3. garbhāvakrāntiśārīram

Adhikarana 1 (1-2) · Śloka 2

ಅಥಾತೋ ಗರ್ಭಾವಕ್ರಾನ್ತಿಂ ಶಾರೀರಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಸೌಮ್ಯಂ ಶುಕ್ರಮಾರ್ತವಮಾಗ್ನೇಯಮಿತರೇಷಾಮಪ್ಯತ್ರ ಭೂತಾನಾಂ ಸಾನ್ನಿಧ್ಯಮಸ್ತ್ಯಣುನಾ ವಿಶೇಷೇಣ, ಪರಸ್ಪರೋಪಕಾರಾತ್ (ಪರಸ್ಪರಾನುಗ್ರಹಾತ್,) ಪರಸ್ಪರಾನುಪ್ರವೇಶಾಚ್ಚ ||೩||

Adhikarana 3 (4) · Śloka 4

ತತ್ರ ಸ್ತ್ರೀಪುಂಸಯೋಃ ಸಂಯೋಗೇ ತೇಜಃ ಶರೀರಾದ್ವಾಯುರುದೀರಯತಿ, ತತಸ್ತೇಜೋನಿಲಸನ್ನಿಪಾತಾಚ್ಛುಕ್ರಂ ಚ್ಯುತಂ ಯೋನಿಮಭಿಪ್ರತಿಪದ್ಯತೇ ಸಂಸೃಜ್ಯತೇ ಚಾರ್ತವೇನ, ತತೋಽಗ್ನೀಷೋಮಸಂಯೋಗಾತ್ ಸಂಸೃಜ್ಯಮಾನೋ ಗರ್ಭಾಶಯಮನುಪ್ರತಿಪದ್ಯತೇ ಕ್ಷೇತ್ರಜ್ಞೋ ವೇದಯಿತಾ ಸ್ಪ್ರಷ್ಟಾ ಘ್ರಾತಾ ದ್ರಷ್ಟಾ ಶ್ರೋತಾ ರಸಯಿತಾ ಪುರುಷಃ ಸ್ರಷ್ಟಾ ಗನ್ತಾ ಸಾಕ್ಷೀ ಧಾತಾ ವಕ್ತಾ ಯಃ ಕೋಽಸಾವಿತ್ಯೇವಮಾದಿಭಿಃ ಪರ್ಯಾಯವಾಚಕೈರ್ನಾಮಭಿರಭಿಧೀಯತೇ ದೈವಸಂಯೋಗಾದಕ್ಷಯೋಽವ್ಯಯೋಽಚಿನ್ತ್ಯೋ ಭೂತಾತ್ಮನಾ ಸಹಾನ್ವಕ್ಷಂ ಸತ್ತ್ವರಜಸ್ತಮೋಭಿರ್ದೈವಾಸುರೈರಪರೈಶ್ಚ ಭಾವೈರ್ವಾಯುನಾಽಭಿಪ್ರೇರ್ಯಮಾಣೋ ಗರ್ಭಾಶಯಮನುಪ್ರವಿಶ್ಯಾವತಿಷ್ಠತೇ ||೪||

Adhikarana 4 (5) · Śloka 5

ತತ್ರ ಶುಕ್ರಬಾಹುಲ್ಯಾತ್ ಪುಮಾನ್, ಆರ್ತವಬಾಹುಲ್ಯಾತ್ ಸ್ತ್ರೀ, ಸಾಮ್ಯಾದುಭಯೋರ್ನಪುಂಸಕಮಿತಿ ||೫||

