27. navagrahākr̥tivijñānīyādhyāyaḥ

Adhikarana 1 (1-2) · Śloka 2

ಅಥಾತೋ ನವಗ್ರಹಾಕೃತಿವಿಜ್ಞಾನೀಯಮಧ್ಯಾಯಂ ವ್ಯಾಖ್ಯಾಸ್ಯಾಮಃ ||೧|| ಯಥೋವಾಚ ಭಗವಾನ್ ಧನ್ವನ್ತರಿಃ ||೨||

Adhikarana 2 (3) · Śloka 3

ಬಾಲಗ್ರಹಾಣಾಂ ವಿಜ್ಞಾನಂ ಸಾಧನಂ ಚಾಪ್ಯನನ್ತರಮ್ | ಉತ್ಪತ್ತಿಂ ಕಾರಣಂ ಚೈವ ಸುಶ್ರುತೈಕಮನಾಃ ಶೃಣು ||೩||

Adhikarana 3 (4-5) · Śloka 5

ಸ್ಕನ್ದಗ್ರಹಸ್ತು ಪ್ರಥಮಃ ಸ್ಕನ್ದಾಪಸ್ಮಾರ ಏವ ಚ | ಶಕುನೀ ರೇವತೀ ಚೈವ ಪೂತನಾ ಚಾನ್ಧಪೂತನಾ ||೪|| ಪೂತನಾ ಶೀತನಾಮಾ ಚ ತಥೈವ ಮುಖಮಣ್ಡಿಕಾ | ನವಮೋ ನೈಗಮೇಷಶ್ಚ ಯಃ ಪಿತೃಗ್ರಹಸಞ್ಜ್ಞಿತಃ ||೫||

Adhikarana 4 (6) · Śloka 6

ಧಾತ್ರೀಮಾತ್ರೋಃ ಪ್ರಾಕ್ಪ್ರದಿಷ್ಟಾಪಚಾರಾಚ್ಛೌಚಭ್ರಷ್ಟಾನ್ಮಙ್ಗಲಾಚಾರಹೀನಾನ್ | ತ್ರಸ್ತಾನ್ ಹೃಷ್ಟಾಂಸ್ತರ್ಜಿತಾನ್ ತಾಡಿತಾನ್ ವಾ ಪೂಜಾಹೇತೋರ್ಹಿಂಸ್ಯುರೇತೇ ಕುಮಾರಾನ್ ||೬||

Adhikarana 5 (7) · Śloka 7

ಐಶ್ವರ್ಯಸ್ಥಾಸ್ತೇ ನ ಶಕ್ಯಾ ವಿಶನ್ತೋ ದೇಹಂ ದ್ರಷ್ಟುಂ ಮಾನುಷೈರ್ವಿಶ್ವರೂಪಾಃ | ಆಪ್ತಂ ವಾಕ್ಯಂ ತತ್ಸಮೀಕ್ಷ್ಯಾಭಿಧಾಸ್ಯೇ ಲಿಙ್ಗಾನ್ಯೇಷಾಂ ಯಾನಿ ದೇಹೇ ಭವನ್ತಿ ||೭||

Adhikarana 6 (8) · Śloka 8

ಶೂನಾಕ್ಷಃ ಕ್ಷತಜಸಗನ್ಧಿಕಃ ಸ್ತನದ್ವಿಡ್ ವಕ್ರಾಸ್ಯೋ ಹತಚಲಿತೈಕಪಕ್ಷ್ಮನೇತ್ರಃ | ಉದ್ವಿಗ್ನಃ ಸುಲುಲಿತಚಕ್ಷುರಲ್ಪರೋದೀ ಸ್ಕನ್ದಾರ್ತೋ ಭವತಿ ಚ ಗಾಢಮುಷ್ಟಿವರ್ಚಾಃ ||೮||

