9. yōgyāsūtrīyādhyāyaḥ

Adhikarana 1 (1-2) · Śloka 2

અથાતો યોગ્યાસૂત્રીયમધ્યાયં વ્યાખ્યાસ્યામઃ ||૧|| યથોવાચ ભગવાન્ ધન્વન્તરિઃ ||૨||

Adhikarana 2 (3) · Śloka 3

અધિગતસર્વશાસ્ત્રાર્થમપિ શિષ્યં યોગ્યાં કારયેત્ | સ્નેહાદિષુ છેદ્યાદિષુ ચ કર્મપથમુપદિશેત્ | સુબહુશ્રુતોઽપ્યકૃતયોગ્યઃ કર્મસ્વયોગ્યો ભવતિ ||૩||

Adhikarana 3 (4) · Śloka 4

તત્ર, પુષ્પફલાલાબૂકાલિન્દકત્રપુસૈ(સો)ર્વારુકર્કારુકપ્રભૃતિષુ છેદ્યવિશેષાન્ દર્શયેત્, ઉત્કર્તનાપકર્તનાનિ ચોપદિશેત્; દૃતિબસ્તિપ્રસેવકપ્રભૃતિષૂદકપઙ્કપૂર્ણેષુ ભેદ્યયોગ્યાં; સરોમ્ણિ ચર્મણ્યાતતે લેખ્યસ્ય; મૃતપશુસિરાસૂત્પલનાલેષુ ચ વેધ્યસ્ય; ઘુણોપહતકાષ્ઠવેણુનલનાલીશુષ્કાલાબૂમુખેષ્વેષ્યસ્ય; પનસબિમ્બીબિલ્વફલમજ્જમૃતપશુદન્તેષ્વાહાર્યસ્ય; મધૂચ્છિષ્ટોપલિપ્તે શાલ્મલીફલકે વિસ્રાવ્યસ્ય; સૂક્ષ્મઘનવસ્ત્રાન્તયોર્મૃદુચર્માન્તયોશ્ચ સીવ્યસ્ય; પુસ્તમયપુરુષાઙ્ગપ્રત્યઙ્ગવિશેષેષુ બન્ધનયોગ્યાં; મૃદુષુ માંસખણ્ડેષ્વગ્નિક્ષારયોગ્યાં; મૃદુચર્મમાંસપેશીષૂત્પલનાલેષુ ચ કર્ણસન્ધિબન્ધયોગ્યામ્; ઉદકપૂર્ણઘટપાર્શ્વસ્રોતસ્યલાબૂમુખાદિષુ ચ નેત્રપ્રણિધાનબસ્તિવ્રણબસ્તિપીડનયોગ્યામિતિ ||૪||

Adhikarana 4 (5) · Śloka 5

ભવતશ્ચાત્ર- એવમાદિષુ મેધાવી યોગ્યાર્હેષુ યથાવિધિ | દ્રવ્યેષુ યોગ્યાં કુર્વાણો ન પ્રમુહ્યતિ કર્મસુ ||૫||

Adhikarana 5 (6) · Śloka 6

તસ્માત્ કૌશલમન્વિચ્છન્ શસ્ત્રક્ષારાગ્નિકર્મસુ | યસ્ય યત્રેહ સાધર્મ્યં તત્ર યોગ્યાં સમાચરેત્ ||૬||

Adhikarana puShpikA · Śloka 9

ઇતિ સુશ્રુતસંહિતાયાં સૂત્રસ્થાને યોગ્યાસૂત્રીયો નામ નવમોઽધ્યાયઃ ||૯||