9. jvaracikitsitam

Adhikarana 1 (1-2) · Śloka 2

অথাতো জ্বরচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

Adhikarana 2 (3) · Śloka 3

বিজ্বরং জ্বরসন্দেহং পর্যপৃচ্ছত্ পুনর্বসুম্| বিবিক্তে শান্তমাসীনমগ্নিবেশঃ কৃতাঞ্জলিঃ||৩||

Adhikarana 3 (4-10) · Śloka 10

দেহেন্দ্রিযমনস্তাপী সর্বরোগাগ্রজো বলী| জ্বরঃ প্রধানো রোগাণামুক্তো ভগবতা পুরা||৪|| তস্য প্রাণিসপত্নস্য ধ্রুবস্য প্রলযোদযে| প্রকৃতিং চ প্রবৃত্তিং চ প্রভাবং কারণানি চ||৫|| পূর্বরূপমধিষ্ঠানং বলকালাত্মলক্ষণম্| ব্যাসতো বিধিভেদাচ্চ পৃথগ্ভিন্নস্য চাকৃতিম্||৬|| লিঙ্গমামস্য জীর্ণস্য সৌষধং চ ক্রিযাক্রমম্| বিমুঞ্চতঃ প্রশান্তস্য চিহ্নং যচ্চ পৃথক্ পৃথক্||৭|| জ্বরাবসৃষ্টো রক্ষ্যশ্চ যাবত্কালং যতো যতঃ| প্রশান্তঃ কারণৈর্যৈশ্চ পুনরাবর্ততে জ্বরঃ||৮|| যাশ্চাপি পুনরাবৃত্তং ক্রিযাঃ প্রশমযন্তি তম্| জগদ্ধিতার্থং তত্ সর্বং ভগবন্! বক্তুমর্হসি||৯|| তদগ্নিবেশস্য বচো নিশম্য গুরুরব্রবীত্| জ্বরাধিকারে যদ্বাচ্যং তত্ সৌম্য! নিখিলং শৃণু||১০||

Adhikarana 4 (11) · Śloka 11

জ্বরো বিকারো রোগশ্চ ব্যাধিরাতঙ্ক এব চ| একোঽর্থো নামপর্যাযৈর্বিবিধৈরভিধীযতে||১১||

Adhikarana 5 (12) · Śloka 12

তস্য প্রকৃতিরুদ্দিষ্টা দোষাঃ শারীরমানসাঃ| দেহিনং ন হি নির্দোষং জ্বরঃ সমুপসেবতে||১২||

Adhikarana 6 (13) · Śloka 14

ক্ষযস্তমো জ্বরঃ পাপ্মা মৃত্যুশ্চোক্তা যমাত্মকাঃ| পঞ্চত্বপ্রত্যযান্নৄণাং ক্লিশ্যতাং স্বেন কর্মণা||১৩|| ইত্যস্য প্রকৃতিঃ প্রোক্তা, ...|১৪|

Adhikarana 7 (14) · Śloka 14

... প্রবৃত্তিস্তু পরিগ্রহাত্| নিদানে পূর্বমুদ্দিষ্টা রুদ্রকোপাচ্চ দারুণাত্||১৪||

Adhikarana 8 (15-25) · Śloka 25

দ্বিতীযে হি যুগে শর্বমক্রোধব্রতমাস্থিতম্| দিব্যং সহস্রং বর্ষাণামসুরা অভিদুদ্রুবুঃ||১৫|| তপোবিঘ্নাশনাঃ কর্তুং তপোবিঘ্নং মহাত্মনঃ| পশ্যন্ সমর্থশ্চোপেক্ষাং চক্রে দক্ষঃ প্রজাপতিঃ||১৬|| পুনর্মাহেশ্বরং ভাগং ধ্রুবং দক্ষঃ প্রজাপতিঃ| যজ্ঞে ন কল্পযামাস প্রোচ্যমানঃ সুরৈরপি||১৭|| ঋচঃ পশুপতের্যাশ্চ শৈব্য আহতযশ্চ যাঃ| যজ্ঞসিদ্ধিপ্রদাস্তাভির্হীনং চৈব স ইষ্টবান্||১৮|| অথোত্তীর্ণব্রতো দেবো বুদ্ধ্বা দক্ষব্যতিক্রমম্| রুদ্রো রৌদ্রং পুরস্কৃত্য ভাবমাত্মবিদাত্মনঃ||১৯|| সৃষ্ট্বা ললাটে চক্ষুর্বৈ দগ্ধ্বা তানসুরান্ প্রভুঃ| বালং ক্রোধাগ্নিসন্তপ্তমসৃজত্ সত্রনাশনম্||২০|| ততো যজ্ঞঃ স বিধ্বস্তো ব্যথিতাশ্চ দিবৌকসঃ| দাহব্যথাপরীতাশ্চ ভ্রান্তা ভূতগণা দিশঃ||২১|| অথেশ্বরং দেবগণঃ সহ সপ্তর্ষিভির্বিভুম্| তমৃগ্ভিরস্তুবন্ যাবচ্ছৈবে ভাবে শিবঃ স্থিতঃ||২২|| শিবং শিবায ভূতানাং স্থিতং জ্ঞাত্বা কৃতাঞ্জলিঃ| ভিযা ভস্মপ্রহরণস্ত্রিশিরা নবলোচনঃ||২৩|| জ্বালামালাকুলো রৌদ্রো হ্রস্বজঙ্ঘোদরঃ ক্রমাত্| ক্রোধাগ্নিরুক্তবান্ দেবমহং কিং করবাণি তে||২৪|| তমুবাচেশ্বরঃ ক্রোধং জ্বরো লোকে ভবিষ্যসি| জন্মাদৌ নিধনে চ ত্বমপচারান্তরেষু চ||২৫||

Adhikarana 9 (26) · Śloka 27

সন্তাপঃ সারুচিস্তৃষ্ণা সাঙ্গমর্দো হৃদি ব্যথা| জ্বরপ্রভাবো, জন্মাদৌ নিধনে চ মহত্তমঃ||২৬|| প্রকৃতিশ্চ প্রবৃত্তিশ্চ প্রভাবশ্চ প্রদর্শিতঃ|২৭|

Adhikarana 10 (27) · Śloka 27

নিদানে কারণান্যষ্টৌ পূর্বোক্তানি বিভাগশঃ||২৭||

Adhikarana 11 (28-29) · Śloka 29

আলস্যং নযনে সাস্রে জৃম্ভণং গৌরবং ক্রমঃ| জ্বলনাতপবায্বম্বুভক্তিদ্বেষাবনিশ্চিতৌ||২৮|| অবিপাকাস্যবৈরস্যে হানিশ্চ বলবর্ণযোঃ| শীলবৈকৃতমল্পং চ জ্বরলক্ষণমগ্রজম্||২৯||

Adhikarana 12 (30) · Śloka 30

কেবলং সমনস্কং চ জ্বরাধিষ্ঠানমুচ্যতে| শরীরং, বলকালস্তু নিদানে সম্প্রদর্শিতঃ||৩০||

Adhikarana 13 (31) · Śloka 31

জ্বরপ্রত্যাত্মিকং লিঙ্গং সন্তাপো দেহমানসঃ| জ্বরেণাবিশতা ভূতং ন হি কিঞ্চিন্ন তপ্যতে||৩১||

Adhikarana 14 (32-35) · Śloka 35

দ্বিবিধো বিধিভেদেন জ্বরঃ শারীরমানসঃ| পুনশ্চ দ্বিবিধো দৃষ্টঃ সৌম্যশ্চাগ্নেয এব বা||৩২|| অন্তর্বেগো বহির্বেগো দ্বিবিধঃ পুনরুচ্যতে| প্রাকৃতো বৈকৃতশ্চৈব সাধ্যশ্চাসাধ্য এব চ||৩৩|| পুনঃ পঞ্চবিধো দৃষ্টো দোষকালবলাবলাত্| সন্ততঃ সততোঽন্যেদ্যুস্তৃতীযকচতুর্থকৌ||৩৪|| পুনরাশ্রযভেদেন ধাতূনাং সপ্তধা মতঃ| ভিন্নঃ কারণভেদেন পুনরষ্টবিধো জ্বরঃ||৩৫||

Adhikarana 15 (36) · Śloka 37

শারীরো জাযতে পূর্বং দেহে, মনসি মানসঃ| বৈচিত্ত্যমরতির্গ্লানির্মনসস্তাপলক্ষণম্||৩৬|| ইন্দ্রিযাণাং চ বৈকৃত্যং জ্ঞেযং সন্তাপলক্ষণম্|৩৭|

Adhikarana 16 (37) · Śloka 38

বাতপিত্তাত্মকঃ শীতমুষ্ণং বাতকফাত্মকঃ||৩৭|| ইচ্ছত্যুভযমেতত্তু জ্বরো ব্যামিশ্রলক্ষণঃ|৩৮|

Adhikarana 17 (38) · Śloka 39

যোগবাহঃ পরং বাযুঃ সংযোগাদুভযার্থকৃত্||৩৮|| দাহকৃত্তেজসা যুক্তঃ, শীতকৃত্ সোমসংশ্রযাত্|৩৯|

Adhikarana 18 (39-41) · Śloka 41

অন্তর্দাহোঽধিকস্তৃষ্ণা প্রলাপঃ শ্বসনং ভ্রমঃ||৩৯|| সন্ধ্যস্থিশূলমস্বেদো দোষবর্চোবিনিগ্রহঃ| অন্তর্বেগস্য লিঙ্গানি জ্বরস্যৈতানি লক্ষযেত্||৪০|| সন্তাপোঽভ্যধিকো বাহ্যস্তৃষ্ণাদীনাং চ মার্দবম্| বহির্বেগস্য লিঙ্গানি সুখসাধ্যত্বমেব চ||৪১||

Adhikarana 19 (42-46) · Śloka 47

প্রাকৃতঃ সুখসাধ্যস্তু বসন্তশরদুদ্ভবঃ| উষ্ণমুষ্ণেন সংবৃদ্ধং পিত্তং শরদি কুপ্যতি||৪২|| চিতঃ শীতে কফশ্চৈবং বসন্তে সমুদীর্যতে| বর্ষাস্বম্লবিপাকাভিরদ্ভিরোষধিভিস্তথা||৪৩|| সঞ্চিতং পিত্তমুদ্রিক্তং শরদ্যাদিত্যতেজসা| জ্বরং সঞ্জনযত্যাশু তস্য চানুবলঃ কফঃ||৪৪|| প্রকৃত্যৈব বিসর্গস্য তত্র নানশনাদ্ভযম্| অদ্ভিরোষধিভিশ্চৈব মধুরাভিশ্চিতঃ কফঃ||৪৫|| হেমন্তে, সূর্যসন্তপ্তঃ স বসন্তে প্রকুপ্যতি| বসন্তে শ্লেষ্মণা তস্মাজ্জ্বরঃ সমুপজাযতে||৪৬|| আদানমধ্যে তস্যাপি বাতপিত্তং ভবেদনু|৪৭|

Adhikarana 20 (47) · Śloka 48

আদাবন্তে চ মধ্যে চ বুদ্ধ্বা দোষবলাবলম্||৪৭|| শরদ্বসন্তযোর্বিদ্বাঞ্জ্বরস্য প্রতিকারযেত্|৪৮|

