2. śukraśōṇitaśuddhiśārīram

Adhikarana 1 (1-2) · Śloka 2

ಅಥಾತಃ ಶುಕ್ರಶೋಣಿತಶುದ್ಧಿಶಾರೀರಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ವಾತ-ಪಿತ್ತ-ಶ್ಲೇಷ್ಮ-ಕುಣಪ -ಗ್ರನ್ಥಿ-ಪೂತಿಪೂಯ-ಕ್ಷೀಣ-ಮೂತ್ರಪುರೀಷರೇತಸಃ ಪ್ರಜೋತ್ಪಾದನೇ ನ ಸಮರ್ಥಾ ಭವನ್ತಿ ||೩||

Adhikarana 3 (4) · Śloka 4

ತೇಷು ವಾತವರ್ಣವೇದನಂ ವಾತೇನ, ಪಿತ್ತವರ್ಣವೇದನಂ ಪಿತ್ತೇನ, ಶ್ಲೇಷ್ಮವರ್ಣವೇದನಂ ಶ್ಲೇಷ್ಮಣಾ, ಕುಣಪಗನ್ಧ್ಯನಲ್ಪಂ ಚ ರಕ್ತೇನ, ಗ್ರನ್ಥಿಭೂತಂ ಶ್ಲೇಷ್ಮವಾತಾಭ್ಯಾಂ, ಪೂತಿಪೂಯನಿಭಂ ಪಿತ್ತಶ್ಲೇಷ್ಮಭ್ಯಾಂ, ಕ್ಷೀಣಂ ಪ್ರಾಗುಕ್ತಂ ಪಿತ್ತಮಾರುತಾಭ್ಯಾಂ, ಮೂತ್ರಪುರೀಷಗನ್ಧಿ ಸನ್ನಿಪಾತೇನೇತಿ | ತೇಷು ಕುಣಪಗ್ರನ್ಥಿಪೂತಿಪೂಯಕ್ಷೀಣರೇತಸಃ ಕೃಚ್ಛ್ರಸಾಧ್ಯಾಃ, ಮೂತ್ರಪುರೀಷರೇತಸಸ್ತ್ವಸಾಧ್ಯಾ ಇತಿ ||೪||

Adhikarana 4 (5) · Śloka 5

ಆರ್ತವಮಪಿ ತ್ರಿಭಿರ್ದೋಷೈಃ ಶೋಣಿತಚತುರ್ಥೈಃ ಪೃಥಗ್ದ್ವನ್ದ್ವೈಃ ಸಮಸ್ತೈಶ್ಚೋಪಸೃಷ್ಟಮಬೀಜಂ ಭವತಿ; ತದಪಿ ದೋಷವರ್ಣವೇದನಾದಿಭಿರ್ವಿಜ್ಞೇಯಮ್ | ತೇಷು ಕುಣಪಗ್ರನ್ಥಿಪೂತಿಪೂಯಕ್ಷೀಣಮೂತ್ರಪುರೀಷಪ್ರಕಾಶಮಸಾಧ್ಯಂ , ಸಾಧ್ಯಮನ್ಯಚ್ಚೇತಿ ||೫||

