9. jvaracikitsitam

Adhikarana 1 (1-2) · Śloka 2

ಅಥಾತೋ ಜ್ವರಚಿಕಿತ್ಸಿತಂ ವ್ಯಾಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||

Adhikarana 2 (3) · Śloka 3

ವಿಜ್ವರಂ ಜ್ವರಸನ್ದೇಹಂ ಪರ್ಯಪೃಚ್ಛತ್ ಪುನರ್ವಸುಮ್| ವಿವಿಕ್ತೇ ಶಾನ್ತಮಾಸೀನಮಗ್ನಿವೇಶಃ ಕೃತಾಞ್ಜಲಿಃ||೩||

Adhikarana 3 (4-10) · Śloka 10

ದೇಹೇನ್ದ್ರಿಯಮನಸ್ತಾಪೀ ಸರ್ವರೋಗಾಗ್ರಜೋ ಬಲೀ| ಜ್ವರಃ ಪ್ರಧಾನೋ ರೋಗಾಣಾಮುಕ್ತೋ ಭಗವತಾ ಪುರಾ||೪|| ತಸ್ಯ ಪ್ರಾಣಿಸಪತ್ನಸ್ಯ ಧ್ರುವಸ್ಯ ಪ್ರಲಯೋದಯೇ| ಪ್ರಕೃತಿಂ ಚ ಪ್ರವೃತ್ತಿಂ ಚ ಪ್ರಭಾವಂ ಕಾರಣಾನಿ ಚ||೫|| ಪೂರ್ವರೂಪಮಧಿಷ್ಠಾನಂ ಬಲಕಾಲಾತ್ಮಲಕ್ಷಣಮ್| ವ್ಯಾಸತೋ ವಿಧಿಭೇದಾಚ್ಚ ಪೃಥಗ್ಭಿನ್ನಸ್ಯ ಚಾಕೃತಿಮ್||೬|| ಲಿಙ್ಗಮಾಮಸ್ಯ ಜೀರ್ಣಸ್ಯ ಸೌಷಧಂ ಚ ಕ್ರಿಯಾಕ್ರಮಮ್| ವಿಮುಞ್ಚತಃ ಪ್ರಶಾನ್ತಸ್ಯ ಚಿಹ್ನಂ ಯಚ್ಚ ಪೃಥಕ್ ಪೃಥಕ್||೭|| ಜ್ವರಾವಸೃಷ್ಟೋ ರಕ್ಷ್ಯಶ್ಚ ಯಾವತ್ಕಾಲಂ ಯತೋ ಯತಃ| ಪ್ರಶಾನ್ತಃ ಕಾರಣೈರ್ಯೈಶ್ಚ ಪುನರಾವರ್ತತೇ ಜ್ವರಃ||೮|| ಯಾಶ್ಚಾಪಿ ಪುನರಾವೃತ್ತಂ ಕ್ರಿಯಾಃ ಪ್ರಶಮಯನ್ತಿ ತಮ್| ಜಗದ್ಧಿತಾರ್ಥಂ ತತ್ ಸರ್ವಂ ಭಗವನ್! ವಕ್ತುಮರ್ಹಸಿ||೯|| ತದಗ್ನಿವೇಶಸ್ಯ ವಚೋ ನಿಶಮ್ಯ ಗುರುರಬ್ರವೀತ್| ಜ್ವರಾಧಿಕಾರೇ ಯದ್ವಾಚ್ಯಂ ತತ್ ಸೌಮ್ಯ! ನಿಖಿಲಂ ಶೃಣು||೧೦||

Adhikarana 4 (11) · Śloka 11

ಜ್ವರೋ ವಿಕಾರೋ ರೋಗಶ್ಚ ವ್ಯಾಧಿರಾತಙ್ಕ ಏವ ಚ| ಏಕೋಽರ್ಥೋ ನಾಮಪರ್ಯಾಯೈರ್ವಿವಿಧೈರಭಿಧೀಯತೇ||೧೧||

Adhikarana 5 (12) · Śloka 12

ತಸ್ಯ ಪ್ರಕೃತಿರುದ್ದಿಷ್ಟಾ ದೋಷಾಃ ಶಾರೀರಮಾನಸಾಃ| ದೇಹಿನಂ ನ ಹಿ ನಿರ್ದೋಷಂ ಜ್ವರಃ ಸಮುಪಸೇವತೇ||೧೨||

Adhikarana 6 (13) · Śloka 14

ಕ್ಷಯಸ್ತಮೋ ಜ್ವರಃ ಪಾಪ್ಮಾ ಮೃತ್ಯುಶ್ಚೋಕ್ತಾ ಯಮಾತ್ಮಕಾಃ| ಪಞ್ಚತ್ವಪ್ರತ್ಯಯಾನ್ನೄಣಾಂ ಕ್ಲಿಶ್ಯತಾಂ ಸ್ವೇನ ಕರ್ಮಣಾ||೧೩|| ಇತ್ಯಸ್ಯ ಪ್ರಕೃತಿಃ ಪ್ರೋಕ್ತಾ, ...|೧೪|

Adhikarana 7 (14) · Śloka 14

... ಪ್ರವೃತ್ತಿಸ್ತು ಪರಿಗ್ರಹಾತ್| ನಿದಾನೇ ಪೂರ್ವಮುದ್ದಿಷ್ಟಾ ರುದ್ರಕೋಪಾಚ್ಚ ದಾರುಣಾತ್||೧೪||

Adhikarana 8 (15-25) · Śloka 25

ದ್ವಿತೀಯೇ ಹಿ ಯುಗೇ ಶರ್ವಮಕ್ರೋಧವ್ರತಮಾಸ್ಥಿತಮ್| ದಿವ್ಯಂ ಸಹಸ್ರಂ ವರ್ಷಾಣಾಮಸುರಾ ಅಭಿದುದ್ರುವುಃ||೧೫|| ತಪೋವಿಘ್ನಾಶನಾಃ ಕರ್ತುಂ ತಪೋವಿಘ್ನಂ ಮಹಾತ್ಮನಃ| ಪಶ್ಯನ್ ಸಮರ್ಥಶ್ಚೋಪೇಕ್ಷಾಂ ಚಕ್ರೇ ದಕ್ಷಃ ಪ್ರಜಾಪತಿಃ||೧೬|| ಪುನರ್ಮಾಹೇಶ್ವರಂ ಭಾಗಂ ಧ್ರುವಂ ದಕ್ಷಃ ಪ್ರಜಾಪತಿಃ| ಯಜ್ಞೇ ನ ಕಲ್ಪಯಾಮಾಸ ಪ್ರೋಚ್ಯಮಾನಃ ಸುರೈರಪಿ||೧೭|| ಋಚಃ ಪಶುಪತೇರ್ಯಾಶ್ಚ ಶೈವ್ಯ ಆಹತಯಶ್ಚ ಯಾಃ| ಯಜ್ಞಸಿದ್ಧಿಪ್ರದಾಸ್ತಾಭಿರ್ಹೀನಂ ಚೈವ ಸ ಇಷ್ಟವಾನ್||೧೮|| ಅಥೋತ್ತೀರ್ಣವ್ರತೋ ದೇವೋ ಬುದ್ಧ್ವಾ ದಕ್ಷವ್ಯತಿಕ್ರಮಮ್| ರುದ್ರೋ ರೌದ್ರಂ ಪುರಸ್ಕೃತ್ಯ ಭಾವಮಾತ್ಮವಿದಾತ್ಮನಃ||೧೯|| ಸೃಷ್ಟ್ವಾ ಲಲಾಟೇ ಚಕ್ಷುರ್ವೈ ದಗ್ಧ್ವಾ ತಾನಸುರಾನ್ ಪ್ರಭುಃ| ಬಾಲಂ ಕ್ರೋಧಾಗ್ನಿಸನ್ತಪ್ತಮಸೃಜತ್ ಸತ್ರನಾಶನಮ್||೨೦|| ತತೋ ಯಜ್ಞಃ ಸ ವಿಧ್ವಸ್ತೋ ವ್ಯಥಿತಾಶ್ಚ ದಿವೌಕಸಃ| ದಾಹವ್ಯಥಾಪರೀತಾಶ್ಚ ಭ್ರಾನ್ತಾ ಭೂತಗಣಾ ದಿಶಃ||೨೧|| ಅಥೇಶ್ವರಂ ದೇವಗಣಃ ಸಹ ಸಪ್ತರ್ಷಿಭಿರ್ವಿಭುಮ್| ತಮೃಗ್ಭಿರಸ್ತುವನ್ ಯಾವಚ್ಛೈವೇ ಭಾವೇ ಶಿವಃ ಸ್ಥಿತಃ||೨೨|| ಶಿವಂ ಶಿವಾಯ ಭೂತಾನಾಂ ಸ್ಥಿತಂ ಜ್ಞಾತ್ವಾ ಕೃತಾಞ್ಜಲಿಃ| ಭಿಯಾ ಭಸ್ಮಪ್ರಹರಣಸ್ತ್ರಿಶಿರಾ ನವಲೋಚನಃ||೨೩|| ಜ್ವಾಲಾಮಾಲಾಕುಲೋ ರೌದ್ರೋ ಹ್ರಸ್ವಜಙ್ಘೋದರಃ ಕ್ರಮಾತ್| ಕ್ರೋಧಾಗ್ನಿರುಕ್ತವಾನ್ ದೇವಮಹಂ ಕಿಂ ಕರವಾಣಿ ತೇ||೨೪|| ತಮುವಾಚೇಶ್ವರಃ ಕ್ರೋಧಂ ಜ್ವರೋ ಲೋಕೇ ಭವಿಷ್ಯಸಿ| ಜನ್ಮಾದೌ ನಿಧನೇ ಚ ತ್ವಮಪಚಾರಾನ್ತರೇಷು ಚ||೨೫||

Adhikarana 9 (26) · Śloka 27

ಸನ್ತಾಪಃ ಸಾರುಚಿಸ್ತೃಷ್ಣಾ ಸಾಙ್ಗಮರ್ದೋ ಹೃದಿ ವ್ಯಥಾ| ಜ್ವರಪ್ರಭಾವೋ, ಜನ್ಮಾದೌ ನಿಧನೇ ಚ ಮಹತ್ತಮಃ||೨೬|| ಪ್ರಕೃತಿಶ್ಚ ಪ್ರವೃತ್ತಿಶ್ಚ ಪ್ರಭಾವಶ್ಚ ಪ್ರದರ್ಶಿತಃ|೨೭|

Adhikarana 10 (27) · Śloka 27

ನಿದಾನೇ ಕಾರಣಾನ್ಯಷ್ಟೌ ಪೂರ್ವೋಕ್ತಾನಿ ವಿಭಾಗಶಃ||೨೭||

Adhikarana 11 (28-29) · Śloka 29

ಆಲಸ್ಯಂ ನಯನೇ ಸಾಸ್ರೇ ಜೃಮ್ಭಣಂ ಗೌರವಂ ಕ್ರಮಃ| ಜ್ವಲನಾತಪವಾಯ್ವಮ್ಬುಭಕ್ತಿದ್ವೇಷಾವನಿಶ್ಚಿತೌ||೨೮|| ಅವಿಪಾಕಾಸ್ಯವೈರಸ್ಯೇ ಹಾನಿಶ್ಚ ಬಲವರ್ಣಯೋಃ| ಶೀಲವೈಕೃತಮಲ್ಪಂ ಚ ಜ್ವರಲಕ್ಷಣಮಗ್ರಜಮ್||೨೯||

Adhikarana 12 (30) · Śloka 30

ಕೇವಲಂ ಸಮನಸ್ಕಂ ಚ ಜ್ವರಾಧಿಷ್ಠಾನಮುಚ್ಯತೇ| ಶರೀರಂ, ಬಲಕಾಲಸ್ತು ನಿದಾನೇ ಸಮ್ಪ್ರದರ್ಶಿತಃ||೩೦||

Adhikarana 13 (31) · Śloka 31

ಜ್ವರಪ್ರತ್ಯಾತ್ಮಿಕಂ ಲಿಙ್ಗಂ ಸನ್ತಾಪೋ ದೇಹಮಾನಸಃ| ಜ್ವರೇಣಾವಿಶತಾ ಭೂತಂ ನ ಹಿ ಕಿಞ್ಚಿನ್ನ ತಪ್ಯತೇ||೩೧||

Adhikarana 14 (32-35) · Śloka 35

ದ್ವಿವಿಧೋ ವಿಧಿಭೇದೇನ ಜ್ವರಃ ಶಾರೀರಮಾನಸಃ| ಪುನಶ್ಚ ದ್ವಿವಿಧೋ ದೃಷ್ಟಃ ಸೌಮ್ಯಶ್ಚಾಗ್ನೇಯ ಏವ ವಾ||೩೨|| ಅನ್ತರ್ವೇಗೋ ಬಹಿರ್ವೇಗೋ ದ್ವಿವಿಧಃ ಪುನರುಚ್ಯತೇ| ಪ್ರಾಕೃತೋ ವೈಕೃತಶ್ಚೈವ ಸಾಧ್ಯಶ್ಚಾಸಾಧ್ಯ ಏವ ಚ||೩೩|| ಪುನಃ ಪಞ್ಚವಿಧೋ ದೃಷ್ಟೋ ದೋಷಕಾಲಬಲಾಬಲಾತ್| ಸನ್ತತಃ ಸತತೋಽನ್ಯೇದ್ಯುಸ್ತೃತೀಯಕಚತುರ್ಥಕೌ||೩೪|| ಪುನರಾಶ್ರಯಭೇದೇನ ಧಾತೂನಾಂ ಸಪ್ತಧಾ ಮತಃ| ಭಿನ್ನಃ ಕಾರಣಭೇದೇನ ಪುನರಷ್ಟವಿಧೋ ಜ್ವರಃ||೩೫||

Adhikarana 15 (36) · Śloka 37

ಶಾರೀರೋ ಜಾಯತೇ ಪೂರ್ವಂ ದೇಹೇ, ಮನಸಿ ಮಾನಸಃ| ವೈಚಿತ್ತ್ಯಮರತಿರ್ಗ್ಲಾನಿರ್ಮನಸಸ್ತಾಪಲಕ್ಷಣಮ್||೩೬|| ಇನ್ದ್ರಿಯಾಣಾಂ ಚ ವೈಕೃತ್ಯಂ ಜ್ಞೇಯಂ ಸನ್ತಾಪಲಕ್ಷಣಮ್|೩೭|

Adhikarana 16 (37) · Śloka 38

ವಾತಪಿತ್ತಾತ್ಮಕಃ ಶೀತಮುಷ್ಣಂ ವಾತಕಫಾತ್ಮಕಃ||೩೭|| ಇಚ್ಛತ್ಯುಭಯಮೇತತ್ತು ಜ್ವರೋ ವ್ಯಾಮಿಶ್ರಲಕ್ಷಣಃ|೩೮|

Adhikarana 17 (38) · Śloka 39

ಯೋಗವಾಹಃ ಪರಂ ವಾಯುಃ ಸಂಯೋಗಾದುಭಯಾರ್ಥಕೃತ್||೩೮|| ದಾಹಕೃತ್ತೇಜಸಾ ಯುಕ್ತಃ, ಶೀತಕೃತ್ ಸೋಮಸಂಶ್ರಯಾತ್|೩೯|

Adhikarana 18 (39-41) · Śloka 41

ಅನ್ತರ್ದಾಹೋಽಧಿಕಸ್ತೃಷ್ಣಾ ಪ್ರಲಾಪಃ ಶ್ವಸನಂ ಭ್ರಮಃ||೩೯|| ಸನ್ಧ್ಯಸ್ಥಿಶೂಲಮಸ್ವೇದೋ ದೋಷವರ್ಚೋವಿನಿಗ್ರಹಃ| ಅನ್ತರ್ವೇಗಸ್ಯ ಲಿಙ್ಗಾನಿ ಜ್ವರಸ್ಯೈತಾನಿ ಲಕ್ಷಯೇತ್||೪೦|| ಸನ್ತಾಪೋಽಭ್ಯಧಿಕೋ ಬಾಹ್ಯಸ್ತೃಷ್ಣಾದೀನಾಂ ಚ ಮಾರ್ದವಮ್| ಬಹಿರ್ವೇಗಸ್ಯ ಲಿಙ್ಗಾನಿ ಸುಖಸಾಧ್ಯತ್ವಮೇವ ಚ||೪೧||

Adhikarana 19 (42-46) · Śloka 47

ಪ್ರಾಕೃತಃ ಸುಖಸಾಧ್ಯಸ್ತು ವಸನ್ತಶರದುದ್ಭವಃ| ಉಷ್ಣಮುಷ್ಣೇನ ಸಂವೃದ್ಧಂ ಪಿತ್ತಂ ಶರದಿ ಕುಪ್ಯತಿ||೪೨|| ಚಿತಃ ಶೀತೇ ಕಫಶ್ಚೈವಂ ವಸನ್ತೇ ಸಮುದೀರ್ಯತೇ| ವರ್ಷಾಸ್ವಮ್ಲವಿಪಾಕಾಭಿರದ್ಭಿರೋಷಧಿಭಿಸ್ತಥಾ||೪೩|| ಸಞ್ಚಿತಂ ಪಿತ್ತಮುದ್ರಿಕ್ತಂ ಶರದ್ಯಾದಿತ್ಯತೇಜಸಾ| ಜ್ವರಂ ಸಞ್ಜನಯತ್ಯಾಶು ತಸ್ಯ ಚಾನುಬಲಃ ಕಫಃ||೪೪|| ಪ್ರಕೃತ್ಯೈವ ವಿಸರ್ಗಸ್ಯ ತತ್ರ ನಾನಶನಾದ್ಭಯಮ್| ಅದ್ಭಿರೋಷಧಿಭಿಶ್ಚೈವ ಮಧುರಾಭಿಶ್ಚಿತಃ ಕಫಃ||೪೫|| ಹೇಮನ್ತೇ, ಸೂರ್ಯಸನ್ತಪ್ತಃ ಸ ವಸನ್ತೇ ಪ್ರಕುಪ್ಯತಿ| ವಸನ್ತೇ ಶ್ಲೇಷ್ಮಣಾ ತಸ್ಮಾಜ್ಜ್ವರಃ ಸಮುಪಜಾಯತೇ||೪೬|| ಆದಾನಮಧ್ಯೇ ತಸ್ಯಾಪಿ ವಾತಪಿತ್ತಂ ಭವೇದನು|೪೭|

Adhikarana 20 (47) · Śloka 48

ಆದಾವನ್ತೇ ಚ ಮಧ್ಯೇ ಚ ಬುದ್ಧ್ವಾ ದೋಷಬಲಾಬಲಮ್||೪೭|| ಶರದ್ವಸನ್ತಯೋರ್ವಿದ್ವಾಞ್ಜ್ವರಸ್ಯ ಪ್ರತಿಕಾರಯೇತ್|೪೮|