Adhikarana 21 (48-49) · Śloka 49

কালপ্রকৃতিমুদ্দিশ্য নির্দিষ্টঃ প্রাকৃতো জ্বরঃ||৪৮|| প্রাযেণানিলজো দুঃখঃ কালেষ্বন্যেষু বৈকৃতঃ| হেতবো বিবিধাস্তস্য নিদানে সম্প্রদর্শিতাঃ||৪৯||

Adhikarana 22 (50) · Śloka 50

বলবত্স্বল্পদোষেষু জ্বরঃ সাধ্যোঽনুপদ্রবঃ|৫০|

Adhikarana 23 (50) · Śloka 51

হেতুভির্বহুভির্জাতো বলিভির্বহুলক্ষণঃ||৫০|| জ্বরঃ প্রাণান্তকৃদ্যশ্চ শীঘ্রমিন্দ্রিযনাশনঃ|৫১|

Adhikarana 24 (51) · Śloka 52

সপ্তাহাদ্বা দশাহাদ্বা দ্বাদশাহাত্তথৈব চ||৫১|| সপ্রলাপভ্রমশ্বাসস্তীক্ষ্ণো হন্যাজ্জ্বরো নরম্|৫২|

Adhikarana 25 (52) · Śloka 53

জ্বরঃ ক্ষীণস্য শূনস্য গম্ভীরো দৈর্ঘরাত্রিকঃ||৫২|| অসাধ্যো বলবান্ যশ্চ কেশসীমন্তকৃজ্জ্বরঃ|৫৩|

Adhikarana 26 (53-60) · Śloka 61

স্রোতোভির্বিসৃতা দোষা গুরবো রসবাহিভিঃ||৫৩|| সর্বদেহানুগাঃ স্তব্ধা জ্বরং কুর্বন্তি সন্ততম্| দশাহং দ্বাদশাহং বা সপ্তাহং বা সুদুঃসহঃ||৫৪|| স শীঘ্রং শীঘ্রকারিত্বাত্ প্রশমং যাতি হন্তি বা| কালদূষ্যপ্রকৃতিভির্দোষস্তুল্যো হি সন্ততম্||৫৫|| নিষ্প্রত্যনীকঃ কুরুতে তস্মাজ্জ্ঞেযঃ সুদুঃসহঃ| যথা ধাতূংস্তথা মূত্রং পুরীষং চানিলাদযঃ||৫৬|| যুগপচ্চানুপদ্যন্তে নিযমাত্ সন্ততে জ্বরে| স শুদ্ধ্যা বাঽপ্যশুদ্ধ্যা বা রসাদীনামশেষতঃ||৫৭|| সপ্তাহাদিষু কালেষু প্রশমং যাতি হন্তি বা| যদা তু নাতিশুধ্যন্তি ন বা শুধ্যন্তি সর্বশঃ||৫৮|| দ্বাদশৈতে সমুদ্দিষ্টাঃ সন্ততস্যাশ্রযাস্তদা| বিসর্গং দ্বাদশে কৃত্বা দিবসেঽব্যক্তলক্ষণম্||৫৯|| দুর্লভোপশমঃ কালং দীর্ঘমপ্যনুবর্ততে| ইতি বুদ্ধ্বা জ্বরং বৈদ্য উপক্রামেত্তু সন্ততম্ ||৬০|| ক্রিযাক্রমবিধৌ যুক্তঃ প্রাযঃ প্রাগপতর্পণৈঃ|৬১|

Adhikarana 27 (61-62) · Śloka 62

রক্তধাত্বাশ্রযঃ প্রাযো দোষঃ সততকং জ্বরম্||৬১|| সপ্রত্যনীকঃ কুরুতে কালবৃদ্ধিক্ষযাত্মকম্| অহোরাত্রে সততকো দ্বৌ কালাবনুবর্ততে||৬২||

Adhikarana 28 (63-67) · Śloka 67

কালপ্রকৃতিদূষ্যাণাং প্রাপ্যৈবান্যতমাদ্বলম্| অন্যেদ্যুষ্কং জ্বরং দোষো রুদ্ধ্বা মেদোবহাঃ সিরাঃ||৬৩|| সপ্রত্যনীকো জনযত্যেককালমহর্নিশি| দোষোঽস্থিমজ্জগঃ কুর্যাত্তৃতীযকচতুর্থকৌ||৬৪|| গতির্দ্ব্যেকান্তরাঽন্যেদ্যুর্দোষস্যোক্তাঽন্যথা পরৈঃ| অন্যেদ্যুষ্কং জ্বরং কুর্যাদপি সংশ্রিত্য শোণিতম্||৬৫|| মাংসস্রোতাংস্যনুগতো জনযেত্তু তৃতীযকম্| সংশ্রিতো মেদসো মার্গং দোষশ্চাপি চতুর্থকম্ ||৬৬|| অন্যেদ্যুষ্কঃ প্রতিদিনং দিনং হিত্বা তৃতীযকঃ| দিনদ্বযং যো বিশ্রম্য প্রত্যেতি স চতুর্থকঃ||৬৭||

Adhikarana 29 (68-69) · Śloka 69

অধিশেতে যথা ভূমিং বীজং কালে চ রোহতি| অধিশেতে তথা ধাতুং দোষঃ কালে চ কুপ্যতি||৬৮|| স বৃদ্ধিং বলকালং চ প্রাপ্য দোষস্তৃতীযকম্| চতুর্থকং চ কুরুতে প্রত্যনীকবলক্ষযাত্||৬৯||

Adhikarana 30 (70) · Śloka 70

কৃত্বা বেগং গতবলাঃ স্বে স্বে স্থানে ব্যবস্থিতাঃ| পুনর্বিবৃদ্ধাঃ স্বে কালে জ্বরযন্তি নরং মলাঃ||৭০||

Adhikarana 31 (71-72) · Śloka 72

কফপিত্তাত্ত্রিকগ্রাহী পৃষ্ঠাদ্বাতকফাত্মকঃ| বাতপিত্তাচ্ছিরোগ্রাহী ত্রিবিধঃ স্যাত্তৃতীযকঃ||৭১|| চতুর্থকো দর্শযতি প্রভাবং দ্বিবিধং জ্বরঃ| জঙ্ঘাভ্যাং শ্লৈষ্মিকঃ পূর্বং শিরস্তোঽনিলসম্ভবঃ||৭২||

Adhikarana 32 (73) · Śloka 73

বিষমজ্বর এবান্যশ্চতুর্থকবিপর্যযঃ| ত্রিবিধো ধাতুরেকৈকো দ্বিধাতুস্থঃ করোতি যম্||৭৩||

Adhikarana 33 (74) · Śloka 74

প্রাযশঃ সন্নিপাতেন দৃষ্টঃ পঞ্চবিধো জ্বরঃ| সন্নিপাতে তু যো ভূযান্ স দোষঃ পরিকীর্তিতঃ||৭৪||

Adhikarana 34 (75-83) · Śloka 83

ঋত্বহোরাত্রদোষাণাং মনসশ্চ বলাবলাত্| কালমর্থবশাচ্চৈব জ্বরস্তং তং প্রপদ্যতে||৭৫|| গুরুত্বং দৈন্যমুদ্বেগঃ সদনং ছর্দ্যরোচকৌ| রসস্থিতে বহিস্তাপঃ সাঙ্গমর্দো বিজৃম্ভণম্||৭৬|| রক্তোষ্ণাঃ পিডকাস্তৃষ্ণা সরক্তং ষ্ঠীবনং মুহুঃ| দাহরাগভ্রমমদপ্রলাপা রক্তসংস্থিতে||৭৭|| অন্তর্দাহঃ সতৃণ্মোহঃ সগ্লানিঃ সৃষ্টবিট্কতা| দৌর্গন্ধ্যং গাত্রবিক্ষেপো জ্বরে মাংসস্থিতে ভবেত্||৭৮|| স্বেদস্তীব্রা পিপাসা চ প্রলাপো বম্যভীক্ষ্ণশঃ| স্বগন্ধস্যাসহত্বং চ মেদঃস্থে গ্লান্যরোচকৌ||৭৯|| বিরেকবমনে চোভে সাস্থিভেদং প্রকূজনম্| বিক্ষেপণং চ গাত্রাণাং শ্বাসশ্চাস্থিগতে জ্বরে||৮০|| হিক্কা শ্বাসস্তথা কাসস্তমসশ্চাতিদর্শনম্| মর্মচ্ছেদো বহিঃ শৈত্যং দাহোঽন্তশ্চৈব মজ্জগে||৮১|| শুক্রস্থানগতঃ শুক্রমোক্ষং কৃত্বা বিনাশ্য চ| প্রাণং বায্বগ্নিসোমৈশ্চ সার্ধং গচ্ছত্যসৌ বিভুঃ||৮২|| রসরক্তাশ্রিতঃ সাধ্যো মেদোমাংসগতশ্চ যঃ| অস্থিমজ্জগতঃ কৃচ্ছ্রঃ শুক্রস্থো নৈব সিদ্ধ্যতি||৮৩||

Adhikarana 35 (84-88) · Śloka 89

হেতুভির্লক্ষণৈশ্চোক্তঃ পূর্বমষ্টবিধো জ্বরঃ| সমাসেনোপদিষ্টস্য ব্যাসতঃ শৃণু লক্ষণম্||৮৪|| শিরোরুক্ পর্বণাং ভেদো দাহো রোম্ণাং প্রহর্ষণম্| কণ্ঠাস্যশোষো বমথুস্তৃষ্ণা মূর্চ্ছা ভ্রমোঽরুচিঃ||৮৫|| স্বপ্ননাশোঽতিবাগ্জৃম্ভা বাতপিত্তজ্বরাকৃতিঃ| শীতকো গৌরবং তন্দ্রা স্তৈমিত্যং পর্বণাং চ রুক্||৮৬|| শিরোগ্রহঃ প্রতিশ্যাযঃ কাসঃ স্বেদাপ্রবর্তনম্| সন্তাপো মধ্যবেগশ্চ বাতশ্লেষ্মজ্বরাকৃতিঃ||৮৭|| মুহুর্দাহো মুহুঃ শীতং স্বেদস্তম্ভো মুহুর্মুহুঃ| মোহঃ কাসোঽরুচিস্তৃষ্ণা শ্লেষ্মপিত্তপ্রবর্তনম্||৮৮|| লিপ্ততিক্তাস্যতা তন্দ্রা শ্লেষ্মপিত্তজ্বরাকৃতিঃ| ইত্যেতে দ্বন্দ্বজাঃ প্রোক্তাঃ ...|৮৯|