Adhikarana 5 (6-10) · Śloka 11

ಭವನ್ತಿ ಚಾತ್ರ- ತೇಷ್ವಾದ್ಯಾಞ್ ಶುಕ್ರದೋಷಾಂಸ್ತ್ರೀನ್ ಸ್ನೇಹಸ್ವೇದಾದಿಭಿರ್ಜಯೇತ್ | ಕ್ರಿಯಾವಿಶೇಷೈರ್ಮತಿಮಾಂಸ್ತಥಾ ಚೋತ್ತರಬಸ್ತಿಭಿಃ ||೬|| ಪಾಯಯೇತ ನರಂ ಸರ್ಪಿರ್ಭಿಷಕ್ ಕುಣಪರೇತಸಿ | ಧಾತಕೀಪುಷ್ಪಖದಿರದಾಡಿಮಾರ್ಜುನಸಾಧಿತಮ್ ||೭|| ಪಾಯಯೇದಥವಾ ಸರ್ಪಿಃ ಶಾಲಸಾರಾದಿಸಾಧಿತಮ್ | ಗ್ರನ್ಥಿಭೂತೇ ಶಟೀಸಿದ್ಧಂ ಪಾಲಾಶೇ ವಾಽಪಿ ಭಸ್ಮನಿ ||೮|| ಪರೂಷಕವಟಾದಿಭ್ಯಾಂ ಪೂಯಪ್ರಖ್ಯೇ ಚ ಸಾಧಿತಮ್ | ಪ್ರಾಗುಕ್ತಂ ವಕ್ಷ್ಯತೇ ಯಚ್ಚ ತತ್ ಕಾರ್ಯಂ ಕ್ಷೀಣರೇತಸಿ ||೯|| ವಿಟ್ಪ್ರಭೇ ಪಾಯಯೇತ್ ಸಿದ್ಧಂ ಚಿತ್ರಕೋಶೀರಹಿಙ್ಗುಭಿಃ | ಸ್ನಿಗ್ಧಂ ವಾನ್ತಂ ವಿರಿಕ್ತಂ ಚ ನಿರೂಢಮನುವಾಸಿತಮ್ ||೧೦|| ಯೋಜಯೇಚ್ಛುಕ್ರದೋಷಾರ್ತಂ ಸಮ್ಯಗುತ್ತರಬಸ್ತಿನಾ |೧೧|

Adhikarana 6 (11) · Śloka 12

ಸ್ಫಟಿಕಾಭಂ ದ್ರವಂ ಸ್ನಿಗ್ಧಂ ಮಧುರಂ ಮಧುಗನ್ಧಿ ಚ ||೧೧|| ಶುಕ್ರಮಿಚ್ಛನ್ತಿ, ಕೇಚಿತ್ತು ತೈಲಕ್ಷೌದ್ರನಿಭಂ ತಥಾ |೧೨|

Adhikarana 7 (12-16) · Śloka 16

ವಿಧಿಮುತ್ತರಬಸ್ತ್ಯನ್ತಂ ಕುರ್ಯಾದಾರ್ತವಶುದ್ಧಯೇ ||೧೨|| ಸ್ತ್ರೀಣಾಂ ಸ್ನೇಹಾದಿಯುಕ್ತಾನಾಂ ಚತಸೃಷ್ವಾರ್ತವಾರ್ತಿಷು | ಕುರ್ಯಾತ್ಕಲ್ಕಾನ್ ಪಿಚೂಂಶ್ಚಾಪಿ ಪಥ್ಯಾನ್ಯಾಚಮನಾನಿ ಚ ||೧೩|| ಗ್ರನ್ಥಿಭೂತೇ ಪಿಬೇತ್ ಪಾಠಾಂ ತ್ರ್ಯೂಷಣಂ ವೃಕ್ಷಕಾಣಿ ಚ | ದುರ್ಗನ್ಧಿಪೂಯಸಙ್ಕಾಶೇ ಮಜ್ಜತುಲ್ಯೇ ತಥಾಽಽರ್ತವೇ ||೧೪|| ಪಿಬೇದ್ಭದ್ರಶ್ರಿಯಃ ಕ್ವಾಥಂ ಚನ್ದನಕ್ವಾಥಮೇವ ಚ | ಶುಕ್ರದೋಷಹರಾಣಾಂ ಚ ಯಥಾಸ್ವಮವಚಾರಣಮ್ ||೧೫|| ಯೋಗಾನಾಂ ಶುದ್ಧಿಕರಣಂ ಶೇಷಾಸ್ವಪ್ಯಾರ್ತವಾರ್ತಿಷು | ಅನ್ನಂ ಶಾಲಿಯವಂ ಮದ್ಯಂ ಹಿತಂ ಮಾಂಸಂ ಚ ಪಿತ್ತಲಮ್ ||೧೬||

Adhikarana 8 (17) · Śloka 17

ಶಶಾಸೃಕ್ಪ್ರತಿಮಂ ಯತ್ತು ಯದ್ವಾ ಲಾಕ್ಷಾರಸೋಪಮಮ್ | ತದಾರ್ತವಂ ಪ್ರಶಂಸನ್ತಿ ಯದ್ವಾಸೋ ನ ವಿರಞ್ಜಯೇತ್ ||೧೭||

