24. anāgatabādhāpratiṣēdhaḥ

Adhikarana 1 (1-2) · Śloka 2

ಅಥಾತೋಽನಾಗತಾಬಾಧಾಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಉತ್ಥಾಯೋತ್ಥಾಯ ಸತತಂ ಸ್ವಸ್ಥೇನಾರೋಗ್ಯಮಿಚ್ಛತಾ | ಧೀಮತಾ ಯದನುಷ್ಠೇಯಂ ತತ್ ಸರ್ವಂ ಸಮ್ಪ್ರವಕ್ಷ್ಯತೇ ||೩||

Adhikarana 3 (4-12) · Śloka 12

ತತ್ರಾದೌ ದನ್ತಪವನಂ ದ್ವಾದಶಾಙ್ಗುಲಮಾಯತಮ್ | ಕನಿಷ್ಠಿಕಾಪರೀಣಾಹಮೃಜ್ವಗ್ರನ್ಥಿತಮವ್ರಣಮ್ ||೪|| ಅಯುಗ್ಮಗ್ರನ್ಥಿ ಯಚ್ಚಾಪಿ ಪ್ರತ್ಯಗ್ರಂ ಶಸ್ತಭೂಮಿಜಮ್ | ಅವೇಕ್ಷ್ಯರ್ತುಂ ಚ ದೋಷಂ ಚ ರಸಂ ವೀರ್ಯಂ ಚ ಯೋಜಯೇತ್ ||೫|| ಕಷಾಯಂ ಮಧುರಂ ತಿಕ್ತಂ ಕಟುಕಂ ಪ್ರಾತರುತ್ಥಿತಃ | ನಿಮ್ಬಶ್ಚ ತಿಕ್ತಕೇ ಶ್ರೇಷ್ಠಃ ಕಷಾಯೇ ಖದಿರಸ್ತಥಾ ||೬|| ಮಧೂಕೋ ಮಧುರೇ ಶ್ರೇಷ್ಠಃ ಕರಞ್ಜಃ ಕಟುಕೇ ತಥಾ | ಕ್ಷೌದ್ರವ್ಯೋಷತ್ರಿವರ್ಗಾಕ್ತಂ ಸತೈಲಂ ಸೈನ್ಧವೇನ ಚ ||೭|| ಚೂರ್ಣೇನ ತೇಜೋವತ್ಯಾಶ್ಚ ದನ್ತಾನ್ನಿತ್ಯಂ ವಿಶೋಧಯೇತ್ | ಏಕೈಕಂ ಘರ್ಷಯೇದ್ದನ್ತಂ ಮೃದುನಾ ಕೂರ್ಚಕೇನ ಚ ||೮|| ದನ್ತಶೋಧನಚೂರ್ಣೇನ ದನ್ತಮಾಂಸಾನ್ಯಬಾಧಯನ್ | ತದ್ದೌರ್ಗನ್ಧ್ಯೋಪದೇಹೌ ತು ಶ್ಲೇಷ್ಮಾಣಂ ಚಾಪಕರ್ಷತಿ ||೯|| ವೈಶದ್ಯಮನ್ನಾಭಿರುಚಿಂ ಸೌಮನಸ್ಯಂ ಕರೋತಿ ಚ | ನ ಖಾದೇದ್ಗಲತಾಲ್ವೋಷ್ಠಜಿಹ್ವಾರೋಗಸಮುದ್ಭವೇ ||೧೦|| ಅಥಾಸ್ಯಪಾಕೇ ಶ್ವಾಸೇ ಚ ಕಾಸಹಿಕ್ಕಾವಮೀಷು ಚ | ದುರ್ಬಲೋಽಜೀರ್ಣಭಕ್ತಶ್ಚ ಮೂರ್ಚ್ಛಾರ್ತೋ ಮದಪೀಡಿತಃ ||೧೧|| ಶಿರೋರುಜಾರ್ತಸ್ತೃಷಿತಃ ಶ್ರಾನ್ತಃ ಪಾನಕ್ಲಮಾನ್ವಿತಃ | ಅರ್ದಿತೀ ಕರ್ಣಶೂಲೀ ಚ ದನ್ತರೋಗೀ ಚ ಮಾನವಃ ||೧೨||

Adhikarana 4 (13-14) · Śloka 14

ಜಿಹ್ವಾನಿರ್ಲೇಖನಂ ರೌಪ್ಯಂ ಸೌವರ್ಣಂ ವಾರ್ಕ್ಷಮೇವ ಚ | ತನ್ಮಲಾಪಹರಂ ಶಸ್ತಂ ಮೃದು ಶ್ಲಕ್ಷ್ಣಂ ದಶಾಙ್ಗುಲಮ್ ||೧೩|| ಮುಖವೈರಸ್ಯದೌರ್ಗನ್ಧ್ಯಶೋಫಜಾಡ್ಯಹರಂ ಸುಖಮ್ | ದನ್ತದಾರ್ಢ್ಯಕರಂ ರುಚ್ಯಂ ಸ್ನೇಹಗಣ್ಡೂಷಧಾರಣಮ್ ||೧೪||

Adhikarana 5 (15-16) · Śloka 17

ಕ್ಷೀರವೃಕ್ಷಕಷಾಯೈರ್ವಾ ಕ್ಷೀರೇಣ ಚ ವಿಮಿಶ್ರಿತೈಃ | ಭಿಲ್ಲೋಟಕಕಷಾಯೇಣ ತಥೈವಾಮಲಕಸ್ಯ ವಾ ||೧೫|| ಪ್ರಕ್ಷಾಲಯೇನ್ಮುಖಂ ನೇತ್ರೇ ಸ್ವಸ್ಥಃ ಶೀತೋದಕೇನ ವಾ | ನೀಲಿಕಾಂ ಮುಖಶೋಷಂ ಚ ಪಿಡಕಾಂ ವ್ಯಙ್ಗಮೇವ ಚ ||೧೬|| ರಕ್ತಪಿತ್ತಕೃತಾನ್ ರೋಗಾನ್ ಸದ್ಯ ಏವ ವಿನಾಶಯೇತ್ |೧೭|

Adhikarana 6 (17-20) · Śloka 20

ಸುಖಂ ಲಘು ನಿರೀಕ್ಷೇತ ದೃಢಂ ಪಶ್ಯತಿ ಚಕ್ಷುಷಾ ||೧೭|| ಮತಂ ಸ್ರೋತೋಞ್ಜನಂ ಶ್ರೇಷ್ಠಂ ವಿಶುದ್ಧಂ ಸಿನ್ಧುಸಮ್ಭವಮ್ | ದಾಹಕಣ್ಡೂಮಲಘ್ನಂ ಚ ದೃಷ್ಟಿಕ್ಲೇದರುಜಾಪಹಮ್ ||೧೮|| ತೇಜೋರೂಪಾವಹಂ ಚೈವ ಸಹತೇ ಮಾರುತಾತಪೌ | ನ ನೇತ್ರರೋಗಾ ಜಾಯನ್ತೇ ತಸ್ಮಾದಞ್ಜನಮಾಚರೇತ್ ||೧೯|| ಭುಕ್ತವಾಞ್ಛಿರಸಾ ಸ್ನಾತಃ ಶ್ರಾನ್ತಶ್ಛರ್ದನವಾಹನೈಃ | ರಾತ್ರೌ ಜಾಗರಿತಶ್ಚಾಪಿ ನಾಞ್ಜ್ಯಾಜ್ವರಿತ ಏವ ಚ ||೨೦||

