Adhikarana atha viShopadravapratiShedho nAma saptacatvAriMsho~adhyAyaH, adhyAyapratij~jA (1) · Śloka 1
ಅಥಾತೋ ವಿಷೋಪದ್ರವಪ್ರತಿಷೇಧಂ ನಾಮಾಧ್ಯಾಯಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರೇಯಾದಯೋ ಮಹರ್ಷಯಃ||೧||
अथातो विषोपद्रवप्रतिषेधं नामाध्यायं व्याख्यास्यामः| इति ह स्माहुरात्रेयादयो महर्षयः||१||
🔊 Audio coming soon
Adhikarana viShopadravAH (2) · Śloka 2
ಜ್ವರಕಾಸವಮಿಶ್ವಾಸಹಿಧ್ಮಾತೃಷ್ಣಾಽತಿಮೂರ್ಚ್ಛನಮ್| ವಿಶೋ ಭೇದೋಽತಿಕಾಠಿನ್ಯಮಾನಾಹೋ ಬಸ್ತಿಮೂರ್ದ್ಧರುಕ್| ಶ್ವಯಥುಃ ಪೂತದಂಶತ್ವಂ ರಕ್ತಸ್ರಾವೋ ವಿಷಾನಿಲಃ| ಇತಿ ಷೋಡಶ ನಿರ್ದಿಷ್ಟಾಃ ವಿಷಾರ್ತ್ತಾನಾಮುಪದ್ರವಾಃ| ಗಚ್ಛನ್ತ್ಯುಪೇಕ್ಷಿತಾ ನಾಶಂ ಯೈರ್ಜುಷ್ಟಾ ವಿಷರೋಗಿಣಃ||೨||
ज्वरकासवमिश्वासहिध्मातृष्णाऽतिमूर्च्छनम्| विशो भेदोऽतिकाठिन्यमानाहो बस्तिमूर्द्धरुक्| श्वयथुः पूतदंशत्वं रक्तस्रावो विषानिलः| इति षोडश निर्दिष्टाः विषार्त्तानामुपद्रवाः| गच्छन्त्युपेक्षिता नाशं यैर्जुष्टा विषरोगिणः||२||
🔊 Audio coming soon
Adhikarana rAjavRukShAdikvAthaH jvare (3) · Śloka 3
ರಾಜವೃಕ್ಷಫಲೋಶೀರಕಾಶ್ಮರ್ಯಘನಪದ್ಮಕಾತ್| ಕ್ವಾಥಃ ಸಶರ್ಕರಾಕ್ಷೌದ್ರೋ ವಿಷಜ್ವರಹರಃ ಪರಮ್||೩||
राजवृक्षफलोशीरकाश्मर्यघनपद्मकात्| क्वाथः सशर्कराक्षौद्रो विषज्वरहरः परम्||३||
🔊 Audio coming soon
Adhikarana jvarAdau yogAntarANi (4) · Śloka 4
ಪೀತಾ ತಣ್ಡುಲತೋಯೇನ ಕಟುಕಾ ಸಸಿತೋಪಲಾ| ವಿಷಜ್ವರಹರಾಽಜಾಜೀ ಜೀವಕರ್ಷಭಕೋತ್ಪಲಮ್| ಕೋಲಮಜ್ಜಸಿತಾಧಾನ್ಯಭಾರ್ಙ್ಗೀ ಯಷ್ಟ್ಯಾಹ್ವಕೇಸರಮ್| ವಿಷಜ್ವರವಮಿಶ್ವಾಸಕಾಸತೃಷ್ಣಾನಿಬರ್ಹಣಮ್| ತ್ರಿಫಲಾರಗ್ವಧವ್ಯಾಘ್ರೀಕ್ವಾಥೋ ಜ್ವರವಿಬನ್ಧಜಿತ್| ಬಾಲಬಿಲ್ವವಚಾಮುಸ್ತಾಕಷಾಯಃ ಸಪುನರ್ನವಃ| ಜ್ವರಾಗ್ನಿಸಾದಶ್ವಯಥೂನ್ನಿಹನ್ತಿ ವಿಷಸಮ್ಭವಾನ್||೪||
पीता तण्डुलतोयेन कटुका ससितोपला| विषज्वरहराऽजाजी जीवकर्षभकोत्पलम्| कोलमज्जसिताधान्यभार्ङ्गी यष्ट्याह्वकेसरम्| विषज्वरवमिश्वासकासतृष्णानिबर्हणम्| त्रिफलारग्वधव्याघ्रीक्वाथो ज्वरविबन्धजित्| बालबिल्ववचामुस्ताकषायः सपुनर्नवः| ज्वराग्निसादश्वयथून्निहन्ति विषसम्भवान्||४||
🔊 Audio coming soon
Adhikarana vaidehikAdi shvAsakAsajvare (5) · Śloka 5
ವೈದೇಹಿಕಾರಾಮಠಕಂ ಕಪಿತ್ಥರಸಸೈನ್ಧವಮ್| ಸಸಿತಾಮಾಕ್ಷಿಕಂ ಲೀಢಂ ಶ್ವಾಸಕಾಸಜ್ವರಾಪಹಮ್||೫||
वैदेहिकारामठकं कपित्थरससैन्धवम्| ससितामाक्षिकं लीढं श्वासकासज्वरापहम्||५||
🔊 Audio coming soon
Adhikarana viShakAsacikitsA (6) · Śloka 6
ಸದ್ರಾಕ್ಷಾನಾಗರಾಂ ಕೃಷ್ಣಾಮಥವಾ ಸವರಾಘನಾಮ್| ಲೀಡ್ವಾಜ್ಯಮಧುನಾ ಕಾಸಾನ್ಮುಚ್ಯತೇ ವಿಷಸಮ್ಭವಾತ್| ಸಪಾಠಾಞ್ಜನಮಞ್ಜಿಷ್ಠಾದ್ವಿನಿಶಾಮಧುಕಂ ತಥಾ| ಯಷ್ಟ್ಯಾಹ್ವಮಮ್ಭಸಾ ಪೀತ್ವಾ.......................||೬||
