13. snēhādhyāyaḥ

Adhikarana 1 (1-2) · Śloka 2

અથાતઃ સ્નેહાધ્યાયં વ્યાખ્યાસ્યામઃ||૧|| ઇતિ હ સ્માહ ભગવાનાત્રેયઃ||૨||

Adhikarana 2 (3) · Śloka 3

સાઙ્ખ્યૈઃ સઙ્ખ્યાતસઙ્ખ્યેયૈઃ સહાસીનં પુનર્વસુમ્| જગદ્ધિતાર્થં પપ્રચ્છ વહ્નિવેશઃ સ્વસંશયમ્||૩||

Adhikarana 3 (4-8) · Śloka 8

કિંયોનયઃ કતિ સ્નેહાઃ કે ચ સ્નેહગુણાઃ પૃથક્| કાલાનુપાને કે કસ્ય કતિ કાશ્ચ વિચારણાઃ||૪|| કતિ માત્રાઃ કથમ્માનાઃ કા ચ કેષૂપદિશ્યતે| કશ્ચ કેભ્યો હિતઃ સ્નેહઃ પ્રકર્ષઃ સ્નેહને ચ કઃ||૫|| સ્નેહ્યાઃ કે કે ન ચ સ્નિગ્ધાસ્નિગ્ધાતિસ્નિગ્ધલક્ષણમ્| કિં પાનાત્ પ્રથમં પીતે જીર્ણે કિઞ્ચ હિતાહિતમ્||૬|| કે મૃદુક્રૂરકોષ્ઠાઃ કા વ્યાપદઃ સિદ્ધયશ્ચ કાઃ| અચ્છે સંશોધને ચૈવ સ્નેહે કા વૃત્તિરિષ્યતે||૭|| વિચારણાઃ કેષુ યોજ્યા વિધિના કેન તત્ પ્રભો!| સ્નેહસ્યામિતવિજ્ઞાન જ્ઞાનમિચ્છામિ વેદિતુમ્||૮||

Adhikarana 4 (9-11) · Śloka 11

અથ તત્સંશયચ્છેત્તા પ્રત્યુવાચ પુનર્વસુઃ| સ્નેહાનાં દ્વિવિધા સૌમ્ય યોનિઃ સ્થાવરજઙ્ગમા||૯|| તિલઃ પ્રિયાલાભિષુકૌ બિભીતકશ્ચિત્રાભયૈરણ્ડમધૂકસર્ષપાઃ| કુસુમ્ભબિલ્વારુકમૂલકાતસીનિકોચકાક્ષોડકરઞ્જશિગ્રુકાઃ||૧૦|| સ્નેહાશયાઃ સ્થાવરસઞ્જ્ઞિતાસ્તથા સ્યુર્જઙ્ગમા મત્સ્યમૃગાઃ સપક્ષિણઃ| તેષાં દધિક્ષીરઘૃતામિષં વસા સ્નેહેષુ મજ્જા ચ તથોપદિશ્યતે||૧૧||

Adhikarana 5 (12) · Śloka 1

સર્વેષાં તૈલજાતાનાં તિલતૈલં વિશિષ્યતે| બલાર્થે સ્નેહને ચાગ્ર્યમૈરણ્ડં તુ વિરેચને||૧૨|| (કટૂષ્ણં તૈલમૈરણ્ડં વાતશ્લેષ્મહરં ગુરુ | કષાયસ્વાદુતિક્તૈશ્ચ યોજિતં પિત્તહન્ત્રપિ ||૧||)|

Adhikarana 6 (13) · Śloka 13

સર્પિસ્તૈલં વસા મજ્જા સર્વસ્નેહોત્તમા મતાઃ| એષુ ચૈવોત્તમં સર્પિઃ સંસ્કારસ્યાનુવર્તનાત્||૧૩||