Adhikarana 21 (48-49) · Śloka 49

ಕಾಲಪ್ರಕೃತಿಮುದ್ದಿಶ್ಯ ನಿರ್ದಿಷ್ಟಃ ಪ್ರಾಕೃತೋ ಜ್ವರಃ||೪೮|| ಪ್ರಾಯೇಣಾನಿಲಜೋ ದುಃಖಃ ಕಾಲೇಷ್ವನ್ಯೇಷು ವೈಕೃತಃ| ಹೇತವೋ ವಿವಿಧಾಸ್ತಸ್ಯ ನಿದಾನೇ ಸಮ್ಪ್ರದರ್ಶಿತಾಃ||೪೯||

Adhikarana 22 (50) · Śloka 50

ಬಲವತ್ಸ್ವಲ್ಪದೋಷೇಷು ಜ್ವರಃ ಸಾಧ್ಯೋಽನುಪದ್ರವಃ|೫೦|

Adhikarana 23 (50) · Śloka 51

ಹೇತುಭಿರ್ಬಹುಭಿರ್ಜಾತೋ ಬಲಿಭಿರ್ಬಹುಲಕ್ಷಣಃ||೫೦|| ಜ್ವರಃ ಪ್ರಾಣಾನ್ತಕೃದ್ಯಶ್ಚ ಶೀಘ್ರಮಿನ್ದ್ರಿಯನಾಶನಃ|೫೧|

Adhikarana 24 (51) · Śloka 52

ಸಪ್ತಾಹಾದ್ವಾ ದಶಾಹಾದ್ವಾ ದ್ವಾದಶಾಹಾತ್ತಥೈವ ಚ||೫೧|| ಸಪ್ರಲಾಪಭ್ರಮಶ್ವಾಸಸ್ತೀಕ್ಷ್ಣೋ ಹನ್ಯಾಜ್ಜ್ವರೋ ನರಮ್|೫೨|

Adhikarana 25 (52) · Śloka 53

ಜ್ವರಃ ಕ್ಷೀಣಸ್ಯ ಶೂನಸ್ಯ ಗಮ್ಭೀರೋ ದೈರ್ಘರಾತ್ರಿಕಃ||೫೨|| ಅಸಾಧ್ಯೋ ಬಲವಾನ್ ಯಶ್ಚ ಕೇಶಸೀಮನ್ತಕೃಜ್ಜ್ವರಃ|೫೩|

Adhikarana 26 (53-60) · Śloka 61

ಸ್ರೋತೋಭಿರ್ವಿಸೃತಾ ದೋಷಾ ಗುರವೋ ರಸವಾಹಿಭಿಃ||೫೩|| ಸರ್ವದೇಹಾನುಗಾಃ ಸ್ತಬ್ಧಾ ಜ್ವರಂ ಕುರ್ವನ್ತಿ ಸನ್ತತಮ್| ದಶಾಹಂ ದ್ವಾದಶಾಹಂ ವಾ ಸಪ್ತಾಹಂ ವಾ ಸುದುಃಸಹಃ||೫೪|| ಸ ಶೀಘ್ರಂ ಶೀಘ್ರಕಾರಿತ್ವಾತ್ ಪ್ರಶಮಂ ಯಾತಿ ಹನ್ತಿ ವಾ| ಕಾಲದೂಷ್ಯಪ್ರಕೃತಿಭಿರ್ದೋಷಸ್ತುಲ್ಯೋ ಹಿ ಸನ್ತತಮ್||೫೫|| ನಿಷ್ಪ್ರತ್ಯನೀಕಃ ಕುರುತೇ ತಸ್ಮಾಜ್ಜ್ಞೇಯಃ ಸುದುಃಸಹಃ| ಯಥಾ ಧಾತೂಂಸ್ತಥಾ ಮೂತ್ರಂ ಪುರೀಷಂ ಚಾನಿಲಾದಯಃ||೫೬|| ಯುಗಪಚ್ಚಾನುಪದ್ಯನ್ತೇ ನಿಯಮಾತ್ ಸನ್ತತೇ ಜ್ವರೇ| ಸ ಶುದ್ಧ್ಯಾ ವಾಽಪ್ಯಶುದ್ಧ್ಯಾ ವಾ ರಸಾದೀನಾಮಶೇಷತಃ||೫೭|| ಸಪ್ತಾಹಾದಿಷು ಕಾಲೇಷು ಪ್ರಶಮಂ ಯಾತಿ ಹನ್ತಿ ವಾ| ಯದಾ ತು ನಾತಿಶುಧ್ಯನ್ತಿ ನ ವಾ ಶುಧ್ಯನ್ತಿ ಸರ್ವಶಃ||೫೮|| ದ್ವಾದಶೈತೇ ಸಮುದ್ದಿಷ್ಟಾಃ ಸನ್ತತಸ್ಯಾಶ್ರಯಾಸ್ತದಾ| ವಿಸರ್ಗಂ ದ್ವಾದಶೇ ಕೃತ್ವಾ ದಿವಸೇಽವ್ಯಕ್ತಲಕ್ಷಣಮ್||೫೯|| ದುರ್ಲಭೋಪಶಮಃ ಕಾಲಂ ದೀರ್ಘಮಪ್ಯನುವರ್ತತೇ| ಇತಿ ಬುದ್ಧ್ವಾ ಜ್ವರಂ ವೈದ್ಯ ಉಪಕ್ರಾಮೇತ್ತು ಸನ್ತತಮ್ ||೬೦|| ಕ್ರಿಯಾಕ್ರಮವಿಧೌ ಯುಕ್ತಃ ಪ್ರಾಯಃ ಪ್ರಾಗಪತರ್ಪಣೈಃ|೬೧|

Adhikarana 27 (61-62) · Śloka 62

ರಕ್ತಧಾತ್ವಾಶ್ರಯಃ ಪ್ರಾಯೋ ದೋಷಃ ಸತತಕಂ ಜ್ವರಮ್||೬೧|| ಸಪ್ರತ್ಯನೀಕಃ ಕುರುತೇ ಕಾಲವೃದ್ಧಿಕ್ಷಯಾತ್ಮಕಮ್| ಅಹೋರಾತ್ರೇ ಸತತಕೋ ದ್ವೌ ಕಾಲಾವನುವರ್ತತೇ||೬೨||

Adhikarana 28 (63-67) · Śloka 67

ಕಾಲಪ್ರಕೃತಿದೂಷ್ಯಾಣಾಂ ಪ್ರಾಪ್ಯೈವಾನ್ಯತಮಾದ್ಬಲಮ್| ಅನ್ಯೇದ್ಯುಷ್ಕಂ ಜ್ವರಂ ದೋಷೋ ರುದ್ಧ್ವಾ ಮೇದೋವಹಾಃ ಸಿರಾಃ||೬೩|| ಸಪ್ರತ್ಯನೀಕೋ ಜನಯತ್ಯೇಕಕಾಲಮಹರ್ನಿಶಿ| ದೋಷೋಽಸ್ಥಿಮಜ್ಜಗಃ ಕುರ್ಯಾತ್ತೃತೀಯಕಚತುರ್ಥಕೌ||೬೪|| ಗತಿರ್ದ್ವ್ಯೇಕಾನ್ತರಾಽನ್ಯೇದ್ಯುರ್ದೋಷಸ್ಯೋಕ್ತಾಽನ್ಯಥಾ ಪರೈಃ| ಅನ್ಯೇದ್ಯುಷ್ಕಂ ಜ್ವರಂ ಕುರ್ಯಾದಪಿ ಸಂಶ್ರಿತ್ಯ ಶೋಣಿತಮ್||೬೫|| ಮಾಂಸಸ್ರೋತಾಂಸ್ಯನುಗತೋ ಜನಯೇತ್ತು ತೃತೀಯಕಮ್| ಸಂಶ್ರಿತೋ ಮೇದಸೋ ಮಾರ್ಗಂ ದೋಷಶ್ಚಾಪಿ ಚತುರ್ಥಕಮ್ ||೬೬|| ಅನ್ಯೇದ್ಯುಷ್ಕಃ ಪ್ರತಿದಿನಂ ದಿನಂ ಹಿತ್ವಾ ತೃತೀಯಕಃ| ದಿನದ್ವಯಂ ಯೋ ವಿಶ್ರಮ್ಯ ಪ್ರತ್ಯೇತಿ ಸ ಚತುರ್ಥಕಃ||೬೭||

Adhikarana 29 (68-69) · Śloka 69

ಅಧಿಶೇತೇ ಯಥಾ ಭೂಮಿಂ ಬೀಜಂ ಕಾಲೇ ಚ ರೋಹತಿ| ಅಧಿಶೇತೇ ತಥಾ ಧಾತುಂ ದೋಷಃ ಕಾಲೇ ಚ ಕುಪ್ಯತಿ||೬೮|| ಸ ವೃದ್ಧಿಂ ಬಲಕಾಲಂ ಚ ಪ್ರಾಪ್ಯ ದೋಷಸ್ತೃತೀಯಕಮ್| ಚತುರ್ಥಕಂ ಚ ಕುರುತೇ ಪ್ರತ್ಯನೀಕಬಲಕ್ಷಯಾತ್||೬೯||

Adhikarana 30 (70) · Śloka 70

ಕೃತ್ವಾ ವೇಗಂ ಗತಬಲಾಃ ಸ್ವೇ ಸ್ವೇ ಸ್ಥಾನೇ ವ್ಯವಸ್ಥಿತಾಃ| ಪುನರ್ವಿವೃದ್ಧಾಃ ಸ್ವೇ ಕಾಲೇ ಜ್ವರಯನ್ತಿ ನರಂ ಮಲಾಃ||೭೦||

Adhikarana 31 (71-72) · Śloka 72

ಕಫಪಿತ್ತಾತ್ತ್ರಿಕಗ್ರಾಹೀ ಪೃಷ್ಠಾದ್ವಾತಕಫಾತ್ಮಕಃ| ವಾತಪಿತ್ತಾಚ್ಛಿರೋಗ್ರಾಹೀ ತ್ರಿವಿಧಃ ಸ್ಯಾತ್ತೃತೀಯಕಃ||೭೧|| ಚತುರ್ಥಕೋ ದರ್ಶಯತಿ ಪ್ರಭಾವಂ ದ್ವಿವಿಧಂ ಜ್ವರಃ| ಜಙ್ಘಾಭ್ಯಾಂ ಶ್ಲೈಷ್ಮಿಕಃ ಪೂರ್ವಂ ಶಿರಸ್ತೋಽನಿಲಸಮ್ಭವಃ||೭೨||

Adhikarana 32 (73) · Śloka 73

ವಿಷಮಜ್ವರ ಏವಾನ್ಯಶ್ಚತುರ್ಥಕವಿಪರ್ಯಯಃ| ತ್ರಿವಿಧೋ ಧಾತುರೇಕೈಕೋ ದ್ವಿಧಾತುಸ್ಥಃ ಕರೋತಿ ಯಮ್||೭೩||

Adhikarana 33 (74) · Śloka 74

ಪ್ರಾಯಶಃ ಸನ್ನಿಪಾತೇನ ದೃಷ್ಟಃ ಪಞ್ಚವಿಧೋ ಜ್ವರಃ| ಸನ್ನಿಪಾತೇ ತು ಯೋ ಭೂಯಾನ್ ಸ ದೋಷಃ ಪರಿಕೀರ್ತಿತಃ||೭೪||

Adhikarana 34 (75-83) · Śloka 83

ಋತ್ವಹೋರಾತ್ರದೋಷಾಣಾಂ ಮನಸಶ್ಚ ಬಲಾಬಲಾತ್| ಕಾಲಮರ್ಥವಶಾಚ್ಚೈವ ಜ್ವರಸ್ತಂ ತಂ ಪ್ರಪದ್ಯತೇ||೭೫|| ಗುರುತ್ವಂ ದೈನ್ಯಮುದ್ವೇಗಃ ಸದನಂ ಛರ್ದ್ಯರೋಚಕೌ| ರಸಸ್ಥಿತೇ ಬಹಿಸ್ತಾಪಃ ಸಾಙ್ಗಮರ್ದೋ ವಿಜೃಮ್ಭಣಮ್||೭೬|| ರಕ್ತೋಷ್ಣಾಃ ಪಿಡಕಾಸ್ತೃಷ್ಣಾ ಸರಕ್ತಂ ಷ್ಠೀವನಂ ಮುಹುಃ| ದಾಹರಾಗಭ್ರಮಮದಪ್ರಲಾಪಾ ರಕ್ತಸಂಸ್ಥಿತೇ||೭೭|| ಅನ್ತರ್ದಾಹಃ ಸತೃಣ್ಮೋಹಃ ಸಗ್ಲಾನಿಃ ಸೃಷ್ಟವಿಟ್ಕತಾ| ದೌರ್ಗನ್ಧ್ಯಂ ಗಾತ್ರವಿಕ್ಷೇಪೋ ಜ್ವರೇ ಮಾಂಸಸ್ಥಿತೇ ಭವೇತ್||೭೮|| ಸ್ವೇದಸ್ತೀವ್ರಾ ಪಿಪಾಸಾ ಚ ಪ್ರಲಾಪೋ ವಮ್ಯಭೀಕ್ಷ್ಣಶಃ| ಸ್ವಗನ್ಧಸ್ಯಾಸಹತ್ವಂ ಚ ಮೇದಃಸ್ಥೇ ಗ್ಲಾನ್ಯರೋಚಕೌ||೭೯|| ವಿರೇಕವಮನೇ ಚೋಭೇ ಸಾಸ್ಥಿಭೇದಂ ಪ್ರಕೂಜನಮ್| ವಿಕ್ಷೇಪಣಂ ಚ ಗಾತ್ರಾಣಾಂ ಶ್ವಾಸಶ್ಚಾಸ್ಥಿಗತೇ ಜ್ವರೇ||೮೦|| ಹಿಕ್ಕಾ ಶ್ವಾಸಸ್ತಥಾ ಕಾಸಸ್ತಮಸಶ್ಚಾತಿದರ್ಶನಮ್| ಮರ್ಮಚ್ಛೇದೋ ಬಹಿಃ ಶೈತ್ಯಂ ದಾಹೋಽನ್ತಶ್ಚೈವ ಮಜ್ಜಗೇ||೮೧|| ಶುಕ್ರಸ್ಥಾನಗತಃ ಶುಕ್ರಮೋಕ್ಷಂ ಕೃತ್ವಾ ವಿನಾಶ್ಯ ಚ| ಪ್ರಾಣಂ ವಾಯ್ವಗ್ನಿಸೋಮೈಶ್ಚ ಸಾರ್ಧಂ ಗಚ್ಛತ್ಯಸೌ ವಿಭುಃ||೮೨|| ರಸರಕ್ತಾಶ್ರಿತಃ ಸಾಧ್ಯೋ ಮೇದೋಮಾಂಸಗತಶ್ಚ ಯಃ| ಅಸ್ಥಿಮಜ್ಜಗತಃ ಕೃಚ್ಛ್ರಃ ಶುಕ್ರಸ್ಥೋ ನೈವ ಸಿದ್ಧ್ಯತಿ||೮೩||

Adhikarana 35 (84-88) · Śloka 89

ಹೇತುಭಿರ್ಲಕ್ಷಣೈಶ್ಚೋಕ್ತಃ ಪೂರ್ವಮಷ್ಟವಿಧೋ ಜ್ವರಃ| ಸಮಾಸೇನೋಪದಿಷ್ಟಸ್ಯ ವ್ಯಾಸತಃ ಶೃಣು ಲಕ್ಷಣಮ್||೮೪|| ಶಿರೋರುಕ್ ಪರ್ವಣಾಂ ಭೇದೋ ದಾಹೋ ರೋಮ್ಣಾಂ ಪ್ರಹರ್ಷಣಮ್| ಕಣ್ಠಾಸ್ಯಶೋಷೋ ವಮಥುಸ್ತೃಷ್ಣಾ ಮೂರ್ಚ್ಛಾ ಭ್ರಮೋಽರುಚಿಃ||೮೫|| ಸ್ವಪ್ನನಾಶೋಽತಿವಾಗ್ಜೃಮ್ಭಾ ವಾತಪಿತ್ತಜ್ವರಾಕೃತಿಃ| ಶೀತಕೋ ಗೌರವಂ ತನ್ದ್ರಾ ಸ್ತೈಮಿತ್ಯಂ ಪರ್ವಣಾಂ ಚ ರುಕ್||೮೬|| ಶಿರೋಗ್ರಹಃ ಪ್ರತಿಶ್ಯಾಯಃ ಕಾಸಃ ಸ್ವೇದಾಪ್ರವರ್ತನಮ್| ಸನ್ತಾಪೋ ಮಧ್ಯವೇಗಶ್ಚ ವಾತಶ್ಲೇಷ್ಮಜ್ವರಾಕೃತಿಃ||೮೭|| ಮುಹುರ್ದಾಹೋ ಮುಹುಃ ಶೀತಂ ಸ್ವೇದಸ್ತಮ್ಭೋ ಮುಹುರ್ಮುಹುಃ| ಮೋಹಃ ಕಾಸೋಽರುಚಿಸ್ತೃಷ್ಣಾ ಶ್ಲೇಷ್ಮಪಿತ್ತಪ್ರವರ್ತನಮ್||೮೮|| ಲಿಪ್ತತಿಕ್ತಾಸ್ಯತಾ ತನ್ದ್ರಾ ಶ್ಲೇಷ್ಮಪಿತ್ತಜ್ವರಾಕೃತಿಃ| ಇತ್ಯೇತೇ ದ್ವನ್ದ್ವಜಾಃ ಪ್ರೋಕ್ತಾಃ ...|೮೯|

