21. karṇagatarōgapratiṣēdhādhyāyaḥ

Adhikarana 1 (1-2) · Śloka 2

ಅಥಾತಃ ಕರ್ಣಗತರೋಗಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಸಾಮಾನ್ಯಂ ಕರ್ಣರೋಧೇಷು ಘೃತಪಾನಂ ರಸಾಯನಮ್ | ಅವ್ಯಾಯಾಮೋಽಶಿರಃಸ್ನಾನಂ ಬ್ರಹ್ಮಚರ್ಯಮಕತ್ಥನಮ್ ||೩||

Adhikarana 3 (4) · Śloka 4

ಕರ್ಣಶೂಲೇ ಪ್ರಣಾದೇ ಚ ಬಾಧಿರ್ಯಕ್ಷ್ವೇಡಯೋರಪಿ | ಚತುರ್ಣಾಮಪಿ ರೋಗಾಣಾಂ ಸಾಮಾನ್ಯಂ ಭೇಷಜಂ ವಿದುಃ ||೪||

Adhikarana 4 (5) · Śloka 5

ಸ್ನಿಗ್ಧಂ ವಾತಹರೈಃ ಸ್ವೇದೈರ್ನರಂ ಸ್ನೇಹವಿರೇಚಿತಮ್ | ನಾಡೀಸ್ವೇದೈರುಪಚರೇತ್ಪಿಣ್ಡಸ್ವೇದೈಸ್ತಥೈವ ಚ ||೫||

Adhikarana 5 (6-7) · Śloka 7

ಬಿಲ್ವೈರಣ್ಡಾರ್ಕವರ್ಷಾಭೂದಧಿತ್ಥೋನ್ಮತ್ತಶಿಗ್ರುಭಿಃ | ಬಸ್ತಗನ್ಧಾಶ್ವಗನ್ಧಾಭ್ಯಾಂ ತರ್ಕಾರೀಯವವೇಣುಭಿಃ ||೬|| ಆರನಾಲಶೃತೈರೇಭಿರ್ನಾಡೀಸ್ವೇದಃ ಪ್ರಯೋಜಿತಃ | ಕಫವಾತಸಮುತ್ಥಾನಂ ಕರ್ಣಶೂಲಂ ನಿರಸ್ಯತಿ ||೭||

Adhikarana 6 (8) · Śloka 8

ಮೀನಕುಕ್ಕುಟಲಾವಾನಾಂ ಮಾಂಸಜೈಃ ಪಯಸಾಽಪಿ ವಾ | ಪಿಣ್ಡೈಃ ಸ್ವೇದಂ ಚ ಕುರ್ವೀತ ಕರ್ಣಶೂಲನಿವಾರಣಮ್ ||೮||

Adhikarana 7 (9-10) · Śloka 10

ಅಶ್ವತ್ಥಪತ್ರಖಲ್ಲಂ ವಾ ವಿಧಾಯ ಬಹುಪತ್ರಕಮ್ | ತದಙ್ಗಾರೈಃ ಸುಸಮ್ಪೂರ್ಣಂ ನಿದಧ್ಯಾಚ್ಛ್ರವಣೋಪರಿ ||೯|| ಯತ್ತೈಲಂ ಚ್ಯವತೇ ತಸ್ಮಾತ್ ಖಲ್ಲಾದಙ್ಗಾರತಾಪಿತಾತ್ | ತತ್ ಪ್ರಾಪ್ತಂ ಶ್ರವಣಸ್ರೋತಃ ಸದ್ಯೋ ಗೃಹ್ಣಾತಿ ವೇದನಾಮ್ ||೧೦||

Adhikarana 8 (11) · Śloka 11

ಕ್ಷೌಮಗುಗ್ಗುಲ್ವಗುರುಭಿಃ ಸಘೃತೈರ್ಧೂಪಯೇಚ್ಚ ತಮ್ | ಭಕ್ತೋಪರಿ ಹಿತಂ ಸರ್ಪಿರ್ಬಸ್ತಿಕರ್ಮ ಚ ಪೂಜಿತಮ್ ||೧೧||