Adhikarana 7 (21-24) · Śloka 24

ಕರ್ಪೂರಜಾತೀಕಙ್ಕೋಲಲವಙ್ಗಕಟುಕಾಹ್ವಯೈಃ | ಸಚೂರ್ಣಪೂಗೈಃ ಸಹಿತಂ ಪತ್ರಂ ತಾಮ್ಬೂಲಜಂ ಶುಭಮ್ ||೨೧|| ಮುಖವೈಶದ್ಯಸೌಗನ್ಧ್ಯಕಾನ್ತಿಸೌಷ್ಠವಕಾರಕಮ್ | ಹನುದನ್ತಸ್ವರಮಲಜಿಹ್ವೇನ್ದ್ರಿಯವಿಶೋಧನಮ್ ||೨೨|| ಪ್ರಸೇಕಶಮನಂ ಹೃದ್ಯಂ ಗಲಾಮಯವಿನಾಶನಮ್ | ಪಥ್ಯಂ ಸುಪ್ತೋತ್ಥಿತೇ ಭುಕ್ತೇ ಸ್ನಾತೇ ವಾನ್ತೇ ಚ ಮಾನವೇ ||೨೩|| ರಕ್ತಪಿತ್ತಕ್ಷತಕ್ಷೀಣತೃಷ್ಣಾಮೂರ್ಚ್ಛಾಪರೀತಿನಾಮ್ | ರೂಕ್ಷದುರ್ಬಲಮರ್ತ್ಯಾನಾಂ ನ ಹಿತಂ ಚಾಸ್ಯಶೋಷಿಣಾಮ್ ||೨೪||

Adhikarana 8 (25-26) · Śloka 26

ಶಿರೋಗತಾಂಸ್ತಥಾ ರೋಗಾಞ್ಛಿರೋಭಙ್ಗೋಽಪಕರ್ಷತಿ | ಕೇಶಾನಾಂ ಮಾರ್ದವಂ ದೈರ್ಧ್ಯಂ ಬಹುತ್ವಂ ಸ್ನಿಗ್ಧಕೃಷ್ಣತಾಮ್ ||೨೫|| ಕರೋತಿ ಶಿರಸಸ್ತೃಪ್ತಿಂ ಸುತ್ವಕ್ಕಮಪಿ ಚಾನನಮ್ | ಸನ್ತರ್ಪಣಂ ಚೇನ್ದ್ರಿಯಾಣಾಂ ಶಿರಸಃ ಪ್ರತಿಪೂರಣಮ್ ||೨೬||

Adhikarana 9 (27-28) · Śloka 28

ಮಧುಕಂ ಕ್ಷೀರಶುಕ್ಲಾ ಚ ಸರಲಂ ದೇವದಾರು ಚ | ಕ್ಷುದ್ರಕಂ ಪಞ್ಚನಾಮಾನಂ ಸಮಭಾಗಾನಿ ಸಂಹರೇತ್ ||೨೭|| ತೇಷಾಂ ಕಲ್ಕಕಷಾಯಾಭ್ಯಾಂ ಚಕ್ರತೈಲಂ ವಿಪಾಚಯೇತ್ | ಸದೈವ ಶೀತಲಂ ಜನ್ತೋರ್ಮೂರ್ಧ್ನಿ ತೈಲಂ ಪ್ರದಾಪಯೇತ್ ||೨೮||

Adhikarana 10 (29) · Śloka 29

ಕೇಶಪ್ರಸಾಧನೀ ಕೇಶ್ಯಾ ರಜೋಜನ್ತುಮಲಾಪಹಾ |೨೯|

Adhikarana 11 (29) · Śloka 29

ಹನುಮನ್ಯಾಶಿರಃಕರ್ಣಶೂಲಘ್ನಂ ಕರ್ಣಪೂರಣಮ್ ||೨೯||

Adhikarana 12 (30) · Śloka 30

ಅಭ್ಯಙ್ಗೋ ಮಾರ್ದವಕರಃ ಕಫವಾತನಿರೋಧನಃ | ಧಾತೂನಾಂ ಪುಷ್ಟಿಜನನೋ ಮೃಜಾವರ್ಣಬಲಪ್ರದಃ ||೩೦||

Adhikarana 13 (31-32) · Śloka 32

ಸೇಕಃ ಶ್ರಮಘ್ನೋಽನಿಲಹೃದ್ಭಗ್ನಸನ್ಧಿಪ್ರಸಾಧಕಃ | ಕ್ಷತಾಗ್ನಿದಗ್ಧಾಭಿಹತವಿಘೃಷ್ಟಾನಾಂ ರುಜಾಪಹಃ ||೩೧|| ಜಲಸಿಕ್ತಸ್ಯ ವರ್ಧನ್ತೇ ಯಥಾ ಮೂಲೇಽಙ್ಕುರಾಸ್ತರೋಃ | ತಥಾ ಧಾತುವಿವೃದ್ಧಿರ್ಹಿ ಸ್ನೇಹಸಿಕ್ತಸ್ಯ ಜಾಯತೇ ||೩೨||

Adhikarana 14 (33) · Śloka 33

ಸಿರಾಮುಖೈ ರೋಮಕೂಪೈರ್ಧಮನೀಭಿಶ್ಚ ತರ್ಪಯನ್ | ಶರೀರಬಲಮಾಧತ್ತೇ ಯುಕ್ತಃ ಸ್ನೇಹೋಽವಗಾಹನೇ ||೩೩||

Adhikarana 15 (34) · Śloka 34

ತತ್ರ ಪ್ರಕೃತಿಸಾತ್ಮ್ಯರ್ತುದೇಶದೋಷವಿಕಾರವಿತ್ | ತೈಲಂ ಘೃತಂ ವಾ ಮತಿಮಾನ್ ಯುಞ್ಜ್ಯಾದಭ್ಯಙ್ಗಸೇಕಯೋಃ ||೩೪||

Adhikarana 16 (35-37) · Śloka 37

ಕೇವಲಂ ಸಾಮದೋಷೇಷು ನ ಕಥಞ್ಚನ ಯೋಜಯೇತ್ | ತರುಣಜ್ವರ್ಯಜೀರ್ಣೀ ಚ ನಾಭ್ಯಕ್ತವ್ಯೌ ಕಥಞ್ಚನ ||೩೫|| ತಥಾ ವಿರಿಕ್ತೋ ವಾನ್ತಶ್ಚ ನಿರೂಢೋ ಯಶ್ಚ ಮಾನವಃ | ಪೂರ್ವಯೋಃ ಕೃಚ್ಛ್ರತಾ ವ್ಯಾಧೇರಸಾಧ್ಯತ್ವಮಥಾಪಿ ವಾ ||೩೬|| ಶೇಷಾಣಾಂ ತದಹಃ ಪ್ರೋಕ್ತಾ ಅಗ್ನಿಮಾನ್ದ್ಯಾದಯೋ ಗದಾಃ | ಸನ್ತರ್ಪಣಸಮುತ್ಥಾನಾಂ ರೋಗಾಣಾಂ ನೈವ ಕಾರಯೇತ್ ||೩೭||

