

vāntaṁ haritpītakanīlakr̥ṣṇamāraktaraktābhamatīva cāmlam | māṁsōdakābhaṁ tvatipicchilācchaṁ ślēṣmānujātaṁ vividhaṁ rasēna ||4|| bhuktē vidagdhē tvathavā'pyabhuktē karōti tiktāmlavamiṁ kadācit | udgāramēvaṁvidhamēva kaṇṭhahr̥tkukṣidāhaṁ śirasō rujaṁ ca ||5|| karacaraṇadāhamauṣṇyaṁ mahatīmaruciṁ jvaraṁ ca kaphapittam | janayati kaṇḍūmaṇḍalapiḍakāśatanicitagātrarōgacayam ||6||

View original

वान्तं हरित्पीतकनीलकृष्णमारक्तरक्ताभमतीव चाम्लम् | मांसोदकाभं त्वतिपिच्छिलाच्छं श्लेष्मानुजातं विविधं रसेन ||४|| भुक्ते विदग्धे त्वथवाऽप्यभुक्ते करोति तिक्ताम्लवमिं कदाचित् | उद्गारमेवंविधमेव कण्ठहृत्कुक्षिदाहं शिरसो रुजं च ||५|| करचरणदाहमौष्ण्यं महतीमरुचिं ज्वरं च कफपित्तम् | जनयति कण्डूमण्डलपिडकाशतनिचितगात्ररोगचयम् ||६||

🔊 Audio coming soon

Show commentary

madhukōśa vyākhyā (vijayarakṣita, śrīkaṇṭhadatta kr̥ta)

ūrdhvagatimāha– vāntamityādi| nīlaṁ snigdhakr̥ṣṇaṁ, kr̥ṣṇaṁ mardanāñjanavadrūkṣakr̥ṣṇam, āraktamīṣallōhitaṁ, raktamantarlōhitam| māṁsōdakābhamiti māṁsadhāvanatōyābhaṁ kr̥ṣṇalōhitamityarthaḥ| vividhaṁ rasēnēti rasēna lavaṇakaṭutiktākhyēna nānārūpam| karōti tiktāmlavamimiti tiktasya amlasya vā vamiṁ vāntiṁ karōti| udgāramēvaṁvidhamēvēti atra karōtīti sambadhyatē, ēvaṁvidhamiti amlatiktam| kaṇṭhahr̥tkukṣidāhaṁ śirasō rujaṁ cēti atrāpi karōtīti sambadhyatē| karacaraṇētyādi– kaṇḍūmaṇḍalapiḍakāśatanicitagātrarōgacayamiti kaṇḍvādinicitagātraṁ ca rōgacayaṁ cēti dvandvaḥ, tēna kaṇḍvādinicitagātraṁ rōgacayaṁ karōtītyarthaḥ; rōgacayō'vipākōtklēśādiḥ||4-6||

ātaṅkadarpaṇa vyākhyā (vācaspati vaidya kr̥ta)

ūrdhvagatimāha– vāntamityādi| harit śākapatrābham, nīlaṁ cāṣapakṣaprabhaṁ snigdhakr̥ṣṇaṁ, kr̥ṣṇam añjanābham, āraktam īṣallōhitaṁ, raktam atyantalōhitaṁ, māṁsōdakābhaṁ māṁsadhāvanatōyābham, acchaṁ nirmalam| vividhaṁ rasēna lavaṇakaṭutiktākhyēnānurūpaṁ karōti| āhārasyāvasthāmāha– bhukta ityādi| bhuktē āhārē vidagdhē athavā kadācidabhuktē'pi sati tiktāmlavamiṁ karōtīti sambadhyatē| amlapittē kaphapittavatsāmānyamāha– karētyādi| kaphapittaṁ karacaraṇadāhādikaṁ janayati, tathā kaṇḍūmaṇḍalapiḍakācitagātrarōganicayamiti kaṇḍvādinicitagātraṁ ca rōganicayaścēti dvandvaḥ| tēna kaṇḍvādinicitagātraṁ rōgacayaṁ karōtītyarthaḥ| rōgacayaḥ avipākōtklēśādiḥ||4-6||

Adhikarana amlapittasya sādhyatvādivicāraḥ (7) · Śloka 7

rōgō'yamamlapittākhyō yatnāt saṁsādhyatē navaḥ | cirōtthitō bhavēdyāpyaḥ, kr̥cchrasādhyaḥ sa kasyacit ||7||

View original

रोगोऽयमम्लपित्ताख्यो यत्नात् संसाध्यते नवः | चिरोत्थितो भवेद्याप्यः, कृच्छ्रसाध्यः स कस्यचित् ||७||

🔊 Audio coming soon

Show commentary

madhukōśa vyākhyā (vijayarakṣita, śrīkaṇṭhadatta kr̥ta)

sādhyatvādikamāha– rōga ityādi| kr̥cchrasādhyaḥ sa kasyaciditi ahitāhārācāraśīlinaḥ kasyaciccirōtthitō'pi kr̥cchrasādhyaḥ||7||