Adhikarana 9 (18-20) · Śloka 21

ತದೇವಾತಿಪ್ರಸಙ್ಗೇನ ಪ್ರವೃತ್ತಮನೃತಾವಪಿ | ಅಸೃಗ್ದರಂ ವಿಜಾನೀಯಾದತೋಽನ್ಯದ್ರಕ್ತಲಕ್ಷಣಾತ್ ||೧೮|| ಅಸೃಗ್ದರೋ ಭವೇತ್ ಸರ್ವಃ ಸಾಙ್ಗಮರ್ದಃ ಸವೇದನಃ | ತಸ್ಯಾತಿವೃತ್ತೌ ದೌರ್ಬಲ್ಯಂ ಭ್ರಮೋ ಮೂರ್ಚ್ಛಾ ತಮಸ್ತೃಷಾ ||೧೯|| ದಾಹಃ ಪ್ರಲಾಪಃ ಪಾಣ್ಡುತ್ವಂ ತನ್ದ್ರಾ ರೋಗಾಶ್ಚ ವಾತಜಾಃ | ತರುಣ್ಯಾ ಹಿತಸೇವಿನ್ಯಾಸ್ತಮಲ್ಪೋಪದ್ರವಂ ಭಿಷಕ್ ||೨೦|| ರಕ್ತಪಿತ್ತವಿಧಾನೇನ ಯಥಾವತ್ ಸಮುಪಾಚರೇತ್ |೨೧|

Adhikarana 10 (21-23) · Śloka 23

ದೋಷೈರಾವೃತಮಾರ್ಗತ್ವಾದಾರ್ತವಂ ನಶ್ಯತಿ ಸ್ತ್ರಿಯಾಃ ||೨೧|| ತತ್ರ ಮತ್ಸ್ಯಕುಲತ್ಥಾಮ್ಲತಿಲಮಾಷಸುರಾ ಹಿತಾಃ | ಪಾನೇ ಮೂತ್ರಮುದಶ್ವಿಚ್ಚ ದಧಿ ಶುಕ್ತಂ ಚ ಭೋಜನೇ ||೨೨|| ಕ್ಷೀಣಂ ಪ್ರಾಗೀರಿತಂ ರಕ್ತಂ ಸಲಕ್ಷಣಚಿಕಿತ್ಸಿತಮ್ | ತಥಾಽಪ್ಯತ್ರ ವಿಧಾತವ್ಯಂ ವಿಧಾನಂ ನಷ್ಟರಕ್ತವತ್ ||೨೩||