Adhikarana 9 (12) · Śloka 13

ನಿರನ್ನೋ ನಿಶಿ ತತ್ಸರ್ಪಿಃ ಪೀತ್ವೋಪರಿ ಪಿಬೇತ್ ಪಯಃ | ಮೂರ್ಧಬಸ್ತಿಷು ನಸ್ಯೇ ಚ ಮಸ್ತಿಷ್ಕೇ ಪರಿಷೇಚನೇ ||೧೨|| ಶತಪಾಕಂ ಬಲಾತೈಲಂ ಪ್ರಶಸ್ತಂ ಚಾಪಿ ಭೋಜನೇ |೧೩|

Adhikarana 10 (13) · Śloka 14

ಕಣ್ಟಕಾರೀಮಜಾಕ್ಷೀರೇ ಪಕ್ತ್ವಾ ಕ್ಷೀರೇಣ ತೇನ ಚ ||೧೩|| ವಿಪಚೇತ್ ಕುಕ್ಕುಟವಸಾಂ ಕರ್ಣಯೋಸ್ತತ್ಪ್ರಪೂರಣಮ್ |೧೪|

Adhikarana 11 (14-16) · Śloka 16

ತಣ್ಡುಲೀಯಕಮೂಲಾನಿ ಫಲಮಙ್ಕೋಲಜಂ ತಥಾ ||೧೪|| ಅಹಿಂಸ್ರಾಕೇನ್ದುಕಾನ್ಮೂಲಂ ಸರಲಂ ದೇವದಾರು ಚ | ಲಶುನಂ ಶೃಙ್ಗವೇರಂ ಚ ತಥಾ ವಂಶಾವಲೇಖನಮ್ ||೧೫|| ಕಲ್ಕೈರೇಷಾಂ ತಥಾಽಮ್ಲೈಶ್ಚ ಪಚೇತ್ ಸ್ನೇಹಂ ಚತುರ್ವಿಧಮ್ | ವೇದನಾಯಾಃ ಪ್ರಶಾನ್ತ್ಯರ್ಥಂ ಹಿತಂ ತತ್ಕರ್ಣಪೂರಣಮ್ ||೧೬||

Adhikarana 12 (17-18) · Śloka 18

ಲಶುನಾರ್ದ್ರಕಶಿಗ್ರೂಣಾಂ ಮುರಙ್ಗ್ಯಾ ಮೂಲಕಸ್ಯ ಚ | ಕದಲ್ಯಾಃ ಸ್ವರಸಃ ಶ್ರೇಷ್ಠಃ ಕದುಷ್ಣಃ ಕರ್ಣಪೂರಣೇ ||೧೭|| ಶೃಙ್ಗವೇರರಸಃ ಕ್ಷೌದ್ರಂ ಸೈನ್ಧವಂ ತೈಲಮೇವ ಚ | ಕದುಷ್ಣಂ ಕರ್ಣಯೋರ್ದೇಯಮೇತದ್ವಾ ವೇದನಾಪಹಮ್ ||೧೮||

Adhikarana 13 (19) · Śloka 19

ವಂಶಾವಲೇಖನಾಯುಕ್ತೇ ಮೂತ್ರೇ ಚಾಜಾವಿಕೇ ಭಿಷಕ್ | ಸರ್ಪಿಃ ಪಚೇತ್ತೇನ ಕರ್ಣಂ ಪೂರಯೇತ್ ಕರ್ಣಶೂಲಿನಃ ||೧೯||

Adhikarana 14 (20-21) · Śloka 21

ಮಹತಃ ಪಞ್ಚಮೂಲಸ್ಯ ಕಾಣ್ಡಮಷ್ಟಾದಶಾಙ್ಗುಲಮ್ | ಕ್ಷೌಮೇಣಾವೇಷ್ಟ್ಯ ಸಂಸಿಚ್ಯ ತೈಲೇನಾದೀಪಯೇತ್ತತಃ ||೨೦|| ಯತ್ತೈಲಂ ಚ್ಯವತೇ ತೇಭ್ಯೋ ಧೃತೇಭ್ಯೋ ಭಾಜನೋಪರಿ | ಜ್ಞೇಯಂ ತದ್ದೀಪಿಕಾತೈಲಂ ಸದ್ಯೋ ಗೃಹ್ಣಾತಿ ವೇದನಾಮ್ ||೨೧||