Adhikarana 36 (89-108) · Śloka 109

... সন্নিপাতজ উচ্যতে||৮৯|| সন্নিপাতজ্বরস্যোর্ধ্বং ত্রযোদশবিধস্য হি| প্রাক্সূত্রিতস্য বক্ষ্যামি লক্ষণং বৈ পৃথক্ পৃথক্||৯০|| ভ্রমঃ পিপাসা দাহশ্চ গৌরবং শিরসোঽতিরুক্| বাতপিত্তোল্বণে বিদ্যাল্লিঙ্গং মন্দকফে জ্বরে||৯১|| শৈত্যং কাসোঽরুচিস্তন্দ্রাপিপাসাদাহরুগ্ব্যথাঃ| বাতশ্লেষ্মোল্বণে ব্যাধৌ লিঙ্গং পিত্তাবরে বিদুঃ||৯২|| ছর্দিঃ শৈত্যং মুহুর্দাহস্তৃষ্ণা মোহোঽস্থিবেদনা| মন্দবাতে ব্যবস্যন্তি লিঙ্গং পিত্তকফোল্বণে||৯৩|| সন্ধ্যস্থিশিরসঃ শূলং প্রলাপো গৌরবং ভ্রমঃ| বাতোল্বণে স্যাদ্ দ্ব্যনুগে তৃষ্ণা কণ্ঠাস্যশুষ্কতা||৯৪|| রক্তবিণ্মূত্রতা দাহঃ স্বেদস্তৃড্ বলসঙ্ক্ষযঃ| মূর্চ্ছা চেতি ত্রিদোষে স্যাল্লিঙ্গং পিত্তে গরীযসি||৯৫|| আলস্যারুচিহৃল্লাসদাহবম্যরতিভ্রমৈঃ| কফোল্বণং সন্নিপাতং তন্দ্রাকাসেন চাদিশেত্||৯৬|| প্রতিশ্যা ছর্দিরালস্যং তন্দ্রাঽরুচ্যগ্নিমার্দবম্| হীনবাতে পিত্তমধ্যে লিঙ্গং শ্লেষ্মাধিকে মতম্||৯৭|| হারিদ্রমূত্রনেত্রত্বং দাহস্তৃষ্ণা ভ্রমোঽরুচিঃ| হীনবাতে মধ্যকফে লিঙ্গং পিত্তাধিকে মতম্||৯৮|| শিরোরুগ্বেপথুঃ শ্বাসঃ প্রলাপশ্ছর্দ্যরোচকৌ| হীনপিত্তে মধ্যকফে লিঙ্গং স্যান্মারুতাধিকে||৯৯|| শীতকো গৌরবং তন্দ্রা প্রলাপোঽস্থিশিরোঽতিরুক্| হীনপিত্তে বাতমধ্যে লিঙ্গং শ্লেষ্মাধিকে বিদুঃ||১০০|| শ্বাসঃ কাসঃ প্রতিশ্যাযো মুখশোষোঽতিপার্শ্বরুক্| কফহীনে পিত্তমধ্যে লিঙ্গং বাতাধিকে মতম্||১০১|| বর্চোভেদোঽগ্নিদৌর্বল্যং তৃষ্ণা দাহোঽরুচির্ভ্রমঃ| কফহীনে বাতমধ্যে লিঙ্গং পিত্তাধিকে বিদুঃ||১০২|| সন্নিপাতজ্বরস্যোর্ধ্বমতো বক্ষ্যামি লক্ষণম্| ক্ষণে দাহঃ ক্ষণে শীতমস্থিসন্ধিশিরোরুজা||১০৩|| সাস্রাবে কলুষে রক্তে নির্ভুগ্নে চাপি দর্শনে | সস্বনৌ সরুজৌ কর্ণৌ কণ্ঠঃ শূকৈরিবাবৃতঃ||১০৪|| তন্দ্রা মোহঃ প্রলাপশ্চ কাসঃ শ্বাসোঽরুচির্ভ্রমঃ| পরিদগ্ধা খরস্পর্শা জিহ্বা স্রস্তাঙ্গতা পরম্||১০৫|| ষ্ঠীবনং রক্তপিত্তস্য কফেনোন্মিশ্রিতস্য চ| শিরসো লোঠনং তৃষ্ণা নিদ্রানাশো হৃদি ব্যথা||১০৬|| স্বেদমূত্রপুরীষাণাং চিরাদ্দর্শনমল্পশঃ| কৃশত্বং নাতিগাত্রাণাং প্রততং কণ্ঠকূজনম্||১০৭|| কোঠানাং শ্যাবরক্তানাং মণ্ডলানাং চ দর্শনম্| মূকত্বং স্রোতসাং পাকো গুরুত্বমুদরস্য চ||১০৮|| চিরাত্ পাকশ্চ দোষাণাং সন্নিপাতজ্বরাকৃতিঃ|১০৯|

Adhikarana 37 (109) · Śloka 110

দোষে বিবদ্ধে নষ্টেঽগ্নৌ সর্বসম্পূর্ণলক্ষণঃ||১০৯|| সন্নিপাতজ্বরোঽসাধ্যঃ কৃচ্ছ্রসাধ্যস্ত্বতোঽন্যথা|১১০|

Adhikarana 38 (110) · Śloka 111

নিদানে ত্রিবিধা প্রোক্তা যা পৃথগ্জজ্বরাকৃতিঃ||১১০|| সংসর্গসন্নিপাতানাং তযা চোক্তং স্বলক্ষণম্|১১১|

Adhikarana 39 (111-113) · Śloka 114

আগন্তুরষ্টমো যস্তু স নির্দিষ্টশ্চতুর্বিধঃ||১১১|| অভিঘাতাভিষঙ্গাভ্যামভিচারাভিশাপতঃ| শস্ত্রলোষ্টকশাকাষ্ঠমুষ্ট্যরত্নিতলদ্বিজৈঃ||১১২|| তদ্বিধৈশ্চ হতে গাত্রে জ্বরঃ স্যাদভিঘাতজঃ| তত্রাভিঘাতজে বাযুঃ প্রাযো রক্তং প্রদূষযন্||১১৩|| সব্যথাশোফবৈবর্ণ্যং করোতি সরুজং জ্বরম্|১১৪|

Adhikarana 40 (114-127) · Śloka 128

কামশোকভযক্রোধৈরভিষক্তস্য যো জ্বরঃ||১১৪|| সোঽভিষঙ্গাজ্বরো জ্ঞেযো যশ্চ ভূতাভিষঙ্গজঃ| কামশোকভযাদ্বাযুঃ, ক্রোধাত্ পিত্তং, ত্রযো মলাঃ||১১৫|| ভূতাভিষঙ্গাত্ কুপ্যন্তি ভূতসামান্যলক্ষণাঃ| ভূতাধিকারে ব্যাখ্যাতং তদষ্টবিধলক্ষণম্||১১৬|| বিষবৃক্ষানিলস্পর্শাত্তথাঽন্যৈর্বিষসম্ভবৈঃ| অভিষক্তস্য চাপ্যাহুর্জ্বরমেকেঽভিষঙ্গজম্||১১৭|| চিকিত্সযা বিষঘ্ন্যৈব স শমং লভতে নরঃ| অভিচারাভিশাপাভ্যাং সিদ্ধানাং যঃ প্রবর্ততে||১১৮|| সন্নিপাতজ্বরো ঘোরঃ স বিজ্ঞেযঃ সুদুঃসহঃ| সন্নিপাতজ্বরস্যোক্তং লিঙ্গং যত্তস্য তত্ স্মৃতম্||১১৯|| চিত্তোন্দ্রিযশরীরাণামর্তযোঽন্যাশ্চ নৈকশঃ| প্রযোগং ত্বভিচারস্য দৃষ্ট্বা শাপস্য চৈব হি||১২০|| স্বযং শ্রুত্বাঽনুমানেন লক্ষ্যতে প্রশমেন বা| বৈবিধ্যাদভিচারস্য শাপস্য চ তদাত্মকে||১২১|| যথাকর্মপ্রযোগেণ লক্ষণং স্যাত্ পৃথগ্বিধম্| ধ্যাননিঃশ্বাসবহুলং লিঙ্গং কামজ্বরে স্মৃতম্||১২২|| শোকজে বাষ্পবহুলং ত্রাসপ্রাযং ভযজ্বরে| ক্রোধজে বহুসংরম্ভং ভূতাবেশে ত্বমানুষম্||১২৩|| মূর্চ্ছামোহমদগ্লানিভূযিষ্ঠং বিষসম্ভবে| কেষাঞ্চিদেষাং লিঙ্গানাং সন্তাপো জাযতে পুরঃ||১২৪|| পশ্চাত্তুল্যং তু কেষাঞ্চিদেষু কামজ্বরাদিষু| কামাদিজানামুদ্দিষ্টং জ্বরাণাং যদ্বিশেষণম্||১২৫|| কামাদিজানাং রোগাণামন্যেষামপি তত্ স্মৃতম্| মনস্যভিহতে পূর্বং কামাদ্যৈর্ন তথা বলম্||১২৬|| জ্বরঃ প্রাপ্নোতি বাতাদ্যৈর্দেহো যাবন্ন দূষ্যতি| দেহে চাভিহ(দ্রু)তে পূর্বং বাতাদ্যৈর্ন তথা বলম্||১২৭|| জ্বরঃ প্রাপ্নোতি কামাদ্যৈর্মনো যাবন্ন দূষ্যতি|১২৮|

Adhikarana 41 (128) · Śloka 129

তে পূর্বং কেবলাঃ পশ্চান্নিজৈর্ব্যামিশ্রলক্ষণাঃ||১২৮|| হেত্বৌষধবিশিষ্টাশ্চ ভবন্ত্যাগন্তবো জ্বরাঃ|১২৯|

Adhikarana 42 (129-131) · Śloka 132

সংসৃষ্টাঃ সন্নিপতিতাঃ পৃথগ্বা কুপিতা মলাঃ||১২৯|| রসাখ্যং ধাতুমন্বেত্য পক্তিং স্থানান্নিরস্য চ| স্বেন তেনোষ্মণ চৈব কৃত্বা দেহোষ্মণো বলম্||১৩০|| স্রোতাংসি রুদ্ধ্বা সম্প্রাপ্তাঃ কেবলং দেহমুল্বণাঃ| সন্তাপমধিকং দেহে জনযন্তি নরস্তদা||১৩১|| ভবত্যত্যুষ্ণসর্বাঙ্গো জ্বরিতস্তেন চোচ্যতে|১৩২|

Adhikarana 43 (132) · Śloka 133

স্রোতসাং সন্নিরুদ্ধত্বাত্ স্বেদং না নাধিগচ্ছতি||১৩২|| স্বস্থানাত্ প্রচ্যুতে চাগ্নৌ প্রাযশস্তরুণেজ্বরে|১৩৩|

Adhikarana 44 (133-136) · Śloka 137

অরুচিশ্চাবিপাকশ্চ গুরুত্বমুদরস্য চ||১৩৩|| হৃদযস্যাবিশুদ্ধিশ্চ তন্দ্রা চালস্যমেব চ| জ্বরোঽবিসর্গী বলবান্ দোষাণামপ্রবর্তনম্||১৩৪|| লালাপ্রসেকো হৃল্লাসঃ ক্ষুন্নাশো বিরসং মুখম্| স্তব্ধসুপ্তগুরুবং চ গাত্রাণাং বহুমূত্রতা||১৩৫|| ন বিড্ জীর্ণা ন চ গ্লানির্জ্বরস্যামস্য লক্ষণম্| জ্বরবেগোঽধিকস্তৃষ্ণা প্রলাপঃ শ্বসনং ভ্রমঃ||১৩৬|| মলপ্রবৃত্তিরুত্ক্লেশঃ পচ্যমানস্য লক্ষণম্|১৩৭|

Adhikarana 45 (137) · Śloka 138

ক্ষুত্ ক্ষামতা লঘুত্বং চ গাত্রাণাং জ্বরমার্দবম্||১৩৭|| দোষপ্রবৃত্তিরষ্টাহো নিরামজ্বরলক্ষণম্|১৩৮|