सद्राक्षानागरां कृष्णामथवा सवराघनाम्| लीड्वाज्यमधुना कासान्मुच्यते विषसम्भवात्| सपाठाञ्जनमञ्जिष्ठाद्विनिशामधुकं तथा| यष्ट्याह्वमम्भसा पीत्वा.......................||६||
🔊 Audio coming soon
Adhikarana viShavamIcikitsA (7) · Śloka 7
....................................ಂಅರಿಚೈರವಚೂರ್ಣಿತಮ್| ವಿಷವಮ್ಯಾಂ ಪಿಬೇತ್ಕ್ವಾಥಂ ಬಿಲ್ವಮೂಲಾದ್ರಜೋಽಥವಾ| ಧಾತ್ರೀಪರುಷಕದ್ರಾಕ್ಷಾಮಧುಕಂ ಪಯಸಾ ದ್ರುತಮ್| ವೇಲ್ಲಾಗ್ರ್ಯಾಞ್ಜನಸೋಶೀರಯಷ್ಟ್ಯೈಲಾಕಣಕೇಸರಮ್| ಲಿಹ್ಯಾನ್ಮರಿಚಕುಮ್ಭೀಂ ವಾ ಘೃತಪುಷ್ಪರಸದ್ರುತಾಮ್| ಕ್ಷೀರಿವೃಕ್ಷಾಙ್ಕುರಕ್ಷೌದ್ರಸಿತಾಸ್ತೃಡ್ವಮಥುಚ್ಛಿದಃ| ಜೀರ್ಣಶಾಲ್ಯೋದನಂ ಕ್ಷೌದ್ರಂ ಕ್ಷೀರಂ ಚನ್ದನಸಾಧಿತಮ್| ಶೀತಾಮ್ಭೋಽನುಪಿಬೇದ್ ಭುಕ್ತ್ವಾ ವಿಷಚ್ಛರ್ದಿಮಪೋಹತಿ||೭||
....................................ंअरिचैरवचूर्णितम्| विषवम्यां पिबेत्क्वाथं बिल्वमूलाद्रजोऽथवा| धात्रीपरुषकद्राक्षामधुकं पयसा द्रुतम्| वेल्लाग्र्याञ्जनसोशीरयष्ट्यैलाकणकेसरम्| लिह्यान्मरिचकुम्भीं वा घृतपुष्परसद्रुताम्| क्षीरिवृक्षाङ्कुरक्षौद्रसितास्तृड्वमथुच्छिदः| जीर्णशाल्योदनं क्षौद्रं क्षीरं चन्दनसाधितम्| शीताम्भोऽनुपिबेद् भुक्त्वा विषच्छर्दिमपोहति||७||
🔊 Audio coming soon
Adhikarana viShajashvAse cikitsA (8) · Śloka 8
ತೈಲಗೋವಿಡ್ರಸಕ್ಷೌದ್ರೈರ್ಲಿಹ್ಯಾತ್ ಕೃಷ್ಣಾಪ್ರಿಯಙ್ಗುಕೇ| ಶ್ವಾಸೀ ಕ್ಷೌದ್ರೇಣ ವಾ ದ್ರಾಕ್ಷಾಶೃಙ್ಗೀಮಾಗಧಿಕಾಸಿತಾಃ| ಗುಡನಾಗರವೈದೇಹೀವಿಜಯಾಮಲಕಾನಿ ವಾ||೮||
तैलगोविड्रसक्षौद्रैर्लिह्यात् कृष्णाप्रियङ्गुके| श्वासी क्षौद्रेण वा द्राक्षाशृङ्गीमागधिकासिताः| गुडनागरवैदेहीविजयामलकानि वा||८||
🔊 Audio coming soon
Adhikarana viShajahidhmAyAM cikitsA (9) · Śloka 9
ಹಿಧ್ಮಾಯಾಂ ಶಙ್ಖಕನಕಕಟುಕಾಸ್ವರ್ಣಗೈರಿಕಮ್| ವೇಲ್ಲಶುಣ್ಠೀಕಣೋಶೀರರಜನೀದ್ವಿತಯಾನಿ ವಾ| ಲಿಹ್ಯಾದ್ವಾ ವ್ಯೋಷಮೃದ್ವೀಕಾಂ ಬೀಜಪೂರರಸೇನ ವಾ| ಸಕ್ಷೌದ್ರಂ ವಾಲಕರಜಃ ಕ್ವಾಥಂ ವಾ ಸಗುಡಂ ಪಿಬೇತ್| ವಿಶ್ವಭೇಷಜಗಾಯತ್ರೀಹರಿದ್ರಾಮರದಾರುಜಮ್| ದನ್ತೀನ್ದ್ರವಾರುಣೀದ್ವೀಪೀಕಲ್ಕಂ ಸೌವೀರಕೇಣ ವಾ||೯||
हिध्मायां शङ्खकनककटुकास्वर्णगैरिकम्| वेल्लशुण्ठीकणोशीररजनीद्वितयानि वा| लिह्याद्वा व्योषमृद्वीकां बीजपूररसेन वा| सक्षौद्रं वालकरजः क्वाथं वा सगुडं पिबेत्| विश्वभेषजगायत्रीहरिद्रामरदारुजम्| दन्तीन्द्रवारुणीद्वीपीकल्कं सौवीरकेण वा||९||
🔊 Audio coming soon
Adhikarana viShajatRuNmUrcchayoH cikitsA (10) · Śloka 10
ತೃಣ್ಮೂರ್ಚ್ಛಯೋರಾಶಿರಸೋ ಲೇಪಸೇಕಾ ಹಿಮಾ ಹಿತಾಃ| ಅಮ್ಭೋಜನಾಲಕುಸುಮಚನ್ದನೋಶೀರಮೌಕ್ತಿಕೈಃ| ವೈಹಾಯಸಸಿತಾತೋಯಕ್ಷೀರಾಜ್ಯೇಕ್ಷುರಸಾಪ್ಲುತೈಃ| ವೀಜನಂ ತಾಲವೃನ್ತೇನ ಶೀತೇ ಸಿಕತಿಲೇ ಸ್ಥಿತಿಃ| ಕಮಲೋತ್ಪಲಕಿಞ್ಜಲ್ಕಪಟಲಾವೃತವಾರಿಷು| ವಿಷತೃಡ್ದಾಹಮೂರ್ಚ್ಛಾಘ್ನಂ ಸರಸೀಷ್ವವಗಾಹನಮ್||೧೦||
