7. navēgāndhāraṇīyō'dhyāyaḥ

Adhikarana 1 (1-2) · Śloka 2

অথাতো নবেগান্ধারণীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

Adhikarana 2 (3-4) · Śloka 4

ন বেগান্ ধারযেদ্ধীমাঞ্জাতান্ মূত্রপুরীষযোঃ| ন রেতসো ন বাতস্য ন ছর্দ্যাঃ ক্ষবথোর্ন চ||৩|| নোদ্গারস্য ন জৃম্ভাযা ন বেগান্ ক্ষুত্পিপাসযোঃ| ন বাষ্পস্য ন নিদ্রাযা নিঃশ্বাসস্য শ্রমেণ চ||৪||

Adhikarana 3 (5-25) · Śloka 25

এতান্ ধারযতো জাতান্ বেগান্ রোগা ভবন্তি যে| পৃথক্পৃথক্চিকিত্সার্থং তান্মে নিগদতঃ শৃণু||৫|| বস্তিমেহনযোঃ শূলং মূত্রকৃচ্ছ্রং শিরোরুজা | বিনামো বঙ্ক্ষণানাহঃ স্যাল্লিঙ্গং মূত্রনিগ্রহে||৬|| স্বেদাবগাহনাভ্যঙ্গান্ সর্পিষশ্চাবপীডকম্ | মূত্রে প্রতিহতে কুর্যাত্ত্রিবিধং বস্তিকর্ম চ||৭|| পক্বাশযশিরঃশূলং বাতবর্চোঽপ্রবর্তনম্ | পিণ্ডিকোদ্বেষ্টনাধ্মানং পুরীষে স্যাদ্বিধারিতে||৮|| স্বেদাভ্যঙ্গাবগাহাশ্চ বর্তযো বস্তিকর্ম চ| হিতং প্রতিহতে বর্চস্যন্নপানং প্রমাথি চ||৯|| মেঢ্রে বৃষণযোঃ শূলমঙ্গমর্দো হৃদি ব্যথা| ভবেত্ প্রতিহতে শুক্রে বিবদ্ধং মূত্রমেব চ||১০|| তত্রাভ্যঙ্গোঽবগাহশ্চ মদিরা চরণাযুধাঃ| শালিঃ পযো নিরূহশ্চ শস্তং মৈথুনমেব চ||১১|| সঙ্গো বিণ্মূত্রবাতানামাধ্মানং বেদনা ক্লমঃ| জঠরে বাতজাশ্চান্যে রোগাঃ স্যুর্বাতনিগ্রহাত্||১২|| স্নেহস্বেদবিধিস্তত্র বর্তযো ভোজনানি চ| পানানি বস্তযশ্চৈব শস্তং বাতানুলোমনম্||১৩|| কণ্ডূকোঠারুচিব্যঙ্গশোথপাণ্ড্বামযজ্বরাঃ| কুষ্ঠহৃল্লাসবীসর্পাশ্ছর্দিনিগ্রহজা গদাঃ||১৪|| ভুক্ত্বা প্রচ্ছর্দনং ধূমো লঙ্ঘনং রক্তমোক্ষণম্| রূক্ষান্নপানং ব্যাযামো বিরেকশ্চাত্র শস্যতে||১৫|| মন্যাস্তম্ভঃ শিরঃশূলমর্দিতার্ধাবভেদকৌ| ইন্দ্রিযাণাং চ দৌর্বল্যং ক্ষবথোঃ স্যাদ্বিধারণাত্||১৬|| তত্রোর্ধ্বজত্রুকেঽভ্যঙ্গঃ স্বেদো ধূমঃ সনাবনঃ| হিতং বাতঘ্নমাদ্যং চ ঘৃতং চৌত্তরভক্তিকম্||১৭|| হিক্কা শ্বাসোঽরুচিঃ কম্পো বিবন্ধো হৃদযোরসোঃ| উদ্গারনিগ্রহাত্তত্র হিক্কাযাস্তুল্যমৌষধম্||১৮|| বিনামাক্ষেপসঙ্কোচাঃ সুপ্তিঃ কম্পঃ প্রবেপনম্| জৃম্ভাযা নিগ্রহাত্তত্র সর্বং বাতঘ্নমৌষধম্||১৯|| কার্শ্যদৌর্বল্যবৈবর্ণ্যমঙ্গমর্দোঽরুচির্ভ্রমঃ| ক্ষুদ্বেগনিগ্রহাত্তত্র স্নিগ্ধোষ্ণং লঘু ভোজনম্||২০|| কণ্ঠাস্যশোষো বাধির্যং শ্রমঃ সাদো হৃদি ব্যথা| পিপাসানিগ্রহাত্তত্র শীতং তর্পণমিষ্যতে||২১|| প্রতিশ্যাযোঽক্ষিরোগশ্চ হৃদ্রোগশ্চারুচির্ভ্রমঃ| বাষ্পনিগ্রহণাত্তত্র স্বপ্নো মদ্যং প্রিযাঃ কথাঃ||২২|| জৃম্ভাঽঙ্গমর্দস্তন্দ্রা চ শিরোরোগোঽক্ষিগৌরবম্| নিদ্রাবিধারণাত্তত্র স্বপ্নঃ সংবাহনানি চ||২৩|| গুল্মহৃদ্রোগসম্মোহাঃ শ্রমনিঃশ্বাসধারণাত্| জাযন্তে তত্র বিশ্রামো বাতঘ্ন্যশ্চ ক্রিযা হিতাঃ||২৪|| বেগনিগ্রহজা রোগা য এতে পরিকীর্তিতাঃ| ইচ্ছংস্তেষামনুত্পত্তিং বেগানেতান্ন ধারযেত্||২৫||