Adhikarana 46 (138) · Śloka 139

নবজ্বরে দিবাস্বপ্নস্নানাভ্যঙ্গান্নমৈথুনম্||১৩৮|| ক্রোধপ্রবাতব্যাযামান্ কষাযাংশ্চ বিবর্জযেত্|১৩৯|

Adhikarana 47 (139) · Śloka 140

জ্বরে লঙ্ঘনমেবাদাবুপদিষ্টমৃতে জ্বরাত্||১৩৯|| ক্ষযানিলভযক্রোধকামশোকশ্রমোদ্ভবাত্ |১৪০|

Adhikarana 48 (140-141) · Śloka 142

লঙ্ঘনেন ক্ষযং নীতে দোষে সন্ধুক্ষিতেঽনলে||১৪০|| বিজ্বরত্বং লঘুত্বং চ ক্ষুচ্চৈবাস্যোপজাযতে | প্রাণাবিরোধিনা চৈনং লঙ্ঘনেনোপপাদযেত্||১৪১|| বলাধিষ্ঠানমারোগ্যং যদর্থোঽযং ক্রিযাক্রমঃ|১৪২|

Adhikarana 49 (142) · Śloka 143

লঙ্ঘনং স্বেদনং কালো যবাগ্বস্তিক্তকো রসঃ||১৪২|| পাচনান্যবিপক্বানাং দোষাণাং তরুণে জ্বরে|১৪৩|

Adhikarana 50 (143-144) · Śloka 145

তৃষ্যতে সলিলং চোষ্ণং দদ্যাদ্বাতকফজ্বরে ||১৪৩|| মদ্যোত্থে পৈত্তিকে চাথ শীতলং তিক্তকৈঃ শৃতম্| দীপনং পাচনং চৈব জ্বরঘ্নমুভযং হি তত্||১৪৪|| স্রোতসাং শোধনং বল্যং রুচিস্বেদকরং শিবম্|১৪৫|

Adhikarana 51 (145) · Śloka 146

মুস্তপর্পটকোশীরচন্দনোদীচ্যনাগরৈঃ||১৪৫|| শৃতশীতং জলং দদ্যাত্ পিপাসাজ্বরশান্তযে|১৪৬|

Adhikarana 52 (146) · Śloka 147

কফপ্রধানানুত্ক্লিষ্টান্ দোষানামাশযস্থিতান্||১৪৬|| বুদ্ধ্বা জ্বরকরান্ কালে বম্যানাং বমনৈর্হরেত্|১৪৭|

Adhikarana 53 (147-148) · Śloka 149

অনুপস্থিতদোষাণাং বমনং তরুণেজ্বরে||১৪৭|| হৃদ্রোগং শ্বাসমানাহং মোহং চ জনযেদ্ভৃশম্| সর্বদেহানুগাঃ সামা ধাতুস্থা অসুনির্হরাঃ ||১৪৮|| দোষাঃ ফলানামামানাং স্বরসা ইব সাত্যযাঃ|১৪৯|

Adhikarana 54 (149-154) · Śloka 155

বমিতং লঙ্ঘিতং কালে যবাগূভিরুপাচরেত্||১৪৯|| যথাস্বৌষধসিদ্ধাভির্মণ্ডপূর্বাভিরাদিতঃ| যাবজ্জ্বরমৃদূভাবাত্ ষডহং বা বিচক্ষণঃ||১৫০|| তস্যাগ্নির্দীপ্যতে তাভিঃ সমিদ্ভিরিব পাবকঃ| তাশ্চ ভেষজসংযোগাল্লঘুত্বাচ্চাগ্নিদীপনাঃ||১৫১|| বাতমূত্রপুরীষাণাং দোষাণাং চানুলোমনাঃ| স্বেদনায দ্রবোষ্ণত্বাদ্দ্রবত্বাত্তৃট্প্রশান্তযে||১৫২|| আহারভাবাত্ প্রাণায সরত্বাল্লাঘবায চ| জ্বরঘ্ন্যো জ্বরসাত্ম্যত্বাত্তস্মাত্ পেযাভিরাদিতঃ||১৫৩|| জ্বরানুপচরেদ্ধীমানৃতে মদ্যসমুত্থিতাত্| মদাত্যযে মদ্যনিত্যে গ্রীষ্মে পিত্তকফাধিকে||১৫৪|| ঊর্ধ্বগে রক্তপিত্তে চ যবাগূর্ন হিতা জ্বরে|১৫৫|

Adhikarana 55 (155) · Śloka 156

তত্র তর্পণমেবাগ্রে প্রযোজ্যং লাজসক্তুভিঃ||১৫৫|| জ্বরাপহৈঃ ফলরসৈর্যুক্তং সমধুশর্করম্|১৫৬|

Adhikarana 56 (156-159) · Śloka 160

ততঃ সাত্ম্যবলাপেক্ষী ভোজযেজ্জীর্ণতর্পণম্||১৫৬|| তনুনা মুদ্গযূষেণ জাঙ্গলানাং রসেন বা| অন্নকালেষু চাপ্যস্মৈ বিধেযং দন্তধাবনম্||১৫৭|| যোঽস্য বক্ত্ররসস্তস্মাদ্বিপরীতং প্রিযং চ যত্| তদস্য মুখবৈশদ্যং প্রকাঙ্ক্ষাং চান্নপানযোঃ||১৫৮|| ধত্তে রসবিশেষাণামভিজ্ঞত্বং করোতি যত্| বিশোধ্য দ্রুমশাখাগ্রৈরাস্যং প্রক্ষাল্য চাসকৃত্||১৫৯|| মস্ত্বিক্ষুরসমদ্যাদ্যৈর্যথাহারমবাপ্নুযাত্|১৬০|

Adhikarana 57 (160) · Śloka 161

পাচনং শমনীযং বা কষাযং পাযযেদ্ভিষক্||১৬০|| জ্বরিতং ষডহেঽতীতে লঘ্বন্নপ্রতিভোজিতম্|১৬১|

Adhikarana 58 (161-162) · Śloka 163

স্তভ্যন্তে ন বিপচ্যন্তে কুর্বন্তি বিষমজ্বরম্||১৬১|| দোষা বদ্ধাঃ কষাযেণ স্তম্ভিত্বাত্তরুণে জ্বরে| ন তু কল্পনমুদ্দিশ্য কষাযঃ প্রতিষিধ্যতে||১৬২|| যঃ কষাযকষাযঃ স্যাত্ স বর্জ্যস্তরুণজ্বরে|১৬৩|

Adhikarana 59 (163) · Śloka 164

যূষৈরম্লৈরনম্লৈর্বা জাঙ্গলৈর্বা রসৈর্হিতৈঃ||১৬৩|| দশাহং যাবদশ্নীযাল্লঘ্বন্নং জ্বরশান্তযে|১৬৪|

Adhikarana 60 (164) · Śloka 165

অত ঊর্ধ্বং কফে মন্দে বাতপিত্তোত্তরে জ্বরে||১৬৪|| পরিপক্বেষু দোষেষু সর্পিষ্পানং যথাঽমৃতম্|১৬৫|

Adhikarana 61 (165-166) · Śloka 167

নির্দশাহমপি জ্ঞাত্বা কফোত্তরমলঙ্ঘিতম্||১৬৫|| ন সর্পিঃ পাযযেদ্বৈদ্যঃ কষাযৈস্তমুপাচরেত্ | যাবল্লঘুত্বাদশনং দদ্যান্মাংসরসেন চ||১৬৬|| বলং হ্যলং নিগ্রহায দোষাণাং, বলকৃচ্চ তত্ |১৬৭|

Adhikarana 62 (167) · Śloka 168

দাহতৃষ্ণাপরীতস্য বাতপিত্তোত্তরং জ্বরম্||১৬৭|| বদ্ধপ্রচ্যুতদোষং বা নিরামং পযসা জযেত্|১৬৮|

Adhikarana 63 (168) · Śloka 169

ক্রিযাভিরাভিঃ প্রশমং ন প্রযাতি যদা জ্বরঃ||১৬৮|| অক্ষীণবলমাংসাগ্নেঃ শমযেত্তং বিরেচনৈঃ|১৬৯|

Adhikarana 64 (169-170) · Śloka 171

জ্বরক্ষীণস্য ন হিতং বমনং ন বিরেচনম্||১৬৯|| কামং তু পযসা তস্য নিরূহৈর্বা হরেন্মলান্| নিরূহো বলমগ্নিং চ বিজ্বরত্বং মুদং রুচিম্||১৭০|| পরিপক্বেষু দোষেষু প্রযুক্তঃ শীঘ্রমাবহেত্|১৭১|

Adhikarana 65 (171) · Śloka 172

পিত্তং বা কফপিত্তং বা পিত্তাশযগতং হরেত্||১৭১|| স্রংসনং ত্রীন্মলান্ বস্তির্হরেত্ পক্বাশযস্থিতান্|১৭২|

Adhikarana 66 (172) · Śloka 173

জ্বরে পুরাণে সঙ্ক্ষীণে কফপিত্তে দৃঢাগ্নযে||১৭২|| রূক্ষবদ্ধপুরীষায প্রদদ্যাদনুবাসনম্|১৭৩|

Adhikarana 67 (173) · Śloka 174

গৌরবে শিরসঃ শূলে বিবদ্ধেষ্বিন্দ্রিযেষু চ||১৭৩|| জীর্ণজ্বরে রুচিকরং কুর্যান্মূর্ধবিরেচনম্|১৭৪|

Adhikarana 68 (174-175) · Śloka 176

অভ্যঙ্গাংশ্চ প্রদেহাংশ্চ পরিষেকাবগাহনে||১৭৪|| বিভজ্য শীতোষ্ণকৃতং কুর্যাজ্জীর্ণে জ্বরে ভিষক্| তৈরাশু প্রশমং যাতি বহির্মার্গগতো জ্বরঃ||১৭৫|| লভন্তে সুখমঙ্গানি বলং বর্ণশ্চ বর্ধতে|১৭৬|

Adhikarana 69 (176) · Śloka 177

ধূপনাঞ্জনযোগৈশ্চ যান্তি জীর্ণজ্বরাঃ শমম্||১৭৬|| ত্বঙ্মাত্রশেষা যেষাং চ ভবত্যাগন্তুরন্বযঃ|১৭৭|

Adhikarana 70 (177-178) · Śloka 179

ইতি ক্রিযাক্রমঃ সিদ্ধো জ্বরঘ্নঃ সম্প্রকাশিতঃ||১৭৭|| যেষাং ত্বেষ ক্রমস্তানি দ্রব্যাণ্যূর্ধ্বমতঃ শৃণু| রক্তশাল্যাদযঃ শস্তাঃ পুরাণাঃ ষষ্টিকৈঃ সহ||১৭৮|| যবাগ্বোদনলাজার্থে জ্বরিতানাং জ্বরাপহাঃ|১৭৯|