Adhikarana 7 (9) · Śloka 9

ನಿಃಸಞ್ಜ್ಞೋ ಭವತಿ ಪುನರ್ಭವೇತ್ಸಸಞ್ಜ್ಞಃ ಸಂರಬ್ಧಃ ಕರಚರಣೈಶ್ಚ ನೃತ್ಯತೀವ | ವಿಣ್ಮೂತ್ರೇ ಸೃಜತಿ ವಿನದ್ಯ ಜೃಮ್ಭಮಾಣಃ ಫೇನಂ ಚ ಪ್ರಸೃಜತಿ ತತ್ಸಖಾಭಿಪನ್ನಃ ||೯||

Adhikarana 8 (10) · Śloka 10

ಸ್ರಸ್ತಾಙ್ಗೋ ಭಯಚಕಿತೋ ವಿಹಙ್ಗಗನ್ಧಿಃ ಸಂಸ್ರಾವಿವ್ರಣಪರಿಪೀಡಿತಃ ಸಮನ್ತಾತ್ | ಸ್ಫೋಟೈಶ್ಚ ಪ್ರಚಿತತನುಃ ಸದಾಹಪಾಕೈರ್ವಿಜ್ಞೇಯೋ ಭವತಿ ಶಿಶುಃ ಕ್ಷತಃ ಶಕುನ್ಯಾ ||೧೦||

Adhikarana 9 (11) · Śloka 11

ರಕ್ತಾಸ್ಯೋ ಹರಿತಮಲೋಽತಿಪಾಣ್ಡುದೇಹಃ ಶ್ಯಾವೋ ವಾ ಜ್ವರಮುಖಪಾಕವೇದನಾರ್ತಃ | ರೇವತ್ಯಾ ವ್ಯಥಿತತನುಶ್ಚ ಕರ್ಣನಾಸಂ ಮೃದ್ನಾತಿ ಧ್ರುವಮಭಿಪೀಡಿತಃ ಕುಮಾರಃ ||೧೧||

Adhikarana 10 (12) · Śloka 12

ಸ್ರಸ್ತಾಙ್ಗಃ ಸ್ವಪಿತಿ ಸುಖಂ ದಿವಾ ನ ರಾತ್ರೌ ವಿಡ್ ಭಿನ್ನಂ ಸೃಜತಿ ಚ ಕಾಕತುಲ್ಯಗನ್ಧಿಃ | ಛರ್ದ್ಯಾಽಽರ್ತೋ ಹೃಷಿತತನೂರುಹಃ ಕುಮಾರಸ್ತೃಷ್ಣಾಲುರ್ಭವತಿ ಚ ಪೂತನಾಗೃಹೀತಃ ||೧೨||

Adhikarana 11 (13) · Śloka 13

ಯೋ ದ್ವೇಷ್ಟಿ ಸ್ತನಮತಿಸಾರಕಾಸಹಿಕ್ಕಾಚ್ಛರ್ದೀಭಿರ್ಜ್ವರಸಹಿತಾಭಿರರ್ದ್ಯಮಾನಃ | ದುರ್ವರ್ಣಃ ಸತತಮಧಃಶಯೋಽಮ್ಲಗನ್ಧಿಸ್ತಂ ಬ್ರೂಯುರ್ಭಿಷಜ ಇಹಾನ್ಧಪೂತನಾರ್ತಮ್ ||೧೩||

Adhikarana 12 (14) · Śloka 14

ಉದ್ವಿಗ್ನೋ ಭೃಶಮತಿವೇಪತೇ ಪ್ರರುದ್ಯಾತ್ ಸಂಲೀನಃ ಸ್ವಪಿತಿ ಚ ಯಸ್ಯ ಚಾನ್ತ್ರಕೂಜಃ | ವಿಸ್ರಾಙ್ಗೋ ಭೃಶಮತಿಸಾರ್ಯತೇ ಚ ಯಸ್ತಂ ಜಾನೀಯಾದ್ಭಿಷಗಿಹ ಶೀತಪೂತನಾರ್ತಮ್ ||೧೪||

Adhikarana 13 (15) · Śloka 15

ಮ್ಲಾನಾಙ್ಗಃ ಸುರುಚಿರಪಾಣಿಪಾದವಕ್ತ್ರೋ ಬಹ್ವಾಶೀ ಕಲುಷಸಿರಾವೃತೋದರೋ ಯಃ | ಸೋದ್ವೇಗೋ ಭವತಿ ಚ ಮೂತ್ರತುಲ್ಯಗನ್ಧಿಃ ಸ ಜ್ಞೇಯಃ ಶಿಶುರಿಹ ವಕ್ತ್ರಮಣ್ಡಿಕಾರ್ತಃ ||೧೫||