Adhikarana 15 (22) · Śloka 22

ಕುರ್ಯಾದೇವಂ ಭದ್ರಕಾಷ್ಠೇ ಕುಷ್ಠೇ ಕಾಷ್ಠೇ ಚ ಸಾರಲೇ | ಮತಿಮಾನ್ ದೀಪಿಕಾತೈಲಂ ಕರ್ಣಶೂಲನಿಬರ್ಹಣಮ್ ||೨೨||

Adhikarana 16 (23-26) · Śloka 26

ಅರ್ಕಾಙ್ಕುರಾನಮ್ಲಪಿಷ್ಟಾಂಸ್ತೈಲಾಕ್ತಾನ್ ಲವಣಾನ್ವಿತಾನ್ | ಸನ್ನಿದಧ್ಯಾತ್ ಸ್ನುಹೀಕಾಣ್ಡೇ ಕೋರಿತೇ ತಚ್ಛದಾವೃತೇ ||೨೩|| ಪುಟಪಾಕಕ್ರಮಾಸ್ವಿನ್ನಾನ್ ಪೀಡಯೇದಾರಸಾಗಮಾತ್ | ಸುಖೋಷ್ಣಂ ತದ್ರಸಂ ಕರ್ಣೇ ದಾಪಯೇಚ್ಛೂಲಶಾನ್ತಯೇ ||೨೪|| ಕಪಿತ್ಥಮಾತುಲುಙ್ಗಾಮ್ಲಶೃಙ್ಗವೇರರಸೈಃ ಶುಭೈಃ | ಸುಖೋಷ್ಣೈಃ ಪೂರಯೇತ್ ಕರ್ಣಂ ತಚ್ಛೂಲವಿನಿವೃತ್ತಯೇ ||೨೫|| ಕರ್ಣಂ ಕೋಷ್ಣೇನ ಚುಕ್ರೇಣ ಪೂರಯೇತ್ ಕರ್ಣಶೂಲಿನಃ | ಸಮುದ್ರಫೇನಚೂರ್ಣೇನ ಯುಕ್ತ್ಯಾ ಚಾಪ್ಯವಚೂರ್ಣಯೇತ್ ||೨೬||

Adhikarana 17 (27) · Śloka 27

ಅಷ್ಟಾನಾಮಿಹ ಮೂತ್ರಾಣಾಂ ಮೂತ್ರೇಣಾನ್ಯತಮೇನ ತು | ಕೋಷ್ಣೇನ ಪೂರಯೇತ್ ಕರ್ಣಂ ಕರ್ಣಶೂಲೋಪಶಾನ್ತಯೇ ||೨೭||

Adhikarana 18 (28) · Śloka 28

ಮೂತ್ರೇಷ್ವಮ್ಲೇಷು ವಾತಘ್ನೇ ಗಣೇ ಚ ಕ್ವಥಿತೇ ಭಿಷಕ್ | ಪಚೇಚ್ಚತುರ್ವಿಧಂ ಸ್ನೇಹಂ ಪೂರಣಂ ತಚ್ಚ ಕರ್ಣಯೋಃ ||೨೮||

Adhikarana 19 (29) · Śloka 29

ಏತಾ ಏವ ಕ್ರಿಯಾಃ ಕುರ್ಯಾತ್ ಪಿತ್ತಘ್ನೈಃ ಪಿತ್ತಸಂಯುತೇ |೨೯|

Adhikarana 20 (29-30) · Śloka 30

ಕಾಕೋಲ್ಯಾದೌ ದಶಕ್ಷೀರಂ ತಿಕ್ತಂ ಚಾತ್ರ ಹಿತಂ ಹವಿಃ ||೨೯|| ಕ್ಷೀರವೃಕ್ಷಪ್ರವಾಲೇಷು ಮಧುಕೇ ಚನ್ದನೇ ತಥಾ | ಕಲ್ಕಕ್ವಾಥೇ ಪರಂ ಪಕ್ವಂ ಶರ್ಕರಾಮಧುಕೈಃ ಸರೈಃ ||೩೦||

Adhikarana 21 (31) · Śloka 31

ಇಙ್ಗುದೀಸರ್ಷಪಸ್ನೇಹೌ ಸಕಫೇ ಪೂರಣೇ ಹಿತೌ | ತಿಕ್ತೌಷಧಾನಾಂ ಯೂಷಾಶ್ಚ ಸ್ವೇದಾಶ್ಚ ಕಫನಾಶನಾಃ ||೩೧||