Adhikarana 5 (6) · Śloka 6

ಋತುಸ್ತು ದ್ವಾದಶರಾತ್ರಂ ಭವತಿ ದೃಷ್ಟಾರ್ತವಃ; ಅದೃಷ್ಟಾರ್ತವಾಽಪ್ಯಸ್ತೀತ್ಯೇಕೇ ಭಾಷನ್ತೇ ||೬||

Adhikarana 6 (7-8) · Śloka 8

ಭವನ್ತಿ ಚಾತ್ರ- ಪೀನಪ್ರಸನ್ನವದನಾಂ ಪ್ರಕ್ಲಿನ್ನಾತ್ಮಮುಖದ್ವಿಜಾಮ್ | ನರಕಾಮಾಂ ಪ್ರಿಯಕಥಾಂ ಸ್ರಸ್ತಕುಕ್ಷ್ಯಕ್ಷಿಮೂರ್ಧಜಾಮ್ ||೭|| ಸ್ಫುರದ್ಭುಜಕುಚಶ್ರೋಣಿನಾಭ್ಯೂರುಜಘನಸ್ಫಿಚಾಮ್ | ಹರ್ಷೌತ್ಸುಕ್ಯಪರಾಂ ಚಾಪಿ ವಿದ್ಯಾದೃತುಮತೀಮಿತಿ ||೮||

Adhikarana 7 (9) · Śloka 9

ನಿಯತಂ ದಿವಸೇಽತೀತೇ ಸಙ್ಕುಚತ್ಯಮ್ಬುಜಂ ಯಥಾ | ಋತೌ ವ್ಯತೀತೇ ನಾರ್ಯಾಸ್ತು ಯೋನಿಃ ಸಂವ್ರಿಯತೇ ತಥಾ ||೯||

Adhikarana 8 (10) · Śloka 10

ಮಾಸೇನೋಪಚಿತಂ ಕಾಲೇ ಧಮನೀಭ್ಯಾಂ ತದಾರ್ತವಮ್ | ಈಷತ್ಕೃಷ್ಣಂ ವಿವರ್ಣಂ ಚ ವಾಯುರ್ಯೋನಿಮುಖಂ ನಯೇತ್ ||೧೦||

Adhikarana 9 (11) · Śloka 11

ತದ್ವರ್ಷಾದ್ದ್ವಾದಶಾತ್ ಕಾಲೇ ವರ್ತಮಾನಮಸೃಕ್ ಪುನಃ | ಜರಾಪಕ್ವಶರೀರಾಣಾಂ ಯಾತಿ ಪಞ್ಚಾಶತಃ ಕ್ಷಯಮ್ ||೧೧||

Adhikarana 10 (12) · Śloka 12

ಯುಗ್ಮೇಷು ತು ಪುಮಾನ್ ಪ್ರೋಕ್ತೋ ದಿವಸೇಷ್ವನ್ಯಥಾಽಬಲಾ | ಪುಷ್ಪಕಾಲೇ ಶುಚಿಸ್ತಸ್ಮಾದಪತ್ಯಾರ್ಥೋ ಸ್ತ್ರಿಯಂ ವ್ರಜೇತ್ ||೧೨||

Adhikarana 11 (13) · Śloka 13

ತತ್ರ ಸದ್ಯೋಗೃಹೀತಗರ್ಭಾಯಾ ಲಿಙ್ಗಾನಿ- ಶ್ರಮೋ ಗ್ಲಾನಿಃ ಪಿಪಾಸಾ ಸಕ್ಥಿಸದನಂ ಶುಕ್ರಶೋಣಿತಯೋರವಬನ್ಧಃ ಸ್ಫುರಣಂ ಚ ಯೋನೇಃ ||೧೩||

Adhikarana 12 (14-15) · Śloka 15

ಸ್ತನಯೋಃ ಕೃಷ್ಣಮುಖತಾ ರೋಮರಾಜ್ಯುದ್ಗಮಸ್ತಥಾ | ಅಕ್ಷಿಪಕ್ಷ್ಮಾಣಿ ಚಾಪ್ಯಸ್ಯಾಃ ಸಮ್ಮೀಲ್ಯನ್ತೇ ವಿಶೇಷತಃ ||೧೪|| ಅಕಾಮತಶ್ಛರ್ದಯತಿ ಗನ್ಧಾದುದ್ವಿಜತೇ ಶುಭಾತ್ | ಪ್ರಸೇಕಃ ಸದನಂ ಚಾಪಿ ಗರ್ಭಿಣ್ಯಾ ಲಿಙ್ಗಮುಚ್ಯತೇ ||೧೫||