Adhikarana 14 (16) · Śloka 16

ಯಃ ಫೇನಂ ವಮತಿ ವಿನಮ್ಯತೇ ಚ ಮಧ್ಯೇ ಸೋದ್ವೇಗಮ್ ವಿಲಪತಿ ಚೋರ್ಧ್ವಮೀಕ್ಷಮಾಣಃ | ಜ್ವರ್ಯೇತ ಪ್ರತತಮಥೋ ವಸಾಸಗನ್ಧಿರ್ನಿಃಸಞ್ಜ್ಞೋ ಭವತಿ ಹಿ ನೈಗಮೇಷಜುಷ್ಟಃ ||೧೬||

Adhikarana 15 (17) · Śloka 17

ಪ್ರಸ್ತಬ್ಧೋ ಯಃ ಸ್ತನದ್ವೇಷೀ ಮುಹ್ಯತೇ ಚಾವಿಶನ್ಮುಹುಃ | ತಂ ಬಾಲಮಚಿರಾದ್ಧನ್ತಿ ಗ್ರಹಃ ಸಮ್ಪೂರ್ಣಲಕ್ಷಣಃ ||೧೭||

Adhikarana 16 (18) · Śloka 18

ವಿಪರೀತಮತಃ ಸಾಧ್ಯಂ ಚಿಕಿತ್ಸೇದಚಿರಾರ್ದಿತಮ್ |೧೮|

Adhikarana 17 (18-20) · Śloka 20

ಗೃಹೇ ಪುರಾಣಹವಿಷಾಽಭ್ಯಜ್ಯ ಬಾಲಂ ಶುಚೌ ಶುಚಿಃ ||೧೮|| ಸರ್ಷಪಾನ್ ಪ್ರಕಿರೇತ್ತೇಷಾಂ ತೈಲೈರ್ದೀಪಂ ಚ ಕಾರಯೇತ್ | ಸದಾ ಸನ್ನಿಹಿತಂ ಚಾಪಿ ಜುಹುಯಾದ್ಧವ್ಯವಾಹನಮ್ ||೧೯|| ಸರ್ವಗನ್ಧೌಷಧೀಬೀಜೈರ್ಗನ್ಧಮಾಲ್ಯೈರಲಙ್ಕ್ರತಮ್ | ಅಗ್ನಯೇ ಕೃತ್ತಿಕಾಭ್ಯಶ್ಚ ಸ್ವಾಹಾ ಸ್ವಾಹೇತಿ ಸನ್ತತಮ್ ||೨೦||

Adhikarana 18 (21) · Śloka 21

ನಮಃ ಸ್ಕನ್ದಾಯ ದೇವಾಯ ಗ್ರಹಾಧಿಪತಯೇ ನಮಃ | ಶಿರಸಾ ತ್ವಾಽಭಿವನ್ದೇಽಹಂ ಪ್ರತಿಗೃಹ್ಣೀಷ್ವ ಮೇ ಬಲಿಮ್ | ನೀರುಜೋ ನಿರ್ವಿಕಾರಶ್ಚ ಶಿಶುರ್ಮೇ ಜಾಯತಾಂ ದ್ರುತಮ್ ||೨೧||

Adhikarana puShpikA · Śloka 27

ಇತಿ ಸುಶ್ರುತಸಂಹಿತಾಯಾಮುತ್ತರತನ್ತ್ರಾನ್ತರ್ಗತೇ ಕುಮಾರತನ್ತ್ರೇ ನವಗ್ರಹಾಕೃತಿವಿಜ್ಞಾನೀಯೋ ನಾಮ (ಪ್ರಥಮೋಽಧ್ಯಾಯಃ, ಆದಿತಃ) ಸಪ್ತವಿಂಶೋಽಧ್ಯಾಯಃ ||೨೭||