Adhikarana 11 (24) · Śloka 24

ಏವಮದುಷ್ಟಶುಕ್ರಃ ಶುದ್ಧಾರ್ತವಾ ಚ ||೨೪||

Adhikarana 12 (25-30) · Śloka 30

ಋತೌ ಪ್ರಥಮದಿವಸಾತ್ ಪ್ರಭೃತಿ ಬ್ರಹ್ಮಚಾರಿಣೀ ದಿವಾಸ್ವಪ್ನಾಞ್ಜನಾಶ್ರುಪಾತಸ್ನಾನಾನುಲೇಪನಾಭ್ಯಙ್ಗನಖಚ್ಛೇದನಪ್ರಧಾವನಹಸನಕಥನಾತಿಶಬ್ದಶ್ರವಣಾವಲೇಖನಾನಿಲಾಯಾಸಾನ್ ಪರಿಹರೇತ್ | ಕಿಂ ಕಾರಣಂ? ದಿವಾ ಸ್ವಪನ್ತ್ಯಾಃ ಸ್ವಾಪಶೀಲಃ, ಅಞ್ಜನಾದನ್ಧಃ, ರೋದನಾದ್ವಿಕೃತದೃಷ್ಟಿಃ, ಸ್ನಾನಾನುಲೇಪನಾದ್ದುಃಖಶೀಲಃ , ತೈಲಾಭ್ಯಙ್ಗಾತ್ ಕುಷ್ಠೀ, ನಖಾಪಕರ್ತನಾತ್ ಕುನಖೀ, ಪ್ರಧಾವನಾಚ್ಚಞ್ಚಲಃ, ಹಸನಾಚ್ಛ್ಯಾವದನ್ತೌಷ್ಠತಾಲುಜಿಹ್ವಃ, ಪ್ರಲಾಪೀ ಚಾತಿಕಥನಾತ್ , ಅತಿಶಬ್ದಶ್ರವಣಾದ್ಬಧಿರಃ, ಅವಲೇಖನಾತ್ ಖಲತಿಃ, ಮಾರುತಾಯಾಸಸೇವನಾದುನ್ಮತ್ತೋ ಗರ್ಭೋ ಭವತೀತ್ಯೇವಮೇತಾನ್ ಪರಿಹರೇತ್ | ದರ್ಭಸಂಸ್ತರಶಾಯಿನೀಂ ಕರತಲಶರಾವಪರ್ಣಾನ್ಯತಮಭೋಜಿನೀಂ ಹವಿಷ್ಯಂ, ತ್ರ್ಯಹಂ ಚ ಭರ್ತುಃ ಸಂರಕ್ಷೇತ್ | ತತಃ ಶುದ್ಧಸ್ನಾತಾಂ ಚತುರ್ಥೇಽಹನ್ಯಹತವಾಸಃಸಮಲಙ್ಕೃತಾಂ ಕೃತಮಙ್ಗಲಸ್ವಸ್ತಿವಾಚನಾಂ ಭರ್ತಾರಂ ದರ್ಶಯೇತ್ | ತತ್ ಕಸ್ಯ ಹೇತೋಃ? ||೨೫|| ಪೂರ್ವಂ ಪಶ್ಯೇದೃತುಸ್ನಾತಾ ಯಾದೃಶಂ ನರಮಙ್ಗನಾ | ತಾದೃಶಂ ಜನಯೇತ್ ಪುತ್ರಂ ಭರ್ತಾರಂ ದರ್ಶಯೇದತಃ ||೨೬|| ತತೋ ವಿಧಾನಂ ಪುತ್ರೀಯಮುಪಾಧ್ಯಾಯಃ ಸಮಾಚರೇತ್ | ಕರ್ಮಾನ್ತೇ ಚ ಕ್ರಮಂ ಹ್ಯೇತಮಾರಭೇತ ವಿಚಕ್ಷಣಃ ||೨೭|| ತತೋಽಪರಾಹ್ಣೇ ಪುಮಾನ್ ಮಾಸಂ ಬ್ರಹ್ಮಚಾರೀ ಸರ್ಪಿಃಸ್ನಿಗ್ಧಃ ಸರ್ಪಿಃಕ್ಷೀರಾಭ್ಯಾಂ ಶಾಲ್ಯೋದನಂ ಭುಕ್ತ್ವಾ ಮಾಸಂ ಬ್ರಹ್ಮಚಾರಿಣೀಂ ತೈಲಸ್ನಿಗ್ಧಾಂ ತೈಲಮಾಷೋತ್ತರಾಹಾರಾಂ ನಾರೀಮುಪೇಯಾದ್ರಾತ್ರೌ ಸಾಮಭಿರಭಿವಿಶ್ವಾಸ್ಯ ; ವಿಕಲ್ಪ್ಯೈವಂ ಚತುರ್ಥ್ಯಾಂ ಷಷ್ಠ್ಯಾಮಷ್ಟಮ್ಯಾಂ ದಶಮ್ಯಾಂ ದ್ವಾದಶ್ಯಾಂ ಚೋಪೇಯಾದಿತಿ ಪುತ್ರಕಾಮಃ ||೨೮|| ಏಷೂತ್ತರೋತ್ತರಂ ವಿದ್ಯಾದಾಯುರಾರೋಗ್ಯಮೇವ ಚ | ಪ್ರಜಾಸೌಭಾಗ್ಯಮೈಶ್ವರ್ಯಂ ಬಲಂ ಚ ದಿವಸೇಷು ವೈ ||೨೯|| ಅತಃ ಪರಂ ಪಞ್ಚಮ್ಯಾಂ ಸಪ್ತಮ್ಯಾಂ ನವಮ್ಯಾಮೇಕಾದಶ್ಯಾಂ ಚ ಸ್ತ್ರೀಕಾಮಃ; ತ್ರಯೋದಶೀಪ್ರಭೃತಯೋ ನಿನ್ದ್ಯಾಃ ||೩೦||