Adhikarana 36 (89-108) · Śloka 109

... ಸನ್ನಿಪಾತಜ ಉಚ್ಯತೇ||೮೯|| ಸನ್ನಿಪಾತಜ್ವರಸ್ಯೋರ್ಧ್ವಂ ತ್ರಯೋದಶವಿಧಸ್ಯ ಹಿ| ಪ್ರಾಕ್ಸೂತ್ರಿತಸ್ಯ ವಕ್ಷ್ಯಾಮಿ ಲಕ್ಷಣಂ ವೈ ಪೃಥಕ್ ಪೃಥಕ್||೯೦|| ಭ್ರಮಃ ಪಿಪಾಸಾ ದಾಹಶ್ಚ ಗೌರವಂ ಶಿರಸೋಽತಿರುಕ್| ವಾತಪಿತ್ತೋಲ್ಬಣೇ ವಿದ್ಯಾಲ್ಲಿಙ್ಗಂ ಮನ್ದಕಫೇ ಜ್ವರೇ||೯೧|| ಶೈತ್ಯಂ ಕಾಸೋಽರುಚಿಸ್ತನ್ದ್ರಾಪಿಪಾಸಾದಾಹರುಗ್ವ್ಯಥಾಃ| ವಾತಶ್ಲೇಷ್ಮೋಲ್ಬಣೇ ವ್ಯಾಧೌ ಲಿಙ್ಗಂ ಪಿತ್ತಾವರೇ ವಿದುಃ||೯೨|| ಛರ್ದಿಃ ಶೈತ್ಯಂ ಮುಹುರ್ದಾಹಸ್ತೃಷ್ಣಾ ಮೋಹೋಽಸ್ಥಿವೇದನಾ| ಮನ್ದವಾತೇ ವ್ಯವಸ್ಯನ್ತಿ ಲಿಙ್ಗಂ ಪಿತ್ತಕಫೋಲ್ಬಣೇ||೯೩|| ಸನ್ಧ್ಯಸ್ಥಿಶಿರಸಃ ಶೂಲಂ ಪ್ರಲಾಪೋ ಗೌರವಂ ಭ್ರಮಃ| ವಾತೋಲ್ಬಣೇ ಸ್ಯಾದ್ ದ್ವ್ಯನುಗೇ ತೃಷ್ಣಾ ಕಣ್ಠಾಸ್ಯಶುಷ್ಕತಾ||೯೪|| ರಕ್ತವಿಣ್ಮೂತ್ರತಾ ದಾಹಃ ಸ್ವೇದಸ್ತೃಡ್ ಬಲಸಙ್ಕ್ಷಯಃ| ಮೂರ್ಚ್ಛಾ ಚೇತಿ ತ್ರಿದೋಷೇ ಸ್ಯಾಲ್ಲಿಙ್ಗಂ ಪಿತ್ತೇ ಗರೀಯಸಿ||೯೫|| ಆಲಸ್ಯಾರುಚಿಹೃಲ್ಲಾಸದಾಹವಮ್ಯರತಿಭ್ರಮೈಃ| ಕಫೋಲ್ಬಣಂ ಸನ್ನಿಪಾತಂ ತನ್ದ್ರಾಕಾಸೇನ ಚಾದಿಶೇತ್||೯೬|| ಪ್ರತಿಶ್ಯಾ ಛರ್ದಿರಾಲಸ್ಯಂ ತನ್ದ್ರಾಽರುಚ್ಯಗ್ನಿಮಾರ್ದವಮ್| ಹೀನವಾತೇ ಪಿತ್ತಮಧ್ಯೇ ಲಿಙ್ಗಂ ಶ್ಲೇಷ್ಮಾಧಿಕೇ ಮತಮ್||೯೭|| ಹಾರಿದ್ರಮೂತ್ರನೇತ್ರತ್ವಂ ದಾಹಸ್ತೃಷ್ಣಾ ಭ್ರಮೋಽರುಚಿಃ| ಹೀನವಾತೇ ಮಧ್ಯಕಫೇ ಲಿಙ್ಗಂ ಪಿತ್ತಾಧಿಕೇ ಮತಮ್||೯೮|| ಶಿರೋರುಗ್ವೇಪಥುಃ ಶ್ವಾಸಃ ಪ್ರಲಾಪಶ್ಛರ್ದ್ಯರೋಚಕೌ| ಹೀನಪಿತ್ತೇ ಮಧ್ಯಕಫೇ ಲಿಙ್ಗಂ ಸ್ಯಾನ್ಮಾರುತಾಧಿಕೇ||೯೯|| ಶೀತಕೋ ಗೌರವಂ ತನ್ದ್ರಾ ಪ್ರಲಾಪೋಽಸ್ಥಿಶಿರೋಽತಿರುಕ್| ಹೀನಪಿತ್ತೇ ವಾತಮಧ್ಯೇ ಲಿಙ್ಗಂ ಶ್ಲೇಷ್ಮಾಧಿಕೇ ವಿದುಃ||೧೦೦|| ಶ್ವಾಸಃ ಕಾಸಃ ಪ್ರತಿಶ್ಯಾಯೋ ಮುಖಶೋಷೋಽತಿಪಾರ್ಶ್ವರುಕ್| ಕಫಹೀನೇ ಪಿತ್ತಮಧ್ಯೇ ಲಿಙ್ಗಂ ವಾತಾಧಿಕೇ ಮತಮ್||೧೦೧|| ವರ್ಚೋಭೇದೋಽಗ್ನಿದೌರ್ಬಲ್ಯಂ ತೃಷ್ಣಾ ದಾಹೋಽರುಚಿರ್ಭ್ರಮಃ| ಕಫಹೀನೇ ವಾತಮಧ್ಯೇ ಲಿಙ್ಗಂ ಪಿತ್ತಾಧಿಕೇ ವಿದುಃ||೧೦೨|| ಸನ್ನಿಪಾತಜ್ವರಸ್ಯೋರ್ಧ್ವಮತೋ ವಕ್ಷ್ಯಾಮಿ ಲಕ್ಷಣಮ್| ಕ್ಷಣೇ ದಾಹಃ ಕ್ಷಣೇ ಶೀತಮಸ್ಥಿಸನ್ಧಿಶಿರೋರುಜಾ||೧೦೩|| ಸಾಸ್ರಾವೇ ಕಲುಷೇ ರಕ್ತೇ ನಿರ್ಭುಗ್ನೇ ಚಾಪಿ ದರ್ಶನೇ | ಸಸ್ವನೌ ಸರುಜೌ ಕರ್ಣೌ ಕಣ್ಠಃ ಶೂಕೈರಿವಾವೃತಃ||೧೦೪|| ತನ್ದ್ರಾ ಮೋಹಃ ಪ್ರಲಾಪಶ್ಚ ಕಾಸಃ ಶ್ವಾಸೋಽರುಚಿರ್ಭ್ರಮಃ| ಪರಿದಗ್ಧಾ ಖರಸ್ಪರ್ಶಾ ಜಿಹ್ವಾ ಸ್ರಸ್ತಾಙ್ಗತಾ ಪರಮ್||೧೦೫|| ಷ್ಠೀವನಂ ರಕ್ತಪಿತ್ತಸ್ಯ ಕಫೇನೋನ್ಮಿಶ್ರಿತಸ್ಯ ಚ| ಶಿರಸೋ ಲೋಠನಂ ತೃಷ್ಣಾ ನಿದ್ರಾನಾಶೋ ಹೃದಿ ವ್ಯಥಾ||೧೦೬|| ಸ್ವೇದಮೂತ್ರಪುರೀಷಾಣಾಂ ಚಿರಾದ್ದರ್ಶನಮಲ್ಪಶಃ| ಕೃಶತ್ವಂ ನಾತಿಗಾತ್ರಾಣಾಂ ಪ್ರತತಂ ಕಣ್ಠಕೂಜನಮ್||೧೦೭|| ಕೋಠಾನಾಂ ಶ್ಯಾವರಕ್ತಾನಾಂ ಮಣ್ಡಲಾನಾಂ ಚ ದರ್ಶನಮ್| ಮೂಕತ್ವಂ ಸ್ರೋತಸಾಂ ಪಾಕೋ ಗುರುತ್ವಮುದರಸ್ಯ ಚ||೧೦೮|| ಚಿರಾತ್ ಪಾಕಶ್ಚ ದೋಷಾಣಾಂ ಸನ್ನಿಪಾತಜ್ವರಾಕೃತಿಃ|೧೦೯|

Adhikarana 37 (109) · Śloka 110

ದೋಷೇ ವಿಬದ್ಧೇ ನಷ್ಟೇಽಗ್ನೌ ಸರ್ವಸಮ್ಪೂರ್ಣಲಕ್ಷಣಃ||೧೦೯|| ಸನ್ನಿಪಾತಜ್ವರೋಽಸಾಧ್ಯಃ ಕೃಚ್ಛ್ರಸಾಧ್ಯಸ್ತ್ವತೋಽನ್ಯಥಾ|೧೧೦|

Adhikarana 38 (110) · Śloka 111

ನಿದಾನೇ ತ್ರಿವಿಧಾ ಪ್ರೋಕ್ತಾ ಯಾ ಪೃಥಗ್ಜಜ್ವರಾಕೃತಿಃ||೧೧೦|| ಸಂಸರ್ಗಸನ್ನಿಪಾತಾನಾಂ ತಯಾ ಚೋಕ್ತಂ ಸ್ವಲಕ್ಷಣಮ್|೧೧೧|

Adhikarana 39 (111-113) · Śloka 114

ಆಗನ್ತುರಷ್ಟಮೋ ಯಸ್ತು ಸ ನಿರ್ದಿಷ್ಟಶ್ಚತುರ್ವಿಧಃ||೧೧೧|| ಅಭಿಘಾತಾಭಿಷಙ್ಗಾಭ್ಯಾಮಭಿಚಾರಾಭಿಶಾಪತಃ| ಶಸ್ತ್ರಲೋಷ್ಟಕಶಾಕಾಷ್ಠಮುಷ್ಟ್ಯರತ್ನಿತಲದ್ವಿಜೈಃ||೧೧೨|| ತದ್ವಿಧೈಶ್ಚ ಹತೇ ಗಾತ್ರೇ ಜ್ವರಃ ಸ್ಯಾದಭಿಘಾತಜಃ| ತತ್ರಾಭಿಘಾತಜೇ ವಾಯುಃ ಪ್ರಾಯೋ ರಕ್ತಂ ಪ್ರದೂಷಯನ್||೧೧೩|| ಸವ್ಯಥಾಶೋಫವೈವರ್ಣ್ಯಂ ಕರೋತಿ ಸರುಜಂ ಜ್ವರಮ್|೧೧೪|

Adhikarana 40 (114-127) · Śloka 128

ಕಾಮಶೋಕಭಯಕ್ರೋಧೈರಭಿಷಕ್ತಸ್ಯ ಯೋ ಜ್ವರಃ||೧೧೪|| ಸೋಽಭಿಷಙ್ಗಾಜ್ವರೋ ಜ್ಞೇಯೋ ಯಶ್ಚ ಭೂತಾಭಿಷಙ್ಗಜಃ| ಕಾಮಶೋಕಭಯಾದ್ವಾಯುಃ, ಕ್ರೋಧಾತ್ ಪಿತ್ತಂ, ತ್ರಯೋ ಮಲಾಃ||೧೧೫|| ಭೂತಾಭಿಷಙ್ಗಾತ್ ಕುಪ್ಯನ್ತಿ ಭೂತಸಾಮಾನ್ಯಲಕ್ಷಣಾಃ| ಭೂತಾಧಿಕಾರೇ ವ್ಯಾಖ್ಯಾತಂ ತದಷ್ಟವಿಧಲಕ್ಷಣಮ್||೧೧೬|| ವಿಷವೃಕ್ಷಾನಿಲಸ್ಪರ್ಶಾತ್ತಥಾಽನ್ಯೈರ್ವಿಷಸಮ್ಭವೈಃ| ಅಭಿಷಕ್ತಸ್ಯ ಚಾಪ್ಯಾಹುರ್ಜ್ವರಮೇಕೇಽಭಿಷಙ್ಗಜಮ್||೧೧೭|| ಚಿಕಿತ್ಸಯಾ ವಿಷಘ್ನ್ಯೈವ ಸ ಶಮಂ ಲಭತೇ ನರಃ| ಅಭಿಚಾರಾಭಿಶಾಪಾಭ್ಯಾಂ ಸಿದ್ಧಾನಾಂ ಯಃ ಪ್ರವರ್ತತೇ||೧೧೮|| ಸನ್ನಿಪಾತಜ್ವರೋ ಘೋರಃ ಸ ವಿಜ್ಞೇಯಃ ಸುದುಃಸಹಃ| ಸನ್ನಿಪಾತಜ್ವರಸ್ಯೋಕ್ತಂ ಲಿಙ್ಗಂ ಯತ್ತಸ್ಯ ತತ್ ಸ್ಮೃತಮ್||೧೧೯|| ಚಿತ್ತೋನ್ದ್ರಿಯಶರೀರಾಣಾಮರ್ತಯೋಽನ್ಯಾಶ್ಚ ನೈಕಶಃ| ಪ್ರಯೋಗಂ ತ್ವಭಿಚಾರಸ್ಯ ದೃಷ್ಟ್ವಾ ಶಾಪಸ್ಯ ಚೈವ ಹಿ||೧೨೦|| ಸ್ವಯಂ ಶ್ರುತ್ವಾಽನುಮಾನೇನ ಲಕ್ಷ್ಯತೇ ಪ್ರಶಮೇನ ವಾ| ವೈವಿಧ್ಯಾದಭಿಚಾರಸ್ಯ ಶಾಪಸ್ಯ ಚ ತದಾತ್ಮಕೇ||೧೨೧|| ಯಥಾಕರ್ಮಪ್ರಯೋಗೇಣ ಲಕ್ಷಣಂ ಸ್ಯಾತ್ ಪೃಥಗ್ವಿಧಮ್| ಧ್ಯಾನನಿಃಶ್ವಾಸಬಹುಲಂ ಲಿಙ್ಗಂ ಕಾಮಜ್ವರೇ ಸ್ಮೃತಮ್||೧೨೨|| ಶೋಕಜೇ ಬಾಷ್ಪಬಹುಲಂ ತ್ರಾಸಪ್ರಾಯಂ ಭಯಜ್ವರೇ| ಕ್ರೋಧಜೇ ಬಹುಸಂರಮ್ಭಂ ಭೂತಾವೇಶೇ ತ್ವಮಾನುಷಮ್||೧೨೩|| ಮೂರ್ಚ್ಛಾಮೋಹಮದಗ್ಲಾನಿಭೂಯಿಷ್ಠಂ ವಿಷಸಮ್ಭವೇ| ಕೇಷಾಞ್ಚಿದೇಷಾಂ ಲಿಙ್ಗಾನಾಂ ಸನ್ತಾಪೋ ಜಾಯತೇ ಪುರಃ||೧೨೪|| ಪಶ್ಚಾತ್ತುಲ್ಯಂ ತು ಕೇಷಾಞ್ಚಿದೇಷು ಕಾಮಜ್ವರಾದಿಷು| ಕಾಮಾದಿಜಾನಾಮುದ್ದಿಷ್ಟಂ ಜ್ವರಾಣಾಂ ಯದ್ವಿಶೇಷಣಮ್||೧೨೫|| ಕಾಮಾದಿಜಾನಾಂ ರೋಗಾಣಾಮನ್ಯೇಷಾಮಪಿ ತತ್ ಸ್ಮೃತಮ್| ಮನಸ್ಯಭಿಹತೇ ಪೂರ್ವಂ ಕಾಮಾದ್ಯೈರ್ನ ತಥಾ ಬಲಮ್||೧೨೬|| ಜ್ವರಃ ಪ್ರಾಪ್ನೋತಿ ವಾತಾದ್ಯೈರ್ದೇಹೋ ಯಾವನ್ನ ದೂಷ್ಯತಿ| ದೇಹೇ ಚಾಭಿಹ(ದ್ರು)ತೇ ಪೂರ್ವಂ ವಾತಾದ್ಯೈರ್ನ ತಥಾ ಬಲಮ್||೧೨೭|| ಜ್ವರಃ ಪ್ರಾಪ್ನೋತಿ ಕಾಮಾದ್ಯೈರ್ಮನೋ ಯಾವನ್ನ ದೂಷ್ಯತಿ|೧೨೮|

Adhikarana 41 (128) · Śloka 129

ತೇ ಪೂರ್ವಂ ಕೇವಲಾಃ ಪಶ್ಚಾನ್ನಿಜೈರ್ವ್ಯಾಮಿಶ್ರಲಕ್ಷಣಾಃ||೧೨೮|| ಹೇತ್ವೌಷಧವಿಶಿಷ್ಟಾಶ್ಚ ಭವನ್ತ್ಯಾಗನ್ತವೋ ಜ್ವರಾಃ|೧೨೯|

Adhikarana 42 (129-131) · Śloka 132

ಸಂಸೃಷ್ಟಾಃ ಸನ್ನಿಪತಿತಾಃ ಪೃಥಗ್ವಾ ಕುಪಿತಾ ಮಲಾಃ||೧೨೯|| ರಸಾಖ್ಯಂ ಧಾತುಮನ್ವೇತ್ಯ ಪಕ್ತಿಂ ಸ್ಥಾನಾನ್ನಿರಸ್ಯ ಚ| ಸ್ವೇನ ತೇನೋಷ್ಮಣ ಚೈವ ಕೃತ್ವಾ ದೇಹೋಷ್ಮಣೋ ಬಲಮ್||೧೩೦|| ಸ್ರೋತಾಂಸಿ ರುದ್ಧ್ವಾ ಸಮ್ಪ್ರಾಪ್ತಾಃ ಕೇವಲಂ ದೇಹಮುಲ್ಬಣಾಃ| ಸನ್ತಾಪಮಧಿಕಂ ದೇಹೇ ಜನಯನ್ತಿ ನರಸ್ತದಾ||೧೩೧|| ಭವತ್ಯತ್ಯುಷ್ಣಸರ್ವಾಙ್ಗೋ ಜ್ವರಿತಸ್ತೇನ ಚೋಚ್ಯತೇ|೧೩೨|

Adhikarana 43 (132) · Śloka 133

ಸ್ರೋತಸಾಂ ಸನ್ನಿರುದ್ಧತ್ವಾತ್ ಸ್ವೇದಂ ನಾ ನಾಧಿಗಚ್ಛತಿ||೧೩೨|| ಸ್ವಸ್ಥಾನಾತ್ ಪ್ರಚ್ಯುತೇ ಚಾಗ್ನೌ ಪ್ರಾಯಶಸ್ತರುಣೇಜ್ವರೇ|೧೩೩|

Adhikarana 44 (133-136) · Śloka 137

ಅರುಚಿಶ್ಚಾವಿಪಾಕಶ್ಚ ಗುರುತ್ವಮುದರಸ್ಯ ಚ||೧೩೩|| ಹೃದಯಸ್ಯಾವಿಶುದ್ಧಿಶ್ಚ ತನ್ದ್ರಾ ಚಾಲಸ್ಯಮೇವ ಚ| ಜ್ವರೋಽವಿಸರ್ಗೀ ಬಲವಾನ್ ದೋಷಾಣಾಮಪ್ರವರ್ತನಮ್||೧೩೪|| ಲಾಲಾಪ್ರಸೇಕೋ ಹೃಲ್ಲಾಸಃ ಕ್ಷುನ್ನಾಶೋ ವಿರಸಂ ಮುಖಮ್| ಸ್ತಬ್ಧಸುಪ್ತಗುರುವಂ ಚ ಗಾತ್ರಾಣಾಂ ಬಹುಮೂತ್ರತಾ||೧೩೫|| ನ ವಿಡ್ ಜೀರ್ಣಾ ನ ಚ ಗ್ಲಾನಿರ್ಜ್ವರಸ್ಯಾಮಸ್ಯ ಲಕ್ಷಣಮ್| ಜ್ವರವೇಗೋಽಧಿಕಸ್ತೃಷ್ಣಾ ಪ್ರಲಾಪಃ ಶ್ವಸನಂ ಭ್ರಮಃ||೧೩೬|| ಮಲಪ್ರವೃತ್ತಿರುತ್ಕ್ಲೇಶಃ ಪಚ್ಯಮಾನಸ್ಯ ಲಕ್ಷಣಮ್|೧೩೭|

Adhikarana 45 (137) · Śloka 138

ಕ್ಷುತ್ ಕ್ಷಾಮತಾ ಲಘುತ್ವಂ ಚ ಗಾತ್ರಾಣಾಂ ಜ್ವರಮಾರ್ದವಮ್||೧೩೭|| ದೋಷಪ್ರವೃತ್ತಿರಷ್ಟಾಹೋ ನಿರಾಮಜ್ವರಲಕ್ಷಣಮ್|೧೩೮|