तृण्मूर्च्छयोराशिरसो लेपसेका हिमा हिताः| अम्भोजनालकुसुमचन्दनोशीरमौक्तिकैः| वैहायससितातोयक्षीराज्येक्षुरसाप्लुतैः| वीजनं तालवृन्तेन शीते सिकतिले स्थितिः| कमलोत्पलकिञ्जल्कपटलावृतवारिषु| विषतृड्दाहमूर्च्छाघ्नं सरसीष्ववगाहनम्||१०||
🔊 Audio coming soon
Adhikarana tRuShNAyAM visheSheNa cikitsA (11) · Śloka 11
ವಿಷವೇಗಸಮುತ್ಥಾಯಾಂ ತೃಷ್ಣಾಯಾಂ ಲಾಜತರ್ಪಣಮ್| ಶರ್ಕರಾದಾಡಿಮಕ್ಷೌದ್ರಸಲಿಲಾಪ್ಲಾವಿತಂ ಪಿಬೇತ್| ವಟವೇತಸಜಮ್ಬ್ವಾಮ್ರಸೇವ್ಯತೋಯಂ ಚ ಶೀತಲಮ್||೧೧||
विषवेगसमुत्थायां तृष्णायां लाजतर्पणम्| शर्करादाडिमक्षौद्रसलिलाप्लावितं पिबेत्| वटवेतसजम्ब्वाम्रसेव्यतोयं च शीतलम्||११||
🔊 Audio coming soon
Adhikarana viShajAtisAre cikitsA (12) · Śloka 12
ಭೂನಿಮ್ಬಮುಸ್ತಕಟುಕಾತ್ರಾಯನ್ತೀನ್ದ್ರಯವಾನ್ ಸಮಾನ್| ದ್ವೌ ಭಾಗೌ ಚಿತ್ರಕಾದಷ್ಟೌ ಕುಟಜಾದ್ವಾರಿಣಾ ಪಿಬೇತ್| ವಿಷಾತಿಸಾರೋದಾವರ್ತಕಾಸಶ್ವಾಸಜ್ವರಾಪಹಮ್| ಲೋಧ್ರಮೋಚರಸಾಮ್ಬಷ್ಠಾಧಾತಕೀಸ್ತಣ್ಡುಲಾಮ್ಬುನಾ| ಸಮಾಕ್ಷಿಕಾ ಪಿಬೇತ್ತದ್ವನ್ನಾಗರಾತಿವಿಷಾಭಯಾಃ| ಸಧಾತಕೀಃ ಸಕುಟಜಾಃ ಸಾಞ್ಜನಾಃ ಶ್ಲಕ್ಷ್ಣಚೂರ್ಣಿತಾಃ| ಪಾಠಾನಾಗರಚೂರ್ಣಂ ವಾ ದಧ್ನಾ ಯುಕ್ತಂ ಸಮಾಕ್ಷಿಕಮ್||೧೨||
भूनिम्बमुस्तकटुकात्रायन्तीन्द्रयवान् समान्| द्वौ भागौ चित्रकादष्टौ कुटजाद्वारिणा पिबेत्| विषातिसारोदावर्तकासश्वासज्वरापहम्| लोध्रमोचरसाम्बष्ठाधातकीस्तण्डुलाम्बुना| समाक्षिका पिबेत्तद्वन्नागरातिविषाभयाः| सधातकीः सकुटजाः साञ्जनाः श्लक्ष्णचूर्णिताः| पाठानागरचूर्णं वा दध्ना युक्तं समाक्षिकम्||१२||
🔊 Audio coming soon
Adhikarana bastirugAdiShu cikitsA (13) · Śloka 13
ಬಸ್ತಿರುಗ್ವರ್ತನಾಹೇಷು ಫಲವರ್ತಿಂ ಪ್ರಯೋಜಯೇತ್| ಸಾರಗ್ವಧಾಂ ಸತ್ರಿವೃತಾಂ ಸೋಪಕುಲ್ಯಾಂ ಹರೀತಕೀಮ್| ಪಿಬೇದ್ ಘೃತೇನ ಸಕ್ಷೌದ್ರಾಂ ಬಸ್ತಿಶೂಲಾದಿನಾಶಿನೀಮ್| ಗೃಹಧೂಮನತಶ್ಯಾಮಾನೀಲಿನೀತಣ್ಡುಲೀಯಕೈಃ| ಸಿದ್ಧಂ ವಾಜ್ಯಂ ತಥಾಽಸಿದ್ಧಂ ವರಾಕ್ವಾಥತ್ರಿವೃದ್ಯುತಮ್||೧೩||
बस्तिरुग्वर्तनाहेषु फलवर्तिं प्रयोजयेत्| सारग्वधां सत्रिवृतां सोपकुल्यां हरीतकीम्| पिबेद् घृतेन सक्षौद्रां बस्तिशूलादिनाशिनीम्| गृहधूमनतश्यामानीलिनीतण्डुलीयकैः| सिद्धं वाज्यं तथाऽसिद्धं वराक्वाथत्रिवृद्युतम्||१३||
🔊 Audio coming soon
Adhikarana mUrddharuji cikitsA (14) · Śloka 14
ಕಾಕೋಲೀಕ್ಷೀರಿವೃದ್ವಾತ್ವಗ್ದ್ರಾಕ್ಷಾಯಷ್ಟ್ಯಾಹ್ವಶರ್ಕರಾಃ| ನಸ್ಯಂ ವಿಷಶಿರೋರುಗ್ಘ್ನಂ ಸಂಯೋಜ್ಯಂ ಶೀತವಾರಿಣಾ||೧೪||
काकोलीक्षीरिवृद्वात्वग्द्राक्षायष्ट्याह्वशर्कराः| नस्यं विषशिरोरुग्घ्नं संयोज्यं शीतवारिणा||१४||
🔊 Audio coming soon