Adhikarana 71 (179-187) · Śloka 188

লাজপেযাং সুখজরাং পিপ্পলীনাগরৈঃ শৃতাম্||১৭৯|| পিবেজ্জ্বরী জ্বরহরাং ক্ষুদ্বানল্পাগ্নিরাদিতঃ| অম্লাভিলাষী তামেব দাডিমাম্লাং সনাগরাম্||১৮০|| সৃষ্টবিট্ পৈত্তিকো বাঽথ শীতাং মধুযুতাং পিবেত্| পেযাং বা রক্তশালীনাং পার্শ্ববস্তিশিরোরুজি||১৮১|| শ্বদংষ্ট্রাকণ্টকারিভ্যাং সিদ্ধাং জ্বরহরাং পিবেত্| জ্বরাতিসারী পেযাং বা পিবেত্ সাম্লাং শৃতাং নরঃ||১৮২|| পৃশ্নিপর্ণীবলাবিল্বনাগরোত্পলধান্যকৈঃ| শৃতাং বিদারীগন্ধাদ্যৈর্দীপনীং স্বেদনীং নরঃ||১৮৩|| কাসী শ্বাসী চ হিক্কী চ যবাগূং জ্বরিতঃ পিবেত্| বিবদ্ধবর্চাঃ সযবাং পিপ্পল্যামলকৈঃ শৃতাম্||১৮৪|| সর্পিষ্মতীং পিবেত্ পেযাং জ্বরী দোষানুলোমনীম্| কোষ্ঠে বিবদ্ধে সরুজি পিবেত্ পেযাং শৃতাং জ্বরী||১৮৫|| মৃদ্বীকাপিপ্পলীমূলচব্যামলকনাগরৈঃ| পিবেত্ সবিল্বাং পেযাং বা জ্বরে সপরিকর্তিকে||১৮৬|| বলাবৃক্ষাম্লকোলাম্লকলশীধাবনীশৃতাম্| অস্বেদনিদ্রস্তৃষ্ণার্তঃ পিবেত্ পেযাং সশর্করাম্||১৮৭|| নাগরামলকৈঃ সিদ্ধাং ঘৃতভৃষ্টাং জ্বরাপহাম্|১৮৮|

Adhikarana 72 (188) · Śloka 189

মুদ্গান্মসূরাংশ্চণকান্ কুলত্থান্ সমকুষ্টকান্||১৮৮|| যূষার্থে যূষসাত্ম্যানাং জ্বরিতানাং প্রদাপযেত্|১৮৯|

Adhikarana 73 (189) · Śloka 190

পটোলপত্রং সফলং কুলকং পাপচেলিকম্||১৮৯|| কর্কোটকং কঠিল্লং চ বিদ্যাচ্ছাকং জ্বরে হিতম্|১৯০|

Adhikarana 74 (190-193) · Śloka 194

লাবান্ কপিঞ্জলানেণাংশ্চকোরানুপচক্রকান্||১৯০|| কুরঙ্গান্ কালপুচ্ছাংশ্চ হরিণান্ পৃষতাঞ্ছশান্| প্রদদ্যান্মাংসসাত্ম্যায জ্বরিতায জ্বরাপহান্||১৯১|| ঈষদম্লাননম্লান্ বা রসান্ কালে বিচক্ষণঃ| কুক্কুটাংশ্চ মযূরাংশ্চ তিত্তিরিক্রৌঞ্চবর্তকান্||১৯২|| গুরূষ্ণত্বান্ন শংসন্তি জ্বরে কেচিচ্চিকিত্সকাঃ| লঙ্ঘনেনানিলবলং জ্বরে যদ্যধিকং ভবেত্||১৯৩|| ভিষঙ্মাত্রাবিকল্পজ্ঞো দদ্যাত্তানপি কালবিত্|১৯৪|

Adhikarana 75 (194) · Śloka 195

ঘর্মাম্বু চানুপানার্থং তৃষিতায প্রদাপযেত্||১৯৪|| মদ্যং বা মদ্যসাত্ম্যায যথাদোষং যথাবলম্|১৯৫|

Adhikarana 76 (195-196) · Śloka 196

গুরূষ্ণস্নিগ্ধমধুরান্ কষাযাংশ্চ নবজ্বরে||১৯৫|| আহারান্ দোষপক্ত্যর্থং প্রাযশঃ পরিবর্জযেত্| অন্নপানক্রমঃ সিদ্ধো জ্বরঘ্নঃ সম্প্রকাশিতঃ||১৯৬||

Adhikarana 77 (197-199) · Śloka 200

অত ঊর্ধ্বং প্রবক্ষ্যন্তে কষাযা জ্বরনাশনাঃ| পাক্যং শীতকষাযং বা মুস্তপর্পটকং পিবেত্||১৯৭|| সনাগরং পর্পটকং পিবেদ্বা সদুরালভম্| কিরাততিক্তকং মুস্তং গুডূচীং বিশ্বভেষজম্||১৯৮|| পাঠামুশীরং সোদীচ্যং পিবেদ্বা জ্বরশান্তযে| জ্বরঘ্না দীপনাশ্চৈতে কষাযা দোষপাচনাঃ||১৯৯|| তৃষ্ণারুচিপ্রশমনা মুখবৈরস্যনাশনাঃ|২০০|

Adhikarana 78 (200-203) · Śloka 203

কলিঙ্গকাঃ পটোলস্য পত্রং কটুকরোহিণী||২০০|| পটোলঃ সারিবা মুস্তং পাঠা কটুকরোহিণী| নিম্বঃ পটোলস্ত্রিফলা মৃদ্বীকা মুস্তবত্সকৌ||১০১|| কিরাততিক্তমমৃতা চন্দনং বিশ্বভেষজম্| গুডূচ্যামলকং মুস্তমর্ধশ্লোকসমাপনাঃ||২০২|| কষাযাঃ শমযন্ত্যাশু পঞ্চ পঞ্চবিধাঞ্জ্বরান্| সন্ততং সততান্যেদ্যুস্তৃতীযকচতুর্থকান্||২০৩||

Adhikarana 79 (204-206) · Śloka 207

বত্সকারগ্বধৌ পাঠাং ষড্গ্রন্থাং কটুরোহিণীম্| মূর্বাং সাতিবিষাং নিম্বং পটোলং ধন্বযাসকম্||২০৪|| বচাং মুস্তমুশীরং চ মধুকং ত্রিফলাং বলাম্| পাক্যং শীতকষাযং বা পিবেজ্জ্বরহরং নরঃ||২০৫|| মধূকমুস্তমৃদ্বীকাকাশ্মর্যাণি পরূষকম্| ত্রাযমাণামুশীরং চ ত্রিফলাং কটুরোহিণীম্||২০৬|| পীত্বা নিশিস্থিতং জন্তুর্জ্বরাচ্ছীঘ্রং বিমুচ্যতে|২০৭|

Adhikarana 80 (207-209) · Śloka 209

জাত্যামলকমুস্তানি তদ্বদ্ধন্বযবাসকম্||২০৭|| বিবদ্ধদোষো জ্বরিতঃ কষাযং সগুডং পিবেত্| ত্রিফলাং ত্রাযমাণাং চ মৃদ্বীকাং কটুরোহিণীম্||২০৮|| পিত্তশ্লেষ্মহরস্ত্বেষ কষাযো হ্যানুলোমিকঃ| ত্রিবৃতাশর্করাযুক্তঃ পিত্তশ্লেষ্মজ্বরাপহঃ||২০৯||

Adhikarana 81 (210-214) · Śloka 214

বৃহত্যৌ বত্সকং মুস্তং দেবদারু মহৌষধম্| কোলবল্লী চ যোগোঽযং সন্নিপাতজ্বরাপহঃ||২১০|| শটী পুষ্করমূলং চ ব্যাঘ্রী শৃঙ্গী দুরালভা| গুডূচী নাগরং পাঠা কিরাতং কটুরোহিণী||২১১|| এষ শট্যাদিকো বর্গঃ সন্নিপাতজ্বরাপহঃ| কাসহৃদ্গ্রহপার্শ্বার্তিশ্বাসতন্দ্রাসু শস্যতে||২১২|| বৃহত্যৌ পৌষ্করং ভার্গী শটী শৃঙ্গী দুরালভা| বত্সকস্য চ বীজানি পটোলং কটুরোহিণী||২১৩|| বৃহত্যাদির্গণঃ প্রোক্তঃ সন্নিপাতজ্বরাপহঃ| কাসাদিষু চ সর্বেষু দদ্যাত্ সোপদ্রবেষু চ||২১৪||

Adhikarana 82 (215) · Śloka 215

কষাযাশ্চ যবাগ্বশ্চ পিপাসাজ্বরনাশনাঃ| নির্দিষ্টা ভেষজাধ্যাযে ভিষক্তানপি যোজযেত্||২১৫||

Adhikarana 83 (216-217) · Śloka 217

জ্বরাঃ কষাযৈর্বমনৈর্লঙ্ঘনৈর্লঘুভোজনৈঃ| রূক্ষস্য যে ন শাম্যন্তি সর্পিস্তেষাং ভিষগ্জিতম্||২১৬|| রূক্ষং তেজো জ্বরকরং তেজসা রূক্ষিতস্য চ| যঃ স্যাদনুবলো ধাতুঃ স্নেহবধ্যঃ স চানিলঃ||২১৭||

Adhikarana 84 (218) · Śloka 218

কষাযাঃ সর্ব এবৈতে সর্পিষা সহ যোজিতাঃ| প্রযোজ্যা জ্বরশান্ত্যর্থমগ্নিসন্ধুক্ষণাঃ শিবাঃ||২১৮||

Adhikarana 85 (219-221) · Śloka 221

পিপ্পল্যশ্চন্দনং মুস্তমুশীরং কটুরোহিণী| কলিঙ্গকাস্তামলকী সারিবাঽতিবিষা স্থিরা||২১৯|| দ্রাক্ষামলকবিল্বানি ত্রাযমাণা নিদিগ্ধিকা| সিদ্ধমিতৈর্ঘৃতং সদ্যো জীর্ণজ্বরমপোহতি||২২০|| ক্ষযং কাসং শিরঃশূলং পার্শ্বশূলং হলীমকম্| অংসাভিতাপমাগ্নিং চ বিষমং সন্নিযচ্ছতি||২২১||

Adhikarana 86 (222-223) · Śloka 223

বাসাং গুডূচীং ত্রিফলাং ত্রাযমাণাং যবাসকম্| পক্ত্বা তেন কষাযেণ পযসা দ্বিগুণেন চ||২২২|| পিপ্পলীমুস্তমৃদ্বীকাচন্দনোত্পলনাগরৈঃ| কল্কীকৃতৈশ্চ বিপচেদ্ধৃতং জীর্ণজ্বরাপহম্||২২৩||

Adhikarana 87 (224-226) · Śloka 226

বলাং শ্বদংষ্ট্রাং বৃহতীং কলসীং ধাবনীং স্থিরাম্| নিম্বং পর্পটকং মুস্তং ত্রাযমাণাং দুরালভাম্||২২৪|| কৃত্বা কষাযং পেষ্যার্থে দদ্যাত্তামলকীং শটীম্| দ্রাক্ষাং পুষ্করমূলং চ মেদামামলকানি চ||২২৫|| ঘৃতং পযশ্চ তত্ সিদ্ধং সর্পির্জ্বরহরং পরম্| ক্ষযকাসশিরঃশূলপার্শ্বশূলাংসতাপনুত্ ||২২৬||

