1. kalpanāsiddhiḥ

Adhikarana 1 (1-2) · Śloka 2

ಅಥಾತಃ ಕಲ್ಪನಾಸಿದ್ಧಿಂ ವ್ಯಾಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||

Adhikarana 2 (3-5) · Śloka 6

ಕಾ ಕಲ್ಪನಾ ಪಞ್ಚಸು ಕರ್ಮಸೂಕ್ತಾ, ಕ್ರಮಶ್ಚ ಕಃ, ಕಿಂ ಚ ಕೃತಾಕೃತೇಷು| ಲಿಡ್ಗಂ ತಥೈವಾತಿಕೃತೇಷು, ಸಙ್ಖ್ಯಾ ಕಾ, ಕಿಙ್ಗುಣಃ, ಕೇಷು ಚ ಕಶ್ಚ ಬಸ್ತಿಃ||೩|| ಕಿಂ ವರ್ಜನೀಯಂ ಪ್ರತಿಕರ್ಮಕಾಲೇ, ಕೃತೇ ಕಿಯಾನ್ ವಾ ಪರಿಹಾರಕಾಲಃ| ಪ್ರಣೀಯಮಾನಶ್ಚ ನ ಯಾತಿ ಕೇನ, ಕೇನೈತಿ ಶೀಘ್ರಂ, ಸುಚಿರಾಚ್ಚ ಬಸ್ತಿಃ||೪|| ಸಾಧ್ಯಾ ಗದಾಃ ಸ್ವೈಃ ಶಮನೈಶ್ಚ ಕೇಚಿತ್ ಕಸ್ಮಾತ್ ಪ್ರಯುಕ್ತೈರ್ನ ಶಮಂ ವ್ರಜನ್ತಿ| ಪ್ರಚೋದಿತಃ ಶಿಷ್ಯವರೇಣ ಸಮ್ಯಗಿತ್ಯಗ್ನಿವೇಶೇನ ಭಿಷಗ್ವರಿಷ್ಠಃ||೫|| ಪುನರ್ವಸುಸ್ತನ್ತ್ರವಿದಾಹ ತಸ್ಮೈ ಸರ್ವಪ್ರಜಾನಾಂ ಹಿತಕಾಮ್ಯಯೇದಮ್|೬|

Adhikarana 3 (6) · Śloka 7

ತ್ರ್ಯಹಾವರಂ ಸಪ್ತದಿನಂ ಪರಂ ತು ಸ್ನಿಗ್ಧೋ ನರಃ ಸ್ವೇದಯಿತವ್ಯ ಉಕ್ತಃ ||೬|| ನಾತಃ ಪರಂ ಸ್ನೇಹನಮಾದಿಶನ್ತಿ ಸಾತ್ಮ್ಯೀಭವೇತ್ ಸಪ್ತದಿನಾತ್ ಪರಂ ತು|೭|

Adhikarana 4 (7) · Śloka 7

ಸ್ನೇಹೋಽನಿಲಂ ಹನ್ತಿ ಮೃದೂಕರೋತಿ ದೇಹಂ ಮಲಾನಾಂ ವಿನಿಹನ್ತಿ ಸಙ್ಗಮ್||೭||

Adhikarana 5 (8) · Śloka 8

ಸ್ನಿಗ್ಧಸ್ಯ ಸೂಕ್ಷ್ಮೇಷ್ವಯನೇಷು ಲೀನಂ ಸ್ವೇದಸ್ತು ದೋಷಂ ನಯತಿ ದ್ರವತ್ವಮ್|೮|

Adhikarana 6 (8) · Śloka 9

ಗ್ರಾಮ್ಯೌದಕಾನೂಪರಸೈಃ ಸಮಾಂಸೈರುತ್ಕ್ಲೇಶನೀಯಃ ಪಯಸಾ ಚ ವಮ್ಯಃ||೮|| ರಸೈಸ್ತಥಾ ಜಾಙ್ಗಲಜೈಃ ಸಯೂಷೈಃ ಸ್ನಿಗ್ಧೈಃ ಕಫಾವೃದ್ಧಿಕರೈರ್ವಿರೇಚ್ಯಃ|೯|

Adhikarana 7 (9) · Śloka 10

ಶ್ಲೇಷ್ಮೋತ್ತರಶ್ಛರ್ದಯತಿ ಹ್ಯದುಃಖಂ ವಿರಿಚ್ಯತೇ ಮನ್ದಕಫಸ್ತು ಸಮ್ಯಕ್||೯|| ಅಧಃ ಕಫೇಽಲ್ಪೇ ವಮನಂ ವಿರೇಚಯೇದ್ವಿರೇಚನಂ ವೃದ್ಧಕಫೇ ತಥೋರ್ಧ್ವಮ್|೧೦|