Adhikarana viShajashvayathau cikitsA (15) · Śloka 15
ಶ್ವಯಥೌ ಶುದ್ಧಕೋಷ್ಠಸ್ಯ ಪಯಃಪಾನೇ ಹಿತಂ ಶೃತಮ್| ವಿಶ್ವಭೇಷಜವೈದೇಹೀಕಟುಕಾದೇವದಾರುಭಿಃ| ಸುರಸಾಮೂಲಕಲ್ಕೈರ್ವಾ ಛಾಗಂ ವಾ ಪಿಪ್ಪಲೀಶೃತಮ್| ತ್ರಿಫಲಾಯಾಃ ಕಷಾಯೇಣ ತ್ರಿವೃತಾ ಭಾವಿತಾ ತ್ರ್ಯಹಮ್| ಆಲೋಡ್ಯ ಸರ್ಪಿಷಾ ಪೀತಾ ವಿಷಶ್ವಯಥುನಾಶಿನೀ| ಮಧುವೇಲ್ಲವರಾವ್ಯೋಷಸುರಾಹ್ವೋಶೀರಪದ್ಮಕೈಃ| ವಿಷಶ್ವಯಥುಜಿಲ್ಲೇಪಸ್ತಥಾ ಸ್ವಾದುಕಷಾಯಕೈಃ| ಶಿರೀಷಪುಷ್ಪಾಽಹಿಶಿರೋನತಕುಷ್ಠೈರ್ಘೃತಾನ್ವಿತಃ| ಧೂಪೋಽಗದಃ ಶ್ವಯಥುಜಿತ್ಸಮಸ್ತವಿಷನಾಶನಃ||೧೫||
श्वयथौ शुद्धकोष्ठस्य पयःपाने हितं शृतम्| विश्वभेषजवैदेहीकटुकादेवदारुभिः| सुरसामूलकल्कैर्वा छागं वा पिप्पलीशृतम्| त्रिफलायाः कषायेण त्रिवृता भाविता त्र्यहम्| आलोड्य सर्पिषा पीता विषश्वयथुनाशिनी| मधुवेल्लवराव्योषसुराह्वोशीरपद्मकैः| विषश्वयथुजिल्लेपस्तथा स्वादुकषायकैः| शिरीषपुष्पाऽहिशिरोनतकुष्ठैर्घृतान्वितः| धूपोऽगदः श्वयथुजित्समस्तविषनाशनः||१५||
🔊 Audio coming soon
Adhikarana pUtidaMshe cikitsA (16) · Śloka 16
ಅಲ್ಪೇನಾಪ್ಯಪಚಾರೇಣ ದಂಶಃ ಪೂತಿತ್ವಮಶ್ನುತೇ| ಪ್ರಾಯೋ ನ ಸಹತೇ ತೀಕ್ಷ್ಣಮುಷ್ಣಂ ವಾ ಭೇಷಜಂ ವಿಷಮ್| ಮಧುರಸ್ನಿಗ್ಧಶೀತಾನಿ ಯುಞ್ಜ್ಯಾತ್ತಸ್ಮಾದ್ವಿಷವ್ರಣೇ| ಸೇಕಾಲೇಪಾಂಶ್ಚ ಸಕ್ಷೀರೈಃ ಕಷಾಯೈಃ ಕ್ಷೀರಿವೃಕ್ಷಜೈಃ| ನ್ಯಗ್ರೋಧಶೃಙ್ಗಮಧುಕತಿಲಸರ್ಷಪಸೈನ್ಧವಮ್| ಸಾಭಯಾ ನಿಮ್ಬಪತ್ರಾಜ್ಯಂ ದಂಶಪೂತಿತ್ವನಾಶನಮ್| ಕರ್ಣಿಕಾಪಾತನಂ ಶ್ರೇಷ್ಠಂ ವಿಷವ್ರಣವಿನಾಶನಮ್||೧೬||
अल्पेनाप्यपचारेण दंशः पूतित्वमश्नुते| प्रायो न सहते तीक्ष्णमुष्णं वा भेषजं विषम्| मधुरस्निग्धशीतानि युञ्ज्यात्तस्माद्विषव्रणे| सेकालेपांश्च सक्षीरैः कषायैः क्षीरिवृक्षजैः| न्यग्रोधशृङ्गमधुकतिलसर्षपसैन्धवम्| साभया निम्बपत्राज्यं दंशपूतित्वनाशनम्| कर्णिकापातनं श्रेष्ठं विषव्रणविनाशनम्||१६||
🔊 Audio coming soon
Adhikarana raktasrAve cikitsA (17) · Śloka 17
ರಕ್ತೇ ಸ್ರವತ್ಯತಿಭೃಶಂ ಘೃತಂ ಸಮರಿಚಂ ಪಿಬೇತ್| ತಣ್ಡುಲೀಯಕಮೂಲೇನ ಸಿತಯಾ ವಾ ಸಮನ್ವಿತಮ್| ದಂಶಂ ಪ್ರಲೇಪಯೇಚ್ಚಾಸ್ಯ ದಾರ್ವ್ಯಾಸು ಶ್ಲಕ್ಷ್ಣಪಿಷ್ಟಯಾ| ಸಿತೋಪಲಾಕ್ಷೌದ್ರಕೃತಚ್ಛಾಗದುಗ್ಧಾನಿ ನಾವನಮ್| ಶಮೀಕಲ್ಕಂ ಪಿಬೇಚ್ಛ್ಲಕ್ಷ್ಣಮಙ್ಗಂ ಲಿಮ್ಪೇದ್ವಿಶಾಲಯಾ| ನಾವನೇ ಹೇಮಶುಕ್ಲಾ ಚ ತತಃ ಶಾಮ್ಯತಿ ಶೋಣಿತಮ್||೧೭||
रक्ते स्रवत्यतिभृशं घृतं समरिचं पिबेत्| तण्डुलीयकमूलेन सितया वा समन्वितम्| दंशं प्रलेपयेच्चास्य दार्व्यासु श्लक्ष्णपिष्टया| सितोपलाक्षौद्रकृतच्छागदुग्धानि नावनम्| शमीकल्कं पिबेच्छ्लक्ष्णमङ्गं लिम्पेद्विशालया| नावने हेमशुक्ला च ततः शाम्यति शोणितम्||१७||
🔊 Audio coming soon
Adhikarana viShAnile cikitsA (18) · Śloka 18