Adhikarana 13 (31) · Śloka 31

ತತ್ರ ಪ್ರಥಮೇ ದಿವಸೇ ಋತುಮತ್ಯಾಂ ಮೈಥುನಗಮನಮನಾಯುಷ್ಯಂ ಪುಂಸಾಂ ಭವತಿ, ಯಶ್ಚ ತತ್ರಾಧೀಯತೇ ಗರ್ಭಃ ಸ ಪ್ರಸವಮಾನೋ ವಿಮುಚ್ಯತೇ ; ದ್ವಿತೀಯೇಽಪ್ಯೇವಂ ಸೂತಿಕಾಗೃಹೇ ವಾ; ತೃತೀಯೇಽಪ್ಯೇವಮಸಮ್ಪೂರ್ಣಾಙ್ಗೋಽಲ್ಪಾಯುರ್ವಾ ಭವತಿ; ಚತುರ್ಥೇ ತು ಸಮ್ಪೂರ್ಣಾಙ್ಗೋ ದೀರ್ಘಾಯುಶ್ಚ ಭವತಿ | ನ ಚ ಪ್ರವರ್ತಮಾನೇ ರಕ್ತೇ ಬೀಜಂ ಪ್ರವಿಷ್ಟಂ ಗುಣಕರಂ ಭವತಿ, ಯಥಾ ನದ್ಯಾಂ ಪ್ರತಿಸ್ರೋತಃ ಪ್ಲಾವಿದ್ರವ್ಯಂ ಪ್ರಕ್ಷಿಪ್ತಂ ಪ್ರತಿನಿವರ್ತತೇ ನೋರ್ಧ್ವಂ ಗಚ್ಛತಿ ತದ್ವದೇತದ್ದ್ರಷ್ಟವ್ಯಮ್ | ತಸ್ಮಾನ್ನಿಯಮವತೀಂ ತ್ರಿರಾತ್ರಂ ಪರಿಹರೇತ್ | ಅತಃ ಪರಂ ಮಾಸಾದುಪೇಯಾತ್ ||೩೧||

Adhikarana 14 (32) · Śloka 32

ಲಬ್ಧಗರ್ಭಾಯಾಶ್ಚೈತೇಷ್ವಹಃಸು ಲಕ್ಷ್ಮಣಾವಟಶುಙ್ಗಸಹದೇವಾವಿಶ್ವದೇವಾನಾಮನ್ಯತಮಾಂ ಕ್ಷೀರೇಣಾಭಿಷುತ್ಯ ತ್ರೀಂಶ್ಚತುರೋ ವಾ ಬಿನ್ದೂನ್ ದದ್ಯಾದ್ದಕ್ಷಿಣೇ ನಾಸಾಪುಟೇ ಪುತ್ರಕಾಮಾಯೈ , ನ ಚ ತಾನ್ನಿಷ್ಠೀವೇತ್ ||೩೨||

Adhikarana 15 (33) · Śloka 33

ಧ್ರುವಂ ಚತುರ್ಣಾಂ ಸಾನ್ನಿಧ್ಯಾದ್ಗರ್ಭಃ ಸ್ಯಾದ್ವಿಧಿಪೂರ್ವಕಮ್ | ಋತುಕ್ಷೇತ್ರಾಮ್ಬುಬೀಜಾನಾಂ ಸಾಮಗ್ರ್ಯಾದಙ್ಕುರೋ ಯಥಾ ||೩೩||

Adhikarana 16 (34) · Śloka 34

ಏವಂ ಜಾತಾ ರೂಪವನ್ತಃ ಸತ್ತ್ವವನ್ತಶ್ಚಿರಾಯುಷಃ | ಭವನ್ತ್ಯೃಣಸ್ಯ ಮೋಕ್ತಾರಃ ಸತ್ಪುತ್ರಾಃ ಪುತ್ರಿಣೇ ಹಿತಾಃ ||೩೪||