Adhikarana 88 (227-233) · Śloka 233

জ্বরিভ্যো বহুদোষেভ্য ঊর্ধ্বং চাধশ্চ বুদ্ধিমান্| দদ্যাত্ সংশোধনং কালে কল্পে যদুপদেক্ষ্যতে||২২৭|| মদনং পিপ্পলীভির্বা কলিঙ্গৈর্মধুকেন বা| যুক্তমুষ্ণাম্বুনা পেযং বমনং জ্বরশান্তযে||২২৮|| ক্ষৌদ্রাম্বুনা রসেনেক্ষোরথবা লবণাম্বুনা| জ্বরে প্রচ্ছর্দনং শস্তং মদ্যৈর্বা তর্পণেন বা||২২৯|| মৃদ্বীকামলকানাং বা রসং প্রস্কন্দনং পিবেত্| রসমামলকানাং বা ঘৃতভৃষ্টং জ্বরাপহম্||২৩০|| লিহ্যাদ্বা ত্রৈবৃতং চূর্ণং সংযুক্তং মধুসর্পিষা| পিবেদ্বা ক্ষৌদ্রমাবাপ্য সঘৃতং ত্রিফলারসম্||২৩১|| আরগ্বধং বা পযসা মৃদ্বীকানাং রসেন বা| ত্রিবৃতাং ত্রাযমাণাং বা পযসা জ্বরিতঃ পিবেত্||২৩২|| জ্বরাদ্বিমুচ্যতে পীত্বা মৃদ্বীকাভিঃ সহাভযাম্| পযোঽনুপানমুষ্ণং বা পীত্বা দ্রাক্ষারসং নরঃ||২৩৩||

Adhikarana 89 (234-239) · Śloka 239

কাসাচ্ছ্বাসাচ্ছিরঃশূলাত্পার্শ্বশূলাচ্চিরজ্বরাত্| মুচ্যতে জ্বরিতঃ পীত্বা পঞ্চমূলীশৃতং পযঃ||২৩৪|| এরণ্ডমূলোত্ক্বথিতং জ্বরাত্ সপরিকর্তিকাত্| পযো বিমুচ্যতে পীত্বা তদ্বদ্বিল্বশলাটুভিঃ||২৩৫|| ত্রিকণ্টকবলাব্যাঘ্রীগুডনাগরসাধিতম্| বর্চোমূত্রবিবন্ধঘ্নং শোফজ্বরহরং পযঃ||২৩৬|| সনাগরং সমৃদ্বীকং সঘৃতক্ষৌদ্রশর্করম্| শৃতং পযঃ সখর্জূরং পিপাসাজ্বরনাশনম্||২৩৭|| চতুর্গুণেনাম্ভসা বা শৃতং জ্বরহরং পযঃ| ধারোষ্ণং বা পযঃ সদ্যো বাতপিত্তজ্বরং জযেত্||২৩৮|| জীর্ণজ্বরাণাং সর্বেষাং পযঃ প্রশমনং পরম্| পেযং তদুষ্ণং শীতং বা যথাস্বং ভেষজৈঃ শৃতম্||২৩৯||

Adhikarana 90 (240-249) · Śloka 249

প্রযোজযেজ্জ্বরহরান্নিরূহান্ সানুবাসনান্| পক্বাশযগতে দোষে বক্ষ্যন্তে যে চ সিদ্ধিষু||২৪০|| পটোলারিষ্টপত্রাণি সোশীরশ্চতুরঙ্গুলঃ| হ্রীবেরং রোহিণী তিক্তা শ্বদংষ্ট্রা মদনানি চ||২৪১|| স্থিরা বলা চ তত্ সর্বং পযস্যর্ধোদকে শৃতম্| ক্ষীরাবশেষং নির্যূহং সংযুক্তং মধুসর্পিষা||২৪২|| কল্কৈর্মদনমুস্তানাং পিপ্পল্যা মধুকস্য চ| বত্সকস্য চ সংযুক্তং বস্তিং দদ্যাজ্জ্বরাপহম্||২৪৩|| শুদ্ধে মার্গে হৃতে দোষে বিপ্রসন্নেষু ধাতুষু| গতাঙ্গশূলো লঘ্বঙ্গঃ সদ্যো ভবতি বিজ্বরঃ||২৪৪|| আরগ্বধমুশীরং চ মদনস্য ফলং তথা| চতস্রঃ পর্ণিনীশ্চৈব নির্যূহমুপকল্পযেত্||২৪৫|| প্রিযঙ্গুর্মদনং মুস্তং শতাহ্বা মধুযষ্টিকা| কল্কঃ সর্পির্গুডঃ ক্ষৌদ্রং জ্বরঘ্নো বস্তিরুত্তমঃ||২৪৬|| গুডূচীং ত্রাযমাণাং চ চন্দনং মধুকং বৃষম্| স্থিরাং বলাং পৃশ্নিপর্ণীং মদনং চেতি সাধযেত্||২৪৭|| রসং জাঙ্গলমাংসস্য রসেন সহিতং ভিষক্| পিপ্পলীফলমুস্তানাং কল্কেন মধুকস্য চ||২৪৮|| ঈষত্সলবণং যুক্ত্যা নিরূহং মধুসর্পিষা| জ্বরপ্রশমনং দদ্যাদ্বলস্বেদরুচিপ্রদম্||২৪৯||

Adhikarana 91 (250-253) · Śloka 253

জীবন্তীং মধুকং মেদাং পিপ্পলীং মদনং বচাম্| ঋদ্ধিং রাস্নাং বলাং বিশ্বং শতপুষ্পাং শতাবরীম্||২৫০|| পিষ্ট্বা ক্ষীরং জলং সর্পিস্তৈলং চ বিপচেদ্ভিষক্| আনুবাসনিকং স্নেহমেতং বিদ্যাজ্জ্বরাপহম্||২৫১|| পটোলপিচুমর্দাভ্যাং গুডূচ্যা মধুকেন চ| মদনৈশ্চ শৃতঃ স্নেহো জ্বরঘ্নমনুবাসনম্||২৫২|| চন্দনাগুরুকাশ্মর্যপটোলমধুকোত্পলৈঃ| সিদ্ধঃ স্নেহো জ্বরহরঃ স্নেহবস্তিঃ প্রশস্যতে||২৫৩||

Adhikarana 92 (254-255) · Śloka 255

যদুক্তং ভেষজাধ্যাযে বিমানে রোগভেষজে| শিরোবিরেচনং কুর্যাদ্যুক্তিজ্ঞস্তজ্জ্বরাপহম্||২৫৪|| যচ্চ নাবনিকং তৈলং যাশ্চ তৈলং যাশ্চ প্রাগ্ধূমবর্তযঃ| মাত্রাশিতীযে নির্দিষ্টাঃ প্রযোজ্যাস্তা জ্বরেষ্বপি||২৫৫||

Adhikarana 93 (256) · Śloka 256

অভ্যঙ্গাংশ্চ প্রদেহাংশ্চ পরিষেকাংশ্চ কারযেত্| যথাভিলাষং শীতোষ্ণং বিভজ্য দ্বিবিধং জ্বরম্||২৫৬||

Adhikarana 94 (257) · Śloka 257

সহস্রধৌতং সর্পির্বা তৈলং বা চন্দনাদিকম্| দাহজ্বরপ্রশমনং দদ্যাদভ্যঞ্জনং ভিষক্||২৫৭||

Adhikarana 95 (258-259) · Śloka 259

অথ চন্দনাদ্যং তৈলমুপদেক্ষ্যামঃ- চন্দনভদ্রশ্রীকালানুসার্যকালীযকপদ্মাপদ্মকোশীরসারিবামধুকপ্রপৌণ্ডরীকনাগপুষ্পোদীচ্যবন্যপদ্মোত্পলনলিনকুমুদ- সৌগন্ধিকপুণ্ডরীকশতপত্রবিসমৃণালশালূকশৈবালকশেরুকানন্তাকুশকাশেক্ষুদর্ভশরনলশালিমূলজম্বুবেতসবানীরগুন্দ্রা- ককুভাসনাশ্বকর্ণস্যন্দনবাতপোথশালতালধবতিনিশখদিরকদরকদম্বকাশ্মর্যফলসর্জপ্লক্ষবটকপীতনোদুম্বরাশ্বত্থ- ন্যগ্রোধধাতকীদূর্বেত্কটশৃঙ্গাটকমঞ্জিষ্ঠাজ্যোতিষ্মতীপুষ্করবীজক্রৌঞ্চাদনবদরীকোবিদারকদলী- সংবর্তকারিষ্টশতপর্বাশীতকুম্ভিকাশতাবরীশ্রীপর্ণীশ্রাবণীমহাশ্রাবণীরোহিণীশীতপাক্যোদনপাকীকালবলাপযস্যাবিদারী- জীবকর্ষভকমেদামহামেদামধুরসর্ষ্যপ্রোক্তাতৃণশূন্যমোচরসাটরূষকবকুলকুটজপটোলনিম্বশাল্মলীনারিকেল- খর্জূরমৃদ্বীকাপ্রিযালপ্রিযঙ্গুধন্বনাত্মাগুপ্তামধূকানামন্যেষাং চ শীতবীর্যাণাং যথালাভমৌষধানাং কষাযং কারযেত্| তেন কষাযেণ দ্বিগুণিতপযসা তেষামেব চ কল্কেন কষাযার্ধমাত্রং মৃদ্বগ্নিনা সাধযেত্তৈলম্| এতত্তৈলমভ্যঙ্গাত্ সদ্যো দাহজ্বরমপনযতি| এতৈরেব চৌষধৈরশ্লক্ষ্ণপিষ্টৈঃ সুশীতৈঃ প্রদেহং কারযেত্| এতৈরেব চ শৃতশীতং সলিলমবগাহপরিষেকার্থং প্রযুঞ্জীত||২৫৮|| ইতি চন্দনাদ্যং তৈলম্| মধ্বারনালক্ষীরদধিঘৃতসলিলসেকাবগাহাশ্চ সদ্যো দাহজ্বরমপনযন্তি শীতস্পর্শত্বাত্||২৫৯||

Adhikarana 96 (260-266) · Śloka 266

ভবন্তি চাত্র- পৌষ্করেষু সুশীতেষু পদ্মোত্পলদলেষু চ| কদলীনাং চ পত্রেষু ক্ষৌমেষু বিমলেষু চ||২৬০|| চন্দনোদকশীতেষু শীতে ধারাগৃহেঽপি বা| হিমাম্বুসিক্তে সদনে দাহার্তঃ সংবিশেত্ সুখম্||২৬১|| হেমশঙ্খপ্রবালানাং মণীনাং মৌক্তিকস্য চ| চন্দনোদকশীতানাং সংস্পর্শানুরসান্ স্পৃশেত্||২৬২|| স্রগ্ভির্নীলোত্পলৈঃ পদ্মৈর্ব্যজনৈর্বিবিধৈরপি| শীতবাতাবহৈর্ব্যজ্জ্যেচ্চন্দনোদকবর্ষিভিঃ ||২৬৩|| নদ্যস্তডাগাঃ পদ্মিন্যো হ্রদাশ্চ বিমলোদকাঃ| অবগাহে হিতা দাহতৃষ্ণাগ্লানিজ্বরাপহাঃ||২৬৪|| প্রিযাঃ প্রদক্ষিণাচারাঃ প্রমদাশ্চন্দনোক্ষিতাঃ| সান্ত্বযেযুঃ পরৈঃ কামৈর্মণিমৌক্তিকভূষণাঃ||২৬৫|| শীতানি চান্নপানানি শীতান্যুপবনানি চ| বাযবশ্চন্দ্রপাদাশ্চ শীতা দাহজ্বরাপহাঃ||২৬৬||