Adhikarana 17 (38-50) · Śloka 51

ಶರೀರಾಯಾಸಜನನಂ ಕರ್ಮ ವ್ಯಾಯಾಮಸಞ್ಜ್ಞಿತಮ್ | ತತ್ ಕೃತ್ವಾ ತು ಸುಖಂ ದೇಹಂ ವಿಮೃದ್ಗೀಯಾತ್ ಸಮನ್ತತಃ ||೩೮|| ಶರೀರೋಪಚಯಃ ಕಾನ್ತಿರ್ಗಾತ್ರಾಣಾಂ ಸುವಿಭಕ್ತತಾ | ದೀಪ್ತಾಗ್ನಿತ್ವಮನಾಲಸ್ಯಂ ಸ್ಥಿರತ್ವಂ ಲಾಘವಂ ಮೃಜಾ ||೩೯|| ಶ್ರಮಕ್ಲಮಪಿಪಾಸೋಷ್ಣಶೀತಾದೀನಾಂ ಸಹಿಷ್ಣುತಾ | ಆರೋಗ್ಯಂ ಚಾಪಿ ಪರಮಂ ವ್ಯಾಯಾಮಾದುಪಜಾಯತೇ ||೪೦|| ನ ಚಾಸ್ತಿ ಸದೃಶಂ ತೇನ ಕಿಞ್ಚಿತ್ ಸ್ಥೌಲ್ಯಾಪಕರ್ಷಣಮ್ | ನ ಚ ವ್ಯಾಯಾಮಿನಂ ಮರ್ತ್ಯಮರ್ದಯನ್ತ್ಯರಯೋ ಬಲಾತ್ ||೪೧|| ನ ಚೈನಂ ಸಹಸಾಽಽಕ್ರಮ್ಯ ಜರಾ ಸಮಧಿರೋಹತಿ | ಸ್ಥಿರೀಭವತಿ ಮಾಂಸಂ ಚ ವ್ಯಾಯಾಮಾಭಿರತಸ್ಯ ಚ ||೪೨|| ವ್ಯಾಯಾಮಸ್ವಿನ್ನಗಾತ್ರಸ್ಯ ಪದ್ಭ್ಯಾಮುದ್ವರ್ತಿತಸ್ಯ ಚ | ವ್ಯಾಧಯೋ ನೋಪಸರ್ಪನ್ತಿ ಸಿಂಹಂ ಕ್ಷುದ್ರಮೃಗಾ ಇವ ||೪೩|| ವಯೋರೂಪಗುಣೈರ್ಹೀನಮಪಿ ಕುರ್ಯಾತ್ ಸುದರ್ಶನಮ್ | ವ್ಯಾಯಾಮಂ ಕುರ್ವತೋ ನಿತ್ಯಂ ವಿರುದ್ಧಮಪಿ ಭೋಜನಮ್ ||೪೪|| ವಿದಗ್ಧಮವಿದಗ್ಧಂ ವಾ ನಿರ್ದೋಷಂ ಪರಿಪಚ್ಯತೇ | ವ್ಯಾಯಾಮೋ ಹಿ ಸದಾ ಪಥ್ಯೋ ಬಲಿನಾಂ ಸ್ನಿಗ್ಧಭೋಜಿನಾಮ್ ||೪೫|| ಸ ಚ ಶೀತೇ ವಸನ್ತೇ ಚ ತೇಷಾಂ ಪಥ್ಯತಮಃ ಸ್ಮೃತಃ | ಸರ್ವೇಷ್ವೃತುಷ್ವಹರಹಃ ಪುಮ್ಭಿರಾತ್ಮಹಿತೈಷಿಭಿಃ ||೪೬|| ಬಲಸ್ಯಾರ್ಧೇನ ಕರ್ತವ್ಯೋ ವ್ಯಾಯಾಮೋ ಹನ್ತ್ಯತೋಽನ್ಯಥಾ | ಹೃದಿ ಸ್ಥಾನಸ್ಥಿತೋ ವಾಯುರ್ಯದಾ ವಕ್ತ್ರಂ ಪ್ರಪದ್ಯತೇ ||೪೭|| ವ್ಯಾಯಾಮಂ ಕುರ್ವತೋ ಜನ್ತೋಸ್ತದ್ಬಲಾರ್ಧಸ್ಯ ಲಕ್ಷಣಮ್ | ವಯೋಬಲಶರೀರಾಣಿ ದೇಶಕಾಲಾಶನಾನಿ ಚ ||೪೮|| ಸಮೀಕ್ಷ್ಯ ಕುರ್ಯಾದ್ವ್ಯಾಯಾಮಮನ್ಯಥಾ ರೋಗಮಾಪ್ನುಯಾತ್ | ಕ್ಷಯತೃಷ್ಣಾರುಚಿಚ್ಛರ್ದಿರಕ್ತಪಿತ್ತಭ್ರಮಕ್ಲಮಾಃ ||೪೯|| ಕಾಸಶೋಷಜ್ವರಶ್ವಾಸಾ ಅತಿವ್ಯಾಯಾಮಸಮ್ಭವಾಃ | ರಕ್ತಪಿತ್ತೀ ಕೃಶಃ ಶೋಷೀ ಶ್ವಾಸಕಾಸಕ್ಷತಾತುರಃ ||೫೦|| ಭುಕ್ತವಾನ್ ಸ್ತ್ರೀಷು ಚ ಕ್ಷೀಣಸ್ತೃಡ್ಭ್ರಮಾರ್ತಶ್ಚ ವರ್ಜಯೇತ್ |೫೧|

Adhikarana 18 (51) · Śloka 52

ಉದ್ವರ್ತನಂ ವಾತಹರಂ ಕಫಮೇದೋವಿಲಾಪನಮ್ ||೫೧|| ಸ್ಥಿರೀಕರಣಮಙ್ಗಾನಾಂ ತ್ವಕ್ಪ್ರಸಾದಕರಂ ಪರಮ್ |೫೨|

Adhikarana 19 (52-56) · Śloka 56

ಸಿರಾಮುಖವಿವಿಕ್ತತ್ವಂ ತ್ವಕ್ಸ್ಥಸ್ಯಾಗ್ನೇಶ್ಚ ತೇಜನಮ್ ||೫೨|| ಉದ್ಧರ್ಷಣೋತ್ಸಾದನಾಭ್ಯಾಂ ಜಾಯೇಯಾತಾಮಸಂಶಯಮ್ | ಉತ್ಸಾದನಾದ್ಭವೇತ್ ಸ್ತ್ರೀಣಾಂ ವಿಶೇಷಾತ್ ಕಾನ್ತಿಮದ್ವಪುಃ ||೫೩|| ಪ್ರಹರ್ಷಸೌಭಾಗ್ಯಮೃಜಾಲಾಘವಾದಿಗುಣಾನ್ವಿತಮ್ | ಉದ್ಧರ್ಷಣಂ ತು ವಿಜ್ಞೇಯಂ ಕಣ್ಡೂಕೋಠಾನಿಲಾಪಹಮ್ ||೫೪|| ಊರ್ವೋಃ ಸಞ್ಜನಯತ್ಯಾಶು ಫೇನಕಃ ಸ್ಥೈರ್ಯಲಾಘವೇ | ಕಣ್ಡೂಕೋಠಾನಿಲಸ್ತಮ್ಭಮಲರೋಗಾಪಹಶ್ಚ ಸಃ ||೫೫|| ತೇಜನಂ ತ್ವಗ್ಗತಸ್ಯಾಗ್ನೇಃ ಸಿರಾಮುಖವಿವೇಚನಮ್ | ಉದ್ಧರ್ಷಣಂ ತ್ವಿಷ್ಟಿಕಯಾ ಕಣ್ಡೂಕೋಠವಿನಾಶನಮ್ ||೫೬||