Adhikarana 7 (14-17) · Śloka 17

ઘૃતં પિત્તાનિલહરં રસશુક્રૌજસાં હિતમ્| નિર્વાપણં મૃદુકરં સ્વરવર્ણપ્રસાદનમ્||૧૪|| મારુતઘ્નં ન ચ શ્લેષ્મવર્ધનં બલવર્ધનમ્| ત્વચ્યમુષ્ણં સ્થિરકરં તૈલં યોનિવિશોધનમ્||૧૫|| વિદ્ધભગ્નાહતભ્રષ્ટયોનિકર્ણશિરોરુજિ| પૌરુષોપચયે સ્નેહે વ્યાયામે ચેષ્યતે વસા||૧૬|| બલશુક્રરસશ્લેષ્મમેદોમજ્જવિવર્ધનઃ| મજ્જા વિશેષતોઽસ્થ્નાં ચ બલકૃત્ સ્નેહને હિતઃ||૧૭||

Adhikarana 8 (18) · Śloka 18

સર્પિઃ શરદિ પાતવ્યં વસા મજ્જા ચ માધવે| તૈલં પ્રાવૃષિ નાત્યુષ્ણશીતે સ્નેહં પિબેન્નરઃ||૧૮||

Adhikarana 9 (19) · Śloka 19

વાતપિત્તાધિકો રાત્રાવુષ્ણે ચાપિ પિબેન્નરઃ| શ્લેષ્માધિકો દિવા શીતે પિબેચ્ચામલભાસ્કરે||૧૯||

Adhikarana 10 (20-21) · Śloka 21

અત્યુષ્ણે વા દિવા પીતો વાતપિત્તાધિકેન વા| મૂર્ચ્છાં પિપાસામુન્માદં કામલાં વા સમીરયેત્||૨૦|| શીતે રાત્રૌ પિબન્ સ્નેહં નરઃ શ્લેષ્માધિકોઽપિ વા| આનાહમરુચિં શૂલં પાણ્ડુતાં વા સમૃચ્છતિ||૨૧||

Adhikarana 11 (22) · Śloka 22

જલમુષ્ણં ઘૃતે પેયં યૂષસ્તૈલેઽનુ શસ્યતે| વસામજ્જ્ઞોસ્તુ મણ્ડઃ સ્યાત્ સર્વેષૂષ્ણમથામ્બુ વા||૨૨||

Adhikarana 12 (23-25) · Śloka 25

ઓદનશ્ચ વિલેપી ચ રસો માંસં પયો દધિ| યવાગૂઃ સૂપશાકૌ ચ યૂષઃ કામ્બલિકઃ ખડઃ||૨૩|| સક્તવસ્તિલપિષ્ટં ચ મદ્યં લેહાસ્તથૈવ ચ| ભક્ષ્યમભ્યઞ્જનં બસ્તિસ્તથા ચોત્તરબસ્તયઃ||૨૪|| ગણ્ડૂષઃ કર્ણતૈલં ચ નસ્તઃકર્ણાક્ષિતર્પણમ્| ચતુર્વિંશતિરિત્યેતાઃ સ્નેહસ્ય પ્રવિચારણાઃ ||૨૫||

Adhikarana 13 (26) · Śloka 26

અચ્છપેયસ્તુ યઃ સ્નેહો ન તામાહુર્વિચારણામ્| સ્નેહસ્ય સ ભિષગ્દૃષ્ટઃ કલ્પઃ પ્રાથમકલ્પિકઃ||૨૬||

Adhikarana 14 (27-28) · Śloka 28

રસૈશ્ચોપહિતઃ સ્નેહઃ સમાસવ્યાસયોગિભિઃ| ષડ્ભિસ્ત્રિષષ્ટિધા સઙ્ખ્યાં પ્રાપ્નોત્યેકશ્ચ કેવલઃ||૨૭|| એવમેતાશ્ચતુઃષષ્ટિઃ સ્નેહાનાં પ્રવિચારણા | ઓકર્તુવ્યાધિપુરુષાન્ પ્રયોજ્યા જાનતા ભવેત્||૨૮||

