62. yōnivyāpannidānam

Adhikarana yoniroganidAnam (1) · Śloka 1

अथ योनिव्यापन्निदानम् | विंशतिर्व्यापदो योनौ निर्दिष्टा रोगसङ्ग्रहे | मिथ्याचारेण ताः स्त्रीणां प्रदुष्टेनार्तवेन च ||१|| जायन्ते बीजदोषाच्च दैवाच्च शृणु ताः पृथक् | (च. चि. अ. ३०) |

Adhikarana vAtikayonirogANAM lakShaNam (2-4) · Śloka 4

सा फेनिलमुदावर्ता रजः कृच्छ्रेण मुञ्चति ||२|| वन्ध्यां नष्टार्तवां विद्याद्विप्लुतां नित्यवेदनाम् | परिप्लुतायां भवति ग्राम्यधर्मेण रुग्भृशम् ||३|| वातला कर्कशा स्तब्धा शूलनिस्तोदपीडिता | चतसृष्वपि चाद्यासु भवन्त्यनिलवेदनाः ||४|| (सु. उ. तं. अ. ३८) |

Adhikarana paittikayonirogANAM lakShaNam (5-7) · Śloka 7

सदाहं क्षीयते रक्तं यस्यां सा लोहितक्षया | सवातमुद्गिरेद्बीजं वामिनी रजसा युतम् ||५|| प्रस्रंसिनी स्रंसते च क्षोभिता दुष्प्रजायिनी | स्थितं स्थितं हन्ति गर्भं पुत्रघ्नी रक्तसङ्क्षयात् ||६|| अत्यर्थं पित्तला योनिर्दाहपाकज्वरान्विता | चतसृष्वपि चाद्यासु पित्तलिङ्गोच्छ्रयो भवेत् ||७|| (सु. उ. तं. अ. ३८) |

Adhikarana shlaiShmikayonirogANAM lakShaNam (8-10) · Śloka 10

अत्यानन्दा न सन्तोषं ग्राम्यधर्मेण गच्छति | कर्णिन्यां कर्णिका योनौ श्लेष्मासृग्भ्यां प्रजायते ||८|| मैथुनेऽचरणा पूर्वं पुरुषादतिरिच्यते | बहुशश्चातिचरणा तयोर्बीजं न विन्दति ||९|| श्लेष्मला पिच्छिला योनिः कण्डूग्रस्ताऽतिशीतला | चतसृष्वपि चाद्यासु श्लेष्मलिङ्गोच्छ्रयो भवेत् ||१०|| (सु. उ. तं. अ. ३८) |

Adhikarana sAnnipAtikayonirogANAM lakShaNam (11-13) · Śloka 13

अनार्तवाऽस्तनी षण्डी खरस्पर्शा च मैथुने | अतिकायगृहीतायास्तरुण्यास्त्वण्डली भवेत् ||११|| विवृता च महायोनिः सूचीवक्त्राऽतिसंवृता | सर्वलिङ्गसमुत्थाना सर्वदोषप्रकोपजा ||१२|| चतसृष्वपि चाद्यासु सर्वलिङ्गोच्छ्रयो भवेत् | पञ्चासाध्या भवन्तीह योनयः सर्वदोषजाः ||१३|| (सु. उ. तं. अ. ३८) |

Adhikarana puShpikA · Śloka 62

इति श्रीमाधवकरविरचिते माधवनिदाने योनिव्यापन्निदानं समाप्तम् ||६२||