Adhikarana 17 (35) · Śloka 35

ತತ್ರ ತೇಜೋಧಾತುರ್ವರ್ಣಾನಾಂ ಪ್ರಭವಃ, ಸ ಯದಾ ಗರ್ಭೋತ್ಪತ್ತಾವಬ್ಧಾತುಪ್ರಾಯೋ ಭವತಿ ತದಾ ಗರ್ಭಂ ಗೌರಂ ಕರೋತಿ, ಪೃಥಿವೀಧಾತುಪ್ರಾಯಃ ಕೃಷ್ಣಂ, ಪೃಥಿವ್ಯಾಕಾಶಧಾತುಪ್ರಾಯಃ ಕೃಷ್ಣಶ್ಯಾಮಂ, ತೋಯಾಕಾಶಧಾತುಪ್ರಾಯೋ ಗೌರಶ್ಯಾಮಮ್ | ‘ಯಾದೃಗ್ವರ್ಣಮಾಹಾರಮುಪಸೇವತೇ ಗರ್ಭಿಣೀ ತಾದೃಗ್ವರ್ಣಪ್ರಸವಾ ಭವತಿ’ ಇತ್ಯೇಕೇ ಭಾಷನ್ತೇ | ತತ್ರ ದೃಷ್ಟಿಭಾಗಮಪ್ರತಿಪನ್ನಂ ತೇಜೋ ಜಾತ್ಯನ್ಧಂ ಕರೋತಿ, ತದೇವ ರಕ್ತಾನುಗತಂ ರಕ್ತಾಕ್ಷಂ, ಪಿತ್ತಾನುಗತಂ ಪಿಙ್ಗಾಕ್ಷಂ, ಶ್ಲೇಷ್ಮಾನುಗತಂ ಶುಕ್ಲಾಕ್ಷಂ, ವಾತಾನುಗತಂ ವಿಕೃತಾಕ್ಷಮಿತಿ ||೩೫||

Adhikarana 18 (36) · Śloka 36

ಭವನ್ತಿ ಚಾತ್ರ- ಘೃತಪಿಣ್ಡೋ ಯಥೈವಾಗ್ನಿಮಾಶ್ರಿತಃ ಪ್ರವಿಲೀಯತೇ | ವಿಸರ್ಪತ್ಯಾರ್ತವಂ ನಾರ್ಯಾಸ್ತಥಾ ಪುಂಸಾಂ ಸಮಾಗಮೇ ||೩೬||

Adhikarana 19 (37) · Śloka 37

ಬೀಜೇಽನ್ತರ್ವಾಯುನಾ ಭಿನ್ನೇ ದ್ವೌ ಜೀವೌ ಕುಕ್ಷಿಮಾಗತೌ | ಯಮಾವಿತ್ಯಭಿಧೀಯೇತೇ ಧರ್ಮೇತರಪುರಃಸರೌ ||೩೭||

Adhikarana 20 (38) · Śloka 38

ಪಿತ್ರೋರತ್ಯಲ್ಪಬೀಜತ್ವಾದಾಸೇಕ್ಯಃ ಪುರುಷೋ ಭವೇತ್ | ಸ ಶುಕ್ರಂ ಪ್ರಾಶ್ಯ ಲಭತೇ ಧ್ವಜೋಚ್ಛ್ರಾಯಮಸಂಶಯಮ್ ||೩೮||

Adhikarana 21 (39) · Śloka 39

ಯಃ ಪೂತಿಯೋನೌ ಜಾಯೇತ ಸ ಸೌಗನ್ಧಿಕಸಞ್ಜ್ಞಿತಃ | ಸ ಯೋನಿಶೇಫಸೋರ್ಗನ್ಧಮಾಘ್ರಾಯ ಲಭತೇ ಬಲಮ್ ||೩೯||

Adhikarana 22 (40) · Śloka 40

ಸ್ವೇ ಗುದೇಽಬ್ರಹ್ಮಚರ್ಯಾದ್ಯಃ ಸ್ತ್ರೀಷು ಪುಂವತ್ ಪ್ರವರ್ತತೇ | ಕುಮ್ಭೀಕಃ ಸ ತು ವಿಜ್ಞೇಯಃ... |೪೦|

Adhikarana 23 (40-41) · Śloka 41

...ಈರ್ಷ್ಯಕಂ ಶೃಣು ಚಾಪರಮ್ ||೪೦|| ದೃಷ್ಟ್ವಾ ವ್ಯವಾಯಮನ್ಯೇಷಾಂ ವ್ಯವಾಯೇ ಯಃ ಪ್ರವರ್ತತೇ | ಈರ್ಷ್ಯಕಃ ಸ ತು ವಿಜ್ಞೇಯಃ,... |೪೧|