Adhikarana 15 (29-40) · Śloka 40

અહોરાત્રમહઃ કૃત્સ્નમર્ધાહં ચ પ્રતીક્ષતે| પ્રધાના મધ્યમા હ્રસ્વા સ્નેહમાત્રા જરાં પ્રતિ||૨૯|| ઇતિ તિસ્રઃ સમુદ્દિષ્ટા માત્રાઃ સ્નેહસ્ય માનતઃ| તાસાં પ્રયોગાન્ વક્ષ્યામિ પુરુષં પુરુષં પ્રતિ||૩૦|| પ્રભૂતસ્નેહનિત્યા યે ક્ષુત્પિપાસાસહા નરાઃ| પાવકશ્ચોત્તમબલો યેષાં યે ચોત્તમા બલે||૩૧|| ગુલ્મિનઃ સર્પદષ્ટાશ્ચ વિસર્પોપહતાશ્ચ યે| ઉન્મત્તાઃ કૃચ્છ્રમૂત્રાશ્ચ ગાઢવર્ચસ એવ ચ||૩૨|| પિબેયુરુત્તમાં માત્રાં તસ્યાઃ પાને ગુણાઞ્છૃણુ| વિકારાઞ્છમયત્યેષાં શીઘ્રં સમ્યક્પ્રયોજિતા||૩૩|| દોષાનુકર્ષિણી માત્રા સર્વમાર્ગાનુસારિણી| બલ્યા પુનર્નવકરી શરીરેન્દ્રિયચેતસામ્||૩૪|| અરુષ્કસ્ફોટપિડકાકણ્ડૂપામાભિરર્દિતાઃ| કુષ્ઠિનશ્ચ પ્રમીઢાશ્ચ વાતશોણિતિકાશ્ચ યે||૩૫|| નાતિબહ્વાશિનશ્ચૈવ મૃદુકોષ્ઠાસ્તથૈવ ચ| પિબેયુર્મધ્યમાં માત્રાં મધ્યમાશ્ચાપિ યે બલે||૩૬|| માત્રૈષા મન્દવિભ્રંશા ન ચાતિબલહારિણી| સુખેન ચ સ્નેહયતિ શોધનાર્થે ચ યુજ્યતે||૩૭|| યે તુ વૃદ્ધાશ્ચ બાલાશ્ચ સુકુમારાઃ સુખોચિતાઃ| રિક્તકોષ્ઠત્વમહિતં યેષાં મન્દાગ્નયશ્ચ યે||૩૮|| જ્વરાતીસારકાસાશ્ચ યેષાં ચિરસમુત્થિતાઃ| સ્નેહમાત્રાં પિબેયુસ્તે હ્રસ્વાં યે ચાવરા બલે||૩૯|| પરિહારે સુખા ચૈષા માત્રા સ્નેહનબૃંહણી| વૃષ્યા બલ્યા નિરાબાધા ચિરં ચાપ્યનુવર્તતે||૪૦||

Adhikarana 16 (41-43) · Śloka 43

વાતપિત્તપ્રકૃતયો વાતપિત્તવિકારિણઃ| ચક્ષુઃકામાઃ ક્ષતાઃ ક્ષીણા વૃદ્ધા બાલાસ્તથાઽબલાઃ||૪૧|| આયુઃપ્રકર્ષકામાશ્ચ બલવર્ણસ્વરાર્થિનઃ| પુષ્ટિકામાઃ પ્રજાકામાઃ સૌકુમાર્યાર્થિનશ્ચ યે||૪૨|| દીપ્ત્યોજઃસ્મૃતિમેધાગ્નિબુદ્ધીન્દ્રિયબલાર્થિનઃ| પિબેયુઃ સર્પિરાર્તાશ્ચ દાહશસ્ત્રવિષાગ્નિભિઃ||૪૩||