Adhikarana 4 (26) · Śloka 26

ইমাংস্তু ধারযেদ্বেগান্ হিতার্থী প্রেত্য চেহ চ| সাহসানামশস্তানাং মনোবাক্কাযকর্মণাম্||২৬||

Adhikarana 5 (27) · Śloka 27

লোভশোকভযক্রোধমানবেগান্ বিধারযেত্| নৈর্লজ্জ্যের্ষ্যাতিরাগাণামভিধ্যাযাশ্চ বুদ্ধিমান্||২৭||

Adhikarana 6 (28) · Śloka 28

পরুষস্যাতিমাত্রস্য সূচকস্যানৃতস্য চ| বাক্যস্যাকালযুক্তস্য ধারযেদ্বেগমুত্থিতম্||২৮||

Adhikarana 7 (29) · Śloka 29

দেহপ্রবৃত্তির্যা কাচিদ্বিদ্যতে পরপীডযা| স্ত্রীভোগস্তেযহিংসাদ্যা তস্যাবেগান্বিধারযেত্||২৯||

Adhikarana 8 (30) · Śloka 30

পুণ্যশব্দো বিপাপত্বান্মনোবাক্কাযকর্মণাম্| ধর্মার্থকামান্ পুরুষঃ সুখী ভুঙ্ক্তে চিনোতি চ||৩০||

Adhikarana 9 (31) · Śloka 31

শরীরচেষ্টা যা চেষ্টা স্থৈর্যার্থা বলবর্ধিনী| দেহব্যাযামসঙ্খ্যাতা মাত্রযা তাং সমাচরেত্||৩১||

Adhikarana 10 (32-33) · Śloka 1

লাঘবং কর্মসামর্থ্যং স্থৈর্যং দুঃখসহিষ্ণুতা | দোষক্ষযোঽগ্নিবৃদ্ধিশ্চ ব্যাযামাদুপজাযতে||৩২|| শ্রমঃ ক্লমঃ ক্ষযস্তৃষ্ণা রক্তপিত্তং প্রতামকঃ| অতিব্যাযামতঃ কাসো জ্বরশ্ছর্দিশ্চ জাযতে||৩৩|| (স্বেদাগমঃ শ্বাসবৃদ্ধির্গাত্রাণাং লাঘবং তথা| হৃদযাদ্যুপরোধশ্চ ইতি ব্যাযামলক্ষণম্||১||)|

Adhikarana 11 (34) · Śloka 34

ব্যাযামহাস্যভাষ্যাধ্বগ্রাম্যধর্মপ্রজাগরান্| নোচিতানপি সেবেত বুদ্ধিমানতিমাত্রযা||৩৪||