Adhikarana 20 (57-63) · Śloka 64

ನಿದ್ರಾದಾಹಶ್ರಮಹರಂ ಸ್ವೇದಕಣ್ಡೂತೃಷಾಪಹಮ್ | ಹೃದ್ಯಂ ಮಲಹರಂ ಶ್ರೇಷ್ಠಂ ಸರ್ವೇನ್ದ್ರಿಯವಿಬೋಧನಮ್ ||೫೭|| ತನ್ದ್ರಾಪಾಪ್ಮೋಪಶಮನಂ ತುಷ್ಟಿದಂ ಪುಂಸ್ತ್ವವರ್ಧನಮ್ | ರಕ್ತಪ್ರಸಾದನಂ ಚಾಪಿ ಸ್ನಾನಮಗ್ನೇಶ್ಚ ದೀಪನಮ್ ||೫೮|| ಉಷ್ಣೇನ ಶಿರಸಃ ಸ್ನಾನಮಹಿತಂ ಚಕ್ಷುಷಃ ಸದಾ | ಶೀತೇನ ಶಿರಸಃ ಸ್ನಾನಂ ಚಕ್ಷುಷ್ಯಮಿತಿ ನಿರ್ದಿಶೇತ್ ||೫೯|| ಶ್ಲೇಷ್ಮಮಾರುತಕೋಪೇ ತು ಜ್ಞಾತ್ವಾ ವ್ಯಾಧಿಬಲಾಬಲಮ್ | ಕಾಮಮುಷ್ಣಂ ಶಿರಃಸ್ನಾನಂ ಭೈಷಜ್ಯಾರ್ಥಂ ಸಮಾಚರೇತ್ ||೬೦|| ಅತಿಶೀತಾಮ್ಬು ಶೀತೇ ಚ ಶ್ಲೇಷ್ಮಮಾರುತಕೋಪನಮ್ | ಅತ್ಯುಷ್ಣಮುಷ್ಣಕಾಲೇ ಚ ಪಿತ್ತಶೋಣಿತಕೋಪನಮ್ ||೬೧|| ತಚ್ಚಾತಿಸಾರಜ್ವರಿತಕರ್ಣಶೂಲಾನಿಲಾರ್ತಿಷು | ಆಧ್ಮಾನಾರೋಚಕಾಜೀರ್ಣಭುಕ್ತವತ್ಸು ಚ ಗರ್ಹಿತಮ್ ||೬೨|| ಸೌಭಾಗ್ಯದಂ ವರ್ಣಕರಂ ಪ್ರೀತ್ಯೋಜೋಬಲವರ್ಧನಮ್ | ಸ್ವೇದದೌರ್ಗನ್ಧ್ಯವೈವರ್ಣ್ಯಶ್ರಮಘ್ನಮನುಲೇಪನಮ್ ||೬೩|| ಸ್ನಾನಂ ಯೇಷಾಂ ನಿಷಿದ್ಧಂ ತು ತೇಷಾಮಪ್ಯನುಲೇಪನಮ್ |೬೪|

Adhikarana 21 (64) · Śloka 65

ರಕ್ಷೋಘ್ನಮಥ ಚೌಜಸ್ಯಂ ಸೌಭಾಗ್ಯಕರಮುತ್ತಮಮ್ ||೬೪|| ಸುಮನೋಮ್ಬರರತ್ನಾನಾಂ ಧಾರಣಂ ಪ್ರೀತಿವರ್ಧನಮ್ |೬೫|

Adhikarana 22 (65) · Śloka 66

ಮುಖಾಲೇಪಾದ್ದೃಢಂ ಚಕ್ಷುಃ ಪೀನಗಣ್ಡಂ ತಥಾಽಽನನಮ್ ||೬೫|| ಅವ್ಯಙ್ಗಪಿಡಕಂ ಕಾನ್ತಂ ಭವತ್ಯಮ್ಬುಜಸನ್ನಿಭಮ್ |೬೬|

Adhikarana 23 (66-67) · Śloka 68

ಪಕ್ಷ್ಮಲಂ ವಿಶದಂ ಕಾನ್ತಮಮಲೋಜ್ಜ್ವಲಮಣ್ಡಲಮ್ ||೬೬|| ನೇತ್ರಮಞ್ಜನಸಂಯೋಗಾದ್ಭವೇಚ್ಚಾಮಲತಾರಕಮ್ | ಯಶಸ್ಯಂ ಸ್ವರ್ಗ್ಯಮಾಯುಷ್ಯಂ ಧನಧಾನ್ಯವಿವರ್ಧನಮ್ ||೬೭|| ದೇವತಾತಿಥಿವಿಪ್ರಾಣಾಂ ಪೂಜನಂ ಗೋತ್ರವರ್ಧನಮ್ |೬೮|

Adhikarana 24 (68) · Śloka 69

ಆಹಾರಃ ಪ್ರೀಣನಃ ಸದ್ಯೋ ಬಲಕೃದ್ದೇಹಧಾರಕಃ ||೬೮|| ಆಯುಸ್ತೇಜಃಸಮುತ್ಸಾಹಸ್ಮೃತ್ಯೋಜೋಗ್ನಿವಿವರ್ಧನಃ |೬೯|

Adhikarana 25 (69) · Śloka 70

ಪಾದಪ್ರಕ್ಷಾಲನಂ ಪಾದಮಲರೋಗಶ್ರಮಾಪಹಮ್ ||೬೯|| ಚಕ್ಷುಃಪ್ರಸಾದನಂ ವೃಷ್ಯಂ ರಕ್ಷೋಘ್ನಂ ಪ್ರೀತಿವರ್ಧನಮ್ |೭೦|

Adhikarana 26 (70) · Śloka 71

ನಿದ್ರಾಕರೋ ದೇಹಸುಖಶ್ಚಕ್ಷುಷ್ಯಃ ಶ್ರಮಸುಪ್ತಿನುತ್ ||೭೦|| ಪಾದತ್ವಙ್ಮೃದುಕಾರೀ ಚ ಪಾದಾಭ್ಯಙ್ಗಃ ಸದಾ ಹಿತಃ |೭೧|

Adhikarana 27 (71-74) · Śloka 74

ಪಾದರೋಗಹರಂ ವೃಷ್ಯಂ ರಕ್ಷೋಘ್ನಂ ಪ್ರೀತಿವರ್ಧನಮ್ ||೭೧|| ಸುಖಪ್ರಚಾರಮೋಜಸ್ಯಂ ಸದಾ ಪಾದತ್ರಧಾರಣಮ್ | ಅನಾರೋಗ್ಯಮನಾಯುಷ್ಯಂ ಚಕ್ಷುಷೋರುಪಘಾತಕೃತ್ ||೭೨|| ಪಾದಾಭ್ಯಾಮನುಪಾನದ್ಭ್ಯಾಂ ಸದಾ ಚಙ್ಕ್ರಮಣಂ ನೃಣಾಮ್ | ಪಾಪ್ಮೋಪಶಮನಂ ಕೇಶನಖರೋಮಾಪಮಾರ್ಜನಮ್ ||೭೩|| ಹರ್ಷಲಾಘವಸೌಭಾಗ್ಯಕರಮುತ್ಸಾಹವರ್ಧನಮ್ | ಬಾಣವಾರಂ ಮೃಜಾವರ್ಣತೇಜೋಬಲವಿವರ್ಧನಮ್ ||೭೪||

Adhikarana 28 (75) · Śloka 75

ಪವಿತ್ರಂ ಕೇಶ್ಯಮುಷ್ಣೀಷಂ ವಾತಾತಪರಜೋಪಹಮ್ |೭೫|

Adhikarana 29 (75) · Śloka 76

ವರ್ಷಾನಿಲರಜೋಘರ್ಮಹಿಮಾದೀನಾಂ ನಿವಾರಣಮ್ ||೭೫|| ವರ್ಣ್ಯಂ ಚಕ್ಷುಷ್ಯಮೌಜಸ್ಯಂ ಶಙ್ಕರಂ ಛತ್ರಧಾರಣಮ್ |೭೬|

Adhikarana 30 (76-77) · Śloka 78

ಶುನಃ ಸರೀಸೃಪವ್ಯಾಲವಿಷಾಣಿಭ್ಯೋ ಭಯಾಪಹಮ್ ||೭೬|| ಶ್ರಮಸ್ಖಲನದೋಷಘ್ನಂ ಸ್ಥವಿರೇ ಚ ಪ್ರಶಸ್ಯತೇ | ಸತ್ತ್ವೋತ್ಸಾಹಬಲಸ್ಥೈರ್ಯಧೈರ್ಯವೀರ್ಯವಿವರ್ಧನಮ್ ||೭೭|| ಅವಷ್ಟಮ್ಭಕರಂ ಚಾಪಿ ಭಯಘ್ನಂ ದಣ್ಡಧಾರಣಮ್ |೭೮|