Adhikarana 22 (32-33) · Śloka 33

ಸುರಸಾದೌ ಕೃತಂ ತೈಲಂ ಪಞ್ಚಮೂಲೇ ಮಹತ್ಯಪಿ | ಮಾತುಲುಙ್ಗರಸಃ ಶುಕ್ತಂ ಲಶುನಾರ್ದ್ರಕಯೋ ರಸಃ ||೩೨|| ಏಕೈಕಃ ಪೂರಣೇ ಪಥ್ಯಸ್ತೈಲಂ ತೇಷ್ವಪಿ ವಾ ಕೃತಮ್ | ತೀಕ್ಷ್ಣಾ ಮೂರ್ಧವಿರೇಕಾಶ್ಚ ಕವಲಾಶ್ಚಾತ್ರ ಪೂಜಿತಾಃ ||೩೩||

Adhikarana 23 (34) · Śloka 34

ಕರ್ಣಶೂಲವಿಧಿಃ ಕೃತ್ಸ್ನಃ ಪಿತ್ತಘ್ನಃ ಶೋಣಿತಾವೃತೇ |೩೪|

Adhikarana 24 (34-35) · Śloka 36

ಶೂಲಪ್ರಣಾದಬಾಧಿರ್ಯಕ್ಷ್ವೇಡಾನಾಂ ತು ಪ್ರಕೀರ್ತಿತಮ್ ||೩೪|| ಸಾಮಾನ್ಯತೋ, ವಿಶೇಷೇಣ ಬಾಧಿರ್ಯೇ ಪೂರಣಂ ಶೃಣು | ಗವಾಂ ಮೂತ್ರೇಣ ಬಿಲ್ವಾನಿ ಪಿಷ್ಟ್ವಾ ತೈಲಂ ವಿಪಾಚಯೇತ್ ||೩೫|| ಸಜಲಂ ಚ ಸದುಗ್ಧಂ ಚ ಬಾಧಿರ್ಯೇ ಕರ್ಣಪೂರಣಮ್ |೩೬|

Adhikarana 25 (36-37) · Śloka 38

ಸಿತಾಮಧುಕಬಿಮ್ಬೀಭಿಃ ಸಿದ್ಧಂ ವಾಽಽಜೇ ಪಯಸ್ಯಪಿ ||೩೬|| ಬಿಮ್ಬೀಕ್ವಾಥೇ ವಿಮಥ್ಯೋಷ್ಣಂ ಶೀತೀಭೂತಂ ತದುದ್ಧೃತಮ್ | ಪುನಃ ಪಚೇದ್ದಶಕ್ಷೀರಂ ಸಿತಾಮಧುಕಚನ್ದನೈಃ ||೩೭|| ಬಿಲ್ವಾಮ್ಬುಗಾಢಂ ತತ್ತೈಲಂ ಬಾಧಿರ್ಯೇ ಕರ್ಣಪೂರಣಮ್ |೩೮|

Adhikarana 26 (38) · Śloka 38

ವಕ್ಷ್ಯತೇ ಯಃಪ್ರತಿಶ್ಯಾಯೇ ವಿಧಿಃ ಸೋಽಪ್ಯತ್ರ ಪೂಜಿತಃ ||೩೮||

Adhikarana 27 (39) · Śloka 39

ವಾತವ್ಯಾಧಿಷು ಯಶ್ಚೋಕ್ತೋ ವಿಧಿಃ ಸ ಚ ಹಿತೋ ಭವೇತ್ |೩೯|

Adhikarana 28 (39) · Śloka 40

ಕರ್ಣಸ್ರಾವೇ ಪೂತಿಕರ್ಣೇ ತಥೈವ ಕೃಮಿಕರ್ಣಕೇ ||೩೯|| ಸಮಾನಂ ಕರ್ಮ ಕುರ್ವೀತ ಯೋಗಾನ್ ವೈಶೇಷಿಕಾನಪಿ |೪೦|

Adhikarana 29 (40-41) · Śloka 41

ಶಿರೋವಿರೇಚನಂ ಚೈವ ಧೂಪನಂ ಪೂರಣಂ ತಥಾ ||೪೦|| ಪ್ರಮಾರ್ಜನಂ ಧಾವನಂ ಚ ವೀಕ್ಷ್ಯ ವೀಕ್ಷ್ಯಾವಚಾರಯೇತ್ | ರಾಜವೃಕ್ಷಾದಿತೋಯೇನ ಸುರಸಾದಿಗಣೇನ ವಾ ||೪೧||