Adhikarana 46 (138) · Śloka 139

ನವಜ್ವರೇ ದಿವಾಸ್ವಪ್ನಸ್ನಾನಾಭ್ಯಙ್ಗಾನ್ನಮೈಥುನಮ್||೧೩೮|| ಕ್ರೋಧಪ್ರವಾತವ್ಯಾಯಾಮಾನ್ ಕಷಾಯಾಂಶ್ಚ ವಿವರ್ಜಯೇತ್|೧೩೯|

Adhikarana 47 (139) · Śloka 140

ಜ್ವರೇ ಲಙ್ಘನಮೇವಾದಾವುಪದಿಷ್ಟಮೃತೇ ಜ್ವರಾತ್||೧೩೯|| ಕ್ಷಯಾನಿಲಭಯಕ್ರೋಧಕಾಮಶೋಕಶ್ರಮೋದ್ಭವಾತ್ |೧೪೦|

Adhikarana 48 (140-141) · Śloka 142

ಲಙ್ಘನೇನ ಕ್ಷಯಂ ನೀತೇ ದೋಷೇ ಸನ್ಧುಕ್ಷಿತೇಽನಲೇ||೧೪೦|| ವಿಜ್ವರತ್ವಂ ಲಘುತ್ವಂ ಚ ಕ್ಷುಚ್ಚೈವಾಸ್ಯೋಪಜಾಯತೇ | ಪ್ರಾಣಾವಿರೋಧಿನಾ ಚೈನಂ ಲಙ್ಘನೇನೋಪಪಾದಯೇತ್||೧೪೧|| ಬಲಾಧಿಷ್ಠಾನಮಾರೋಗ್ಯಂ ಯದರ್ಥೋಽಯಂ ಕ್ರಿಯಾಕ್ರಮಃ|೧೪೨|

Adhikarana 49 (142) · Śloka 143

ಲಙ್ಘನಂ ಸ್ವೇದನಂ ಕಾಲೋ ಯವಾಗ್ವಸ್ತಿಕ್ತಕೋ ರಸಃ||೧೪೨|| ಪಾಚನಾನ್ಯವಿಪಕ್ವಾನಾಂ ದೋಷಾಣಾಂ ತರುಣೇ ಜ್ವರೇ|೧೪೩|

Adhikarana 50 (143-144) · Śloka 145

ತೃಷ್ಯತೇ ಸಲಿಲಂ ಚೋಷ್ಣಂ ದದ್ಯಾದ್ವಾತಕಫಜ್ವರೇ ||೧೪೩|| ಮದ್ಯೋತ್ಥೇ ಪೈತ್ತಿಕೇ ಚಾಥ ಶೀತಲಂ ತಿಕ್ತಕೈಃ ಶೃತಮ್| ದೀಪನಂ ಪಾಚನಂ ಚೈವ ಜ್ವರಘ್ನಮುಭಯಂ ಹಿ ತತ್||೧೪೪|| ಸ್ರೋತಸಾಂ ಶೋಧನಂ ಬಲ್ಯಂ ರುಚಿಸ್ವೇದಕರಂ ಶಿವಮ್|೧೪೫|

Adhikarana 51 (145) · Śloka 146

ಮುಸ್ತಪರ್ಪಟಕೋಶೀರಚನ್ದನೋದೀಚ್ಯನಾಗರೈಃ||೧೪೫|| ಶೃತಶೀತಂ ಜಲಂ ದದ್ಯಾತ್ ಪಿಪಾಸಾಜ್ವರಶಾನ್ತಯೇ|೧೪೬|

Adhikarana 52 (146) · Śloka 147

ಕಫಪ್ರಧಾನಾನುತ್ಕ್ಲಿಷ್ಟಾನ್ ದೋಷಾನಾಮಾಶಯಸ್ಥಿತಾನ್||೧೪೬|| ಬುದ್ಧ್ವಾ ಜ್ವರಕರಾನ್ ಕಾಲೇ ವಮ್ಯಾನಾಂ ವಮನೈರ್ಹರೇತ್|೧೪೭|

Adhikarana 53 (147-148) · Śloka 149

ಅನುಪಸ್ಥಿತದೋಷಾಣಾಂ ವಮನಂ ತರುಣೇಜ್ವರೇ||೧೪೭|| ಹೃದ್ರೋಗಂ ಶ್ವಾಸಮಾನಾಹಂ ಮೋಹಂ ಚ ಜನಯೇದ್ಭೃಶಮ್| ಸರ್ವದೇಹಾನುಗಾಃ ಸಾಮಾ ಧಾತುಸ್ಥಾ ಅಸುನಿರ್ಹರಾಃ ||೧೪೮|| ದೋಷಾಃ ಫಲಾನಾಮಾಮಾನಾಂ ಸ್ವರಸಾ ಇವ ಸಾತ್ಯಯಾಃ|೧೪೯|

Adhikarana 54 (149-154) · Śloka 155

ವಮಿತಂ ಲಙ್ಘಿತಂ ಕಾಲೇ ಯವಾಗೂಭಿರುಪಾಚರೇತ್||೧೪೯|| ಯಥಾಸ್ವೌಷಧಸಿದ್ಧಾಭಿರ್ಮಣ್ಡಪೂರ್ವಾಭಿರಾದಿತಃ| ಯಾವಜ್ಜ್ವರಮೃದೂಭಾವಾತ್ ಷಡಹಂ ವಾ ವಿಚಕ್ಷಣಃ||೧೫೦|| ತಸ್ಯಾಗ್ನಿರ್ದೀಪ್ಯತೇ ತಾಭಿಃ ಸಮಿದ್ಭಿರಿವ ಪಾವಕಃ| ತಾಶ್ಚ ಭೇಷಜಸಂಯೋಗಾಲ್ಲಘುತ್ವಾಚ್ಚಾಗ್ನಿದೀಪನಾಃ||೧೫೧|| ವಾತಮೂತ್ರಪುರೀಷಾಣಾಂ ದೋಷಾಣಾಂ ಚಾನುಲೋಮನಾಃ| ಸ್ವೇದನಾಯ ದ್ರವೋಷ್ಣತ್ವಾದ್ದ್ರವತ್ವಾತ್ತೃಟ್ಪ್ರಶಾನ್ತಯೇ||೧೫೨|| ಆಹಾರಭಾವಾತ್ ಪ್ರಾಣಾಯ ಸರತ್ವಾಲ್ಲಾಘವಾಯ ಚ| ಜ್ವರಘ್ನ್ಯೋ ಜ್ವರಸಾತ್ಮ್ಯತ್ವಾತ್ತಸ್ಮಾತ್ ಪೇಯಾಭಿರಾದಿತಃ||೧೫೩|| ಜ್ವರಾನುಪಚರೇದ್ಧೀಮಾನೃತೇ ಮದ್ಯಸಮುತ್ಥಿತಾತ್| ಮದಾತ್ಯಯೇ ಮದ್ಯನಿತ್ಯೇ ಗ್ರೀಷ್ಮೇ ಪಿತ್ತಕಫಾಧಿಕೇ||೧೫೪|| ಊರ್ಧ್ವಗೇ ರಕ್ತಪಿತ್ತೇ ಚ ಯವಾಗೂರ್ನ ಹಿತಾ ಜ್ವರೇ|೧೫೫|

Adhikarana 55 (155) · Śloka 156

ತತ್ರ ತರ್ಪಣಮೇವಾಗ್ರೇ ಪ್ರಯೋಜ್ಯಂ ಲಾಜಸಕ್ತುಭಿಃ||೧೫೫|| ಜ್ವರಾಪಹೈಃ ಫಲರಸೈರ್ಯುಕ್ತಂ ಸಮಧುಶರ್ಕರಮ್|೧೫೬|

Adhikarana 56 (156-159) · Śloka 160

ತತಃ ಸಾತ್ಮ್ಯಬಲಾಪೇಕ್ಷೀ ಭೋಜಯೇಜ್ಜೀರ್ಣತರ್ಪಣಮ್||೧೫೬|| ತನುನಾ ಮುದ್ಗಯೂಷೇಣ ಜಾಙ್ಗಲಾನಾಂ ರಸೇನ ವಾ| ಅನ್ನಕಾಲೇಷು ಚಾಪ್ಯಸ್ಮೈ ವಿಧೇಯಂ ದನ್ತಧಾವನಮ್||೧೫೭|| ಯೋಽಸ್ಯ ವಕ್ತ್ರರಸಸ್ತಸ್ಮಾದ್ವಿಪರೀತಂ ಪ್ರಿಯಂ ಚ ಯತ್| ತದಸ್ಯ ಮುಖವೈಶದ್ಯಂ ಪ್ರಕಾಙ್ಕ್ಷಾಂ ಚಾನ್ನಪಾನಯೋಃ||೧೫೮|| ಧತ್ತೇ ರಸವಿಶೇಷಾಣಾಮಭಿಜ್ಞತ್ವಂ ಕರೋತಿ ಯತ್| ವಿಶೋಧ್ಯ ದ್ರುಮಶಾಖಾಗ್ರೈರಾಸ್ಯಂ ಪ್ರಕ್ಷಾಲ್ಯ ಚಾಸಕೃತ್||೧೫೯|| ಮಸ್ತ್ವಿಕ್ಷುರಸಮದ್ಯಾದ್ಯೈರ್ಯಥಾಹಾರಮವಾಪ್ನುಯಾತ್|೧೬೦|

Adhikarana 57 (160) · Śloka 161

ಪಾಚನಂ ಶಮನೀಯಂ ವಾ ಕಷಾಯಂ ಪಾಯಯೇದ್ಭಿಷಕ್||೧೬೦|| ಜ್ವರಿತಂ ಷಡಹೇಽತೀತೇ ಲಘ್ವನ್ನಪ್ರತಿಭೋಜಿತಮ್|೧೬೧|

Adhikarana 58 (161-162) · Śloka 163

ಸ್ತಭ್ಯನ್ತೇ ನ ವಿಪಚ್ಯನ್ತೇ ಕುರ್ವನ್ತಿ ವಿಷಮಜ್ವರಮ್||೧೬೧|| ದೋಷಾ ಬದ್ಧಾಃ ಕಷಾಯೇಣ ಸ್ತಮ್ಭಿತ್ವಾತ್ತರುಣೇ ಜ್ವರೇ| ನ ತು ಕಲ್ಪನಮುದ್ದಿಶ್ಯ ಕಷಾಯಃ ಪ್ರತಿಷಿಧ್ಯತೇ||೧೬೨|| ಯಃ ಕಷಾಯಕಷಾಯಃ ಸ್ಯಾತ್ ಸ ವರ್ಜ್ಯಸ್ತರುಣಜ್ವರೇ|೧೬೩|

Adhikarana 59 (163) · Śloka 164

ಯೂಷೈರಮ್ಲೈರನಮ್ಲೈರ್ವಾ ಜಾಙ್ಗಲೈರ್ವಾ ರಸೈರ್ಹಿತೈಃ||೧೬೩|| ದಶಾಹಂ ಯಾವದಶ್ನೀಯಾಲ್ಲಘ್ವನ್ನಂ ಜ್ವರಶಾನ್ತಯೇ|೧೬೪|

Adhikarana 60 (164) · Śloka 165

ಅತ ಊರ್ಧ್ವಂ ಕಫೇ ಮನ್ದೇ ವಾತಪಿತ್ತೋತ್ತರೇ ಜ್ವರೇ||೧೬೪|| ಪರಿಪಕ್ವೇಷು ದೋಷೇಷು ಸರ್ಪಿಷ್ಪಾನಂ ಯಥಾಽಮೃತಮ್|೧೬೫|

Adhikarana 61 (165-166) · Śloka 167

ನಿರ್ದಶಾಹಮಪಿ ಜ್ಞಾತ್ವಾ ಕಫೋತ್ತರಮಲಙ್ಘಿತಮ್||೧೬೫|| ನ ಸರ್ಪಿಃ ಪಾಯಯೇದ್ವೈದ್ಯಃ ಕಷಾಯೈಸ್ತಮುಪಾಚರೇತ್ | ಯಾವಲ್ಲಘುತ್ವಾದಶನಂ ದದ್ಯಾನ್ಮಾಂಸರಸೇನ ಚ||೧೬೬|| ಬಲಂ ಹ್ಯಲಂ ನಿಗ್ರಹಾಯ ದೋಷಾಣಾಂ, ಬಲಕೃಚ್ಚ ತತ್ |೧೬೭|

Adhikarana 62 (167) · Śloka 168

ದಾಹತೃಷ್ಣಾಪರೀತಸ್ಯ ವಾತಪಿತ್ತೋತ್ತರಂ ಜ್ವರಮ್||೧೬೭|| ಬದ್ಧಪ್ರಚ್ಯುತದೋಷಂ ವಾ ನಿರಾಮಂ ಪಯಸಾ ಜಯೇತ್|೧೬೮|

Adhikarana 63 (168) · Śloka 169

ಕ್ರಿಯಾಭಿರಾಭಿಃ ಪ್ರಶಮಂ ನ ಪ್ರಯಾತಿ ಯದಾ ಜ್ವರಃ||೧೬೮|| ಅಕ್ಷೀಣಬಲಮಾಂಸಾಗ್ನೇಃ ಶಮಯೇತ್ತಂ ವಿರೇಚನೈಃ|೧೬೯|

Adhikarana 64 (169-170) · Śloka 171

ಜ್ವರಕ್ಷೀಣಸ್ಯ ನ ಹಿತಂ ವಮನಂ ನ ವಿರೇಚನಮ್||೧೬೯|| ಕಾಮಂ ತು ಪಯಸಾ ತಸ್ಯ ನಿರೂಹೈರ್ವಾ ಹರೇನ್ಮಲಾನ್| ನಿರೂಹೋ ಬಲಮಗ್ನಿಂ ಚ ವಿಜ್ವರತ್ವಂ ಮುದಂ ರುಚಿಮ್||೧೭೦|| ಪರಿಪಕ್ವೇಷು ದೋಷೇಷು ಪ್ರಯುಕ್ತಃ ಶೀಘ್ರಮಾವಹೇತ್|೧೭೧|

Adhikarana 65 (171) · Śloka 172

ಪಿತ್ತಂ ವಾ ಕಫಪಿತ್ತಂ ವಾ ಪಿತ್ತಾಶಯಗತಂ ಹರೇತ್||೧೭೧|| ಸ್ರಂಸನಂ ತ್ರೀನ್ಮಲಾನ್ ಬಸ್ತಿರ್ಹರೇತ್ ಪಕ್ವಾಶಯಸ್ಥಿತಾನ್|೧೭೨|

Adhikarana 66 (172) · Śloka 173

ಜ್ವರೇ ಪುರಾಣೇ ಸಙ್ಕ್ಷೀಣೇ ಕಫಪಿತ್ತೇ ದೃಢಾಗ್ನಯೇ||೧೭೨|| ರೂಕ್ಷಬದ್ಧಪುರೀಷಾಯ ಪ್ರದದ್ಯಾದನುವಾಸನಮ್|೧೭೩|

Adhikarana 67 (173) · Śloka 174

ಗೌರವೇ ಶಿರಸಃ ಶೂಲೇ ವಿಬದ್ಧೇಷ್ವಿನ್ದ್ರಿಯೇಷು ಚ||೧೭೩|| ಜೀರ್ಣಜ್ವರೇ ರುಚಿಕರಂ ಕುರ್ಯಾನ್ಮೂರ್ಧವಿರೇಚನಮ್|೧೭೪|

Adhikarana 68 (174-175) · Śloka 176

ಅಭ್ಯಙ್ಗಾಂಶ್ಚ ಪ್ರದೇಹಾಂಶ್ಚ ಪರಿಷೇಕಾವಗಾಹನೇ||೧೭೪|| ವಿಭಜ್ಯ ಶೀತೋಷ್ಣಕೃತಂ ಕುರ್ಯಾಜ್ಜೀರ್ಣೇ ಜ್ವರೇ ಭಿಷಕ್| ತೈರಾಶು ಪ್ರಶಮಂ ಯಾತಿ ಬಹಿರ್ಮಾರ್ಗಗತೋ ಜ್ವರಃ||೧೭೫|| ಲಭನ್ತೇ ಸುಖಮಙ್ಗಾನಿ ಬಲಂ ವರ್ಣಶ್ಚ ವರ್ಧತೇ|೧೭೬|

Adhikarana 69 (176) · Śloka 177

ಧೂಪನಾಞ್ಜನಯೋಗೈಶ್ಚ ಯಾನ್ತಿ ಜೀರ್ಣಜ್ವರಾಃ ಶಮಮ್||೧೭೬|| ತ್ವಙ್ಮಾತ್ರಶೇಷಾ ಯೇಷಾಂ ಚ ಭವತ್ಯಾಗನ್ತುರನ್ವಯಃ|೧೭೭|

Adhikarana 70 (177-178) · Śloka 179

ಇತಿ ಕ್ರಿಯಾಕ್ರಮಃ ಸಿದ್ಧೋ ಜ್ವರಘ್ನಃ ಸಮ್ಪ್ರಕಾಶಿತಃ||೧೭೭|| ಯೇಷಾಂ ತ್ವೇಷ ಕ್ರಮಸ್ತಾನಿ ದ್ರವ್ಯಾಣ್ಯೂರ್ಧ್ವಮತಃ ಶೃಣು| ರಕ್ತಶಾಲ್ಯಾದಯಃ ಶಸ್ತಾಃ ಪುರಾಣಾಃ ಷಷ್ಟಿಕೈಃ ಸಹ||೧೭೮|| ಯವಾಗ್ವೋದನಲಾಜಾರ್ಥೇ ಜ್ವರಿತಾನಾಂ ಜ್ವರಾಪಹಾಃ|೧೭೯|