Adhikarana 31 (78) · Śloka 78

ಆಸ್ಯಾ ವರ್ಣಕಫಸ್ಥೌಲ್ಯಸೌಕುಮಾರ್ಯಕರೀ ಸುಖಾ ||೭೮||

Adhikarana 32 (79-80) · Śloka 80

ಅಧ್ವಾ ವರ್ಣಕಫಸ್ಥೌಲ್ಯಸೌಕುಮಾರ್ಯವಿನಾಶನಃ | ಅತ್ಯಧ್ವಾ ವಿಪರೀತೋಽಸ್ಮಾಜ್ಜರಾದೌರ್ಬಲ್ಯಕೃಚ್ಚ ಸಃ ||೭೯|| ಯತ್ತು ಚಙ್ಕ್ರಮಣಂ ನಾತಿದೇಹಪೀಡಾಕರಂ ಭವೇತ್ | ತದಾಯುರ್ಬಲಮೇಧಾಗ್ನಿಪ್ರದಮಿನ್ದ್ರಿಯಬೋಧನಮ್ ||೮೦||

Adhikarana 33 (81-82) · Śloka 82

ಶ್ರಮಾನಿಲಹರಂ ವೃಷ್ಯಂ ಪುಷ್ಟಿನಿದ್ರಾಧೃತಿಪ್ರದಮ್ | ಸುಖಂ ಶಯ್ಯಾಸನಂ, ದುಃಖಂ ವಿಪರೀತಗುಣಂ ಮತಮ್ ||೮೧|| ಬಾಲವ್ಯಜನಮೌಜಸ್ಯಂ ಮಕ್ಷಿಕಾದೀನಪೋಹತಿ | ಶೋಷದಾಹಶ್ರಮಸ್ವೇದಮೂರ್ಚ್ಛಾಘ್ನೋ ವ್ಯಜನಾನಿಲಃ ||೮೨||

Adhikarana 34 (83) · Śloka 83

ಪ್ರೀತಿನಿದ್ರಾಕರಂ ವೃಷ್ಯಂ ಕಫವಾತಶ್ರಮಾಪಹಮ್ | ಸಂವಾಹನಂ ಮಾಂಸರಕ್ತತ್ವಕ್ಪ್ರಸಾದಕರಂ ಸುಖಮ್ ||೮೩||

Adhikarana 35 (84-88) · Śloka 88

ಪ್ರವಾತಂ ರೌಕ್ಷ್ಯವೈವರ್ಣ್ಯಸ್ತಮ್ಭಕೃದ್ದಾಹಪಕ್ತಿನುತ್ | ಸ್ವೇದಮೂರ್ಚ್ಛಾಪಿಪಾಸಾಘ್ನಮಪ್ರವಾತಮತೋಽನ್ಯಥಾ ||೮೪|| ಸುಖಂ ವಾತಂ ಪ್ರಸೇವೇತ ಗ್ರೀಷ್ಮೇ ಶರದಿ ಮಾನವಃ | ನಿವಾತಂ ಹ್ಯಾಯುಷೇ ಸೇವ್ಯಮಾರೋಗ್ಯಾಯ ಚ ಸರ್ವದಾ ||೮೫|| ಆತಪಃ ಪಿತ್ತತೃಷ್ಣಾಗ್ನಿಸ್ವೇದಮೂರ್ಚ್ಛಾಭ್ರಮಾಸ್ರಕೃತ್ | ದಾಹವೈವರ್ಣ್ಯಕಾರೀ ಚ ಛಾಯಾ ಚೈತಾನಪೋಹತಿ ||೮೬|| ಅಗ್ನಿರ್ವಾತಕಫಸ್ತಮ್ಭಶೀತವೇಪಥುನಾಶನಃ | ಆಮಾಭಿಷ್ಯನ್ದಜರಣೋ ರಕ್ತಪಿತ್ತಪ್ರದೂಷಣಃ ||೮೭|| ಪುಷ್ಟಿವರ್ಣಬಲೋತ್ಸಾಹಮಗ್ನಿದೀಪ್ತಿಮತನ್ದ್ರಿತಾಮ್ | ಕರೋತಿ ಧಾತುಸಾಮ್ಯಂ ಚ ನಿದ್ರಾ ಕಾಲೇ ನಿಷೇವಿತಾ ||೮೮||

Adhikarana 36 (89) · Śloka 89

ತತ್ರಾದಿತ ಏವ ನೀಚನಖರೋಮ್ಣಾ ಶುಚಿನಾ ಶುಕ್ಲವಾಸಸಾ ಲಘೂಷ್ಣೀಷಚ್ಛತ್ರೋಪಾನತ್ಕೇನ ದಣ್ಡಪಾಣಿನಾ ಕಾಲೇ ಹಿತಮಿತಮಧುರಪೂರ್ವಾಭಿಭಾಷಿಣಾ ಬನ್ಧುಭೂತೇನ ಭೂತಾನಾಂ ಗುರುವೃದ್ಧಾನುಮತೇನ ಸುಸಹಾಯೇನಾನನ್ಯಮನಸಾ ಖಲೂಪಚರಿತವ್ಯಂ, ತದಪಿ ನ ರಾತ್ರೌ, ನ ಕೇಶಾಸ್ಥಿಕಣ್ಟಕಾಶ್ಮತುಷಭಸ್ಮೋತ್ಕರಕಪಾಲಾಙ್ಗಾರಾಮೇಧ್ಯಸ್ನಾನಬಲಿಭೂಮಿಷು, ನ ವಿಷಮೇನ್ದ್ರಕೀಲಚತುಷ್ಪಥಶ್ವಭ್ರಾಣಾಮುಪರಿಷ್ಟಾತ್ ||೮೯||

Adhikarana 37 (90) · Śloka 90

ನ ರಾಜದ್ವಿಷ್ಟಪರುಷಪೈಶುನ್ಯಾನೃತಾನಿ ವದೇತ್, ನ ದೇವಬ್ರಾಹ್ಮಣಪಿತೃಪರಿವಾದಾಂಶ್ಚ; ನ ನರೇನ್ದ್ರದ್ವಿಷ್ಟೋನ್ಮತ್ತಪತಿತಕ್ಷುದ್ರನೀಚಾನುಪಾಸೀತ ||೯೦||

Adhikarana 38 (91) · Śloka 91

ವೃಕ್ಷಪರ್ವತಪ್ರಪಾತವಿಷಮವಲ್ಮೀಕದುಷ್ಟವಾಜಿಕುಞ್ಜರಾದ್ಯಧಿರೋಹಣಾನಿ ಪರಿಹರೇತ್, ಪೂರ್ಣನದೀಸಮುದ್ರಾವಿದಿತಪಲ್ವಲಶ್ವಭ್ರಕೂಪಾವತರಣಾನಿ, ಭಿನ್ನಶೂನ್ಯಾಗಾರಶ್ಮಶಾನವಿಜನಾರಣ್ಯವಾಸಾಗ್ನಿಸಮ್ಭ್ರಮವ್ಯಾಲಭುಜಙ್ಗಕೀಟಸೇವಾಶ್ಚ, ಗ್ರಾಮಾಘಾತಕಲಹಶಸ್ತ್ರಸನ್ನಿಪಾತವ್ಯಾಲಸರೀಸೃಪಶೃಙ್ಗಿಸನ್ನಿಕರ್ಷಾಂಶ್ಚ ||೯೧||