ಕೃಶಸ್ಯಾತಿಸ್ರುತೇ ರಕ್ತೇ ರೂಕ್ಷೈರತ್ಯರ್ಥಸೇವಿತೈಃ| ವಿಷಸ್ಯ ಚ ಸ್ವಭಾವೇನ ಮಾತರಿಶ್ವಾ ಪ್ರಕುಪ್ಯತಿ| ಉನ್ಮಾದಾಕ್ಷೇಪಕಮನೋಭ್ರಂಶಾಪಸ್ಮೃತಯಸ್ತತಃ| ತತ್ರೇಷ್ಟಂ ಸ್ನೇಹನಂ ಬಸ್ತಿನಸ್ಯಪ್ರಧಮನಾಞ್ಜನಮ್| ನಾಗದನ್ತ್ಯಭಯಾಕುಷ್ಠಪಿಪ್ಪಲೀವೃಷಕಟ್ಫಲಮ್| ಭಲ್ಲಾತಕಾಸ್ಥಿತ್ರಿಕಟುಕಾಬಿಲ್ವಪ್ರತಿವಿಷಾಗ್ನಿಕಾಃ| ಸಕ್ಷೀರಂ ತೈರ್ಘೃತಂ ಸಿದ್ಧಂ ವಿಷವಾತವಿಕಾರಜಿತ್| ಪಿಬೇದೇರಣ್ಡತೈಲಂ ವಾ ಛಾಗಮಾಂಸರಸಾನ್ವಿತಮ್| ಐಕಧ್ಯಂ ಘೃತತೈಲಂ ವಾ ಮೇಧ್ಯಮಾಸರಸಾಶನಣಃ| ಕಾರ್ಪಾಸಮೂಲಂ ಮರಿಚಂ ಹರಿದ್ರೇ ನಲದಂ ನಲಮ್| ಪಿಪ್ಪಲೀಂ ಸ್ವರ್ಜಿಕಾಂ ಕುಷ್ಠಂ ಜಲೇನಾಲೋಡ್ಯ ಪಾಯಯೇತ್| ಉನ್ಮತ್ತಂ ವಿಷವಾತೇನ ತಥಾಽಪಸ್ಮಾರಿಣಂ ನರಮ್| ವಚಾಹಂಸಪದೀವ್ಯೋಷದಧಿತ್ಥಂ ಹಸ್ತಿಪಿಪ್ಪಲೀಮ್| ದೇವದಾರುಬಲಾಬಿಲ್ವಕೃಮಿಜಿತ್ಕುಷ್ಠಟುಣ್ಟುಕಮ್| ಲೋಧ್ರಾಖುಕರ್ಣ್ಯತಿವಿಷಾಃ ಕ್ಷೀರಂ ಸರ್ಪಿಶ್ಚ ಪಾಯಯೇತ್| ನಿಹನ್ತಿ ಪಾನಾಭ್ಯಙ್ಗಾಭ್ಯಾಂ ಘೃತಂ ಸರ್ವವಿಷಾಣಿ ತತ್||೧೮||
कृशस्यातिस्रुते रक्ते रूक्षैरत्यर्थसेवितैः| विषस्य च स्वभावेन मातरिश्वा प्रकुप्यति| उन्मादाक्षेपकमनोभ्रंशापस्मृतयस्ततः| तत्रेष्टं स्नेहनं बस्तिनस्यप्रधमनाञ्जनम्| नागदन्त्यभयाकुष्ठपिप्पलीवृषकट्फलम्| भल्लातकास्थित्रिकटुकाबिल्वप्रतिविषाग्निकाः| सक्षीरं तैर्घृतं सिद्धं विषवातविकारजित्| पिबेदेरण्डतैलं वा छागमांसरसान्वितम्| ऐकध्यं घृततैलं वा मेध्यमासरसाशनणः| कार्पासमूलं मरिचं हरिद्रे नलदं नलम्| पिप्पलीं स्वर्जिकां कुष्ठं जलेनालोड्य पाययेत्| उन्मत्तं विषवातेन तथाऽपस्मारिणं नरम्| वचाहंसपदीव्योषदधित्थं हस्तिपिप्पलीम्| देवदारुबलाबिल्वकृमिजित्कुष्ठटुण्टुकम्| लोध्राखुकर्ण्यतिविषाः क्षीरं सर्पिश्च पाययेत्| निहन्ति पानाभ्यङ्गाभ्यां घृतं सर्वविषाणि तत्||१८||
🔊 Audio coming soon
Adhikarana sheSharogeShu cikitsA (19) · Śloka 19
ಪ್ರತಿಕುರ್ಯಾದ್ಯಥಾಸ್ವಂ ಚ ರೋಗೇಷ್ವೇನಂ ಪರೇಷು ಚ| ದೋಷಾನುಬನ್ಧಮಾಲೋಚ್ಯ ವಿಷತನ್ತ್ರಾವಿರೋಧತಃ||೧೯||
प्रतिकुर्याद्यथास्वं च रोगेष्वेनं परेषु च| दोषानुबन्धमालोच्य विषतन्त्राविरोधतः||१९||
🔊 Audio coming soon
Adhikarana viShasheShe cikitsA (20) · Śloka 20
ದೃಶ್ಯಶಬ್ದಾಗದೈರಸ್ಯ ವಿಷಶೇಷಂ ನಿವರ್ತಯೇತ್| ಅಲ್ಪಮಪ್ಯವಶಿಷ್ಟಂ ಹಿ ವ್ಯಾಧಯೇ ಮರಣಾಯ ವಾ||೨೦||
दृश्यशब्दागदैरस्य विषशेषं निवर्तयेत्| अल्पमप्यवशिष्टं हि व्याधये मरणाय वा||२०||
🔊 Audio coming soon
Adhikarana kShArAgadaH (21) · Śloka 21