Adhikarana 17 (44-46) · Śloka 46

પ્રવૃદ્ધશ્લેષ્મમેદસ્કાશ્ચલસ્થૂલગલોદરાઃ| વાતવ્યાધિભિરાવિષ્ટા વાતપ્રકૃતયશ્ચ યે||૪૪|| બલં તનુત્વં લઘુતાં દૃઢતાં સ્થિરગાત્રતામ્ | સ્નિગ્ધશ્લક્ષ્ણતનુત્વક્તાં યે ચ કાઙ્ક્ષન્તિ દેહિનઃ||૪૫|| કૃમિકોષ્ઠાઃ ક્રૂરકોષ્ઠાસ્તથા નાડીભિરર્દિતાઃ| પિબેયુઃ શીતલે કાલે તૈલં તૈલોચિતાશ્ચ યે||૪૬||

Adhikarana 18 (47-49) · Śloka 49

વાતાતપસહા યે ચ રૂક્ષા ભારાધ્વકર્શિતાઃ| સંશુષ્કરેતોરુધિરા નિષ્પીતકફમેદસઃ||૪૭|| અસ્થિસન્ધિસિરાસ્નાયુમર્મકોષ્ઠમહારુજઃ| બલવાન્મારુતો યેષાં ખાનિ ચાવૃત્ય તિષ્ઠતિ||૪૮|| મહચ્ચાગ્નિબલં યેષાં વસાસાત્મ્યાશ્ચ યે નરાઃ| તેષાં સ્નેહયિતવ્યાનાં વસાપાનં વિધીયતે||૪૯||

Adhikarana 19 (50) · Śloka 51

દીપ્તાગ્નયઃ ક્લેશસહા ઘસ્મરાઃ સ્નેહસેવિનઃ| વાતાર્તાઃ ક્રૂરકોષ્ઠાશ્ચ સ્નેહ્યા મજ્જાનમાપ્નુયુઃ||૫૦|| યેભ્યો યેભ્યો હિતો યો યઃ સ્નેહઃ સ પરિકીર્તિતઃ|૫૧|

Adhikarana 20 (51) · Śloka 51

સ્નેહનસ્ય પ્રકર્ષૌ તુ સપ્તરાત્રત્રિરાત્રકૌ||૫૧||

Adhikarana 21 (52) · Śloka 52

સ્વેદ્યાઃ શોધયિતવ્યાશ્ચ રૂક્ષા વાતવિકારિણઃ| વ્યાયામમદ્યસ્ત્રીનિત્યાઃ સ્નેહ્યાઃ સ્યુર્યે ચ ચિન્તકાઃ||૫૨||

Adhikarana 22 (53-56) · Śloka 56

સંશોધનાદૃતે યેષાં રૂક્ષણં સમ્પ્રવક્ષ્યતે| ન તેષાં સ્નેહનં શસ્તમુત્સન્નકફમેદસામ્||૫૩|| અભિષ્યણ્ણાનનગુદા નિત્યમન્દાગ્નયશ્ચ યે| તૃષ્ણામૂર્ચ્છાપરીતાશ્ચ ગર્ભિણ્યસ્તાલુશોષિણઃ||૫૪|| અન્નદ્વિષશ્છર્દયન્તો જઠરામગરાર્દિતાઃ| દુર્બલાશ્ચ પ્રતાન્તાશ્ચ સ્નેહગ્લાના મદાતુરાઃ||૫૫|| ન સ્નેહ્યા વર્તમાનેષુ ન નસ્તો બસ્તિકર્મસુ| સ્નેહપાનાત્ પ્રજાયન્તે તેષાં રોગાઃ સુદારુણાઃ||૫૬||

Adhikarana 23 (57-59) · Śloka 59

પુરીષં ગ્રથિતં રૂક્ષં વાયુરપ્રગુણો મૃદુઃ| પક્તા ખરત્વં રૌક્ષ્યં ચ ગાત્રસ્યાસ્નિગ્ધલક્ષણમ્||૫૭|| વાતાનુલોમ્યં દીપ્તોઽગ્નિર્વર્ચઃ સ્નિગ્ધમસંહતમ્| માર્દવં સ્નિગ્ધતા ચાઙ્ગે સ્નિગ્ધાનામુપજાયતે||૫૮|| પાણ્ડુતા ગૌરવં જાડ્યં પુરીષસ્યાવિપક્વતા| તન્દ્રીરરુચિરુત્કેશઃ સ્યાદતિસ્નિગ્ધલક્ષણમ્||૫૯||