Adhikarana 13 (16-17) · Śloka 17

ತದಾ ಪ್ರಭೃತಿ ವ್ಯವಾಯಂ ವ್ಯಾಯಾಮಮತಿತರ್ಪಣಮತಿಕರ್ಶನಂ ದಿವಾಸ್ವಪ್ನಂ ರಾತ್ರಿಜಾಗರಣಂ ಶೋಕಂ ಯಾನಾರೋಹಣಂ ಭಯಮುತ್ಕುಟುಕಾಸನಂ ಚೈಕಾನ್ತತಃ ಸ್ನೇಹಾದಿಕ್ರಿಯಾಂ ಶೋಣಿತಮೋಕ್ಷಣಂ ಚಾಕಾಲೇ ವೇಗವಿಧಾರಣಂ ಚ ನ ಸೇವೇತ ||೧೬|| ದೋಷಾಭಿಘಾತೈರ್ಗರ್ಭಿಣ್ಯಾ ಯೋ ಯೋ ಭಾಗಃ ಪ್ರಪೀಡ್ಯತೇ | ಸ ಸ ಭಾಗಃ ಶಿಶೋಸ್ತಸ್ಯ ಗರ್ಭಸ್ಥಸ್ಯ ಪ್ರಪೀಡ್ಯತೇ ||೧೭||

Adhikarana 14 (18) · Śloka 18

ತತ್ರ ಪ್ರಥಮೇ ಮಾಸಿ ಕಲಲಂ ಜಾಯತೇ; ದ್ವಿತೀಯೇ ಶೀತೋಷ್ಮಾನಿಲೈರಭಿಪ್ರಪಚ್ಯಮಾನಾನಾಂ ಮಹಾಭೂತಾನಾಂ ಸಙ್ಘಾತೋ ಘನಃ ಸಞ್ಜಾಯತೇ, ಯದಿ ಪಿಣ್ಡಃ ಪುಮಾನ್, ಸ್ತ್ರೀ ಚೇತ್ ಪೇಶೀ, ನಪುಂಸಕಂ ಚೇದರ್ಬುದಮಿತಿ; ತೃತೀಯೇ ಹಸ್ತಪಾದಶಿರಸಾಂ ಪಞ್ಚಪಿಣ್ಡಕಾ ನಿರ್ವರ್ತನ್ತೇಽಙ್ಗಪ್ರತ್ಯಙ್ಗವಿಭಾಗಶ್ಚ ಸೂಕ್ಷ್ಮೋ ಭವತಿ; ಚತುರ್ಥೇ ಸರ್ವಾಙ್ಗಪ್ರತ್ಯಙ್ಗವಿಭಾಗಃ ಪ್ರವ್ಯಕ್ತೋ ಭವತಿ, ಗರ್ಭಹೃದಯಪ್ರವ್ಯಕ್ತಿಭಾವಾಚ್ಚೇತನಾಧಾತುರಭಿವ್ಯಕ್ತೋ ಭವತಿ, ಕಸ್ಮಾತ್? ತತ್ಸ್ಥಾನತ್ವಾತ್ | ತಸ್ಮಾದ್ಗರ್ಭಶ್ಚತುರ್ಥೇ ಮಾಸ್ಯಭಿಪ್ರಾಯಮಿನ್ದ್ರಿಯಾರ್ಥೇಷು ಕರೋತಿ, ದ್ವಿಹೃದಯಾಂ ಚ ನಾರೀಂ ದೌಹೃದಿನೀಮಾಚಕ್ಷತೇ | ದೌಹೃದವಿಮಾನನಾತ್ ಕುಬ್ಜಂ ಕುಣಿಂ ಖಞ್ಜಂ ಜಡಂ ವಾಮನಂ ವಿಕೃತಾಕ್ಷಮನಕ್ಷಂ ವಾ ನಾರೀ ಸುತಂ ಜನಯತಿ, ತಸ್ಮಾತ್ ಸಾ ಯದ್ಯದಿಚ್ಛೇತ್ತತ್ತಸ್ಯೈ ದಾಪಯೇತ್, ಲಬ್ಧದೌಹೃದಾ ಹಿ ವೀರ್ಯವನ್ತಂ ಚಿರಾಯುಷಂ ಚ ಪುತ್ರಂ ಜನಯತಿ ||೧೮||