Adhikarana 71 (179-187) · Śloka 188

ಲಾಜಪೇಯಾಂ ಸುಖಜರಾಂ ಪಿಪ್ಪಲೀನಾಗರೈಃ ಶೃತಾಮ್||೧೭೯|| ಪಿಬೇಜ್ಜ್ವರೀ ಜ್ವರಹರಾಂ ಕ್ಷುದ್ವಾನಲ್ಪಾಗ್ನಿರಾದಿತಃ| ಅಮ್ಲಾಭಿಲಾಷೀ ತಾಮೇವ ದಾಡಿಮಾಮ್ಲಾಂ ಸನಾಗರಾಮ್||೧೮೦|| ಸೃಷ್ಟವಿಟ್ ಪೈತ್ತಿಕೋ ವಾಽಥ ಶೀತಾಂ ಮಧುಯುತಾಂ ಪಿಬೇತ್| ಪೇಯಾಂ ವಾ ರಕ್ತಶಾಲೀನಾಂ ಪಾರ್ಶ್ವಬಸ್ತಿಶಿರೋರುಜಿ||೧೮೧|| ಶ್ವದಂಷ್ಟ್ರಾಕಣ್ಟಕಾರಿಭ್ಯಾಂ ಸಿದ್ಧಾಂ ಜ್ವರಹರಾಂ ಪಿಬೇತ್| ಜ್ವರಾತಿಸಾರೀ ಪೇಯಾಂ ವಾ ಪಿಬೇತ್ ಸಾಮ್ಲಾಂ ಶೃತಾಂ ನರಃ||೧೮೨|| ಪೃಶ್ನಿಪರ್ಣೀಬಲಾಬಿಲ್ವನಾಗರೋತ್ಪಲಧಾನ್ಯಕೈಃ| ಶೃತಾಂ ವಿದಾರೀಗನ್ಧಾದ್ಯೈರ್ದೀಪನೀಂ ಸ್ವೇದನೀಂ ನರಃ||೧೮೩|| ಕಾಸೀ ಶ್ವಾಸೀ ಚ ಹಿಕ್ಕೀ ಚ ಯವಾಗೂಂ ಜ್ವರಿತಃ ಪಿಬೇತ್| ವಿಬದ್ಧವರ್ಚಾಃ ಸಯವಾಂ ಪಿಪ್ಪಲ್ಯಾಮಲಕೈಃ ಶೃತಾಮ್||೧೮೪|| ಸರ್ಪಿಷ್ಮತೀಂ ಪಿಬೇತ್ ಪೇಯಾಂ ಜ್ವರೀ ದೋಷಾನುಲೋಮನೀಮ್| ಕೋಷ್ಠೇ ವಿಬದ್ಧೇ ಸರುಜಿ ಪಿಬೇತ್ ಪೇಯಾಂ ಶೃತಾಂ ಜ್ವರೀ||೧೮೫|| ಮೃದ್ವೀಕಾಪಿಪ್ಪಲೀಮೂಲಚವ್ಯಾಮಲಕನಾಗರೈಃ| ಪಿಬೇತ್ ಸಬಿಲ್ವಾಂ ಪೇಯಾಂ ವಾ ಜ್ವರೇ ಸಪರಿಕರ್ತಿಕೇ||೧೮೬|| ಬಲಾವೃಕ್ಷಾಮ್ಲಕೋಲಾಮ್ಲಕಲಶೀಧಾವನೀಶೃತಾಮ್| ಅಸ್ವೇದನಿದ್ರಸ್ತೃಷ್ಣಾರ್ತಃ ಪಿಬೇತ್ ಪೇಯಾಂ ಸಶರ್ಕರಾಮ್||೧೮೭|| ನಾಗರಾಮಲಕೈಃ ಸಿದ್ಧಾಂ ಘೃತಭೃಷ್ಟಾಂ ಜ್ವರಾಪಹಾಮ್|೧೮೮|

Adhikarana 72 (188) · Śloka 189

ಮುದ್ಗಾನ್ಮಸೂರಾಂಶ್ಚಣಕಾನ್ ಕುಲತ್ಥಾನ್ ಸಮಕುಷ್ಟಕಾನ್||೧೮೮|| ಯೂಷಾರ್ಥೇ ಯೂಷಸಾತ್ಮ್ಯಾನಾಂ ಜ್ವರಿತಾನಾಂ ಪ್ರದಾಪಯೇತ್|೧೮೯|

Adhikarana 73 (189) · Śloka 190

ಪಟೋಲಪತ್ರಂ ಸಫಲಂ ಕುಲಕಂ ಪಾಪಚೇಲಿಕಮ್||೧೮೯|| ಕರ್ಕೋಟಕಂ ಕಠಿಲ್ಲಂ ಚ ವಿದ್ಯಾಚ್ಛಾಕಂ ಜ್ವರೇ ಹಿತಮ್|೧೯೦|

Adhikarana 74 (190-193) · Śloka 194

ಲಾವಾನ್ ಕಪಿಞ್ಜಲಾನೇಣಾಂಶ್ಚಕೋರಾನುಪಚಕ್ರಕಾನ್||೧೯೦|| ಕುರಙ್ಗಾನ್ ಕಾಲಪುಚ್ಛಾಂಶ್ಚ ಹರಿಣಾನ್ ಪೃಷತಾಞ್ಛಶಾನ್| ಪ್ರದದ್ಯಾನ್ಮಾಂಸಸಾತ್ಮ್ಯಾಯ ಜ್ವರಿತಾಯ ಜ್ವರಾಪಹಾನ್||೧೯೧|| ಈಷದಮ್ಲಾನನಮ್ಲಾನ್ ವಾ ರಸಾನ್ ಕಾಲೇ ವಿಚಕ್ಷಣಃ| ಕುಕ್ಕುಟಾಂಶ್ಚ ಮಯೂರಾಂಶ್ಚ ತಿತ್ತಿರಿಕ್ರೌಞ್ಚವರ್ತಕಾನ್||೧೯೨|| ಗುರೂಷ್ಣತ್ವಾನ್ನ ಶಂಸನ್ತಿ ಜ್ವರೇ ಕೇಚಿಚ್ಚಿಕಿತ್ಸಕಾಃ| ಲಙ್ಘನೇನಾನಿಲಬಲಂ ಜ್ವರೇ ಯದ್ಯಧಿಕಂ ಭವೇತ್||೧೯೩|| ಭಿಷಙ್ಮಾತ್ರಾವಿಕಲ್ಪಜ್ಞೋ ದದ್ಯಾತ್ತಾನಪಿ ಕಾಲವಿತ್|೧೯೪|

Adhikarana 75 (194) · Śloka 195

ಘರ್ಮಾಮ್ಬು ಚಾನುಪಾನಾರ್ಥಂ ತೃಷಿತಾಯ ಪ್ರದಾಪಯೇತ್||೧೯೪|| ಮದ್ಯಂ ವಾ ಮದ್ಯಸಾತ್ಮ್ಯಾಯ ಯಥಾದೋಷಂ ಯಥಾಬಲಮ್|೧೯೫|

Adhikarana 76 (195-196) · Śloka 196

ಗುರೂಷ್ಣಸ್ನಿಗ್ಧಮಧುರಾನ್ ಕಷಾಯಾಂಶ್ಚ ನವಜ್ವರೇ||೧೯೫|| ಆಹಾರಾನ್ ದೋಷಪಕ್ತ್ಯರ್ಥಂ ಪ್ರಾಯಶಃ ಪರಿವರ್ಜಯೇತ್| ಅನ್ನಪಾನಕ್ರಮಃ ಸಿದ್ಧೋ ಜ್ವರಘ್ನಃ ಸಮ್ಪ್ರಕಾಶಿತಃ||೧೯೬||

Adhikarana 77 (197-199) · Śloka 200

ಅತ ಊರ್ಧ್ವಂ ಪ್ರವಕ್ಷ್ಯನ್ತೇ ಕಷಾಯಾ ಜ್ವರನಾಶನಾಃ| ಪಾಕ್ಯಂ ಶೀತಕಷಾಯಂ ವಾ ಮುಸ್ತಪರ್ಪಟಕಂ ಪಿಬೇತ್||೧೯೭|| ಸನಾಗರಂ ಪರ್ಪಟಕಂ ಪಿಬೇದ್ವಾ ಸದುರಾಲಭಮ್| ಕಿರಾತತಿಕ್ತಕಂ ಮುಸ್ತಂ ಗುಡೂಚೀಂ ವಿಶ್ವಭೇಷಜಮ್||೧೯೮|| ಪಾಠಾಮುಶೀರಂ ಸೋದೀಚ್ಯಂ ಪಿಬೇದ್ವಾ ಜ್ವರಶಾನ್ತಯೇ| ಜ್ವರಘ್ನಾ ದೀಪನಾಶ್ಚೈತೇ ಕಷಾಯಾ ದೋಷಪಾಚನಾಃ||೧೯೯|| ತೃಷ್ಣಾರುಚಿಪ್ರಶಮನಾ ಮುಖವೈರಸ್ಯನಾಶನಾಃ|೨೦೦|

Adhikarana 78 (200-203) · Śloka 203

ಕಲಿಙ್ಗಕಾಃ ಪಟೋಲಸ್ಯ ಪತ್ರಂ ಕಟುಕರೋಹಿಣೀ||೨೦೦|| ಪಟೋಲಃ ಸಾರಿವಾ ಮುಸ್ತಂ ಪಾಠಾ ಕಟುಕರೋಹಿಣೀ| ನಿಮ್ಬಃ ಪಟೋಲಸ್ತ್ರಿಫಲಾ ಮೃದ್ವೀಕಾ ಮುಸ್ತವತ್ಸಕೌ||೧೦೧|| ಕಿರಾತತಿಕ್ತಮಮೃತಾ ಚನ್ದನಂ ವಿಶ್ವಭೇಷಜಮ್| ಗುಡೂಚ್ಯಾಮಲಕಂ ಮುಸ್ತಮರ್ಧಶ್ಲೋಕಸಮಾಪನಾಃ||೨೦೨|| ಕಷಾಯಾಃ ಶಮಯನ್ತ್ಯಾಶು ಪಞ್ಚ ಪಞ್ಚವಿಧಾಞ್ಜ್ವರಾನ್| ಸನ್ತತಂ ಸತತಾನ್ಯೇದ್ಯುಸ್ತೃತೀಯಕಚತುರ್ಥಕಾನ್||೨೦೩||

Adhikarana 79 (204-206) · Śloka 207

ವತ್ಸಕಾರಗ್ವಧೌ ಪಾಠಾಂ ಷಡ್ಗ್ರನ್ಥಾಂ ಕಟುರೋಹಿಣೀಮ್| ಮೂರ್ವಾಂ ಸಾತಿವಿಷಾಂ ನಿಮ್ಬಂ ಪಟೋಲಂ ಧನ್ವಯಾಸಕಮ್||೨೦೪|| ವಚಾಂ ಮುಸ್ತಮುಶೀರಂ ಚ ಮಧುಕಂ ತ್ರಿಫಲಾಂ ಬಲಾಮ್| ಪಾಕ್ಯಂ ಶೀತಕಷಾಯಂ ವಾ ಪಿಬೇಜ್ಜ್ವರಹರಂ ನರಃ||೨೦೫|| ಮಧೂಕಮುಸ್ತಮೃದ್ವೀಕಾಕಾಶ್ಮರ್ಯಾಣಿ ಪರೂಷಕಮ್| ತ್ರಾಯಮಾಣಾಮುಶೀರಂ ಚ ತ್ರಿಫಲಾಂ ಕಟುರೋಹಿಣೀಮ್||೨೦೬|| ಪೀತ್ವಾ ನಿಶಿಸ್ಥಿತಂ ಜನ್ತುರ್ಜ್ವರಾಚ್ಛೀಘ್ರಂ ವಿಮುಚ್ಯತೇ|೨೦೭|

Adhikarana 80 (207-209) · Śloka 209

ಜಾತ್ಯಾಮಲಕಮುಸ್ತಾನಿ ತದ್ವದ್ಧನ್ವಯವಾಸಕಮ್||೨೦೭|| ವಿಬದ್ಧದೋಷೋ ಜ್ವರಿತಃ ಕಷಾಯಂ ಸಗುಡಂ ಪಿಬೇತ್| ತ್ರಿಫಲಾಂ ತ್ರಾಯಮಾಣಾಂ ಚ ಮೃದ್ವೀಕಾಂ ಕಟುರೋಹಿಣೀಮ್||೨೦೮|| ಪಿತ್ತಶ್ಲೇಷ್ಮಹರಸ್ತ್ವೇಷ ಕಷಾಯೋ ಹ್ಯಾನುಲೋಮಿಕಃ| ತ್ರಿವೃತಾಶರ್ಕರಾಯುಕ್ತಃ ಪಿತ್ತಶ್ಲೇಷ್ಮಜ್ವರಾಪಹಃ||೨೦೯||

Adhikarana 81 (210-214) · Śloka 214

ಬೃಹತ್ಯೌ ವತ್ಸಕಂ ಮುಸ್ತಂ ದೇವದಾರು ಮಹೌಷಧಮ್| ಕೋಲವಲ್ಲೀ ಚ ಯೋಗೋಽಯಂ ಸನ್ನಿಪಾತಜ್ವರಾಪಹಃ||೨೧೦|| ಶಟೀ ಪುಷ್ಕರಮೂಲಂ ಚ ವ್ಯಾಘ್ರೀ ಶೃಙ್ಗೀ ದುರಾಲಭಾ| ಗುಡೂಚೀ ನಾಗರಂ ಪಾಠಾ ಕಿರಾತಂ ಕಟುರೋಹಿಣೀ||೨೧೧|| ಏಷ ಶಟ್ಯಾದಿಕೋ ವರ್ಗಃ ಸನ್ನಿಪಾತಜ್ವರಾಪಹಃ| ಕಾಸಹೃದ್ಗ್ರಹಪಾರ್ಶ್ವಾರ್ತಿಶ್ವಾಸತನ್ದ್ರಾಸು ಶಸ್ಯತೇ||೨೧೨|| ಬೃಹತ್ಯೌ ಪೌಷ್ಕರಂ ಭಾರ್ಗೀ ಶಟೀ ಶೃಙ್ಗೀ ದುರಾಲಭಾ| ವತ್ಸಕಸ್ಯ ಚ ಬೀಜಾನಿ ಪಟೋಲಂ ಕಟುರೋಹಿಣೀ||೨೧೩|| ಬೃಹತ್ಯಾದಿರ್ಗಣಃ ಪ್ರೋಕ್ತಃ ಸನ್ನಿಪಾತಜ್ವರಾಪಹಃ| ಕಾಸಾದಿಷು ಚ ಸರ್ವೇಷು ದದ್ಯಾತ್ ಸೋಪದ್ರವೇಷು ಚ||೨೧೪||

Adhikarana 82 (215) · Śloka 215

ಕಷಾಯಾಶ್ಚ ಯವಾಗ್ವಶ್ಚ ಪಿಪಾಸಾಜ್ವರನಾಶನಾಃ| ನಿರ್ದಿಷ್ಟಾ ಭೇಷಜಾಧ್ಯಾಯೇ ಭಿಷಕ್ತಾನಪಿ ಯೋಜಯೇತ್||೨೧೫||

Adhikarana 83 (216-217) · Śloka 217

ಜ್ವರಾಃ ಕಷಾಯೈರ್ವಮನೈರ್ಲಙ್ಘನೈರ್ಲಘುಭೋಜನೈಃ| ರೂಕ್ಷಸ್ಯ ಯೇ ನ ಶಾಮ್ಯನ್ತಿ ಸರ್ಪಿಸ್ತೇಷಾಂ ಭಿಷಗ್ಜಿತಮ್||೨೧೬|| ರೂಕ್ಷಂ ತೇಜೋ ಜ್ವರಕರಂ ತೇಜಸಾ ರೂಕ್ಷಿತಸ್ಯ ಚ| ಯಃ ಸ್ಯಾದನುಬಲೋ ಧಾತುಃ ಸ್ನೇಹವಧ್ಯಃ ಸ ಚಾನಿಲಃ||೨೧೭||

Adhikarana 84 (218) · Śloka 218

ಕಷಾಯಾಃ ಸರ್ವ ಏವೈತೇ ಸರ್ಪಿಷಾ ಸಹ ಯೋಜಿತಾಃ| ಪ್ರಯೋಜ್ಯಾ ಜ್ವರಶಾನ್ತ್ಯರ್ಥಮಗ್ನಿಸನ್ಧುಕ್ಷಣಾಃ ಶಿವಾಃ||೨೧೮||

Adhikarana 85 (219-221) · Śloka 221

ಪಿಪ್ಪಲ್ಯಶ್ಚನ್ದನಂ ಮುಸ್ತಮುಶೀರಂ ಕಟುರೋಹಿಣೀ| ಕಲಿಙ್ಗಕಾಸ್ತಾಮಲಕೀ ಸಾರಿವಾಽತಿವಿಷಾ ಸ್ಥಿರಾ||೨೧೯|| ದ್ರಾಕ್ಷಾಮಲಕಬಿಲ್ವಾನಿ ತ್ರಾಯಮಾಣಾ ನಿದಿಗ್ಧಿಕಾ| ಸಿದ್ಧಮಿತೈರ್ಘೃತಂ ಸದ್ಯೋ ಜೀರ್ಣಜ್ವರಮಪೋಹತಿ||೨೨೦|| ಕ್ಷಯಂ ಕಾಸಂ ಶಿರಃಶೂಲಂ ಪಾರ್ಶ್ವಶೂಲಂ ಹಲೀಮಕಮ್| ಅಂಸಾಭಿತಾಪಮಾಗ್ನಿಂ ಚ ವಿಷಮಂ ಸನ್ನಿಯಚ್ಛತಿ||೨೨೧||

Adhikarana 86 (222-223) · Śloka 223

ವಾಸಾಂ ಗುಡೂಚೀಂ ತ್ರಿಫಲಾಂ ತ್ರಾಯಮಾಣಾಂ ಯವಾಸಕಮ್| ಪಕ್ತ್ವಾ ತೇನ ಕಷಾಯೇಣ ಪಯಸಾ ದ್ವಿಗುಣೇನ ಚ||೨೨೨|| ಪಿಪ್ಪಲೀಮುಸ್ತಮೃದ್ವೀಕಾಚನ್ದನೋತ್ಪಲನಾಗರೈಃ| ಕಲ್ಕೀಕೃತೈಶ್ಚ ವಿಪಚೇದ್ಧೃತಂ ಜೀರ್ಣಜ್ವರಾಪಹಮ್||೨೨೩||

Adhikarana 87 (224-226) · Śloka 226

ಬಲಾಂ ಶ್ವದಂಷ್ಟ್ರಾಂ ಬೃಹತೀಂ ಕಲಸೀಂ ಧಾವನೀಂ ಸ್ಥಿರಾಮ್| ನಿಮ್ಬಂ ಪರ್ಪಟಕಂ ಮುಸ್ತಂ ತ್ರಾಯಮಾಣಾಂ ದುರಾಲಭಾಮ್||೨೨೪|| ಕೃತ್ವಾ ಕಷಾಯಂ ಪೇಷ್ಯಾರ್ಥೇ ದದ್ಯಾತ್ತಾಮಲಕೀಂ ಶಟೀಮ್| ದ್ರಾಕ್ಷಾಂ ಪುಷ್ಕರಮೂಲಂ ಚ ಮೇದಾಮಾಮಲಕಾನಿ ಚ||೨೨೫|| ಘೃತಂ ಪಯಶ್ಚ ತತ್ ಸಿದ್ಧಂ ಸರ್ಪಿರ್ಜ್ವರಹರಂ ಪರಮ್| ಕ್ಷಯಕಾಸಶಿರಃಶೂಲಪಾರ್ಶ್ವಶೂಲಾಂಸತಾಪನುತ್ ||೨೨೬||