Adhikarana 24 (41-42) · Śloka 42

...ಷಣ್ಢಕಂ ಶೃಣು ಪಞ್ಚಮಮ್ ||೪೧|| ಯೋ ಭಾರ್ಯಾಯಾಮೃತೌ ಮೋಹಾದಙ್ಗನೇವ ಪ್ರವರ್ತತೇ | ತತಃ ಸ್ತ್ರೀಚೇಷ್ಟಿತಾಕಾರೋ ಜಾಯತೇ ಷಣ್ಢಸಞ್ಜ್ಞಿತಃ ||೪೨||

Adhikarana 25 (43) · Śloka 43

ಋತೌ ಪುರುಷವದ್ವಾಽಪಿ ಪ್ರವರ್ತೇತಾಙ್ಗನಾ ಯದಿ | ತತ್ರ ಕನ್ಯಾ ಯದಿ ಭವೇತ್ ಸಾ ಭವೇನ್ನರಚೇಷ್ಟಿತಾ ||೪೩||

Adhikarana 26 (44) · Śloka 44

ಆಸೇಕ್ಯಶ್ಚ ಸುಗನ್ಧೀ ಚ ಕುಮ್ಭೀಕಶ್ಚೇರ್ಷ್ಯಕಸ್ತಥಾ | ಸರೇತಸಸ್ತ್ವಮೀ ಜ್ಞೇಯಾ ಅಶುಕ್ರಃ ಷಣ್ಢಸಞ್ಜ್ಞಿತಃ ||೪೪||

Adhikarana 27 (45) · Śloka 45

ಅನಯಾ ವಿಪ್ರಕೃತ್ಯಾ ತು ತೇಷಾಂ ಶುಕ್ರವಹಾಃ ಸಿರಾಃ | ಹರ್ಷಾತ್ ಸ್ಫುಟತ್ವಮಾಯಾನ್ತಿ ಧ್ವಜೋಚ್ಛ್ರಾಯಸ್ತತೋ ಭವೇತ್ ||೪೫||

Adhikarana 28 (46) · Śloka 46

ಆಹಾರಾಚಾರಚೇಷ್ಟಾಭಿರ್ಯಾದೃಶೀಭಿಃ ಸಮನ್ವಿತೌ | ಸ್ತ್ರೀಪುಂಸೌ ಸಮುಪೇಯಾತಾಂ ತಯೋಃ ಪುತ್ರೋಽಪಿ ತಾದೃಶಃ ||೪೬||

Adhikarana 29 (47) · Śloka 47

ಯದಾ ನಾರ್ಯಾವುಪೇಯಾತಾಂ ವೃಷಸ್ಯನ್ತ್ಯೌ ಕಥಞ್ಚನ | ಮುಞ್ಚತಃ ಶುಕ್ರಮನ್ಯೋನ್ಯಮನಸ್ಥಿಸ್ತತ್ರ ಜಾಯತೇ ||೪೭||

Adhikarana 30 (48-49) · Śloka 49

ಋತುಸ್ನಾತಾ ತು ಯಾ ನಾರೀ ಸ್ವಪ್ನೇ ಮೈಥುನಮಾವಹೇತ್ | ಆರ್ತವಂ ವಾಯುರಾದಾಯ ಕುಕ್ಷೌ ಗರ್ಭಂ ಕರೋತಿ ಹಿ ||೪೮|| ಮಾಸಿ ಮಾಸಿ ವಿವರ್ಧೇತ ಗರ್ಭಿಣ್ಯಾ ಗರ್ಭಲಕ್ಷಣಮ್ | ಕಲಲಂ ಜಾಯತೇ ತಸ್ಯಾ ವರ್ಜಿತಂ ಪೈತೃಕೈರ್ಗುಣೈಃ ||೪೯||

Adhikarana 31 (50) · Śloka 50

ಸರ್ಪವೃಶ್ಚಿಕಕೂಷ್ಮಾಣ್ಡವಿಕೃತಾಕೃತಯಶ್ಚ ಯೇ | ಗರ್ಭಾಸ್ತ್ವೇತೇ ಸ್ತ್ರಿಯಾಶ್ಚೈವ ಜ್ಞೇಯಾಃ ಪಾಪಕೃತೋ ಭೃಶಮ್ ||೫೦||