Adhikarana 8 (10) · Śloka 11

ಸ್ನಿಗ್ಧಾಯ ದೇಯಂ ವಮನಂ ಯಥೋಕ್ತಂ ವಾನ್ತಸ್ಯ ಪೇಯಾದಿರನುಕ್ರಮಶ್ಚ||೧೦|| ಸ್ನಿಗ್ಧಸ್ಯ ಸುಸ್ವಿನ್ನತನೋರ್ಯಥಾವದ್ವಿರೇಚನಂ ಯೋಗ್ಯತಮಂ ಪ್ರಯೋಜ್ಯಮ್ |೧೧|

Adhikarana 9 (11) · Śloka 12

ಪೇಯಾಂ ವಿಲೇಪೀಮಕೃತಂ ಕೃತಂ ಚ ಯೂಷಂ ರಸಂ ತ್ರಿರ್ದ್ವಿರಥೈಕಶಶ್ಚ||೧೧|| ಕ್ರಮೇಣ ಸೇವೇತ ವಿಶುದ್ಧಕಾಯಃ ಪ್ರಧಾನಮಧ್ಯಾವರಶುದ್ಧಿಶುದ್ಧಃ|೧೨|

Adhikarana 10 (12) · Śloka 13

ಯಥಾಽಣುರಗ್ನಿಸ್ತೃಣಗೋಮಯಾದ್ಯೈಃ ಸನ್ಧುಕ್ಷ್ಯಮಾಣೋ ಭವತಿ ಕ್ರಮೇಣ||೧೨|| ಮಹಾನ್ ಸ್ಥಿರಃ ಸರ್ವಪಚಸ್ತಥೈವ ಶುದ್ಧಸ್ಯ ಪೇಯಾದಿಭಿರನ್ತರಗ್ನಿಃ|೧೩|

Adhikarana 11 (13-14) · Śloka 15

ಜಘನ್ಯಮಧ್ಯಪ್ರವರೇ ತು ವೇಗಾಶ್ಚತ್ವಾರ ಇಷ್ಟಾ ವಮನೇ ಷಡಷ್ಟೌ||೧೩|| ದಶೈವ ತೇ ದ್ವಿತ್ರಿಗುಣಾ ವಿರೇಕೇ ಪ್ರಸ್ಥಸ್ತಥಾ ದ್ವಿತ್ರಿಚತುರ್ಗುಣಶ್ಚ| ಪಿತ್ತಾನ್ತಮಿಷ್ಟಂ ವಮನಂ ವಿರೇಕಾದರ್ಧಂ ಕಫಾನ್ತಂ ಚ ವಿರೇಕಮಾಹುಃ||೧೪|| ದ್ವಿತ್ರಾನ್ ಸವಿಟ್ಕಾನಪನೀಯ ವೇಗಾನ್ಮೇಯಂ ವಿರೇಕೇ ವಮನೇ ತು ಪೀತಮ್|೧೫|

Adhikarana 12 (15) · Śloka 16

ಕ್ರಮಾತ್ ಕಫಃ ಪಿತ್ತಮಥಾನಿಲಶ್ಚ ಯಸ್ಯೈತಿ ಸಮ್ಯಗ್ವಮಿತಃ ಸ ಇಷ್ಟಃ||೧೫|| ಹೃತ್ಪಾರ್ಶ್ವಮೂರ್ಧೇನ್ದ್ರಿಯಮಾರ್ಗಶುದ್ಧೌ ತಥಾ ಲಘುತ್ವೇಽಪಿ ಚ ಲಕ್ಷ್ಯಮಾಣೇ|೧೬|