Adhikarana 88 (227-233) · Śloka 233

ಜ್ವರಿಭ್ಯೋ ಬಹುದೋಷೇಭ್ಯ ಊರ್ಧ್ವಂ ಚಾಧಶ್ಚ ಬುದ್ಧಿಮಾನ್| ದದ್ಯಾತ್ ಸಂಶೋಧನಂ ಕಾಲೇ ಕಲ್ಪೇ ಯದುಪದೇಕ್ಷ್ಯತೇ||೨೨೭|| ಮದನಂ ಪಿಪ್ಪಲೀಭಿರ್ವಾ ಕಲಿಙ್ಗೈರ್ಮಧುಕೇನ ವಾ| ಯುಕ್ತಮುಷ್ಣಾಮ್ಬುನಾ ಪೇಯಂ ವಮನಂ ಜ್ವರಶಾನ್ತಯೇ||೨೨೮|| ಕ್ಷೌದ್ರಾಮ್ಬುನಾ ರಸೇನೇಕ್ಷೋರಥವಾ ಲವಣಾಮ್ಬುನಾ| ಜ್ವರೇ ಪ್ರಚ್ಛರ್ದನಂ ಶಸ್ತಂ ಮದ್ಯೈರ್ವಾ ತರ್ಪಣೇನ ವಾ||೨೨೯|| ಮೃದ್ವೀಕಾಮಲಕಾನಾಂ ವಾ ರಸಂ ಪ್ರಸ್ಕನ್ದನಂ ಪಿಬೇತ್| ರಸಮಾಮಲಕಾನಾಂ ವಾ ಘೃತಭೃಷ್ಟಂ ಜ್ವರಾಪಹಮ್||೨೩೦|| ಲಿಹ್ಯಾದ್ವಾ ತ್ರೈವೃತಂ ಚೂರ್ಣಂ ಸಂಯುಕ್ತಂ ಮಧುಸರ್ಪಿಷಾ| ಪಿಬೇದ್ವಾ ಕ್ಷೌದ್ರಮಾವಾಪ್ಯ ಸಘೃತಂ ತ್ರಿಫಲಾರಸಮ್||೨೩೧|| ಆರಗ್ವಧಂ ವಾ ಪಯಸಾ ಮೃದ್ವೀಕಾನಾಂ ರಸೇನ ವಾ| ತ್ರಿವೃತಾಂ ತ್ರಾಯಮಾಣಾಂ ವಾ ಪಯಸಾ ಜ್ವರಿತಃ ಪಿಬೇತ್||೨೩೨|| ಜ್ವರಾದ್ವಿಮುಚ್ಯತೇ ಪೀತ್ವಾ ಮೃದ್ವೀಕಾಭಿಃ ಸಹಾಭಯಾಮ್| ಪಯೋಽನುಪಾನಮುಷ್ಣಂ ವಾ ಪೀತ್ವಾ ದ್ರಾಕ್ಷಾರಸಂ ನರಃ||೨೩೩||

Adhikarana 89 (234-239) · Śloka 239

ಕಾಸಾಚ್ಛ್ವಾಸಾಚ್ಛಿರಃಶೂಲಾತ್ಪಾರ್ಶ್ವಶೂಲಾಚ್ಚಿರಜ್ವರಾತ್| ಮುಚ್ಯತೇ ಜ್ವರಿತಃ ಪೀತ್ವಾ ಪಞ್ಚಮೂಲೀಶೃತಂ ಪಯಃ||೨೩೪|| ಏರಣ್ಡಮೂಲೋತ್ಕ್ವಥಿತಂ ಜ್ವರಾತ್ ಸಪರಿಕರ್ತಿಕಾತ್| ಪಯೋ ವಿಮುಚ್ಯತೇ ಪೀತ್ವಾ ತದ್ವದ್ಬಿಲ್ವಶಲಾಟುಭಿಃ||೨೩೫|| ತ್ರಿಕಣ್ಟಕಬಲಾವ್ಯಾಘ್ರೀಗುಡನಾಗರಸಾಧಿತಮ್| ವರ್ಚೋಮೂತ್ರವಿಬನ್ಧಘ್ನಂ ಶೋಫಜ್ವರಹರಂ ಪಯಃ||೨೩೬|| ಸನಾಗರಂ ಸಮೃದ್ವೀಕಂ ಸಘೃತಕ್ಷೌದ್ರಶರ್ಕರಮ್| ಶೃತಂ ಪಯಃ ಸಖರ್ಜೂರಂ ಪಿಪಾಸಾಜ್ವರನಾಶನಮ್||೨೩೭|| ಚತುರ್ಗುಣೇನಾಮ್ಭಸಾ ವಾ ಶೃತಂ ಜ್ವರಹರಂ ಪಯಃ| ಧಾರೋಷ್ಣಂ ವಾ ಪಯಃ ಸದ್ಯೋ ವಾತಪಿತ್ತಜ್ವರಂ ಜಯೇತ್||೨೩೮|| ಜೀರ್ಣಜ್ವರಾಣಾಂ ಸರ್ವೇಷಾಂ ಪಯಃ ಪ್ರಶಮನಂ ಪರಮ್| ಪೇಯಂ ತದುಷ್ಣಂ ಶೀತಂ ವಾ ಯಥಾಸ್ವಂ ಭೇಷಜೈಃ ಶೃತಮ್||೨೩೯||

Adhikarana 90 (240-249) · Śloka 249

ಪ್ರಯೋಜಯೇಜ್ಜ್ವರಹರಾನ್ನಿರೂಹಾನ್ ಸಾನುವಾಸನಾನ್| ಪಕ್ವಾಶಯಗತೇ ದೋಷೇ ವಕ್ಷ್ಯನ್ತೇ ಯೇ ಚ ಸಿದ್ಧಿಷು||೨೪೦|| ಪಟೋಲಾರಿಷ್ಟಪತ್ರಾಣಿ ಸೋಶೀರಶ್ಚತುರಙ್ಗುಲಃ| ಹ್ರೀಬೇರಂ ರೋಹಿಣೀ ತಿಕ್ತಾ ಶ್ವದಂಷ್ಟ್ರಾ ಮದನಾನಿ ಚ||೨೪೧|| ಸ್ಥಿರಾ ಬಲಾ ಚ ತತ್ ಸರ್ವಂ ಪಯಸ್ಯರ್ಧೋದಕೇ ಶೃತಮ್| ಕ್ಷೀರಾವಶೇಷಂ ನಿರ್ಯೂಹಂ ಸಂಯುಕ್ತಂ ಮಧುಸರ್ಪಿಷಾ||೨೪೨|| ಕಲ್ಕೈರ್ಮದನಮುಸ್ತಾನಾಂ ಪಿಪ್ಪಲ್ಯಾ ಮಧುಕಸ್ಯ ಚ| ವತ್ಸಕಸ್ಯ ಚ ಸಂಯುಕ್ತಂ ಬಸ್ತಿಂ ದದ್ಯಾಜ್ಜ್ವರಾಪಹಮ್||೨೪೩|| ಶುದ್ಧೇ ಮಾರ್ಗೇ ಹೃತೇ ದೋಷೇ ವಿಪ್ರಸನ್ನೇಷು ಧಾತುಷು| ಗತಾಙ್ಗಶೂಲೋ ಲಘ್ವಙ್ಗಃ ಸದ್ಯೋ ಭವತಿ ವಿಜ್ವರಃ||೨೪೪|| ಆರಗ್ವಧಮುಶೀರಂ ಚ ಮದನಸ್ಯ ಫಲಂ ತಥಾ| ಚತಸ್ರಃ ಪರ್ಣಿನೀಶ್ಚೈವ ನಿರ್ಯೂಹಮುಪಕಲ್ಪಯೇತ್||೨೪೫|| ಪ್ರಿಯಙ್ಗುರ್ಮದನಂ ಮುಸ್ತಂ ಶತಾಹ್ವಾ ಮಧುಯಷ್ಟಿಕಾ| ಕಲ್ಕಃ ಸರ್ಪಿರ್ಗುಡಃ ಕ್ಷೌದ್ರಂ ಜ್ವರಘ್ನೋ ಬಸ್ತಿರುತ್ತಮಃ||೨೪೬|| ಗುಡೂಚೀಂ ತ್ರಾಯಮಾಣಾಂ ಚ ಚನ್ದನಂ ಮಧುಕಂ ವೃಷಮ್| ಸ್ಥಿರಾಂ ಬಲಾಂ ಪೃಶ್ನಿಪರ್ಣೀಂ ಮದನಂ ಚೇತಿ ಸಾಧಯೇತ್||೨೪೭|| ರಸಂ ಜಾಙ್ಗಲಮಾಂಸಸ್ಯ ರಸೇನ ಸಹಿತಂ ಭಿಷಕ್| ಪಿಪ್ಪಲೀಫಲಮುಸ್ತಾನಾಂ ಕಲ್ಕೇನ ಮಧುಕಸ್ಯ ಚ||೨೪೮|| ಈಷತ್ಸಲವಣಂ ಯುಕ್ತ್ಯಾ ನಿರೂಹಂ ಮಧುಸರ್ಪಿಷಾ| ಜ್ವರಪ್ರಶಮನಂ ದದ್ಯಾದ್ಬಲಸ್ವೇದರುಚಿಪ್ರದಮ್||೨೪೯||

Adhikarana 91 (250-253) · Śloka 253

ಜೀವನ್ತೀಂ ಮಧುಕಂ ಮೇದಾಂ ಪಿಪ್ಪಲೀಂ ಮದನಂ ವಚಾಮ್| ಋದ್ಧಿಂ ರಾಸ್ನಾಂ ಬಲಾಂ ವಿಶ್ವಂ ಶತಪುಷ್ಪಾಂ ಶತಾವರೀಮ್||೨೫೦|| ಪಿಷ್ಟ್ವಾ ಕ್ಷೀರಂ ಜಲಂ ಸರ್ಪಿಸ್ತೈಲಂ ಚ ವಿಪಚೇದ್ಭಿಷಕ್| ಆನುವಾಸನಿಕಂ ಸ್ನೇಹಮೇತಂ ವಿದ್ಯಾಜ್ಜ್ವರಾಪಹಮ್||೨೫೧|| ಪಟೋಲಪಿಚುಮರ್ದಾಭ್ಯಾಂ ಗುಡೂಚ್ಯಾ ಮಧುಕೇನ ಚ| ಮದನೈಶ್ಚ ಶೃತಃ ಸ್ನೇಹೋ ಜ್ವರಘ್ನಮನುವಾಸನಮ್||೨೫೨|| ಚನ್ದನಾಗುರುಕಾಶ್ಮರ್ಯಪಟೋಲಮಧುಕೋತ್ಪಲೈಃ| ಸಿದ್ಧಃ ಸ್ನೇಹೋ ಜ್ವರಹರಃ ಸ್ನೇಹಬಸ್ತಿಃ ಪ್ರಶಸ್ಯತೇ||೨೫೩||

Adhikarana 92 (254-255) · Śloka 255

ಯದುಕ್ತಂ ಭೇಷಜಾಧ್ಯಾಯೇ ವಿಮಾನೇ ರೋಗಭೇಷಜೇ| ಶಿರೋವಿರೇಚನಂ ಕುರ್ಯಾದ್ಯುಕ್ತಿಜ್ಞಸ್ತಜ್ಜ್ವರಾಪಹಮ್||೨೫೪|| ಯಚ್ಚ ನಾವನಿಕಂ ತೈಲಂ ಯಾಶ್ಚ ತೈಲಂ ಯಾಶ್ಚ ಪ್ರಾಗ್ಧೂಮವರ್ತಯಃ| ಮಾತ್ರಾಶಿತೀಯೇ ನಿರ್ದಿಷ್ಟಾಃ ಪ್ರಯೋಜ್ಯಾಸ್ತಾ ಜ್ವರೇಷ್ವಪಿ||೨೫೫||

Adhikarana 93 (256) · Śloka 256

ಅಭ್ಯಙ್ಗಾಂಶ್ಚ ಪ್ರದೇಹಾಂಶ್ಚ ಪರಿಷೇಕಾಂಶ್ಚ ಕಾರಯೇತ್| ಯಥಾಭಿಲಾಷಂ ಶೀತೋಷ್ಣಂ ವಿಭಜ್ಯ ದ್ವಿವಿಧಂ ಜ್ವರಮ್||೨೫೬||

Adhikarana 94 (257) · Śloka 257

ಸಹಸ್ರಧೌತಂ ಸರ್ಪಿರ್ವಾ ತೈಲಂ ವಾ ಚನ್ದನಾದಿಕಮ್| ದಾಹಜ್ವರಪ್ರಶಮನಂ ದದ್ಯಾದಭ್ಯಞ್ಜನಂ ಭಿಷಕ್||೨೫೭||

Adhikarana 95 (258-259) · Śloka 259

ಅಥ ಚನ್ದನಾದ್ಯಂ ತೈಲಮುಪದೇಕ್ಷ್ಯಾಮಃ- ಚನ್ದನಭದ್ರಶ್ರೀಕಾಲಾನುಸಾರ್ಯಕಾಲೀಯಕಪದ್ಮಾಪದ್ಮಕೋಶೀರಸಾರಿವಾಮಧುಕಪ್ರಪೌಣ್ಡರೀಕನಾಗಪುಷ್ಪೋದೀಚ್ಯವನ್ಯಪದ್ಮೋತ್ಪಲನಲಿನಕುಮುದ- ಸೌಗನ್ಧಿಕಪುಣ್ಡರೀಕಶತಪತ್ರಬಿಸಮೃಣಾಲಶಾಲೂಕಶೈವಾಲಕಶೇರುಕಾನನ್ತಾಕುಶಕಾಶೇಕ್ಷುದರ್ಭಶರನಲಶಾಲಿಮೂಲಜಮ್ಬುವೇತಸವಾನೀರಗುನ್ದ್ರಾ- ಕಕುಭಾಸನಾಶ್ವಕರ್ಣಸ್ಯನ್ದನವಾತಪೋಥಶಾಲತಾಲಧವತಿನಿಶಖದಿರಕದರಕದಮ್ಬಕಾಶ್ಮರ್ಯಫಲಸರ್ಜಪ್ಲಕ್ಷವಟಕಪೀತನೋದುಮ್ಬರಾಶ್ವತ್ಥ- ನ್ಯಗ್ರೋಧಧಾತಕೀದೂರ್ವೇತ್ಕಟಶೃಙ್ಗಾಟಕಮಞ್ಜಿಷ್ಠಾಜ್ಯೋತಿಷ್ಮತೀಪುಷ್ಕರಬೀಜಕ್ರೌಞ್ಚಾದನಬದರೀಕೋವಿದಾರಕದಲೀ- ಸಂವರ್ತಕಾರಿಷ್ಟಶತಪರ್ವಾಶೀತಕುಮ್ಭಿಕಾಶತಾವರೀಶ್ರೀಪರ್ಣೀಶ್ರಾವಣೀಮಹಾಶ್ರಾವಣೀರೋಹಿಣೀಶೀತಪಾಕ್ಯೋದನಪಾಕೀಕಾಲಬಲಾಪಯಸ್ಯಾವಿದಾರೀ- ಜೀವಕರ್ಷಭಕಮೇದಾಮಹಾಮೇದಾಮಧುರಸರ್ಷ್ಯಪ್ರೋಕ್ತಾತೃಣಶೂನ್ಯಮೋಚರಸಾಟರೂಷಕಬಕುಲಕುಟಜಪಟೋಲನಿಮ್ಬಶಾಲ್ಮಲೀನಾರಿಕೇಲ- ಖರ್ಜೂರಮೃದ್ವೀಕಾಪ್ರಿಯಾಲಪ್ರಿಯಙ್ಗುಧನ್ವನಾತ್ಮಾಗುಪ್ತಾಮಧೂಕಾನಾಮನ್ಯೇಷಾಂ ಚ ಶೀತವೀರ್ಯಾಣಾಂ ಯಥಾಲಾಭಮೌಷಧಾನಾಂ ಕಷಾಯಂ ಕಾರಯೇತ್| ತೇನ ಕಷಾಯೇಣ ದ್ವಿಗುಣಿತಪಯಸಾ ತೇಷಾಮೇವ ಚ ಕಲ್ಕೇನ ಕಷಾಯಾರ್ಧಮಾತ್ರಂ ಮೃದ್ವಗ್ನಿನಾ ಸಾಧಯೇತ್ತೈಲಮ್| ಏತತ್ತೈಲಮಭ್ಯಙ್ಗಾತ್ ಸದ್ಯೋ ದಾಹಜ್ವರಮಪನಯತಿ| ಏತೈರೇವ ಚೌಷಧೈರಶ್ಲಕ್ಷ್ಣಪಿಷ್ಟೈಃ ಸುಶೀತೈಃ ಪ್ರದೇಹಂ ಕಾರಯೇತ್| ಏತೈರೇವ ಚ ಶೃತಶೀತಂ ಸಲಿಲಮವಗಾಹಪರಿಷೇಕಾರ್ಥಂ ಪ್ರಯುಞ್ಜೀತ||೨೫೮|| ಇತಿ ಚನ್ದನಾದ್ಯಂ ತೈಲಮ್| ಮಧ್ವಾರನಾಲಕ್ಷೀರದಧಿಘೃತಸಲಿಲಸೇಕಾವಗಾಹಾಶ್ಚ ಸದ್ಯೋ ದಾಹಜ್ವರಮಪನಯನ್ತಿ ಶೀತಸ್ಪರ್ಶತ್ವಾತ್||೨೫೯||

Adhikarana 96 (260-266) · Śloka 266

ಭವನ್ತಿ ಚಾತ್ರ- ಪೌಷ್ಕರೇಷು ಸುಶೀತೇಷು ಪದ್ಮೋತ್ಪಲದಲೇಷು ಚ| ಕದಲೀನಾಂ ಚ ಪತ್ರೇಷು ಕ್ಷೌಮೇಷು ವಿಮಲೇಷು ಚ||೨೬೦|| ಚನ್ದನೋದಕಶೀತೇಷು ಶೀತೇ ಧಾರಾಗೃಹೇಽಪಿ ವಾ| ಹಿಮಾಮ್ಬುಸಿಕ್ತೇ ಸದನೇ ದಾಹಾರ್ತಃ ಸಂವಿಶೇತ್ ಸುಖಮ್||೨೬೧|| ಹೇಮಶಙ್ಖಪ್ರವಾಲಾನಾಂ ಮಣೀನಾಂ ಮೌಕ್ತಿಕಸ್ಯ ಚ| ಚನ್ದನೋದಕಶೀತಾನಾಂ ಸಂಸ್ಪರ್ಶಾನುರಸಾನ್ ಸ್ಪೃಶೇತ್||೨೬೨|| ಸ್ರಗ್ಭಿರ್ನೀಲೋತ್ಪಲೈಃ ಪದ್ಮೈರ್ವ್ಯಜನೈರ್ವಿವಿಧೈರಪಿ| ಶೀತವಾತಾವಹೈರ್ವ್ಯಜ್ಜ್ಯೇಚ್ಚನ್ದನೋದಕವರ್ಷಿಭಿಃ ||೨೬೩|| ನದ್ಯಸ್ತಡಾಗಾಃ ಪದ್ಮಿನ್ಯೋ ಹ್ರದಾಶ್ಚ ವಿಮಲೋದಕಾಃ| ಅವಗಾಹೇ ಹಿತಾ ದಾಹತೃಷ್ಣಾಗ್ಲಾನಿಜ್ವರಾಪಹಾಃ||೨೬೪|| ಪ್ರಿಯಾಃ ಪ್ರದಕ್ಷಿಣಾಚಾರಾಃ ಪ್ರಮದಾಶ್ಚನ್ದನೋಕ್ಷಿತಾಃ| ಸಾನ್ತ್ವಯೇಯುಃ ಪರೈಃ ಕಾಮೈರ್ಮಣಿಮೌಕ್ತಿಕಭೂಷಣಾಃ||೨೬೫|| ಶೀತಾನಿ ಚಾನ್ನಪಾನಾನಿ ಶೀತಾನ್ಯುಪವನಾನಿ ಚ| ವಾಯವಶ್ಚನ್ದ್ರಪಾದಾಶ್ಚ ಶೀತಾ ದಾಹಜ್ವರಾಪಹಾಃ||೨೬೬||