Adhikarana 39 (92) · Śloka 92

ನಾಗ್ನಿಗೋಗುರುಬ್ರಾಹ್ಮಣಪ್ರೇಙ್ಖಾದಮ್ಪತ್ಯನ್ತರೇಣ ಯಾಯಾತ್ | ನ ಶವಮನುಯಾಯಾತ್ | ದೇವಗೋಬ್ರಾಹ್ಮಣಚೈತ್ಯಧ್ವಜರೋಗಿಪತಿತಪಾಪಕಾರಿಣಾಂ ಚ ಛಾಯಾಂ ನಾಕ್ರಮೇತ | ನಾಸ್ತಂ ಗಚ್ಛನ್ತಮುದ್ಯನ್ತಂ ವಾಽಽದಿತ್ಯಂ ವೀಕ್ಷೇತ | ಗಾಂ ಧಾಪಯನ್ತೀಂ ಧಯನ್ತೀಂ ಪರಶಸ್ಯಂ ವಾ ಚರನ್ತೀಂ ನ ಕಸ್ಮೈಚಿದಾಚಕ್ಷೀತ, ನ ಚೋಲ್ಕಾಪಾತೋತ್ಪಾತೇನ್ದ್ರಧನೂಂಷಿ | ನಾಗ್ನಿಂ ಮುಖೇನೋಪಧಮೇತ್ | ನಾಪೋ ಭೂಮಿಂ ವಾ ಪಾಣಿಪಾದೇನಾಭಿಹನ್ಯಾತ್ ||೯೨||

Adhikarana 40 (93) · Śloka 93

ನ ವೇಗಾನ್ ಧಾರಯೇದ್ ವಾತಮೂತ್ರಪುರೀಷಾದೀನಾಮ್ | ನ ಬಹಿರ್ವೇಗಾನ್ ಗ್ರಾಮನಗರದೇವತಾಯತನಶ್ಮಶಾನಚತುಷ್ಪಥಸಲಿಲಾಶಯಪಥಿ ಸನ್ನಿಕೃಷ್ಟಾನುತ್ಸೃಜೇನ್ನ ಪ್ರಕಾಶಂ ನ ವಾಯ್ವಗ್ನಿಸಲಿಲಸೋಮಾರ್ಕಗೋಗುರುಪ್ರತಿಮುಖಮ್ ||೯೩||

Adhikarana 41 (94) · Śloka 94

ನ ಭೂಮಿಂ ವಿಲಿಖೇತ್, ನಾಸಂವೃತಮುಖಃ ಸದಸಿ ಜೃಮ್ಭೋದ್ಗಾರಕಾಸಶ್ವಾಸಕ್ಷವಥೂನುತ್ಸೃಜೇತ್, ನ ಪರ್ಯಙ್ಕಿಕಾವಷ್ಟಮ್ಭಪಾದಪ್ರಸಾರಣಾನಿ ಗುರುಸನ್ನಿಧೌ ಕುರ್ಯಾತ್ ||೯೪||

Adhikarana 42 (95) · Śloka 95

ನ ಬಾಲಕರ್ಣನಾಸಾಸ್ರೋತೋದಶನಾಕ್ಷಿವಿವರಾಣ್ಯಭಿಕುಷ್ಣೀಯಾತ್ , ನ ವೀಜಯೇತ್ ಕೇಶಮುಖನಖವಸ್ತ್ರಗಾತ್ರಾಣಿ, ನ ಗಾತ್ರನಖವಕ್ತ್ರವಾದಿತ್ರಂ ಕುರ್ಯಾತ್, ನ ಕಾಷ್ಠಲೋಷ್ಟತೃಣಾದೀನಭಿಹನ್ಯಾಚ್ಛಿನ್ದ್ಯಾದ್ಭಿನ್ದ್ಯಾದ್ವಾ ||೯೫||

Adhikarana 43 (96) · Śloka 96

ನ ಪ್ರತಿವಾತಾತಪಂ ಸೇವೇತ, ನ ಭುಕ್ತಮಾತ್ರೋಽಗ್ನಿಮುಪಾಸೀತ, ನೋತ್ಕಟಕಾಲ್ಪಕಾಷ್ಠಾಸನಮಧ್ಯಾಸೀತ, ನ ಗ್ರೀವಾಂ ವಿಷಮಂ ಧಾರಯೇತ್, ನ ವಿಷಮಕಾಯಃ ಕ್ರಿಯಾಂ ಭಜೇತ ಭುಞ್ಜೀತ ವಾ, ನ ಪ್ರತತಮೀಕ್ಷೇತ ವಿಶೇಷಾಜ್ಜ್ಯೋತಿರ್ಭಾಸ್ಕರಸೂಕ್ಷ್ಮಚಲಭ್ರಾನ್ತಾನಿ, ನ ಭಾರಂ ಶಿರಸಾ ವಹೇತ್, ನ ಸ್ವಪ್ನಜಾಗರಣಶಯನಾಸನಸ್ಥಾನಚಙ್ಕ್ರಮಣಯಾನವಾಹನಪ್ರಧಾವನಲಙ್ಘನಪ್ಲವನಪ್ರತರಣಹಾಸ್ಯಭಾಷ್ಯವ್ಯವಾಯವ್ಯಾಯಾಮಾದೀನುಚಿತಾನಪ್ಯತಿಸೇವೇತ ||೯೬||

Adhikarana 44 (97) · Śloka 97

ಉಚಿತಾದಪ್ಯಹಿತಾತ್ ಕ್ರಮಶೋ ವಿರಮೇತ್, ಹಿತಮನುಚಿತಮಪ್ಯಾಸೇವೇತ ಕ್ರಮಶಃ, ನ ಚೈಕಾನ್ತತಃ ಪಾದಹೀನಾತ್ ||೯೭||

Adhikarana 45 (98) · Śloka 98

ನಾವಾಕ್ಶಿರಾಃ ಶಯೀತ, ನ ಭಿನ್ನಪಾತ್ರೇ ಭುಞ್ಜೀತ, ನ ವಿನಾ ಪಾತ್ರೇಣ, ನಾಞ್ಜಲಿಪುಟೇನಾಪಃ ಪಿಬೇತ್, ಕಾಲೇ ಹಿತಮಿತಸ್ನಿಗ್ಧಮಧುರಪ್ರಾಯಮಾಹಾರಂ ವೈದ್ಯಪ್ರತ್ಯವೇಕ್ಷಿತಮಶ್ನೀಯಾತ್, ಗ್ರಾಮಗಣಗಣಿಕಾಪಣಿಕಶತ್ರುಸತ್ರಶಠಪತಿತಭೋಜನಾನಿ ಪರಿಹರೇತ್, ಶೇಷಾಣ್ಯಪಿ ಚಾನಿಷ್ಟರೂಪರಸಗನ್ಧಸ್ಪರ್ಶಶಬ್ದಮಾನಸಾನಿ, ಅನ್ಯಾನ್ಯೇವಙ್ಗುಣಾನ್ಯಪಿ ಸಮ್ಭ್ರಮದತ್ತಾನಿ, (ತಾನ್ಯಪಿ) ಮಕ್ಷಿಕಾಬಾಲೋಪಹತಾನಿ , ನಾಪ್ರಕ್ಷಾಲಿತಪಾದೋ ಭುಞ್ಜೀತ ನ ಮೂತ್ರೋಚ್ಚಾರಪೀಡಿತೋ ನ ಸನ್ಧ್ಯಯೋರ್ನಾನುಪಾಶ್ರಿತೋ ನಾತೀತಕಾಲಂ ಹೀನಮತಿಮಾತ್ರಂ (ನೋದ್ಧೃತಸ್ನೇಹಂ) ಚೇತಿ ||೯೮||