Adhikarana 12 (35) · Śloka 2

এতানেবংবিধাংশ্চান্যান্ যোঽতিমাত্রং নিষেবতে| গজং সিংহ ইবাকর্ষন্ সহসা স বিনশ্যতি||৩৫|| (অতিব্যবাযভারাধ্বকর্মভিশ্চাতিকর্শিতাঃ | ক্রোধশোকভযাযাসৈঃ ক্রান্তা যে চাপি মানবাঃ||১|| বালবৃদ্ধপ্রবাতাশ্চ যে চোচ্চৈর্বহুভাষকাঃ| তে বর্জযেযুর্ব্যাযামং ক্ষুধিতাস্তৃষিতাশ্চ যে||২||)|

Adhikarana 13 (36-37) · Śloka 37

উচিতাদহিতাদ্ধীমান্ ক্রমশো বিরমেন্নরঃ| হিতং ক্রমেণ সেবেত ক্রমশ্চাত্রোপদিশ্যতে||৩৬|| প্রক্ষেপাপচযে তাভ্যাং ক্রমঃ পাদাংশিকো ভবেত্| একান্তরং ততশ্চোর্ধ্বং দ্ব্যন্তরং ত্র্যন্তরং তথা||৩৭||

Adhikarana 14 (38) · Śloka 38

ক্রমেণাপচিতা দোষাঃ ক্রমেণোপচিতা গুণাঃ| সন্তো যান্ত্যপুনর্ভাবমপ্রকম্প্যা ভবন্তি চ||৩৮||

Adhikarana 15 (39-40) · Śloka 40

সমপিত্তানিলকফাঃ কেচিদ্গর্ভাদি মানবাঃ| দৃশ্যন্তে বাতলাঃ কেচিত্পিত্তলাঃ শ্লেষ্মলাস্তথা||৩৯|| তেষামনাতুরাঃ পূর্বে বাতলাদ্যাঃ সদাতুরাঃ| দোষানুশযিতা হ্যেষাং দেহপ্রকৃতিরুচ্যতে||৪০||

Adhikarana 16 (41) · Śloka 41

বিপরীতগুণস্তেষাং স্বস্থবৃত্তের্বিধির্হিতঃ| সমসর্বরসং সাত্ম্যং সমধাতোঃ প্রশস্যতে||৪১||

Adhikarana 17 (42-43) · Śloka 43

দ্বে অধঃ সপ্ত শিরসি খানি স্বেদমুখানি চ| মলাযনানি বাধ্যন্তে দুষ্টৈর্মাত্রাধিকৈর্মলৈঃ||৪২|| মলবৃদ্ধিং গুরুতযা লাঘবান্মলসঙ্ক্ষযম্| মলাযনানাং বুধ্যেত সঙ্গোত্সর্গাদতীব চ||৪৩||

Adhikarana 18 (44) · Śloka 44

তান্ দোষলিঙ্গৈরাদিশ্য ব্যাধীন্ সাধ্যানুপাচরেত্| ব্যাধিহেতুপ্রতিদ্বন্দ্বৈর্মাত্রাকালৌ বিচারযন্||৪৪||

Adhikarana 19 (45-50) · Śloka 50

বিষমস্বস্থবৃত্তানামেতে রোগাস্তথাঽপরে| জাযন্তেঽনাতুরস্তস্মাত্ স্বস্থবৃত্তপরো ভবেত্||৪৫|| মাধবপ্রথমে মাসি নভস্যপ্রথমে পুনঃ| সহস্যপ্রথমে চৈব হারযেদ্দোষসঞ্চযম্||৪৬|| স্নিগ্ধস্বিন্নশরীরাণামূর্ধ্বং চাধশ্চ নিত্যশঃ| বস্তিকর্ম ততঃ কুর্যান্নস্যকর্ম চ বুদ্ধিমান্||৪৭|| যথাক্রমং যথাযোগ্যমত ঊর্ধ্বং প্রযোজযেত্| রসাযনানি সিদ্ধানি বৃষ্যযোগাংশ্চ কালবিত্||৪৮|| রোগাস্তথা ন জাযন্তে প্রকৃতিস্থেষু ধাতুষু| ধাতবশ্চাভিবর্ধন্তে জরা মান্দ্যমুপৈতি চ||৪৯|| বিধিরেষ বিকারাণামনুত্পত্তৌ নিদর্শিতঃ| নিজানামিতরেষাং তু পৃথগেবোপদেক্ষ্যতে||৫০||