Adhikarana 15 (19-21) · Śloka 21

ಭವನ್ತಿ ಚಾತ್ರ- ಇನ್ದ್ರಿಯಾರ್ಥಾಂಸ್ತು ಯಾನ್ ಯಾನ್ ಸಾ ಭೋಕ್ತುಮಿಚ್ಛತಿ ಗರ್ಭಿಣೀ ಗರ್ಭಾಬಾಧಭಯಾತ್ತಾಂಸ್ತಾನ್ ಭಿಷಗಾಹೃತ್ಯ ದಾಪಯೇತ್ ||೧೯|| ಸಾ ಪ್ರಾಪ್ತದೌಹೃದಾ ಪುತ್ರಂ ಜನಯೇತ ಗುಣಾನ್ವಿತಮ್ | ಅಲಬ್ಧದೌಹೃದಾ ಗರ್ಭೇ ಲಭೇತಾತ್ಮನಿ ವಾ ಭಯಮ್ ||೨೦|| ಯೇಷು ಯೇಷ್ವಿನ್ದ್ರಿಯಾರ್ಥೇಷು ದೌಹೃದೇ ವೈ ವಿಮಾನನಾ | ಪ್ರಜಾಯೇತ ಸುತಸ್ಯಾರ್ತಿಸ್ತಸ್ಮಿಂಸ್ತಸ್ಮಿಂಸ್ತಥೇನ್ದ್ರಿಯೇ ||೨೧||

Adhikarana 16 (22-28) · Śloka 28

ರಾಜಸನ್ದರ್ಶನೇ ಯಸ್ಯಾ ದೌರ್ಹೃದಂ ಜಾಯತೇ ಸ್ತ್ರಿಯಾಃ | ಅರ್ಥವನ್ತಂ ಮಹಾಭಾಗಂ ಕುಮಾರಂ ಸಾ ಪ್ರಸೂಯತೇ ||೨೨|| ದುಕೂಲಪಟ್ಟಕೌಶೇಯಭೂಷಣಾದಿಷು ದೌಹೃದಾತ್ | ಅಲಙ್ಕಾರೈಷಿಣಂ ಪುತ್ರಂ ಲಲಿತಂ ಸಾ ಪ್ರಸೂಯತೇ ||೨೩|| ಆಶ್ರಮೇ ಸಂಯತಾತ್ಮಾನಂ ಧರ್ಮಶೀಲಂ ಪ್ರಸೂಯತೇ | ದೇವತಾಪ್ರತಿಮಾಯಾಂ ತು ಪ್ರಸೂತೇ ಪಾರ್ಷದೋಪಮಮ್ | ದರ್ಶನೇ ವ್ಯಾಲಜಾತೀನಾಂ ಹಿಂಸಾಶೀಲಂ ಪ್ರಸೂಯತೇ ||೨೪|| ಗೋಧಾಮಾಂಸಾಶನೇ ಪುತ್ರಂ ಸುಷುಪ್ಸುಂ ಧಾರಣಾತ್ಮಕಮ್ | ಗವಾಂ ಮಾಂಸೇ ತು ಬಲಿನಂ ಸರ್ವಕ್ಲೇಶಸಹಂ ತಥಾ ||೨೫|| ಮಾಹಿಷೇ ದೌರ್ಹೃದಾಚ್ಛೂರಂ ರಕ್ತಾಕ್ಷಂ ಲೋಮಸಂಯುತಮ್ | ವರಾಹಮಾಂಸಾತ್ ಸ್ವಪ್ನಾಲುಂ ಶೂರಂ ಸಞ್ಜನಯೇತ್ ಸುತಮ್ ||೨೬|| ಮಾರ್ಗಾದ್ವಿಕ್ರಾನ್ತಜಙ್ಘಾಲಂ ಸದಾ ವನಚರಂ ಸುತಮ್ | ಸೃಮರಾದ್ವಿಗ್ನಮನಸಂ ನಿತ್ಯಭೀತಂ ಚ ತೈತ್ತಿರಾತ್ ||೨೭|| ಅತೋಽನುಕ್ತೇಷು ಯಾ ನಾರೀ ಸಮಭಿಧ್ಯಾತಿ ದೌರ್ಹೃದಮ್ | ಶರೀರಾಚಾರಶೀಲೈಃ ಸಾ ಸಮಾನಂ ಜನಯಿಷ್ಯತಿ ||೨೮||