ಧವಾಶ್ವಕರ್ಣತಿನಿಶಕರಘಾಟಕಪೀತನಾನ್| ಪಲಾಶಾಮ್ರಾತಕಕುಭಪಾರಿಭದ್ರಕತಿಲ್ವಕಾನ್| ಕಪಿತ್ಥಕುಟಜಾಙ್ಕೋಲಪ್ರಗ್ರಹಾಮಲಕೀಭುಜಾನ್| ಶಮೀಶ್ಲೇಷ್ಮಾತಕಾನನ್ತಗೋಜೀಯಮಲಕಣ್ಟಕಾನ್| ಗೋಪಘೋಣ್ಟಾಹಿಮಾರೌ ಚ ಭಸ್ಮೀಕೃತ್ಯಾಮ್ಭಸಾ ಗವಾಮ್| ಕ್ಷಾರಕಲ್ಪೇನ ವಿಸ್ರಾವ್ಯ ಪಚೇತ್ಕ್ಷಿಪ್ತ್ವಾಽವಚೂರ್ಣಿತಾನ್| ಪಿಪ್ಪಲೀದ್ವಯಕೋಶಾಮ್ರಸಪ್ತಪರ್ಣೈಲವಾಲುಕಾನ್| ವರಾಙ್ಗಚೋಚಮಞ್ಜಿಷ್ಠಾಕುಷ್ಠವಞ್ಜುಲಟುಣ್ಟುಕಾನ್| ವಿಡಙ್ಗಾತಿವಿಷಾನನ್ತಾಸರ್ಷಪಾತಣ್ಡುಲೀಯಕಾನ್| ಸುರಾಹ್ವಸರಲಪ್ಲಕ್ಷಗೃಹಧೂಮಕರಞ್ಜಕಾನ್| ನಾಗದನ್ತೀ ಸುತಶ್ರೇಣೀ ನಿಚುಲಂ ವರುಣಂ ವಚಾಮ್| ವರ್ದ್ಧಮಾನಮಯೋ ಬಿಲ್ವಂ ಕ್ಷಾರವತ್ಪಾಕಮಾಗತಮ್| ತಲ್ಲೋಹಕುಮ್ಭೇ ನಿಹಿತಂ ಕಾರ್ಯಂ ಸನ್ನಿಹಿತಂ ಸದಾ| ತೇನ ದುನ್ದುಭಿಮಾಲಿಮ್ಪೇತ್ ಪತಾಕಾಸ್ತರಣಾನಿ ಚ| ದರ್ಶನಶ್ರವಣಸ್ಪರ್ಶೈರ್ನಿರ್ವಿಷಂ ತಾನಿ ಕುರ್ವತೇ| ಪಾನಾತ್ಕ್ಷಾರಾಗದಶ್ಚೈಷ ವಿಷಂ ಸ್ಥಾವರಜಙ್ಗಮಮ್| ಶೂಲಗುಲ್ಮೋದರಾಜೀರ್ಣಶ್ವಾಸಕಾಸಾಶ್ಮಶರ್ಕರಾಃ| ಶೋಫಾರ್ಶೋಗ್ರಹಣೀದೋಷಾನರುಚಿಂ ಚ ನಿಯಚ್ಛತಿ| ಅಪಿ ತಕ್ಷಕತುಲ್ಯಾನಾಂ ಸರ್ಪಾಣಾಂ ದರ್ಪನಾಶನಃ||೨೧||
धवाश्वकर्णतिनिशकरघाटकपीतनान्| पलाशाम्रातककुभपारिभद्रकतिल्वकान्| कपित्थकुटजाङ्कोलप्रग्रहामलकीभुजान्| शमीश्लेष्मातकानन्तगोजीयमलकण्टकान्| गोपघोण्टाहिमारौ च भस्मीकृत्याम्भसा गवाम्| क्षारकल्पेन विस्राव्य पचेत्क्षिप्त्वाऽवचूर्णितान्| पिप्पलीद्वयकोशाम्रसप्तपर्णैलवालुकान्| वराङ्गचोचमञ्जिष्ठाकुष्ठवञ्जुलटुण्टुकान्| विडङ्गातिविषानन्तासर्षपातण्डुलीयकान्| सुराह्वसरलप्लक्षगृहधूमकरञ्जकान्| नागदन्ती सुतश्रेणी निचुलं वरुणं वचाम्| वर्द्धमानमयो बिल्वं क्षारवत्पाकमागतम्| तल्लोहकुम्भे निहितं कार्यं सन्निहितं सदा| तेन दुन्दुभिमालिम्पेत् पताकास्तरणानि च| दर्शनश्रवणस्पर्शैर्निर्विषं तानि कुर्वते| पानात्क्षारागदश्चैष विषं स्थावरजङ्गमम्| शूलगुल्मोदराजीर्णश्वासकासाश्मशर्कराः| शोफार्शोग्रहणीदोषानरुचिं च नियच्छति| अपि तक्षकतुल्यानां सर्पाणां दर्पनाशनः||२१||
🔊 Audio coming soon
Adhikarana sugandhAkhyo~agadaH (22) · Śloka 22
ಶ್ರೀವೇಷ್ಟಕಮನೋಹ್ವಾಲಂ ಸಸರ್ಜರಸವಾಲಕಮ್| ಕರ್ಷಾಂಶಂ ನಾಗಪುಷ್ಪಸ್ಯ ಪ್ರಕುಞ್ಚಂ ತ್ರುಟಿ ವಿಂಶಕಮ್| ಹರೇಣವಃ ಚತುಃಷಷ್ಟಿಃ ಕುಟನ್ನಟಚತುಷ್ಟಯಮ್| ಶತಾಹ್ವಾಂ ಷೋಡಶೈತಾನಿ ಪುಷ್ಯೇ ಸಮ್ಭೃತ್ಯ ಪೇಷಯೇತ್| ಆಶ್ಲೇಷಾಸು ಗವಾಂ ಮಧ್ಯೇ ಶಸ್ತ್ರಮನ್ತ್ರಾಭಿರಕ್ಷಿತಮ್| ಕುಮಾರ್ಯಾ ಸ್ನಾತಯಾ ತತ್ರ ಮನ್ತ್ರೋಽಯಂ ವಿಷ್ಣುನಿರ್ಮಿತಃ| ಮಾತಾ ಮೇ ವಿಜಯಾ ನಾಮ ಜಯೋ ನಾಮ ಪಿತಾ ಮಮ| ಅಜಯ್ಯಸ್ಯ ಚ ಪುತ್ರೋಽಸೌ ಜಯೇ ಚ ವಿಜಯಾಮಿ ಚ| ಸುಗನ್ಧಾಖ್ಯೋಽಯಮಗದೋ ನಿತ್ಯಂ ದೇಹವಿಲೇಪನಾತ್| ಅಭಙ್ಗಕರಣೋ ಯುದ್ಧೇ ವಿವಾದೇ ಚ ಜಯಾವಹಃ| ಅನೇನ ಲೇಪಿತಾಶ್ಛತ್ರದುನ್ದುಭಿಧ್ವಜತೋರಣಾಃ| ದೃಷ್ಟಸ್ಪೃಷ್ಟಶ್ರುತಾ ಘ್ನನ್ತಿ ವಿಷಂ ಸ್ಥಾವರಜಙ್ಗಮಮ್| ಭೂತಬಾಲಗ್ರಹೋನ್ಮಾದಾನ್ ಗೇಹಸ್ಥೋಽಪಿ ನಿವಾರಯೇತ್||೨೨||
श्रीवेष्टकमनोह्वालं ससर्जरसवालकम्| कर्षांशं नागपुष्पस्य प्रकुञ्चं त्रुटि विंशकम्| हरेणवः चतुःषष्टिः कुटन्नटचतुष्टयम्| शताह्वां षोडशैतानि पुष्ये सम्भृत्य पेषयेत्| आश्लेषासु गवां मध्ये शस्त्रमन्त्राभिरक्षितम्| कुमार्या स्नातया तत्र मन्त्रोऽयं विष्णुनिर्मितः| माता मे विजया नाम जयो नाम पिता मम| अजय्यस्य च पुत्रोऽसौ जये च विजयामि च| सुगन्धाख्योऽयमगदो नित्यं देहविलेपनात्| अभङ्गकरणो युद्धे विवादे च जयावहः| अनेन लेपिताश्छत्रदुन्दुभिध्वजतोरणाः| दृष्टस्पृष्टश्रुता घ्नन्ति विषं स्थावरजङ्गमम्| भूतबालग्रहोन्मादान् गेहस्थोऽपि निवारयेत्||२२||