Adhikarana 32 (51) · Śloka 51

ಗರ್ಭೋ ವಾತಪ್ರಕೋಪೇಣ ದೌಹೃದೇ ವಾಽವಮಾನಿತೇ | ಭವೇತ್ ಕುಬ್ಜಃ ಕುಣಿಃ ಪಙ್ಗುರ್ಮೂಕೋ ಮಿನ್ಮಿಣ ಏವ ವಾ ||೫೧||

Adhikarana 33 (52) · Śloka 52

ಮಾತಾಪಿತ್ರೋಸ್ತು ನಾಸ್ತಿಕ್ಯಾದಶುಭೈಶ್ಚ ಪುರಾಕೃತೈಃ | ವಾತಾದೀನಾಂ ಪ್ರಕೋಪೇಣ ಗರ್ಭೋ ವೈಕೃತಮಾಪ್ನುಯಾತ್ ||೫೨||

Adhikarana 34 (53) · Śloka 53

ಮಲಾಲ್ಪತ್ವಾದಯೋಗಾಚ್ಚ ವಾಯೋಃ ಪಕ್ವಾಶಯಸ್ಯ ಚ | ವಾತಮೂತ್ರಪುರೀಷಾಣಿ ನ ಗರ್ಭಸ್ಥಃ ಕರೋತಿ ಹಿ ||೫೩||

Adhikarana 35 (54) · Śloka 54

ಜರಾಯುಣಾ ಮುಖೇ ಚ್ಛನ್ನೇ ಕಣ್ಠೇ ಚ ಕಫವೇಷ್ಟಿತೇ | ವಾಯೋರ್ಮಾರ್ಗನಿರೋಧಾಚ್ಚ ನ ಗರ್ಭಸ್ಥಃ ಪ್ರರೋದಿತಿ ||೫೪||

Adhikarana 36 (55) · Śloka 55

ನಿಃಶ್ವಾಸೋಚ್ಛ್ವಾಸಸಙ್ಕ್ಷೋಭಸ್ವಪ್ನಾನ್ ಗರ್ಭೋಽಧಿಗಚ್ಛತಿ | ಮಾತುರ್ನಿಶ್ವಸಿತೋಚ್ಛ್ವಾಸಸಙ್ಕ್ಷೋಭಸ್ವಪ್ನಸಮ್ಭವಾನ್ ||೫೫||

Adhikarana 37 (56) · Śloka 56

ಸನ್ನಿವೇಶಃ ಶರೀರಾಣಾಂ ದನ್ತಾನಾಂ ಪತನೋದ್ಭವೌ | ತಲೇಷ್ವಸಮ್ಭವೋ ಯಶ್ಚ ರೋಮ್ಣಾಮೇತತ್ ಸ್ವಭಾವತಃ ||೫೬||

Adhikarana 38 (57) · Śloka 57

ಭಾವಿತಾಃ ಪೂರ್ವದೇಹೇಷು ಸತತಂ ಶಾಸ್ತ್ರಬುದ್ಧಯಃ | ಭವನ್ತಿ ಸತ್ತ್ವಭೂಯಿಷ್ಠಾಃ ಪೂರ್ವಜಾತಿಸ್ಮರಾ ನರಾಃ ||೫೭||

Adhikarana 39 (58) · Śloka 58

ಕರ್ಮಣಾ ಚೋದಿತೋ ಯೇನ ತದಾಪ್ನೋತಿ ಪುನರ್ಭವೇ | ಅಭ್ಯಸ್ತಾಃ ಪೂರ್ವದೇಹೇ ಯೇ ತಾನೇವ ಭಜತೇ ಗುಣಾನ್ ||೫೮||

Adhikarana puShpikA · Śloka 2

ಇತಿ ಸುಶ್ರುತಸಂಹಿತಾಯಾಂ ಶಾರೀರಸ್ಥಾನೇ ಶುಕ್ರಶೋಣಿತಶುದ್ಧಿಶಾರೀರಂ ನಾಮ ದ್ವಿತೀಯೋಽಧ್ಯಾಯಃ ||೨||