Adhikarana 13 (16) · Śloka 16

ದುಶ್ಛರ್ದಿತೇ ಸ್ಫೋಟಕಕೋಠಕಣ್ಡೂಹೃತ್ಖಾವಿಶುದ್ಧಿರ್ಗುರುಗಾತ್ರತಾಂ ಚ||೧೬||

Adhikarana 14 (17) · Śloka 17

ತೃಣ್ಮೋಹಮೂರ್ಚ್ಛಾನಿಲಕೋಪನಿದ್ರಾಬಲಾದಿಹಾನಿರ್ವಮನೇಽತಿ ಚ ಸ್ಯಾತ್|೧೭|

Adhikarana 15 (17) · Śloka 18

ಸ್ರೋತೋವಿಶುದ್ಧೀನ್ದ್ರಿಯಸಮ್ಪ್ರಸಾದೌ ಲಘುತ್ವಮೂರ್ಜೋಽಗ್ನಿರನಾಮಯತ್ವಮ್||೧೭|| ಪ್ರಾಪ್ತಿಶ್ಚ ವಿಟ್ಪಿತ್ತಕಫಾನಿಲಾನಾಂ ಸಮ್ಯಗ್ವಿರಿಕ್ತಸ್ಯ ಭವೇತ್ ಕ್ರಮೇಣ|೧೮|

Adhikarana 16 (18) · Śloka 19

ಸ್ಯಾಚ್ಛ್ಲೇಷ್ಮಪಿತ್ತಾನಿಲಸಮ್ಪ್ರಕೋಪಃ ಸಾದಸ್ತಥಾಽಗ್ನೇರ್ಗುರುತಾ ಪ್ರತಿಶ್ಯಾ||೧೮|| ತನ್ದ್ರಾ ತಥಾ ಚ್ಛರ್ದಿರರೋಚಕಶ್ಚ ವಾತಾನುಲೋಮ್ಯಂ ನ ಚ ದುರ್ವಿರಿಕ್ತೇ|೧೯|

Adhikarana 17 (19) · Śloka 20

ಕಫಾಸ್ರಪಿತ್ತಕ್ಷಯಜಾನಿಲೋತ್ಥಾಃ ಸುಪ್ತ್ಯಙ್ಗಮರ್ದಕ್ಲಮವೇಪನಾದ್ಯಾಃ||೧೯|| ನಿದ್ರಾಬಲಾಭಾವತಮಃಪ್ರವೇಶಾಃ ಸೋನ್ಮಾದಹಿಕ್ಕಾಶ್ಚ ವಿರೇಚಿತೇಽತಿ|೨೦|

Adhikarana 18 (20-21) · Śloka 22

ಸಂಸೃಷ್ಟಭಕ್ತಂ ನವಮೇಽಹ್ನಿ ಸರ್ಪಿಸ್ತಂ ಪಾಯಯೇತಾಪ್ಯನುವಾಸಯೇದ್ವಾ||೨೦|| ತೈಲಾಕ್ತಗಾತ್ರಾಯ ತತೋ ನಿರೂಹಂ ದದ್ಯಾತ್ರ್ಯಹಾನ್ನಾತಿಬುಭುಕ್ಷಿತಾಯ| ಪ್ರಸ್ಯಾಗತೇ ಧನ್ವರಸೇನ ಭೋಜ್ಯಃ ಸಮೀಕ್ಷ್ಯ ವಾ ದೋಷಬಲಂ ಯಥಾರ್ಹಮ್||೨೧|| ನರಸ್ತತೋ ನಿಶ್ಯನುವಾಸನಾರ್ಹೋ ನಾತ್ಯಾಶಿತಃ ಸ್ಯಾದನುವಾಸನೀಯಃ |೨೨|

Adhikarana 19 (22) · Śloka 23

ಶೀತೇ ವಸನ್ತೇ ಚ ದಿವಾಽನುವಾಸ್ಯೋ ರಾತ್ರೌ ಶರದ್ಗ್ರೀಷ್ಮಘನಾಗಮೇಷು||೨೨|| ತಾನೇವ ದೋಷಾನ್ ಪರಿರಕ್ಷತಾ ಯೇ ಸ್ನೇಹಸ್ಯ ಪಾನೇ ಪರಿಕೀರ್ತಿತಾಃ ಪ್ರಾಕ್|೨೩|

Adhikarana 20 (23-24) · Śloka 24

ಪ್ರತ್ಯಾಗತೇ ಚಾಪ್ಯನುವಾಸನೀಯೇ ದಿವಾ ಪ್ರದೇಯಂ ವ್ಯುಷಿತಾಯ ಭೋಜ್ಯಮ್||೨೩|| ಸಾಯಂ ಚ ಭೋಜ್ಯಂ ಪರತೋ ದ್ವ್ಯಹೇ ವಾ ತ್ರ್ಯಹೇಽನುವಾಸ್ಯೋಽಹನಿ ಪಞ್ಚಮೇ ವಾ | ತ್ರ್ಯಹೇ ತ್ರ್ಯಹೇ ವಾಽಪ್ಯಥ ಪಞ್ಚಮೇ ವಾ ದದ್ಯಾನ್ನಿರೂಹಾದನುವಾಸನಂ ಚ||೨೪||