Adhikarana 97 (267) · Śloka 267

ಅಥೋಷ್ಣಾಭಿಪ್ರಾಯಿಣಾಂ ಜ್ವರಿತಾನಾಮಭ್ಯಙ್ಗಾದೀನುಪಕ್ರಮಾನುಪದೇಕ್ಷ್ಯಾಮಃ- ಅಗುರುಕುಷ್ಠತಗರಪತ್ರನಲದಶೈಲೇಯಧ್ಯಾಮಕಹರೇಣುಕಾಸ್ಥೌಣೇಯಕಕ್ಷೇಮಕೈಲಾವರಾಙ್ಗದಲಪುರತಮಾಲಪತ್ರಭೂತೀಕರೋಹಿಷಸರಲಶಲ್ಲಕೀ- ದೇವದಾರ್ವಗ್ನಿಮನ್ಥಬಿಲ್ವಸ್ಯೋನಾಕಕಾಶ್ಮರ್ಯಪಾಟಲಾಪುನರ್ನವಾವೃಶ್ಚೀರಕಣ್ಟಕಾರೀಬೃಹತೀಶಾಲಪರ್ಣೀಪೃಶ್ನಿಪರ್ಣೀಮಾಷಪರ್ಣೀಮುದ್ಗಪರ್ಣೀಗೋಕ್ಷುರಕೈರಣ್ಡ- ಶೋಭಾಞ್ಜನಕವರುಣಾರ್ಕಚಿರಬಿಲ್ವತಿಲ್ವಕಶಟೀಪುಷ್ಕರಮೂಲಗಣ್ಡೀರೋರುಬೂಕಪತ್ತೂರಾಕ್ಷೀವಾಶ್ಮಾನ್ತಕಶಿಗ್ರುಮಾತುಲುಙ್ಗಪೀಲುಕಮೂಲಕಪರ್ಣೀ- ತಿಲಪರ್ಣೀಪೀಲುಪರ್ಣೀಮೇಷಶೃಙ್ಗೀಹಿಂಸ್ರಾದನ್ತಶಠೈರಾವತಕಭಲ್ಲಾತಕಾಸ್ಫೋತಕಾಣ್ಡೀರಾತ್ಮಜೈಕೇಷೀಕಾಕರಞ್ಜಧಾನ್ಯಕಾಜಮೋದ- ಪೃಥ್ವೀಕಾಸುಮುಖಸುರಸಕುಠೇರಕಕಾಲಮಾಲಕಪರ್ಣಾಸಕ್ಷವಕಫಣಿಜ್ಝಕಭೂಸ್ತೃಣಶೃಙ್ಗವೇರಪಿಪ್ಪಲೀಸರ್ಷಪಾಶ್ವಗನ್ಧಾರಾಸ್ನಾರುಹಾರೋಹಾವಚಾಬಲಾತಿಬಲಾ- ಗುಡೂಚೀಶತಪುಷ್ಪಾಶೀತವಲ್ಲೀನಾಕುಲೀಗನ್ಧನಾಕುಲೀಶ್ವೇತಾಜ್ಯೋತಿಷ್ಮತೀಚಿತ್ರಕಾಧ್ಯಣ್ಡಾಮ್ಲಚಾಙ್ಗೇರೀ- ತಿಲಬದರಕುಲತ್ಥಮಾಷಾಣಾಮೇವಂವಿಧಾನಾಮನ್ಯೇಷಾಂ ಚೋಷ್ಣವೀರ್ಯಾಣಾಂ ಯಥಾಲಾಭಮೌಷಧಾನಾಂ ಕಷಾಯಂ ಕಾರಯೇತ್, ತೇನ ಕಷಾಯೇಣ ತೇಷಾಮೇವ ಚ ಕಲ್ಕೇನ ಸುರಾಸೌವೀರಕತುಷೋದಕಮೈರೇಯಮೇದಕದಧಿಮಣ್ಡಾರನಾಲಕಟ್ವರಪ್ರತಿವಿನೀತೇನ ತೈಲಪಾತ್ರಂ ವಿಪಾಚಯೇತ್| ತೇನ ಸುಖೋಷ್ಣೇನ ತೈಲೇನೋಷ್ಣಾಭಿಪ್ರಾಯಿಣಂ ಜ್ವರಿತಮಭ್ಯಞ್ಜ್ಯಾತ್, ತಥಾ ಶೀತಜ್ವರಃ ಪ್ರಶಾಮ್ಯತಿ; ಏತೈರೇವ ಚೌಷಧೈಃ ಶ್ಲಕ್ಷ್ಣಪಿಷ್ಟೈಃ ಸುಖೋಷ್ಣೈಃ ಪ್ರದೇಹಂ ಕಾರಯೇತ್, ಏತೈರೇವ ಚ ಶೃತಂ ಸುಖೋಷ್ಣಂ ಸಲಿಲಮವಗಾಹನಾರ್ಥಂ ಪರಿಷೇಕಾರ್ಥಂ ಚ ಪ್ರಯುಞ್ಜೀತ ಶೀತಜ್ವರಪ್ರಶಮಾರ್ಥಮ್||೨೬೭|| ಇತ್ಯಗುರ್ವಾದ್ಯಂ ತೈಲಮ್|

Adhikarana 98 (268-271) · Śloka 271

ಭವನ್ತಿ ಚಾತ್ರ- ತ್ರಯೋದಶವಿಧಃ ಸ್ವೇದಃ ಸ್ವೇದಾಧ್ಯಾಯೇ ನಿದರ್ಶಿತಃ| ಮಾತ್ರಾಕಾಲವಿದಾ ಯುಕ್ತಃ ಸ ಚ ಶೀತಜ್ವರಾಪಹಃ||೨೬೮|| ಸಾ ಕುಟೀ ತಚ್ಚ ಶಯನಂ ತಚ್ಚಾವಚ್ಛಾದನಂ ಜ್ವರಮ್| ಶೀತಂ ಪ್ರಶಮಯನ್ತ್ಯಾಶು ಧೂಪಾಶ್ಚಾಗುರುಜಾ ಘನಾಃ||೨೬೯|| ಚಾರೂಪಚಿತಗಾತ್ರ್ಯಶ್ಚ ತರುಣ್ಯೋ ಯೌವನೋಷ್ಮಣಾ| ಆಶ್ಲೇಷಾಚ್ಛಮಯನ್ತ್ಯಾಶು ಪ್ರಮದಾಃ ಶಿಶಿರಜ್ವರಮ್||೨೭೦|| ಸ್ವೇದನಾನ್ಯನ್ನಪಾನಾನಿ ವಾತಶ್ಲೇಷ್ಮಹರಾಣಿ ಚ| ಶೀತಜ್ವರಂ ಜಯನ್ತ್ಯಾಶು ಸಂಸರ್ಗಬಲಯೋಜನಾತ್||೨೭೧||

Adhikarana 99 (272-282) · Śloka 283

ವಾತಜೇ ಶ್ರಮಜೇ ಚೈವ ಪುರಾಣೇ ಕ್ಷತಜೇ ಜ್ವರೇ| ಲಙ್ಘನಂ ನ ಹಿತಂ ವಿದ್ಯಾಚ್ಛಮನೈಸ್ತಾನುಪಾಚರೇತ್||೨೭೨|| ವಿಕ್ಷಿಪ್ಯಾಮಾಶಯೋಷ್ಮಾಣಂ ಯಸ್ಮಾದ್ಗತ್ವಾ ರಸಂ ನೃಣಾಮ್| ಜ್ವರಂ ಕುರ್ವನ್ತಿ ದೋಷಾಸ್ತು ಹೀಯತೇಽಗ್ನಿಬಲಂ ತತಃ||೨೭೩|| ಯಥಾ ಪ್ರಜ್ವಲಿತೋ ವಹ್ನಿಃ ಸ್ಥಾಲ್ಯಾಮಿನ್ಧನವಾನಪಿ| ನ ಪಚತ್ಯೋದನಂ ಸಮ್ಯಗನಿಲಪ್ರೇರಿತೋ ಬಹಿಃ||೨೭೪|| ಪಕ್ತಿಸ್ಥಾನಾತ್ತಥಾ ದೋಷೈರೂಷ್ಮಾ ಕ್ಷಿಪ್ತೋ ಬಹಿರ್ನೃಣಾಮ್| ನ ಪಚತ್ಯಭ್ಯವಹೃತಂ ಕೃಚ್ಛ್ರಾತ್ ಪಚತಿ ವಾ ಲಘು||೨೭೫|| ಅತೋಽಗ್ನಿಬಲರಕ್ಷಾರ್ಥಂ ಲಙ್ಘನಾದಿಕ್ರಮೋ ಹಿತಃ| ಸಪ್ತಾಹೇನ ಹಿ ಪಚ್ಯನ್ತೇ ಸಪ್ತಧಾತುಗತಾ ಮಲಾಃ||೨೭೬|| ನಿರಾಮಶ್ಚಾಪ್ಯತಃ ಪ್ರೋಕ್ತೋ ಜ್ವರಃ ಪ್ರಾಯೋಽಷ್ಟಮೇಽಹನಿ| ಉದೀರ್ಣದೋಷಸ್ತ್ವಲ್ಪಾಗ್ನಿರಶ್ನನ್ ಗುರು ವಿಶೇಷತಃ||೨೭೭|| ಮುಚ್ಯತೇ ಸಹಸಾ ಪ್ರಾಣೈಶ್ಚಿರಂ ಕ್ಲಿಶ್ಯತಿ ವಾ ನರಃ| ಏತಸ್ಮಾತ್ಕಾರಣಾದ್ವಿದ್ವಾನ್ ವಾತಿಕೇಽಪ್ಯಾದಿತೋ ಜ್ವರೇ||೨೭೮|| ನಾತಿ ಗುರ್ವತಿ ವಾ ಸ್ನಿಗ್ಧಂ ಭೋಜಯೇತ್ ಸಹಸಾ ನರಮ್| ಜ್ವರೇ ಮಾರುತಜೇ ತ್ವಾದಾವನಪೇಕ್ಷ್ಯಾಪಿ ಹಿ ಕ್ರಮಮ್||೨೭೯|| ಕುರ್ಯಾನ್ನಿರನುಬನ್ಧಾನಾಮಭ್ಯಙ್ಗಾದೀನುಪಕ್ರಮಾನ್| ಪಾಯಯಿತ್ವಾ ಕಷಾಯಂ ಚ ಭೋಜಯೇದ್ರಸಭೋಜನಮ್||೨೮೦|| ಜೀರ್ಣಜ್ವರಹರಂ ಕುರ್ಯಾತ್ ಸರ್ವಶಶ್ಚಾಪ್ಯುಪಕ್ರಮಮ್| ಶ್ಲೇಷ್ಮಲಾನಾಮವಾತಾನಾಂ ಜ್ವರೋಽನುಷ್ಣಃ ಕಫಾಧಿಕಃ||೨೮೧|| ಪರಿಪಾಕಂ ನ ಸಪ್ತಾಹೇನಾಪಿ ಯಾತಿ ಮೃದೂಷ್ಮಣಾಮ್| ತಂ ಕ್ರಮೇಣ ಯಥೋಕ್ತೇನ ಲಙ್ಘನಾಲ್ಪಾಶನಾದಿನಾ||೨೮೨|| ಆದಶಾಹಮುಪಕ್ರಮ್ಯ ಕಷಾಯಾದ್ಯೈರುಪಾಚರೇತ್|೨೮೩|

Adhikarana 100 (283) · Śloka 284

ಸಾಮಾ ಯೇ ಯೇ ಚ ಕಫಜಾಃ ಕಫಪಿತ್ತಜ್ವರಾಶ್ಚ ಯೇ||೨೮೩|| ಲಙ್ಘನಂ ಲಙ್ಘನೀಯೋಕ್ತಂ ತೇಷು ಕಾರ್ಯಂ ಪ್ರತಿ ಪ್ರತಿ|೨೮೪|

Adhikarana 101 (284) · Śloka 285

ವಮನೈಶ್ಚ ವಿರೇಕೈಶ್ಚ ಬಸ್ತಿಭಿಶ್ಚ ಯಥಾಕ್ರಮಮ್||೨೮೪|| ಜ್ವರಾನುಪಚರೇದ್ಧೀಮಾನ್ ಕಫಪಿತ್ತಾನಿಲೋದ್ಭವಾನ್|೨೮೫|

Adhikarana 102 (285-286) · Śloka 287

ಸಂಸೃಷ್ಟಾನ್ ಸನ್ನಿಪತಿತಾನ್ ಬುದ್ಧ್ವಾ ತರತಮೈಃ ಸಮೈಃ||೨೮೫|| ಜ್ವರಾನ್ ದೋಷಕ್ರಮಾಪೇಕ್ಷೀ ಯಥೋಕ್ತೈರೌಷಧೈರ್ಜಯೇತ್| ವರ್ಧನೇನೈಕದೋಷಸ್ಯ ಕ್ಷಪಣೇನೋಚ್ಛ್ರಿತಸ್ಯ ವಾ||೨೮೬|| ಕಫಸ್ಥಾನಾನುಪೂರ್ವ್ಯಾ ವಾ ಸನ್ನಿಪಾತಜ್ವರಂ ಜಯೇತ್|೨೮೭|

Adhikarana 103 (287-288) · Śloka 289

ಸನ್ನಿಪಾತಜ್ವರಸ್ಯಾನ್ತೇ ಕರ್ಣಮೂಲೇ ಸುದಾರೂಣಃ||೨೮೭|| ಶೋಥಃ ಸಞ್ಜಾಯತೇ ತೇನ ಕಶ್ಚಿದೇವ ಪ್ರಮುಚ್ಯತೇ| ರಕ್ತಾವಸೇಚನೈಃ ಶೀಘ್ರಂ ಸರ್ಪಿಷ್ಪಾನೈಶ್ಚ ತಂ ಜಯೇತ್||೨೮೮|| ಪ್ರದೇಹೈಃ ಕಫಪಿತ್ತಘ್ನೈರ್ನಾವನೈಃ ಕವಲಗ್ರಹೈಃ|೨೮೯|

Adhikarana 104 (289) · Śloka 290

ಶೀತೋಷ್ಣಸ್ನಿಗ್ಧರೂಕ್ಷಾದ್ಯೈರ್ಜ್ವರೋ ಯಸ್ಯ ನ ಶಾಮ್ಯತಿ||೨೮೯|| ಶಾಖಾನುಸಾರೀ ರಕ್ತಸ್ಯ ಸೋಽವಸೇಕಾತ್ ಪ್ರಶಾಮ್ಯತಿ|೨೯೦|

Adhikarana 105 (290) · Śloka 291

ವಿಸರ್ಪೇಣಾಭಿಘಾತೇನ ಯಶ್ಚ ವಿಸ್ಫೋಟಕೈರ್ಜ್ವರಃ||೨೯೦|| ತತ್ರಾದೌ ಸರ್ಪಿಷಃ ಪಾನಂ ಕಫಪಿತ್ತೋತ್ತರೋ ನ ಚೇತ್|೨೯೧|

Adhikarana 106 (291) · Śloka 292

ದೌರ್ಬಲ್ಯಾದ್ದೇಹಧಾತೂನಾಂ ಜ್ವರೋ ಜೀರ್ಣೋಽನುವರ್ತತೇ||೨೯೧|| ಬಲ್ಯೇಃ ಸಮ್ಬೃಂಹಣೈಸ್ತಸ್ಮಾದಾಹಾರೈಸ್ತಮುಪಾಚರೇತ್|೨೯೨|

Adhikarana 107 (292-295) · Śloka 296

ಕರ್ಮ ಸಾಧಾರಣಂ ಜಹ್ಯಾತ್ತೃತೀಯಕಚತುರ್ಥಕೌ ||೨೯೨|| ಆಗನ್ತುರನುಬನ್ಧೋ ಹಿ ಪ್ರಾಯಶೋ ವಿಷಮಜ್ವರೇ| ವಾತಪ್ರಧಾನಂ ಸರ್ಪಿರ್ಭಿರ್ಬಸ್ತಿಭಿಃ ಸಾನುವಾಸನೈಃ||೨೯೩|| ಸ್ನಿಗ್ಧೋಷ್ಣೈರನ್ನಪಾನೈಶ್ಚ ಶಮಯೇದ್ವಿಷಮಜ್ವರಮ್| ವಿರೇಚನೇನ ಪಯಸಾ ಸರ್ಪಿಷಾ ಸಂಸ್ಕೃತೇನ ಚ||೨೯೪|| ವಿಷಮಂ ತಿಕ್ತಶೀತೈಶ್ಚ ಜ್ವರಂ ಪಿತ್ತೋತ್ತರಂ ಜಯೇತ್| ವಮನಂ ಪಾಚನಂ ರೂಕ್ಷಮನ್ನಪಾನಂ ವಿಲಙ್ಘನಮ್||೨೯೫|| ಕಷಾಯೋಷ್ಣಂ ಚ ವಿಷಮೇ ಜ್ವರೇ ಶಸ್ತಂ ಕಫೋತ್ತರೇ|೨೯೬|