Adhikarana 20 (51-52) · Śloka 52

যে ভূতবিষবায্বগ্নিসম্প্রহারাদিসম্ভবাঃ| নৃণামাগন্তবো রোগাঃ প্রজ্ঞা তেষ্বপরাধ্যতি||৫১|| ঈর্ষ্যাশোকভযক্রোধমানদ্বেষাদযশ্চ যে| মনোবিকারাস্তেঽপ্যুক্তাঃ সর্বে প্রজ্ঞাপরাধজাঃ||৫২||

Adhikarana 21 (53-54) · Śloka 54

ত্যাগঃ প্রজ্ঞাপরাধানামিন্দ্রিযোপশমঃ স্মৃতিঃ| দেশকালাত্মবিজ্ঞানং সদ্বৃত্তস্যানুবর্তনম্||৫৩|| আগন্তূনামনুত্পত্তাবেষ মার্গো নিদর্শিতঃ| প্রাজ্ঞঃ প্রাগেব তত্ কুর্যাদ্ধিতং বিদ্যাদ্যদাত্মনঃ||৫৪||

Adhikarana 22 (55) · Śloka 55

আপ্তোপদেশপ্রজ্ঞানং প্রতিপত্তিশ্চ কারণম্| বিকারাণামনুত্পত্তাবুত্পন্নানাং চ শান্তযে||৫৫||

Adhikarana 23 (56-59) · Śloka 59

পাপবৃত্তবচঃসত্ত্বাঃ সূচকাঃ কলহপ্রিযাঃ| মর্মোপহাসিনো লুব্ধাঃ পরবৃদ্ধিদ্বিষঃ শঠাঃ||৫৬|| পরাপবাদরতযশ্চপলা রিপুসেবিনঃ| নির্ঘৃণাস্ত্যক্তধর্মাণঃ পরিবর্জ্যা নরাধমাঃ||৫৭|| বুদ্ধিবিদ্যাবযঃশীলধৈর্যস্মৃতিসমাধিভিঃ| বৃদ্ধোপসেবিনো বৃদ্ধাঃ স্বভাবজ্ঞা গতব্যথাঃ||৫৮|| সুমুখাঃ সর্বভূতানাং প্রশান্তাঃ শংসিতব্রতাঃ| সেব্যাঃ সন্মার্গবক্তারঃ পুণ্যশ্রবণদর্শনাঃ||৫৯||

Adhikarana 24 (60) · Śloka 60

আহারাচারচেষ্টাসু সুখার্থী প্রেত্য চেহ চ| পরং প্রযত্নমাতিষ্ঠেদ্বুদ্ধিমান্ হিতসেবনে||৬০||

Adhikarana 25 (61-62) · Śloka 62

ন নক্তং দধি ভুঞ্জীত ন চাপ্যঘৃতশর্করম্| নামুদ্গযূষং নাক্ষৌদ্রং নোষ্ণং নামলকৈর্বিনা ||৬১|| জ্বরাসৃক্পিত্তবীসর্পকুষ্ঠপাণ্ড্বামযভ্রমান্| প্রাপ্নুযাত্কামলাং চোগ্রাং বিধিং হিত্বা দধিপ্রিযঃ||৬২||

Adhikarana 26 (63-66) · Śloka 66

তত্র শ্লোকাঃ- বেগা বেগসমুত্থাশ্চ রোগাস্তেষাং চ ভেষজম্| যেষাং বেগা বিধার্যাশ্চ যদর্থং যদ্ধিতাহিতম্||৬৩|| উচিতে চাহিতে বর্জ্যে সেব্যে চানুচিতে ক্রমঃ| যথাপ্রকৃতি চাহারো মলাযনগদৌষধম্||৬৪|| ভবিষ্যতামনুত্পত্তৌ রোগাণামৌষধং চ যত্| বর্জ্যাঃ সেব্যাশ্চ পুরুষা ধীমতাঽঽত্মসুখার্থিনা||৬৫|| বিধিনা দধি সেব্যং চ যেন যস্মাত্তদত্রিজঃ| নবেগান্ধারণেঽধ্যাযে সর্বমেবাবদন্মুনিঃ||৬৬||

Adhikarana puShpikA · Śloka 7

ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে নবেগান্ধারণীযো নাম সপ্তমোঽধ্যাযঃ||৭||