Adhikarana 21 (25) · Śloka 25

ಏಕಂ ತಥಾ ತ್ರೀನ್ ಕಫಜೇ ವಿಕಾರೇ ಪಿತ್ತಾತ್ಮಕೇ ಪಞ್ಚ ತು ಸಪ್ತ ವಾಽಪಿ| ವಾತೇ ನವೈಕಾದಶ ವಾ ಪುನರ್ವಾ ಬಸ್ತೀನಯುಗ್ಮಾನ್ ಕುಶಲೋ ವಿದಧ್ಯಾತ್||೨೫||

Adhikarana 22 (26) · Śloka 26

ನರೋ ವಿರಿಕ್ತಸ್ತು ನಿರೂಹದಾನಂ ವಿವರ್ಜಯೇತ್ ಸಪ್ತದಿನಾನ್ಯವಶ್ಯಮ್| ಶುದ್ಧೋ ನಿರೂಹೇಣ ವಿರೇಚನಂ ಚ ತದ್ಧ್ಯಸ್ಯ ಶೂನ್ಯಂ ವಿಕಸೇಚ್ಛರೀರಮ್||೨೬||

Adhikarana 23 (27-28) · Śloka 28

ಬಸ್ತಿರ್ವಯಃಸ್ಥಾಪಯಿತಾ ಸುಖಾಯುರ್ಬಲಾಗ್ನಿಮೇಧಾಸ್ವರವರ್ಣಕೃಚ್ಚ| ಸರ್ವಾರ್ಥಕಾರೀ ಶಿಶುವೃದ್ಧಯೂನಾಂ ನಿರತ್ಯಯಃ ಸರ್ವಗದಾಪಹಶ್ಚ||೨೭|| ವಿಟ್ಶ್ಲೇಷ್ಮಪಿತ್ತಾನಿಲಮೂತ್ರಕರ್ಷೀ ದಾರ್ಢ್ಯಾವಹಃ ಶುಕ್ರಬಲಪ್ರದಶ್ಚ| ವಿಶ್ವಕ್ಸ್ಥಿತಂ ದೋಷಚಯಂ ನಿರಸ್ಯ ಸರ್ವಾನ್ ವಿಕಾರಾನ್ ಶಮಯೇನ್ನಿರೂಹಃ||೨೮||

Adhikarana 24 (29-31) · Śloka 31

ದೇಹೇ ನಿರೂಹೇಣ ವಿಶುದ್ಧಮಾರ್ಗೇ ಸಂಸ್ನೇಹನಂ ವರ್ಣಬಲಪ್ರದಂ ಚ| ನ ತೈಲದಾನಾತ್ ಪರಮಸ್ತಿ ಕಿಞ್ಚಿದ್ದ್ರವ್ಯಂ ವಿಶೇಷೇಣ ಸಮೀರಣಾರ್ತೇ ||೨೯|| ಸ್ನೇಹೇನ ರೌಕ್ಷ್ಯಂ ಲಘುತಾಂ ಗುರುತ್ವಾದೌಷ್ಣ್ಯಾಚ್ಚ ಶೈತ್ಯಂ ಪವನಸ್ಯ ಹತ್ವಾ| ತೈಲಂ ದದಾತ್ಯಾಶು ಮನಃಪ್ರಸಾದಂ ವೀರ್ಯಂ ಬಲಂ ವರ್ಣಮಥಾಗ್ನಿಪುಷ್ಟಿಮ್ ||೩೦|| ಮೂಲೇ ನಿಷಿಕ್ತೋ ಹಿ ಯಥಾ ದ್ರುಮಃ ಸ್ಯಾನ್ನೀಲಚ್ಛದಃ ಕೋಮಲಪಲ್ಲವಾಗ್ರ್ಯಃ| ಕಾಲೇ ಮಹಾನ್ ಪುಷ್ಪಫಲಪ್ರದಶ್ಚ ತಥಾ ನರಃ ಸ್ಯಾದನುವಾಸನೇನ||೩೧||