Adhikarana 108 (296-309) · Śloka 310

ಯೋಗಾಃ ಪರಾಃ ಪ್ರವಕ್ಷ್ಯನ್ತೇ ವಿಷಮಜ್ವರನಾಶನಾಃ||೨೯೬|| ಪ್ರಯೋಕ್ತವ್ಯಾ ಮತಿಮತಾ ದೋಷಾದೀನ್ ಪ್ರವಿಭಜ್ಯ ತೇ| ಸುರಾ ಸಮಣ್ಡಾ ಪಾನಾರ್ಥೇ ಭಕ್ಷ್ಯಾರ್ಥೇ ಚರಣಾಯುಧಃ||೨೯೭|| ತಿತ್ತಿರಿಶ್ಚ ಮಯೂರಶ್ಚ ಪ್ರಯೋಜ್ಯಾ ವಿಷಮಜ್ವರೇ| ಪಿಬೇದ್ವಾ ಷಟ್ಪಲಂ ಸರ್ಪಿರಭಯಾಂ ವಾ ಪ್ರಯೋಜಯೇತ್||೨೯೮|| ತ್ರಿಫಲಾಯಾಃ ಕಷಾಯಂ ವಾ ಗುಡೂಚ್ಯಾ ರಸಮೇವ ವಾ| ನೀಲಿನೀಮಜಗನ್ಧಾಂ ಚ ತ್ರಿವೃತಾಂ ಕಟುರೋಹಿಣೀಮ್||೨೯೯|| ಪಿಬೇಜ್ಜ್ವರಾಗಮೇ ಯುಕ್ತ್ಯಾ ಸ್ನೇಹಸ್ವೇದೋಪಪಾದಿತಃ| ಸರ್ಪಿಷೋ ಮಹತೀಂ ಮಾತ್ರಾಂ ಪೀತ್ವಾ ವಾ ಛರ್ದಯೇತ್ ಪುನಃ||೩೦೦|| ಉಪಯುಜ್ಯಾನ್ನಪಾನಂ ವಾ ಪ್ರಭೂತಂ ಪುನರುಲ್ಲಿಖೇತ್| ಸಾನ್ನಂ ಮದ್ಯಂ ಪ್ರಭೂತಂ ವಾ ಪೀತ್ವಾ ಸ್ವಪ್ಯಾಜ್ಜ್ವರಾಗಮೇ||೩೦೧|| ಆಸ್ಥಾಪನಂ ಯಾಪನಂ ವಾ ಕಾರಯೇದ್ವಿಷಮಜ್ವರೇ| ಪಯಸಾ ವೃಷದಂಶಸ್ಯ ಶಕೃದ್ವಾ ತದಹಃ ಪಿಬೇತ್||೩೦೨|| ವೃಷಸ್ಯ ದಧಿಮಣ್ಡೇನ ಸುರಯಾ ವಾ ಸಸೈನ್ಧವಮ್| ಪಿಪ್ಪಲ್ಯಾಸ್ತ್ರಿಫಲಾಯಾಶ್ಚ ದಧ್ನಸ್ತಕ್ರಸ್ಯ ಸರ್ಪಿಷಃ||೩೦೩|| ಪಞ್ಚಗವ್ಯಸ್ಯ ಪಯಸಃ ಪ್ರಯೋಗೋ ವಿಷಮಜ್ವರೇ| ರಸೋನಸ್ಯ ಸತೈಲಸ್ಯ ಪ್ರಾಗ್ಭಕ್ತಮುಪಸೇವನಮ್||೩೦೪|| ಮೇದ್ಯಾನಾಮುಷ್ಣವೀರ್ಯಾಣಾಮಾಮಿಷಾಣಾಂ ಚ ಭಕ್ಷಣಮ್| ಹಿಙ್ಗುತುಲ್ಯಾ ತು ವೈಯಾಘ್ರೀ ವಸಾ ನಸ್ಯಂ ಸಸೈನ್ಧವಾ||೩೦೫|| ಪುರಾಣಸರ್ಪಿಃ ಸಿಂಹಸ್ಯ ವಸಾ ತದ್ವತ್ ಸಸೈನ್ಧವಾ| ಸೈನ್ಧವಂ ಪಿಪ್ಪಲೀನಾಂ ಚ ತಣ್ಡುಲಾಃ ಸಮನಃಶಿಲಾಃ||೩೦೬|| ನೇತ್ರಾಞ್ಜನಂ ತೈಲಪಿಷ್ಟಂ ಶಸ್ಯತೇ ವಿಷಮಜ್ವರೇ| ಪಲಙ್ಕಷಾ ನಿಮ್ಬಪತ್ರಂ ವಚಾ ಕುಷ್ಠಂ ಹರೀತಕೀ||೩೦೭|| ಸರ್ಷಪಾಃ ಸಯವಾಃ ಸರ್ಪಿರ್ಧೂಪನಂ ಜ್ವರನಾಶನಮ್| ಯೇ ಧೂಮಾ ಧೂಪನಂ ಯಚ್ಚ ನಾವನಂ ಚಾಞ್ಜನಂ ಚ ಯತ್||೩೦೮|| ಮನೋವಿಕಾರೇ ನಿರ್ದಿಷ್ಟಂ ಕಾರ್ಯಂ ತದ್ವಿಷಮಜ್ವರೇ| ಮಣೀನಾಮೋಷಧೀನಾಂ ಚ ಮಙ್ಗಲ್ಯಾನಾಂ ವಿಷಸ್ಯ ಚ||೩೦೯|| ಧಾರಣಾದಗದಾನಾಂ ಚ ಸೇವನಾನ್ನ ಭವೇಜ್ಜ್ವರಃ|೩೧೦|

Adhikarana 109 (309-316) · Śloka 317

ಸೋಮಂ ಸಾನುಚರಂ ದೇವಂ ಸಮಾತೃಗಣಮೀಶ್ವರಮ್||೩೧೦|| ಪೂಜಯನ್ ಪ್ರಯತಃ ಶೀಘ್ರಂ ಮುಚ್ಯತೇ ವಿಷಮಜ್ವರಾತ್| ವಿಷ್ಣುಂ ಸಹಸ್ರಮೂರ್ಧಾನಂ ಚರಾಚರಪತಿಂ ವಿಭುಮ್||೩೧೧|| ಸ್ತುವನ್ನಾಮಸಹಸ್ರೇಣ ಜ್ವರಾನ್ ಸರ್ವಾನಪೋಹತಿ| ಬ್ರಹ್ಮಾಣಮಶ್ವಿನಾವಿನ್ದ್ರಂ ಹುತಭಕ್ಷಂ ಹಿಮಾಚಲಮ್||೩೧೨|| ಗಙ್ಗಾಂ ಮರುದ್ಗಣಾಂಶ್ಚೇಷ್ಟ್ಯಾ ಪೂಜಯಞ್ಜಯತಿ ಜ್ವರಾನ್| ಭಕ್ತ್ಯಾ ಮಾತುಃ ಪಿತುಶ್ಚೈವ ಗುರೂಣಾಂ ಪೂಜನೇನ ಚ||೩೧೩|| ಬ್ರಹ್ಮಚರ್ಯೇಣ ತಪಸಾ ಸತ್ಯೇನ ನಿಯಮೇನ ಚ| ಜಪಹೋಮಪ್ರದಾನೇನ ವೇದಾನಾಂ ಶ್ರವಣೇನ ಚ||೩೧೪|| ಜ್ವರಾದ್ವಿಮುಚ್ಯತೇ ಶೀಘ್ರಂ ಸಾಧೂನಾಂ ದರ್ಶನೇನ ಚ| ಜ್ವರೇ ರಸಸ್ಥೇ ವಮನಮುಪವಾಸಂ ಚ ಕಾರಯೇತ್||೩೧೫|| ಸೇಕಪ್ರದೇಹೌ ರಕ್ತಸ್ಥೇ ತಥಾ ಸಂಶಮನಾನಿ ಚ| ವಿರೇಚನಂ ಸೋಪವಾಸಂ ಮಾಂಸಮೇದಃಸ್ಥಿತೇ ಹಿತಮ್||೩೧೬|| ಅಸ್ಥಿಮಜ್ಜಗತೇ ದೇಯಾ ನಿರೂಹಾಃ ಸಾನುವಾಸನಾಃ|೩೧೭|

Adhikarana 110 (317-322) · Śloka 323

ಶಾಪಾಭಿಚಾರಾದ್ಭೂತಾನಾಮಭಿಷಙ್ಗಾಚ್ಚ ಯೋ ಜ್ವರಃ||೩೧೭|| ದೈವವ್ಯಪಾಶ್ರಯಂ ತತ್ರ ಸರ್ವಮೌಷಧಮಿಷ್ಯತೇ| ಅಭಿಘಾತಜ್ವರೋ ನಶ್ಯೇತ್ ಪಾನಾಭ್ಯಙ್ಗೇನ ಸರ್ಪಿಷಃ||೩೧೮|| ರಕ್ತಾವಸೇಕೈರ್ಮದ್ಯೈಶ್ಚ ಸಾತ್ಮ್ಯೈರ್ಮಾಂಸರಸೌದನೈಃ| ಸಾನಾಹೋ ಮದ್ಯಸಾತ್ಮ್ಯಾನಾಂ ಮದಿರಾರಸಭೋಜನೈಃ||೩೧೯|| ಕ್ಷತಾನಾಂ ವ್ರಣಿತಾನಾಂ ಚ ಕ್ಷತವ್ರಣಚಿಕಿತ್ಸಯಾ| ಆಶ್ವಾಸೇನೇಷ್ಟಲಾಭೇನ ವಾಯೋಃ ಪ್ರಶಮನೇನ ಚ||೩೨೦|| ಹರ್ಷಣೈಶ್ಚ ಶಮಂ ಯಾನ್ತಿ ಕಾಮಶೋಕಭಯಜ್ವರಾಃ| ಕಾಮ್ಯೈರರ್ಥೈರ್ಮನೋಜ್ಞೈಶ್ಚ ಪಿತ್ತಘ್ನೈಶ್ಚಾಪ್ಯುಪಕ್ರಮೈಃ||೩೨೧|| ಸದ್ವಾಕ್ಯೈಶ್ಚ ಶಮಂ ಯಾತಿ ಜ್ವರಃ ಕ್ರೋಧಸಮುತ್ಥಿತಃ| ಕಾಮಾತ್ ಕ್ರೋಧಜ್ವರೋ ನಾಶಂ ಕ್ರೋಧಾತ್ ಕಾಮಸಮುದ್ಭವಃ||೩೨೨|| ಯಾತಿ ತಾಭ್ಯಾಮುಭಾಭ್ಯಾಂ ಚ ಭಯಶೋಕಸಮುತ್ಥಿತಃ|೩೨೩|

Adhikarana 111 (323) · Śloka 324

ಜ್ವರಸ್ಯ ವೇಗಂ ಕಾಲಂ ಚ ಚಿನ್ತಯಞ್ಜ್ವರ್ಯತೇ ತು ಯಃ||೩೨೩|| ತಸ್ಯೇಷ್ಟೈಸ್ತು ವಿಚಿತ್ರೈಶ್ಚ ವಿಷಯೈರ್ನಾಶಯೇತ್ ಸ್ಮೃತಿಮ್|೩೨೪|

Adhikarana 112 (324-328) · Śloka 328

ಜ್ವರಪ್ರಮೋಕ್ಷೇ ಪುರುಷಃ ಕೂಜನ್ ವಮತಿ ಚೇಷ್ಟತೇ| ಶ್ವಸನ್ವಿವರ್ಣಃ ಸ್ವಿನ್ನಾಙ್ಗೋ ವೇಪತೇ ಲೀಯತೇ ಮುಹುಃ||೩೨೪|| ಪ್ರಲಪತ್ಯುಷ್ಣಸರ್ವಾಙ್ಗಃ ಶೀತಾಙ್ಗಶ್ಚ ಭವತ್ಯಪಿ| ವಿಸಞ್ಜ್ಞೋ ಜ್ವರವೇಗಾರ್ತಃ ಸಕ್ರೋಧ ಇವ ವೀಕ್ಷ್ಯತೇ ||೩೨೫|| ಸದೋಷಶಬ್ದಂ ಚ ಶಕೃದ್ದ್ರವಂ ಸ್ರವತಿ ವೇಗವತ್| ಲಿಙ್ಗಾನ್ಯೇತಾನಿ ಜಾನೀಯಾಜ್ಜ್ವರಮೋಕ್ಷೇ ವಿಚಕ್ಷಣಃ||೩೨೬|| ಬಹುದೋಷಸ್ಯ ಬಲವಾನ್ ಪ್ರಾಯೇಣಾಭಿನವೋ ಜ್ವರಃ| ಸತ್ಕ್ರಿಯಾದೋಷಪಕ್ತ್ಯಾ ಚೇದ್ವಿಮುಞ್ಚತಿ ಸುದಾರುಣಮ್||೩೨೭|| ಕೃತ್ವಾ ದೋಷವಶಾದ್ವೇಗಂ ಕ್ರಮಾದುಪರಮನ್ತಿ ಯೇ| ತೇಷಾಮದಾರುಣೋ ಮೋಕ್ಷೋ ಜ್ವರಾಣಾಂ ಚಿರಕಾರಿಣಾಮ್||೩೨೮||

Adhikarana 113 (329) · Śloka 329

ವಿಗತಕ್ಲಮಸನ್ತಾಪಮವ್ಯಥಂ ವಿಮಲೇನ್ದ್ರಿಯಮ್| ಯುಕ್ತಂ ಪ್ರಕೃತಿಸತ್ತ್ವೇನ ವಿದ್ಯಾತ್ ಪುರುಷಮಜ್ವರಮ್||೩೨೯||

Adhikarana 114 (330-332) · Śloka 332

ಸಜ್ವರೋ ಜ್ವರಮುಕ್ತಶ್ಚ ವಿದಾಹೀನಿ ಗುರೂಣಿ ಚ| ಅಸಾತ್ಮ್ಯಾನ್ಯನ್ನಪಾನಾನಿ ವಿರುದ್ಧಾನಿ ಚ ವರ್ಜಯೇತ್||೩೩೦|| ವ್ಯವಾಯಮತಿಚೇಷ್ಟಾಶ್ಚ ಸ್ನಾನಮತ್ಯಶನಾನಿ ಚ| ತಥಾ ಜ್ವರಃ ಶಮಂ ಯಾತಿ ಪ್ರಶಾನ್ತೋ ಜಾಯತೇ ನ ಚ||೩೩೧|| ವ್ಯಾಯಾಮಂ ಚ ವ್ಯವಾಯಂ ಚ ಸ್ನಾನಂ ಚಙ್ಕ್ರಮಣಾನಿ ಚ| ಜ್ವರಮುಕ್ತೋ ನ ಸೇವೇತ ಯಾವನ್ನ ಬಲವಾನ್ ಭವೇತ್||೩೩೨||

Adhikarana 115 (333-343) · Śloka 343

ಅಸಞ್ಜಾತಬಲೋ ಯಸ್ತು ಜ್ವರಮುಕ್ತೋ ನಿಷೇವತೇ| ವರ್ಜ್ಯಮೇತನ್ನರಸ್ತಸ್ಯ ಪುನರಾವರ್ತತೇ ಜ್ವರಃ||೩೩೩|| ದುರ್ಹೃತೇಷು ಚ ದೋಷೇಷು ಯಸ್ಯ ವಾ ವಿನಿವರ್ತತೇ| ಸ್ವಲ್ಪೇನಪ್ಯಪಚಾರೇಣ ತಸ್ಯ ವ್ಯಾವರ್ತತೇ ಪುನಃ||೩೩೪|| ಚಿರಕಾಲಪರಿಕ್ಲಿಷ್ಟಂ ದುರ್ಬಲಂ ಹೀನತೇಜಸಮ್ | ಅಚಿರೇಣೈವ ಕಾಲೇನ ಸ ಹನ್ತಿ ಪುನರಾಗತಃ||೩೩೫|| ಅಥವಾಽಪಿ ಪರೀಪಾಕಂ ಧಾತುಷ್ವೇವ ಕ್ರಮಾನ್ಮಲಾಃ| ಯಾನ್ತಿ ಜ್ವರಮಕುರ್ವನ್ತಸ್ತೇ ತಥಾಽಪ್ಯಪಕುರ್ವತೇ||೩೩೬|| ದೀನತಾಂ ಶ್ವಯಥುಂ ಗ್ಲಾನಿಂ ಪಾಣ್ಡುತಾಂ ನಾನ್ನಕಾಮತಾಮ್| ಕಣ್ಡೂರುಕ್ತೋಠಪಿಡಕಾಃ ಕುರ್ವನ್ತ್ಯಗ್ನಿಂ ಚ ತೇ ಮೃದುಮ್||೩೩೭|| ಏವಮನ್ಯೇಽಪಿ ಚ ಗದಾ ವ್ಯಾವರ್ತನ್ತೇ ಪುನರ್ಗತಾಃ| ಅನಿರ್ಘಾತೇನ ದೋಷಾಣಾಮಲ್ಪೈರಪ್ಯಹಿತೈರ್ನೃಣಾಮ್||೩೩೮|| ನಿರ್ವೃತ್ತೇಽಪಿ ಜ್ವರೇ ತಸ್ಮಾದ್ಯಥಾವಸ್ಥಂ ಯಥಾಬಲಮ್| ಯಥಾಪ್ರಾಣಂ ಹರೇದ್ದೋಷಂ ಪ್ರಯೋಗೈರ್ವಾ ಶಮಂ ನಯೇತ್||೩೩೯|| ಮೃದುಭಿಃ ಶೋಧನೈಃ ಶುದ್ಧಿರ್ಯಾಪನಾ ಬಸ್ತಯೋ ಹಿತಾಃ| ಹಿತಾಶ್ಚ ಲಘವೋ ಯೂಷಾ ಜಾಙ್ಗಲಾಮಿಷಜಾ ರಸಾಃ||೩೪೦|| ಅಭ್ಯಙ್ಗೋದ್ವರ್ತನಸ್ನಾನಧೂಪನಾನ್ಯಞ್ಜನಾನಿ ಚ| ಹಿತಾನಿ ಪುನರಾವೃತ್ತೇ ಜ್ವರೇ ತಿಕ್ತಘೃತಾನಿ ಚ||೩೪೧|| ಗುರ್ವ್ಯಭಿಷ್ಯನ್ದ್ಯಸಾತ್ಮ್ಯಾನಾಂ ಭೋಜನಾತ್ ಪುನರಾಗತೇ| ಲಙ್ಘನೋಷ್ಣೋಪಚಾರಾದಿಃ ಕ್ರಮಃ ಕಾರ್ಯಶ್ಚ ಪೂರ್ವವತ್||೩೪೨|| ಕಿರಾತತಿಕ್ತಕಂ ತಿಕ್ತಾ ಮುಸ್ತಂ ಪರ್ಪಟಕೋಽಮೃತಾ| ಘ್ನನ್ತಿ ಪೀತಾನಿ ಚಾಭ್ಯಾಸಾತ್ ಪುನರಾವರ್ತಕಂ ಜ್ವರಮ್||೩೪೩||

Adhikarana 116 (344) · Śloka 344

ತಸ್ಯಾಂ ತಸ್ಯಾಮವಸ್ಥಾಯಾಂ ಜ್ವರಿತಾನಾಂ ವಿಚಕ್ಷಣಃ| ಜ್ವರಾಕ್ರಿಯಾಕ್ರಮಾಪೇಕ್ಷೀ ಕುರ್ಯಾತ್ತತ್ತಚ್ಚಿಕಿತ್ಸಿತಮ್||೩೪೪||

Adhikarana 117 (345) · Śloka 345

ರೋಗರಾಟ್ ಸರ್ವಭೂತಾನಾಮನ್ತಕೃದ್ದಾರುಣೋ ಜ್ವರಃ| ತಸ್ಮಾದ್ವಿಶೇಷತಸ್ತಸ್ಯ ಯತೇತ ಪ್ರಶಮೇ ಭಿಷಕ್||೩೪೫||

Adhikarana 118 (346) · Śloka 346

ತತ್ರ ಶ್ಲೋಕಃ- ಯಥಾಕ್ರಮಂ ಯಥಾಪ್ರಶ್ನಮುಕ್ತಂ ಜ್ವರಚಿಕಿತ್ಸಿತಮ್| ಆತ್ರೇಯೇಣಾಗ್ನಿವೇಶಾಯ ಭೂತಾನಾಂ ಹಿತಕಾಮ್ಯಯಾ||೩೪೬||

Adhikarana puShpikA · Śloka 3

ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇ ಚಿಕಿತ್ಸಿತಸ್ಥಾನೇ ಜ್ವರಚಿಕಿತ್ಸಿತಂ ನಾಮ ತೃತೀಯೋಽಧ್ಯಾಯಃ||೩||