🔊 Audio coming soon
Adhikarana mahAsugandho~agadaH (23) · Śloka 23
ಪ್ರಪೌಣ್ಡರೀಕಸರಲದೇವದಾರುಕುಟನ್ನಟಮ್| ಜಟಾಶತಾಹ್ವಾತಿವಿಷಾತಿಲಪರ್ಣೀ ಸುಗನ್ಧಿಕಾ| ನೀಲೀಯವಪುಲಾಭಾರ್ಙ್ಗೀಮಧುಯಷ್ಟ್ಯೈಲವಾಲುಕಮ್| ತೋಯತೋಯದಕಾಲೀಯತಗರಧ್ಯಾಮಕತ್ವಚಃ| ನಖಪದ್ಮಕಪುನ್ನಾಗಪತ್ರಕಾಲಾನುಸಾರಿಕಾಃ| ತಾಲೀಸಪತ್ರಂ ಮರಿಚಂ ಜೋಙ್ಗಕಂ ಚನ್ದನದ್ವಯಮ್| ದ್ವ್ಯೇಲಾ ದ್ವಿಸೇವ್ಯಾ ದ್ವಿಶ್ವೇತಾ ದ್ವಿನಿಶಾ ನಲದದ್ವಯಮ್| ಲಾಕ್ಷಾಶೀತಶಿವವ್ಯೋಷಫಲಿನೀಧಾನ್ಯಗೈರಿಕಮ್| ಶೈಲೇಯಕಶಿಲಾಪುಷ್ಪಗ್ರನ್ಥಿಲಾಚೋರಕಾಭಯಾಃ| ಅರ್ಕಸ್ಥೈಣೇಯಪೃಥ್ವೀಕಾಕಟುಕಾಚನ್ದ್ರರಾಜಯಃ| ಕಲಿಙ್ಗಕಃ ಸರ್ಜರಸಃ ಕುಷ್ಠಂ ಲವಣಪಞ್ಚಕಮ್| ಶ್ರೀಪರ್ಣಿಕಾಶ್ಮರೀಶೇಲುಶಿಂಶಪಾಸಿನ್ದುವಾರಜಾಃ| ಚಮ್ಪಕಾಶೋಕಸುರಸಸುಮನಾಸ್ತಿಲ್ವಕೋದ್ಭವಾಃ| ಪಾಟಲ್ಯಾಸ್ತೃಣಶೂಲ್ಯಾಶ್ಚ ಪ್ರಸವಾಃ ಕುಮುದೋತ್ಪಲಮ್| ತಿನಿಶಾರ್ಜುನಶಮ್ಯಾಕಧವಪುಷ್ಪಂ ಸಪಙ್ಕಜಮ್| ಪಞ್ಚಾಶೀತೇರಿದಂ ಚೂರ್ಣಂ ಸಮೂತ್ರಘೃತಮಾಕ್ಷಿಕಮ್| ನಿಧಾಪಯೇತ್ ಗವಾಂ ಶೃಙ್ಗೇ ಮನುಷ್ಯೇ ಪುನರಾಹರೇತ್| ಭಗ್ನಸ್ಕನ್ಧಂ ವಿವೃತಾಕ್ಷಂ ಮೃತ್ಯೋರ್ದಂಷ್ಟ್ರಾನ್ತರಂ ಗತಮ್| ಮಹಾಸುಗನ್ಧೋ ನಾಮ್ನಾಽಯಮತಿವೀರ್ಯೋಽತಿತೇಜಸಾ| ವಾರಯತ್ಯತಿದುರ್ವಾರಂ ವಿಷಾಗ್ನಿಂ ವಾಸುಕೇರಪಿ| ನೃಪೋಽನೇನಾನುಲಿಪ್ತಾಙ್ಗೋ ಭವೇತ್ ಸರ್ವಜನಪ್ರಿಯಃ| ತೇಜಸ್ವಿತಾಂ ಚ ಲಭತೇ ರಾಜಕಸ್ಯಾಪಿ ಮಧ್ಯಗಃ||೨೩||
प्रपौण्डरीकसरलदेवदारुकुटन्नटम्| जटाशताह्वातिविषातिलपर्णी सुगन्धिका| नीलीयवपुलाभार्ङ्गीमधुयष्ट्यैलवालुकम्| तोयतोयदकालीयतगरध्यामकत्वचः| नखपद्मकपुन्नागपत्रकालानुसारिकाः| तालीसपत्रं मरिचं जोङ्गकं चन्दनद्वयम्| द्व्येला द्विसेव्या द्विश्वेता द्विनिशा नलदद्वयम्| लाक्षाशीतशिवव्योषफलिनीधान्यगैरिकम्| शैलेयकशिलापुष्पग्रन्थिलाचोरकाभयाः| अर्कस्थैणेयपृथ्वीकाकटुकाचन्द्रराजयः| कलिङ्गकः सर्जरसः कुष्ठं लवणपञ्चकम्| श्रीपर्णिकाश्मरीशेलुशिंशपासिन्दुवारजाः| चम्पकाशोकसुरससुमनास्तिल्वकोद्भवाः| पाटल्यास्तृणशूल्याश्च प्रसवाः कुमुदोत्पलम्| तिनिशार्जुनशम्याकधवपुष्पं सपङ्कजम्| पञ्चाशीतेरिदं चूर्णं समूत्रघृतमाक्षिकम्| निधापयेत् गवां शृङ्गे मनुष्ये पुनराहरेत्| भग्नस्कन्धं विवृताक्षं मृत्योर्दंष्ट्रान्तरं गतम्| महासुगन्धो नाम्नाऽयमतिवीर्योऽतितेजसा| वारयत्यतिदुर्वारं विषाग्निं वासुकेरपि| नृपोऽनेनानुलिप्ताङ्गो भवेत् सर्वजनप्रियः| तेजस्वितां च लभते राजकस्यापि मध्यगः||२३||
🔊 Audio coming soon
Adhikarana shItoShNaviShaye sAmAnyaniyamaH (24) · Śloka 24