Adhikarana 30 (42-45) · Śloka 45

ಕರ್ಣಪ್ರಕ್ಷಾಲನಂ ಕಾರ್ಯಂ ಚೂರ್ಣೈರೇಷಾಂ ಚ ಪೂರಣಮ್ | ಕ್ವಾಥಂ ಪಞ್ಚಕಷಾಯಂ ತು ಕಪಿತ್ಥರಸಯೋಜಿತಮ್ ||೪೨|| ಕರ್ಣಸ್ರಾವೇ ಪ್ರಶಂಸನ್ತಿ ಪೂರಣಂ ಮಧುನಾ ಸಹ | ಸರ್ಜತ್ವಕ್ಚೂರ್ಣಸಂಯುಕ್ತಃ ಕಾರ್ಪಾಸೀಫಲಜೋ ರಸಃ ||೪೩|| ಯೋಜಿತೋ ಮಧುನಾ ವಾಽಪಿ ಕರ್ಣಸ್ರಾವೇ ಪ್ರಶಸ್ಯತೇ | ಲಾಕ್ಷಾ ರಸಾಞ್ಜನಂ ಸರ್ಜಶ್ಚೂರ್ಣಿತಂ ಕರ್ಣಪೂರಣಮ್ ||೪೪|| ಸಶೈವಲಂ ಮಹಾವೃಕ್ಷಜಮ್ಬ್ವಾಮ್ರಪ್ರಸವಾಯುತಮ್ | ಕುಲೀರಕ್ಷೌದ್ರಮಣ್ಡೂಕೀಸಿದ್ಧಂ ತೈಲಂ ಚ ಪೂಜಿತಮ್ ||೪೫||

Adhikarana 31 (46) · Śloka 46

ತಿನ್ದುಕಾನ್ಯಭಯಾ ರೋಧ್ರಂ ಸಮಙ್ಗಾಽಽಮಲಕಂ ಮಧು | ಪೂರಣಂ ಚಾತ್ರ ಪಥ್ಯಂ ಸ್ಯಾತ್ಕಪಿತ್ಥರಸಯೋಜಿತಮ್ ||೪೬||

Adhikarana 32 (47-48) · Śloka 49

ರಸಮಾಮ್ರಕಪಿತ್ಥಾನಾಂ ಮಧೂಕಧವಶಾಲಜಮ್ | ಪೂರಣಾರ್ಥಂ ಪ್ರಶಂಸನ್ತಿ ತೈಲಂ ವಾ ತೈರ್ವಿಪಾಚಿತಮ್ ||೪೭|| ಪ್ರಿಯಙ್ಗುಮಧುಕಾಮ್ಬಷ್ಠಾಧಾತಕೀಶಿಲಪರ್ಣಿಭಿಃ | ಮಞ್ಜಿಷ್ಠಾಲೋಧ್ರಲಾಕ್ಷಾಭಿಃ ಕಪಿತ್ಥಸ್ಯ ರಸೇನ ವಾ ||೪೮|| ಪಚೇತ್ತೈಲಂ ತದಾಸ್ರಾವಮವಗೃಹ್ಣಾತಿ ಪೂರಣಾತ್ |೪೯|

Adhikarana 33 (49-50) · Śloka 51

ಘೃತಂ ರಸಾಞ್ಜನಂ ನಾರ್ಯಾಃ ಕ್ಷೀರೇಣ ಮಧುಸಂಯುತಮ್ ||೪೯|| ತತ್ಪ್ರಶಸ್ತಂ ಚಿರೋತ್ಥೇಽಪಿ ಸಾಸ್ರಾವೇ ಪೂತಿಕರ್ಣಕೇ | ನಿರ್ಗುಣ್ಡೀಸ್ವರಸಸ್ತೈಲಂ ಸಿನ್ಧುರ್ಧೂಮರಜೋ ಗುಡಃ ||೫೦|| ಪೂರಣಃ ಪೂತಿಕರ್ಣಸ್ಯ ಶಮನೋ ಮಧುಸಂಯುತಃ |೫೧|