Adhikarana 24 (60-61) · Śloka 61

દ્રવોષ્ણમનભિષ્યન્દિ ભોજ્યમન્નં પ્રમાણતઃ| નાતિસ્નિગ્ધમસઙ્કીર્ણં શ્વઃ સ્નેહં પાતુમિચ્છતા||૬૦|| પિબેત્ સંશમનં સ્નેહમન્નકાલે પ્રકાઙ્ક્ષિતઃ| શુદ્ધ્યર્થં પુનરાહારે નૈશે જીર્ણે પિબેન્નરઃ||૬૧||

Adhikarana 25 (62-64) · Śloka 64

ઉષ્ણોદકોપચારી સ્યાદ્બ્રહ્મચારી ક્ષપાશયઃ | શકૃન્મૂત્રાનિલોદ્ગારાનુદીર્ણાંશ્ચ ન ધારયેત્||૬૨|| વ્યાયામમુચ્ચૈર્વચનં ક્રોધશોકૌ હિમાતપૌ| વર્જયેદપ્રવાતં ચ સેવેત શયનાસનમ્||૬૩|| સ્નેહં પીત્વા નરઃ સ્નેહં પ્રતિભુઞ્જાન એવ ચ| સ્નેહમિથ્યોપચારાદ્ધિ જાયન્તે દારુણા ગદાઃ||૬૪||

Adhikarana 26 (65-69) · Śloka 69

મૃદુકોષ્ઠસ્ત્રિરાત્રેણ સ્નિહ્યત્યચ્છોપસેવયા| સ્નિહ્યતિ ક્રૂરક્રોષ્ઠસ્તુ સપ્તરાત્રેણ માનવઃ||૬૫|| ગુડમિક્ષુરસં મસ્તુ ક્ષીરમુલ્લોડિતં દધિ| પાયસં કૃશરાં સર્પિઃ કાશ્મર્યત્રિફલારસમ્||૬૬|| દ્રાક્ષારસં પીલુરસં જલમુષ્ણમથાપિ વા| મદ્યં વા તરુણં પીત્વા મૃદુકોષ્ઠો વિરિચ્યતે||૬૭|| વિરેચયન્તિ નૈતાનિ ક્રૂરકોષ્ઠં કદાચન| ભવતિ ક્રૂરકોષ્ઠસ્ય ગ્રહણ્યત્યુલ્બણાનિલા||૬૮|| ઉદીર્ણપિત્તાઽલ્પકફા ગ્રહણી મન્દમારુતા| મૃદુકોષ્ઠસ્ય તસ્માત્ સ સુવિરેચ્યો નરઃ સ્મૃતઃ||૬૯||