ātaṅkadarpaṇa vyākhyā (vācaspati vaidya kr̥ta)

sādhyatvādikamāha– rōga ityādi| ayamamlapittākhyō rōgō navaḥ san yatnātsaṁsādhyatē, cirōtthitō yāpyō bhavēt| kasyacidityādi| ahitāhārācāraśīlinaḥ kasyaciccirōtthitō'pi kr̥cchrasādhya ityarthaḥ||7||

Adhikarana amlapittē dōṣāntarasaṁsargaḥ, dōṣabhēdēnāmlapittalakṣaṇāni ca (8-12) · Śloka 12

sānilaṁ sānilakaphaṁ sakaphaṁ tacca lakṣayēt | dōṣaliṅgēna matimān bhiṣaṅmōhakaraṁ hi tat ||8|| kampapralāpamūrchācimicimigātrāvasādaśūlāni | tamasō darśanavibhramavimōhaharṣāṇyanilakōpāt ||9|| kaphaniṣṭhīvanagauravajaḍatāruciśītasādavamilēpāḥ | dahanabalasādakaṇḍūnidrāścihnaṁ kaphānugatē ||10|| ubhayamidamēva cihnaṁ mārutakaphasambhavē bhavatyamlē | tiktāmlakaṭukōdgārahr̥tkukṣikaṇṭhadāhakr̥t ||11|| bhramō mūrchāruciśchardirālasyaṁ ca śirōrujā | prasēkō mukhamādhuryaṁ ślēṣmapittasya lakṣaṇam ||12||

View original

सानिलं सानिलकफं सकफं तच्च लक्षयेत् | दोषलिङ्गेन मतिमान् भिषङ्मोहकरं हि तत् ||८|| कम्पप्रलापमूर्छाचिमिचिमिगात्रावसादशूलानि | तमसो दर्शनविभ्रमविमोहहर्षाण्यनिलकोपात् ||९|| कफनिष्ठीवनगौरवजडतारुचिशीतसादवमिलेपाः | दहनबलसादकण्डूनिद्राश्चिह्नं कफानुगते ||१०|| उभयमिदमेव चिह्नं मारुतकफसम्भवे भवत्यम्ले | तिक्ताम्लकटुकोद्गारहृत्कुक्षिकण्ठदाहकृत् ||११|| भ्रमो मूर्छारुचिश्छर्दिरालस्यं च शिरोरुजा | प्रसेको मुखमाधुर्यं श्लेष्मपित्तस्य लक्षणम् ||१२||

🔊 Audio coming soon

Show commentary

madhukōśa vyākhyā (vijayarakṣita, śrīkaṇṭhadatta kr̥ta)

tatraiva kēvalānilakaphānilakaphamātrāṇāṁ saṁsargamāha– sānilamityādi| bhiṣaṅmōhakaramiti tasyōrdhvādhaḥpravartamānatvēna chardyatīsārābhyāṁ sakāśādbhēdasya durjñēyatvāt vaidyamōhakaratvam| kaphētyādi– sādavamilēpā ityatra sādō'ṅgasādaḥ, lēpaḥ ślēṣmaliptāsyatā| dahanabalasādēti sādaśabdō dahanabalābhyāṁ sambadhyatē||8-12||

ātaṅkadarpaṇa vyākhyā (vācaspati vaidya kr̥ta)

tasminnanilakaphasaṁsargamāha– sānilamityādi| taccāmlapittaṁ sānilaṁ savātaṁ, sānilakaphaṁ savātakaphaṁ lakṣayēt| dōṣaliṅgēna vātapittakaphaliṅgēnētyarthaḥ| yatastadbhiṣaṅmōhakaraṁ vaidyabhrāntijanakaṁ, tasyōrdhvādhaḥpravartamānatvēna chardyatīsārābhyāṁ bhēdasya durjñēyatvāt| sānilasyāmlapittasya lakṣaṇamāha– kampētyādi| vātayutē'mlē kampādayastathā tamōdarśanādayō bhavanti| kaphānugatasya lakṣaṇamāha– kaphētyādi| kaphānugatē'mlē kaphaniṣṭhīvanādiliṅgaṁ syāt| sādavamilēpā iti sādaḥ aṅgasādaḥ, lēpaḥ kaphaliptāsyatā| dahanabalasādēti sādaśabdō dahanabalābhyāṁ sambandhyatē, anyatsugamam||8-12||

Adhikarana puṣpikā · Śloka 51

iti śrīmādhavakaraviracitē mādhavanidānē'mlapittanidānaṁ samāptam ||51||

View original

इति श्रीमाधवकरविरचिते माधवनिदानेऽम्लपित्तनिदानं समाप्तम् ||५१||

🔊 Audio coming soon

Show commentary

madhukōśa vyākhyā (vijayarakṣita, śrīkaṇṭhadatta kr̥ta)

iti śrīkaṇṭhadattakr̥tāyāṁ madhukōśavyākhyāyāmlapittanidānaṁ samāptam||51||

ātaṅkadarpaṇa vyākhyā (vācaspati vaidya kr̥ta)

iti śrīvācaspativaidyaviracitāyāṁ mādhavanidānavyākhyāyāmātaṅkadarpaṇākhyāyāmamlapittanidānam||51||

← 50. śītapittōdardakōṭhanidānam52. visarpanidānam →