Adhikarana 17 (29) · Śloka 29

ಕರ್ಮಣಾ ಚೋದಿತಂ ಜನ್ತೋರ್ಭವಿತವ್ಯಂ ಪುನರ್ಭವೇತ್ | ಯಥಾ ತಥಾ ದೈವಯೋಗಾದ್ದೌರ್ಹೃದಂ ಜನಯೇದ್ಧೃದಿ ||೨೯||

Adhikarana 18 (30) · Śloka 30

ಪಞ್ಚಮೇ ಮನಃ ಪ್ರತಿಬುದ್ಧತರಂ ಭವತಿ, ಷಷ್ಠೇ ಬುದ್ಧಿಃ, ಸಪ್ತಮೇ ಸರ್ವಾಙ್ಗಪ್ರತ್ಯಙ್ಗವಿಭಾಗಃ ಪ್ರವ್ಯಕ್ತತರಃ; ಅಷ್ಟಮೇಽಸ್ಥಿರೀಭವತ್ಯೋಜಃ , ತತ್ರ ಜಾತಶ್ಚೇನ್ನ ಜೀವೇನ್ನಿರೋಜಸ್ತ್ವಾನ್ನೈರೃತಭಾಗತ್ವಾಚ್ಚ , ತತೋ ಬಲಿಂ ಮಾಂಸೌದನಮಸ್ಮೈ ದಾಪಯೇತ್; ನವಮದಶಮೈಕಾದಶದ್ವಾದಶಾನಾಮನ್ಯತಮಸ್ಮಿಞ್ಜಾಯತೇ, ಅತೋಽನ್ಯಥಾ ವಿಕಾರೀ ಭವತಿ ||೩೦||