ಶೀತಮೇವ ಚ ಕುರ್ವೀತ ವಿಧಾನಂ ವಿಷರೋಗಿಣಾಮ್| ಮುಕ್ತ್ವಾ ಕೀಟವಿಷಂ ತದ್ಧಿ ಶೀತೇನಾಭಿಪ್ರವರ್ದ್ಧತೇ||೨೪||
शीतमेव च कुर्वीत विधानं विषरोगिणाम्| मुक्त्वा कीटविषं तद्धि शीतेनाभिप्रवर्द्धते||२४||
🔊 Audio coming soon
Adhikarana viShe pathyam (25) · Śloka 25
ಶಾಲಯಃ ಷಷ್ಟಿಕಾ ಜೀರ್ಣಾಃ ಕೋರದೂಷಾಃ ಪ್ರಿಯಙ್ಗವಃ| ಮುದ್ಗೋ ಹರೇಣುಸ್ತುವರೀ ಪಟೋಲಂ ವೇತ್ರಪಲ್ಲವಾಃ| ತಣ್ಡುಲೀಯಕಜೀವನ್ತೀ ವಾರ್ತಾಕಂ ಸುನಿಷಣ್ಣಕಃ| ಜಾಙ್ಗಲಂ ದಾಡಿಮಂ ಧಾತ್ರೀ ಕಪಿತ್ಥಂ ಸೈನ್ಧವಂ ಸಿತಾ| ಅವಿದಾಹಿ ಯದನ್ಯಚ್ಚ ವಿಜ್ಞಾಯಾನ್ನಸ್ವರೂಪತಃ| ತತ್ತದ್ದದ್ಯಾದ್ವಿಷಾರ್ತ್ತೇಭ್ಯಃ ಕಾರ್ಯಾ ವ್ಯಞ್ಜನಸಂಸ್ಕೃತಿಃ| ಕಷಾಯೈರ್ವಿಷಹನ್ತೃಣಾಂ ಘೃತೈಃ ಕಲ್ಯಾಣಕಾದಿಭಿಃ| ದಿವ್ಯಸಾರಸಕೂಪೋತ್ಥಮನ್ಯದ್ವಾ ಶೃತಶೀತಲಮ್| ಮಧ್ವಾಮಲಕಯುಕ್ತಂ ವಾ ವಿಷಾರ್ತ್ತಃ ಸಲಿಲಂ ಪಿಬೇತ್| ನದೀತಟಾಕಜಂ ತ್ಯಾಜ್ಯಂ ವಿಶೇಷೇಣ ಘನಾಗಮೇ| ಶುಕ್ಲವಸ್ತ್ರೋದರಾಯಾತೈಃ ಸುಕೃತಾಃ ಸಕ್ತವೋ ಯವೈಃ| ತಕ್ರೇಣ ಸಘೃತಾಃ ಪೀತಾಃ ಪರಮಂ ವಿಷನಾಶನಾಃ||೨೫||
शालयः षष्टिका जीर्णाः कोरदूषाः प्रियङ्गवः| मुद्गो हरेणुस्तुवरी पटोलं वेत्रपल्लवाः| तण्डुलीयकजीवन्ती वार्ताकं सुनिषण्णकः| जाङ्गलं दाडिमं धात्री कपित्थं सैन्धवं सिता| अविदाहि यदन्यच्च विज्ञायान्नस्वरूपतः| तत्तद्दद्याद्विषार्त्तेभ्यः कार्या व्यञ्जनसंस्कृतिः| कषायैर्विषहन्तृणां घृतैः कल्याणकादिभिः| दिव्यसारसकूपोत्थमन्यद्वा शृतशीतलम्| मध्वामलकयुक्तं वा विषार्त्तः सलिलं पिबेत्| नदीतटाकजं त्याज्यं विशेषेण घनागमे| शुक्लवस्त्रोदरायातैः सुकृताः सक्तवो यवैः| तक्रेण सघृताः पीताः परमं विषनाशनाः||२५||
🔊 Audio coming soon
Adhikarana viShe apathyam (26) · Śloka 26
ತಿಲಮದ್ಯಕುಲತ್ಥಕ್ಷುತ್ಕ್ರುದ್ಭಯಾಯಾಸಮೈಥುನಮ್| ವರ್ಜಯೇದ್ವಿಷಮುಕ್ತೋಽಪಿ ದಿವಾಸ್ವಪ್ನಂ ವಿಶೇಷತಃ||೨೬||
तिलमद्यकुलत्थक्षुत्क्रुद्भयायासमैथुनम्| वर्जयेद्विषमुक्तोऽपि दिवास्वप्नं विशेषतः||२६||
🔊 Audio coming soon
Adhikarana aviShanaralakShaNam (27-47) · Śloka 47
ಪ್ರಶಾನ್ತದೋಷಂ ಪ್ರಕೃತಿಸ್ಥಧಾತು ಮಾಹಾರಕಾಮಂ ಸಮಮೂತ್ರವಿಟ್ಕಮ್| ಪ್ರಸನ್ನವರ್ಣೇನ್ದ್ರಿಯಚಿತ್ತಚೇಷ್ಟಂ ವೈದ್ಯೋಽವಗಚ್ಛೇದವಿಷಂ ಮನುಷ್ಯಮ್||೨೭|| ಇತಿ ವೈದ್ಯಪತಿಸಿಂಹಗುಪ್ತಸ್ಯ ಸೂನೋರ್ವಾಗ್ಭಟಸ್ಯ ಕೃತಾ- ವಷ್ಟಾಙ್ಗಸಂಗ್ರಹಸಂಹಿತಾಯಾಮುತ್ತರತನ್ತ್ರೇ ವಿಷೋಪದ್ರವ- ಪ್ರತಿಷೇಧೋ ನಾಮ ಸಪ್ತಚತ್ವಾರಿಂಶೋಽಧ್ಯಾಯಃ||೪೭||
प्रशान्तदोषं प्रकृतिस्थधातु माहारकामं सममूत्रविट्कम्| प्रसन्नवर्णेन्द्रियचित्तचेष्टं वैद्योऽवगच्छेदविषं मनुष्यम्||२७|| इति वैद्यपतिसिंहगुप्तस्य सूनोर्वाग्भटस्य कृता- वष्टाङ्गसंग्रहसंहितायामुत्तरतन्त्रे विषोपद्रव- प्रतिषेधो नाम सप्तचत्वारिंशोऽध्यायः||४७||
🔊 Audio coming soon