Adhikarana 27 (70-78) · Śloka 78

ઉદીર્ણપિત્તા ગ્રહણી યસ્ય ચાગ્નિબલં મહત્| ભસ્મીભવતિ તસ્યાશુ સ્નેહઃ પીતોઽગ્નિતેજસા||૭૦|| સ જગ્ધ્વા સ્નેહમાત્રાં તામોજઃ પ્રક્ષારયન્ બલી| સ્નેહાગ્નિરુત્તમાં તૃષ્ણાં સોપસર્ગામુદીરયેત્||૭૧|| નાલં સ્નેહસમૃદ્ધસ્ય શમાયાન્નં સુગુર્વપિ| સ ચેત્ સુશીતં સલિલં નાસાદયતિ દહ્યતે| યથૈવાશીવિષઃ કક્ષમધ્યગઃ સ્વવિષાગ્નિના||૭૨|| અજીર્ણે યદિ તુ સ્નેહે તૃષ્ણા સ્યાચ્છર્દયેદ્ભિષક્| શીતોદકં પુનઃ પીત્વા ભુક્ત્વા રૂક્ષાન્નમુલ્લિખેત્||૭૩|| ન સર્પિઃ કેવલં પિત્તે પેયં સામે વિશેષતઃ| સર્વં હ્યનુરજેદ્દેહં હત્વા સઞ્જ્ઞાં ચ મારયેત્||૭૪|| તન્દ્રા સોત્ક્લેશ આનાહો જ્વરઃ સ્તમ્ભો વિસઞ્જ્ઞતા| કુષ્ઠાનિ કણ્ડૂઃ પાણ્ડુત્વં શોફાર્શાંસ્યરુચિસ્તૃષા||૭૫|| જઠરં ગ્રહણીદોષાઃ સ્તૈમિત્યં વાક્યનિગ્રહઃ| શૂલમામપ્રદોષાશ્ચ જાયન્તે સ્નેહવિભ્રમાત્||૭૬|| તત્રાપ્યુલ્લેખનં શસ્તં સ્વેદઃ કાલપ્રતીક્ષણમ્| પ્રતિ પ્રતિ વ્યાધિબલં બુદ્ધ્વા સ્રંસનમેવ ચ||૭૭|| તક્રારિષ્ટપ્રયોગશ્ચ રૂક્ષપાનાન્નસેવનમ્| મૂત્રાણાં ત્રિફલાયાશ્ચ સ્નેહવ્યાપત્તિભેષજમ્||૭૮||

Adhikarana 28 (79) · Śloka 79

અકાલે ચાહિતશ્ચૈવ માત્રયા ન ચ યોજિતઃ| સ્નેહો મિથ્યોપચારાચ્ચ વ્યાપદ્યેતાતિસેવિતઃ||૭૯||

Adhikarana 29 (80) · Śloka 80

સ્નેહાત્ પ્રસ્કન્દનં જન્તુસ્ત્રિરાત્રોપરતઃ પિબેત્| સ્નેહવદ્દ્રવમુષ્ણં ચ ત્ર્યહં ભુક્ત્વા રસૌદનમ્||૮૦||

Adhikarana 30 (81) · Śloka 81

એકાહોપરતસ્તદ્વદ્ભુક્ત્વા પ્રચ્છર્દનં પિબેત્|૮૧|

Adhikarana 31 (81) · Śloka 81

સ્યાત્ત્વસંશોધનાર્થીયે વૃત્તિઃ સ્નેહે વિરિક્તવત્||૮૧||

Adhikarana 32 (82-90) · Śloka 1

સ્નેહદ્વિષઃ સ્નેહનિત્યા મૃદુકોષ્ઠાશ્ચ યે નરાઃ| ક્લેશાસહા મદ્યનિત્યાસ્તેષામિષ્ટા વિચારણા||૮૨|| લાવતૈત્તિરમાયૂરહાંસવારાહકૌક્કુટાઃ| ગવ્યાજૌરભ્રમાત્સ્યાશ્ચ રસાઃ સ્યુઃ સ્નેહને હિતાઃ||૮૩|| યવકોલકુલત્થાશ્ચ સ્નેહાઃ સગુડશર્કરાઃ| દાડિમં દધિ સવ્યોષં રસસંયોગસઙ્ગ્રહઃ||૮૪|| સ્નેહયન્તિ તિલાઃ પૂર્વં જગ્ધાઃ સસ્નેહફાણિતાઃ| કૃશરાશ્ચ બહુસ્નેહાસ્તિલકામ્બલિકાસ્તથા||૮૫|| ફાણિતં શૃઙ્ગવેરં ચ તૈલં ચ સુરયા સહ| પિબેદ્રૂક્ષો ભૃતૈર્માંસૈર્જીર્ણેઽશ્નીયાચ્ચ ભોજનમ્||૮૬|| તૈલં સુરાયા મણ્ડેન વસાં મજ્જાનમેવ વા| પિબન્ સફાણિતં ક્ષીરં નરઃ સ્નિહ્યતિ વાતિકઃ||૮૭|| ધારોષ્ણં સ્નેહસંયુક્તં પીત્વા સશર્કરં પયઃ| નરઃ સ્નિહ્યતિ પીત્વા વા સરં દધ્નઃ સફાણિતમ્||૮૮|| પાઞ્ચપ્રસૃતિકી પેયા પાયસો માષમિશ્રકઃ| ક્ષીરસિદ્ધો બહુસ્નેહઃ સ્નેહયેદચિરાન્નરમ્||૮૯|| સર્પિસ્તૈલવસામજ્જાતણ્ડુલપ્રસૃતૈઃ શૃ(કૃ)તા| પાઞ્ચપ્રસૃતિકી પેયા પેયા સ્નેહનમિચ્છતા||૯૦|| (શૌકરો વા રસઃ સ્નિગ્ધઃ સર્પિર્લવણસંયુતઃ | પીતો દ્વિર્વાસરે યત્નાત્ સ્નેહયેદચિરાન્નરમ્ ||૧||)|

