అథ దాహనిదానం| త్వచం ప్రాప్తః స పానోష్మా పిత్తరక్తాభిమూర్ఛితః | దాహం ప్రకురుతే ఘోరం పిత్తవత్తత్ర భేషజం ||1||
View original
अथ दाहनिदानम्| त्वचं प्राप्तः स पानोष्मा पित्तरक्ताभिमूर्छितः | दाहं प्रकुरुते घोरं पित्तवत्तत्र भेषजम् ||१||
🔊 Audio coming soon
Show commentary
మధుకోశ వ్యాఖ్యా (విజయరక్షిత, శ్రీకంఠదత్త కృత)
మదాత్యయేऽపి దాహో భవత్యతః సప్తప్రకారం దాహమాహ; తత్ర మద్యజమాహ– త్వచమిత్యాది| పానోష్మా పా.| మద్యపానకుపితపిత్తస్యౌష్ణ్యం; సమానోష్మేతి పాఠాంతరమయుక్తం, సుశ్రుతే పానాత్యయే శ్లోకస్యాస్య పాఠాత్| పిత్తజోऽప్యయం హేతుభేదాత్ పృథక్ పఠితః||1||
ఆతంకదర్పణ వ్యాఖ్యా (వాచస్పతి వైద్య కృత)
మదాత్యయే దాహో భవతీత్యతో మదాత్యయానంతరం దాహనిదానారంభః| మద్యజదాహమాహ– త్వచమిత్యాది| పానోష్మా మద్యపానకుపితపిత్తోష్మా, స త్వచం ప్రాప్తో ఘోరం దాహం ప్రకర్షేణ కురుత ఇత్యర్థః| కీదృశః పిత్తరక్తాభ్యామభివర్ధితః| అన్యే ‘సమానోష్మా’ ఇతి పాఠాంతరం పఠంతి| తన్న యుక్తం, సుశ్రుతే పానాత్యయే శ్లోకస్యాస్య పాఠాత్| పిత్తజోऽప్యయం హేతుభేదాత్పృథక్ పఠితః||1||