Adhikarana 97 (267) · Śloka 267

অথোষ্ণাভিপ্রাযিণাং জ্বরিতানামভ্যঙ্গাদীনুপক্রমানুপদেক্ষ্যামঃ- অগুরুকুষ্ঠতগরপত্রনলদশৈলেযধ্যামকহরেণুকাস্থৌণেযকক্ষেমকৈলাবরাঙ্গদলপুরতমালপত্রভূতীকরোহিষসরলশল্লকী- দেবদার্বগ্নিমন্থবিল্বস্যোনাককাশ্মর্যপাটলাপুনর্নবাবৃশ্চীরকণ্টকারীবৃহতীশালপর্ণীপৃশ্নিপর্ণীমাষপর্ণীমুদ্গপর্ণীগোক্ষুরকৈরণ্ড- শোভাঞ্জনকবরুণার্কচিরবিল্বতিল্বকশটীপুষ্করমূলগণ্ডীরোরুবূকপত্তূরাক্ষীবাশ্মান্তকশিগ্রুমাতুলুঙ্গপীলুকমূলকপর্ণী- তিলপর্ণীপীলুপর্ণীমেষশৃঙ্গীহিংস্রাদন্তশঠৈরাবতকভল্লাতকাস্ফোতকাণ্ডীরাত্মজৈকেষীকাকরঞ্জধান্যকাজমোদ- পৃথ্বীকাসুমুখসুরসকুঠেরককালমালকপর্ণাসক্ষবকফণিজ্ঝকভূস্তৃণশৃঙ্গবেরপিপ্পলীসর্ষপাশ্বগন্ধারাস্নারুহারোহাবচাবলাতিবলা- গুডূচীশতপুষ্পাশীতবল্লীনাকুলীগন্ধনাকুলীশ্বেতাজ্যোতিষ্মতীচিত্রকাধ্যণ্ডাম্লচাঙ্গেরী- তিলবদরকুলত্থমাষাণামেবংবিধানামন্যেষাং চোষ্ণবীর্যাণাং যথালাভমৌষধানাং কষাযং কারযেত্, তেন কষাযেণ তেষামেব চ কল্কেন সুরাসৌবীরকতুষোদকমৈরেযমেদকদধিমণ্ডারনালকট্বরপ্রতিবিনীতেন তৈলপাত্রং বিপাচযেত্| তেন সুখোষ্ণেন তৈলেনোষ্ণাভিপ্রাযিণং জ্বরিতমভ্যঞ্জ্যাত্, তথা শীতজ্বরঃ প্রশাম্যতি; এতৈরেব চৌষধৈঃ শ্লক্ষ্ণপিষ্টৈঃ সুখোষ্ণৈঃ প্রদেহং কারযেত্, এতৈরেব চ শৃতং সুখোষ্ণং সলিলমবগাহনার্থং পরিষেকার্থং চ প্রযুঞ্জীত শীতজ্বরপ্রশমার্থম্||২৬৭|| ইত্যগুর্বাদ্যং তৈলম্|

Adhikarana 98 (268-271) · Śloka 271

ভবন্তি চাত্র- ত্রযোদশবিধঃ স্বেদঃ স্বেদাধ্যাযে নিদর্শিতঃ| মাত্রাকালবিদা যুক্তঃ স চ শীতজ্বরাপহঃ||২৬৮|| সা কুটী তচ্চ শযনং তচ্চাবচ্ছাদনং জ্বরম্| শীতং প্রশমযন্ত্যাশু ধূপাশ্চাগুরুজা ঘনাঃ||২৬৯|| চারূপচিতগাত্র্যশ্চ তরুণ্যো যৌবনোষ্মণা| আশ্লেষাচ্ছমযন্ত্যাশু প্রমদাঃ শিশিরজ্বরম্||২৭০|| স্বেদনান্যন্নপানানি বাতশ্লেষ্মহরাণি চ| শীতজ্বরং জযন্ত্যাশু সংসর্গবলযোজনাত্||২৭১||

Adhikarana 99 (272-282) · Śloka 283

বাতজে শ্রমজে চৈব পুরাণে ক্ষতজে জ্বরে| লঙ্ঘনং ন হিতং বিদ্যাচ্ছমনৈস্তানুপাচরেত্||২৭২|| বিক্ষিপ্যামাশযোষ্মাণং যস্মাদ্গত্বা রসং নৃণাম্| জ্বরং কুর্বন্তি দোষাস্তু হীযতেঽগ্নিবলং ততঃ||২৭৩|| যথা প্রজ্বলিতো বহ্নিঃ স্থাল্যামিন্ধনবানপি| ন পচত্যোদনং সম্যগনিলপ্রেরিতো বহিঃ||২৭৪|| পক্তিস্থানাত্তথা দোষৈরূষ্মা ক্ষিপ্তো বহির্নৃণাম্| ন পচত্যভ্যবহৃতং কৃচ্ছ্রাত্ পচতি বা লঘু||২৭৫|| অতোঽগ্নিবলরক্ষার্থং লঙ্ঘনাদিক্রমো হিতঃ| সপ্তাহেন হি পচ্যন্তে সপ্তধাতুগতা মলাঃ||২৭৬|| নিরামশ্চাপ্যতঃ প্রোক্তো জ্বরঃ প্রাযোঽষ্টমেঽহনি| উদীর্ণদোষস্ত্বল্পাগ্নিরশ্নন্ গুরু বিশেষতঃ||২৭৭|| মুচ্যতে সহসা প্রাণৈশ্চিরং ক্লিশ্যতি বা নরঃ| এতস্মাত্কারণাদ্বিদ্বান্ বাতিকেঽপ্যাদিতো জ্বরে||২৭৮|| নাতি গুর্বতি বা স্নিগ্ধং ভোজযেত্ সহসা নরম্| জ্বরে মারুতজে ত্বাদাবনপেক্ষ্যাপি হি ক্রমম্||২৭৯|| কুর্যান্নিরনুবন্ধানামভ্যঙ্গাদীনুপক্রমান্| পাযযিত্বা কষাযং চ ভোজযেদ্রসভোজনম্||২৮০|| জীর্ণজ্বরহরং কুর্যাত্ সর্বশশ্চাপ্যুপক্রমম্| শ্লেষ্মলানামবাতানাং জ্বরোঽনুষ্ণঃ কফাধিকঃ||২৮১|| পরিপাকং ন সপ্তাহেনাপি যাতি মৃদূষ্মণাম্| তং ক্রমেণ যথোক্তেন লঙ্ঘনাল্পাশনাদিনা||২৮২|| আদশাহমুপক্রম্য কষাযাদ্যৈরুপাচরেত্|২৮৩|

Adhikarana 100 (283) · Śloka 284

সামা যে যে চ কফজাঃ কফপিত্তজ্বরাশ্চ যে||২৮৩|| লঙ্ঘনং লঙ্ঘনীযোক্তং তেষু কার্যং প্রতি প্রতি|২৮৪|

Adhikarana 101 (284) · Śloka 285

বমনৈশ্চ বিরেকৈশ্চ বস্তিভিশ্চ যথাক্রমম্||২৮৪|| জ্বরানুপচরেদ্ধীমান্ কফপিত্তানিলোদ্ভবান্|২৮৫|

Adhikarana 102 (285-286) · Śloka 287

সংসৃষ্টান্ সন্নিপতিতান্ বুদ্ধ্বা তরতমৈঃ সমৈঃ||২৮৫|| জ্বরান্ দোষক্রমাপেক্ষী যথোক্তৈরৌষধৈর্জযেত্| বর্ধনেনৈকদোষস্য ক্ষপণেনোচ্ছ্রিতস্য বা||২৮৬|| কফস্থানানুপূর্ব্যা বা সন্নিপাতজ্বরং জযেত্|২৮৭|

Adhikarana 103 (287-288) · Śloka 289

সন্নিপাতজ্বরস্যান্তে কর্ণমূলে সুদারূণঃ||২৮৭|| শোথঃ সঞ্জাযতে তেন কশ্চিদেব প্রমুচ্যতে| রক্তাবসেচনৈঃ শীঘ্রং সর্পিষ্পানৈশ্চ তং জযেত্||২৮৮|| প্রদেহৈঃ কফপিত্তঘ্নৈর্নাবনৈঃ কবলগ্রহৈঃ|২৮৯|

Adhikarana 104 (289) · Śloka 290

শীতোষ্ণস্নিগ্ধরূক্ষাদ্যৈর্জ্বরো যস্য ন শাম্যতি||২৮৯|| শাখানুসারী রক্তস্য সোঽবসেকাত্ প্রশাম্যতি|২৯০|

Adhikarana 105 (290) · Śloka 291

বিসর্পেণাভিঘাতেন যশ্চ বিস্ফোটকৈর্জ্বরঃ||২৯০|| তত্রাদৌ সর্পিষঃ পানং কফপিত্তোত্তরো ন চেত্|২৯১|

Adhikarana 106 (291) · Śloka 292

দৌর্বল্যাদ্দেহধাতূনাং জ্বরো জীর্ণোঽনুবর্ততে||২৯১|| বল্যেঃ সম্বৃংহণৈস্তস্মাদাহারৈস্তমুপাচরেত্|২৯২|

Adhikarana 107 (292-295) · Śloka 296

কর্ম সাধারণং জহ্যাত্তৃতীযকচতুর্থকৌ ||২৯২|| আগন্তুরনুবন্ধো হি প্রাযশো বিষমজ্বরে| বাতপ্রধানং সর্পির্ভির্বস্তিভিঃ সানুবাসনৈঃ||২৯৩|| স্নিগ্ধোষ্ণৈরন্নপানৈশ্চ শমযেদ্বিষমজ্বরম্| বিরেচনেন পযসা সর্পিষা সংস্কৃতেন চ||২৯৪|| বিষমং তিক্তশীতৈশ্চ জ্বরং পিত্তোত্তরং জযেত্| বমনং পাচনং রূক্ষমন্নপানং বিলঙ্ঘনম্||২৯৫|| কষাযোষ্ণং চ বিষমে জ্বরে শস্তং কফোত্তরে|২৯৬|