Adhikarana 46 (99-100) · Śloka 100

ನ ಭುಞ್ಜೀತೋದ್ಧೃತಸ್ನೇಹಂ ನಷ್ಟಂ ಪರ್ಯುಷಿತಂ ಪಯಃ | ನ ನಕ್ತಂ ದಧಿ ಭುಞ್ಜೀತ ನ ಚಾಪ್ಯಘೃತಶರ್ಕರಮ್ ||೯೯|| ನಾಮುದ್ಗಯೂಷಂ ನಾಕ್ಷೌದ್ರಂ ನೋಷ್ಣಂ ನಾಮಲಕೈರ್ವಿನಾ | ಅನ್ಯಥಾ ಜನಯೇತ್ ಕುಷ್ಠವಿಸರ್ಪಾದೀನ್ ಗದಾನ್ ಬಹೂನ್ | ನಾತ್ಮಾನಮುದಕೇ ಪಶ್ಯೇನ್ನ ನಗ್ನಃ ಪ್ರವಿಶೇಜ್ಜಲಮ್ ||೧೦೦||

Adhikarana 47 (101) · Śloka 101

ದ್ಯೂತಮದ್ಯಾತಿಸೇವಾಪ್ರತಿಭೂತ್ವಸಾಕ್ಷಿತ್ವಸಮಾಹ್ವಾನಗೋಷ್ಠೀವಾದಿತ್ರಾಣಿ ನ ಸೇವೇತ, ಸ್ರಜಂ ಛತ್ರೋಪಾನಹೌ ಕನಕಮತೀತವಾಸಾಂಸಿ ನ ಚಾನ್ಯೈರ್ಧೃತಾನಿ ಧಾರಯೇತ್, ಬ್ರಾಹ್ಮಣಮಗ್ನಿಂ ಗಾಂ ಚ ನೋಚ್ಛಿಷ್ಟಃ ಸ್ಪೃಶೇತ್ ||೧೦೧||

Adhikarana 48 (102-106) · Śloka 107

ಭವನ್ತಿ ಚಾತ್ರ- ಯಸ್ಮಿನ್ ಯಸ್ಮಿನ್ನೃತೌ ಯೇ ಯೇ ದೋಷಾಃ ಕುಪ್ಯನ್ತಿ ದೇಹಿನಾಮ್ | ತೇಷು ತೇಷು ಪ್ರದಾತವ್ಯಾ ರಸಾಸ್ತೇ ತೇ ವಿಜಾನತಾ ||೧೦೨|| ವರ್ಷಾಸು ನ ಪಿಬೇತ್ತೋಯಂ ಪಿಬೇಚ್ಛರದಿ ಮಾತ್ರಯಾ | ವರ್ಷಾಸು ಚತುರೋ ಮಾಸಾನ್ ಮಾತ್ರಾವದುದಕಂ ಪಿಬೇತ್ ||೧೦೩|| ಉಷ್ಣಂ ಹೈಮೇ ವಸನ್ತೇ ಚ ಕಾಮಂ ಗ್ರೀಷ್ಮೇ ತು ಶೀತಲಮ್ | ಹೇಮನ್ತೇ ಚ ವಸನ್ತೇ ಚ ಸೀಧ್ವರಿಷ್ಟೌ ಪಿಬೇನ್ನರಃ ||೧೦೪|| ಶೃತಶೀತಂ ಪಯೋ ಗ್ರೀಷ್ಮೇ ಪ್ರಾವೃಟ್ಕಾಲೇ ರಸಂ ಪಿಬೇತ್ | ಯೂಷಂ ವರ್ಷತಿ, ತಸ್ಯಾನ್ತೇ ಪ್ರಪಿಬೇಚ್ಛೀತಲಂ ಜಲಮ್ ||೧೦೫|| ಸ್ವಸ್ಥ ಏವಮತೋಽನ್ಯಸ್ತು ದೋಷಾಹಾರಗತಾನುಗಃ | ಸ್ನೇಹಂ ಸೈನ್ಧವಚೂರ್ಣೇನ ಪಿಪ್ಪಲೀಭಿಶ್ಚ ಸಂಯುತಮ್ ||೧೦೬|| ಪಿಬೇದಗ್ನಿವಿವೃದ್ಧ್ಯರ್ಥಂ ನ ಚ ವೇಗಾನ್ ವಿಧಾರಯೇತ್ |೧೦೭|

Adhikarana 49 (107-109) · Śloka 109

ಅಗ್ನಿದೀಪ್ತಿಕರಂ ನೄಣಾಂ ರೋಗಾಣಾಂ ಶಮನಂ ಪ್ರತಿ ||೧೦೭|| ಪ್ರಾವೃಟ್ಶರದ್ವಸನ್ತೇಷು ಸಮ್ಯಕ್ ಸ್ನೇಹಾದಿಮಾಚರೇತ್ | ಕಫೇ ಪ್ರಚ್ಛರ್ದನಂ ಪಿತ್ತೇ ವಿರೇಕೋ ಬಸ್ತಿರೀರಣೇ ||೧೦೮|| ಶಸ್ಯತೇ ತ್ರಿಷ್ವಪಿ ಸದಾ ವ್ಯಾಯಾಮೋ ದೋಷನಾಶನಃ | ಭುಕ್ತಂ ವಿರುದ್ಧಮಪ್ಯನ್ನಂ ವ್ಯಾಯಾಮಾನ್ನ ಪ್ರದುಷ್ಯತಿ ||೧೦೯||