Adhikarana 33 (91-94) · Śloka 94

ગ્રામ્યાનૂપૌદકં માંસં ગુડં દધિ પયસ્તિલાન્| કુષ્ઠી શોથી પ્રમેહી ચ સ્નેહને ન પ્રયોજયેત્||૯૧|| સ્નેહૈર્યથાર્હં તાન્ સિદ્ધૈઃ સ્નેહયેદવિકારિભિઃ| પિપ્પલીભિર્હરીતક્યા સિદ્ધૈસ્ત્રિફલયાઽપિ વા||૯૨|| દ્રાક્ષામલકયૂષાભ્યાં દધ્ના ચામ્લેન સાધયેત્| વ્યોષગર્ભં ભિષક્ સ્નેહં પીત્વા સ્નિહ્યતિ તં નરઃ||૯૩|| યવકોલકુલત્થાનાં રસાઃ ક્ષારઃ સુરા દધિ| ક્ષીરસર્પિશ્ચ તત્ સિદ્ધં સ્નેહનીયં ઘૃતોત્તમમ્||૯૪||

Adhikarana 34 (95) · Śloka 95

તૈલમજ્જવસાસર્પિર્બદરત્રિફલારસૈઃ| યોનિશુક્રપ્રદોષેષુ સાધયિત્વા પ્રયોજયેત્||૯૫||

Adhikarana 35 (96-97) · Śloka 97

ગૃહ્ણાત્યમ્બુ યથા વસ્ત્રં પ્રસ્રવત્યધિકં યથા| યથાગ્નિ જીર્યતિ સ્નેહસ્તથા સ્રવતિ ચાધિકઃ||૯૬|| યથા વાઽઽક્લેદ્ય મૃત્પિણ્ડમાસિક્તં ત્વરયા જલમ્| સ્રવતિ સ્રંસતે સ્નેહસ્તથા ત્વરિતસેવિતઃ||૯૭||

Adhikarana 36 (98) · Śloka 98

લવણોપહિતાઃ સ્નેહાઃ સ્નેહયન્ત્યચિરાન્નરમ્| તદ્ધ્યભિષ્યન્દ્યરૂક્ષં ચ સૂક્ષ્મમુષ્ણં વ્યવાયિ ચ||૯૮||

Adhikarana 37 (99) · Śloka 99

સ્નેહમગ્રે પ્રયુઞ્જીત તતઃ સ્વેદમનન્તરમ્| સ્નેહસ્વેદોપપન્નસ્ય સંશોધનમથેતરત્ ||૯૯||

Adhikarana 38 (100) · Śloka 100

તત્ર શ્લોકઃ- સ્નેહાઃ સ્નેહવિધિઃ કૃત્સ્નવ્યાપત્સિદ્ધિઃ સભેષજા| યથાપ્રશ્નં ભગવતા વ્યાહૃતં ચાન્દ્રભાગિના||૧૦૦||

Adhikarana puShpikA · Śloka 13

ઇત્યગ્નિવેશકૃતે તન્ત્રે ચરકપ્રતિસંસ્કૃતે શ્લોકસ્થાને સ્નેહાધ્યાયો નામ ત્રયોદશોઽધ્યાયઃ સમાપ્તઃ||૧૩||