Adhikarana 108 (296-309) · Śloka 310

যোগাঃ পরাঃ প্রবক্ষ্যন্তে বিষমজ্বরনাশনাঃ||২৯৬|| প্রযোক্তব্যা মতিমতা দোষাদীন্ প্রবিভজ্য তে| সুরা সমণ্ডা পানার্থে ভক্ষ্যার্থে চরণাযুধঃ||২৯৭|| তিত্তিরিশ্চ মযূরশ্চ প্রযোজ্যা বিষমজ্বরে| পিবেদ্বা ষট্পলং সর্পিরভযাং বা প্রযোজযেত্||২৯৮|| ত্রিফলাযাঃ কষাযং বা গুডূচ্যা রসমেব বা| নীলিনীমজগন্ধাং চ ত্রিবৃতাং কটুরোহিণীম্||২৯৯|| পিবেজ্জ্বরাগমে যুক্ত্যা স্নেহস্বেদোপপাদিতঃ| সর্পিষো মহতীং মাত্রাং পীত্বা বা ছর্দযেত্ পুনঃ||৩০০|| উপযুজ্যান্নপানং বা প্রভূতং পুনরুল্লিখেত্| সান্নং মদ্যং প্রভূতং বা পীত্বা স্বপ্যাজ্জ্বরাগমে||৩০১|| আস্থাপনং যাপনং বা কারযেদ্বিষমজ্বরে| পযসা বৃষদংশস্য শকৃদ্বা তদহঃ পিবেত্||৩০২|| বৃষস্য দধিমণ্ডেন সুরযা বা সসৈন্ধবম্| পিপ্পল্যাস্ত্রিফলাযাশ্চ দধ্নস্তক্রস্য সর্পিষঃ||৩০৩|| পঞ্চগব্যস্য পযসঃ প্রযোগো বিষমজ্বরে| রসোনস্য সতৈলস্য প্রাগ্ভক্তমুপসেবনম্||৩০৪|| মেদ্যানামুষ্ণবীর্যাণামামিষাণাং চ ভক্ষণম্| হিঙ্গুতুল্যা তু বৈযাঘ্রী বসা নস্যং সসৈন্ধবা||৩০৫|| পুরাণসর্পিঃ সিংহস্য বসা তদ্বত্ সসৈন্ধবা| সৈন্ধবং পিপ্পলীনাং চ তণ্ডুলাঃ সমনঃশিলাঃ||৩০৬|| নেত্রাঞ্জনং তৈলপিষ্টং শস্যতে বিষমজ্বরে| পলঙ্কষা নিম্বপত্রং বচা কুষ্ঠং হরীতকী||৩০৭|| সর্ষপাঃ সযবাঃ সর্পির্ধূপনং জ্বরনাশনম্| যে ধূমা ধূপনং যচ্চ নাবনং চাঞ্জনং চ যত্||৩০৮|| মনোবিকারে নির্দিষ্টং কার্যং তদ্বিষমজ্বরে| মণীনামোষধীনাং চ মঙ্গল্যানাং বিষস্য চ||৩০৯|| ধারণাদগদানাং চ সেবনান্ন ভবেজ্জ্বরঃ|৩১০|

Adhikarana 109 (309-316) · Śloka 317

সোমং সানুচরং দেবং সমাতৃগণমীশ্বরম্||৩১০|| পূজযন্ প্রযতঃ শীঘ্রং মুচ্যতে বিষমজ্বরাত্| বিষ্ণুং সহস্রমূর্ধানং চরাচরপতিং বিভুম্||৩১১|| স্তুবন্নামসহস্রেণ জ্বরান্ সর্বানপোহতি| ব্রহ্মাণমশ্বিনাবিন্দ্রং হুতভক্ষং হিমাচলম্||৩১২|| গঙ্গাং মরুদ্গণাংশ্চেষ্ট্যা পূজযঞ্জযতি জ্বরান্| ভক্ত্যা মাতুঃ পিতুশ্চৈব গুরূণাং পূজনেন চ||৩১৩|| ব্রহ্মচর্যেণ তপসা সত্যেন নিযমেন চ| জপহোমপ্রদানেন বেদানাং শ্রবণেন চ||৩১৪|| জ্বরাদ্বিমুচ্যতে শীঘ্রং সাধূনাং দর্শনেন চ| জ্বরে রসস্থে বমনমুপবাসং চ কারযেত্||৩১৫|| সেকপ্রদেহৌ রক্তস্থে তথা সংশমনানি চ| বিরেচনং সোপবাসং মাংসমেদঃস্থিতে হিতম্||৩১৬|| অস্থিমজ্জগতে দেযা নিরূহাঃ সানুবাসনাঃ|৩১৭|

Adhikarana 110 (317-322) · Śloka 323

শাপাভিচারাদ্ভূতানামভিষঙ্গাচ্চ যো জ্বরঃ||৩১৭|| দৈবব্যপাশ্রযং তত্র সর্বমৌষধমিষ্যতে| অভিঘাতজ্বরো নশ্যেত্ পানাভ্যঙ্গেন সর্পিষঃ||৩১৮|| রক্তাবসেকৈর্মদ্যৈশ্চ সাত্ম্যৈর্মাংসরসৌদনৈঃ| সানাহো মদ্যসাত্ম্যানাং মদিরারসভোজনৈঃ||৩১৯|| ক্ষতানাং ব্রণিতানাং চ ক্ষতব্রণচিকিত্সযা| আশ্বাসেনেষ্টলাভেন বাযোঃ প্রশমনেন চ||৩২০|| হর্ষণৈশ্চ শমং যান্তি কামশোকভযজ্বরাঃ| কাম্যৈরর্থৈর্মনোজ্ঞৈশ্চ পিত্তঘ্নৈশ্চাপ্যুপক্রমৈঃ||৩২১|| সদ্বাক্যৈশ্চ শমং যাতি জ্বরঃ ক্রোধসমুত্থিতঃ| কামাত্ ক্রোধজ্বরো নাশং ক্রোধাত্ কামসমুদ্ভবঃ||৩২২|| যাতি তাভ্যামুভাভ্যাং চ ভযশোকসমুত্থিতঃ|৩২৩|

Adhikarana 111 (323) · Śloka 324

জ্বরস্য বেগং কালং চ চিন্তযঞ্জ্বর্যতে তু যঃ||৩২৩|| তস্যেষ্টৈস্তু বিচিত্রৈশ্চ বিষযৈর্নাশযেত্ স্মৃতিম্|৩২৪|

Adhikarana 112 (324-328) · Śloka 328

জ্বরপ্রমোক্ষে পুরুষঃ কূজন্ বমতি চেষ্টতে| শ্বসন্বিবর্ণঃ স্বিন্নাঙ্গো বেপতে লীযতে মুহুঃ||৩২৪|| প্রলপত্যুষ্ণসর্বাঙ্গঃ শীতাঙ্গশ্চ ভবত্যপি| বিসঞ্জ্ঞো জ্বরবেগার্তঃ সক্রোধ ইব বীক্ষ্যতে ||৩২৫|| সদোষশব্দং চ শকৃদ্দ্রবং স্রবতি বেগবত্| লিঙ্গান্যেতানি জানীযাজ্জ্বরমোক্ষে বিচক্ষণঃ||৩২৬|| বহুদোষস্য বলবান্ প্রাযেণাভিনবো জ্বরঃ| সত্ক্রিযাদোষপক্ত্যা চেদ্বিমুঞ্চতি সুদারুণম্||৩২৭|| কৃত্বা দোষবশাদ্বেগং ক্রমাদুপরমন্তি যে| তেষামদারুণো মোক্ষো জ্বরাণাং চিরকারিণাম্||৩২৮||

Adhikarana 113 (329) · Śloka 329

বিগতক্লমসন্তাপমব্যথং বিমলেন্দ্রিযম্| যুক্তং প্রকৃতিসত্ত্বেন বিদ্যাত্ পুরুষমজ্বরম্||৩২৯||

Adhikarana 114 (330-332) · Śloka 332

সজ্বরো জ্বরমুক্তশ্চ বিদাহীনি গুরূণি চ| অসাত্ম্যান্যন্নপানানি বিরুদ্ধানি চ বর্জযেত্||৩৩০|| ব্যবাযমতিচেষ্টাশ্চ স্নানমত্যশনানি চ| তথা জ্বরঃ শমং যাতি প্রশান্তো জাযতে ন চ||৩৩১|| ব্যাযামং চ ব্যবাযং চ স্নানং চঙ্ক্রমণানি চ| জ্বরমুক্তো ন সেবেত যাবন্ন বলবান্ ভবেত্||৩৩২||

Adhikarana 115 (333-343) · Śloka 343

অসঞ্জাতবলো যস্তু জ্বরমুক্তো নিষেবতে| বর্জ্যমেতন্নরস্তস্য পুনরাবর্ততে জ্বরঃ||৩৩৩|| দুর্হৃতেষু চ দোষেষু যস্য বা বিনিবর্ততে| স্বল্পেনপ্যপচারেণ তস্য ব্যাবর্ততে পুনঃ||৩৩৪|| চিরকালপরিক্লিষ্টং দুর্বলং হীনতেজসম্ | অচিরেণৈব কালেন স হন্তি পুনরাগতঃ||৩৩৫|| অথবাঽপি পরীপাকং ধাতুষ্বেব ক্রমান্মলাঃ| যান্তি জ্বরমকুর্বন্তস্তে তথাঽপ্যপকুর্বতে||৩৩৬|| দীনতাং শ্বযথুং গ্লানিং পাণ্ডুতাং নান্নকামতাম্| কণ্ডূরুক্তোঠপিডকাঃ কুর্বন্ত্যগ্নিং চ তে মৃদুম্||৩৩৭|| এবমন্যেঽপি চ গদা ব্যাবর্তন্তে পুনর্গতাঃ| অনির্ঘাতেন দোষাণামল্পৈরপ্যহিতৈর্নৃণাম্||৩৩৮|| নির্বৃত্তেঽপি জ্বরে তস্মাদ্যথাবস্থং যথাবলম্| যথাপ্রাণং হরেদ্দোষং প্রযোগৈর্বা শমং নযেত্||৩৩৯|| মৃদুভিঃ শোধনৈঃ শুদ্ধির্যাপনা বস্তযো হিতাঃ| হিতাশ্চ লঘবো যূষা জাঙ্গলামিষজা রসাঃ||৩৪০|| অভ্যঙ্গোদ্বর্তনস্নানধূপনান্যঞ্জনানি চ| হিতানি পুনরাবৃত্তে জ্বরে তিক্তঘৃতানি চ||৩৪১|| গুর্ব্যভিষ্যন্দ্যসাত্ম্যানাং ভোজনাত্ পুনরাগতে| লঙ্ঘনোষ্ণোপচারাদিঃ ক্রমঃ কার্যশ্চ পূর্ববত্||৩৪২|| কিরাততিক্তকং তিক্তা মুস্তং পর্পটকোঽমৃতা| ঘ্নন্তি পীতানি চাভ্যাসাত্ পুনরাবর্তকং জ্বরম্||৩৪৩||

Adhikarana 116 (344) · Śloka 344

তস্যাং তস্যামবস্থাযাং জ্বরিতানাং বিচক্ষণঃ| জ্বরাক্রিযাক্রমাপেক্ষী কুর্যাত্তত্তচ্চিকিত্সিতম্||৩৪৪||

Adhikarana 117 (345) · Śloka 345

রোগরাট্ সর্বভূতানামন্তকৃদ্দারুণো জ্বরঃ| তস্মাদ্বিশেষতস্তস্য যতেত প্রশমে ভিষক্||৩৪৫||

Adhikarana 118 (346) · Śloka 346

তত্র শ্লোকঃ- যথাক্রমং যথাপ্রশ্নমুক্তং জ্বরচিকিত্সিতম্| আত্রেযেণাগ্নিবেশায ভূতানাং হিতকাম্যযা||৩৪৬||

Adhikarana puShpikA · Śloka 3

ইত্যগ্নিবেশকৃতে তন্ত্রে চরকপ্রতিসংস্কৃতে চিকিত্সিতস্থানে জ্বরচিকিত্সিতং নাম তৃতীযোঽধ্যাযঃ||৩||