Adhikarana 19 (31-32) · Śloka 32

ಮಾತುಸ್ತು ಖಲು ರಸವಹಾಯಾಂ ನಾಡ್ಯಾಂ ಗರ್ಭನಾಭಿನಾಡೀಪ್ರತಿಬದ್ಧಾ, ಸಾಽಸ್ಯ ಮಾತುರಾಹಾರರಸವೀರ್ಯಮಭಿವಹತಿ | ತೇನೋಪಸ್ನೇಹೇನಾಸ್ಯಾಭಿವೃದ್ಧಿರ್ಭವತಿ | ಅಸಞ್ಜಾತಾಙ್ಗಪ್ರತ್ಯಙ್ಗಪ್ರವಿಭಾಗಮಾನಿಷೇಕಾತ್ ಪ್ರಭೃತಿ ಸರ್ವಶರೀರಾವಯವಾನುಸಾರಿಣೀನಾಂ ರಸವಹಾನಾಂ ತಿರ್ಯಗ್ಗತಾನಾಂ ಧಮನೀನಾಮುಪಸ್ನೇಹೋ ಜೀವಯತಿ ||೩೧|| ಗರ್ಭಸ್ಯ ಖಲು ಸಮ್ಭವತಃ ಪೂರ್ವಂ ಶಿರಃ ಸಮ್ಭವತೀತ್ಯಾಹ ಶೌನಕಃ, ಶಿರೋಮೂಲತ್ವಾತ್ ಪ್ರಧಾನೇನ್ದ್ರಿಯಾಣಾಂ ; ಹೃದಯಮಿತಿ ಕೃತವೀರ್ಯೋ, ಬುದ್ಧೇರ್ಮನಸಶ್ಚ ಸ್ಥಾನತ್ವಾತ್; ನಾಭಿರಿತಿ ಪಾರಾಶರ್ಯಃ, ತತೋ ಹಿ ವರ್ಧತೇ ದೇಹೋ ದೇಹಿನಃ; ಪಾಣಿಪಾದಮಿತಿ ಮಾರ್ಕಣ್ಡೇಯಃ, ತನ್ಮೂಲತ್ವಾಚ್ಚೇಷ್ಟಾಯಾ ಗರ್ಭಸ್ಯ; ಮಧ್ಯಶರೀರಮಿತಿ ಸುಭೂತಿರ್ಗೌತಮಃ, ತನ್ನಿಬದ್ಧತ್ವಾತ್ ಸರ್ವಗಾತ್ರಸಮ್ಭವಸ್ಯ | ತತ್ತು ನ ಸಮ್ಯಕ್, ಸರ್ವಾಣ್ಯಙ್ಗಪ್ರತ್ಯಙ್ಗಾನಿ ಯುಗಪತ್ ಸಮ್ಭವನ್ತೀತ್ಯಾಹ ಧನ್ವನ್ತರಿಃ, ಗರ್ಭಸ್ಯ ಸೂಕ್ಷ್ಮತ್ವಾನ್ನೋಪಲಭ್ಯನ್ತೇ ವಂಶಾಙ್ಕುರವಚ್ಚೂತಫಲವಚ್ಚ; ತದ್ಯಥಾ- ಚೂತಫಲೇ ಪರಿಪಕ್ವೇ ಕೇಶರಮಾಂಸಾಸ್ಥಿಮಜ್ಜಾನಃ ಪೃಥಕ್ ಪೃಥಗ್ದೃಶ್ಯನ್ತೇ ಕಾಲಪ್ರಕರ್ಷಾತ್, ತಾನ್ಯೇವ ತರುಣೇ ನೋಪಲಭ್ಯನ್ತೇ ಸೂಕ್ಷ್ಮತ್ವಾತ್; ತೇಷಾಂ ಸೂಕ್ಷ್ಮಾಣಾಂ ಕೇಶರಾದೀನಾಂ ಕಾಲಃ ಪ್ರವ್ಯಕ್ತತಾಂ ಕರೋತಿ; ಏತೇನೈವ ವಂಶಾಙ್ಕುರೋಽಪಿ ವ್ಯಾಖ್ಯಾತಃ | ಏವಂ ಗರ್ಭಸ್ಯ ತಾರುಣ್ಯೇ ಸರ್ವೇಷ್ವಙ್ಗಪ್ರತ್ಯಙ್ಗೇಷು ಸತ್ಸ್ವಪಿ ಸೌಕ್ಷ್ಮ್ಯಾದನುಪಲಬ್ಧಿಃ, ತಾನ್ಯೇವ ಕಾಲಪ್ರಕರ್ಷಾತ್ ಪ್ರವ್ಯಕ್ತಾನಿ ಭವನ್ತಿ ||೩೨||

Adhikarana 20 (33) · Śloka 33

ತತ್ರ ಗರ್ಭಸ್ಯ ಪಿತೃಜಮಾತೃಜರಸಜಾತ್ಮಜಸತ್ತ್ವಜಸಾತ್ಮ್ಯಜಾನಿ ಶರೀರಲಕ್ಷಣಾನಿ ವ್ಯಾಖ್ಯಾಸ್ಯಾಮಃ | ಗರ್ಭಸ್ಯ ಕೇಶಶ್ಮಶ್ರುಲೋಮಾಸ್ಥಿನಖದನ್ತಸಿರಾಸ್ನಾಯುಧಮನೀರೇತಃಪ್ರಭೃತೀನಿ ಸ್ಥಿರಾಣಿ ಪಿತೃಜಾನಿ, ಮಾಂಸಶೋಣಿತಮೇದೋಮಜ್ಜಹೃನ್ನಾಭಿಯಕೃತ್ಪ್ಲೀಹಾನ್ತ್ರಗುದಪ್ರಭೃತೀನಿ ಮೃದೂನಿ ಮಾತೃಜಾನಿ, ಶರೀರೋಪಚಯೋ ಬಲಂ ವರ್ಣಃ ಸ್ಥಿತಿರ್ಹಾನಿಶ್ಚ ರಸಜಾನಿ, ಇನ್ದ್ರಿಯಾಣಿ ಜ್ಞಾನಂ ವಿಜ್ಞಾನಮಾಯುಃ ಸುಖದುಃಖಾದಿಕಂ ಚಾತ್ಮಜಾನಿ, ಸತ್ತ್ವಜಾನ್ಯುತ್ತರತ್ರ ವಕ್ಷ್ಯಾಮಃ, ವೀರ್ಯಮಾರೋಗ್ಯಂ ಬಲವರ್ಣೌ ಮೇಧಾ ಚ ಸಾತ್ಮ್ಯಜಾನಿ ||೩೩||