Adhikarana 25 (32-34) · Śloka 34

ಸ್ತಬ್ಧಾಶ್ಚ ಯೇ ಸಙ್ಕುಚಿತಾಶ್ಚ ಯೇಽಪಿ ಯೇ ಪಙ್ಗವೋ ಯೇಽಪಿ ಚ ಭಗ್ನರುಗ್ಣಾಃ| ಯೇಷಾಂ ಚ ಶಾಖಾಸು ಚರನ್ತಿ ವಾತಾಃ ಶಸ್ತೋ ವಿಶೇಷೇಣ ಹಿ ತೇಷು ಬಸ್ತಿಃ||೩೨|| ಆಧ್ಮಾಪನೇ ವಿಗ್ರಥಿತೇ ಪುರೀಷೇ ಶೂಲೇ ಚ ಭಕ್ತಾನಭಿನನ್ದನೇ ಚ| ಏವಮ್ಪ್ರಕಾರಾಶ್ಚ ಭವನ್ತಿ ಕುಕ್ಷೌ ಯೇ ಚಾಮಯಾಸ್ತೇಷು ಚ ಬಸ್ತಿರಿಷ್ಟಃ||೩೩|| ಯಾಶ್ಚ ಸ್ತ್ರಿಯೋ ವಾತಕೃತೋಪಸರ್ಗಾ ಗರ್ಭಂ ನ ಗೃಹ್ಣನ್ತಿ ನೃಭಿಃ ಸಮೇತಾಃ| ಕ್ಷೀಣೇನ್ದ್ರಿಯಾ ಯೇ ಚ ನರಾಃ ಕೃಶಾಶ್ಚ ಬಸ್ತಿಃ ಪ್ರಶಸ್ತಃ ಪರಮಂ ಚ ತೇಷು||೩೪||

Adhikarana 26 (35) · Śloka 35

ಉಷ್ಣಾಭಿಭೂತೇಷು ವದನ್ತಿ ಶೀತಾಞ್ಛೀತಾಭಿಭೂತೇಷು ತಥಾ ಸುಖೋಷ್ಣಾನ್| ತತ್ಪ್ರತ್ಯನೀಕೌಷಧಸಮ್ಪ್ರಯುಕ್ತಾನ್ ಸರ್ವತ್ರ ಬಸ್ತೀನ್ ಪ್ರವಿಭಜ್ಯ ಯುಞ್ಜ್ಯಾತ್ ||೩೫||

Adhikarana 27 (36) · Śloka 36

ನ ಬೃಂಹಣೀಯಾನ್ ವಿದಧೀತ ಬಸ್ತೀನ್ ವಿಶೋಧನೀಯೇಷು ಗದೇಷು ವೈದ್ಯಃ| ಕುಷ್ಠಪ್ರಮೇಹಾದಿಷು ಮೇದುರೇಷು ನರೇಷು ಯೇ ಚಾಪಿ ವಿಶೋಧನೀಯಾಃ||೩೬||

Adhikarana 28 (37) · Śloka 37

ಕ್ಷೀಣಕ್ಷತಾನಾಂ ನ ವಿಶೋಧನೀಯಾನ್ನ ಶೋಷಿಣಾಂ ನೋ ಭೃಶದುರ್ಬಲಾನಾಮ್| ನ ಮೂರ್ಚ್ಛಿತಾನಾಂ ನ ವಿಶೋಧಿತಾನಾಂ ಯೇಷಾಂ ಚ ದೋಷೇಷು ನಿಬದ್ಧಮಾಯುಃ||೩೭||

Adhikarana 29 (38-39) · Śloka 40

ಶಾಖಾಗತಾಃ ಕೋಷ್ಠಗತಾಶ್ಚ ರೋಗಾ ಮರ್ಮೋರ್ಧ್ವಸರ್ವಾವಯವಾಙ್ಗಜಾಶ್ಚ| ಯೇ ಸನ್ತಿ ತೇಷಾಂ ನ ಹಿ ಕಶ್ಚಿದನ್ಯೋ ವಾಯೋಃ ಪರಂ ಜನ್ಮನಿ ಹೇತುರಸ್ತಿ||೩೮|| ವಿಣ್ಮೂತ್ರಪಿತ್ತಾದಿಮಲಾಶಯಾನಾಂ ವಿಕ್ಷೇಪಸಙ್ಘಾತಕರಃ ಸ ಯಸ್ಮಾತ್| ತಸ್ಯಾತಿವೃದ್ಧಸ್ಯ ಶಮಾಯ ನಾನ್ಯದ್ಬಸ್ತಿಂ ವಿನಾ ಭೇಷಜಮಸ್ತಿ ಕಿಞ್ಚಿತ್||೩೯|| ತಸ್ಮಾಚ್ಚಿಕಿತ್ಸಾರ್ಧಮಿತಿ ಬ್ರುವನ್ತಿ ಸರ್ವಾಂ ಚಿಕಿತ್ಸಾಮಪಿ ಬಸ್ತಿಮೇಕೇ|೪೦|