Adhikarana 50 (110-129) · Śloka 130

ಉತ್ಸರ್ಗಮೈಥುನಾಹಾರಶೋಧನೇ ಸ್ಯಾತ್ತು ತನ್ಮನಾಃ | ನೇಚ್ಛೇದ್ದೋಷಚಯಾತ್ ಪ್ರಾಜ್ಞಃ ಪೀಡಾಂ ವಾ ಕಾಯಮಾನಸೀಮ್ ||೧೧೦|| ಅತಿಸ್ತ್ರೀಸಮ್ಪ್ರಯೋಗಾಚ್ಚ ರಕ್ಷೇದಾತ್ಮಾನಮಾತ್ಮವಾನ್ | ಶೂಲಕಾಸಜ್ವರಶ್ವಾಸಕಾರ್ಶ್ಯಪಾಣ್ಡ್ವಾಮಯಕ್ಷಯಾಃ ||೧೧೧|| ಅತಿವ್ಯವಾಯಾಜ್ಜಾಯನ್ತೇ ರೋಗಾಶ್ಚಾಕ್ಷೇಪಕಾದಯಃ | ಆಯುಷ್ಮನ್ತೋ ಮನ್ದಜರಾ ವಪುರ್ವರ್ಣಬಲಾನ್ವಿತಾಃ ||೧೧೨|| ಸ್ಥಿರೋಪಚಿತಮಾಂಸಾಶ್ಚ ಭವನ್ತಿ ಸ್ತ್ರೀಷು ಸಂಯತಾಃ | ತ್ರಿಭಿಸ್ತ್ರಿಭಿರಹೋಭಿರ್ವಾ ಸಮೀಯಾತ್ ಪ್ರಮದಾಂ ನರಃ ||೧೧೩|| ಸರ್ವೇಷ್ವೃತುಷು, ಘರ್ಮೇಷು ಪಕ್ಷಾತ್ ಪಕ್ಷಾದ್ವ್ರಜೇದ್ಬುಧಃ | ರಜಸ್ವಲಾಮಕಾಮಾಂ ಚ ಮಲಿನಾಮಪ್ರಿಯಾಂ ತಥಾ ||೧೧೪|| ವರ್ಣವೃದ್ಧಾಂ ವಯೋವೃದ್ಧಾಂ ತಥಾ ವ್ಯಾಧಿಪ್ರಪೀಡಿತಾಮ್ | ಹೀನಾಙ್ಗೀಂ ಗರ್ಭಿಣೀಂ ದ್ವೇಷ್ಯಾಂ ಯೋನಿದೋಷಸಮನ್ವಿತಾಮ್ ||೧೧೫|| ಸಗೋತ್ರಾಂ ಗುರುಪತ್ನೀಂ ಚ ತಥಾ ಪ್ರವ್ರಜಿತಾಮಪಿ | ಸನ್ಧ್ಯಾಪರ್ವಸ್ವಗಮ್ಯಾಂ ಚ ನೋಪೇಯಾತ್ ಪ್ರಮದಾಂ ನರಃ ||೧೧೬|| ಗೋಸರ್ಗೇ ಚಾರ್ಧರಾತ್ರೇ ಚ ತಥಾ ಮಧ್ಯನ್ದಿನೇಷು ಚ | ಲಜ್ಜಾಸಮಾವಹೇ ದೇಶೇ ವಿವೃತೇಽಶುದ್ಧ ಏವ ಚ ||೧೧೭|| ಕ್ಷುಧಿತೋ ವ್ಯಾಧಿತಶ್ಚೈವ ಕ್ಷುಬ್ಧಚಿತ್ತಶ್ಚ ಮಾನವಃ | ವಾತವಿಣ್ಮೂತ್ರವೇಗೀ ಚ ಪಿಪಾಸುರತಿದುರ್ಬಲಃ ||೧೧೮|| ತಿರ್ಯಗ್ಯೋನಾವಯೋನೌ ಚ ಪ್ರಾಪ್ತಶುಕ್ರವಿಧಾರಣಮ್ | ದುಷ್ಟಯೋನೌ ವಿಸರ್ಗಂ ತು ಬಲವಾನಪಿ ವರ್ಜಯೇತ್ ||೧೧೯|| ರೇತಸಶ್ಚಾತಿಮಾತ್ರಂ ತು ಮೂರ್ಧಾವರಣಮೇವ ಚ | ಸ್ಥಿತಾವುತ್ತಾನಶಯನೇ ವಿಶೇಷೇಣೈವ ಗರ್ಹಿತಮ್ ||೧೨೦|| ಕ್ರೀಡಾಯಾಮಪಿ ಮೇಧಾವೀ ಹಿತಾರ್ಥೀ ಪರಿವರ್ಜಯೇತ್ | ರಜಸ್ವಲಾಂ ಪ್ರಾಪ್ತವತೋ ನರಸ್ಯಾನಿಯತಾತ್ಮನಃ ||೧೨೧|| ದೃಷ್ಟ್ಯಾಯುಸ್ತೇಜಸಾಂ ಹಾನಿರಧರ್ಮಶ್ಚ ತತೋ ಭವೇತ್ | ಲಿಙ್ಗಿನೀಂ ಗುರುಪತ್ನೀಂ ಚ ಸಗೋತ್ರಾಮಥ ಪರ್ವಸು ||೧೨೨|| ವೃದ್ಧಾಂ ಚ ಸನ್ಧ್ಯಯೋಶ್ಚಾಪಿ ಗಚ್ಛತೋ ಜೀವಿತಕ್ಷಯಃ | ಗರ್ಭಿಣ್ಯಾ ಗರ್ಭಪೀಡಾ ಸ್ಯಾದ್ ವ್ಯಾಧಿತಾಯಾಂ ಬಲಕ್ಷಯಃ ||೧೨೩|| ಹೀನಾಙ್ಗೀಂ ಮಲಿನಾಂ ದ್ವೇಷ್ಯಾಂ ಕಾಮಂ ವನ್ಧ್ಯಾಮಸಂವೃತೇ | ದೇಶೇಽಶುದ್ಧೇ ಚ ಶುಕ್ರಸ್ಯ ಮನಸಶ್ಚ ಕ್ಷಯೋ ಭವೇತ್ ||೧೨೪|| ಕ್ಷುಧಿತಃ ಕ್ಷುಬ್ಧಚಿತ್ತಶ್ಚ ಮಧ್ಯಾಹ್ನೇ ತೃಷಿತೋಽಬಲಃ | ಸ್ಥಿತಶ್ಚ ಹಾನಿಂ ಶುಕ್ರಸ್ಯ ವಾಯೋಃ ಕೋಪಂ ಚ ವಿನ್ದತಿ ||೧೨೫|| ಅತಿಪ್ರಸಙ್ಗಾದ್ಭವತಿ ಶೋಷಃ ಶುಕ್ರಕ್ಷಯಾವಹಃ | ವ್ಯಾಧಿತಸ್ಯ ರುಜಾ ಪ್ಲೀಹ್ನಿ ಮೃತ್ಯುರ್ಮೂರ್ಚ್ಛಾ ಚ ಜಾಯತೇ ||೧೨೬|| ಪ್ರತ್ಯೂಷಸ್ಯರ್ಧರಾತ್ರೇ ಚ ವಾತಪಿತ್ತ ಪ್ರಕುಪ್ಯತಃ | ತಿರ್ಯಗ್ಯೋನಾವಯೋನೌ ಚ ದುಷ್ಟಯೋನೌ ತಥೈವ ಚ ||೧೨೭|| ಉಪದಂಶಸ್ತಥಾ ವಾಯೋಃ ಕೋಪಃ ಶುಕ್ರಸ್ಯ ಚ ಕ್ಷಯಃ | ಉಚ್ಚಾರಿತೇ ಮೂತ್ರಿತೇ ಚ ರೇತಸಶ್ಚ ವಿಧಾರಣೇ ||೧೨೮|| ಉತ್ತಾನೇ ಚ ಭವೇಚ್ಛೀಧ್ರಂ ಶುಕ್ರಾಶ್ಮರ್ಯಾಸ್ತು ಸಮ್ಭವಃ | ಸರ್ವಂ ಪರಿಹರೇತ್ತಸ್ಮಾದೇತಲ್ಲೋಕದ್ವಯೇಽಹಿತಮ್ ||೧೨೯|| ಶುಕ್ರಂ ಚೋಪಸ್ಥಿತಂ ಮೋಹಾನ್ನ ಸನ್ಧಾರ್ಯಂ ಕಥಞ್ಚನ |೧೩೦|

Adhikarana 51 (130-132) · Śloka 132

ವಯೋರೂಪಗುಣೋಪೇತಾಂ ತುಲ್ಯಶೀಲಾಂ ಕುಲಾನ್ವಿತಾಮ್ ||೧೩೦|| ಅಭಿಕಾಮೋಽಭಿಕಾಮಾಂ ತು ಹೃಷ್ಟೋ ಹೃಷ್ಟಾಮಲಙ್ಕೃತಾಮ್ | ಸೇವೇತ ಪ್ರಮದಾಂ ಯುಕ್ತ್ಯಾ ವಾಜೀಕರಣಬೃಂಹಿತಃ ||೧೩೧|| ಭಕ್ಷ್ಯಾಃ ಸಶರ್ಕರಾಃ ಕ್ಷೀರಂ ಸಸಿತಂ ರಸ ಏವ ಚ | ಸ್ನಾನಂ ಸವ್ಯಜನಂ ಸ್ವಪ್ನೋ ವ್ಯವಾಯಾನ್ತೇ ಹಿತಾನಿ ತು ||೧೩೨||

Adhikarana 52 (133) · Śloka 133

ಮುಖಮಾತ್ರಂ ಸಮಾಸೇನ ಸದ್ವೃತ್ತಸ್ಯೈತದೀರಿತಮ್ | ಆರೋಗ್ಯಮಾಯುರರ್ಥೋ ವಾ ನಾಸದ್ಭಿಃ ಪ್ರಾಪ್ಯತೇ ನೃಭಿಃ ||೧೩೩||

Adhikarana puShpikA · Śloka 24

ಇತಿ ಸುಶ್ರುತಸಂಹಿತಾಯಾಂ ಚಿಕಿತ್ಸಾಸ್ಥಾನೇಽನಾಗತಾಬಾಧಚಿಕಿತ್ಸಿತಂ ನಾಮ ಚತುರ್ವಿಂಶೋಽಧ್ಯಾಯಃ ||೨೪||