Adhikarana 21 (34) · Śloka 34

ತತ್ರ ಯಸ್ಯಾ ದಕ್ಷಿಣೇ ಸ್ತನೇ ಪ್ರಾಕ್ ಪಯೋದರ್ಶನಂ ಭವತಿ ದಕ್ಷಿಣಕುಕ್ಷಿಮಹತ್ತ್ವಂ ಚ ಪೂರ್ವಂ ಚ ದಕ್ಷಿಣಂ ಸಕ್ಥ್ಯುತ್ಕರ್ಷತಿ ಬಾಹುಲ್ಯಾಚ್ಚ ಪುನ್ನಾಮಧೇಯೇಷು ದ್ರವ್ಯೇಷು ದೌರ್ಹೃದಮಭಿಧ್ಯಾಯತಿ ಸ್ವಪ್ನೇಷು ಚೋಪಲಭತೇ ಪದ್ಮೋತ್ಪಲಕುಮುದಾಮ್ರಾತಕಾದೀನಿ ಪುನ್ನಾಮಾನ್ಯೇವ ಪ್ರಸನ್ನಮುಖವರ್ಣಾ ಚ ಭವತಿ ತಾಂ ಬ್ರೂಯಾತ್ ಪುತ್ರಮಿಯಂ ಜನಯಿಷ್ಯತೀತಿ, ತದ್ವಿಪರ್ಯಯೇ ಕನ್ಯಾಂ, ಯಸ್ಯಾಃ ಪಾರ್ಶ್ವದ್ವಯಮವನತಂ ಪುರಸ್ತಾನ್ನಿರ್ಗತಮುದರಂ ಪ್ರಾಗಭಿಹಿತಂ ಚ ಲಕ್ಷಣಂ ಚ ತಸ್ಯಾ ನಪುಂಸಕಮಿತಿ ವಿದ್ಯಾತ್, ಯಸ್ಯಾ ಮಧ್ಯೇ ನಿಮ್ನಂ ದ್ರೋಣೀಭೂತಮುದರಂ ಸಾ ಯುಗ್ಮಂ ಪ್ರಸೂಯತ ಇತಿ ||೩೪||

Adhikarana 22 (35) · Śloka 35

ಭವನ್ತಿ ಚಾತ್ರ- ದೇವತಾಬ್ರಾಹ್ಮಣಪರಾಃ ಶೌಚಾಚಾರಹಿತೇ ರತಾಃ | ಮಹಾಗುಣಾನ್ ಪ್ರಸೂಯನ್ತೇ ವಿಪರೀತಾಸ್ತು ನಿರ್ಗುಣಾನ್ ||೩೫||

Adhikarana 23 (36) · Śloka 36

ಅಙ್ಗಪ್ರತ್ಯಙ್ಗನಿರ್ವೃತ್ತಿಃ ಸ್ವಭಾವಾದೇವ ಜಾಯತೇ | ಅಙ್ಗಪ್ರತ್ಯಙ್ಗನಿರ್ವೃತ್ತೌ ಯೇ ಭವನ್ತಿ ಗುಣಾಗುಣಾಃ | ತೇ ತೇ ಗರ್ಭಸ್ಯ ವಿಜ್ಞೇಯಾ ಧರ್ಮಾಧರ್ಮನಿಮಿತ್ತಜಾಃ ||೩೬||

Adhikarana puShpikA · Śloka 3

ಇತಿ ಸುಶ್ರುತಸಂಹಿತಾಯಾಂ ಶಾರೀರಸ್ಥಾನೇ ಗರ್ಭಾವಕ್ರಾನ್ತಿಶಾರೀರಂ ನಾಮ ತೃತೀಯೋಽಧ್ಯಾಯಃ ||೩||