Adhikarana 30 (40) · Śloka 41

ನಾಭಿಪ್ರದೇಶಂ ಕಟಿಪಾರ್ಶ್ವಕುಕ್ಷಿಂ ಗತ್ವಾ ಶಕೃದ್ದೋಷಚಯಂ ವಿಲೋಡ್ಯ ||೪೦|| ಸಂಸ್ನೇಹ್ಯ ಕಾಯಂ ಸಪುರೀಷದೋಷಃ ಸಮ್ಯಕ್ ಸುಖೇನೈತಿ ಚ ಯಃ ಸ ಬಸ್ತಿಃ |೪೧|

Adhikarana 31 (41) · Śloka 42

ಪ್ರಸೃಷ್ಟವಿಣ್ಮೂತ್ರಸಮೀರಣತ್ವಂ ರುಚ್ಯಗ್ನಿವೃದ್ಧ್ಯಾಶಯಲಾಘವಾನಿ||೪೧|| ರೋಗೋಪಶಾನ್ತಿಃ ಪ್ರಕೃತಿಸ್ಥತಾ ಚ ಬಲಂ ಚ ತತ್ ಸ್ಯಾತ್ ಸುನಿರೂಢಲಿಙ್ಗಮ್|೪೨|

Adhikarana 32 (42) · Śloka 43

ಸ್ಯಾದ್ರುಕ್ಛಿರೋಹೃದ್ಗುದಬಸ್ತಿಲಿಙ್ಗೇ ಶೋಫಃ ಪ್ರತಿಶ್ಯಾಯವಿಕರ್ತಿಕೇ ಚ||೪೨|| ಹೃಲ್ಲಾಸಿಕಾ ಮಾರುತಮೂತ್ರಸಙ್ಗಃ ಶ್ವಾಸೋ ನ ಸಮ್ಯಕ್ ಚ ನಿರೂಹಿತೇ ಸ್ಯುಃ|೪೩|

Adhikarana 33 (43) · Śloka 43

ಲಿಙ್ಗಂ ಯದೇವಾತಿವಿರೇಚಿತಸ್ಯ ಭವೇತ್ತದೇವಾತಿನಿರೂಹಿತಸ್ಯ||೪೩||

Adhikarana 34 (44) · Śloka 44

ಪ್ರತ್ಯೇತ್ಯಸಕ್ತಂ ಸಶಕೃಚ್ಚ ತೈಲಂ ರಕ್ತಾದಿಬುದ್ಧೀನ್ದ್ರಿಯಸಮ್ಪ್ರಸಾದಃ | ಸ್ವಪ್ನಾನುವೃತ್ತಿರ್ಲಘುತಾ ಬಲಂ ಚ ಸೃಷ್ಟಾಶ್ಚ ವೇಗಾಃ ಸ್ವನುವಾಸಿತೇ ಸ್ಯುಃ||೪೪||

Adhikarana 35 (45) · Śloka 46

ಅಧಃಶರೀರೋದರಬಾಹುಪೃಷ್ಠಪಾರ್ಶ್ವೇಷು ರುಗ್ರೂಕ್ಷಖರಂ ಚ ಗಾತ್ರಮ್ | ಗ್ರಹಶ್ಚ ವಿಣ್ಮೂತ್ರಸಮೀರಣಾನಾಮಸಮ್ಯಗೇತಾನ್ಯನುವಾಸಿತಸ್ಯ ||೪೫|| ಹೃಲ್ಲಾಸಮೋಹಕ್ಲಮಸಾದಮೂರ್ಚ್ಛಾವಿಕರ್ತಿಕಾ ಚಾತ್ಯನುವಾಸಿತಸ್ಯ|೪೬|

Adhikarana 36 (46) · Śloka 47

ಯಸ್ಯೇಹ ಯಾಮಾನನುವರ್ತತೇ ತ್ರೀನ್ ಸ್ನೇಹೋ ನರಃ ಸ್ಯಾತ್ ಸ ವಿಶುದ್ಧದೇಹಃ||೪೬|| ಆಶ್ವಾಗತೇಽನ್ಯಸ್ತು ಪುನರ್ವಿಧೇಯಃ ಸ್ನೇಹೋ ನ ಸಂಸ್ನೇಹಯತಿ ಹ್ಯತಿಷ್ಠನ್|೪೭|