Adhikarana 34 (51) · Śloka 51

ಕೃಮಿಕರ್ಣಕನಾಶಾರ್ಥಂ ಕೃಮಿಘ್ನಂ ಯೋಜಯೇದ್ವಿಧಿಮ್ ||೫೧||

Adhikarana 35 (52) · Śloka 52

ವಾರ್ತಾಕುಧೂಮಶ್ಚ ಹಿತಃ ಸಾರ್ಷಪಸ್ನೇಹ ಏವ ಚ |೫೨|

Adhikarana 36 (52-53) · Śloka 53

ಕೃಮಿಘ್ನಂ ಹರಿತಾಲೇನ ಗವಾಂ ಮೂತ್ರಯುತೇನ ಚ ||೫೨|| ಗುಗ್ಗುಲೋಃ ಕರ್ಣದೌರ್ಗನ್ಧ್ಯೇ ಧೂಪನಂ ಶ್ರೇಷ್ಠಮುಚ್ಯತೇ | ಛರ್ದನಂ ಧೂಮಪಾನಂ ಚ ಕವಲಸ್ಯ ಚ ಧಾರಣಮ್ ||೫೩||

Adhikarana 37 (54) · Śloka 54

ಕರ್ಣಕ್ಷ್ವೇಡೇ ಹಿತಂ ತೈಲಂ ಸಾರ್ಷಪಂ ಚೈವ ಪೂರಣಮ್ | ವಿದ್ರಧೌ ಚಾಪಿ ಕುರ್ವೀತ ವಿದ್ರಧ್ಯುಕ್ತಂ ಚಿಕಿತ್ಸಿತಮ್ ||೫೪||

Adhikarana 38 (55) · Śloka 55

ಪ್ರಕ್ಲೇದ್ಯ ಧೀಮಾಂಸ್ತೈಲೇನ ಸ್ವೇದೇನ ಪ್ರವಿಲಾಯ್ಯ ಚ | ಶೋಧಯೇತ್ಕರ್ಣವಿಟ್ಕಂ ತು ಭಿಷಕ್ ಸಮ್ಯಕ್ ಶಲಾಕಯಾ ||೫೫||

Adhikarana 39 (56) · Śloka 56

ನಾಡೀಸ್ವೇದೋಽಥ ವಮನಂ ಧೂಮೋ ಮೂರ್ಧವಿರೇಚನಮ್ | ವಿಧಿಶ್ಚ ಕಫಹೃತ್ಸರ್ವಃ ಕರ್ಣಕಣ್ಡೂಮಪೋಹತಿ ||೫೬||

Adhikarana 40 (57) · Śloka 57

ಅಥ ಕರ್ಣಪ್ರತೀನಾಹೇ ಸ್ನೇಹಸ್ವೇದೌ ಪ್ರಯೋಜಯೇತ್ | ತತೋ ವಿರಿಕ್ತಶಿರಸಃ ಕ್ರಿಯಾಂ ಪ್ರಾಪ್ತಾಂ ಸಮಾಚರೇತ್ ||೫೭||

Adhikarana 41 (58) · Śloka 58

ಕರ್ಣಪಾಕಸ್ಯ ಭೈಷಜ್ಯಂ ಕುರ್ಯಾತ್ಪಿತ್ತವಿಸರ್ಪವತ್ |೫೮|

Adhikarana 42 (58) · Śloka 59

ಕರ್ಣಚ್ಛಿದ್ರೇ ವರ್ತಮಾನಂ ಕೀಟಂ ಕ್ಲೇದಮಲಾದಿ ವಾ ||೫೮|| ಶೃಙ್ಗೇಣಾಪಹರೇದ್ಧೀಮಾನಥವಾಽಪಿ ಶಲಾಕಯಾ |೫೯|

Adhikarana 43 (59) · Śloka 59

ಶೇಷಾಣಾಂ ತು ವಿಕಾರಾಣಾಂ ಪ್ರಾಕ್ ಚಿಕಿತ್ಸಿತಮೀರಿತಮ್ ||೫೯||

Adhikarana puShpikA · Śloka 21

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಶಾಲಾಕ್ಯತನ್ತ್ರೇ ಕರ್ಣಗತರೋಗಪ್ರತಿಷೇಧೋ ನಾಮೈಕವಿಂಶೋಽಧ್ಯಾಯಃ ||೨೧||