Adhikarana 37 (47-48) · Śloka 49

ತ್ರಿಂಶನ್ಮತಾಃ ಕರ್ಮ ನು ಬಸ್ತಯೋ ಹಿ ಕಾಲಸ್ತತೋಽರ್ಧೇನ ತತಶ್ಚ ಯೋಗಃ||೪೭|| ಸಾನ್ವಾಸನಾ ದ್ವಾದಶ ವೈ ನಿರೂಹಾಃ ಪ್ರಾಕ್ ಸ್ನೇಹ ಏಕಃ ಪರತಶ್ಚ ಪಞ್ಚ| ಕಾಲೇ ತ್ರಯೋಽನ್ತೇ ಪುರತಸ್ತಥೈಕಃ ಸ್ನೇಹಾ ನಿರೂಹಾನ್ತರಿತಾಶ್ಚ ಷಟ್ ಸ್ಯುಃ||೪೮|| ಯೋಗೇ ನಿರೂಹಾಸ್ತ್ರಯ ಏವ ದೇಯಾಃ ಸ್ನೇಹಾಶ್ಚ ಪಞ್ಚೈವ ಪರಾದಿಮಧ್ಯಾಃ|೪೯|

Adhikarana 38 (49) · Śloka 50

ತ್ರೀನ್ ಪಞ್ಚ ವಾಽಽಹುಶ್ಚತುರೋಽಥ ಷಡ್ವಾ ವಾತಾದಿಕಾನಾಮನುವಾಸನೀಯಾನ್ ||೪೯|| ಸ್ನೇಹಾನ್ ಪ್ರದಾಯಾಶು ಭಿಷಗ್ವಿದಧ್ಯಾತ್ ಸ್ರೋತೋವಿಶುದ್ಯರ್ಥಮತೋ ನಿರೂಹಾನ್|೫೦|

Adhikarana 39 (50-52) · Śloka 53

ವಿಶುದ್ಧದೇಹಸ್ಯ ತತಃ ಕ್ರಮೇಣ ಸ್ನಿಗ್ಧಂ ತಲಸ್ವೇದಿತಮುತ್ತಮಾಙ್ಗಮ್||೫೦|| ವಿರೇಚಯೇತ್ತ್ರಿರ್ದ್ವಿರಥೈಕಶೋ ವಾ ಬಲಂ ಸಮೀಕ್ಷ್ಯ ತ್ರಿವಿಧಂ ಮಲಾನಾಮ್| ಉರಃಶಿರೋಲಾಘವಮಿನ್ದ್ರಿಯಾಚ್ಛ್ಯಂ ಸ್ರೋತೋವಿಶುದ್ಧಿಶ್ಚ ಭವೇದ್ವಿಶುದ್ಧೇ||೫೧|| ಗಲೋಪಲೇಪಃ ಶಿರಸೋ ಗುರುತ್ವಂ ನಿಷ್ಠೀವನಂ ಚಾಪ್ಯಥ ದುರ್ವಿರಿಕ್ತೇ| ಶಿರೋಕ್ಷಿಶಙ್ಖಶ್ರವಣಾರ್ತಿತೋದಾವತ್ಯರ್ಥಶುದ್ಧೇ ತಿಮಿರಂ ಚ ಪಶ್ಯೇತ್||೫೨|| ಸ್ಯಾತ್ತರ್ಪಣಂ ತತ್ರ ಮೃದು ದ್ರವಂ ಚ ಸ್ನಿಗ್ಧಸ್ಯ ತೀಕ್ಷ್ಣಂ ತು ಪುನರ್ನ ಯೋಗೇ|೫೩|

Adhikarana 40 (53) · Śloka 53

ಇತ್ಯಾತುರಸ್ವಸ್ಥಸುಖಃ ಪ್ರಯೋಗೋ ಬಲಾಯುಷೋರ್ವೃದ್ಧಿಕೃದಾಮಯಘ್ನಃ||೫೩||

Adhikarana 41 (54) · Śloka 54

ಕಾಲಸ್ತು ಬಸ್ತ್ಯಾದಿಷು ಯಾತಿ ಯಾವಾಂಸ್ತಾವಾನ್ ಭವೇದ್ದ್ವಿಃ ಪರಿಹಾರಕಾಲಃ|೫೪|

Adhikarana 42 (54) · Śloka 55

ಅತ್ಯಾಸನಸ್ಥಾನವಚಾಂಸಿ ಯಾನಂ ಸ್ವಪ್ನಂ ದಿವಾ ಮೈಥುನವೇಗರೋಧಾನ್||೫೪|| ಶೀತೋಪಚಾರಾತಪಶೋಕರೋಷಾಂಸ್ತ್ಯಜೇದಕಾಲಾಹಿತಭೋಜನಂ ಚ|೫೫|

Adhikarana 43 (55) · Śloka 56

ಬದ್ಧೇ ಪ್ರಣೀತೇ ವಿಷಮಂ ಚ ನೇತ್ರೇ ಮಾರ್ಗೇ ತಥಾಽರ್ಶಃಕಫವಿಡ್ವಿಬದ್ಧೇ ||೫೫|| ನ ಯಾತಿ ಬಸ್ತಿರ್ನ ಸುಖಂ ನಿರೇತಿ ದೋಷಾವೃತೋಽಲ್ಪೋ ಯದಿ ವಾಽಲ್ಪವೀರ್ಯಃ|೫೬|

Adhikarana 44 (56) · Śloka 57

ಪ್ರಾಪ್ತೇ ತು ವರ್ಚೋನಿಲಮೂತ್ರವೇಗೇ ವಾತೇಽತಿವೃದ್ಧೇಽಲ್ಪಬಲೇ ಗುದೇ ವಾ||೫೬|| ಅತ್ಯುಷ್ಣತೀಕ್ಷ್ಣಶ್ಚ ಮೃದೌ ಚ ಕೋಷ್ಠೇ ಪ್ರಣೀತಮಾತ್ರಃ ಪುನರೇತಿ ಬಸ್ತಿಃ|೫೭|

Adhikarana 45 (57-58) · Śloka 59

ಮೇದಃಕಫಾಭ್ಯಾಮನಿಲೋ ನಿರುದ್ಧಃ ಶೂಲಾಙ್ಗಸುಪ್ತಿಶ್ವಯಥೂನ್ ಕರೋತಿ||೫೭|| ಸ್ನೇಹಂ ತು ಯುಞ್ಜನ್ನಬುಧಸ್ತು ತಸ್ಮೈ ಸಂವರ್ಧಯತ್ಯೇವ ಹಿ ತಾನ್ ವಿಕಾರಾನ್| ರೋಗಾಸ್ತಥಾಽನ್ಯೇಽಪ್ಯವಿತರ್ಕ್ಯಮಾಣಾಃ ಪರಸ್ಪರೇಣಾವಗೃಹೀತಮಾರ್ಗಾಃ||೫೮|| ಸನ್ದೂಷಿತಾ ಧಾತುಭಿರೇವ ಚಾನ್ಯೈಃ ಸ್ವೈರ್ಭೇಷಜೈರ್ನೋಪಶಮಂ ವ್ರಜನ್ತಿ|೫೯|

Adhikarana 46 (59) · Śloka 60

ಸರ್ವಂ ಚ ರೋಗಪ್ರಶಮಾಯ ಕರ್ಮ ಹೀನಾತಿಮಾತ್ರಂ ವಿಪರೀತಕಾಲಮ್||೫೯|| ಮಿಥ್ಯೋಪಚಾರಾಚ್ಚ ನ ತಂ ವಿಕಾರಂ ಶಾನ್ತಿಂ ನಯೇತ್ ಪಥ್ಯಮಪಿ ಪ್ರಯುಕ್ತಮ್|೬೦|

Adhikarana 47 (60) · Śloka 61

ತತ್ರ ಶ್ಲೋಕಃ- ಪ್ರಶ್ನಾನಿಮಾನ್ ದ್ವಾದಶ ಪಞ್ಚಕರ್ಮಾಣ್ಯುದ್ದಿಶ್ಯ ಸಿದ್ಧಾವಿಹ ಕಲ್ಪನಾಯಾಮ್||೬೦|| ಪ್ರಜಾಹಿತಾರ್ಥಂ ಭಗವಾನ್ ಮಹಾರ್ಥಾನ್ ಸಮ್ಯಗ್ಜಗಾದರ್ಷಿವರೋಽತ್ರಿಪುತ್ರಃ||೬೧||

Adhikarana puShpikA · Śloka 1

ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇಽಪ್ರಾಪ್ತೇ ದೃಢಬಲಸಮ್ಪೂರಿತೇ ಸಿದ್ಧಿಸ್ಥಾನೇ ಕಲ್ಪನಾಸಿದ್ಧಿರ್ನಾಮ ಪ್ರಥಮೋಽಧ್ಯಾಯಃ||೧||